དམ་རྫས་རཀྟའི་སྒྲུབ་ཚུལ་དངོས་གྲུབ་སྙིང་པོ།

🚧 This website is under continued development. We appreciate your patience!

Previous Text Back to Volume PageNext Text

Wylie title	dam rdzas rak+ta'i sgrub tshul dngos grub snying po
Location	mkhyen brtse'i bka' 'bum Volume 13, sde tshan 23, Text 25, Pages 609-626 (Folios 74a5 to 82b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dam rdzas rak+ta'i sgrub tshul dngos grub snying po. In 'jam dbyangs mkhyen brtse'i dbang po'i bka' 'bum, Vol. 13: 609-626. Khams sde dge rdzong sar dgon: Rdzong sar blo gros phun tshogs, 2020.
Genre	Ritual and Liturgical Texts - cho ga phyag len  ·  Offering Rituals - mchod sbyin
RTZ	In the Rinchen Terdzö: https://rtz.tsadra.org/index.php/Terdzo-THI-030
Colophon	ཅེས་པའང་དཔལ་ཁྲག་འཐུང་ཆེན་པོས་བཀའ་སྩལ་པའི་རཀྟ་དམར་གྱི་རྒྱུད་སྡེའི་དགོངས་པ་གཙོ་བོར་སྦྱར་བ་སྟེ། གཞན་དུ་སྤྱིའི་རྣམ་བཞག་འདི་ལྟར་ངེས་པར་བྱས་ན། སྒྲུབ་ཚུལ་བཀའ་དགོངས་ཕུར་གསུམ་སོགས་རང་རང་གང་ལ་མོས་པའི་གཞུང་ལྟར་བྱིན་གྱིས་བརླབས་པས་ཀྱང་དོན་གྲུབ་པ་ཡིན་ནོ།
	ces pa'ang dpal khrag 'thung chen pos bka' stsal pa'i rak+ta dmar gyi rgyud sde'i dgongs pa gtso bor sbyar ba ste/__gzhan du spyi'i rnam bzhag 'di ltar nges par byas na/__sgrub tshul bka' dgongs phur gsum sogs rang rang gang la mos pa'i gzhung ltar byin gyis brlabs pas kyang don grub pa yin no

1 Texts in this Section (sde tshan or chos tshan)

25 609-626	དམ་རྫས་རཀྟའི་སྒྲུབ་ཚུལ་དངོས་གྲུབ་སྙིང་པོ། dam rdzas rak+ta'i sgrub tshul dngos grub snying po Ritual and Liturgical Texts - cho ga phyag len   ·   Offering Rituals - mchod sbyin	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །དམ་རྫས་རཀྟའི་སྒྲུབ་ཚུལ་དངོས་གྲུབ་སྙིང་པོ་ཞེས་བྱ་བ་བཞུགས་སོ། །ཨོཾ་སྭ་སྟི། །ཆགས་བྲལ་བདེ་ཆེན་སྣང་མཐའ་ཡས། །དཔལ་ལྡན་བླ་མར་གུས་བཏུད་ནས། །ཆགས་མེད་རྡོ་རྗེའི་དམ་ཚིག་རྫས། །རཀྟའི་སྒྲུབ་ཚུལ་སྙིང་པོ་འབྲི། འདི་ལ་ལྔ། ངོ་བོ། ངེས་ཚིག །དབྱེ་བ། བྱུང་ཁུངས། སྒྲུབ་པའི་རིམ་པ་རྣམས་སོ། །དང་པོ་ནི། སྲིད་ཞི་གང་རུང་གིས་བསྡུས་ཤིང་མ་རྟོགས་ན་ཆགས་པའི་གཞི་དང་། རྟོགས་ན་ཆགས་བྲལ་གྱི་སྒྲུབ་རྫས་སུ་ངེས་པས་རབ་ཏུ་ཕྱེ་བའི་རིགས་སུ་གནས་པ་སྟེ། རཀྟ་དམར་གྱི་རྒྱུད་ལས། རཀྟའི་ངོ་བོ་ཆགས་པ་ཡིན། ཞེས་གསུངས། གཉིས་པ་ངེས་ཚིག་ནི། རཀྟའི་སྒྲ་ལས་དྲངས་ཏེ་ཁ་དོག་དམར་བ་ལ་འཇུག་ལ། སྣང་སྲིད་ཐམས་ཅད་ཀྱང་དཀར་དམར་གྱི་ཟླས་ཕྱེ་བའི་དམར་ཆ་ཤེས་རབ་སྟོང་པ་ཉིད་ཀྱི་རང་བཞིན་དུ་ངེས་པའི་ཕྱིར་ན་རཀྟ་སྟེ། རཀྟ་དམར་གྱི་རྒྱུད་ལས། ཐམས་ཅད་རཀ་པས་རཀྟ་ཡིན། ཞེས་གསུངས། གསུམ་པ་དབྱེ་བ་ནི། སྒྲས་བརྗོད་རིགས་ཀྱི་སྒོ་ནས་དབྱེ་ན་ལྔ་སྟེ། སྲིད་པ་གཞིའི་རཀྟ། འཁོར་བ་རྒྱུའི་རཀྟ། འགྱུར་མེད་རིགས་ཀྱི་རཀྟ། འབྲས་བུ་ཆེན་པོའི་རཀྟ། བསྒྲུབ་རྫས་གྲངས་ཀྱི་རཀྟ་སྟེ་ལྔ་ལས། དང་པོ་ནི། འབྱུང་བ་ཆུ་དང་ཆུའི་རིགས་སུ་གཏོགས་པ་ཐམས་ཅད་དེ། དེ་ཉིད་ལས། གཞི་ཡི་རཀྟ་འབྱུང་བ་ཆུ། ཞེས་གསུངས། གཉིས་པ་ནི། མའི་མངལ་ཁྲག་སྟེ། དེ་ཉིད་ལས། རྒྱུ་ཡི་རཀྟ་པདྨའི་ཁྲག །ཅེས་གསུངས། གསུམ་པ་ནི། སོ་སོར་རྟོག་པའི་ཡེ་ཤེས་དང་། དེའི་བདག་ཉིད་ཀྱི་གསུང་རྡོ་རྗེ་སྣང་བ་མཐའ་ཡས་ཀྱི་ངོ་བོར་བཞུགས་པ་རྣམས་ཏེ། དེ་ཉིད་ལས། རིགས་ཀྱི་རཀྟ་སྣང་མཐའ་ཡས། །ཞེས་གསུངས། བཞི་པ་ནི། རུ་དྲ་སྡེ་གསུམ་དཔལ་ཆེན་པོས་བསྒྲལ་བའི་སྙིང་ཁྲག་སྟེ། དེ་ཉིད་ལས། འབྲས་བུའི་རཀྟ་ཙིཏྟའི་ཁྲག །ཅེས་གསུངས། ལྔ་པ། སྒྲུབ་རྫས་ཀྱི་རཀྟ་ལ་སོ་ལྔར་མཆིས་ཏེ། དེ་ཉིད་ལས། གྲངས་ཀྱི་རཀྟ་སུམ་ཅུ་ལྔ། ཞེས་གསུངས། ཡང་མཚོན་བྱེད་དཔེའི་རཀྟ་དང་། མཚོན་བྱ་དོན་གྱི་རཀྟ་གཉིས་སུ་ཕྱེ་ནས། དང་པོ་ལ། མཱུ་ལ་རྩ་བའི་རཀྟ། མ་འདྲེས་དྭངས་མའི་རཀྟ། ཟུངས་ལྡན་བཅུད་ཀྱི་རཀྟ། སྣ་ཚོགས་ཕལ་པའི་རཀྟ་སྟེ་བཞིར་ཕྱེ། དང་པོ་ལ། སྲོག་ཅན་རྩ་བའི་རཀྟ་དང་། སྲོག་མེད་རྩ་བའི་རཀྟ་གཉིས་ལས། དང་པོ་ནི། རང་སྲོག་རང་གིས་བཅད་ནས་ལྕེབས་ཏེ་ཤི་བའི་བམ་གྱི་སྲོག་རྩའི་ཁྲག་དང་། མཁའ་ལྡིང་སྟེ་བྱ་ཤ་ཟན་རྣམས་ཀྱི་སྲོག་རྩའི་ཁྲག་དང་། ཁྱི་ནག་འོག་ཅན་གྱི་སྲོག་རྩའི་ཁྲག་དང་། གླང་འོག་ཅན་རོག་པོའི་སྲོག་རྩའི་ཁྲག་དང་། རྟ་གསེབ་ནག་པོའི་སྲོག་རྩའི་ཁྲག་རྣམས་ཏེ། གླང་ཆེན་རབ་འབོག་གི་རྒྱུད་ལས། རང་ཤི་བམ་གྱི་སྲོག་རྩའི་ཁྲག །མཁའ་ལྡིང་ཀུ་ཀུ་རཱ་ཙའི་ཁྲག །དེ་བཞིན་གླང་པོ་རྟ་ཡི་ཁྲག །མཆོད་ཅིང་ཐུགས་དམ་སྐོང་བའི་རྫས། །གསུང་གི་དངོས་གྲུབ་རྟེན་ཏུ་བཤམ། །ཞེས་གསུངས། གཉིས་པ་ལ། ཤིང་གི་ཁྲག་ཤིང་དམར་པོ། རྩ་བའི་ཁྲག་མོན་བུ་དམར་པོ། འབྲས་བུའི་ཁྲག་རམ་བུ་དམར་པོ། མེ་ཏོག་གི་ཁྲག་ལུག་རུ་དམར་པོ། སྡོང་པོ་ཡལ་འདབ་དང་བཅས་པའི་ཁྲག་སེང་ལྡེང་དམར་པོ་རྣམས་ཏེ། གཟའ་རྒྱུད་རིན་ཆེན་འཁོར་ལོ་ལས། ས་ཤིང་རྩ་བ་མོན་བུ་དང་། རམ་བུ་ལུག་རུ་དམར་པོ་དང་། །སྡོང་པོ་ཡལ་འདབ་སེང་ལྡེང་ཁྲག །ཅེས་གསུངས། གཉིས་པ་མ་འདྲེས་དྭངས་མའི་རཀྟ་ལ་གསུམ་སྟེ། མ་ཧཱ་རཀྟ། པདྨ་རཀྟ། མ་འདྲེས་རཀྟ་རྣམས་སོ། །དང་པོ་ནི། གདུག་ཅན་དགྲ་བགེགས་བསྒྲལ་བའི་ཁྲག་ཆེན་ནོ། །གཉིས་པ་ནི། བུ་མོ་རྡོ་རྗེའི་མདའ་མ་ཕོག་པའི་ཟླ་མཚན་ཐོག་མར་བབས་པ་དེའོ། །གསུམ་པ་ནི། གཞན་གྱིས་ལོངས་མ་སྤྱད་པའི་སྲོག་ཅན་རྩ་བའི་རཀྟ་གང་ཡང་རུང་བ་སྟེ། མ་མོ་སྲིད་པའི་རྒྱུད་ལུང་ལས། མ་ཧཱ་རཀྟ་བསྒྲལ་བའི་ཁྲག །པདྨ་རཀྟ་གསལ་བའི་ཁྲག །ཆུ་དང་མ་འདྲེས་དྭངས་མའི་ཁྲག །སྟོང་ལ་སྦྱར་བའི་ཁྲག་ཆེན་པོ། །ཞེས་གསུངས། གསུམ་པ་ཟུངས་ལྡན་བཅུད་ཀྱི་རཀྟ་ལ་གསུམ་སྟེ། སྣ་ཁྲག །གཏར་ཁྲག །མངལ་ཁྲག་གོ དང་པོ་ནི། སྐྱེས་པ་དང་བུ་མོ་ལོ་བཅུ་དྲུག་ནས་ཉེར་ལྔའི་བར་གྱི་ལང་ཚོ་དར་བའི་སྣ་ཁྲག་གོ །གཉིས་པ་ནི། དེ་དག་གི་ལུས་ལ་གཏར་བའི་ཁྲག་གོ །གསུམ་པ་ནི། བུ་མོ་ལང་ཚོ་རྒྱས་པའི་ཟླ་མཚན་ཏེ། དེ་ཉིད་ལས། ཕོ་མོ་དར་མའི་སྣ་ཁྲག་དང་། །དེ་བཞིན་ལུས་ལ་གཏར་བའི་ཁྲག །གཞོན་ནུ་ལང་ཚོའི་མངལ་ཁྲག་གོ། །ཞེས་གསུངས། བཞི་པ་ཕལ་བའི་རཀྟ་ནི། མཛེ་ཁྲག་དང་། རབས་ཆད་མ་ཡིན་པའི་ཁྲག་སྣང་གཏོགས་སོ་ཅོག་སྟེ། དེ་ཉིད་ལས། ཕལ་པ་གང་ཡང་རུང་བའི་ཁྲག །མཛེ་དང་མཛོ་རྟོལ་སྤངས་པའོ། །ཞེས་གསུངས། གཉིས་པ་མཚོན་བྱ་དོན་གྱི་རཀྟ་ནི། ཆགས་རྟོག་དབྱིངས་སུ་དག་པའི་བདེ་བ་ཆེན་པོའི་ཡེ་ཤེས་ཏེ། ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་སྒྲུབ་ཐབས་ལས། ཉོན་མོངས་ཆགས་པ་འཁོར་བའི་ཁྲག༔ ཆགས་མེད་བདེ་ཆེན་དབྱིངས་སུ་བསྒྲལ༔ འདོད་ཡོན་རྡོ་རྗེའི་དམ་ཚིག་ཆེ༔ འཁོར་བ་བསྒྲལ་ཕྱིར་བཞེས་སུ་གསོལ༔ ཞེས་གསུངས། བཞི་པ་བྱུང་ཁུངས་ནི། དཔལ་ཆེན་པོ་ཁྲག་འཐུང་ཧེ་རུ་ཀའི་ཐུགས་ཀ་ནས་སྤྲོས་པའི་མ་མོ་ཆེན་མོ་བྷ་ག་ཧྲཱི་ཏི་མ་ཞེས་བྱ་བས་སྣང་སྲིད་འཁོར་འདས་ཐམས་ཅད་ལ་བདག་གིར་མཛད་དེ་ཐུགས་རྗེ་ཀུན་ཁྱབ་ཏུ་བཞུགས་པ་ལས། མ་མོ་ཐམས་ཅད་ཀྱི་རྗེ་མོ་ཨེ་ཀ་ཛཱ་ཊི་མ་ཕྱུང་ངོ་། །དེས་རཀྟ་ཐམས་ཅད་ཀྱི་དྭངས་སྙིགས་གསུམ་དུ་ཕྱེ་སྟེ། དྭངས་མ་ལས་སངས་རྒྱས་བྱང་ཆུབ་སེམས་དཔའ་འཕགས་པ་ལ་སོགས་པ་འཇིག་རྟེན་ལས་འདས་པའི་བཀོད་པ་རྣམས་སྣང་བར་བྱས། བར་པ་ལས་འཇིག་རྟེན་གྱི་ལྷ་མི་སོགས་བདེ་འགྲོ་བ་རྣམས་དང་། སྙིགས་མ་ལས་ངན་སོང་གསུམ་གྱི་འཇིག་རྟེན་རྣམས་སྣང་བར་མཛད་དོ། །དེའི་ཚེ་དཔལ་ཆེན་པོའི་དཔྲལ་བའི་དབྱིངས་ནས་སྨེ་བ་དམར་པོ་ཞིག་བྱུང་སྟེ་དེའི་ནང་ནས་ཡུམ་ཆེན་མཁའ་ལ་གཤོག་གཅིག་མ་དང་། གཙུག་ན་རལ་གཅིག་མ་དང་། །དབྱིངས་ཀྱི་རལ་གཅིག་མ་དང་། གླིང་བཞི་དྲག་མོ་རྒྱལ་ཏེ་ཡུམ་ཆེན་བཞི་ཕྱུངས་ནས། དེ་རྣམས་ཀྱིས་རིམ་པར་མེ་ཏོག་གི་རཀྟ་ལྔ། རྩ་བའི་རཀྟ་ལྔ། རྡོའི་རཀྟ་ལྔ། འབྲས་བུའི་རཀྟ་ལྔ་རྣམས་སྤྲུལ་པའི་ཚུལ་སོགས་རཀྟ་དམར་གྱི་རྒྱུད་ལས་གསུངས་སོ། །ལྔ་པ་སྒྲུབ་པའི་ཐབས་ལ་གསུམ་སྟེ། སྦྱོར་བ་ཡོ་བྱད་ཀྱི་ཤོམས། དངོས་གཞི་སྒྲུབ་པའི་ཐབས། རྗེས་ཕན་ཡོན་དང་ལས་ཚོགས་བསྟན་པའོ། །དང་པོ་ནི། རཀྟའི་རྩ་བ་བརྒྱད། ཡན་ལག་སོ་ལྔ། དེ་ལས་འཕྲོས་པ་བསམ་གྱིས་མི་ཁྱབ་པ་ལས། དང་པོ་རྩ་བ་བརྒྱད་ལ། ནང་གི་རྩ་བ་བཞི། ཕྱིའི་རྩ་བ་བཞི་ལས། དང་པོ་ནང་གི་རྩ་བ་བཞི་ནི། ཡབ་ཀྱི་ཤངས་བུག་གཡས་རོ་མའི་ལམ་ནས་བྱུང་བའི་རཀྟ། ཡུམ་གྱི་བྷ་གའི་པདྨ་ལས་བབས་པའི་རཀྟ། སྲིད་པ་ཆགས་པའི་ལྟེ་ཁྲག་སྟེ་ལྟེ་བ་བཅད་པའི་ཁྲག །འབྲས་བུ་ཆེན་པོ་བསྒྲལ་བའི་ཁྲག་སྟེ་དཔལ་ཆེན་པོས་རུ་དྲ་བསྒྲལ་བའི་སྙིང་ཁྲག་རྣམས་ལ། ཕྱི་མ་འདི་གཏེར་བྱོན་གྱི་རཀྟའི་དམ་རྫས་རྣམས་ལ་འདྲེས་ཤིང་། མ་རྙེད་ན་དཔའ་བོ་གཡུལ་དུ་བསད་པའི་སྙིང་ཁྲག་གིས་བྱའོ། །གཉིས་པ་ཕྱིའི་རྩ་བ་བཞི་ནི། སྟག་གཟིག་སོགས་སྡེར་ཆགས། བྱ་རྒོད་སོགས་འདབ་ཆགས། རྟ་བོང་སོགས་རྨིག་ཟླུམ། གཡག་སོགས་རྨིག་པ་ཁ་བྲག་གི་ཁྲག་སྣའམ། ཡང་ན་རཀྟའི་རྒྱུད་ལས། གླང་ཆེན། མ་ཧེ། སྟག །དཔའ་བོ་གཡུལ་དུ་བསད་པའི་སྙིང་ཁྲག་ལའང་བཤད་པས་གང་འབྱོར་དང་། ཡན་ལག་གི་རཀྟ་སོ་ལྔ་མ་རྒྱུད་ནས་བཤད་ཚུལ་མི་འདྲ་བ་གཉིས་སུ་གསུངས་ནའང་། དེང་སང་ཡོངས་གྲགས་རྙེད་སླ་བ། མཚལ། ལི་ཁྲི། བཙག །ལྡོང་རོས། རྡོ་དྲེག་དམར་པོ་རྣམས་སའི་རཀྟ། ཙནྡན་དམར་པོ། སེང་སྡེང་། མཛོ་མོ་ཤིང་། ཀན་ད་ཀ་རི་དམར་པོ། ཤེར་ཤིང་དམར་པོ་རྣམས་ཤིང་གི་རཀྟ། པདྨ་རཱ་ག །བྱུ་རུ། མཆོང་དམར། མེ་ཤེལ། རྡོ་རྒྱུས་དམར་པོའམ། སྨུག་པོ་སྦལ་རྒྱལ་རྣམས་རྡོའི་རཀྟ། ཧ་ལོ། ཨུག་ཆོས། གླང་སྣ། སེ་རྒོད། །ལུག་རུ་དམར་པོ་རྣམས་མེ་ཏོག་གི་རཀྟ། ར་མོ་ཤག །ཉེ་ཤིང་། སྙ་ལོ། །ཁྲག་རྐང་། སྨྱུག་མ་དམར་པོ་རྣམས་རྩ་བའི་རཀྟ། འདིའི་ཁྲག་རྐང་ནི་མང་ཡུལ་དང་། མདོ་ཁམས་ཀློང་ཐང་གི་ཕྱོགས་སུ་འབྱུང་བར་གསུངས་ཏེ། ལེའུ་ལྔ་པ་ལས། རཀྟ་མཱུ་ལ་ཁྲག་གི་ཉུང་མ་ཞེས། །མང་ཡུལ་ཁྲིག་བབས་མདོ་ཡུལ་གྱི། །ཀློང་ཐང་སྒྲོན་མའི་གནས་སུ་སྐྱེ། །འདི་ཡང་སྲིད་པའི་རཀྟ་ཡིན། །ཞེས་གསུངས། རྒུ་འབྲུམ། རམ་བུ། ཁ་སྲན་བྲེ་པོ། བ་མཁལ་སྨུག་པོ། སྐྱུ་རུ་ར་རྣམས་འབྲུའི་རཀྟ། རྒྱ་སྐྱེགས། སིནྡྷུ་ར། འབྲི་མོག །བུ་རམ། བྲག་ཞུན་རྣམས་རྩ་བའི་རཀྟར་ངོས་འཛིན་མཛད་སྣང་ལ། དེ་དག་གི་ཡན་ལག་ཏུ་བཙག་སོགས་ས་དམར་གྱི་རིགས་སུ་གྱུར་ཚད་དང་། ཟངས་སོགས་རིན་པོ་ཆེའི་རིགས་དང་། རྡོ་རིགས་དམར་པོར་གཏོགས་ཚད། བཙོད་དང་། འོམ་བུ་སོགས་ཤིང་དང་། ལྡུམ་བུའི་རིགས་དམར་པོར་གཏོགས་ཚད། ཨུཏྤལ་དམར་པོ་དང་། ཤང་ཤང་དྲིལ་བུ་དམར་པོ་སོགས་མེ་ཏོག་དམར་པོར་གཏོགས་ཚད། སྣ་མའི་འབྲུ་དང་། དབྱི་མོང་། འོལ་མོ་སེ་སོགས་འབྲས་བུ་དམར་པོའི་རིགས་དང་། འབྲས་དམར། ཁྲེ་དམར་སོགས་འབྲུ་རིགས་དམར་པོའི་རིགས་དང་། ལི་ག་དུར་སོགས་རྩ་བ་དམར་པོའི་རིགས་སུ་གཏོགས་ཚད་དང་། ཡུགས་ས་མོ་དང་། མཛེ་མོ་དང་། དམ་ཉམས་དང་། རབས་ཆད་དང་། སེ་མོག་ཅན་མ་གཏོགས་པའི་བུད་མེད་ཀྱི་ཟླ་མཚན་འཛོམ་གང་ཆེ། གཞན་ཡང་ཕུག་རོན། ལུག །བ་ལང་། དྲེའུ་སོགས་རབས་ཆད། དམེ་ཕོ། དམ་ཚིག་ཉམས་པ། པུ་ཤུད། ཟེར་མོ། སོ་ཏོ་རོག་པོ་སོགས་ཀྱི་ཁྲག་མ་གཏོགས་པའི་ཁྲག་སྣ་རིགས་གང་རྙེད་དང་། དེའང་གཡུལ་དུ་བསད་པ་ལྟ་བུའི་དམིགས་བསལ་མ་གཏོགས། གཞན་རྣམས་གསོན་ཁྲག་ཁོ་ན་བྱུང་ན་ལེགས་ཤིང་། རཀྟའི་རྒྱུད་ལས་མཆོག་བསྒྲལ་གྱི་རཀྟ་ཉེར་གསུམ་ཞེས། རུ་དྲ། དབང་ཕྱུག །ཚངས་པ། འཇོག་པོ། ཁྱབ་འཇུག་སྟེ་དུག་ལྔ་བསྒྲལ་བའི་ཁྲག་ཆེན། མ་ཧཱ་དེ་ཝ། བིཥྞུ་རཱ་ཛ། བྷྲྀངྒི་རི་ཏི། ཚོགས་བདག །དགའ་བྱེད་དབང་ཕྱུག །ཁྱབ་འཇུག །སྟོབས་བཟང་། གཞོན་ནུ་སྨིན་དྲུག་སྟེ་ཚོགས་བརྒྱད་བསྒྲལ་བའི་ཁྲག་ཆེན། བསྒྲལ་བའི་ཞིང་བཅུའི་ཁྲག་ཆེན་རྣམས་ཀྱང་ཚོགས་དགོས་པར་གསུངས་ནའང་གཏེར་བྱོན་གྱི་ཕབ་གཏའ་རྣམས་ལ་འདུས་ཤིང་། དེར་མ་ཟད་བདུད་རྩི་སྨན་གྱི་སྐབས་གསང་ཆེན་མཆོག་གི་མྱུར་ལམ་ལས། དེ་ལ་ས་བོན་ནི་མི་ལ་ནྲི་ལྗང་གུ་དང་། དུད་འགྲོ་སྤྱི་ལ་སུ་སེར་པོ་ཡིན་པས་མི་དང་། བྱོལ་སོང་གི་རྣམ་པ་མཐའ་ཡས་པ་བློས་བཏགས་ཏེ། དེ་དག་ཀྱང་རང་རང་གི་ལས་ཀྱིས་ཤི་བའི་ཤར་མོས་ལ་སྦྱར་བར་བྱའོ། །ཞེས་སྨན་སྒྲུབ་ལ་གཏོང་འོས་པའི་ཤ་མ་རྙེད་ན་ཡིད་ཀྱིས་དེ་ལྟར་བཏགས་ནས་བྱ་བར་གསུངས་པ་བཞིན་དུ་འདིར་རཀྟ་རྙེད་དཀའ་བ་རྣམས་ལ་ཡང་རིག་པས་སྦྱོར་ཚུལ་འདྲ་བར་སེམས་སོ། །གང་ལྟར་ཡང་དེ་རྣམས་ལས་རྩ་བའི་རཀྟ་བརྐོ་བར་འོས་པ་རྣམས་སྟོན་ཟླ་ར་བའི་ཉ་སྟོང་བརྒྱད་གསུམ་གང་རུང་ལ་བཙལ་བར་བྱ་སྟེ། དེའི་དུས་སུ་དང་པོར་ས་ཕྱོགས་དེར་སྟེགས་བུ་ཁེབས་ལྡན་གྱི་དབུས་སུ་མཎྜ་ལར་ཙནྡན་དམར་པོས་བྱུགས་པའི་དབུས་སུ་ཚོམ་བུ་དམར་པོ་བཀོད། སྨན་རཀ་གཏོར་མཆོད་ཀྱིས་བསྐོར། །སྐྱབས་སེམས་དང་ལྷག་པའི་ལྷ་གང་ཡང་རུང་བའི་བདག་བསྐྱེད་བཟླས་པ་དང་བཅས་པ་སྔོན་དུ་འགྲོ་བས་མཆོད་གཏོར་རྣམས་སྤྱི་ལྟར་བརླབ། རང་གི་ཐུགས་སྲོག་ས་བོན་ལས། །འོད་འཕྲོས་བཅོམ་ལྡན་སྣང་མཐའ་ཡས། །རྩི་ཡི་ལྷ་མོའི་ཚོགས་དང་བཅས། །མདུན་གྱི་ནམ་མཁར་སྤྱན་དྲངས་གྱུར། །ཨོཾ་ཨ་མི་ཏ་བྷཱ་ས་པ་རི་ཝཱ་ར་ཨེ་ཧྱེ་ཧི། བཛྲ་ས་མཱ་ཛཿ ཛཿཧཱུྃ་བྃ་ཧོཿ ཨོཾ་བཛྲ་ཨརྒྷཾ་ནས། ཤབྡ་སརྦ་པཉྩ་རཀྟ་བ་ལིཾ་ཏ་ཁཱ་ཧི། རྡོ་རྗེ་དཔག་མེད་རྒྱལ་པོ་ཆེ། །མི་རྟོག་རྡོ་རྗེ་ནམ་མཁའ་འཛིན། །འདོད་ཆགས་ཕ་རོལ་ཕྱིན་པ་བརྙེས། །པདྨ་མཁའ་འགྲོར་ཕྱག་འཚལ་བསྟོད། །རང་གི་ཐུགས་ནས་འོད་འཕྲོས་པས། །མདུན་གྱི་ལྷ་ཚོགས་ཐུགས་རྒྱུད་བསྐུལ། །རཀྟ་རྩི་ཡི་དངོས་གྲུབ་ཀུན། །ཐོགས་པ་མེད་པར་སྩལ་བར་གྱུར། ཨོཾ་རཀྟ་མཱུ་ལ་པུཎྱེ་པུཎྱེ་སྭ་ཧཱ། ཞེས་བཟླ་བཞིན་དུ་བརྐོལ། མཐར་ཡིག་བརྒྱ་བརྗོད་ཅིང་མགྲོན་རྣམས་རང་གནས་སུ་གཤེགས་པར་བསམ། དེས་མཚོན་ཏེ་མེ་ཏོག་གི་རཀྟ་རྣམས་འདབ་མ་རྒྱས་པའི་དུས་སུ་བཏུ། འབྲས་བུའི་རཀྟ་རྣམས་སྨིན་པའི་དུས་དང་བསྟུན་ལ་བླང་། དེ་ལྟར་རྩ་བ་དང་ཡན་ལག་གི་རཀྟ་རྣམས་ལེགས་པར་བཏུས་ནས་གཡག་རྒོད་དང་ར་ལ་སོགས་པའི་གསོན་ཁྲག་གཙང་མར་སྦྱར་ཏེ་བྷནྡྷ་དུམ་བུ་གསུམ་པ་སོགས་མོ་ཐོད་མཚན་ཉིད་ཚང་བའི་སྣོད་དུ་བསྐྱིལ། སྟེང་ནས་ཕོ་ཐོད་ཀྱིས་དགབ། དར་དམར་གྱིས་དྲིལ། ཚོན་སྐུད་སྣ་ལྔས་བཅིངས་ལ་བདུད་རྩི་ལྔས་སྤགས་པའི་མཎྜལ་དམར་པོའི་དབུས་སུ་གཞག་པའི་མཐར་མཆོད་གཏོར་ཀྱིས་བསྐོར། སྤྲོ་ན་བཀའ་བརྒྱད་སོགས་ཀྱི་སྒྲུབ་པའི་ཁོག་དབུབས་ཀྱིས་གཞུང་བསྲང་བའམ། གང་ལྟར་ཡང་ཕྱི་མཚམས་དམ་པར་བཅད་ནས་སྒྲུབ་པ་ལ་འཇུག་གོ །གཉིས་པ་ལ་གསུམ། བདག་བསྐྱེད་གསལ་བ། མདུན་བསྐྱེད་བསྒྲུབ་པ། དངོས་གྲུབ་བླང་བའོ། །དང་པོ་ནི། ཚོགས་ཞིང་ནམ་མཁའ་གང་བར་སད་པར་གྱུར་པའི་སྤྱན་སྔར། རྡོ་རྗེ་སློབ་དཔོན་སངས་རྒྱས་དཔལ་ཞེས་སོགས་ཀྱིས་ཚོགས་བསགས་པའི་མཐར་ཚོགས་ཞིང་རྣམས་རང་ལ་ཐིམ་པར་བསམ། སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ཅེས་ཚད་མེད་བཞི་བསྒོམ་པ་སྔོན་དུ་འགྲོ་བས། རྃ་ཡྃ་ཁྃ། །རྣམ་དག་ཆོས་དབྱིངས་ངང་ཉིད་ལས། །རང་བྱུང་མཆོད་པའི་ཕུང་པོ་ནི། །ཀུན་བཟང་མཆོད་པའི་སྤྲིན་ལྟ་བུ། །དཔག་ཡས་ནམ་མཁའ་གང་བར་གྱུར། །ཨོཾ་སརྦ་པཱུ་ཛ་མེགྷ་ཨཱཿཧཱུྃ། ཞེས་པས་མཆོད་གཏོར་བརླབ། ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏཱ་ཀོ྅ཧཾ། སྣང་སྲིད་འཁོར་འདས་ཆོས་རྣམས་ཀུན། །འོད་གསལ་སྟོང་ཉིད་དབྱིངས་ཀྱི་ངང་། །རིག་པ་ཡེ་ཤེས་སྒྱུ་མའི་ལྷ། །སྐུ་ཡི་དཀྱིལ་འཁོར་བསམ་ལས་ཀྱང་། །ཁྲག་འཐུང་རྒྱལ་པོའི་སྐུ་ལ་འདུས། །པདྨ་ཉི་ཟླ་དྲེགས་པའི་སྟེང་། །བདག་ཉིད་ཆེ་མཆོག་སྨེ་བ་བརྩེགས། །ཞལ་གསུམ་ཕྱག་དྲུག་ཞབས་བཞི་བགྲད། །དབུས་མཐིང་དཔལ་ཆེན་ཉིད་ཀྱི་ཞལ། །གཡས་དཀར་ཁྲོ་མོ་གཽ་རཱི་མ། གཡོན་དམར་ལྷ་མོ་པྲ་མོ་ཧཱ། །ཕྱག་དྲུག་གཡས་གཡོན་དང་པོ་གཉིས། །རྡོ་རྗེ་དྲིལ་འཛིན་ཡུམ་ལ་འཁྱུད། །གཡས་ཀྱི་གཉིས་པས་ཁ་ཊྭཱཾ་ག །གསུམ་པས་གསང་བའི་རྔེའུ་ཆུང་འཁྲོལ། །གཡོན་གྱི་གཉིས་པས་ཐོད་ཁྲག་དང་། །གསུམ་པས་རྒྱུ་མའི་ཞགས་པ་གདེངས། །ཕྱག་མཚན་དྲུག་པོ་ལྷ་མོ་དྲུག །གར་དགུའི་ཉམས་ལྡན་མེ་དབུས་འགྱིང་། །ཡུམ་ནི་ཀྲོ་དྷཱི་ཤྭ་རི་མཐིང་། །གྲི་ཐོད་འཛིན་པས་འཁྱུད་ཅིང་སྦྱོར། །རྔམས་བརྗིད་དུར་ཁྲོད་རོལ་པ་ཡི། །རྒྱན་ཆས་འཁོར་གྱི་ལྷ་རྣམས་ཏེ། །ཁྲག་འཐུང་རིགས་ལྔ་སིཾ་ཧ་བརྒྱད། །སྒོ་མ་དབང་ཕྱུག་ཉེར་བརྒྱད་དེ། །ལྔ་བཅུ་ཐམ་པ་ཚང་བར་བསྒོམ། །སྣང་སྲིད་གཞིར་བཞེངས་དཔལ་ཆེན་པོའི། །དཀྱིལ་འཁོར་ཆེན་པོར་ལྷུན་གྱིས་རྫོགས། ཞེས་གསལ་བཏབ་ལ་བཟླས་པ་བྱ་བ་ནི། གསུང་གི་དཀྱིལ་འཁོར་བསམ་ལས་ཀྱང་། །ཁྲག་འཐུང་རྒྱལ་པོའི་གསུང་དུ་འདུས། །རུ་ལུ་འབྲུ་བརྒྱད་གསུང་གི་སྔགས། །ཨཱོཾ་ནི་ཡེ་ཤེས་ཁྲག་འཐུང་ལྔ། །རུ་ལུ་གོང་མ་གཽ་རཱི་བརྒྱད། །རུ་ལུ་འོག་མ་སིཾ་ཧ་བརྒྱད། །ཧཱུྃ་ནི་ཕྱག་བརྙན་སྒོ་མ་བཞི། །བྷྱོ་ནི་རྣལ་འབྱོར་ཉི་ཤུ་བརྒྱད། ཧཱུྃ་ནི་ཡེ་ཤེས་སེམས་དཔའི་ཐུགས། །བསྙེན་པའི་དཀྱིལ་འཁོར་གསུང་གི་ལྷ། །གསལ་ཞིང་བཟླས་བའི་འོད་ཟེར་གྱིས། །དངོས་གྲུབ་རྣམ་གཉིས་ཐོབ་པར་གྱུར། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཞེས་བཟླས་མཐར། ཐུགས་ཀྱི་དཀྱིལ་འཁོར་བསམ་ཡས་ཀྱང་། །ཁྲག་འཐུང་རྒྱལ་པོའི་ཐུགས་ལ་འདུས། །ཡེ་ཤེས་སེམས་དཔའ་ཐུགས་དམ་ལྷ། །སངས་རྒྱས་རྩ་བའི་ཐུགས་ཀྱི་དངོས། །ཐིག་ལེ་བྱང་ཆུབ་སེམས་ཉིད་དེ། །བྱ་སྩོལ་མེད་པར་ཀུན་ལ་གནས། །འཛིན་ཆགས་མེད་པ་ཐུགས་ཀྱི་མཆོག །མ་འགགས་ཤར་བ་ཐུགས་ཀྱི་རྒྱན། །རང་སར་རྫོགས་པ་ཐུགས་ཀྱི་གནས། །ཞེས་པའི་དོན་ཆོས་ཉིད་བསམ་གྱིས་མི་ཁྱབ་པའི་དབྱིངས་སུ་མཉམ་པར་བཞག་གོ །གཉིས་པ་ལ་གཉིས། ཛཔ྄་ཁང་དབྱེ་བ་དང་། ཞལ་བསྒྱུར་བའོ། །དང་པོ་ནི། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ་ཛཿ བདག་གི་ཐུགས་ཀ་ནས་ཡེ་ཤེས་ཀྱི་ཕྱག་རྒྱ་གཉིས་པ་ལོགས་སུ་བྱེ་ནས་མདུན་གྱི་བསྒྲུབ་རྫས་དང་དབྱེར་མེད་དུ་བཞུགས་པར་གྱུར། ཅེས་བརྗོད་ཅིང་བསམས་ལ་རུ་ལུའི་ཛཔ྄་ཅི་ནུས་བཟླ་བས་གཟི་བྱིན་བསྐྱེད་དོ། །གཉིས་པ་ནི། མདུན་གྱི་ཁྲག་འཐུང་ཁྲོ་བོའི་རྒྱལ། །ཡོངས་གྱུར་གྱི་སྣོད་ཀ་པཱ་ལ། །ཡངས་ཤིང་རྒྱ་ཆེ་མཚན་ཉིད་རྫོགས། །ནང་བཅུད་ཁམས་གསུམ་རཀྟ་ཀུན། །གཅིག་ཏུ་འདུས་པའི་རྒྱ་མཚོའི་དབུས། །རཾ་ལས་རྡོ་རྗེ་སྒེག་མོ་དམར། །ཤིན་ཏུ་ཆགས་པའི་ཉམས་འགྱུར་ཅན། །ཕྱག་གཉིས་རཀྟའི་ཐོད་པ་བསྣམས། །ཞབས་ཟུང་དོར་སྟབས་པད་ཉིར་རོལ། །གཅེར་བུ་ནུ་འབུར་བྷ་ག་རྒྱས། །རཀྟའི་ཆར་རྒྱུན་འབེབས་པ་ཡི། །གནས་གསུམ་ཨོཾ་ཨཱཿཧཱུྃ་གིས་མཚན། །དེ་ལས་འོད་འཕྲོས་ཡེ་ཤེས་པ། །ཁྲག་འཐུང་དཀྱིལ་འཁོར་སྤྱན་དྲངས་གྱུར། །ཧཱུྃ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་ཁྲག་འཐུང་འཁོར་དང་བཅས། །གནས་འདིར་སྤྱན་འདྲེན་གཤེགས་སུ་གསོལ། །མ་ཧཱ་མཱཾ་ས་རཀྟ་ཨ་མྲྀ་ཏ་ཁཱ་ཧི་ཧ་ཧ་ཧེ་ཧེ་ཨ་ལ་ལ། བཀའ་ཉན་རོལ་པའི་བུ་མོ་ནི། །རྡོ་རྗེ་སྒེག་མོ་འདོད་ཆགས་ཆེ། །འདོད་ཅིང་ཆགས་པ་འཇོམས་པའི་མཆོག །མཆོད་པའི་རྫས་ས་བཞུགས་སུ་གསོལ། །རཀྟ་མ་ཧཱ་ས་མ་ཡ་ཏིཥྛ་ལྷན། ང་ནི་ཟ་བྱེད་ཆེན་པོ་སྟེ། །ཁམས་གསུམ་མ་ལུས་བསྒྲལ་བ་དང་། །གདུལ་དཀའ་མ་ལུས་འདུལ་བའི་ཕྱིར། །ཤ་རུས་ལ་སོགས་བཟའ་བར་བྱ། །ང་ནི་ཁྲག་འཐུང་ཆེན་པོ་སྟེ། །འཁོར་བའི་དྲྭ་བ་ཆགས་པའི་རྒྱུད། །དམར་ཆེན་པོ་ནི་རྒྱ་མཚོར་བསྐྱིལ། །མཁའ་འགྲོའི་ཚོགས་བཅས་རྣམས་ལ་རོལ། །མ་ལུས་བཞེས་ནས་བསྣམ་དུ་གསོལ། །མ་ཧ་རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། ག་ཎ་ཁཱ་ཧི། ཙཀྵུ་ཁཱ་ཧི། བཱ་སུ་ཏ་ཁཱ་ཧི། བ་ལིཾ་ཏ་ཁཱ་ཧི། ཀིཾ་ནི་རི་ཏི་ཁཱ་ཧི། མཱཾ་ས་ཁཱ་ཧི། ཤུ་ཀྲ་ཁཱ་ཧི། ཧཱུྃ། འདོད་ཆགས་ཆེན་པོའི་ཡེ་ཤེས་ཀྱིས། །ཁམས་གསུམ་འཁོར་བའི་ཉོན་མོངས་འཇོམས། །དབྱིངས་ཡུམ་རྡོ་རྗེ་སྒེག་མོ་ལ། །མཆོད་ཅིང་བསྟོད་དེ་དངོས་གྲུབ་སྩོལ། །རང་ཉིད་དཔལ་ཆེན་ཐུགས་ཀ་ནས། །འོད་འཕྲོས་ལྷ་མོའི་ཐུགས་རྒྱུད་བསྐུལ། །ཐུགས་རྗེ་ཆགས་པའི་འོད་ཟེར་གྱིས། །འཁོར་འདས་རཀྟ་ཐམས་ཅད་བཀུག །ཞལ་དུ་ཞུགས་ཤིང་སྐུ་ལས་བརྒྱུད། །པདྨའི་མཁའ་ནས་ཆར་ལྟར་བབས། །དྭངས་མཱ་རཀྟའི་རྒྱ་མཚོར་བསྐྱིལ། །ཤར་གྱི་རྦ་རླབས་ནུབ་ཏུ་འཕྱོ། ནུབ་ཀྱི་རྦ་རླབས་ཤར་དུ་འཕྱོ། །ལྷོ་ཡི་རྦ་རླབས་བྱང་དུ་འཕྱོ། །བྱང་གི་རྦ་རླབས་ལྷོ་རུ་འཕྱོ། །སྟེང་གི་རྦ་རླབས་འོག་ཏུ་འཕྱོ། འོག་གི་རྦ་རླབས་སྟེང་དུ་འཕྱོ། །ཤ་ཆེན་ལྷུ་དུམ་ལང་ལོང་དང་། །ཙིཏྟ་ཚིལ་ཆེན་ཆོལ་ལོ་ལོ། །རཀྟའི་རླངས་པ་ཕྱུ་རུ་རུ། །དྲི་ཡི་ངད་པ་ཆི་ལི་ལི། །གཟུགས་ཀྱི་ལྷ་མོ་བམ་དབྱུག་ཕྱར། །སྒྲ་ཡི་ལྷ་མོ་རྐང་གླིང་འབུད། །ལ་ལ་བྷནྡྷ་ཆ་ལང་བརྡེབ། །དྲི་ཡི་ལྷ་མོ་གསུར་ཆེན་བསྣམས། །རོ་ཡི་ལྷ་མོ་ཤ་ཆེན་ཐོགས། །རེག་བྱའི་ལྷ་མོ་ཞིང་ཕྲག་གྱོན། །བདེ་གཤེགས་རྣམས་ཀྱི་ཐུགས་དམ་བསྐང་། །མ་མོ་མཁའ་འགྲོའི་ཚོགས་སུ་རོལ། །རྣལ་འབྱོར་དབང་ཕྱུག་གཡར་དམ་སྐོང་། །འཁོར་འདས་རཀྟ་འདུས་པའི་བཅུད། །ཁྲག་ཆེན་འབར་བའི་དཀྱིལ་འཁོར་ནི། །དངོས་གྲུབ་ཀུན་གྱི་སྙིང་པོར་གྱུར། །ཞེས་དམིགས་ལ། རཀྟ་ཛྭ་ལ་མཎྜ་ལ་ཧཱུྃ། ཞེས་བཟླ་ཞིང་། སྟོང་ཕྲག་རེའི་མཚམས་སུ་སྟོད་ཚིག་གི་མཆོད་པའང་བྱ། ཐུན་བསྡུ་བའི་ཚེ་ཚོགས་མཆོད་བྱེད་ན་གསང་བ་སྤྱིའི་འགྲོས་ལྟར་བྱ། གང་ལྟར་ཡང་མཐར། མདུན་གྱི་ལྷ་མོ་འོད་དུ་ཞུ་ནས་རཀྟ་ལ་ཐིམ་པས་ཁྲག་ཆེན་འབར་བའི་དཀྱིལ་འཁོར་ཁ་དོག་དམར་གསལ་ཉི་མ་བྱེ་བའི་གཟི་འོད་ཅན་རཀྟའི་རྦ་རླབས་ཕྱོགས་བརྒྱར་གཡོ་ཞིང་ཟེགས་མ་གང་ལ་རེག་པས་དངོས་གྲུབ་རྣམ་གཉིས་ཀྱི་དོན་བྱེད་ནུས་པར་གྱུར། ཅེས་བརྗོད་ཅིང་བསམས་ལ་སླར་ཡང་བཟླས་པས་བརྟན་པར་བྱ། དགེ་བ་འདི་ཡིས་མྱུར་དུ་བདག །ཧེ་རུ་ཀ་དཔལ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་བསྔོ་སྨོན་དང་། ཤིས་བརྗོད་རྒྱས་པར་བྱའོ། །དེ་ལྟར་ཐུན་བཞིའམ་དྲུག་སོགས་སུ་བཅད་ནས་བསྒྲུབས་པས། རཀྟ་ལས་འོད་དང་། སྒྲ་དང་། དྲི་མ་ཁྱད་པར་ཅན་འཐུལ་བ་སོགས་རྟགས་བྱུང་བ་ན། གསུམ་པ་དངོས་གྲུབ་བླང་བ་ནི། ལྷ་མོ་རཀྟ་ལ་བསྟིམ་པའི་རྗེས་སུ་ཐོད་པའི་རྒྱ་བཀྲོལ་ལ། རཀྟའི་དྭངས་བཅུད་འོད་ཟེར་འབར་བ་རང་གི་སྙིང་གར་ཐིམ། མི་ཤིགས་པའི་ཐིག་ལེ་དང་རོ་གཅིག་ཏུ་གྱུར་པས་སྲིད་ཞིའི་ཁམས་ན་ཆེ་བཙན་འགྲན་ཟླ་དང་བྲལ་བ་དཔལ་ཆེན་པོའི་སྐུ་གསུང་ཐུགས་དང་དབྱེར་མེད་པར་གྱུར་པའི་མོས་པ་དང་བཅས། ཕུད་ཀྱིས་དཀྱིལ་འཁོར་གྱི་ལྷ་ཚོགས་ནམ་མཁའ་གང་བར་སད་པ་ལ། ཧཱུྃ། རྡོ་རྗེ་སྒེག་མོ་འདོད་ཆགས་ཆེ། །རཀྟ་པདྨ་ལས་བྱུང་བ། །ཐིག་ལེ་ཟག་མེད་བདེ་བ་ཆེ། འདོད་ཆགས་འཁོར་བ་སྟོང་ཕྱིར་བཞེས། །མ་ཧཱ་རཀྟ་ཁཱ་ཧི། ཞེས་མཆོད། ལྷག་མ་རྣམས་རིལ་བུའམ། ཕུར་མར་བྱས་ཏེ་གྲིབ་མར་བསྐམ། སླར་སྣོད་བཟང་པོར་ཚགས་བྱས་ཏེ་མཆོད་པའི་རྫས་སུ་སྤེལ་ལོ། །གསུམ་པ་དེ་ལྟར་བསྒྲུབས་པའི་དམ་ཚིག་རྫས་ཆེན་པོའི་ཕན་ཡོན་ནི། རྒྱུད་ལས། འབྲས་བུ་སྐུ་དང་ཡེ་ཤེས་ཐོབ། །མ་མོ་མཁའ་འགྲོ་བྲན་བཞིན་ཉན། །དུས་གསུམ་བདེ་གཤེགས་བྱིན་གྱིས་རློབས། །གཟུངས་མ་བྲན་འཁོར་དབང་དུ་འདུ། །དགྲ་བགེགས་འབྱུང་པོ་འདར་ཞིང་སྐྲག །ཅེས་མཆོག་དང་ཐུན་མོང་གི་དངོས་གྲུབ་ཐམས་ཅད་རཀྟའི་མཆོད་པ་དང་ལས་ལ་སྦྱར་བས་འགྲུབ་པར་གསུངས་པས་མཚོན་རྒྱ་ཆེར་ཤེས་པར་བྱ་ཞིང་། ལས་སྦྱོར་གྱི་ཚུལ་ཡང་དེ་ཉིད་ལས། བཀྲ་ཤིས་ཉམས་དགའ་ཡིད་འོང་དུ། །ཕུན་སུམ་ཚོགས་པ་བཞི་ལྡན་པས། །ཕྲིན་ལས་ཞི་རྒྱས་དབང་དྲག་བཞི། །ཞེས་སོགས་སྤྱིར་ལས་བཞི་དང་། ཁྱད་པར་ཁྲག་ཟོར་སྒྲུབ་པའི་ཐབས་སོགས་གསུངས་པས་མཚོན་རྒྱུད་དང་མན་ངག་རྣམས་ལས་མང་དུ་འགྱུར་བ་ལྟར་རྟོགས་པར་བྱའོ། །རྡོ་རྗེའི་ཆགས་པས་ཁམས་གསུམ་གྱི། །འདོད་ཆགས་འཇོམས་པའི་དམ་ཚིག་རྫས། །རཀྟའི་སྒྲུབ་ཚུལ་བརྗོད་པའི་དགེས། །འགྲོ་ཀུན་ཧེ་རུ་ཀར་གྱུར་ཅིག །ཅེས་པའང་དཔལ་ཁྲག་འཐུང་ཆེན་པོས་བཀའ་སྩལ་པའི་རཀྟ་དམར་གྱི་རྒྱུད་སྡེའི་དགོངས་པ་གཙོ་བོར་སྦྱར་བ་སྟེ། གཞན་དུ་སྤྱིའི་རྣམ་བཞག་འདི་ལྟར་ངེས་པར་བྱས་ན། སྒྲུབ་ཚུལ་བཀའ་དགོངས་ཕུར་གསུམ་སོགས་རང་རང་གང་ལ་མོས་པའི་གཞུང་ལྟར་བྱིན་གྱིས་བརླབས་པས་ཀྱང་དོན་གྲུབ་པ་ཡིན་ནོ། ། ༈

[edit]

dam rdzas rak+ta'i sgrub tshul dngos grub snying po/ @#/_/dam rdzas rak+ta'i sgrub tshul dngos grub snying po zhes bya ba bzhugs so/__/oM swa sti/__/chags bral bde chen snang mtha' yas/__/dpal ldan bla mar gus btud nas/__/chags med rdo rje'i dam tshig rdzas/__/rak+ta'i sgrub tshul snying po 'bri/__'di la lnga/__ngo bo/__nges tshig__/dbye ba/__byung khungs/__sgrub pa'i rim pa rnams so/__/dang po ni/__srid zhi gang rung gis bsdus shing ma rtogs na chags pa'i gzhi dang /__rtogs na chags bral gyi sgrub rdzas su nges pas rab tu phye ba'i rigs su gnas pa ste/__rak+ta dmar gyi rgyud las/__rak+ta'i ngo bo chags pa yin/__zhes gsungs/__gnyis pa nges tshig ni/__rak+ta'i sgra las drangs te kha dog dmar ba la 'jug la/__snang srid thams cad kyang dkar dmar gyi zlas phye ba'i dmar cha shes rab stong pa nyid kyi rang bzhin du nges pa'i phyir na rak+ta ste/__rak+ta dmar gyi rgyud las/__thams cad raka pas rak+ta yin/__zhes gsungs/__gsum pa dbye ba ni/__sgras brjod rigs kyi sgo nas dbye na lnga ste/__srid pa gzhi'i rak+ta/__'khor ba rgyu'i rak+ta/__'gyur med rigs kyi rak+ta/__'bras bu chen po'i rak+ta/__bsgrub rdzas grangs kyi rak+ta ste lnga las/__dang po ni/__'byung ba chu dang chu'i rigs su gtogs pa thams