JKCL-KABUM-11-DA-110

From Khyentse Lineage - A Tsadra Foundation Project

ཨག་འདམ་གཉིས་ཀྱི་གཞི་བདག་བསང་མཆོད་ཕན་བདེའི་དབྱངས་སྙན།
Wylie title ag 'dam gnyis kyi gzhi bdag bsang mchod phan bde'i dbyangs snyan JKCL-KABUM-11-DA-110.pdf
Location chos kyi blo gros bka' 'bum
Volume 11, Text 110, Pages 527-529 (Folios 1a1 to 2a5)
Author འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation 'jam dbyangs mkhyen brtse chos kyi blo gros. ag 'dam gnyis kyi gzhi bdag bsang mchod phan bde'i dbyangs snyan. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 11: 527-529. Bir, H.P.: Khyentse Labrang, 2012.
Genre Smoke Offerings - bsangs mchod - lha bsang

":Property:textsubnumber|textsubnumber" can not be assigned to a declared number type with value 1.

[edit]
ཨག་འདམ་གཉིས་ཀྱི་གཞི་བདག་བསང་མཆོད་ཕན་བདེའི་དབྱངས་སྙན་ཅེས་བྱ་བ་བཞུགས་སོ། །ཨོཾ་སྭསྟི། དགེ་ལེགས་ཀུན་གྱི་མཆོག་གྱུར་པ། །པདྨ་རྒྱལ་ལ་གུས་བཏུད་ནས། །དཀར་ཕྱོགས་སྐྱོང་བའི་གཞི་བདག་ཚོགས། །དགྱེས་བའི་བསང་མཆོད་ཉུང་ངུར་སྤེལ། །དེ་ལ་མཆོད་གཏོར་གསེར་སྐྱེམས་སོགས་ལེགས་པར་བཤམས་ཤིང་། །བཟང་ཤིང་གི་དུད་པ་ཐུལ་པ་དང་བཅས། རྃ་ཡྃ་ཁྃ། བསང་གི་ཉེས་སྐྱོན་མ་དག་ཐམས་ཅད་སྦྱངས། །བསང་གི་བདུད་རྩི་དུད་སྤྲིན་ཕྱོགས་བརྒྱར་ཁྱབ། །མི་གཙང་ཉེས་ཀུན་སེལ་བའི་བསང་མཆོད་ཀྱིས། །ས་དང་བར་སྣང་ཡོངས་སུ་ཁྱབ་པར་གྱུར། ཨོཾ་ཨཱཿཧཱུྃ། ནམ་མཁའ་མཛོད་ཀྱི་སྔགས་རྒྱས་སྤེལ། ཀྱཻ། བསང་ངོ་མཆོད་དོ་ཀུན་བཟང་མཆོད་སྤྲིན་གྱིས། །རྒྱལ་བ་དགོངས་བརྒྱུད་རིག་འཛིན་བརྡའ་བརྒྱུད་དང་། །གང་ཟག་སྙན་བརྒྱུད་ལས་འཕྲོ་གཏེར་བརྒྱུད་སོགས། །རིག་འཛིན་མཁས་གྲུབ་རྒྱ་མཚོའི་ཚོགས་རྣམས་ལ། །མཆོད་པ་འབུལ་ལོ་བྱིན་རླབས་ཆར་ཆེན་ཕོབས། །ཆོས་ཀྱི་དབྱིངས་ནས་སྒྱུ་འཕྲུལ་རོལ་པའི་གར། །ཡི་དམ་ཞི་ཁྲོའི་དཀྱིལ་འཁོར་བསམ་ལས་འདས། །རྒྱུད་དང་སྒྲུབ་སྡེའི་ལྷ་ཚོགས་ཐམས་ཅད་ལ། །བསང་མཆོད་འབུལ་ལོ་གྲུབ་གཉིས་དངོས་གྲུབ་སྩོལ། །གནས་གསུམ་དཔའ་བོ་དང་ནི་ཌཀྐིའི་ཚོགས། །བཀའ་གཏེར་བསྟན་སྲུང་དམ་ཅན་རྒྱ་མཚོ་དང