JKCL-KABUM-08-NYA-011-032

Previous Text Back to Volume PageNext Text

ཞལ་གདམས་བདུད་རྩིའི་བསིལ་ཟེར།

Wylie title	zhal gdams bdud rtsi'i bsil zer
Location	chos kyi blo gros bka' 'bum Volume 8, sde tshan 11, Text 32, Pages 367-370 (Folios 42a2 to 43b2)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. zhal gdams bdud rtsi'i bsil zer. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 367-370. Bir, H.P.: Khyentse Labrang, 2012.
Genre	Advice - zhal gdams
Colophon	།ཚིག་དེ་སྐད་ཆོས་ཀྱི་བློ་གྲོས་ལ། །རིགས་ལྡན་གྱི་བུ་མོས་བསྐུར་བའི་ངོར། །གང་ཤར་གྱི་གདམས་པ་བྲིས་པ་འདིས། །རྒྱུད་ཡོངས་སུ་གྲོལ་བའི་རྒྱུར་གྱུར་ཅིག། སརྦ་དཱ་མངྒ་ལཾ།།
	/tshig de skad chos kyi blo gros la/__/rigs ldan gyi bu mos bskur ba'i ngor/__/gang shar gyi gdams pa bris pa 'dis/__/rgyud yongs su grol ba'i rgyur gyur cig/__sarba dA mang+ga laM//

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༈ ཞལ་གདམས་བདུད་རྩིའི་བསིལ་ཟེར་ཅེས་བྱ་བ་བཞུགས། རྗེ་བླ་མ་རྣམས་ལ་ཕྱག་འཚལ་ལོ། །ཕ་བཀའ་དྲིན་ཅན་གྱི་ཐུགས་རྗེས་ཟུང་། །རྟེན་དལ་འབྱོར་མི་ལུས་རིན་ཆེན་འདི། །དུས་ལན་གཅིག་ཐོབ་པ་ད་རེས་ཙམ། །དོན་མེད་དུ་ཆུད་ཟོས་མི་བྱེད་པར། །དོན་ཆེན་གྱི་སྙིང་པོ་ལོངས་ཤིག་ཨང་། །ཚེ་འདི་ལ་ཇི་ལྟར་འབྱོར་གྱུར་ཀྱང་། །ཏིལ་འབྲུ་ཙམ་ཁྱེར་བའི་དབང་ནི་མེད། །ཚེ་ཕྱི་མའི་སྐྱེས་ཆེན་འདེགས་པའི་ཚེ། །ཕན་བྱེད་ཀྱི་བརྒྱག་དགེ་དམ་ཆོས་ལགས། །ཚེ་སྲོག་འདི་མི་རྟག་ཆུ་བུར་འདྲ། །དུས་སྐད་ཅིག་ཡུད་ཙམ་འགྱུར་ཞིང་འགྲོ། །དགྲ་འཆི་བདག་གཤིན་རྗེ་རྔམ་བརྗིད་ཆེ། །དུས་རིང་པོར་སྡོད་པའི་རང་དབང་མེད། །ཁམས་གསུམ་གྱི་སེམས་ཅན་ཞགས་པས་འདེབས། །མ་ཤི་བར་ཚེ་ཐར་ལུས་པ་མེད། །ཤི་ནས་ཀྱང་མེད་པར་མི་འགྲོ་ཞིང་། །ལས་དགེ་སྡིག་ཅི་བྱས་ཆུད་མི་ཟ། །རང་བྱས་ཀྱི་ལས་ཀྱི་རྣམ་སྨིན་མྱོང་། །ངན་སོང་གི་སྡུག་བསྔལ་བཟོད་བླག་མེད། །མཐོ་རིས་ཀྱི་བདེ་བ་འགྱུར་ནས་ནི། །དུས་ནམ་ཞིག་སྡུག་བསྔལ་ཁོ་ན་མྱོང་། །དེ་བས་ན་དམ་པའི་ལྷ་ཆོས་སྒྲུབས། །སྐྱབས་བསླུ་མེད་བླ་མ་དཀོན་མཆོག་ལ། །དད་མོས་ཀྱི་ཡིད་ཆེས་བློ་གཏད་ཞུ། །ཐེག་ཆེན་གྱི་རྩ་བ་སེམས་བསྐྱེད་ཡིན། །རང་ལེགས་འདོད་འཁྲི་བ་རྒྱང་དུ་བསྐྱུར། །བདག་གཅེས་འཛིན་འགོང་པོ་གཞོམ་པར་གྱིས། །གཞན་ཀུན་ལ་ཕན་པའི་བསམ་པ་བསྐྱེད། །དེ་བདག་གཞན་ཕྱོགས་རིས་མེད་པར་བྱ། །སེམས་བསྐྱེད་ཀྱི་རྩ་བ་སྙིང་རྗེ་བསྒོམ། །སྙིང་རྗེ་དེ་འཁྲུངས་ན་བྱང་སེམས་སྐྱེ། །ལུས་ངག་ཡིད་གསུམ་དགེ་ལ་གཞོལ། །དགེ་བ་དེ་སེམས་ཅན་ཡོངས་ལ་བསྔོ། །མ་ནམ་མཁའ་མཐའ་མཉམ་འགྲོ་བ་ལ། །དཔལ་ཀུན་ཏུ་བཟང་པོའི་སྨོན་ལམ་ཐོབ། །རང་རྒྱུད་ལ་ཚེ་རབས་ཐོག་མེད་ནས། །སྒོ་གསུམ་གྱི་བསགས་པའི་སྡིག་སྒྲིབ་དང་། །སྡོམ་གསུམ་གྱི་དམ་ཚིག་ཉམས་ཆགས་ལ། །སྟོབས་བཞི་ཡི་ཆོ་གས་བཤགས་པར་བྱ། །བསོད་ནམས་ཀྱི་ཚོགས་ཆེན་བསགས་པ་དང་། །ཡེ་ཤེས་ཀྱི་ཚོགས་ལ་བློ་བཞག་གཅེས། །སེམས་ཆོས་ཉིད་གཉུག་མའི་ཡེ་ཤེས་དེ། །མངོན་སུམ་དུ་རྟོགས་པར་བྱ་བའི་ཕྱིར། །ཕ་དྲིན་ཅན་བླ་མ་སྤྱི་བོ་དང་། །སྙིང་པདྨའི་ཟེའུ་འབྲུར་བསྒོམ་བྱས་ནས། །གསོལ་འདེབས་དང་དབང་བླང་ཡང་ཡང་བྱ། །བསྐྱེད་རྫོགས་ཀྱི་མདོ་འགགས་དེ་རུ་ཚངས། །དད་དམ་ཚིག་ངོས་ལྐོག་མེད་པར་སྲུངས། །སེམས་འཁྲུལ་པའི་རྟོགས་ཚོགས་རྩད་བཅད་ལ། །འཁྲུལ་པ་རྣམས་གཞི་མེད་རྩ་བྲལ་བཏང་། །སེམས་ཆོས་ཉིད་རིག་སྟོང་ཆོས་ཀྱི་སྐུ། །རང་བཞིན་གྱི་གསལ་དྭངས་ལོངས་སྤྱོད་རྫོགས། །རིག་རྩལ་ནི་འགགས་མེད་སྤྲུལ་སྐུར་ཤར། །སྐུ་གསུམ་པོའི་ཡེ་ཤེས་གཅིག་ཏུ་རྫོགས། །གཞི་ལྷུན་གྲུབ་འོད་གསལ་འདུས་མ་བྱས། །ལམ་རང་བྱུང་རིག་པ་མ་བཅོས་བཞག། ཀ་དག་གི་རིག་པ་ཞེས་བྱ་དེ། །ད་ལྟར་གྱི་ཤེས་རིག་མ་བཅོས་པ། །གཟུང་འཛིན་གྱི་རྟོག་པས་མ་བསླད་པའི། །གསལ་དྭངས་རྗེན་པར་ལྷག་གེར་འཇོག། ཡེངས་མེད་ཀྱི་ངང་དུ་འཛིན་རྩལ་བྲལ། །རང་བཞག་འདི་བསྒོམ་གྱི་དངོས་གཞི་ལགས། །དེའི་ངང་ནས་འཁོར་དང་མྱང་འདས་ཀྱི། །ཚོགས་དྲུག་གི་སྣང་བ་གང་ཤར་ཡང་། །བཅོས་བསྒྱུར་དང་བྲལ་བར་ཐད་ཀར་འཇོག། དེས་མ་འཆིངས་མ་ཞེན་རང་གྲོལ་སྤྱོད། །གཞི་རིག་སྟོང་འོད་གསལ་གོམས་པ་ལས། །ཐོབ་བྱའི་འབྲས་བུ་གཞན་བཙལ་མེད། །ཡེ་ཤེས་ལྷུན་རྫོགས་སྒྲིབ་བྱེད་ཀྱི། །དྲི་མ་དང་བྲལ་བ་འབྲས་བུ་ཡིན། །དུས་རྒྱུན་དུ་སེམས་བསྐྱེད་བཟང་པོ་དང་། །དྲན་ཤེས་དང་བག་ཡོད་བརྟེན་པར་མཛོད། །ཁྱེད་བུད་མེད་བློ་འདི་རྩབ་རྩུབ་མང་། །བློ་སྣ་མ་མང་ཆོས་ལ་འབུངས། །འཁོར་བ་ལ་ཞེན་པ་རྒྱབ་ཏུ་བསྐྱུར། །གནས་རི་ཁྲོད་འགྲིམས་ལ་བསགས་སྦྱང་དང་། །བསྙེན་སྒྲུབ་དང་བླ་མའི་རྣམ་འབྱོར་ལ། །དུས་རྟག་ཏུ་བརྩོན་པ་བྱས་གྱུར་ན། །ཚེ་འདི་འཕོས་དཔལ་རི་པདྨ་འོད། །ལྷན་གཅིག་ཏུ་འཚོགས་པའི་རྟེན་འབྱུང་དང་། །སྨོན་ལམ་བཟང་པོའི་མཚམས་སྦྱར་ཡོད། །ཚིག་དེ་སྐད་ཆོས་ཀྱི་བློ་གྲོས་ལ། །རིགས་ལྡན་གྱི་བུ་མོས་བསྐུར་བའི་ངོར། །གང་ཤར་གྱི་གདམས་པ་བྲིས་པ་འདིས། །རྒྱུད་ཡོངས་སུ་གྲོལ་བའི་རྒྱུར་གྱུར་ཅིག། སརྦ་དཱ་མངྒ་ལཾ།། །།

