གསང་སྔགས་སྔ་འགྱུར་བའི་ལུགས་ཀྱི་དབང་བསྐུར་གྱི་ཆོ་གའི་ཟིན་ཐུན།

🚧 This website is under continued development. We appreciate your patience!

Previous Text Back to Volume PageNext Text

Wylie title	gsang sngags snga 'gyur ba'i lugs kyi dbang bskur gyi cho ga'i zin thun
Location	mkhyen brtse'i bka' 'bum Volume 6, sde tshan 1, Text 5, Pages 73-83 (Folios 37a5 to 42a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. gsang sngags snga 'gyur ba'i lugs kyi dbang bskur gyi cho ga'i zin thun. In 'jam dbyangs mkhyen brtse'i dbang po'i bka' 'bum, Vol. 6: 73-83. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris  ·  Overviews - spyi don  ·  Empowerment Ritual - dbang chog - dbang skur
Colophon	།ཞེས་པ་རྣམས་ཀྱང་དབང་གི་སྤྱི་དོན་དང་འབྲེལ་བའི་ཟིན་ཐུན་རགས་པ་ཙམ་མོ། །སརྦ་མངྒ་ལཾ།།
	zhes pa rnams kyang dbang gi spyi don dang 'brel ba'i zin thun rags pa tsam mo/__/sarba mang+ga laM/

1 Texts in this Section (sde tshan or chos tshan)

5 73-83	གསང་སྔགས་སྔ་འགྱུར་བའི་ལུགས་ཀྱི་དབང་བསྐུར་གྱི་ཆོ་གའི་ཟིན་ཐུན། gsang sngags snga 'gyur ba'i lugs kyi dbang bskur gyi cho ga'i zin thun Notes - zin bris   ·   Overviews - spyi don   ·   Empowerment Ritual - dbang chog - dbang skur	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ན་མོ་བཛྲ་སཏྭཱ་ཤྩ་གུ་རུ་བྷྱཿ སྟ་གོན་གྱི་སྐབས་སུ། སློབ་དཔོན་དྲིལ་བུ་པས། དབང་བསྐུར་དཀྱིལ་འཁོར་སྔོན་འགྲོ་བར། །རྡོ་རྗེ་འཆང་གིས་གསུངས་པ་སྟེ། །ཞེས་པ་ལྟར་དབང་བསྐུར་བ་དེའང་དཀྱིལ་འཁོར་སྔོན་དུ་འགྲོ་བ་ཅན་ཡིན་ལ། དེ་ཡང་ངོ་བོ་ནི། བཀོད་པ་ལྷའི་འཁོར་ལོ་རྫོགས་པར་སྣང་བའོ། །ངེས་ཚིག་ནི། མཎྜལ་ཞེས་པའི་སྒྲ་ལས་དྲངས་ན་སྙིང་པོའི་ཡོན་ཏན་གྱི་གཞི་ལེན་ཅིང་འཛིན་པར་བྱེད་པས་དཀྱིལ་འཁོར་རོ། །དབྱེ་ན། ཆོས་དོན་ལ། དབྱེ་བ་རང་བཞིན་ཏིང་འཛིན་དང་། །གཟུགས་བརྙན་དཀྱིལ་འཁོར་རྣམ་པ་གསུམ། །ཞེས་པ་རང་བཞིན་ཡེ་ཤེས་ཀྱི་དཀྱིལ་འཁོར། རིག་པ་ཉམས་ཀྱི་དཀྱིལ་འཁོར། ཀུན་རྫོབ་གཟུགས་བརྙན་གྱི་དཀྱིལ་འཁོར་གསུམ་ལས། སྔ་མ་གཉིས་ནི་སློབ་དཔོན་འཕགས་ས་ཐོབ་པ་རྣམས་ཀྱི་སྤྱོད་ཡུལ་ཡིན་ལ། ཏིང་ངེ་འཛིན་རྗེས་མཐུན་ཐོབ་པས་ནི། དྲིལ་བུ་པས། རི་མོར་བྱ་བའི་ལས་དང་ནི། །ཐིག་དང་ཚོན་དགྱེའི་རིམ་པ་བསྟན། །འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་སྐལ་དམན་འཇུག་པ་ལ་རྡུལ་ཚོན། འབྲིང་ལ་རས་བྲིས། རབ་ལ་ཚོམ་བུ། ཡང་རབ་བླ་མའི་ལུས་ཀྱི་དཀྱིལ་འཁོར་ལ་བརྟེན་པའི་ཚུལ་དང་བཞི་ལས། འདིར་བླ་མ་རྣམས་ཀྱི་ཕྱག་བཞེས་ལྟར་ཕྱི་དཀྱིལ་གསུམ་གང་རུང་ལ་འཇུག་པའི་སྒོ་ནི། ཧེ་རུ་ཀ་འདུས་པར། དང་པོར་ས་ཡི་ཆོ་ག་སྟེ། །སོགས་གསུངས་པའི་ནུབ་དང་པོ་ས་ཆོག་དང་། གཉིས་པ་ལྷ་དང་བུམ་པ་སྟ་གོན་སྔོན་དུ་སོང་ནས། ད་ལམ་སློབ་མ་སྟ་གོན་གྱི་སོགས་སྦྲེལ་ལོ། །དངོས་གཞིའི་སྐབས། སྤྱིར་གསང་སྔགས་སྔ་འགྱུར་རྡོ་རྗེ་ཐེག་པ་ལ་བཀའ་བབས་ཆུ་བོ་བཞི་ཞེས་གྲགས་ཤིང་། དེ་ཡང་བསྡུ་ན། གཞི་རྒྱུད་སྦྱང་གཞི་བདེ་གཤེགས་སྙིང་པོའི་ཁམས་ཉིད། ལམ་རྒྱུད། འཇུག་པའི་སྒོ་ནི་སྨིན་པར་བྱེད་པའི་དབང་། །གྲོལ་བར་བྱེད་པའི་བསྐྱེད་རྫོགས་རྣམ་པ་གཉིས། མཐུན་པའི་གྲོགས་སུ་དམ་ཚིག་སྤྱོད་པ་གསུམ། །སྔགས་ཀྱི་ལམ་མཆོག་རྣལ་མར་ངེས་པ་ལས། །ཞེས་པ་ལྟར་འཇུག་སྒོ་སྨིན་བྱེད་དབང་བཞི་དང་། དེ་དང་རྗེས་སུ་མཐུན་པའི་ལམ་ལ། བུམ་དབང་གི་དེ་ཁོ་ན་ཉིད་བསྐྱེད་རིམ་དང་། མཆོག་དབང་གསུམ་གྱི་ཉམས་ལེན་རྫོགས་རིམ། དེ་གཉིས་ཀའི་མཐུན་པའི་གྲོགས་སུ་དམ་ཚིག་དང་སྡོམ་པའི་ཀུན་སྤྱོད། དེ་དག་གི་བླང་དོར་འཇུག་ལྡོག་གི་གནས་སྒྲ་ཇི་བཞིན་པར་ཤེས་པར་བྱ་བའི་ཕྱིར་རྒྱུད་ཀྱི་བཤད་པ་སྟེ། དེ་ལྟ་བུའི་ལམ་གྱི་རྒྱུན་གོམས་པས་མཐར་འབྲས་རྒྱུད་ཤིན་ཏུ་དག་པ་གཉིས་ལྡན་སྐུ་བཞི་དབྱེར་མི་ཕྱེད་པའི་གོ་འཕང་ལ་སྦྱོར་ཚུལ་རྒྱས་པར་འཆད་དོ། ། ༈

