དཔལ་ཀྱེ་རྡོ་རྗེ་གཙོ་རྐྱང་གི་མངོན་རྟོགས་ངག་འདོན་སྙིང་པོ་གསལ་བ།

🚧 This website is under continued development. We appreciate your patience!

First text in section. Back to Volume PageNext Text

Wylie title	dpal kye rdo rje gtso rkyang gi mngon rtogs ngag 'don snying po gsal ba
Location	mkhyen brtse'i bka' 'bum Volume 8, sde tshan 12, Text 1, Pages 227-234 (Folios 1a to 4b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dpal kye rdo rje gtso rkyang gi mngon rtogs ngag 'don snying po gsal ba. In 'jam dbyangs mkhyen brtse'i dbang po'i bka' 'bum, Vol. 8: 227-234. Khams sde dge rdzong sar dgon: Rdzong sar blo gros phun tshogs, 2020.
Genre	Sadhanas - Evocation Ritual - sgrub thabs  ·  Liturgy - ngag 'don
Deity	kye rdo rje
Colophon	།ཞེས་པའང་ཉེར་མཁོའི་ཡན་ལག་ཏུ་ལུགས་འདི་ལ་ཚད་མར་གྱུར་པའི་གཞུང་ལས་བཏུས་ཏེ་བྱ་བྲལ་བ་མཉྫུ་གྷོ་ཥས་བྲིས་པའི་དགེ་བས་འགྲོ་ཀུན་དཔལ་ཧེ་རུ་ཀ་དགེས་པ་རྡོ་རྗེའི་གོ་འཕང་ཚེ་འདི་ཉིད་ལ་མངོན་དུ་བྱེད་པའི་རྒྱུར་གྱུར་ཅིག།
	zhes pa'ang nyer mkho'i yan lag tu lugs 'di la tshad mar gyur pa'i gzhung las btus te bya bral ba many+dzu g+ho Shas bris pa'i dge bas 'gro kun dpal he ru ka dges pa rdo rje'i go 'phang tshe 'di nyid la mngon du byed pa'i rgyur gyur cig

1 Texts in this Section (sde tshan or chos tshan)

1 227-234	དཔལ་ཀྱེ་རྡོ་རྗེ་གཙོ་རྐྱང་གི་མངོན་རྟོགས་ངག་འདོན་སྙིང་པོ་གསལ་བ། dpal kye rdo rje gtso rkyang gi mngon rtogs ngag 'don snying po gsal ba Sadhanas - Evocation Ritual - sgrub thabs   ·   Liturgy - ngag 'don	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །དཔལ་ཀྱེ་རྡོ་རྗེ་གཙོ་རྐྱང་གི་མངོན་རྟོགས་ངག་འདོན་སྙིང་པོ་གསལ་བ་ཞེས་བྱ་བ་བཞུགས་སོ།། །། ན་མོ་གུ་རུ་ཤྲཱི་ཧེ་བཛྲཱ་ཡ། བསྡུས་པའི་ཚུལ་གྱིས་དཔལ་ཀྱཻ་རྡོ་རྗེ་གཙོ་རྐྱང་གི་མངོན་རྟོགས་བསྒོམ་པར་འདོད་པས། བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འདུག་སྟེ། སྐྱབས་ཡུལ་གསལ་བཏབ་ལ། བདག་དང་འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ཅི་ནུས་ཀྱིས་མཐར་ཐལ་མོ་སྦྱར་ཏེ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། སྐྱབས་ཡུལ་རྣམས་འོད་དུ་ཞུ་ནས་རང་ལ་ཐིམ་པར་བསམ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་ལམ་ཟབ་མོ་ཉམས་སུ་བླང་བར་བགྱིའོ། །ཞེས་ལན་