ལྷ་དང་བཅས་པའི་སྟོན་པ་མཉམ་མེད་ཐུབ་པའི་དབང་པོའི་བླ་མའི་རྣལ་འབྱོར་བྱིན་རླབས་རོལ་མཚོ།

🚧 This website is under continued development. We appreciate your patience!

First text in volume. Back to Volume PageNext Text

Wylie title	lha dang bcas pa'i ston pa mnyam med thub pa'i dbang po'i bla ma'i rnal 'byor byin rlabs rol mtsho
Location	chos kyi blo gros bka' 'bum Volume 4, Text 1, Pages 1-7 (Folios 1a1 to 4a1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	ཤཱཀྱ་ཐུབ་པ་ (Śākyamuni)
Citation	'jam dbyangs mkhyen brtse chos kyi blo gros. lha dang bcas pa'i ston pa mnyam med thub pa'i dbang po'i bla ma'i rnal 'byor byin rlabs rol mtsho. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 4: 1-7. Bir, H.P.: Khyentse Labrang, 2012.
Genre	Guru Yoga Texts - bla ma'i rnal 'byor
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/merry-sea-buddha-guru-yoga
Colophon	།ཅེས་པའང་མེ་བྱ་ཟླ་བཅུ་གཉིས་ཚེས་ལྔ་ལ་བྷོ་དྷི་གྷ་ཡའི་བྱང་ཆུབ་ཆེན་པོར་མཆོད་འབུལ་གསོལ་སྨོན་སྐབས་སྔ་ཕྱིར་ཉམས་ཀྱི་བརྫུན་རིས་ལ་གསལ་བ་ལྟར། ཟླ་བ་དེའི་ཚེས་བདུན་ལ་བྱ་རྒོད་སྤུངས་རིའི་ཉེ་འདབ་རྒྱལ་པོའི་ཁབ་ཏུ་གྲགས་པའི་གནས་ཆེན་ནས་ཆོས་ཀྱི་བློ་གྲོས་པས་སྤེལ་བ་སིདྡྷི་རསྟུ།།
	/ces pa'ang me bya zla bcu gnyis tshes lnga la b+ho d+hi g+ha ya'i byang chub chen por mchod 'bul gsol smon skabs snga phyir nyams kyi brdzun ris la gsal ba ltar/__zla ba de'i tshes bdun la bya rgod spungs ri'i nye 'dab rgyal po'i khab tu grags pa'i gnas chen nas chos kyi blo gros pas spel ba sid+d+hi rastu//

1 Texts in this Section (sde tshan or chos tshan)

1-7	ལྷ་དང་བཅས་པའི་སྟོན་པ་མཉམ་མེད་ཐུབ་པའི་དབང་པོའི་བླ་མའི་རྣལ་འབྱོར་བྱིན་རླབས་རོལ་མཚོ། lha dang bcas pa'i ston pa mnyam med thub pa'i dbang po'i bla ma'i rnal 'byor byin rlabs rol mtsho Guru Yoga Texts - bla ma'i rnal 'byor	