JKW-KABAB-13-PA-004

From Khyentse Lineage - A Tsadra Foundation Project

གྲོལ་ཏིག་ཞི་ཁྲོའི་དབང་བསྐུར་གྱི་ཆོ་ག་སྡིག་སྒྲིབ་རྒྱུན་གཅོད།
Wylie title grol tig zhi khro'i dbang bskur gyi cho ga sdig sgrib rgyun gcod JKW-KABAB-13-PA-004.pdf
Location mkhyen brtse'i bka' babs
Volume 13, Text 4, Pages 59-71 (Folios 1a to 7a1)
Author ཕུན་ཚོགས་རྣམ་རྒྱལ་
Less details More details
Tertön འཕྲེང་པོ་གཏེར་སྟོན་ཤེས་རབ་འོད་ཟེར་, འཇམ་དབྱངས་མཁྱེན་བརྩེའི་དབང་པོ་ ('phreng po gter ston shes rab 'od zer, 'jam dbyangs mkhyen brtse'i dbang po)
Source Author(s) མཁའ་ཁྱབ་རྡོ་རྗེ་ (Karmapa, 15th)
Citation Phun tshogs rnam rgyal. grol tig zhi khro'i dbang bskur gyi cho ga sdig sgrib rgyun gcod. In Rdzong sar 'jam dbyangs mkhyen brtse'i dbang po'i bka' babs, Vol. 13: 59-71. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre Empowerment Ritual - dbang chog - dbang skur
Cycle གྲོལ་ཏིག་དགོངས་པ་རང་གྲོལ་གྱི་ཆོས་སྡེ་ (grol tig dgongs pa rang grol gyi chos sde)
Deity zhi khro
Karchag page JKW-KABAB-Volume-13-PA-Karchag
Colophon

།ཅེས་པའང་རྒྱལ་དབང་ཀརྨ་པ་མཁའ་ཁྱབ་རྡོ་རྗེའི་གསུང་བཞིན་ཕུན་ཚོགས་རྣམ་རྒྱལ་པས་བསྡེབས་པའོ།། །།

ces pa'ang rgyal dbang karma pa mkha' khyab rdo rje'i gsung bzhin phun tshogs rnam rgyal pas bsdebs pa'o

":Property:textsubnumber|textsubnumber" can not be assigned to a declared number type with value 1.

[edit]
༄༅། །གྲོལ་ཏིག་ཞི་ཁྲོའི་དབང་བསྐུར་གྱི་ཆོ་ག་སྡིག་སྒྲིབ་རྒྱུན་གཅོད་ཞེས་བྱ་བ་བཞུགས་སོ།།

༄༅། །སྣང་སྲིད་གཞིར་བཞེངས་ཞི་ཁྲོའི་ལྷ། །འབྲས་བུའི་བཅུད་དུ་ཡོངས་སྨིན་པ། །བླ་མའི་ཞབས་ལ་གུས་བཏུད་ནས། །དབང་གི་ཆོ་ག་འདིར་གསལ་བྱ། །དེ་ལ་འདི་ཡི་དབང་བསྐུར་བར་འདོད་པས་ཐོག་མར་སྦྱོར་བ་ཡོ་བྱད་ཀྱི་ཤོམས་དང་དབང་དོན་སྒྲུབ་མཆོད་ཀྱི་རིམ་པ་རྣམས་ཕྲིན་ལས་འོད་གསལ་སྙིང་པོ་ལྟར་དང་བཟླས་པའི་དབུར་ཛབ྄་ཁང་དབྱེ། བཟླས་པ་གྲུབ་ནས་རྣམ་བུམ་ལ་དམིགས་ཏེ། བུམ་པ་རང་བྱུང་གི་གཞལ་མེད་ཁང་ཆེན་པོར་ཀུན་བཟང་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་ལྷ་ཚོགས་དྭངས་པའི་མཚོ་ལ་གཟའ་སྐར་ཤར་བ་བཞིན་ལྷག་པར་གསལ་བར་གྱུར། བདག་སྲོག་སྔགས་ཀྱི་འོད་ཟེར་གཟུངས་ཐག་ལ། འཁྲིལ་ཏེ་བུམ་པའི་ལྷ་ཚོགས་ཐུགས་ཀར་ཞུགས། དེ་དག་སྐུ་ལས་བྱང་སེམས་བདུད་རྩིའི་རྒྱུན། བབས་པས་བུམ་ཆུར་གཉིས་མེད་རོ་གཅིག་གྱུར། ཅེས་བརྗོད་ཅིང་བསམས་ལ་གཟུངས་ཐག་ནས་བཟུང་སྟེ་སྔགས་ཅི་ནུས་བཟླ། ལས་བུམ་དུ་རྡོ་རྗེ་སེམས་དཔའ་སྐད་ཅིག་གིས་གསལ་བའི་སྐུ་ལས་བདུད་རྩིའི་རྒྱུན་བབས་པས་བུམ་པ་གང་བར་གྱུར་པར་བསམས་ལ་ཡི་གེ་བརྒྱ་པ་ཅི་རིགས་བཟླ། ཐུན་མཐར་མཆོད་པ་དང་ཡི་གེ་བརྒྱ་པའི་རྗེས། ཨོཾ་ཨཱཿཧཱུྃ་གིས་དུང་ཞལ་གྱི་ཆུ་མཆོད་ཡོན་དུ་དྲངས་པས་བུམ་པའི་ལྷ་བདེ་སྟོང་ཆེན་པོའི་ངོ་བོར་འོད་དུ་ཞུ་ནས་བུམ་ཆུ་དང་དབྱེར་མེད་རོ་གཅིག་ཏུ་གྱུར་པར་བསམ། དེ་ནས་བདག་འཇུག་བླང་བའམ་རིག་པའི་མེ་ཏོག་དོར། དབང་དངོས་ལ། ཐོག་མར་ཁྲུས་དང༌། བགེགས་བསྐྲད། སྲུང་འཁོར་བསྒོམ། སེམས་བསྐྱེད་གསལ་བཏབ་ལ། དེ་ལ་འདིར་དུས་གསུམ་གྱི་སངས་རྒྱས་སྲས་དང་བཅས་པའི་ཐུགས་རྗེ་ཕྲིན་ལས་གཅིག་ཏུ་འདུས་ཤིང༌། དེ་དག་ཐམས་ཅད་ལས་ཀྱང་རྣམ་ཐར་དང་བཀའ་དྲིན་ཁྱད་པར་དུ་འཕགས་པ། གུ་རུ་རིན་པོ་ཆེ་པདྨ་སཾ་བྷ་ཝ་ཉིད་ཀྱི་ཐུགས་ཀྱི་ཐིག་ལེ་མཐར་ཐུག་པ། སྤྲུལ་པའི་རྗེ་འབངས་གྲོགས་གསུམ་ལ་ལྐོག་ཆོས་སུ་བསྩལ་བ། པདྨའི་ཞལ་གདམས་གྲོལ་ཐིག་དགོངས་པ་རང་གྲོལ་ཞེས་ཡོངས་སུ་གྲགས་ཤིང༌། གྲོལ་བ་བཞི་ལྡན་གྱི་ཟབ་ཆོས་ཁྱད་པར་དུ་འཕགས་པ། ལོ་ཆེན་བཻ་རོ་ཙ་ནའི་ཐུགས་སྤྲུལ། མཁས་ཤིང་གྲུབ་པ་ཡོངས་ཀྱི་འཁོར་ལོས་སྒྱུར་བ་འགྲོ་འདུལ་ཤེས་རབ་འོད་ཟེར་གྱིས་དབུར་སྟོད་བྲག་རི་རིན་ཆེན་སྤུངས་པ་སོགས་གཏེར་གནས་དྲུག་ནས་སྤྱན་དྲངས་པའི་ནང་ཚན། སྔོ་འཕྲང་ཀླུ་བདུད་མཁར་གྱི་གཏེར་བྱོན། ཞི་ཁྲོའི་བསྐྱེད་རྫོགས་ལམ་འབྲས་སྙིང་པོའི་དབང་བསྐུར་ཟབ་མོ་འདི་ཉིད་བསྒྲུབ་པར་བགྱི་བ་ལ་སོགས་ཀྱིས་མཚམས་སྦྱར་ནས་མཎྜལ་འབུལ་དུ་གཞུག