JKW-KABUM-15-BA-034

Previous Section Back to Volume PageNext Section

བླ་མ་དྲག་པོ་རྟ་ཁྱུང་འབར་བའི་བྱིན་རླབས་དབང་བསྐུར་གྱི་མཚམས་སྦྱོར་དངོས་གྲུབ་འདོད་འཇོ།

Wylie title	bla ma drag po rta khyung 'bar ba'i byin rlabs dbang bskur gyi mtshams sbyor dngos grub 'dod 'jo
Location	mkhyen brtse'i bka' 'bum Volume 15, sde tshan 34, Pages 609-621 (Folios 1a to 7a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇིགས་མེད་གླིང་པ་ ('jigs med gling pa)
Source Author(s)	འཇིགས་མེད་འཕྲིན་ལས་འོད་ཟེར་ (Dodrupchen, 1st)
Citation	'jam dbyangs mkhyen brtse'i dbang po. bla ma drag po rta khyung 'bar ba'i byin rlabs dbang bskur gyi mtshams sbyor dngos grub 'dod 'jo. In 'jam dbyangs mkhyen brtse'i dbang po'i bka' 'bum, Vol. 15: 609-621. Khams sde dge rdzong sar dgon: Rdzong sar blo gros phun tshogs, 2020.
Genre	Empowerment Ritual - dbang chog - dbang skur
Cycle	བླ་མ་དྲག་པོ་རྟ་ཁྱུང་འབར་བ་ (bla ma drag po rta khyung 'bar ba)
Parent Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Colophon	རྒྱས་པར་གྲུབ་ཆེན་རིན་པོ་ཆེ་འཇིགས་མེད་ཕྲིན་ལས་འོད་ཟེར་གྱི་ཆོག་སྒྲིགས་ལྟར་རྟོགས་པར་བྱ་བ་ཁོ་ནའོ། །སརྦ་དཱ་ཀ་ལྱཱ་ནཾ་བྷ་བ་ཏུ།།
	rgyas par grub chen rin po che 'jigs med phrin las 'od zer gyi chog sgrigs ltar rtogs par bya ba kho na'o/__/sarba dA ka l+yA naM b+ha ba tu/

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །བླ་མ་དྲག་པོ་རྟ་ཁྱུང་འབར་བའི་བྱིན་རླབས་དབང་བསྐུར་གྱི་མཚམས་སྦྱོར་དངོས་གྲུབ་འདོད་འཇོ་ཞེས་བྱ་བ་བཞུགས་སོ། །

ན་མོ་གུ་རུ་བཛྲ་ཀྲོ་དྷཱ་ཡ། འདིར་བླ་མ་དྲག་པོ་རྟ་ཁྱུང་འབར་བའི་དཀྱིལ་འཁོར་དུ་སློབ་མ་རྗེས་སུ་གཟུང་བར་འདོད་པས། སྟེགས་ཀྱི་ཁར་འབྲུ་ཚོམ་ལྔ་བཀོད་པའི་དབུས་སུ་དཔལ་གཏོར་ཙཀླིས་བརྒྱན་པ། དེའི་གཡས་གཡོན་དུ་སྨན་རག །མདུན་དུ་ཉེར་སྤྱོད་དང་སྔོན་གཏོར། ཉེ་ལོགས་ཅི་བདེ་བར་ལས་བུམ་སོགས་དགོས་པའི་ཡོ་བྱད་རྣམས་ལེགས་པར་བཤམ། བརྒྱུད་འདེབས་སྔོན་དུ་འགྲོ་བས་ལས་གཞུང་བསྲངས་ཏེ་བདག་མདུན་དབྱེར་མེད་ཀྱི་རིམ་པ་གསལ་བཏབ་ལ། བཟླས་པ་ཅི་ནུས་དང་། ལས་བུམ་དུ་ཁྲོ་བོ་རྟ་མགྲིན་དམར་པོ་གཡས་དབྱུག་ཏོ་དང་གཡོན་མེའི་ཞགས་པ་ཐོགས་པར་གསལ་བར་གྱུར་པར་བསམས་ལ། ཨོཾ་བཛྲ་ཀྲོ་དྷ་ཧ་ཡ་གྲཱྀ་ཝ་ཧུ་ལུ་ཧུ་ལུ་ཧཱུྃ་ཕཊ༔ ཅེས་ཅི་ནུས་བཟླས་མཐར། མཆོད་ཅིང་བསྟོད། ཧཱུྃ། ཞེས་བརྗོད་པ་ལས་ཀྱི་ཁྲོ་བོ་དབང་གི་བྱ་བ་མ་གྲུབ་བར་དུ་བཞུགས་པར་བསམ། ཆོས་སྲུང་གི་གཏོར་བསྔོ་དང་། ཚོགས་ལྷག་མའི་བར་གྲུབ་ནས་རིག་པའི་མེ་ཏོག་དོར་ནས་སློབ་དཔོན་བདག་ཉིད་འཇུག་པ་ནི། ཨོཾ་བཛྲ་ས་མ་ཡ་ཨོཾ། ཨཱཿབཛྲ་ས་མ་ཡ་ཨཱཿ ཧཱུྃ་བཛྲ་ས་མ་ཡ་ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཨོཾ། ཡེ་ཤེས་རྒྱལ་པོ་སྐུ་གསུང་ཐུགས། ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོར་བདག་སྦྱོར་ཅིག །ཨོཾ་བཛྲ་ས་མ་ཡ་ཧཱུྃ། ཨོཾ་བཛྲ་ས་མ་ཡ་སྟྭཾ། ཨོཾ་བཛྲ་ས་མ་ཡ་ཧོ། ཞེས་ཏིང་ངེ་འཛིན་གྱི་འཇུག་པ་སྔོན་དུ་འགྲོ་བས། སློབ་མ་འཇུག་པར་གསོལ་བ་གདབ་པ་ནི། ཨོཾ། རྡོ་རྗེའི་ཡེ་ཤེས་མཐོང་བྱེད་པའི། །དེ་བཞིན་གཤེགས་པ་ཐམས་ཅད་ཀྱི། །སྙིང་པོའི་དཀྱིལ་འཁོར་ཆེན་པོ་འདིར། །བདག་གི་སློབ་མ་འཇུག་པར་འཚལ། །ཞེས་གསོལ་བས་གནང་བ་བྱིན་པར་བསམ་ལ། དེ་ནས་སློབ་མ་རྣམས་གྲལ་ལ་འཁོད་པར། ལས་བུམ་ཐོགས་ཏེ། ཇི་ལྟར་བལྟམས་པ་སོགས་བརྗོད། ཨོཾ་བཛྲ་ཀྲོ་དྷ་ཧ་ཡ་སོགས་དང་ཡི་གེ་བརྒྱ་པ་བཟླ་བཞིན་དུ་ཁྲུས་བྱ། བགེགས་གཏོར། ཨོཾ་ཀྲོ་དྷ་སོགས་ཀྱིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་བགེགས་ཀྱི་གཏོར་མ་འདོད་ཡོན་གྱི་དངོས་པོ་ཟད་མི་ཤེས་པར་གྱུར། ཨོཾ་ཨཱཿཧཱུྃ་ཧོས་བརླབ། ཨོཾ་སརྦ་བྷུ་ཏ་ཨཱ་ཀཪྵཱ་ཡ་ཛཿས་མགྲོན་དགུག །ཨོཾ་སརྦ་བིགྷན་ན་མསྶ་རྦ་ཏ་ཐཱ་ག་ཏེ་སོགས་ལན་གསུམ་གྱིས་བསྔོས་ལ། ཧྲཱིཿ སྣོད་བཅུད་སྤྲུལ་པའི་དཀྱིལ་འཁོར་འདིར༔ སོགས་ཀྱི་མཐར། ཨོཾ་བཛྲ་ཀྲོ་དྷ་སོགས་ནས་ཨོཾ་སུམྦྷ་ནི་སོགས་བརྗོད་ཅིང་བསྐྲད། ཧྲཱིཿ སྣང་སྲིད་དག་པ་རབ་འབྱམས་ལ༔ སོགས་ཀྱི་མཐར། བྷྲཱུྃ་བཛྲ་ཀྲོ་དྷ་རཀྵ་རཀྵ་ཧཱུྃ༔ ཞེས་བརྗོད་པས་ཕྱོགས་མཚམས་ཐམས་ཅད་རྡོ་རྗེའི་ས་གཞི་རྭ་བ་དྲ་བ་གུར་བླ་བྲེ་ཡེ་ཤེས་ཀྱི་མེ་དཔུང་རབ་ཏུ་འབར་བའི་སྲུང་བའི་འཁོར་ལོ་ཅིས་ཀྱང་མི་ཆོད་མི་ཤིགས་པར་གྱུར་པའི་མོས་པ་མཛོད། དེ་ལྟར་ཁྲུས་བྱས། བགེགས་ཕྲལ། སྲུང་འཁོར་བསྒོམ་པ་རྣམས་སྔོན་དུ་སོང་ནས། སླར་ཡང་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་སྨིན་བྱེད་ཀྱི་དབང་བསྐུར་ཟབ་མོ་གསན་ལ་དོན་ཚུལ་བཞིན་དུ་ཉམས་སུ་བླང་བར་བགྱིའོ། །སྙམ་པ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་གསལ་བཏབ་སྟེ་གསན་འཚལ། དེ་ལ་འདིར་གསན་པར་བྱ་བའི་ཆོས་ནི། འཇམ་དཔལ་དབྱངས་དངོས་མངའ་བདག་ཚངས་པ་ལྷའི་མེ་ཏོག་གི་ཡེ་ཤེས་སྒྱུ་འཕྲུལ་དྲྭ་བའི་རོལ་གར། ལྔ་བརྒྱ་པ་རྣམས་ཀྱི་གཙུག་གི་ནོར་བུ་ཐམས་ཅད་མཁྱེན་ཅིང་གཟིགས་པ་ཆེན་པོ་རིག་འཛིན་འཇིགས་མེད་གླིང་པ་ཞེས་མཚན་ཉི་ཟླ་ལྟར་ཡོངས་སུ་གྲགས་པ་འདི་ཉིད་ལ། དུས་གསུམ་མཁྱེན་པ་དཔལ་ཨོ་རྒྱན་གྱི་སློབ་དཔོན་ཆེན་པོ་པདྨ་སཾ་བྷ་བས་ཞལ་མངོན་སུམ་དུ་བསྟན་ནས་ལེགས་པར་སྩལ་བའི་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྐོར་ལས་བྱུང་བའི་བླ་མ་དྲག་པོ་རྟ་ཁྱུང་འབར་བ་གཉེན་པོ་གསུམ་ལྡན་གྱི་དཀྱིལ་འཁོར་དུ་དབང་བསྐུར་ཟབ་མོ་འབུལ་བའི་སྐབས་སུ་བབ་པ་ཡིན། དེ་ལ་སྔོན་འགྲོ་སློབ་དཔོན་གྱིས་བགྱི་བར་འོས་པའི་ཆོས་རྣམས་གྲུབ་ནས། དངོས་གཞི་སློབ་མ་རྣམས་ཀྱི་ངོ་སྐལ་དུ་གྱུར་པ་ལའང་། མཎྜལ་འབུལ་ཞིང་གསོལ་བ་འདེབས་པ་སོགས་སྔོན་དུ་འགྲོ་དགོས་པས་ཐོག་མར་བླ་མ་དང་ཡི་དམ་པདྨ་དྲག་པོ་ཐ་མི་དད་པའི་སྤྱན་སྔར་བྱིན་རླབས་དབང་བསྐུར་གྱི་རིམ་པ་ཟབ་མོ་ཞུ་བའི་ཡོན་དུ་མཎྜལ་ཞིག་ཕུལ་མཛོད། ཅེས་བརྡ་སྦྱར་ལ་མཎྜལ་དབུལ། དེ་ལྟར་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་མཛོད། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། །སླར་ཡང་རྒྱུད་དག་པར་བྱ་བའི་སླད་དུ་མདུན་གྱི་ནམ་མཁར་བླ་མ་དང་གཉིས་སུ་མེད་པའི་དྲག་པོ་རྟ་ཁྱུང་འབར་བ་ལ་རྩ་གསུམ་རྒྱ་མཚོའི་ཚོགས་ཀྱིས་བསྐོར་བ་མངོན་སུམ་ལྟ་བུར་བཞུགས་པའི་སྤྱན་སྔར་རྒྱུན་བཤགས་སྔོན་དུ་འགྲོ་བ་ཅན་གྱིས་བྱང་ཆུབ་མཆོག་ཏུ་སེམས་བསྐྱེད་སྙམ་པས་འདིའི་རྗེས་ཟློས་ལན་གསུམ་མཛོད། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅན་སོ་སོར་བཤགས། །འགྲོ་བའི་དགེ་ལ་རྗེས་ཡི་རངས། །སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་པས་རྒྱུད་དག་པར་བྱས་པ་ལ་ཡེ་ཤེས་དབབ་པའི་སླད་དུ་དམིགས་པ་འདི་བཞིན་དུ་མཛོད། ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ། ཁྱེད་རང་རྣམས་ཀྱི་ཕུང་པོ་ཁམས་དང་སྐྱེ་མཆེད་ཀྱིས་མཚོན་པའི་མ་དག་པའི་སྣང་བ་ཐམས་ཅད་རྣམ་པར་ཐར་པའི་སྒོ་གསུམ་དང་དབྱེར་མེད་པའི་སྟོང་པ་ཉིད་དུ་གྱུར། སྟོང་པའི་ངང་ལས་དམིགས་མེད་སྙིང་རྗེ་ཆེན་པོའི་རྣམ་རོལ་ཕྱི་སྣོད་ཀྱི་འཇིག་རྟེན་འོག་མིན་པདྨ་འོད་ཀྱི་གཞལ་ཡས་ཁང་དུར་ཁྲོད་རོལ་པའི་ཕོ་བྲང་ཆེན་པོར་གསལ་བའི་དབུས་སུ། པདྨ་ཉི་ཟླ་དུག་སྦྲུལ་བཅུ་གཉིས་བསྣོལ་བའི་གདན་གྱི་སྟེང་དུ་ཤེས་རིག་གི་ངོ་བོ་ཡི་གེ་ཧྲཱིཿདམར་པོ་ཡོངས་སུ་གྱུར་པ་ལས། སྐད་ཅིག་གིས་ཡི་དམ་པདྨ་ཧེ་རུ་ཀའི་སྐུར་གྱུར་པ་ནི། འཇིགས་བྱེད་རྡོ་རྗེ་གྲོ་བོ་ལོད༔ ཅེས་པ་ནས། ཡང་དག་ཐོད་ཁྲག་འཛིན༔ ཞེས་པའི་བར་གཞུང་ལྟར་ལ། དེ་ལྟར་དུ་གསལ་བའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་གྱི་ཚོགས་བསམ་མི་ཁྱབ་པ་འཕྲོས་པས་རང་བཞིན་གྱི་གནས་ནས་རྔ་ཡབ་དཔལ་རི་སྤྲུལ་པའི་ཞིང་ཁམས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་བླ་མ་དྲག་པོ་རྟ་ཁྱུང་འབར་བའི་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པར་ཁ་ཆར་བུ་ཡུག་འཚུབས་པ་བཞིན་དུ་སྤྱན་དྲངས་ནས་སིབ་སིབ་ཐིམ་པས་རྒྱུད་བྱིན་གྱིས་བརླབས་པར་གྱུར་པའི་མོས་པ་མཛོད། ཧཱུྃ༔ དྲག་པོ་རྟ་ཁྱུང་ལྷ་ཚོགས་རྣམས༔ ཆོས་སྐུའི་ཀློང་ནས་ཐུགས་རྗེ་སྐྱེད༔ ལོངས་སྐུའི་རྣམ་རོལ་ཅིར་ཡང་བསྒྱུར༔ སྤྲུལ་སྐུའི་དཀྱིལ་འཁོར་བརྟེན་པར་བཅས༔ དབང་བསྐུར་བྱིན་ཕོབ་རྟགས་མཚན་སྟོན༔ རྩ་སྔགས་མཐར། སརྦ་ས་མ་ཡ་ཨཱ་བེ་ཤ་ཡ་ཕེཾ་ཕེཾ། ཞེས་པས་བྱིན་དབབ། མེ་ཏོག་གཏོར་ལ། ཏིཥྛ་བཛྲ་ཞེས་བརྗོད་ཅིང་བརྟན་པར་བྱ། གཏོར་མ་ཐོགས་ལ། དེ་ལྟར་དབབ་ཅིང་བརྟན་པར་བྱ་བ་སྔོན་དུ་སོང་ནས། དངོས་གཞི་དབང་བསྐུར་བའི་སླད་དུ་གཏོར་མ་འདི་ཉིད་དབང་དྲག་རྟ་ཁྱུང་འབར་བར་དངོས་སུ་གསལ་བ་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཤིང་བྱིན་གྱིས་བརླབས་པ་ལ་བརྟེན་ནས་རྐྱེན་ཕྱི་ནང་གི་བར་ཆད་ཐམས་ཅད་ཉེ་བར་ཞི་བ་དང་། མཆོག་ཐུན་མོང་གི་དངོས་གྲུབ་མ་ལུས་པ་རྒྱུད་ལ་སྩལ་བྱུང་སྙམ་པའི་མོས་པ་དུང་དུང་མཛོད་ཅིག །ཅེས་བརྡ་སྦྱར་ལ་ལས་བུམ་སྤྱི་བོར་བཞག །ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ སོགས་ནས། བྱིན་གྱིས་རློབ་ཕྱིར་གཤེགས་སུ་གསོལ༔ ལུས་ལ་སྐུ་ཡི་བྱིན་གྱིས་རློབས༔ སྐུ་ཡི་དངོས་གྲུབ་ཐོབ་པར་ཤོག༔ རྩ་སྔགས་མཐར། ཀཱ་ཡ་ཨ་བྷི་ཥིཉྩ་ཨོཾ༔ དེས་བླ་མ་དྲག་པོ་རྟ་ཁྱུང་འབར་བའི་སྐུའི་དབང་བསྐུར་ཐོབ། ཁྱེད་རང་རྣམས་ཀྱི་ལུས་ཀྱི་སྒོ་ནས་བསགས་པའི་སྡིག་པ་དང་སྒྲིབ་པ་ནད་གདོན་བར་ཆད་ཐམས་ཅད་ཞི་བར་བྱས༔ ལུས་བླ་མ་དྲག་པོའི་སྐུ་དང་ནུས་པ་མཉམ་པར་བྱིན་གྱིས་བརླབས་པ་ཡིན་སྙམ་དུ་མོས་པ་མཛོད། གཏོར་མ་མགྲིན་པར་བཞག་ལ། ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ སོགས་ནས། གཤེགས་སུ་གསོལ༔ ངག་ལ་གསུང་གི་བྱིན་གྱིས་རློབས༔ གསུང་གི་དངོས་གྲུབ་ཐོབ་པར་ཤོག༔ རྩ་སྔགས་མཐར། ཝཱ་ཀ་ཨ་བྷི་ཥིཉྩ་ཨཱཿ དེ་རྗེས་འབྲེལ་བཟླས་ལུང་གི་སླད་དུ་སློབ་དཔོན་གྱི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་བྱུང་། ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀའི་ས་བོན་གྱི་མཐར་གཡས་སྐོར་དུ་འཁོད་པས་བརྟན་གཡོའི་སྒྲ་སྐད་ཐམས་ཅད་གྲགས་སྟོང་གཞོམ་མེད་གསུང་གི་ངོ་བོར་དག་པར་གྱུར་པའི་མོས་པ་དང་བཅས་ཏེ་སྔགས་འདིའི་རྗེས་ཟློས་ལན་གསུམ་མཛོད། རྩ་སྔགས་ལན་གསུམ་བཟླས་མཐར། རྡོ་རྗེ་སློབ་མ་འདི་རྣམས་ཀྱི་རྒྱུད་ལ་བླ་མ་དྲག་པོ་རྟ་ཁྱུང་འབར་བའི་ནུས་པ་སྔགས་ཀྱི་བྱིན་རླབས་མ་ལུས་པ་འཇུག་ཅིང་བརྟན་པར་གྱུར་ཅིག །ཨོཾ་ཡེ་དྷརྨ་སོགས་དང་བཅས་མེ་ཏོག་འཐོར། དེས་བླ་མ་དྲག་པོའི་རྟ་ཁྱུང་འབར་བའི་གསུང་གི་དབང་བསྐུར་ཐོབ། ཁྱེད་རང་རྣམས་ཀྱི་ངག་གི་སྒོ་ནས་བསགས་པའི་སྡིག་པ་དང་སྒྲིབ་པ་ནད་གདོན་བར་ཆད་ཐམས་ཅད་ཞི་བར་བྱས། ངག་བླ་མ་དྲག་པོའི་གསུང་དང་ནུས་པ་མཉམ་པར་བྱིན་གྱིས་བརླབས་པ་ཡིན་སྙམ་དུ་མོས་པ་མཛོད། གཏོར་མ་སྙིང་གར་བཞག་ལ། ཧཱུྃ༔ ཨོ་རྒྱན་ཡུལ་གྱི་སོགས་ནས་གཤེགས་སུ་གསོལ༔ ཡིད་ལ་ཐུགས་ཀྱི་བྱིན་གྱིས་རློབས༔ ཐུགས་ཀྱི་དངོས་གྲུབ་སྩལ་དུ་གསོལ༔ རྩ་སྔགས་མཐར། ཙིཏྟ་ཨ་བྷི་ཥིཉྩ་ཧཱུྃ༔ དེས་བླ་མ་དྲག་པོ་རྟ་ཁྱུང་འབར་བའི་ཐུགས་ཀྱི་དབང་བསྐུར་ཐོབ། ཁྱེད་རང་རྣམས་ཀྱིས་ཡིད་ཀྱི་སྒོ་ནས་བསགས་པའི་སྡིག་པ་དང་སྒྲིབ་པ་ནད་གདོན་བར་ཆད་ཐམས་ཅད་ཞི་བར་བྱས། ཡིད་བླ་མ་དྲག་པོའི་ཐུགས་དང་ནུས་པ་མཉམ་པར་བྱིན་གྱིས་བརླབས་པ་ཡིན་སྙམ་དུ་མོས་པ་མཛོད། སླར་ཡང་གཏོར་མ་སྤྱི་བོར་བཞག་ལ། ཨོཾ་ཨཱཿཧཱུྃ། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་དྲག་པོ། གྲུབ་ཆེན་རྗེ་འབངས་ཉེར་ལྔ། ཀུན་མཁྱེན་དྲི་མེད་འོད་ཟེར། ཀློང་ཆེན་ནམ་མཁའི་རྣལ་འབྱོར། འཇིགས་མེད་ཕྲིན་ལས་འོད་ཟེར། དྲིན་ཅན་རྩ་བའི་