གཉིས་པ་གསོ་བ་རིག་པ།

🚧 This website is under continued development. We appreciate your patience!

Previous Text Back to Volume PageNext Text

Wylie title	gnyis pa gso ba rig pa
Location	mkhyen brtse'i bka' 'bum Volume 17, sde tshan 1, Text 11, Pages 84-86 (Folios 42b1 to 43b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. gnyis pa gso ba rig pa. In 'jam dbyangs mkhyen brtse'i dbang po'i bka' 'bum, Vol. 17: 84-86. Khams sde dge rdzong sar dgon: Rdzong sar blo gros phun tshogs, 2020.
Genre	Medicine Texts - gso ba rig pa

1 Texts in this Section (sde tshan or chos tshan)

11 84-86	གཉིས་པ་གསོ་བ་རིག་པ། gnyis pa gso ba rig pa Medicine Texts - gso ba rig pa	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

གཉིས་པ་དོན་གཉེར་བྱེ་བྲག་པ་རྣམ་འགྱུར་གྱི་གདུང་བས་ཉེན་པའི་ལུས་ཅན་ཐམས་ཅད་རྗེས་སུ་འཛིན་པ་གསོ་བ་རིག་པ་ལ། ངོ་བོ་ནི་ཤེས་པར་བྱ་བའི་གནས་གང་ཞིག །མི་ན་བར་གནས་པ་དང་། ན་བ་གསོ་བར་བྱེད་པའི་ཐབས་ཡན་ལག་དང་བཅས་པ། ངེས་ཚིག་ནི། ཙི་ཀིཏྶ་བིདྱ་ཞེས་པའི་སྒྲ་ལས་དྲངས་ན་ཁམས་སམ་འདུ་བ་མི་སྙོམ་པ་རྣམས་སྙོམ་པར་བྱེད་པའི་རིག་གནས་ཡིན་པས་དེ་གསོ་བ་རིག་པ་ཞེས་བྱ། དབྱེ་ན། ཇི་སྐད་དུ། ལུས་དང་བྱིས་པ་གདོན་མོ་ནད། །མཚོན་དང་དུག་དང་རྒས་རོ་ཙ། །གསོ་དཔྱད་གང་ལ་གནས་གྱུར་པ། །ཡན་ལག་བརྒྱད་ཅེས་དེ་ལ་བརྗོད། །ཅེས་པའམ། ཡང་ན་བརྗོད་པར་བྱ་བའི་དོན་ཐམས་ཅད་གནས་རྣམ་པ་བཞིར་འདུས་ཏེ། བཤད་པའི་རྒྱུད་ལས། ཚེ་རིང་ཆོས་ནོར་བདེ་བ་བསྒྲུབ་པའི་ཕྱིར། །གསོ་བ་རིག་པའི་དོན་རྣམས་མདོར་བསྡུ་ན། །གསོ་བྱ་གསོ་བྱེད་ཇི་ལྟར་གསོ་བ་དང་། །གསོ་བ་པོ་དང་རྣམ་པ་བཞི་རུ་བཤད། །ཅེས་གསུངས་པའི། དང་པོ་ནི་གསོ་བར་བྱ་བའི་ཡུལ་གང་ལས་བྱུང་བའི་ལུས་ཆགས་གནས་