རྡོ་རྗེ་ཐེག་པའི་ལམ་གྱི་སྔོན་འགྲོ་མངོན་པར་དབང་བསྐུར་བའི་ཟིན་བྲིས།

🚧 This website is under continued development. We appreciate your patience!

Previous Text Back to Volume PageNext Text

Wylie title	rdo rje theg pa'i lam gyi sngon 'gro mngon par dbang bskur ba'i zin bris
Location	mkhyen brtse'i bka' 'bum Volume 6, sde tshan 1, Text 4, Pages 63-73 (Folios 32a5 to 37a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdo rje theg pa'i lam gyi sngon 'gro mngon par dbang bskur ba'i zin bris. In 'jam dbyangs mkhyen brtse'i dbang po'i bka' 'bum, Vol. 6: 63-73. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris

1 Texts in this Section (sde tshan or chos tshan)

4 63-73	རྡོ་རྗེ་ཐེག་པའི་ལམ་གྱི་སྔོན་འགྲོ་མངོན་པར་དབང་བསྐུར་བའི་ཟིན་བྲིས། rdo rje theg pa'i lam gyi sngon 'gro mngon par dbang bskur ba'i zin bris Notes - zin bris	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ན་མོ་གུ་ར་ཝེ། གང་མཚན་དྲན་པའི་སྣང་བ་ཡིས། །གློ་བུར་འཁྲུལ་པའི་མུན་བསལ་ནས། །ལྷན་སྐྱེས་སྐུ་བཞིའི་ལམ་མཆོག་ལ། །འགོད་མཛད་ཁྱབ་བདག་བླ་མས་སྐྱོངས། །རྡོ་རྗེ་ཐེག་པའི་ལམ་ཐམས་ཅད་ཀྱི་སྔོན་དུ་འགྲོ་བ་མངོན་པར་དབང་བསྐུར་བའི་ཆོ་ག་ལ་ཉེ་བར་འོས་པའི་ཟིན་ཐུན་ཅུང་ཟད་ཅིག་སྤྲོ་བ་ལ། ཧེ་རུ་ཀ་འདུས་པ་ལས། གང་གིས་གང་ལ་དབང་བསྐུར་བས། །རྒྱུད་དག་ནུས་པ་ཐོབ་ཕྱིར་དབང་། །ཞེས་གསུངས་པ་ལྟར། གང་གིས་དབང་བསྐུར་བ་པོ་སློབ་དཔོན་དང་། གང་ལ་དབང་བསྐུར་བ་སློབ་མའི་མཚན་ཉིད། གང་བསྐུར་བ་དབང་གི་རབ་དབྱེ། དེ་ལྟར་བསྐུར་བ་ལས་བྱུང་བའི་དག་ཐོབ་ཀྱི་འབྲས་བུའོ། །དང་པོ་ནི། ལམ་རིམ་ལས། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་དང་བརྒྱད་འཆང་བ། །ཞེས་སོ། །གཉིས་པ་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བས། སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །ཅེས་དང་། བྱེ་བྲག་ཏུ། དད་བརྩོན་བརྟུལ་ཞུགས་ལྡན་རྟོགས་ནས། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །ཞེས་སོ། །གསུམ་པ་ལ་གཉིས་ཏེ། རྣམ་གཞག་སྤྱིར་བསྟན་པ་དང་། ས་བཅད་བྱེ་བྲག་ཏུ་སྨོས་པའོ། །དང་པོ་ལའང་། ངོ་བོ། ངེས་ཚིག །དབྱེ་བ། ཇི་ལྟར་བསྐུར་བའི་ཚུལ། བསྐུར་བའི་ཡོན་ཏན། མ་བསྐུར་བའི་སྐྱོན་ནོ། །དང་པོ་ནི། གཞི་དང་ལམ་དང་འབྲས་བུའི་དབང་བཞི་རུ། །གདོད་ནས་གྲུབ་པ་རྩ་རླུང་ཐིག་ལེའི་རྟེན། །རང་ཆས་ཉིད་དེ་མཚུངས་པར་ལྡན་པ་དང་། །ལྷན་ཅིག་བྱེད་པའི་རྒྱུ་ནི་རྣམ་པ་གཉིས། །སྣོད་དུ་རུང་བའི་སློབ་མ་རྒྱུ་ཡི་རྐྱེན། །ལྟ་དགོངས་ལྡན་པའི་སློབ་དཔོན་བདག་པོའི་རྐྱེན། །ནུས་པའི་ཆོ་ག་མཁྱེན་པ་དམིགས་པའི་རྐྱེན། །རྟེན་ཅིང་འབྲེལ་འབྱུང་དེ་མ་ཐག་པའི་རྐྱེན། །རྒྱུ་གཉིས་རྐྱེན་བཞི་ཚོགས་པས་དབང་བསྐུར་འགྲུབ། །ཅེས་གསུངས་པ་ལྟར། མཚུངས་ལྡན་གྱི་རྒྱུ་གདོད་ནས་རང་ཆས་སུ་བཞུགས་པའི་ཆོས་ཉིད་དང་། ལྷན་ཅིག་བྱེད་རྒྱུ་རབ་གནས་དང་ལྡན་པའི་དབང་རྫས་རྣམས་ལ་བརྟེན་ནས། རྒྱུའི་རྐྱེན་དད་བརྩོན་བརྟུལ་ཞུགས་སོགས་སྣོད་དུ་རུང་བའི་སློབ་མར། བདག་པོའི་རྐྱེན་ཕན་ནུས་ཟབ་མོའི་དབང་བསྐུར་ནུས་པའི་སློབ་དཔོན་གྱིས། དམིགས་པའི་རྐྱེན་རྫས་སྔགས་ཏིང་ངེ་འཛིན་གསུམ་འཛོམས་པའི་ནུས་པ་ཁྱད་པར་ཅན་དང་ལྡན་པས། དེ་མ་ཐག་པའི་རྐྱེན་དབང་སྔ་མ་སྔ་མས་གོ་ཕྱེ་ནས་ཕྱི་མ་ཕྱི་མ་འབྱུང་བ་སྟེ། དེ་ལྟ་བུའི་རྒྱུ་རྐྱེན་ལ་བརྟེན་ནས་གོ་འཕང་གི་ཆོས་རྒྱུད་ལ་འཇོག་པས་གློ་བུར་གྱི་དྲི་མ་བསལ་ཏེ་ཐར་པའི་མྱུ་གུ་མངོན་པར་སྐྱེ་བའམ། སྐྱེ་ངེས་ཀྱི་ས་བོན་རྒྱུད་ལ་འཇོག་པར་བྱེད་པའི་ཚུལ་ཅན་ནོ། །གཉིས་པ་ནི། ཨ་བྷི་ཥིཉྩའི་སྒྲ་ལས་དྲངས་ན་མངོན་པར་གཏོར་བ་དང་། ཨ་བྷི་ཥེ་ཀ་ཏིའི་སྒྲ་ལས་དྲངས་ན་མངོན་པར་བླུགས་པ་སྟེ། སྦྱང་བྱ་སྒོ་གསུམ་གྱི་དྲི་མ་གཏོར་ཞིང་། སྦྱངས་འབྲས་སྐུ་བཞིའི་འབྲས་བུ་ཐོབ་རུང་དང་། སྦྱོང་བྱེད་ལམ་སྒོམ་རུང་གི་སྐལ་བ་རྒྱུད་ལ་འཇོག་པའི་ཕྱིར་དེ་སྐད་དུ་བཏགས་ཏེ། ཧེ་བཛྲ་ལས། གཏོར་དང་བླུགས་པ་ཞེས་བྱ་བ། །དེས་ན་དབང་ཞེས་བརྗོད་པ་ཡིན། །ཅེས་སོ། །གསུམ་པ་ནི། རྒྱུད་སྡེ་སོ་སོའི་དབང་གི་རིམ་པ། ཡེ་ཤེས་ཐིག་ལེར། ཆུ་ཡི་དབང་དང་དབུ་རྒྱན་དག །བྱ་བའི་རྒྱུད་ལ་རབ་ཏུ་གྲགས། །སོགས་དང་། བྱེ་བྲག་རྣལ་འབྱོར་བླ་ན་མེད་པའི་རིང་ལུགས་ལྟར་ན། གསང་བའི་སྙིང་པོའི་རྒྱུད་ཕྱི་མར། །སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །དབང་ནི་རྣམ་པ་བཞི་ཡིས་ཀྱང་། །སྐལ་བར་ལྡན་པ་སྨིན་པར་བྱ། །རྣམ་རྟོག་དྲི་མ་དག་བྱའི་ཕྱིར། །དབང་བསྐུར་རྣམ་པ་བཞི་ཡིན་ནོ། །ཞེས་པ་ལྟར་སྦྱང་གཞི་ཕྲ་བ་གཉུག་མའི་སྐུ་རྡོ་རྗེ་སོགས། སྦྱང་བྱ་ཕུང་ཁམས་སྐྱེ་མཆེད་རགས་པར་སྣང་བ། སྦྱོང་བྱེད་བུམ་པའི་དབང་རྗེས་འབྲངས་དང་བཅས་པ། སྦྱངས་འབྲས་སངས་རྒྱས་ཐམས་ཅད་ཀྱི་ཐུགས་རྗེའི་རང་གཟུགས་སྤྲུལ་པའི་སྐུ་སོགས་བཞིར་གནས་པས་མཚོན་ཏེ་དབང་བཞི་སོ་སོར་རིམ་པར་ཕྱེ་བ་ལ་རྣམ་གྲངས་མཐའ་ཀླས་པ་ཐམས་ཅད་དོན་གྱིས་འདུ་བའི་འཐད་པ་རྒྱས་པར་འཆད་དུ་ཡོད་དོ། །བཞི་པ་ནི། བསྙེན་པ་དང་ནི་ས་ཡི་ཆོ་ག་དང་། །སྟ་གོན་དང་ནི་སློབ་མ་འཇུག་ཅིང་སྨིན། །མངོན་རྟོགས་བཞི་པོ་རེ་རེ་ཉིད་ལ་ཡང་། །བཞི་བཞིར་དབྱེ་བའི་ཡན་ལག་མ་ཚང་ན། །ཆོ་ག་ཉམས་པས་སྨིན་པར་ནུས་མ་ཡིན། །ཅེས་གསུངས་པའི་དོན། དང་པོ་བསྙེན་པ་ལ་ཡང་། འདུས་པར། བསྙེན་པའི་དམ་ཚིག་སྦྱོར་བ་དང་། །ཉེ་བར་སྒྲུབ་པ་འབྱུང་བ་དང་། །སྒྲུབ་པ་དོན་གྱི་དམ་ཚིག་དང་། །སྒྲུབ་པ་ཆེན་པོ་དག་དང་བཞི། །ཞེས་དང་། དེའི་དོན་ཀྱང་རྒྱུད་ཕྱི་མར། དང་པོ་སྟོང་པ་བྱང་ཆུབ་སེམས། །གཉིས་པ་ས་བོན་བསྡུ་བའོ། །གསུམ་པ་ལ་ནི་གཟུགས་རྫོགས་པ། །བཞི་པ་ལ་ནི་ཡིག་འབྲུ་དགོད། །རྡོ་རྗེ་རྣམ་བཞི་འདི་དག་གིས། །ཐ་མལ་སྒྲུབ་པའི་བསྙེན་པ་བྱ། །ཞེས་པས་དམ་ཚིག་པ་བསྐྱེད་པ་བསྙེན་པ། སྐྱེ་མཆེད་སྐུ་གསུང་ཐུགས་བྱིན་གྱིས་བརླབས་པ་ཉེར་སྒྲུབ། ཡེ་ཤེས་པ་གཞུགས་སྒྲུབ་པ། རིགས་བདག་གིས་རྒྱས་འདེབས་པ་སྒྲུབ་ཆེན་ནོ། །ཞེས་བཤད། བསྙེན་པ། ཉེ་བསྙེན། སྒྲུབ་པ། སྒྲུབ་ཆེན་ནོ། །གཉིས་པ་སྟ་གོན་ལའང་། གནས་ཁང་རྙིང་པའི་དབང་དུ་བྱས་ཏེ་ས་བརྟག་པ་དོར་བའི་འཕྲོས། བླང་བ། སྦྱོང་བ། བཟུང་བ། སྲུང་བའོ། །གསུམ་པ་སྟ་གོན་ལ། ས་ལྷ་དང་། དཀྱིལ་འཁོར་གྱི་ལྷ་དང་། བུམ་པ་དང་། སློབ་མ་སྟ་གོན་དང་བཞི་སྟེ། དང་པོ་ནི། ས་ཆོག་གི་སྐབས་སུ་ཡོད་པས་སྐབས་འདིར་མི་བྱེད་པ་མང་མོད། འོན་ཀྱང་ལྷག་པའི་ཉེས་པ་མེད་དེ་རྡོར་ཕྲེང་ལས་དེ་ལྟར་བསྟན་པའི་ཕྱིར་རོ། །བཞི་པ་སློབ་མ་འཇུག་ཅིང་སྨིན་པ་ལའང་། སློབ་དཔོན་རང་ཉིད་དཀྱིལ་འཁོར་དུ་འཇུག་པ། སློབ་མ་འཇུག་པར་གནང་བ་ནོད་པ། ནོད་ནས་དཀྱིལ་འཁོར་དུ་ཞུགས་པ། ཞུགས་པ་ལ་དབང་བསྐུར་བའོ། །ལྔ་པ་ནི། སྒྱུ་འཕྲུལ་དྲྭ་བར། དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་དང་། གསང་བ་མཛོད་ལས། དབང་བསྐུར་ཡང་དག་སྦྱིན་ལྡན་ནོ། །སོགས་སོ། །དྲུག་པ་ནི། སྔ་མ་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་ན། །ཉན་པ་ལ་སོགས་བརྩོན་པ་ནི། །འབྲས་བུ་མེད་ཅིང་བརླག་པར་འགྱུར། །ཞེས་སོ། །གཉིས་པ་ས་བཅད་བྱེ་བྲག་ཏུ་སྨོས་པ་ལ། སྔོན་འགྲོ། དངོས་གཞི། རྗེས་སོ། །དང་པོ་ལའང་། ཧེ་རུ་ཀ་འདུས་པར། དང་པོ་ས་ཡི་ཆོ་ག་སྟེ། །གཉིས་པ་ལ་ནི་སྟ་གོན་གནས། །གསུམ་པ་འཇུག་པའི་ཆོ་ག་བྱ། །ཞེས་པ་ལྟར་ས་ཆོག་དང་། སྟ་གོན་གཉིས། སྔ་མ་ལའང་དངོས་དང་། ཡན་ལག་གཉིས། དང་པོ་ནི། ༡༽ས་ཡི་ལྷ་མོར་བསླང་བ་༡དང་། །འོད་ཀྱིས་སྦྱངས་༢ཤིང་རྡོ་རྗེར་བཟུང་༣། །བཛྲ་རཀྵས