ཐེག་པ་མཐའ་དག་གི་སྙིང་པོ་མདོ་ཙམ་བརྗོད་པ་ཆོས་ཀྱི་སྒོ་འབྱེད།

🚧 This website is under continued development. We appreciate your patience!

Previous Text Back to Volume PageNext Text

Wylie title	theg pa mtha' dag gi snying po mdo tsam brjod pa chos kyi sgo 'byed
Location	chos kyi blo gros bka' 'bum Volume 9, Text 5, Pages 49-64 (Folios 1a to 8b3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. theg pa mtha' dag gi snying po mdo tsam brjod pa chos kyi sgo 'byed. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 9: 49-64. Bir, H.P.: Khyentse Labrang, 2012.
Genre	Overviews - spyi don
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/opening-the-door-of-dharma
Colophon	།དེ་ལྟར་ཆོས་ཀྱི་སྒོ་འབྱེད་འདི། །འབྲས་སྤྱི་བློན་ཆེན་བཀའི་བསྐུལ་ངོར། །བོད་ཆེན་ལྗོངས་ཀྱི་ཆར་གཏོགས་པའི། །འཇམ་དབྱངས་མཁྱེན་བརྩེའི་སྤྲུལ་མིང་འཛིན། །བླུན་རྨོངས་ཆོས་ཀྱི་བློ་གྲོས་པས། །ལྷག་བསམ་བཟང་པོས་ཤར་མར་བྲིས། །དགེ་བས་བསྟན་འགྲོར་སྨན་གྱུར་ཅིག །སརྦ་དཱ་མངྒ་ལཾ། ཤུ་བྷཾ།།
	/de ltar chos kyi sgo 'byed 'di/__/'bras spyi blon chen bka'i bskul ngor/__/bod chen ljongs kyi char gtogs pa'i/__/'jam dbyangs mkhyen brtse'i sprul ming 'dzin/__/blun rmongs chos kyi blo gros pas/__/lhag bsam bzang pos shar mar bris/__/dge bas bstan 'gror sman gyur cig__/sarba dA mang+ga laM/__shu b+haM//

1 Texts in this Section (sde tshan or chos tshan)

49-64	ཐེག་པ་མཐའ་དག་གི་སྙིང་པོ་མདོ་ཙམ་བརྗོད་པ་ཆོས་ཀྱི་སྒོ་འབྱེད། theg pa mtha' dag gi snying po mdo tsam brjod pa chos kyi sgo 'byed Overviews - spyi don	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །ཐེག་པ་མཐའ་དག་གི་སྙིང་པོ་མདོ་ཙམ་བརྗོད་པ་ཆོས་ཀྱི་སྒོ་འབྱེད་ཅེས་བྱ་བ་བཞུགས་སོ། ། བླ་མ་དང་མགོན་པོ་འཇམ་དཔལ་དབྱངས་ལ་ཕྱག་འཚལ་ལོ། །བདག་ཏུ་ལྟ་བའི་དྲྭ་བ་འདྲལ་མཛད་ཅིང་། །ཡེ་ཤེས་རལ་གྲིའི་འོད་ཀྱིས་སྲིད་གསུམ་ཁྱབ། །རྒྱལ་བ་ཀུན་གྱི་མཁྱེན་རབ་ཕུང་པོ་ཆེ། །མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ཐེག་པ་མཐའ་ཡས་ཆོས་ཚུལ་བསམ་མི་ཁྱབ། །བརྗོད་པར་ནུས་མིན་འོན་ཀྱང་མདོ་ཙམ་ཞིག །ཉུང་ངུའི་ངག་གི་རྣམ་པར་དབྱེ་བ་ནི། །ཆ་ཤས་ཙམ་ཞིག་བདག་གི་བརྗོད་པར་བྱ། །ཀུན་མཁྱེན་སྟོན་པ་ཤཱཀྱ་སེང་གེ་ཡི། །ཆོས་ཀྱི་འཁོར་ལོ་རིམ་པ་གསུམ་བསྐོར་བ། །དང་པོས་བསོད་ནམས་མིན་པ་བཟློག་པ་དང་། །བར་པས་བདག་ཏུ་ལྟ་བ་བཟློག་པ་དང་། །ཐ་མས་ལྟ་གཞི་ཐམས་ཅད་བཟློག་པར་གསུངས། །བརྗོད་བྱ་བསླབ་གསུམ་རྗོད་བྱེད་གསུང་རབ་ནི། །ཡན་ལག་བཅུ་གཉིས་ཁོངས་སུ་བསྡུ་བ་དང་། །གསང་བ་སྔགས་ཀྱི་ཐེག་པ་ཆེན་པོ་ལ། །ཁ་ཅིག་ནང་གི་མངོན་པ་ཞེས་བཤད་ཀྱང་། །རིག་པ་འཛིན་པའི་སྡེ་སྣོད་ཅེས་གསུངས་ཏེ། །ལོགས་སུ་བཀར་བ་དེ་ཉིད་ལེགས་པར་བཞེད། །བོད་དུ་འགྱུར་བ་པུསྟི་བརྒྱ་ལྷག་ཙམ། །འོན་ཀྱང་བཀའ་ཡི་ཚད་བཟུང་མི་ནུས་སོ། །བཀའ་ཡི་དགོངས་འགྲེལ་བསྟན་བཅོས་རྣམ་གྲངས་ལ། །ཐེག་དམན་བྱེ་བྲག་བཤད་མཛོད་ལ་སོགས་པ། །ཐེག་ཆེན་དགོངས་འགྲེལ་འཛམ་གླིང་རྒྱན་དྲུག་དང་། །རྨད་བྱུང་སློབ་དཔོན་ལ་སོགས་མཁས་རྣམས་ཀྱིས། །མཛད་པ་ཤིན་ཏུ་རྣམ་གྲངས་མང་པོ་དང་། །གསང་སྔགས་རྒྱུད་སྡེའི་འགྲེལ་དང་སྒྲུབ་ཐབས་དང་། །མན་ངག་བསམ་མི་ཁྱབ་པ་བཞུགས་པ་རྣམས། །སྔོན་བྱོན་ལོ་པཎ་རྣམས་ཀྱི་བཀའ་དྲིན་ལས། །བོད་དུ་བསྒྱུར་བ་གླེགས་བམ་ཉིས་བརྒྱ་ལྷག །བཞུགས་པ་རྣམས་ཀྱི་བསྟན་པའི་གཞི་འཛིན་བྱེད། །འཕགས་པའི་ཡུལ་དུ་གསར་རྙིང་ཞེས་པ་མེད། །བོད་དུ་ལོ་ཙཱ་རྣམས་ཀྱི་འགྱུར་སྔ་ཕྱིའི། །གསར་རྙིང་དབྱེ་བ་རིན་བཟང་བྱོན་ཡན་ཆོད། །འགྱུར་བ་སྔ་འགྱུར་རྙིང་མ་དེ་ཕྱིན་ཆོད། །གསར་མ་ཞེས་དབྱེ་དེ་ཡང་འདུལ་མདོ་མངོན། །གསང་སྔགས་ཕྱི་རྒྱུད་གསུམ་པོ་ལ་སོགས་པ། །ཕལ་ཆེར་བསྟན་པ་སྔ་དར་དུས་སུ་འགྱུར། །རྣལ་འབྱོར་བླ་མེད་བདེ་ཀྱཻ་དུས་གཤིན་སོགས། །ཕྱི་འགྱུར་ཤས་ཆེ་སྔ་འགྱུར་རྙིང་མ་ལ། །ཏནྟྲ་ཆེན་པོ་བཅོ་བརྒྱད་ལ་སོགས་པ། །བླ་མེད་རྒྱུད་སྡེ་རྣམ་གྲངས་ཤིན་ཏུ་མང་། །དེ་ལ་གསར་མའི་མཁས་མཆོག་འགའ་ཞིག་གིས། །རྒྱུད་ནི་ཚད་མ་མིན་ཞེས་གསུངས་ན་ཡང་། །གཟུར་གནས་རྣམས་ཀྱི་ཚད་མ་ཉིད་དུ་བསྔགས། །དོན་ལའང་དེ་ལྟར་འཁྲུལ་མེད་གནས་པར་སེམས། །རྒྱུ་མཚན་ཅི་ཕྱིར་ཞེ་ན་བཀའ་དང་ནི། །བསྟན་བཅོས་རྣམས་ཀྱི་ཟབ་དང་རྒྱ་ཆེའི་དོན། །ཇི་བཞིན་སྟོན་པས་སྤྱི་བོས་བླངས་པར་རིགས། །དེ་ལ་གསང་སྔགས་རྙིང་མར་ཐེག་རིམ་དགུ། །བསྡུ་ན་རྒྱུ་འབྲས་ཐེག་པ་གཉིས་སུ་འདུ། །རྒྱུ་ཡི་ཐེག་པ་ཉན་རང་བྱང་སེམས་གསུམ། །འབྲས་བུ་སྔགས་ལ་ཕྱི་རྒྱུད་སྡེ་གསུམ་དང་། །ནང་པ་ཐབས་ཆེན་རྒྱུད་སྡེ་གསུམ་ཡོད་དེ། །དེ་དག་རྣམས་ལ་ལྟ་སྒོམ་སྤྱོད་འབྲས་ཀྱི། །རྣམ་པར་བཞག་པ་མང་དུ་ཡོད་གྱུར་ཀྱང་། །ཉུང་ངུའི་ངག་གིས་འདི་རུ་འབྲི་མི་ནུས། །སྔ་འགྱུར་རྙིང་མ་བཀའ་གཏེར་དག་སྣང་གསུམ། །གསང་སྔགས་གསར་མ་ཇོ་བོ་བཀའ་གདམས་ཞེས། །ཨ་ཏི་ཤ་དང་རྒྱལ་བ་འབྲོམ་སྟོན་པ། །སྐུ་མཆེད་གསུམ་སོགས་བསྟན་འཛིན་བསམ་མི་ཁྱབ། །བཀའ་གདམས་རྙིང་མ་ས་དཀར་ཀུན་ལའང་འདྲེས། །དེ་ཉིད་གཞི་བཟུང་འཇམ་དབྱངས་ཙོང་ཁ་པས། །འདུལ་མདོ་དབུ་མ་ཕར་ཕྱིན་གསང་སྔགས་སོགས། །རྒྱས་པར་མཛད་ཅིང་དེ་ཡི་རིང་ལུགས་ཀྱིས། །འཛིན་མའི་ཁྱོན་ཀུན་ཐམས་ཅད་ཁྱབ་པར་གྱུར། །དེ་ཡི་བཞེད་པའི་མདོ་སྔགས་ཟབ་གནད་ལ། །ལྷག་པའི་ལྷ་དང་རང་གི་རྣམ་དཔྱོད་ཀྱི། །ཤེས་རབ་ཟབ་མོའི་སྒྲོམ་ལས་ཐོན་པ་ཡི། །ཁྱད་ཆོས་མང་བཞུགས་ལེགས་བཤད་རྣམས་སུ་གསལ། །ས་སྐྱ་པ་ཞེས་རྗེ་བཙུན་གོང་མ་ལྔས། །རྣལ་འབྱོར་དབང་ཕྱུག་བིཪྺ་པ་ཆེན་པོ། །ནཱ་རོ་པ་དང་རྡོ་རྗེ་གདན་པ་སོགས། །འཕགས་ཡུལ་མཁས་གྲུབ་མང་པོའི་མདོ་སྔགས་ཀྱི། །བཞེད་སྲོལ་འཛིན་ཅིང་སྔ་འགྱུར་རྙིང་མ་ཡི། །ཡང་དག་ཕུར་པ་སོགས་ཀྱང་འཁོན་ལུགས་ཞེས། །ཁྱད་པར་འཕགས་པ་ཉམས་པ་མེད་པར་བཞུགས། །འཛམ་གླིང་མཁས་པའི་གཙུག་རྒྱན་ས་པཎ་ཞེས། །མུ་སྟེགས་རྩོད་པ་བཟློག་ལ་བོད་དུ་ནི། །འདི་ཙམ་ཉིད་ལས་གཞན་དུ་མ་གྲགས་སོ། །དེ་ཡི་བརྒྱུད་འཛིན་ས་ངོར་ཚར་གསུམ་ཡིན། །བུ་ལུགས་ཇོ་ནང་བོ་དོང་ཞེས་གྲགས་རྣམས། །རྟེན་གཞིའི་རྩ་བ་ས་སྐྱ་པ་ལས་གྱེས། །མདོ་སྔགས་བཞེད་པ་ཅུང་ཟད་འབུར་དོད་ཡོད། །ནཱ་རོ་མཻ་ཏྲི་ལས་འོང་བཀའ་བརྒྱུད་པ། །མར་མི་དྭགས་གསུམ་བཀའ་བརྒྱུད་ཀུན་གྱི་རྗེ། །དེ་ལས་གྱེས་པ་ཆེ་བཞི་ཆུང་བརྒྱད་སོགས། །མང་ཡང་དྭགས་པོའི་སློབ་མ་ཕག་གྲུ་ལས། །གྱེས་པ་མང་ཞིང་ད་ལྟ་ཀར་འབྲུག་དང་། །འབྲི་སྟག་བཞི་པོ་མ་ཉམས་བཞུགས་པ་དང་། །གཞན་རྣམས་བསྟན་རྒྱུན་ཤིན་ཏུ་ཉག་ཕྲར་གྱུར། །མཁས་གྲུབ་ཁྱུང་པོ་རྣལ་འབྱོར་ཞེས་བྱ་བས། །རྒྱ་གར་ཡེ་ཤེས་ཌཱ་ཀི་རྣམ་གཉིས་དང་། །རཱ་ཧུ་ལ་དང་མཻ་ཏྲི་པ་ལ་སོགས། །མཁས་གྲུབ་བརྒྱ་དང་ལྔ་བཅུ་བསྟེན་བྱས་ཏེ། །བོད་དུ་སྤེལ་བ་ཤངས་པ་བཀའ་བརྒྱུད་གྲགས། །དེ་ཡི་ཆོས་ལུགས་རྐང་ཚུགས་འཛིན་པ་མེད། །ས་དཀར་གཉིས་ལ་དབང་ལུང་རྒྱུན་རྣམས་བཞུགས། །གཞན་ཡང་རྒྱ་གར་དམ་པ་སངས་རྒྱས་ཀྱི། །བཀའ་སྲོལ་ཞི་བྱེད་མ་ཅིག་ལབ་སྒྲོན་གྱི། །དམ་ཆོས་བདུད་ཀྱི་གཅོད་ཡུལ་ཞེས་བྱ་བས། །བོད་དུ་གསང་སྔགས་བཀའ་སྲོལ་རྣམ་གྲངས་མང་། །དེ་རྣམས་ཐམས་ཅད་མིང་གི་རྣམ་གྲངས་ལས། །དོན་ལ་ཁྱད་པར་དབྱེ་བ་འགའ་མེད་ཅིང་། །མཐར་ཐུག་བྱང་ཆུབ་སྒྲུབ་པ་གནད་གཅིག་གོ །བཤད་པའི་བཀའ་བབས་ས་སྐྱ་དགེ་ལྡན་གཉིས། །སྒྲུབ་པའི་བཀའ་བབས་བཀའ་རྙིང་ཞེས་གྲགས་ཀྱང་། །དོན་ལ་སྔོན་བྱོན་མཁས་པས་འདི་ལྟར་གསུངས། །གངས་ཅན་བསྟན་པའི་སྲོལ་འབྱེད་རྙིང་མ་པ། །བསྟན་འཛིན་བྱེ་བའི་འབྱུང་གནས་བཀའ་གདམས་པ། །ཡོངས་རྫོགས་བསྟན་པ་རྒྱས་མཛད་ས་སྐྱ་པ། །ཟླ་མེད་གྲུབ་པའི་གསང་ལམ་བཀའ་བརྒྱུད་པ། །ལེགས་བཤད་སྨྲ་བའི་ཉི་མ་ཙོང་ཁ་པ། །ཟབ་རྒྱས་རྒྱུད་སྡེའི་མངའ་བདག་ཇོ་ཞལ་གཉིས། །ཞེས་སུ་བཤད་འདི་དོན་ལ་གནས་པར་འདུག །རྙིང་མ་གཏེར་མ་ཞེས་གྲགས་ཨོ་རྒྱན་གྱི། །སློབ་དཔོན་ཆེན་པོ་པདྨ་སམྦྷ་ཝ། །བོད་དུ་བྱོན་ནས་མངའ་བདག་རྗེ་འབངས་ལ། །ཐུན་མོང་ཐུན་མིན་མང་དུ་གསུངས་པ་རྣམས། །སྙིགས་དུས་བསྟན་འགྲོ་སྐྱོབས་པའི་དཔུང་གཉེན་དུ། །ས་ཡི་གཏེར་དང་དགོངས་པའི་གཏེར་དུ་སྦས། །དུས་བབས་སྤྲུལ་པའི་སྐྱེས་མཆོག་རྣམས་ཀྱིས་འདོན། །བསྟན་དང་འགྲོ་ལ་ཕན་བདེའི་བཙས་སུ་བྱེད། །དག་སྣང་སྙན་བརྒྱུད་ཞེས་སུ་གྲགས་པ་རྣམས། །གསང་སྔགས་གསར་རྙིང་གཉིས་ཀར་མང་པོ་བཞུགས། །མཁས་པ་འགའ་རེས་གཏེར་ལ་རྩོད་བྱེད་ཀྱང་། །དགོས་པ་དགོངས་གཞི་གང་ཡིན་བརྟགས་པ་ལས། །གཏེར་ཆོས་ཚད་མ་གསུམ་གྱིས་གྲུབ་པ་ལ། །སྐུར་པ་བཏབ་ན་ཆོས་ལ་སྡང་བ་ཡི། །ཉེས་པ་ཤིན་ཏུ་ལྕི་བས་བག་ཡོད་མཛོད། །འབུམ་པ་ལ་སོགས་ཀླུ་སྒྲུབ་གཏེར་མ་དང་། །ཨོ་རྒྱན་དྷཱུ་མ་ཐ་ལའི་མཆོད་རྟེན་ནས། །གསང་སྔགས་རྒྱུད་སྡེ་གྲུབ་ཐོབ་རྣམས་ཀྱིས་བླངས། །འཕགས་ཡུལ་ལའང་དོན་དུ་གཏེར་བྱོན་བཞུགས། །དེ་སོགས་སྒྲུབ་བྱེད་མང་ཡང་སྤྲོས་པ་བསྐྱུངས། །དེ་ལྟར་བཤད་པའི་བསྟན་པ་མཐའ་དག་གི །ལམ་གྱི་སྙིང་པོ་ངེས་འབྱུང་བསྐྱེད་པ་ལ། །གཞི་རྟེན་སོ་ཐར་རིས་བདུན་གང་རུང་གི །ཁྲིམས་ལ་གནས་ཤིང་དལ་འབྱོར་རྙེད་དཀའ་བསྒོམ། །དལ་བའི་རྟེན་བཟང་འདི་འདྲ་ད་ཕྱིས་ནས། །རྙེད་དཀའ་དོན་ཆེ་ཡིད་བཞིན་ནོར་དང་མཚུངས། །དེ་ཡང་ཡུན་དུ་མི་རྟག་མྱུར་དུ་འཆི། །རྒན་གཞོན་བར་མ་ནམ་འཆི་ངེས་མེད་དང་། །འཆི་བའི་རྐྱེན་མང་འཚོ་བའི་རྐྱེན་ཉུང་ཞིང་། །ནམ་ཟླ་དུས་བཞི་དགྲ་གཉེན་འགྱུར་ལྡོག་སོགས། །ཡང་ཡང་བསམ་ལ་མི་རྟག་དྲན་པར་མཛོད། །ཤི་ནས་ནམ་མཁའི་དབྱིངས་སུ་ཐིམ་པ་མིན། །མི་ནས་མིར་སྐྱེ་རྟ་ནས་རྟར་སྐྱེ་བའང་མིན། །འགྲོ་བ་རྣམས་ནི་ལས་ཀྱི་འཕེན་པ་ཡི། །སྣ་ཚོགས་འགྲོ་འདི་གནས་རིས་མཐོ་རིས་དང་། །ལོངས་སྤྱོད་ཆེ་ཆུང་མངའ་རིས་དབང་ཐང་རྣམས། །སྐྱེ་གཟུགས་བཟང་ངན་སྣ་ཚོགས་འབྱུང་བ་ནི། །དགེ་དང་མི་དགེ་འདྲེས་མའི་ལས་རྣམས་ཀྱིས། །སྲིད་པ་འདི་ན་རྣམ་པ་སྣ་ཚོགས་མཆིས། །དགེ་དང་མི་དགེའི་ལས་ནི་བཅུ་རུ་འདུས། །རྣམ་སྨིན་རྒྱུ་མཐུན་དབང་དང་བྱེད་འབྲས་བཞིས། །དགེ་དང་མི་དགེའི་འབྲས་བུ་སོ་སོར་སྨིན། །མ་བྱས་པ་ཡི་ལས་དང་མི་འཕྲད་ཅིང་། །བྱས་པ་ནམ་ཡང་ཆུད་མི་ཟ་བ་དང་། །བྱེད་པོ་གང་ཡིན་དེ་ལ་ངེས་པར་སྨིན། །མཐོང་བའི་ཆོས་ལ་མྱོང་འགྱུར་ལས་འབྲས་དང་། །སྐྱེས་ནས་མྱོང་དང་ལན་གྲངས་གཞན་ལ་མྱོང་། །མྱོང་བ་ངེས་དང་མ་ངེས་ལ་སོགས་པ། །ལས་འབྲས་རྣམ་བཞག་ཞིབ་ཏུ་བསྟན་པ་ཡི། །མདོ་དང་བསྟན་བཅོས་ཁྲིད་ཡིག་རྣམས་སུ་གཟིགས། །རྒྱུ་འབྲས་སྤང་བླང་བྱ་འདི་སངས་རྒྱས་པའི། །ཆོས་ཀྱི་སྙིང་པོ་བདེན་བཞི་རྟེན་འབྲེལ་གྱི། །གནད་ཀྱི་འགགས་སྡོམ་ཟབ་མོ་འདི་ཉིད་ཡིན། །ལས་ཀྱི་བྱེད་པས་འགྲོ་བ་རིགས་དྲུག་འཁྱམས། །ངན་སོང་གསུམ་དང་མཐོ་རིས་གནས་གསུམ་མོ། །མདོར་ན་འདོད་གཟུགས་གཟུགས་མེད་ཁམས་གསུམ་དུ། །སྐྱོན་མེད་རྡུལ་ཙམ་ཡོད་པ་མ་ཡིན་ཞིང་། །སྡུག་བསྔལ་སྡུག་བསྔལ་འགྱུར་བའི་སྡུག་བསྔལ་དང་། །ཁྱབ་པ་འདུ་བྱེད་སྡུག་བསྔལ་གྱིས་མནར་ཞིང་། །བྱེ་བྲག་རིགས་དྲུག་སྡུག་བསྔལ་སོ་སོས་གཟིར། །མི་དགེ་བ་ལས་འབྲས་བུ་སྡུག་བསྔལ་འབྱུང་། །ཟག་བཅས་དགེ་བས་མཐོ་རིས་གནས་སུ་སྐྱེ། །མི་གཡོ་འཇིག་རྟེན་པ་ཡི་ཏིང་འཛིན་གྱིས། །བསམ་གཏན་གཟུགས་མེད་གནས་སུ་འཕེན་པར་བྱེད། །དེ་དག་འཁོར་བའི་རྩ་བ་མ་སྤངས་པས། །སྲིད་པར་སྲེད་ལེན་གྱིས་འཕངས་འཁོར་བར་ལྷུངས། །དེས་ན་འཁོར་བའི་གནས་འདི་མེ་འོབ་དང་། །དུག་སྦྲུལ་ཚང་དང་ལྷན་ཅིག་གནས་པ་འདྲ། །དེ་ཕྱིར་འཁོར་བའི་བདེ་བར་ཡིད་མི་སྨོན། །སྲིད་ལས་ངེས་པར་འབྱུང་བའི་བློ་བསྐྱེད་ཅིག །ཐར་པའི་ལམ་དུ་འཇུག་པའི་རྩ་བ་ནི། །དགེ་བའི་བཤེས་གཉེན་བསྟན་ལ་རགས་ལས་པས། །ཐོས་པས་རྒྱུད་དུལ་ཁྲིམས་ལྡན་བྱང་སེམས་འབྱོངས། །ཡང་དག་ལྟ་ལྡན་བརྩེ་བ་ཆེན་པོ་མངའ། །སྒྲོ་འདོགས་ཆོད་ནུས་དབང་དང་དམ་ལྡན་པའི། །བླ་མ་བསྟེན་ནས་ཅི་གསུངས་བཀའ་བཞིན་སྒྲུབ། །དད་དང་མོས་གུས་བསྐྱེད་ན་ཡོན་ཏན་ཐོབ། །དེ་ཕྱིར་བླ་མ་བཟང་པོ་བསྟེན་པར་གཅེས། །བླ་མའི་གདམས་ངག་འཆི་མེད་བདུད་རྩི་འདྲ། །ཇི་ཙམ་ཐོབ་པ་ཡལ་བར་མི་འདོར་བ། །རང་གི་ཉམས་སུ་བླངས་ཤིང་བསམ་བསྒོམས་མཛོད། །ཐོས་པ་ཙམ་གྱིས་ཕན་པར་མི་འགྱུར་ཏེ། །ཆུ་མ་བཏུང་ན་སྐོམ་པ་སེལ་མི་ནུས། །དེ་བས་དབེན་པའི་རི་ངོགས་གནས་པར་བྱ། །ལམ་གྱི་གཞི་རྟེན་སྐྱབས་སུ་འགྲོ་བ་ནི། །སྡོམ་པ་ཀུན་གྱི་གཞི་རྟེན་གྱུར་པ་དང་། །ཕྱི་ནང་ཤན་འབྱེད་ལྷ་མི་ཀུན་གྱིས་བླངས། །འདི་ཕྱིའི་ལེགས་ཚོགས་ཐམས་ཅད་དེ་ཡིས་འགྲུབ། །སྟོན་པ་སངས་རྒྱས་སྐྱོབས་པ་དམ་ཆོས་དང་། །འདྲེན་པ་དགེ་འདུན་གསུམ་ལ་བློ་གཏད་ཁེལ། །ཁ་ཙམ་མ་ཡིན་བསླུ་མེད་ཡིད་ཆེས་བསྐྱེད། །སྐྱབས་འགྲོའི་བསླབ་བྱ་རྣམས་ནི་ལེགས་པར་བསྲུངས། །ཐེག་ཆེན་ལམ་གྱི་དངོས་གཞི་བྱང་ཆུབ་སེམས། །དམ་ཆོས་འོ་མ་བསྲུབ་པའི་ཉིང་ཁུ་ཡིན། །འདི་མེད་མདོ་སྔགས་ཉམས་ལེན་གང་བྱས་ཀྱང་། །སྙིང་པོ་མེད་པ་ཆུ་ཤིང་སྡོང་པོར་མཚུངས། །དེ་ཡང་ནམ་མཁའི་མཐས་གཏུགས་སེམས་ཅན་རྣམས། །རང་གི་སྐྱེ་བ་ཐོག་མེད་ཁ་བརྒྱུད་ནས། །སྐྱེ་བ་གྲངས་མང་སེམས་ཅན་གྲངས་མེད་པ། །ཕ་མར་གྱུར་ནས་ཕན་བཏགས་བསམ་མི་ཁྱབ། །དེ་ཕྱིར་བྱམས་དང་སྙིང་རྗེ་ཆེན་པོ་ནི། །དགྲ་གཉེན་བར་མའི་འགྲོ་བ་ཀུན་ལ་བསྒོམ། །ཉེ་རིང་ཆགས་སྡང་བྲལ་བར་བཏང་སྙོམས་བསྐྱེད། ལུས་ངག་ཡིད་གསུམ་དགེ་ལ་རབ་བཀོལ་ཞིང་། །གཞན་ཕན་འགྱུར་བའི་བསམ་པ་བཟང་པོ་དང་། །སྨོན་ལམ་ཁྱད་འཕགས་རྟག་ཏུ་གདབ་པར་བྱ། །ཡང་དག་ལྟ་བ་རྒྱུད་ལ་སྐྱེ་བའི་ཐབས། །བསོད་ནམས་ཚོགས་བསགས་སྒྲིབ་སྦྱོང་ནན་ཏན་གཅེས། །ཡན་ལག་བདུན་པ་ཕྱག་བསྐོར་མདོ་འདོན་དང་། །གཟུངས་སྔགས་བཟླ་ཞིང་བྱང་ཆུབ་ལྟུང་བཤགས་འདོན། །སྟོབས་བཞི་ཚང་བའི་སྒོ་ནས་འབད་བྱས་ན། །སྡིག་སྒྲིབ་ཉེས་ལྟུང་ཐམས་ཅད་བྱང་ཞིང་དག །ཚོགས་བསགས་སྙིང་པོ་མཎྜལ་དག་ཀྱང་འབུལ། །དེ་ལྟར་དམིགས་པ་དང་བཅས་བསགས་པ་རྣམས། །འཁོར་གསུམ་རང་བཞིན་མེད་རྟོགས་ཤེས་རབ་ཀྱི། །སྟོང་ཉིད་དང་འབྲེལ་ཡེ་ཤེས་ཚོགས་ཞེས་བྱ། །བསོད་ནམས་ཚོགས་ལས་སངས་རྒྱས་གཟུགས་སྐུ་དང་། །ཡེ་ཤེས་ཚོགས་ཀྱིས་ཆོས་ཀྱི་སྐུ་ཐོབ་འགྱུར། །དེ་ལྟར་བསགས་སྦྱངས་གཉིས་ལ་བརྩོན་པ་དང་། །ཡང་དག་ལྟ་བ་རྒྱུད་ལ་བསྐྱེད་པའི་ཕྱིར། །ཐོག་མར་ཞི་གནས་བཙལ་ཞིང་སེམས་གནས་དགུ། །ཉེས་པ་ལྔ་སྤོངས་འདུ་བྱེད་བརྒྱད་བསྟེན་ཏེ། །རྟེན་ཅན་རྟེན་མེད་རྩེ་གཅིག་དམིགས་པ་ལ། །བདེ་གསལ་མི་རྟོག་ཏིང་འཛིན་སྐྱེ་བར་འགྱུར། །དེས་ནི་ཉོན་མོངས་མགོ་ནོན་ཙམ་ཞིག་འབྱུང་། །དེ་ནས་ལྷག་མཐོང་ལྟ་བ་གཏན་ལ་དབབ། །ཐོག་མེད་སྲིད་པའི་རྩ་བ་བདག་ཏུ་བཟུང་། །མ་རིག་པ་འདི་རྩད་ནས་གཞོམ་པའི་ཕྱིར། །སྟོང་པ་ཉིད་དེ་ངེས་པར་བསྒོམ་པར་བྱ། །དེ་ཡང་ཕུང་པོ་ལྔས་བསྡུས་འཚོགས་པ་ལ། །བརྟེན་ནས་ངའོ་སྙམ་པའི་ལྷན་སྐྱེས་ཀྱི། །ངར་འཛིན་འདི་ཉིད་རྣམ་པར་གཞོམ་པ་ལ། །སོ་སོར་བརྟགས་པའི་དཔྱད་པ་རྣམ་པར་གཅེས། །བདག་གམ་ཕུང་པོ་གཅིག་གམ་ཐ་དད་སོགས། །དབུ་མའི་རིག་པ་ནས་འབྱུང་ལྟར་དཔྱད་དེ། །གང་ཟག་བདག་མེད་གཏན་ལ་དབབ་པ་དང་། །གཟུང་དང་འཛིན་པས་བསྡུས་པའི་ཆོས་ཀྱི་བདག །ཕུང་པོའི་ཆ་ཤས་དུ་མར་ལེགས་དཔྱད་ཅིང་། །བདག་མེད་དོན་ལ་ངེས་ཤེས་རྙེད་པ་ན། །སྲིད་དང་ཞི་བས་བསྡུས་པའི་ཆོས་ཐམས་ཅད། །རང་བཞིན་སྐྱེ་བ་མེད་པར་གཏན་ལ་དབབ། །ཐམས་ཅད་མཉམ་པ་ཉིད་དུ་འཆར་བ་དང་། །སྐྱེ་མེད་སྟོང་པའི་ངང་ལས་སྣང་གྲགས་ཀྱི། །ཆོས་རྣམས་འགགས་པ་མེད་པར་རང་ཤར་བའི། །རྟེན་འབྲེལ་ཟབ་མོའི་རིགས་པ་ཁོང་ཆུད་ཅིང་། །སྟོང་དང་རྟེན་འབྱུང་ཐ་མི་དད་པ་ཡི། །གོ་མྱོང་བྱུང་ན་འཛིན་པས་མ་བསླད་པར། །རྣམ་པར་མི་རྟོག་སྤྲོས་བྲལ་དབུ་མའི་དབྱིངས། །ཇི་སྲིད་བར་དུ་མཉམ་པར་བཞག་པར་བྱ། །མདོར་ན་དཔྱད་འཇོག་གཉིས་པོ་སྤེལ་མ་ཡི། །སོ་སོར་རྟོགས་པའི་ཤེས་རབ་དང་ལྡན་པའི། །རྩེ་གཅིག་མི་གཡོའི་ཞི་བར་གནས་པ་དང་། །ལྷག་མཐོང་ཤེས་རབ་ཟུང་དུ་འཇུག་པ་ལ། །ཡང་དག་ལྟ་བ་ཞེས་བྱ་རྒྱལ་བའི་ཡུམ། །ཤེས་རབ་ཕ་རོལ་ཕྱིན་མའི་སྒོམ་དོན་ཡིན། །མཐའ་བརྒྱད་སྤྲོས་པ་ཀུན་བྲལ་ལྟ་བ་དང་། །མ་ཡེངས་ཇི་བཞིན་འཇོག་པ་སྒོམ་པ་དང་། །རྒྱལ་སྲས་ལམ་བཟང་དམ་པར་སྤྱོད་པ་ལས། །འབྲས་བུ་ས་བཅུ་ལམ་ལྔ་མཐར་ཕྱིན་ཏེ། །སྲིད་ཞིར་མི་གནས་བྱང་ཆུབ་ཆེན་པོ་བརྙེས། །རང་གཞན་དོན་གཉིས་ལྷུན་གྱིས་གྲུབ་བར་འགྱུར། ཀྱེ་མ། དེང་སང་སྙིགས་མ་ལྔ་བདོའི་མཐར་ཐུག་འདིར། །བསྟན་འཛིན་སྐྱེས་བུ་འགའ་ནི་དབྱིངས་སུ་གཤེགས། །བདག་འདྲ་མུ་ཅོར་སྨྲ་བས་ས་སྟེང་ཁེངས། །ལྷ་མ་ཡིན་རྣམས་ཧ་ཧར་དགོད་པ་དང་། །དཀར་ཕྱོགས་ལྷ་རྣམས་རིང་དུ་འབྲོས་ཤིང་བྱེར། །སངས་རྒྱས་བསྟན་པ་རི་མོའི་མར་མེ་ལྟར། །གྱུར་འདིར་ཐུགས་རྗེ་ཆེ་རྣམས་དགོངས་སུ་གསོལ། །སངས་རྒྱས་བསྟན་ལ་གཅེས་པར་འཛིན་པ་རྣམས། །ལུང་རྟོགས་བཤད་སྒྲུབ་སྤང་ཀློགས་བྱ་བར་བརྩོན། །ཆོས་སྤྱོད་རྣམ་བཅུར་རྟག་ཏུ་མི་གཡེལ་ཞིང་། །གསོལ་འདེབས་མཆོད་འབུལ་ཚོགས་བསགས་དག་ལ་རེམས། །དགེ་འདུན་ཐུགས་མཐུན་གྲུབ་མཐའི་ཁ་འཛིན་སྤོངས། །ཕྱོགས་དང་རིས་སུ་མ་གཅོད་བསྟན་པ་ཀུན། །ནང་འགལ་མ་གཏོང་ཆོས་ལ་སྐུར་འདེབས་སྤོངས། །བསྟན་པའི་ཆོས་ཚུལ་རྒྱ་མཚོ་ཇི་སྙེད་པ། །རང་སེམས་འདུལ་བར་ཤེས་བྱོས་ཉམས་ལེན་མཛོད། །རྟག་ཏུ་སྒོ་གསུམ་ཞི་དུལ་ལྷོད་ཆགས་པས། །དྲན་དང་ཤེས་བཞིན་བག་ཡོད་བསྟེན་པར་མཛོད། །རྒྱལ་པོ་ཀྲྀ་ཀྲྀའི་རྨི་ལྟས་དང་མཐུན་པ། །འཕགས་ཡུལ་ཉན་ཐོས་སྡེ་པ་བཅོ་བརྒྱད་ཀྱིས། །བསྟན་པ་རྩོད་པ་ཅན་དུ་གྱུར་པ་ལས། །རིམ་གྱིས་འགྲིབ་ཅིང་བྱང་ཕྱོགས་བོད་ཡུལ་དུ། །ས་དགེ་དཀར་རྙིང་གྲུབ་མཐའི་གདོན་གྱིས་བཏབ། །རྩོད་པས་བསྟན་པ་དཀྲུགས་ཤིང་ཟིང་ཟིང་གྱུར། །འདི་ཕྱི་གཉིས་ཕུང་རང་གཞན་སྡིག་ལ་སྦྱར། །དོན་གྱི་སྙིང་པོ་ཅུང་ཟད་མེད་པས་ན། །ངེས་པར་དོར་ལ་སྟོན་པའི་བསྟན་པ་སྲུངས། །སངས་རྒྱས་འཇིགས་པ་མེད་པའི་གནས་ཐོབ་པས། །བསྟན་པ་ཕྱི་ནང་སུས་ཀྱང་བཤིག་མི་ནུས། །སེངྒེའི་ཁོག་པ་འབུ་ཡིས་གཡེངས་པ་བཞིན། །ནང་ནས་བཤིག་ཅེས་མདོ་ནས་གསུངས་པ་ལ། །དྲན་པ་ཉེ་བར་བཞག་ནས་སྤང་བླངས་མཛོད། །ཁྱིམ་ན་གནས་རྣམས་དཀོན་མཆོག་མཆོད་པ་དང་། །ཕན་སེམས་དང་ལྡན་དགེ་བའི་ལས་བརྩོན་ན། །འདི་ཕྱི་ཚེ་རབས་ཀུན་ཏུ་དགེ་བར་གྱུར། །བདག་ནི་འཆི་ལ་ཉེ་ཞིང་རྒས་པས་ཉེན། །སངས་རྒྱས་བསྟན་ལ་ལྷག་བསམ་བཟང་ཙམ་ལས། །ཕན་ཐོགས་ནུས་པ་གང་ཡང་མེད་ངེས་ཀྱང་། །བསྟན་པ་རྒྱས་པའི་སྨོན་ལམ་འདེབས་ལ་བརྩོན། །གངས་ཅན་ལྗོངས་ཀྱི་ཕན་བདེའི་འབྱུང་གནས་མཆོག །བསྟན་འཛིན་རྒྱ་མཚོའི་ཞབས་པད་ཡུན་དུ་བརྟན། །འོད་དཔག་མེད་མགོན་པཎ་ཆེན་བླ་མ་དང་། །ཀརྨ་པ་དང་འཇམ་མགོན་ས་སྐྱ་པ། །ལ་སོགས་བསྟན་འཛིན་སྐྱེས་རྣམས་སྐུ་ཚེ་དང་། །མཛད་པ་ཕྲིན་ལས་ཐམས་ཅད་རབ་རྒྱས་ཤིང་། །འཕགས་པའི་ཡུལ་གྱི་རྒྱལ་བློན་འབངས་བཅས་རྣམས། །བདེ་སྐྱིད་རྫོགས་ལྡན་དཔལ་གྱིས་འབྱོར་པ་དང་། །སླར་ཡང་སངས་རྒྱས་བསྟན་པ་རབ་འཕེལ་ཞིང་། །སྡེ་སྣོད་གསུམ་གྱི་ཆོས་ཀྱི་རྔ་ཆེན་སྒྲོགས། །སྲིད་རྩེའི་བར་དུ་ཁྱབ་པའི་བཀྲ་ཤིས་ཤོག །དེ་ལྟར་ཆོས་ཀྱི་སྒོ་འབྱེད་འདི། །འབྲས་སྤྱི་བློན་ཆེན་བཀའི་བསྐུལ་ངོར། །བོད་ཆེན་ལྗོངས་ཀྱི་ཆར་གཏོགས་པའི། །འཇམ་དབྱངས་མཁྱེན་བརྩེའི་སྤྲུལ་མིང་འཛིན། །བླུན་རྨོངས་ཆོས་ཀྱི་བློ་གྲོས་པས། །ལྷག་བསམ་བཟང་པོས་ཤར་མར་བྲིས། །དགེ་བས་བསྟན་འགྲོར་སྨན་གྱུར་ཅིག །སརྦ་དཱ་མངྒ་ལཾ། ཤུ་བྷཾ།། །།

[edit]

@#/__/theg pa mtha' dag gi snying po mdo tsam brjod pa chos kyi sgo 'byed ces bya ba bzhugs so/__/ bla ma dang mgon po 'jam dpal dbyangs la phyag 'tshal lo/__/bdag tu lta ba'i drwa ba 'dral mdzad cing /__/ye shes ral gri'i 'od kyis srid gsum khyab/__/rgyal ba kun gyi mkhyen rab phung po che/__/mgon po 'jam pa'i dbyangs la phyag 'tshal lo/__/theg pa mtha' yas chos tshul bsam mi khyab/__/brjod par nus min 'on kyang mdo tsam zhig__/nyung ngu'i ngag gi rnam par dbye ba ni/__/cha shas tsam zhig bdag gi brjod par bya/__/kun mkhyen ston pa shAkya seng ge yi/__/chos kyi 'khor lo rim pa gsum bskor ba/__/dang pos bsod nams min pa bzlog pa dang /__/bar pas bdag tu lta ba bzlog pa dang /__/tha mas lta gzhi thams cad bzlog par gsungs/__/brjod bya bslab gsum rjod byed gsung rab ni/__/yan lag bcu gnyis khongs su bsdu ba dang /__/gsang ba sngags kyi theg pa chen po la/__/kha cig nang gi mngon pa zhes bshad kyang /__/rig pa 'dzin pa'i sde snod ces gsungs te/__/logs su bkar ba de nyid legs par bzhed/__/bod du 'gyur ba pusti brgya lhag tsam/__/'on kyang bka' yi tshad bzung mi nus so/__/bka' yi dgongs 'grel bstan bcos rnam grangs la/__/theg dman bye brag bshad mdzod la sogs pa/__/theg chen dgongs 'grel 'dzam gling rgyan drug dang /__/rmad byung slob dpon la sogs mkhas rnams kyis/__/mdzad pa shin tu rnam grangs mang po dang /__/gsang sngags rgyud sde'i 'grel dang sgrub thabs dang /__/man ngag bsam mi khyab pa bzhugs pa rnams/__/sngon byon lo paN rnams kyi bka' drin las/__/bod du bsgyur ba glegs bam nyis brgya lhag__/bzhugs pa rnams kyi bstan pa'i gzhi 'dzin byed/__/'phags pa'i yul du gsar rnying zhes pa med/__/bod du lo tsA rnams kyi 'gyur snga phyi'i/__/gsar rnying dbye ba rin bzang byon yan chod/__/'gyur ba snga 'gyur rnying ma de phyin chod/__/gsar ma zhes dbye de yang 'dul mdo mngon/__/gsang sngags phyi rgyud gsum po la sogs pa/__/phal cher bstan pa snga dar dus su 'gyur/__/rnal 'byor bla med bde kyai dus gshin sogs/__/phyi 'gyur shas che snga 'gyur rnying ma la/__/tan+t+ra chen po bco brgyad la sogs pa/__/bla med rgyud sde rnam grangs shin tu mang /__/de la gsar ma'i mkhas mchog 'ga' zhig gis/__/rgyud ni tshad ma min zhes gsungs na yang /__/gzur gnas rnams kyi tshad ma nyid du bsngags/__/don la'ang de ltar 'khrul med gnas par sems/__/rgyu mtshan ci phyir zhe na bka' dang ni/__/bstan bcos rnams kyi zab dang rgya che'i don/__/ji bzhin ston pas spyi bos blangs par rigs/__/de la gsang sngags rnying mar theg rim dgu/__/bsdu na rgyu 'bras theg pa gnyis su 'du/__/rgyu yi theg pa nyan rang byang sems gsum/__/'bras bu sngags la phyi rgyud sde gsum dang /__/nang pa thabs chen rgyud sde gsum yod de/__/de dag rnams la lta sgom spyod 'bras kyi/__/rnam par bzhag pa mang du yod gyur kyang /__/nyung ngu'i ngag gis 'di ru 'bri mi nus/__/snga 'gyur rnying ma bka' gter dag snang gsum/__/gsang sngags gsar ma jo bo bka' gdams zhes/__/a ti sha dang rgyal ba 'brom ston pa/__/sku mched gsum sogs bstan 'dzin bsam mi khyab/__/bka' gdams rnying ma sa dkar kun la'ang 'dres/__/de nyid gzhi bzung 'jam dbyangs tsong kha pas/__/'dul mdo dbu ma phar phyin gsang sngags sogs/__/rgyas par mdzad cing de yi ring lugs kyis/__/'dzin ma'i khyon kun thams cad khyab par gyur/__/de yi bzhed pa'i mdo sngags zab gnad la/__/lhag pa'i lha dang rang gi rnam dpyod kyi/__/shes rab zab mo'i sgrom las thon pa yi/__/khyad chos mang bzhugs legs bshad rnams su gsal/__/sa skya pa zhes rje btsun gong ma lngas/__/rnal 'byor dbang phyug biR+Wa pa chen po/__/nA ro pa dang rdo rje gdan pa sogs/__/'phags yul mkhas grub mang po'i mdo sngags kyi/__/bzhed srol 'dzin cing snga 'gyur rnying ma yi/__/yang dag phur pa sogs kyang 'khon lugs zhes/__/khyad par 'phags pa nyams pa med par bzhugs/__/'dzam gling mkhas pa'i gtsug rgyan sa paN zhes/__/mu stegs rtsod pa bzlog la bod du ni/__/'di tsam nyid las gzhan du ma grags so/__/de yi brgyud 'dzin sa ngor tshar gsum yin/__/bu lugs jo nang bo dong zhes grags rnams/__/rten gzhi'i rtsa ba sa skya pa las gyes/__/mdo sngags bzhed pa cung zad 'bur dod yod/__/nA ro mai tri las 'ong bka' brgyud pa/__/mar mi dwags gsum bka' brgyud kun gyi rje/__/de las gyes pa che bzhi chung brgyad sogs/__/mang yang dwags po'i slob ma phag gru las/__/gyes pa mang zhing da lta kar 'brug dang /__/'bri stag bzhi po ma nyams bzhugs pa dang /__/gzhan rnams bstan rgyun shin tu nyag phrar gyur/__/mkhas grub khyung po rnal 'byor zhes bya bas/__/rgya gar ye shes