འཁོར་ལོའི་དབང་ཕྱུག་འཇམ་དབྱངས་མཁྱེན་བརྩེའི་དབང་པོ་ལ་བསྔགས་པ་དྲང་གཏམ་བདེན་ཚིག་རྡོ་རྗེའི་རོལ་མོ།

🚧 This website is under continued development. We appreciate your patience!

Previous Text Back to Volume PageNext Text

Wylie title	'khor lo'i dbang phyug 'jam dbyangs mkhyen brtse'i dbang po la bsngags pa drang gtam bden tshig rdo rje'i rol mo
Location	mkhyen brtse'i bka' babs Volume 1, Text 8, Pages 405-416 (Folios 1a to 6b3)
Author	མི་ཕམ་རྒྱ་མཚོ་
Less details More details
Associated People	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	Mi pham rgya mtsho. 'khor lo'i dbang phyug 'jam dbyangs mkhyen brtse'i dbang po la bsngags pa drang gtam bden tshig rdo rje'i rol mo. In Rdzong sar 'jam dbyangs mkhyen brtse'i dbang po'i bka' babs, Vol. 1: 405-416. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Supplications - gsol 'debs
Karchag page	JKW-KABAB-Volume-01-KA-Karchag
Colophon	།ཅེས་པའང་སྐྱབས་རྗེ་དམ་པ་གང་གི་བཀའ་དྲིན་ལས་སྐྱེས་པའི་བཙུན་གཟུགས་གྱི་ན་བ་མི་ཕམ་ཞེས་པས་རབ་ཚེས་དབང་ཕྱུག་ཁྲུམས་ཟླའི་ཚེས་ཉེར་བརྒྱད་གྱི་སྔ་ཐུན་གཉིས་པར་གང་ཤར་དུ་གསོལ་བ་བཏབ་པ་དགེ་ལེགས་སུ་གྱུར་ཅིག། །སརྦ་དཱ་ཀ་ལྱཱ་ཎཾ་བྷ་བ་ཏུ།།
	ces pa'ang skyabs rje dam pa gang gi bka' drin las skyes pa'i btsun gzugs gyi na ba mi pham zhes pas rab tshes dbang phyug khrums zla'i tshes nyer brgyad gyi snga thun gnyis par gang shar du gsol ba btab pa dge legs su gyur cig/__/sarba dA ka l+yA NaM b+ha ba tu

Tibetan Text

Wylie

[edit]

༈ འཁོར་ལོའི་དབང་ཕྱུག་འཇམ་དབྱངས་མཁྱེན་བརྩེའི་དབང་པོ་ལ་བསྔགས་པ་དྲང་གཏམ་བདེན་ཚིག་རྡོ་རྗེའི་རོལ་མོ་ཞེས་བྱ་བ་བཞུགས་སོ།། །མཁྱེན་བརྩེ་ནུས་པ་མཚུངས་མེད་པའི། །དཔལ་ལྡན་བླ་མའི་ཞབས་པད་ལ། །དྭང་བའི་ཡིད་ཀྱིས་ཕྱག་བཅས་པའི། །དྲང་པོའི་གཏམ་གྱི་རོལ་མོ་འཁྲོལ། །ཁྱོད་ཀྱི་ཡོན་ཏན་རིན་ཆེན་གཏེར། །ཀུན་ནས་བརྗོད་པ་ལྟ་ཅི་སྟེ། །ཉི་ཚེའི་མཐོང་བས་མཐོང་ལས་ཀྱང༌། །ཅུང་ཟད་ཙམ་ཞིག་འདི་ན་བརྗོད། །སྙིགས་མའི་ནགས་ཀྱི་ཚང་ཚིང་འདིར། །རྟོག་དཔྱོད་སྤྲེའུ་འདྲའི་གཡོ་བག་ཅན། །ཕྱོགས་རྣམས་མངོན་པར་བལྟས་ནས་སུ། །གང་གི་ཞབས་ཀྱི་དྲུང་དུ་ལྷགས། །མཁས་ཤིང་གྲུབ་པའི་ངོ་མཚར་གཏམ། །རྒྱང་ནས་ཐོས་པའི་རྗེས་བསྙེགས་ཏེ། །དྲུང་དུ་ཡུན་རིང་བརྟགས་ན་ཡང༌། །ཕྱི་ཕྱིར་གཏིང་དཔག་དཀའ་བ་ཁྱོད། །རྟོག་གེའི་ལྟ་བས་ཅི་བལྟས་ཀྱང༌། །སྐྱོན་མེད་ཡོན་ཏན་ལྡན་མཐོང་ན། །རྟོག་མེད་དད་པས་འཇུག་རྣམས་ལ། །མཐོང་བས་ཕན་པ་ཅི་ཞིག་མཚར། །དེང་སང་གངས་རིའི་ཁྲོད་འདི་ན། །གྲུབ་པར་གྲགས་ཀྱང་མཁས་བཙུན་བྲལ། །མཁས་ཀྱང་གྲུབ་འབྲས་མཐོང་དཀའ་བས། །ཕུན་ཚོགས་ལྡན་པ་རྙེད་པར་དཀའ། །མཁས་དང་བཙུན་དང་གྲུབ་པ་གསུམ། །འགྲན་པ་བཞིན་དུ་ཁྱོད་ལ་འཕེལ། །འདི་འདྲའི་ཕུན་ཚོགས་མཐོང་དཀའ་བ། །ངོ་མཚར་ཆེ་ཡང་ཤེས་པ་དཀོན། །དེ་དག་རེ་རེའི་ངང་ཚུལ་ལའང༌། །འགྲན་པར་བཀའ་ན་ཀུན་བསྡོམས་པའི། །རྣམ་ཐར་བཟང་པོ་ནམ་མཁའི་ཁྱོན། །རྒྱས་པར་བཀང་ལ་སུ་ཞིག་འགྲན། །རང་གི་རིག་པས་མ་གྲུབ་ཀྱང༌། །གྲགས་པ་ཙམ་གྱི་རྗེས་འབྲངས་ནས། །བྲག་ཅ་ལྟ་བུའི་ཀློག་པ་པ། །མང་པོ་བལ་པ་ཛ་བཞིན་འཛིངས། །རྟོག་གེའི་རློམ་པས་འགྱིང་རྣམས་ཀྱང༌། །རྟོག་གེའི་གནད་གསང་མ་རྙེད་པར། །གཅོང་རོང་དོག་པོའི་ཆུ་བཞིན་དུ། །བླུན་པོའི་ཁྲོད་ན་ཤགས་ཀྱིས་གཅོལ། །ཁྱོད་ནི་རབ་འབྱམས་གཞུང་ལུགས་ལ། །རང་བྱན་ཚུད་པའི་རྣམ་ཐར་གྱིས། །དོགས་མེད་རི་རབ་འདྲ་བ་ཡི། །ངེས་གསང་སྙིང་པོའི་རིང་ལུགས་འཛིན། །མཁས་པའི་གདུགས་དཀར་མངོན་མཐོ་བ། །བློ་ལྡན་བརྒྱ་ཕྲག་གིས་བརྩམས་པའི། །བསྟན་བཅོས་རྣམས་ན་དཀའ་བ་ཡི། །ཁུར་ཆེན་འབད་པས་བཏེག་པ་ཀུན། །ཁྱོད་ཀྱི་ཞལ་དུ་སོན་པ་ན། །ཞུགས་ཀྱིས་འཚེད་པའི་གསེར་བཞིན་དུ། །གང་གི་ནག་ནོག་གྱུར་པའི་སྐྱོན། །བསལ་ཕྱིར་བདེ་བླག་རྟོགས་པར་མཛད། །ཇི་ལྟ་ཇི་ལྟར་ཟབ་པ་ཡི། །མདོ་རྒྱུད་སྙིང་པོའི་ངེས་གསང་ལ། །དེ་ལ་དེ་ལྟར་ལྷག་པར་ཡང༌། །མཁས་པའི་ངོ་མཚར་ཁྱོད་ཀྱིས་བཟུང༌། །ཕྱི་དང་ནང་གི་རིག་པའི་གནས། །ཀུན་ལ་ཁྱབ་པར་རྗེས་སོང་བ། །མཁའ་དང་མཉམ་པའི་བློ་གྲོས་ཅན། །ཁྱོད་ནི་ཆོས་གཏེར་ཆོས་ཀྱི་མཛོད། །མཁས་པར་གྲགས་པ་མང་ན་ཡང༌། །ཐེ་ཚོམ་སྨག་དང་བྲལ་བ་ཡི། །ཡེ་ཤེས་ཉི་མའི་འོད་ཟེར་ཅན། །མཁྱེན་རབ་གཙང་མ་ཁྱོད་འདྲ་དཀོན། །ཟབ་མོའི་གཞུང་གི་དཀའ་གནད་བརྒྱ། །གཅིག་ཅར་འགྲོལ་བའི་ལེགས་བཤད་གསུང༌། །མཁའ་ལ་མཚོན་གྱིས་བསྣུན་པ་བཞིན། །རྒོལ་བའི་སྐབས་མི་ཐོབ་པ་མཚར། །གང་གིས་བརྩམས་པའི་ཚིག་དོན་ཀུན། །ཟབ་དང་གསལ་དང་སྙན་པ་ཡི། །ཕུན་ཚོགས་དངོས་པོ་བརྒྱ་འབར་བས། །ལེགས་བཤད་ཀུན་གྱི་བླ་ན་འཕགས། །ལྟ་གདེངས་མཐོན་པོར་གཤེགས་ན་ཡང༌། །བསྟན་པའི་མིག་ལྟོས་དྲི་མེད་ལ། །བསམས་ཏེ་རྣམ་ཐར་གཙང་མའི་ཚུལ། །སྐྱོང་བ་བསྟན་འཛིན་དམ་པའི་སྲོལ། །དེ་ལྟ་ན་ཡང་བསྟན་ཞབས་འདིར། །སྣ་ཚོགས་ཐོ་ཅོའི་སྤྱོད་པ་ཡིས། །རིམ་གཉིས་ལམ་ལ་བསྙད་བཏགས་ནས། །རྒྱལ་བསྟན་རྙོགས་མར་བགྱིད་པ་མང༌། །གཞན་སྣང་ཟིལ་གྱིས་གནོན་པ་ཡི། །ཀུན་སྤྱོད་སྨད་དུ་མེད་པའི་སྟོངས། །བྲལ་བཞིན་ཆོས་དད་སྤྱོད་ལམ་སོགས། །རྒྱུད་དང་འགལ་བས་མ་དད་སྤེལ། །དེ་འདྲའི་སྤྱོད་ངན་གདོལ་པའི་ཁྱུ། །ས་སྟེང་འདིར་ནི་ཆེས་མང་ཞིག །སྔགས་ལམ་རྣལ་མའི་སྐྱེས་བུ་ལའང༌། །ཐེ་ཚོམ་བགྱིད་སླད་བདུད་ཀྱིས་སྤྲུལ། །ཁྱོད་ནི་རིམ་གཉིས་ཟབ་མོ་ཡིས། །གང་བའི་བུམ་པ་ལྟར་གང་ཡང༌། །དམན་པའི་སྐྱེ་བོ་སྲུང་བའི་སླད། །སྤྱོད་ལམ་པདྨ་བཞིན་དུ་གཙང༌། །ངུར་སྨྲིག་མཛེས་པའི་བླ་གོས་ཀྱིས། །འཆར་ཀའི་འོད་ཀྱིས་ཟླ་བ་བཞིན། །མཛེས་པར་བཀླུབས་པའི་སྐུ་ཡི་ཁྱོན། །ཚུལ་ཁྲིམས་དྲི་བསུང་བཟང་པོས་གཏམས། །མཆོག་ཏུ་གཙང་བའི་རྣམ་ཐར་གྱིས། །ཕྱོགས་ཀུན་སྐྱེ་བོའི་ཡིད་ཀྱི་མཚོ། །བགྲུངས་པས་བསྟན་པ་རིན་ཆེན་གྱི། །མཆོད་ཡོན་རྨད་དུ་བྱུང་བར་མཛད། །གཙང་མའི་ཁྲིམས་ཀྱི་འོད་ཆགས་པའི། །འདུལ་འཛིན་རྒྱུ་སྐར་ཕྲེང་བའི་ཁྲོད། །འཕགས་པ་དགྱེས་པའི་ཚུལ་ཁྲིམས་ཀྱི། །འོད་བཟང་ཁྱོད་ནི་ཟླ་བ་བཞིན། །རིག་པའི་གཞུང་ལུགས་ཕྱོགས་རེ་བའི། །དོན་ལ་མཁས་པའི་སྙེམས་པ་དང༌། །བཟླས་དང་དཀའ་ཐུབ་ཏིང་ངེ་འཛིན། །ཕྲ་མོའི་བརྟུལ་ཞུགས་བརྟེན་རྣམས་ཀྱི། །གྲུབ་པའི་འབྲས་བུ་ཟང་ཟིང་དང༌། །ཚེ་འདིའི་སྙན་པར་བཙོངས་ནས་སུ། །མི་བཟད་གདོན་དང་མཚུངས་པ་ཡི། །འཁོར་ངན་རྣམས་ཀྱི་རྩོད་གཞིར་སྒྲུབ། །ཀློག་དང་སྤོང་བ་ཕྲིན་ལས་ཀྱི། །འཁོར་ལོ་གསུམ་གྱི་ཚུལ་བཟང་ལ། །ཕན་པའི་ཐབས་ཚུལ་སེམས་པ་ནི། །ཀྱེ་མ་དེང་སང་དུས་ན་སུ། །རྟག་ཏུ་བསྟན་ལ་གང་ཕན་ཐབས། །འཆད་དང་འབྲི་དང་སྤེལ་སོགས་ལ། །རྩེ་གཅིག་ཐུགས་ནི་ཞུགས་གྱུར་པ། །རང་དོན་སྤངས་པ་ཁྱོད་འདྲ་དཀོན། །ཁྱོད་ཀྱི་རྣམ་དཀར་ཕྲིན་ལས་གང༌། །བརྒྱུད་ནས་ངང་གིས་འཇུག་པ་ཡིས། །རྒྱ་མཚོའི་གོས་ཅན་ཁྱབ་གྱུར་ཀྱང༌། །དེ་ལོངས་སྤྱོད་པས་མི་ཤེས་སོ། །གཞན་བརྒྱས་འབད་དེ་སྒོ་ཀུན་ནས། །འཁོར་ལོ་གསུམ་ལ་ཆེར་བརྩོན་པ། །དེ་ལས་ཁྱོད་ནི་བཞུགས་བཞིན་དུ། །ཉིན་གཅིག་མཛད་པའི་སྟོབས་རབ་འཕེལ། །མཁས་ཤིང་གྲུབ་པའི་རྣམ་ཐར་ནི། །མཆོག་ཏུ་མཐོ་བའི་རི་དབང་རྩེར། །འཛེགས་ནས་གཞན་གྱི་ཡོན་ཏན་གང༌། །ཆུང་ངུའང་ཐུགས་ལ་གཙིགས་སུ་མཛད། །རིགས་དང་གཟུགས་དང་སྟོབས་དང་ནི། །མང་ཐོས་བློ་དང་དཔལ་རྣམས་ཀྱིས། །དྲེགས་པ་རྣམས་ཀྱང་ཁྱོད་དྲུང་ན། །ཉི་མས་རྒྱུ་སྐར་བཞིན་དུ་གྱུར། །ཁྱོད་ཀྱི་མཛད་པ་རེ་རེས་ཀྱང༌། །ཡ་རབ་དམ་པའི་ཟླ་འོད་སྟོང༌། །སྙིགས་མའི་སྨག་ཏུ་བཀྱེས་མོད་ཀྱང༌། །བླུན་རྣམས་ཁྱོད་རྗེས་སྙོགས་མི་སེམས། །ཁྱོད་ཀྱིས་བསྟན་དང་འགྲོ་བ་ལ། །བཟང་པོའི་ཕྲིན་ལས་གང་བྱུང་བ། །གཞན་དང་མཉམ་པ་མེད་པ་ཡི། །རླབས་ཆེན་ཕུལ་དུ་བྱུང་བར་སྣང༌། །རྡེའུ་ཁབ་ཤིང་སོགས་ལ་བརྟེན་པ། །དོན་ཆུང་ཉི་ཚེའི་རྫུ་བག་ལས། །ལམ་གྱི་རྟོགས་པ་ངོམ་བྱེད་པའི། །གྲུབ་པས་དེང་སང་ས་འདི་གང༌། །ཅི་འདི་ཟག་བཅས་ཟག་མེད་ཀྱི། །བསམ་གཏན་དག་གམ་རིག་སྔགས་ཀྱིས། །གྲུབ་སྟེ་འདི་ལ་འདི་ལས་གཞན། །གཙོ་བོའི་ཡོན་ཏན་ཅི་ཞིག་ཅེས། །དྲིས་ནས་བརྟགས་ཤིང་དཔྱད་པ་ན། །ལམ་གྱིས་གྲུབ་པ་ལྟ་ཞོག་སྟེ། །ལམ་གྱི་ཚུལ་ལའང་ཆེར་རྨོངས་པའི། །རང་མཚང་མ་སྦས་གསལ་པོར་མངོན། །རབ་འབྱམས་མདོ་དང་རྒྱུད་སྡེ་ནས། །ཇི་སྐད་བཤད་པའི་དོན་མཐོང་བ། །དེ་ལྟ་དེ་ལྟར་ཁྱོད་ཉིད་ལ། །གྲུབ་པ་ཆེན་པོར་ངེས་པ་རྙེད། །སྒྲུབ་བརྒྱུད་ཤིང་རྟ་བརྒྱད་ཀྱི་སྲོལ། །བརྒྱུད་ལྡན་བླ་མའི་ཞལ་སྒོ་ནས། །བླངས་ཏེ་ཐོག་མཐའ་བར་གྱི་གནད། །ཁྱོད་ཀྱིས་མྱོང་བས་གྲུབ་པར་བྱས། །གཞན་གྱིས་འབད་དེ་བརྙེས་པ་གང༌། །གྲུབ་པ་ཆེན་པོའི་རྣམ་ཐར་དུ། །ངོམ་པ་སྟོང་དུ་འཕེལ་བ་སྙེད། །ཁྱོད་ལ་རྩེད་མོའི་ཞོར་གྱིས་རྫོགས། །སྣང་སྲིད་འདོད་དགུར་སྒྱུར་བ་ཡི། །གྲུབ་པའི་རོལ་རྩེད་རྨད་བྱུང་བ། །དུས་དང་དུས་སུ་སྣང་བ་ནི། །སྐལ་བཟང་སྐྱེ་བོའི་རྣ་རྒྱན་བྱས། །སྲིན་བུས་ཤིང་ལ་ཡི་གེ་བཞིན། །སྟེས་དབང་འགྲིགས་པའི་ལུང་བསྟན་གྱིས། །སྐྱེ་བོ་མགུ་བའི་ཟློས་གར་ལ། །ཁྱོད་ནི་ཡ་མཚན་མི་མཛད་ཀྱང༌། །ལྐོག་གྱུར་ཕྱོགས་དུས་སྣང་ཚུལ་གཏམ། །རྒྱུ་དང་རྐྱེན་དང་འབྲས་བུར་བཅས། །རེས་འགའ་དགོས་པས་གསུངས་པ་ཀུན། །ཤིན་ཏུ་ཡིད་ཆེས་ཁོ་ནར་གནས། །ཡེ་ཤེས་དམ་པའི་གཟིགས་པ་ཡིས། །སྣང་སྲིད་ལག་མཐིལ་བཞིན་མངོན་ཡང༌། །ཟབ་མོའི་རྣམ་པར་ཐར་པའི་མཐའ། །སྦས་པའི་ཚུལ་གྱིས་རྟག་ཏུ་བཞུགས། །གྲོང་ཚིག་སྤེལ་མའི་རྫུན་ལུང་གིས། །སྣ་དྲངས་རྡོལ་བོན་ཟོལ་མའི་གཏེར། །འདོན་པ་སོམ་ཉིའི་དཔྱོང་ཐག་ཅན། །བག་ཡངས་རྒྱུ་བས་ས་འདི་གང༌། །མདོ་རྒྱུད་དོན་དང་མི་འགལ་བར། །མན་ངག་མྱོང་བས་གྲུབ་པ་ཡི། །མཁའ་འགྲོའི་སྙིང་གི་ཟུངས་ཁྲག་གང༌། །འདོན་པའི་གང་ཟག་དེ་ཅི་འདྲ། །ཇི་ལྟར་འཕགས་པའི་ཡུལ་དག་ན། །མཁས་ཤིང་གྲུབ་པ་གྲངས་མང་ཡང༌། །མཁའ་འགྲོ་གསང་བའི་གཏེར་གྱི་སྒོ། །འབྱེད་པ་འཕགས་མཆོག་རེ་ཟུང་ཡིན། །དེ་ཕྱིར་འདི་འདྲའི་ཚུལ་གྱིས་སུ། །གཏེར་གྱི་ཆོས་དང་འདོན་པ་པོ། །ལུང་བཞིན་རིགས་པས་ལེགས་བརྟགས་ན། །ཕལ་ཆེར་ལྦུ་བ་བཞིན་དུ་གསོབ། །ཆོས་ཀྱི་རྒྱུན་གྱི་ཏིང་འཛིན་ལས། །རྒྱལ་བའི་ཐུགས་ཀྱི་གསང་བའི་གཏེར། །དགོངས་པས་རང་གིར་མཛད་པ་ཡི། །རྣམ་ཐར་དྲི་མེད་ཁྱོད་ལ་མངའ། །མཚོ་འཁྲུངས་རྒྱལ་བའི་བྱིན་རླབས་དང༌། །རྗེ་འབངས་གྲུབ་པའི་རིག་འཛིན་རྣམས། །སྤྲུལ་དང་བྱིན་རླབས་སྨོན་ལམ་གྱིས། །གངས་ཅན་ཕན་བདེའི་གཏེར་གྱི་སྒོ། །འབྱེད་ནུས་མཁས་ཤིང་གྲུབ་པ་ཡི། །རྣམ་ཐར་བཟང་པོའི་ཚུལ་གནས་པ། །དེ་ཀུན་ཁྱོད་ཀྱི་ཞབས་པད་ལ། །བརྟེན་ནས་དོན་གཉིས་ལྷུན་གྱིས་གྲུབ། །ངོ་མཚར་བཀའ་བབས་བདུན་ལྡན་གྱི། །རིན་ཆེན་རྒྱལ་སྲིད་ཆེ་ལྡན་པ། །ཆོས་ཀྱི་རྒྱལ་པོ་ཆེན་པོ་ཁྱོད། །རྒྱལ་ཐབས་སྲིད་པ་གསུམ་ན་འཕགས། །ཁྱེད་ཀྱི་ཟབ་མོའི་ཆོས་བཀའ་རྣམས། །མདོ་རྒྱུད་ལུང་གི་སྙིང་པོ་རུ། །རིག་པས་ངེས་ཤིང་མྱོང་བས་གྲུབ། །ངོ་མཚར་ཚད་མ་བཞི་དང་ལྡན། །མཁས་ཤིང་གྲུབ་པའི་རྣམ་ཐར་གྱི། །ཡང་རྩེར་སོན་པ་ཁྱོད་འདྲ་བས། །ཐུན་མིན་མཁའ་འགྲོའི་ཟབ་རྒྱའི་སྒོ། །འབྱེད་པ་ཤིན་ཏུ་ཚུལ་དང་མཐུན། །རྒྱལ་དབང་པདྨ་ཐོད་ཕྲེང་དང༌། །སྲས་བཅས་རྒྱལ་བས་མགྲིན་གཅིག་ཏུ། །སྙིགས་མའི་མུན་སེལ་སྒྲོན་མེ་རུ། །བསྔགས་པའི་མེ་ཏོག་ཁྱོད་ལ་འཐོར། །འདི་ན་སྙིགས་མའི་མྱ་ངམ་ཐང༌། །ཕྱོགས་དང་ཕྱོགས་སུ་བལྟ་ན་ཡང༌། །ཡ་རབ་བཟང་པོའི་ལུགས་སྲོལ་ཆུ། །སྤྱད་དུ་རུང་བའང་མི་སྣང་བས། །སྲེད་པས་སྐོམ་བཞིན་རྒྱུ་བ་བདག །ཡོན་ཏན་ནོར་བུའི་གཏེར་གྱི་མཛོད། །ཆོས་ཀྱི་རྒྱ་མཚོ་ཁྱོད་ལྟ་བུ། །མཐོང་བས་ཡིད་ནི་ལྷག་པར་དགའ། །ཁྱོད་ལ་ཡོན་ཏན་ཚད་མེད་ཀྱང༌། །སྤྲིན་གྱི་མཐོང་ཀར་ནམ་མཁའ་བཞིན། །རང་གི་མཐོང་བ་ཉི་ཚེ་བས། །གང་དཔོག་སྒྲོ་སྐུར་བྲལ་ཏེ་བརྗོད། །རང་ལ་ངེས་པ་མ་སྐྱེས་ཀྱང༌། །ངོ་བསྟོད་བསྔགས་པའི་བྲག་ཅའི་སྒྲ། །སྡེབ་སྦྱོར་ཙམ་གྱི་དབང་བྱས་པ། །དེ་དག་རྣམས་དང་འདི་མི་མཚུངས། །ཕྱོགས་སུ་ལྷུང་བའི་བསམ་པ་ཡིས། །ཁྱོད་ལ་བསྟོད་པ་མ་ལགས་ཏེ། །བསྟོད་བྱའི་ཡོན་ཏན་འདི་འདྲ་རྣམས། །ཁྱོད་ལ་ཕྱོགས་སུ་ལྷུང་བར་གྱུར། །ཕྱོགས་སུ་ལྷུང་བའི་བསམ་པ་ཡིས། །གཞན་ལ་སྨད་པ་མ་ལགས་ཏེ། །ཁྱོད་ཀྱི་ཚུལ་དང་འགལ་བའི་སྐྱོན། །སྙིགས་མས་བཟུང་བ་རྣམས་ལ་སྣང༌། །དེ་སླད་དྲང་པོར་བརྗོད་པ་འདི། །གང་ལ་བདེན་པའི་ཚིག་ཏུ་སོང༌། །དེ་ལའང་ཁྱོད་འདྲའི་རིན་པོ་ཆེ། །ཕངས་པར་བྱ་བ་ཉིད་དུ་འཚལ། །དེ་ཕྱིར་རྒྱལ་བའི་བསྟན་པ་ལ། །ཁྱོད་ནི་ཀུན་ནས་མངའ་དབང་འབྱོར། །སྐྱེ་རྒུ་སྐལ་བ་བཟང་རྣམས་ཀྱི། །མཆོད་པའི་སྟེགས་ལ་ཡང་དག་འཛེགས། །འདི་འདྲའི་དཔལ་ནི་མངོན་སུམ་དུ། །འཛིན་པའི་གཟུགས་སྐུ་རིན་པོ་ཆེ། །ཞིང་འདིར་ཇི་ཙམ་བཞུགས་པ་སྲིད། །བསྟན་འདི་སྐྱོང་བའི་མགོན་དང་བཅས། །དེ་སླད་སྤྲུལ་པའི་གཟུགས་གཞན་གྱིས། །འདི་འདྲའི་བསྟན་དོན་འབྱུང་དཀའ་བས། །སྤྲུལ་པའི་བཀོད་པ་འདི་ཉིད་ཀྱིས། །བསྐལ་པའི་བར་དུ་བཞུགས་གསོལ་འདེབས། །སེམས་ཅན་གཅིག་ཕྱིར་བསྐལ་མང་དུ། །སྙིང་རྗེ་ཆེ་རྣམས་བཞུགས་བགྱིད་ཕྱིར། །བདག་གི་ཁྱོད་ཉིད་ཁོ་ན་ལ། །རེ་བ་བཅས་ཏེ་གསོལ་བ་ལགས། །སྤྱད་རུང་འབྱོར་བའི་མཎྜལ་དང༌། །མཐོང་རུང་ལུས་ཀྱི་རིམ་གྲོ་ཡིས། །རེ་འབྲས་ཞུ་བའི་སྟོབས་བསྐྱེད་པ། །དེ་འདྲ་བདག་ལ་མ་མཆིས་ཕྱིར། །མཐོང་དུ་མི་རུང་སེམས་ཀྱིས་ནི། །ངེས་པ་བརྟན་པོས་གསོལ་འདི་ལ། །གཞན་དུ་སུ་ཞིག་ཡིད་རྟོན་ཏེ། །ལྷ་དང་འཕགས་རྣམས་དཔང་མཛོད་ཅིག །གང་སྐུ་རིན་ཆེན་སྣང་བ་ནི། །འཇིག་རྟེན་འདིར་ནི་ཇི་བཞུགས་པ། །བདག་ལ་བཀའ་དྲིན་གནང་སྦྱིན་ནི། །དེ་ཡིན་མཆོག་ནི་དེ་གཅིག་ཞུ། །རྟེན་འབྲེལ་བསླུ་བ་མེད་པ་ནི། །དངོས་པོའི་རྗེས་སུ་འབྲང་བ་སྟེ། །ལྟར་སྣང་རྣམས་ཀྱི་རྗེས་མི་འགྲོ། །འདི་ནི་ཆོས་རྣམས་ཆོས་ཉིད་ཡིན། །དེ་ཕྱིར་དམན་པ་བདག་གིས་ཀྱང༌། །དྭངས་བའི་ཡིད་ཀྱིས་ཁྱོད་ཉིད་ལ། །གསོལ་བ་གང་ཞིག་བཏབ་པ་ཡི། །རེ་བ་འབྲས་བུར་བཅས་གྱུར་ཅིག །ཚེ་དཔག་མེད་མངའ་རྒྱལ་བ་ཀུན། །སྲིད་གསུམ་དགྲ་ལས་རྣམ་རྒྱལ་ཞིང༌། །སྐྱེ་རྒུར་ཡིད་བཞིན་འདོད་འཇོ་བའི༌། །ཕྲིན་ལས་འཁོར་ལོ་མཆོག་ལྡན་པས། །དེང་འདིར་སྐྱེ་རྒུའི་གཉེན་གཅིག་པུ། །མགོན་པོ་བསྐལ་བརྒྱར་ཞབས་བརྟན་པར། །བདག་གི་རེ་ཞིང་སྨོན་པའི་འབྲས། །ཡིད་བཞིན་འགྲུབ་པའི་དགའ་སྟོན་སྩོལ། །ཅེས་པའང་སྐྱབས་རྗེ་དམ་པ་གང་གི་བཀའ་དྲིན་ལས་སྐྱེས་པའི་བཙུན་གཟུགས་གྱི་ན་བ་མི་ཕམ་ཞེས་པས་རབ་ཚེས་དབང་ཕྱུག་ཁྲུམས་ཟླའི་ཚེས་ཉེར་བརྒྱད་གྱི་སྔ་ཐུན་གཉིས་པར་གང་ཤར་དུ་གསོལ་བ་བཏབ་པ་དགེ་ལེགས་སུ་གྱུར་ཅིག། །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

[edit]