cad de/__de nyid las/__gzhi yi rak+ta 'byung ba chu/__zhes gsungs/__gnyis pa ni/__ma'i mngal khrag ste/__de nyid las/__rgyu yi rak+ta pad+ma'i khrag__/ces gsungs/__gsum pa ni/__so sor rtog pa'i ye shes dang /__de'i bdag nyid kyi gsung rdo rje snang ba mtha' yas kyi ngo bor bzhugs pa rnams te/__de nyid las/__rigs kyi rak+ta snang mtha' yas/__/zhes gsungs/__bzhi pa ni/__ru dra sde gsum dpal chen pos bsgral ba'i snying khrag ste/__de nyid las/__'bras bu'i rak+ta tsit+ta'i khrag__/ces gsungs/__lnga pa/__sgrub rdzas kyi rak+ta la so lngar mchis te/__de nyid las/__grangs kyi rak+ta sum cu lnga/__zhes gsungs/__yang mtshon byed dpe'i rak+ta dang /__mtshon bya don gyi rak+ta gnyis su phye nas/__dang po la/__mU la rtsa ba'i rak+ta/__ma 'dres dwangs ma'i rak+ta/__zungs ldan bcud kyi rak+ta/__sna tshogs phal pa'i rak+ta ste bzhir phye/__dang po la/__srog can rtsa ba'i rak+ta dang /__srog med rtsa ba'i rak+ta gnyis las/__dang po ni/__rang srog rang gis bcad nas lcebs te shi ba'i bam gyi srog rtsa'i khrag dang /__mkha' lding ste bya sha zan rnams kyi srog rtsa'i khrag dang /__khyi nag 'og can gyi srog rtsa'i khrag dang /__glang 'og can rog po'i srog rtsa'i khrag dang /__rta gseb nag po'i srog rtsa'i khrag rnams te/__glang chen rab 'bog gi rgyud las/__rang shi bam gyi srog rtsa'i khrag__/mkha' lding ku ku rA tsa'i khrag__/de bzhin glang po rta yi khrag__/mchod cing thugs dam skong ba'i rdzas/__/gsung gi dngos grub rten tu bsham/__/zhes gsungs/__gnyis pa la/__shing gi khrag shing dmar po/__rtsa ba'i khrag mon bu dmar po/__'bras bu'i khrag ram bu dmar po/__me tog gi khrag lug ru dmar po/__sdong po yal 'dab dang bcas pa'i khrag seng ldeng dmar po rnams te/__gza' rgyud rin chen 'khor lo las/__sa shing rtsa ba mon bu dang /__ram bu lug ru dmar po dang /__/sdong po yal 'dab seng ldeng khrag__/ces gsungs/__gnyis pa ma 'dres dwangs ma'i rak+ta la gsum ste/__ma hA rak+ta/__pad+ma rak+ta/__ma 'dres rak+ta rnams so/__/dang po ni/__gdug can dgra bgegs bsgral ba'i khrag chen no/__/gnyis pa ni/__bu mo rdo rje'i mda' ma phog pa'i zla mtshan thog mar babs pa de'o/__/gsum pa ni/__gzhan gyis longs ma spyad pa'i srog can rtsa ba'i rak+ta gang yang rung ba ste/__ma mo srid pa'i rgyud lung las/__ma hA rak+ta bsgral ba'i khrag_/pad+ma rak+ta gsal ba'i khrag__/chu dang ma 'dres dwangs ma'i khrag__/stong la sbyar ba'i khrag chen po/__/zhes gsungs/__gsum pa zungs ldan bcud kyi rak+ta la gsum ste/__sna khrag__/gtar khrag__/mngal khrag go__dang po ni/__skyes pa dang bu mo lo bcu drug nas nyer lnga'i bar gyi lang tsho dar ba'i sna khrag go__/gnyis pa ni/__de dag gi lus la gtar ba'i khrag go__/gsum pa ni/__bu mo lang tsho rgyas pa'i zla mtshan te/__de nyid las/__pho mo dar ma'i sna khrag dang /__/de bzhin lus la gtar ba'i khrag__/gzhon nu lang tsho'i mngal khrag go/_/zhes gsungs/__bzhi pa phal ba'i rak+ta ni/__mdze khrag dang /__rabs chad ma yin pa'i khrag snang gtogs so cog ste/__de nyid las/__phal pa gang yang rung ba'i khrag_/mdze dang mdzo rtol spangs pa'o/__/zhes gsungs/__gnyis pa mtshon bya don gyi rak+ta ni/__chags rtog dbyings su dag pa'i bde ba chen po'i ye shes te/__thugs rje chen po bde gshegs kun 'dus kyi sgrub thabs las/__nyon mongs chags pa 'khor ba'i khrag:__chags med bde chen dbyings su bsgral:__'dod yon rdo rje'i dam tshig che:__'khor ba bsgral phyir bzhes su gsol:__zhes gsungs/__bzhi pa byung khungs ni/__dpal chen po khrag 'thung he ru ka'i thugs ka nas spros pa'i ma mo chen mo b+ha ga hrI ti ma zhes bya bas snang srid 'khor 'das thams cad la bdag gir mdzad de thugs rje kun khyab tu bzhugs pa las/__ma mo thams cad kyi rje mo e ka dzA Ti ma phyung ngo /__/des rak+ta thams cad kyi dwangs snyigs gsum du phye ste/__dwangs ma las sangs rgyas byang chub sems dpa' 'phags pa la sogs pa 'jig rten las 'das pa'i bkod pa rnams snang bar byas/__bar pa las 'jig rten gyi lha mi sogs bde 'gro ba rnams dang /__snyigs ma las ngan song gsum gyi 'jig rten rnams snang bar mdzad do/__/de'i tshe dpal chen po'i dpral ba'i dbyings nas sme ba dmar po zhig byung ste de'i nang nas yum chen mkha' la gshog gcig ma dang /__gtsug na ral gcig ma dang /__/dbyings kyi ral gcig ma dang /__gling bzhi drag mo rgyal te yum chen bzhi phyungs nas/__de rnams kyis rim par me tog gi rak+ta lnga/__rtsa ba'i rak+ta lnga/__rdo'i rak+ta lnga/__'bras bu'i rak+ta lnga rnams sprul pa'i tshul sogs rak+ta dmar gyi rgyud las gsungs so/__/lnga pa sgrub pa'i thabs la gsum ste/__sbyor ba yo byad kyi shoms/__dngos gzhi sgrub pa'i thabs/__rjes phan yon dang las tshogs bstan pa'o/__/dang po ni/__rak+ta'i rtsa ba brgyad/__yan lag so lnga/__de las 'phros pa bsam gyis mi khyab pa las/__dang po rtsa ba brgyad la/__nang gi rtsa ba bzhi/__phyi'i rtsa ba bzhi las/__dang po nang gi rtsa ba bzhi ni/__yab kyi shangs bug g.yas ro ma'i lam nas byung ba'i rak+ta/__yum gyi b+ha ga'i pad+ma las babs pa'i rak+ta/__srid pa chags pa'i lte khrag ste lte ba bcad pa'i khrag__/'bras bu chen po bsgral ba'i khrag ste dpal chen pos ru dra bsgral ba'i snying khrag rnams la/__phyi ma 'di gter byon gyi rak+ta'i dam rdzas rnams la 'dres shing /__ma rnyed na dpa' bo g.yul du bsad pa'i snying khrag gis bya'o/__/gnyis pa phyi'i rtsa ba bzhi ni/__stag gzig sogs sder chags/__bya rgod sogs 'dab chags/__rta bong sogs rmig zlum/__g.yag sogs rmig pa kha brag gi khrag sna'am/__yang na rak+ta'i rgyud las/__glang chen/__ma he/__stag__/dpa' bo g.yul du bsad pa'i snying khrag la'ang bshad pas gang 'byor dang /__yan lag gi rak+ta so lnga ma rgyud nas bshad tshul mi 'dra ba gnyis su gsungs na'ang /__deng sang yongs grags rnyed sla ba/__mtshal/__li khri/__btsag__/ldong ros/__rdo dreg dmar po rnams sa'i rak+ta/__tsan+dan dmar po/__seng sdeng /__mdzo mo shing /__kan da ka ri dmar po/__sher shing dmar po rnams shing gi rak+ta/__pad+ma rA ga__/byu ru/__mchong dmar/__me shel/__rdo rgyus dmar po'am/__smug po sbal rgyal rnams rdo'i rak+ta/__ha lo/__ug chos/__glang sna/__se rgod/__/lug ru dmar po rnams me tog gi rak+ta/__ra mo shag__/nye shing /__snya lo/__/khrag rkang /__smyug ma dmar po rnams rtsa ba'i rak+ta/__'di'i khrag rkang ni mang yul dang /__mdo khams klong thang gi phyogs su 'byung bar gsungs te/__le'u lnga pa las/__rak+ta mU la khrag gi nyung ma zhes/__/mang yul khrig babs mdo yul gyi/__/klong thang sgron ma'i gnas su skye/__/'di yang srid pa'i rak+ta yin/__/zhes gsungs/__rgu 'brum/__ram bu/__kha sran bre po/__ba mkhal smug po/__skyu ru ra rnams 'bru'i rak+ta/__rgya skyegs/__sin+d+hu ra/__'bri mog__/bu ram/__brag zhun rnams rtsa ba'i rak+tar ngos 'dzin mdzad snang la/__de dag gi yan lag tu btsag sogs sa dmar gyi rigs su gyur tshad dang /__zangs sogs rin po che'i rigs dang /__rdo rigs dmar por gtogs tshad/__btsod dang /__'om bu sogs shing dang /__ldum bu'i rigs dmar por gtogs tshad/__ut+pal dmar po dang /__shang shang dril bu dmar po sogs me tog dmar por gtogs tshad/__sna ma'i 'bru dang /__dbyi mong /__'ol mo se sogs 'bras bu dmar po'i rigs dang /__'bras dmar/__khre dmar sogs 'bru rigs dmar po'i rigs dang /_li ga dur sogs rtsa ba dmar po'i rigs su gtogs tshad dang /__yugs sa mo dang /__mdze mo dang /__dam nyams dang /__rabs chad dang /__se mog can ma gtogs pa'i bud med kyi zla mtshan 'dzom gang che/__gzhan yang phug ron/__lug__/ba lang /__dre'u sogs rabs chad/__dme pho/__dam tshig nyams pa/__pu shud/__zer mo/__so to rog po sogs kyi khrag ma gtogs pa'i khrag sna rigs gang rnyed dang /__de'ang g.yul du bsad pa lta bu'i dmigs bsal ma gtogs/__gzhan rnams gson khrag kho na byung na legs shing /__rak+ta'i rgyud las mchog bsgral gyi rak+ta nyer gsum zhes/__ru dra/__dbang phyug__/tshangs pa/__'jog po/__khyab 'jug ste dug lnga bsgral ba'i khrag chen/__ma hA de wa/__biSh+Nu rA dza/__b+hr-ing+gi ri ti/__tshogs bdag__/dga' byed dbang phyug__/khyab 'jug__/stobs bzang /__gzhon nu smin drug ste tshogs brgyad bsgral ba'i khrag chen/__bsgral ba'i zhing bcu'i khrag chen rnams kyang tshogs dgos par gsungs na'ang gter byon gyi phab gta' rnams la 'dus shing /__der ma zad bdud rtsi sman gyi skabs gsang chen mchog gi myur lam las/__de la sa bon ni mi la n+ri ljang gu dang /__dud 'gro spyi la su ser po yin pas mi dang /__byol song gi rnam pa mtha' yas pa blos btags te/__de dag kyang rang rang gi las kyis shi ba'i shar mos la sbyar bar bya'o/__/zhes sman sgrub la gtong 'os pa'i sha ma rnyed na yid kyis de ltar btags nas bya bar gsungs pa bzhin du 'dir rak+ta rnyed dka' ba rnams la yang rig pas sbyor tshul 'dra bar sems so/__/gang ltar yang de rnams las rtsa ba'i rak+ta brko bar 'os pa rnams ston zla ra ba'i nya stong brgyad gsum gang rung la btsal bar bya ste/__de'i dus su dang por sa phyogs der stegs bu khebs ldan gyi dbus su maN+Da lar tsan+dan dmar pos byugs pa'i dbus su tshom bu dmar po bkod/__sman raka gtor mchod kyis bskor/__/skyabs sems dang lhag pa'i lha gang yang rung ba'i bdag bskyed bzlas pa dang bcas pa sngon du 'gro bas mchod gtor rnams spyi ltar brlab/__rang gi thugs srog sa bon las/__/'od 'phros bcom ldan snang mtha' yas/__/rtsi yi lha mo'i tshogs dang bcas/__/mdun gyi nam mkhar spyan drangs gyur/__/oM a mi ta b+hA sa pa ri wA ra e h+ye hi/__badz+ra sa mA dzaH__dzaHhU~M ba~M hoH__oM badz+ra ar+g+haM nas/__shab+da sarba pany+tsa rak+ta ba liM ta khA hi/__rdo rje dpag med rgyal po che/__/mi rtog rdo rje nam mkha' 'dzin/__/'dod chags pha rol phyin pa brnyes/__/pad+ma mkha' 'gror phyag 'tshal bstod/__/rang gi thugs nas 'od 'phros pas/__/mdun gyi lha tshogs thugs rgyud bskul/__/rak+ta rtsi yi