གསུམ། སེམས་ཅན་ཐམས་ཅད་བདེ་བ་སོགས་ཚད་མེད་བཞི་བསྒོམ། ཨོཾ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། སྟོང་པའི་ངང་ལས་པདྨ་དང་ཉི་མ་བདུད་བཞི་བརྩེགས་པའི་གདན་གྱི་སྟེང་དུ་ཧཱུྃ་ལས་ཐོད་པ་དུམ་བུ་གསུམ་པ་དཔྲལ་བར་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་གིས་མཚན་པ། དེའི་གཡོན་ཏུ་ཨོཾ་ལས་གྲི་གུག་སྔོ་ནག་ཡུ་བ་ལ་ཨྃ་གིས་མཚན་པ། དེ་ཡོངས་སུ་གྱུར་པ་ལས་རང་ཉིད་སྐད་ཅིག་གིས་དཔལ་ཀྱེ་རྡོ་རྗེ་སྐུ་མདོག་སྔོན་པོ་ཞལ་བརྒྱད། ཕྱག་བཅུ་དྲུག་པ། ཞབས་བཞི་པ། རྩ་བའི་ཞལ་སྔོན་པོ། གཡས་དཀར། གཡོན་དམར། སྟེང་ཞལ་དུད་ཀ །ཞལ་ལྷག་མ་གཉིས་གཉིས་གནག་པ། ཞལ་རེ་རེ་ལ་སྤྱན་གསུམ་གསུམ་དང་ལྡན་ཞིང་མཆེ་བ་བཞི་བཞི་བཙིགས་པ། དབུ་སྐྲ་སེར་པོ་གྱེན་ཏུ་བརྫེས་པ། སྤྱི་བོར་སྣ་ཚོགས་རྡོ་རྗེས་མཚན་པ། ཕྱག་བཅུ་དྲུག་གིས་ཐོད་པ་བཅུ་དྲུག་བཟུང་བའི་གཡས་ཀྱི་དང་པོ་ན་གླང་པོ་ཆེ་དཀར་པོ། །གཡོན་གྱི་དང་པོ་ན་སའི་ལྷ་སེར་པོ། །དེ་གཉིས་ཀྱིས་ཡུམ་ལ་འཁྱུད་པ། གཡས་ཀྱི་གཉིས་པ་ན་རྟ་སྔོན་པོ། གསུམ་པ་ན་བོང་བུ་གྭ་པ། བཞི་པ་ན་གླང་སེར་པོ། ལྔ་པ་ན་རྔ་མོ་ཐལ་ཁ། དྲུག་པ་ན་མི་དམར་པོ། བདུན་པ་ན་ཤ་ར་བྷ་སྔོན་པོ། བརྒྱད་པ་ན་བྱི་བླ་གྭ་པ། གཡོན་གྱི་གཉིས་པ་ན་ཆུའི་ལྷ་དཀར་པོ། གསུམ་པ་ན་མེའི་ལྷ་དམར་པོ། བཞི་པ་ན་རླུང་གི་ལྷ་ལྗང་གུ། ལྔ་པ་ན་ཟླ་བའི་ལྷ་དཀར་པོ། དྲུག་པ་ན་ཉི་མའི་ལྷ་དམར་པོ། བདུན་པ་ན་གཤིན་རྗེ་སྔོན་པོ། བརྒྱད་པ་ན་ནོར་འཛིན་སེར་པོ། དབུ་རེ་རེ་ལ་མི་མགོ་སྐམ་པོ་ལྔ་ལྔས་བརྒྱན་ཅིང་། རློན་པ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་དང་ལྡན་པ། ཞབས་གཡས་གཉིས་བརྐྱངས་པའི་བརླ་ལ་གཡོན་གཉིས་བསྐུམ་པའི་སོར་མོ་རྣམས་གཏད་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ། སྒེག་ཅིང་དཔའ་བ་མི་སྡུག་པ། རྒོད་ཅིང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་ཡི། །གར་དགུའི་རོ་དང་ལྡན་པ་ཉིད། །དེའི་པང་ན་ཡུམ་རྡོ་རྗེ་བདག་མེད་མ་སྐུ་མདོག་སྔོན་མོ། ཞལ་གཅིག་ཕྱག་གཉིས་སྤྱན་གསུམ་མ། སྐྲ་སེར་པོ་གྱེན་དུ་བརྫེས་པ། གཡས་གྲི་གུག །གཡོན་ཐོད་པ་འཛིན་པས་ཡབ་ལ་འཁྱུད་པ། མི་མགོ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་དོ་ཤལ་ཅན། རུས་པའི་རྒྱན་ལྔ་དང་ལྡན་པ། ཞབས་གཡོན་བརྐྱང་ཤིང་གཡས་བསྐུམ་པས་ཡབ་ལ་འཁྱུད་པ། གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། དེའི་མིག་ཏུ་གཏི་མུག་རྡོ་རྗེ་མ། རྣ་བར་ཞེ་སྡང་རྡོ་རྗེ་མ། སྣ་ལ་སེར་སྣ་རྡོ་རྗེ་མ། །ཁ་ལ་འདོད་ཆགས་རྡོ་རྗེ་མ། །ལུས་ལ་ཕྲག་དོག་རྡོ་རྗེ་མ། །ཡིད་ལ་བདག་མེད་རྣལ་འབྱོར་མ། །སྤྱི་བོར་སྐུ་རྡོ་རྗེ་མ། མགྲིན་པར་གསུང་རྡོ་རྗེ་མ། ཐུགས་ཀར་ཐུགས་རྡོ་རྗེ་མ། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དཔལ་ཀྱེ་རྡོ་རྗེ་ཡབ་ཡུམ་གྱི་རྣམ་པར་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿ རང་ལ་གཉིས་སུ་མེད་པར་ཐིམ། སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཨོཾ་ཨ་བྷི་ཥིཉྩ་མཱཾ་སརྦ་ཏ་ཐཱ་ག་ཏ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཨོཾ་བཛྲཱི་བྷ་བ་ཨ་བྷི་ཥིཉྩ་ཧཱུྃ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུ་ལྷག་མ་ཡར་ལུད་པ་ལས་ཡབ་ཡུམ་གཉིས་ཀ་ལ་མི་བསྐྱོད་པས་དབུར་བརྒྱན། ཞེས་བརྗོད་ཅིང་བསམས་ལ་ལྷའི་ང་རྒྱལ་དང་གསལ་སྣང་ལ་སེམས་བཟུང་། དེ་ནས་བཟླས་པ་བྱ་བར་འདོད་པས། ཡུམ་གྱི་ཐུགས་ཀའི་ཨོཾ་ལས་སྔགས་ཀྱི་ཕྲེང་བ་བྱུང་། ཞལ་ནས་འཐོན་ཡབ་ཀྱི་ཞལ་དུ་ཞུགས་སྐུའི་དབྱིབས་བརྒྱུད་རྡོ་རྗེའི་ལམ་ནས་བྱུང་སྟེ་ཡུམ་གྱི་པདྨར་ཞུགས། སྐུའི་དབྱིབས་བརྒྱུད་དེ་ཡུམ་གྱི་ཞལ་ནས་ཡབ་ཀྱི་ཞལ་དུ་ཞུགས་ཏེ་རྒྱུན་མི་འཆད་པར་འཁོར་བས་བདེ་བ་ཆེན་པོའི་ཡེ་ཤེས་བརྟན་པར་བསམས་ལ། ཨོཾ་ཨཥྟ་ན་ནཱ་ཡ། པིངྒ་ལོདྡྷ་ཀེ་ཤ་ཝརྟྨ་ནེ། ཙ་ཏུ་རྦིངྴ་ཏི་ནེ་ཏྲཱ་ཡ། ཥོ་ཌ་ཤ་བྷུ་ཛ་ཡ། ཀྲྀཥྞ་ཛི་མཱུ་ཏ་ཝ་པུ་ཥེ། ཀ་པཱ་ལ་མཱ་ལཱ་ནེ་ཀཱ་དྷཱ་རི་ཎེ། ཨདྷྨ་ཏ་ཀྲཱུ་ར་ཙིཏྟཱ་ཡ། ཨརྡྷེནྟུ་དཾ་ཥྟཱི་ཎེ། མཱ་ར་ཡ་མཱ་ར་ཡ། ཀཱ་ར་ཡ་ཀཱ་ར་ཡ། གརྫྫ་ཡ་གརྫྫ་ཡ། ཏརྫྫ་ཡ་ཏརྫྫ་ཡ། ཤོ་ཥ་ཡ་ཤོ་ཥ་ཡ། སཔྟ་སཱ་ག་རཱ་ན། བནྡ་བནྡ། ནཱ་གཱ་ཥྟ་ཀཱན། གྲྀ་ཧྞ་གྲྀ་ཧྞ། ཤ་ཏྲུན། ཧ་ཧཱ་ཧི་ཧཱི་ཧུ་ཧཱུ་ཧེ་ཧེ་ཧོ་ཧོ་ཧཾ་ཧཿཕཊ་སྭཱ་ཧཱ། ཞེས་ཉི་ཤུ་རྩ་གཅིག་སོགས་ཅི་ནུས་དང་། སྤྲོ་ན། ཨོཾ་དེ་ཝ་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་དང་། ཨོཾ་ཨཱཿཨྃ་ཧཱུྃ་ཕཊ་སྭཱ་ཧཱ། ཞེས་པའང་ཅུང་ཟད་བཟླས་མཐར་ཐལ་མོ་སྦྱར་ཏེ། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱིས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། མྱུར་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་སྙིང་པོ་ཀྱེ་རྡོ་རྗེའི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། ཞེས་གསོལ་བ་གདབ། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཁམས་གསུམ་སྣོད་བཅུད་ཐམས་ཅད་འོད་དུ་ཞུ་ནས་རང་ལ་ཐིམ། ཡུམ་ཡབ་ལ་ཐིམ། ཡབ་ཀྱི་ཞལ་ཕྱག་ལྷག་མ་རྣམས་རྩ་བའི་ཞལ་ཕྱག་ལ་ཐིམ། རང་ཧེ་རུ་ཀ་ཞལ་གཅིག་ཕྱག་གཉིས་པའི་སྐུར་གྱུར་པའི་མིག་ཏུ་གཏི་མུག་རྡོ་རྗེ་མ་སོགས་ནས། ཐུགས་རྡོ་རྗེ་མ། ཨོཾ་སརྦ་ཏཱ་ཐཱ་ག་ཏ་ཀཱ་ཡ་ཝཱ་ཀྐ་ཙིཏྟ་བཛྲ་སྭ་བྷཱ་བ་ཨཏྨ་ཀོ྅་ཧཾ། དགེ་བ་འདི་ཡིས་མྱུར་དུ་བདག །དགེས་པ་རྡོ་རྗེ་འགྲུབ་གྱུར་ནས་སོགས། །རིགས་སུ་སྐྱེ་དང་དམ་ཚིག་ཅན། །སྨྱོ་མེད་ཀྱེ་ཡི་རྡོ་རྗེ་སྟོན། །བླ་མ་ལ་གུས་སྙིང་རྗེར་ལྡན། །སྐྱེ་ཞིང་སྐྱེ་བར་འགྱུར་བ་ཤོག །ལག་པས་རྡོ་རྗེ་དྲིལ་བུ་འཁྲོལ། །ཟབ་མོའི་ཆོས་ནི་ཀློག་པ་དང་། །བཙུན་མོའི་ཁུ་བ་མཉམ་ཟས་ཅན། །སྐྱེ་ཞིང་སྐྱེ་བར་འགྱུར་བ་ཤོག །སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སྐྱོན་མེད་པར། །གང་གི་ལམ་གྱིས་གྲོལ་འགྱུར་པ། །དེ་ཡིས་སངས་རྒྱས་མྱུར་ཐོབ་ཤོག །ཅེས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག་པའི་ཚེ་རང་དང་སྣང་བ་ཐམས་ཅད་ལྷའི་འཁོར་ལོར་ཤེས་པས། ཟས་ཡེ་ཤེས་ཀྱི་བདུད་རྩིས་སྙིང་གའི་ཧཱུྃ་ལྷ་ཐམས་ཅད་ཀྱི་ངོ་བོར་མཆོད་པའི་བསམ་པས་ལོངས་སྤྱོད། ནུབ་མོ་ལྷར་སྣང་འོད་གསལ་གྱི་དབྱིངས་སུ་སྦྱངས་ཏེ་ཉལ། ཐོ་རངས་ལྷའི་ང་རྒྱལ་གྱིས་ལྡངས་ཏེ་ལམ་ཟབ་མོའི་རྣལ་འབྱོར་ལ་འཇུག་པར་བྱའོ། །ཞེས་པའང་ཉེར་མཁོའི་ཡན་ལག་ཏུ་ལུགས་འདི་ལ་ཚད་མར་གྱུར་པའི་གཞུང་ལས་བཏུས་ཏེ་བྱ་བྲལ་བ་མཉྫུ་གྷོ་ཥས་བྲིས་པའི་དགེ་བས་འགྲོ་ཀུན་དཔལ་ཧེ་རུ་ཀ་དགེས་པ་རྡོ་རྗེའི་གོ་འཕང་ཚེ་འདི་ཉིད་ལ་མངོན་དུ་བྱེད་པའི་རྒྱུར་གྱུར་ཅིག། །། ༈

[edit]

kye rdor gtso rkyang gi mngon rtogs/__ @#/__/dpal kye rdo rje gtso rkyang gi mngon rtogs ngag 'don snying po gsal ba zhes bya ba bzhugs so//__// na mo gu ru shrI he badz+rA ya/__bsdus pa'i tshul gyis dpal kyai rdo rje gtso rkyang gi mngon rtogs bsgom par 'dod pas/__bde ba'i stan la bsam gtan gyi spyod lam dang ldan pas 'dug ste/__skyabs yul gsal btab la/__bdag dang 'gro ba nam mkha' dang mnyam pa'i sems can thams cad dus 'di nas bzung ste ji srid byang chub snying po la mchis kyi bar du phyogs bcu dus gsum gyi de bzhin gshegs pa thams cad kyi sku gsung thugs yon tan phrin las thams cad kyi ngo bo/__chos kyi phung po stong phrag brgyad cu rtsa bzhi'i 'byung gnas/__'phags pa'i dge 'dun thams cad kyi mnga' bdag__/rje btsun rtsa ba dang brgyud par bcas pa'i dpal ldan bla ma dam pa rnams la skyabs su mchi'o/__/rdzogs pa'i sangs rgyas bcom ldan 'das rnams la skyabs su mchi'o/__/dam pa'i chos rnams la skyabs su mchi'o/__/'phags pa'i dge 'dun rnams la skyabs su mchi'o/__/zhes ci nus kyis mthar thal mo sbyar te/__bla ma dang dkon mchog rin po che rnam pa gsum la bdag phyag 'tshal zhing skyabs su mchi'o/__/khyed rnams kyis bdag gi rgyud byin gyis brlab tu gsol/__skyabs yul rnams 'od du zhu nas rang la thim par bsam/__sems can thams cad kyi don du rdzogs pa'i sangs rgyas kyi go 'phang thob par bya/__de'i ched du bdag gis lam zab mo nyams su blang bar bgyi'o/__/zhes lan gsum/__sems can thams cad bde ba sogs tshad med bzhi bsgom/__oM shUn+ya tA dz+nyA na badz+ra swa b+hA wa At+ma ko\u0f85 haM/__stong pa'i ngang las pad+ma dang nyi ma bdud bzhi brtsegs pa'i gdan gyi steng du hU~M las thod pa dum bu gsum pa dpral bar sna tshogs rdo rje'i lte ba la hU~M gis mtshan pa/__de'i g.yon tu oM las gri gug sngo nag yu ba la a~M gis mtshan pa/__de yongs su gyur pa las rang nyid skad cig gis dpal kye rdo rje sku mdog sngon po zhal brgyad/__phyag bcu drug pa/__zhabs bzhi pa/__rtsa ba'i zhal sngon po/__g.yas dkar/__g.yon dmar/__steng zhal dud ka__/zhal lhag ma gnyis gnyis gnag pa/__zhal re re la spyan gsum gsum dang ldan zhing mche ba bzhi bzhi btsigs pa/__dbu skra ser po gyen tu brdzes pa/__spyi bor sna tshogs rdo rjes mtshan pa/__phyag bcu drug gis thod pa bcu drug bzung ba'i g.yas kyi dang po na glang po che dkar po/__/g.yon gyi dang po na sa'i lha ser po/__/de gnyis kyis yum la 'khyud pa/__g.yas kyi gnyis pa na rta sngon po/__gsum pa na bong bu gwa pa/__bzhi pa na glang ser po/__lnga pa na rnga mo thal kha/__drug pa na mi dmar po/__bdun pa na sha ra b+ha sngon po/__brgyad pa na byi bla gwa pa/__g.yon gyi gnyis pa na chu'i lha dkar po/__gsum pa na me'i lha dmar po/__bzhi pa na rlung gi lha ljang gu/__lnga pa na zla ba'i lha dkar po/__drug pa na nyi ma'i lha dmar po/__bdun pa na gshin rje sngon po/__brgyad pa na nor 'dzin ser po/__dbu re re la mi mgo skam po lnga lngas brgyan cing /__rlon pa lnga bcu'i do shal can/__rus pa'i rgyan drug dang ldan pa/__zhabs g.yas gnyis brkyangs pa'i brla la g.yon gnyis bskum pa'i sor mo rnams gtad pa'i skyil krung phyed pa'i gar stabs kyis bzhugs pa/__sgeg cing dpa' ba mi sdug pa/__rgod cing drag shul 'jigs su rung /__/snying rje rngam dang zhi ba yi/__/gar dgu'i ro dang ldan pa nyid/__/de'i pang na yum rdo rje bdag med ma sku mdog sngon mo/__zhal gcig phyag gnyis spyan gsum ma/__skra ser po