ནི་རི་ཏི་པའི་ལུགས་བྱམས་པའི་སྒྲུབ་རྗེས་སོགས་ཀྱི་ཉེར་མཁོའི་ཡི་གེ་བདུད་རྩིའི་ཆུ་སྐྱེས།

🚧 This website is under continued development. We appreciate your patience!

Previous Text Back to Volume PageLast text in section.

Wylie title	ni ri ti pa'i lugs byams pa'i sgrub rjes sogs kyi nyer mkho'i yi ge bdud rtsi'i chu skyes
Location	mkhyen brtse'i bka' 'bum Volume 11, sde tshan 14, Text 15, Pages 568-576 (Folios 83b2 to 87b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. ni ri ti pa'i lugs byams pa'i sgrub rjes sogs kyi nyer mkho'i yi ge bdud rtsi'i chu skyes. In 'jam dbyangs mkhyen brtse'i dbang po'i bka' 'bum, Vol. 11: 568-576. Khams sde dge rdzong sar dgon: Rdzong sar blo gros phun tshogs, 2020.
Genre	Sadhanas - Evocation Ritual - sgrub thabs  ·  Activity Practices - las tshogs
Deity	byams pa
Colophon	ཞེས་པའང་ཉེར་མཁོའི་ཡན་ལག་ཏུ་མཁྱེན་བརྩེའི་དབང་པོས་བྲིས་པ་དགེ་ལེགས་ཀྱི་བདུད་རྩིས་ཕན་བདེའི་ཆུ་སྐྱེས་རྟག་ཏུ་རྒྱས་པར་གྱུར་ཅིག །མངྒ་ལཾ།། །།དགེའོ།། །།དགེའོ།། །།དགེའོ།
	zhes pa'ang nyer mkho'i yan lag tu mkhyen brtse'i dbang pos bris pa dge legs kyi bdud rtsis phan bde'i chu skyes rtag tu rgyas par gyur cig__/mang+ga laM//__//dge'o//__//dge'o//__//dge'o/

1 Texts in this Section (sde tshan or chos tshan)

15 568-576	ནི་རི་ཏི་པའི་ལུགས་བྱམས་པའི་སྒྲུབ་རྗེས་སོགས་ཀྱི་ཉེར་མཁོའི་ཡི་གེ་བདུད་རྩིའི་ཆུ་སྐྱེས། ni ri ti pa'i lugs byams pa'i sgrub rjes sogs kyi nyer mkho'i yi ge bdud rtsi'i chu skyes Sadhanas - Evocation Ritual - sgrub thabs   ·   Activity Practices - las tshogs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །ནི་རི་ཏི་པའི་ལུགས་ཀྱི་འཕགས་པ་བྱམས་པའི་སྒྲུབ་ཐབས་རྗེས་གནང་སོགས་ཀྱི་ཉེར་མཁོའི་ཡི་གེ་བདུད་རྩིའི་ཆུ་སྐྱེས་ཞེས་བྱ་བ་བཞུགས་སོ། །ན་མོ་གུ་རུ་མཻ་ཏྲི་ནཱ་ཐཱ་ཡ། པཎ་གྲུབ་ཀྱི་དབང་པོ་ནི་རི་ཏི་པའི་རྒྱ་གཞུང་གི་རྗེས་སུ་འབྲང་པའི་འཕགས་པ་བྱམས་པའི་རྣལ་འབྱོར་ཉམས་སུ་བླང་བར་འདོད་པས། གནས་གཙང་ཞིང་དབེན་པར་འདིའི་བྲིས་སྐུ་ཡོད་ན་བཤམས་པའི་སྤྱན་སྔར་མཆོད་པའི་ཕྲེང་བ་ཚར་དུ་དངར་བས་མཛེས་པར་བྱ། རང་ཉིད་ཀྱིས་ཁས་བླངས་པའི་ཚུལ་ཁྲིམས་རྣམ་པར་དག་པས་གཞི་བཟུང་སྟེ་ཁྲུས་དང་གཙང་སྦྲའི་ཀུན་སྤྱོད་ལྷུར་ལེན་པས། སྒྲུབ་པའི་ཐབས་རིན་ཆེན་འབྱུང་གནས་ལས་ཇི་སྐད་བཤད་པ་བཞིན་ཐུན་གསུམ་མམ་བཞིའི་སྦྱོར་བས་རྟགས་མཐོང་བའམ། བཟླས་པ་འབུམ་ཕྲག་བཅུ་ཁ་སྐོང་དང་བཅས་པ་རྫོགས་པར་བྱ། ཐུན་མཚམས་རྣམས་སུ་བཟང་སྤྱོད་ལས་འབྱུང་པའི་ཡན་ལག་བདུན་པ་དང་བཅས་ཕྱག་འཚལ་མཎྜལ་འབུལ། མཚན་བརྒྱ་དང་། དམ་བཅས་པའི་གཟུངས་འདོན། བྱམས་པའི་སྨོན་ལམ་སོགས་སྨོན་ལམ་རྒྱ་ཆེར་གདབ། རྟགས་ནི། དངོས་སམ་རྨི་ལམ་དུ་དགའ་ལྡན་དུ་ཕྱིན་པ་དང་། ཀླུ་ཤིང་གི་མེ་ཏོག་དང་རིལ་བ་སྤྱི་བླུགས་རྙེད་པ། འཕགས་པ་དགྱེས་པའི་ཞལ་མཐོང་བ་རྣམས་བྱུང་ན་སྡིག་སྒྲིབ་དག་པ་དང་། ཐོས་པ་འཛིན་པ་སོགས་ཡོན་ཏན་དཔག་ཏུ་མེད་པ་དང་ལྡན་པར་འགྱུར་རོ། །རྩ་བའི་བསྙེན་པ་རྫོགས་ནས་ལས་སྦྱོར་གྱི་སྔགས་གཉིས་ཀྱང་ཇི་ལྟར་རིགས་པ་བཟླ། བཟླས་དམིགས་གཙོ་བོར་ལྷ་སྐུ་དང་། སྔགས་ཕྲེང་གི་གསལ་སྣང་ལ་ཡིད་རྩེ་གཅིག་ཏུ་གཏད་དེ་བཟླ་བ་ཁོ་ན་ཡིན་ལ། དེས་སྐྱོ་ན་སྔགས་ཕྲེང་ལས་འཕྲོས་པའི་འོད་ཀྱིས་དགའ་ལྡན་གྱི་གནས་ན་བཞུགས་པའི་རྒྱལ་བ་བྱམས་པའི་ཐུགས་རྒྱུད་བསྐུལ། སྐུ་གསུང་ཐུགས་ཀྱི་གནས་ནས་འོད་ཟེར་གྱི་ཚོགས་བསམ་གྱིས་མི་ཁྱབ་པ་བྱུང་། རང་ལ་ཐིམ་པས་སྡིག་སྒྲིབ་དག་ཅིང་རྒྱུད་བྱིན་གྱིས་བརླབས་པའི་དམིགས་པ་བྱ་བར་བཤད་དོ། །འདིའི་རྗེས་གནང་ལ། མཎྜལ་གྱི་དབུས་སུ་ཚོམ་བུ་གཅིག་དང་། དེའི་མདུན་མཆོད་པ་དང་བཅས་པ་བཤམ། བདག་བསྐྱེད་སྔོན་དུ་འགྲོ་བས། ཚོམ་བུ་བསང་སྦྱང་། སྟོང་པའི་ངང་ལས་པད་ཟླའི་གདན་ལ་མཻཾ་གསེར་མདོག་སོགས་ནས། ཛཿཧཱུྃ་བྃ་ཧོཿའི་བར་རང་ཉིད་ཅེས་པའི་ཚིག་དོར་བ་མ་གཏོགས་བདག་བསྐྱེད་བཞིན་གསལ་གདབ། དེའི་སྤྱན་སྔར་ཕྱག་མཆོད་སོགས་ཐུན་མཚམས་གྱི་བྱ་བ་ལྟར་བྱ། སློབ་མ་ཁྲུས་བྱས་མེ་ཏོག་དང་བཅས་ཏེ་འཁོད་པ་ལ། ཆོས་བཤད་ཅི་རིགས་པ་དང་། མཚམས་སྦྱོར་གྱི་ཁྱད་པར་དེ་ལ་འདིར་རྒྱལ་བ་མི་ཕམ་མགོན་པོ་ཞེས་སམ་རྒྱལ་ཚབ་ཆེན་པོ་བྱམས་པ་ཞེས་སྟོན་པ་ཤཱཀྱ་སེང་གེ་ཉིད་དགའ་ལྡན་ནས་འཛམ་གླིང་འདིར་བྱོན་པའི་ཚེ་རྒྱལ་ཚབ་ཏུ་མངའ་གསོལ་བའི་ཕྱིར་དགའ་ལྡན་གྱི་སྟོན་པ་ཆེན་པོ་ས་བཅུའི་དབང་ཕྱུག་ལྷའི་རྒྱལ་པོའི་ཚུལ། གསང་སྔགས་སུའང་ལྷག་པའི་ལྷ་མཆོག་དཀྱིལ་འཁོར་གྱི་མགོན་པོར་སྣང་བ། བསྐལ་བ་བཟང་པོ་འདིར་སངས་རྒྱས་སྟོང་དུ་བྱོན་པའི་ནང་ཚན་རྒྱལ་བ་ལྔ་པར་གྱུར་པ་འདི་ཉིད་བསྙེན་པས་གནས་སྐབས་སུ་སྒྲིབ་པ་སྦྱོང་། ཤེས་རབ་སྐྱེ། །ཐོས་པ་འཛིན་པར་འགྱུར་བ་དང་། རིམ་གྱིས་ས་བཅུ་དང་ལམ་ལྔའི་མངོན་རྟོགས་རྒྱུད་ལ་སྐྱེ་བ་དང་། འདི་ནས་ཚེ་འཕོས་ཀྱང་དགའ་ལྡན་གྱི་གནས་མཆོག་དམ་པར་རྒྱལ་ཚབ་ཆེན་པོས་རྗེས་སུ་འཛིན་པ་སོགས་ཕན་ཡོན་མཆོག་དང་ལྡན་པའི་ཕྱིར། འདི་ལྟ་བུ་ལ་གུས་པས་འབད་པར་རིགས་པས། དེའི་ཕྱིར་ནི་རི་ཏི་པའི་རྒྱ་གཞུང་གི་རྗེས་སུ་འབྲང་བའི་མགོན་པོ་བྱམས་པའི་སྒྲུབ་ཐབས་ཀྱི་རྗེས་གནང་ཞུ་བའི་དོན་དུ་མཎྜལ་ཕུལ། གསོལ་བ་འདེབས་པ་འདི་གསུང་བར་ཞུ། རྡོ་རྗེ་འཛིན་པ་དགོངས་སུ་གསོལ། །བདག་ནི་འགྲོ་ལ་ཕན་དོན་དུ། །གཙོ་ཆེན་ཁྱེད་ལ་གསོལ་འདེབས་ཀྱི། །མ་ལུས་རྗེས་གནང་སྩལ་དུ་གསོལ། །ལན་གསུམ། རྒྱུད་དག་པར་བྱ་བའི་སླད་དུ་མདུན་བསྐྱེད་ཀྱི་ལྷ་དང་སངས་རྒྱས་བྱང་སེམས་རྣམས་ཀྱི་དྲུང་དུ་སྐྱབས་གསུམ་སྔོན་དུ་འགྲོ་བས་བྱང་ཆུབ་ཀྱི་སེམས་བཟུང་སྙམ་པས་འདིའི་རྗེས་ཟློས་མཛོད། །འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཤེས་རབ་སྙིང་བརྩེ་དང་བཅས་པའི། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བཅས་ཏེ། །རྫོགས་པའི་བྱང་ཆུབ་སེམས་བསྐྱེད་བགྱི། །ལན་གསུམ། ཁྱད་པར་འཕགས་པ་བྱམས་པའི་རྗེས་གནང་སྩལ་དུ་གསོལ་སྙམ་པའི་འདུན་པས་འདིའི་རྗེས་ཟློས་ཀྱང་གསུངས་ཤིག །སློབ་དཔོན་དགོངས་སུ་གསོལ། བདག་ལ་འཕགས་པ་བྱམས་པའི་རྗེས་གནང་མ་ལུས་པ་སྩལ་དུ་གསོལ། ཞེས་ལན་གསུམ་གྱིས་གསོལ་བ་བཏབ་ནས། ད་རྗེས་གནང་གི་གཞི་དགོད་པའི་སླད་དུ་དམིགས་པ་འདི་བཞིན་མཛད་པར་ཞུ། སྭ་བྷ་བ་སོགས། ཕྱི་ནང་གི་དངོས་པོ་ཐམས་ཅད་མི་དམིགས་ཏེ་སྟོང་པ་ཉིད་དུ་གྱུར་པའི་ངང་ལས། པད་ཟླའི་གདན་ལ་ཁྱེད་རང་རྣམས་ཀྱི་སེམས་ཉིད་མཻཾ་ཡིག་ཡོངས་སུ་གྱུར་པ་ལས་སྤྱི་བླུགས་ཀྱིས་མཚན་པའི་ཀླུ་ཤིང་གི་ཡལ་ག་མཻཾ་གྱིས་མཚན་པ། དེའི་འོད་ཀྱི་འཕྲོ་འདུ་ལས་ཁྱེད་རང་རྣམས་འཕགས་པ་བྱམས་པ་སོགས་ནས། རིན་པོ་ཆེའི་རྒྱན་ཅན། ཐུགས་ཀར་ཟླ་བའི་དཀྱིལ་འཁོར་ལ་མཻཾ་ཡིག་དང་བཅས་པ་རྣམས་གསལ་ལམ་སྟེ་གྱུར་པའི་མོས་པ་མཛོད། དེ་ནས་རྗེས་གནང་དངོས་གཞི་ལ་གསུམ་ལས། དང་པོ་སྐུའི་རྗེས་གནང་ནི། སློབ་དཔོན་ཡང་རང་གིས་བསྒོམས་པ་དང་འདྲ་བའི་འཕགས་པ་བྱམས་པ་དངོས་ཡིན་སྙམ་པའི་མོས་གུས་བྱས་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ལྷའི་ཐུགས་རྒྱུད་བསྐུལ། དེའི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱི་ཐུགས་རྒྱུད་བསྐུལ་བས། སློབ་དཔོན་དང་མདུན་བསྐྱེད་ཀྱི་ལྷ་དང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀ་ནས་འཕགས་པ་བྱམས་པའི་སྐུ་ཆེ་ཆུང་མ་ངེས་པ་དཔག་ཏུ་མེད་པ་བྱོན། ཁྱེད་རང་རྣམས་ཀྱི་སྤྱི་གཙུག་ལ་སོགས་པ་དང་བ་སྤུའི་བུ་ག་རྣམས་ནས་ཆར་བབ་པ་བཞིན་དུ་སིབ་སིབ་ཐིམ་པར་མོས་པ་མཛོད། ཛཿཧཱུྃ་བྃ་ཧོཿ གཉིས་སུ་མེད་པར་ཐིམ། དྲིལ་བུའམ་ཏིང་ཤག་དཀྲོལ། གཉིས་པ་གསུང་གི་རྗེས་གནང་ནི། སློབ་དཔོན་གྱི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་མཻཾ་སེར་པོ། དེ་ལས་སྔགས་ཀྱི་ཕྲེང་བ་བྱུང་། སློབ་དཔོན་གྱི་ཁ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀར་ཟླ་བའི་སྟེང་དུ་མཻཾ་སེར་པོ་གནས་པ་ལ་ཐིམ། དེའི་དུས་སུ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཁྱེན་བརྩེ་ནུས་མཐུ་ཐམས་ཅད་འོད་ཟེར་གྱི་རྣམ་པར་སྔགས་ཕྲེང་དང་ལྷན་ཅིག་ཞལ་དུ་ཞུགས། སྙིང་གའི་མཻཾ་ལ་ཐིམ་པའི་མོས་པ་མཛོད་ལ། སྔགས་འདིའི་རྗེས་ཟློས་ལན་གསུམ་གསུངས་ཤིག །ཨོཾ་མཻཾ་མཻཾ་ཏྲི་སོགས་བརྗོད། དང་པོས་བྱིན་གྱིས་བརླབས། གཉིས་པས་དབྱེར་མེད་དུ་འདྲེས། གསུམ་པས་བརྟན་པར་བྱས་པའི་མོས་པ་མཛོད། སློབ་དཔོན་ལ་མེ་ཏོག་འཐོར་བཞིན་དུ་འདིའི་རྗེས་ཟློས་མཛོད་ཅིག །བཅོམ་ལྡན་བདག་གིས་བཟུང་ལགས་ཀྱི། །བདག་ལ་འགོ་བར་མཛད་དུ་གསོལ། །ཞེས་ལན་གསུམ། དེ་ལྟར་ཕུལ་བའི་མེ་ཏོག་དེ་ཉིད་སླར་ཡང་བྱིན་གྱིས་བརླབས་ཏེ། །ཁྱེད་རང་གི་སྤྱི་བོར་ཕུལ་བའི་མོས་པ་མཛོད་ཅིག །སློབ་དཔོན་གྱིས་མེ་ཏོག་གཏོར་ཞིང་། །བཅོམ་ལྡན་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། རིག་པ་འཛིན་པ་འདི་རྣམས་ལ་རྗེ་བཙུན་བྱམས་པ་མགོན་པོའི་སྐུ་གསུང་ཐུགས་ཀྱི་བྱིན་རླབས་མ་ལུས་པ་འཇུག་པར་གྱུར་ཅིག །གསུམ་པ་ཐུགས་ཀྱི་རྗེས་གནང་ནི། མདུན་བསྐྱེད་ཀྱི་ལྷ་ལ་མོས་གུས་དུང་དུང་བ་དང་། བདག་གི་རྒྱུད་བྱིན་གྱིས་བརླབ་ཏུ་གསོལ་སྙམ་པ་མཛད་པས། མདུན་གྱི་ལྷའི་ཐུགས་ཀ་ནས། ཕྱག་མཚན་གྱི་ཚོགས་དཔག་ཏུ་མེད་པ་རྒྱང་སྟེ་བྱོན། ཁྱེད་རང་རྣམས་ཀྱི་སྙིང་གའི་ས་བོན་དང་དབྱེར་མེད་དུ་འདྲེས། རྒྱུད་བྱིན་གྱིས་བརླབས་པའི་མོས་པ་མཛོད། དེ་ནས་རྒྱ་གཞུང་སྒྲུབ་ཐབས་ཀྱི་ལུང་ཡང་སྤྲོ་ན་བྱའོ། །རྗེས་གཙོ་བོས། མཎྜལ། དེང་ནས་སོགས་སྤྱི་ལྟར་བྱས་ལ། སློབ་མ་རྣམས་རང་གནས་སུ་གཏང་། ཚོམ་བུའི་ལྷ་ལ་ཕྱག་མཆོད་བཟོད་གསོལ་གཤེགས་བསྡུ་ཤིས་བརྗོད་སོགས་སྤྱི་ལྟར་བྱའོ། །ཡང་གདམས་ངག་གཞན་ལས་འབྱུང་བ་ལྟར་འདིའི་གཟུངས་སྒྲུབ་སོགས་འདི་དག་གི་ཁུངས་སྒྲོལ་མ་རྣལ་འབྱོར་མའི་རྒྱུད་ཕྱི་མ་ལས། བྱམས་པའི་སྔགས་བཟླས་པའི་ཆུས་འཁྲུད་པ་དང་། ས་དཀར་ལ་བཟླས་ཏེ་རིལ་བུ་བྱ་བ་དང་། སྲུང་སྐུད་བྱས་པ་དེ་དག་གིས་ནི་ནད་དང་གདོན་ལས་ཐར་བ་དང་། མཚམས་མེད་པ་བྱས་ལའང་ངན་འགྲོ་ལས་ཐར་བར་འགྱུར་རོ། །ཞེས་རྒྱ་ཆེར་བསྔགས་སོ། །བྱ་བར་འདོད་ན། བུམ་པ་བཅུད་ལྡན་མཆོད་གཏོར་བཅས་ཚུལ་བཞིན་དུ་བཤམས་ལ། བདག་བསྐྱེད་སྔོན་དུ་འགྲོ་བས། བུམ་པའི་ནང་དུ་ཟླ་བའི་སྟེང་དུ་གསང་སྔགས་ཀྱི་ཕྲེང་བ་བཀོད། བུམ་པའི་སྟེང་དུ་འཕགས་པ་བྱམས་པ་བསྒོམ། དེའི་ཕྱག་ལས་བདུད་རྩིའི་ཆུ་རྒྱུན་བྱུང་བས་བུམ་པའི་ཡི་གེ་ལ་ཐིམ་པས་ཡི་གེ་འོད་དུ་ཞུ་བ་ལས་བུམ་པའི་ནང་བདུད་རྩིས་ཁེངས་པར་བསམ་ཞིང་སྔགས་བཟླ། བཟླས་པ་ཚར་བ་དང་། འཕགས་པ་བྱམས་པ་ལ་མཆོད་པ་དང་གཏོར་མ་འབྲུ་གསུམ་གྱིས་བརླབ། རྩ་སྔགས་ལན་གསུམ་གྱིས་ཕུལ་ལ་མཆོད་བསྟོད་གསོལ་བ་གདབ་ལ་གཤེགས་སུ་གསོལ། ཆུ་དེས་རང་གཞན་ལ་ཁྲུས་བྱ་བ་སོགས་ཕན་གདགས་པར་བྱས་ན་ཕན་ཡོན་དཔག་ཏུ་མེད་པ་འབྱུང་བར་གསུངས་སོ། །དེ་ཉིད་ལས་སྔགས་འདག་བྱེད་ནའང་ཁྲུས་ཆུས་ས་དཀར་པོ་དྲི་མ་མེད་པ་སྦྲུས་ལ་རིལ་བུ་བྱ། དེའི་སྟེང་དུ་ཟླ་བའི་དཀྱིལ་འཁོར་ལ་གསང་སྔགས་བཀོད་པ་དེ་ལས་བདུད་རྩིའི་རྒྱུན་བྱུང་པས་རིལ་བུ་ལ་ཐིམ་པས་བདུད་རྩིར་མེར་གྱིས་གྱུར་པར་བསྒོམས་ལ། དེ་ལྟ་བུའི་རིལ་བུས་བདག་གཞན་ལ་ཕན་གདགས་པར་བྱའོ། །སྲུང་སྐུད་བྱེད་ན། སྐུད་པ་གཙང་མ་ལ་རྡོ་རྗེའི་མདུད་པ་གསུམ་མམ་ལྔ་བྱས་པ་སྙིམས་པའི་བར་དུ་བཅུག །དེའི་སྟེང་དུ་ཟླ་བའི་དཀྱིལ་འཁོར་གྱི་སྟེང་དུ་གསང་སྔགས་བཀོད་ལ་འོད་དུ་ཞུ་བ་ལས་བྱུང་བའི་སྐུད་པར་བསྒོམས་ཏེ། དེ་ལ་རྟེན་འབྲེལ་གྱི་སྔགས་གསུམ་མམ་ལྔ་བཟླས་པས་རབ་གནས་བྱས་ལ་གདགས་པར་བྱའོ། །ཞེས་པའང་ཉེར་མཁོའི་ཡན་ལག་ཏུ་མཁྱེན་བརྩེའི་དབང་པོས་བྲིས་པ་དགེ་ལེགས་ཀྱི་བདུད་རྩིས་ཕན་བདེའི་ཆུ་སྐྱེས་རྟག་ཏུ་རྒྱས་པར་གྱུར་ཅིག །མངྒ་ལཾ།། །།དགེའོ།། །།དགེའོ།། །།དགེའོ།།

[edit]

