ཡོངས་འཛིན་བཀའ་དྲིན་ཅན་མཁན་རིན་པོ་ཆེ་ཀུན་དཔལ་ལ་བསྟོད་པ་བཀའ་དྲིན་རྗེས་དྲན་གྱི་མེ་ཏོག་མཆོད་པ།

🚧 This website is under continued development. We appreciate your patience!

Previous Text Back to Volume PageNext Text

Wylie title	yongs 'dzin bka' drin can mkhan rin po che kun dpal la bstod pa bka' drin rjes dran gyi me tog mchod pa
Location	chos kyi blo gros bka' 'bum Volume 2, Text 74, Pages 607-611 (Folios 1a1 to 3a5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	ཀུན་བཟང་དཔལ་ལྡན་ (kun bzang dpal ldan)
Citation	'jam dbyangs mkhyen brtse chos kyi blo gros. yongs 'dzin bka' drin can mkhan rin po che kun dpal la bstod pa bka' drin rjes dran gyi me tog mchod pa. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 2: 607-611. Bir, H.P.: Khyentse Labrang, 2012.
Genre	Verses of Praise - bstod pa
Colophon	།ཅེས་པའང་མགོན་པོ་མཆོག་གི་ཚད་མེད་པའི་བཀའ་དྲིན་གྱིས་བསྐྱངས་པའི་བན་ཧྲུལ་བློ་གྲོས་རྒྱ་མཚོས་འབྲས་ལྗོངས་སྒང་ཐོག་ནས་བླ་མ་དྲན་བཞིན་བྲིས་་པ་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག །
	ces pa'ang mgon po mchog gi tshad med pa'i bka' drin gyis bskyangs pa'i ban hrul blo gros rgya mtshos 'bras ljongs sgang thog nas bla ma dran bzhin bris pa byin rlabs myur du 'jug pa'i rgyur gyur cig__/

1 Texts in this Section (sde tshan or chos tshan)

607-611	ཡོངས་འཛིན་བཀའ་དྲིན་ཅན་མཁན་རིན་པོ་ཆེ་ཀུན་དཔལ་ལ་བསྟོད་པ་བཀའ་དྲིན་རྗེས་དྲན་གྱི་མེ་ཏོག་མཆོད་པ། yongs 'dzin bka' drin can mkhan rin po che kun dpal la bstod pa bka' drin rjes dran gyi me tog mchod pa Verses of Praise - bstod pa	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

ཡོངས་འཛིན་བཀའ་དྲིན་ཅན་མཁན་རིན་པོ་ཆེ་ཀུན་དཔལ་ལ་བསྟོད་པ་བཀའ་དྲིན་རྗེས་དྲན་གྱི་མེ་ཏོག་མཆོད་པ་བཞུགས་སོ། །བླ་མ་དང་མགོན་པོ་འཇམ་དཔལ་དབྱངས་ལ་ཕྱག་འཚལ་ལོ། །གཟོད་ནས་རབ་ཏུ་ཞི་བའི་སྐུ་བརྙེས་ཀྱང་། །དེང་དུས་བདག་སོགས་འགྲོ་ལ་ཐུགས་བརྩེ་བས། །ཐེག་མཆོག་དགེ་བའི་བཤེས་ཀྱི་སྐུར་སྟོན་པ། །མཚུངས་མེད་མཁན་ཆེན་བླ་མར་བསྟོད་པར་བྱ། །སྐྱེ་འདིའི་གོང་ནས་མཁས་དང་གྲུབ་པ་ནི། །གཅིག་ཉིད་མ་ཡིན་དུ་མའི་གར་གྱིས་རོལ། །མདོ་ཁམས་ཟླ་ཆུའི་འགྲམ་དུ་ཆུ་སྦྲུལ་བལྟམས། །དམ་པའི་བག་ཆགས་ཡོངས་སུ་སད་ལ་བསྟོད། །འཇིགས་མེད་ཆོས་ཀྱི་དབང་པོས་རྗེས་སུ་བཟུང་། །ཕ་མས་བུ་ཚ་བསྐྱངས་པ་ཇི་བཞིན་དུ། །བླང་དོར་སྤྱོད་པ་ཐམས་ཅད་ལེགས་པར་བསླབ། །རྒྱལ་སྲས་ཟླ་བ་གཞོན་ནུར་གྱུར་ལ་བསྟོད། །འབྲི་ཀློག་བརྡ་སྤྲོད་དཀའ་བ་མེད་པར་མཁྱེན། །རྒྱལ་སྲས་སེམས་དཔའ་ཆེན་པོའི་ལྷ་སྙན་དུ། །ཐུགས་དམ་བསྟོད་པ་གླུར་བླངས་ལེའུ་རྣམས། །ཉིན་བཞིན་སྒྲོགས་པས་དགྱེས་པ་བསྐྱེད་ལ་བསྟོད། །དགེ་འདུན་འདུས་པར་བདེ་ཆེན་ཞིང་སྒྲུབ་ཀྱི། །སྨོན་ལམ་བཤད་པ་ཕུལ་དུ་བྱུང་བ་མཛད། །བློ་ལྡན་ངོ་མཚར་སྤྲོ་དགའ་མཆོག་ཏུ་བསྐྱེད། །འདྲེན་མཆོག་བླ་མས་དབུགས་དབྱུང་མཛད་ལ་བསྟོད། །ཞི་བ་ལྷ་དངོས་སེམས་དཔའ་ཆེན་པོ་ལས། །བྱང་ཆུབ་སྤྱོད་འཇུག་ཞག་གི་ཕུང་པོ་དྲུག །ཟབ་དང་རྒྱ་ཆེའི་ལེགས་བཤད་གསུང་སྒྲོས་རྣམས། །ཟིན་བྲིས་རྨད་དུ་བྱུང་བ་མཛད་ལ་བསྟོད། །ས་བཅུའི་སེམས་དཔའ་ཡོན་ཏན་རྒྱ་མཚོ་ལས། །རབ་བྱུང་བསྙེན་རྫོགས་ངུར་སྨྲིག་རྒྱལ་མཚན་བཞེས། །ཐུབ་པའི་བསྟན་ལ་ཁྲིམས་ལྡན་རྒྱ་མཚོའི་རྒྱན། །བཅས་རང་ཉེས་པས་གོས་པ་མེད་ལ་བསྟོད། །མཁས་པའི་དབང་པོ་བསྟན་འཛིན་ནོར་བུ་ལས། །མཚན་ཉིད་ཐེག་པའི་གཞུང་དོན་མང་པོ་གསན། །ཐོས་དང་བསམ་པས་སྒྲོ་འདོགས་ལེགས་བཅད་དེ། །མཁས་པའི་རྒྱལ་སར་འཛེག་པར་མཛད་ལ་བསྟོད། །ཁྱབ་པར་འཇམ་མགོན་མཁྱེན་བརྩེའི་དབང་པོ་དང་། །ཆོས་ཀྱི་རྡོ་རྗེ་བསྟན་པའི་ཉི་མའི་ཞབས། །བདེ་ཆེན་རྡོ་རྗེ་པདྨའི་མཚན་ཅན་སོགས། །སྙིང་ཐིག་གཙོར་གྱུར་སྨིན་གྲོལ་གསན་ལ་བསྟོད། །བདུད་འདུལ་རྣམ་རོལ་ལྕགས་ཀོང་གྲུབ་དབང་ལས། །རང་གཏེར་རྫོགས་ཆེན་ལ་སོགས་སྨིན་གྲོལ་གསན། །རྟོགས་པའི་བོགས་འདོན་མ་འོང་འབྱུང་འགྱུར་གྱི། །ལུང་བསྟན་གསལ་ཐོབ་མངོན་དུ་གྱུར་ལ་བསྟོད། །ཁྱད་པར་ཚེ་སྔོན་འབྲེལ་བའི་འཇམ་པའི་དབྱངས། །མི་ཕམ་ཕྱོགས་ལས་རྣམ་རྒྱལ་ཞབས་བསྟེན་ནས། །དབུ་ཚད་ཟབ་དོན་དཀའ་གནད་ལྷུག་པར་སྩལ། །ཐུགས་ཀྱི་སྲས་མཆོག་ཆེན་པོའི་ཞབས་ལ་བསྟོད། །འཕགས་པའི་ཡུལ་གྱི་མ་ག་དྷ་གཉིས་པ། །ཀཿཐོག་རྡོ་རྗེ་གདན་གྱི་ཆོས་གྲྭ་རུ། །སྐྱེ་སྔོན་མཁས་པ་ཤཱཀྱ་རྡོ་རྗེ་རུ། །འཁྲུངས་པའི་བག་ཆགས་ཤིན་ཏུ་གསལ་ལ་བསྟོད། །ཐམས་ཅད་མཁྱེན་དངོས་སི་ཏུ་པཎྜི་ཏ། །གསང་སྔགས་ཆོས་ཚུལ་གསར་རྙིང་རྒྱ་མཚོ་གསན། །ཐུགས་ཡིད་གཅིག་འདྲེས་མདོ་སྔགས་འཆད་སྤེལ་མཛད། །མཁས་པའི་སློབ་ཚོགས་མང་དུ་བསྐྲུན་ལ་བསྟོད། །བསྟན་གཉིས་དར་རྒྱས་གླིང་གི་ཆོས་གྲྭ་ཆེར། །མཁས་གྲུབ་གཙུག་རྒྱན་པདྨ་བི་ཛ་དང་། །མི་ཕམ་ཆོས་རྗེའི་ལེགས་གསུང་བཀའ་བསྡུ་མཛད། །ཟབ་རྒྱས་ཆོས་ཚུལ་འབུལ་བཞེས་གནང་ལ་བསྟོད། །འོག་མིན་གཉིས་པ་བཀྲ་ཤིས་ལྷ་རྩེ་ཡི། །གཟིམས་སྐྱིལ་འཆི་མེད་གྲུབ་པའི་དགའ་ཚལ་དུ། །འདུས་པའི་ཚོགས་ལ་བྱང་ཆུབ་སྤྱོད་འཇུག་དང་། །ཚད་མ་རྣམ་འགྲེལ་བཤད་པ་སྤྲོས་ལ་བསྟོད། །ཨེ་ཝྃ་ཐར་པ་རྩེ་ཡི་མཁན་ཆེན་དང་། །ཀུན་མཁྱེན་གཟིམས་སྐྱིལ་དུས་འཁོར་འགྲེལ་ཆེན་གྱི། །ངེས་གསང་ཆོས་ཀྱི་འཁོར་ལོ་ལན་གཉིས་བསྐོར། །འཇམ་དཔལ་དགྱེས་པའི་ཟབ་དགོངས་རྫོགས་ལ་བསྟོད། །རང་གི་སློབ་དཔོན་གསུང་སྒྲོས་དོར་བ་དང་། །འཕགས་བོད་འགྲེལ་པའི་ཚིག་ཡམ་བཏུས་མིན་པར། །སྔོན་གྱི་མཁས་པའི་བཞེད་གཞུང་གསུང་སྒྲོས་བཞིན། །མ་ནོར་འཁྲུལ་མེད་བསྟན་པར་མཛད་ལ་བསྟོད། །དཔྱོད་ལྡན་རྣམས་ཀྱིས་ཇི་ལྟར་བརྩད་ཅིང་འདྲི། །དེ་ཙམ་ཁྱོད་བློ་གཏིང་ཟབ་མཐའ་མི་དཔོག །བརྟོན་པ་བཞི་དང་རིགས་པ་རྣམ་པ་བཞིས། །ལན་ལྡོན་ངེས་ཤེས་བསྐྱེད་པར་མཛད་ལ་བསྟོད། །བདེན་པར་སྨྲ་ཞིང་གཡོ་སྒྱུ་ཀུན་དང་བྲལ། །ཕྱི་ཚུལ་ཉན་ཐོས་སྤྱོད་པ་དག་ཅིང་གཙང་། །ནང་དུ་བསྐྱེད་རྫོགས་རྫོགས་པ་ཆེན་པོ་ཡི། །ཟབ་དོན་ཉམས་བཞེས་གཡེལ་བ་མེད་ལ་བསྟོད། །སྒོམ་པའི་ལག་རྗེས་སྒོམ་བྱུང་ཤེས་རབ་འབར། །སྔ་འགྱུར་རྙིང་མའི་ལྟ་བ་འཛིན་པ་ལ། །དེ་ཙམ་དུས་ན་ཁྱོད་འདྲ་ཤིན་ཏུ་དཀོན། །ཀློང་རམ་གསུམ་པར་བསྔགས་འོས་ཁྱོད་ལ་བསྟོད། །རྡོ་གྲུབ་སྤྲུལ་པའི་སྐུ་མཆོག་རྣམ་གཉིས་སོགས། །སྐལ་བཟང་སློབ་མར་སྙིང་ཐིག་ཆོས་འཁོར་བསྐོར། །བསྟན་པའི་སྲོག་རྩ་ཡོངས་སུ་མཐུད་པ་དང་། །འགྲོ་དོན་ཕ་མཐའ་ཡས་པ་ཁྱོད་ལ་བསྟོད། །རྙིང་བསྟན་རྙོགས་མར་གྱུར་པའི་དུས་ཀྱི་ཚེ། །གསལ་བྱེད་ནོར་བུ་ཆུ་དྭངས་ཁྱེད་གཅིག་པུ། །མི་ཕམ་བླ་མའི་དགོངས་པ་ཇི་བཞིན་བཀྲལ། །རྟག་ཆད་མཐའ་སྤངས་དབུ་མ་སྟོན་ལ་འདུད། །ངེས་དོན་སྒྲོན་མེའི་གཞུང་འགྲེལ་ཟབ་མོ་སོགས། །བླ་མའི་དགོངས་པ་ཇི་བཞིན་བཀྲལ་བ་ཡི། །ལེགས་བཤད་རྩོམ་པ་མང་དུ་མཛད་ལ་སོགས། །སྔ་འགྱུར་བསྟན་པའི་མེ་རོ་སློང་ལ་བསྟོད། །ཡང་དག་རིག་པའི་ལམ་ནས་དྲངས་པ་ལ། །སྙིགས་དུས་ཆོས་ཀྱི་གྲགས་པར་དངོས་སྣང་བའི། །ཀུན་བཟང་དཔལ་ལྡན་ཕྱོགས་ལས་རྣམ་པར་རྒྱལ། །སྨྲ་བའི་སེང་གེ་ཆེན་པོར་དད་པས་བསྟོད། །ཆུ་ལུག་བཅུ་ཕྲག་བདུན་ལ་གཉིས་ལྷག་པར། །གཟུགས་སྐུའི་བུམ་པ་བསྡུ་བར་མ་གྱུར་བར། །ཐུགས་དམ་ཟབ་མོར་རྟག་ཏུ་བརྩོན་པ་དང་། །མདོ་སྔགས་འཆད་པས་ཉིན་མཚན་འདས་ལ་བསྟོད། །དེ་ལྟར་དཔལ་ལྡན་བླ་མ་བཀའ་དྲིན་ཅན། །ཁྱོད་ཀྱི་དྲིན་ལས་བ་ལང་བདག་འདྲ་ཡང་། །ཐོས་པའི་བག་ཆགས་ཙམ་ཞིག་སད་པ་འདི། །ཉིད་ཀྱི་དྲིན་ཐོབ་གདུང་བས་མཆི་མ་དཀུ། །མགོན་ཁྱོད་བདག་ལ་ལྷག་པར་ཐུགས་བརྩེ་བས། །བདག་གི་སྙིང་དབུས་རྟག་བཞུགས་མི་འབྲལ་སྐྱོངས། །བྱང་ཆུབ་སེམས་འབྱོངས་ཡང་དག་གནས་ལུགས་རྟོགས། །རང་གཞན་དོན་གཉིས་ལྷུན་གྱིས་འགྲུབ་པར་ཤོག །ཅེས་པའང་མགོན་པོ་མཆོག་གི་ཚད་མེད་པའི་བཀའ་དྲིན་གྱིས་བསྐྱངས་པའི་བན་ཧྲུལ་བློ་གྲོས་རྒྱ་མཚོས་འབྲས་ལྗོངས་སྒང་ཐོག་ནས་བླ་མ་དྲན་བཞིན་བྲིས་་པ་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག ། །།