DA ki rnam gnyis dang /__/rA hu la dang mai tri pa la sogs/__/mkhas grub brgya dang lnga bcu bsten byas te/__/bod du spel ba shangs pa bka' brgyud grags/__/de yi chos lugs rkang tshugs 'dzin pa med/__/sa dkar gnyis la dbang lung rgyun rnams bzhugs/__/gzhan yang rgya gar dam pa sangs rgyas kyi/__/bka' srol zhi byed ma cig lab sgron gyi/__/dam chos bdud kyi gcod yul zhes bya bas/__/bod du gsang sngags bka' srol rnam grangs mang /__/de rnams thams cad ming gi rnam grangs las/__/don la khyad par dbye ba 'ga' med cing /__/mthar thug byang chub sgrub pa gnad gcig go__/bshad pa'i bka' babs sa skya dge ldan gnyis/__/sgrub pa'i bka' babs bka' rnying zhes grags kyang /__/don la sngon byon mkhas pas 'di ltar gsungs/__/gangs can bstan pa'i srol 'byed rnying ma pa/__/bstan 'dzin bye ba'i 'byung gnas bka' gdams pa/__/yongs rdzogs bstan pa rgyas mdzad sa skya pa/__/zla med grub pa'i gsang lam bka' brgyud pa/__/legs bshad smra ba'i nyi ma tsong kha pa/__/zab rgyas rgyud sde'i mnga' bdag jo zhal gnyis/__/zhes su bshad 'di don la gnas par 'dug__/rnying ma gter ma zhes grags o rgyan gyi/__/slob dpon chen po pad+ma sam+b+ha wa/__/bod du byon nas mnga' bdag rje 'bangs la/__/thun mong thun min mang du gsungs pa rnams/__/snyigs dus bstan 'gro skyobs pa'i dpung gnyen du/__/sa yi gter dang dgongs pa'i gter du sbas/__/dus babs sprul pa'i skyes mchog rnams kyis 'don/__/bstan dang 'gro la phan bde'i btsas su byed/__/dag snang snyan brgyud zhes su grags pa rnams/__/gsang sngags gsar rnying gnyis kar mang po bzhugs/__/mkhas pa 'ga' res gter la rtsod byed kyang /__/dgos pa dgongs gzhi gang yin brtags pa las/__/gter chos tshad ma gsum gyis grub pa la/__/skur pa btab na chos la sdang ba yi/__/nyes pa shin tu lci bas bag yod mdzod/__/'bum pa la sogs klu sgrub gter ma dang /__/o rgyan d+hU ma tha la'i mchod rten nas/__/gsang sngags rgyud sde grub thob rnams kyis blangs/__/'phags yul la'ang don du gter byon bzhugs/__/de sogs sgrub byed mang yang spros pa bskyungs/__/de ltar bshad pa'i bstan pa mtha' dag gi__/lam gyi snying po nges 'byung bskyed pa la/__/gzhi rten so thar ris bdun gang rung gi__/khrims la gnas shing dal 'byor rnyed dka' bsgom/__/dal ba'i rten bzang 'di 'dra da phyis nas/__/rnyed dka' don che yid bzhin nor dang mtshungs/__/de yang yun du mi rtag myur du 'chi/__/rgan gzhon bar ma nam 'chi nges med dang /__/'chi ba'i rkyen mang 'tsho ba'i rkyen nyung zhing /__/nam zla dus bzhi dgra gnyen 'gyur ldog sogs/__/yang yang bsam la mi rtag dran par mdzod/__/shi nas nam mkha'i dbyings su thim pa min/__/mi nas mir skye rta nas rtar skye ba'ang min/__/'gro ba rnams ni las kyi 'phen pa yi/__/sna tshogs 'gro 'di gnas ris mtho ris dang /__/longs spyod che chung mnga' ris dbang thang rnams/__/skye gzugs bzang ngan sna tshogs 'byung ba ni/__/dge dang mi dge 'dres ma'i las rnams kyis/__/srid pa 'di na rnam pa sna tshogs mchis/__/dge dang mi dge'i las ni bcu ru 'dus/__/rnam smin rgyu mthun dbang dang byed 'bras bzhis/__/dge dang mi dge'i 'bras bu so sor smin/__/ma byas pa yi las dang mi 'phrad cing /__/byas pa nam yang chud mi za ba dang /__/byed po gang yin de la nges par smin/__/mthong ba'i chos la myong 'gyur las 'bras dang /__/skyes nas myong dang lan grangs gzhan la myong /__/myong ba nges dang ma nges la sogs pa/__/las 'bras rnam bzhag zhib tu bstan pa yi/__/mdo dang bstan bcos khrid yig rnams su gzigs/__/rgyu 'bras spang blang bya 'di sangs rgyas pa'i/__/chos kyi snying po bden bzhi rten 'brel gyi/__/gnad kyi 'gags sdom zab mo 'di nyid yin/__/las kyi byed pas 'gro ba rigs drug 'khyams/__/ngan song gsum dang mtho ris gnas gsum mo/__/mdor na 'dod gzugs gzugs med khams gsum du/__/skyon med rdul tsam yod pa ma yin zhing /__/sdug bsngal sdug bsngal 'gyur ba'i sdug bsngal