་༤བསྲུང་བའོ། །ཞེས་བཞིའོ། །གཉིས་པ་ནི་ཐིག་ལས་ཏེ། ཐིག་༢སྐུད་རིགས་༡ལྔའི་ངོ་བོ་བཟུང་། །ནམ་མཁར་ཡེ་ཤེས་༢ཐིག་གདབ་པས། །དེ་ལས་བྱུང་བའི་ཐིག་སྐུད་ཀྱིས། །ས་༣གཞིར་ཚངས་ཐིག་ལ་སོགས་གདབ། །ཅེས་སོ། །གཉིས་པ་སྟ་གོན་ལའང་དངོས་དང་། ཡན་ལག་གཉིས། དང་པོ་ནི། ལྷ་༡༽གནས་རྣམས་སུ་ཚོམ་བུ་བཀོད། །དེ་ཉིད་ལྷར་༡བསྐྱེད་གནང་༢བ་ནོད། །སེམས་༣མ་རྡོ་རྗེའི་རྒྱ་ཡིས་བཏེགས། །དམ་ཚིག་༤བསྡུས་ཏེ་ནོངས་༥པ་བཤགས། །བུམ་༢༽པ་བཅུད་ལྡན་ལྷར་༡བསྐྱེད་ལ། །བཟླས་༢བྱས་འོད་ཞུ་༣བདུད་རྩིར་༤བསམ། །དེ་ནས་སློབ་མ་༣གྲལ་ལ་འཁོད། །ཁྲུས་༡བྱས་བགེགས་༢ཕྲལ་སྲུང་༣འཁོར་བསྒོམ། །ལོ་རྒྱུས་༤མཚམས་སྦྱར་མཎྜལ་༥ཕུལ། །ངེས་འབྱུང་ཚིག་གིས་བློ་༦བཅོས་ལ། །གསོལ་༧འདེབས་སྤྲོ་༨བསྐྱེད་ཉེན་པར་བསྐུལ། །ཐུན་༩མོང་ཁྱད་པར་སྡོམ་པ་༡༠སྡོམ་པ་གསུམ་ལ་སོགས་བྱིན། །ལྷར་༡༡བསྐྱེད་སྐྱེ་མཆེད་བྱིན་༡༢གྱིས་བརླབས། །དེ་ནས་དངོས་གྲུབ་ལྟས་མཐོང་ཕྱིར། །སོ་ཤིང་དོར་དང་༡༣རྨི་ལམ་བརྟག༡༤ །སྔ་མ་བྱིན་༡རླབས་དོར་བ་༢དང་། །དངོས་གྲུབ་མཚན་མ་བཤད་༣པར་བྱ། །ཕྱི་མའི་སྔོན་འགྲོ་རྣམ་གསུམ་སྟེ། །བསལ་བའི་ཕྱིར་དུ་ཁྱོར་༡ཆུ་དང་། །བར་ཆད་བསྲུང་ཕྱིར་རྡོ་རྗེའི་སྐུ་༢། །རྩེ་མོར་༣མི་འཁྲུགས་ཀུ་ཤ་སྦྱིན། །མི་ལྡོག་ཕྱིར་ན་ཆོས་༡༥ཀྱང་བཤད། །དགེ་བ་བསྔོ་ལ་༡༦རང་གནས་བཏང་། །དངོས་གཞིར་རྨི་ལམ་དྲི་ཞིང་༤དཔྱད་༥། །ངན་ན་བཟློག་པའི་ཐབས་༦སོགས་བསྟན། །དེ་ལྟར་ལྷ་བུམ་སློབ་མ་ཡི། །སྟ་གོན་ཉེ་བར་བསྡུས་བའོ། །ཞེས་སོ། །གཉིས་པ་ལ་རེ་ཁཱ་འགྱེད་པ་དང་། རྒྱན་དགྲམ་པ་གཉིས་པ་དངོས་གཞི་ལ་གཉིས། དེ་ཡང་། ཚོན་༡༽རྣམས་རིགས་ལྔར་བྱིན་༡བརླབས་པ། །མཆོད་༢བསྟོད་འོད་ཞུས་༣བྲིས་པའི་རྗེས་༤། །སྟ་གོན་སྐབས་ཀྱི་ཡེ་ཤེས་པ། །ཛཿཧཱུྃ་བྃ་ཧོཿས་དལ་ལ་བསྟིམ། །ཐིག་ཚོན་༦ལྷག་མའི་ཡེ་ཤེས་གཤེགས། །དཀྱིལ་༢འཁོར་རྒྱན་མཆོད་མཆོད་༡རྫས་དང་། །དབང་༢རྫས་ཚང་བར་འདུ་བྱའོ། །གསུམ་པ་འཇུག་པའི་ཆོ་ག་ལའང་། དཀྱིལ་འཁོར་སྒྲུབ་ཅིང་མཆོད་པ་སྔོན་དུ་འགྲོ་བས། སློབ་དཔོན་རང་ཉིད་འཇུག་པ། སློབ་མ་འཇུག་པར་གསོལ་བ་གདབ་པ། འཇུག་པ། དབང་བསྐུར་བའོ། །དང་པོ་ནི། སོ་སོའི་ལས་ཀྱི་གཞུང་བསྲངས་ལ། བདག་མདུན་བུམ་གསུམ་དབྱེར་མེད་༡བསྐྱེད། །བཟླས་༢དང་རྣམ་བུམ་༣ལས་བུམ་༤ལ། །དམིགས་བསལ་བཟླས་ཤིང་མཆོད་༦ཅིང་བསྟོད་༧། །དུང་ཆོས་ཕུལ་༨ལ་འོད་དུ་ཞུ། །ནོངས་༩པ་བཤགས་ཤིང་དགེ་བ་༡༠བསྔོ། །ཞེས་སོ། །གཉིས་པ་ནི། སློབ་མ་ཇི་ལྟར་བྱ་བ་བཞིན། །བླངས་སམ་བསྐྱེད་རྫོགས་མཐུ་བསྟན་པས། །རིག་པའི་མེ་ཏོག་དོར་བ་ཡིས། །བདག་ཉིད་འཇུག་པ་བླང་བར་བྱ། །ཞེས་སོ། །གསུམ་པ་ནི། ལས་བུམ་ཆུས་བཀྲུ་མིག་དར་འཆིང་། །མེ་ཏོག་གཏད་༣ཅིང་གསོལ་བ་༤གདབ། །དྲི་ཞིང་༥ལན་གདབ་༦སྤྲོ་བ་བསྐྱེད། །ཕྱིར་༧འབྲང་བགེགས་བསྐྲད་སྲུང་འཁོར་༨བསྒོམ། །མཎྜལ་༩ཕུལ་ཞིང་འཇུག་པའི་ཡོན་དུ་ཐུན་མོང་དང་༡༠། །ཁྱད་༡༡པར་སྡོམ་པ་སྔར་ལྟར་བྱིན། །ཐམས་ཅད་༡༢རྣལ་འབྱོར་སེམས་བསྐྱེད་ལ། །དམ་༡༣བཞག་རིགས་༡༤ལྔའི་སྡོམ་པ་བཟུང་། །ཞེས་སོ། །བཞི་པ་ནི། ཕྱི་ལྟར་༡༽གསོལ་གདབ་༡ནང་དུ་བཅུག༢ །སྐུ་གསུང་ཐུགས་༣ཀྱི་ཕྱག་རྒྱས་ཞུགས། །ནང་༤༽ལྟར་འཇུག་པའི་དངོས་གཞི་ནི། །སྲས་སུ་བྱ་ཕྱིར་ལྷར་༡བསྐྱེད་ལ། །ཡེ་ཤེས་༢དབབ་ཅིང་བརྟན་༣པར་བྱ། །གདོང་༤གཡོགས་ཕྱེ་ཞིང་དཀྱིལ་འཁོར་བསྟན༥། །རྟེན་དང་བརྟེན་པའི་དག་སྦྱོར་འཆད། །ཅེས་སོ། །ལྔ་པ་ནི། ཞུགས་༥༽ནས་དབང་བསྐུར་བྱ་བའི་སླད། །མཎྜལ་༡ཕུལ་ཞིང་དངོས་གཞི་ལ། །དབང་༢གི་ངོ་བོ་ངེས་ཚིག་དང་། །རྣམ་གྲངས་དབྱེ་བསྡུ་བཤད་པའི་རྗེས། །ཐོག་མར་སྤྲོས་༡བཅས་བུམ་དབང་ལ། །ཕན་༡ནུས་གཉིས་༢ལས་དང་པོ་ནི། །དཀྱིལ་༡འཁོར་ལྷ་ལ་མཆོད་༢བསྟོད་དང་། །གསོལ་༣གདབ་སྔོན་དུ་འགྲོ་བ་ཡིས། །མི་བསྐྱོད་ཆུ་དང་༤རིན་འབྱུང་༥གི། །དབུ་༦རྒྱན་སྣང་མཐའི་༧རྡོ་རྗེ་སྟེ། །དོན་གྲུབ་༨དྲིལ་བུ་རྣམ་སྣང་༩མིང་། །དེ་ལ་སློབ་མའི་