JKW-KABUM-11-DA-007-003

Previous Text Back to Volume PageNext Text

རྡོ་རྗེ་མི་འཁྲུགས་པ་ལྷ་དགུའི་སྒོ་ནས་གཤིན་པོ་རྗེས་སུ་འཛིན་པའི་ཆོ་ག་མདོར་བསྡུས་པ་ཀླག་ཆོག་ཏུ་བཀོད་པ།

Wylie title	rdo rje mi 'khrugs pa lha dgu'i sgo nas gshin po rjes su 'dzin pa'i cho ga mdor bsdus pa klag chog tu bkod pa
Location	mkhyen brtse'i bka' 'bum Volume 11, sde tshan 7, Text 3, Pages 263-274 (Folios 10a4 to 15b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	ངོར་ཆེན་དཀོན་མཆོག་ལྷུན་གྲུབ་ (Ngor mkhan chen, 10th)
Citation	'jam dbyangs mkhyen brtse'i dbang po. rdo rje mi 'khrugs pa lha dgu'i sgo nas gshin po rjes su 'dzin pa'i cho ga mdor bsdus pa klag chog tu bkod pa. In 'jam dbyangs mkhyen brtse'i dbang po'i bka' 'bum, Vol. 11: 263-274. Khams sde dge rdzong sar dgon: Rdzong sar blo gros phun tshogs, 2020.
Genre	Ritual and Liturgical Texts - cho ga phyag len  ·  Liturgy - ngag 'don  ·  Funerary Rituals - gnas lung - byang chog
Deity	rdo rje mi 'khrugs pa
Colophon	ཞེས་པའང་ངོར་ཆེན་ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱི་གསུང་རབས་ཀྱི་དངོས་བསྟན་ཇི་ལྟ་བར་ངག་འདོན་བཀླག་ཆོག་ཏུ་མཉྫུ་གྷོ་ཥས་བྲིས་པ་སརྦ་དཱ་སུ་ཤྲེ་ཡོ་བྷ་བ་ཏུ།།
	zhes pa'ang ngor chen thams cad mkhyen pa dkon mchog lhun grub kyi gsung rabs kyi dngos bstan ji lta bar ngag 'don bklag chog tu many+dzu g+ho Shas bris pa sarba dA su shre yo b+ha ba tu

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །རྡོ་རྗེ་མི་འཁྲུགས་པ་ལྷ་དགུའི་སྒོ་ནས་གཤིན་པོ་རྗེས་སུ་འཛིན་པའི་ཆོ་ག་མདོར་བསྡུས་པ་ཀླག་ཆོག་ཏུ་བཀོད་པ་བཞུགས་སོ། །ཨོཾ་སྭ་སྟི། རྡོ་རྗེ་མི་འཁྲུགས་པ་ལྷ་དགུའི་སྒོ་ནས་གཤིན་པོ་རྗེས་སུ་བཟུང་བའི་ཆོ་ག་མདོར་བསྡུས་པ་ནི། སྦྱོར་བའི་སྐབས་སུ་དཀྱིལ་འཁོར་གྱི་ལྷོ་ཕྱོགས་སུ་སྦྱོང་སྟེགས་པདྨ་འདབ་བརྒྱད་བྲིས་པའི་སྟེང་དུ་ཚེ་འདས་ཀྱི་མིང་བྱང་ངམ་རུས་བུ་སོགས་བཞག །སྦྱོང་ཆས་ཟས་བསྔོ་སོགས་ཀྱང་འདུ་བྱ། དངོས་གཞིར་མཆོད་པ་བྱིན་རླབས་ནས་བདག་བསྐྱེད། མདུན་བསྐྱེད། བུམ་བསྐྱེད། ཆ་གསུམ། བདག་འཇུག་བཅས་དཀྱུས་ལྟར་ལ། །མདུན་བསྐྱེད་ཀྱི་བཟླས་པའི་སྐབས། །བྱེ་མའམ་ཡུངས་ཀར་ལ་སྔགས་ཀྱི་ནུས་པ་བསྡུ། རྟེན་ཨ་མྲྀ་ཏས་བསང་། ཤཱུ་ནྱ་ཏས་སྦྱངས། སྟོང་པའི་ངང་ལས་ནྲྀ་ལས་ཚེ་ལས་འདས་པ་ཆེ་གེ་མོ་རང་གི་ཕུང་པོ་དང་ཁམས་དང་སྐྱེ་མཆེད་ཐམས་ཅད་ཡོངས་སུ་རྫོགས་པ་གསོན་པོའི་རྣམ་པ་ཇི་ལྟ་བ་བཞིན་དུ་གྱུར་པར་བསམ། རང་གི་ཐུགས་ཀའི་ཧཱུྃ་དང་ཚེ་འདས་ཀྱི་སྙིང་གའི་ནྲྀ་ལས་འོད་ཟེར་འཕྲོས་པས་ཚེ་འདས་ཀྱི་རྣམ་ཤེས་གང་ན་གནས་ནས་བཀུག་པར་བསམ་ཞིང་ལྷའི་ང་རྒྱལ་བརྟན་པོས་འཇིག་རྟེན་གསུམ་རྒྱལ་གྱི་ཕྱག་རྒྱ་བཅས་ཏེ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི༴ ཆོས་ཀྱི༴ དགེ་འདུན༴ གསང་སྔགས་རིག་སྔགས་ཀྱི་རྒྱལ་པོ་ཁྲོ་བོ་ཁྲོ་མོ་རྣམས་ཀྱི༴ བཅོམ་ལྡན་འདས་རྡོ་རྗེ་མི་འཁྲུགས་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་བདེན་པ་ཆེན་པོའི་བྱིན་གྱི་རླབས་ཀྱིས། ཚེ་ལས་འདས་པ་ཆེ་གེ་མོ་ཞེས་བགྱི་བ་ཁམས་གསུམ་སྐྱེ་གནས་བཞི་རིགས་དྲུག་གང་ན་གནས་ཀྱང་སྐད་ཅིག་ལ་འདིར་མཆིས་པར་གྱུར་ཅིག །ཨོཾ་ཊཀྐི་ཧཱུྃ་ཛཿ ཞེས་ལན་གསུམ་དང་། ཨོཾ་ཤོ་དྷ་ནེ་ཤོ་དྷ་ནེ་སརྦ་པཱ་པཾ་ཨ་པ་ནཱ་ཡ་ཧཱུྃ། ཞེས་པས་རྣམ་པར་ཤེས་པ་ཨ་ཐུང་ངུའི་རྣམ་པར་བཀུག་སྟེ་རྟེན་ལ་ཐིམ་པས་སྙིང་གར་ཨ་དཀར་པོ་དྲི་མ་མེད་པའི་གཟུགས་སུ་གྱུར་པར་བསམ། གཏོར་མ་རྟེན་ལ་བསྐོར་ཞིང་། ཨོཾ་སརྦ་བིགྷྣཱན་ན་མཿསརྦ་ཏ་ཐཱ་ག་ཏ་ཞེས་སོགས་ལན་གསུམ་གྱིས་ཞི་བས་སྦྱང་། ཏིང་ལོ་དང་ཆང་བུས་རྟེན་ལ་བསྐོར་ཞིང་། རྡོ་རྗེ་གསོར་ལ་སུམྦྷ་སོགས་བརྗོད་པ་ལན་གསུམ་གྱིས་ཞི་དྲག་ཕྱེད་མས་སྦྱངས་ལ། ཚེ་ལས་འདས་པ་ཆེ་གེ་མོ་གསོན་གྱི་དུས་ན་ཚེ་གནས་པ་དང་། གཤིན་གྱི་དུས་ན་སྡིག་པ་སྦྱོང་བ་ལ་བར་དུ་གཅོད་པར་བྱེད་པའི་གདོན་བགེགས་ལོག་པར་འདྲེན་པ་ཐམས་ཅད་གཏོར་མ་ལམ་རྔན། ཏིང་ལོ་ལམ་སྒྲོན། ཆང་བུ་ལམ་བརྒྱགས་ཀྱི་ཚུལ་དུ་ཁྱེར་ལ་སའི་ཕྱོགས་འདིར་མ་གནས་པར་གཞན་དུ་སོང་ཞིག །སྤྲོ་ན། །རང་གི་སྙིང་ག་ནས་འོད་ཟེར་འཕྲོས་པས་ཡེ་ཤེས་ཀྱི་ཁྲོ་བོའི་ཚོགས་དཔག་ཏུ་མེད་པ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཞེས་དང་། རྡོ་རྗེ་དྲིལ་བུ་འཛིན་པས། ཧཱུྃ། ཡེ་ཤེས་བསྐལ་པ་མེ་ལྟར་འབར་བའི་འོད། །མ་རིག་འདོད་པའི་མུན་ཁམས་ཐམས་ཅད་སྲེག །ཞེ་སྡང་གཤིན་རྗེའི་འཇིགས་པ་ཐམས་ཅད་འཇོམས། །དཔའ་བོ་ཆེན་པོ་དཔའ་མཚན་སྟག་ལྤགས་ཅན། །ལོག་འདྲེན་སྲིན་པོའི་མཐའ་གནོན་དགྲ་འདུལ་བ། །རིག་པའི་རྒྱལ་པོ་ཁྲོ་བོ་བཞུགས་སོ་འཚལ། །ལོག་འདྲེན་གདུལ་བའི་སླད་དུ་སྤྱན་འདྲེན་ན། །འགྲོ་བའི་དོན་དུ་མཆོད་ཀྱིས་གཤེགས་སུ་གསོལ། ཨོཾ་བཛྲ་ཀྲོ་དྷཱ་རཱ་ཛ་ས་པ་རཱི་བཱ་ར་ཨེ་ཧྱེ་ཧིས་སྤྱན་དྲངས། ཨོཾ་པདྨ་ཀ་མ་ལཱ་ཡ་སྟཾ་གྱིས་གདན་དབུལ། ཨོཾ་ཨརྒྷཾ། པུཥྤེ། དྷཱུ་ཥྤེ། ཨཱ་ལོ་ཀེ། གནྡྷེ། ནཻ་བི་དྱེ། ཤཔྡ་ཧཱུྃ་གིས་མཆོད། ཧཱུྃ། ཆོས་ཉིད་སྟོང་པ་གཉིས་མེད་ངང་ཉིད་ལས། །འཇིག་རྟེན་སྤྱོད་པའི་ཚུལ་ཡང་མི་སྤོང་ཞིང་། །ཐབས་ལ་མཁས་པས་འཇིགས་བྱེད་སྐུར་སྟོན་པ། །ཁྲོ་ཆེན་འབར་བའི་ཚོགས་ལ་ཕྱག་འཚལ་བསྟོད། །ཡེ་ཤེས་ཞི་བའི་ངང་ལས་མ་གཡོས་ཀྱང་། །སྐུ་ཡི་ཆ་ལུགས་ཟ་བྱེད་རྔམ་སྟབས་ཅན། །གསུང་གི་ང་རོ་འབྲུག་སྟོང་ལྡིར་བའི་སྒྲས། །མ་ལུས་དབང་དུ་སྡུད་ལ་ཕྱག་འཚལ་བསྟོད། །ལྷག་པའི་ཡེ་ཤེས་རོལ་པ་སྟོན་མཛད་ཅིང་། །བསྡིགས་པའི་མཚོན་ཆ་སྣ་ཚོགས་ཕྱག་ན་བསྣམས། །ཉོན་མོངས་དུག་ཆེན་རྩད་ནས་འཇོམས་མཛད་པ། །སྦྲུལ་གདུག་རྒྱན་གྱིས་བརྒྱན་ལ་ཕྱག་འཚལ་བསྟོད། །བསྐལ་པ་མེ་ལྟར་འབར་བའི་ཀློང་དཀྱིལ་ན། །དཔའ་བོ་སྟངས་སྟབས་བརྐྱང་བསྐུམ་ཚུལ་དུ་བཞུགས། །ཉི་ཟླ་འབར་བའི་སྤྱན་གྱི་སྡང་མིག་གིས། །བགེགས་དཔུང་སྲེག་པར་མཛད་ལ་ཕྱག་འཚལ་བསྟོད། །གཏུམ་ཆེན་དུས་མཐའི་མེ་ལྟར་གཟི་བརྗིད་འབར། གློག་སྟོང་འགྱུ་འདྲའི་ཁྲོ་གཉེར་མཆེ་བ་གཙིགས། །རྔམ་པའི་ང་རོ་འབྲུག་སྒྲ་སྟོང་བཞིན་སྒྲོགས། །ཁྲོ་རྒྱལ་བགེགས་ཚོགས་འདུལ་ལ་ཕྱག་འཚལ་བསྟོད། །འཇིགས་པའི་ཧཱུྃ་སྒྲ་ངེས་སྒྲོགས་ཤིང་། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་པའི་ལྷ། །བགེགས་ཀྱི་དགྲ་ལ་ཕྱག་འཚལ་བསྟོད། །ཅེས་བསྟོད། གང་ལྟར་ཡང་། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས༴ ཆོས་ཀྱི༴ དགེ་འདུན༴ གསང་སྔགས་དང་རིག་སྔགས་ཀྱི་རྒྱལ་པོ་ཁྲོ་བོ་ཁྲོ་མོ་རྣམས༴ བཅོམ་ལྡན་འདས་མི་འཁྲུགས་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་བདེན་པ་ཆེན་པོའི་བྱིན་གྱིས་བརླབས་ཀྱིས། ཚེ་ལས་འདས་པ་ཆེ་གེ་མོ་གསོན་གྱི་དུས་ན་ཚེ་གནས་པ་དང་། གཤིན་གྱི་དུས་ན་སྡིག་པ་སྦྱོང་བ་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་པར་འདྲེན་པའི་རིགས་གང་ཡིན་པ་དེ་དག་ལ་རྒྱུད་སྡེ་དང་མཐུན་པའི་སྦྱོང་བ་རྣམ་པར་དག་པ་བྱས་ཟིན་པས། དེས་ཚིམ་པར་གྱིས་ལ་སའི་ཕྱོགས་འདིར་མ་གནས་པར་གཞན་དུ་སོངས་ཤིག །གང་དག་མི་འགྲོ་བ་དེ་དག་དེ་བཞིན་གཤེགས་པ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ལས་བྱུང་བའི་རྡོ་རྗེ་འབར་ཞིང་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་བྱའོ། །ཞེས་དང་། རྟེན་ལ་གུ་གུལ་གྱིས་བདུག །ཡུངས་ཀར་གྱིས་བྲབ། དྲག་སྔགས་མང་དུ་བཟླ་ཞིང་རོལ་མོ་དྲག་ཏུ་བྱ་བ་ལན་གསུམ་གྱི་དྲག་པོས་སྦྱང་། །ཚེ་འདས་ཀྱི་སྡིག་སྒྲིབ་ཐམས་ཅད་ཀྃ་ཡིག་ནག་པོའི་རྣམ་པས་སྣ་སྒོ་ནས་ཐོན་ཏེ་སྡིག་པ་རྭ་ཅན་གྱི་རྣམ་པས་ཏིལ་ལ་ཐིམ། དེ་གཡས་སུ་མེ་དང་། གཡོན་དུ་ཆུར་དོར་བས་སྡིག་སྒྲིབ་བསྲེགས་ཤིང་སྦྱངས་པར་བསམས་ལ། ཨོཾ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱ། ཞེས་བརྗོད་པས་མེར་བསྲེགས་ཤིང་ཆུར་དོར། རྟེན་ལ་ཀཾ་ཀ་ནི་བཟླ་ཞིང་བྱེ་མའམ་ཡུངས་ཀར་གྱིས་བྲབས་ལ། མཐར་ཆེ་གེ་མོའི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་གྱུར་ཅིག །ཅེས་བརྗོད། དཀྱིལ་འཁོར་ལ་མེ་ལོང་བསྟན་ཏེ། ཇི་ལྟར་བལྟམས་པ་སོགས་དང་། འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིན་ཏེ། །ཅི་འདོད་དངོས་གྲུབ་སྩོལ་བར་མཛོད། ཨོཾ་སརྦ་ཏ་ཐཱ་ག་ཏ་སོགས་དང་། །དེ་བཞིན་གཤེགས་པ་རྣམས་དང་དེ་སྲས་ལ། །རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོང་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་སོགས་ཀྱིས་ཁྲུས་གསོལ། །དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱིའོ། །ཨོཾ་ཧཱུྃ་ཏྲྃ་ཧྲཱིཿཨཱཿཀཱ་ཡ་བི་ཤོ་དྷ་ནི་སྭཱ་ཧཱ། ཞེས་པས་སྐུ་ཕྱིའོ། །དེ་ནས་ཁྲུས་བྱས་པའི་ཆུ་དེ་སླར་ཡང་བུམ་པའི་ནང་དུ་བླུགས་ལ། རྟེན་དངོས་སམ་མེ་ལོང་ལ་གཟུགས་བརྙན་འཆར་དུ་བཅུག་ལ། འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་པ། །གཏོང་བ་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ཀྱིས་ཁྲུས་བྱའོ། །ཞེས་དང་ཀཾ་ཀ་ནི་བརྗོད། དེ་བཞིན་དུ་ཚིག་རྐང་དང་པོ་དང་གསུམ་པའི་གནས་སུ། ཚུལ་ཁྲིམས༴ བཟོད་པ༴ བརྩོན་འགྲུས༴ བསམ་གཏན༴ ཤེས་རབ༴ ཞེས་བཅུག །རྐང་པ་གཉིས་པའི་སེར་སྣའི་གནས་སུ། ཁྲིམས་འཆལ༴ ཁོང་ཁྲོ༴ ལེ་ལོ༴ རྣམ་གཡེང༴ ཤེས་འཆལ་རྣམས་བཅུག་ལ། ཚིག་བཞི་པ་ལྔས་ཁྲུས་བྱ། དེ་ནས་བུ་ལ་སོགས་པའི་ཉེ་དུ་ཡོད་ན་མིང་བྱང་འཛིན་དུ་བཅུག་ཅིང་ཕྱག་བྱེད་དུ་གཞུག །དབང་མི་བསྐུར་ན། ཚེ་ལས་འདས་པས་བླ་མ་དང་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་བ་སོགས་ཡན་ལག་བདུན་གྱི་སྒོ་ནས་ཚོགས་གསོག་ཅིང་སྐྱབས་སུ་གསོལ་བར་གྱུར་པར་བསམས་ལ། ཇི་སྙེད་སུ་དག་སོགས་ཡན་ལག་བདུན་པ་བྱ། གང་ལྟར་ཡང་། གཙོ་བོ་རྒྱལ་བ་འགྲོ་བའི་མགོན། །འགྲོ་བ་སྐྱོབ་པའི་དོན་བརྩོན་པ། །སྟོབས་ཆེན་འཇིགས་པ་རྣམ་སེལ་བ། །བདག་ནི་སྐྱབས་སུ་མཆི་ལགས་སོ། །དེ་ཡི་ཐུགས་སུ་ཆུད་པའི་ཆོས། །འཁོར་བའི་འཇིགས་པ་སེལ་མཛད་པ། །བྱང་ཆུབ་སེམས་དཔའི་ཚོགས་ལ་ཡང་། །དེ་བཞིན་ཚེ་འདས་སྐྱབས་སུ་མཆི། །ཚེ་འདས་འཇིགས་པ་ཆེར་མཐོང་ནས། །ཀུན་ཏུ་བཟང་ལ་ཚེ་འདས་འབུལ། །འཇམ་པའི་དབྱངས་ལ་ཚེ་འདས་ཀྱི། །ལུས་འདི་བདག་གིས་དབུལ་བར་བགྱི། །ཐུགས་རྗེའི་སྤྱོད་པ་མ་འཁྲུལ་པའི། །སྤྱན་རས་གཟིགས་མགོན་དེ་ལ་ཡང་། །ཉམ་ཐག་ང་རོས་འོ་དོད་འབོད། །སྡིག་ལྡན་འདི་ལ་བསྐྱབ་ཏུ་གསོལ། །འཕགས་པ་ནམ་མཁའི་སྙིང་པོ་དང་། །ས་ཡི་སྙིང་པོ་དག་དང་ནི། །ཐུགས་རྗེའི་བདག་ཉིད་ཐམས་ཅད་ལ། །ཕྱག་འཚལ་སྙིང་ནས་འོ་དོད་འབོད། །གང་ཞིག་མཐོང་ན་གཤིན་རྗེ་ཡི། །ཕོ་ཉ་ལ་སོགས་སྡང་བ་རྣམས། །སྐྲག་ནས་ཕྱོགས་བཅུར་འབྱེད་བྱེད་པ། །རྡོ་རྗེ་ཅན་ལ་སྐྱབས་སུ་མཆི། །སྔོན་ཆད་ཁྱེད་ཀྱི་བཀའ་ལས་འདས། །ད་ནི་འཇིགས་པ་ཆེར་མཐོང་ནས། །ཁྱེད་ལ་སྐྱབས་སུ་མཆི་ལགས་ཀྱི། །འཇིགས་པ་མྱུར་དུ་བསལ་དུ་གསོལ། ཚེ་ལས་འདས་པ་ཆེ་གེ་མོ་ཞེས་བགྱི་བ་དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ་དཀོན་མཆོག་རིན་པོ་ཆེ་རྣམ་པ་གསུམ་དང་། བྱང་ཆུབ་སེམས་དཔའ་ཉེ་བའི་སྲས་བརྒྱད་དང་བཅས་པ་ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །སྡིག་པ་ཐམས་ཅད་སྦྱང་དུ་གསོལ། ལམ་བསྟན་དུ་གསོལ། མྱུར་དུ་རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་གོ་འཕང་ཐོབ་པར་མཛད་དུ་གསོལ། ཞེས་སྙིང་ཐག་པ་ནས་བརྗོད་ཅིང་གསོལ་བ་འདེབས་པར་བསམ་མོ། །དབང་མི་བསྐུར་ན། དཀྱིལ་འཁོར་གྱི་གཙོ་བོ་རྡོ་རྗེ་མི་འཁྲུགས་པས་ཚེ་ལས་འདས་པ་ལ་སྐྱབས་གསུམ་སྔོན་དུ་འགྲོ་བ་ཅན་གྱི་སྨོན་པ་དང་འཇུག་པའི་བདག་ཉིད་ཅན་གྱི་བྱང་ཆུབ་མཆོག་ཏུ་སེམས་བསྐྱེད་པའི་སྡོམ་པ་སྩལ་བར་གྱུར་པའི་མོས་པས། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཞེས་ལན་གསུམ་དང་། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་པའི་བསླབ་པ་ལ། །དེ་དག་རིམ་བཞིན་གནས་པ་དང་། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །བྱང་ཆུབ་སེམས་དཔའི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །ཞེས་པ་ལན་གསུམ་ཚེ་འདས་ཀྱིས་རྗེས་ཟློས་བྱས་པར་མོས་ཏེ་དངོས་སུ་རང་གིས་བརྗོད་དོ། །དབང་བསྐུར་ན་གོང་གི་བདུན་རྣམ་དག་བཞག་ལ། འཇུག་པ་ནས་བརྩམས་དབང་གི་དངོས་གཞི་ཡན་ཆད་ཙམ་ཞིག་བསྐུར་ལ། གཙོ་བོས༴ མཎྜལ། དེང་ནས་སོགས་བྱ། དེ་ལྟར་དབང་བསྐུར་བས་ཁྱོད་རང་དེ་བཞིན་གཤེགས་པ་ཐམས་ཅད་ཀྱི་བདག་ཉིད་རྡོ་རྗེ་མི་འཁྲུགས་པར་གྱུར་པ་དེ་ཉིད་ལ་ཉེ་བར་སྤྱོད་པ་རྣམས་ཀྱིས་མཆོད་པར་མོས་པ་མཛོད། ཨོཾ་སརྦ་ཏ་ཐཱ་ག་ཏ་བཛྲ་ཨཀྵོ་བྷྱ་ཨརྒྷཾ་སོགས་ཆུ་གཉིས་སྔོན་འགྲོའི་ཉེར་སྤྱོད་ཀྱིས་མཆོད། གཟུང་འཛིན་རྡོ་རྗེ་བརྟན་པའི་ས། །མེ་ལོང་ཡེ་ཤེས་ངོ་བོ་ཉིད། །བདུད་འདུལ་ཆེན་པོའི་ཕྱག་རྒྱ་ཅན། །ཕྱག་འཚལ་མི་བསྐྱོད་རྡོ་རྗེ་ལ། །ཞེས་པས་བསྟོད། དབང་མ་བསྐུར་ན་ཚེ་ལས་འདས་པ་སྐད་ཅིག་གིས་རྡོ་རྗེ་མི་འཁྲུགས་པའི་སྐུར་གསལ་བའི་ཐུགས་ཀར་ཨ་ཡིག་གིས་མཚན་པར་གྱུར་པར་བསམས་ལ། མཆོད་བསྟོད་གོང་བཞིན་བྱ། ཟས་གཏད་བྱེད་ན། འདོད་ཡོན་རྣམས་ལ་ཆབ་ཀྱིས་བྲན་ཏེ། ཨ་མྲྀ་ཏས་བསང་། སྭ་བྷཱ་བས་སྦྱངས། ཨ་ཀཱ་རོ་སོགས་ལན་གསུམ་གྱིས་བྱིན་རླབས། །ཁ་དོག་དབྱིབས་ལེགས་ཡིད་འོང་རྒྱན་ཕྲེང་ལྡན། །ཕྱོགས་དུས་ཀུན་ན་གཟུགས་མཆོག་ཅི་མཆིས་རྣམས། །མོས་བློས་མཆོད་གནས་ལྷ་ལ་བདག་འབུལ་གྱི། །བཞེས་ཤིག་བླ་མེད་བྱང་ཆུབ་ཐོབ་པར་ཤོག །ཨོཾ་སརྦ་ཏ་ཐཱ་ག་ཏཱ་ཨཀྵོ་བྷྱ་རཱུ་པ་ཀཱ་མ་གུ་ཎ་པཱུ་ཛི་ཏེ་ཨཱཿཧཱུྃ། ཞེས་དང་། སྒྲ་དྲི་རོ་རེག་བྱ་རྣམས་ལའང་། ཤཔྡ་གནྡྷེ་ར་ས་སྤཪྵེ་སོགས་བསྒྱུར་ཏེ་འབུལ་ལ། ཐམས་ཅད་ནམ་མཁའི་མཛོད་སོགས་བརྗོད། བྱང་བུ་བསྲེག་ན། ཚེ་འདས་ཀྱི་རྣམ་ཤེས་ཨ་དཀར་པོའི་རྣམ་པས་མདུན་གྱི་ནམ་མཁར་གནས་པར་མོས་ཤིང་། ཆོས་རྣམས་ཐམས་ཅད་ཀྱི་རང་བཞིན་སྟོང་པ་ཉིད་དུ་ཤེས་པའི་ངང་ནས། འཁྲུལ་ངོར་སྣང་བའི་ཚེ་འདས་ཀྱིས་གཙོ་བྱས་སེམས་ཅན་ཐམས་ཅད་ཀྱི་སྡིག་སྒྲིབ་དང་སྡུག་བསྔལ་གྱི་བུད་ཤིང་ཐམས་ཅད། བདག་མེད་རྟོགས་པའི་ཡེ་ཤེས་ཀྱི་མེས་བསྲེགས་པར་གྱུར་པར་བསམས་ལ། །སྟོང་ཉིད་ཡེ་ཤེས་འབར་བའི་མེས། །ཚེ་འདས་སྒྲིབ་པའི་བུད་ཤིང་དང་། །འཁོར་བའི་སྡུག་བསྔལ་མ་ལུས་པ། །ཡེ་ཤེས་སྣང་བར་འབར་གྱུར་ཅིག །ཅེས་དང་། ཀཾ་ཀ་ནི་བརྗོད་ཅིང་བསྲེག་གོ། །ལམ་སྦྱང་བསྟན་ནི། ནུབ་གོང་མ་རྣམས་ལ་མཆོད་པའི་རྗེས་དང་། ནུབ་ཐ་མ་ལ་བྱང་བུ་བསྲེགས་པའི་རྗེས་ལ་བྱ་སྟེ། དྲིལ་བུ་གསིལ་ཞིང་མེ་ཏོག་གཏོར་ལ། དཀོན་མཆོག་རིན་ཆེན་དཔལ་ཞིང་དུ། །དཀོན་མཆོག་རིན་ཆེན་ལས་བྱུང་བ། །དཀོན་མཆོག་རིན་ཆེན་འོད་ཟེར་གྱི། །རིན་ཆེན་ཕྲེང་བ་རྣམ་དག་པ། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་བསྒོམ་པའི་ལམ། །བླ་ན་མེད་པའི་ཁྱད་པར་ལམ། །བྱང་ཆུབ་བར་ཆད་མེད་པའི་ལམ། །རྣམ་པར་གྲོལ་བའི་ལམ་དག་ལ། །བསྟེན་ནས་སྡིག་པ་ཀུན་སྦྱངས་ནས། །འཕགས་པའི་ལམ་དེར་འགྲོ་བར་ཤོག །ཨོཾ་རཏྣེ་རཏྣེ་མ་ཧཱ་རཏྣེ་རཏྣ་སཾ་བྷ་ཝེ། རཏྣ་ཀི་རཏྣ་རཏྣ་མཱ་བི་ཤུདྡྷེ། ཤོ་དྷ་ཡ་སརྦ་པཱ་པཾ་ཧཱུྃ་ཏྲཊ། ཅེས་བརྗོད་ཅིང་། ཚེ་འདས་ཀྱི་རྣམ་ཤེས་ཨ་དཀར་པོ་དྲི་མ་མེད་པའི་རྣམ་པ་ཅན་དེ་ཤར་ཕྱོགས་མངོན་པར་དགའ་བའི་ཞིང་ན་བཞུགས་པའི་བཅོམ་ལྡན་འདས་རྡོ་རྗེ་མི་འཁྲུགས་པའི་ཐུགས་ཀར་ཐིམ་པར་བསམ་ལ་རོལ་མོ་བྱ། འདི་ནས་ཉིང་མཚམས་སྦྱར་མ་ཐག །དག་པའི་ཞིང་ཁམས་མངོན་དགའ་རུ། །པདྨའི་སྙིང་པོ་དམ་པ་ལ། །བརྫུས་ཏེ་སྐྱེ་བ་ལེན་པར་ཤོག །ཅེས་སོགས་ཚེ་འདས་ཀྱི་དོན་དུ་སྨོན་ལམ་ཅི་ཤེས་བྱ་ཞིང་བདག་མེད་པའི་ལྟ་བས་རྒྱས་བཏབ་ལ་རྗེས་ཀྱི་ཆོག་རྣམས་དཀྱུས་ལྟར་བྱའོ། །ཞེས་པའང་ངོར་ཆེན་ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱི་གསུང་རབས་ཀྱི་དངོས་བསྟན་ཇི་ལྟ་བར་ངག་འདོན་བཀླག་ཆོག་ཏུ་མཉྫུ་གྷོ་ཥས་བྲིས་པ་སརྦ་དཱ་སུ་ཤྲེ་ཡོ་བྷ་བ་ཏུ།། །། ༈

[edit]

rdo rje mi 'khrugs pa lha dgu'i sgo nas gshin po rjes su 'dzin pa'i cho ga mdor bsdus pa klag chog tu bkod pa/__ @#/_/rdo rje mi 'khrugs pa lha dgu'i sgo nas gshin po rjes su 'dzin pa'i cho ga mdor bsdus pa klag chog tu bkod pa bzhugs so/__/oM swa sti/__rdo rje mi 'khrugs pa lha dgu'i sgo nas gshin po rjes su bzung ba'i cho ga mdor bsdus pa ni/__sbyor ba'i skabs su dkyil 'khor gyi lho phyogs su sbyong stegs pad+ma 'dab brgyad bris pa'i steng du tshe 'das kyi ming byang ngam rus bu sogs bzhag__/sbyong chas zas bsngo sogs kyang 'du bya/__dngos gzhir mchod pa byin