ni ri ti pa'i lugs byams pa'i sgrub rjes sogs kyi nyer mkho'i yi ge bdud rtsi'i chu skyes/ @#/_/ni ri ti pa'i lugs kyi 'phags pa byams pa'i sgrub thabs rjes gnang sogs kyi nyer mkho'i yi ge bdud rtsi'i chu skyes zhes bya ba bzhugs so/__/na mo gu ru mai tri nA thA ya/__paN grub kyi dbang po ni ri ti pa'i rgya gzhung gi rjes su 'brang pa'i 'phags pa byams pa'i rnal 'byor nyams su blang bar 'dod pas/__gnas gtsang zhing dben par 'di'i bris sku yod na bshams pa'i spyan sngar mchod pa'i phreng ba tshar du dngar bas mdzes par bya/__rang nyid kyis khas blangs pa'i tshul khrims rnam par dag pas gzhi bzung ste khrus dang gtsang sbra'i kun spyod lhur len pas/__sgrub pa'i thabs rin chen 'byung gnas las ji skad bshad pa bzhin thun gsum mam bzhi'i sbyor bas rtags mthong ba'am/__bzlas pa 'bum phrag bcu kha skong dang bcas pa rdzogs par bya/__thun mtshams rnams su bzang spyod las 'byung pa'i yan lag bdun pa dang bcas phyag 'tshal maN+Dal 'bul/__mtshan brgya dang /__dam bcas pa'i gzungs 'don/__byams pa'i smon lam sogs smon lam rgya cher gdab/__rtags ni/__dngos sam rmi lam du dga' ldan du phyin pa dang /__klu shing gi me tog dang ril ba spyi blugs rnyed pa/__'phags pa dgyes pa'i zhal mthong ba rnams byung na sdig sgrib dag pa dang /__thos pa 'dzin pa sogs yon tan dpag tu med pa dang ldan par 'gyur ro/__/rtsa ba'i bsnyen pa rdzogs nas las sbyor gyi sngags gnyis kyang ji ltar rigs pa bzla/__bzlas dmigs gtso bor lha sku dang /__sngags phreng gi gsal snang la yid rtse gcig tu gtad de bzla ba kho na yin la/__des skyo na sngags phreng las 'phros pa'i 'od kyis dga' ldan gyi gnas na bzhugs pa'i rgyal ba byams pa'i thugs rgyud bskul/__sku gsung thugs kyi gnas nas 'od zer gyi tshogs bsam gyis mi khyab pa byung /__rang la thim pas sdig sgrib dag cing rgyud byin gyis brlabs pa'i dmigs pa bya bar bshad do/__/'di'i rjes gnang la/__maN+Dal gyi dbus su tshom bu gcig dang /__de'i mdun mchod pa dang bcas pa bsham/__bdag bskyed sngon du 'gro bas/__tshom bu bsang sbyang /__stong pa'i ngang las pad zla'i gdan la maiM gser mdog sogs nas/__dzaHhU~M ba~M hoH'i bar rang nyid ces pa'i tshig dor ba ma gtogs bdag bskyed bzhin gsal gdab/__de'i spyan sngar phyag mchod sogs thun mtshams gyi bya ba ltar bya/__slob ma khrus byas me tog dang bcas te 'khod pa la/__chos bshad ci rigs pa dang /__mtshams sbyor gyi khyad par de la 'dir rgyal ba mi pham mgon po zhes sam rgyal tshab chen po byams