དབང་ཞེས་ཏེ། །གསང་སྔགས་ཕྱི་པའི་དབང་ཡོངས་རྫོགས། །གཉིས་༢པ་རང་དོན་ཉན་སྒོམ་དང་། །གཞན་དོན་འཆད་ཕྲིན་གཉིས་ཀ་ལ། །རྡོ་རྗེ་རྒྱལ་༡པོའི་དབང་བསྐུར་ཏེ། །སྐུ་གསུང་ཐུགས་ཀྱི་དམ་ཚིག་བྱིན། །སྤྲོ་ན་མངའ་གསོལ་སོགས་ཀྱང་བྱ། །རྗེས་འབྲེལ་བུམ་པའི་དབང་༢བསྐུར་དང་། །སྐུ་ཡི་རྗེས་༣གནང་ཉིད་ཀྱང་བྱིན། །གཉིས་༢པ་སྤྲོས་མེད་ཟབ་མོ་ནི། །མཆོག་དབང་གོང་མ་གསུམ་ཡིན་ཏེ། །གསང་༡དབང་རྗེས་འབྲེལ་བཟླས་༢ལུང་དང་། །ཤེར་༣དབང་དགའ་བཞིའི་ཡེ་ཤེས་ཀྱི། །ངོ་༤སྤྲོད་བཞི་པ་ཚིག་དབང་ལ། །ཀ་དག་བརྡས་༥མཚོན་ངོ་སྤྲོད་༦གདབ། །ལྷུན་༧གྲུབ་རིག་པའི་རྩལ་དབང་བསྐུར། །བཀའ་ལུང་རྫོགས་པར་བྱ་བའི་ཕྱིར། །རྒྱུད་ཀྱི་བཀའ་༨གཏད་འབོགས་པའོ། །ཞེས་སོ། །དེ་དག་གི་རྗེས་འབྲེལ་གྱི་རིམ་པ་ནི། ཤིས་པར་བྱ་ཕྱིར་བཀྲ་༡ཤིས་༢རྫས། །རྟགས་༣བརྒྱད་སྦྱིན་ནམ་ཤིས་པ་༤བརྗོད། །དམ་ཚིག་༥དབྱེ་བ་རྒྱས་པར་བཤད། །དེ་ཉིད་བསྡུས་ཏེ་ཁས་བླང་གཞུག །གཏང་༧རག་མཎྜལ་ལུས་༨ཀྱང་དབུལ། །དགེ་བ་༩བསྔོ་ཞིང་རང་གནས་༡༠བཏང་། །ཞེས་སོ། །གསུམ་པ་རྗེས་ཀྱི་ལས་ཁྲིགས་ནི། །ཚོགས་ལ་རོལ་ཞིང་སྤྱོད་པ་བསྐྱང་། །རྡོ་རྗེའི་གླུ་གར་བྱ་བ་དང་། །དངོས་གྲུབ་བླངས་ཤིང་རྡུལ་ཚོན་ཉིད། །ཨ་ཀཱ་རོས་བསྡུ་ཆུ་ཀླུང་བསྐུར། །བསྔོ་སྨོན་ཤིས་བརྗོད་ལ་སོགས་བྱ། །ཞེས་པ་སྟེ་རགས་རིམ་ཙམ་མོ། །དེ་ལྟར་རྡུལ་ཚོན་གྱི་ཕྱོགས་ལ་བརྟེན་པའི་ཟིན་ཐོ་རགས་པར་བཀོད་པའོ། །བཞི་པ་ནི། རྒྱུ་ལམ་འབྲས་གསུམ་སྟེ། དབང་མཆོག་རང་ལ་གནས་པ་ཁམས་དྲུག་གི། །རྟེན་དང་འབྱོར་པ་རྒྱུ་ཡི་དབང་ཡིན་ཏེ། །སློབ་དཔོན་ཉིད་ཀྱི་ཆོ་གས་བསྐུར་བ་དང་། །རང་གི་དམིགས་པས་འདྲིས་པ་ལམ་གྱི་དབང་། །རྒྱུ་དུས་འོད་ཟེར་ཆེན་པོའི་དབང་བཞིན་དུ། །རང་སེམས་སྐུ་བཞིར་སྨིན་པ་འབྲས་བུའི་དབང་། །ཞེས་གསུངས་པ་ལྟར་ཏེ་གོ་སླའོ། །ལྔ་པ་ནི། སྦྱང་གཞི་ཐོབ་བྱ་རང་ལ་གནས་པ་ཤིན་ཏུ་ཕྲ་བ་མི་ཤིགས་པའི་བདག་ཉིད་ཅན་གྱི་སྐུ་གསུང་ཐུགས་ཡེ་ཤེས་རྡོ་རྗེ་སྟེ། དེ་ལ་སྦྱང་བྱ་གློ་བུར་གྱི་དྲི་མ་ལུས་ངག་ཡིད་གསུམ་ཀུན་གཞི་དང་བཅས་པ་ཐམས་ཅད། སྦྱོང་བྱེད་རྡོ་རྗེ་རྩེ་མོ་ལས། སྨིན་པ་དང་ནི་སོགས་ལྟར་གཉིས་ལས། དང་པོའང་བུམ་གསང་ཤེས་རབ་ཡེ་ཤེས་བཞི་དང་། གཉིས་པ་བསྐྱེད་རིམ་སོགས་ལམ་བཞི། ལམ་དེའི་སྔོན་དུ་འགྲོ་བའི་ལྟ་བ་བཞི། དེ་ལས་བྱུང་བའི་གྲུབ་མཐའ་བཞི། གྲུབ་མཐའ་མ་སྙོགས་ན་འདའ་ཀ་མ་བཞི་སྟེ། དེ་ལྟ་བུས་སྦྱང་བ་ནི་དག་པ་དང་། དེས་འབྲས་བུ་རྩའི་འགྲོས་ཐིམ་དབྱིབས་ཀྱི་ལམ་དག་པ་སྐུ་རྡོ་རྗེ་སྤྲུལ་པའི་སྐུ་སོགས་ཐོབ་པའོ། །མཁས་མང་ལེགས་བཤད་བདུད་རྩི་ཡིས། །ཕྱེ་བའི་སྨིན་བྱེད་རྣམ་བཤད་ནི། །བདུད་རྩིར་བཅས་པའི་ཨུཏྤལ་ལ། །སྐལ་བཟང་མགུལ་པའི་རྒྱན་དུ་གྲུབ། །རྡོ་རྗེ་ཐེག་པའི་ལམ་གྱི་སྔོན་འགྲོ་མངོན་པར་དབང་བསྐུར་བའི་ཟིན་བྲིས་ལེའུ་ཚན་ནོ།། །། ༈

[edit]

rdo rje theg pa'i lam gyi sngon 'gro mngon par dbang bskur ba'i zin bris/ na mo gu ra we/__gang mtshan dran pa'i snang ba yis/__/glo bur 'khrul pa'i mun bsal nas/__/lhan skyes sku bzhi'i lam mchog la/__/'god mdzad khyab bdag bla mas skyongs/__/rdo rje theg pa'i lam thams cad kyi sngon du 'gro ba mngon par dbang bskur ba'i cho ga la nye bar 'os pa'i zin thun cung zad cig spro ba la/__he ru ka 'dus pa las/__gang gis gang la dbang bskur bas/__/rgyud dag nus pa thob phyir dbang /__/zhes gsungs pa ltar/__gang gis dbang bskur ba po slob dpon dang /__gang la dbang bskur ba slob ma'i mtshan nyid/__gang bskur ba dbang gi rab dbye/__de ltar bskur ba las byung ba'i dag thob kyi 'bras bu'o/__/dang po ni/__lam rim las/__ston pa mdzod ldan chu bo rdzogs/__/gnyer