ཞལ་གདམས་བསླབ་བྱ་གནད་ཀྱི་ཕྲེང་བ།

🚧 This website is under continued development. We appreciate your patience!

Previous Text Back to Volume PageNext Text

Wylie title	zhal gdams bslab bya gnad kyi phreng ba
Location	chos kyi blo gros bka' 'bum Volume 8, sde tshan 11, Text 21, Pages 341-345 (Folios 29a4 to 31a2)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. zhal gdams bslab bya gnad kyi phreng ba. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 341-345. Bir, H.P.: Khyentse Labrang, 2012.
Genre	Advice - zhal gdams
Colophon	ཆོས་ཀྱི་བློ་གྲོས་པས་སོ།།
	chos kyi blo gros pas so//

1 Texts in this Section (sde tshan or chos tshan)

21 341-345	ཞལ་གདམས་བསླབ་བྱ་གནད་ཀྱི་ཕྲེང་བ། zhal gdams bslab bya gnad kyi phreng ba Advice - zhal gdams	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༈ ཞལ་གདམས་བསླབ་བྱ་གནད་ཀྱི་ཕྲེང་བ་ཞེས་བྱ་བ། དུས་གསུམ་རྒྱལ་བ་ཐམས་ཅད་འདུས་པའི་དངོས། །དཔལ་ལྡན་བླ་མའི་ཞབས་ལ་ཕྱག་འཚལ་ནས། །རིང་དུ་འདྲིས་པའི་སྨོན་བཤེས་མཆོག་ཉིད་ལ། །བརྩེ་བའི་བསླབ་བྱ་གནད་ཀྱི་ཕྲེང་བ་དབྱེ། །དལ་དང་འབྱོར་པ་ཨུ་དུམ་ཝཱ་ར་འདི། །ཡང་ཡང་རྙེད་དཀའ་ཡིད་བཞིན་ནོར་ལས་ལྷག། འདི་འདྲ་ཐོབ་པ་ད་རེས་ཙམ་ཡིན་པས། །སྙིང་པོ་བླང་བའི་ཐབས་ལ་འབད་པར་འཚལ། །ཁས་བླང་ཚུལ་ཁྲིམས་སྡོམ་པ་ཕུན་ཚོགས་འདི། །གཡོན་ཅན་སྒེག་མོས་བསླུ་ཁྲིད་མ་ཤོར་བ། །དྲན་ཤེས་བག་ཡོད་བརྟན་པོས་རབ་སྡོམ་སྟེ། །ངུར་སྨྲིག་རྒྱལ་མཚན་མཆོག་ཏུ་བརྟན་པར་མཛོད། །སྲིད་ལས་ངེས་པར་འབྱུང་བའི་བློ་བསྐྱེད་ལ། །མི་རྟག་འཆི་བ་རྗེས་སུ་དྲན་པ་དང་། །འཁོར་བའི་ཉེས་དམིགས་ཡང་ཡང་དྲན་གྱིས་ལ། །ཚེ་འདིའི་ཞེན་པ་གཏིང་ནས་ལོག་པར་མཛོད། །དཀར་ནག