JKCL-KABUM-08-NYA-016

From Khyentse Lineage - A Tsadra Foundation Project

ཟུང་འཇུག་དབུ་མ་ཆེན་པོའི་དོན་བརྗོད་པ་ངེས་དོན་ལམ་འཇུག།
Wylie title zung 'jug dbu ma chen po'i don brjod pa nges don lam 'jug JKCL-KABUM-08-NYA-016.pdf
Location chos kyi blo gros bka' 'bum
Volume 8, Text 16, Pages 577-592 (Folios 1a1 to 8b1)
Author འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation 'jam dbyangs mkhyen brtse chos kyi blo gros. zung 'jug dbu ma chen po'i don brjod pa nges don lam 'jug. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 577-592. Bir, H.P.: Khyentse Labrang, 2012.
Genre Madhyamaka - dbu ma
Colophon

།ཅེས་པའང་མ་སྦྱངས་མུ་ཅོར་སྨྲ་བ་ཆོས་དབྱིངས་བདེ་གཤེགས་སྙིང་པོ་ལ་མོས་པས་སྤྱོད་པ་བློ་གྲོས་རྒྱ་མཚོས་མྱུར་བར་བྲིས་པ་དགེ།

/ces pa'ang ma sbyangs mu cor smra ba chos dbyings bde gshegs snying po la mos pas spyod pa blo gros rgya mtshos myur bar bris pa dge/

":Property:textsubnumber|textsubnumber" can not be assigned to a declared number type with value 1.

[edit]
༄༅། །ཟུང་འཇུག་དབུ་མ་ཆེན་པོའི་དོན་བརྗོད་པ་ངེས་དོན་ལམ་འཇུག་ཅེས་བྱ་བ་བཞུགས་སོ། ། ཟུང་འཇུག་གཉུག་མ་ཡོངས་གྲུབ་བདེ་གཤེགས་སྙིང་པོའི་གནས་ལུགས་མངོན་སུམ་གཟིགས་པའི་བླ་མ་དམ་པ་རྣམས་ལ་གུས་པས་ཕྱག་འཚལ་ལོ། །ཐོག་མ་ཐ་མ་མེད་པའི་དབྱིངས། །ཆོས་རྣམས་ཀུན་གྱི་འབྱུང་གནས་ཆེ། །གཙང་རྟག་བདེ་བའི་མཐར་སོན་པ། །དང་པོའི་སངས་རྒྱས་ཕྱག་བཙལ་ནས། །ཟུང་འཇུག་རབ་ཏུ་མི་གནས་པའི། །དབུ་མ་ཆེན་པོ་འདིར་བཤད་བྱ། །བརྟན་དང་གཡོ་བའི་ཆོས་རྣམས་ལ། །ཆོས་ཀྱི་དབྱིངས་ཀྱིས་ཀུན་ཏུ་ཁྱབ། །ཆོས་རྣམས་དེ་བཞིན་ཉིད་དབྱེར་མེད། །སེམས་ཅན་རྒྱུད་ལ་སངས་རྒྱས་ཀྱི། །རིགས་སམ་ཁམས་ཞེས་གྲགས་པ་ནི། །བདེ་གཤེགས་སྙིང་པོ་ཞེས་བྱ་སྟེ། །སེམས་ཀྱི་ཆོས་ཉིད་དེ་ཡིན་ཅིང་། །ཆོས་ཅན་སེམས་ནི་འཁོར་བ་སྟེ། །དེ་ཡི་ཆོས་ཉིད་དག་པ་ནི། །མྱང་འདས་བདེ་གཤེགས་ཆོས་ཀྱི་སྐུ། །མ་དག་འཁོར་བ་ལྟར་སྣང་ཞིང་། །དག་པས་ཕྱོགས་རེའི་ཆ་མཐོང་ལ། །ཤིན་ཏུ་དག་པས་དབྱེར་མེད་པ། །ཆོས་ཉིད་རོ་མཉམ་ཆེན་པོར་གཟིགས། །གློ་བུར་དྲི་མའི་སྦུབས་ཞུགས་ཕྱིར། །སྙིང་པོའི་སྒྲ་ནི་གསལ་བར་བསྟན། །རྒྱལ་ཚབ་ས་བཅུའི་དབང་ཕྱུག་གི །རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་པའི་རྒྱུ་མཚན་གསུམ་གྱིས་བསྟན། །ཆོས་ཀྱི་སྐུ་ནི་འཕྲོ་བའམ། །ཁྱབ་པའི་ཕྱིར་དང་སེམས་ཅན་ནས། །སངས་རྒྱས་བར་གྱི་དེ་བཞིན་ཉིད། །རོ་གཅིག་ཐ་དད་འགྱུར་བ་མེད། །སངས་རྒྱས་ཉིད་དུ་འགྱུར་བའི་རིགས། །སེམས་ཅན་ཀུན་ལ་ཡོད་པར་གསུངས། །རང་བཞིན་གནས་པའི་རིགས་དེ་ལ། །རྣམ་དབྱེར་བཅས་པའི་ཆོས་ཀུན་བཏགས། །གཞན་དབང་གཉིས་ཀྱིས་སྟོང་པ་དང་། །རྣམ་དབྱེར་མེད་པའི་དམ་པའི་དོན། །བརྫུན་པ་བསླུ་བ་ལས་འདས་ཤིང་། །བདེན་པར་རྟག་པ་ཆེན་པོར་གྲུབ། །བདེན་པར་གྲུབ་པས་ནོངས་ཟེར་ན། །བརྫུན་པ་བསླུ་བ་ཉིད་དུ་སྨོས། །དེ་འདྲའི་སྐུར་པ་བཏབ་གྱུར་ན། །སེམས་ཅན་དམྱལ་བ་ཆེན་པོར་ལྟུང་། །བདེན་པར་གྲུབ་ན་གཞི་གྲུབ་ཐལ། །དངོས་པོ་ཉིད་དུ་འགྱུར་བ་སོགས། །ལྟར་སྣང་སྐྱོན་མང་རྗོད་བྱེད་པ། །ངལ་བ་ཁོ་ན་ཙམ་དུ་ཟད། །ཅི་ཕྱིར་གཞི་དངོས་ཁས་མ་བླངས། །ཆོས་ཉིད་བསམ་མི་ཁྱབ་པ་ཡི། །སྤྲོས་པ་བྲལ་བའི་གནས་ལུགས་ལ། །དོན་དམ་བདེན་པ་ཞེས་བརྗོད་ཀྱི། །དེ་ཉིད་གང་ལ་གྲུབ་ཟེར་ན། །འཕགས་པའི་ཡེ་ཤེས་གཟིགས་ངོར་གྲུབ། །རྒྱས་འགྱུར་ཚོགས་གཉིས་བསགས་པ་ལས། །གོང་འཕེལ་བྱུང་བའང་གཤེགས་སྙིང་གི །ཁམས་ཀྱི་ཡོན་ཏན་གསལ་བ་ལ། །རྒྱས་འགྱུར་རིགས་ཞེས་འཇོག་པ་ལས། །ཡོན་ཏན་སྔར་མེད་གསར་བསྐྱེད་མིན། །གཟུགས་སྐུ་མཚན་དཔེའི་ཡོན་ཏན་རྣམས། །དབྱིངས་ཀྱི་ངོ་བོར་ལྡན་པས་ན། །རང་བཞིན་ལྷུན་གྱིས་གྲུབ་པའོ། །གཞི་དུས་ཆོས་གཟུགས་འདུ་འབྲལ་མེད། །ལམ་གྱི་དུས་ཀྱང་དེ་ལྟར་བསྒོམ། །འབྲས་དུས་དེ་གཉིས་དབྱེར་མི་ཕྱེད། །དེས་ན་ལྷུན་གྲུབ་ཡོན་ཏན་རྣམས། །མེད་ཅེས་ཆད་ལྟ་རིང་དུ་སྤངས། །གསང་སྔགས་བླ་མེད་ཐེག་པ་ལས། །ཐིག་ལེ་སོ་གཉིས་མཚན་བཟང་སོགས། །བསྟན་པ་དེ་ཉིད་སེམས་དཀྱིལ་ལ། །སྦྱར་ན་རིག་པའི་གཤིས་ལ་ཚང་། །དག་པ་དྭངས་པ་འོད་གསལ་བ། །མི་འཁྲུགས་འདུས་མ་བྱས་སུ་གསུངས། །འོད་གསལ་ཞེས་པ་རྣམ་ཤེས་ཀྱི། །གསལ་རིག་ཙམ་ལ་ངོས་བཟུང་ན། །དེ་ནི་རྒྱུ་རྐྱེན་ལ་ལྟོས་ཕྱིར། །འདུས་མ་བྱས་སུ་མི་རུང་ཞིང་། །ཆོས་དབྱིངས་གསལ་སྟོང་ཆེན་པོ་ནི། །འདུས་མ་བྱས་སུ་མཁས་པ་དང་། །གྲུབ་པ་ཀུན་གྱི་བཞེད་པ་ཡིན། །ཁ་ཅིག་ཀུན་གཞི་རྣམ་ཤེས་ཉིད། །གཤེགས་སྙིང་ཉིད་དུ་བཞེད་པ་ཡང་། །རིགས་ཤིང་འཐད་པ་མ་ཡིན་ཏེ། །དེ་ནི་སྐྱེ་འགགས་ཆོས་ཅན་གྱི། །ངོ་བོ་འདུས་བྱས་ཡིན་པའི་ཕྱིར། །བདེ་གཤེགས་སྙིང་པོར་མི་འཐད་དེ། །འདུས་མ་བྱས་སུ་གསུངས་ཕྱིར་རོ། །འགའ་ལས་ཟག་མེད་སེམས་རྒྱུད་ཅེས། །གསུངས་པ་ཀུན་གཞིའི་རྣམ་ཤེས་ཀྱི། །གསལ་ཆ་ཉིད་ལ་དགོངས་པ་ཡིན། །དེ་ནི་མ་སྒྲིབ་ལུང་མ་བསྟན། །ཡིན་ཕྱིར་དགེ་བའི་ཐ་སྙད་མེད། །འོན་ཏེ་ཟག་མེད་སེམས་རྒྱུད་ཅེས། །ཚོགས་བརྒྱད་ལས་གཞན་ཡོད་ན་ནི། །དེ་ཚེ་རྣམ་ཤེས་ཚོགས་དགུར་འགྱུར། །དེས་ན་ཚོགས་བརྒྱད་ལས་གཞན་པའི། །ཟག་མེད་སེམས་རྒྱུད་མི་འཐད་དོ། །ཞེས་གསུངས་དེ་ལ་ངེས་ཤེས་བསྐྱེད། །དེས་ན་ཇི་ལྟར་ཁས་བླངས་རྣམས། །སྐྱོན་ཅན་ཉིད་ལས་འགའ་ཡང་མེད། །སྐྱོན་མེད་གཉུག་མ་ཟུང་འཇུག་གི །ལྟ་བ་རྒྱུད་ལ་བསྐྱེད་པར་བྱ། །སྙིང་པོའི་དོན་ལ་བྱམས་པ་དང་། །ཀླུ་སྒྲུབ་ཡབ་སྲས་ཐོགས་མེད་སོགས། །ཐམས་ཅད་དགོངས་པ་གཅིག་ཏུ་མཐུན། །དེ་ཡང་ཐེག་ཆེན་རྒྱུད་བླ་མས། །འཁོར་ལོ་ཐ་མའི་སྙིང་པོའི་དོན། །ཇི་བཞིན་གསལ་བར་མཛད་པ་ཉིད། །ངེས་པའི་དོན་ལ་ཡང་དག་འཇུག། འཕགས་པ་ཀླུས་ཀྱང་འདི་ལྟ་སྟེ། །བྱང་ཆུབ་སེམས་འགྲེལ་ལས། བཅོམ་ལྡན་འདས་ཀྱིས། གསང་བའི་བདག་པོ་སེམས་དེ་ནི་ནང་ན་ཡང་མ་ཡིན། ཕྱི་རོལ་ན་ཡང་མ་ཡིན། གཉིས་ཀའི་བར་དུ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། གསང་བའི་བདག་པོ་སེམས་དེ་ནི་རང་བཞིན་གྱིས་ཡོངས་སུ་དག་པའི་ཕྱིར་རོ། །ཞེས་དང་། བཅོམ་ལྡན་འདས་ཀྱི་བྱང་ཆུབ་གང་ཞེ་ན། གང་སེམས་ཀྱི་ཡང་དག་པར་ཇི་ལྟ་བ་བཞིན་ཡོངས་སུ་ཤེས་པ་སྟེ། དེ་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །ཞེས་དང་། བྱང་ཆུབ་ནི་ནམ་མཁའི་མཚན་ཉིད་ཕྱིར། དེའི་ཕྱིར་གང་ཞིག་རང་གི་སེམས་ཡང་དག་པ་ཇི་ལྟ་བ་བཞིན་རིག་པ་དེ་ལ་བརྩེ་བའི་ཐབས་ཀྱི། ཀྱེ་མ་ཀྱི་ཧུད་སེམས་ཅན་འདི་དག་ནི་སྡུག་བསྔལ། དེ་ལས་ཇི་ལྟར་ན་དེ་དག་རང་གི་སེམས་ཀྱི་ཆོས་ཉིད་ཀྱི་རང་བཞིན་རྟོགས་པར་འགྱུར་བ་དེ་བཞིན་དུ་བདག་གིས་འབད་པར་བྱའོ། །ཞེས་དབྱིངས་དང་ཡེ་ཤེས་དབྱེར་མེད་ཟུང་འཇུག་གི་གནས་ལུགས་དེ་ཉིད་སོ་སོ་རང་རིག་པའི་ཡེ་ཤེས་ཀྱིས་རྟོགས་ནས་སེམས་ཅན་རྣམས་ཀྱང་དེ་ལ་དཀྲི་བའི་སླད་དུ་འབད་པར་བསྟན་པ་དང་། སྟོང་ཉིད་ཕྱད་ཆད་དང་གསལ་བ་རིས་ཆད་ནི་རང་བཞིན་ཡོངས་སུ་དག་གཞིར་མི་འཐད་དེ། དེ་ལ་དག་མ་དག་གཉིས་ཀ་མེད་པའི་ཕྱིར། དེས་ན་ཆོས་ཅན་སེམས་ཀྱི་གནས་ལུགས་ཟུང་འཇུག་འདི་ཡོངས་སུ་དག་པ་ལ་དག་པར་བལྟ་བར་བྱ་དགོས་ཤིང་། །རང་སེམས་གདོད་ནས་མ་སྐྱེས་པ། །ཆོས་བདག་མེད་པ་མཉམ་པ་ཉིད། །ཅེས་པའང་རྣམ་པ་ཀུན་གྱི་མཆོག་དང་ལྡན་པའི་སྟོང་ཉིད་འོད་གསལ་འདི་ལ་ཆོས་ཐམས་ཅད་མཉམ་པ་ཉིད་དུ་འཐད་ལ། །དེ་ལས་གཞན་དུ་མ་ཡིན་ནོ། །ཡང་ཀླུས་གསང་འདུས་རིམ་ལྔ་ལས། །ཡང་དག་མཐའ་ལས་ལངས་ནས་ནི། །གཉིས་མེད་ཡེ་ཤེས་ཐོབ་པར་འགྱུར། །ཟུང་འཇུག་ཏིང་འཛིན་ལ་གནས་ནས། །སླར་ཡང་གང་ལའང་མི་སློབ་བོ། །འདི་ནི་རྫོགས་པའི་རྣལ་འབྱོར་པ། །རྡོ་རྗེ་འཛིན་པ་ཆེན་པོའང་དེ། །རྣམ་པ་ཀུན་གྱི་མཆོག་ལྡན་པའི། །ཐམས་ཅད་མཁྱེན་པ་དེ་ནས་འགྱུར། །ཅེས་དང་། རླུང་གི་དེ་ཉིད་གསལ་བ་ནི། །ཡེ་ཤེས་ལྔ་ཡི་ངོ་བོ་ཉིད། །རྣལ་འབྱོར་བྱིས་པའི་ཡུལ་མིན་ཞིང་། །རྟོག་གེ་པ་ཡིས་མི་ཤེས་སོ། །ཞེས་དང་། ཇི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞིན་དུ། །རང་གི་རང་གི་ཡེ་ཤེས་ནི། །ལེགས་མཐོང་གང་ཡིན་འདིར་ཕྱག་ཡིན། །ཅེས་དང་། གསལ་བ་རུ་ནི་བཤད་བྱ་སྟེ། །སྟོང་པ་གསུམ་གྱི་རྣམ་དག་ན། །འོད་གསལ་བ་ནི་འདིར་བཤད་དེ། །ཐམས་ཅད་སྟོང་པར་དེ་བརྗོད་དེ། །ཡེ་ཤེས་གསུམ་ནི་རྣམ་དག་པ། །ཡེ་ཤེས་དག་ནས་དེ་ཉིད་སྟོང་། །ཐམས་ཅད་མཁྱེན་པ་བླ་ན་མེད། །འགྱུར་བ་མེད་ཅིང་སྣང་བ་མེད། །གཉིས་མེད་མཆོག་ཏུ་ཞི་བ་ཉིད། །ཅེས་དང་། ནམ་མཁའི་ངོས་ལྟར་མཆོག་གྱུར་པ། །འོད་གསལ་བ་ནི་དེ་དམིགས་ཤིང་། །འོད་གསལ་བ་ཡི་གནས་ཐོབ་ནས། །རབ་དགའི་གཟུགས་སུ་སྐྱེ་བར་འགྱུར། །ཅེས་རླུང་སེམས་མ་དག་པ་ཐམས་ཅད་ཀྱི་ཆོས་ཉིད་འོད་གསལ་ཟུང་འཇུག་གི་ཡེ་ཤེས་ཀྱི་ངོ་བོར་བསྟན་པ། སེམས་འཁྲུལ་བཅས་ཀྱི་གསལ་རིག་མ་འགགས་པ་ཙམ་ཆོས་དབྱིངས་འོད་གསལ་དུ་མི་འཐད་ཅིང་། རང་བཞིན་འོད་གསལ་དེ་ནི་སྟོང་གསུམ་གྱི་མཐའི་འོད་གསལ་ཉིད་དོན་གྱི་འོད་གསལ་དངོས་སུ་བཤད་པའོ། །ཡང་འཕགས་པ་ཀླུས། འཁོར་ལོ་ཐ་མའི་དགོངས་འགྲེལ་དུ་གྲགས་པ་ཆོས་དབྱིངས་བསྟོད་པ་ལས། གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱངས་པ་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་ཉིད་དོ། །ཇི་ལྟར་འོ་མ་དང་འདྲེས་པས། །མར་གྱི་སྙིང་པོ་མི་སྣང་བ། །དེ་བཞིན་ཉོན་མོངས་དང་འདྲེས་པ། །ཆོས་ཀྱི་དབྱིངས་ཀྱང་མི་མཐོང་ངོ་། །ཇི་ལྟར་འོ་མ་རྣམས་སྦྱངས་པས། །མར་གྱི་སྙིང་པོ་དྲི་མེད་འགྱུར། །དེ་བཞིན་ཉོན་མོངས་རྣམས་སྦྱངས་པས། །ཆོས་དབྱིངས