་། །འདོད་དགུའི་དཔལ་གཏེར་ནོར་ལྷ་རབ་འབྱམས་ལ། །བསང་མཆོད་འབུལ་ལོ་ཕྲིན་ལས་རྣམ་བཞི་སྒྲུབས། །བརྟན་མ་བཅུ་གཉིས་མགུར་ལྷ་བཅུ་གསུམ་དང་། །དགེ་བསྙེན་ཉེར་གཅིག་ལྷ་རབ་མཆེད་དགུ་སོགས། སྲིད་པ་ཆགས་པའི་ལྷ་ཀླུ་གཞི་བདག་ལ། །བསང་མཆོད་འབུལ་ལོ་འཇིག་རྟེན་བདེ་ལེགས་མཛོད། ཀྱཻ། བདེ་ཆེན་ལྗོངས་ཀྱི་ནོར་འཛིན་ཐིག་ལེ་ཆེ། །ཡུལ་གྱི་དགེ་བཅུ་གཡང་དུ་འཁྱིལ་བ་ཡི། །ཨག་དང་འདམ་གྱི་གཞུང་ཆེན་སྐྱོང་མཛད་པའི། །དཀར་ཕྱོགས་སྐྱོང་བའི་ཡུལ་ལྷ་ཐམས་ཅད་དང་། །ཁྱད་པར་ཨོ་ཌི་ཡ་ནའི་སློབ་དཔོན་ཆེས། །བཀའ་བསྒོས་དམ་ཚིག་རྡོ་རྗེ་གཙུག་ཏུ་བཀོད། །ཐ་ཚིག་སྙིང་ལ་འཆང་བའི་ཡུལ་ལྷ་ནི། །ཚྭ་རྒྱལ་དངུལ་འཕྲུ་མི་དཀར་འཁོར་གསུམ་ཅན། །རྟ་དཀར་ལ་ཞོན་ཚྭ་ཆེན་བཅོ་བརྒྱད་བསྐོར། །སྟོང་དཔོན་དགྲ་འདུལ་མི་དམར་དམག་དཔོན་ཆས། །རྒྱལ་སྲིད་སྣ་བདུན་ཡང་འཁོར་བྱེ་བ་བཅས། །བླ་མ་རིན་ཆེན་ཉན་ཐོས་དགེ་སློང་འབུམ། །གྲོ་གད་དབྱིག་རྡི་ར་རྫོང་གླང་ཆེན་མཆེད། །མེ་འབར་མཚོ་མོ་ལ་སོགས་མཚོ་སྨན་རིགས། །ཨ་མྱི་འབྲི་རྒྱལ་སྔགས་ཆས་འབྲོང་ནག་ཞོན། །རྒྱལ་ཆེན་བཅོ་བརྒྱད་སྲིད་མོ་གོང་མོ་རི། །ནིས་ར་མཚོ་རྒན་མཚོ་སྨན་དུ་མ་དང་། །རལ་པ་རི་དམར་རྫ་རི་རྒྱལ་མོ་དང་། །བྲག་ལ་མདའ་ཟུག་ཁྲ་ནེ་ཏ་དུ་སོགས། །དཀར་ཕྱོགས་སྐྱོང་བའི་གཞི་བདག་འཁོར་བཅས་རྣམས། །བསང་མཆོད་འདོད་ཡོན་བདུད་རྩི་དགྱེས་པར་བཞེས། །རྨེ་མནོལ་མཁོན་སོགས་གྲིབ་ཀྱིས་ཕོག་པ་ཡི། །མི་གཙང་དྲི་མའི་ཚོགས་རྣམས་སེལ་གྱུར་ཅིག །དུས་ངན་སེམས་ཅན་སྤྱོད་པ་ལོག་པ་ལས། །བྱུང་བའི་འབྲས་བུའི་ཕོག་ཐུག་འགྲམ་འཁྲུགས་སོགས། །མི་ཤེས་བག་མེད་དབང་དུ་གྱུར་པ་རྣམས། །གནོངས་ཤིང་འགྱོད་པས་མཐོལ་བཤགས་འབུལ་ལགས་ན། །ཁྱོད་ཐུགས་དགྱེས་པའི་ཟླ་ཞལ་ངོམ་པ་ལས། །བྱུང་བའི་ཟེར་ཕྲེང་བདུད་རྩིའི་ཐིག་པ་ལ། །ལྗོངས་འདིའི་ལེགས་བྱས་དགའ་སྟོན་སྨིན་པ་དང་། །ནད་མུག་མཚོན་འཁྲུགས་མཐའ་ཡི་དམག་དཔུང་བཟློག །གཞི་བྱེས་ཀུན་ཏུ་སྲུངས་ཤིང་སྐྱོབས་པ་དང་། །ལུས་ལ་གཟི་བརྗིད་ངག་ལ་ནུས་མཐུ་དང་། །སེམས་ལ་བདེ་གསལ་འབར་ཞིང་དཔལ་འབྱོར་རྒྱས། །ཚེ་གཡང་ལོངས་སྤྱོད་འདོད་དགུའི་བླ་རེ་བྲེས། །རྫོགས་ལྡན་དུས་ཀྱི་ལེགས་བྱས་དར་ལ་བབ། །སྲིད་ཞི་ཕུན་ཚོགས་རྒྱས་པའི་བཀྲ་ཤིས་ཤོག །ཅེས་བརྗོད་ལ་གཏོར་མ་བསང་ཕུད་མཆོད།། །།
[edit]

