ཡུལ་ལྷའི་བསང་མཆོད་ཕྲིན་ལས་མྱུར་འགྲུབ།

🚧 This website is under continued development. We appreciate your patience!

Previous Text Back to Volume Page Next Text

Wylie title	yul lha'i bsang mchod phrin las myur 'grub
Location	mdo mkhyen brtse bka' 'bum Volume 7, Text 29, Pages (Folios to )
Author	མདོ་མཁྱེན་བརྩེ་
Less details More details
Tertön	མདོ་མཁྱེན་བརྩེ་ (Mdo mkhyen brtse)
Citation
Genre	Smoke Offerings - bsangs mchod - lha bsang
Colophon	ཅེས་པའི་བསང་མཆོད་ཕྲིན་ལས་མྱུར་འགྲུབ་ཅེས་བྱ་བ་ཡབ་བསོད་ནམས་འཕན་གྱིས་བསྐུལ་ངོར། སྤྲང་སྨྱོན་ཡེ་ཤེས་རྡོ་རྗེས་བྲིས་པ་དགེའོ། །མངྒ་ལཾ། །
Colophon	ces pa'i bsang mchod phrin las myur 'grub ces bya ba yab bsod nams 'phan gyis bskul ngor/_sprang smyon ye shes rdo rjes bris pa dge'o/_/mang+ga laM/_/

[edit]

༄༅། །ཡུལ་ལྷའི་བསང་མཆོད་ཕྲིན་ལས་མྱུར་འགྲུབ་ཅེས་བྱ་བ་བཞུགས།

«བླ་མ་ལྷག་པའི་ལྷ་ལ་ཕྱག་འཚལ་ལོ། །ཡུལ་སྤྱིའི་བསང་མཆོད་བྱ་བར་འདོད་པས་ཅི་འབྱོར་བའི་ཡོ་བྱད་བཤམས་ལ་བསང་སྦྱངས།» སྟོང་པའི་ངང་ལས་ཏིང་ངེ་འཛིན་གྱི་བྱེད་ལས་ཀྱིས་ཕྱི་ནང་གསང་བའི་མཆོད་རྫས་རྣམས་འདོད་པའི་ཡོན་ཏན་ལྔའི་བཞེད་དགུའི་ལོངས་སྤྱོད་མི་ཟད་པའི་གཏེར་ཆེན་པོར་གྱུར། རཾ་ཡཾ་ཁཾ། ཨོཾ་ཨཱཿཧཱུྃ། ཀྱཻ། སྔོན་ཚེ་པདྨ་འབྱུང་གནས་ཀྱིས། །བཀའ་དང་དམ་ལ་བཞག་པ་ཡི། །ཡུལ་འདིར་གནས་པའི་གཞི་བདག་རྣམས། །མཆོད་སྦྱིན་བསང་གི་མགྲོན་དུ་གཤེགས། །དངོས་བཤམས་བསང་གསུར་ཇ་ཆང་སྐྱེམས། །ལ་སོགས་བཞེད་དགུའི་ལོངས་སྤྱོད་དང༌། །ཡིད་སྤྲུལ་ཀུན་བཟང་མཆོད་པའི་སྤྲིན། །འཛད་མེད་ནམ་མཁའི་མཛོད་ཀྱི་གཏེར། །བཞེས་ལ་པདྨའི་ཐ་ཚིག་བཞིན། །སྔ་འགྱུར་བསྟན་དང་བསྟན་འཛིན་སྡེ། །འཛིན་མའི་གར་ཁྱབ་སྤེལ་བ་ཡི། །ཕྲིན་ལས་གཡེལ་མེད་སྒྲུབ་པ་དང༌། །ཁྱད་པར་བདག་སོགས་ལྟོས་བཅས་ལ། །འཇིགས་པ་བརྒྱད་སོགས་མི་མཐུན་ཕྱོགས། །ཞི་བའི་ཕྲིན་ལས་འོད་བརྒྱའི་གཟིས། །བ་མོ་བཞུས་པ་ཇི་བཞིན་དུ། །མིང་ཙམ་མེད་པར་ཞི་བ་དང༌། །ཚེ་དང་བསོད་ནམས་དཔལ་འབྱོར་སྟོབས། །མངའ་ཐང་ལོངས་སྤྱོད་མ་ལུས་པ། །རྒྱས་པའི་ཕྲིན་ལས་ནོར་བུ་ལ། །གསོལ་བ་བཏབ་བཞིན་སྤེལ་བ་དང༌། །རྣམ་གསུམ་འདུ་བ་ལྕགས་ཀྱི་ཁམས། །མ་ལུས་དབང་གི་ཕྲིན་ལས་ཀྱིས། །ཁབ་ལེན་རྡོ་ཡི་མཆིལ་མ་ཡིས། །སྐད་ཅིག་དབང་དུ་བྱེད་པ་དང༌། འགལ་སྦྱོར་རྩོམ་པའི་ནག་ཕྱོགས་ཀྱི། །དགྲ་དང་བགེགས་ཀྱི་དཔུང་ཚོགས་ཀུན། །དྲག་པོའི་ཕྲིན་ལས་མེ་ཆར་གྱིས། །མྱུར་བ་ཉིད་དུ་བརླག་པ་དང༌། །མདོར་ན་བསམ་པའི་དོན་རྣམས་ཀུན། །འབད་མེད་ལྷུན་གྱིས་གྲུབ་པར་མཛོད། «།ཅེས་པའི་བསང་མཆོད་ཕྲིན་ལས་མྱུར་འགྲུབ་ཅེས་བྱ་བ་ཡབ་བསོད་ནམས་འཕན་གྱིས་བསྐུལ་ངོར། སྤྲང་སྨྱོན་ཡེ་ཤེས་རྡོ་རྗེས་བྲིས་པ་དགེའོ། །མངྒ་ལཾ། །