JKCL-KABUM-11-DA-111

Previous Text Back to Volume PageNext Text

རྟ་བསང་བདུད་རྩིའི་གྲུ་ཆར།

Wylie title	rta bsang bdud rtsi'i gru char
Location	chos kyi blo gros bka' 'bum Volume 11, Text 111, Pages 531-534 (Folios 1a1 to 2b3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. rta bsang bdud rtsi'i gru char. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 11: 531-534. Bir, H.P.: Khyentse Labrang, 2012.
Genre	Smoke Offerings - bsangs mchod - lha bsang
Colophon	།ཞེས་པའང་རྣམ་འགྱུར་ཞེས་པ་འབྱུང་བ་སུམ་ལྡན་ལྕགས་ཕོ་སྟག་གི་ལོར་སྒྲུབ་གནས་རྒྱལ་པོ་དཀར་མོ་སྟག་ཚང་གི་ཐུས་རུ་མར་དབོན་མཛོད་ཚེ་དཔལ་ནས་རྟ་བསང་དགོས་ཞེས་བསྐུལ་བ་ན་དཔེ་གཞན་མ་འབྱོར་སྟབས་ཉམས་མཚར་བྲི་འདོད་བྱུང་བ་པདྨ་ཡེ་ཤེས་རྡོ་རྗེས་སྨྲས་རིམ་བཞིན་ཚེ་རིང་བཀྲ་ཤིས་ནས་ཡི་གེར་བགྱིས་པ་འདིས་ཀྱང་རྔོག་ཆགས་ཀྱི་རྒུད་པ་ཞི་ཞིང་། །འཇིག་རྟེན་ཀུན་ཏུ་ཅང་ཤེས་འཕེལ་བའི་རྒྱུར་གྱུར་ཅིག།
	/zhes pa'ang rnam 'gyur zhes pa 'byung ba sum ldan lcags pho stag gi lor sgrub gnas rgyal po dkar mo stag tshang gi thus ru mar dbon mdzod tshe dpal nas rta bsang dgos zhes bskul ba na dpe gzhan ma 'byor stabs nyams mtshar bri 'dod byung ba pad+ma ye shes rdo rjes smras rim bzhin tshe ring bkra shis nas yi ger bgyis pa 'dis kyang rngog chags kyi rgud pa zhi zhing /__/'jig rten kun tu cang shes 'phel ba'i rgyur gyur cig/

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

རྟ་བསང་བདུད་རྩིའི་གྲུ་ཆར་བཞུགས། །ཧྱ་གྲཱི་ཝ་ལ་ན་མོ། རྟའི་ནད་རྣམས་ཞི་བར་འདོད་པས་བཟང་ཤིང་སྣ་ཚོགས་ཀྱི་དུད་པ། རིན་ཆེན་འབྲུ་སྨན་དར་ཟབ་སྣ་ཚོགས་བསྲེས་པའི་ཕྱེ་མར་བསྲེགས་པ་ལ་ཆུ་གཙང་མས་བྲན། རྃ་ཡྃ་ཁྃ་གིས་སྦྱངས། ཨོཾ་ཨཱཿཧཱུྃ་ལན་གསུམ་དང་ནམ་མཁའ་མཛོད་ཀྱི་སྔགས་རྒྱ་མང་དུ་བརྗོད་པས་བྱིན་གྱིས་བརླབ། །ཀྱཻ། །བླ་མེད་དཀོན་མཆོག་རིན་ཆེན་གསུམ། །ཡི་དམ་དཔའ་བོ་མཁའ་འགྲོ་དང་། །ཆོས་སྐྱོང་ནོར་ལྷ་གཏེར་གྱི་བདག །གནས་དང་གཞི་ཡི་བདག་པོ་དང་། །ཁྱད་པར་རྟ་རྣམས་སྲུང་སྐྱོབ་ལྷ། །འཕགས་མཆོག་སྙིང་རྗེའི་བདག་པོ་དང་། །རྟ་ལྷ་ཨཱཪྻ་རེ་མནྟ། །རྟ་བདག་གནོད་སྦྱིན་ཀུ་བེ་ར། །ཅང་ཤེས་སྤྲིན་གྱི་ཤུགས་འཆང་དང་། །རྟ་ཐུག་དགྲ་ལྷའི་དམག་ཚོགས་སོགས། །འདིར་གཤེགས་དགྱེས་པའི་གདན་ལ་བཞུགས། །གཙང་མའི་སྐུ་ཁྲུས་འདི་གསོལ་ལོ། །ཨརྒྷཾ་བི་ཤུདྡྷེ་སྭཱ་ཧཱ། །དག་ཅིང་གཙང་མའི་མཆོད་ཡོན་དང་། །མེ་ཏོག་བདུག་སྤོས་མར་མེ་དང་། །ཞལ་ཟས་རོལ་མོ་སྣ་ཚོགས་འབུལ། །གཙང་མར་སྦྱར་བའི་བདུག་པའི་སྤྲིན། །འདོད་ཡོན་ལྷ་མོའི་གོམ་སྟབས་གཡོ། །ཏིང་ངེ་འཛིན་གྱིས་སྤྲུལ་པ་ཡི། །རྣམ་མང་མཆོད་པ་སྣ་ཚོགས་དང་། །གཟུགས་སྒྲ་དྲི་རོ་རེག་བྱ་སོགས། །ལྷ་དང་མི་ཡི་དཔལ་འབྱོར་ཀུན། །བསང་གི་དུད་སྤྲིན་ནམ་མཁའི་ཁྱོན། །མ་ལུས་དོག་པོར་བཀང་བ་ལས། །བྱུང་བའི་མཆོད་སྤྲིན་དཔག་མེད་དང་། །ཁྱད་པར་འཕགས་མཆོག་སྙིང་རྗེའི་གཏེར། །སེམས་ཅན་དོན་ལ་རབ་དགེས་པའི། །ཐུགས་བསྐྱེད་མཐུ་ལས་བྱུང་བ་ཡི། །རྫུ་འཕྲུལ་ལྡན་པའི་ཅང་ཤེས་ནི། །སྤུ་སྡུག་དཀར་སེར་སྔོ་ནག་དང་། །མཚལ་ལུ་བྲ་ནག་རྐྱང་ཆེན་དང་། །འོལ་བ་ངང་པ་དཀར་སེར་རག །མཛེས་ཤིང་མྱུར་བའི་རྐང་འགྲོས་ལྡན། །སྟོབས་ཤུགས་མཐུ་དཔལ་ཐོགས་པ་མེད། །གང་བསམ་ཡུལ་ལ་བགྲོད་བྱེད་པར། །རིན་ཆེན་སྒ་སྲབ་ནོར་བུས་བརྒྱན། །བྱེ་བ་བསམ་མི་ཁྱབ་པའི་ཚོགས། །སྤྲུལ་ནས་མགྲོན་རིགས་རྣམས་ལ་འབུལ། །བསྔོའོ་སྦྱིན་ནོ་ཚིམ་གྱུར་ཅིག །ལྕགས་ཀྱི་བྱ་ཁྲ་སྔོན་མོ་དང་། །དུང་གི་བྱ་ཁྲ་སྟག་སེང་གེ། ཁྱུང་འབྲུག་དོམ་དྲེད་ཁྱི་ནག་སོགས། །རྟ་ལ་འགོ་བའི་ལྷ་རྣམས་ལ། །བདུད་རྩི་བསང་གི་མཆོད་པ་འབུལ། །དམེ་ཤན་ནལ་ཡུགས་ལ་སོགས་པའི། །མི་གཙང་དྲི་མ་ཐམས་ཅད་བསང་། །སྒོ་གསུམ་དག་ཅིང་གཙང་བ་དང་། །རླུང་གི་ཤུགས་དང་མྱུར་བའི་བང་། །ས་ཆེན་ཡུད་ཙམ་བསྐོར་བ་ཡི། །རྫུ་འཕྲུལ་རྐང་པ་དང་ལྡན་ཅིང་། །རིག་ཁམས་དྭངས་པའི་མངོན་ཤེས་ཀྱིས། །འདོད་པའི་དོན་ཀུན་འབད་མེད་སྒྲུབས། །ཅི་བསམ་ཡིད་བཞིན་འགྲུབ་པར་མཛོད། །རྟ་ལ་གནོད་ཅིང་འཚེ་བ་ཡི། །བདུད་དང་གནོད་སྦྱིན་སྲིན་པོ་དང་། །འདྲེ་མོ་ཐེའུ་རང་བཙན་གྲི་གཤེད། །ས་བདག་ལ་སོགས་འབྱུང་པོ་རྣམས། །འདོད་ཡོན་བདུད་རྩིས་རབ་ཚིམས་ནས། །གདུག་ཅིང་གནོད་པའི་སེམས་རྣམས་ཞི། །བྱམས་པའི་སེམས་དང་ལྡན་པར་མཛོད། །སངས་རྒྱས་རྣམས་ཀྱི་བདེན་པ་དང་། །ཆོས་ཉིད་རང་བཞིན་དག་པའི་མཐུ། །ཆོས་ཅན་རྟེན་འབྲེལ་བསླུ་མེད་ཀྱི། །འདོད་ཡོན་བདུད་རྩིའི་བསང་མཆོད་འདིས། །རྟ་ལ་གནོད་པའི་ཡམས་ནད་དང་། །སྤུ་རྔོ་ལྷད་མཐིང་ཞྭ་བྱེ་སོགས། །ལས་དང་རྐྱེན་ལས་གྱུར་པ་ཡི། །ནད་དང་གནོད་པ་གཏན་ཞི་ཞིང་། །ལན་ཆགས་བུ་ལོན་བྱང་བ་དང་། །སྤུ་སྡུག་མཛེས་ཤིང་གོམ་སྟབས་ཀྱིས། །འཇིག་རྟེན་ཀུན་གྱི་ཡིད་དགའ་ཞིང་། །མཐོང་ན་ཡིད་སྨོན་འབྱུང་བ་དང་། །ས་རྟ་གནམ་རྟ་ཆུ་རྟ་སོགས། །བཀྲ་ཤིས་རི་མོས་མཚན་པ་ཡི། །ཅང་ཤེས་ཚོགས་ཀྱིས་རི་ལུང་གང་། །གང་བསམ་ས་རུ་ཕྱིན་པ་དང་། །ཕས་རྒོལ་ཕྱོགས་ལས་རྣམ་རྒྱལ་ཞིང་། །མཐར་ཐུག་འཕགས་པའི་སྨོན་ལམ་གྱིས། །བདེ་ནས་བདེ་བའི་སར་བགྲོད་དེ། །རྫུ་འཕྲུལ་རྐང་བཞི་མྱུར་ཐོབ་སྟེ། །སྙིང་རྗེའི་གཏེར་ཆེན་བ་ལ་ཧ། །རྟ་མཆོག་ཧེ་རུ་ཀ་དཔལ་གྱི། །གོ་འཕང་དམ་པ་ཐོབ་གྱུར་ཅིག །ཀི་བསྭོ་ཆའོ་ལྷ་རྒྱལ་ལོ། །ལྷ་ཀླུ་མི་གསུམ་རྟ་གཡང་དང་། །སྦེ་རྟ་ཧོར་གྱི་རྟ་གཡང་རྣམས། །དེ་རིང་འདི་རུ་གཡང་དུ་ཁུག །ཁུ་ཡེ་ཧུ་ལོ་གཡང་གི་བརྡ། །རྟ་མཆོག་རིན་ཆེན་བཀྲ་ཤིས་ཀྱིས། །དུས་རྣམས་ཀུན་ཏུ་བཀྲ་ཤིས་ཤོག །ཛ་ཡ་ཛ་ཡ་རེ་མནྟ་སིདྡྷི་ཕ་ལ་ཧོ། །ཞེས་པའང་རྣམ་འགྱུར་ཞེས་པ་འབྱུང་བ་སུམ་ལྡན་ལྕགས་ཕོ་སྟག་གི་ལོར་སྒྲུབ་གནས་རྒྱལ་པོ་དཀར་མོ་སྟག་ཚང་གི་ཐུས་རུ་མར་དབོན་མཛོད་ཚེ་དཔལ་ནས་རྟ་བསང་དགོས་ཞེས་བསྐུལ་བ་ན་དཔེ་གཞན་མ་འབྱོར་སྟབས་ཉམས་མཚར་བྲི་འདོད་བྱུང་བ་པདྨ་ཡེ་ཤེས་རྡོ་རྗེས་སྨྲས་རིམ་བཞིན་ཚེ་རིང་བཀྲ་ཤིས་ནས་ཡི་གེར་བགྱིས་པ་འདིས་ཀྱང་རྔོག་ཆགས་ཀྱི་རྒུད་པ་ཞི་ཞིང་། །འཇིག་རྟེན་ཀུན་ཏུ་ཅང་ཤེས་འཕེལ་བའི་རྒྱུར་གྱུར་ཅིག། །།