!__'khor lo'i dbang phyug 'jam dbyangs mkhyen brtse'i dbang po la bsngags pa drang gtam bden tshig rdo rje'i rol mo zhes bya ba bzhugs so//__/mkhyen brtse nus pa mtshungs med pa'i/__/dpal ldan bla ma'i zhabs pad la/__/dwang ba'i yid kyis phyag bcas pa'i/__/drang po'i gtam gyi rol mo 'khrol/__/khyod kyi yon tan rin chen gter/__/kun nas brjod pa lta ci ste/__/nyi tshe'i mthong bas mthong las kyang*/__/cung zad tsam zhig 'di na brjod/__/snyigs ma'i nags kyi tshang tshing 'dir/__/rtog dpyod spre'u 'dra'i g.yo bag can/__/phyogs rnams mngon par bltas nas su/__/gang gi zhabs kyi drung du lhags/__/mkhas shing grub pa'i ngo mtshar gtam/__/rgyang nas thos pa'i rjes bsnyegs te/__/drung du yun ring brtags na yang*/__/phyi phyir gting dpag dka' ba khyod/__/rtog ge'i lta bas ci bltas kyang*/__/skyon med yon tan ldan mthong na/__/rtog med dad pas 'jug rnams la/__/mthong bas phan pa ci zhig mtshar/__/deng sang gangs ri'i khrod 'di na/__/grub par grags kyang mkhas btsun bral/__/mkhas kyang grub 'bras mthong dka' bas/__/phun tshogs ldan pa rnyed par dka'/__/mkhas dang btsun dang grub pa gsum/__/'gran pa bzhin du khyod la 'phel/__/'di 'dra'i phun tshogs mthong dka' ba/__/ngo mtshar che yang shes pa dkon/__/de dag re re'i ngang tshul la'ang*/__/'gran par bka' na kun bsdoms pa'i/__/rnam thar bzang po nam mkha'i khyon/__/rgyas par bkang la su zhig 'gran/__/rang gi rig pas ma grub kyang*/__/grags pa tsam gyi rjes 'brangs nas/__/brag ca lta bu'i klog pa pa/__/mang po bal pa dza bzhin 'dzings/__/rtog ge'i rlom pas 'gying rnams kyang*/__/rtog ge'i gnad gsang ma rnyed par/__/gcong rong dog po'i chu bzhin du/__/blun po'i khrod na shags kyis gcol/__/khyod ni rab 'byams gzhung lugs la/__/rang byan tshud pa'i rnam thar gyis/__/dogs med ri rab 'dra ba yi/__/nges gsang snying po'i ring lugs 'dzin/__/mkhas pa'i gdugs dkar mngon mtho ba/__/blo ldan brgya phrag gis brtsams pa'i/__/bstan bcos rnams na dka' ba yi/__/khur chen 'bad pas bteg pa kun/__/khyod kyi zhal du son pa na/__/zhugs kyis 'tshed pa'i gser bzhin du/__/gang gi nag nog gyur pa'i skyon/__/bsal phyir bde blag rtogs par mdzad/__/ji lta ji ltar zab pa yi/__/mdo rgyud snying po'i nges gsang la/__/de la de ltar lhag par yang*/__/mkhas pa'i ngo mtshar khyod kyis bzung*/__/phyi dang nang gi rig pa'i gnas/__/kun la khyab par rjes song ba/__/mkha' dang mnyam pa'i blo gros can/__/khyod ni chos gter chos kyi mdzod/__/mkhas par grags pa mang na yang*/__/the tshom smag dang bral ba yi/__/ye shes nyi ma'i 'od zer can/__/mkhyen rab gtsang ma khyod 'dra dkon/__/zab mo'i gzhung gi dka' gnad brgya/__/gcig car 'grol ba'i legs bshad gsung*/__/mkha' la mtshon gyis bsnun pa bzhin/__/rgol ba'i skabs mi thob pa mtshar/__/gang gis brtsams pa'i tshig don kun/__/zab dang gsal dang snyan pa yi/__/phun tshogs dngos po brgya 'bar bas/__/legs bshad kun gyi bla na 'phags/__/lta gdengs mthon por gshegs na yang*/__/bstan pa'i mig ltos dri med la/__/bsams te rnam thar gtsang ma'i tshul/__/skyong ba bstan 'dzin dam pa'i srol/__/de lta na yang bstan zhabs 'dir/__/sna tshogs tho co'i spyod pa yis/__/rim gnyis lam la bsnyad btags nas/__/rgyal bstan rnyogs mar bgyid pa mang*/__/gzhan snang zil gyis