བཤེས་གཉེན་ལ་སྤྲིང་བའི་གཏམ་ཐེག་པའི་འཁྲི་ཤིང་།

🚧 This website is under continued development. We appreciate your patience!

Previous Text Back to Volume PageNext Text

Wylie title	bshes gnyen la spring ba'i gtam theg pa'i 'khri shing
Location	mkhyen brtse'i bka' 'bum Volume 2, sde tshan 1, Text 15, Pages 48-52 (Folios 24b2 to 26b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bshes gnyen la spring ba'i gtam theg pa'i 'khri shing. In 'jam dbyangs mkhyen brtse'i dbang po'i bka' 'bum, Vol. 2: 48-52. Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam

1 Texts in this Section (sde tshan or chos tshan)

15 48-52	བཤེས་གཉེན་ལ་སྤྲིང་བའི་གཏམ་ཐེག་པའི་འཁྲི་ཤིང་། bshes gnyen la spring ba'i gtam theg pa'i 'khri shing Discourses - gtam	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

བཤེས་གཉེན་ལ་སྤྲིང་བའི་གཏམ་ཐེག་པའི་འཁྲི་ཤིང་ཞེས་བྱ་བ། འཇི༷གས་བྲལ་འགྱུར་བདེའི་མཐའ་ལས་འདས་པའི་ཟུང་འཇུག་འཕོ་མེ༷ད་ཆུ་སྐྱེས་གསར། །བསོ༷ད་ན༷མས་ཡེ་ཤེས་ཚོགས་གཉིས་ཉིན་བྱེད་འཛུམ་པའི་རྟགས་ཀྱི་སོར་མོ་ཡིས། །ཉེར་ཕྱེད་དེ་ཚེ་རྣམ་ཀུན་མཆོ༷ག་ལྡ༷ན་འཁྱུད་རྒྱས་རོལ་པའི་བཅུད་ལེན་ཅན། །མཚུངས་བྲལ་བཤེས་གཉེན་སྲིད་དང་ཞི་བའི་ཐོར་ཚུགས་རྩེ་མོར་རྒྱལ་གྱུར་ཅིག ༡ །གཙུག་ཏོར་དྲྭ་བ་མཛེས་པའི་དོག་པ་རྣམ་པར་བྲལ་ཡང་སོར་མོ་ཡིས། །དེ་མཚོན་གདེངས་ཀ་གྱེན་དུ་ཕྱོགས་པའི་ཨུཏྤལ་དམར་པོའི་དཔེ་ཟླ་ཅན། །རབ་གུས་གདུང་བའི་ཡིད་ཀྱི་དབང་གྱུར་ཉེ་བར་གསོལ་བའི་ཚིག་གི་ཕྲེང་། །སྙན་པ་བྲལ་མོད་རང་བཞིན་ཉིད་དུ་དད་པས་བརྗོད་འདི་དོན་གྱིས་ལྕི། ༢ །ཟླ་བའི་ཐོད་ཅན་འཛུམ་ཟེར་རལ་པ་བདེ་འབྱུང་དབང་པོའི་མཐུ་མ་ཡིན། །ཚུལ་མིན་མྱོས་ལྡན་མཚམས་སྤྲིན་བཞིན་མདངས་འདོད་འགྲོའི་འཇོ་སྒེག་གིས་བསླུས་མིན། །དེ་ལྟར་ན་ཡང་སྔོན་སྨོན་གྱིས་བསྐྲུན་བློ་གྲོས་གཏེར་ལྡན་དེ་དབང་དུ། །སོང་བ་གང་ཞིག་བདེན་པ་གཉིས་ཀྱི་ཆོས་ཚུལ་རྒྱ་མཚོའི་སྙིང་པོ་ཉིད། ༣ །བཅད་ལྷུག་སྤེལ་བའི་ཉམས་བརྒྱས་རབ་སྒེག་སྙན་པར་སྨྲ་བའི་འཛམ་བུའི་ཤིང་། །རང་བཞིན་རྐྱེན་དང་རྣམ་འགྱུར་གྱིས་མཚོན་འབྲས་བུར་སྨིན་པའི་དོག་པ་ནི། །བསྒྱུར་བགོད་འཕྲི་བསྣན་རི་མོའི་འགྲོས་ལྡན་མ་དྲོས་རླབས་ཀྱིས་བཟུང་བ་ལས། །རིག་པའི་གནས་ཀུན་སྨྲ་བའི་ཁྱུ་མཆོག་སུཪྺཎ་ཡི་དཔེ་ཟླར་བསྒྲུབས། ༤ །གང་ན་སྤོང་བདུན་འཁོར་བཅས་ཆུ་གཏེར་བསྲུབས་ལས་འཐོན་པའི་རིག་གྲོལ་ཟླ། །བཅས་དང་རང་བཞིན་དོན་ལ་མི་འགལ་ངེས་པར་འབྱུང་བའི་རི་དྭགས་ཅན། །སྲིད་པའི་སྡུག་བསྔལ་ཁོང་བུར་དབུགས་འབྱིན་ཞི་བདེའི་ངལ་བསོའི་འཛུམ་ཟེར་གྱིས། །འཇུག་སྒོ་ཐོག་མའི་ཀུནྡཱའི་འབབ་སྟེགས་ཡོངས་སུ་ཕྱེ་ཕྱིར་ལྷགས་པ་བཞིན། ༥ །ཡིད་ནི་གཞན་ལ་ཕན་པའི་འཁྲི་ཤིང་དམ་པ་ཉིད་དུ་ཆགས་པ་ལས། །སྨོན་འཇུག་སེམས་ཀྱི་པདྨ་དཀར་པོའི་ལ་ཐོད་མཛེས་པའི་བསིལ་ཡབ་དེས། །དམན་པའི་བློ་ཅན་སྲས་བཅས་རྒྱལ་བའི་གྲིབ་བསིལ་མཆོག་ཏུ་དེས་སྦྱར་ཏེ། །ཆེན་པོ་བདུན་ལྡན་ཐེག་པའི་དྲྭ་བར་ངལ་བསོའི་དབུགས་རབ་འབྱིན་བར་གྱུར། ༦ །ཁྱད་པར་དུ་མས་མངོན་པར་འཕགས་པའི་བླ་མེད་རྡོ་རྗེའི་མཚན་དོན་ལ། །ཉེ་བར་གནས་པས་མི་ཕྱེད་བརྟག་དཀར་དཔལ་ལྡན་མྱུར་བའི་ཤུལ་ལམ་དོར། །སྨིན་བྱེད་ཀྱིས་གཞུག་དམ་ཚིག་གྲོགས་བཅས་རིམ་གཉིས་འདེགས་འཇོག་བསྒྱུར་བ་ཡིས། །ཁ་སྦྱོར་བདུན་ལྡན་རིན་ཆེན་གླིང་ཕྱིན་རྟག་ཁྱབ་ལྷུན་གྲུབ་རོལ་པས་སྤྱོད། ༧ །དེ་ལྟའི་ཐེག་གསུམ་ཡིད་བྱེད་ལས་འདས་མངོན་སུམ་སྙིང་ཏིག་བདུད་རྩིའི་གཏེར། །གསང་སྔགས་རིགས་ཅན་ལྷ་རྣམས་ཀུན་ལ་བགོ་བཤའ་བྱེད་མོད་ཡང་དག་པའི། །ངེས་ཤེས་བརྟན་ལྡན་སྒྲ་གཅན་ཕྲག་དོག་རྣམ་པར་བཏུད་པའི་དཔལ་དེ་ཡིས། །མི་ཤིགས་འཕོ་ཆེན་བདེ་བའི་རྡོ་རྗེར་འཆི་མེད་སྲོག་གི་ཀ་བ་བཙུགས། ༨ །བྱུང་གནས་འགྲོ་གསུམ་རྟོག་པས་མ་བཅིངས་བརྗོད་མེད་ལྷན་སྐྱེས་ཡེ་ཤེས་ནི། །གཟོད་མ་ཉིད་ནས་གྲུབ་པ་ལས་འདས་གཞི་གྲོལ་ཀ་དག་ལྟ་བའི་ཀློང་། །རིག་གདངས་སྒྲོན་བཞིའི་རོལ་པས་མངོན་སྤྲུལ་རྡོ་རྗེ་ལུ་གུ་རྒྱུད་ཀྱི་སྦུབས། །དབྱེར་མེད་འདྲེས་ལས་རོ་གཅིག་ལྷུན་གྲུབ་འོད་གསལ་འདུས་མ་བྱས་དབྱིངས་ཐིམ། ༩ །དེ་ལྟར་རིམ་འཇུག་ཐེག་པའི་མཆིལ་པ་རྣོན་པོའི་དབང་དུ་བྱས་པ་ཡིས། །ཀུན་ནས་དུལ་གྱུར་སེམས་ཀྱི་གཉིས་འཐུང་རྫོགས་པ་ཆེན་པོའི་གཙུག་ཏོར་ཅན། །ཁྱོད་གཅིག་ཐར་པའི་ས་འཛིན་དབང་པོར་རྣམ་པར་བཤེས་པའི་བརྟུལ་ཞུགས་དེར། །རྗེས་སུ་བསྔགས་ཏེ་ཆོས་ཀྱི་གླེང་མོ་ཅུང་ཟད་མགྲིན་པའི་རོལ་མོར་འཁྲོལ། ༡༠ །ནང་གི་དེ་ཉིད་བསམ་གྱིས་མི་ཁྱབ་ཆོས་ཀུན་གཟིགས་པའི་རྡུལ་བྲལ་སྤྱན། །འཇམ་དཔལ་གཞོན་ནུར་མངོན་པར་འགྲུབ་པའི་ཀུན་མཁྱེན་དེ་ཡིས་རྗེས་བཟུང་བའི། །གྲུབ་པའི་གོ་འཕང་མཐོན་པོར་གཤེགས་པའི་རྣལ་འབྱོར་མཆོག་གི་ཕྱག་རྒྱ་ཡིས། །རྗེས་སུ་སྐྱོང་ཁྱོད་གཞན་དུ་དཀོན་མཐོང་ཡང་དག་བཤེས་སུ་ངེས་པ་རྙེད། ༡༡ །འདིར་གནས་རྨོངས་པའི་ཚོན་རིས་སྟུག་པོ་འགོག་པ་མེད་པར་ཤར་བ་ལ། །གང་གང་འཛིན་པའི་རིག་ཤེས་རྗེས་འགྲོ་ཆོས་ཚུལ་བཟུང་བའི་བུས་པ་ཡང་། །ཡང་དག་བསྟན་དང་སྟོན་པ་སྤྱི་དང་ཁྱད་པར་སྔ་འགྱུར་ཡོ་ག་གསུམ། །ཚུལ་དེར་རབ་དད་སྐྱབས་གསུམ་འཛིན་པའི་གདུགས་ཀར་ཁོང་བུར་ངལ་བསོ་ཐོབ།༡༢ །བདག་ཅག་འདྲེན་པ་ཐམས་ཅད་མཁྱེན་ཞབས་འཇི༷གས་མེ༷ད་བློ༷་ལྡ༷ན་རྒྱ༷་མཚོ༷་ཡིས། །དཔལ་གྱི་མགུར་ལས་ཆོས་ཚུལ་ཟད་མེད་རོལ་མོར་འཁྲོལ་བ་རྗེས་མཚོན་སླད། །འཁོར་བ་ལས་སྒྲོལ་དུས་གསུམ་རྒྱལ་ཡུམ་ཡོན་ཏན་ནོར་བུའི་ཟ་མ་ཏོག །གང་ལ་རབ་བསྔགས་ཟུང་གིས་བརྒྱན་པའི་ཕྲེང་བ་འདི་ཉིད་དབུལ་བར་བགྱི། ༡༣ །སླད་མའི་ཆར་ཡང་ནང་གི་དེ་ཉིད་དཔྱིད་དང་ཐིག་ལེ་མཉམ་སྦྱོར་བའི། །བདེ་སྟོང་ཡོན་ཏན་ཕྱི་རོལ་ལ་སྨིན་ས་བཅུ་རྒྱུན་མཐར་ཞུགས་ཀྱི་བར། །ཚུར་མཐོང་སྐལ་བཟང་འགྲོ་བའི་སྤྱོད་ཡུལ་གདན་གསུམ་མི་འགྱུར་རྟག་པའི་མཐུས། །ཨཽ་ཌཱིའི་ཡུལ་ལྟར་སྔགས་རིག་གྲུབ་པའི་ཧེ་རུ་ཀ་ཡིས་ཀུན་བཟང་སྨོན། ༡༤ །དེ་སྐད་གསོལ་བ་ཀུན་མཁྱེན་རྗེ་དེའི་བྱིན་རླབས་སྙིང་དབུས་སིམ་པ་ལས། །དད་པའི་རྟོག་པ་ཕྱོགས་ཙམ་མཆིས་དེའི་ཚུལ་གནས་ཐོས་བསམ་སྒོམ་གསུམ་ལ། །སྨོན་པའི་བློ་ཅན་འཇིགས་མེད་མཁྱེན་བརྩེའི་མྱུ་གུ་ཞེས་བགྱི་གཞོན་ནུ་དེས། །སྤྲིང་བ་འདིས་མཐུས་ཐུགས་ཡིད་འདྲེས་པའི་བསམ་སྦྱོར་ཡང་དག་འགྲུབ་གྱུར་ཅིག ༡༥ །སརྦ་ས་མནྟ་ཤུ་བྷཾ་ཛ་ཡནྟུ།། །། ༈

[edit]

bshes gnyen la spring ba'i gtam theg pa'i 'khri shing /__ bshes gnyen la spring ba'i gtam theg pa'i 'khri shing zhes bya ba/_'jiXgs bral 'gyur bde'i mtha' las 'das pa'i zung 'jug 'pho meXd chu skyes gsar/_/bsoXd naXms ye shes tshogs gnyis nyin byed 'dzum pa'i rtags kyi sor mo yis/_/nyer phyed de tshe rnam kun mchoXg ldaXn 'khyud rgyas rol pa'i bcud len can/_/mtshungs bral bshes gnyen srid dang zhi ba'i thor tshugs rtse mor rgyal gyur cig__1__/gtsug tor drwa ba mdzes pa'i dog pa rnam par bral yang sor mo yis/_/de mtshon gdengs ka gyen du phyogs pa'i ut+pal dmar po'i dpe zla can/_/rab gus gdung ba'i yid kyi dbang gyur nye bar gsol ba'i tshig gi phreng /_/snyan pa bral mod rang bzhin nyid du dad pas brjod 'di don gyis lci/_2__/zla ba'i thod can 'dzum zer ral pa bde 'byung dbang po'i mthu ma yin/_/tshul min myos ldan mtshams sprin bzhin mdangs 'dod 'gro'i 'jo sgeg gis bslus min/_/de ltar na yang sngon smon