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །ལྷ་དང་བཅས་པའི་སྟོན་པ་མཉམ་མེད་ཐུབ་པའི་དབང་པོའི་བླ་མའི་རྣལ་འབྱོར་བྱིན་རླབས་རོལ་མཚོ་ཞེས་བྱ་བ་བཞུགས། །ཐུབ་དབང་སྐུ་གསུམ་གྱི་བླ་མའི་རྣལ་འབྱོར་ནི། སྐྱབས་སེམས་རྒྱས་བསྡུས་ཅི་རིགས་དང་། ཚད་མེད་བཞི་བསྒོམ་ལ། ཨ། མདུན་མཁར་མཆོད་སྤྲིན་རྒྱ་མཚོ་འཁྲིགས་པའི་དབུས། །རིན་ཆེན་ཁྲི་རྐང་སེང་གེ་གླང་ཆེན་དང་། །རྟ་མཆོག་རྨ་བྱས་བཏེགས་པའི་ཁྲི་ཡི་ཁར། །སྣ་ཚོགས་པདྨ་འདབ་སྟོང་བརྡལ་བ་ལ། །ཉི་མ་ཟླ་བ་རྒྱས་པའི་གདན་སྟེང་དུ། །རྩ་བའི་བླ་མ་སྤྲུལ་སྐུ་ཐུབ་པ་ཆེ། །དྲི་མེད་གསེར་གྱི་ལྷུན་པོ་ལྟ་བུར་བརྗིད། །མཚན་དཔེའི་དཔལ་འབར་ཆོས་གོས་རྣམ་གསུམ་གསོལ། །ཕྱག་གཡས་ས་གནོན་གཡོན་པ་མཉམ་བཞག་དང་། །ཞབས་ཟུང་རྡོ་རྗེའི་སྐྱིལ་ཀྲུང་དྲང་པོར་བཞུགས། །ཐུགས་ཀར་ཆུ་སྐྱེས་རབ་ཏུ་རྒྱས་པའི་སྟེང་། །ལོངས་སྐུ་སྟོན་པ་རྡོ་རྗེ་འཆང་ཆེན་པོ། །དབང་སྔོན་བཻཌཱུའི་མདོག་འཆང་དབུ་བརྒྱན་སོགས། །རིན་ཆེན་རྒྱན་དང་ལྷ་རྫས་དར་གྱིས་བཀླུབས། །ཐབས་ཤེས་ཟུང་འཇུག་རྡོར་དྲིལ་ཐུགས་ཀར་བསྣོལ། །ཟག་མེད་བདེ་བ་ཆེན་པོས་ཡོངས་ཁེངས་ཤིང་། །དེ་ཡི་ཐུགས་དབུས་འོད་ཀྱི་གུར་ཁྱིམ་ཀློང་། །ཆོས་སྐུ་ཀུན་བཟང་མཐིང་གསལ་ནམ་མཁའི་མདངས། །གཅེར་བུ་རྒྱན་མེད་ཀུན་བཟང་དཀར་མོར་འཁྲིལ། །ཐུབ་དབང་སྐུ་ཡི་འོད་ཟེར་ཕུང་པོ་ལས། །ཕྱོགས་བཅུའི་སངས་རྒྱས་བྱང་སེམས་ཉི་རྡུལ་ལྟར། །འཁྲིགས་པར་གསལ་བའི་གནས་གསུམ་འབྲུ་གསུམ་གསལ། །འོད་འཕྲོས་ཡེ་ཤེས་སེམས་དཔའ་སྤྱན་དྲངས་གྱུར། །མ་ལུས་སེམས་ཅན་ཀུན་གྱི་མགོན་གྱུར་ཅིང་། །སོགས་ཤྭ་ལོ་ཀ་གསུམ། བཛྲ་ས་མ་ཡ་ཛཿཛཿཧཱུྃ་བྃ་ཧོཿ དབྱེར་མེད་དུ་བསྟིམ། བཟང་སྤྱོད་ནས་འབྱུང་བའི་ཡན་ལག་བདུན་པ་དང་། གུར་ནས་འབྱུང་བའི་རྒྱུན་བཤགས་ལན་གསུམ་བྱ། མཎྜལ་རྒྱས་བསྡུས་གྲངས་མང་འབུལ། སྔ་འགྱུར་གྱི་རྒྱུད་ནས་འབྱུང་བའི་དམ་བཅའ་ཉེར་བརྒྱད་པའམ། ཨོཾ། བདེ་བར་གཤེགས་པ་ཁྱེད་ཅི་འདྲ། སོགས་བརྗོད་ལ། བླ་མ་སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྒྱལ་བ་ཤཱཀྱ་ཐུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། ཞེས་དད་མོས་རྩེ་གཅིག་པས་གྲངས་ཅི་ནུས་བསགས། སྟོན་པ་མཉམ་མེད་འདྲེན་མཆོག་ཤཱཀྱའི་ཏོག །ངེས་པ་ལྔ་ལྡན་ཁྱབ་བདག་རྡོ་རྗེ་འཆང་། །ནམ་མཁའ་དང་མཉམ་ཆོས་སྐུ་ཀུན་ཏུ་བཟང་། །སྐུ་གསུམ་དབྱེར་མེད་ཐུབ་མཆོག་དོན་ཀུན་གྲུབ། །སྙིང་ནས་རྩེ་གཅིག་གུས་པས་གསོལ་འདེབས་ན། །བྱིན་རླབས་དངོས་གྲུབ་སྩོལ་ཅིག་ཤཱཀྱའི་ཏོག །བདེ་སྟོང་ཡེ་ཤེས་སྐྱེད་ཅིག་རྡོ་རྗེ་འཆང་། །ཡེ་གྲོལ་གཞིར་གནས་ཁྱབ་བདག་ཀུན་ཏུ་བཟང་། །ཟག་མེད་ཚུལ་ཁྲིམས་ཕུང་པོ་ཡོངས་སུ་རྫོགས། །ས་ལམ་ཡོན་ཏན་མ་ལུས་མཐར་ཕྱིན་ཏེ། །སྲིད་ཞིར་མི་གནས་བྱང་ཆུབ་དམ་པ་བརྙེས། །ཁམས་གསུམ་འཁོར་བ་དོང་ནས་སྤྲུགས་ནུས་ཤོག །ཅེས་པས་ཀྱང་གསོལ་བ་བཏབ། ཐུབ་པའི་མཚན་སྔགས་རིང་ཐུང་དང་། སངས་རྒྱས་སྤྱི་སྔགས། མཛོད་སྤུ་ནོར་བུའི་གཟུངས། ཡེ་དྷརྨ་བཅས་བཟླ་ཞིང་། གཞན་ཡང་། ཨོཾ་ཨཱཿགུ་རུ་བཛྲ་དྷཱ་ར་ཧཱུྃ། ཞེས་དང་། ཨོཾ་ཨཱཿཧཱུྃ། གྲངས་གང་མང་བཟླ། ཀུན་བཟང་ཐུགས་ཀར་ཐིག་ལེ་སེར། །ཞིང་ཁམས་སྣ་ཚོགས་གསལ་བ་དང་། །འོད་འཕྲོས་འགྲོ་བའི་དོན་གཉིས་བྱས། །ཚུར་འདུས་ཐིག་ལེ་ལ་བསྟིམ་ཞིང་། །ཕྲ་ཞིང་བརྟག་པར་དཀའ་བ་ཡི། །ཐིག་ལེ་སྟོང་པ་ཆེན་པོ་ལས། །ཐིག་ལེ་ལྔ་དང་བརྒྱ་ཕྲག་སོགས། །སྔགས་ཀྱིས་མཚན་པས་ནམ་མཁའ་གང་། །ཆོས་ཉིད་རང་སྒྲ་ལྡིར་བ་དང་། །གྲགས་སྟོང་རྡོ་རྗེའི་སྔགས་སུ་རྫོགས། །སླར་འདུས་རྩ་བའི་ཐིག་ལེར་བསྟིམ། །དེ་ཡང་ཆོས་ཀྱི་དབྱིངས་སུ་ཡལ། །བླ་མ་སྐུ་གསུམ་དགོངས་པའི་ངང་། །བསྐྱངས་ལ་དུས་གསུམ་རྟོག་བྲལ་བཞག །སླར་ཡང་སྐུ་གསུམ་ལྷ་ཚོགས་ལས། །སྐུ་འོད་སྔགས་ཕྲེང་ཕྱག་མཚན་དང་། །བདུད་རྩིའི་རྒྱུན་བཅས་བྱུང་བ་དང་། །རང་གི་གནས་བཞིར་ཐིམ་པ་ལས། །སྒྲིབ་དག་དབང་དང་དངོས་གྲུབ་ཐོབ། །བླ་མའི་སྐུ་གསུམ་བྱིན་རླབས་ཞུགས། །མཐར་ནི་འོད་ཞུ་རང་ལ་ཐིམ། །རང་ལུས་བླ་མའི་སྐུ་རུ་གསལ། རྗེས་ལ་བཟང་པོ་སྤྱོད་པ་དང་། །ཐུབ་པས་རྗེས་འཛིན་སྨོན་ལམ་ནི། བདག་ནི་སྐྱེ་ཞིང་སྐྱེ་བ་ཐམས་ཅད་དུ། །དལ་འབྱོར་རྟེན་ཐོབ་ཡང་དག་བཤེས་དང་མཇལ། །ཐེག་ཆེན་ཟབ་དང་རྒྱ་ཆེའི་ཆོས་ལ་སྤྱོད། །ཚུལ་བཞིན་ཉམས་བླང་བྱང་ཆུབ་ཐོབ་པར་ཤོག །ཚེ་རབས་ཀུན་ཏུ་ཐུབ་པའི་ཆོས་མཛོད་འཛིན། །མཁྱེན་བརྩེ་ནུས་པའི་ཡོན་ཏན་དཔག་མེད་ལྡན། །ཐོས་བསམ་སྒོམ་ལ་རྟག་ཏུ་བརྩོན་པ་ཡིས། །རྒྱལ་བའི་བསྟན་ལ་བྱ་བ་བྱེད་པར་ཤོག །བསྟན་ལ་འཁུ་བའི་མུ་སྟེགས་ཀླ་ཀློའི་ཚོགས། །བདག་གི་སྟོབས་ཀྱིས་རྩད་ནས་གཞོམ་པ་དང་། །བསམ་སྦྱོར་ངན་པའི་གནོད་པས་མི་བརྫི་བར། །ཕྱོགས་ལས་རྣམ་པར་རྒྱལ་བར་བྱིན་གྱིས་རློབས། །ཚེ་མཐར་ཕྱིན་ཅིང་བསམ་དོན་ཡིད་བཞིན་འགྲུབ། །རབ་འབྱམས་གསུང་རབས་ཀུན་གྱི་དེ་ཉིད་ལ། །ཐོགས་མེད་བློ་གྲོས་སྤོབས་པའི་གཏེར་ཆེན་འབྱེད། །རྩོད་འཆད་རྩོམ་ལ་ཆགས་ཐོགས་མེད་པར་ཤོག །བདག་ལ་འབྲེལ་བའི་སེམས་ཅན་ཇི་སྙེད་དང་། །ནམ་མཁས་ཁྱབ་པའི་འགྲོ་བ་མཐའ་དག་གི། སྡུག་བསྔལ་ཀུན་བསལ་བདེ་ལྡན་ཞིང་དུ་དྲོངས། །ཕྱིན་ཆད་ལས་ངན་སྐྱེ་སྒོ་ཆོད་པར་ཤོག །མགོན་པོ་འཇམ་པའི་དབྱངས་ཀྱི་ཐུགས་བསྐྱེད་ལྟར། །སེམས་ཅན་དོན་དུ་འཁོར་བར་གནས་པ་དང་། །བྱང་ཆུབ་སེམས་ཀྱི་ཕྲིན་ལས་ཆེན་པོ་ཡིས། །ཕྱོགས་དུས་མུ་མཐའ་མེད་པར་ཁྱབ་པར་ཤོག །ཅེས་སོགས་ཀྱི་སྨོན་ལམ་གདབ་བོ། །ཅེས་པའང་མེ་བྱ་ཟླ་བཅུ་གཉིས་ཚེས་ལྔ་ལ་བྷོ་དྷི་གྷ་ཡའི་བྱང་ཆུབ་ཆེན་པོར་མཆོད་འབུལ་གསོལ་སྨོན་སྐབས་སྔ་ཕྱིར་ཉམས་ཀྱི་བརྫུན་རིས་ལ་གསལ་བ་ལྟར། ཟླ་བ་དེའི་ཚེས་བདུན་ལ་བྱ་རྒོད་སྤུངས་རིའི་ཉེ་འདབ་རྒྱལ་པོའི་ཁབ་ཏུ་གྲགས་པའི་གནས་ཆེན་ནས་ཆོས་ཀྱི་བློ་གྲོས་པས་སྤེལ་བ་སིདྡྷི་རསྟུ།། །།

[edit]

@#/__/lha dang bcas pa'i ston pa mnyam med thub pa'i dbang po'i bla ma'i rnal 'byor byin rlabs rol mtsho zhes bya ba bzhugs/__/ thub dbang sku gsum gyi bla ma'i rnal 'byor ni/__skyabs sems rgyas bsdus ci rigs dang /__tshad med bzhi bsgom la/__a/__mdun mkhar mchod sprin rgya mtsho 'khrigs pa'i dbus/__/rin chen khri rkang seng ge glang chen dang /__/rta mchog rma byas btegs pa'i khri yi khar/__/sna tshogs pad+ma 'dab stong brdal ba la/__/nyi ma zla ba rgyas pa'i gdan steng du/__/rtsa ba'i bla ma sprul sku thub pa che/__/dri med gser gyi lhun po lta bur brjid/__/mtshan dpe'i dpal 'bar chos gos rnam gsum gsol/__/phyag g.yas sa gnon g.yon pa mnyam bzhag dang /__/zhabs zung rdo rje'i skyil krung drang por bzhugs/__/thugs kar chu skyes rab tu rgyas pa'i steng /__/longs sku ston pa rdo rje 'chang chen po/__/dbang sngon baiDU'i mdog 'chang dbu brgyan sogs/__/rin chen rgyan dang lha rdzas dar gyis bklubs/__/thabs shes zung 'jug rdor dril thugs kar bsnol/__/zag med bde ba chen pos yongs khengs shing /__/de yi thugs dbus 'od kyi gur khyim klong /__/chos sku kun bzang mthing gsal nam mkha'i mdangs/__/gcer bu rgyan med kun bzang dkar mor 'khril/__/thub dbang sku yi 'od zer phung po las/__/phyogs bcu'i sangs rgyas byang sems nyi rdul ltar/__/'khrigs par gsal ba'i gnas gsum 'bru gsum gsal/__/'od 'phros ye shes sems dpa' spyan drangs gyur/__/ma lus sems can kun gyi mgon gyur cing /__/sogs shwa lo ka gsum/__badz+ra sa ma ya dzaHdzaHhU~M