བོ་དོང་རས་ཆེན་དཔལ་འབྱོར་བཟང་པོའི་ལུགས་ཀྱི་གཏུམ་མོ་ཞག་བདུན་མའི་ཁྲིད་ཡིག་བླ་མའི་ཞལ་ལུང་།

🚧 This website is under continued development. We appreciate your patience!

Previous Text Back to Volume PageLast text in section.

Wylie title	bo dong ras chen dpal 'byor bzang po'i lugs kyi gtum mo zhag bdun ma'i khrid yig bla ma'i zhal lung
Location	mkhyen brtse'i bka' 'bum Volume 11, sde tshan 5, Text 5, Pages 218-235 (Folios 31b5 to 40a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	བོ་དོང་པཎ་ཆེན་ཕྱོགས་ལས་རྣམ་རྒྱལ་, རས་ཆེན་དཔལ་འབྱོར་བཟང་པོ་ (bo dong paN chen phyogs las rnam rgyal, ras chen dpal 'byor bzang po)
Citation	'jam dbyangs mkhyen brtse'i dbang po. bo dong ras chen dpal 'byor bzang po'i lugs kyi gtum mo zhag bdun ma'i khrid yig bla ma'i zhal lung. In 'jam dbyangs mkhyen brtse'i dbang po'i bka' 'bum, Vol. 11: 218-235. Khams sde dge rdzong sar dgon: Rdzong sar blo gros phun tshogs, 2020.
Genre	Contemplative Guide Books and Instructional Manuals - khrid yig
DNZ	In the Damngak Dzö: https://dnz.tsadra.org/index.php/Wylie:Bo_dong_ras_chen_dpal_%27byor_bzang_po%27i_lugs_kyi_gtum_mo_zhag_bdun_ma%27i_khrid_yig_bla_ma%27i_zhal_lung

1 Texts in this Section (sde tshan or chos tshan)

5 218-235	བོ་དོང་རས་ཆེན་དཔལ་འབྱོར་བཟང་པོའི་ལུགས་ཀྱི་གཏུམ་མོ་ཞག་བདུན་མའི་ཁྲིད་ཡིག་བླ་མའི་ཞལ་ལུང་། bo dong ras chen dpal 'byor bzang po'i lugs kyi gtum mo zhag bdun ma'i khrid yig bla ma'i zhal lung Contemplative Guide Books and Instructional Manuals - khrid yig	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །བོ་དོང་རས་ཆེན་དཔལ་འབྱོར་བཟང་པོའི་ལུགས་ཀྱི་གཏུམ་མོ་ཞག་བདུན་མའི་ཁྲིད་ཡིག་བླ་མའི་ཞལ་ལུང་ཞེས་བྱ་བ་བཞུགས་སོ། །

ན་མོ་གུ་རུ་བཛྲ་ཝ་རཱ་ཧཱི་པཱ་དཱ་ཡ། དེ་ལ་འདིར་རིང་བརྒྱུད་ནཱ་རོ་དང་། ནི་གུ་ནས་བརྒྱུད་པའི་གཏུམ་མོའི་མན་ངག་ཀུན་མཁྱེན་ཕྱོགས་ལས་རྣམ་རྒྱལ་ལ་བཀའ་བབས་པ་དང་། ཉེ་བརྒྱུད་བོ་དོང་རས་ཆེན་དཔལ་འབྱོར་བཟང་པོ་ལ་ཡེ་ཤེས་ཀྱི་མཁའ་འགྲོ་མས་དངོས་སུ་གནང་བའི་སྙན་བརྒྱུད་གཏུམ་མོའི་མན་ངག་ཞག་བདུན་མའི་གདམས་ངག་ཟབ་མོ་ལ་བརྟེན་ནས་འཇའ་ལུས་རྡོ་རྗེའི་སྐུ་སྒྲུབ་པར་བྱེད་པའི་འཁྲིད་ཀྱི་རིམ་པ་ལ་གསུམ། སྔོན་འགྲོ། དངོས་གཞི། རྗེས་སོ། །དང་པོ་ལ་གསུམ། ཐུན་མོང་དང་། ཐུན་མོང་མ་ཡིན་པ་དང་། ཁྱད་པར་གྱི་སྔོན་འགྲོའོ། །དང་པོ་ནི། བདེ་མཆོག་འཁོར་ལོ་ལ་སོགས་པ་རྣལ་འབྱོར་བླ་མེད་མ་རྒྱུད་ཀྱི་དཀྱིལ་འཁོར་དུ་དབང་ཐོབ་ཅིང་དམ་ཚིག་ལ་གནས་པས། དལ་འབྱོར་རྙེད་དཀའ། འཆི་བ་མི་རྟག་པ། ལས་རྒྱུ་འབྲས། འཁོར་བའི་ཉེས་དམིགས་བསྒོམ་པ་རྣམས་གཞན་དང་མཐུན། གཉིས་པ་ལ་གསུམ། སྐྱབས་འགྲོ། སེམས་བསྐྱེད། བླ་མའི་རྣལ་འབྱོར་རོ། །དང་པོ་ནི། ས་ཕྱོགས་ཐམས་ཅད་དག་པའི་ཞིང་ཁམས་ཆེན་པོར་གསལ་བའི་རང་གི་མདུན་དུ་ཡན་ལག་བརྒྱད་དང་ལྡན་པའི་བདུད་རྩིའི་ཆུ་གཏེར་ཡིད་བཞིན་གྱི་ནོར་བུས་གཏམས་པའི་དབུས་སུ་དཔག་བསམ་གྱི་ལྗོན་ཤིང་ཡལ་ག་ལྔ་པའི་ལྟེ་བར་རྩ་བའི་བླ་མ་རྡོ་རྗེ་འཆང་ལ་གཏུམ་མོ་བརྒྱུད་པའི་བླ་མ་རྣམས་ཀྱིས་བསྐོར་བ། མདུན་དུ་པད་ཉི་རོའི་གདན་ལ་ཡི་དམ་རྡོ་རྗེ་ཕག་མོ་དམར་མོ་གྲི་ཐོད་ཁ་ཊྭཱྃ་ག་འཛིན་ཅིང་། རུས་པའི་ཕྱག་རྒྱ་ལྔས་སྤྲས་པ། མི་མགོ་སྐམ་པོའི་དབུ་རྒྱན་དང་། རློན་པའི་དོ་ཤལ་ཅན། རྣ་ལྟག་གཡས་སུ་ཕག་ཞལ་ནག་པོ་ངུར་སྒྲ་སྒྲོགས་པ། ཞབས་གཡས་བསྐུམས་པའི་གར་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་མཐར་ཡི་དམ་ལྷ་ཚོགས་ཀྱིས་བསྐོར་བ། གཡས་སུ་སངས་རྒྱས་སྤྲུལ་སྐུའི་རྣམ་པ་ཅན། རྒྱབ་ཏུ་དམ་ཆོས། གཡོན་དུ་དགེ་འདུན། མཐའ་སྐོར་ཀུན་ཏུ་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བསྐོར་བའི་སྤྱན་སྔར་རང་གཞན་སེམས་ཅན་ཐམས་ཅད་སྒོ་གསུམ་གུས་ཤིང་དྭང་བས་འཁོད་པར་མོས་ལ། ཐོག་མར་ཨོཾ་ཨཱཿཧཱུྃ། སྒོ་གསུམ་དག་པར་བྱེད་པ་ཞེས་སོགས་རྡོ་རྗེའི་རྣལ་འབྱོར་ཟབ་མོ་ལ་འཇུག་པར་དམ་བཅའ་བའི་ཚུལ་གྱིས་བརྗོད་རྗེས། མོས་གུས་གདུང་ཤུགས་དྲག་པོས། སངས་རྒྱས་ཆོས་དང་ཞེས་སོགས་སྐྱབས་འགྲོ་ཅི་ནུས་སུ་བྱ། གཉིས་པ་ནི། བདག་གཞན་མཐའ་ཡས་པའི་སེམས་ཅན་ཐམས་ཅད་ཀྱི་དོན་དུ་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་ཐོབ་པར་བྱ། དེའི་ཆེད་དུ་ལམ་ཟབ་མོ་གཏུམ་མོའི་རྣལ་འབྱོར་ལ་འཇུག་པར་བགྱིའོ་སྙམ་པས། རང་གཞན་དོན་གཉིས་སོགས་བརྗོད། མཐར་སྐྱབས་ཡུལ་རྣམས་ལས་འོད་ཟེར་འཕྲོས། རང་དང་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་དག་ཅིང་བྱིན་གྱིས་བརླབས། སྐྱབས་ཡུལ་རིམ་པར་འོད་དུ་ཞུ་ནས་རང་ལ་ཐིམ་པར་བསམ། གསུམ་པ་ལ་ལྔ། བླ་མའི་རྣལ་འབྱོར་གསལ་གདབ་པ། འབྲུ་གསུམ་གྱི་བཟླས་པ་བྱ་བ། ནང་གི་མཎྜལ་འབུལ་བ། གདུང་ཤུགས་ཀྱིས་གསོལ་བ་གདབ་པ། ཏིང་ངེ་འཛིན་གྱི་དབང་བླང་བའོ། །དང་པོ་ནི། ཨོཾ་ཨཱཿཧཱུྃ་ཞེས་བརྗོད་པས་རང་གི་གཞི་ལུས་སྐད་ཅིག་གིས་རྡོ་རྗེ་འཆང་ཆེན་པོའི་རྣམ་པར་ལམ་གྱིས་གསལ་གདབ། དེ་ནས། ཨོཾ་ཞེས་བརྗོད་པས་གཟུགས་སྣང་ཐམས་ཅད་སྐུ་རྡོ་རྗེའི་ངོ་བོ་རྣམ་སྣང་དཀར་པོ་འོད་དུ་ཞུ་བ་ལས་བྱུང་བའི་ཐར་པ་ཆེན་པོའི་གཞལ་མེད་ཁང་ཡངས་ཤིང་རྒྱ་ཆེ་བའི་དབུས་སུ། ཨཿ ཞེས་བརྗོད་པས་སྒྲར་གྲགས་ཐམས་ཅད་གསུང་རྡོ་རྗེའི་ངོ་བོ་འོད་དཔག་མེད་དམར་པོ་འོད་དུ་ཞུ་བ་ལས་པདྨ་ཟླ་བའི་གདན། ཧཱུྃ་ཞེས་བརྗོད་པས་དེའི་སྟེང་དུ་རང་གི་སེམས་ཉིད་ཀྱི་ངོ་བོ་རང་རྡོ་རྗེ་འཆང་ཡབ་ཡུམ་དུ་གསལ་བཞིན་པ་སླར་ཡང་གསལ་སྣང་ལེགས་འདོན། དེའི་སྤྱི་བོར་སེང་གེས་བཏེག་པའི་རིན་པོ་ཆེའི་ཁྲི། པདྨ། ཉི་མ། ཟླ་བ་སྟེ་གདན་བཞི་བརྩེགས་ཀྱི་སྟེང་དུ་རྩ་བའི་བླ་མ་ཉིད་རང་གིས་བསྒོམས་པ་ཇི་ལྟ་བའི་རྡོ་རྗེ་འཆང་ཡབ་ཡུམ་དུ་གསལ་བཏབ་ནས་སེམས་གཟུང་། གཉིས་པ་ནི། བླ་མའི་སྐུ་གསུང་ཐུགས་ཀྱིས་རང་གི་ལུས་ངག་ཡིད་གསུམ་དྭང་མ་མི་ཤིགས་གསུམ་ལྡན་གྱི་ངོ་བོར་བྱིན་གྱིས་བརླབ་ཏུ་གསོལ་སྙམ་པས། ཨོཾ་ཨཱཿཧཱུྃ་ཞེས་རྩེ་གཅིག་ཏུ་བཟླ། གསུམ་པ་ནི། སྭ་བྷཱ་ཝའི་སྔགས་ཀྱིས་སྟོང་པར་སྦྱངས་པའི་ངང་ལས་རང་གི་ལུས་ཐ་མལ་དུ་གནས་པ་རྒྱ་མ་ཞིག་པ་རིལ་པོར་མཎྜལ་དུ་དབུལ་ཏེ། དེའང་ཤ །ཁྲག །དྲོད། དབུགས་འབྱུང་བཞིའི་ངོ་བོ་ཡུམ་བཞིའི་རང་བཞིན་རྣམ་པར་དག་པ་འབྱུང་བ་རིམ་བརྩེགས་ཀྱི་རྟེན། རྩ་ཨ་བ་དྷཱུ་ཏི་ལུས་ཀྱི་དབུས་དྲང་པོར་གནས་པ་དང་གཟུང་འཛིན་གྱི་ཕྱོགས་སུ་མ་ལྷུང་བས་རི་རབ། ལྟེ་བ་སྤྲུལ་པའི་འཁོར་ལོ་ལུས་ཀྱི་བསྐྱེད་གཞི་ཡིན་པས་ལུས་འཕགས། ལོངས་སྤྱོད་འཁོར་ལོ་ཟས་སྐོམ་ལོངས་སྤྱོད་ཅིང་སྨྲ་བ་ཆོས་མཐུན་དུ་འབྱུང་བས་འཛམ་གླིང་། ཆོས་ཀྱི་འཁོར་ལོ་རང་བཞིན་བརྒྱད་ཅུའི་རྟོག་པ་ནུབ་པས་བ་ལང་སྤྱོད། བདེ་ཆེན་འཁོར་ལོ་ཧཾ་ཡིག་བདེ་བ་ཆེན་པོའི་རྒྱུན་གྱིས་ལུས་འཚོ་བར་བྱེད་པས་སྒྲ་མི་སྙན། དེ་ལས་གྱེས་པའི་རྩ་ཕྲན་དང་། སྐྲ་དང་། བ་སྤུ་ལ་སོགས་པ་གླིང་སོ་སོའི་རྒྱན། ལག་ངར་གཉིས། རྗེ་ངར་གཉིས། དཔུང་པ་གཉིས། བརླ་གཉིས་བཅས་གླིང་ཕྲན་བརྒྱད། རླུང་ཕྱིར་འབུད་པས་ཉོན་མོངས་དང་སྒྲིབ་པ་རྣམས་གཅོད་པའི་ཕྱིར་འཁོར་ལོ། །རྔུབས་པས་རླུང་དབུ་མར་ཞུགས་པ་ལ་བརྟེན་ནས་ཡོན་ཏན་ཐམས་ཅད་འབྱུང་བས་ནོར་བུ། གནས་པས་རླུང་སེམས་དབུ་མར་འདུས་ཏེ་བདེ་སྟོང་གི་ཡེ་ཤེས་སྐྱེད་པས་བཙུན་མོ། །བརྟན་པས་མི་འགྱུར་བའི་བདེ་བ་གྲུབ་པས་བློན་པོ། །དེ་ལྟ་བུའི་མྱུར་ལམ་གྱིས་ནང་གིས་ལམ་བདེ་བླག་ཏུ་ཐེག་པས་གླང་པོ། །ཟུང་འཇུག་ཡན་ལག་བདུན་ལྡན་གྱི་ཞིང་ཁམས་སུ་མྱུར་དུ་བགྲོད་པས་རྟ་མཆོག །འགྲོས་བཞི་དབུ་མར་ཐིམ་པས་བདུད་བཞིའི་གཡུལ་ལས་རྒྱལ་བས་ན་དམག་དཔོན། ཁམས་དམར་ཆ་ཉི་མ། དཀར་ཆ་ཟླ་བ། སྙིང་འདོད་རྒུ་འབྱུང་བའི་རིན་པོ་ཆེའི་གཏེར་ཆེན་པོ་སོགས་ཀྱི་ངོ་བོར་དམིགས་ཏེ་ཕུལ་ལ། འདོད་པའི་དོན་ལ་གསོལ་བ་གདབ། བཞི་པ་ནི། རྗེ་འཇིགས་མེད་གྲགས་པའི་གསོལ་འདེབས། རྒྱ་ཆེན་ཆོས་ཀྱི་སྤྱན་ལྡན་སོགས་དང་། རང་གི་རྩ་བའི་བླ་མའི་སྐུ་བསྟོད་ཚར་གྲངས་ཅི་མང་དང་། བརྒྱུད་པའི་གསོལ་འདེབས་སྐབས། བརྒྱུད་པའི་བླ་མ་རང་གི་བཞུགས་གནས་སོ་སོར་མངོན་སུམ་བཞིན་དུ་གསལ་བའམ། དེ་ལྟར་མི་ནུས་ན་སྤྱི་བོའི་བླ་མ་རྡོ་རྗེ་འཆང་ཉིད་བརྒྱུད་པའི་བླ་མ་ཐམས་ཅད་འདུས་པའི་ངོ་བོར་མོས་ཏེ་གསོལ་བ་གདབ། ལྔ་པ་ནི། དཔལ་ལྡན་བླ་མ་རིན་པོ་ཆེ་སོགས་ཀྱིས་གསོལ་བ་བཏབ་ལ་དབང་བཞི་ལེན་པའི་དམིགས་པ་ངག་འདོན་ལྟར་བསྐྱང་། བླ་མ་རང་ལ་བསྟིམས་ནས་རང་སེམས་དང་བླ་མའི་ཐུགས་དབྱེར་མེད་དུ་འདྲེས་པའི་ངང་ལ་མཉམ་པར་བཞག་གོ། །། གསུམ་པ་ཁྱད་པར་གྱི་སྔོན་འགྲོ་ལ་གསུམ་ལས། ནུབ་དང་པོ་བླ་མ་སྐུ་རྡོ་རྗེ་ལ་བརྟེན་ནས་དག་བྱེད་ཨའི་སྟོང་ར་བསྒོམ་པ་ནི། རང་ཐ་མལ་དུ་གནས་པའི་སྤྱི་བོར་བྷྲཱུྃ་སེར་པོ་ལས་སེང་གེ་ཆེན་པོ་བརྒྱད་ཀྱིས་བཏེག་པའི་རིན་པོ་ཆེའི་ཁྲི། དེའི་སྟེང་དུ་པྃ་དཀར་པོ་ལས་པདྨ་དཀར་པོ་འདབ་མ་འབུམ་ལྡན་གྱི་དབུས། རྃ་དམར་པོ་ལས་ཟེའུ་འབྲུ་དམར་སེར་གྱི་ཚད་དང་མཉམ་པའི་ཉི་མའི་དཀྱིལ་འཁོར་འོད་འབར་བ། དེའི་སྟེང་དུ་ཨ་དཀར་པོ་ལས་ཟླ་བའི་དཀྱིལ་འཁོར་དཀར་བསིལ་ཉ་གང་བ། དེའི་སྟེང་དུ་བླ་མ་སྐུ་རྡོ་རྗེའི་ངོ་བོ་རྒྱལ་བ་རྡོ་རྗེ་འཆང་སྐུ་མདོག་དཀར་པོ་གཡས་རྡོ་རྗེ་དང་། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་རྡོ་རྗེ་རྣལ་འབྱོར་མ་སྐུ་མདོག་དམར་མོ་གཡས་གྲི་གུག་དང་། གཡོན་ཐོད་པ་བདུད་རྩིས་གང་བ་འཛིན་པས་ཡབ་ལ་འཁྱུད་པ། ཞབས་གཉིས་རྡོ་རྗེ་དང་པདྨའི་སྐྱིལ་མོ་ཀྲུང་གིས་འོད་ཟེར་དཀར་པོ་འཕྲོ་བའི་ཀློང་ན་བཞུགས་པར་གསལ་བཏབ་ནས། ཕ་བླ་མ་སངས་རྒྱས་རིན་པོ་ཆེ་ལ་གསོལ་བ་འདེབས་སོ། །བདག་གཞན་སེམས་ཅན་ཐམས་ཅད་ཀྱི་ནད་གདོན་བར་ཆད་ཞི་བར་བྱིན་གྱིས་རློབས། ལས་ངན་སྡིག་སྒྲིབ་དག་པར་བྱིན་གྱིས་རློབས། ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། །ཞེས་གསོལ་བ་ཤུགས་དྲག་ཏུ་བཏབ་པས་བླ་མ་རྡོ་རྗེ་འཆང་ཡབ་ཡུམ་གདན་ཁྲི་དང་བཅས་པ་འོད་དུ་ལྟེམ་གྱིས་ཞུ་ནས་རང་གི་སྤྱི་བོར་སིབ་ཀྱིས་ཐིམ་པའི་རྐྱེན་གྱིས་མགོ་བོའི་ནང་དུ་ཆོས་འབྱུང་དཀར་པོ་ཟུར་གསུམ་པ། རྩ་བ་ཕྲ་བ་ལྕེ་ཆུང་ལ་ཟུག་པ། གདེང་ཀ་ཆེ་བ་གྱེན་དུ་ཕྱོགས་པའི་ཟུར་གཉིས་རྣ་སྟག་གཡས་གཡོན་དང་། ཟུར་གཅིག་སྨིན་མཚམས་སུ་བསྟན་པ། དེའི་ནང་དུ་ཨ་དཀར་པོ་གསལ་ཞིང་འཚེར་བ་ལ་དམིགས་པ་གཏད་ནས། ཨ་ཨ་ཞེས་བརྒྱ་སྟོང་གི་བར་བརྗོད་པས། ཨ་ལས་བདུད་རྩིའི་རྒྱུན་དཀར་པོ་དཔག་ཏུ་མེད་པ་བབས་པས་ཆོས་འབྱུང་གི་ནང་ཐམས་ཅད་ཁེངས། མཐར་ཆོས་འབྱུང་གི་ཁ་ནས་ལུད་པ་དང་། རྩ་བ་ནས་འཁྲིལ་བའི་ཚུལ་གྱིས་བབས། རང་གི་སྤྱི་བོ་ཚངས་པའི་བུ་ག་ནས་མར་ཞུགས་ལུས་ཀྱི་ནང་ཐམས་ཅད་ཁྱབ། ཚེ་རབས་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཉེས་ལྟུང་ཐམས་ཅད་དུད་ཁུའམ་སོལ་ཁུའི་རྣམ་པར་འོག་སྒོ་གཉིས་དང་། རྐང་པའི་སྲིན་ལག་གི་རྩེ་མོ་དང་། བ་སྤུའི་བུ་ག་ཚུན་ཆད་ནས་ཐོན་པ་རིམ་པ་དགུའི་འོག་ཏུ་སོང་བས་སྡིག་སྒྲིབ་ཐམས་ཅད་དག །ཤུལ་ཐམས་ཅད་བདུད་རྩིས་སྐྱ་མེར་གྱིས་ཁེངས་པས་བྱིན་གྱིས་བརླབས་པར་བསམས་ལ། རྐང་པ་གཉིས་སེམས་སྐྱིལ་ལྷོད་ཆགས་པར་བྱ། ལག་པ་གཉིས་ཀྱི་མཐེ་བོང་གིས་སྲིན་ལག་གི་འདྲེ་རྩ་མནན་པའི་རྡོ་རྗེ་ཁུ་ཚུར་པུས་མོའི་སྟེང་དུ་ཁ་སྦུབ་ཏུ་བཞག །སྣ་བུག་གཉིས་ནས་རླུང་ཤུག་བསྐྱེད་དེ་ལྷག་མེད་དུ་སངས་ཀྱིས་བུས་པ་དང་མཉམ་དུ་འོག་རླུང་འཐེན་ཞིང་སྟོང་འདྲེན་བྱ། རླུང་ཕྱིར་ཐུབ་ཚད་གཟུང་། མི་ཐུབ་པ་དང་སྣ་བུག་གཉིས་ཀྱི་སྤུ་མི་འགུལ་བའི་ཚོད་ཀྱིས་དལ་བུས་རྔུབས་ལ་ལྟེ་འོག་ཏུ་ཧྲིལ་གྱིས་མནན་ལ་རླུང་ཁ་སྦྱར་ཐུབ་ཚད་གཟུང་། མི་ཐུབ་པ་དང་སྔར་བཞིན་ཕྱིར་འབུད་པ། དེ་འདྲ་བ་ལན་གསུམ་བྱས་པའི་རྗེས་མའི་ཚེ་ལྟོ་བ་གཡས་སྐོར་གསུམ། གཡོན་སྐོར་གསུམ། དབུས་སྐོར་གསུམ། དཔུང་པ་གཡས་གཡོན་རེས་མོས་སུ་འདེགས་པ་དང་། དབུས་འདེགས་པ་སྟེ་གསུམ་གྱི་མཐར་རླུང་ཁ་སྣ་གཉིས་ཀ་ནས་སྒྲ་དང་བཅས་ལྷག་མ་མེད་པར་ཕྱིར་འབུད་ཅིང་ཧ་སྒྲུགས་བྱ། དེ་ལ་ལས་དང་པོ་པས་འཛིན་ཡུན་རིང་པོ་མ་བྱུང་རུང་། འབུད་རྔུབས་ཀྱི་དུས་སུ་རླུང་ལྷག་མ་མ་ལུས་པ་དང་། འཛིན་པའི་སྐབས་སུ་རླུང་རྐུན་མ་ཤོར་བར་འཇམ་རླུང་དལ་བུའི་སྦྱོར་བ་ལ་ཡུན་ཐུང་གྲངས་མང་གི་ཚུལ་དུ་བསླབས་པས་རིམ་གྱིས་གོམས་པ་བརྟན་པར་འགྱུར་རོ། །མདོར་ན་དེ་ལྟ་བུའི་རླུང་སྦྱོར་ཐུན་རེ་ལ་བརྒྱ་རྩ་སོགས་ནས་བདུན་ནམ་གསུམ་ལ་ཉུང་མཐའ་བྱས་པ་བསྒོམ་པར་བྱའོ།། །། ནུབ་གཉིས་པ་བླ་མ་གསུང་རྡོ་རྗེ་ལ་བརྟེན་ནས་དག་བྱེད་ཨའི་སྟོང་ར་བསྒོམ་པ་ནི། སྦྱོར་དངོས་ཀྱི་ཁྱད་པར་གཞན་གོང་དང་འདྲ་བ་ལ། བླ་མ་རྡོ་རྗེ་འཆང་སྐུ་མདོག་དམར་པོ་དང་། འོད་དམར