dngos grub kun/__/thogs pa med par stsal bar gyur/__oM rak+ta mU la puN+ye puN+ye swa hA/__zhes bzla bzhin du brkol/__mthar yig brgya brjod cing mgron rnams rang gnas su gshegs par bsam/__des mtshon te me tog gi rak+ta rnams 'dab ma rgyas pa'i dus su btu/__'bras bu'i rak+ta rnams smin pa'i dus dang bstun la blang /__de ltar rtsa ba dang yan lag gi rak+ta rnams legs par btus nas g.yag rgod dang ra la sogs pa'i gson khrag gtsang mar sbyar te b+han+d+ha dum bu gsum pa sogs mo thod mtshan nyid tshang ba'i snod du bskyil/__steng nas pho thod kyis dgab/__dar dmar gyis dril/__tshon skud sna lngas bcings la bdud rtsi lngas spags pa'i maN+Dal dmar po'i dbus su gzhag pa'i mthar mchod gtor kyis bskor/__spro na bka' brgyad sogs kyi sgrub pa'i khog dbubs kyis gzhung bsrang ba'am/__gang ltar yang phyi mtshams dam par bcad nas sgrub pa la 'jug go__/gnyis pa la gsum/__bdag bskyed gsal ba/__mdun bskyed bsgrub pa/__dngos grub blang ba'o/__/dang po ni/__tshogs zhing nam mkha' gang bar sad par gyur pa'i spyan sngar/__rdo rje slob dpon sangs rgyas dpal zhes sogs kyis tshogs bsags pa'i mthar tshogs zhing rnams rang la thim par bsam/__sems can bde dang ldan gyur cig__/sdug bsngal kun dang bral bar shog__/bde dang rtag tu mi 'bral zhing /__/chos kun mnyam nyid rtogs par shog__/ces tshad med bzhi bsgom pa sngon du 'gro bas/__ra~M ya~M kha~M/__/rnam dag chos dbyings ngang nyid las/__/rang byung mchod pa'i phung po ni/__/kun bzang mchod pa'i sprin lta bu/__/dpag yas nam mkha' gang bar gyur/__/oM sarba pU dza meg+ha AHhU~M/__zhes pas mchod gtor brlab/__oM ma hA shU n+ya tA dz+nyA na badz+ra swa b+hA wa AtA ko\u0f85haM/__snang srid 'khor 'das chos rnams kun/__/'od gsal stong nyid dbyings kyi ngang /__/rig pa ye shes sgyu ma'i lha/__/sku yi dkyil 'khor bsam las kyang /__/khrag 'thung rgyal po'i sku la 'dus/__/pad+ma nyi zla dregs pa'i steng /__/bdag nyid che mchog sme ba brtsegs/__/zhal gsum phyag drug zhabs bzhi bgrad/__/dbus mthing dpal chen nyid kyi zhal/__/g.yas dkar khro mo gau rI ma/__g.yon dmar lha mo pra mo hA/__/phyag drug g.yas g.yon dang po gnyis/__/rdo rje dril 'dzin yum la 'khyud/__/g.yas kyi gnyis pas kha T+wAM ga__/gsum pas gsang ba'i rnge'u chung 'khrol/__/g.yon gyi gnyis pas thod khrag dang /__/gsum pas rgyu ma'i zhags pa gdengs/__/phyag mtshan drug po lha mo drug__/gar dgu'i nyams ldan me dbus 'gying /__/yum ni kro d+hI shwa ri mthing /__/gri thod 'dzin pas 'khyud cing sbyor/__/rngams brjid dur khrod rol pa yi/__/rgyan chas 'khor gyi lha rnams te/__/khrag 'thung rigs lnga siM ha brgyad/__/sgo ma dbang phyug nyer brgyad de/__/lnga bcu tham pa tshang bar bsgom/__/snang srid gzhir bzhengs dpal chen po'i/__/dkyil 'khor chen por lhun gyis rdzogs/__zhes gsal btab la bzlas pa bya ba ni/__gsung gi dkyil 'khor bsam las kyang /__/khrag 'thung rgyal po'i gsung du 'dus/__/ru lu 'bru brgyad gsung gi sngags/__/A+oM ni ye shes khrag 'thung lnga/__/ru lu gong ma gau rI brgyad/__/ru lu 'og ma siM ha brgyad/__/hU~M ni phyag brnyan sgo ma bzhi/__/b+h+yo ni rnal 'byor nyi shu brgyad/__hU~M ni ye shes sems dpa'i thugs/__/bsnyen pa'i dkyil 'khor gsung gi lha/__/gsal zhing bzlas ba'i 'od zer gyis/__/dngos grub rnam gnyis thob par gyur/__oM ru lu ru lu hU~M b+h+yo hU~M/__zhes bzlas mthar/__thugs kyi dkyil 'khor bsam yas kyang /__/khrag 'thung rgyal po'i thugs la 'dus/__/ye shes sems dpa' thugs dam lha/__/sangs rgyas rtsa ba'i thugs kyi dngos/__/thig le byang chub sems nyid de/__/bya stsol med par kun la gnas/__/'dzin chags med pa thugs kyi mchog__/ma 'gags shar ba thugs kyi rgyan/__/rang sar rdzogs pa thugs kyi gnas/__/zhes pa'i don chos nyid bsam gyis mi khyab pa'i dbyings su mnyam par bzhag go__/gnyis pa la gnyis/__dzapa? khang dbye ba dang /__zhal bsgyur ba'o/__/dang po ni/__oM ru lu ru lu hU~M b+h+yo hU~M phaT dzaH__bdag gi thugs ka nas ye shes kyi phyag rgya gnyis pa logs su bye nas mdun gyi bsgrub rdzas dang dbyer med du bzhugs par gyur/__ces brjod cing bsams la ru lu'i dzapa? ci nus bzla bas gzi byin bskyed do/__/gnyis pa ni/__mdun gyi khrag 'thung khro bo'i rgyal/__/yongs gyur gyi snod ka pA la/__/yangs shing rgya che mtshan nyid rdzogs/__/nang bcud khams gsum rak+ta kun/__/gcig tu 'dus pa'i rgya mtsho'i dbus/__/raM las rdo rje sgeg mo dmar/__/shin tu chags pa'i nyams 'gyur can/__/phyag gnyis rak+ta'i thod pa bsnams/__/zhabs zung dor stabs pad nyir rol/__/gcer bu nu 'bur b+ha ga rgyas/__/rak+ta'i char rgyun 'bebs pa yi/__/gnas gsum oM AHhU~M gis mtshan/__/de las 'od 'phros ye shes pa/__/khrag 'thung dkyil 'khor spyan drangs gyur/__/hU~M/__he ru ka yi gnas bcu dang /__/dur khrod chen po'i gnas brgyad nas/__/dpal chen khrag 'thung 'khor dang bcas/__/gnas 'dir spyan 'dren gshegs su gsol/__/ma hA mAM sa