དམ་ཚིག་རྣམ་དབྱེ་རྒྱས་པར་འཆད་ན། དེ་ལྟར་དབང་བཞི་མཐའ་བརྟེན་བཅས་པ་ལེགས་པར་གྲུབ་པ་དེ་དག་གི་གནས་སྐབས་སུ་ཐོབ་ཅིང་ཁས་བླངས་པའི་དམ་ཚིག་དང་སྡོམ་པའི་ཚོགས་ལ་སྙིང་ནས་གཅེས་སྤྲས་སུ་བྱ་བ་ནི་དངོས་གྲུབ་དང་ཡོན་ཏན་ཐམས་ཅད་ཀྱི་སྲོག་ཤིང་ལྟ་བུ་སྟེ། སྤྱི་མདོ་ལས། དམ་ཚིག་འདི་ལ་གནས་པ་ན། །བླ་མེད་བྱང་ཆུབ་རྣམ་སྨིན་པས། །དགེ་བའི་སྲོག་འཛིན་དམ་པའོ། །ཞེས་གསུངས་པའི་ཕྱིར་རོ། །དེས་ན་དེ་དག་གི་བླང་དོར་གྱི་འཇུག་ལྡོག་ཤེས་པར་བྱ་བའི་སླད་དུ་གྲངས་དང་རིམ་པའི་རྣམ་དབྱེ་ཅུང་ཟད་སྙན་དུ་གསོལ་ན་གསུམ་སྟེ། ངོ་བོ། ངེས་ཚིག །དབྱེ་བའོ། །དང་པོ་ནི། བསྲུང་བྱའི་དོན་སྔགས་ཀྱི་བརྟུལ་ཞུགས་བཟང་པོ་ལས་མི་འདའ་བར་བསྡམས་པའི་ལྷག་བསམ་ཁྱད་པར་ཅན་ས་བོན་དང་བཅས་པའོ། །གཉིས་པ་ནི། ས་མ་ཡའི་སྒྲ་ལས་དྲངས་ན་དངོས་སུ་ཡལ་གམ་བཅས་པའི་ཐ་ཚིག་ལ་འཇུག་པས་ཇི་ལྟར་བཅས་པ་ལས་འདའ་བར་བྱ་བ་མ་ཡིན་པའམ། བསྲུངས་མ་བསྲུངས་ཀྱི་ཁེ་ཉེན་གྱིས་དམ་ཚིག་ཏུ་བཞག་པའང་ཡོད་དེ། རྡོ་རྗེ་ལས། དམ་ཚིག་འདི་ལས་གང་འདའ་བ། །རྡོ་རྗེ་ཅན་ཡང་འཚིག་པར་འགྱུར། །ཞེས་སོ། །གསུམ་པ་ལ་གཉིས་ཏེ། གསང་སྔགས་གསར་རྙིང་ཐུན་མོང་དུ་གྲགས་པའི་རྩ་བ་དང་ཡན་ལག་གི་ལྟུང་བ་དང་། སྔ་འགྱུར་རྡོ་རྗེ་ཐེག་པའི་རིང་ལུགས་ནང་རྒྱུད་སྡེ་གསུམ་ཁོ་ན་ལ་གྲགས་པའི་ཐུན་མོང་མ་ཡིན་པའོ། །དང་པོ་ལའང་། རིགས་ལྔའི་སྡོམ་པ་དང་། རྩ་བ་དང་ཡན་ལག་གི་ལྟུང་བའོ། །དང་པོ་ལ་ཐུན་མོང་ལྟར་ན། སངས་རྒྱས་རྣལ་འབྱོར་སྨོན་འཇུག་ཚུལ་ཁྲིམས་གསུམ། །མི་བསྐྱོད་རྡོར་དྲིལ་ཕྱག་རྒྱ་བླ་མ་བཟུང་། །རིན་འབྱུང་ཆོས་ནོར་མི་འཇིགས་བྱམས་པ་སྦྱིན། །སྣང་མཐའ་ཐེག་པ་གསུམ་འཛིན་ཆོས་རྣམས་བཤད། །དོན་གྲུབ་མཆོད་བསྟོད་ཕྲིན་ལས་ཀུན་ལ་གུས། །ཞེས་དང་། ཁྱད་པར་བླ་མེད་རིགས་ལྔའི་སྡོམ་པ་ནི། །རྡོ་རྗེའི་རིགས་གྱུར་སྲོག་ལ་འཚེ་བ་དང་། །ཞིང་བཅུ་ལས་གཞན་རླུང་རྟོག་དབུ་མར་གསོད། །རིན་ཆེན་རིགས་ལ་མ་བྱིན་བླང་བྱ་ནི། །མཚན་ལྡན་གཟུངས་དང་སྐལ་མེད་སྐྱེ་བོའི་ནོར། །རྫོགས་པའི་བྱང་ཆུབ་རང་སྟོབས་མཐུ་ཡིས་བླང་། །པདྨའི་རིགས་ལ་རི་དྭགས་མིག་ཅན་མཆོད། །སྟོང་པ་ཉིད་ཀྱི་བུད་མེད་ཀུན་ཏུ་སྤྱོད། །ལས་ཆོས་དམ་ཚིག་ཕྱག་རྒྱ་ཆེན་པོ་བསྟེན། །འདོད་པའི་ཡོན་ཏན་སྒྱུ་མ་ལྟ་བུར་སྤྱོད། །ཅེས་སོ། །གཉིས་པ་ནི། སློབ་དཔོན་སྨོད་པར་མི་བྱ་ཞིང་། །བདེ་གཤེགས་བཀའ་ལས་འདས་མི་བྱ། །རྡོ་རྗེ་སྤུན་ལ་སྨད་མི་བྱ། །སེམས་ཅན་རྣམས་ལ་བྱམས་པ་དང་། །བྱང་ཆུབ་སེམས་ནི་དོར་མི་བྱ། །སྐལ་མེད་དེ་ཉིད་བསྟན་མི་བྱ། །བདག་གི་ཕུང་པོ་སྨད་མི་བྱ། །ཆོས་ཉིད་ལ་ནི་སུན་མི་དབྱུང་། །གདུགས་ལ་བྱམས་པ་རྟག་ཏུ་སྤང་། །ཆོས་ཀྱི་ཚད་བཟུང་མི་བྱའོ། །དད་ལྡན་སེམས་ཅན་བསླུ་མི་བྱ། །རྟག་ཏུ་དམ་ཚིག་བསྟེན་པར་བྱ། །བུད་མེད་ཉིད་ལའང་སྨད་མི་བྱ། །ཞེས་སོ། །གསུམ་པ་ནི། དབང་དང་དམ་ཚིག་སྡོམ་པས་མ་སྦྱངས་པས། །ཐ་མལ་བུད་མེད་རིག་མར་བསྟེན་པ་དང་། །མཚན་ཉིད་འགལ་བའི་དྲན་པའི་ཁྲོན་པ་ནས། །ཆོ་ག་མ་ཡིན་བཞིན་པས་བདུད་རྩི་ལེན། །དབང་མ་ཐོབ་དང་ལྷག་པར་འདི་མེད་ལ། །སྐུ་གཟུགས་གླེགས་བམ་ཕྱག་མཚན་ཕྱག་རྒྱ་སྟོན། །ཚོགས་ཀྱི་འཁོར་ལོའི་དུས་ན་འཐབ་རྩོད་དང་། །བབ་ཅོལ་ཀྱལ་ཀས་བརྟུལ་ཞུགས་ཐ་མལ་སྦྱར། །སྣོད་ལྡན་དམ་ཆོས་འདྲི་ལ་ཤེས་བཞིན་དུ། །དེ་ལས་འགལ་བའི་བསྙོན་དོར་ལན་དུ་ལྡོག །སྔགས་ཀྱི་ལྟ་སྤྱོད་བཀུར་ཞིང་ཉམས་སད་པའི། །ཉན་ཐོས་ནང་དུ་ཞག་བདུན་ལོངས་པར་བསྡད། །སྔགས་རྒྱུད་དེ་ཉིད་ཆོ་ག་མི་ཤེས་བཞིན། །རྡོ་རྗེ་འཛིན་པ་ང་རྒྱལ་རྫུན་དང་འགྲོགས། །དབང་བསྐུར་ཐོབ་ཀྱང་སྔགས་ལ་མ་དད་པའི། །ཐེ་ཚོམ་ཅན་ལ་སླར་ཡང་གསང་བ་འཆད། །ཅེས་སོ། །གཉིས་པ་ལའང་གསུམ་སྟེ། རྒྱུད་ལུང་གཉིས་པོ་ཆེ་ལས་བསྟན་པའི་རྩ་བ་དང་། ཡན་ལག་གི་དམ་ཚིག་དང་། མན་ངག་རྫོགས་པ་ཆེན་པོའི་རིང་ལུགས་རང་བཞིན་ལྟ་བའི་དམ་ཚིག་བཞིའོ། །དང་པོ་ནི། དམ་ཚིག་རྣམ་པར་བཀོད་པའི་གྲུབ་མཐའ་ནི། །རྩ་བ་བླ་མའི་སྐུ་གསུང་ཐུགས་གསུམ་ལ། །ཕྱི་ནང་གསང་བའི་དམ་ཚིག་གསུམ་ཚན་གསུམ། །སྲོག་གཅོད་མི་ཚངས་སྤྱོད་དང་རྐུ་སྤོང་བ། །ཕ་མ་སྤུན་སྲིང་རང་ལུས་ཆོས་གང་སྨོད། །བླ་མའི་གྲིབ་འགོམ་ཡུམ་གཙེས་སྤུན་སྲིང་བརྡེག །གསུང་གི་གསུམ་ལ་རྫུན་སྨྲ་ཚིག་རྩུབ་སྤངས། །ཆོས་སྒྲས་དོན་སེམས་གནས་ལུགས་སྒོམ་མི་བཀུར། །བླ་མའི་ཡུམ་དང་སྤུན་སྲིང་ཚིག་མི་བརྙས། །ཐུགས་ཀྱི་གསུམ་ལ་ཡིད་ཀྱི་རྣམ་གསུམ་དང་། །སྤྱོད་དང་སྒོམ་དང་ལྟ་བ་ལོག་པ་སྤང་། །༡བླ་མ་ལྷ་༢མཆེད་ལྷ་སྒོམ་ཐུན་ཀུན་སེམས། །ཞེས་ཏེ། དེ་ཡང་རྩ་བ་རྡོ་རྗེ་གསུམ་གྱི་དམ་ཚིག་ལ་བླ་མ་ཞེས་སྨོས་པ་ནི། རང་གི་སྒོ་གསུམ་སངས་རྒྱས་ཀུན་འདུས་བླ་མའི་རྡོ་རྗེ་གསུམ་དང་དབྱེར་མི་ཕྱེད་པར་བསྡམས་པས་སམ། ཡང་ན་གུ་རུའི་སྒྲ་ལས་དྲངས་ན་ལྕི་བ་སྟེ་ཉམས་ན་སྦྱང་དཀའ་བའི་དོན་ནོ། །གཉིས་པ་ནི། ཐབས་ཀྱི་དབང་གྱུར་ཡན་ལག་ཉི་ཤུ་ལྔ། །ཏན་གན་མ་བྱིན་ལེན་རྫུན་ཀྱལ་བའི་ཚིག །སྤྱད་བྱ་ལྔ་ནི་གནང་བཀག་ཤེས་པས་སྤྱོད། །འདོད་ཆགས་ཞེ་སྡང་ལ་སོགས་ཉོན་མོངས་ལྔ། །མི་སྤོང་ལྔ་ནི་རང་རྒྱུད་པ་དང་བྲལ། །དྲི་ཆེན་དྲི་ཆུ་མཱཾ་ས་རཀྟ་ཟིལ། །དང་ལེན་ལྔ་ལ་གཙང་རྨེའི་གཉིས་རྟོག་འདྲལ། །ཕུང་པོ་འབྱུང་ཡུལ་དབང་པོ་ཁ་དོག་ལྔ། །ཤེས་བྱ་ལྔ་ནི་ཤེས་རབ་སྟོབས་ཀྱིས་སྤྱོད། །རྡོ་རྗེ་རིན་ཆེན་པདྨ་ལས་དེ་བཞིན། །བསྒྲུབ་བྱ་ལྔ་ནི་རྟོགས་གོམས་མཐུ་ཡིས་བསྒྲུབ། །ཅེས་སོ། །གཞན་ཡང་སྲུང་མཚམས་མེད་པར་གཅིག་ཅར་བའི་དམ་ཚིག་དང་། བསྲུང་མཚམས་ཅན་རིམ་གྱིས་པའི་དམ་ཚིག་གཉིས། ཕྱི་མ་ལའང་། ཞི་རྒྱུད་ལས། དཀྱིལ་འཁོར་འདིར་ནི་གང་བཞུགས་པ། །བསྲུང་ཞིང་བསྡམ་པར་བྱ་བ་དག །སྤྱི་དང་ཁྱད་པར་ལྷག་པ་ཡིས། །རྣམ་པར་དབྱེ་བས་བཟུང་བྱ་སྟེ། །ཞེས་དང་། བཤགས་ལེར། སྤྱི་དང་ཁྱད་པར་སོགས་པ་ལྟར། དང་པོ་ནི། སོ་བྱང་དང་ཕྱི་རྒྱུད་ཀྱི་སྡོམ་པའི་སྲུང་མཚམས་སུ་གྲགས་པ་རྣམས་དང་། དུས་ཀྱི་འཁོར་ལོའི་བརྟུལ་ཞུགས་ཉེར་ལྔ། རིགས་ལྔའི་སྡོམ་པ་སོགས་སོ། །གཉིས་པ་ནི། ཐུན་མོང་མ་ཡིན་པའི་རྩ་བ་དང་ཡན་ལག་བཤད་མ་ཐག་པའོ། །གསུམ་པ་ནི། ཞི་རྒྱུད་ལས། གཅན་གཟན་རྒྱལ་པོའི་ཁྲི་མི་གཞིག །སོགས་ལྡེམ་དགོངས་ཀྱི་སྒྲས་བསྟན་པ་ཉི་ཤུ་སྟེ་འདི་ནི་སྤྱི་དང་ཁྱད་པར་ལ་གནས་པའི་སྔགས་པས་སྒྲུབ་པ་སོགས་ཀྱི་དུས་སུ་བསྲུང་བར་བྱ་བ་ཡིན་པས་ལྷག་པའི་སྒྲས་བསྟན་ནོ། །གསུམ་པ་ནི། རྡོ་རྗེ་སེམས་དཔལ་ནམ་མཁའ་ཆེ་ལས། མེད་དང་གཅིག་པུ་ཕྱལ་བ་ལྷུན་གྲུབ་སྟེ། །བསྲུང་བར་བྱ་བའི་ཚུལ་ཁྲིམས་ཀུན་དང་བྲལ། །ཞེས་དང་། རང་བཞིན་མེད་པས་མེད་པ་ཞེས་སུ་བཤད། །སེམས་སུ་ཀུན་གཅིག་གཅིག་པུར་བརྟགས་པ་ཡིན། །དངོས་སུ་མི་སྤོང་ཡེ་ཤེས་མི་འགག་པས། །དེ་ལ་ཕྱལ་བ་ཞེས་སུ་གྲགས་པ་སྟེ། །ཇི་ལྟར་སྣང་བའི་ཆོས་རྣམས་ཐམས་ཅད་ཀུན། །ཡིད་ཆེས་བྱང་ཆུབ་སེམས་སུ་རྫོགས་པའི་ཕྱིར། །ལྷུན་གྱིས་རྫོགས་པ་ཞེས་སུ་ང་ཡིས་བསྟན། །ཅེས་སོ། །དེ་ལྟར་ཡང་། དང་པོ་སྡོམ་པ་མ་ཐོབ་པ་ཐོབ་པར་བྱ་བའི་ཕྱིར་དབང་བསྐུར་བླང་། བར་དུ་མི་ཉམས་པར་བསྲུང་བའི་ཕྱིར་བསྲུང་མཚམས་ཤེས་པ་དང་། བསླབ་པ་བཅའ་བ་པོ་དང་བཅས་པའི་བསླབ་པ་བཅས་ལ་གུས་པ་དང་། བག་མེད་པ་དང་བྲལ་བར་དྲན་དང་ཤེས་བཞིན་ལྡན་པ་དང་། རང་རྒྱུད་ཀྱི་ཉོན་མོངས་པ་འབུར་འཇོམས་སུ་བྱས་པས་ལྟུང་བ་འབྱུང་བའི་སྒོ་བཞི་འམ། བརྗེད་ངས་མེད་པ་དང་། དྲན་པ་གསལ་བས་དྲུག་པོ་བཅད་ནས་ཚུལ་བཞིན་དུ་བསླབ་པ་དང་། གལ་ཏེ་ཉམས་ན་དྲུག་ཆའི་ཚོད་ལས་དྲུག་ཆའི་ཐུན་ཚོད་ལས་འདས་པ་འདས་ན་ཉམས་པ་དང་། ཞག་གཅིག་ལས་འདས་ན་འགལ་བ། ཟླ་གཅིག་གིས་ཉམས་པ། ལོ་གཅིག་གིས་འདས་ན་འདས་ལ། གཉིས་འདས་ན་རལ་པ་སྟེ་རིམ་གྱིས་ཉེས་པ་ལྕི་ཞིང་། གསུམ་འདས་ན་གསོར་མི་རུང་བ་ཡིན་ཅིང་། དེའི་ཚེ་ཕྱིར་འཆོས་པའང་། འགལ་ན་ཚོགས་འཁོར་ཉམས་ན་བདོག་དགུས་བཀང་། །འདས་ན་བུ་དང་ཆུང་མ་ནོར་གྱི་དབྱིག །རལ་ན་སྲོག་གིས་གསོ་བའི་རྣམ་གཞག་རྣམས། །རྡོ་རྗེ་ཉི་མ་རྣམ་པར་བཀོད་ལས་གསུངས། །ཞེས་པ་ལྟར་རོ། །གཞན་ཡང་སྙིང་པོ་རྒྱན་ལས་གསུངས་པའི་གསོ་ཐབས་ཉེར་ལྔ་སོགས་དང་། ཁྱད་པར་དོང་སྤྲུགས་བཤགས་པས་མི་འདག་མེད། །ཅེས་སོགས་དྲན་པར་བྱས་ནས་ཕྱིར་བཅོས་ལ་འབད་དོ། །མདོར་ན་རང་གི་ལུས་གཉུག་མའི་རྩ་རླུང་ཐིག་ལེའི་ཡེ་ཤེས་དང་བཅས་པ་གདོད་ནས་སྐུ་གསུང་ཐུགས་ཡེ་ཤེས་རྡོ་རྗེའི་བདག་ཉིད་དུ་བཞུགས་པ་ཉིད་ཤེས་རབ་ཀྱིས་སྒྲོ་འདོགས་ཆོད་དེ་རྟོགས་པར་གྱུར་ན། རྟོགས་འདུལ་གྱི་དམ་ཚིག་བསམ་གྱིས་མི་ཁྱབ་པ་ཐམས་ཅད་ཀྱང་དེར་འདུ་ཤིང་རྣམ་པར་དག་པར་འགྱུར་བ་ཡིན་ཏེ། མདོར་ན་རང་ལུས་སོགས་སོ། །བཞི་པ་ནི། རྒྱུད་ལས། རྩ་བའི་དམ་ཚིག་ཉམས་གྱུར་ན། སྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང་། །ཞེས་སོ། །ལྔ་པ་ནི། སྔ་མར་རྒྱལ་བའི་རིག་པ་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡི། །སྲས་སུ་དགོངས་ནས་བྱིན་གྱིས་རློབས། །ཞེས་སོ། །དེས་ན་སྡོམ་འབྱུང་ལས། ཅི་སྟེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་བཏང་ཡང་སླ། །འཆི་བའི་དུས་ལ་བབས་ཀྱང་སླ། །རྟག་ཏུ་དམ་ཚིག་བསྲུང་བར་བྱ། །ཞེས་གསུངས་པ་རྣམས་ལ་དྲན་པ་ཉེ་བར་བཞག་ནས་ཇི་ལྟར་དམ་བཅས་པའི་རྡོ་རྗེ་ཐེག་པའི་འདུལ་བ་ལ་ཚུལ་བཞིན་དུ་ཅི་ནུས་ཀྱིས་བསླབས་ཤིང་བསྲུང་བར་བྱའོ་སྙམ་པས་མདོར་བསྡུས་ཏེ་ཁས་བླང་བ་འདིའི་རྗེས་ཟློས་མཛོད། རྩ་བ་སྐུ་གསུང་ཐུགས་སོགས་སོ། །ཞེས་པ་རྣམས་ཀྱང་དབང་གི་སྤྱི་དོན་དང་འབྲེལ་བའི་ཟིན་ཐུན་རགས་པ་ཙམ་མོ། །སརྦ་མངྒ་ལཾ།། །། ༈ སྤྱི་མདོ་ལས། སྐུ་དང་གསུང་ཐུགས་རྡོ་རྗེ་ཡི། །བསྲུང་དང་སྤྱད་དང་ཡིད་འོང་དང་། །མི་འདོར་ཤེས་བྱ་བསྒྲུབ་པ་དང་། །ཞེས་དང་། སྒྱུ་དྲྭར། བླ་མེད་མི་སྤོང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །ཞེས་པ་ནི། བླ་མ་བཀུར་བ་དང་། མཆེད་ལ་བྱམས་པ་གཉིས་སྐུ། སྔགས་དང་ཕྱག་རྒྱ་རྒྱུན་མི་ཆད་པ་གསུང་། བླ་ན་མེད་པའི་བྱང་ཆུབ་ཀྱི་སེམས་མི་སྤོང་བ་དང་གསང་བ་མི་སྨྲ་བ་རྣམས་ཐུགས་ཀྱི་དམ་ཚིག་ཏུ་འདུ་ཞིང་། ཡན་ལག་ཀྱང་། གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤོང་ངོ་། །ཞེས་དང་། དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་འདོར་རོ། །ཞེས་པ་རྣམས་ནི་ཡན་ལག་ཏུ་འདུའོ། ། ༈

སློབ་དཔོན་སངས་རྒྱས་གསང་བས། དག་པ་ཁྲུས་ནས་མ་བཏོན་པར། །གསང་སྔགས་དབང་གི་སྒོ་མི་དབྱེ། །བྱུར་དང་མི་ཤིས་མི་བསལ་བར། །གསང་སྔགས་དབང་གི་གྲལ་མ་སྟོན། །སྲུང་བའི་འཁོར་ལོ་མ་བསྒོམས་པར། །གསང་སྔགས་དབང་གི་ཆོས་མི་འཆད། །ཅེས་སོ།། །། ༈

[edit]

gsang sngags snga 'gyur ba'i lugs kyi dbang bskur gyi cho ga'i zin thun/___ na mo badz+ra satwA sh+tsa gu ru b+h+yaH__sta gon gyi skabs su/__slob dpon dril bu pas/__dbang bskur dkyil 'khor sngon 'gro bar/__/rdo rje 'chang gis gsungs pa ste/__/zhes pa ltar dbang bskur ba de'ang dkyil 'khor sngon du 'gro ba can yin la/__de yang ngo bo ni/__bkod pa lha'i 'khor lo rdzogs par snang ba'o/__/nges tshig ni/__maN+Dal zhes pa'i sgra las drangs na snying po'i yon tan gyi gzhi len cing 'dzin par byed pas dkyil 'khor ro/__/dbye na/__chos don la/__dbye ba rang bzhin ting 'dzin dang /__/gzugs brnyan dkyil 'khor rnam pa gsum/__/zhes