rlabs nas bdag bskyed/__mdun bskyed/__bum bskyed/__cha gsum/__bdag 'jug bcas dkyus ltar la/__/mdun bskyed kyi bzlas pa'i skabs/__/bye ma'am yungs kar la sngags kyi nus pa bsdu/__rten a mr-i tas bsang /__shU n+ya tas sbyangs/__stong pa'i ngang las nr-i las tshe las 'das pa che ge mo rang gi phung po dang khams dang skye mched thams cad yongs su rdzogs pa gson po'i rnam pa ji lta ba bzhin du gyur par bsam/__rang gi thugs ka'i hU~M dang tshe 'das kyi snying ga'i nr-i las 'od zer 'phros pas tshe 'das kyi rnam shes gang na gnas nas bkug par bsam zhing lha'i nga rgyal brtan pos 'jig rten gsum rgyal gyi phyag rgya bcas te/__rje btsun rtsa ba dang brgyud par bcas pa'i dpal ldan bla ma dam pa rnams kyi bka' bden pa dang /__sangs rgyas kyi=__chos kyi=__dge 'dun=__gsang sngags rig sngags kyi rgyal po khro bo khro mo rnams kyi=__bcom ldan 'das rdo rje mi 'khrugs pa'i dkyil 'khor gyi lha tshogs rnams kyi bka' bden pa dang bden pa chen po'i byin gyi rlabs kyis/__tshe las 'das pa che ge mo zhes bgyi ba khams gsum skye gnas bzhi rigs drug gang na gnas kyang skad cig la 'dir mchis par gyur cig__/oM Tak+ki hU~M dzaH__zhes lan gsum dang /__oM sho d+ha ne sho d+ha ne sarba pA paM a pa nA ya hU~M/__zhes pas rnam par shes pa a thung ngu'i rnam par bkug ste rten la thim pas snying gar a dkar po dri ma med pa'i gzugs su gyur par bsam/__gtor ma rten la bskor zhing /__oM sarba big+h+nAn na maHsarba ta thA ga ta zhes sogs lan gsum gyis zhi bas sbyang /__ting lo dang chang bus rten la bskor zhing /__rdo rje gsor la sum+b+ha sogs brjod pa lan gsum gyis zhi drag phyed mas sbyangs la/__tshe las 'das pa che ge mo gson gyi dus na tshe gnas pa dang /__gshin gyi dus na sdig pa sbyong ba la bar du gcod par byed pa'i gdon bgegs log par 'dren pa thams cad gtor ma lam rngan/__ting lo lam sgron/__chang bu lam brgyags kyi tshul du khyer la sa'i phyogs 'dir ma gnas par gzhan du song zhig__/spro na/__/rang gi snying ga nas 'od zer 'phros pas ye shes kyi khro bo'i tshogs dpag tu med pa mdun gyi nam mkhar oM badz+ra sa mA dzaH__zhes dang /__rdo rje dril bu 'dzin pas/__hU~M/__ye shes bskal pa me ltar 'bar ba'i 'od/__/ma rig 'dod pa'i mun khams thams cad sreg__/zhe sdang gshin rje'i 'jigs pa thams cad 'joms/__/dpa' bo chen po dpa' mtshan stag lpags can/__/log 'dren srin po'i mtha' gnon dgra 'dul ba/__/rig pa'i rgyal po khro bo bzhugs so 'tshal/__/log 'dren gdul ba'i slad du spyan 'dren na/__/'gro ba'i don du mchod kyis gshegs su gsol/__oM badz+ra kro d+hA rA dza sa pa rI bA ra e h+ye his spyan drangs/__oM pad+ma ka ma lA ya staM gyis gdan dbul/__oM ar+g+haM/__puSh+pe/__d+hU Sh+pe/__A lo ke/__gan+d+he/__nai bi d+ye/__shap+da hU~M gis mchod/__hU~M/__chos nyid stong pa gnyis med ngang nyid las/__/'jig rten spyod pa'i tshul yang mi spong zhing /__/thabs la mkhas pas 'jigs byed skur ston pa/__/khro chen 'bar ba'i tshogs la phyag 'tshal bstod/__/ye shes zhi ba'i ngang las ma g.yos kyang /__/sku yi cha lugs za byed rngam stabs can/__/gsung gi nga ro 'brug stong ldir ba'i sgras/__/ma lus dbang du sdud la phyag 'tshal bstod/__/lhag pa'i ye shes rol pa ston mdzad cing /__/bsdigs pa'i mtshon