JKCL-KABUM-08-NYA-011-044

Previous Text Back to Volume PageNext Text

རང་ཅག་དཔོན་སློབ་དབང་ཆོས་ཀྱི་འབྲེལ་བ་རྒྱ་ཆེ་བས་ལོག་ལྟ་དང་སོགས།

Wylie title	rang cag dpon slob dbang chos kyi 'brel ba rgya che bas log lta dang sogs
Location	chos kyi blo gros bka' 'bum Volume 8, sde tshan 11, Text 44, Pages 401-404 (Folios 59a3 to 60a3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. rang cag dpon slob dbang chos kyi 'brel ba rgya che bas log lta dang sogs. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 401-404. Bir, H.P.: Khyentse Labrang, 2012.
Genre	Advice - zhal gdams

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༈ རང་ཅག་དཔོན་སློབ་དབང་ཆོས་ཀྱི་འབྲེལ་བརྒྱ་ཆེ་བས་ལོག་ལྟ་དང་བརྙས་སེམས་བགྱིས་ན་འདི་ཕྱི་ཀུན་དུ་ཉེས་དམིགས་ཆེ་ཞིང་རྣམ་སྨིན་རྩུབ་མོ་མྱོང་བར་འགྱུར་ཏེ་ལག་ན་རྡོ་རྗེ་དབང་བསྐུར་བའི་རྒྱུད་ལས། བཅོམ་ལྡན་འདས་གང་དག་སློབ་དཔོན་ལ་བརྙས་པར་བགྱིད་པ་དེ་དག་གི་རྣམ་པར་སྨིན་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ལྷ་དང་བཅས་པའི་འཇིག་རྟེན་སྐྲག་པར་འགྱུར་གྱིས་དེ་སྐད་མ་སྨྲ་ཞིག། གསང་བའི་བདག་པོ། འོ་ན་ཅུང་ཞིག་བརྗོད་པར་བྱའོ། །དཔའ་བོ་བསྒྲིམ་ཏེ་ཉོན་ཅིག། མཚམས་མེད་ལ་སོགས་མི་བཟད་པ། །དམྱལ་བ་གང་དག་ངས་བཤད་པ། །དེ་རྣམས་ཀྱི་ནི་གནས་སུ་བརྗོད། །དེར་ནི་བསྐལ་པ་མཐའ་ཡས་སོ། །དེ་ལྟ་བས་ན་རྣམ་ཀུན་ཏུ། །དེ་ལ་ནམ་ཡང་བརྙས་མི་བྱ། །ཞེས་དང་། བླ་མ་ལྔ་བཅུ་པ་ལས་ཀྱང་། །སློབ་དཔོན་ལ་ནི་སྨོད་པ་དེ། །ཡམས་དང་མཛེ་དང་ནད་རྣམས་དང་། །གདོན་དང་རིམས་དང་དུག་རྣམས་ཀྱིས། །རྨོངས་ཆེན་དེ་ནི་འཆི་བར་འགྱུར། །རྒྱལ་པོ་མེ་དང་སྤྲུལ་གདུག་དང་། །ཆུ་དང་མཁའ་འགྲོ་རྐུན་པོ་དང་། །གདོན་དང་ལོག་འདྲེན་རྣམས་ཀྱིས་ཀྱང་། །བསད་ནས་སེམས་ཅན་དམྱལ་བར་འགྲོ། །ནམ་ཡང་སློབ་དཔོན་དག་གི་ནི། །ཀུན་ཏུ་སེམས་དཀྲུག་མི་བྱ་སྟེ། །གལ་ཏེ་རྨོངས་པས་བྱས་གྱུར་ན། །དམྱལ་བར་ངེས་པར་འཆོམ་པར་འགྱུར། །མནར་མེད་ལ་སོགས་འཇིགས་རུང་བའི། །དམྱལ་བ་བསྟན་པ་གང་ཡིན་པ། །སློབ་དཔོན་ལ་ནི་སྨོད་པ་རྣམས། །དེར་ནི་གནས་པར་ཡང་དག་བཤད། །ཅེས་དང་། སངས་རྒྱས་ཡེ་ཤེས་ཞབས་ཀྱིས་འཇམ་དཔལ་ཞལ་ལུང་ལས། །མ་འོངས་རྡོ་རྗེ་འཆང་བ་སྟེ། །དེ་ལ་བརྙས་བྱེད་སེམས་ཅན་གང་། །དེ་ཡིས་ང་ལ་བརྙས་བྱེད་པས། །ངས་ནི་དེ་ཀུན་དུས་སུ་སྤོང་། །ཞེས་དང་། སྤྱོད་འཇུག་ལས། །གང་ཞིག་དེ་འདྲའི་རྒྱལ་སྲས་སྦྱིན་བདག་ལ། །གལ་ཏེ་ངན་སེམས་སྐྱེད་པར་བྱེད་པ་དེ། །ངན་སེམས་བསྐྱེད་བའི་གྲངས་བཞིན་བསྐལ་པར་ནི། །དམྱལ་བར་གནས་པར་འགྱུར་ཞེས་ཐུབ་པས་གསུངས། ཞེས་སོགས་མདོ་རྒྱུད་ཀུན་ནས་ཉེས་དམིགས་རྒྱ་ཆེར་གསུང་བ་ལ་བདག་ལེགས་སུ་འདོད་པ་རྣམས་ཀྱི་སྤང་བླང་ཚུལ་བཞིན་ཏུ་མཛད་པར་རིགས་སོ། །གཞན་ཕན་ལྷག་བསམ་གངས་རི་ལྟར་དཀར་བས། །རིང་འཚོའི་ཐབས་ལ་འབད་འདིར་དོན་ལྡན་ན། །བླ་མ་མཆོག་གསུམ་རྒྱལ་བ་སྲས་བཅས་ཀྱི། །དགེ་ལེགས་ཤིས་པའི་མེ་ཏོག་དེང་འདིར་སྩོལ། །བླ་སློབ་མི་འབྲལ་དམ་ཚིག་སེལ་མེད་ཅིང་། །བྱང་ཆུབ་སྙིང་པོའི་བར་དུ་འགྲོགས་གྱུར་ཏེ། །འོག་མིན་སྟུག་པོ་བཀོད་པའི་ཞིང་ཁམས་སུ། །སྟོན་འཁོར་དགོངས་པ་དབྱེར་མེད་འགྱུར་བར་ཤོག། །།

