རྒྱལ་ཆེན་རྣམ་སྲས་ལ་བསྟོད་པ་སེང་ཆེན་འགྱིང་གླུ།

From Khyentse Lineage - A Tsadra Foundation Project
JKCL-KABUM-11-DA-031
Wylie title rgyal chen rnam sras la bstod pa seng chen 'gying glu JKCL-KABUM-11-DA-031.pdf
Location chos kyi blo gros bka' 'bum
Volume 11, Text 31, Pages 151-153 (Folios 1a1 to 2a1)
Author འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation 'jam dbyangs mkhyen brtse chos kyi blo gros. rgyal chen rnam sras la bstod pa seng chen 'gying glu. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 11: 151-153. Bir, H.P.: Khyentse Labrang, 2012.
Genre Protector Rituals - gsol mchod  ·  Verses of Praise - bstod pa
Deity rnam mang thos sras
Colophon

།ཅེས་པའང་ས་ཕོ་བྱི་བའི་ལོར་གཡང་སྒྲུབ་སྐབས་དབོ་ཟླ་བའི་དཀར་ཕྱོགས་ཀྱི་བཟང་པོ་དང་པོའི་ཚེས་ལ་འཇམ་དབྱངས་ཆོས་ཀྱི་བློ་གྲོས་པས་བསྟོད་ཅིང་སྨོན་པ་སྲིད་ཞིའི་ཕུན་ཚོགས་འབད་མེད་ངང་གི་འདུ་བའི་རྒྱུར་གྱུར་ཅིག །སརྦ་དྭ་ཀ་ལྱཱ་ཛཾ་པུ་ཤྲ་ཡེ་དྷ་བ་ཏུ།།

/ces pa'ang sa pho byi ba'i lor g.yang sgrub skabs dbo zla ba'i dkar phyogs kyi bzang po dang po'i tshes la 'jam dbyangs chos kyi blo gros pas bstod cing smon pa srid zhi'i phun tshogs 'bad med ngang gi 'du ba'i rgyur gyur cig__/sarba dwa ka l+yA dzaM pu shra ye d+ha ba tu//