་ཤིན་ཏུ་དྲི་མེད་འགྱུར། ཅེས་དང་། །ཇི་ལྟར་རིན་ཆེན་བཻཌཱུཪྻ། །དུས་རྣམས་ཀུན་ཏུ་འོད་གསལ་ཡང་། །རྡོ་ཡི་ནང་ན་གནས་གྱུར་ན། །དེ་ཡི་འོད་ནི་གསལ་མ་ཡིན། །དེ་བཞིན་ཉོན་མོངས་ཀྱིས་བསྒྲིབས་པའི། །ཆོས་དབྱིངས་ཤིན་ཏུ་དྲི་མེད་པའང་། །འཁོར་བར་འོད་ནི་གསལ་མ་ཡིན། །མྱ་ངན་འདས་ན་འོད་གསལ་འགྱུར། །དབྱིངས་ཡོད་ན་ནི་ལས་བྱས་པས། །ས་ལེ་སྦྲམ་དག་མཐོང་བར་འགྱུར། །ཁམས་མེད་ན་ནི་ལས་བྱས་ན། །ཉོན་མོངས་འབའ་ཞིག་སྐྱེད་པར་བྱེད། །ཅེས་དང་། དེ་བཞིན་འོད་གསལ་བ་ཡི་སེམས། །འདོད་ཆགས་ལ་སོགས་དྲི་མ་ཅན། །ཡེ་ཤེས་ཨེ་ཡིས་ཉོན་མོངས་བསྲེགས། །དེ་ཉིད་འོད་གསལ་མ་ཡིན་ནོ། །སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་གང་། །དེ་དག་ཀུན་གྱི་ཉོན་མོངས་ལྡོག། ཁམས་དེ་ཉམས་པར་བྱེད་མ་ཡིན། །ཞེས་དང་། སོ་སོ་རང་རིག་སྦྱོར་ལྡན་ཉིད། །སངས་རྒྱས་རྟག྄༵་པའི་ཆོས་ཉིད་ཅན། །ཞེས་དང་། །ཐོག་མ་བར་དང་མཐར་དགེ་བ། །བསླུ་བ་མེད་ཅིང་བརྟན྄༵་པ་ཡི། །གང་ཞིག་དེ་ལྟར་བདག་མེད་པའང་། །ཇི་ལྟར་བདག་དང་བདག་གིས་བརྟགས། ཞེས་སོགས་རྒྱ་ཆེར་གསུངས་པ་རྣམས་འཁོར་ལོ་ཐ་མའི་མདོ་དང་། བསྟན་བཅོས་ནས་གསུངས་པ་བཞིན། རང་བཞིན་གྱི་འོད་གསལ་དེ་བཞིན་གཤེགས་པའི་སྙིང་པོ་སྒྲིབ་པའི་ཚོགས་ཀྱིས་བསྒྲིབས་ཚུལ་དང་། རང་གི་ངོ་བོ་འཕོ་འགྱུར་བྲལ་བ་རྟག་བརྟན་ཆེན་པོར་བཞུགས་ཚུལ་སོགས་གསུངས་ཤིང་། སློབ་དཔོན་ཟླ་གྲགས་ཀྱི་ཞལ་ནས་སྟོང་ཉིད་ཉི་ཤུ་བཤད་པའི་སྐབས། སངས་རྒྱས་རྣམས་ནི་འབྱུང་བའམ། །མ་བྱུང་ཡང་རུང་དངོས་སུ་དང་། །དངོས་པོ་ཀུན་གྱི་སྟོང་པ་ཉིད། །གཞན་གྱི་དངོས་པོ་རབ་ཏུ་བསྒྲགས། །ཡང་དག་མཐའ་དང་དེ་བཞིན་ཉིད། །ཅེས་པའི་འགྲེལ་པར་གཞན་གྱི་དངོས་པོ་ནི་མཆོག་ཏུ་བྱུང་བའི་དེ་ཁོ་ན་ཉིད་དོ། །དེའི་མཆོག་ཏུ་བྱུང་བ་ཉིད་ནི་རྟག་ཏུ་ཡོད་པ་ཉིད་དོ། །རྣམ་པ་གཅིག་ཏུ་ན་གཞན་གྱི་དངོས་པོ་ནི་ཡེ་ཤེས་ཕུལ་དུ་བྱུང་བས་རྟོགས་པར་བྱ་བའི་དངོས་པོ་སྟེ། དེ་ནི་དེ་ཉིད་ཀྱིས་སྟོང་པ་ཉིད་དོ། །ཡང་ན་ཕ་རོལ་ན་ཡོད་པ་ནི་གཞན་གྱི་དངོས་པོའོ། །འཁོར་བ་ལས་འདས་པའི་ཕྱིར་གཞན་གྱི་དངོས་པོ་ཞེས་བྱ་བ་ནི་ཡང་དག་པའི་མཐའ་སྟེ་རྣམ་པར་འགྱུར་བ་མེད་པའི་དོན་དེ་བཞིན་ཉིད་ཀྱི་སྟོང་པ་ཉིད་ཀྱི་མཚན་ཉིད་ཅན་དེ་ནི་གཞན་གྱི་དངོས་པོའི་སྟོང་པ་ཉིད་དོ། །ཞེས་ཆོས་དབྱིངས་འོད་གསལ་འགྱུར་མེད་རྟག་ཏུ་བཞུགས་པ་དང་། དབྱིངས་སྤྲོས་བྲལ་གྱི་ངོ་བོ་དང་མི་ཕྱེད་པ་དང་། འཁོར་བ་ཀུན་བརྟགས་དང་གཞན་དབང་ཡང་དག་པའི་མཐའ་ཆོས་དབྱིངས་དང་། ཡང་ན་ཕ་རོལ་ན་ཡོད་པ་འཁོར་བའི་ཆོས་ཀྱི་ཡང་དག་པའི་མཐའ་དེ་སྟོང་པར་བཤད་པ་སྟེ། མཁས་པ་ཆེན་པོའི་དགོངས་པ་ཆེས་ཟབ་པའོ། །ཇོ་བོ་རྗེས། དེ་ལྟར་རགས་པའི་རྣལ་འབྱོར་བསྟན་ནས་ད་ནི་ཕྲ་བའི་རྣལ་འབྱོར་བསྟན་པར་བྱ་སྟེ། འདི་ཕྲ་བ་ཡིན་ཏེ། འདི་ལྟར་ཆོས་ཐམས་ཅད་རང་གི་སེམས་ཉིད་སྒྱུ་མ་ཙམ་དུ་སྣང་བ་འབྱུང་སྟེ། འདི་ལས་སེམས་སྒྱུ་མ་ཙམ་ནི་དུས་གསུམ་ལས་འདས་པ། ཁ་དོག་དང་དབྱིབས་མེད་པར་རང་བཞིན་གྱི་འོད་གསལ་བ། སྣང་བ་མེད་པས་ཆོས་ཐམས་ཅད་ནི་སེམས་ཉིད་སྒྱུ་མ་ཙམ་ཡིན་པར་ཤེས་པར་བྱའོ། །ཞེས་དང་། ལང་གཤེགས་ཀྱིས། སེམས་ཙམ་ལ་ནི་བརྟེན་ནས་སུ། སོགས་ཀྱིས་གསུངས་པ་དང་། ཡང་ལང་དཀར་གཤེགས་པའི་ལུང་གི་མཁས་པ་ཆེན་པོ་རྣམས་ཀྱི་གཤེགས་སྙིང་འཁོར་ལོ་ཐ་མ་ནས་བཤད་པ་དྲང་དོན་དུ་བཀྲལ་བའང་བར་པ་གཙོར་འདོན་ལ་དགོངས་ནས་གསུངས་པ་ཡིན་གྱི་མཐའ་གཅིག་ཏུ་མ་ངེས་ཏེ། ལུང་དེའི་དོན། བྱིས་པ་རྣམས་བདག་མེད་པས་འཇིགས་པར་འགྱུར་བའི་གནས་རྣམས་སྤངས་བའི་ཕྱིར་དོན་དེ་དེ་བཞིན་གཤེགས་པའི་སྙིང་པོའི་སྒོ་ནས་བསྟན་པས་རྣམ་པར་མི་རྟོག་པའི་གནས་ཟླ་གྲགས་དང་ཆོས་རྗེ་འཇམ་པའི་དབྱངས་སོགས་ཀྱིས་ལུང་དྲང་དོན་དུ་བཀྲལ་བའང་གཤེགས་སྙིང་མཚན་མ་ཅན་དུ་བཟུང་ན་ལུང་འདིས་བསལ་བས་དེ་ལ་དགོངས་ཤིང་། རང་བཞིན་འོད་གསལ་སྤྲོས་བྲལ་མཚན་མ་མེད་པར་གོ་ན་ལུང་འདིའི་དོན་དང་འབྱོར་ཞིང་དགོངས་པ་གཅིག་ཏུ་མཐུན་ནོ། །མཆན། སྣང་བ་མེད་པའི་སྤྱོད་ཡུལ་སྟོན་ཏོ། །ཞེས་བྱིས་བློས་རྟོགས་པར་དཀའ་བར་བསྟན་པ་དང་། ད་ལྟ་དང་། མ་འོངས་པའི་བྱང་ཆུབ་སེམས་དཔའ་རྣམས་ཀྱིས་ཀྱང་བདག་ལ་མངོན་ཞེན་མི་བྱ་ཞེས་པས་ཉན་རང་བྱང་འཕགས་རྣམས་ཀྱིས་ཟབ་མོའི་གནས་དེར་བདག་ཏུ་འཁྲུལ་ནས་རྟོགས་དཀའ་བ་དང་། བདག་ཏུ་སྨྲ་བ་དྲང་བའི་ཕྱིར། དེ་བཞིན་གཤེགས་པའི་སྙིང་པོ་བསྟན་པས། དེ་བཞིན་གཤེགས་པའི་སྙིང་པོ་སྟོན་ཏེ། ཡང་དག་པའི་བདག་ཏུ་རྣམ་པར་རྟོག་པའི་ལྟ་བར་ལྷུང་བའི་བསམ་པ་ཅན་དག་རྣམ་པར་ཐར་པའི་སྒོ་གསུམ་གྱི་སྤྱོད་ཡུལ་ལ་གནས་པའི་བསམ་པ་དང་ལྡན་ཅིང་། མྱུར་དུ་བླ་ན་མེད་པའི་རྫོགས་པའི་བྱང་ཆུབ་ཏུ་ཇི་ལྟར་འཚང་རྒྱ་བར་འགྱུར། སོགས་ཀྱིས་ཡང་དག་པའི་བདག་ཅེས་བརྟགས་པའང་དབྱིངས་རྣམ་ཐར་གསུམ་སྒོ་གསུམ་གྱི་རང་བཞིན་དང་མི་ཕྱེད་པས་བྱང་ཆུབ་ཐོབ་པར་གསུངས་ཤིང་། ལེན་པའི་རྣམ་པར་ཤེས་པ་སོགས་ཀྱི་དོན་ཀུན་གཞིའི་མཛོད་ཁང་འདི་རྟོགས་པར་དཀའ་ཞིང་། ཟབ་ཅིང་ཕྲ་བས་བྱིས་པ་རྣམས་ལ་མ་བསྟན་ཅེས་པའི་ཤུགས་ཀྱིས་དེ་བཞིན་གཤེགས་པའི་སྙིང་པོ་ཡོད་པར་བསྟན་པའོ། །འཇམ་དཔལ་གྱི་ལྟ་འདོད་མདོར་བསྟན་ལས། །ཕུང་པོ་རྣམ་བཅད་སྟོང་པ་ཉིད། །ཆུ་ཤིང་བཞིན་དུ་སྙིང་པོ་མེད། །རྣམ་པ་ཀུན་གྱི་མཆོག་ལྡན་པའི། །སྟོང་ཉིད་དེ་ལྟར་འགྱུར་མ་ཡིན། །ཅེས་སོགས་དབྱིངས་དང་ཡེ་ཤེས་དབྱེར་མེད་པའི་གནས་ལུགས་འདི་སྒོམ་པ་ཉམས་སུ་མྱང་བྱའི་ལྟ་བ་ནི་འདི་ཁོ་ན་ཡིན་ནོ། །དེ་ལྟར་ཡིད་ཆེས་ལུང་དག་ལ། །བློ་ལྡན་རྣམས་ཀྱིས་ངེས་ཤེས་དྲོངས། །རིག་པ་བཞི་ཡིས་ལེགས་པར་དཔྱོད། །འོད་གསལ་ཅེས་པ་དངོས་པོ་དང་། །མཚན་མ་ཅན་དུ་འཛིན་པ་སྤོངས། །གསལ་སྟོང་མི་མཐུན་འགལ་ཟླ་གཉིས། །ཟུང་འཇུག་སྒྲུབ་པའི་ངལ་བ་དོར། །གནས་སྣང་གཅིག་ཏུ་མི་བསྲེ་བར། །མ་དག་མ་དག་དག་པ་དང་། །ཤིན་ཏུ་རྣམ་པར་དག་པ་ཡི། །གནས་སྐབས་སོ་སོར་ཤན་འབྱེད་བྱ། །ཀུན་རྫོབ་རང་གི་ངོ་བོས་སྟོང་། །དོན་དམ་གཞན་གྱི་དངོས་པོས་སྟོང་། །འཁོར་འདས་ཆོས་རྣམས་སྟོང་རྟེན་འབྱུང་། །དབྱེར་མེད་དབུ་མའི་ལམ་དུ་གསུངས། །མྱ་ངན་འདས་པ་བདེན་གཅིག་པུ། །ཇི་བཞིན་གཟིགས་པ་སངས་འཕགས་ཀྱི། །ཡེ་ཤེས་གཟིགས་པ་མི་བསླུ་ཞིང་། །བདེ༵ན་པ་ཉིད་དུ་ཚད་མས་གྲུབ྄༵། །དེས་ན་དེ་ཉིད་དབང་བཙན་བྱ། །འདི་དོན་ས་བཅུའི་སེམས་དཔས་ཀྱང་། །ཇི་བཞིན་རྟོགས་པར་མ་གསུངས་ན། །སོ་སྐྱེས་རྟོགས་པ་ལྟ་ཅི་ཞིག། འདྲེན་པ་རྣམས་ཀྱི་ཆོས་ཀྱི་སྐུ། །སྒྲོ་སྐུར་རྟག་ཆད་ལས་གྲོལ་ཞིང་། །ཟབ་ཞི་སྤྲོས་བྲལ་འོད་གསལ་བ། །འདུས་མ་བྱས་པའི་དོན་རྟོགས་པའི། །ཐབས་ཆེན་ལ་ནི་འབད་པ་གཅེས། །ཀླུ་སྒྲུབ་ཐོགས་མེད་ངེས་པའི་དོན། །མཐར་ཐུག་དགོངས་པ་གཅིག་ཏུ་འབབས། །དེ་ཀུན་ཟུང་འཇུག་ཕྲ་བ་ཡི། །ནང་གི་དབུ་མར་བཤད་པ་དེ། །ཟབ་མོར་བསྟན་པའི་རྒྱུད་རྣམས་དང་། །སེམས་འགྲེལ་སོགས་སུ་གསལ་བར་བསྟན། །ལྷ་གཅིག་དཱི་པཾ་ཀཱ་ར་ཡི། །ཆོས་དབྱིངས་ལྟ་བའི་གླུ་དབྱངས་ལས། །ཚུལ་གཉིས་ཤིང་རྟ་ལ་ཞོན་ནས། །རིག་པའི་སྲབ་སྐྱོགས་འཇུ་བྱེད་པ། །དེ་དག་དེ་ཕྱིར་ཇི་བཞིན་ནོ། །ཐེག་པ་ཆེན་པོ་པ་ཉིད་ཐོབ། །ཅེས་དང་། ཕ་རོལ་རྒོལ་བ་བཟློག་པ་དང་། །བསྟན་བཅོས་ཆེན་པོའི་གཞུང་དང་ནི། །རྩོད་པ་ཆེན་པོ་བྱུང་དུས་སུ། །རགས་པའི་དབུ་མའི་གཞུང་སྨྲ་བྱ། །དེ་ཉིད་དོན་ལ་གཙོར་བྱེད་ཅིང་། །རྣལ་འབྱོར་ཉམས་སུ་ལེན་དུས་སུ། །ཕྲ་བའི་རྣལ་འབྱོར་བསྒོམ་པར་བྱ། །འདི་ནི་ཞལ་གྱི་གདམས་པ་ཡིན། །ཞེས་རྗེས་འཇུག་རྣམས་ལ་གདམས་པ་དང་། །མཆོག་གསང་འོད་གསལ་རྫོགས་པ་ཆེའི། །ཤིན་ཏུ་གསལ་རྒྱས་བསྟན་པ་དང་། །རྣལ་འབྱོར་དབང་ཕྱུག་བིཪྺ་པ། །ས་སྐྱའི་རྗེ་བཙུན་མཆོག་རྣམས་ཀྱང་། །ཟུང་འཇུག་དབུ་མ་གསལ་བར་བཤད། །མར་མི་དྭགས་སོགས་འདི་ཉིད་བཞེད། །མཁས་གྲུབ་རྣམས་ཀྱི་དགོངས་པའི་མཐིལ། །འདི་ནི་བཤད་པ་ཙམ་གྱིས་མིན། །ནང་གི་རྣལ་འབྱོར་བསྒོམ་པ་ལས། །དཀར་པོའི་ཚེས་ཟླ་འཕེལ་བ་བཞིན། །རིམ་གྱིས་ཆོས་སྐུའི་རྒྱལ་ས་ཐོབ། །རྣམ་གྲོལ་ཡོན་ཏན་རབ་བརྙེས་ནས། །འགྲོ་དོན་ཕྲིན་ལས་ལྷུན་གྲུབ་འབྱུང་། །ཐམས་ཅད་སྟོང་པ་འོད་གསལ་བ། །མཚན་མཚོན་བརྗོད་པ་ལས་འདས་པའི། །ཟུང་འཇུག་གཉུག་མའི་ཡེ་ཤེས་དེ། །འགྲོ་བ་ཀུན་གྱིས་རྟོགས་པར་ཤོག། འདི་སྦྱར་དགེ་བས་བདག་གཞན་རྣམས། །བདེ་གཤེགས་སྙིང་པོའི་ཁྱབ་མཐོང་ནས། །ལམ་ལ་འབད་པ་དོན་ཡོད་ཅིང་། །དག་པ་གཉིས་ལྡན་སྐུ་ཐོབ་ཤོག། །ཅེས་པའང་མ་སྦྱངས་མུ་ཅོར་སྨྲ་བ་ཆོས་དབྱིངས་བདེ་གཤེགས་སྙིང་པོ་ལ་མོས་པས་སྤྱོད་པ་བློ་གྲོས་རྒྱ་མཚོས་མྱུར་བར་བྲིས་པ་དགེ། །།
[edit]

@#/__/zung 'jug dbu ma chen po'i don brjod pa nges don lam 'jug ces bya ba bzhugs so/__/ zung 'jug gnyug ma yongs grub bde gshegs snying po'i gnas lugs mngon sum gzigs pa'i bla ma dam pa rnams la gus pas phyag 'tshal lo/__/thog ma tha ma med pa'i dbyings/__/chos rnams kun gyi 'byung gnas che/__/gtsang rtag bde ba'i mthar son pa/__/dang po'i sangs rgyas phyag btsal nas/__/zung 'jug rab tu mi gnas pa'i/__/dbu ma chen po 'dir bshad bya/__/brtan dang g.yo ba'i chos rnams la/__/chos kyi dbyings kyis kun tu khyab/__/chos rnams de bzhin nyid dbyer med/__/sems can rgyud la sangs rgyas kyi/__/rigs sam khams zhes grags pa ni/__/bde gshegs snying po zhes bya ste/__/sems kyi chos nyid de yin cing /__/chos can sems ni 'khor ba ste/__/de yi chos nyid dag pa ni/__/myang 'das bde gshegs chos kyi sku/__/ma dag 'khor ba ltar snang zhing /__/dag pas phyogs re'i cha mthong la/__/shin tu