gyen du brdzes pa/__g.yas gri gug__/g.yon thod pa 'dzin pas yab la 'khyud pa/__mi mgo skam po lnga'i dbu rgyan dang /__skam po lnga bcu'i do shal can/__rus pa'i rgyan lnga dang ldan pa/__zhabs g.yon brkyang shing g.yas bskum pas yab la 'khyud pa/__gnyis ka'ang ye shes kyi me 'bar ba'i dbus na bzhugs pa/__de'i mig tu gti mug rdo rje ma/__rna bar zhe sdang rdo rje ma/__sna la ser sna rdo rje ma/__/kha la 'dod chags rdo rje ma/__/lus la phrag dog rdo rje ma/__/yid la bdag med rnal 'byor ma/__/spyi bor sku rdo rje ma/__mgrin par gsung rdo rje ma/__thugs kar thugs rdo rje ma/__rang gi thugs ka'i hU~M las 'od zer 'phros pas phyogs bcu'i sangs rgyas dang byang chub sems dpa' thams cad dpal kye rdo rje yab yum gyi rnam par oM badz+ra sa mA dzaH__dzaHhU~M ba~M hoH__rang la gnyis su med par thim/__slar yang thugs ka'i hU~M las 'od zer 'phros pas dbang gi lha rigs lnga 'khor dang bcas pa oM badz+ra sa mA dzaH__oM a b+hi Shiny+tsa mAM sarba ta thA ga ta/__zhes gsol ba btab pas/__dbang gi lha rnams kyis/__oM badz+rI b+ha ba a b+hi Shiny+tsa hU~M/__zhes gsungs shing bum pa'i chus spyi bo nas dbang bskur/__sku gang /__dri ma dag__/chu lhag ma yar lud pa las yab yum gnyis ka la mi bskyod pas dbur brgyan/__zhes brjod cing bsams la lha'i nga rgyal dang gsal snang la sems bzung /__de nas bzlas pa bya bar 'dod pas/__yum gyi thugs ka'i oM las sngags kyi phreng ba byung /__zhal nas 'thon yab kyi zhal du zhugs sku'i dbyibs brgyud rdo rje'i lam nas byung ste yum gyi pad+mar zhugs/__sku'i dbyibs brgyud de yum gyi zhal nas yab kyi zhal du zhugs te rgyun mi 'chad par 'khor bas bde ba chen po'i ye shes brtan par bsams la/__oM aSh+ta na nA ya/__ping+ga lod+d+ha ke sha war+t+ma ne/__tsa tu rbing+sha ti ne trA ya/__Sho Da sha b+hu dza ya/__kr-iSh+Na dzi mU ta wa pu She/__ka pA la mA lA ne kA d+hA ri Ne/__ad+h+ma ta krU ra tsit+tA ya/__ar+d+hen+tu daM Sh+tI Ne/__mA ra ya mA ra ya/__kA ra ya kA ra ya/__gar+dz+dza ya gar+dz+dza ya/__tar+dz+dza ya tar+dz+dza ya/__sho Sha ya sho Sha ya/__sap+ta sA ga rA na/__ban+da ban+da/__nA gA Sh+ta kAn/__gr-i