pa rang bzhin ye shes kyi dkyil 'khor/__rig pa nyams kyi dkyil 'khor/__kun rdzob gzugs brnyan gyi dkyil 'khor gsum las/__snga ma gnyis ni slob dpon 'phags sa thob pa rnams kyi spyod yul yin la/__ting nge 'dzin rjes mthun thob pas ni/__dril bu pas/__ri mor bya ba'i las dang ni/__/thig dang tshon dgye'i rim pa bstan/__/'gro ba 'di dag rang bzhin gyis/__/grub pa'i dkyil 'khor gnyis med pa'o/__/zhes skal dman 'jug pa la rdul tshon/__'bring la ras bris/__rab la tshom bu/__yang rab bla ma'i lus kyi dkyil 'khor la brten pa'i tshul dang bzhi las/__'dir bla ma rnams kyi phyag bzhes ltar phyi dkyil gsum gang rung la 'jug pa'i sgo ni/__he ru ka 'dus par/__dang por sa yi cho ga ste/__/sogs gsungs pa'i nub dang po sa chog dang /__gnyis pa lha dang bum pa sta gon sngon du song nas/__da lam slob ma sta gon gyi sogs sbrel lo/__/dngos gzhi'i skabs/__spyir gsang sngags snga 'gyur rdo rje theg pa la bka' babs chu bo bzhi zhes grags shing /__de yang bsdu na/__gzhi rgyud sbyang gzhi bde gshegs snying po'i khams nyid/_lam rgyud/__'jug pa'i sgo ni smin par byed pa'i dbang /__/grol bar byed pa'i bskyed rdzogs rnam pa gnyis/__mthun pa'i grogs su dam tshig spyod pa gsum/__/sngags kyi lam mchog rnal mar nges pa las/__/zhes pa ltar 'jug sgo smin byed dbang bzhi dang /__de dang rjes su mthun pa'i lam la/__bum dbang gi de kho na nyid bskyed rim dang /__mchog dbang gsum gyi nyams len rdzogs rim/__de gnyis ka'i mthun pa'i grogs su dam tshig dang sdom pa'i kun spyod/__de dag gi blang dor 'jug ldog gi gnas sgra ji bzhin par shes par bya ba'i phyir rgyud kyi bshad pa ste/__de lta bu'i lam gyi rgyun goms pas mthar 'bras rgyud shin tu dag pa gnyis ldan sku bzhi dbyer mi phyed pa'i go 'phang la sbyor tshul rgyas par 'chad do/____/__! dam tshig rnam dbye rgyas par 'chad na/__de ltar dbang bzhi mtha' brten bcas pa legs par grub pa de dag gi gnas skabs su thob cing khas blangs pa'i dam tshig dang sdom pa'i tshogs la snying nas gces spras su bya ba ni dngos grub dang yon tan thams cad kyi srog shing lta bu ste/__spyi mdo las/__dam tshig 'di la gnas pa na/__/bla med byang chub rnam smin pas/__/dge ba'i srog 'dzin dam pa'o/__/zhes gsungs pa'i phyir ro/__/des na de dag gi blang dor gyi 'jug ldog shes par bya ba'i slad du grangs dang rim pa'i rnam dbye cung zad snyan du gsol na gsum ste/__ngo bo/__nges tshig__/dbye ba'o/__/dang po ni/__bsrung bya'i don sngags kyi brtul zhugs bzang po las mi 'da' bar bsdams pa'i lhag bsam khyad par can sa bon dang bcas pa'o/__/gnyis pa ni/__sa ma ya'i sgra las drangs na dngos su yal gam bcas pa'i tha tshig la 'jug pas ji ltar bcas pa las 'da' bar bya ba ma yin pa'am/__bsrungs ma bsrungs kyi khe nyen gyis dam tshig tu bzhag pa'ang yod de/__rdo rje las/__dam tshig 'di las gang 'da' ba/___/rdo rje can yang 'tshig par 'gyur/__/zhes so/__/gsum pa la gnyis te/__gsang sngags gsar rnying thun mong du grags