་པོ་འཕྲོ་བར་གསལ་བཏབ་ལ་གསོལ་འདེབས་བྱ། དེ་ཉིད་རང་ལ་ཐིམ་པའི་རྐྱེན་གྱིས་མགོ་བོའི་ནང་དུ་ཆོས་འབྱུང་དམར་པོ་ལྕགས་སྲེག་གི་རྣམ་པ་ཅན་དུ་ཡོད་པའི་ནང་དུ་ཨ་དམར་པོ་ལ་ཡིད་གཏད་དེ་བཟླས་པ་བྱས་པས་བདུད་རྩི་དམར་པོ་རེག་བྱ་ཚ་བ་དཔག་ཏུ་མེད་པ་བབས་པས་ནད་ཐམས་ཅད་རྣག་ཁྲག་གི་རྣམ་པས་ཐོན། ཤུལ་ཐམས་ཅད་བདུད་རྩི་ཟངས་ཞུན་གྱི་ཁུ་བ་ལྟ་བུ་སྐྱོ་ཚ་ཁོལ་བ་བཞིན་བུན་བུན་དུ་ཁོལ་བས་གང་བར་བསམ། རླུང་འཛིན་པ་སོགས་འདྲ། ནུབ་གསུམ་པ་བླ་མ་ཐུགས་རྡོ་རྗེ་ལ་བརྟེན་ནས་དག་བྱེད་ཨའི་སྟོང་ར་བསྒོམ་པ་ནི། སྦྱོར་དངོས་ཀྱི་དམིགས་པ་གཞན་ཐམས་ཅད་སྔར་བཞིན་ལ། དམིགས་བསལ་གྱི་ཁྱད་པར་བླ་མ་སྐུ་མདོག་སྔོན་པོ་དང་། ཆོས་འབྱུང་སྔོན་པོའི་ནང་ཨ་ཡིག་སྔོན་པོ་བསྒོམ། དེ་ལས་འོད་ཟེར་འཕྲོས། གཤིན་རྗེ་གཤེད་དང་། དཔལ་རྟ་མགྲིན་དང་། རྡོ་རྗེ་གཏུམ་པོ་སོགས་ཁྲོ་བོའི་ཚོགས་དཔག་ཏུ་མེད་པ་སྤྱན་དྲངས། ཨ་ལ་ཐིམ། ཨ་བརྗོད་པའི་རྐྱེན་གྱིས་ཨ་ཡིག་ལས་ཁྲོ་བོ་དཔག་ཏུ་མེད་པ་བྱུང་། ལུས་གང་། གདོན་ཐམས་ཅད་སྲོག་ཆགས་མི་སྡུག་པའི་རྣམ་པས་ཐོན། ལུས་དང་ཆོས་འབྱུང་གི་ནང་བཅས་ཁྲོ་བོའི་ཚོགས་དཔག་ཏུ་མེད་པ་མཚོན་ཆ་ཕྱིར་གདེངས་པས་བར་མཚམས་མེད་པར་བུན་གྱིས་ཁེངས་པར་བསམས་ལ་རླུང་བུམ་པ་ཅན་གཟུང་ངོ་།། །། གཉིས་པ་དངོས་གཞི་ལ་བཞི། རླུང་ཁ་སྦྱོར་ལ་བརྟེན་ནས་མེ་གསོ་བ། ས་བོན་གཉིས་ལ་བརྟེན་ནས་མེ་སྦར་བ། རྩ་གསུམ་འཁོར་ལོ་བཞི་ལ་བརྟེན་ནས་འབར་འཛག་བསྒོམ་པ། མཆོག་གི་གཏུམ་མོ་ལ་བརྟེན་ནས་བདེ་སྟོང་ཟུང་འཇུག་གི་ཡེ་ཤེས་མངོན་དུ་བྱ་བའོ། །དེ་ལ་ཐོག་མར་ནུབ་བཞི་པ་མེ་གསོ་བའི་དམིགས་པ་ནི། སྐྱབས་འགྲོ་ནས་བཟུང་དག་བྱེད་ཨའི་སྟོང་རའི་བར་གོང་བཞིན་ཉམས་སུ་བླང་། དེ་ནས་རང་གི་སྤྱི་བོར་བླ་མ་རྡོ་རྗེ་འཆང་བསྒོམས་ལ་མོས་གུས་དྲག་པོ་རྩེ་གཅིག་པས། ཕ་བླ་མ་སངས་རྒྱས་རིན་པོ་ཆེ་ལ་གསོལ་བ་འདེབས་སོ། །བདག་ལ་བདེ་དྲོད་ཀྱི་ཏིང་ངེ་འཛིན་སྐྱེ་བར་བྱིན་གྱིས་རློབས། །བདག་ལ་བདེ་སྟོང་གི་ཏིང་ངེ་འཛིན་སྐྱེ་བར་བྱིན་གྱིས་རློབས། །ཏིང་ངེ་འཛིན་ཁྱད་པར་ཅན་བདག་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། །ཞེས་གསོལ་བ་བཏབ་པའི་རྐྱེན་གྱིས་བླ་མ་ཡབ་ཡུམ་འོད་དུ་ཞུ། རང་ལ་ཐིམ་པས་སྐད་ཅིག་གིས་རང་ཉིད་པདྨ་དམར་པོ་དང་ཉི་མའི་གདན་ལ་རྡོ་རྗེ་ཕག་མོ་སྐུ་མདོག་དམར་མོ་གཅེར་བུ་རུས་པའི་རྒྱན་གྱིས་སྤྲས་པ། དབུ་སྐྲ་ཕྱེད་སྤྱི་བོར་བཅིངས་པས་རུས་པའི་འཁོར་ལོས་མཚན་པ། ཕྱེད་ཐུར་དུ་གྲོལ་ཞིང་མི་མགོ་སྐམ་པོ་ལྔས་དབུ་བརྒྱན་པ། ཕྱག་གཉིས་རླུང་འཛིན་པའི་ཕྱག་རྒྱ་དང་། ཞབས་གཉིས་རླུང་འཛིན་པའི་འདུག་སྟངས་ཀྱིས་བཞུགས་པའི་སྤྱན་གསུམ་ནམ་མཁར་བཀྲ་ཧྲིག་གེར་གཟིགས་པ། སྐུ་ལུས་ཀྱི་ནང་ལྟེ་བའི་ཐད་དུ་མེའི་སྙིང་པོ་ཚ་ཞིང་ངར་ལ་རྩུབ་པ་རྣོ་བ་སྟེ་མཚན་ཉིད་བཞི་ལྡན་བྱ་ངང་པའི་སྒོ་ང་ཙམ་མདུན་རྒྱབ་གཡས་གཡོན་བཞི་སྒྲོམ་དུ་ཡོད་པར་བསམ། དེ་ནས་རླུང་རོ་བསལ། རླུང་སྟོང་འདྲེན་སྐབས་འོག་རླུང་ཕོག་པའི་རྐྱེན་གྱིས་མེ་སྔོ་ཡལ་ཡལ་འབར། རླུང་རྔུབ་ཅིང་དགང་གཞིལ་མནན་པས་དེ་ལས་ཀྱང་མེ་ཆེར་འབར་བས་ལུས་ཀྱི་ནང་ཐམས་ཅད་མེས་ཁེངས། ཡང་སྟོང་འདྲེན་གྱིས་རླུང་བུས་སྐབས། སྟོད་ཐམས་ཅད་མེས་ཁེངས་ཤིང་འབར། དགང་དུས་བརླ་གཉིས་ནས་བརྒྱུད་རྐང་པ་གཉིས་སོགས་ལུས་སྨད་ཀུན་མེས་ཁེངས་ཤིང་འབར་བར་དམིགས་པ་གཏད་ལ་བུམ་ཅན་གོང་བཞིན་གཟུང་། ཕོ་བ་བསྐོར་སྐབས་མེ་ལྕེ་དམར་འཁྱིལ་འཁྱིལ་བྱེད་པར་བསམ་མོ།། །། ནུབ་ལྔ་པ་ས་བོན་གཉིས་ལ་བརྟེན་ནས་མེ་སྦར་བ་ནི། རང་ཕག་མོར་གསལ་བའི་ལྟེ་བའི་ཐད་དུ་མེ་བཞི་སྒྲོམ་གསལ་བཏབ་པ་ཡན་གོང་ལྟར་ལ། དམིགས་པའི་ཁྱད་པར། ཉི་གདན་དང་བཤང་ལམ་གྱི་བར་དུ་རླུང་གི་ས་བོན་ཡྃ་ཡིག་ལྗང་གུ་ཞིག་དང་། བཤང་ལམ་གྱི་ནང་སྒོར་ཞུགས་ཙམ་དུ་མེའི་ས་བོན་རྃ་ཡིག་དམར་པོ་འབར་ལ་ཁད་པར་བསམས་ལ་རླུང་ཕྱིར་བུས། སྟོང་འདྲེན་སྐབས་ཡྃ་ཡིག་ལས་རླུང་གཡོས་རྃ་ཡིག་ལ་ཕོག་པས་མེ་འབར། ལྟེ་བའི་མེ་བཞི་སྒྲོམ་ལ་ཕོག་པས་མེ་ལྷག་པར་འབར་བས་ལུས་ཀྱི་ནང་ཀུན་ཁེངས། སྟོང་འདྲེན་སྐབས་མེ་སྟོད་དུ་འབར་བས་རང་ཕག་མོར་གསལ་བའི་ཞལ་དང་། སྤྱན་དང་། སྙན་སོགས་ནས་མེ་ལྕེ་དམར་ཉུག་ཉུག་འབར་ཞིང་དགང་དུས་སྨད་ཆ་ཀུན་མེས་ཁེངས། མེ་ཐུར་དུ་འབར་བས་འོག་སྒོ་གཉིས་ནས་མེ་ལྕེ་ཕྱིར་འཕྲོས་ཤིང་འབར་བས་ཕྱི་དབྱིབས་ཀྱི་ལུས་ཀྱང་མེ་འབར་བའི་དབུས་སུ་ཡོད་པར་བསམས་ལ་ཕོ་བསྐོར་གོང་བཞིན་བྱ། དེ་ནས་ཕྱི་ནང་ཀུན་མེ་འབར་བའི་དབུས་སུ་རང་ཕག་མོར་གསལ་བའི་སྤྱན་གསུམ་བཀྲ་ཧྲིག་གེ་བ། སྣང་སྟོང་སྒྱུ་མའི་སྐུར་དམིགས་པ་གཏད་པ་རླུང་བུམ་ཅན་ཅི་ནུས་སུ་འཛིན་ནོ།། །། ནུབ་དྲུག་པ་རྩ་གསུམ་འཁོར་ལོ་བཞི་ལ་བརྟེན་ནས་འབར་འཛག་བསྒོམ་པ་ནི། རང་གི་ཕྱི་དབྱིབས་ཀྱི་ལུས་རྡོ་རྗེ་ཕག་མོ་མེ་དབུས་སུ་ཡོད་པ་གོང་བཞིན་ལ། ལྟེ་འོག་སོར་བཞི་ནས་ཡར་སྣ་སྤྱི་བོར་ཟུག་པའི་རྩ་དབུ་མ་ཆུ་ཤིང་གི་སྡོང་པོ་ལྟར་དྲང་བ་པདྨའི་སྣལ་མ་ལྟར་སྲབ་པ། རྒྱ་སྐྱེགས་ཀྱི་མེ་ཏོག་ལྟར་སྣུམ་པ། ཏིལ་མར་གྱི་མར་མེ་ལྟར་གསལ་བ་སྟེ་ཁྱད་ཆོས་བཞི་དང་ལྡན་པའི་ཕྱི་སྔོ་བ། ནང་དམར་བ། ཁོག་པ་སྟོང་པ། ལུས་ཀྱི་དབུས་དྲང་པོར་ཡོད་པའི་གཡས་སུ་རོ་མ་དམར་མོ་ཕྱི་ནང་གཉིས་དམར། གཡོན་དུ་རྐྱང་མ་དཀར་མོ་ཕྱི་དཀར་ནང་དམར་བ། དེ་གཉིས་དབུ་མའི་མར་སྣ་ནས་སྐྱེས་པའི་ཚུལ་གྱིས་རོ་རྐྱང་དབུ་གསུམ་གྱི་གཤམ་ཡི་གེ་དབུ་ཅན་གྱི་ཆའི་གཤམ་ལྟར་ཡོད་པ། རོ་རྐྱང་ཕྱིར་གྱེས། ལྟེ་བར་འདུས་མཚམས་སུ་ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རེ་བཞི་པ་ས་ཁམས་མཚོན་པའི་ཕྱི་སེར་ནང་དམར་བ། ཕྱིའི་རྩེ་རྣམས་ཁ་གྱེན་ཕྱོགས་གདུགས་ཡུ་གནམ་ལ་བསྟན་ནས་འཕྱངས་པ་ལྟ་བུ། ཡང་རོ་རྐྱང་གཉིས་གཡས་གཡོན་གཉིས་སུ་གྱེས། སྙིང་གར་འདུས་མཚམས་སུ་ཆོས་ཀྱི་འཁོར་ལོ་རྩ་འདབ་བརྒྱད་པ་ཅུང་ཟད་ཐུར་བསྟན་གདུགས་ཕུབ་པ་ལྟ་བུ་རླུང་ཁམས་མཚོན་པའི་ཕྱི་སྔོ་ནང་དམར་བ། ཡང་རོ་རྐྱང་ཕྱིར་གྱེས། མགྲིན་པར་འདུས་མཚམས་ལོངས་སྤྱོད་འཁོར་ལོ་རྩ་འདབ་བཅུ་དྲུག་པ་མེ་ཁམས་མཚོན་པའི་ཕྱི་ནང་གཉིས་དམར་བ། ཅུང་ཟད་ཁ་གྱེན་ལ་ཕྱོགས་པ། ཡང་རོ་རྐྱང་གཉིས་པོ་ཕྱིར་གྱེས། སྤྱི་བོར་འདུས་མཚམས་སུ་བདེ་ཆེན་འཁོར་ལོ་རྩ་འདབ་སུམ་ཅུ་རྩ་གཉིས་པ་ཆུ་ཁམས་མཚོན་པའི་ཕྱི་དཀར་ནང་དམར་བ། ཅུང་ཟད་ཁ་ཐུར་བསྟན་གདུགས་ཕུབ་པ་ལྟ་བུ་དང་། རོ་རྐྱང་གཉིས་གྱེས་པའི་སྣེ་གཉིས་སྣ་བུག་ལ་གཏད་ཅིང་། རྩའི་འཁོར་ལོ་དེ་རྣམས་ཀྱི་རྩ་བ་རོ་རྐྱང་དབུ་གསུམ་ལས་སྐྱེས་པའི་རྩེ་མོ་རང་ལུས་རྡོ་རྗེ་ཕག་མོར་གསལ་བའི་ཕྱིའི་པགས་པའི་མཚམས་སུ་རེག་པ། དབུ་མའི་མར་སྣའི་སུམ་མདོའི་ནང་དུ། གཏུམ་མོ་ཨ་ཤད་ཀྱི་རྣམ་པ་མེ་ཁབ་རྩེ་འདྲ་བ་རིང་ཐུང་ཚོན་གང་བ་ཁྱད་ཆོས་བཞི་དང་ལྡན་པ། དབུ་མའི་ཡས་སྣར་ཡི་གེ་དབུ་ཅན་གྱི་ཧྃ་དཀར་པོ་མགོ་ཐུར་བསྟན་གཅིག་བསམས་ལ། རླུང་འབུད་སྐབས་གོང་ལྟར་གསལ་གདབ། རླུང་རྔུབ་ནས་གནོན་སྐབས་རླུང་རོ་རྐྱང་གི་ལམ་བརྒྱུད། མར་སྣ་སུམ་མདོའི་ཨ་ཤད་ཀྱི་མེ་ལ་ལོག་པའི་རྐྱེན་གྱིས་མེ་འབར་བ་དབུ་མའི་ནང་བརྒྱུད་ཡར་སྣའི་ཧྃ་ཡིག་ལ་ཕོག་པས་ཧྃ་ལས་ཡེ་ཤེས་ཀྱི་བདུད་རྩི་དཀར་པོའི་རྒྱུན་བསམ་གྱིས་མི་ཁྱབ་པ་བབས། མར་སྣའི་ཨ་ཤད་ཀྱི་མེ་ལ་ཕོག་པའི་རྐྱེན་གྱིས་མེ་ཚ་རུ་སོང་། དེའི་རྐྱེན་གྱིས་བདུད་རྩི་ཆེར་བབས་པས་སྤྱི་བོ་བདེ་ཆེན་གྱི་འཁོར་ལོའི་རྩ་འདབ་མས་བདུད་རྩིས་ཁེངས། རོ་རྐྱང་དབུ་གསུམ་གྱི་ལམ་བརྒྱུད་མགྲིན་པའི་འཁོར་ལོའི་རྩ་འདབ་ཁེངས། མེ་ཆེར་སོང་བས་བདུད་རྩི་འབབ་ཇེ་ཆེར་གྱུར་པས་སྙིང་གའི་འཁོར་ལོ་ཁེངས། དེ་ནས་རིམ་བཞིན་ལྟེ་བའི་འཁོར་ལོ་ཁེངས། རོ་རྐྱང་དབུ་གསུམ་གྱི་སྨད་ཆ་སོགས་ཀྱིས་མཚོན་མདོར་ན་རྩ་ནང་ཐམས་ཅད་བདུད་རྩིས་ཁེངས་ཤིང་སྐུ་ལུས་ཀྱི་ཕྱི་ཡང་མེ་འབར་བའི་དབུས་སུ་ཡོད་པར་བསམས་ལ་རླུང་བུམ་པ་ཅན་གཟུང་། །ནུབ་བདུན་པ་མཆོག་གི་གཏུམ་མོ་ལ་བརྟེན་ནས་བདེ་སྟོང་ཟུང་འཇུག་གི་ཡེ་ཤེས་མངོན་དུ་བྱ་བ་ནི། རང་ཕག་མོར་གསལ་བའི་སྐུ་ལ་རྩ་འཁོར་རོ་རྐྱང་སོགས་གོང་བཞིན་བསྐྱེད། དབུ་མའི་ཡས་སྣེར་ངོ་བོ་རང་གི་རྩ་བའི་བླ་མ་ཡིན་པ་ལ་རྣམ་པ་རྡོ་རྗེ་འཆང་ཡབ་ཡུམ་རྒྱན་མཚན་དཔེས་སྤྲས་པ་ཚོན་གང་བ་གཅིག་གསལ་བའི་སྟེང་གི་ཆར། རྒྱལ་བ་རྡོ་རྗེ་འཆང་ཡབ་ཡུམ་ལ་བརྒྱུད་པའི་བླ་མ་རྣམས་ཀྱིས་བསྐོར་བ། མར་སྣར་ཉི་གདན་ལ་མེའི་རང་བཞིན་གྱི་ཚེ་དཔག་མེད་ཚོན་གང་བ་ལོངས་སྤྱོད་རྫོགས་སྐུའི་རྒྱན་དང་མཚན་དཔེས་སྤྲས་པ་འོད་ཀྱི་རང་བཞིན་ཅན་གསལ་བཏབ་ནས། དབུ་མའི་ཡར་སྣའི་བླ་མར་གསོལ་བ་རྩེ་གཅིག་གིས་བཏབ་པས། སྐུ་ལས་འོད་ཟེར་འཕྲོས། སྟེང་གི་བླ་མ་གཙོ་འཁོར་ལ་ཕོག །དེ་རྣམས་ཀྱི་ཐུགས་རྒྱུད་བསྐུལ། སྐུ་ལས་བདུད་རྩིའི་རྒྱུན་དཔག་མེད་བབས་པས་དབུ་མའི་ཡར་སྣའི་རྩ་བའི་བླ་མ་ཡབ་ཡུམ་ལ་ཐིམ། སླར་ཡང་གསོལ་བ་ཡིད་ཀྱིས་རྩེ་གཅིག་ཏུ་བཏབ་པས་བླ་མ་ཡབ་ཡུམ་གྱི་སྐུ་ལས་བདུད་རྩིའི་རྒྱུན་དཀར་དམར་དཔག་ཏུ་མེད་པ་བབས། དབུ་མའི་མར་སྣའི་ཚེ་དཔག་མེད་ལ་ཕོག་པའི་རྐྱེན་གྱིས་མེ་སྒྲ་བཅས་དབུ་མའི་ནང་དུ་ཏལ་གྱིས་འབར། དབུ་མའི་ཡར་སྣའི་བླ་མའི་སྐུ་ལས་ཀྱང་བདུད་རྩི་ཇེ་ཆེར་བབས། དེས་མེའང་ཆེར་འབར། དེས་བདུད་རྩིའང་ཆེར་བབས་པས་སྤྱི་བོའི་འཁོར་ལོ་ཀུན་ཁེངས། སླར་ཡང་རོ་རྐྱང་གི་ལམ་བརྒྱུད་མགྲིན་པ་སོགས་འཁོར་ལོ་འོག་མ་ཀུན་ཁེངས། སླར་ཡང་འབར་འཛག་ཆེས་ཆེར་རྒྱས་པས་རྩ་ནང་ཀུན་དང་རོ་རྐྱང་དབུ་གསུམ་གྱི་སྨད་ཆའང་ཁེངས། དེ་ནས་ཀྱང་མེ་དང་བདུད་རྩིར་ཆེར་བབས་པས་རྩ་རྣམས་ཇེ་ཆེ་ཇེ་ཆེར་སོང་། མཐར་རང་གི་ལུས་རི་རབ་དང་མཚུངས་པའི་ནང་རོ་རྐྱང་དབུ་གསུམ་ཕྱི་ནང་མེ་འབར་བ་དང་བཅས་པའི་དབུས་བླ་མ་ཡབ་ཡུམ་སོགས་བཀྲ་ལམ་མེ་བར་དམིགས་པ་རྩེ་གཅིག་ཏུ་གཏད་དེ་རླུང་བུམ་པ་ཅན་ཅི་ནུས་སུ་འཛིན་ལ་དབྱིངས་རིག་བསྲེའོ། །གསུམ་པ་རྗེས་ནི། དེ་ལྟར་ནུབ་བདུན་དུ་འབད་པས། རབ་ཀྱིས་ཆོས་འདི་ཞུ་བའི་འདུན་པ་ཡོད་པ་ཙམ་དང་འབྲིང་སྔོན་འགྲོའི་དུས། ཐ་མའང་མེ་དམིགས་ཀྱི་མགོ་ཚུགས་ནས་དྲོད་མི་སྐྱེ་བ་མི་སྲིད། གང་ལྟར་ཡང་ནུབ་བདུན་པའི་སྲོད་ལ་གཏུམ་མོའི་མེ་དབང་བསྐུར་ཞིང་རས་གཟན་སོགས་སྦྱིན། ཐོ་རངས་ནས་རས་འབུད་ཕྱག་ལེན་ལྟར་གཏང་། ཕྱིར་ཉིན་དཔོན་སློབ་ཐམས་ཅད་ཀྱིས་ཕག་མོའི་གཞུང་གང་རུང་བསྲངས་ནས། དགའ་སྟོན་ཚོགས་ཀྱི་འཁོར་ལོ་བཅས་མཐའ་རྒྱས་སུ་ཕྱག་ལེན་མཛད་དོ། །དེ་ནས་ཀྱང་མ་ཆག་པར་ཉམས་སུ་བླངས་པས་དྲོད་ཀྱི་གཏུམ་མོ་ལ་བརྟེན་ནས་བདེ་བའི་གཏུམ་མོས་རྒྱུད་ཡོངས་སུ་གང་ཞིང་། དེས་དྲངས་པའི་མི་རྟོག་པའི་གཏུམ་མོ་ཕྱག་རྒྱ་ཆེན་པོའི་ཡེ་ཤེས་མངོན་སུམ་དུ་རྟོགས་པར་འགྱུར་ལ། གེགས་སེལ་དང་བོགས་འདོན་གྱི་སླད་དུ་རླུང་ཐར་པའི་སྒོ་འབྱེད་ཞལ་ལས་འབྱུང་བ་ལྟར་ཉམས་སུ་བླང་། རྒྱུན་གྱི་ཉམས་ལེན་སྐབས་ཐུན་མོང་མ་ཡིན་པའི་སྔོན་འགྲོ་ནི་ངེས་པར་དགོས། ཁྱད་པར་གྱི་སྔོན་འགྲོ་རེས་མོས་སུ་ཉམས་སུ་བླང་བའམ། སྔོན་དུ་ལེགས་པར་འབྱོངས་ཟིན་པ་ཡིན་ན་དངོས་གཞིའི་མེ་དམིགས་བཞི་ལ་གནད་དུ་བསྣུན། དེའང་ནུབ་རེར་རེས་མོས་སུ་བྱས་པས་ནུབ་བཞིས་དམིགས་པ་ཚར་གཅིག་རྫོགས་པ་སྟེ། དེ་ལྟ་བུའི་ཚུལ་གྱིས་བསྐྱར་ཏེ་ཉམས་སུ་བླང་ཞིང་། དམིགས་པ་སྔ་མ་སྔ་མ་ལ་གོམས་པ་བརྟན་པོ་གྱུར་ན། ཕྱི་མ་རྣམས་ལ་རིམ་གྱིས་གཙོ་བོར་བྱས་པས་ཀྱང་རུང་ངོ་། །ཞེས་རྣལ་འབྱོར་གྱི་དབང་ཕྱུག་ཆེན་པོ་རས་ཆེན་དཔལ་འབྱོར་བཟང་པོ་ནས་བརྒྱུད་པའི་བོ་དོང་ལུགས་ཀྱི་གཏུམ་མོ་ཞག་བདུན་མའི་དམིགས་འཁྲིད་བླ་མའི་ཞལ་ལུང་ལས་ཇི་ལྟར་བྱུང་བ་བཞིན་དག་པར་བྲིས་པའི་དགེ་བས་འགྲོ་ཀུན་གཉུག་མ་དོན་གྱི་ཙཎྜ་ལཱི་ཟུང་འཇུག་དྭང་མ་གསུམ་ལྡན་གྱི་ཡེ་ཤེས་ཚེ་འདི་ཉིད་ལ་མངོན་སུམ་དུ་བྱེད་པའི་རྒྱུར་གྱུར་ཅིག །སརྦ་དཱ་མངྒལཾ་བྷ་བ་ཏུ།། །།

[edit]

bo dong ras chen dpal 'byor bzang po'i lugs kyi gtum mo zhag bdun ma'i khrid yig bla ma'i zhal lung / @#/_/bo dong ras chen dpal 'byor bzang po'i lugs kyi gtum mo zhag bdun ma'i khrid yig bla ma'i zhal lung zhes bya ba bzhugs so/__/ na mo gu ru badz+ra wa rA hI pA dA ya/__de la 'dir ring brgyud nA ro dang /__ni gu nas brgyud pa'i gtum mo'i man ngag kun mkhyen phyogs las rnam rgyal la bka' babs pa dang /__nye brgyud bo dong ras chen dpal 'byor bzang po la ye shes kyi mkha' 'gro mas dngos su gnang ba'i snyan brgyud gtum mo'i man ngag zhag bdun ma'i gdams ngag zab mo la brten nas 'ja' lus rdo rje'i sku sgrub par byed pa'i 'khrid kyi rim pa la gsum/__sngon 'gro/__dngos gzhi/__rjes so/__/dang po la gsum/__thun mong dang /__thun mong ma yin pa dang /__khyad par gyi sngon 'gro'o/__/dang po ni/__bde mchog 'khor lo la sogs pa rnal 'byor bla med ma rgyud kyi dkyil 'khor du dbang thob cing dam tshig la gnas pas/__dal 'byor rnyed dka'/__'chi ba mi rtag pa/__las rgyu 