gyis bskrun blo gros gter ldan de dbang du/_/song ba gang zhig bden pa gnyis kyi chos tshul rgya mtsho'i snying po nyid/_3__/bcad lhug spel ba'i nyams brgyas rab sgeg snyan par smra ba'i 'dzam bu'i shing /_/rang bzhin rkyen dang rnam 'gyur gyis mtshon 'bras bur smin pa'i dog pa ni/_/bsgyur bgod 'phri bsnan ri mo'i 'gros ldan ma dros rlabs kyis bzung ba las/_/rig pa'i gnas kun smra ba'i khyu mchog suR+WaN yi dpe zlar bsgrubs/_4__/gang na spong bdun 'khor bcas chu gter bsrubs las 'thon pa'i rig grol zla/_/bcas dang rang bzhin don la mi 'gal nges par 'byung ba'i ri dwags can/_/srid pa'i sdug bsngal khong bur dbugs 'byin zhi bde'i ngal bso'i 'dzum zer gyis/_/'jug sgo thog ma'i kun+dA'i 'bab stegs yongs su phye phyir lhags pa bzhin/_5__/yid ni gzhan la phan pa'i 'khri shing dam pa nyid du chags pa las/_/smon 'jug sems kyi pad+ma dkar po'i la thod mdzes pa'i bsil yab des/_/dman pa'i blo can sras bcas rgyal ba'i grib bsil mchog tu des sbyar te/_/chen po bdun ldan theg pa'i drwa bar ngal bso'i dbugs rab 'byin bar gyur/_6__/khyad par du mas mngon par 'phags pa'i bla med rdo rje'i mtshan don la/_/nye bar gnas pas mi phyed brtag dkar dpal ldan myur ba'i shul lam dor/_/smin byed kyis gzhug dam tshig grogs bcas rim gnyis 'degs 'jog bsgyur ba yis/_/kha sbyor bdun ldan rin chen gling phyin rtag khyab lhun grub rol pas spyod/_7__/de lta'i theg gsum yid byed las 'das mngon sum snying tig bdud rtsi'i gter/_/gsang sngags rigs can lha rnams kun la bgo bsha' byed mod yang dag pa'i/_/nges shes brtan ldan sgra gcan phrag dog rnam par btud pa'i dpal de yis/_/mi shigs 'pho chen bde ba'i rdo rjer 'chi med srog gi ka ba btsugs/_8__/byung gnas 'gro gsum rtog pas ma bcings brjod med lhan skyes ye shes ni/_/gzod ma nyid nas grub pa las 'das gzhi grol ka dag lta ba'i klong /_/rig gdangs sgron bzhi'i rol pas mngon sprul rdo rje lu gu rgyud kyi sbubs/_/dbyer med 'dres las ro gcig lhun grub 'od