pa'i rtsa ba dang yan lag gi ltung ba dang /__snga 'gyur rdo rje theg pa'i ring lugs nang rgyud sde gsum kho na la grags pa'i thun mong ma yin pa'o/_/dang po la'ang /__rigs lnga'i sdom pa dang /__rtsa ba dang yan lag gi ltung ba'o/__/dang po la thun mong ltar na/__sangs rgyas rnal 'byor smon 'jug tshul khrims gsum/__/mi bskyod rdor dril phyag rgya bla ma bzung /__/rin 'byung chos nor mi 'jigs byams pa sbyin/__/snang mtha' theg pa gsum 'dzin chos rnams bshad/__/don grub mchod bstod phrin las kun la gus/__/zhes dang /__khyad par bla med rigs lnga'i sdom pa ni/__/rdo rje'i rigs gyur srog la 'tshe ba dang /__/zhing bcu las gzhan rlung rtog dbu mar gsod/__/rin chen rigs la ma byin blang bya ni/__/mtshan ldan gzungs dang skal med skye bo'i nor/__/rdzogs pa'i byang chub rang stobs mthu yis blang /__/pad+ma'i rigs la ri dwags mig can mchod/__/stong pa nyid kyi bud med kun tu spyod/__/las chos dam tshig phyag rgya chen po bsten/__/'dod pa'i yon tan sgyu ma lta bur spyod/__/ces so/__/gnyis pa ni/__slob dpon smod par mi bya zhing /__/bde gshegs bka' las 'das mi bya/__/rdo rje spun la smad mi bya/__/sems can rnams la byams pa dang /__/byang chub sems ni dor mi bya/__/skal med de nyid bstan mi bya/__/bdag gi phung po smad mi bya/__/chos nyid la ni sun mi dbyung /__/gdugs la byams pa rtag tu spang /__/chos kyi tshad bzung mi bya'o/__/dad ldan sems can bslu mi bya/_/rtag tu dam tshig bsten par bya/__/bud med nyid la'ang smad mi bya/__/zhes so/__/gsum pa ni/__dbang dang dam tshig sdom pas ma sbyangs pas/__/tha mal bud med rig mar bsten pa dang /__/mtshan nyid 'gal ba'i dran pa'i khron pa nas/__/cho ga ma yin bzhin pas bdud rtsi len/__/dbang ma thob dang lhag par 'di med la/__/sku gzugs glegs bam phyag mtshan phyag rgya ston/__/tshogs kyi 'khor lo'i dus na 'thab rtsod dang /__/bab col kyal kas brtul zhugs tha mal sbyar/__/snod ldan dam chos 'dri la shes bzhin du/_/de las 'gal ba'i bsnyon dor lan du ldog__/sngags kyi lta spyod bkur zhing nyams sad pa'i/__/nyan thos nang du zhag bdun longs par bsdad/__/sngags rgyud de nyid cho ga mi shes bzhin/__/rdo rje 'dzin pa nga rgyal rdzun dang 'grogs/__/dbang bskur thob kyang sngags la ma dad pa'i/__/the tshom can la slar yang gsang ba 'chad/__/ces so/___/gnyis pa la'ang gsum ste/__rgyud lung gnyis po che las bstan pa'i rtsa ba dang /__yan lag gi dam tshig dang /__man ngag rdzogs pa chen po'i ring lugs rang bzhin lta ba'i dam tshig bzhi'o/__/dang po ni/__dam tshig rnam par bkod pa'i grub mtha' ni/__/rtsa ba bla ma'i sku gsung thugs gsum la/__/phyi nang gsang ba'i dam tshig gsum tshan gsum/__/srog gcod mi tshangs spyod dang rku spong ba/__/pha ma spun sring rang lus chos gang smod/__/bla ma'i grib 'gom yum gtses spun sring brdeg__/gsung gi gsum la rdzun smra tshig rtsub spangs/__/chos sgras don sems gnas lugs sgom mi bkur/__/bla ma'i yum dang spun sring tshig mi brnyas/__/thugs