'bras/__'khor ba'i nyes dmigs bsgom pa rnams gzhan dang mthun/__gnyis pa la gsum/__skyabs 'gro/__sems bskyed/__bla ma'i rnal 'byor ro/__/dang po ni/__sa phyogs thams cad dag pa'i zhing khams chen por gsal ba'i rang gi mdun du yan lag brgyad dang ldan pa'i bdud rtsi'i chu gter yid bzhin gyi nor bus gtams pa'i dbus su dpag bsam gyi ljon shing yal ga lnga pa'i lte bar rtsa ba'i bla ma rdo rje 'chang la gtum mo brgyud pa'i bla ma rnams kyis bskor ba/__mdun du pad nyi ro'i gdan la yi dam rdo rje phag mo dmar mo gri thod kha T+wA~M ga 'dzin cing /__rus pa'i phyag rgya lngas spras pa/__mi mgo skam po'i dbu rgyan dang /__rlon pa'i do shal can/__rna ltag g.yas su phag zhal nag po ngur sgra sgrogs pa/__zhabs g.yas bskums pa'i gar stabs kyis ye shes kyi me 'bar ba'i dbus na bzhugs pa'i mthar yi dam lha tshogs kyis bskor ba/__g.yas su sangs rgyas sprul sku'i rnam pa can/__rgyab tu dam chos/__g.yon du dge 'dun/__mtha' skor kun tu dpa' bo mkha' 'gro chos skyong srung ma'i tshogs kyis bskor ba'i spyan sngar rang gzhan sems can thams cad sgo gsum gus shing dwang bas 'khod par mos la/__thog mar oM AHhU~M/__sgo gsum dag par byed pa zhes sogs rdo rje'i rnal 'byor zab mo la 'jug par dam bca' ba'i tshul gyis brjod rjes/__mos gus gdung shugs drag pos/__sangs rgyas chos dang zhes sogs skyabs 'gro ci nus su bya/__gnyis pa ni/__bdag gzhan mtha' yas pa'i sems can thams cad kyi don du zung 'jug rdo rje 'chang chen po'i go 'phang thob par bya/__de'i ched du lam zab mo gtum mo'i rnal 'byor la 'jug par bgyi'o snyam pas/__rang gzhan don gnyis sogs brjod/__mthar skyabs yul rnams las 'od zer 'phros/__rang dang sems can thams cad la phog pas sdig sgrib dag cing byin gyis brlabs/__skyabs yul rim par 'od du zhu nas rang la thim par bsam/__gsum pa la lnga/__bla ma'i rnal 'byor gsal gdab pa/__'bru gsum gyi bzlas pa bya ba/__nang gi maN+Dal 'bul ba/__gdung shugs kyis gsol ba gdab pa/__ting nge 'dzin gyi dbang blang ba'o/__/dang po ni/__oM AHhU~M zhes brjod pas rang gi gzhi lus skad cig gis rdo rje 'chang chen po'i rnam par lam gyis gsal gdab/__de nas/__oM zhes brjod pas gzugs snang thams cad sku rdo rje'i ngo bo rnam snang dkar po 'od du zhu ba las byung ba'i thar pa chen po'i gzhal med khang yangs shing rgya che ba'i dbus su/__aH_zhes brjod pas sgrar grags thams cad gsung rdo rje'i ngo bo 'od dpag med dmar po 'od du zhu ba las pad+ma zla ba'i gdan/__hU~M zhes brjod pas de'i steng du rang gi sems nyid kyi ngo bo rang rdo rje 'chang yab yum du gsal bzhin pa slar yang gsal snang legs 'don/__de'i spyi bor seng ges bteg pa'i rin po che'i khri/__pad+ma/__nyi ma/__zla ba ste gdan bzhi brtsegs kyi steng du rtsa ba'i bla ma nyid rang gis bsgoms pa ji lta ba'i rdo rje 'chang yab yum du gsal btab nas sems gzung /__gnyis pa ni/__bla ma'i sku gsung thugs kyis rang gi lus ngag yid gsum dwang ma mi shigs gsum ldan gyi ngo bor byin gyis brlab tu gsol snyam pas/__oM AHhU~M zhes rtse gcig tu bzla/__gsum pa ni/__swa b+hA wa'i sngags kyis stong par sbyangs pa'i ngang las rang gi lus tha mal du gnas pa rgya ma zhig pa ril por maN+Dal du dbul te/__de'ang sha__/khrag__/drod/__dbugs 'byung bzhi'i ngo bo yum bzhi'i rang bzhin rnam par dag pa 'byung ba rim brtsegs kyi rten/__rtsa a ba d+hU ti lus kyi dbus drang por gnas pa dang gzung 'dzin gyi phyogs su ma lhung bas ri rab/__lte ba sprul pa'i 'khor lo lus kyi bskyed gzhi yin pas lus 'phags/__longs spyod 'khor lo zas skom longs spyod cing smra ba chos mthun du 'byung bas 'dzam gling /__chos kyi 'khor lo rang bzhin brgyad cu'i rtog pa nub pas ba lang spyod/__bde chen 'khor lo haM yig bde ba chen po'i rgyun gyis lus 'tsho bar byed pas sgra mi snyan/__de las gyes pa'i rtsa phran dang /__skra dang /__ba spu la sogs pa gling so so'i rgyan/__lag ngar gnyis/__rje ngar gnyis/__dpung pa gnyis/__brla gnyis bcas gling phran brgyad/__rlung phyir 'bud pas nyon mongs dang sgrib pa rnams gcod pa'i phyir 'khor lo/__/rngubs pas rlung dbu mar zhugs pa la brten nas yon tan thams cad 'byung bas nor bu/__gnas pas rlung sems dbu mar 'dus te bde stong gi ye shes skyed pas btsun mo/__/brtan pas mi 'gyur ba'i bde ba grub pas blon po/__/de lta bu'i myur lam gyis nang gis lam bde blag tu theg pas glang po/__/zung 'jug yan lag bdun ldan gyi zhing khams su myur du bgrod pas rta mchog__/'gros bzhi dbu mar thim pas bdud bzhi'i g.yul las rgyal bas na dmag dpon/__khams dmar cha nyi ma/__dkar cha zla ba/__snying 'dod rgu 'byung ba'i rin po che'i gter chen po sogs kyi ngo bor dmigs te phul la/__'dod pa'i don la gsol ba gdab/__bzhi pa ni/__rje 'jigs med grags pa'i gsol 'debs/__rgya chen chos kyi spyan ldan sogs dang /__rang gi rtsa ba'i bla ma'i sku bstod tshar grangs ci mang dang /__brgyud pa'i gsol 'debs skabs/__brgyud pa'i bla ma rang gi bzhugs gnas so sor mngon sum bzhin du gsal ba'am/__de ltar