[edit]

rta bsang bdud rtsi'i gru char bzhugs/__/h+ya grI wa la na mo/__rta'i nad rnams zhi bar 'dod pas bzang shing sna tshogs kyi dud pa/__rin chen 'bru sman dar zab sna tshogs bsres pa'i phye mar bsregs pa la chu gtsang mas bran/__ra~M ya~M kha~M gis sbyangs/__oM AHhU~M lan gsum dang nam mkha' mdzod kyi sngags rgya mang du brjod pas byin gyis brlab/__/kyai/__/bla med dkon mchog rin chen gsum/__/yi dam dpa' bo mkha' 'gro dang /__/chos skyong nor lha gter gyi bdag__/gnas dang gzhi yi bdag po dang /__/khyad par rta rnams srung skyob lha/__/'phags mchog snying rje'i bdag po dang /__/rta lha AR+Ya re man+ta/__/rta bdag gnod sbyin ku be ra/__/cang shes sprin gyi shugs 'chang dang /__/rta thug dgra lha'i dmag tshogs sogs/__/'dir gshegs dgyes pa'i gdan la bzhugs/__/gtsang ma'i sku khrus 'di gsol lo/__/ar+g+haM bi shud+d+he swA hA/__/dag cing gtsang ma'i mchod yon dang /__/me tog bdug spos mar me dang /__/zhal zas rol mo sna tshogs 'bul/__/gtsang mar sbyar ba'i bdug pa'i sprin/__/'dod yon lha mo'i gom stabs g.yo/__/ting nge 'dzin gyis sprul pa yi/__/rnam mang mchod pa sna tshogs dang /__/gzugs sgra dri ro reg bya sogs/__/lha dang mi yi dpal 'byor kun/__/bsang gi dud sprin nam mkha'i khyon/__/ma lus dog por bkang ba las/__/byung ba'i mchod sprin dpag med dang /__/khyad par 'phags mchog snying rje'i gter/__/sems can don la rab dges pa'i/__/thugs bskyed mthu las byung ba yi/__/rdzu 'phrul ldan pa'i cang shes ni/__/spu sdug dkar ser sngo nag dang /__/mtshal lu bra nag rkyang chen dang /__/'ol ba ngang pa dkar ser rag__/mdzes shing myur ba'i rkang 'gros ldan/__/stobs shugs mthu dpal thogs pa med/__/gang bsam yul la bgrod byed par/__/rin chen sga srab nor bus brgyan/__/bye ba bsam mi khyab pa'i tshogs/__/sprul nas mgron rigs rnams la 'bul/__/bsngo'o sbyin no tshim gyur cig__/lcags kyi bya khra sngon mo dang /__/dung gi bya khra stag seng ge/__khyung 'brug dom dred khyi nag sogs/__/rta la 'go ba'i lha rnams la/__/bdud rtsi bsang gi mchod pa 'bul/__/dme shan nal yugs la sogs pa'i/__/mi gtsang dri ma thams cad bsang /__/sgo gsum dag cing gtsang ba dang /__/rlung gi shugs dang myur ba'i bang /__/sa chen yud tsam bskor ba yi/__/rdzu 'phrul rkang pa dang ldan cing /__/rig khams dwangs pa'i mngon shes kyis/__/'dod pa'i don kun 'bad med sgrubs/__/ci bsam yid bzhin 'grub par mdzod/__/rta la gnod cing 'tshe ba yi/__/bdud dang gnod sbyin srin po dang /__/'dre mo the'u rang btsan gri gshed/__/sa bdag la sogs 'byung po rnams/__/'dod yon bdud rtsis rab tshims nas/__/gdug cing gnod pa'i sems rnams zhi/__/byams pa'i sems dang ldan par mdzod/__/sangs rgyas rnams kyi bden pa dang /__/chos nyid rang bzhin dag pa'i mthu/__/chos can rten 'brel bslu med kyi/__/'dod yon bdud rtsi'i bsang mchod 'dis/__/rta la gnod pa'i yams nad dang /__/spu rngo lhad mthing zhwa bye sogs/__/las dang rkyen las gyur pa yi/__/nad dang gnod pa gtan zhi zhing /__/lan chags bu lon byang ba dang /__/spu sdug mdzes shing gom stabs kyis/__/'jig rten kun gyi yid dga' zhing /__/mthong na yid smon 'byung ba dang /__/sa rta gnam rta chu rta sogs/__/bkra shis ri mos mtshan pa yi/__/cang shes tshogs kyis ri lung gang /__/gang bsam sa ru phyin pa dang /__/phas rgol phyogs las rnam rgyal zhing /__/mthar thug 'phags pa'i smon lam gyis/__/bde nas bde ba'i sar bgrod de/__/rdzu 'phrul rkang bzhi myur thob ste/__/snying rje'i gter chen ba la ha/__/rta mchog he ru ka dpal gyi/__/go 'phang dam pa thob gyur cig__/ki bswo cha'o lha rgyal lo/__/lha klu mi gsum rta g.yang dang /__/sbe rta hor gyi rta g.yang rnams/__/de ring 'di ru g.yang du khug__/khu ye hu lo g.yang gi brda/__/rta mchog rin chen bkra shis kyis/__/dus rnams kun tu bkra shis shog__/dza ya dza ya re man+ta sid+d+hi pha la ho/__/zhes pa'ang rnam 'gyur zhes pa 'byung ba sum ldan lcags pho stag gi lor sgrub gnas rgyal po dkar mo stag tshang gi thus ru mar dbon mdzod tshe dpal nas rta bsang dgos zhes bskul ba na dpe gzhan ma 'byor stabs nyams mtshar bri 'dod byung ba pad+ma ye shes rdo rjes smras rim bzhin tshe ring bkra shis nas yi ger bgyis pa 'dis kyang rngog chags kyi rgud pa zhi zhing /__/'jig rten kun tu cang shes 'phel ba'i rgyur gyur cig/__//__