dag pas dbyer med pa/__/chos nyid ro mnyam chen por gzigs/__/glo bur dri ma'i sbubs zhugs phyir/__/snying po'i sgra ni gsal bar bstan/__/rgyal tshab sa bcu'i dbang phyug gi__/rdzogs sangs sku ni 'phro phyir dang /__/de bzhin nyid dbyer med phyir dang /__/rigs yod phyir na lus can kun/__/rtag tu sangs rgyas snying po can/__/zhes pa'i rgyu mtshan gsum gyis bstan/__/chos kyi sku ni 'phro ba'am/__/khyab pa'i phyir dang sems can nas/__/sangs rgyas bar gyi de bzhin nyid/__/ro gcig tha dad 'gyur ba med/__/sangs rgyas nyid du 'gyur ba'i rigs/__/sems can kun la yod par gsungs/__/rang bzhin gnas pa'i rigs de la/__/rnam dbyer bcas pa'i chos kun btags/__/gzhan dbang gnyis kyis stong pa dang /__/rnam dbyer med pa'i dam pa'i don/__/brdzun pa bslu ba las 'das shing /__/bden par rtag pa chen por grub/__/bden par grub pas nongs zer na/__/brdzun pa bslu ba nyid du smos/__/de 'dra'i skur pa btab gyur na/__/sems can dmyal ba chen por ltung /__/bden par grub na gzhi grub thal/__/dngos po nyid du 'gyur ba sogs/__/ltar snang skyon mang rjod byed pa/__/ngal ba kho na tsam du zad/__/ci phyir gzhi dngos khas ma blangs/__/chos nyid bsam mi khyab pa yi/__/spros pa bral ba'i gnas lugs la/__/don dam bden pa zhes brjod kyi/__/de nyid gang la grub zer na/__/'phags pa'i ye shes gzigs ngor grub/__/rgyas 'gyur tshogs gnyis bsags pa las/__/gong 'phel byung ba'ang gshegs snying gi__/khams kyi yon tan gsal ba la/__/rgyas 'gyur rigs zhes 'jog pa las/__/yon tan sngar med gsar bskyed min/__/gzugs sku mtshan dpe'i yon tan rnams/__/dbyings kyi ngo bor ldan pas na/__/rang bzhin lhun gyis grub pa'o/__/gzhi dus chos gzugs 'du 'bral med/__/lam gyi dus kyang de ltar bsgom/__/'bras dus de gnyis dbyer mi phyed/__/des na lhun grub yon tan rnams/__/med ces chad lta ring du spangs/__/gsang sngags bla med theg pa las/__/thig le so gnyis mtshan bzang sogs/__/bstan pa de nyid sems dkyil la/__/sbyar na rig pa'i gshis la tshang /__/dag pa dwangs pa 'od gsal ba/__/mi 'khrugs 'dus ma byas su gsungs/__/'od gsal zhes pa rnam shes kyi/__/gsal rig tsam la ngos bzung na/__/de ni rgyu rkyen la ltos phyir/__/'dus ma byas su mi rung zhing /__/chos dbyings gsal stong chen po ni/__/'dus ma byas su mkhas pa dang /__/grub pa kun gyi bzhed pa yin/__/kha cig kun gzhi rnam shes nyid/__/gshegs snying nyid du bzhed pa yang /__/rigs shing 'thad pa ma yin te/__/de ni skye 'gags chos can gyi/__/ngo bo 'dus byas yin pa'i phyir/__/bde gshegs snying por mi 'thad de/__/'dus ma byas su gsungs phyir ro/__/'ga' las zag med sems rgyud ces/__/gsungs pa kun gzhi'i rnam shes kyi/__/gsal cha nyid la dgongs pa yin/__/de ni ma sgrib lung ma bstan/__/yin phyir dge ba'i tha snyad med/__/'on te zag med sems rgyud ces/__/tshogs brgyad las gzhan yod na ni/__/de tshe rnam shes tshogs dgur 'gyur/__/des na tshogs brgyad las gzhan pa'i/__/zag med sems rgyud mi 'thad do/__/zhes gsungs de la nges shes bskyed/__/des na ji ltar khas blangs rnams/__/skyon can nyid las 'ga' yang med/__/skyon med gnyug ma zung 'jug gi__/lta ba rgyud la bskyed par bya/__/snying po'i don la byams pa dang /__/klu sgrub yab sras thogs med sogs/__/thams cad dgongs pa gcig tu mthun/__/de yang theg chen rgyud bla mas/__/'khor lo tha ma'i snying po'i don/__/ji bzhin gsal bar mdzad pa nyid/__/nges pa'i don la yang dag 'jug/__'phags pa klus kyang 'di lta ste/__/byang chub sems 'grel las/__bcom ldan 'das kyis/__gsang ba'i bdag po sems de ni nang na yang ma yin/__phyi rol na yang ma yin/__gnyis ka'i bar du yang ma yin no/__/de ci'i phyir zhe na/__gsang ba'i bdag po sems de ni rang bzhin gyis yongs su dag