བླ་མ་དཀྱིལ་འཁོར་གྱི་དབང་ཕྱུག་དང་གཉིས་སུ་མེད་པའི་དྲུང་དུ་དཀྱིལ་འཁོར་དུ་འཇུག་པའི་དོན་དུ་གསོལ་བ་འདེབས་པ་འདིའི་རྗེས་ཟློས། རྡོ་རྗེ་སློབ་དཔོན་དགོངས་སུ་གསོལ༔ སྔོན་ཆད་ལམ་ལོག་འཁོར་བར་འཁྱམས༔ སྲིད་པའི་མཚོ་ལས་བསྒྲལ་སླད་དུ༔ བླ་མ་ཞི་ཁྲོའི་དཀྱིལ་འཁོར་དུ༔ བདག་ཉིད་འཇུག་པར་འཚལ་བར་བགྱི༔ ལན་གསུམ། མདུན་གྱི་ནམ་མཁར་རྩ་གསུམ་ཞི་ཁྲོའི་དཀྱྀལ་འཁོར་གྱི་ལྷ་ཚོགས་མངོན་སུམ་དུ་བཞུགས་པའི་སྤྱན་སྔར། བསགས་སྦྱོང་གི་སྙིང་པོ་བསྡུས་པ་ཡན་ལག་བཅུ་པའི་ཏིང་ངེ་འཛིན་གསལ་འདེབས་བཞིན་པས་འདིའི་རྗེས་ཟློས། ཧཱུྃ༔ རྣམ་དག་མཉམ་པའི་ངང་ཉིད་ལས༔ བླ་མ་ཞི་ཁྲོའི་ལྷ་ཚོགས་གཤེགས༔ པདྨ་ཉི་ཟླའི་སྟེང་དུ་བཞུགས༔ ཕྱག་འཚལ་མཆོད་འབུལ་སྡིག་པ་བཤགས༔ དགེ་ལ་ཡི་རང་ཆོས་འཁོར་བསྐུལ༔ བཞུགས་གསོལ་འདེབས་སོ་དགེ་རྩ་བསྔོ༔ ཡང་དག་རྡོ་རྗེ་འཆང་ཐོབ་ཤོག༔ ལན་གསུམ། དཀྱིལ་འཁོར་དུ་འཇུག་ཅིང་དབང་གི་ཡེ་ཤེས་སྐྱཻ་བའི་རྟེན་སྐྱབས་གསུམ་སྔོན་དུ་འགྲོ་བས། སོ་ཐར། བྱང་སེམས། རིག་འཛིན་གྱི་སྡེ་སྣོད་རྣམས་ཀྱི་བསླབ་བྱ་མཐའ་དག་བླངས་ནས། ཚུལ་བཞིན་བསྲུང་བར་དམ་བཅའ་བའི་བློ་བརྟན་པོས་འདིའི་རྗེས་ཟློས། བླ་མ་ཞི་ཁྲོ་སྐྱབས་ཀྱི་མཆོག་ཏུ་འཛིན༔ འགྲོ་བའི་དོན་དུ་སྨོན་འཇུག་སེམས་བསྐྱེད་དེ༔ སྐུ་གསུང་ཐུགས་དང་མཉམ་སྦྱོར་གསང་སྔགས་ཀྱི༔ དམ་ཚིག་སྡོམ་པ་རྟག་ཏུ་བསྐྱང་བར་བགྱི༔ ལན་གསུམ། དེ་ནས་དངོས་གཞིའི་ཡེ་ཤེས་དབབ་པའི་སླད་དུ་དམིགས་པ་འདི་བཞིན་དུ་མཛོད། ཁྱེད་རང་རྣམས་དཀྱིལ་འཁོར་གྱི་ཤར་སྒོའི་འགྲམ་དུ་དབང་སྟེགས་པད་ཟླའི་གདན་གྱི་སྟེང་དུ་འཁོད་པ་ལ། བདག་སློབ་དཔོན་ཀུན་བཟང་ཡབ་ཡུམ་དུ་གསལ་བའི་ཐུགས་ཀའི་ས་བོན་ལས་འོད་ཟེར་བྱུང༌། རྣམ་སྨིན་གྱི་ཕུང་པོ་སྦྱངས། རྣམ་པར་ཤེས་པ་ཧཱུྃ་མཐིང་གར་གྱུར་པ་ཡབ་ཀྱི་ཞལ་དུ་དྲངས། སྐུའི་དབྱིབས་བརྒྱུད། ཡུམ་གྱི་པདྨར་བབས། ཕྱིར་བྱུང་ནས་རང་གི་གདན་ལ་འཁོད་པས་ཀུན་བཟང་རྡོ་རྗེ་སེམས་དཔའ་ཞི་ཁྲོ་རབ་འབྱམས་ཀུན་འདུས་སུ་གསལ་བའི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པ། ཐུགས་ཀའི་ས་བོན་ལས་འོད་ཟེར་འཕྲོས། ཕྱོགས་བཅུ་དུས་བཞིའི་རྩ་གསུམ་རྒྱལ་བ་རབ་འབྱམས་ཐམས་ཅད་བདེ་གཤེགས་ཞི་ཁྲོ་རབ་འབྱམས་ཀྱི་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པར་ཁ་ཆར་བུ་ཡུག་འཚུབས་པ་བཞིན་སྤྱན་དྲངས་ཏེ་སྙིང་ག་ནས་སིབ་སིབ་ཐིམ་པས་རྒྱུད་བྱིན་གྱིས་བརླབས་པར་གྱུར་པའི་མོས་པ་མཛོད། སྤོས་རོལ་བཅས། ཧཱུྃ༔ ཐུགས་སྲོག་ཧཱུྃ་ལས་འོད་ཟེར་འཕྲོས༔ ཕྱོགས་བཅུ་དུས་བཞིའི་རྒྱལ་བ་རྣམས༔ མཁའ་ལ་ཆར་ལྟར་བབས་ནས་ཀྱང་༔ རྣལ་འབྱོར་སྒོ་གསུམ་རྡོ་རྗེར་མཛོད༔ བླ་མ་རིག་འཛིན་ལྷ་ཚོགས་རྣམས༔ བར་སྣང་གློག་ལྟར་འཁྱུགས་ནས་ཀྱང་༔ རྩ་ཁམས་རླུང་ལ་ཡེ་ཤེས་སྤོར༔ ཡི་དམ་མཁའ་འགྲོ་སྲུང་མའི་ཚོགས༔ ས་ནས་རླངས་ལྟར་རྡོལ་ནས་ཀྱང་༔ རིག་པའི་རྩལ་ཆེན་རང་ལ་སྤོར༔ ཨོཾ་ཨཱཿཧཱུྃ་ཧྲཱིཿབོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ སརྦ་ས་མ་ཡ་ཨེ་ཨཱའ་རལླི་ཕེཾ་ཕེཾ་ཕེཾ༔ ཞེས་དབབ། ཏིཥྛ་བཛྲ་ས་མ་ཡ་ཧཱུྃ་གིས་བརྟན་པར་བྱའོ། །དེས་འཇུག་པའི་ཆོས་གྲུབ་ནས། ཞུགས་ནས་མངོན་པར་དབང་བསྐུར་བའི་ཕྱིར་མཎྜལ་ཕུལ། གསོལ་གདབ་པ་འདི་ཡི་རྗེས་ཟློས་མཛོད། བྱང་ཆུབ་རྡོ་རྗེས་སངས་རྒྱས་ལ༔ ཇི་ལྟར་མཆོག་ཆེན་སྩལ་བ་བཞིན༔ བདག་ཀྱང་ཡོངས་སུ་བསྐྱབ་པའི་ཕྱིར༔ ནམ་མཁའི་རྡོ་རྗེས་དེང་བདག་སྩོལ༔ ལན་གསུམ། དེ་ལྟར་གསོལ་བ་བཏབ་པས། བདག་སློབ་དཔོན་དང་མདུན་བསྐྱེད་གཙོ་བོ་ཡབ་ཡུམ་གྱི་ཐུགས་ཀའི་འོད་ཟེར་གྱིས་གདན་གསུམ་ཚང་བའི་དབང་གི་ལྷ་ནམ་མཁའ་གང་བར་སྤྱན་དྲངས་པ་དང༌། སློབ་དཔོན་ལྷན་ཅིག་པས་རྣམ་རྒྱལ་གྱི་བུམ་པས་དབང་བསྐུར་བའི་མོས་པ་མཛོད། ཧཱུྃ༔ དབང་བསྐུར་རྡོ་རྗེ་ཆེན་པོ་སྟེ༔ ཁམས་གསུམ་ཀུན་གྱིས་ཕྱག་བྱས་པས༔ སངས་རྒྱས་ཀུན་གྱི་གསང་གསུམ་གྱི༔ གནས་ལས་བྱུང་བ་སྦྱིན་པར་བྱ༔ ཨོཾ་ཧཱུྃ་ཏྲཱྃ་ཧྲཱི༔ཨཱཿ བཛྲ་ཀ་ལ་ཤ་ཨ་བྷི་ཥིཉྩ་ཧཱུྃ་ཧཱུྃ་ཧཱུྃ༔ བྱང་ཆུབ་སེམས་ཀྱི་བདུད་རྩིས་དབང་བསྐུར་བས་ལུས་ཀྱི་ནང་ཐམས་ཅད་གང༌། སྒྲིབ་གཉིས་བག་ཆགས་དང་བཅས་པ་དག །བདེ་བ་ཆེན་པོའི་ཡེ་ཤེས་ཉམས་སུ་མྱངས། ཆུའི་ལྷག་མ་སྤྱི་བོར་བརྟན་པ་ལས་དེ་བཞིན་གཤེགས་པ་རིགས་ལྔས་དབུ་བརྒྱན་པའི་མོས་པ་མཛོད། རྗེས་འབྲེལ་ལྷ་སྐུ་ཕྱག་རྒྱའི་དབང་བསྐུར་བ་ནི། མདུན་བསྐྱེད་ཞི་ཁྲོའི་ལྷ་ཚོགས་གཙོ་འཁོར་རྣམས་ཀྱི་སྐུ་ལས་ཡེ་ཤེས་ཀྱི་སྐུ་གཉིས་པ་རེ་བྱོན། ཁྱེད་རང་རྣམས་ཀྱི་སྤྱི་བོ་ནས་ཞུགས། གཞི་ལུས་ཕུང་ཁམས་སྐྱེ་མཆེད་རྣམས་ལ་ཐིམ་པས་བདག་རྟོག་གི་དྲི་མ་སྦྱངས། སྣང་སྟོང་དག་པ་ལྷའི་དཀྱིལ་འཁོར་དུ་སད་པར་བྱས་པའི་མོས་པ་མཛོད། ལྷ་ཙཀ་རྣམས་རིམ་པར་སྦྱིན་ལ། ཧཱུྃ། ཆོས་རྣམས་རྣམ་དག་ཡེ་ནས་ལྷུན་གྱིས་གྲུབ། །བྱ་བ་བྱེད་དང་ཡིད་ཆོས་རྣམ་པར་དག །ནམ་མཁའི་མཐའ་བཞིན་ཀུན་ལ་སྙོམས་མཛད་པ། །ཀུན་བཟང་ཡབ་ཡུམ་གཉིས་ཀྱིས་དབང་བསྐུར་རོ། །ཧཱུྃ་ཨ་བྷི་ཥིཉྩ་མི། ཧཱུྃ། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང༌། །གཟུགས་སུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་པས་དབང་བསྐུར་རོ། །ཧཱུྃ་ཨོཾ་སྭཱ་ཨཱྃ་ཧཱ་ཨ་བྷི་ཥིཉྩ་མི། ཧཱུྃ། ངོ་མཚར་ཕོ་བྲང་བདེ་བར་གཤེགས་པའི་ཡུམ། །དུས་གསུམ་རྒྱལ་བ་ཐམས་ཅད་སྐྱེད་མཛད་མ། །རིགས་ཀྱི་ཡུམ་གྱུར་རྣམས་ཀྱིས་དབང་བསྐུར་རོ། །མཱུྃ་ལཱྃ་མཱྃ་པྱཱྃ་ཏཱྃ་ཨ་བྷི་ཥིཉྩ་མི། ཧཱུྃ། རྣམ་ཤེས་དབང་པོ་དག་པ་སྐུ་གསུང་ཐུགས། །བདེ་བར་གཤེགས་པ་རྣམས་ཀྱི་སྲས་མཆོག་སྟེ། །སེམས་དཔའ་ཆེན་པོ་བརྒྱད་ཀྱིས་དབང་བསྐུར་རོ། །མ་ཧཱ་ས་ཏྭ་ཨ་བྷི་ཥིཉྩ་མི། ཧཱུྃ། སྒེག་མོ་ཕྲེང་ཐོགས་རིན་ཆེན་གླུ་གར་ཅན། །ནམ་མཁའ་མཉམ་པའི་མཆོད་པས་རྒྱལ་བ་མཆོད། །བྱང་ཆུབ་ལྷ་མོའི་ཚོགས་ཀྱིས་དབང་བསྐུར་རོ། །བོ་དྷི་དེ་ཝཱི་ཨ་བྷི་ཥིཉྩ་མི། ཧཱུྃ། བདུག་སྤོས་མེ་ཏོག་མར་མེ་དྲི་ཆབ་མ། །རྒྱལ་བ་རྒྱ་མཚོ་རྣམས་ལ་མཆོད་འབུལ་མ། །མཆོད་པའི་ལྷ་མོ་རྣམས་ཀྱིས་དབང་བསྐུར་རོ། །པཱུ་ཛ་དེ་ཝཱི་ཨ་བྷི་ཥིཉྩ་མི། ཧཱུྃ། དྲག་ཤུལ་ཐབས་ཀྱིས་འགྲོ་བ་འདུལ་མཛད་པ། །ཚད་མེད་བཞི་ལྡན་སྒོ་བཞི་ཐུབ་པར་སྲུང༌། །ཏ་ཀྲྀད་སྒོ་བ་བཞི་ཡིས་དབང་བསྐུར་རོ། །ཧཱུྃ་ཧཱུྃ་ཧཱུྃ་ཧཱུྃ་ཨ་བྷི་ཥིཉྩ་མི། ཧཱུྃ། རྟག་ཆད་མཐར་ཕྱིན་གསང་བ་ཡུམ་གྱི་ངང༌། །ལྕགས་ཀྱུ་ཞགས་པ་ལྕགས་སྒྲོག་དྲིལ་འཁྲོལ་མ། །སྒོ་མ་ཆེན་མོ་བཞི་ཡིས་དབང་བསྐུར་རོ། །ཛཿཧཱུྃ་བྃ་ཧོཿཨ་བྷི་ཥིཉྩ་མི། ཧཱུྃ། སྟེང་འོག་ཕྱོགས་བཞི་འཇིག་རྟེན་འདུལ་མཛད་གཙོ། །ཉོན་མོངས་དྲུག་འཇོམས་རྒྱུད་དྲུག་དག་པར་སྦྱོང༌། །བཅོམ་ལྡན་ཐུབ་པ་དྲུག་གིས་དབང་བསྐུར་རོ། །སརྦ་མུ་ནེ་ཨ་བྷི་ཥིཉྩ་མི། ཧཱུྃ། འཇིག་རྟེན་འདས་པའི་དུས་ན་མངོན་བྱུང་བ། །གདུག་པ་འདུལ་ཕྱིར་དུས་ལས་མི་འདའ་བའི། །དཔལ་ཆེན་ཧེ་རུ་ཀ་རྣམས་ཀྱིས་དབང་བསྐུར་རོ། །སརྦ་ཤྲཱི་ཧེ་རུ་ཀ་ཨ་བྷི་ཥིཉྩ་མི། ཧཱུྃ། ཁྲོ་མོ་དབང་ཕྱུག་སྐུ་ལ་འཁྲིལ་མཛད་ཅིང༌། །མཁའ་འགྲོ་མི་བཟད་འབར་བའི་སྤྲིན་འཕྲོ་མ། གདུག་པ་འདུལ་མཛད་ཡུམ་གྱིས་དབང་བསྐུར་རོ། །སརྦ་ཀྲོ་དྷི་ཤྭ་རཱི་ཨ་བྷི་ཥིཉྩ་མི། ཧཱུྃ། བསྐལ་པ་མེ་ལྟར་འབར་བའི་ཀློང་དཀྱིལ་ནས། །ཡེ་ཤེས་སྐུ་མཆོག་འཇིགས་བྱེད་རྒྱན་གྱིས་བཞུགས། །ཁྲོ་མོ་ཆེན་མོ་བརྒྱད་ཀྱིས་དབང་བསྐུར་རོ། །ཧ་ཨ་བྷི་ཥིཉྩ་མི། ཧཱུྃ། ནམ་མཁའི་ལུས་ཅན་གར་ཡང་ཐོགས་མེད་ཅིང༌། །འདོད་དགུར་སྒྱུར་བའི་གཟུགས་ཅན་འཕྲུལ་མོ་ཆེ། །ཕྲ་མེན་ཆེན་མོ་བརྒྱད་ཀྱིས་དབང་བསྐུར་རོ། །ཧེ་ཨ་བྷི་ཨ་བྷི་ཥིཉྩ་མི། ཧཱུྃ། རྡོ་རྗེ་གདོང་མོ་ཕོ་ཉ་མགྱོགས་མ་བཞི། །ཤར་ལྷོ་ནུབ་བྱང་སྒོ་བཞི་ཐུབ་པར་སྲུང༌། །སྒོ་སྐྱོང་ཁྲོ་མོ་བཞི་ཡིས་དབང་བསྐུར་རོ། །ཛཿཧཱུྃ་བྃ་ཧོཿ ཨ་བྷི་ཥིཉྩ་མི། ཧཱུྃ། དཔལ་གྱི་འཁོར་ཚོགས་བཛྲ་ཨཱ་རལླི། །མཁའ་ལ་ཤུགས་འགྲོ་མ་ཚོགས་དབང་ཕྱུག་མ། །རྣལ་འབྱོར་ཉི་ཤུ་བརྒྱད་ཀྱིས་དབང་བསྐུར་རོ། བྷྱོ་བྷྱོ་བྷྱོ་བྷྱོ་ཨ་བྷི་ཥིཉྩ་མི། དེ་ལྟར་ལུས་ལ་ལྷའི་དབང་བསྐུར་བས། འདི་ལྟར་སྣང་བའི་ཆོས་ཐམས་ཅད་དམ་པ་རིགས་བརྒྱའི་ངོ་བོར་དག་ཅིང༌། དེ་ཡང་རང་སེམས་ལྷག་པ་བདེན་གཉིས་དབྱེར་མེད་གསང་ཆེན་རིགས་གཅིག་ཏུ་རྣམ་པར་དག་པ་ཡིན་ནོ། །དེ་དག་རྣམས་ཀྱི་སྒོ་ནས་ནི། བུམ་པའི་དབང་བསྐུར་ཡོངས་སུ་རྫོགས། ལུས་ཀྱི་སྒྲིབ་དག་ཀུན་ཏུ་འོད། ས་ནོན་ཞི་བའི་ལས་རྣམས་འགྲུབ། སྤྲུལ་སྐུ་མངོན་དུ་བྱས་པའོ། ནམ་མཁར་བཞུགས་པའི་དེ་བཞིན་གཤེགས་པ་ཡབ་ཡུམ་རྣམས་སྙོམས་པར་ཞུགས་པའི་བྱང་ཆུབ་སེམས་ཀྱི་བདུད་རྩི་ལྕེ་ཐོག་ཏུ་བཞག་པར་གྱུར། བདུད་རྩི་མྱངས་ལ། ཧཱུྃ༔ ཇི་ལྟར་སྔོན་གྱི་སངས་རྒྱས་ཀྱིས༔ དབང་བསྐུར་སྲས་ལ་སྦྱིན་པ་ལྟར༔ གཉིས་མེད་སྦྱར་བའི་བདུད་རྩིའི་ཆུ༔ གདན་གསུམ་ངོ་བོས་ཁྱོད་དབང་བསྐུར༔ ཨོཾ་ཨཱཿཧཱུྃ་ཧྲཱིཿབོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ བོ་དྷི་ཙིཏྟ་ཨ་བྷི་ཥིཉྩ་ཧཱུྃ༔ མགྲིན་པ་ནས་བརྒྱུད་རྩ་ཁམས་གང་༔ གསང་བའི་དབང་ཐོབ་ངག་སྒྲིབ་དག༔ རྒྱས་པའི་ལས་འགྲུབ་པད་ཅན་ནོན༔ རང་བྱུང་རྣམ་བཞི་མངོན་དུ་གྱུར༔ དཀྱིལ་འཁོར་གྱི་གཙོ་བོའི་ཐུགས་ཀ་ནས་གཟུགས་དང་ལང་ཚོ་རྫོགས་པའི་རིག་མ་རྡོ་རྗེ་བཙུན་མོའི་ངོ་བོ་ཅན་སྤྲོས་ཏེ་ཐར་པ་བསྟེན་པར་བསྐུལ་བར་གྱུར། ཧཱུྃ༔ ཀུན་བཟང་ཐུགས་ཀ་ནས་བྱུང་བའི༔ ལྷ་མོ་དགའ་སྟེར་གནས་སྟེར་མ༔ གཟུགས་དང་ལང་ཚོ་ཀུན་ལྡན་པ༔ འདི་ཁྱེར་རྟག་ཏུ་མཆོད་པ་གྱིས༔ ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ༔ ལྷ་མོ་རྡོ་རྗེའི་ལམ་དུ་ཞུགས༔ སྙིང་གར་བརྒྱུད་དེ་སྤྱི་བོར་ཐིམ༔ མས་བརྟན་དགའ་བཞིའི་མཐར་བསྐྱལ་ལོ༔ ཤེར་དབང་ཐོབ་ནས་ཡིད་སྒྲིབ་དག༔ དབང་གི་ལས་འགྲུབ་ཚོགས་ཆེན་ནོན༔ དགའ་བཞིའི་ཡེ་ཤེས་མངོན་དུ་གྱུར༔ དབང་བཞི་པའི་སླད་དུ། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་ཐུགས་ཀ་ནས་རང་འདྲའི་ཡེ་ཤེས་ཀྱི་སྐུ་གཉིས་པ་བྱུང༌། སྙིང་གའི་དབུས་སུ་ཐིམ་པ་ལ་བརྟེན་ནས་བྱིན་རླབས་འཕོ་བའི་རིམ་པས་དོན་གྱི་ལྷན་ཅིག་སྐྱེས་པའི་ཡེ་ཤེས་རྒྱུད་ལ་སྐྱེས་པར་གྱུར། རྡོ་རྗེ་སེམས་དཔའི་མེ་ལོང་གི་བརྡས་མཚོན་ཏེ། ཧཱུྃ༔ བདེ་ལ་སེམས་བཟུང་སྟོང་ཉིད་ངང་༔ སྲིད་པ་ངོ་བོ་ཉིད་དག་པ༔ སྣང་སྟོང་ཟུང་འཇུག་མཐའ་ལས་འདས༔ རང་བཞིན་དག་པའི་དོན་བསྒོམ་བྱ༔ ཨོཾ་ཨཱཿཧཱུྃ་ཧྲཱིཿབོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཀཱ་ཡ་ཝཱ་ཀ་ཙིཏྟ་ཛྙཱ་ན་ཨ་བྷི་ཥིཉྩ་ཨོཾ་ཨཱཿཧཱུྃ༔ བཞི་པའི་དབང་ཐོབ་རྦ་རླབས་དག༔ དྲག་པོའི་ལས་འགྲུབ་བླ་མའི་ས༔ ནོན་ཞིང་སྒོ་གསུམ་དམ་ཚིག་འཛིན༔ ངོ་བོ་ཉིད་སྐུ་ཧེ་རུ་ཀ༔ མ་བཅོས་རྫོགས་པ་ཆེན་པོ་འགྲུབ༔ ཅེས་རྟོག་པ་བསྐྱེད། ཛཿཧཱུྃ་བྃ་ཧོཿ ནམ་མཁར་བཞུགས་པའི་དབང་གི་ལྷ་རྣམས་ཡི་གེ་གསུམ་གྱི་རྣམ་པས་རང་ལ་ཐིམ་པར་གྱུར་པའི་མོས་པས་དབྱིངས་རིག་དབྱེར་མེད་ཀྱི་ངང་དུ་མཉམ་པར་ཞོག་ཅིག །དེ་ལྟར་སྨིན་བྱེད་དབང་བཞིའི་རིམ་པ་སྟན་ཐོག་གཅིག་ཏུ་ཐོབ་པའི་བཀའ་དྲིན་གཏང་རག་གི་ཡོན་དུ་མཎྜལ། སླར་ཡང་མཎྜལ་དུ་མ་ཟད། ལུས་ལོངས་སྤྱོད་ཀྱིས་བསྡུས་པས་བདག་ཏུ་བྱས་པའི་བདོག་པ་ཅི་མཆིས་ཡོན་དུ་འབུལ་བ་དང༌། དབང་གི་སྐབས་སུ་ཐོབ་ཅིང་ཁས་བླངས་པའི་རྩ་བ་དང་ཡན་ལག་གི་དམ་ཚིག་རྣམས་ཚུལ་བཞིན་དུ་བསྲུང་སྙམ་པས་འདིའི་རྗེས་ཟློས། བདག་གི་ལུས་དང་ལོངས་སྤྱོད་ཀུན༔ ཁྱེད་ལ་འབུལ་གྱིས་ཡོངས་སུ་བཞེས༔ ཁྱེད་ཀྱི་ཐུགས་རྗེས་བདག་ལ་ཟུངས༔ ཀུན་ཀྱང་ཡེ་ཤེས་མཆོག་ཐོབ་ཤོག༔ རྩ་བ་ཡན་ལག་དམ་ཚིག་རྣམས༔ ལུས་དང་སྲོག་གི་ཕྱིར་མི་གཏང་༔ རིན་ཆེན་གླང་པོ་ནོར་བུ་རྟ༔ བུ་དང་བུ་མོ་ཡོ་བྱད་རྣམས༔ ཡུལ་འཁོར་ལོངས་སྤྱོད་བཅས་ཀུན་འབུལ༔ ཚེ་གཅིག་གྲོལ་འགྱུར་གདམས་མཆོག་སྩོལ༔ ལན་གསུམ་དང་དགེ་བསྔོ་བཅས་བྱ། རྗེས་ཆོག་ཚོགས་ལ་རོལ་ཞིང་ལྷག་མ་ཕྱིན་མཐར་དབྱུང་བས་གྲུབ་བོ། །ཅེས་པའང་རྒྱལ་དབང་ཀརྨ་པ་མཁའ་ཁྱབ་རྡོ་རྗེའི་གསུང་བཞིན་ཕུན་ཚོགས་རྣམ་རྒྱལ་པས་བསྡེབས་པའོ།། །།

[edit]

@#/__/grol tig zhi khro'i dbang bskur gyi cho ga sdig sgrib rgyun gcod zhes bya ba bzhugs so//@#/__/snang srid gzhir bzhengs zhi khro'i lha/__/'bras bu'i bcud du yongs smin pa/__/bla ma'i zhabs la gus btud nas/__/dbang gi cho ga 'dir gsal bya/__/de la 'di yi dbang bskur bar 'dod pas thog mar sbyor ba yo byad kyi shoms dang dbang don sgrub mchod kyi rim pa rnams phrin las 'od gsal snying po ltar dang bzlas pa'i dbur dzaba? khang dbye/__bzlas pa grub nas rnam bum la dmigs te/__bum