h+Na gr-i h+Na/__sha trun/__ha hA hi hI hu hU he he ho ho haM haHphaT swA hA/__zhes nyi shu rtsa gcig sogs ci nus dang /__spro na/__oM de wa pi tsu badz+ra hU~M hU~M hU~M phaT swA hA/__zhes dang /__oM AHa~M hU~M phaT swA hA/__zhes pa'ang cung zad bzlas mthar thal mo sbyar te/__bde bar gshegs pa thams cad kyi sku gsung thugs yon tan phrin las thams cad kyis bdag dang sems can thams cad la byin gyis brlab tu gsol/__myur du phyag rgya chen po mchog gi dngos grub snying po kye rdo rje'i go 'phang thob par byin gyis brlab tu gsol/__zhes gsol ba gdab/__rang gi thugs ka'i hU~M las 'od zer 'phros pas khams gsum snod bcud thams cad 'od du zhu nas rang la thim/__yum yab la thim/__yab kyi zhal phyag lhag ma rnams rtsa ba'i zhal phyag la thim/__rang he ru ka zhal gcig phyag gnyis pa'i skur gyur pa'i mig tu gti mug rdo rje ma sogs nas/__thugs rdo rje ma/__oM sarba tA thA ga ta kA ya wA k+ka tsit+ta badz+ra swa b+hA ba at+ma ko\u0f85 haM/__dge ba 'di yis myur du bdag__/dges pa rdo rje 'grub gyur nas sogs/__/rigs su skye dang dam tshig can/__/smyo med kye yi rdo rje ston/__/bla ma la gus snying rjer ldan/__/skye zhing skye bar 'gyur ba shog__/lag pas rdo rje dril bu 'khrol/__/zab mo'i chos ni klog pa dang /__/btsun mo'i khu ba mnyam zas can/__/skye zhing skye bar 'gyur ba shog__/sems can thams cad bde gyur cig__/sems can thams cad skyon med par/__/gang gi lam gyis grol 'gyur pa/__/de yis sangs rgyas myur thob shog_/ces bsngo smon gyis mtshams sbyar te spyod lam la 'jug pa'i tshe rang dang snang ba thams cad lha'i 'khor lor shes pas/__zas ye shes kyi bdud rtsis snying ga'i hU~M lha thams cad kyi ngo bor mchod pa'i bsam pas longs spyod/__nub mo lhar snang 'od gsal gyi dbyings su sbyangs te nyal/__tho rangs lha'i nga rgyal gyis ldangs te lam zab mo'i rnal 'byor la 'jug par bya'o/__/zhes pa'ang nyer mkho'i yan lag tu lugs 'di la tshad mar gyur pa'i gzhung las btus te bya bral ba many+dzu g+ho Shas bris pa'i dge bas 'gro kun dpal he ru ka dges pa rdo rje'i go 'phang tshe 'di nyid la mngon du byed pa'i rgyur gyur cig/____//_!_