་ལས་འབྲས་ནམ་ཡང་མི་བསླུ་བས། །དགེ་སྡིག་འདོར་ལེན་དྲན་པས་ཟིན་བྱོས་ལ། །འཆོལ་བར་མི་སྤྱོད་ཕྲ་ཞིབ་བརྩོན་པ་དང་། །རྟག་ཏུ་སེམས་ལ་ཡང་ཡང་བརྟག་པ་གཅེས། །སངས་རྒྱས་བསྟན་པའི་སྙིང་པོ་འདི་ཡིན་ཅིང་། །དམ་ཆོས་སྒྲུབ་པའི་གནད་འགགས་འདི་ལ་ཐུག། འདི་བྲལ་ལྟ་སྒོམ་མཐོན་པོར་རློམ་བྱས་ཀྱང་། །ངན་འགྲོའི་རྒྱུ་ལས་ཅུང་ཟད་ཡོད་རེ་ཀན། །བླ་མ་མཆོག་གསུམ་སྐྱབས་ཀྱི་མཆོག་ཏུ་བཟུང་། །རང་འདོད་མེད་པའི་བྱང་ཆུབ་སེམས་གཉིས་བསྐྱེད། །ཚོགས་བསགས་སྒྲིབ་སྦྱོང་ཐབས་ལ་བརྩོན་པ་དང་། །བྱིན་རླབས་བླ་མའི་རྣལ་འབྱོར་བསྒོམ་པ་གཅེས། །བསགས་སྦྱངས་མ་བྱས་གནས་ལུགས་དོན་རྟོགས་དཀའ། །སྒྲིབ་པ་བྱང་ན་རང་གནས་ཡེ་ཤེས་གསལ། །མོས་གུས་ཡོད་ན་བླ་མའི་བྱིན་རླབས་འཇུག། དེ་དང་བྲལ་ན་ཡེ་ཤེས་རྟོགས་དུས་མེད། །དེ་ཡང་ཁ་ཙམ་གསོལ་བཏབ་ཕན་པ་མེད། །སྙིང་ཁོངས་རུས་པའི་གཏིང་ནས་གསོལ་བ་ཐོབ། །རེས་འགའ་མ་ཡིན་རྟག་ཏུ་མོས་གུས་བསྒོམ། །བླ་མའི་སྐྱོན་ལ་མི་རྟོག་ཡོན་ཏན་སེམས། །བཀའ་དྲིན་རྗེས་དྲན་དམ་པ་གོང་མ་ཡི། །རྣམ་ཐར་རྣམས་ལ་ལེགས་པར་བསམ་བྱས་ན། །དད་དང་དག་སྣང་གོང་ནས་གོང་དུ་འཕེལ། །ཀུན་ལ་དག་སྣང་སྦྱོང་བ་གལ་ཆེའོ། །རང་སྐྱོན་མི་རིག་གཞན་སྐྱོན་མཐོང་བ་འདི། །དམ་ཆོས་སྒྲུབ་ལ་གེགས་དང་བར་ཆད་ཆེ། །གཞན་ལ་རྩུབ་མོའི་ངག་གིས་སྨྲ་བ་ཡང་། །རང་གཞན་གཉིས་ཀ་ཞེ་སྡང་མེ་ཡིས་བསྲེགས། །དེས་ན་ཞི་ཞིང་འཇམ་པའི་ངག་གིས་སྨྲ། །སུ་དང་འགྲོགས་ཀྱང་མི་བདེ་མེད་པ་དང་། །སྤྱོད་ལམ་བསྟུན་ན་ཀུན་གྱི་ཡིད་དུ་འོང་། །གྱོང་པོ་སུ་དང་མི་མཐུན་རྭ་རྒོག་འདྲ། །སྒོ་གསུམ་སྤྱོད་ལམ་ཞི་ཞིང་དུལ་བ་དང་། །སྨྲ་བ་མ་མང་རན་ཚོད་ཙམ་དུ་གྱིས། །གྲུབ་མཐའ་ཀུན་ལ་རིས་སུ་མ་བཅད་པར། །ཕྱོགས་མེད་དག་པའི་སྣང་བ་བསྐྱེད་པར་མཛོད། །ཡང་དག་བརྒྱུད་ལྡན་དམ་ཆོས་ཅི་ཐོབ་བྱ། །རྟོག་གེ་ངན་པའི་གཞུང་ལ་བལྟ་བ་དང་། །རང་གཞན་རྩོད་ཡིག་སོགས་ལ་བལྟ་བ་ནི། །སེམས་ལ་མི་ཕན་གཡེང་བའི་རྒྱུ་ཡིན་སྤོངས། །མདོ་སྔགས་ཟབ་དོན་སྙིང་པོའི་གདམས་པ་རྣམས། །མཇལ་ནས་རང་གི་རྒྱུད་ལ་འབྱོར་བར་གྱིས། །བླ་མ་ཡི་དམ་བསྐྱེད་རྫོགས་ནན་དུ་བསྒོམ། །བར་རླུང་དེ་ཉིད་རྒྱུན་དུ་འཛིན་པ་གནད། །འབྲུ་གསུམ་རྡོར་བཟླས་གཏུམ་མོ་འབར་འཛག་རྣམས། །ཅུང་ཟད་བསྒོམ་ན་དམ་ཚིག་མི་ཉམས་ཕན། །རྒྱུན་དུ་བསམ་པ་བཟང་པོ་ཁོ་ན་དང་། །ཡེངས་མེད་དྲན་པས་རིག་པའི་རང་ངོ་བསྐྱངས། །དེ་ལ་ཡིད་དཔྱོད་འཛིན་པ་མ་ཞུགས་དང་། །རང་ཤར་རང་གྲོལ་ནམ་མཁའི་ངང་དུ་བཞག། བློ་ཡི་ཆོས་ཀྱི་བསླད་པ་མ་ཞུགས་དང་། རྟོག་ཚོགས་ཐམས་ཅད་ཆོས་ཀྱི་དབྱིངས་སུ་ཐོངས། །ཉམས་ནི་འཇམ་རྩུབ་ཇི་ལྟར་ཤར་ན་ཡང་། །ཞེན་པ་མ་བྱེད་བྱུང་རྒྱལ་བཏང་བྱས་ན། །ཞེན་པས་མི་འཆིང་རེ་དོག་བྲལ་བར་འགྱུར། །ཁྲེགས་ཆོད་བོགས་འདོན་ནམ་མཁའ་སུམ་ཕྲུག་གི །གདམས་པ་དེ་ལ་རྒྱུན་དུ་བརྩོན་པར་གྱིས། །རྗེས་ཐོབ་འཁྲུལ་པ་རྒྱ་འབྱམས་ཤོར་གྱུར་ན། །བོགས་བསྐྱེད་མེད་ཅིང་འཁྲུལ་པ་ལུ་གུ་བརྒྱུད། །འཕྱན་ཅིང་ལས་གསོགས་འཁོར་བར་འཁྱམས་པས་ན། །རྗེས་ཤེས་ལྟ་བའི་ངང་ནས་མ་ཡེངས་གཅེས། །སེམས་ཅན་རྣམས་ལ་བྱམས་དང་སྙིང་རྗེ་བསྒོམ། །བདེ་སྡུག་གཏོང་ལེན་བློ་སྦྱོང་བག་རེ་བསམ། །དམིགས་མེད་རིག་སྟོང་ངང་བཞག་མ་བྲལ་ན། །རྩལ་གདངས་སྙིང་རྗེ་ཆེན་པོ་འགགས་མེད་འཆར། །སྒོ་གསུམ་ཅི་སྤྱོད་སེམས་ཅན་དོན་དུ་བསྔོ། །བཟང་པོ་སྤྱོད་པའི་སྨོན་ལམ་ཡང་ཡང་གདབ། །མདོ་སྔགས་བཤགས་པ་དག་ལ་རྒྱུན་དུ་འབད། །དེས་ནི་བྱ་བ་ཐམས་ཅད་དོན་ཡོད་འགྱུར། །དེ་ལྟར་གདམས་པ་གནད་ཀྱི་ཕྲེང་བ་འདི། །རང་གིས་ཚུལ་བཞིན་སྤྱད་པ་མེད་ན་ཡང་། །དམ་པའི་གསུང་གི་རྗེས་སུ་འབྲང་ནས་བྲིས། །གྲོགས་ཁྱོད་སེམས་ཀྱི་གསོས་སུ་འདི་གྱུར་ཅིག། དེ་སྐད་བློ་གྲོས་མཆོག་ལྡན་རང་ཡུལ་དུ། །བསྐྱོད་ཁར་ནན་དུ་བསྐུལ་བས་རྐྱེན་བྱས་ཏེ། །བན་ཧྲུལ་མི་རྒན་ལག་པ་འདར་བཞིན་དུ། །བྲིས་པའི་དགེ་བས་བྱང་ཆུབ་མཆོག་ཐོབ་ཤོག །ཆོས་ཀྱི་བློ་གྲོས་པས་སོ།། །།