འཇིག་པའི་གནས་སྐབས་ལ་སོགས་པ་དང་། གང་གསོ་བར་བྱ་བ་དེ་ལས་བྱུང་བའི་ནང་རྒྱུ་རྐྱེན་ཞུགས་ཚུལ་མཚན་ཉིད་ལ་སོགས་པའི་སྒོ་ནས་སྟོན་པ་དང་། གཉིས་པ། དེ་ཉིད་གསོ་བར་བྱེད་པའི་གཉེན་པོ་སྤྱོད་ལམ་དང་། ཟས་དང་། སྨན་དང་། དཔྱད་ཀྱི་གནས་རྣམས་སྟོན། གསུམ་པ་ནི། མི་ན་རིང་དུ་གནས་པར་བྱ་བ་དང་། གལ་ཏེ་རྣམ་པར་གྱུར་པ་ན་བརྟག་ཚུལ་གསུམ་གྱིས་བརྟག་སྟེ་གསོ་ཚུལ་སྤྱི་དང་བྱེ་བྲག་གི་སྒོ་ནས་གསོ་བའི་ཐབས། བཞི་པ། དེ་ལྟར་གསོ་བར་བྱེད་པ་ལ་ཉེ་བར་སྦྱོར་བའི་སྨན་པའི་མཚན་ཉིད་རྒྱུ་དང་། ངོ་བོ། ངེས་ཚིག །དབྱེ་བ། ལས་འབྲས་བུ་སྟེ་རྣམ་པ་དྲུག་གི་སྒོ་ནས་ལེགས་པར་གཏན་ལ་འབེབས་པའི་ཚུལ་རྣམས་ཁོང་དུ་ཆུད་པར་བྱ་བའོ། །དེ་ལྟ་བུའི་གསོ་བ་རིག་པའི་བརྗོད་བྱ་སྟོན་པའི་གཞུང་ནི་བདག་ཅག་གི་སྟོན་པས་ཀྱང་ཐེག་པ་ཆེ་ཆུང་སྣ་ཚོགས་སུ་ཐོར་བུ་ཐོར་བུར་བཀའ་སྩལ་པ་དང་། ཕྱི་རོལ་པའི་འདོད་པ་ལྟར་ན་ཚངས་པས་ཚེའི་རིག་བྱེད་འབུམ་པ་སོགས་དྲན་ནས་བཤད་པར་འདོད་པ་སོགས་དང་། རྒྱ་གར་འཕགས་པའི་ཡུལ་དུ་འཕགས་པ་ཀླུས་སྦྱོར་བ་བརྒྱ་པ། སློབ་དཔོན་དཔའ་བོས་ཡན་ལག་བརྒྱད་པའི་སྐོར། ཁ་ཆེ་ཟླ་བ་མངོན་དགས་དེའི་འགྲེལ་པ་སོགས་བསྟན་བཅོས་མཐའ་ཡས་ཤིང་། བོད་དུ་ཁྲི་སྲོང་གི་དུས་སུ་བླ་སྨན་མཁས་པ་མི་དགུ་ལ་སོགས་པས་མཛད་པའི་གཞུང་དང་མན་ངག་སྣ་ཚོགས་པ་དང་། བསྟན་པ་ཕྱི་དར་ལོ་ཆེན་རིན་ཆེན་བཟང་པོས་བརྒྱད་པ་རྩ་འགྲེལ་སོགས་སྨན་གྱི་བསྟན་བཅོས་མང་དུ་བསྒྱུར་པ་སོགས་ལས་རིམ་པར་དར་ཞིང་། ཁྱད་པར་སྨན་པའི་རྒྱལ་པོ་མིའི་ཤ་ཚུགས་ལ་བརྟེན་པ་གཡུ་ཐོག་ཡོན་ཏན་མགོན་པོས་དཔལ་ལྡན་རྒྱུད་བཞི་ལ་སོགས་པ་སྤེལ་ནས་གསོ་དཔྱད་ཀྱི་བསྟན་པ་ཉིན་མོ་ལྟར་གསལ་བར་མཛད་པའི་མཐུ་ལས། ཕྱིས་སུའང་བྱང་པ་རྣམ་རྒྱལ་གྲགས་བཟང་དང་། ཟུར་མཁར་བ་མཉམ་ཉིད་རྡོ་རྗེ་ཁུ་དབོན་སོགས་ཆེས་མཁས་ཤིང་རྣམ་དཔྱོད་ཀྱི་མཐུ་ཕུལ་དུ་བྱུང་བ་མང་པོ་ཞིག་བྱོན་པས་དེང་སང་བར་དུའང་ཉམས་པ་མེད་པར་གནས་པ་འདི་ལགས་སོ། །