cha sna tshogs phyag na bsnams/__/nyon mongs dug chen rtsad nas 'joms mdzad pa/__/sbrul gdug rgyan gyis brgyan la phyag 'tshal bstod/__/bskal pa me ltar 'bar ba'i klong dkyil na/__/dpa' bo stangs stabs brkyang bskum tshul du bzhugs/__/nyi zla 'bar ba'i spyan gyi sdang mig gis/__/bgegs dpung sreg par mdzad la phyag 'tshal bstod/__/gtum chen dus mtha'i me ltar gzi brjid 'bar/__glog stong 'gyu 'dra'i khro gnyer mche ba gtsigs/__/rngam pa'i nga ro 'brug sgra stong bzhin sgrogs/__/khro rgyal bgegs tshogs 'dul la phyag 'tshal bstod/__/'jigs pa'i hU~M sgra nges sgrogs shing /__/bgegs rnams ma lus 'joms mdzad pa/__/dngos grub ma lus stsol pa'i lha/__/bgegs kyi dgra la phyag 'tshal bstod/__/ces bstod/__gang ltar yang /__rje btsun rtsa ba dang brgyud par bcas pa'i dpal ldan bla ma dam pa rnams kyi bka' bden pa dang /__sangs rgyas=__chos kyi=__dge 'dun=__gsang sngags dang rig sngags kyi rgyal po khro bo khro mo rnams=__bcom ldan 'das mi 'khrugs pa'i dkyil 'khor gyi lha tshogs rnams kyi bka' bden pa dang bden pa chen po'i byin gyis brlabs kyis/__tshe las 'das pa che ge mo gson gyi dus na tshe gnas pa dang /__gshin gyi dus na sdig pa sbyong ba la gnod cing 'tshe bar byed pa'i gdon bgegs log par 'dren pa'i rigs gang yin pa de dag la rgyud sde dang mthun pa'i sbyong ba rnam par dag pa byas zin pas/__des tshim par gyis la sa'i phyogs 'dir ma gnas par gzhan du songs shig_/gang dag mi 'gro ba de dag de bzhin gshegs pa thams cad kyi thugs gnyis su med pa'i ye shes las byung ba'i rdo rje 'bar zhing rab tu 'bar ba 'dis khyed rnams kyi mgo bo tshal pa brgyar 'gas par bya'o/__/zhes dang /__rten la gu gul gyis bdug__/yungs kar gyis brab/__drag sngags mang du bzla zhing rol mo drag tu bya ba lan gsum gyi drag pos sbyang /__/tshe 'das kyi sdig sgrib thams cad ka~M yig nag po'i rnam pas sna sgo nas thon te sdig pa rwa can gyi rnam pas til la thim/__de g.yas su me dang /__g.yon du chur dor bas sdig sgrib bsregs shing sbyangs par bsams la/__oM sarba pA paM da ha na badz+ra ya swA hA/__zhes brjod pas mer bsregs shing chur dor/__rten la kaM ka ni bzla zhing bye ma'am yungs kar gyis brabs la/__mthar che ge mo'i sdig pa dang sgrib pa thams cad byang zhing dag par gyur cig__/ces brjod/__dkyil 'khor la me long bstan te/__ji ltar bltams pa sogs dang /__'di ni khrus mchog dpal dang ldan/__/thugs rje'i chu ni bla na med/__/byin rlabs ye shes chu yin te/__/ci 'dod dngos grub stsol bar mdzod/__oM sarba ta thA ga ta sogs dang /__/de bzhin gshegs pa rnams dang de sras la/__/rin chen bum pa mang po spos kyi chu/__/yid 'ong legs par bkang ba glu dang ni/__/rol mor bcas pa du mas sku khrus gsol/__/oM sarba ta thA ga ta sogs kyis khrus gsol/__/de dag sku la mtshungs pa med pa'i gos/__/gtsang la dri rab bsgos pas sku phyi'o/__/oM hU~M tra~M hrIHAHkA ya bi sho d+ha ni swA hA/__zhes pas sku phyi'o/__/de nas khrus byas pa'i chu de slar yang bum pa'i nang du blugs la/__rten dngos sam me long la gzugs brnyan 'char du bcug la/__'di ni sbyin pa'i rang bzhin chu/__/ser sna'i dri ma sbyong mdzad pa/__/gtong ba dri yis legs bsgos chu/_/khrus legs mdzad kyis khrus bya'o/__/zhes dang kaM ka