[edit]

!_zhal gdams bslab bya gnad kyi phreng ba zhes bya ba/__dus gsum rgyal ba thams cad 'dus pa'i dngos/__/dpal ldan bla ma'i zhabs la phyag 'tshal nas/__/ring du 'dris pa'i smon bshes mchog nyid la/__/brtse ba'i bslab bya gnad kyi phreng ba dbye/__/dal dang 'byor pa u dum wA ra 'di/__/yang yang rnyed dka' yid bzhin nor las lhag/__'di 'dra thob pa da res tsam yin pas/__/snying po blang ba'i thabs la 'bad par 'tshal/__/khas blang tshul khrims sdom pa phun tshogs 'di/__/g.yon can sgeg mos bslu khrid ma shor ba/__/dran shes bag yod brtan pos rab sdom ste/__/ngur smrig rgyal mtshan mchog tu brtan par mdzod/__/srid las nges par 'byung ba'i blo bskyed la/__/mi rtag 'chi ba rjes su dran pa dang /__/'khor ba'i nyes dmigs yang yang dran gyis la/__/tshe 'di'i zhen pa gting nas log par mdzod/__/dkar nag las 'bras nam yang mi bslu bas/__/dge sdig 'dor len dran pas zin byos la/__/'chol bar mi spyod phra zhib brtson pa dang /__/rtag tu sems la yang yang brtag pa gces/__/sangs rgyas bstan pa'i snying po 'di yin cing /__/dam chos sgrub pa'i gnad 'gags 'di la thug/__'di bral lta sgom mthon por rlom byas kyang /__/ngan 'gro'i rgyu las cung zad yod re kan/__/bla ma mchog gsum skyabs kyi mchog tu bzung /__/rang 'dod med pa'i byang chub sems gnyis bskyed/__/tshogs bsags sgrib sbyong thabs la brtson pa dang /__/byin rlabs bla ma'i rnal 'byor bsgom pa gces/__/bsags sbyangs ma byas gnas lugs don rtogs dka'/__/sgrib pa byang na rang gnas ye shes gsal/__/mos gus yod na bla ma'i byin rlabs 'jug/__de dang bral na ye shes rtogs dus med/__/de yang kha tsam gsol btab phan pa med/__/snying khongs rus pa'i gting nas gsol ba thob/__/res 'ga' ma yin rtag tu mos gus bsgom/__/bla ma'i skyon la mi rtog yon tan sems/__/bka' drin rjes dran dam pa gong ma yi/__/rnam thar rnams la legs par bsam byas na/__/dad dang dag snang gong nas gong du 'phel/__/kun la dag snang sbyong ba gal che'o/__/rang skyon mi rig gzhan skyon mthong ba 'di/__/dam chos sgrub la gegs dang bar chad che/__/gzhan la rtsub mo'i ngag gis smra ba yang /__/rang gzhan gnyis ka zhe sdang me yis bsregs/__/des na zhi zhing 'jam pa'i ngag gis smra/__/su dang 'grogs kyang mi bde med pa dang /__/spyod lam bstun na kun gyi yid du 'ong /__/gyong po su dang mi mthun rwa rgog 'dra/__/sgo gsum spyod lam zhi zhing dul ba dang /__/smra ba ma mang ran tshod tsam du gyis/__/grub mtha' kun la ris su ma bcad par/__/phyogs med dag pa'i snang ba bskyed par mdzod/__/yang dag brgyud ldan dam chos ci thob bya/__/rtog ge ngan pa'i gzhung la blta ba dang /__/rang gzhan rtsod yig sogs la blta ba ni/__/sems la mi phan g.yeng ba'i rgyu yin spongs/__/mdo sngags zab don snying po'i gdams pa rnams/__/mjal nas rang gi rgyud la 'byor bar gyis/__/bla ma yi dam bskyed rdzogs nan du bsgom/__/bar rlung de nyid rgyun du 'dzin pa gnad/__/'bru gsum rdor bzlas gtum mo 'bar 'dzag rnams/__/cung zad bsgom na dam tshig mi nyams phan/__/rgyun du bsam pa bzang po kho na dang /__/yengs med dran pas rig pa'i rang ngo bskyangs/__/de la yid dpyod 'dzin pa ma zhugs dang /__/rang shar rang grol nam mkha'i ngang du bzhag/__blo yi chos kyi bslad pa ma zhugs dang /__rtog tshogs thams cad chos kyi dbyings su thongs/__/nyams ni 'jam rtsub ji ltar shar na yang /__/zhen pa ma byed byung rgyal btang byas na/__/zhen pas mi 'ching re dog bral bar 'gyur/__/khregs chod bogs 'don nam mkha' sum phrug gi__/gdams pa de la rgyun du brtson par gyis/__/rjes thob 'khrul pa rgya 'byams shor gyur na/__/bogs bskyed med cing 'khrul pa lu gu brgyud/__/'phyan cing las gsogs 'khor bar 'khyams pas na/__/rjes shes lta ba'i ngang nas ma yengs gces/__/sems can rnams la byams dang snying rje bsgom/__/bde sdug gtong len blo sbyong bag re bsam/__/dmigs med rig stong ngang bzhag ma bral na/__/rtsal gdangs snying rje chen po 'gags med 'char/__/sgo gsum ci spyod sems can don du bsngo/__/bzang po spyod pa'i smon lam yang yang gdab/__/mdo sngags bshags pa dag la rgyun du 'bad/__/des ni bya ba thams cad don yod 'gyur/__/de ltar gdams pa gnad kyi phreng ba 'di/__/rang gis tshul bzhin spyad pa med na yang /__/dam pa'i gsung gi rjes su 'brang nas bris/__/grogs khyod sems kyi gsos su 'di gyur cig/__de skad blo gros mchog ldan rang yul du/__/bskyod khar nan du bskul bas rkyen byas te/__/ban hrul mi rgan lag pa 'dar bzhin du/__/bris pa'i dge bas byang chub mchog thob shog/__chos kyi blo gros pas so//___//