JKW-KABUM-02-KHA-001-028

Previous Text Back to Volume PageNext Text

ཕྱག་ན་རྡོ་རྗེ།

Wylie title	phyag na rdo rje
Location	mkhyen brtse'i bka' 'bum Volume 2, sde tshan 1, Text 28, Pages 113-114 (Folios 57a2 to 57b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. phyag na rdo rje. In 'jam dbyangs mkhyen brtse'i dbang po'i bka' 'bum, Vol. 2: 113-114. Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam

Tibetan Text

Wylie

[edit]

བྱང་ཆུབ་སེམས་དཔའ་ཕྱག་ན་རྡོ་རྗེ་ནི། དཀོན་མཆོག་བརྩེགས་པའི་འདུས་པ་གསུམ་པར། སྔོན་བསྐལ་པ་གྲངས་མེད་པའི་གོང་རོལ་དུ་བསྐལ་པ་མཛེས་བར་སྣང་བ་ཞེས་བྱ་བར། ཞིང་ཁམས་རྣམ་པར་བརྒྱན་པ་བཀོད་པ་ཁྱད་པར་འཕགས་པས་བརྒྱན་པ་དེར་དེ་བཞིན་གཤེགས་པ་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། དེའི་ཚེ་དེའི་དུས་ན་འཁོར་ལོས་སྒྱུར་རྒྱལ་ཡུལ་འཁོར་སྲུང་ལ་སྲས་སྟོང་དང་། ཁྱེའུ་ཆོས་ཀྱི་སེམས་དཔའ་དང་། ཆོས་ཀྱི་བློ་གྲོས་ཞེས་བྱ་བའི་རྫུས་སྐྱེས་མཆེད་གཉིས་བཅས་བྱུང་བའི། རྒྱལ་པོ་དེ་ནི་དེ་བཞིན་གཤེགས་པ་མར་མེ་མཛད་དང་། སྲས་སྟོང་ནི་བསྐལ་པ་བཟང་པོའི་སངས་རྒྱས་སྟོང་རྩ་གཉིས། ཁྱེའུ་ཆོས་སེམས་ནི་བྱང་ཆུབ་སེམས་དཔའ་ཕྱག་ན་རྡོ་རྗེ་དང་། ཁྱེའུ་ཆོས་ཀྱི་བློ་གྲོས་ནི་ཚངས་པ་ཆེན་པོ་གཙུག་ཕུད་ཅན་དུ་འགྱུར་བར་གསུངས་པ་བཞིན། གསང་བའི་བདག་པོ་ཆེན་པོ་འདི་ཉིད་སངས་རྒྱས་སྟོང་པོ་ཐམས་ཅད་ཀྱི་རྗེས་སུ་འབྲངས་ཤིང་བར་ཆད་སྲུང་བ་དང་། ཐུན་མོང་དང་ཐུན་མོང་མ་ཡིན་པའི་གསང་བའི་མཛོད་ཐམས་ཅད་བཟུང་ནས་སངས་རྒྱས་སྟོང་རྫོགས་པ་དང་ཤར་ཕྱོགས་མངོན་དགའི་ཞིང་དུ་རྒྱལ་བ་མི་འཁྲུགས་པའི་དྲུང་དུ་བྱོན་ནས་བསྙེན་བཀུར་བ་དང་། དེ་ནས་རིམ་བཞིན་སངས་རྒྱས་བྱེ་བ་གྲངས་མེད་པ་མཆོད་ནས་རྒྱལ་བའི་སྲས་ཀྱི་སྤྱོད་པ་ཡོངས་སུ་རྫོགས་པ་ན། རྣམ་པར་སྦྱོར་བ་ཞེས་བྱ་བའི་བསྐལ་པ་ལ། ཀུན་ནས་ཡོངས་སུ་དག་པ་ཞེས་བྱ་བའི་ཞིང་ཁམས་སུ་མངོན་པར་རྫོགས་པ་སངས་རྒྱས་ཏེ། དེ་བཞིན་གཤེགས་པ་རྡོ་རྗེ་རྣམ་པར་གནོན་པ་ཞེས་ཐེག་པ་ཆེན་པོའི་ཆོས་འབའ་ཞིག་གསུངས་པ་ཞིག་ཏུ་འགྱུར་བར་བཤད་པ་སོགས་མཐའ་ཀླས་ཤིང་། དོན་དམ་པར་སངས་རྒྱས་ཐམས་ཅད་ཀྱི་ཐུགས་རྣམ་པར་མི་རྟོག་པའི་ཡེ་ཤེས་ཚུར་མཐོང་གི་སྣང་ངོར་རི་རབ་ཀྱི་བྱང་ཕྱོགས་ལྕང་ལོ་ཅན་དུ་གནོད་སྦྱིན་ཐམས་ཅད་ཀྱི་སྡེ་དཔོན་གྱི་ཚུལ་དུ་བཞུགས་པར་བཤད་པ་དང་། ཁྱད་པར་སྡེ་སྣོད་གསུམ་དང་། རྒྱུད་སྡེ་བཞིའི་སྡུད་པ་པོར་བཤད་པ་དེ་དང་དེ་དག་ཀྱང་གསང་བའི་བདག་པོ་འབའ་ཞིག་གི་སྤྲུལ་པ་ཡིན་ཏེ། རྒྱས་པར་སྣང་བ་བསམ་གྱིས་མི་ཁྱབ་པའི་མདོ་དང་། ཕྱག་ན་རྡོ་རྗེ་དབང་བསྐུར་པའི་རྒྱུད་སོགས་སུ་ཤེས་པར་བྱའོ། ། ། ། ༈