ba~M hoHdbyer med du bstim/__bzang spyod nas 'byung ba'i yan lag bdun pa dang /__gur nas 'byung ba'i rgyun bshags lan gsum bya/__maN+Dal rgyas bsdus grangs mang 'bul/__snga 'gyur gyi rgyud nas 'byung ba'i dam bca' nyer brgyad pa'am/__oM/__bde bar gshegs pa khyed ci 'dra/__sogs brjod la/__bla ma ston pa bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dpal rgyal ba shAkya thub pa la phyag 'tshal lo/__/mchod do skyabs su mchi'o/__/byin gyis brlab tu gsol/__zhes dad mos rtse gcig pas grangs ci nus bsags/__ston pa mnyam med 'dren mchog shAkya'i tog__/nges pa lnga ldan khyab bdag rdo rje 'chang /__/nam mkha' dang mnyam chos sku kun tu bzang /__/sku gsum dbyer med thub mchog don kun grub/__/snying nas rtse gcig gus pas gsol 'debs na/__/byin rlabs dngos grub stsol cig shAkya'i tog__/bde stong ye shes skyed cig rdo rje 'chang /__/ye grol gzhir gnas khyab bdag kun tu bzang /__/zag med tshul khrims phung po yongs su rdzogs/__/sa lam yon tan ma lus mthar phyin te/__/srid zhir mi gnas byang chub dam pa brnyes/__/khams gsum 'khor ba dong nas sprugs nus shog__/ces pas kyang gsol ba btab/__thub pa'i mtshan sngags ring thung dang /__sangs rgyas spyi sngags/__mdzod spu nor bu'i gzungs/__ye d+harma bcas bzla zhing /__gzhan yang /__oM AHgu ru badz+ra d+hA ra hU~M/__zhes dang /__oM AHhU~M/__grangs gang mang bzla/__kun bzang thugs kar thig le ser/__/zhing khams sna tshogs gsal ba dang /__/'od 'phros 'gro ba'i don gnyis byas/__/tshur 'dus thig le la bstim zhing /__/phra zhing brtag par dka' ba yi/__/thig le stong pa chen po las/__/thig le lnga dang brgya phrag sogs/__/sngags kyis mtshan pas nam mkha' gang /__/chos nyid rang sgra ldir ba dang /__/grags stong rdo rje'i sngags su rdzogs/__/slar 'dus rtsa ba'i thig ler bstim/__/de yang chos kyi dbyings su yal/__/bla ma sku gsum dgongs pa'i ngang /__/bskyangs la dus gsum rtog bral