ldan rgyud dang las la mkhas/__/man ngag drod dang brgyad 'chang ba/__/zhes so/__/gnyis pa ni/__rdo rje sems dpa' sgyu 'phrul drwa bas/__ston pa mchod brtson rtogs pa gsal/__/dam tshig sngags dang phyag rgya rnams/__/ma nyams shes shing yo byad ldan/__/ces dang /__bye brag tu/__dad brtson brtul zhugs ldan rtogs nas/__/phan pa'i dbang sbyin nus pa'i dbang /__/rim pa bzhin du sbyin par bya/__/zhes so/__/gsum pa la gnyis te/__rnam gzhag spyir bstan pa dang /__sa bcad bye brag tu smos pa'o/__/dang po la'ang /__ngo bo/__nges tshig__/dbye ba/__ji ltar bskur ba'i tshul/__bskur ba'i yon tan/__ma bskur ba'i skyon no/__/dang po ni/__gzhi dang lam dang 'bras bu'i dbang bzhi ru/__/gdod nas grub pa rtsa rlung thig le'i rten/__/rang chas nyid de mtshungs par ldan pa dang /__/lhan cig byed pa'i rgyu ni rnam pa gnyis/__/snod du rung ba'i slob ma rgyu yi rkyen/__/lta dgongs ldan pa'i slob dpon bdag po'i rkyen/__/nus pa'i cho ga mkhyen pa dmigs pa'i rkyen/__/rten cing 'brel 'byung de ma thag pa'i rkyen/__/rgyu gnyis rkyen bzhi tshogs pas dbang bskur 'grub/__/ces gsungs pa ltar/__mtshungs ldan gyi rgyu gdod nas rang chas su bzhugs pa'i chos nyid dang /__lhan cig byed rgyu rab gnas dang ldan pa'i dbang rdzas rnams la brten nas/__rgyu'i rkyen dad brtson brtul zhugs sogs snod du rung ba'i slob mar/__bdag po'i rkyen phan nus zab mo'i dbang bskur nus pa'i slob dpon gyis/__dmigs pa'i rkyen rdzas sngags ting nge 'dzin gsum 'dzoms pa'i nus pa khyad par can dang ldan pas/__de ma thag pa'i rkyen dbang snga ma snga mas go phye nas phyi ma phyi ma 'byung ba ste/__de lta bu'i rgyu rkyen la brten nas go 'phang gi chos rgyud la 'jog pas glo bur gyi dri ma bsal te thar pa'i myu gu mngon par skye ba'am/_skye nges kyi sa bon rgyud la 'jog par byed pa'i tshul can no/__/gnyis pa ni/__a b+hi Shiny+tsa'i sgra las drangs na mngon par gtor ba dang /__a b+hi She ka ti'i sgra las drangs na mngon par blugs pa ste/__sbyang bya sgo gsum gyi dri ma gtor zhing /__sbyangs 'bras sku bzhi'i 'bras bu thob rung dang /__sbyong byed lam sgom rung gi skal ba rgyud la 'jog pa'i phyir de skad du btags te/__he badz+ra las/__gtor dang blugs pa zhes bya ba/__/des na dbang zhes brjod pa yin/__/ces so/__/gsum pa ni/__rgyud sde so so'i dbang gi rim pa/__ye shes thig ler/__chu yi dbang dang dbu rgyan dag__/bya ba'i rgyud la rab tu grags/__/sogs dang /__bye brag rnal 'byor bla na med pa'i ring lugs ltar na/__gsang ba'i snying po'i rgyud phyi mar/__/slob dpon gsang ba shes rab dang /__/de ma thag pa bzhi pa ste/__/dbang ni rnam pa bzhi yis kyang /__/skal bar ldan pa smin par bya/__/rnam rtog dri ma dag bya'i phyir/__/dbang bskur rnam pa bzhi yin no/__/zhes pa ltar sbyang gzhi phra ba gnyug ma'i sku rdo rje sogs/__sbyang bya phung khams skye mched rags par snang ba/__sbyong byed bum pa'i dbang rjes 'brangs dang bcas pa/__sbyangs 'bras sangs rgyas thams cad kyi thugs