མཉམ་མེད་ལྷ་གཅིག་དཱི་པཾ་ཀ་ར་ལ་བསྟོད་པ་ཁུ་བྱུག་མགྲིན་པའི་གླུ་དབྱངས།

🚧 This website is under continued development. We appreciate your patience!

Previous Text Back to Volume PageNext Text

Wylie title	mnyam med lha gcig dI paM ka ra la bstod pa khu byug mgrin pa'i glu dbyangs
Location	chos kyi blo gros bka' 'bum Volume 2, Text 75, Pages 613-616 (Folios 1a1 to 2b4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	ཇོ་བོ་རྗེ་ཨ་ཏི་ཤ་ (Atiśa)
Citation	'jam dbyangs mkhyen brtse chos kyi blo gros. mnyam med lha gcig dI paM ka ra la bstod pa khu byug mgrin pa'i glu dbyangs. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 2: 613-616. Bir, H.P.: Khyentse Labrang, 2012.
Genre	Verses of Praise - bstod pa
Colophon	།ཅེས་པའང་ས་སྟག་སྣྲོན་ཟླ་བའི་ཚེས་བརྒྱད་བཟང་པོར་ཆོས་ཀྱི་བློ་གྲོས་ཀྱིས་སྨྲས་རིམ་བཞིན་དད་སློབ་ཞི་བའི་སྙིང་པོས་ཡི་གེར་བཀོད་པ་འདིས་ཀྱང་བདག་གཞན་སེམས་ཅན་ཐམས་ཅད་ཀྱི་རྒྱུད་ལ་བྱང་ཆུབ་ཀྱི་སེམས་རིན་པོ་ཆེ་མྱུར་དུ་སྐྱེ་ཞིང་མི་ཉམས་གོང་འཕེལ་དུ་འབྱུང་བའི་རྒྱུར་གྱུར་ཅིག །ཤུབྷཾ་མསྟུ་སརྦ་ཛ་ག་ཏཾ། །
	/ces pa'ang sa stag snron zla ba'i tshes brgyad bzang por chos kyi blo gros kyis smras rim bzhin dad slob zhi ba'i snying pos yi ger bkod pa 'dis kyang bdag gzhan sems can thams cad kyi rgyud la byang chub kyi sems rin po che myur du skye zhing mi nyams gong 'phel du 'byung ba'i rgyur gyur cig__/shub+haM mastu sarba dza ga taM/

1 Texts in this Section (sde tshan or chos tshan)

613-616	མཉམ་མེད་ལྷ་གཅིག་དཱི་པཾ་ཀ་ར་ལ་བསྟོད་པ་ཁུ་བྱུག་མགྲིན་པའི་གླུ་དབྱངས། mnyam med lha gcig dI paM ka ra la bstod pa khu byug mgrin pa'i glu dbyangs Verses of Praise - bstod pa	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