[edit]

yongs 'dzin bka' drin can mkhan rin po che kun dpal la bstod pa bka' drin rjes dran gyi me tog mchod pa bzhugs so/____/bla ma dang mgon po 'jam dpal dbyangs la phyag 'tshal lo/____/gzod nas rab tu zhi ba'i sku brnyes kyang /____/deng dus bdag sogs 'gro la thugs brtse bas/____/theg mchog dge ba'i bshes kyi skur ston pa/____/mtshungs med mkhan chen bla mar bstod par bya/____/skye 'di'i gong nas mkhas dang grub pa ni/____/gcig nyid ma yin du ma'i gar gyis rol/____/mdo khams zla chu'i 'gram du chu sbrul bltams/____/dam pa'i bag chags yongs su sad la bstod/____/'jigs med chos kyi dbang pos rjes su bzung /____/pha mas bu tsha bskyangs pa ji bzhin du/____/blang dor spyod pa thams cad legs par bslab/____/rgyal sras zla ba gzhon nur gyur la bstod/____/'bri klog brda sprod dka' ba med par mkhyen/____/rgyal sras sems dpa' chen po'i lha snyan du/____/thugs dam bstod pa glur blangs le'u rnams/____/nyin bzhin sgrogs pas dgyes pa bskyed la bstod/____/dge 'dun 'dus par bde chen zhing sgrub kyi/____/smon lam bshad pa phul du byung ba mdzad/____/blo ldan ngo mtshar spro dga' mchog tu bskyed/____/'dren mchog bla mas dbugs dbyung mdzad la bstod/____/zhi ba lha dngos sems dpa' chen po las/____/byang chub spyod 'jug zhag gi phung po drug__/zab dang rgya che'i legs bshad gsung sgros rnams/____/zin bris rmad du byung ba mdzad la bstod/____/sa bcu'i sems dpa' yon tan rgya mtsho las/____/rab byung bsnyen rdzogs ngur smrig rgyal mtshan bzhes/____/thub pa'i bstan la khrims ldan rgya mtsho'i rgyan/____/bcas rang nyes pas gos pa med la bstod/____/mkhas pa'i dbang po bstan 'dzin nor bu las/____/mtshan nyid theg pa'i gzhung don mang po gsan/____/thos dang bsam pas sgro 'dogs legs bcad de/____/mkhas pa'i rgyal sar 'dzeg par mdzad la bstod/____/khyab par 'jam mgon mkhyen