JKCL-KABUM-04-NGA-013

Previous Text Back to Volume PageNext Text

བླ་མའི་རྣལ་འབྱོར་ཡེ་ཤེས་གསང་བ།

Wylie title	bla ma'i rnal 'byor ye shes gsang ba
Location	chos kyi blo gros bka' 'bum Volume 4, Text 13, Pages 65-75 (Folios 1a1 to 6a3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. bla ma'i rnal 'byor ye shes gsang ba. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 4: 65-75. Bir, H.P.: Khyentse Labrang, 2012.
Genre	Guru Yoga Texts - bla ma'i rnal 'byor
Colophon	།ཡེ་ཤེས་གསང་བ་སྒྲུབ་པའི་ཐབས། །སྤྲུལ་པའི་སྐུ་མཆོག་ཟུང་གིས་བསྐུལ། །གདོང་སྣ་མཆོག་སྤྲུལ་རིན་པོ་ཆེ་དང་། སྨར་ཁམས་རྒྱལ་སྲས་མཆོག་སྤྲུལ་རྣམ་གཉིས་ཡིན་ལགས། མཆན། །འཇམ་དབྱངས་ཆོས་ཀྱི་བློ་གྲོས་པས། །གང་ཤར་གང་དྲན་ཡི་གེར་བྲིས། །དགེ་བས་འཁོར་བ་དོང་སྤྲུགས་ཤོག
	/ye shes gsang ba sgrub pa'i thabs/__/sprul pa'i sku mchog zung gis bskul/__/gdong sna mchog sprul rin po che dang /__smar khams rgyal sras mchog sprul rnam gnyis yin lags/__mchan/__/'jam dbyangs chos kyi blo gros pas/__/gang shar gang dran yi ger bris/__/dge bas 'khor ba dong sprugs shog

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །བླ་མའི་རྣལ་འབྱོར་ཡེ་ཤེས་གསང་བ་བཞུགས། ། ན་མོ་གུ་རུ་བཛྲ་དྷཱ་ར་ཡ། ཟབ་མོ་བླ་མའི་སྒྲུབ་པ་ནི། །རྒྱལ་བ་ཀུན་གྱི་གསང་ལམ་ཆེ། །རྡོ་རྗེའི་ཡེ་ཤེས་ཆེན་པོ་ཡང་། བླ་མའི་བྱིན་རླབས་ཁོ་ན་ཡིས། །རྟོགས་ལས་ཐབས་གཞན་མེད་པར་གསུངས། །དེ་ཉིད་ཉམས་སུ་བླང་འདོད་ན། །བདེ་བའི་སྟན་ལ་བག་ཕབ་སྟེ། །སྲིད་ལས་ངེས་པར་འབྱུང་བ་ཡི། །བློ་བཅོས་བྱང་ཆུབ་སེམས་སྦྱངས་ནས། ཨ་ཨ། སྣང་བས་གར་ཁྱབ་པདྨ་འོད་ཀྱི་ཞིང་། །རྒྱ་ཁྱོན་བཀོད་པ་ཚད་ལས་འདས་པའི་དབུས། །གཞི་ལུས་དཔལ་ལྡན་རྡོ་རྗེ་མི་བསྐྱོད་པ། །དཀར་གསལ་ཕྱག་གཡས་རྡོ་རྗེ་ཐུགས་ཀར་གཏོད། །གཡོན་པས་དྲིལ་བུ་དཀུར་བསྟེན་ཕྱེད་སྐྱིལ་བཞུགས། །ལོངས་སྐུའི་རྒྱན་རྫོགས་དེ་ཡི་མདུན་མཁའ་རུ། །སེང་ཁྲི་པདྨ་ཉི་ཟླའི་གདན་སྟེང་དུ། །རང་རིག་བླ་མ་གཟུགས་ཀྱི་སྐུར་སྣང་བ། །རྩ་བའི་བླ་མ་ཨོ་རྒྱན་རྡོ་རྗེ་འཆང་། །ཆོས་སྐུ་གསང་བ་འདུས་པ་ནམ་མཁའི་མདངས། །ཞལ་གཅིག་ཕྱག་གཉིས་ཞི་འཛུམ་ཆགས་ཉམས་ཅན། །རྡོར་དྲིལ་ཐུགས་ཀར་བསྣོལ་ཞིང་མནྡཱ་ར། །དམར་མོ་གྲི་ཐོད་འཛིན་དང་མཉམ་པར་སྦྱོར། །གཉིས་ཀ་དར་དང་རིན་ཆེན་རུས་པས་བརྒྱན། །ཞབས་གཉིས་རྡོ་རྗེའི་སྐྱིལ་ཀྲུང་གཡོ་མེད་བཅིང་། །མཚན་དཔེའི་གཟི་བྱིན་མཚུངས་པ་མེད་པ་ཡི། །གནས་གསུམ་རྡོ་རྗེའི་ཡིག་འབྲུ་གསུམ་གྱིས་མཚན། །དེ་ལས་འོད་འཕྲོས་ཕྱོགས་བཅུའི་ཞིང་ཀུན་ནས། །རྩ་གསུམ་ལྷ་ཚོགས་ཆོས་དབྱིངས་ཁྱབ་པར་བྱོན། །དམ་ཚིག་པ་དང་གཉིས་སུ་མེད་པར་གྱུར། །ཅེས་བརྗོད་རྡོ་རྗེའི་ཚིག་བདུན་གྱིས། །ཐུགས་དམ་གནད་ནས་བསྐུལ་བར་བྱ། །ཐོད་ཕྲེང་རྩལ་གྱི་ཛ྄བ་ཀྱང་བཟླ། དེ་ནས་ཚོགས་བསགས་བྱ་བ་ནི། ཨ། གདོད་ནས་རྣམ་དག་ཆོས་ཀྱི་སྐུར། །རང་ངོ་ཤེས་པས་ཕྱག་འཚལ་ལོ། །སྣང་སྲིད་ཆོས་ཀུན་རོལ་བའི་རྒྱན། །གཉིས་འཛིན་བྲལ་བའི་མཆོད་པ་འབུལ། །སྡིག་ལྟུང་གདོད་ནས་མ་སྐྱེས་ཤིང་། །གནས་པ་མེད་པའི་ངང་དུ་བཤགས། །ཟག་བཅས་ཟག་མེད་དགེ་བ་ལ། །བྱས་པ་མེད་པར་རྗེས་ཡི་རང་། །གཞོམ་མེད་ཆོས་ཀྱི་འཁོར་ལོ་ནི། །རྒྱུན་ཆད་མེད་པར་བསྐོར་བར་བསྐུལ། །འགྱུར་བཅས་འཕོ་བའི་ཆོས་མཐའ་དག །འགྱུར་མེད་བརྟན་པར་བཞུགས་སུ་གསོལ། །དུས་གསུམ་བསགས་པའི་དགེ་ཚོགས་རྣམས། །སྐུ་གསུམ་ལྷུན་གྲུབ་ཆེན་པོར་བསྔོ། །ཁམས་གསུམ་འགྲོ་བ་མ་ལུས་པ། །གཞོན་ནུ་བུམ་སྐུར་བྱང་ཆུབ་ཤོག །སྐུ་གསུམ་མཆོད་པའི་མཎྜལ་ནི། །སྣོད་བཅུད་འཇིག་རྟེན་རབ་འབྱམས་ཀུན། །རི་རབ་གླིང་བཞི་ཉི་ཟླས་བརྒྱན། །བླ་མ་སྤྲུལ་པའི་སྐུ་ལ་འབུལ། །རྡོ་རྗེའི་ཕུང་པོ་འོག་མིན་ཞིང་། །བཀོད་པ་ཚད་མེད་འབྱམས་ཀླས་པ། །བླ་མ་ལོངས་སྤྱོད་རྫོགས་སྐུར་འབུལ། །དབྱིངས་ནི་གདོད་ནས་དག་པ་ལ། །རིག་པ་འོད་ཐིག་རང་བྱུང་ཤར། །བླ་མ་ཆོས་ཀྱི་སྐུ་ལ་འབུལ། །ཚོགས་གཉིས་རྫོགས་པའི་ཞིང་ཁམས་འབྱོང་། །སྐུ་གསུམ་གོ་འཕང་ཐོབ་པར་ཤོག །ཨོཾ་ཨཱཿཧཱུྃ་གུ་རུ་དྷེ་ཝ་དྷཱ་ཀི་ནི་སརྦ་རཏྣ་མཎྜ་ལ་པཱུ་ཛ་མེ་གྷ་ཨཱཿཧཱུྃ། ཅེས་པས་མཎྜལ་འབུལ་བྱས་ནས། རང་གི་སྙིང་ག་ནས་སྤྲོས་པའི། །འཇོ་སྒེག་ལྡན་པའི་ལྷ་མོ་ཡིས། །ཉེར་སྤྱོད་བདུན་དང་འདོད་ཡོན་ལྔ། །སྣང་སྲིད་དངོས་པོ་ཅི་མཆིས་པ། །མཆོད་པའི་ཕྱག་རྒྱ་དཔག་མེད་སྤྲུལ། །མཁའ་ཁྱབ་ཏིང་འཛིན་རོལ་མོ་ཡི། །མཆོད་པས་རྟག་ཏུ་མཆོད་པར་བགྱི། ནམ་མཁའ་མཛོད་ཀྱི་སྔགས་རྒྱས་དབུལ། ཨོཾ། བྷཉྫ་འབར་བའི་སྣོད་ཆེན་པོར། །སྣང་སྲིད་བདུད་རྩིར་སྦྱར་བ་ལས། །ཡེ་ཤེས་རིགས་ལྔའི་སྤྲིན་ཕུང་གི། ཟེག་མས་བླ་མ་མཆོད་པར་བགྱི། །ཨོཾ་སརྦ་པཉྩ་ཨ་མྲྀ་ཏ་ཁཱ་ཧི། ཨཱཿལྕང་ལོར་བཅས་པའི་དུང་ཆེན་སྣོད། །ཉོན་མོངས་རྟོག་ཚོགས་བསྒྲལ་བ་ཡི། །དམར་ཆེན་རཀྟའི་མཆོད་པ་འདིས། །བླ་མ་དཀྱིལ་འཁོར་ལྷ་ཚོགས་མཆོད། མ་ཧཱ་རཀྟ་ཁཱ་ཧི། ཧཱུྃ། སྲིད་གསུམ་ཡེ་ནས་གཏོར་གཞོང་དུ། །སྲིད་པ་བཅུད་ཀྱི་གཏོར་མར་སྦྱར། །འདོད་ཡོན་ལྔ་ཡི་སྤྲིན་ཕུང་འཕྲོ། །རྡོ་རྗེའི་ལྗགས་ཀྱི་སྦུ་གུར་བཞེས། །ཨོཾ་མ་ཧཱ་བ་ལིཾ་ཏ་ཁ་རཾ་ཁཱ་ཧི། རང་ལས་སྤྲོས་པའི་ལྷ་མོ་ནི། །པད་ཅན་དུང་ཅན་རིག་མའི་ཚོགས། །བདེ་བའི་ཉམས་ལྡན་སྐུ་ལ་འཁྲིལ། །སྙོམས་འཇུག་དགའ་བཞིས་དགྱེས་པ་བསྐྱེད། །མ་ཧཱ་སུ་ཁ་སིདྡྷི་ཨ་ལ་ལ་ཧོཿརྣམ་ཐར་གསུམ་ལྡན་ཨེ་ཡི་དབྱིངས། །བདག་ལྟའི་རུ་ཏྲ་བཀུག་བྱས་ནས། །བདག་མེད་རྟོགས་པའི་ཐོ་བས་བསྒྲལ། །ཤ་ཁྲག་བདུད་རྩིར་སྦར་བྱས་ཏེ། །སྐུ་གསུམ་བླ་མའི་ལྷ་ཚོགས་མཆོད། །སརྦ་ཤཱ་ཏྲུཾ་མཱ་ར་ཡ་ཕཊ། ཨ། མཆོད་བྱ་མཆོད་བྱེད་མཆོད་ཡུལ་ཀུན། །གདོད་ནས་རང་རིག་བདེ་བ་ཆེ། །སྨྲ་བརྗོད་སྤྲོས་པ་བྲལ་བའི་ཀློང་། །སྐྱེ་མེད་ཆོས་སྐུའི་ངང་དུ་མཆོད། །དྷརྨ་དྷཱ་ཏུ་ཨཏྨ་ཀོ྅ཧཾ། དེ་ནས་བསྟོད་པ་བྱ་བ་ནི། ཧཱུྃ་ཧྲཱིཿམ་བཅོས་སྤྲོས་བྲལ་བདེ་བ་ཆེ། །འོད་གསལ་འདུས་མ་བྱས་པའི་སྐུ། །ཡེ་ཤེས་ལྔ་ལྡན་བླ་མ་རྗེར། །བསྟོད་དབྱངས་རྒྱ་མཚོའི་སྤྲིན་གྱིས་མཆོད། །ཡེ་ཤེས་སྐུ་ནི་ཀུན་ལ་ཁྱབ། །བརྟན་གཡོ་ཀུན་གྱི་སྤྱི་དཔལ་ཆེ། །མཁའ་ཁྱབ་མཁའ་ཡི་རྡོ་རྗེ་ཅན། །འོད་གསལ་རྣམ་ཀུན་མཆོག་ལྡན་བསྟོད། །ཟག་པར་བཅས་པའི་ཆོས་ཐམས་ཅད། །ཟག་མེད་རིག་སྟོང་རྡོ་རྗེར་སྡོམ། །འགྱུར་མེད་རྡོ་རྗེའི་སྐུར་སྒྲུབ་པ། །རྡོ་རྗེའི་སྐུ་ལ་ཕྱག་འཚལ་བསྟོད། །འགགས་མེད་རང་བྱུང་རྡོ་རྗེའི་སྒྲ། །ཡི་གེ་འཁོར་ལོའི་སྤྲིན་དུ་བྲེས། །བརྗོད་མེད་བརྗོད་པ་ཀུན་གྱི་གཞི། །རྡོ་རྗེའི་གསུང་ལ་ཕྱག་འཚལ་བསྟོད། །རྣམ་བཅས་སྤྲོས་པ་རབ་ཏུ་ཞི། །རྣམ་མེད་རང་བྱུང་རང་འོད་གསལ། །ཀུན་ནས་ཀུན་ཏུ་བཟང་པོའི་དཔལ། །རྡོ་རྗེའི་ཐུགས་ལ་ཕྱག་འཚལ་བསྟོད། །བྲལ་དང་སྨིན་པའི་ཡོན་ཏན་ནི། །མ་བཙལ་ཡེ་ནས་ལྷུན་གྱིས་རྫོགས། །སྤང་ཐོབ་བྲལ་བའི་བདག་ཉིད་ཅན། །ཡོན་ཏན་རྡོ་རྗེར་ཕྱག་འཚལ་བསྟོད། །ནམ་མཁའ་ཇི་སྲིད་གནས་ཀྱི་བར། །འགྲོ་དོན་ཕྲིན་ལས་རྒྱུན་མི་ཆད། །མཁའ་དང་རྒྱ་མཚོ་ལྟར་ཟབ་པའི། །ཕྲིན་ལས་རྡོ་རྗེར་ཕྱག་འཚལ་བསྟོད། །སྐུ་གསུང་ཐུགས་ཡོན་ཕྲིན་ལས་རྣམས། །བསམ་མི་ཁྱབ་པའི་བདག་ཉིད་ཆེ། །སངས་རྒྱས་ཀུན་དང་མཉམ་པའི་སྐུར། །དབྱེར་མེད་རོ་མཉམ་རྟག་ཏུ་འདུད། །ཕུང་པོ་བདུད་རྩིར་བསྒྱུར་ཏེ་མཆོད། ཨ། རང་ལུས་ཐ་མལ་ཕུང་པོ་ནི། །སྟོང་གསུམ་ཁྱབ་པ་ཙམ་དུ་གྱུར། །ཐོད་པའི་སྒྱེད་པུ་གསུམ་གྱི་སྟེང་། །རབ་ཡངས་ཀ་པ་ལ་ཡི་ནང་། །ཕུང་པོ་དུམ་བུར་བསིལ་ཞིང་བླུགས། །འོག་ནས་མེ་རླུང་སྦར་བས་དྲོས། །སྟེང་མཁར་རཾ་དང་ཨོཾ་ཨཱཿཧཱུྃ། །བརྩེགས་མར་གནས་པ་ཞུ་བ་ལས། །བདུད་རྩི་ཞུ་བསྐོལ་མ་དག་པའི། །རླངས་པ་ཕྱིར་ཐོན་ཡེ་ཤེས་ཀྱི། །བདུད་རྩི་མཁའ་ཁྱབ་འཕྲོ་བར་སྤེལ། །ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་མང་བརྗོད་དེ་མཆོད་པར་བགྱི། ཨོཾ་ཨཱཿཧཱུྃ། བླ་མ་སྐུ་བཞིའི་དཀྱིལ་འཁོར་ལ། །ཟག་མེད་བདུད་རྩིའི་ཕུད་ཀྱིས་མཆོད། །རྡོ་རྗེའི་ཡེ་ཤེས་བསྐྱེད་དུ་གསོལ། །ཡི་དམ་དཀྱིལ་འཁོར་ལྷ་ཚོགས་ལ། །ཟག་མེད༴ །མཆོག་ཐུན་དངོས་གྲུབ་སྩལ་དུ་གསོལ། །མཁའ་འགྲོ་ཆོས་སྐྱོང་སྲུང་མ་ལ། །ཟག་མེད༴ །བར་ཆད་ཀུན་སོལ་ཕྲིན་ལས་སྒྲུབས། །བགེགས་རིགས་ལན་ཆགས་མགྲོན་རྣམས་ལ། །ཟག་མེད་བདུད་རྩི་འདི་བྱིན་པས། །གནོད་སེམས་གདུག་རྩུབ་ཞི་བར་ཤོག །རིགས་དྲུག་སྙིང་རྗེའི་མགྲོན་རྣམས་ལ། །ཟག་མེད་བདུད་རྩི་འདི་བྱིན་པས། །ལན་ཆགས་བུ་ལོན་བྱང་གྱུར་ཅིག །ག་ཎ་ཙཀྲའི་མཆོད་པ་ནི། །ཐབས་ཤེས་རྫས་ཀྱང་ཅི་འབྱོར་བཤམས། རྃ་ཡྃ་ཁྃ་གིས་དྲི་མ་སྦྱོང་། །འབྲུ་གསུམ་བརྗོད་པས་བདུད་རྩིར་སྤེལ། །བདག་ལུས་ཕུང་ཁམས་སྐྱེ་མཆེད་རྣམས། །ཐབས་ཤེས་རྫས་དང་དབྱེར་མེད་གྱུར། །ཨོཾ་ཨཱཿཧཱུྃ། རང་བྱུང་བྷནྡྷའི་སྣོད་ནང་དུ། །ཚོགས་གཏོར་རིན་ཆེན་འབར་བ་ཆེ། །བཟའ་བཅའ་བཏུང་བའི་དངོས་པོ་ནི། །རི་དང་རྒྱ་མཚོ་ལྟར་བསྐྱིལ་བ། །འདོད་ཡོན་ལྔ་ཡི་སྤྲིན་ཕུང་འཕྲོ། །རྡོ་རྗེའི་ལྷ་མོ་གར་སྟབས་ཅན། །དཔག་མེད་སྤྲོས་པས་རབ་བཏེགས་ནས། །ཚོགས་ཀྱི་ཞིང་མཆོག་བསམ་ཡས་པར། །སྒྱུ་འཕྲུལ་རྡོ་རྗེའི་རོལ་པས་མཆོད། །གསང་གསུམ་དམ་ཚིག་ཉམས་པ་བཤགས། །གཉིས་འཛིན་རུ་ཏྲ་དབྱིངས་སུ་བསྒྲལ། །མཆོད་བཞེས་དམ་བསྐངས་དངོས་གྲུབ་སྩོལ། །མ་ཧཱ་ག་ཎ་ཙཀྲ་པཱུ་ཛ་ཁཱ་ཧི། ཡི་གེ་བརྒྱ་པ་བརྗོད་བྱས་ནས། །རང་ལུས་རྡོར་སེམས་གསལ་བ་ལ། །ཕུལ་བས་གདན་གསུམ་དཀྱིལ་འཁོར་བརྙེས། །ཚོགས་ལ་རོལ་ཞིང་ལྷག་མ་བཏང་། ཧྲཱིཿཕཻཾ། ཞིང་སྐྱོང་ཕོ་ཉ་འབྱུང་པོའི་ཚོགས། །རྣལ་འབྱོར་རོལ་པའི་ལྷག་མ་བཞེས། །རྩ་རླུང་ཐིག་ལེའི་བར་ཆད་སོལ། །རྡོ་རྗེ་གསུམ་མཆོག་གྲུབ་པར་མཛོད། ཨུཥྩི་ཊ་བ་ལིཾ་ཏ་ཁཱ་ཧི། དེ་ནས་གསོལ་འདེབས་བཟླས་དབང་བླངས། ཀྱེ་ཀྱེ་བླ་མ་རྡོ་རྗེ་འཆང་། །སངས་རྒྱས་ཐམས་ཅད་འདུས་པའི་སྐུ། །འགྲོ་བ་ཡོངས་ཀྱི་མགོན་གཅིག་པུ། །རྩ་གསུམ་རྒྱ་མཚོའི་སྤྱི་དཔལ་ཆེ། །མ་རིག་མུན་པ་སེལ་བའི་སྒྲོན། །ཐར་པའི་ལམ་སྟོན་དེད་དཔོན་ཆེ། །བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ལྡན་རྡོ་རྗེ་འཆང་། །བདག་ལ་དགོངས་པར་མཛད་དུ་གསོལ། །ཡེ་ཤེས་སྐུ་ཡི་ཉི་མ་ཆེས། །བདག་རྒྱུད་མ་རིག་མུན་པ་སོལ། །རྡོ་རྗེའི་ཡེ་ཤེས་བསྐྱེད་དུ་གསོལ། །རིག་རྩལ་རྟོགས་པ་སྦར་དུ་གསོལ། །སྐུ་གསུམ་མངོན་འགྱུར་བྱིན་རློབས་ཤིག །ཅེས་དང་ཚིག་བདུན་ཐོད་ཕྲེང་རྩལ། །གྲངས་མང་བཟླས་པས་ཐུགས་རྒྱུད་བསྐུལ། །མཆོག་སྦྱིན་རྡོ་རྗེ་སོགས་ཀྱིས་བསྟོད། གུ་རུའི་དཔྲལ་བའི་ཨོཾ་ཡིག་ལས། །འོད་ཟེར་བདུད་རྩི་དཀར་པོ་དང་། །བླ་མ་ཞི་ཁྲོའི་སྐུ་དཔག་མེད། །བྱོན་ནས་རང་གི་དཔྲལ་བར་ཐིམ། །ལུས་དང་རྩ་ཡི་སྒྲིབ་པ་དག །བུམ་དབང་ཐོབ་ཅིང་ས་བརྒྱད་ནོན། །སྤྲུལ་སྐུའི་གོ་འཕང་རྒྱུད་ལ་བཞག །གུ་རུའི་མགྲིན་པའི་ཨཱཿདམར་ལས། །འོད་ཟེར་བདུད་རྩི་དམར་པོ་དང་། །སྔགས་ཕྲེང་བསམ་མི་ཁྱབ་པ་འཕྲོས། །རང་གི་མགྲིན་པར་ཐིམ་པ་ཡིས། །ངག་དང་རླུང་གི་སྒྲིབ་པ་དག །གསང་དབང་ཐོབ་ཅིང་ས་དགུ་ནོན། །ལོངས་སྐུའི་གོ་འཕང་རྒྱུད་ལ་བཞག །གུ་རུའི་ཐུགས་ཀའི་ཧཱུྃ་ཡིག་ལས། །འོད་ཟེར་བདུད་རྩི་སྔོན་པོ་དང་། །ཕྱག་མཚན་དཔག་ཏུ་མེད་པ་བྱོན། །རང་གི་སྙིང་གར་ཐིམ་པ་དང་། །ཡིད་དང་ཐིག་ལེའི་སྒྲིབ་པ་དག །ཤེར་དབང་ཐོབ་ཅིང་ཀུན་འོད་ནོན། །ཆོས་སྐུའི་གོ་འཕང་རྒྱུད་ལ་བཞག །གུ་རུའི་གནས་གསུམ་འབྲུ་གསུམ་ལས། །འོད་ཟེར་བདུད་རྩི་འདྲེས་པ་དང་། །ཨ་ཡིག་མཐིང་འོད་གོང་བུ་ཞིག །རང་གི་སྒོ་གསུམ་སྙིང་དབུས་ཐིམ། །ཆ་སྙོམས་ཤེས་སྒྲིབ་ཕྲ་བ་དག །ཡེ་ཤེས་བླ་མའི་ས་ནོན་ཅིང་། །ངོ་བོ་ཉིད་སྐུ་རྒྱུད་ལ་བཞག །མཐར་ནི་བླ་མ་དགྱེས་པ་ཆེས། །སྤྱི་བོ་ནས་བརྒྱུད་སྙིང་འོད་ཁྱིམ། །སྒྲོན་མའི་གུར་ཁང་ཆེན་པོར་བཞུགས། །ཐ་མལ་ཤེས་པ་བཟོ་མ་བཅོས། །དུས་གསུམ་རྟོག་པས་མ་བསླད་ཅིང་། །ཀ་དག་རིག་པ་ཟང་མ་ཐལ། །གཞིར་གནས་ཆོས་སྐུའི་ཀློང་ཆེན་པོར། །སྤྲོས་པའི་གྲྭ་ཟུར་ཁྲེག་ཆོད་ཀྱི། །སྐུ་གསུམ་ལྷུན་གྲུབ་དགོངས་པ་ལ། །རང་བཞིན་གནས་པས་རྟག་ཏུ་སྐྱོང་། །དེ་ཚེ་བོགས་འདོན་ཡེ་ཤེས་ཀྱི། །འོད་གདངས་རྡོ་རྗེ་མཁའ་ལ་འགྲོ། །རིག་པ་སྤྲོ་བསྡུ་བྲལ་བ་ཡི། །མངོན་སུམ་གནད་ཀྱི་གཟེར་ཁ་ལས། །འོད་རིག་སྟོང་གསུམ་དབྱེར་མེད་པ། །གོང་འཕེལ་ཚད་ལ་ཕེབས་པ་དང་། །སྐུ་གསུམ་ཞིང་ཁམས་ཆེན་པོར་རྫོགས། །ཆོས་ཅན་སྣང་བ་དབྱིངས་སུ་ཟད། །ཆོས་ཉིད་གཞོན་ནུ་བུམ་པ་སྐུ། །ནང་གསལ་ཐིམ་ལ་མ་རྨུག་པ། །ཡེ་ཤེས་ཆེན་པོར་ངལ་གསོའོ། །ཐུན་མཚམས་བླ་མའི་རོལ་པར་བལྟ། །བླ་མའི་སྣང་བ་འབྲལ་མེད་བྱ། །དེ་ཡང་རང་རིག་བླ་མར་བལྟ། །མཉམ་བཞག་རྗེས་ཐོབ་དབྱེར་མེད་ཅིང་། །ཆོས་སྐུའི་དགོངས་པའི་བཙན་ས་ཟིན། །ཕྱིར་མི་ལྡོག་པའི་འབྲས་བུ་ནི། །ཀུན་ཏུ་བཟང་པོ་ཨེ་མ་ཧོ། །ཡེ་ཤེས་གསང་བ་སྒྲུབ་པའི་ཐབས། །སྤྲུལ་པའི་སྐུ་མཆོག་ཟུང་གིས་བསྐུལ། །གདོང་སྣ་མཆོག་སྤྲུལ་རིན་པོ་ཆེ་དང་། སྨར་ཁམས་རྒྱལ་སྲས་མཆོག་སྤྲུལ་རྣམ་གཉིས་ཡིན་ལགས། མཆན། །འཇམ་དབྱངས་ཆོས་ཀྱི་བློ་གྲོས་པས། །གང་ཤར་གང་དྲན་ཡི་གེར་བྲིས། །དགེ་བས་འཁོར་བ་དོང་སྤྲུགས་ཤོག །།།

[edit]