[edit]

!_rang cag dpon slob dbang chos kyi 'brel brgya che bas log lta dang brnyas sems bgyis na 'di phyi kun du nyes dmigs che zhing rnam smin rtsub mo myong bar 'gyur te lag na rdo rje dbang bskur ba'i rgyud las/__bcom ldan 'das gang dag slob dpon la brnyas par bgyid pa de dag gi rnam par smin pa ji lta bu lags/__bcom ldan 'das kyis bka' stsal pa/__lag na rdo rje lha dang bcas pa'i 'jig rten skrag par 'gyur gyis de skad ma smra zhig/__gsang ba'i bdag po/__'o na cung zhig brjod par bya'o/__/dpa' bo bsgrim te nyon cig/__mtshams med la sogs mi bzad pa/__/dmyal ba gang dag ngas bshad pa/__/de rnams kyi ni gnas su brjod/__/der ni bskal pa mtha' yas so/__/de lta bas na rnam kun tu/__/de la nam yang brnyas mi bya/__/zhes dang /__bla ma lnga bcu pa las kyang /__/slob dpon la ni smod pa de/__/yams dang mdze dang nad rnams dang /__/gdon dang rims dang dug rnams kyis/__/rmongs chen de ni 'chi bar 'gyur/__/rgyal po me dang sprul gdug dang /__/chu dang mkha' 'gro rkun po dang /__/gdon dang log 'dren rnams kyis kyang /__/bsad nas sems can dmyal bar 'gro/__/nam yang slob dpon dag gi ni/__/kun tu sems dkrug mi bya ste/__/gal te rmongs pas byas gyur na/__/dmyal bar nges par 'chom par 'gyur/__/mnar med la sogs 'jigs rung ba'i/__/dmyal ba bstan pa gang yin pa/__/slob dpon la ni smod pa rnams/__/der ni gnas par yang dag bshad/__/ces dang /__sangs rgyas ye shes zhabs kyis 'jam dpal zhal lung las/__/ma 'ongs rdo rje 'chang ba ste/__/de la brnyas byed sems can gang /__/de yis nga la brnyas byed pas/__/ngas ni de kun dus su spong /__/zhes dang /__spyod 'jug las/__/gang zhig de 'dra'i rgyal sras sbyin bdag la/__/gal te ngan sems skyed par byed pa de/__/ngan sems bskyed ba'i grangs bzhin bskal par ni/__/dmyal bar gnas par 'gyur zhes thub pas gsungs/__zhes sogs mdo rgyud kun nas nyes dmigs rgya cher gsung ba la bdag legs su 'dod pa rnams kyi spang blang tshul bzhin tu mdzad par rigs so/__/gzhan phan lhag bsam gangs ri ltar dkar bas/__/ring 'tsho'i thabs la 'bad 'dir don ldan na/__/bla ma mchog gsum rgyal ba sras bcas kyi/__/dge legs shis pa'i me tog deng 'dir stsol/__/bla slob mi 'bral dam tshig sel med cing /__/byang chub snying po'i bar du 'grogs gyur te/__/'og min stug po bkod pa'i zhing khams su/__/ston 'khor dgongs pa dbyer med 'gyur bar shog/__//