pa zhes ston pa shAkya seng ge nyid dga' ldan nas 'dzam gling 'dir byon pa'i tshe rgyal tshab tu mnga' gsol ba'i phyir dga' ldan gyi ston pa chen po sa bcu'i dbang phyug lha'i rgyal po'i tshul/__gsang sngags su'ang lhag pa'i lha mchog dkyil 'khor gyi mgon por snang ba/__bskal ba bzang po 'dir sangs rgyas stong du byon pa'i nang tshan rgyal ba lnga par gyur pa 'di nyid bsnyen pas gnas skabs su sgrib pa sbyong /__shes rab skye/__/thos pa 'dzin par 'gyur ba dang /__rim gyis sa bcu dang lam lnga'i mngon rtogs rgyud la skye ba dang /__'di nas tshe 'phos kyang dga' ldan gyi gnas mchog dam par rgyal tshab chen pos rjes su 'dzin pa sogs phan yon mchog dang ldan pa'i phyir/__'di lta bu la gus pas 'bad par rigs pas/__de'i phyir ni ri ti pa'i rgya gzhung gi rjes su 'brang ba'i mgon po byams pa'i sgrub thabs kyi rjes gnang zhu ba'i don du maN+Dal phul/__gsol ba 'debs pa 'di gsung bar zhu/__rdo rje 'dzin pa dgongs su gsol/__/bdag ni 'gro la phan don du/__/gtso chen khyed la gsol 'debs kyi/__/ma lus rjes gnang stsal du gsol/__/lan gsum/__rgyud dag par bya ba'i slad du mdun bskyed kyi lha dang sangs rgyas byang sems rnams kyi drung du skyabs gsum sngon du 'gro bas byang chub kyi sems bzung snyam pas 'di'i rjes zlos mdzod/__/'gro rnams bsgral 'dod bsam pa yis/__/sangs rgyas chos dang dge 'dun la/__/byang chub snying por mchis kyi bar/__/rtag par bdag ni skyabs su mchi/__/shes rab snying brtse dang bcas pa'i/__/brtson pas sems can don du bdag__/sangs rgyas mdun du gnas bcas te/__/rdzogs pa'i byang chub sems bskyed bgyi/__/lan gsum/__khyad par 'phags pa byams pa'i rjes gnang stsal du gsol snyam pa'i 'dun pas 'di'i rjes zlos kyang gsungs shig__/slob dpon dgongs su gsol/__bdag la 'phags pa byams pa'i rjes gnang ma lus pa stsal du gsol/__zhes lan gsum gyis gsol ba btab nas/__da rjes gnang gi gzhi dgod pa'i slad du dmigs pa 'di bzhin mdzad par zhu/__swa b+ha ba sogs/__phyi nang gi dngos po thams cad mi dmigs te stong pa nyid du gyur pa'i ngang las/__pad zla'i gdan la khyed rang rnams kyi sems nyid maiM yig yongs su gyur pa las spyi blugs kyis mtshan pa'i klu shing gi yal ga maiM gyis mtshan pa/__de'i 'od kyi 'phro 'du las khyed rang rnams 'phags pa byams pa sogs nas/__rin po che'i rgyan can/__thugs kar zla ba'i dkyil 'khor la maiM