gnon pa yi/__/kun spyod smad du med pa'i stongs/__/bral bzhin chos dad spyod lam sogs/__/rgyud dang 'gal bas ma dad spel/__/de 'dra'i spyod ngan gdol pa'i khyu/__/sa steng 'dir ni ches mang zhig__/sngags lam rnal ma'i skyes bu la'ang*/__/the tshom bgyid slad bdud kyis sprul/__/khyod ni rim gnyis zab mo yis/__/gang ba'i bum pa ltar gang yang*/__/dman pa'i skye bo srung ba'i slad/__/spyod lam pad+ma bzhin du gtsang*/__/ngur smrig mdzes pa'i bla gos kyis/__/'char ka'i 'od kyis zla ba bzhin/__/mdzes par bklubs pa'i sku yi khyon/__/tshul khrims dri bsung bzang pos gtams/__/mchog tu gtsang ba'i rnam thar gyis/__/phyogs kun skye bo'i yid kyi mtsho/__/bgrungs pas bstan pa rin chen gyi/__/mchod yon rmad du byung bar mdzad/__/gtsang ma'i khrims kyi 'od chags pa'i/__/'dul 'dzin rgyu skar phreng ba'i khrod/__/'phags pa dgyes pa'i tshul khrims kyi/__/'od bzang khyod ni zla ba bzhin/__/rig pa'i gzhung lugs phyogs re ba'i/__/don la mkhas pa'i snyems pa dang*/__/bzlas dang dka' thub ting nge 'dzin/__/phra mo'i brtul zhugs brten rnams kyi/__/grub pa'i 'bras bu zang zing dang*/__/tshe 'di'i snyan par btsongs nas su/__/mi bzad gdon dang mtshungs pa yi/__/'khor ngan rnams kyi rtsod gzhir sgrub/__/klog dang spong ba phrin las kyi/__/'khor lo gsum gyi tshul bzang la/__/phan pa'i thabs tshul sems pa ni/__/kye ma deng sang dus na su/__/rtag tu bstan la gang phan thabs/__/'chad dang 'bri dang spel sogs la/__/rtse gcig thugs ni zhugs gyur pa/__/rang don spangs pa khyod 'dra dkon/__/khyod kyi rnam dkar phrin las gang*/__/brgyud nas ngang gis 'jug pa yis/__/rgya mtsho'i gos can khyab gyur kyang*/__/de longs spyod pas mi shes so/__/gzhan brgyas 'bad de sgo kun nas/__/'khor lo gsum la cher brtson pa/__/de las khyod ni bzhugs bzhin du/__/nyin gcig mdzad pa'i stobs rab 'phel/__/mkhas shing grub pa'i rnam thar ni/__/mchog tu mtho ba'i ri dbang rtser/__/'dzegs nas gzhan gyi yon tan gang*/__/chung ngu'ang thugs la gtsigs su mdzad/__/rigs dang gzugs dang stobs dang ni/__/mang thos blo dang dpal rnams kyis/__/dregs pa rnams kyang khyod drung na/__/nyi mas rgyu skar bzhin du gyur/__/khyod kyi mdzad pa re res kyang*/__/ya rab dam pa'i zla 'od stong*/__/snyigs ma'i smag tu bkyes mod kyang*/__/blun rnams khyod rjes snyogs mi sems/__/khyod kyis bstan dang 'gro ba la/__/bzang po'i phrin las gang byung ba/__/gzhan dang mnyam pa med pa yi/__/rlabs chen phul du byung bar snang*/__/rde'u khab shing sogs la brten pa/__/don chung nyi tshe'i rdzu bag las/__/lam gyi rtogs pa ngom byed pa'i/__/grub pas deng sang sa 'di gang*/__/ci 'di zag bcas zag med kyi/__/bsam gtan dag gam rig sngags kyis/__/grub ste 'di la 'di las gzhan/__/gtso bo'i yon tan ci zhig ces/__/dris nas brtags shing dpyad pa na/__/lam gyis grub pa lta zhog ste/__/lam gyi tshul la'ang cher rmongs pa'i/__/rang mtshang ma