[edit]

!_zhal gdams bdud rtsi'i bsil zer ces bya ba bzhugs/__rje bla ma rnams la phyag 'tshal lo/__/pha bka' drin can gyi thugs rjes zung /__/rten dal 'byor mi lus rin chen 'di/__/dus lan gcig thob pa da res tsam/__/don med du chud zos mi byed par/__/don chen gyi snying po longs shig ang /__/tshe 'di la ji ltar 'byor gyur kyang /__/til 'bru tsam khyer ba'i dbang ni med/__/tshe phyi ma'i skyes chen 'degs pa'i tshe/__/phan byed kyi brgyag dge dam chos lags/__/tshe srog 'di mi rtag chu bur 'dra/__/dus skad cig yud tsam 'gyur zhing 'gro/__/dgra 'chi bdag gshin rje rngam brjid che/__/dus ring por sdod pa'i rang dbang med/__/khams gsum gyi sems can zhags pas 'debs/__/ma shi bar tshe thar lus pa med/__/shi nas kyang med par mi 'gro zhing /__/las dge sdig ci byas chud mi za/__/rang byas kyi las kyi rnam smin myong /__/ngan song gi sdug bsngal bzod blag med/__/mtho ris kyi bde ba 'gyur nas ni/__/dus nam zhig sdug bsngal kho na myong /__/de bas na dam pa'i lha chos sgrubs/__/skyabs bslu med bla ma dkon mchog la/__/dad mos kyi yid ches blo gtad zhu/__/theg chen gyi rtsa ba sems bskyed yin/__/rang legs 'dod 'khri ba rgyang du bskyur/__/bdag gces 'dzin 'gong po gzhom par gyis/__/gzhan kun la phan pa'i bsam pa bskyed/__/de bdag gzhan phyogs ris med par bya/__/sems bskyed kyi rtsa ba snying rje bsgom/__/snying rje de 'khrungs na byang sems skye/__/lus ngag yid gsum dge la gzhol/__/dge ba de sems can yongs la bsngo/__/ma nam mkha' mtha' mnyam 'gro ba la/__/dpal kun tu bzang po'i smon lam thob/__/rang rgyud la tshe rabs thog med nas/__/sgo gsum gyi bsags pa'i sdig sgrib dang /__/sdom gsum gyi dam tshig nyams chags la/__/stobs bzhi yi cho gas bshags par bya/__/bsod nams kyi tshogs chen bsags pa dang /__/ye shes kyi tshogs la