ni brjod/__de bzhin du tshig rkang dang po dang gsum pa'i gnas su/__tshul khrims=__bzod pa=__brtson 'grus=__bsam gtan=__shes rab=__zhes bcug__/rkang pa gnyis pa'i ser sna'i gnas su/__khrims 'chal=__khong khro=__le lo=__rnam g.yeng=__shes 'chal rnams bcug la/__tshig bzhi pa lngas khrus bya/__de nas bu la sogs pa'i nye du yod na ming byang 'dzin du bcug cing phyag byed du gzhug__/dbang mi bskur na/__tshe las 'das pas bla ma dang dkyil 'khor gyi lha tshogs sangs rgyas dang byang chub sems dpa' rnams la phyag 'tshal ba sogs yan lag bdun gyi sgo nas tshogs gsog cing skyabs su gsol bar gyur par bsams la/__ji snyed su dag sogs yan lag bdun pa bya/__gang ltar yang /__gtso bo rgyal ba 'gro ba'i mgon/__/'gro ba skyob pa'i don brtson pa/__/stobs chen 'jigs pa rnam sel ba/__/bdag ni skyabs su mchi lags so/__/de yi thugs su chud pa'i chos/__/'khor ba'i 'jigs pa sel mdzad pa/__/byang chub sems dpa'i tshogs la yang /__/de bzhin tshe 'das skyabs su mchi/__/tshe 'das 'jigs pa cher mthong nas/__/kun tu bzang la tshe 'das 'bul/__/'jam pa'i dbyangs la tshe 'das kyi/__/lus 'di bdag gis dbul bar bgyi/__/thugs rje'i spyod pa ma 'khrul pa'i/__/spyan ras gzigs mgon de la yang /__/nyam thag nga ros 'o dod 'bod/__/sdig ldan 'di la bskyab tu gsol/__/'phags pa nam mkha'i snying po dang /__/sa yi snying po dag dang ni/__/thugs rje'i bdag nyid thams cad la/__/phyag 'tshal snying nas 'o dod 'bod/__/gang zhig mthong na gshin rje yi/__/pho nya la sogs sdang ba rnams/__/skrag nas phyogs bcur 'byed byed pa/__/rdo rje can la skyabs su mchi/__/sngon chad khyed kyi bka' las 'das/__/da ni 'jigs pa cher mthong nas/__/khyed la skyabs su mchi lags kyi/__/'jigs pa myur du bsal du gsol/__tshe las 'das pa che ge mo zhes bgyi ba dus 'di nas bzung ste byang chub snying po la mchis kyi bar du dkon mchog rin po che rnam pa gsum dang /__byang chub sems dpa' nye ba'i sras brgyad dang bcas pa thams cad la phyag 'tshal zhing skyabs su mchi'o/__/sdig pa thams cad sbyang du gsol/__lam bstan du gsol/__myur du rnam pa thams cad mkhyen pa'i sangs rgyas kyi go 'phang thob par mdzad du gsol/__zhes snying thag pa nas brjod cing gsol ba 'debs par bsam mo/__/dbang mi bskur na/__dkyil 'khor gyi gtso bo rdo rje mi 'khrugs pas tshe las 'das pa la skyabs gsum sngon du 'gro ba can gyi smon pa dang 'jug pa'i bdag nyid can gyi byang chub mchog tu sems bskyed pa'i sdom pa stsal bar gyur pa'i mos pas/__byang chub snying por mchis kyi bar/__/sangs rgyas rnams la skyabs su mchi/__/chos dang byang chub sems dpa' yi/__/tshogs la'ang de bzhin skyabs su mchi/__/zhes lan gsum dang /__ji ltar sngon gyi bde gshegs kyis/__/byang chub thugs ni bskyed pa dang /__/byang chub sems pa'i bslab pa la/__/de dag rim bzhin gnas pa dang /__/de bzhin 'gro la phan don du/__/byang chub sems ni bskyed bgyi zhing /__/byang chub sems dpa'i bslab pa la'ang /__/rim pa bzhin du bslab par bgyi/__/zhes pa lan gsum tshe 'das kyis rjes zlos byas par mos te dngos su rang gis brjod do/__/dbang bskur na gong gi bdun rnam dag bzhag la/__'jug pa nas brtsams dbang gi dngos gzhi yan chad tsam zhig bskur la/__gtso bos=__maN+Dal/__deng nas sogs