[edit]

gnyis pa gso ba rig pa/ gnyis pa don gnyer bye brag pa rnam 'gyur gyi gdung bas nyen pa'i lus can thams cad rjes su 'dzin pa gso ba rig pa la/__ngo bo ni shes par bya ba'i gnas gang zhig__/mi na bar gnas pa dang /__na ba gso bar byed pa'i thabs yan lag dang bcas pa/__nges tshig ni/__tsi kit+sa bid+ya zhes pa'i sgra las drangs na khams sam 'du ba mi snyom pa rnams snyom par byed pa'i rig gnas yin pas de gso ba rig pa zhes bya/__dbye na/__ji skad du/__lus dang byis pa gdon mo nad/__/mtshon dang dug dang rgas ro tsa/__/gso dpyad gang la gnas gyur pa/__/yan lag brgyad ces de la brjod/__/ces pa'am/__yang na brjod par bya ba'i don thams cad gnas rnam pa bzhir 'dus te/__bshad pa'i rgyud las/__tshe ring chos nor bde ba bsgrub pa'i phyir/__/gso ba rig pa'i don rnams mdor bsdu na/__/gso bya gso byed ji ltar gso ba dang /__/gso ba po dang rnam pa bzhi ru bshad/__/ces gsungs pa'i/__dang po ni gso bar bya ba'i yul gang las byung ba'i lus chags gnas 'jig pa'i gnas skabs la sogs pa dang /__gang gso bar bya ba de las byung ba'i nang rgyu rkyen zhugs tshul mtshan nyid la sogs pa'i sgo nas ston pa dang /__gnyis pa/__de nyid gso bar byed pa'i gnyen po spyod lam dang /__zas dang /__sman dang /__dpyad kyi gnas rnams ston/__gsum pa ni/__mi na ring du gnas par bya ba dang /__gal te rnam par gyur pa na brtag tshul gsum gyis brtag ste gso tshul spyi dang bye brag gi sgo nas gso ba'i thabs/__bzhi pa/__de ltar gso bar byed pa la nye bar sbyor ba'i sman pa'i mtshan nyid rgyu dang /__ngo bo/__nges tshig__/dbye ba/__las 'bras bu ste rnam pa drug gi sgo nas legs par gtan la 'bebs pa'i tshul rnams khong du chud par bya ba'o/__/de lta bu'i gso ba rig pa'i brjod bya ston pa'i gzhung ni bdag cag gi ston pas kyang theg pa che chung sna tshogs su thor bu thor bur bka' stsal pa dang /__phyi rol pa'i 'dod pa ltar na tshangs pas tshe'i rig byed 'bum pa sogs dran nas bshad par 'dod pa sogs dang /__rgya gar 'phags pa'i yul du 'phags pa klus sbyor ba brgya pa/__slob dpon dpa' bos yan lag brgyad pa'i skor/__kha che zla ba mngon dgas de'i 'grel pa sogs bstan bcos mtha' yas shing /__bod du khri srong gi dus su bla sman mkhas pa mi dgu la sogs pas mdzad pa'i gzhung dang man ngag sna tshogs pa dang /__bstan pa phyi dar lo chen rin chen bzang pos brgyad pa rtsa 'grel sogs sman gyi bstan bcos mang du bsgyur pa sogs las rim par dar zhing /__khyad par sman pa'i rgyal po mi'i sha tshugs la brten pa g.yu thog yon tan mgon pos dpal ldan rgyud bzhi la sogs pa spel nas gso dpyad kyi bstan pa nyin mo ltar gsal bar mdzad pa'i mthu las/__phyis su'ang byang pa rnam rgyal grags bzang dang /_zur mkhar ba mnyam nyid rdo rje khu dbon sogs ches mkhas shing rnam dpyod kyi mthu phul du byung ba mang po zhig byon pas deng sang bar du'ang nyams pa med par gnas pa 'di lags so/__/