brtse'i dbang po dang /____/chos kyi rdo rje bstan pa'i nyi ma'i zhabs/____/bde chen rdo rje pad+ma'i mtshan can sogs/____/snying thig gtsor gyur smin grol gsan la bstod/____/bdud 'dul rnam rol lcags kong grub dbang las/____/rang gter rdzogs chen la sogs smin grol gsan/____/rtogs pa'i bogs 'don ma 'ong 'byung 'gyur gyi/____/lung bstan gsal thob mngon du gyur la bstod/____/khyad par tshe sngon 'brel ba'i 'jam pa'i dbyangs/____/mi pham phyogs las rnam rgyal zhabs bsten nas/____/dbu tshad zab don dka' gnad lhug par stsal/____/thugs kyi sras mchog chen po'i zhabs la bstod/____/'phags pa'i yul gyi ma ga d+ha gnyis pa/____/kaHthog rdo rje gdan gyi chos grwa ru/____/skye sngon mkhas pa shAkya rdo rje ru/____/'khrungs pa'i bag chags shin tu gsal la bstod/____/thams cad mkhyen dngos si tu paN+Di ta/____/gsang sngags chos tshul gsar rnying rgya mtsho gsan/____/thugs yid gcig 'dres mdo sngags 'chad spel mdzad/____/mkhas pa'i slob tshogs mang du bskrun la bstod/____/bstan gnyis dar rgyas gling gi chos grwa cher/____/mkhas grub gtsug rgyan pad+ma bi dza dang /____/mi pham chos rje'i legs gsung bka' bsdu mdzad/____/zab rgyas chos tshul 'bul bzhes gnang la bstod/____/'og min gnyis pa bkra shis lha rtse yi/____/gzims skyil 'chi med grub pa'i dga' tshal du/____/'dus pa'i tshogs la byang chub spyod 'jug dang /____/tshad ma rnam 'grel bshad pa spros la bstod/____/e wa~M thar pa rtse yi mkhan chen dang /____/kun mkhyen gzims skyil dus 'khor 'grel chen gyi/____/nges gsang chos kyi 'khor lo lan gnyis bskor/____/'jam dpal dgyes pa'i zab dgongs rdzogs la bstod/____/rang gi slob dpon gsung sgros dor ba dang /____/'phags bod 'grel pa'i tshig yam btus min par/____/sngon gyi mkhas pa'i bzhed gzhung gsung sgros bzhin/____/ma nor 'khrul med bstan par mdzad la bstod/____/dpyod ldan rnams kyis ji ltar brtsad cing 'dri/____/de tsam khyod blo gting zab mtha' mi dpog__/brton pa bzhi dang rigs pa rnam pa bzhis/____/lan ldon nges shes bskyed par mdzad la