བླ་མ་ལ་སོགས་པ་རྩ་བ་དང་བརྒྱུད་པར་བཅས་པའི་དཔལ་མགོན་རིག་འཛིན་བླ་མ། ཡི་དམ་མཁའ་འགྲོ་རྒྱ་མཚོ། ཆོས་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱིས། དེང་འདིར་རྡོ་རྗེའི་སློབ་མ་འདི་རྣམས་ལ་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་དབང་མཆོག་དམ་པ་བསྐུར་ནས། ལུས་ངག་ཡིད་གསུམ་གྱི་འགལ་རྐྱེན་ཕྱི་ནང་གི་ནད་གདོན་བར་ཆད་མི་མཐུན་པའི་ཕྱོགས་ཐམས་ཅད་ཉེ་བར་ཞི་བ་དང་། མཐུན་རྐྱེན་ཚེ་དང་བསོད་ནམས། དཔལ་དང་གྲགས་པ། ལུང་དང་རྟོགས་པའི་ཡོན་ཏན་ལ་སོགས་པ་མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་ཐོབ་པར་བྱིན་གྱིས་བརླབས་ཏུ་གསོལ། རྩ་སྔགས་མཐར། ཛཿཧཱུྃ་བྃ་ཧོཿ ཞེས་བརྗོད་པས། གཏོར་མའི་ལྷ་ལས་རང་འདྲ་གཉིས་པ་རེ་བྱུང་ནས་འོད་དུ་ཞུ་སྟེ་ཁྱེད་རང་རྣམས་ལ་ཐིམ་པ་ལ་བརྟེན་ནས། ཁྱེད་རང་རྣམས་ཀྱི་ལུས་ངག་ཡིད་གསུམ་དང་། ཡེ་ཤེས་ལྷ་ཡི་སྐུ་གསུང་ཐུགས་གསུམ་དབྱེར་མེད་རོ་གཅིག་ཏུ་འདྲེས་ནས་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པར་གྱུར་པ་ལ། བདག་མདུན་དཀྱིལ་འཁོར་གྱི་ལྷ་ཚོགས་རྣམས་ཀྱིས་ཤིས་པ་བརྗོད་པའི་བདེན་ཚིག་གི་གླུ་དབྱངས་དི་རི་རི་སྒྲོགས་ཤིང་མེ་ཏོག་མནྡཱ་རའི་ཆར་ཆེན་པོ་ཕབ་པས་མངའ་གསོལ་བའི་མོས་པ་མཛོད། ཧོཿ རིག་འཛིན་བརྒྱུད་པའི་བྱིན་རླབས་དང་༔ སོགས་ཤིས་བརྗོད་ཇི་ལྟར་རིགས་པར་བྱ། དེས་དབང་གི་དངོས་གཞི་ལེགས་པར་གྲུབ་ནས། གནས་སྐབས་དེ་དག་ཏུ་ཐོབ་པའི་དམ་ཚིག་རྣམས་བསྲུང་སྙམ་པས་འདིའི་རྗེས་ཟློས་ལན་གསུམ་མཛོད། གཙོ་བོས་ཇི་ལྟར་བཀའ་སྩལ་བ། །དེ་དག་ཐམས་ཅད་བདག་གིས་བགྱི། །བཀའ་དྲིན་གཏང་རག་གི་ཡོན་དུ་དམིགས་ཏེ་མཎྜལ་ཞིག་ཕུལ་མཛོད། མཎྜལ་ཕུལ་ནས། སླར་ཡང་ལུས་ལོངས་སྤྱོད་དགེ་ཚོགས་དང་བཅས་པ་ཐམས་ཅད་ཀྱང་འཁོར་ལོས་སྒྱུར་བའི་རྒྱལ་སྲིད་ཀྱི་འབྱོར་པ་ལྟར་སྤྲུལ་ཏེ་ཕུལ་ན་ཆ་ཤས་ནས་བཞེས་ལ་ལོངས་སྤྱད་དུ་གསོལ་སྙམ་པས་འདིའི་རྗེས་ཟློས་ལན་གསུམ་མཛོད། དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱིས་སློབ་མར་གཟུང་བ་དང་། །ཆ་ཤས་ཅིས་ཀྱང་སྤྱད་དུ་གསོལ། །དེ་ལྟ་བུ་དགེ་བའི་རྩ་བ་སེམས་ཅན་ཐམས་ཅད་ཀྱི་དོན་དུ་ཟག་པ་མེད་པའི་བསྔོ་བས་རྒྱས་འདེབས་མཛད་པར་ཞུ། བསོད་ནམས་འདི་ཡིས་སོགས་བརྗོད་ལ་སློབ་མ་རྣམས་རང་གནས་སུ་གཏོང་། ལྷག་མ་ནས་བརྩམས་ཏེ་རྗེས་ཆོག་ལས་གཞུང་ལྟར་བྱའོ། །ཞེས་པའང་དོན་གཉེར་ཅན་གྱི་ངོར། བློ་དམན་རྣམས་འཇུག་པ་བདེ་བའི་སླད། གཏེར་གཞུང་རྡོ་རྗེའི་ཚིག་རྐང་ཉིད་རྩ་བར་བཟུང་སྟེ་མཚམས་སྦྱོར་ཉུང་གསལ་བཀླགས་ཆོག་ཏུ་བཀོད་པ་འདིའང་ཀུན་མཁྱེན་བླ་མ་དགྱེས་པའི་འབངས་ཀྱིས་སྦྱར་བ་སྟེ། དགེ་བས་མཐའ་ཀླས་པའི་ཡིད་ཅན་ཐམས་ཅད་གནས་སྐབས་གཟའ་ཀླུ་རྒྱལ་གསུམ་ལ་སོགས་པའི་ནད་གདོན་ཉེར་འཚེའི་གཡུལ་ངོ་ལས་རྒྱལ་ཏེ། མཐར་ཐུག་རིགས་ཀུན་ཁྱབ་བདག་པདྨ་དྲག་པོའི་གོ་འཕང་ཚེ་འདི་ཉིད་ལ་མངོན་སུམ་དུ་བྱེད་པའི་རྒྱུར་གྱུར་ཅིག །རྒྱས་པར་གྲུབ་ཆེན་རིན་པོ་ཆེ་འཇིགས་མེད་ཕྲིན་ལས་འོད་ཟེར་གྱི་ཆོག་སྒྲིགས་ལྟར་རྟོགས་པར་བྱ་བ་ཁོ་ནའོ། །སརྦ་དཱ་ཀ་ལྱཱ་ནཾ་བྷ་བ་ཏུ།། །།

[edit]

rta khyung dbang bskur mtshams sbyor dngos grub 'dod 'jo/ @#/__/bla ma drag po rta khyung 'bar ba'i byin rlabs dbang bskur gyi mtshams sbyor dngos grub 'dod 'jo zhes bya ba bzhugs so/__/ na mo gu ru badz+ra kro d+hA ya/__'dir bla ma drag po rta khyung 'bar ba'i dkyil 'khor du slob ma rjes su gzung bar 'dod pas/__stegs kyi khar 'bru tshom lnga bkod pa'i dbus su dpal gtor tsaklis brgyan pa/__de'i g.yas g.yon du sman rag__/mdun du nyer spyod dang sngon gtor/__nye logs ci bde bar las bum sogs dgos pa'i yo byad rnams legs par bsham/__brgyud 'debs sngon du 'gro bas las gzhung bsrangs te bdag mdun dbyer med kyi rim