pa rang byung gi gzhal med khang chen por kun bzang rdo rje sems dpa' sgyu 'phrul drwa ba'i lha tshogs dwangs pa'i mtsho la gza' skar shar ba bzhin lhag par gsal bar gyur/__bdag srog sngags kyi 'od zer gzungs thag la/__'khril te bum pa'i lha tshogs thugs kar zhugs/__de dag sku las byang sems bdud rtsi'i rgyun/__babs pas bum chur gnyis med ro gcig gyur/__ces brjod cing bsams la gzungs thag nas bzung ste sngags ci nus bzla/__las bum du rdo rje sems dpa' skad cig gis gsal ba'i sku las bdud rtsi'i rgyun babs pas bum pa gang bar gyur par bsams la yi ge brgya pa ci rigs bzla/__thun mthar mchod pa dang yi ge brgya pa'i rjes/__oM AHhU~M gis dung zhal gyi chu mchod yon du drangs pas bum pa'i lha bde stong chen po'i ngo bor 'od du zhu nas bum chu dang dbyer med ro gcig tu gyur par bsam/__de nas bdag 'jug blang ba'am rig pa'i me tog dor/__dbang dngos la/__thog mar khrus dang*/__bgegs bskrad/__srung 'khor bsgom/__sems bskyed gsal btab la/__de la 'dir dus gsum gyi sangs rgyas sras dang bcas pa'i thugs rje phrin las gcig tu 'dus shing*/__de dag thams cad las kyang rnam thar dang bka' drin khyad par du 'phags pa/__gu ru rin po che pad+ma saM b+ha wa nyid kyi thugs kyi thig le mthar thug pa/__sprul pa'i rje 'bangs grogs gsum la lkog chos su bstsal ba/__pad+ma'i zhal gdams grol thig dgongs pa rang grol zhes yongs su grags shing*/__grol ba bzhi ldan gyi zab chos khyad par du 'phags pa/__lo chen bai ro tsa na'i thugs sprul/__mkhas shing grub pa yongs kyi 'khor los sgyur ba 'gro 'dul shes rab 'od zer gyis dbur stod brag ri rin chen spungs pa sogs gter gnas drug nas spyan drangs pa'i nang tshan/__sngo 'phrang klu bdud mkhar gyi gter byon/__zhi khro'i bskyed rdzogs lam 'bras snying po'i dbang bskur zab mo 'di nyid bsgrub par bgyi ba la sogs kyis mtshams sbyar nas maN+Dal 'bul du gzhug__bla ma dkyil 'khor gyi dbang phyug dang gnyis su med pa'i drung du dkyil 'khor du 'jug pa'i don du gsol ba 'debs pa 'di'i rjes zlos/__rdo rje slob dpon dgongs su gsol:__sngon chad lam log 'khor bar 'khyams:__srid pa'i mtsho las bsgral slad du:__bla ma zhi khro'i dkyil 'khor du:__bdag nyid 'jug par 'tshal bar bgyi:__lan gsum/__mdun gyi nam mkhar rtsa gsum zhi khro'i dky-il 'khor gyi lha tshogs mngon sum du bzhugs pa'i spyan sngar/__bsags sbyong gi snying po bsdus pa yan lag bcu pa'i ting nge 'dzin gsal 'debs bzhin pas 'di'i rjes zlos/__hU~M:__rnam dag mnyam pa'i ngang nyid las:__bla ma zhi khro'i lha tshogs gshegs:__pad+ma nyi zla'i steng du bzhugs:__phyag 'tshal mchod 'bul sdig pa bshags:__dge la yi rang chos 'khor bskul:__bzhugs gsol 'debs so dge rtsa bsngo:__yang dag rdo rje 'chang thob shog:__lan gsum/__dkyil 'khor du 'jug cing dbang gi ye shes skyai ba'i rten skyabs gsum sngon du 'gro bas/__so thar/__byang sems/__rig 'dzin gyi sde snod rnams kyi bslab bya mtha' dag blangs nas/__tshul bzhin bsrung bar dam bca' ba'i blo brtan pos 'di'i rjes zlos/__bla ma zhi khro skyabs kyi mchog tu 'dzin:__'gro ba'i don du smon 'jug sems bskyed de:__sku gsung thugs dang mnyam sbyor gsang sngags kyi:__dam tshig sdom pa rtag tu bskyang bar bgyi:__lan gsum/__de nas dngos gzhi'i ye shes dbab