མཉམ་མེད་ལྷ་གཅིག་དཱི་པཾ་ཀ་ར་ལ་བསྟོད་པ་ཁུ་བྱུག་མགྲིན་པའི་གླུ་དབྱངས་ཞེས་བྱ་བ་བཞུགས་སོ། །ན་མོ་གུ་རུ་དཱི་པཾ་ཀཱ་རཱ་ཡ། ལྷ་བརྒྱའི་ཚོགས་ཀྱི་ཡུལ་ན་སེམས་དཔའ་ཆེ། །བྱམས་ཆེན་དགྱེས་པའི་སྲས་ཀྱི་ཐུ་བོ་མཆོག །རྒྱལ་སྲས་བཟང་པོ་སྐྱོང་ཞེས་མཚན་སྙན་ལྡན། །འཕགས་ཆེན་དབུས་ན་གཟི་བརྗིད་ལྷམ་མེར་བཞུགས། །གང་ཁྱོད་སྲིད་ཞིའི་སྤྲོས་པ་ལས་འདས་ཤིང་། །དེ་བཞིན་གཤེགས་པ་རྣམས་དང་རོ་མཉམ་པའི། །མི་ཟད་རྒྱན་འཁོར་ཉེར་ལྔར་དབང་འབྱོར་བས། །ངོ་མཚར་སྒྱུ་མའི་རོལ་རྩེད་ཅིར་ཡང་ངོམས། །འཕགས་ཡུལ་པཎ་གྲུབ་ཡོངས་ཀྱི་གཙུག་ཏོར་རྩེར། །ཞབས་སེན་རྡུལ་འོད་འཇོག་ལ་སྙེམས་བྲལ་ཞིང་། །འཛམ་གླིང་མཛེས་པར་བྱེད་པའི་རྒྱན་ཅིག་པུ། །ས་ཆེན་འདི་ན་སྔོན་མེད་སྐྱེས་མཆོག་རྒྱལ། །ཕྱི་རུ་རྣམ་དག་གཙང་མའི་གོས་ཀྱིས་བཀླུབས། །ནང་དུ་གཞན་ཕན་བྱང་ཆུབ་སེམས་མཆོག་ལྡན། །གསང་བ་གདན་གསུམ་རྡོ་རྗེའི་བདག་ཉིད་ཆེ། །ཀུན་མཁྱེན་ཉི་མའི་གཉེན་གྱི་རྒྱལ་ཚབ་མཆོག །ཡི་དམ་ལྷ་ཡིས་ལུང་གི་བརྡས་བསྐུལ་ཚེ། །བྱང་ཕྱོགས་གངས་རིའི་ལྗོངས་ལ་ལྷག་པར་བརྩེ། །ཐུགས་རྗེ་ཉིན་མོར་བྱེད་པའི་འཛུམ་གྲོལ་བས། །བསིལ་ལྡན་ས་ཡི་གདུ་བུ་ལྷག་པར་བཞད། །ལོག་རྟོག་གླང་པོ་མྱོས་པའི་སྣ་ཞགས་རྣམས། །ཁྱེད་ཀྱི་མཁྱེན་སྟོབས་ནུས་པའི་རལ་གྲིས་གཅོད། །ཡང་དག་ས་སྲུང་གསེར་གྱི་དྲྭ་བ་ཅན། །འཛིན་མའི་སྤང་ལྗོངས་ཡངས་པར་དལ་གྱིས་རྒྱུ། །བྱང་ཆུབ་ལམ་གྱི་རིམ་པའི་བང་མཛོད་ལས། །བྱང་ཆུབ་སྤྱོད་པ་རྒྱ་མཚོའི་གཏེར་བརྡོལ་བས། །བྱང་ཆུབ་རིགས་ཀྱི་འགྲོ་བ་མ་ལུས་ཀུན། །བྱང་ཆུབ་མཆོག་གི་སྦྱིན་པས་ཡོངས་སུ་ཚིམས། །རྒྱ་གར་མཁས་གྲུབ་བརྒྱ་དང་ལྔ་བཅུ་ལས། །ཟབ་མོ་ལྟ་དང་རྒྱ་ཆེ་སྤྱོད་པའི་རྒྱུད། །མན་ངག་བྱིན་རླབས་བཀའ་བབ་མ་ལུས་པ། །གང་ཐུགས་དཔལ་བེའུར་སྡུད་མཛད་ཨ་ཏི་ཤ། །གང་གིས་སྒྱུ་མ་ལྟ་བུའི་ཏིང་ངེ་འཛིན། །དཔའ་བར་འགྲོ་དང་རྡོ་རྗེའི་ཏིང་འཛིན་སོགས། །ཟབ་ཅིང་གཏིང་དཔག་དཀའ་ལ་འཇུག་ལྡང་གིས། །དཔའ་ཆེན་རྒྱལ་བའི་སྲས་ཀྱི་རྣམ་ཐར་སྒྲུབ། །སྤྱན་དང་མངོན་ཤེས་རྫུ་འཕྲུལ་སྟོབས་དག་དང་། །ཟད་པ་ཟིལ་གནོན་ལ་སོགས་དབང་འབྱོར་ཞིང་། །ཡེ་ཤེས་ཆེན་པོའི་ཆོ་འཕྲུལ་མཐའ་ཡས་པས། །བདུད་ཀྱི་དཔའ་བཀོང་འགྲོ་ལ་ཕན་བདེ་སྦྱིན། །ཁྱད་པར་བྱང་ཕྱོགས་ཨུ་པ་སི་ཀ་ཞེས། །འཕགས་མའི་ཞལ་གྱི་མཆུ་སྒྲོས་ལེགས་བྱེ་བས། །ལུང་བསྟན་བདེན་དོན་མངོན་དུ་གྱུར་པ་ཡི། །སྙིང་རྗེའི་ཟླ་ཞལ་འབྲོམ་རྗེ་རྐང་གཉིས་གཙོ། །ཡབ་མེས་ཏི་སེའི་ལྷུན་པོ་ལས་འོངས་པའི། །བཀའ་གདམས་ཁ་འབབ་རྣམ་བཞིའི་ཀླུང་ཆེན་གྱིས། །ཐུབ་བསྟན་རིན་ཆེན་ནོར་བུའི་རྡུལ་བྱེ་འདྲེན། །ཀུན་དང་མཐུན་ཞིང་ཀུན་ལས་ཁྱད་པར་ཆེ། །གསེར་རིའི་དབུས་ན་ལྷུན་པོ་ལྟར་འཕགས་ཤིང་། །རྡུལ་བྲལ་ཤིན་ཏུ་གཙང་བའི་རྣམ་པར་ཐར། །དཔལ་ལྡན་ཀླུ་དབང་རོལ་པའི་བསྟི་གནས་ཆེ། ཨུ་དུམ་ཝཱ་རའི་ཕྲེང་མཛེས་ཐོད་དུ་བཅིངས། །ཚོགས་ཆེན་བསགས་པས་དགེ་འདུན་སྡེ་ཆེན་རྒྱས། །རླབས་ཆེན་སྤྱོད་པས་འགྲོ་དོན་རྒྱ་ཆེར་འཕེལ། །མཐུ་ཆེན་གྲགས་ལྡན་རྒྱ་མཚོའི་རླབས་ཆེན་གཡོ། །བརྩེ་ཆེན་འདྲེན་པ་ས་ཆེན་རྡུལ་བཞིན་ཁེངས། །ཀུན་མཁྱེན་རྒྱལ་བ་ཐུབ་པའི་བསྟན་པ་ནི། །སྙིགས་མ་རྩོད་པ་རྒྱས་པའི་དུས་འདིར་ཡང་། །བཤད་སྒྲུབ་ནོར་བུའི་སྒྲོན་མེ་འོད་འབར་བ། །མཉམ་མེད་ཇོ་བོ་ཡབ་སྲས་ཐུགས་རྗེའི་མཐུ། །གང་གི་བཀའ་དྲིན་གཟུགས་སུ་མཆིས་གྱུར་ན། །ནམ་མཁའ་འདི་ཡང་སྣོད་དུ་ཆུང་བ་དང་། །བརྟན་མའི་ཁྱོན་གྱིས་ལྕིད་ཀྱང་ཐེག་དཀའ་ཞིང་། །གང་གི་རང་བཞིན་བསམ་པའི་ཡུལ་ལས་འདས། །དེ་ལྟར་རྒྱལ་བ་ཉིད་དང་མཚུངས་པ་ཡི། །དཔལ་ལྡན་མར་མེ་མཛད་ལ་བསྟོད་པ་འདིའི། །ལེགས་བྱས་དགེ་བས་བདག་གཞན་སེམས་ཅན་ཀུན། །ཕན་བདེ་བླ་མེད་བྱང་ཆུབ་ཐོབ་པར་ཤོག །དེ་ལྟར་མངོན་དུ་མ་གྱུར་དེ་སྲིད་དུ། །བྱང་ཆུབ་སེམས་དཔའི་རྟེན་མཆོག་ཐོབ་པ་དང་། །ཐེག་ཆེན་དགེ་བའི་བཤེས་ཀྱིས་རྗེས་བཟུང་ཞིང་། །རྒྱལ་སྲས་སྤྱོད་པ་རྒྱ་མཚོར་འཇུག་པར་ཤོག །བདག་ཀྱང་འདི་ནས་ཚེ་འཕོས་གྱུར་མ་ཐག །དགའ་ལྡན་ཆོས་ཀྱི་འདུན་ས་ཆེན་པོ་དེར། །བྱམས་ཆེན་རྒྱལ་བ་མི་ཕམ་མགོན་པོ་དང་། །ཇོ་བོ་ཡབ་སྲས་དགྱེས་ཞལ་མངོན་གྱུར་ཤོག །བཀའ་གདམས་བསྟན་པའི་སྣང་བས་འཛམ་གླིང་ཁྱབ། །བསྟན་འཛིན་ཞབས་བརྟན་མི་མཐུན་རྒུད་པ་ཞི། །འཇིག་རྟེན་དཔལ་འཕེལ་བདེ་སྐྱིད་རབ་ཏུ་རྒྱས། །ལྷ་ཆོས་བདུན་ལྡན་བསྟན་པའི་བཀྲ་ཤིས་ཤོག །ཅེས་པའང་ས་སྟག་སྣྲོན་ཟླ་བའི་ཚེས་བརྒྱད་བཟང་པོར་ཆོས་ཀྱི་བློ་གྲོས་ཀྱིས་སྨྲས་རིམ་བཞིན་དད་སློབ་ཞི་བའི་སྙིང་པོས་ཡི་གེར་བཀོད་པ་འདིས་ཀྱང་བདག་གཞན་སེམས་ཅན་ཐམས་ཅད་ཀྱི་རྒྱུད་ལ་བྱང་ཆུབ་ཀྱི་སེམས་རིན་པོ་ཆེ་མྱུར་དུ་སྐྱེ་ཞིང་མི་ཉམས་གོང་འཕེལ་དུ་འབྱུང་བའི་རྒྱུར་གྱུར་ཅིག །ཤུབྷཾ་མསྟུ་སརྦ་ཛ་ག་ཏཾ། ། །།

[edit]

mnyam med lha gcig dI paM ka ra la bstod pa khu byug mgrin pa'i glu dbyangs zhes bya ba bzhugs so/____/na mo gu ru dI paM kA rA ya/__lha brgya'i tshogs kyi yul na sems dpa' che/____/byams chen dgyes pa'i sras kyi thu bo mchog__/rgyal sras bzang po skyong zhes mtshan snyan ldan/____/'phags chen dbus na gzi brjid lham mer bzhugs/____/gang khyod srid zhi'i spros pa las 'das shing /____/de bzhin gshegs pa rnams dang ro mnyam pa'i/____/mi zad rgyan 'khor nyer lngar dbang 'byor bas/____/ngo mtshar sgyu ma'i rol rtsed cir yang ngoms/____/'phags yul paN grub yongs kyi gtsug tor