sbas gsal por mngon/__/rab 'byams mdo dang rgyud sde nas/__/ji skad bshad pa'i don mthong ba/__/de lta de ltar khyod nyid la/__/grub pa chen por nges pa rnyed/__/sgrub brgyud shing rta brgyad kyi srol/__/brgyud ldan bla ma'i zhal sgo nas/__/blangs te thog mtha' bar gyi gnad/__/khyod kyis myong bas grub par byas/__/gzhan gyis 'bad de brnyes pa gang*/__/grub pa chen po'i rnam thar du/__/ngom pa stong du 'phel ba snyed/__/khyod la rtsed mo'i zhor gyis rdzogs/__/snang srid 'dod dgur sgyur ba yi/__/grub pa'i rol rtsed rmad byung ba/__/dus dang dus su snang ba ni/__/skal bzang skye bo'i rna rgyan byas/__/srin bus shing la yi ge bzhin/__/stes dbang 'grigs pa'i lung bstan gyis/__/skye bo mgu ba'i zlos gar la/__/khyod ni ya mtshan mi mdzad kyang*/__/lkog gyur phyogs dus snang tshul gtam/__/rgyu dang rkyen dang 'bras bur bcas/__/res 'ga' dgos pas gsungs pa kun/__/shin tu yid ches kho nar gnas/__/ye shes dam pa'i gzigs pa yis/__/snang srid lag mthil bzhin mngon yang*/__/zab mo'i rnam par thar pa'i mtha'/__/sbas pa'i tshul gyis rtag tu bzhugs/__/grong tshig spel ma'i rdzun lung gis/__/sna drangs rdol bon zol ma'i gter/__/'don pa som nyi'i dpyong thag can/__/bag yangs rgyu bas sa 'di gang*/__/mdo rgyud don dang mi 'gal bar/__/man ngag myong bas grub pa yi/__/mkha' 'gro'i snying gi zungs khrag gang*/__/'don pa'i gang zag de ci 'dra/__/ji ltar 'phags pa'i yul dag na/__/mkhas shing grub pa grangs mang yang*/__/mkha' 'gro gsang ba'i gter gyi sgo/__/'byed pa 'phags mchog re zung yin/__/de phyir 'di 'dra'i tshul gyis su/__/gter gyi chos dang 'don pa po/__/lung bzhin rigs pas legs brtags na/__/phal cher lbu ba bzhin du gsob/__/chos kyi rgyun gyi ting 'dzin las/__/rgyal ba'i thugs kyi gsang ba'i gter/__/dgongs pas rang gir mdzad pa yi/__/rnam thar dri med khyod la mnga'/__/mtsho 'khrungs rgyal ba'i byin rlabs dang*/__/rje 'bangs grub pa'i rig 'dzin rnams/__/sprul dang byin rlabs smon lam gyis/__/gangs can phan bde'i gter gyi sgo/__/'byed nus mkhas shing grub pa yi/__/rnam thar bzang po'i tshul gnas pa/__/de kun khyod kyi zhabs pad la/__/brten nas don gnyis lhun gyis grub/__/ngo mtshar bka' babs bdun ldan gyi/__/rin chen rgyal srid che ldan pa/__/chos kyi rgyal po chen po khyod/__/rgyal thabs srid pa gsum na 'phags/__/khyed kyi zab mo'i chos bka' rnams/__/mdo rgyud lung gi snying po ru/__/rig pas nges shing myong bas grub/__/ngo mtshar tshad ma bzhi dang ldan/__/mkhas shing grub pa'i rnam thar gyi/__/yang rtser son pa khyod 'dra bas/__/thun min mkha' 'gro'i zab rgya'i sgo/__/'byed pa shin tu tshul dang mthun/__/rgyal dbang pad+ma thod phreng dang*/__/sras bcas rgyal bas mgrin gcig tu/__/snyigs ma'i mun sel sgron me ru/__/bsngags pa'i me tog khyod la 'thor/__/'di na snyigs ma'i mya ngam thang*/__/phyogs dang phyogs su blta na yang*/__/ya rab bzang po'i lugs