pa'i slad du dmigs pa 'di bzhin du mdzod/__khyed rang rnams dkyil 'khor gyi shar sgo'i 'gram du dbang stegs pad zla'i gdan gyi steng du 'khod pa la/__bdag slob dpon kun bzang yab yum du gsal ba'i thugs ka'i sa bon las 'od zer byung*/__rnam smin gyi phung po sbyangs/__rnam par shes pa hU~M mthing gar gyur pa yab kyi zhal du drangs/__sku'i dbyibs brgyud/__yum gyi pad+mar babs/__phyir byung nas rang gi gdan la 'khod pas kun bzang rdo rje sems dpa' zhi khro rab 'byams kun 'dus su gsal ba'i gnas gsum du oM AHhU~M gis mtshan pa/__thugs ka'i sa bon las 'od zer 'phros/__phyogs bcu dus bzhi'i rtsa gsum rgyal ba rab 'byams thams cad bde gshegs zhi khro rab 'byams kyi sku phyag rgya/__gsung yig 'bru/__thugs phyag mtshan gyi rnam par kha char bu yug 'tshubs pa bzhin spyan drangs te snying ga nas sib sib thim pas rgyud byin gyis brlabs par gyur pa'i mos pa mdzod/__spos rol bcas/__hU~M:__thugs srog hU~M las 'od zer 'phros:__phyogs bcu dus bzhi'i rgyal ba rnams:__mkha' la char ltar babs nas kyang :__rnal 'byor sgo gsum rdo rjer mdzod:__bla ma rig 'dzin lha tshogs rnams:__bar snang glog ltar 'khyugs nas kyang :__rtsa khams rlung la ye shes spor:__yi dam mkha' 'gro srung ma'i tshogs:__sa nas rlangs ltar rdol nas kyang :__rig pa'i rtsal chen rang la spor:__oM AHhU~M hrIHbo d+hi tsit+ta ma hA su kha dz+nyA na d+hA tu AH__oM ru lu ru lu hU~M b+h+yo hU~M:__sarba sa ma ya e A' ral+li pheM pheM pheM:__zhes dbab/__tiSh+Tha badz+ra sa ma ya hU~M gis brtan par bya'o/__/des 'jug pa'i chos grub nas/__zhugs nas mngon par dbang bskur ba'i phyir maN+Dal phul/__gsol gdab pa 'di yi rjes zlos mdzod/__byang chub rdo rjes sangs rgyas la:__ji ltar mchog chen stsal ba bzhin:__bdag kyang yongs su bskyab pa'i phyir:__nam mkha'i rdo rjes deng bdag stsol:__lan gsum/__de ltar gsol ba btab pas/__bdag slob dpon dang mdun bskyed gtso bo yab yum gyi thugs ka'i 'od zer gyis gdan gsum tshang ba'i dbang gi lha nam mkha' gang bar spyan drangs pa dang*/__slob dpon lhan cig pas rnam rgyal gyi bum pas dbang bskur ba'i mos pa mdzod/__hU~M:__dbang bskur rdo rje chen po ste:__khams gsum kun gyis phyag byas pas:__sangs rgyas kun gyi gsang gsum gyi:__gnas las byung ba sbyin par bya:__oM hU~M trA~M hrI:AH__badz+ra ka la sha a b+hi Shiny+tsa hU~M hU~M hU~M:__byang chub sems kyi bdud rtsis dbang bskur bas lus kyi nang thams cad gang*/__sgrib gnyis bag chags dang bcas pa dag__/bde ba chen po'i ye shes nyams su myangs/__chu'i lhag ma spyi bor brtan pa las de bzhin gshegs pa rigs lngas dbu brgyan pa'i mos pa mdzod/__rjes 'brel lha sku phyag rgya'i dbang bskur ba ni/__mdun bskyed zhi khro'i lha tshogs gtso 'khor rnams kyi sku las ye shes kyi sku gnyis pa re byon/__khyed rang rnams kyi spyi bo nas zhugs/__gzhi lus phung khams skye mched rnams la thim pas bdag rtog gi dri ma sbyangs/__snang stong dag pa lha'i dkyil 'khor du sad par byas pa'i mos pa mdzod/__lha tsaka rnams rim par sbyin la/__hU~M/__chos rnams rnam dag ye nas lhun gyis grub/__/bya ba byed dang yid chos rnam par dag__/nam mkha'i mtha' bzhin kun la snyoms mdzad pa/__/kun bzang yab yum gnyis kyis dbang bskur ro/__/hU~M a b+hi Shiny+tsa