[edit]

phyag na rdo rje/ byang chub sems dpa' phyag na rdo rje ni/_dkon mchog brtsegs pa'i 'dus pa gsum par/_sngon bskal pa grangs med pa'i gong rol du bskal pa mdzes bar snang ba zhes bya bar/_zhing khams rnam par brgyan pa bkod pa khyad par 'phags pas brgyan pa der de bzhin gshegs pa yon tan mtha' yas rin chen sna tshogs bkod pa'i rgyal po zhes bya ba 'jig rten du byung ste/_de'i tshe de'i dus na 'khor los sgyur rgyal yul 'khor srung la sras stong dang /_khye'u chos kyi sems dpa' dang /_chos kyi blo gros zhes bya ba'i rdzus skyes mched gnyis bcas byung ba'i/_rgyal po de ni de bzhin gshegs pa mar me mdzad dang /_sras stong ni bskal pa bzang po'i sangs rgyas stong rtsa gnyis/_khye'u chos sems ni byang chub sems dpa' phyag na rdo rje dang /_khye'u chos kyi blo gros ni tshangs pa chen po gtsug phud can du 'gyur bar gsungs pa bzhin/_gsang ba'i bdag po chen po 'di nyid sangs rgyas stong po thams cad kyi rjes su 'brangs shing bar chad srung ba dang /_thun mong dang thun mong ma yin pa'i gsang ba'i mdzod thams cad bzung nas sangs rgyas stong rdzogs pa dang shar phyogs mngon dga'i zhing du rgyal ba mi 'khrugs pa'i drung du byon nas bsnyen bkur ba dang /_de nas rim bzhin sangs rgyas bye ba grangs med pa mchod nas rgyal ba'i sras kyi spyod pa yongs su rdzogs pa na/_rnam par sbyor ba zhes bya ba'i bskal pa la/_kun nas yongs su dag pa zhes bya ba'i zhing khams su mngon par rdzogs pa sangs rgyas te/_de bzhin gshegs pa rdo rje rnam par gnon pa zhes theg pa chen po'i chos 'ba' zhig gsungs pa zhig tu 'gyur bar bshad pa sogs mtha' klas shing /_don dam par sangs rgyas thams cad kyi thugs rnam par mi rtog pa'i ye shes tshur mthong gi snang ngor ri rab kyi byang phyogs lcang lo can du gnod sbyin thams cad kyi sde dpon gyi tshul du bzhugs par bshad pa dang /_khyad par sde snod gsum dang /_rgyud sde bzhi'i sdud pa por bshad pa de dang de dag kyang gsang ba'i bdag po 'ba' zhig gi sprul pa yin te/_rgyas par snang ba bsam gyis mi khyab pa'i mdo dang /_phyag na rdo rje dbang bskur pa'i rgyud sogs su shes par bya'o/_/__/_/_!