mi nus na spyi bo'i bla ma rdo rje 'chang nyid brgyud pa'i bla ma thams cad 'dus pa'i ngo bor mos te gsol ba gdab/__lnga pa ni/__dpal ldan bla ma rin po che sogs kyis gsol ba btab la dbang bzhi len pa'i dmigs pa ngag 'don ltar bskyang /__bla ma rang la bstims nas rang sems dang bla ma'i thugs dbyer med du 'dres pa'i ngang la mnyam par bzhag go/__// gsum pa khyad par gyi sngon 'gro la gsum las/__nub dang po bla ma sku rdo rje la brten nas dag byed a'i stong ra bsgom pa ni/__rang tha mal du gnas pa'i spyi bor b+h+rU~M ser po las seng ge chen po brgyad kyis bteg pa'i rin po che'i khri/__de'i steng du pa~M dkar po las pad+ma dkar po 'dab ma 'bum ldan gyi dbus/__ra~M dmar po las ze'u 'bru dmar ser gyi tshad dang mnyam pa'i nyi ma'i dkyil 'khor 'od 'bar ba/__de'i steng du a dkar po las zla ba'i dkyil 'khor dkar bsil nya gang ba/__de'i steng du bla ma sku rdo rje'i ngo bo rgyal ba rdo rje 'chang sku mdog dkar po g.yas rdo rje dang /__g.yon des yu ba byas pa'i dril bu 'dzin pa/__yum rdo rje rnal 'byor ma sku mdog dmar mo g.yas gri gug dang /__g.yon thod pa bdud rtsis gang ba 'dzin pas yab la 'khyud pa/__zhabs gnyis rdo rje dang pad+ma'i skyil mo krung gis 'od zer dkar po 'phro ba'i klong na bzhugs par gsal btab nas/__pha bla ma sangs rgyas rin po che la gsol ba 'debs so/__/bdag gzhan sems can thams cad kyi nad gdon bar chad zhi bar byin gyis rlobs/__las ngan sdig sgrib dag par byin gyis rlobs/__ting nge 'dzin khyad par can rgyud la skye bar byin gyis brlab tu gsol/__/zhes gsol ba shugs drag tu btab pas bla ma rdo rje 'chang yab yum gdan khri dang bcas pa 'od du ltem gyis zhu nas rang gi spyi bor sib kyis thim pa'i rkyen gyis mgo bo'i nang du chos 'byung dkar po zur gsum pa/__rtsa ba phra ba lce chung la zug pa/__gdeng ka che ba gyen du phyogs pa'i zur gnyis rna stag g.yas g.yon dang /__zur gcig smin mtshams su bstan pa/__de'i nang du a dkar po gsal zhing 'tsher ba la dmigs pa gtad nas/__a a zhes brgya stong gi bar brjod pas/__a las bdud rtsi'i rgyun dkar po dpag tu med pa babs pas chos 'byung gi nang thams cad khengs/__mthar chos 'byung gi kha nas lud pa dang /__rtsa ba nas 'khril ba'i tshul gyis babs/__rang gi spyi bo tshangs pa'i bu ga nas mar zhugs lus kyi nang thams cad khyab/__tshe rabs 'khor ba thog ma med pa nas bsags pa'i sdig sgrib nyes ltung thams cad dud khu'am sol khu'i rnam par 'og sgo gnyis dang /__rkang pa'i srin lag gi rtse mo dang /__ba spu'i bu ga tshun chad nas thon pa rim pa dgu'i 'og tu song bas sdig sgrib thams cad dag__/shul thams cad bdud rtsis skya mer gyis khengs pas byin gyis brlabs par bsams la/__rkang pa gnyis sems skyil lhod chags par bya/__lag pa gnyis kyi mthe bong gis srin lag gi 'dre rtsa mnan pa'i rdo rje khu tshur pus mo'i steng du kha sbub tu bzhag__/sna bug gnyis nas rlung shug bskyed de lhag med du sangs kyis bus pa dang mnyam du 'og rlung 'then zhing stong 'dren bya/__rlung phyir thub tshad gzung /__mi thub pa dang sna bug gnyis kyi spu mi 'gul ba'i tshod kyis dal bus rngubs la lte 'og tu hril gyis mnan la rlung kha sbyar thub tshad gzung /__mi thub pa dang sngar bzhin phyir 'bud pa/__de 'dra ba lan gsum byas pa'i rjes ma'i tshe lto ba g.yas skor gsum/__g.yon skor gsum/__dbus skor gsum/__dpung pa g.yas g.yon res mos su 'degs pa dang /__dbus 'degs pa ste gsum gyi mthar rlung kha sna gnyis ka nas sgra dang bcas lhag ma med par phyir 'bud cing ha sgrugs bya/__de la las dang po pas 'dzin yun ring po ma byung rung /__'bud rngubs kyi dus su rlung lhag ma ma lus pa dang /__'dzin pa'i skabs su rlung rkun ma shor bar 'jam rlung dal bu'i sbyor ba la yun thung grangs mang gi tshul du bslabs pas rim gyis goms pa brtan par 'gyur ro/__/mdor na de lta bu'i rlung sbyor thun re la brgya rtsa sogs nas bdun nam gsum la nyung mtha' byas pa bsgom par bya'o//__// nub gnyis pa bla ma gsung rdo rje la brten nas dag byed a'i stong ra bsgom pa ni/__sbyor dngos kyi khyad par gzhan gong dang 'dra ba la/__bla ma rdo rje 'chang sku mdog dmar po dang /__'od dmar po 'phro bar gsal btab la gsol 'debs bya/__de nyid rang la thim pa'i rkyen gyis mgo bo'i nang du chos 'byung dmar po lcags sreg gi rnam pa can du yod pa'i nang du a dmar po la yid gtad de bzlas pa byas pas bdud rtsi dmar po reg bya tsha ba dpag tu med pa babs pas nad thams cad rnag khrag gi rnam pas thon/__shul thams cad bdud rtsi zangs zhun gyi khu ba lta bu skyo tsha khol ba bzhin bun bun du khol bas gang bar bsam/__rlung 'dzin pa sogs 'dra/__nub gsum pa bla ma thugs rdo rje la brten nas dag byed a'i stong ra bsgom pa ni/__sbyor dngos kyi dmigs pa gzhan thams cad sngar bzhin la/__dmigs bsal gyi khyad par bla ma sku mdog sngon po dang /__chos 'byung sngon po'i nang a yig sngon po bsgom/__de las 'od zer 'phros/__gshin rje gshed dang /__dpal rta mgrin dang /__rdo rje gtum po sogs khro