rtser/____/zhabs sen rdul 'od 'jog la snyems bral zhing /____/'dzam gling mdzes par byed pa'i rgyan cig pu/____/sa chen 'di na sngon med skyes mchog rgyal/____/phyi ru rnam dag gtsang ma'i gos kyis bklubs/____/nang du gzhan phan byang chub sems mchog ldan/____/gsang ba gdan gsum rdo rje'i bdag nyid che/____/kun mkhyen nyi ma'i gnyen gyi rgyal tshab mchog__/yi dam lha yis lung gi brdas bskul tshe/____/byang phyogs gangs ri'i ljongs la lhag par brtse/____/thugs rje nyin mor byed pa'i 'dzum grol bas/____/bsil ldan sa yi gdu bu lhag par bzhad/____/log rtog glang po myos pa'i sna zhags rnams/____/khyed kyi mkhyen stobs nus pa'i ral gris gcod/____/yang dag sa srung gser gyi drwa ba can/____/'dzin ma'i spang ljongs yangs par dal gyis rgyu/____/byang chub lam gyi rim pa'i bang mdzod las/____/byang chub spyod pa rgya mtsho'i gter brdol bas/____/byang chub rigs kyi 'gro ba ma lus kun/____/byang chub mchog gi sbyin pas yongs su tshims/____/rgya gar mkhas grub brgya dang lnga bcu las/____/zab mo lta dang rgya che spyod pa'i rgyud/____/man ngag byin rlabs bka' bab ma lus pa/____/gang thugs dpal be'ur sdud mdzad a ti sha/____/gang gis sgyu ma lta bu'i ting nge 'dzin/____/dpa' bar 'gro dang rdo rje'i ting 'dzin sogs/____/zab cing gting dpag dka' la 'jug ldang gis/____/dpa' chen rgyal ba'i sras kyi rnam thar sgrub/____/spyan dang mngon shes rdzu 'phrul stobs dag dang /____/zad pa zil gnon la sogs dbang 'byor zhing /____/ye shes chen po'i cho 'phrul mtha' yas pas/____/bdud kyi dpa' bkong 'gro la phan bde sbyin/____/khyad par byang phyogs u pa si ka zhes/____/'phags ma'i zhal gyi mchu sgros legs bye bas/____/lung bstan bden don mngon du gyur pa yi/____/snying rje'i zla zhal 'brom rje rkang gnyis gtso/____/yab mes ti se'i lhun po las 'ongs pa'i/____/bka' gdams kha 'bab rnam bzhi'i klung chen gyis/____/thub bstan rin chen nor bu'i rdul bye 'dren/____/kun dang mthun zhing kun las khyad par