pa gsal btab la/__bzlas pa ci nus dang /__las bum du khro bo rta mgrin dmar po g.yas dbyug to dang g.yon me'i zhags pa thogs par gsal bar gyur par bsams la/__oM badz+ra kro d+ha ha ya gr-I wa hu lu hu lu hU~M phaT:__ces ci nus bzlas mthar/__mchod cing bstod/__hU~M/__zhes brjod pa las kyi khro bo dbang gi bya ba ma grub bar du bzhugs par bsam/__chos srung gi gtor bsngo dang /__tshogs lhag ma'i bar grub nas rig pa'i me tog dor nas slob dpon bdag nyid 'jug pa ni/__oM badz+ra sa ma ya oM/__AHbadz+ra sa ma ya AH__hU~M badz+ra sa ma ya hU~M/__swA badz+ra sa ma ya swA/__hA badz+ra sa ma ya hA/__oM/__ye shes rgyal po sku gsung thugs/__yon tan phrin las rmad po che/__/de nyid du ni mnyam sbyor ba'i/__/phyag rgya chen por bdag sbyor cig__/oM badz+ra sa ma ya hU~M/__oM badz+ra sa ma ya s+t+waM/__oM badz+ra sa ma ya ho/__zhes ting nge 'dzin gyi 'jug pa sngon du 'gro bas/__slob ma 'jug par gsol ba gdab pa ni/__oM/__rdo rje'i ye shes mthong byed pa'i/__/de bzhin gshegs pa thams cad kyi/__/snying po'i dkyil 'khor chen po 'dir/__/bdag gi slob ma 'jug par 'tshal/__/zhes gsol bas gnang ba byin par bsam la/__de nas slob ma rnams gral la 'khod par/__las bum thogs te/__ji ltar bltams pa sogs brjod/__oM badz+ra kro d+ha ha ya sogs dang yi ge brgya pa bzla bzhin du khrus bya/__bgegs gtor/__oM kro d+ha sogs kyis bsang /__swa b+hA was sbyang /__stong pa'i ngang las b+h+rU~M las rin po che'i snod yangs shing rgya che ba'i nang du bgegs kyi gtor ma 'dod yon gyi dngos po zad mi shes par gyur/__oM AHhU~M hos brlab/__oM sarba b+hu ta A kaR+ShA ya dzaHsa mgron dgug__/oM sarba big+han na mas+sa rba ta thA ga te sogs lan gsum gyis bsngos la/__hrIH__snod bcud sprul pa'i dkyil 'khor 'dir:__sogs kyi mthar/__oM badz+ra kro d+ha sogs nas oM sum+b+ha ni sogs brjod cing bskrad/__hrIH__snang srid dag pa rab 'byams la:__sogs kyi mthar/__b+h+rU~M badz+ra kro d+ha rak+Sha rak+Sha hU~M:__zhes brjod pas phyogs mtshams thams cad rdo rje'i sa gzhi rwa ba dra ba gur bla bre ye shes kyi me dpung rab tu 'bar ba'i srung ba'i 'khor lo cis kyang mi chod mi shigs par gyur pa'i mos pa mdzod/__de ltar khrus byas/__bgegs phral/__srung 'khor bsgom pa rnams sngon du song nas/__slar yang nam mkha' dang mnyam pa'i sems can thams cad kyi don du rdzogs pa'i sangs rgyas kyi go 'phang rin po che thob par bya/__de'i ched du smin byed kyi dbang bskur zab mo gsan la don tshul bzhin du nyams su blang bar bgyi'o/__/snyam pa byang chub kyi mchog tu sems bskyed pa gsal btab ste gsan 'tshal/__de la 'dir gsan par bya ba'i chos ni/__'jam dpal dbyangs dngos mnga' bdag tshangs pa lha'i me tog gi ye shes sgyu 'phrul drwa ba'i rol gar/__lnga brgya pa rnams kyi gtsug gi nor bu thams cad mkhyen cing gzigs pa chen po rig 'dzin 'jigs med gling pa zhes mtshan nyi zla ltar yongs su grags pa 'di nyid la/__dus gsum mkhyen pa dpal o rgyan gyi slob dpon chen po pad+ma saM b+ha bas zhal mngon sum du bstan nas legs par stsal ba'i rdzogs pa chen po klong chen snying gi thig le'i chos skor las byung ba'i bla ma drag po rta khyung 'bar ba gnyen po gsum ldan gyi dkyil 'khor du dbang bskur zab mo 'bul ba'i skabs su bab pa yin/__de la sngon 'gro slob dpon gyis bgyi bar 'os pa'i chos rnams grub nas/__dngos gzhi slob ma rnams kyi ngo skal du gyur pa la'ang /__maN+Dal 'bul zhing gsol ba 'debs pa sogs sngon du 'gro dgos pas thog mar bla ma dang yi dam pad+ma drag po tha mi dad pa'i spyan sngar byin rlabs dbang bskur gyi rim pa zab mo zhu ba'i yon du maN+Dal zhig phul mdzod/__ces brda sbyar la maN+Dal dbul/__de ltar maN+Dal phul nas gsol ba 'debs pa 'di'i rjes zlos mdzod/__kun mkhyen ye shes phung po can/__/srid pa'i 'khor lo rnam sbyong ba/__/de ring bshad pa'i rin chen gter/__/gtso bos bdag la bka' drin stsol/__/slar yang rgyud dag par bya ba'i slad du mdun gyi nam mkhar bla ma dang gnyis su med pa'i drag po rta khyung 'bar ba la rtsa gsum rgya mtsho'i tshogs kyis bskor ba mngon sum lta bur bzhugs pa'i spyan sngar rgyun bshags sngon du 'gro ba can gyis byang chub mchog tu sems bskyed snyam pas 'di'i rjes zlos lan gsum mdzod/__dkon mchog gsum la bdag skyabs mchi/__/sdig pa thams can so sor bshags/__/'gro ba'i dge la rjes yi rangs/__/sangs rgyas byang chub yid kyis gzung /__/sangs rgyas chos dang tshogs mchog la/__/byang chub bar du skyabs su mchi/__/rang gzhan don ni rab bsgrub phyir/__/byang chub sems ni bskyed par bgyi/__/byang chub mchog gi sems ni bskyed bgyis nas/__/sems can thams cad bdag gis mgron du gnyer/__/byang chub spyod mchog yid 'ong spyad par bgyi/__/'gro la phan phyir sangs rgyas 'grub par shog__/ces pas rgyud dag par byas pa la ye shes dbab pa'i slad du dmigs pa 'di bzhin du mdzod/__oM ma hA shu n+ya tA dz+nyA na badz+ra swa b+hA ba At+ma ko\u0f85 haM/__khyed rang rnams kyi phung po khams dang skye mched kyis mtshon pa'i ma dag pa'i snang ba thams cad rnam par thar pa'i sgo gsum dang dbyer med pa'i stong pa nyid du gyur/__stong pa'i ngang las dmigs med snying rje chen po'i rnam rol phyi snod kyi 'jig rten 'og min pad+ma 'od kyi gzhal yas khang dur khrod rol pa'i pho brang chen por gsal ba'i dbus su/__pad+ma nyi zla dug sbrul bcu gnyis bsnol ba'i gdan gyi steng du shes rig gi ngo bo yi ge hrIHdmar po yongs su gyur pa las/__skad cig gis yi dam pad+ma he ru ka'i skur gyur pa ni/__'jigs byed rdo rje gro bo lod:__ces pa nas/__yang dag thod khrag 'dzin:__zhes pa'i bar gzhung ltar la/__de ltar du gsal ba'i spyi bor oM/__mgrin par AH__thugs kar hU~M/__de las 'od zer gyi tshogs bsam mi khyab pa 'phros pas rang bzhin gyi gnas nas rnga yab dpal ri sprul pa'i zhing khams phyogs bcu dus bzhi'i de bzhin gshegs pa thams cad bla ma drag po rta khyung 'bar ba'i sku phyag rgya/__gsung yig 'bru/__thugs phyag mtshan gyi rnam par kha char bu yug 'tshubs pa bzhin du spyan drangs nas sib sib thim pas rgyud byin gyis brlabs par gyur pa'i mos pa mdzod/__hU~M:__drag po rta khyung lha tshogs rnams:__chos sku'i klong nas thugs rje skyed:__longs