kyi gsum la yid kyi rnam gsum dang /__/spyod dang sgom dang lta ba log pa spang /__/1bla ma lha 2mched lha sgom thun kun sems/__/zhes te/__de yang rtsa ba rdo rje gsum gyi dam tshig la bla ma zhes smos pa ni/__rang gi sgo gsum sangs rgyas kun 'dus bla ma'i rdo rje gsum dang dbyer mi phyed par bsdams pas sam/__yang na gu ru'i sgra las drangs na lci ba ste nyams na sbyang dka' ba'i don no/__/gnyis pa ni/__thabs kyi dbang gyur yan lag nyi shu lnga/__/tan gan ma byin len rdzun kyal ba'i tshig__/spyad bya lnga ni gnang bkag shes pas spyod/__/'dod chags zhe sdang la sogs nyon mongs lnga/__/mi spong lnga ni rang rgyud pa dang bral/__/dri chen dri chu mAM sa rak+ta zil/__/dang len lnga la gtsang rme'i gnyis rtog 'dral/__/phung po 'byung yul dbang po kha dog lnga/__/shes bya lnga ni shes rab stobs kyis spyod/__/rdo rje rin chen pad+ma las de bzhin/__/bsgrub bya lnga ni rtogs goms mthu yis bsgrub/__/ces so/__/gzhan yang srung mtshams med par gcig car ba'i dam tshig dang /__bsrung mtshams can rim gyis pa'i dam tshig gnyis/__phyi ma la'ang /__zhi rgyud las/__dkyil 'khor 'dir ni gang bzhugs pa/__/bsrung zhing bsdam par bya ba dag__/spyi dang khyad par lhag pa yis/__/rnam par dbye bas bzung bya ste/__/zhes dang /__bshags ler/__spyi dang khyad par sogs pa ltar/__dang po ni/__so byang dang phyi rgyud kyi sdom pa'i srung mtshams su grags pa rnams dang /__dus kyi 'khor lo'i brtul zhugs nyer lnga/__rigs lnga'i sdom pa sogs so/__/gnyis pa ni/__thun mong ma yin pa'i rtsa ba dang yan lag bshad ma thag pa'o/__/gsum pa ni/__zhi rgyud las/__gcan gzan rgyal po'i khri mi gzhig__/sogs ldem dgongs kyi sgras bstan pa nyi shu ste 'di ni spyi dang khyad par la gnas pa'i sngags pas sgrub pa sogs kyi dus su bsrung bar bya ba yin pas lhag pa'i sgras bstan no/__/gsum pa ni/__rdo rje sems dpal nam mkha' che las/__med dang gcig pu phyal ba lhun grub ste/__/bsrung bar bya ba'i tshul khrims kun dang bral/__/zhes dang /__rang bzhin med pas med pa zhes su bshad/__/sems su kun gcig gcig pur brtags pa yin/__/dngos su mi spong ye shes mi 'gag pas/__/de la phyal ba zhes su grags pa ste/__/ji ltar snang ba'i chos rnams thams cad kun/__/yid ches byang chub sems su rdzogs pa'i phyir/__/lhun gyis rdzogs pa zhes su nga yis bstan/__/ces so/__/de ltar yang /__dang po sdom pa ma thob pa thob par bya ba'i phyir dbang bskur blang /__bar du mi nyams par bsrung ba'i phyir bsrung mtshams shes pa dang /__bslab pa bca' ba po dang bcas pa'i bslab pa bcas la gus pa dang /__bag med pa dang bral bar dran dang shes bzhin ldan pa dang /__rang rgyud kyi nyon mongs pa 'bur 'joms su byas pas ltung ba 'byung ba'i sgo bzhi 'am/__brjed ngas med pa dang /__dran pa gsal bas drug po bcad nas tshul bzhin du bslab pa dang /__gal te nyams na drug cha'i tshod las drug cha'i thun tshod las 'das pa 'das na nyams pa dang /__zhag gcig las 'das na 'gal ba/__zla gcig