@#/__/bla ma'i rnal 'byor ye shes gsang ba bzhugs/__/ na mo gu ru badz+ra d+hA ra ya/__zab mo bla ma'i sgrub pa ni/__/rgyal ba kun gyi gsang lam che/__/rdo rje'i ye shes chen po yang /__bla ma'i byin rlabs kho na yis/__/rtogs las thabs gzhan med par gsungs/__/de nyid nyams su blang 'dod na/__/bde ba'i stan la bag phab ste/__/srid las nges par 'byung ba yi/__/blo bcos byang chub sems sbyangs nas/__a a/__snang bas gar khyab pad+ma 'od kyi zhing /__/rgya khyon bkod pa tshad las 'das pa'i dbus/__/gzhi lus dpal ldan rdo rje mi bskyod pa/__/dkar gsal phyag g.yas rdo rje thugs kar gtod/__/g.yon pas dril bu dkur bsten phyed skyil bzhugs/__/longs sku'i rgyan rdzogs de yi mdun mkha' ru/__/seng khri pad+ma nyi zla'i gdan steng du/__/rang rig bla ma gzugs kyi skur snang ba/__/rtsa ba'i bla ma o rgyan rdo rje 'chang /__/chos sku gsang ba 'dus pa nam mkha'i mdangs/__/zhal gcig phyag gnyis zhi 'dzum chags nyams can/__/rdor dril thugs kar bsnol zhing man+dA ra/__/dmar mo gri thod 'dzin dang mnyam par sbyor/__/gnyis ka dar dang rin chen rus pas brgyan/__/zhabs gnyis rdo rje'i skyil krung g.yo med bcing /__/mtshan dpe'i gzi byin mtshungs pa med pa yi/__/gnas gsum rdo rje'i yig 'bru gsum gyis mtshan/__/de las 'od 'phros phyogs bcu'i zhing kun nas/__/rtsa gsum lha tshogs chos dbyings khyab par byon/__/dam tshig pa dang gnyis su med par gyur/__/ces brjod rdo rje'i tshig bdun gyis/__/thugs dam gnad nas bskul bar bya/__/thod phreng rtsal gyi dza?b kyang bzla/__de nas tshogs bsags bya ba ni/__a/__gdod nas rnam dag chos kyi skur/__/rang ngo shes pas phyag 'tshal lo/__/snang srid chos kun rol ba'i rgyan/__/gnyis 'dzin bral ba'i mchod pa 'bul/__/sdig ltung gdod nas ma skyes shing /__/gnas pa med pa'i ngang du bshags/__/zag bcas zag med dge ba la/__/byas pa med par rjes yi rang /__/gzhom med chos kyi 'khor lo ni/__/rgyun chad med par bskor bar bskul/__/'gyur bcas 'pho ba'i chos mtha' dag__/'gyur med brtan par bzhugs su gsol/__/dus gsum bsags pa'i dge tshogs rnams/__/sku gsum lhun grub chen por bsngo/__/khams gsum 'gro ba ma lus pa/__/gzhon nu bum skur byang chub shog__/sku gsum mchod pa'i maN+Dal ni/__/snod bcud 'jig rten rab 'byams kun/__/ri rab gling bzhi nyi zlas brgyan/__/bla ma sprul pa'i sku la 'bul/__/rdo rje'i phung po 'og min zhing /__/bkod pa tshad med 'byams klas pa/__/bla ma longs spyod rdzogs skur 'bul/__/dbyings ni gdod nas dag pa la/__/rig pa 'od thig rang byung shar/__/bla ma chos kyi sku la 'bul/__/tshogs gnyis rdzogs pa'i zhing khams 'byong /__/sku gsum go 'phang thob par shog__/oM AHhU~M gu ru d+he wa d+hA ki ni sarba rat+na maN+Da la pU dza me g+ha AHhU~M/__ces pas maN+Dal 'bul byas nas/__rang gi snying ga nas spros pa'i/__/'jo sgeg ldan pa'i lha mo yis/__/nyer spyod bdun dang 'dod yon lnga/__/snang srid dngos po ci mchis pa/__/mchod pa'i phyag rgya dpag med sprul/__/mkha' khyab ting 'dzin rol mo yi/__/mchod pas rtag tu mchod par bgyi/__nam mkha' mdzod kyi sngags rgyas dbul/__oM/__b+hany+dza 'bar ba'i snod chen por/__/snang srid bdud rtsir sbyar ba las/__/ye shes rigs lnga'i sprin phung gi/__zeg mas bla ma mchod par bgyi/__/oM sarba pany+tsa a mr-i ta khA hi/__AHlcang lor bcas pa'i dung chen snod/__/nyon mongs rtog tshogs bsgral ba yi/__/dmar chen rak+ta'i mchod pa 'dis/__/bla ma dkyil 'khor lha tshogs mchod/__ma hA rak+ta khA hi/__hU~M/__srid gsum ye nas gtor gzhong du/__/srid pa bcud kyi gtor mar sbyar/__/'dod yon lnga yi sprin phung 'phro/__/rdo rje'i ljags kyi sbu gur bzhes/__/oM ma hA ba liM ta kha raM khA hi/__rang las spros pa'i lha mo ni/__/pad can dung can rig ma'i tshogs/__/bde ba'i nyams ldan sku la 'khril/__/snyoms 'jug dga' bzhis dgyes pa bskyed/__/ma hA su kha sid+d+hi a la la hoHrnam thar gsum ldan e yi dbyings/__/bdag lta'i ru tra bkug byas nas/__/bdag med rtogs pa'i tho bas bsgral/__/sha khrag bdud rtsir sbar byas te/__/sku gsum bla ma'i lha tshogs mchod/__/sarba shA truM mA ra ya phaT/__a/__mchod bya mchod byed mchod yul kun/__/gdod nas rang rig bde ba che/__/smra brjod spros pa bral ba'i klong /__/skye med chos sku'i ngang du mchod/__/d+harma d+hA tu at+ma ko\u0f85haM/__de nas bstod pa bya ba ni/__hU~M hrIHma bcos spros bral bde ba che/__/'od gsal 'dus ma byas pa'i sku/__/ye shes lnga ldan bla ma rjer/__/bstod dbyangs rgya mtsho'i sprin gyis mchod/__/ye shes sku ni kun la khyab/__/brtan g.yo kun gyi spyi dpal che/__/mkha' khyab mkha' yi rdo rje can/__/'od gsal rnam kun mchog ldan bstod/__/zag par bcas pa'i chos thams cad/__/zag med rig stong rdo rjer sdom/__/'gyur med rdo rje'i skur sgrub pa/__/rdo rje'i sku la phyag 'tshal bstod/__/'gags med rang byung rdo rje'i sgra/__/yi ge 'khor lo'i sprin du bres/__/brjod med brjod pa kun gyi gzhi/__/rdo rje'i gsung la phyag 'tshal bstod/__/rnam bcas spros pa rab tu zhi/__/rnam med rang byung rang 'od gsal/__/kun nas kun tu bzang po'i dpal/__/rdo rje'i thugs la phyag 'tshal bstod/__/bral dang smin pa'i yon tan ni/__/ma btsal ye nas lhun gyis rdzogs/__/spang thob bral ba'i bdag nyid can/__/yon tan rdo rjer phyag 'tshal bstod/__/nam mkha' ji srid gnas kyi bar/__/'gro don phrin las rgyun mi chad/__/mkha' dang rgya mtsho ltar zab pa'i/__/phrin las rdo rjer phyag 'tshal bstod/__/sku gsung thugs yon phrin las rnams/__/bsam mi khyab pa'i bdag nyid che/__/sangs rgyas kun dang mnyam pa'i skur/__/dbyer med ro mnyam rtag tu 'dud/__/phung po bdud rtsir bsgyur te mchod/__a/__rang lus tha mal