pa'i phyir ro/__/zhes dang /__bcom ldan 'das kyi byang chub gang zhe na/__gang sems kyi yang dag par ji lta ba bzhin yongs su shes pa ste/__de nyid bla na med pa yang dag par rdzogs pa'i byang chub bo/__/zhes dang /__byang chub ni nam mkha'i mtshan nyid phyir/__de'i phyir gang zhig rang gi sems yang dag pa ji lta ba bzhin rig pa de la brtse ba'i thabs kyi/__kye ma kyi hud sems can 'di dag ni sdug bsngal/__de las ji ltar na de dag rang gi sems kyi chos nyid kyi rang bzhin rtogs par 'gyur ba de bzhin du bdag gis 'bad par bya'o/__/zhes dbyings dang ye shes dbyer med zung 'jug gi gnas lugs de nyid so so rang rig pa'i ye shes kyis rtogs nas sems can rnams kyang de la dkri ba'i slad du 'bad par bstan pa dang /__stong nyid phyad chad dang gsal ba ris chad ni rang bzhin yongs su dag gzhir mi 'thad de/__de la dag ma dag gnyis ka med pa'i phyir/__des na chos can sems kyi gnas lugs zung 'jug 'di yongs su dag pa la dag par blta bar bya dgos shing /__/rang sems gdod nas ma skyes pa/__/chos bdag med pa mnyam pa nyid/__/ces pa'ang rnam pa kun gyi mchog dang ldan pa'i stong nyid 'od gsal 'di la chos thams cad mnyam pa nyid du 'thad la/__/de las gzhan du ma yin no/__/yang klus gsang 'dus rim lnga las/__/yang dag mtha' las langs nas ni/__/gnyis med ye shes thob par 'gyur/__/zung 'jug ting 'dzin la gnas nas/__/slar yang gang la'ang mi slob bo/__/'di ni rdzogs pa'i rnal 'byor pa/__/rdo rje 'dzin pa chen po'ang de/__/rnam pa kun gyi mchog ldan pa'i/__/thams cad mkhyen pa de nas 'gyur/__/ces dang /__rlung gi de nyid gsal ba ni/__/ye shes lnga yi ngo bo nyid/__/rnal 'byor byis pa'i yul min zhing /__/rtog ge pa yis mi shes so/__/zhes dang /__ji ltar chu la chu bzhag dang /__/ji ltar mar la mar bzhin du/__/rang gi rang gi ye shes ni/__/legs mthong gang yin 'dir phyag yin/__/ces dang /__gsal ba ru ni bshad bya ste/__/stong pa gsum gyi rnam dag na/__/'od gsal ba ni 'dir bshad de/__/thams cad stong par de brjod de/__/ye shes gsum ni rnam dag pa/__/ye shes dag nas de nyid stong /__/thams cad mkhyen pa bla na med/__/'gyur ba med cing snang ba med/__/gnyis med mchog tu zhi ba nyid/__/ces dang /__nam mkha'i ngos ltar mchog gyur pa/__/'od gsal ba ni de dmigs shing /__/'od gsal ba yi gnas thob nas/__/rab dga'i gzugs su skye bar 'gyur/__/ces rlung sems ma dag pa thams cad kyi chos nyid 'od gsal zung 'jug gi ye shes kyi ngo bor bstan pa/__sems 'khrul bcas kyi gsal rig ma 'gags pa tsam chos dbyings 'od gsal du mi 'thad cing /__rang bzhin 'od gsal de ni stong gsum gyi mtha'i 'od gsal nyid don gyi 'od gsal dngos su bshad pa'o/__/yang 'phags pa klus/__'khor lo tha ma'i dgongs 'grel du grags pa chos dbyings bstod pa las/__gang zhig 'khor ba'i rgyur gyur pa/__/de nyid sbyangs pa byas pa las/__/dag pa de nyid mya ngan 'das/__/chos kyi sku yang de nyid do/__/ji ltar 'o ma dang 'dres pas/__/mar gyi snying po mi snang ba/__/de bzhin nyon mongs dang 'dres pa/__/chos kyi dbyings kyang mi mthong ngo /__/ji ltar 'o ma rnams sbyangs pas/__/mar gyi snying po dri med 'gyur/__/de bzhin nyon mongs rnams sbyangs pas/__/chos dbyings shin tu dri med 'gyur/__ces dang /__/ji ltar rin chen baiDUR+Ya/__/dus rnams kun tu 'od gsal yang /__/rdo yi nang na gnas gyur na/__/de yi 'od ni gsal ma yin/__/de bzhin nyon mongs kyis bsgribs pa'i/__/chos dbyings shin tu dri med pa'ang /__/'khor bar 'od ni gsal ma yin/__/mya ngan 'das na 'od gsal 'gyur/__/dbyings yod na ni las byas pas/__/sa le sbram dag mthong bar 'gyur/__/khams med na ni las byas na/__/nyon mongs 'ba' zhig skyed par byed/__/ces dang /__de bzhin 'od gsal ba yi sems/__/'dod chags la sogs dri ma can/__/ye shes e yis nyon mongs bsregs/__/de nyid 'od gsal ma yin no/__/stong pa nyid ni ston pa'i mdo/__/rgyal bas ji snyed gsungs pa gang /__/de dag kun gyi nyon mongs ldog/__khams de nyams par byed ma yin/__/zhes dang /__so so rang rig sbyor ldan nyid/__/sangs rgyas rtaga?