sku'i rnam rol cir yang bsgyur:__sprul sku'i dkyil 'khor brten par bcas:__dbang bskur byin phob rtags mtshan ston:__rtsa sngags mthar/__sarba sa ma ya A be sha ya pheM pheM/__zhes pas byin dbab/__me tog gtor la/__tiSh+Tha badz+ra zhes brjod cing brtan par bya/__gtor ma thogs la/__de ltar dbab cing brtan par bya ba sngon du song nas/__dngos gzhi dbang bskur ba'i slad du gtor ma 'di nyid dbang drag rta khyung 'bar bar dngos su gsal ba khyed rang rnams kyi spyi bor spyan drangs shing byin gyis brlabs pa la brten nas rkyen phyi nang gi bar chad thams cad nye bar zhi ba dang /__mchog thun mong gi dngos grub ma lus pa rgyud la stsal byung snyam pa'i mos pa dung dung mdzod cig__/ces brda sbyar la las bum spyi bor bzhag__/hU~M/__o rgyan yul gyi nub byang mtshams:__pad+ma ge sar sdong po la:__sogs nas/__byin gyis rlob phyir gshegs su gsol:__lus la sku yi byin gyis rlobs:__sku yi dngos grub thob par shog:__rtsa sngags mthar/__kA ya a b+hi Shiny+tsa oM:__des bla ma drag po rta khyung 'bar ba'i sku'i dbang bskur thob/__khyed rang rnams kyi lus kyi sgo nas bsags pa'i sdig pa dang sgrib pa nad gdon bar chad thams cad zhi bar byas:__lus bla ma drag po'i sku dang nus pa mnyam par byin gyis brlabs pa yin snyam du mos pa mdzod/__gtor ma mgrin par bzhag la/__hU~M:__o rgyan yul gyi nub byang mtshams:__sogs nas/__gshegs su gsol:__ngag la gsung gi byin gyis rlobs:__gsung gi dngos grub thob par shog:__rtsa sngags mthar/__wA ka a b+hi Shiny+tsa AH__de rjes 'brel bzlas lung gi slad du slob dpon gyi thugs ka'i sngags phreng las sngags phreng gnyis pa byung /__zhal nas thon/__khyed rang rnams kyi zhal du zhugs/__thugs ka'i sa bon gyi mthar g.yas skor du 'khod pas brtan g.yo'i sgra skad thams cad grags stong gzhom med gsung gi ngo bor dag par gyur pa'i mos pa dang bcas te sngags 'di'i rjes zlos lan gsum mdzod/__rtsa sngags lan gsum bzlas mthar/__rdo rje slob ma 'di rnams kyi rgyud la bla ma drag po rta khyung 'bar ba'i nus pa sngags kyi byin rlabs ma lus pa 'jug cing brtan par gyur cig__/oM ye d+harma sogs dang bcas me tog 'thor/__des bla ma drag po'i rta khyung 'bar ba'i gsung gi dbang bskur thob/__khyed rang rnams kyi ngag gi sgo nas bsags pa'i sdig pa dang sgrib pa nad gdon bar chad thams cad zhi bar byas/__ngag bla ma drag po'i gsung dang nus pa mnyam par byin gyis brlabs pa yin snyam du mos pa mdzod/__gtor ma snying gar bzhag la/__hU~M:__o rgyan yul gyi sogs nas gshegs su gsol:__yid la thugs kyi byin gyis rlobs:__thugs kyi dngos grub stsal du gsol:__rtsa sngags mthar/__tsit+ta a b+hi Shiny+tsa hU~M:__des bla ma drag po rta khyung 'bar ba'i thugs kyi dbang bskur thob/__khyed rang rnams kyis yid kyi sgo nas bsags pa'i sdig pa dang sgrib pa nad gdon bar chad thams cad zhi bar byas/__yid bla ma drag po'i thugs dang nus pa mnyam par byin gyis brlabs pa yin snyam du mos pa mdzod/__slar yang gtor ma spyi bor bzhag la/__oM AHhU~M/__chos sku snang ba mtha' yas/__longs sku thugs rje chen po/__sprul sku