mi/__hU~M/__chos sku nam mkha' bzhin du dbyer med kyang*/__/gzugs su 'ja' tshon bzhin du so sor gsal/__/thabs dang shes rab mchog la mnga' brnyes pa'i/__/rigs lnga bde bar gshegs pas dbang bskur ro/__/hU~M oM swA A~M hA a b+hi Shiny+tsa mi/__hU~M/__ngo mtshar pho brang bde bar gshegs pa'i yum/__/dus gsum rgyal ba thams cad skyed mdzad ma/__/rigs kyi yum gyur rnams kyis dbang bskur ro/__/mU~M lA~M mA~M pyA~M tA~M a b+hi Shiny+tsa mi/__hU~M/__rnam shes dbang po dag pa sku gsung thugs/__/bde bar gshegs pa rnams kyi sras mchog ste/__/sems dpa' chen po brgyad kyis dbang bskur ro/__/ma hA sa twa a b+hi Shiny+tsa mi/__hU~M/__sgeg mo phreng thogs rin chen glu gar can/__/nam mkha' mnyam pa'i mchod pas rgyal ba mchod/__/byang chub lha mo'i tshogs kyis dbang bskur ro/__/bo d+hi de wI a b+hi Shiny+tsa mi/__hU~M/__bdug spos me tog mar me dri chab ma/__/rgyal ba rgya mtsho rnams la mchod 'bul ma/__/mchod pa'i lha mo rnams kyis dbang bskur ro/__/pU dza de wI a b+hi Shiny+tsa mi/__hU~M/__drag shul thabs kyis 'gro ba 'dul mdzad pa/__/tshad med bzhi ldan sgo bzhi thub par srung*/__/ta kr-id sgo ba bzhi yis dbang bskur ro/__/hU~M hU~M hU~M hU~M a b+hi Shiny+tsa mi/__hU~M/__rtag chad mthar phyin gsang ba yum gyi ngang*/__/lcags kyu zhags pa lcags sgrog dril 'khrol ma/__/sgo ma chen mo bzhi yis dbang bskur ro/__/dzaHhU~M ba~M hoHa b+hi Shiny+tsa mi/__hU~M/__steng 'og phyogs bzhi 'jig rten 'dul mdzad gtso/__/nyon mongs drug 'joms rgyud drug dag par sbyong*/__/bcom ldan thub pa drug gis dbang bskur ro/__/sarba mu ne a b+hi Shiny+tsa mi/__hU~M/__'jig rten 'das pa'i dus na mngon byung ba/__/gdug pa 'dul phyir dus las mi 'da' ba'i/__/dpal chen he ru ka rnams kyis dbang bskur ro/__/sarba shrI he ru ka a b+hi Shiny+tsa mi/__hU~M/__khro mo dbang phyug sku la 'khril mdzad cing*/__/mkha' 'gro mi bzad 'bar ba'i sprin 'phro ma/__gdug pa 'dul mdzad yum gyis dbang bskur ro/__/sarba kro d+hi shwa rI a b+hi Shiny+tsa mi/__hU~M/__bskal pa me ltar 'bar ba'i klong dkyil nas/__/ye shes sku mchog 'jigs byed rgyan gyis bzhugs/__/khro mo chen mo brgyad kyis dbang bskur ro/__/ha a b+hi Shiny+tsa mi/__hU~M/__nam mkha'i lus can gar yang thogs med cing*/__/'dod dgur sgyur ba'i gzugs can 'phrul mo che/__/phra men chen mo brgyad kyis dbang bskur ro/__/he a b+hi a b+hi Shiny+tsa mi/__hU~M/__rdo rje gdong mo pho nya mgyogs ma bzhi/__/shar lho nub byang sgo bzhi thub par srung*/__/sgo skyong khro mo bzhi yis dbang bskur ro/__/dzaHhU~M ba~M hoH_a b+hi Shiny+tsa mi/__hU~M/__dpal gyi 'khor tshogs badz+ra A ral+li/__/mkha' la shugs 'gro ma tshogs dbang phyug ma/__/rnal 'byor nyi shu brgyad kyis dbang bskur ro/__b+h+yo b+h+yo b+h+yo b+h+yo a b+hi Shiny+tsa mi/__de ltar lus la lha'i dbang bskur bas/__'di ltar snang ba'i chos thams cad dam pa rigs brgya'i ngo bor dag cing*/__de yang rang sems lhag pa bden gnyis dbyer med gsang chen rigs gcig tu rnam par dag pa yin no/__/de dag rnams kyi sgo nas ni/__bum pa'i dbang bskur yongs su rdzogs/__lus kyi sgrib dag kun tu 'od/__sa non zhi ba'i las rnams 'grub/__sprul sku mngon du byas pa'o/__nam mkhar bzhugs pa'i de bzhin gshegs pa yab yum rnams