rak+ta a mr-i ta khA hi ha ha he he a la la/__bka' nyan rol pa'i bu mo ni/__/rdo rje sgeg mo 'dod chags che/__/'dod cing chags pa 'joms pa'i mchog__/mchod pa'i rdzas sa bzhugs su gsol/__/rak+ta ma hA sa ma ya tiSh+Tha lhan/__nga ni za byed chen po ste/__/khams gsum ma lus bsgral ba dang /__/gdul dka' ma lus 'dul ba'i phyir/__/sha rus la sogs bza' bar bya/__/nga ni khrag 'thung chen po ste/__/'khor ba'i drwa ba chags pa'i rgyud/__/dmar chen po ni rgya mtshor bskyil/__/mkha' 'gro'i tshogs bcas rnams la rol/__/ma lus bzhes nas bsnam du gsol/__/ma ha rak+ta khA hi/__ma hA tsit+ta khA hi/__ga Na khA hi/__tsak+Shu khA hi/__bA su ta khA hi/__ba liM ta khA hi/__kiM ni ri ti khA hi/__mAM sa khA hi/__shu kra khA hi/__hU~M/__'dod chags chen po'i ye shes kyis/__/khams gsum 'khor ba'i nyon mongs 'joms/__/dbyings yum rdo rje sgeg mo la/__/mchod cing bstod de dngos grub stsol/__/rang nyid dpal chen thugs ka nas/__/'od 'phros lha mo'i thugs rgyud bskul/__/thugs rje chags pa'i 'od zer gyis/__/'khor 'das rak+ta thams cad bkug__/zhal du zhugs shing sku las brgyud/__/pad+ma'i mkha' nas char ltar babs/__/dwangs mA rak+ta'i rgya mtshor bskyil/__/shar gyi rba rlabs nub tu 'phyo/__nub kyi rba rlabs shar du 'phyo/__/lho yi rba rlabs byang du 'phyo/__/byang gi rba rlabs lho ru 'phyo/__/steng gi rba rlabs 'og tu 'phyo/__'og gi rba rlabs steng du 'phyo/__/sha chen lhu dum lang long dang /__/tsit+ta tshil chen chol lo lo/__/rak+ta'i rlangs pa phyu ru ru/__/dri yi ngad pa chi li li/__/gzugs kyi lha mo bam dbyug phyar/__/sgra yi lha mo rkang gling 'bud/__/la la b+han+d+ha cha lang brdeb/__/dri yi lha mo gsur chen bsnams/__/ro yi lha mo sha chen thogs/__/reg bya'i lha mo zhing phrag gyon/__/bde gshegs rnams kyi thugs dam bskang /__/ma mo mkha' 'gro'i tshogs su rol/__/rnal 'byor dbang phyug g.yar dam skong /__/'khor 'das rak+ta 'dus pa'i bcud/__/khrag chen 'bar ba'i dkyil 'khor ni/__/dngos grub kun gyi snying por gyur/__/zhes dmigs la/__rak+ta dz+wa la maN+Da la hU~M/__zhes bzla zhing /__stong phrag re'i mtshams su stod tshig gi mchod pa'ang bya/__thun bsdu ba'i tshe tshogs mchod byed na gsang ba spyi'i 'gros ltar bya/__gang ltar yang mthar/__mdun gyi lha mo 'od du zhu nas rak+ta la thim pas khrag chen 'bar ba'i dkyil 'khor kha dog dmar gsal nyi ma bye ba'i gzi 'od can rak+ta'i rba rlabs phyogs brgyar g.yo zhing zegs ma gang la reg pas dngos grub rnam gnyis kyi don byed nus par gyur/__ces brjod cing bsams la slar yang bzlas pas brtan par bya/__dge ba 'di yis myur du bdag__/he ru ka dpal 'grub gyur nas/__/'gro ba gcig kyang ma lus pa/__/de yi sa la 'god par shog__/ces bsngo smon dang /__shis brjod rgyas par bya'o/__/de ltar thun bzhi'am drug sogs su bcad nas bsgrubs pas/__rak+ta las 'od dang /__sgra dang /__dri ma khyad par can 'thul ba sogs rtags byung ba na/__gsum pa dngos grub blang ba ni/__lha mo rak+ta la bstim pa'i rjes su thod pa'i rgya bkrol la/__rak+ta'i dwangs bcud 'od zer 'bar ba rang gi snying gar thim/__mi shigs pa'i thig le dang ro gcig tu gyur pas srid zhi'i khams na che btsan 'gran zla dang bral ba dpal chen po'i sku gsung thugs dang dbyer med par gyur pa'i mos pa dang bcas/__phud kyis dkyil 'khor gyi lha tshogs nam mkha' gang bar sad pa la/__hU~M/__rdo rje sgeg mo 'dod chags che/__/rak+ta pad+ma las byung ba/__/thig le zag med bde ba che/__'dod chags 'khor ba stong phyir bzhes/__/ma hA rak+ta khA hi/__zhes mchod/__lhag ma rnams ril bu'am/__phur mar byas te grib mar bskam/__slar snod bzang por tshags byas te mchod pa'i rdzas su spel lo/__/gsum pa de ltar bsgrubs pa'i dam tshig rdzas chen po'i phan yon ni/__rgyud las/__'bras bu sku dang ye shes thob/__/ma mo mkha' 'gro bran bzhin nyan/__/dus gsum bde gshegs byin gyis rlobs/__/gzungs ma bran 'khor dbang du 'du/__/dgra bgegs 'byung po 'dar zhing skrag__/ces mchog dang thun mong gi dngos grub thams cad rak+ta'i mchod pa dang las la sbyar bas 'grub par gsungs pas mtshon rgya cher shes par bya zhing /__las sbyor gyi tshul yang de nyid las/__bkra shis nyams dga' yid 'ong du/__/phun sum tshogs pa bzhi ldan pas/__/phrin las zhi rgyas dbang drag bzhi/__/zhes sogs spyir las bzhi dang /__khyad par khrag zor sgrub pa'i thabs sogs gsungs pas mtshon rgyud dang man ngag rnams las mang du 'gyur ba ltar rtogs par bya'o/__/rdo rje'i chags pas khams gsum gyi/__/'dod chags 'joms pa'i dam tshig rdzas/__/rak+ta'i sgrub tshul brjod pa'i dges/__/'gro kun he ru kar gyur cig__/ces pa'ang dpal khrag 'thung chen pos bka' stsal pa'i rak+ta dmar gyi rgyud sde'i dgongs pa gtso bor sbyar ba ste/__gzhan du spyi'i rnam bzhag 'di ltar nges par byas na/__sgrub tshul bka' dgongs phur gsum sogs rang rang gang la mos pa'i gzhung ltar byin gyis brlabs pas kyang don grub pa yin no/___/__!