yig dang bcas pa rnams gsal lam ste gyur pa'i mos pa mdzod/__de nas rjes gnang dngos gzhi la gsum las/__dang po sku'i rjes gnang ni/__slob dpon yang rang gis bsgoms pa dang 'dra ba'i 'phags pa byams pa dngos yin snyam pa'i mos gus byas pas/__slob dpon gyi thugs ka nas 'od zer 'phros/__mdun bskyed kyi lha'i thugs rgyud bskul/__de'i thugs ka nas 'od zer 'phros/__phyogs bcu'i sangs rgyas byang sems thams cad kyi thugs rgyud bskul bas/__slob dpon dang mdun bskyed kyi lha dang phyogs bcu'i sangs rgyas dang byang chub sems dpa' thams cad kyi thugs ka nas 'phags pa byams pa'i sku che chung ma nges pa dpag tu med pa byon/__khyed rang rnams kyi spyi gtsug la sogs pa dang ba spu'i bu ga rnams nas char bab pa bzhin du sib sib thim par mos pa mdzod/__dzaHhU~M ba~M hoH__gnyis su med par thim/__dril bu'am ting shag dkrol/__gnyis pa gsung gi rjes gnang ni/__slob dpon gyi snying gar zla ba'i dkyil 'khor gyi steng du maiM ser po/__de las sngags kyi phreng ba byung /__slob dpon gyi kha nas thon/__khyed rang rnams kyi zhal du zhugs/__thugs kar zla ba'i steng du maiM ser po gnas pa la thim/__de'i dus su phyogs bcu'i sangs rgyas dang byang chub sems dpa' rnams kyi mkhyen brtse nus mthu thams cad 'od zer gyi rnam par sngags phreng dang lhan cig zhal du zhugs/__snying ga'i maiM la thim pa'i mos pa mdzod la/__sngags 'di'i rjes zlos lan gsum gsungs shig__/oM maiM maiM tri sogs brjod/__dang pos byin gyis brlabs/__gnyis pas dbyer med du 'dres/__gsum pas brtan par byas pa'i mos pa mdzod/__slob dpon la me tog 'thor bzhin du 'di'i rjes zlos mdzod cig__/bcom ldan bdag gis bzung lags kyi/__/bdag la 'go bar mdzad du gsol/__/zhes lan gsum/__de ltar phul ba'i me tog de nyid slar yang byin gyis brlabs te/__/khyed rang gi spyi bor phul ba'i mos pa mdzod cig__/slob dpon gyis me tog gtor zhing /__/bcom ldan 'di la stsal lags kyis/__/'di la 'go bar mdzad du gsol/__/sngags kyi dngos grub stsal du gsol/__/brtul zhugs brtan par mdzad du gsol/__rig pa 'dzin pa 'di rnams la rje btsun byams pa mgon po'i sku gsung thugs kyi byin rlabs ma lus pa 'jug par gyur cig__/gsum pa thugs kyi rjes gnang ni/__mdun bskyed kyi lha la mos gus dung dung ba dang /__bdag gi rgyud byin gyis brlab tu gsol snyam pa mdzad pas/__mdun gyi lha'i thugs ka nas/__phyag mtshan gyi