dang /__/khyab pa 'du byed sdug bsngal gyis mnar zhing /__/bye brag rigs drug sdug bsngal so sos gzir/__/mi dge ba las 'bras bu sdug bsngal 'byung /__/zag bcas dge bas mtho ris gnas su skye/__/mi g.yo 'jig rten pa yi ting 'dzin gyis/__/bsam gtan gzugs med gnas su 'phen par byed/__/de dag 'khor ba'i rtsa ba ma spangs pas/__/srid par sred len gyis 'phangs 'khor bar lhungs/__/des na 'khor ba'i gnas 'di me 'ob dang /__/dug sbrul tshang dang lhan cig gnas pa 'dra/__/de phyir 'khor ba'i bde bar yid mi smon/__/srid las nges par 'byung ba'i blo bskyed cig__/thar pa'i lam du 'jug pa'i rtsa ba ni/__/dge ba'i bshes gnyen bstan la rags las pas/__/thos pas rgyud dul khrims ldan byang sems 'byongs/__/yang dag lta ldan brtse ba chen po mnga'/__/sgro 'dogs chod nus dbang dang dam ldan pa'i/__/bla ma bsten nas ci gsungs bka' bzhin sgrub/__/dad dang mos gus bskyed na yon tan thob/__/de phyir bla ma bzang po bsten par gces/__/bla ma'i gdams ngag 'chi med bdud rtsi 'dra/__/ji tsam thob pa yal bar mi 'dor ba/__/rang gi nyams su blangs shing bsam bsgoms mdzod/__/thos pa tsam gyis phan par mi 'gyur te/__/chu ma btung na skom pa sel mi nus/__/de bas dben pa'i ri ngogs gnas par bya/__/lam gyi gzhi rten skyabs su 'gro ba ni/__/sdom pa kun gyi gzhi rten gyur pa dang /__/phyi nang shan 'byed lha mi kun gyis blangs/__/'di phyi'i legs tshogs thams cad de yis 'grub/__/ston pa sangs rgyas skyobs pa dam chos dang /__/'dren pa dge 'dun gsum la blo gtad khel/__/kha tsam ma yin bslu med yid ches bskyed/__/skyabs 'gro'i bslab bya rnams ni legs par bsrungs/__/theg chen lam gyi dngos gzhi byang chub sems/__/dam chos 'o ma bsrub pa'i nying khu yin/__/'di med mdo sngags nyams len gang byas kyang /__/snying po med pa chu shing sdong por mtshungs/__/de yang nam mkha'i mthas gtugs sems can rnams/__/rang gi skye ba thog med kha brgyud nas/__/skye ba grangs mang sems can grangs med pa/__/pha mar gyur nas phan btags bsam mi khyab/__/de phyir byams dang snying rje chen po ni/__/dgra gnyen bar ma'i 'gro ba kun la bsgom/__/nye ring chags sdang bral bar btang snyoms bskyed/__lus ngag yid gsum dge la rab bkol zhing /__/gzhan phan 'gyur ba'i bsam pa bzang po dang /__/smon lam khyad 'phags rtag tu gdab par bya/__/yang dag lta ba rgyud la skye ba'i thabs/__/bsod nams tshogs bsags sgrib sbyong nan tan gces/__/yan lag bdun pa phyag bskor mdo 'don dang /__/gzungs sngags bzla zhing byang chub ltung bshags 'don/__/stobs bzhi tshang ba'i sgo nas 'bad byas na/__/sdig sgrib nyes ltung thams cad byang zhing dag__/tshogs bsags snying po maN+Dal dag kyang 'bul/__/de ltar dmigs pa dang bcas bsags pa rnams/__/'khor gsum rang bzhin med rtogs shes rab kyi/__/stong nyid dang 'brel ye shes tshogs zhes bya/__/bsod nams tshogs las sangs rgyas gzugs sku dang /__/ye shes tshogs kyis chos kyi sku thob 'gyur/__/de ltar bsags sbyangs gnyis la brtson pa dang /__/yang dag lta ba rgyud la bskyed pa'i phyir/__/thog mar zhi gnas btsal zhing sems gnas dgu/__/nyes pa lnga spongs 'du byed brgyad bsten te/__/rten can rten med rtse gcig dmigs pa la/__/bde gsal mi rtog ting 'dzin skye bar 'gyur/__/des ni nyon mongs mgo non tsam zhig 'byung /__/de nas lhag mthong lta ba gtan la dbab/__/thog med srid pa'i rtsa ba bdag tu bzung /__/ma rig pa 'di rtsad nas gzhom pa'i phyir/__/stong pa nyid de nges par bsgom par bya/__/de yang phung po lngas bsdus 'tshogs pa la/__/brten nas nga'o snyam pa'i lhan skyes kyi/__/ngar 'dzin 'di nyid rnam par gzhom pa la/__/so sor brtags pa'i dpyad pa rnam par gces/__/bdag gam phung po gcig gam tha dad sogs/__/dbu ma'i rig pa nas 'byung ltar dpyad de/__/gang zag bdag med gtan la dbab pa dang /__/gzung dang 'dzin pas bsdus pa'i chos kyi bdag__/phung po'i cha shas du mar legs dpyad cing /__/bdag