~X pa'i chos nyid can/__/zhes dang /__/thog ma bar dang mthar dge ba/__/bslu ba med cing brtana?~X pa yi/__/gang zhig de ltar bdag med pa'ang /__/ji ltar bdag dang bdag gis brtags/__zhes sogs rgya cher gsungs pa rnams 'khor lo tha ma'i mdo dang /__bstan bcos nas gsungs pa bzhin/__rang bzhin gyi 'od gsal de bzhin gshegs pa'i snying po sgrib pa'i tshogs kyis bsgribs tshul dang /__rang gi ngo bo 'pho 'gyur bral ba rtag brtan chen por bzhugs tshul sogs gsungs shing /__slob dpon zla grags kyi zhal nas stong nyid nyi shu bshad pa'i skabs/__sangs rgyas rnams ni 'byung ba'am/__/ma byung yang rung dngos su dang /__/dngos po kun gyi stong pa nyid/__/gzhan gyi dngos po rab tu bsgrags/__/yang dag mtha' dang de bzhin nyid/__/ces pa'i 'grel par gzhan gyi dngos po ni mchog tu byung ba'i de kho na nyid do/__/de'i mchog tu byung ba nyid ni rtag tu yod pa nyid do/__/rnam pa gcig tu na gzhan gyi dngos po ni ye shes phul du byung bas rtogs par bya ba'i dngos po ste/__de ni de nyid kyis stong pa nyid do/__/yang na pha rol na yod pa ni gzhan gyi dngos po'o/__/'khor ba las 'das pa'i phyir gzhan gyi dngos po zhes bya ba ni yang dag pa'i mtha' ste rnam par 'gyur ba med pa'i don de bzhin nyid kyi stong pa nyid kyi mtshan nyid can de ni gzhan gyi dngos po'i stong pa nyid do/__/zhes chos dbyings 'od gsal 'gyur med rtag tu bzhugs pa dang /__dbyings spros bral gyi ngo bo dang mi phyed pa dang /__'khor ba kun brtags dang gzhan dbang yang dag pa'i mtha' chos dbyings dang /__yang na pha rol na yod pa 'khor ba'i chos kyi yang dag pa'i mtha' de stong par bshad pa ste/__mkhas pa chen po'i dgongs pa ches zab pa'o/__/jo bo rjes/__de ltar rags pa'i rnal 'byor bstan nas da ni phra ba'i rnal 'byor bstan par bya ste/__'di phra ba yin te/__'di ltar chos thams cad rang gi sems nyid sgyu ma tsam du snang ba 'byung ste/__'di las sems sgyu ma tsam ni dus gsum las 'das pa/__kha dog dang dbyibs med par rang bzhin gyi 'od gsal ba/__snang ba med pas chos thams cad ni sems nyid sgyu ma tsam yin par shes par bya'o/__/zhes dang /__lang gshegs kyis/__sems tsam la ni brten nas su/__sogs kyis gsungs pa dang /__yang lang dkar gshegs pa'i lung gi mkhas pa chen po rnams kyi gshegs snying 'khor lo tha ma nas bshad pa drang don du bkral ba'ang bar pa gtsor 'don la dgongs nas gsungs pa yin gyi mtha' gcig tu ma nges te/__lung de'i don/__byis pa rnams bdag med pas 'jigs par 'gyur ba'i gnas rnams spangs ba'i phyir don de de bzhin gshegs pa'i snying po'i sgo nas bstan pas rnam par mi rtog pa'i gnas zla grags dang chos rje 'jam pa'i dbyangs sogs kyis lung drang don du bkral ba'ang gshegs snying mtshan ma can du bzung na lung 'dis bsal bas de la dgongs shing /__rang bzhin 'od gsal spros bral mtshan ma med par go na lung 'di'i don dang 'byor zhing dgongs pa gcig tu mthun no/__/mchan/__snang ba med pa'i spyod yul ston to/__/zhes byis blos rtogs par dka' bar bstan pa dang /__da lta dang /__ma 'ongs pa'i byang chub sems dpa' rnams kyis kyang bdag la mngon zhen mi bya zhes pas nyan rang byang 'phags rnams kyis zab mo'i gnas der bdag tu 'khrul nas rtogs dka' ba dang /__bdag tu smra ba drang ba'i phyir/__de bzhin gshegs pa'i snying po bstan pas/__de bzhin gshegs pa'i snying po ston te/__yang dag pa'i bdag tu rnam par rtog pa'i lta bar lhung ba'i bsam