bstod/____/bden par smra zhing g.yo sgyu kun dang bral/____/phyi tshul nyan thos spyod pa dag cing gtsang /____/nang du bskyed rdzogs rdzogs pa chen po yi/____/zab don nyams bzhes g.yel ba med la bstod/____/sgom pa'i lag rjes sgom byung shes rab 'bar/____/snga 'gyur rnying ma'i lta ba 'dzin pa la/____/de tsam dus na khyod 'dra shin tu dkon/____/klong ram gsum par bsngags 'os khyod la bstod/____/rdo grub sprul pa'i sku mchog rnam gnyis sogs/____/skal bzang slob mar snying thig chos 'khor bskor/____/bstan pa'i srog rtsa yongs su mthud pa dang /____/'gro don pha mtha' yas pa khyod la bstod/____/rnying bstan rnyogs mar gyur pa'i dus kyi tshe/____/gsal byed nor bu chu dwangs khyed gcig pu/____/mi pham bla ma'i dgongs pa ji bzhin bkral/____/rtag chad mtha' spangs dbu ma ston la 'dud/____/nges don sgron me'i gzhung 'grel zab mo sogs/____/bla ma'i dgongs pa ji bzhin bkral ba yi/____/legs bshad rtsom pa mang du mdzad la sogs/____/snga 'gyur bstan pa'i me ro slong la bstod/____/yang dag rig pa'i lam nas drangs pa la/____/snyigs dus chos kyi grags par dngos snang ba'i/____/kun bzang dpal ldan phyogs las rnam par rgyal/____/smra ba'i seng ge chen por dad pas bstod/____/chu lug bcu phrag bdun la gnyis lhag par/____/gzugs sku'i bum pa bsdu bar ma gyur bar/____/thugs dam zab mor rtag tu brtson pa dang /____/mdo sngags 'chad pas nyin mtshan 'das la bstod/____/de ltar dpal ldan bla ma bka' drin can/____/khyod kyi drin las ba lang bdag 'dra yang /____/thos pa'i bag chags tsam zhig sad pa 'di/____/nyid kyi drin thob gdung bas mchi ma dku/____/mgon khyod bdag la lhag par thugs brtse bas/____/bdag gi snying dbus rtag bzhugs mi 'bral skyongs/____/byang chub sems 'byongs yang dag gnas lugs rtogs/____/rang gzhan don gnyis lhun gyis 'grub par shog__/ces pa'ang mgon po mchog gi tshad med pa'i bka' drin gyis bskyangs pa'i ban hrul blo gros rgya mtshos 'bras ljongs sgang thog nas bla ma dran bzhin bris pa byin rlabs myur du 'jug pa'i rgyur gyur cig__/__//_