rje'i rang gzugs sprul pa'i sku sogs bzhir gnas pas mtshon te dbang bzhi so sor rim par phye ba la rnam grangs mtha' klas pa thams cad don gyis 'du ba'i 'thad pa rgyas par 'chad du yod do/__/bzhi pa ni/__bsnyen pa dang ni sa yi cho ga dang /__/sta gon dang ni slob ma 'jug cing smin/__/mngon rtogs bzhi po re re nyid la yang /__/bzhi bzhir dbye ba'i yan lag ma tshang na/__/cho ga nyams pas smin par nus ma yin/__/ces gsungs pa'i don/__dang po bsnyen pa la yang /__'dus par/__bsnyen pa'i dam tshig sbyor ba dang /__/nye bar sgrub pa 'byung ba dang /__/sgrub pa don gyi dam tshig dang /__/sgrub pa chen po dag dang bzhi/__/zhes dang /__de'i don kyang rgyud phyi mar/__dang po stong pa byang chub sems/__/gnyis pa sa bon bsdu ba'o/__/gsum pa la ni gzugs rdzogs pa/__/bzhi pa la ni yig 'bru dgod/__/rdo rje rnam bzhi 'di dag gis/__/tha mal sgrub pa'i bsnyen pa bya/__/zhes pas dam tshig pa bskyed pa bsnyen pa/__skye mched sku gsung thugs byin gyis brlabs pa nyer sgrub/__ye shes pa gzhugs sgrub pa/__rigs bdag gis rgyas 'debs pa sgrub chen no/__/zhes bshad/__bsnyen pa/__nye bsnyen/__sgrub pa/__sgrub chen no/__/gnyis pa sta gon la'ang /__gnas khang rnying pa'i dbang du byas te sa brtag pa dor ba'i 'phros/__blang ba/__sbyong ba/__bzung ba/__srung ba'o/__/gsum pa sta gon la/__sa lha dang /__dkyil 'khor gyi lha dang /__bum pa dang /__slob ma sta gon dang bzhi ste/__dang po ni/__sa chog gi skabs su yod pas skabs 'dir mi byed pa mang mod/__'on kyang lhag pa'i nyes pa med de rdor phreng las de ltar bstan pa'i phyir ro/__/bzhi pa slob ma 'jug cing smin pa la'ang /__slob dpon rang nyid dkyil 'khor du 'jug pa/__slob ma 'jug par gnang ba nod pa/__nod nas dkyil 'khor du zhugs pa/__zhugs pa la dbang bskur ba'o/__/lnga pa ni/__sgyu 'phrul drwa bar/__dus 'di phyin chad rgyal ba'i sras/__/ngan song thams cad med pa dang /__/tshe ring bde ba phun sum tshogs/__/mtho ris thar pa'i bdag por 'gyur/__/zhes dang /__gsang ba mdzod las/__dbang bskur yang dag sbyin ldan no/__/sogs so/__/drug pa ni/__snga ma las/__slob dpon mnyes par ma byas shing /__/dbang rnams thob par ma byas na/__/nyan pa la sogs brtson pa ni/__/'bras bu med cing brlag par 'gyur/__/zhes so/__/gnyis pa sa bcad bye brag tu smos pa la/__sngon 'gro/__dngos gzhi/__rjes so/__/dang po la'ang /__he ru ka 'dus par/__dang po sa yi cho ga ste/__/gnyis pa la ni sta gon gnas/__/gsum pa 'jug pa'i cho ga bya/__/zhes pa ltar sa chog dang /__sta gon gnyis/__snga ma la'ang dngos dang /__yan lag gnyis/__dang po ni/__1)sa yi lha mor bslang ba 1dang /__/'od kyis sbyangs 2shing rdo rjer bzung 3/__/badz+ra rak+Shas 4bsrung ba'o/__/zhes bzhi'o/__/gnyis pa ni thig las te/__thig 2skud rigs 1lnga'i ngo bo bzung /__/nam mkhar ye shes 2thig gdab pas/__/de las byung ba'i thig skud kyis/__/sa 3gzhir tshangs thig la sogs gdab/__/ces so/__/gnyis pa sta gon la'ang dngos dang /__yan lag gnyis/__dang po ni/__lha 