tshogs dpag tu med pa rgyang ste byon/__khyed rang rnams kyi snying ga'i sa bon dang dbyer med du 'dres/__rgyud byin gyis brlabs pa'i mos pa mdzod/__de nas rgya gzhung sgrub thabs kyi lung yang spro na bya'o/__/rjes gtso bos/__maN+Dal/__deng nas sogs spyi ltar byas la/__slob ma rnams rang gnas su gtang /__tshom bu'i lha la phyag mchod bzod gsol gshegs bsdu shis brjod sogs spyi ltar bya'o/__/yang gdams ngag gzhan las 'byung ba ltar 'di'i gzungs sgrub sogs 'di dag gi khungs sgrol ma rnal 'byor ma'i rgyud phyi ma las/__byams pa'i sngags bzlas pa'i chus 'khrud pa dang /__sa dkar la bzlas te ril bu bya ba dang /__srung skud byas pa de dag gis ni nad dang gdon las thar ba dang /__mtshams med pa byas la'ang ngan 'gro las thar bar 'gyur ro/__/zhes rgya cher bsngags so/__/bya bar 'dod na/__bum pa bcud ldan mchod gtor bcas tshul bzhin du bshams la/__bdag bskyed sngon du 'gro bas/__bum pa'i nang du zla ba'i steng du gsang sngags kyi phreng ba bkod/__bum pa'i steng du 'phags pa byams pa bsgom/__de'i phyag las bdud rtsi'i chu rgyun byung bas bum pa'i yi ge la thim pas yi ge 'od du zhu ba las bum pa'i nang bdud rtsis khengs par bsam zhing sngags bzla/__bzlas pa tshar ba dang /__'phags pa byams pa la mchod pa dang gtor ma 'bru gsum gyis brlab/__rtsa sngags lan gsum gyis phul la mchod bstod gsol ba gdab la gshegs su gsol/__chu des rang gzhan la khrus bya ba sogs phan gdags par byas na phan yon dpag tu med pa 'byung bar gsungs so/__/de nyid las sngags 'dag byed na'ang khrus chus sa dkar po dri ma med pa sbrus la ril bu bya/__de'i steng du zla ba'i dkyil 'khor la gsang sngags bkod pa de las bdud rtsi'i rgyun byung pas ril bu la thim pas bdud rtsir mer gyis gyur par bsgoms la/__de lta bu'i ril bus bdag gzhan la phan gdags par bya'o/__/srung skud byed na/__skud pa gtsang ma la rdo rje'i mdud pa gsum mam lnga byas pa snyims pa'i bar du bcug__/de'i steng du zla ba'i dkyil 'khor gyi steng du gsang sngags bkod la 'od du zhu ba las byung ba'i skud par bsgoms te/__de la rten 'brel gyi sngags gsum mam lnga bzlas pas rab gnas byas la gdags par bya'o/_/zhes pa'ang nyer mkho'i yan lag tu mkhyen brtse'i dbang pos bris pa dge legs kyi bdud rtsis phan bde'i chu skyes rtag tu rgyas par gyur cig__/mang+ga laM//__//dge'o//__//dge'o//__//dge'o//