phung po ni/__/stong gsum khyab pa tsam du gyur/__/thod pa'i sgyed pu gsum gyi steng /__/rab yangs ka pa la yi nang /__/phung po dum bur bsil zhing blugs/__/'og nas me rlung sbar bas dros/__/steng mkhar raM dang oM AHhU~M/__/brtsegs mar gnas pa zhu ba las/__/bdud rtsi zhu bskol ma dag pa'i/__/rlangs pa phyir thon ye shes kyi/__/bdud rtsi mkha' khyab 'phro bar spel/__/oM AHhU~M ha ho hrIHlan mang brjod de mchod par bgyi/__oM AHhU~M/__bla ma sku bzhi'i dkyil 'khor la/__/zag med bdud rtsi'i phud kyis mchod/__/rdo rje'i ye shes bskyed du gsol/__/yi dam dkyil 'khor lha tshogs la/__/zag med=__/mchog thun dngos grub stsal du gsol/__/mkha' 'gro chos skyong srung ma la/__/zag med=__/bar chad kun sol phrin las sgrubs/__/bgegs rigs lan chags mgron rnams la/__/zag med bdud rtsi 'di byin pas/__/gnod sems gdug rtsub zhi bar shog__/rigs drug snying rje'i mgron rnams la/__/zag med bdud rtsi 'di byin pas/__/lan chags bu lon byang gyur cig__/ga Na tsakra'i mchod pa ni/__/thabs shes rdzas kyang ci 'byor bshams/__ra~M ya~M kha~M gis dri ma sbyong /__/'bru gsum brjod pas bdud rtsir spel/__/bdag lus phung khams skye mched rnams/__/thabs shes rdzas dang dbyer med gyur/__/oM AHhU~M/__rang byung b+han+d+ha'i snod nang du/__/tshogs gtor rin chen 'bar ba che/__/bza' bca' btung ba'i dngos po ni/__/ri dang rgya mtsho ltar bskyil ba/__/'dod yon lnga yi sprin phung 'phro/__/rdo rje'i lha mo gar stabs can/__/dpag med spros pas rab btegs nas/__/tshogs kyi zhing mchog bsam yas par/__/sgyu 'phrul rdo rje'i rol pas mchod/__/gsang gsum dam tshig nyams pa bshags/__/gnyis 'dzin ru tra dbyings su bsgral/__/mchod bzhes dam bskangs dngos grub stsol/__/ma hA ga Na tsakra pU dza khA hi/__yi ge brgya pa brjod byas nas/__/rang lus rdor sems gsal ba la/__/phul bas gdan gsum dkyil 'khor brnyes/__/tshogs la rol zhing lhag ma btang /__hrIHphaiM/__zhing skyong pho nya 'byung po'i tshogs/__/rnal 'byor rol pa'i lhag ma bzhes/__/rtsa rlung thig le'i bar chad sol/__/rdo rje gsum mchog grub par mdzod/__uSh+tsi Ta ba liM ta khA hi/__de nas gsol 'debs bzlas dbang blangs/__kye kye bla ma rdo rje 'chang /__/sangs rgyas thams cad 'dus pa'i sku/__/'gro ba yongs kyi mgon gcig pu/__/rtsa gsum rgya mtsho'i spyi dpal che/__/ma rig mun pa sel ba'i sgron/__/thar pa'i lam ston ded dpon che/__/bla ma sangs rgyas bla ma chos/__/de bzhin bla ma dge 'dun te/__/bla ma dpal ldan rdo rje 'chang /__/bdag la dgongs par mdzad du gsol/__/ye shes sku yi nyi ma ches/__/bdag rgyud ma rig mun pa sol/__/rdo rje'i ye shes