1)gnas rnams su tshom bu bkod/__/de nyid lhar 1bskyed gnang 2ba nod/__/sems 3ma rdo rje'i rgya yis btegs/__/dam tshig 4bsdus te nongs 5pa bshags/__/bum 2)pa bcud ldan lhar 1bskyed la/__/bzlas 2byas 'od zhu 3bdud rtsir 4bsam/__/de nas slob ma 3gral la 'khod/__/khrus 1byas bgegs 2phral srung 3'khor bsgom/__/lo rgyus 4mtshams sbyar maN+Dal 5phul/__/nges 'byung tshig gis blo 6bcos la/__/gsol 7'debs spro 8bskyed nyen par bskul/__/thun 9mong khyad par sdom pa 10sdom pa gsum la sogs byin/__/lhar 11bskyed skye mched byin 12gyis brlabs/__/de nas dngos grub ltas mthong phyir/__/so shing dor dang 13rmi lam brtag14__/snga ma byin 1rlabs dor ba 2dang /__/dngos grub mtshan ma bshad 3par bya/__/phyi ma'i sngon 'gro rnam gsum ste/__/bsal ba'i phyir du khyor 1chu dang /__/bar chad bsrung phyir rdo rje'i sku 2/__/rtse mor 3mi 'khrugs ku sha sbyin/__/mi ldog phyir na chos 15kyang bshad/__/dge ba bsngo la 16rang gnas btang /__/dngos gzhir rmi lam dri zhing 4dpyad 5/__/ngan na bzlog pa'i thabs 6sogs bstan/__/de ltar lha bum slob ma yi/__/sta gon nye bar bsdus ba'o/__/zhes so/__/gnyis pa la re khA 'gyed pa dang /__rgyan dgram pa gnyis pa dngos gzhi la gnyis/__de yang /__tshon 1)rnams rigs lngar byin 1brlabs pa/__/mchod 2bstod 'od zhus 3bris pa'i rjes 4/__/sta gon skabs kyi ye shes pa/__/dzaHhU~M ba~M hoHsa dal la bstim/__/thig tshon 6lhag ma'i ye shes gshegs/__/dkyil 2'khor rgyan mchod mchod 1rdzas dang /__/dbang 2rdzas tshang bar 'du bya'o/__/gsum pa 'jug pa'i cho ga la'ang /__dkyil 'khor sgrub cing mchod pa sngon du 'gro bas/__slob dpon rang nyid 'jug pa/__slob ma 'jug par gsol ba gdab pa/__'jug pa/__dbang bskur ba'o/__/dang po ni/__so so'i las kyi gzhung bsrangs la/__bdag mdun bum gsum dbyer med 1bskyed/__/bzlas 2dang rnam bum 3las bum 4la/__/dmigs bsal bzlas shing mchod 6cing bstod 7/__/dung chos phul 8la 'od du zhu/__/nongs 9pa bshags shing dge ba 10bsngo/__/zhes so/__/gnyis pa ni/__slob ma ji ltar bya ba bzhin/__/blangs sam bskyed rdzogs mthu bstan pas/__/rig pa'i me tog dor ba yis/__/bdag nyid 'jug pa blang bar bya/__/zhes so/__/gsum pa ni/__las bum chus bkru mig dar 'ching /__/me tog gtad 3cing gsol ba 4gdab/__/dri zhing 5lan gdab 6spro ba bskyed/__/phyir 7'brang bgegs bskrad srung 'khor 8bsgom/__/maN+Dal 9phul zhing 'jug pa'i yon du thun mong dang 10/__/khyad 11par sdom pa sngar ltar byin/__/thams cad 12rnal 'byor sems bskyed la/__/dam 13bzhag rigs 14lnga'i sdom pa bzung /__/zhes so/__/bzhi pa ni/__phyi ltar 1)gsol gdab 1nang du bcug2__/sku gsung thugs 3kyi phyag rgyas zhugs/__/nang 4)ltar 'jug pa'i dngos gzhi ni/__/sras su bya phyir lhar 1bskyed la/__/ye shes 2dbab cing brtan 3par bya/__/gdong 4g.yogs phye zhing dkyil 'khor bstan5/__/rten dang brten pa'i dag sbyor 'chad/__/ces so/__/lnga pa ni/__zhugs 5)nas dbang bskur bya ba'i slad/__/maN+Dal 1phul zhing dngos gzhi la/__/dbang 2gi ngo bo nges tshig dang /__/rnam