gis nyams pa/__lo gcig gis 'das na 'das la/__gnyis 'das na ral pa ste rim gyis nyes pa lci zhing /__gsum 'das na gsor mi rung ba yin cing /__de'i tshe phyir 'chos pa'ang /__'gal na tshogs 'khor nyams na bdog dgus bkang /__/'das na bu dang chung ma nor gyi dbyig__/ral na srog gis gso ba'i rnam gzhag rnams/__/rdo rje nyi ma rnam par bkod las gsungs/_/zhes pa ltar ro/__/gzhan yang snying po rgyan las gsungs pa'i gso thabs nyer lnga sogs dang /__khyad par dong sprugs bshags pas mi 'dag med/__/ces sogs dran par byas nas phyir bcos la 'bad do/__/mdor na rang gi lus gnyug ma'i rtsa rlung thig le'i ye shes dang bcas pa gdod nas sku gsung thugs ye shes rdo rje'i bdag nyid du bzhugs pa nyid shes rab kyis sgro 'dogs chod de rtogs par gyur na/__rtogs 'dul gyi dam tshig bsam gyis mi khyab pa thams cad kyang der 'du shing rnam par dag par 'gyur ba yin te/__mdor na rang lus sogs so/__/bzhi pa ni/__rgyud las/__rtsa ba'i dam tshig nyams gyur na/__sgrub pa thams cad log par 'gyur/__/yid du mi 'ong sna tshogs pa'i/__/'bras bu mi 'dod bzhin du 'du/__/yan lag dam tshig nyams gyur na/__/'bras bu med cing ngan song ltung /__/zhes so/__/lnga pa ni/__snga mar rgyal ba'i rig pa 'dzin pa de/__/'jig rten gtso dang 'khor gyis bkur/__/dam pa mchog dang dam pa yi/__/sras su dgongs nas byin gyis rlobs/__/zhes so/__/des na sdom 'byung las/__ci ste dngos grub mchog 'dod na/__/srog ni yongs su btang yang sla/__/'chi ba'i dus la babs kyang sla/__/rtag tu dam tshig bsrung bar bya/__/zhes gsungs pa rnams la dran pa nye bar bzhag nas ji ltar dam bcas pa'i rdo rje theg pa'i 'dul ba la tshul bzhin du ci nus kyis bslabs shing bsrung bar bya'o snyam pas mdor bsdus te khas blang ba 'di'i rjes zlos mdzod/__rtsa ba sku gsung thugs sogs so/__/zhes pa rnams kyang dbang gi spyi don dang 'brel ba'i zin thun rags pa tsam mo/__/sarba mang+ga laM//____//__! spyi mdo las/__sku dang gsung thugs rdo rje yi/__/bsrung dang spyad dang yid 'ong dang /__/mi 'dor shes bya bsgrub pa dang /__/zhes dang /__sgyu drwar/__bla med mi spong bla ma bkur/__/sngags dang phyag rgya rgyun mi bcad/__/yang dag lam du zhugs la byams/__/gsang ba'i don phyir smra mi bya/__/zhes pa ni/__bla ma bkur ba dang /__mched la byams pa gnyis sku/__sngags dang phyag rgya rgyun mi chad pa gsung /__bla na med pa'i byang chub kyi sems mi spong ba dang gsang ba mi smra ba rnams thugs kyi dam tshig tu 'du zhing /__yan lag kyang /__gti mug chags dang zhe sdang dang /__/nga rgyal phrag dog mi spong ngo /__/zhes dang /__dkar rtsi dmar rtsi dri sha chen/__/dag pa'i snod chu mi 'dor ro/__/zhes pa rnams ni yan lag tu 'du'o/___/__! slob dpon sangs rgyas gsang bas/_dag pa khrus nas ma bton par/__/gsang sngags dbang gi sgo mi dbye/__/byur dang mi shis mi bsal bar/__/gsang sngags dbang gi gral ma ston/__/srung ba'i 'khor lo ma bsgoms par/__/gsang sngags dbang gi chos mi 'chad/__/ces so//____//__!