bzhag__/slar yang sku gsum lha tshogs las/__/sku 'od sngags phreng phyag mtshan dang /__/bdud rtsi'i rgyun bcas byung ba dang /__/rang gi gnas bzhir thim pa las/__/sgrib dag dbang dang dngos grub thob/__/bla ma'i sku gsum byin rlabs zhugs/__/mthar ni 'od zhu rang la thim/__/rang lus bla ma'i sku ru gsal/__rjes la bzang po spyod pa dang /__/thub pas rjes 'dzin smon lam ni/__bdag ni skye zhing skye ba thams cad du/__/dal 'byor rten thob yang dag bshes dang mjal/__/theg chen zab dang rgya che'i chos la spyod/__/tshul bzhin nyams blang byang chub thob par shog__/tshe rabs kun tu thub pa'i chos mdzod 'dzin/__/mkhyen brtse nus pa'i yon tan dpag med ldan/__/thos bsam sgom la rtag tu brtson pa yis/__/rgyal ba'i bstan la bya ba byed par shog__/bstan la 'khu ba'i mu stegs kla klo'i tshogs/__/bdag gi stobs kyis rtsad nas gzhom pa dang /__/bsam sbyor ngan pa'i gnod pas mi brdzi bar/__/phyogs las rnam par rgyal bar byin gyis rlobs/__/tshe mthar phyin cing bsam don yid bzhin 'grub/__/rab 'byams gsung rabs kun gyi de nyid la/__/thogs med blo gros spobs pa'i gter chen 'byed/__/rtsod 'chad rtsom la chags thogs med par shog__/bdag la 'brel ba'i sems can ji snyed dang /__/nam mkhas khyab pa'i 'gro ba mtha' dag gi/__sdug bsngal kun bsal bde ldan zhing du drongs/__/phyin chad las ngan skye sgo chod par shog__/mgon po 'jam pa'i dbyangs kyi thugs bskyed ltar/__/sems can don du 'khor bar gnas pa dang /__/byang chub sems kyi phrin las chen po yis/__/phyogs dus mu mtha' med par khyab par shog__/ces sogs kyi smon lam gdab bo/__/ces pa'ang me bya zla bcu gnyis tshes lnga la b+ho d+hi g+ha ya'i byang chub chen por mchod 'bul gsol smon skabs snga phyir nyams kyi brdzun ris la gsal ba ltar/__zla ba de'i tshes bdun la bya rgod spungs ri'i nye 'dab rgyal po'i khab tu grags pa'i gnas chen nas chos kyi blo gros pas spel ba sid+d+hi rastu//____//