bskyed du gsol/__/rig rtsal rtogs pa sbar du gsol/__/sku gsum mngon 'gyur byin rlobs shig__/ces dang tshig bdun thod phreng rtsal/__/grangs mang bzlas pas thugs rgyud bskul/__/mchog sbyin rdo rje sogs kyis bstod/__gu ru'i dpral ba'i oM yig las/__/'od zer bdud rtsi dkar po dang /__/bla ma zhi khro'i sku dpag med/__/byon nas rang gi dpral bar thim/__/lus dang rtsa yi sgrib pa dag__/bum dbang thob cing sa brgyad non/__/sprul sku'i go 'phang rgyud la bzhag__/gu ru'i mgrin pa'i AHdmar las/__/'od zer bdud rtsi dmar po dang /__/sngags phreng bsam mi khyab pa 'phros/__/rang gi mgrin par thim pa yis/__/ngag dang rlung gi sgrib pa dag__/gsang dbang thob cing sa dgu non/__/longs sku'i go 'phang rgyud la bzhag__/gu ru'i thugs ka'i hU~M yig las/__/'od zer bdud rtsi sngon po dang /__/phyag mtshan dpag tu med pa byon/__/rang gi snying gar thim pa dang /__/yid dang thig le'i sgrib pa dag__/sher dbang thob cing kun 'od non/__/chos sku'i go 'phang rgyud la bzhag__/gu ru'i gnas gsum 'bru gsum las/__/'od zer bdud rtsi 'dres pa dang /__/a yig mthing 'od gong bu zhig__/rang gi sgo gsum snying dbus thim/__/cha snyoms shes sgrib phra ba dag__/ye shes bla ma'i sa non cing /__/ngo bo nyid sku rgyud la bzhag__/mthar ni bla ma dgyes pa ches/__/spyi bo nas brgyud snying 'od khyim/__/sgron ma'i gur khang chen por bzhugs/__/tha mal shes pa bzo ma bcos/__/dus gsum rtog pas ma bslad cing /__/ka dag rig pa zang ma thal/__/gzhir gnas chos sku'i klong chen por/__/spros pa'i grwa zur khreg chod kyi/__/sku gsum lhun grub dgongs pa la/__/rang bzhin gnas pas rtag tu skyong /__/de tshe bogs 'don ye shes kyi/__/'od gdangs rdo rje mkha' la 'gro/__/rig pa spro bsdu bral ba yi/__/mngon sum gnad kyi gzer kha las/__/'od rig stong gsum dbyer med pa/__/gong 'phel tshad la phebs pa dang /__/sku gsum zhing khams chen por rdzogs/__/chos can snang ba dbyings su zad/__/chos nyid gzhon nu bum pa sku/__/nang gsal thim la ma rmug pa/__/ye shes chen por ngal gso'o/__/thun mtshams bla ma'i rol par blta/__/bla ma'i snang ba 'bral med bya/__/de yang rang rig bla mar blta/__/mnyam bzhag rjes thob dbyer med cing /__/chos sku'i dgongs pa'i btsan sa zin/__/phyir mi ldog pa'i 'bras bu ni/__/kun tu bzang po e ma ho/__/ye shes gsang ba sgrub pa'i thabs/__/sprul pa'i sku mchog zung gis bskul/__/gdong sna mchog sprul rin po che dang /__smar khams rgyal sras mchog sprul rnam gnyis yin lags/__mchan/__/'jam dbyangs chos kyi blo gros pas/__/gang shar gang dran yi ger bris/__/dge bas 'khor ba dong sprugs shog__///__