pa can dag rnam par thar pa'i sgo gsum gyi spyod yul la gnas pa'i bsam pa dang ldan cing /__myur du bla na med pa'i rdzogs pa'i byang chub tu ji ltar 'tshang rgya bar 'gyur/__sogs kyis yang dag pa'i bdag ces brtags pa'ang dbyings rnam thar gsum sgo gsum gyi rang bzhin dang mi phyed pas byang chub thob par gsungs shing /__len pa'i rnam par shes pa sogs kyi don kun gzhi'i mdzod khang 'di rtogs par dka' zhing /__zab cing phra bas byis pa rnams la ma bstan ces pa'i shugs kyis de bzhin gshegs pa'i snying po yod par bstan pa'o/__/'jam dpal gyi lta 'dod mdor bstan las/__/phung po rnam bcad stong pa nyid/__/chu shing bzhin du snying po med/__/rnam pa kun gyi mchog ldan pa'i/__/stong nyid de ltar 'gyur ma yin/__/ces sogs dbyings dang ye shes dbyer med pa'i gnas lugs 'di sgom pa nyams su myang bya'i lta ba ni 'di kho na yin no/__/de ltar yid ches lung dag la/__/blo ldan rnams kyis nges shes drongs/__/rig pa bzhi yis legs par dpyod/__/'od gsal ces pa dngos po dang /__/mtshan ma can du 'dzin pa spongs/__/gsal stong mi mthun 'gal zla gnyis/__/zung 'jug sgrub pa'i ngal ba dor/__/gnas snang gcig tu mi bsre bar/__/ma dag ma dag dag pa dang /__/shin tu rnam par dag pa yi/__/gnas skabs so sor shan 'byed bya/__/kun rdzob rang gi ngo bos stong /__/don dam gzhan gyi dngos pos stong /__/'khor 'das chos rnams stong rten 'byung /__/dbyer med dbu ma'i lam du gsungs/__/mya ngan 'das pa bden gcig pu/__/ji bzhin gzigs pa sangs 'phags kyi/__/ye shes gzigs pa mi bslu zhing /__/bde~Xn pa nyid du tshad mas gruba?~X/__/des na de nyid dbang btsan bya/__/'di don sa bcu'i sems dpas kyang /__/ji bzhin rtogs par ma gsungs na/__/so skyes rtogs pa lta ci zhig/__'dren pa rnams kyi chos kyi sku/__/sgro skur rtag chad las grol zhing /__/zab zhi spros bral 'od gsal ba/__/'dus ma byas pa'i don rtogs pa'i/__/thabs chen la ni 'bad pa gces/__/klu sgrub thogs med nges pa'i don/__/mthar thug dgongs pa gcig tu 'babs/__/de kun zung 'jug phra ba yi/__/nang gi dbu mar bshad pa de/__/zab mor bstan pa'i rgyud rnams dang /__/sems 'grel sogs su gsal bar bstan/__/lha gcig dI paM kA ra yi/__/chos dbyings lta ba'i glu dbyangs las/__/tshul gnyis shing rta la zhon nas/__/rig pa'i srab skyogs 'ju byed pa/__/de dag de phyir ji bzhin no/__/theg pa chen po pa nyid thob/__/ces dang /__pha rol rgol ba bzlog pa dang /__/bstan bcos chen po'i gzhung dang ni/__/rtsod pa chen po byung dus su/__/rags pa'i dbu ma'i gzhung smra bya/__/de nyid don la gtsor byed cing /__/rnal 'byor nyams su len dus su/__/phra ba'i rnal 'byor bsgom par bya/__/'di ni zhal gyi gdams pa yin/__/zhes rjes 'jug rnams la gdams pa dang /__/mchog gsang 'od gsal rdzogs pa che'i/__/shin tu gsal rgyas bstan pa dang /__/rnal 'byor dbang phyug biR+Wa pa/__/sa skya'i rje btsun mchog rnams kyang /__/zung 'jug dbu ma gsal bar bshad/__/mar mi dwags sogs 'di nyid bzhed/__/mkhas grub rnams kyi dgongs pa'i mthil/__/'di ni bshad pa tsam gyis min/__/nang gi rnal 'byor bsgom pa las/__/dkar po'i tshes zla 'phel ba bzhin/__/rim gyis chos sku'i rgyal sa thob/__/rnam grol yon tan rab brnyes nas/__/'gro don phrin las lhun grub 'byung /__/thams cad stong pa 'od gsal ba/__/mtshan mtshon brjod pa las 'das pa'i/__/zung 'jug gnyug ma'i ye shes de/__/'gro ba kun gyis rtogs par shog/__'di sbyar dge bas bdag gzhan rnams/__/bde gshegs snying po'i khyab mthong nas/__/lam la 'bad pa don yod cing /__/dag pa gnyis ldan sku thob shog/_/ces pa'ang ma sbyangs mu cor smra ba chos dbyings bde gshegs snying po la mos pas spyod pa blo gros rgya mtshos myur bar bris pa dge/__//__

Footnotes

Other Information