gsal 'dus ma byas dbyings thim/_9_/de ltar rim 'jug theg pa'i mchil pa rnon po'i dbang du byas pa yis/_/kun nas dul gyur sems kyi gnyis 'thung rdzogs pa chen po'i gtsug tor can/_/khyod gcig thar pa'i sa 'dzin dbang por rnam par bshes pa'i brtul zhugs der/_/rjes su bsngags te chos kyi gleng mo cung zad mgrin pa'i rol mor 'khrol/_10__/nang gi de nyid bsam gyis mi khyab chos kun gzigs pa'i rdul bral spyan/_/'jam dpal gzhon nur mngon par 'grub pa'i kun mkhyen de yis rjes bzung ba'i/_/grub pa'i go 'phang mthon por gshegs pa'i rnal 'byor mchog gi phyag rgya yis/_/rjes su skyong khyod gzhan du dkon mthong yang dag bshes su nges pa rnyed/_11__/'dir gnas rmongs pa'i tshon ris stug po 'gog pa med par shar ba la/_/gang gang 'dzin pa'i rig shes rjes 'gro chos tshul bzung ba'i bus pa yang /_/yang dag bstan dang ston pa spyi dang khyad par snga 'gyur yo ga gsum/_/tshul der rab dad skyabs gsum 'dzin pa'i gdugs kar khong bur ngal bso thob/12__/bdag cag 'dren pa thams cad mkhyen zhabs 'jiXgs meXd bloX ldaXn rgyaX mtshoX yis/_/dpal gyi mgur las chos tshul zad med rol mor 'khrol ba rjes mtshon slad/_/'khor ba las sgrol dus gsum rgyal yum yon tan nor bu'i za ma tog__/gang la rab bsngags zung gis brgyan pa'i phreng ba 'di nyid dbul bar bgyi/_13__/slad ma'i char yang nang gi de nyid dpyid dang thig le mnyam sbyor ba'i/_/bde stong yon tan phyi rol la smin sa bcu rgyun mthar zhugs kyi bar/_/tshur mthong skal bzang 'gro ba'i spyod yul gdan gsum mi 'gyur rtag pa'i mthus/_/au DI'i yul ltar sngags rig grub pa'i he ru ka yis kun bzang smon/_14_/de skad gsol ba kun mkhyen rje de'i byin rlabs snying dbus sim pa las/_/dad pa'i rtog pa phyogs tsam mchis de'i tshul gnas thos bsam sgom gsum la/_/smon pa'i blo can 'jigs med mkhyen brtse'i myu gu zhes bgyi gzhon nu des/_/spring ba 'dis mthus thugs yid 'dres pa'i bsam sbyor yang dag 'grub gyur cig__15_/sarba sa man+ta shu b+haM dza yan+tu//___//_!