ag 'dam gnyis kyi gzhi bdag bsang mchod phan bde'i dbyangs snyan ces bya ba bzhugs so/__/oM swasti/__dge legs kun gyi mchog gyur pa/__/pad+ma rgyal la gus btud nas/__/dkar phyogs skyong ba'i gzhi bdag tshogs/__/dgyes ba'i bsang mchod nyung ngur spel/__/de la mchod gtor gser skyems sogs legs par bshams shing /__/bzang shing gi dud pa thul pa dang bcas/__ra~M ya~M kha~M/__bsang gi nyes skyon ma dag thams cad sbyangs/__/bsang gi bdud rtsi dud sprin phyogs brgyar khyab/__/mi gtsang nyes kun sel ba'i bsang mchod kyis/__/sa dang bar snang yongs su khyab par gyur/__oM AHhU~M/__nam mkha' mdzod kyi sngags rgyas spel/__kyai/__bsang ngo mchod do kun bzang mchod sprin gyis/__/rgyal ba dgongs brgyud rig 'dzin brda' brgyud dang /__/gang zag snyan brgyud las 'phro gter brgyud sogs/__/rig 'dzin mkhas grub rgya mtsho'i tshogs rnams la/__/mchod pa 'bul lo byin rlabs char chen phobs/__/chos kyi dbyings nas sgyu 'phrul rol pa'i gar/__/yi dam zhi khro'i dkyil 'khor bsam las 'das/__/rgyud dang sgrub sde'i lha tshogs thams cad la/__/bsang mchod 'bul lo grub gnyis dngos grub stsol/__/gnas gsum dpa' bo dang ni Dak+ki'i tshogs/__/bka' gter bstan srung dam can rgya mtsho dang /__/'dod dgu'i dpal gter nor lha rab 'byams la/__/bsang mchod 'bul lo phrin las rnam bzhi sgrubs/__/brtan ma bcu gnyis mgur lha bcu gsum dang /__/dge bsnyen nyer gcig lha rab mched dgu sogs/__srid pa chags pa'i lha klu gzhi bdag la/__/bsang mchod 'bul lo 'jig rten bde legs mdzod/__kyai/__bde chen ljongs kyi nor 'dzin thig le che/__/yul gyi dge bcu g.yang du 'khyil ba yi/__/ag dang 'dam gyi gzhung chen skyong mdzad pa'i/__/dkar phyogs skyong ba'i yul lha thams cad dang /__/khyad par o Di ya na'i slob dpon ches/__/bka' bsgos dam tshig rdo rje gtsug tu bkod/__/tha tshig snying la 'chang ba'i yul lha ni/__/tshwa rgyal dngul 'phru mi dkar 'khor gsum can/__/rta dkar la zhon tshwa chen bco brgyad bskor/__/stong dpon dgra 'dul mi dmar dmag dpon chas/__/rgyal srid sna bdun yang 'khor bye ba bcas/__/bla ma rin chen nyan thos dge slong 'bum/__/gro gad dbyig rdi ra rdzong glang chen mched/__/me 'bar mtsho mo la sogs mtsho sman rigs/__/a myi 'bri rgyal sngags chas 'brong nag zhon/__/rgyal chen bco brgyad srid mo gong mo ri/__/nis ra mtsho rgan mtsho sman du ma dang /__/ral pa ri dmar rdza ri rgyal mo dang /__/brag la mda' zug khra ne ta du sogs/__/dkar phyogs skyong ba'i gzhi bdag 'khor bcas rnams/__/bsang mchod 'dod yon bdud rtsi dgyes par bzhes/__/rme mnol mkhon sogs grib kyis phog pa yi/__/mi gtsang dri ma'i tshogs rnams sel gyur cig__/dus ngan sems can spyod pa log pa las/__/byung ba'i 'bras bu'i phog thug 'gram 'khrugs sogs/__/mi shes bag med dbang du gyur pa rnams/__/gnongs shing 'gyod pas mthol bshags 'bul lags na/__/khyod thugs dgyes pa'i zla zhal ngom pa las/__/byung ba'i zer phreng bdud rtsi'i thig pa la/__/ljongs 'di'i legs byas dga' ston smin pa dang /__/nad mug mtshon 'khrugs mtha' yi dmag dpung bzlog__/gzhi byes kun tu srungs shing skyobs pa dang /__/lus la gzi brjid ngag la nus mthu dang /__/sems la bde gsal 'bar zhing dpal 'byor rgyas/__/tshe g.yang longs spyod 'dod dgu'i bla re bres/__/rdzogs ldan dus kyi legs byas dar la bab/__/srid zhi phun tshogs rgyas pa'i bkra shis shog__/ces brjod la gtor ma bsang phud mchod//__//

Footnotes

Other Information