bo'i tshogs dpag tu med pa spyan drangs/__a la thim/__a brjod pa'i rkyen gyis a yig las khro bo dpag tu med pa byung /__lus gang /__gdon thams cad srog chags mi sdug pa'i rnam pas thon/__lus dang chos 'byung gi nang bcas khro bo'i tshogs dpag tu med pa mtshon cha phyir gdengs pas bar mtshams med par bun gyis khengs par bsams la rlung bum pa can gzung ngo //__// gnyis pa dngos gzhi la bzhi/__rlung kha sbyor la brten nas me gso ba/__sa bon gnyis la brten nas me sbar ba/__rtsa gsum 'khor lo bzhi la brten nas 'bar 'dzag bsgom pa/__mchog gi gtum mo la brten nas bde stong zung 'jug gi ye shes mngon du bya ba'o/__/de la thog mar nub bzhi pa me gso ba'i dmigs pa ni/__skyabs 'gro nas bzung dag byed a'i stong ra'i bar gong bzhin nyams su blang /__de nas rang gi spyi bor bla ma rdo rje 'chang bsgoms la mos gus drag po rtse gcig pas/__pha bla ma sangs rgyas rin po che la gsol ba 'debs so/__/bdag la bde drod kyi ting nge 'dzin skye bar byin gyis rlobs/__/bdag la bde stong gi ting nge 'dzin skye bar byin gyis rlobs/__/ting nge 'dzin khyad par can bdag rgyud la skye bar byin gyis brlab tu gsol/__/zhes gsol ba btab pa'i rkyen gyis bla ma yab yum 'od du zhu/__rang la thim pas skad cig gis rang nyid pad+ma dmar po dang nyi ma'i gdan la rdo rje phag mo sku mdog dmar mo gcer bu rus pa'i rgyan gyis spras pa/__dbu skra phyed spyi bor bcings pas rus pa'i 'khor los mtshan pa/__phyed thur du grol zhing mi mgo skam po lngas dbu brgyan pa/__phyag gnyis rlung 'dzin pa'i phyag rgya dang /__zhabs gnyis rlung 'dzin pa'i 'dug stangs kyis bzhugs pa'i spyan gsum nam mkhar bkra hrig ger gzigs pa/__sku lus kyi nang lte ba'i thad du me'i snying po tsha zhing ngar la rtsub pa rno ba ste mtshan nyid bzhi ldan bya ngang pa'i sgo nga tsam mdun rgyab g.yas g.yon bzhi sgrom du yod par bsam/__de nas rlung ro bsal/__rlung stong 'dren skabs 'og rlung phog pa'i rkyen gyis me sngo yal yal 'bar/__rlung rngub cing dgang gzhil mnan pas de las kyang me cher 'bar bas lus kyi nang thams cad mes khengs/__yang stong 'dren gyis rlung bus skabs/__stod thams cad mes khengs shing 'bar/__dgang dus brla gnyis nas brgyud rkang pa gnyis sogs lus smad kun mes khengs shing 'bar bar dmigs pa gtad la bum can gong bzhin gzung /__pho ba bskor skabs me lce dmar 'khyil 'khyil byed par bsam mo//__// nub lnga pa sa bon gnyis la brten nas me sbar ba ni/__rang phag mor gsal ba'i lte ba'i thad du me bzhi sgrom gsal btab pa yan gong ltar la/__dmigs pa'i khyad par/__nyi gdan dang bshang lam gyi bar du rlung gi sa bon ya~M yig ljang gu zhig dang /__bshang lam gyi nang sgor zhugs tsam du me'i sa bon ra~M yig dmar po 'bar la khad par bsams la rlung phyir bus/__stong 'dren skabs ya~M yig las rlung g.yos ra~M yig la phog pas me 'bar/__lte ba'i me bzhi sgrom la phog pas me lhag par 'bar bas lus kyi nang kun khengs/__stong 'dren skabs me stod du 'bar bas rang phag mor gsal ba'i zhal dang /__spyan dang /__snyan sogs nas me lce dmar nyug nyug 'bar zhing dgang dus smad cha kun mes khengs/__me thur du 'bar bas 'og sgo gnyis nas me lce phyir 'phros shing 'bar bas phyi dbyibs kyi lus kyang me 'bar ba'i dbus su yod par bsams la pho bskor gong bzhin bya/__de nas phyi nang kun me 'bar ba'i dbus su rang phag mor gsal ba'i spyan gsum bkra hrig ge ba/__snang stong sgyu ma'i skur dmigs pa gtad pa rlung bum can ci nus su 'dzin no//___// nub drug pa rtsa gsum 'khor lo bzhi la brten nas 'bar 'dzag bsgom pa ni/__rang gi phyi dbyibs kyi lus rdo rje phag mo me dbus su yod pa gong bzhin la/__lte 'og sor bzhi nas yar sna spyi bor zug pa'i rtsa dbu ma chu shing gi sdong po ltar drang ba pad+ma'i snal ma ltar srab pa/__rgya skyegs kyi me tog ltar snum pa/__til mar gyi mar me ltar gsal ba ste khyad chos bzhi dang ldan pa'i phyi sngo ba/__nang dmar ba/__khog pa stong pa/__lus kyi dbus drang por yod pa'i g.yas su ro ma dmar mo phyi nang gnyis dmar/__g.yon du rkyang ma dkar mo phyi dkar nang dmar ba/__de gnyis dbu ma'i mar sna nas skyes pa'i tshul gyis ro rkyang dbu gsum gyi gsham yi ge dbu can gyi cha'i gsham ltar yod pa/__ro rkyang phyir gyes/__lte bar 'dus mtshams su lte ba sprul pa'i 'khor lo rtsa 'dab drug cu re bzhi pa sa khams mtshon pa'i phyi ser nang dmar ba/__phyi'i rtse rnams kha gyen phyogs gdugs yu gnam la bstan nas 'phyangs pa lta bu/__yang ro rkyang gnyis g.yas g.yon gnyis su gyes/__snying gar 'dus mtshams su chos kyi 'khor lo rtsa 'dab brgyad pa cung zad thur bstan gdugs phub pa lta bu rlung khams mtshon pa'i phyi sngo nang dmar ba/__yang ro rkyang phyir gyes/__mgrin par 'dus mtshams longs spyod 'khor lo rtsa 'dab bcu drug pa me khams mtshon pa'i phyi nang gnyis dmar ba/__cung zad kha gyen la phyogs pa/__yang ro rkyang gnyis po phyir gyes/__spyi bor 'dus mtshams su bde chen 'khor lo rtsa 'dab sum cu rtsa gnyis pa chu khams mtshon pa'i phyi