med don la nges shes rnyed pa na/__/srid dang zhi bas bsdus pa'i chos thams cad/__/rang bzhin skye ba med par gtan la dbab/__/thams cad mnyam pa nyid du 'char ba dang /__/skye med stong pa'i ngang las snang grags kyi/__/chos rnams 'gags pa med par rang shar ba'i/__/rten 'brel zab mo'i rigs pa khong chud cing /__/stong dang rten 'byung tha mi dad pa yi/__/go myong byung na 'dzin pas ma bslad par/__/rnam par mi rtog spros bral dbu ma'i dbyings/__/ji srid bar du mnyam par bzhag par bya/__/mdor na dpyad 'jog gnyis po spel ma yi/__/so sor rtogs pa'i shes rab dang ldan pa'i/__/rtse gcig mi g.yo'i zhi bar gnas pa dang /__/lhag mthong shes rab zung du 'jug pa la/__/yang dag lta ba zhes bya rgyal ba'i yum/__/shes rab pha rol phyin ma'i sgom don yin/__/mtha' brgyad spros pa kun bral lta ba dang /__/ma yengs ji bzhin 'jog pa sgom pa dang /__/rgyal sras lam bzang dam par spyod pa las/__/'bras bu sa bcu lam lnga mthar phyin te/__/srid zhir mi gnas byang chub chen po brnyes/__/rang gzhan don gnyis lhun gyis grub bar 'gyur/__kye ma/__deng sang snyigs ma lnga bdo'i mthar thug 'dir/__/bstan 'dzin skyes bu 'ga' ni dbyings su gshegs/__/bdag 'dra mu cor smra bas sa steng khengs/__/lha ma yin rnams ha har dgod pa dang /__/dkar phyogs lha rnams ring du 'bros shing byer/__/sangs rgyas bstan pa ri mo'i mar me ltar/__/gyur 'dir thugs rje che rnams dgongs su gsol/__/sangs rgyas bstan la gces par 'dzin pa rnams/__/lung rtogs bshad sgrub spang klogs bya bar brtson/__/chos spyod rnam bcur rtag tu mi g.yel zhing /__/gsol 'debs mchod 'bul tshogs bsags dag la rems/__/dge 'dun thugs mthun grub mtha'i kha 'dzin spongs/__/phyogs dang ris su ma gcod bstan pa kun/__/nang 'gal ma gtong chos la skur 'debs spongs/__/bstan pa'i chos tshul rgya mtsho ji snyed pa/__/rang sems 'dul bar shes byos nyams len mdzod/__/rtag tu sgo gsum zhi dul lhod chags pas/__/dran dang shes bzhin bag yod bsten par mdzod/__/rgyal po kr-i kr-i'i rmi ltas dang mthun pa/__/'phags yul nyan thos sde pa bco brgyad kyis/__/bstan pa rtsod pa can du gyur pa las/__/rim gyis 'grib cing byang phyogs bod yul du/__/sa dge dkar rnying grub mtha'i gdon gyis btab/__/rtsod pas bstan pa dkrugs shing zing zing gyur/__/'di phyi gnyis phung rang gzhan sdig la sbyar/__/don gyi snying po cung zad med pas na/__/nges par dor la ston pa'i bstan pa srungs/__/sangs rgyas 'jigs pa med pa'i gnas thob pas/__/bstan pa phyi nang sus kyang bshig mi nus/__/seng+ge'i khog pa 'bu yis g.yengs pa bzhin/__/nang nas bshig ces mdo nas gsungs pa la/__/dran pa nye bar bzhag nas spang blangs mdzod/__/khyim na gnas rnams dkon mchog mchod pa dang /__/phan sems dang ldan dge ba'i las brtson na/__/'di phyi tshe rabs kun tu dge bar gyur/__/bdag ni 'chi la nye zhing rgas pas nyen/__/sangs rgyas bstan la lhag bsam bzang tsam las/__/phan thogs nus pa gang yang med nges kyang /__/bstan pa rgyas pa'i smon lam 'debs la brtson/__/gangs can ljongs kyi phan bde'i 'byung gnas mchog__/bstan 'dzin rgya mtsho'i zhabs pad yun du brtan/__/'od dpag med mgon paN chen bla ma dang /__/karma pa dang 'jam mgon sa skya pa/__/la sogs bstan 'dzin skyes rnams sku tshe dang /__/mdzad pa phrin las thams cad rab rgyas shing /__/'phags pa'i yul gyi rgyal blon 'bangs bcas rnams/__/bde skyid rdzogs ldan dpal gyis 'byor pa dang /__/slar yang sangs rgyas bstan pa rab 'phel zhing /__/sde snod gsum gyi chos kyi rnga chen sgrogs/__/srid rtse'i bar du khyab pa'i bkra shis shog__/de ltar chos kyi sgo 'byed 'di/__/'bras spyi blon chen bka'i bskul ngor/__/bod chen ljongs kyi char gtogs pa'i/__/'jam dbyangs mkhyen brtse'i sprul ming 'dzin/__/blun rmongs chos kyi blo gros pas/__/lhag bsam bzang pos shar mar bris/__/dge bas bstan 'gror sman gyur cig__/sarba dA mang+ga laM/__shu b+haM//__//