1 Texts in this Section (sde tshan or chos tshan)

[edit]
རྒྱལ་ཆེན་རྣམ་སྲས་ལ་བསྟོད་པ་སེང་ཆེན་འགྱིང་གླུ་ཞེས་བྱ་བ་བཞུགས་སོ། །བཻ། རྒྱལ་བ་ཀུན་གྱི་ཡོན་ཏན་ནོར་བུའི་གཏེར། །གཅིག་ཏུ་སྤུངས་པའི་སེམས་དཔའ་རིན་ཆེན་མང་། །གནོད་སྦྱིན་བྱེ་བ་འབུམ་གྱི་སྡེ་དཔོན་ཆེ། །ངལ་བསོས་པོ་ཞེས་ས་བརྒྱད་སེམས་དཔར་བསྟོད། །གསེར་གྱི་ཡ་ལད་བགོས་པའི་གཟི་བརྗིད་ནི། །ཉི་མ་སྟོང་གིས་འཁྱུད་པ་ཇི་བཞིན་དུ། །ལྷ་མིན་གཡུལ་བཟློག་ལྷ་རྣམས་རྒྱལ་བར་མཛད། །བྱང་ཕྱོགས་སྐྱོང་མཛད་མགོན་པོ་ཁྱོད་ལ་བསྟོད། །གཏེར་གྱི་ཁང་བཟང་དུ་མས་རབ་བསྐོར་ཞིང་། །རྟ་བདག་ཆེན་པོ་བརྒྱད་དང་གནོད་སྦྱིན་ཚོགས། །བྱེ་བ་འབུམ་ཕྲག་མང་པོའི་དབུས་ན་མཐོ། །ཕོ་བྲང་གསེར་གྱི་རྒྱལ་མཚན་བདག་པོར་བསྟོད། །སྐུ་གསུང་ཐུགས་གྱི་རྣམ་འཕྲུལ་དུ་མ་ཡིས། །ལས་བཞིའི་དངོས་གྲུབ་འབད་མེད་ལྷུན་གྱིས་གྲུབ། །ཡོན་ཏན་ཕྲིན་ལས་བསམ་མི་ཁྱབ་པའི་བདག །དབུལ་བའི་གདུང་སེལ་རྒྱལ་ཆེན་ཁྱོད་ལ་བསྟོད། །སྐུ་མདོག་གཙོ་མ་གསེར་གྱི་མདོག་འཆང་ཞིང་། །གདོང་ལྔའི་སྟེང་ན་རྣམ་པར་རོལ་པའི་སྟབས། །ནོར་བུའི་རྒྱལ་མཚན་སྟུག་པོའི་སྤྲིན་ཆེན་ལས། །དགོས་འདོད་ལོངས་སྤྱོད་ཆར་པ་འབེབས་ལ་བསྟོད། །པདྨ་རཱ་གའི་མདོག་འཆང་འོད་དམར་གྱི། །ལྕགས་ཀྱུ་རྣོན་པོས་ཕྱག་རྒྱས་ཐེབས་པ་ན། །ཁབ་ལེན་རྡོ་ཡི་ལྕགས་ཕྱེ་ཇི་བཞིན་དུ། །སྲིད་གསུམ་དབང་མཛད་མདུང་དམར་ཅན་ལ་བསྟོད། །རབ་སྔོན་བཻཌཱུར་སྔོན་པོའི་མདངས་ལྡན་ཞིང་། །ཅང་ཤེས་རྟ་ཡི་སྟེང་ན་གཏུམ་དྲག་བརྗིད། །རྡོ་རྗེའི་རལ་གྲིས་བཏབ་པ་དེ་ཡི་མོད། །སྲིད་གསུམ་བདུད་དགྲ་གདོན་བགེགས་དུམ་བུར་གཏུབ། །མི་བཟད་འཇིགས་རུང་གནོད་སྦྱིན་ཁྲོས་པར་བསྟོད། །དེ་ལྟར་བསྟོད་ཅིང་གསོལ་བ་བཏབ་པའི་མཐུས། །མགོན་པོ་ཁྱེད་ཀྱི་ཤཱཀྱ་སེངྒེ་དང་། །ཕྱག་རྡོར་སྤྱན་སྔར་ཇི་ལྟར་དམ་བཅས་བཞིན། །བསྟན་པ་རིན་ཆེན་ཕྱོགས་བཅུར་རྒྱས་པར་མཛོད། །དེ་ལ་འཁུ་བའི་ཡིད་སྲུབས་སྡེར་བཅས་རྣམས། །གང་གི་ཐུགས་རྗེས་འཇུག་པ་དེ་ཡི་མོད། །མིང་ཙམ་མེད་པ་དབྱིངས་སུ་བསྒྲལ་བ་དང་། །བསྟན་འཛིན་སྐྱེས་རྣམས་དབུ་འཕང་དགུང་དུ་བསྟོད། །ཆོས་ལྡན་རྒྱལ་བློན་ཁྱིམ་བདག་མངའ་ཐང་རྒྱས། །སྒྲུབ་པོ་བདག་ཅག་ནད་གདོན་བར་ཆད་ཞི། །ཚེ་ཆོས་བསོད་ནམས་དཔལ་འབྱོར་རབ་རྒྱས་ནས། །ཅི་བསམ་འབད་མེད་ལྷུན་གྱིས་གྲུབ་པར་མཛོད། །འཇིག་རྟེན་གསུམ་ན་སྲིད་ཞིའི་དཔལ་གྱིས་མཐོ། །རྫོགས་ལྡན་དང་པོའི་དགའ་སྟོན་མཆོག་ཏུ་དར། །ཕུན་ཚོགས་དགེ་ལེགས་གྲུབ་པའི་ཤིས་པ་ཡིས། །མི་ཉམས་རྟག་པར་འཕེལ་བའི་ཕྲིན་ལས་མཛོད། །ཅེས་པའང་ས་ཕོ་བྱི་བའི་ལོར་གཡང་སྒྲུབ་སྐབས་དབོ་ཟླ་བའི་དཀར་ཕྱོགས་ཀྱི་བཟང་པོ་དང་པོའི་ཚེས་ལ་འཇམ་དབྱངས་ཆོས་ཀྱི་བློ་གྲོས་པས་བསྟོད་ཅིང་སྨོན་པ་སྲིད་ཞིའི་ཕུན་ཚོགས་འབད་མེད་ངང་གི་འདུ་བའི་རྒྱུར་གྱུར་ཅིག །སརྦ་དྭ་ཀ་ལྱཱ་ཛཾ་པུ་ཤྲ་ཡེ་དྷ་བ་ཏུ།། །།

Footnotes

Other Information