grangs dbye bsdu bshad pa'i rjes/__/thog mar spros 1bcas bum dbang la/__/phan 1nus gnyis 2las dang po ni/__/dkyil 1'khor lha la mchod 2bstod dang /__/gsol 3gdab sngon du 'gro ba yis/__/mi bskyod chu dang 4rin 'byung 5gi/__/dbu 6rgyan snang mtha'i 7rdo rje ste/__/don grub 8dril bu rnam snang 9ming /__/de la slob ma'i dbang zhes te/__/gsang sngags phyi pa'i dbang yongs rdzogs/__/gnyis 2pa rang don nyan sgom dang /__/gzhan don 'chad phrin gnyis ka la/__/rdo rje rgyal 1po'i dbang bskur te/__/sku gsung thugs kyi dam tshig byin/__/spro na mnga' gsol sogs kyang bya/__/rjes 'brel bum pa'i dbang 2bskur dang /__/sku yi rjes 3gnang nyid kyang byin/__/gnyis 2pa spros med zab mo ni/__/mchog dbang gong ma gsum yin te/__/gsang 1dbang rjes 'brel bzlas 2lung dang /__/sher 3dbang dga' bzhi'i ye shes kyi/__/ngo 4sprod bzhi pa tshig dbang la/__/ka dag brdas 5mtshon ngo sprod 6gdab/__/lhun 7grub rig pa'i rtsal dbang bskur/__/bka' lung rdzogs par bya ba'i phyir/__/rgyud kyi bka' 8gtad 'bogs pa'o/__/zhes so/__/de dag gi rjes 'brel gyi rim pa ni/__shis par bya phyir bkra 1shis 2rdzas/__/rtags 3brgyad sbyin nam shis pa 4brjod/__/dam tshig 5dbye ba rgyas par bshad/__/de nyid bsdus te khas blang gzhug__/gtang 7rag maN+Dal lus 8kyang dbul/__/dge ba 9bsngo zhing rang gnas 10btang /__/zhes so/__/gsum pa rjes kyi las khrigs ni/__/tshogs la rol zhing spyod pa bskyang /__/rdo rje'i glu gar bya ba dang /__/dngos grub blangs shing rdul tshon nyid/__/a kA ros bsdu chu klung bskur/__/bsngo smon shis brjod la sogs bya/__/zhes pa ste rags rim tsam mo/__/de ltar rdul tshon gyi phyogs la brten pa'i zin tho rags par bkod pa'o/__/bzhi pa ni/__rgyu lam 'bras gsum ste/__dbang mchog rang la gnas pa khams drug gi/__/rten dang 'byor pa rgyu yi dbang yin te/__/slob dpon nyid kyi cho gas bskur ba dang /__/rang gi dmigs pas 'dris pa lam gyi dbang /__/rgyu dus 'od zer chen po'i dbang bzhin du/__/rang sems sku bzhir smin pa 'bras bu'i dbang /__/zhes gsungs pa ltar te go sla'o/__/lnga pa ni/__sbyang gzhi thob bya rang la gnas pa shin tu phra ba mi shigs pa'i bdag nyid can gyi sku gsung thugs ye shes rdo rje ste/__de la sbyang bya glo bur gyi dri ma lus ngag yid gsum kun gzhi dang bcas pa thams cad/__sbyong byed rdo rje rtse mo las/__smin pa dang ni sogs ltar gnyis las/__dang po'ang bum gsang shes rab ye shes bzhi dang /__gnyis pa bskyed rim sogs lam bzhi/__lam de'i sngon du 'gro ba'i lta ba bzhi/__de las byung ba'i grub mtha' bzhi/__grub mtha' ma snyogs na 'da' ka ma bzhi ste/__de lta bus sbyang ba ni dag pa dang /__des 'bras bu rtsa'i 'gros thim dbyibs kyi lam dag pa sku rdo rje sprul pa'i sku sogs thob pa'o/__/mkhas mang legs bshad bdud rtsi yis/__/phye ba'i smin byed rnam bshad ni/__/bdud rtsir bcas pa'i ut+pal la/__/skal bzang mgul pa'i rgyan du grub/__/rdo rje theg pa'i lam gyi sngon 'gro mngon par dbang bskur ba'i zin bris le'u tshan no//___//___!