snyoms par zhugs pa'i byang chub sems kyi bdud rtsi lce thog tu bzhag par gyur/__bdud rtsi myangs la/__hU~M:__ji ltar sngon gyi sangs rgyas kyis:__dbang bskur sras la sbyin pa ltar:__gnyis med sbyar ba'i bdud rtsi'i chu:__gdan gsum ngo bos khyod dbang bskur:__oM AHhU~M hrIHbo d+hi tsit+ta ma hA su kha dz+nyA na d+hA tu AH__oM ru lu ru lu hU~M b+h+yo hU~M:__bo d+hi tsit+ta a b+hi Shiny+tsa hU~M:__mgrin pa nas brgyud rtsa khams gang :__gsang ba'i dbang thob ngag sgrib dag:__rgyas pa'i las 'grub pad can non:__rang byung rnam bzhi mngon du gyur:__dkyil 'khor gyi gtso bo'i thugs ka nas gzugs dang lang tsho rdzogs pa'i rig ma rdo rje btsun mo'i ngo bo can spros te thar pa bsten par bskul bar gyur/__hU~M:__kun bzang thugs ka nas byung ba'i:__lha mo dga' ster gnas ster ma:__gzugs dang lang tsho kun ldan pa:__'di khyer rtag tu mchod pa gyis:__oM sarba ta thA ga ta a nu rA ga Na badz+ra swa b+hA wa At+ma ko\u0f85haM:__lha mo rdo rje'i lam du zhugs:__snying gar brgyud de spyi bor thim:__mas brtan dga' bzhi'i mthar bskyal lo:__sher dbang thob nas yid sgrib dag:__dbang gi las 'grub tshogs chen non:__dga' bzhi'i ye shes mngon du gyur:__dbang bzhi pa'i slad du/__bla ma dang dkyil 'khor gyi gtso bo tha mi dad pa'i thugs ka nas rang 'dra'i ye shes kyi sku gnyis pa byung*/__snying ga'i dbus su thim pa la brten nas byin rlabs 'pho ba'i rim pas don gyi lhan cig skyes pa'i ye shes rgyud la skyes par gyur/__rdo rje sems dpa'i me long gi brdas mtshon te/__hU~M:__bde la sems bzung stong nyid ngang :__srid pa ngo bo nyid dag pa:__snang stong zung 'jug mtha' las 'das:__rang bzhin dag pa'i don bsgom bya:__oM AHhU~M hrIHbo d+hi tsit+ta ma hA su kha dz+nyA na d+hA tu AH__oM ru lu ru lu hU~M b+h+yo hU~M:__kA ya wA ka tsit+ta dz+nyA na a b+hi Shiny+tsa oM AHhU~M:__bzhi pa'i dbang thob rba rlabs dag:__drag po'i las 'grub bla ma'i sa:__non zhing sgo gsum dam tshig 'dzin:__ngo bo nyid sku he ru ka:__ma bcos rdzogs pa chen po 'grub:__ces rtog pa bskyed/__dzaHhU~M ba~M hoH__nam mkhar bzhugs pa'i dbang gi lha rnams yi ge gsum gyi rnam pas rang la thim par gyur pa'i mos pas dbyings rig dbyer med kyi ngang du mnyam par zhog cig__/de ltar smin byed dbang bzhi'i rim pa stan thog gcig tu thob pa'i bka' drin gtang rag gi yon du maN+Dal/__slar yang maN+Dal du ma zad/__lus longs spyod kyis bsdus pas bdag tu byas pa'i bdog pa ci mchis yon du 'bul ba dang*/__dbang gi skabs su thob cing khas blangs pa'i rtsa ba dang yan lag gi dam tshig rnams tshul bzhin du bsrung snyam pas 'di'i rjes zlos/__bdag gi lus dang longs spyod kun:__khyed la 'bul gyis yongs su bzhes:__khyed kyi thugs rjes bdag la zungs:__kun kyang ye shes mchog thob shog:__rtsa ba yan lag dam tshig rnams:__lus dang srog gi phyir mi gtang :__rin chen glang po nor bu rta:__bu dang bu mo yo byad rnams:__yul 'khor longs spyod bcas kun 'bul:__tshe gcig grol 'gyur gdams mchog stsol:__lan gsum dang dge bsngo bcas bya/__rjes chog tshogs la rol zhing lhag ma phyin mthar dbyung bas grub bo/__/ces pa'ang rgyal dbang karma pa mkha' khyab rdo rje'i gsung bzhin phun tshogs rnam rgyal pas bsdebs pa'o//__//

Footnotes

Other Information