dkar nang dmar ba/__cung zad kha thur bstan gdugs phub pa lta bu dang /__ro rkyang gnyis gyes pa'i sne gnyis sna bug la gtad cing /__rtsa'i 'khor lo de rnams kyi rtsa ba ro rkyang dbu gsum las skyes pa'i rtse mo rang lus rdo rje phag mor gsal ba'i phyi'i pags pa'i mtshams su reg pa/__dbu ma'i mar sna'i sum mdo'i nang du/__gtum mo a shad kyi rnam pa me khab rtse 'dra ba ring thung tshon gang ba khyad chos bzhi dang ldan pa/__dbu ma'i yas snar yi ge dbu can gyi ha~M dkar po mgo thur bstan gcig bsams la/__rlung 'bud skabs gong ltar gsal gdab/__rlung rngub nas gnon skabs rlung ro rkyang gi lam brgyud/__mar sna sum mdo'i a shad kyi me la log pa'i rkyen gyis me 'bar ba dbu ma'i nang brgyud yar sna'i ha~M yig la phog pas ha~M las ye shes kyi bdud rtsi dkar po'i rgyun bsam gyis mi khyab pa babs/__mar sna'i a shad kyi me la phog pa'i rkyen gyis me tsha ru song /__de'i rkyen gyis bdud rtsi cher babs pas spyi bo bde chen gyi 'khor lo'i rtsa 'dab mas bdud rtsis khengs/__ro rkyang dbu gsum gyi lam brgyud mgrin pa'i 'khor lo'i rtsa 'dab khengs/__me cher song bas bdud rtsi 'bab je cher gyur pas snying ga'i 'khor lo khengs/__de nas rim bzhin lte ba'i 'khor lo khengs/__ro rkyang dbu gsum gyi smad cha sogs kyis mtshon mdor na rtsa nang thams cad bdud rtsis khengs shing sku lus kyi phyi yang me 'bar ba'i dbus su yod par bsams la rlung bum pa can gzung /__/nub bdun pa mchog gi gtum mo la brten nas bde stong zung 'jug gi ye shes mngon du bya ba ni/__rang phag mor gsal ba'i sku la rtsa 'khor ro rkyang sogs gong bzhin bskyed/__dbu ma'i yas sner ngo bo rang gi rtsa ba'i bla ma yin pa la rnam pa rdo rje 'chang yab yum rgyan mtshan dpes spras pa tshon gang ba gcig gsal ba'i steng gi char/__rgyal ba rdo rje 'chang yab yum la brgyud pa'i bla ma rnams kyis bskor ba/__mar snar nyi gdan la me'i rang bzhin gyi tshe dpag med tshon gang ba longs spyod rdzogs sku'i rgyan dang mtshan dpes spras pa 'od kyi rang bzhin can gsal btab nas/__dbu ma'i yar sna'i bla mar gsol ba rtse gcig gis btab pas/__sku las 'od zer 'phros/__steng gi bla ma gtso 'khor la phog__/de rnams kyi thugs rgyud bskul/__sku las bdud rtsi'i rgyun dpag med babs pas dbu ma'i yar sna'i rtsa ba'i bla ma yab yum la thim/__slar yang gsol ba yid kyis rtse gcig tu btab pas bla ma yab yum gyi sku las bdud rtsi'i rgyun dkar dmar dpag tu med pa babs/__dbu ma'i mar sna'i tshe dpag med la phog pa'i rkyen gyis me sgra bcas dbu ma'i nang du tal gyis 'bar/__dbu ma'i yar sna'i bla ma'i sku las kyang bdud rtsi je cher babs/__des me'ang cher 'bar/__des bdud rtsi'ang cher babs pas spyi bo'i 'khor lo kun khengs/__slar yang ro rkyang gi lam brgyud mgrin pa sogs 'khor lo 'og ma kun khengs/__slar yang 'bar 'dzag ches cher rgyas pas rtsa nang kun dang ro rkyang dbu gsum gyi smad cha'ang khengs/__de nas kyang me dang bdud rtsir cher babs pas rtsa rnams je che je cher song /__mthar rang gi lus ri rab dang mtshungs pa'i nang ro rkyang dbu gsum phyi nang me 'bar ba dang bcas pa'i dbus bla ma yab yum sogs bkra lam me bar dmigs pa rtse gcig tu gtad de rlung bum pa can ci nus su 'dzin la dbyings rig bsre'o/__/gsum pa rjes ni/__de ltar nub bdun du 'bad pas/__rab kyis chos 'di zhu ba'i 'dun pa yod pa tsam dang 'bring sngon 'gro'i dus/__tha ma'ang me dmigs kyi mgo tshugs nas drod mi skye ba mi srid/__gang ltar yang nub bdun pa'i srod la gtum mo'i me dbang bskur zhing ras gzan sogs sbyin/__tho rangs nas ras 'bud phyag len ltar gtang /__phyir nyin dpon slob thams cad kyis phag mo'i gzhung gang rung bsrangs nas/__dga' ston tshogs kyi 'khor lo bcas mtha' rgyas su phyag len mdzad do/__/de nas kyang ma chag par nyams su blangs pas drod kyi gtum mo la brten nas bde ba'i gtum mos rgyud yongs su gang zhing /__des drangs pa'i mi rtog pa'i gtum mo phyag rgya chen po'i ye shes mngon sum du rtogs par 'gyur la/__gegs sel dang bogs 'don gyi slad du rlung thar pa'i sgo 'byed zhal las 'byung ba ltar nyams su blang /__rgyun gyi nyams len skabs thun mong ma yin pa'i sngon 'gro ni nges par dgos/__khyad par gyi sngon 'gro res mos su nyams su blang ba'am/__sngon du legs par 'byongs zin pa yin na dngos gzhi'i me dmigs bzhi la gnad du bsnun/__de'ang nub rer res mos su byas pas nub bzhis dmigs pa tshar gcig rdzogs pa ste/__de lta bu'i tshul gyis bskyar te nyams su blang zhing /__dmigs pa snga ma snga ma la goms pa brtan po gyur na/__phyi ma rnams la rim gyis gtso bor byas pas kyang rung ngo /__/zhes rnal 'byor gyi dbang phyug chen po ras chen dpal 'byor bzang po nas brgyud pa'i bo dong lugs kyi gtum mo zhag bdun ma'i dmigs 'khrid bla ma'i zhal lung las ji ltar byung ba bzhin dag par bris pa'i dge bas 'gro kun gnyug ma don gyi tsaN+Da lI zung 'jug dwang ma gsum ldan gyi ye shes tshe 'di nyid la mngon sum du byed pa'i rgyur gyur cig__/sarba dA mang+galaM b+ha ba tu//__//