blo bzhag gces/__/sems chos nyid gnyug ma'i ye shes de/__/mngon sum du rtogs par bya ba'i phyir/__/pha drin can bla ma spyi bo dang /__/snying pad+ma'i ze'u 'brur bsgom byas nas/__/gsol 'debs dang dbang blang yang yang bya/__/bskyed rdzogs kyi mdo 'gags de ru tshangs/__/dad dam tshig ngos lkog med par srungs/__/sems 'khrul pa'i rtogs tshogs rtsad bcad la/__/'khrul pa rnams gzhi med rtsa bral btang /__/sems chos nyid rig stong chos kyi sku/__/rang bzhin gyi gsal dwangs longs spyod rdzogs/__/rig rtsal ni 'gags med sprul skur shar/__/sku gsum po'i ye shes gcig tu rdzogs/__/gzhi lhun grub 'od gsal 'dus ma byas/__/lam rang byung rig pa ma bcos bzhag/__ka dag gi rig pa zhes bya de/__/da ltar gyi shes rig ma bcos pa/__/gzung 'dzin gyi rtog pas ma bslad pa'i/__/gsal dwangs rjen par lhag ger 'jog/__yengs med kyi ngang du 'dzin rtsal bral/__/rang bzhag 'di bsgom gyi dngos gzhi lags/__/de'i ngang nas 'khor dang myang 'das kyi/__/tshogs drug gi snang ba gang shar yang /__/bcos bsgyur dang bral bar thad kar 'jog/__des ma 'chings ma zhen rang grol spyod/__/gzhi rig stong 'od gsal goms pa las/__/thob bya'i 'bras bu gzhan btsal med/__/ye shes lhun rdzogs sgrib byed kyi/__/dri ma dang bral ba 'bras bu yin/__/dus rgyun du sems bskyed bzang po dang /__/dran shes dang bag yod brten par mdzod/__/khyed bud med blo 'di rtsab rtsub mang /__/blo sna ma mang chos la 'bungs/__/'khor ba la zhen pa rgyab tu bskyur/__/gnas ri khrod 'grims la bsags sbyang dang /__/bsnyen sgrub dang bla ma'i rnam 'byor la/__/dus rtag tu brtson pa byas gyur na/__/tshe 'di 'phos dpal ri pad+ma 'od/__/lhan gcig tu 'tshogs pa'i rten 'byung dang /__/smon lam bzang po'i mtshams sbyar yod/__/tshig de skad chos kyi blo gros la/__/rigs ldan gyi bu mos bskur ba'i ngor/__/gang shar gyi gdams pa bris pa 'dis/__/rgyud yongs su grol ba'i rgyur gyur cig/__sarba dA mang+ga laM//___//