pad+ma drag po/__grub chen rje 'bangs nyer lnga/__kun mkhyen dri med 'od zer/__klong chen nam mkha'i rnal 'byor/__'jigs med phrin las 'od zer/__drin can rtsa ba'i bla ma la sogs pa rtsa ba dang brgyud par bcas pa'i dpal mgon rig 'dzin bla ma/__yi dam mkha' 'gro rgya mtsho/__chos srung dam can rgya mtsho'i tshogs dang bcas pa rnams kyis/__deng 'dir rdo rje'i slob ma 'di rnams la sku gsung thugs yon tan phrin las mi zad pa rgyan gyi 'khor lo'i dbang mchog dam pa bskur nas/__lus ngag yid gsum gyi 'gal rkyen phyi nang gi nad gdon bar chad mi mthun pa'i phyogs thams cad nye bar zhi ba dang /__mthun rkyen tshe dang bsod nams/__dpal dang grags pa/__lung dang rtogs pa'i yon tan la sogs pa mchog dang thun mong gi dngos grub ma lus pa myur du thob par byin gyis brlabs tu gsol/__rtsa sngags mthar/__dzaHhU~M ba~M hoH__zhes brjod pas/__gtor ma'i lha las rang 'dra gnyis pa re byung nas 'od du zhu ste khyed rang rnams la thim pa la brten nas/__khyed rang rnams kyi lus ngag yid gsum dang /__ye shes lha yi sku gsung thugs gsum dbyer med ro gcig tu 'dres nas dbang dang byin rlabs dngos grub ma lus pa thob par gyur pa la/__bdag mdun dkyil 'khor gyi lha tshogs rnams kyis shis pa brjod pa'i bden tshig gi glu dbyangs di ri ri sgrogs shing me tog man+dA ra'i char chen po phab pas mnga' gsol ba'i mos pa mdzod/__hoH__rig 'dzin brgyud pa'i byin rlabs dang :__sogs shis brjod ji ltar rigs par bya/__des dbang gi dngos gzhi legs par grub nas/__gnas skabs de dag tu thob pa'i dam tshig rnams bsrung snyam pas 'di'i rjes zlos lan gsum mdzod/__gtso bos ji ltar bka' stsal ba/__/de dag thams cad bdag gis bgyi/__/bka' drin gtang rag gi yon du dmigs te maN+Dal zhig phul mdzod/__maN+Dal phul nas/__slar yang lus longs spyod dge tshogs dang bcas pa thams cad kyang 'khor los sgyur ba'i rgyal srid kyi 'byor pa ltar sprul te phul na cha shas nas bzhes la longs spyad du gsol snyam pas 'di'i rjes zlos lan gsum mdzod/__deng nas brtsams te bdag bran du/__/khyed la bdag ni 'bul lags na/__/khyed kyis slob mar gzung ba dang /__/cha shas cis kyang spyad du gsol/__/de lta bu dge ba'i rtsa ba sems can thams cad kyi don du zag pa med pa'i bsngo bas rgyas 'debs mdzad par zhu/__bsod nams 'di yis sogs brjod la slob ma rnams rang gnas su gtong /__lhag ma nas brtsams te rjes chog las gzhung ltar bya'o/__/zhes pa'ang don gnyer can gyi ngor/__blo dman rnams 'jug pa bde ba'i slad/__gter gzhung rdo rje'i tshig rkang nyid rtsa bar bzung ste mtshams sbyor nyung gsal bklags chog tu bkod pa 'di'ang kun mkhyen bla ma dgyes pa'i 'bangs kyis sbyar ba ste/__dge bas mtha' klas pa'i yid can thams cad gnas skabs gza' klu rgyal gsum la sogs pa'i nad gdon nyer 'tshe'i g.yul ngo las rgyal te/__mthar thug rigs kun khyab bdag pad+ma drag po'i go 'phang tshe 'di nyid la mngon sum du byed pa'i rgyur gyur cig__/rgyas par grub chen rin po che 'jigs med phrin las 'od zer gyi chog sgrigs ltar rtogs par bya ba kho na'o/__/sarba dA ka l+yA naM b+ha ba tu//__//