che/____/gser ri'i dbus na lhun po ltar 'phags shing /____/rdul bral shin tu gtsang ba'i rnam par thar/____/dpal ldan klu dbang rol pa'i bsti gnas che/__u dum wA ra'i phreng mdzes thod du bcings/____/tshogs chen bsags pas dge 'dun sde chen rgyas/____/rlabs chen spyod pas 'gro don rgya cher 'phel/____/mthu chen grags ldan rgya mtsho'i rlabs chen g.yo/____/brtse chen 'dren pa sa chen rdul bzhin khengs/____/kun mkhyen rgyal ba thub pa'i bstan pa ni/____/snyigs ma rtsod pa rgyas pa'i dus 'dir yang /____/bshad sgrub nor bu'i sgron me 'od 'bar ba/____/mnyam med jo bo yab sras thugs rje'i mthu/____/gang gi bka' drin gzugs su mchis gyur na/____/nam mkha' 'di yang snod du chung ba dang /____/brtan ma'i khyon gyis lcid kyang theg dka' zhing /____/gang gi rang bzhin bsam pa'i yul las 'das/____/de ltar rgyal ba nyid dang mtshungs pa yi/____/dpal ldan mar me mdzad la bstod pa 'di'i/____/legs byas dge bas bdag gzhan sems can kun/____/phan bde bla med byang chub thob par shog__/de ltar mngon du ma gyur de srid du/____/byang chub sems dpa'i rten mchog thob pa dang /____/theg chen dge ba'i bshes kyis rjes bzung zhing /____/rgyal sras spyod pa rgya mtshor 'jug par shog__/bdag kyang 'di nas tshe 'phos gyur ma thag__/dga' ldan chos kyi 'dun sa chen po der/____/byams chen rgyal ba mi pham mgon po dang /____/jo bo yab sras dgyes zhal mngon gyur shog__/bka' gdams bstan pa'i snang bas 'dzam gling khyab/____/bstan 'dzin zhabs brtan mi mthun rgud pa zhi/____/'jig rten dpal 'phel bde skyid rab tu rgyas/____/lha chos bdun ldan bstan pa'i bkra shis shog__/ces pa'ang sa stag snron zla ba'i tshes brgyad bzang por chos kyi blo gros kyis smras rim bzhin dad slob zhi ba'i snying pos yi ger bkod pa 'dis kyang bdag gzhan sems can thams cad kyi rgyud la byang chub kyi sems rin po che myur du skye zhing mi nyams gong 'phel du 'byung ba'i rgyur gyur cig__/shub+haM mastu sarba dza ga taM/__/____//_