bya/__de ltar dbang bskur bas khyod rang de bzhin gshegs pa thams cad kyi bdag nyid rdo rje mi 'khrugs par gyur pa de nyid la nye bar spyod pa rnams kyis mchod par mos pa mdzod/__oM sarba ta thA ga ta badz+ra ak+Sho b+h+ya ar+g+haM sogs chu gnyis sngon 'gro'i nyer spyod kyis mchod/__gzung 'dzin rdo rje brtan pa'i sa/__/me long ye shes ngo bo nyid/__/bdud 'dul chen po'i phyag rgya can/__/phyag 'tshal mi bskyod rdo rje la/__/zhes pas bstod/__dbang ma bskur na tshe las 'das pa skad cig gis rdo rje mi 'khrugs pa'i skur gsal ba'i thugs kar a yig gis mtshan par gyur par bsams la/__mchod bstod gong bzhin bya/__zas gtad byed na/__'dod yon rnams la chab kyis bran te/__a mr-i tas bsang /__swa b+hA bas sbyangs/__a kA ro sogs lan gsum gyis byin rlabs/__/kha dog dbyibs legs yid 'ong rgyan phreng ldan/__/phyogs dus kun na gzugs mchog ci mchis rnams/__/mos blos mchod gnas lha la bdag 'bul gyi/__/bzhes shig bla med byang chub thob par shog__/oM sarba ta thA ga tA ak+Sho b+h+ya rU pa kA ma gu Na pU dzi te AHhU~M/__zhes dang /__sgra dri ro reg bya rnams la'ang /__shap+da gan+d+he ra sa spaR+She sogs bsgyur te 'bul la/__thams cad nam mkha'i mdzod sogs brjod/__byang bu bsreg na/__tshe 'das kyi rnam shes a dkar po'i rnam pas mdun gyi nam mkhar gnas par mos shing /__chos rnams thams cad kyi rang bzhin stong pa nyid du shes pa'i ngang nas/__'khrul ngor snang ba'i tshe 'das kyis gtso byas sems can thams cad kyi sdig sgrib dang sdug bsngal gyi bud shing thams cad/__bdag med rtogs pa'i ye shes kyi mes bsregs par gyur par bsams la/__/stong nyid ye shes 'bar ba'i mes/__/tshe 'das sgrib pa'i bud shing dang /__/'khor ba'i sdug bsngal ma lus pa/__/ye shes snang bar 'bar gyur cig__/ces dang /__kaM ka ni brjod cing bsreg go/__/lam sbyang bstan ni/__nub gong ma rnams la mchod pa'i rjes dang /__nub tha ma la byang bu bsregs pa'i rjes la bya ste/__dril bu gsil zhing me tog gtor la/__dkon mchog rin chen dpal zhing du/__/dkon mchog rin chen las byung ba/__/dkon mchog rin chen 'od zer gyi/__/rin chen phreng ba rnam dag pa/__/tshogs kyi lam dang sbyor ba'i lam/__/mthong ba'i lam dang bsgom pa'i lam/__/bla na med pa'i khyad par lam/__/byang chub bar chad med pa'i lam/__/rnam par grol ba'i lam dag la/__/bsten nas sdig pa kun sbyangs nas/__/'phags pa'i lam der 'gro bar shog__/oM rat+ne rat+ne ma hA rat+ne rat+na saM b+ha we/__rat+na ki rat+na rat+na mA bi shud+d+he/__sho d+ha ya sarba pA paM hU~M traT/__ces brjod cing /__tshe 'das kyi rnam shes a dkar po dri ma med pa'i rnam pa can de shar phyogs mngon par dga' ba'i zhing na bzhugs pa'i bcom ldan 'das rdo rje mi 'khrugs pa'i thugs kar thim par bsam la rol mo bya/__'di nas nying mtshams sbyar ma thag__/dag pa'i zhing khams mngon dga' ru/__/pad+ma'i snying po dam pa la/__/brdzus te skye ba len par shog__/ces sogs tshe 'das kyi don du smon lam ci shes bya zhing bdag med pa'i lta bas rgyas btab la rjes kyi chog rnams dkyus ltar bya'o/__/zhes pa'ang ngor chen thams cad mkhyen pa dkon mchog lhun grub kyi gsung rabs kyi dngos bstan ji lta bar ngag 'don bklag chog tu many+dzu g+ho Shas bris pa sarba dA su shre yo b+ha ba tu//____//__!