srol chu/__/spyad du rung ba'ang mi snang bas/__/sred pas skom bzhin rgyu ba bdag__/yon tan nor bu'i gter gyi mdzod/__/chos kyi rgya mtsho khyod lta bu/__/mthong bas yid ni lhag par dga'/__/khyod la yon tan tshad med kyang*/__/sprin gyi mthong kar nam mkha' bzhin/__/rang gi mthong ba nyi tshe bas/__/gang dpog sgro skur bral te brjod/__/rang la nges pa ma skyes kyang*/__/ngo bstod bsngags pa'i brag ca'i sgra/__/sdeb sbyor tsam gyi dbang byas pa/__/de dag rnams dang 'di mi mtshungs/__/phyogs su lhung ba'i bsam pa yis/__/khyod la bstod pa ma lags te/__/bstod bya'i yon tan 'di 'dra rnams/__/khyod la phyogs su lhung bar gyur/__/phyogs su lhung ba'i bsam pa yis/__/gzhan la smad pa ma lags te/__/khyod kyi tshul dang 'gal ba'i skyon/__/snyigs mas bzung ba rnams la snang*/__/de slad drang por brjod pa 'di/__/gang la bden pa'i tshig tu song*/__/de la'ang khyod 'dra'i rin po che/__/phangs par bya ba nyid du 'tshal/__/de phyir rgyal ba'i bstan pa la/__/khyod ni kun nas mnga' dbang 'byor/__/skye rgu skal ba bzang rnams kyi/__/mchod pa'i stegs la yang dag 'dzegs/__/'di 'dra'i dpal ni mngon sum du/__/'dzin pa'i gzugs sku rin po che/__/zhing 'dir ji tsam bzhugs pa srid/__/bstan 'di skyong ba'i mgon dang bcas/__/de slad sprul pa'i gzugs gzhan gyis/__/'di 'dra'i bstan don 'byung dka' bas/__/sprul pa'i bkod pa 'di nyid kyis/__/bskal pa'i bar du bzhugs gsol 'debs/__/sems can gcig phyir bskal mang du/__/snying rje che rnams bzhugs bgyid phyir/__/bdag gi khyod nyid kho na la/__/re ba bcas te gsol ba lags/__/spyad rung 'byor ba'i maN+Dal dang*/__/mthong rung lus kyi rim gro yis/__/re 'bras zhu ba'i stobs bskyed pa/__/de 'dra bdag la ma mchis phyir/__/mthong du mi rung sems kyis ni/__/nges pa brtan pos gsol 'di la/__/gzhan du su zhig yid rton te/__/lha dang 'phags rnams dpang mdzod cig__/gang sku rin chen snang ba ni/__/'jig rten 'dir ni ji bzhugs pa/__/bdag la bka' drin gnang sbyin ni/__/de yin mchog ni de gcig zhu/__/rten 'brel bslu ba med pa ni/__/dngos po'i rjes su 'brang ba ste/__/ltar snang rnams kyi rjes mi 'gro/__/'di ni chos rnams chos nyid yin/__/de phyir dman pa bdag gis kyang*/__/dwangs ba'i yid kyis khyod nyid la/__/gsol ba gang zhig btab pa yi/__/re ba 'bras bur bcas gyur cig__/tshe dpag med mnga' rgyal ba kun/__/srid gsum dgra las rnam rgyal zhing*/__/skye rgur yid bzhin 'dod 'jo ba'i*/__/phrin las 'khor lo mchog ldan pas/__/deng 'dir skye rgu'i gnyen gcig pu/__/mgon po bskal brgyar zhabs brtan par/__/bdag gi re zhing smon pa'i 'bras/__/yid bzhin 'grub pa'i dga' ston stsol/__/ces pa'ang skyabs rje dam pa gang gi bka' drin las skyes pa'i btsun gzugs gyi na ba mi pham zhes pas rab tshes dbang phyug khrums zla'i tshes nyer brgyad gyi snga thun gnyis par gang shar du gsol ba btab pa dge legs su gyur cig/__/sarba dA ka l+yA NaM b+ha ba tu//__//____