DKR-KABUM-11-DA-024

Previous Text Back to Volume PageNext Text

ལྷོ་འབྲུག་རྒྱལ་ཁབ་ཀྱི་ཡུལ་ལྷ་སྤྱི་ཡི་བསང་མཆོད་བཀྲ་ཤིས་ལྷ་ཡི་གླུ་དབྱངས་སོགས།

Wylie title	lho 'brug rgyal khab kyi yul lha spyi yi bsang mchod bkra shis lha yi glu dbyangs sogs
Location	dil mgo mkhyen brtse bka' 'bum Volume 11, Text 24, Pages 143-152 (Folios 1a to 10b3)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. Lho 'brug rgyal khab kyi yul lha spyi yi bsang mchod bkra shis lha yi glu dbyangs sogs. In Skyabs rje dil mgo mkhyen brtse rin po che'i bka' 'bum, Vol. 11: 143-152. Delhi: Shechen Publications, 1994.
Genre	Smoke Offerings - bsangs mchod - lha bsang
Deity	yul lha

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

ལྷོ་འབྲུག་རྒྱལ་ཁབ་ཀྱི་ཡུལ་ལྷ་སྤྱི་ཡི་བསང་མཆོད་བཀྲ་ཤིས་ལྷ་ཡི་གླུ་དབྱངས་ཞེས་བྱ་བཞུགས།།

ཨོཾ་སྭ་སྟི། བསང་བྱ་བར་འདོད་པས་གཏོར་མ་དཀར་དམར་ཟས་སྣ་འབྲུ་སྨན་དར་ཟབ། ཇ་ཆང་གི་སྐྱེམས་ཕུད་བཅས་གཙང་ལ་དག་པ་དང༌། ཤིང་རྩིའི་དུད་སྤྲིན་བཅས་ཆབ་ཀྱིས་བྲན་ལ། རྃ་ཡྃ་ཁྃ། ཨོཾ་ཨཱཿཧཱུྃ་དང༌། ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབས་ལ། ཀྱཻ། ཕུན་ཚོགས་སྐྱེ་དགུའི་བསོད་ནམས་ཀྱི། །དཔལ་ལས་དག་པའི་སྣོད་དང་བཅུད། །བཀོད་པ་ཅིར་ཡང་སྣང་བ་ཡི། །བྱེ་བྲག་ལྷོ་འབྲུག་ཙནྡན་ཚལ། །དགེ་བཅུའི་དཔལ་ཡོན་རབ་རྒྱས་པ། །མ་ཧཱ་གུ་རུ་མཚོ་སྐྱེས་རྗེའི། །མཚན་མཆོག་བརྒྱད་ཀྱི་བཀོད་པ་ལས། །གུ་རུ་རྡོ་རྗེ་གྲོ་ལོད་སྐུར། །བཞེངས་ནས་ལྷ་སྲིན་དམ་བཞག་པའི། །མཛད་པས་བྱིན་རླབས་རྡོ་རྗེའི་གནས། །སྟག་ཚང་སེང་གེ་བསམ་འགྲུབ་དང༌། །ཕྲིན་ལས་མི་ཟད་རྒྱན་གྱི་གནས། །ནེ་རིང་སེང་གེ་རྫོང་ཆེན་མོ། །ལྷོ་མོན་རྡོ་རྗེའི་སྐུ་ཡི་རྗེས། །བྱིན་རླབས་ངོ་མཚར་དཔལ་འབར་བ། །རིག་འཛིན་པདྨས་ཞབས་ཀྱིས་བཅགས། །རྩ་གསུམ་དཀྱིལ་འཁོར་དངོས་སུ་བཞུགས། །མཁའ་འགྲོ་ཆོས་སྐྱོང་འདུ་བའི་ཞིང༌། ངོ་མཚར་གནས་མཆོག་ཐམས་ཅད་དང༌། །ལྷུན་ཆགས་རི་དང་གངས་ཅན་བྲག །མཚོ་གླིང་ནགས་ཀྱི་ཚལ་རྣམས་ལ། །གནས་སུ་འདུ་ཤེས་མི་མ་ཡིན། །དཀར་ཕྱོགས་དགེ་བསྙེན་མཐུ་བོ་ཆེ། །ལྷ་ཀླུ་བཙན་རྒྱལ་གཉན་ས་བདག །དམུ་བདུད་ཐེའུ་རང་གཟའ་སྲིན་པོ། །གཤིན་རྗེ་གནོད་སྦྱིན་ལ་སོགས་རིགས། །མཐུ་དང་རྫུ་འཕྲུལ་སྟོབས་ལྡན་ཞིང༌། །སྣོད་བཅུད་དཔལ་ཡོན་འཛིན་སྤེལ་ཀུན། །གནས་འདིར་སྤྱན་འདྲེན་གཤེགས་སུ་གསོལ། །དགྱེས་པའི་གདན་ལ་བཞུགས་ནས་ཀྱང༌། །འདོད་དགུའི་མཆོད་པའི་དགའ་སྟོན་བཞེས། །དབྱིངས་ཕྱུག་ཡུམ་ལྔའི་སྒྱུ་འཕྲུལ་ལས། །ལེགས་ཤར་བཟང་ཤིང་སྤོས་ཀྱི་སྤྲིན། །དུ་བས་ནམ་མཁའི་དབྱིངས་ཀུན་ཁྱབ། །ངད་པས་ས་བཞིའི་ཁྱོན་རྣམ་བརྡལ། །ཟེགས་མས་བར་སྣང་གང་བ་ཀུན། །འདོད་ཡོན་རྒྱ་མཚོའི་གཏེར་འཆར་བའི། །ཀུན་བཟང་མཆོད་པའི་སྤྲིན་ཕུང་ཆེས། །རྩ་བརྒྱུད་བླ་མ་དཀོན་མཆོག་བསང༌། །ཕྱི་ནང་གསང་བའི་དམ་རྫས་ཀྱིས། །ཡི་དམ་ཞི་ཁྲོའི་དཀྱིལ་འཁོར་བསང༌། །བདེ་སྟོང་ཚོགས་ཀྱི་མཆོད་པ་ཡིས། །གནས་གསུམ་དཔའ་བོ་མཁའ་འགྲོ་བསང༌། །མཆོད་བསྐང་མཐུན་རྟེན་དམ་རྫས་ཀྱིས། །ཆོས་སྐྱོང་དམ་ཅན་རྒྱ་མཚོ་བསང༌། །བདུད་རྩི་སྐྱེམས་ཕུད་མཁོ་དགུ་ཡིས། །དཀར་ཕྱོགས་ལྷ་གཉན་ཚོགས་ཀུན་བསང༌། །ཇི་ལྟར་འོས་པའི་མཐུན་རྫས་ཀྱིས། །སྣོད་བཅུད་ཀུན་ལ་གནས་པ་བསང༌། །ཤ་ཁྲག་རྟ་ནོར་མི་ཕྱུགས་ཀྱིས། །ལྷ་སྲིན་གདུག་པའི་ཚོགས་ཀུན་བསང༌། །ཟས་སྣ་གསུར་གྱི་དྲི་ཆེན་པོས། །གཉུག་གནས་གློ་བུར་ལྷགས་པ་ཡི། །རྒྱལ་བསེན་འབྱུང་པོ་དམ་སྲི་སོགས། །བགེགས་རིགས་ལན་ཆགས་མགྲོན་ཀུན་བསང༌། །ནམ་མཁའ་མཛོད་ཀྱི་ལོངས་སྤྱོད་ཆེ། །གང་བཞེད་ཡིད་བཞིན་འཆར་བ་ཡི། །འཛད་པ་མེད་པའི་ལོངས་སྤྱོད་ཀྱིས། །སྣང་སྲིད་མགྲོན་གྱི་ཚོགས་ཀུན་བསང༌། །བདུད་རྩི་ཅན་གྱི་བཟང་པོའི་ཤིང༌། །དག་བྱེད་ནུས་པའི་རྫས་སུ་གྲུབ། །སྔགས་དང་ཏིང་འཛིན་རྒྱས་བཏབ་པས། །ཉམས་ཆགས་ཉེས་པའི་དྲི་མ་དག །ལེགས་དགུ་ལྷུན་གྱིས་གྲུབ་གྱུར་ཅིག །རིག་འཛིན་བརྒྱུད་པའི་བཀའ་བཞིན་དུ། །བསྟན་འགྲོའི་དཔལ་ཡོན་བདེ་སྐྱིད་སྤེལ། །ལུང་རྟོགས་བཤད་སྒྲུབ་སྡེ་རྒྱས་ཤིང༌། །ཁྲིམས་ལྡན་འདུས་པའི་སྡེ་འཕེལ་མཛོད། །ཆར་ཆུ་དུས་བབ་ལོ་ཕྱུག་ལེགས། །མི་ཕྱུགས་ནད་མུག་མཚོན་འཁྲུགས་ཞི། །སྣོད་བཅུད་ཀུན་དགའི་དཔལ་ཡོན་གྱིས། །མི་བདག་ཆབ་སྲིད་འཕེལ་རྒྱས་མཛོད། །ཚེ་བསོད་དཔལ་འབྱོར་རླུང་རྟ་འཕེལ། །དགྲ་གདོན་དམག་ཇག་ཞི་བ་དང༌། །ཡིད་མཐུན་དཔལ་འབྱོར་འཕེལ་བརྟན་གྱིས། །མཐོ་རིས་ཡོན་ཏན་རྫོགས་པར་མཛོད། །ཁྱེད་རྣམས་སྲིད་པ་ཆགས་པའི་ལྷ། །བདག་ཅག་གནས་མགྲོན་དམ་ཚིག་གཉན། །མཐུན་པའི་རྫས་ཀྱིས་མཆོད་ཅིང་བརྔན། །བཞེས་ལ་ཕྲིན་ལས་མྱུར་དུ་མཛོད། །རྨད་བྱུང་བྱང་ཆུབ་སེམས་ཀྱི་མཐུས། །བདག་གཞན་གཉིས་སུ་མེད་པ་ཡི། །ཕན་བདེའི་དཔལ་ཀུན་ཡིད་བཞིན་འགྲུབ། །བཀྲ་ཤིས་བདེ་ལེགས་ཕུན་ཚོགས་ཤོག །ཅེས་འབུལ་ཞིང་ཕྲིན་ལས་བཅོལ་བས་དགེ་ལེགས་སུ་བྱའོ། ཅེས་པའང་རབ་བྱུང་བཅུ་དྲུག་པའི་བྱེ་བྲག་འཕར་བ་ལྕགས་གླང་གི་ལོར་རྡོ་རྗེའི་གནས་མཆོག་སྟག་ཚང་སེང་གེ་བསམ་འགྲུབ་དུ་གནས་ཆེན་བྱིན་འབེབས་ཀྱི་ཆོ་གས་བསྟན་འགྲོའི་ཕན་བདེའི་སྤེལ་བའི་སྐབས་ཕྲིན་བཅོལ་གྱི་ཚུལ་དུ་རྒྱལ་ཁམས་ཀུན་ཏུ་རྒྱུ་བའི་རྒན་པོ་བཀྲ་ཤིས་དཔལ་འབྱོར་གྱིས་བྲིས་པས་བསྟན་འགྲོའི་དགེ་མཚན་གྱི་དཔལ་ཀུན་ལྷུན་གྱིས་གྲུབ་པའི་རྟེན་འབྱུང་དུ་གྱུར་ཅིག ༈ སྟོད་པའི་ས་ཡི་ཡུལ་ལྷའི་བསང་བཀྲ་ཤིས་ལྷ་ཡི་རོལ་མོ་བཞུགས། ཨོཾ་སྭ་སྟི། གཙང་མའི་གནས་སུ་དཀར་མངར་གྱི་ཞལ་ཟས། བསང་ཕྱེ། ཇ་ཆང་ལོངས་སྤྱོད་འདུ་བྱས་ཏེ། ཆབ་ཀྱི་བྲན་ནས་ནམ་མཁའ་མཛོད་ཀྱི་སྔགས་རྒྱས་བྱིན་བརླབ་སྟེ། ཀྱཻ། ཆོས་ཉིད་གདོད་ནས་དག་པའི་ཆོས། །རྟེན་འབྱུང་སྒྱུ་མའི་ཆོ་འཕྲུལ་གྱིས། །བཀོད་པ་བསམ་མི་ཁྱབ་པ་ལས། །སྣོད་བཅུད་བདེ་སྡུག་མ་ངེས་འཆར། །སྐྱེ་དགུའི་ལས་ཀྱི་སྣང་བ་ལས། །ཕན་གནོད་བྱེད་པའི་ལྷ་འདྲེ་སྲིད། རང་སྣང་སྟོང་དང་རྟེན་འབྲེལ་དུ། །ཤེས་པས་སྒྱུ་མ་མཁན་པོ་ཡིས། །སྒྱུ་མའི་བདེ་སྡུག་བཀོད་པ་ལྟར། །སྲིད་ལ་ཆགས་པའི་ལྷ་དང་འདྲེ། །སྙིང་རྗེའི་མགྲོན་དུ་འབོད་བཞིན་བྱོན། །དགྱེས་པས་འདིར་བཞུགས་ཡིད་འོང་གི །རྣམ་རོལ་དཀར་ཕྱོགས་སྐྱོང་བའི་ལྷ། །དགེ་བསྙེན་ཆེན་པོ་གཡོས་སྟོད་པ། །དབྱར་ས་པ་དང་མེ་རིའི་བཙན། །ཧོན་ཅུ་དཔལ་འཛོམ་རྒྱལ་མོ་དང༌། །ཆུ་བདུད་ཕྲིན་ལས་སྒང་གི་བཙན། །མཆེད་འཁོར་སྤྲུལ་པ་དགྱེས་སྡེ་དཔུང༌། །ཀུན་དང་མཚམས་པའི་བསང་གི་བརྔན། །དག་གཙང་གཡོས་སོགས་ཞིམ་དགུའི་ཟས། །དཀར་མངར་ཕྱེ་ཕུད་གཏོར་མའི་རིགས། །ཇ་ཆང་བདུད་རྩིའི་བཏུང་བའི་སྐྱེམས། །དར་གོས་ནོར་དབྱིག་ཡུལ་མཁར་ཁྱིམ། །རྟ་ནོར་ར་ལུག་བྱ་རྟ་གླང༌། །གཅན་གཟན་རི་དྭགས་གཟུགས་ཀྱི་ཚོགས། །ཁ་ཟས་བཞེད་དགུའི་དཔལ་འབྱོར་སོགས། །འདོད་ཡོན་ལོངས་སྤྱོད་སྤྲིན་ཆེན་པོ། །བདུད་རྩིའི་ཤིང་དང་མེ་སྦྱར་བའི། །དུད་སྤྲིན་ཕྱོགས་ཀུན་ཁྱབ་པ་ཡི། །ངད་པས་གྲིབ་མནོལ་འཁོན་པ་སྦྱངས། །ཟེགས་དང་དགྱེས་པའི་བསྐང་རྫས་འཆར། །ཀུན་ཕན་བྱང་ཆུབ་སེམས་སྤྲིན་གྱིས། །གནས་མགྲོན་དམ་ཚིག་མ་གཡེལ་སྐྱོངས། །ཉིན་སྲུང་མཚན་སྐྱོབས་ལམ་འཕྲང་སྒྲོལ། །ལོ་ལེགས་འབྲུ་དང་གནག་ཕྱུགས་འཕེལ། །ཆར་ཆུ་དུས་བབས་དགྲ་རྐུན་སྲུང༌། །སད་སེར་བཙན་ཐན་མེད་པ་དང༌། །འགྲོ་རྒྱུད་སྣང་བློ་དགེ་ལ་སྦྱོར། །སྣོད་བཅུད་གཡང་འཕེལ་ལོངས་སྤྱོད་རྒྱས། །མཆོག་གསུམ་ཐུགས་རྗེའི་རྟག་སྐྱོངས་བའི། །བཀྲ་ཤིས་བདེ་ལེགས་འཕེལ་རྒྱས་མཛོད། །ཅེས་བརྗོད་ཅིང་ལས་མཇུག་བསྡུའོ། ཅེས་པའང་སྟོད་པ་སྡེ་སྤྱིའི་བསྐུལ་བ་བཞིན་མངྒ་ལས་བྲིས་པ་ཕན་བདེའི་དཔལ་དུ་གྱུར་ཅིག ༈ གནས་བསང་དགེ་ལེགས་དཔལ་བསྐྱེད་བཞུགས། ཧྲཱིཿ རྩ་གསུམ་ཀུན་འདུས་མཚོ་ལས་སྐྱེས། །འཆི་མེད་ཡེ་ཤེས་རྡོ་རྗེའི་སྐུ། །བསམ་ཡས་རྣམ་ཐར་བཀོད་པ་ནི། །སྒྱུ་འཕྲུལ་རྡོ་རྗེའི་རོལ་མོ་ཅན། །སངས་རྒྱས་པདྨ་ཐོད་ཕྲེང་རྩལ། །ཚོགས་བརྒྱད་ཡེ་ཤེས་ཀློང་དགུ་རུ། །དག་པའི་མཚན་མཆོག་བརྒྱད་ཀྱི་གཙོ། །འཆོལ་བའི་ཁྲོ་རྒྱལ་ཧེ་རུ་ཀཿ །རིག་འཛིན་རྡོ་རྗེ་གྲོ་ལོད་ཀྱིས། །ལྷ་སྲིན་སྡེ་བརྒྱད་དབང་བསྡུས་ཤིང༌། །བྲན་བཀོལ་བཀའ་ཡི་འབངས་ཐམས་ཅད། །བསྟན་པ་སྐྱོང་བར་གཉེར་གཏད་གནས། །སྨན་ཤིང་ནགས་ཚལ་རི་བྲག་མཚོ། །གངས་རིས་རབ་མཛེས་ལྗོངས་ཆེན་པོར། །བཞུགས་པའི་རྩ་གསུམ་དཀྱིལ་འཁོར་ལྷ། །བསམ་མི་ཁྱབ་པ་ཐམས་ཅད་དང༌། །དབང་བྱེད་དཀར་ཕྱོགས་ཡུལ་ལྷའི་གཙོ། །ཟོ་དོར་གཉན་པོ་འཁོར་དང་བཅས། །འདིར་གཤེགས་དགྱེས་པའི་གདན་ལ་བཞུགས། །དྲི་ཞིམ་བདུད་རྩིའི་ཟིལ་མངར་ཅན། །བཟང་ཤིང་སྨན་སྤོས་འབྲུ་དར་ཟབ། །དཀར་མངར་ཕུད་དང་ཇ་ཆང་སྐྱེམས། །རིན་ཆེན་གཏོར་མ་མཐུན་རྫས་སོགས། །ཐུགས་ལ་བཞེད་རྒུའི་དཔལ་མཐའ་དག །འབད་མེད་འཆར་བའི་བསང་གི་སྤྲིན། །མདོག་དཀར་དྲི་བསུང་མངར་པོའི་ཚུལ། །ནམ་མཁའ་ལྟར་སྣང་འགེངས་བྱེད་ཅིང༌། །གྲིབ་རྨུག་ཀུན་སེལ་མཆོད་པའི་སྤྲིན། །ངོ་མཚར་རྨད་བྱུང་འདི་འབུལ་ན། །དགྱེས་པའི་ཞལ་བཟང་ཟླ་ལྟར་དཀར། །འཁོན་མནོལ་ཉམས་ཆག་རྒུད་པ་བསང༌། །སྐུ་གསུང་ཐུགས་ལ་གཟི་བརྗིད་དང༌། །སྟོབས་ཀྱི་དཔལ་ཀུན་དགྱེས་བསྐྱེད་ནས། །ཁྱེད་ལ་འདོད་དོན་གསོལ་བ་ནི། །ལྷོ་ལྗོངས་ཆོས་ཀྱི་རྒྱལ་ཁབ་གཙོས། །སྣོད་བཅུད་དཔལ་འབྱོར་དགེ་མཚན་རྒྱས། །སྐྱེ་དགུ་རྣམ་དཀར་ལས་ཀྱིས་འཚོ། །ཀུན་ཀྱང་ཐེག་མཆོག་ཆོས་བཞིན་སྤྱོད། །སངས་རྒྱས་བསྟན་དང་བསྟན་འཛིན་དར། །དགེ་འདུན་ཐུགས་འདུན་ཁྲིམས་གཙང་རྒྱས། །བཤད་སྒྲུབ་ལས་ཀྱི་འཁོར་ལོ་གསུམ། །ཟླ་བ་ཡར་ངོ་ལྟར་འཕེལ་བས། །དཀོན་མཆོག་གསུམ་གྱི་དབུ་འཕང་མཐོ། །ནད་མུག་དུས་འཁྲུགས་རྒུད་ཀུན་ཞི། །རྫོགས་ལྡན་དགའ་སྟོན་མི་ཉམས་རྒྱས། །བཀྲ་ཤིས་བདེ་ལེགས་ཕུན་ཚོགས་ཤོག །ཅེས་པའང་སྒྲུབ་གནས་ཆེན་པོ་དེ་ཉིད་དང་གོས་དང་གོང་བ་བཞིན་འདབས་འབྲེལ་བའི་སྐྱེར་ཆུའི་གཙུག་ལག་ཁང་དུ་གནས་པའི་སྐབས་པདྨའི་སྔགས་རིག་འཛིན་པ་མངྒ་ལའི་མིང་གིས་བྲིས་པ་དགེ་ལེགས་འཕེལ། ༈ སྐྱེར་ཆུའི་ཀླུ་བསང་བཀྲ་ཤིས་རོལ་མོ་བཞུགས། ཀྱཻ། ཡུལ་ནི་ལྷོ་ལྗོངས་ཆོས་ཀྱི་ཞིང༌། །ཕུན་ཚོགས་སྨན་གྱི་ལྗོངས་ཆེན་པོའི། །བྱེ་བྲག་སྐྱེར་ཆུའི་གཙུག་ལག་གི །གནས་གཞི་སྐྱོངས་བའི་ཀླུ་ཡི་རྒྱལ། །དཀར་གསལ་ཞི་འཛུམ་གཞོན་སྒེག་ཚུལ། །རིན་ཆེན་དབུ་རྒྱན་ནོར་ཕྲེང་འཕྱང༌། །དར་ཟབ་ལྷ་ཡི་གོས་ཀྱིས་བཀླུབས། །ཕྱག་ན་ནོར་བུ་བུམ་བཟང་བསྣམས། །སྦྲུལ་མགོ་བདུན་གྱི་ལྡིང་ཀ་ཅན། །སྐུ་སྨད་གསེར་སྦྲུལ་སེར་པོ་འཁྱིལ། །བདུད་རྩིའི་རྒྱ་མཚོའི་དབུས་ན་འགྱིང༌། །དཔག་བསམ་ཤིང་ལ་སྐུ་རྒྱབ་བརྟེན། །དགྱེས་ཡུམ་ཀླུ་སྨན་བཀའ་འཁོར་སྲས། །བྲན་གཡོག་སྤྲུལ་པ་བསམ་མི་ཁྱབ། །དཀར་ཕྱོགས་ཀླུ་རིགས་བྱེ་བས་བསྐོར། །ནོར་བུ་སྣ་ཚོགས་མཛོད་ཀྱིས་ཕྱུག །སྣོད་བཅུད་དགེ་བའི་དཔལ་གཡང་བསྐྱེད། །སྒྲུབ་པ་པོ་ལ་གདུང་ཞིང་འགོ །སྔོན་གྱི་ཐ་ཚིག་རྗེས་དགོངས་ལ། །གནས་འདིར་སྤྱན་འདྲེན་གཤེགས་སུ་གསོལ། །རིན་ཆེན་གཙང་མའི་གདན་ལ་བཞུགས། །བཀྲ་ཤིས་འོ་མའི་མཆོད་ཡོན་དང༌། །ག་བུར་ཆབ་ཀྱི་བྱུག་པ་འབུལ། །དྲི་ཞིམ་མེ་ཏོག་བཞད་པའི་ཚལ། །ཙནྡན་ཨ་གར་བཟང་སྤོས་དྲི། །དཀར་མངར་ཞལ་ཟས་བདུད་རྩིའི་སྐྱེམས། །སྙན་བརྗིད་ཡིད་འོང་རོལ་མོའི་དབྱངས། །བསྟོད་པའི་གླུ་དང་དགྱེས་རྒུའི་གར། །ཀླུ་ནོར་རི་དྭགས་ཆུ་གནས་ཚོགས། །གཏེར་བུམ་མ་རྨོས་སྙེ་མའི་ཞིང༌། །དཔག་བསམ་ལྗོན་ཚལ་ནོར་བུའི་རི། །ལྷ་རྫས་གསེར་དངུལ་རིན་ཆེན་སྤུངས། །དཔག་ཡས་ནམ་མཁའི་དབྱིངས་ཁྱབ་ཅིང༌། །ས་གཞི་ཁྱབ་པར་བརྡལ་བ་ཡི། །མཐུན་རྫས་བཞེད་རྒུ་དཔག་མེད་དུ། །འཆར་ཞིང་ཆར་ཆུ་འབེབས་པ་ཡི། །དྲི་ཞིམ་བསང་དང་བདུད་རྩིའི་སྐྱེམས། །རྨད་བྱུང་གཏོར་མ་བཟའ་བཅའི་ཕུད། །མི་ཟད་ནམ་མཁའ་མཛོད་ཆེན་པོ། །སྐུ་གསུང་ཐུགས་ལ་དགྱེས་བསྐྱེད་ནས། །སྔོན་ཚེ་སློབ་དཔོན་པདྨ་དང༌། །ཆོས་རྒྱལ་སྲོང་བཙན་སྒམ་པོ་སོགས། །རིག་འཛིན་བླ་མའི་སྤྱན་སྔ་རུ། །ཞལ་བཞེས་ཐ་ཚིག་མ་བསྙེལ་བར། །ཡུལ་གྱི་སྣོད་བཅུད་དཔལ་འཕེལ་ཏེ། །ལོ་ཕྱུག་འབྲུ་སྨན་རྩི་ཤིང་རྒྱས། །མི་རྣམས་དཀར་པོའི་ཆོས་ལ་སྤྱོད། །གནག་ཕྱུགས་རྟ་ནོར་འཕེལ་ཞིང་དར། །ནད་མུག་འཁྲུགས་རྩོད་རྒྱུན་ཆད་དེ། །ཆོས་ལྡན་རྒྱལ་པོའི་མངའ་ཐང་རྒྱས། །ལྷ་སྲས་སྐུ་ཚེའི་དཔལ་འཕེལ་ཞིང༌། །ལེགས་རྒུའི་བསོད་ནམས་རླུང་རྟ་དར། །རྒྱལ་བསྟན་སྤྱི་དང་ཁྱད་པར་དུ། །དྭགས་རྙིང་བསྟན་པ་ཉི་བཞིན་གསལ། །བསྟན་འཛིན་སྐྱེས་ཀུན་ཞབས་པད་བརྟན། །བཤད་སྒྲུབ་མཛད་ཕྲིན་མཁའ་མཐའ་བརྡལ། །ཁྲིམས་ལྡན་འདུས་པའི་སྡེ་འཕེལ་ཞིང༌། །སྤང་ཀློག་ཡར་ཟླ་ལྟ་བུར་རྒྱས། །ཁྱད་པར་གཙུག་ལག་མཆོག་འདི་ཡི། །སྟོན་མཆོག་ཞལ་སྐྱིན་རིན་པོ་ཆེ། །མཆོད་དང་བཀུར་བསྟིའི་ལེགས་བྱས་ཀྱིས། །བྱིན་རླབས་ཕྲིན་ལས་དཔལ་ཡོན་རྒྱས། །ཆོས་ཀྱི་རྒྱལ་པོའི་ཐུགས་བསྐྱེད་བཞིན། །ནག་ཕྱོགས་ཕས་རྒོལ་མཐའ་དམག་འཇོམས། །རྣམ་དཀར་ཕྲིན་ལས་ཐོགས་མེད་མྱུར། །ཆོས་སྲིད་ཉི་ཟླའི་སྣང་བ་ཡིས། །ཛམ་གླིང་ཐ་གྲུར་མཛེས་བཞིན་དུ། །ནམ་ཡང་འཕེལ་འགྲིབ་མེད་པར་མཛོད། །ཀླུ་རྒྱལ་བྱང་ཆུབ་སེམས་དཔའ་ཡང༌། །གནས་འདིར་མི་ཉམས་རྟག་བཞུགས་ཏེ། །སྣོད་བཅུད་གཙུག་ལག་གཉེར་འཛིན་ཅིང༌། །ལེགས་ཚོགས་རྒྱས་པའི་ཕྲིན་ལས་མཛོད། །ཅེས་པའང་བོད་ཡུལ་བཀྲ་ཤིས་འབྱུང་བའི་ས་གནད་ཀྱི་མེ་བཙའ་སྤ་གྲོ་སྐྱེར་ཆུའི་གཙུག་ལག་ཁང་དུ་སངས་རྒྱས་གཉིས་པ་སློབ་དཔོན་ཆེན་པོའི་ཞལ་སྐྱིན་ལྷོ་ལྗོངས་ས་སྐྱོང་དབང་མོ་སྐལ་བཟང་ཆོས་ཀྱི་སྒྲོན་མས་གསར་བཞེངས་མཛད་པའི་སྐབས་གནས་བདག་གཉན་པོར་ཕྲིན་ལས་བཅོལ་བའི་ཚུལ་དུ་མཚོ་སྐྱེས་རྒྱལ་བ་དགྱེས་པའི་བཀའ་འབངས་འཇིགས་མེད་མཁྱེན་བརྩེའི་འོད་ཟེར་གྱིས་བྲིས་པ་ཆོས་ལྡན་གྱི་མཛད་པས་བསྟན་འགྲོ་ཡོངས་ཀྱི་གསོས་སྨན་དུ་འགྱུར་བའི་རྒྱུར་གྱུར་ཅིག ༈ ཡུལ་ལྷའི་བསང་མཆོད་བཞུགས། ཀྱཻ། ཕུན་ཚོགས་སྡེ་བཞིའི་འབྱོར་པ་ཡི། །ལྷོ་ལྗོངས་ཙན་དན་ནགས་ཚལ་གྱི། །བྱེ་བྲག་གཡུང་དྲུང་ཆོས་གླིང་གི །གནས་སྲུང་ཚེ་འཛིན་དབང་མོ་དང༌། །ཐབས་མཆོག་བདུད་རྗེ་འཁོར་དང་བཅས། །དགྱེས་བསྐྱེད་བདུད་རྩིའི་བསང་གི་སྤྲིན། །མི་ཟད་ནམ་མཁའ་མཛོད་ལྟ་བུ། །ཉེར་སྤྱོད་འདོད་ཡོན་ཆར་དུ་འབེབས། །གནག་ཕྱུགས་རྟ་ནོར་ས་གཞི་ཁེབས། །གཅན་གཟན་རི་དྭགས་བྱ་རིགས་སོགས། །སྤུ་སྡུག་གྲ་རྒྱས་སྐད་སྙན་སྒྲོགས། །གསེར་དངུལ་དར་ཟབ་ནོར་བུའི་རིགས། །ལྷུན་པོ་ལྟར་སྤུངས་བཟའ་བཅའ་བཏུང༌། །ཞིམ་མངར་སྣ་ཚོགས་ཅིར་ཡང་བཀྲ། །མཆོད་བསྐང་མཐུན་པའི་རྫས་རྣམས་ཀྱིས། །མཉེས་ནས་གནས་མགྲོན་དམ་ཚིག་སྲུངས །མི་ཤེས་རྨོངས་པའི་བྱ་སྤྱོད་ཀྱིས། །ས་བརྐོ་རི་བསྙིལ་ཤིང་གཉན་བཅད། །ཐབ་གཞོབ་ཕོག་ཐུག་ནོངས་པ་བཤགས། །ཡུལ་འདིར་ཆར་ཆུ་འབྲུ་ནོར་སྤེལ། །མི་ཕྱུགས་འཁྲུགས་རྩོད་ནད་མུག་ཞི། །ལོ་ལེགས་ཕྱུགས་དར་ཚེ་བསོད་དང༌། །རླུང་རྟ་དར་རྒྱས་དགེ་ལེགས་སྩོལ། །སློབ་དཔོན་པདྨ་འབྱུང་གནས་སོགས། །སྔོན་བྱོན་སྐྱེས་བུའི་ཐ་ཚིག་ལས། །མ་འདའ་ཀུན་ཕན་བདེ་ལེགས་ཀྱི། །སྣང་བས་རྟག་ཏུ་མཛེས་གྱུར་ཅིག །ཅེས་པའང་ཡུལ་དེར་བསྟི་བའི་སློབ་དཔོན་བཀྲ་ཤིས་དབང་འདུས་ཀྱིས་བསྐུལ་ངོར་དིལ་མཁྱེན་མངྒ་ལས་བྲིས་པ་དགེ་ཞིང་བཀྲ་ཤིས་པར་གྱུར་ཅིག ༈ འཁེང་སྐྱིད་ཁར་ཡུལ་ལྷའི་བསང་མཆོད་བཀྲ་ཤིས་ལྷ་ཡི་རོལ་མོ་བཞུགས། ཨོཾ་སྭསྟི། བསང་བྱ་བར་འདོད་པས་གཙང་མའི་གནས་སུ་སྟེགས་ཁེབ་དཀར་པོའི་སྟེང་གཏོར་མ་དཀར་དམར། གསེར་སྐྱེམས། ཕུད་རྒོད་འབྲུ་སྨན་དར་ཟབ་གཙང་ཕྱེ། དཀར་མངར། ཤིང་ཐོག་ཟས་སྣ་སོགས་བདུད་རྩི་ཆོས་སྨན་གྱིས་སྦགས་པ། ཤིང་སྣའི་མེར་བསྲེགས་ཏེ། རང་ཉིད་ཐུགས་རྗེ་ཆེན་པོའི་ང་རྒྱལ་ལ་གནས་པའི་ཡིག་དྲུག་ཅུང་ཟད་བཟླ། བདག་ཉིད་ལྷར་གསལ་ཐུགས་ཀའི་ས་བོན་ལས། །འོད་འཕྲོས་མགྲོན་ཀུན་མདུན་དུ་སྤྱན་དྲངས་གྱུར། ཀྱཻ། ཆོས་ཉིད་བདེ་བ་ཆེན་པོ་ལ། །བཟང་ངན་གཉིས་སུ་མ་དམིགས་ཀྱང༌། །རྟེན་འབྱུང་སྒྱུ་མའི་འཆར་སྒོ་ལས། །འཁོར་འདས་སྣོད་བཅུད་ཅིར་ཡང་འཆར། །སྣོད་ཀྱི་རི་གླིང་མཚོ་བྲག་ཆུར། །ཡིད་ཀྱི་གཟུགས་ཅན་ལྷ་དང་འདྲེ། །གནས་མགྲོན་བཀོད་པ་འདོད་དགུ་འཆར། །ཁ་བཞི་ལྷོ་ཡི་སྨན་ལྗོངས་ཀྱི། །བྱེ་བྲག་འཁེང་ཡུལ་སྐྱིད་ཁར་རུ། །གནས་བདག་སྲིང་སྲིང་གྲགས་པ་དང༌། །ནོར་འཛིན་རྒྱལ་མོའི་སྲས་ཀྱི་མཆོག །ཨེ་ཀ་དོང་ལེགས་སྤྲུལ་འཁོར་བཅས། །ཕུ་མདའ་ཉིན་སྲིབ་རི་བྲག་མཚོ། །ཆུ་ཀླུང་ལྗོན་ཤིང་ལ་གནས་པའི། །སྡེ་བརྒྱད་འབྱུང་པོ་མི་མ་ཡིན། །ལྷ་ཀླུ་བཙན་སོགས་ཚུལ་ཅན་ལ། །ཞི་ཞིང་ཕན་པའི་སེམས་མཆོག་གིས། །གཙང་སྦྱར་གཏོར་མ་བདུད་རྩིའི་སྐྱེམས། །ཇ་ཆང་ཕུད་རྒོད་འབྲུ་སྨན་ཟས། །བདུད་རྩི་ཤིང་རྩིའི་དུད་སྤྲིན་དང༌། །སྦྱར་བའི་ནམ་མཁའ་མཛོད་ཀྱི་གཏེར། །རྟ་ནོར་རི་དྭགས་གཅན་གཟན་ཕྱུགས། །ཁང་བཟང་བཀྲ་ཤིས་རྫས་རྟགས་བརྒྱད། །རྒྱལ་སྲིད་རིན་ཆེན་བདུན་གྱི་དཔལ། །ཟས་གོས་ལོངས་སྤྱོད་འདོད་དགུ་དང༌། །ཤ་ཁྲག་གསུར་གྱི་དུད་པ་སོགས། །ཡིད་ཀྱི་རེ་བ་བཞིན་འཆར་བས། །དགྱེས་མཉེས་རབ་ཏུ་གྱུར་ནས་ཀྱང༌། །ཕོག་ཐུག་འགྲས་འཁྲུགས་གནོད་པ་ཞི། །ནད་གདོན་འཁོན་ཀུན་བྱང་ནས་ཀྱང༌། །ཡུལ་འདིའི་མི་ལ་མགོན་སྐྱབས་མཛོད། །གནས་མགྲོན་དམ་ཚིག་མི་གཡེལ་བས། །རིས་མེད་རྒྱལ་བསྟན་དར་ཞིང་རྒྱས། །ཁ་བཞི་ལྷོ་ཡི་སྨན་ལྗོངས་ཀྱི། །དགེ་འདུན་སྡེ་རྒྱས་བཤད་སྒྲུབ་དར། །མངའ་བདག་རྒྱལ་པོའི་ཆོས་སྲིད་བརྟན། །དགེ་བཅུའི་ཁྲིམས་ཀྱི་དཔུང་བ་བཙན། །མི་ནོར་ཕྱུགས་གསུམ་དར་ཞིང་རྒྱས། །བསོད་ནམས་རླུང་རྟ་མི་རྒུད་པས། །ཕས་རྒོལ་གཡུལ་ལས་རྣམ་པར་རྒྱལ། །ནད་མུག་མཚོན་གྱི་སྐལ་ངན་ཞི། །ཡིད་མཐུན་གྲུས་ཐུབ་ཚེ་གཡང་རྒྱས། །སྣོད་བཅུད་ལེགས་པའི་དཔལ་འཕེལ་བས། །བདེ་སྐྱིད་དབྱར་མཚོ་ལྟར་རྒྱས་མཛོད། །མཉམ་ཉིད་བྱང་ཆུབ་སེམས་ཀྱི་མཐུས། །ཕན་ཚུན་ཕ་མ་བུ་བཞིན་མཛའ། །བཀྲ་ཤིས་དགེ་མཚན་སྣང་བ་ཡིས། །འཇིག་རྟེན་གསུམ་དུ་ཁྱབ་གྱུར་ཅིག །བསང་གཞུང་གཞན་དང་མ་འབྲེལ་ན་ཡིག་བརྒྱ་དང་སརྦ་བྷུ་ཏ་གཙྪས་གཤེགས་སུ་གསོལ། དགེ་བསྔོ་སྨོན་ལམ་ཤིས་བརྗོད་བྱའོ། །ཞེས་པའང་དད་འབྱོར་ལྡན་པ་ངག་དབང་ཆོས་རྗེས་བསྐུལ་ངོར་འགྱུར་མེད་བསྟན་པའི་རྒྱལ་མཚན་གྱིས་སྐུ་རྗེས་རྡོ་རྗེ་བརྩེགས་པའི་ཀེའུ་ཚང་ནས་བཀའ་བརྒྱད་བདེ་གཤེགས་འདུས་པའི་སྒྲུབ་ཆེན་གྱི་སྐབས་སུ་བྲིས་པས་ཡུལ་དེའི་སྣོད་བཅུད་ཀྱི་རྒུད་པ་ཞི་ཞིང་ཕན་བདེའི་དགའ་སྟོན་རྒྱས་པའི་རྒྱུར་གྱུར་ཅིག །སརྦ་མངྒ་ལཾ། ༈ ཀྱཻ། ཡུལ་གྱི་མིང་ནི་འཁེན་ཞེས་སར། །བཙན་རྒྱལ་གྲགས་པ་རྒྱལ་མཚན་དང༌། །དགྱེས་ཡུམ་དངོས་གྲུབ་དབང་མོ་ཡི། །སྤྲུལ་འཁོར་ཕོ་ཉ་ལས་བྱེད་ཚོགས། །རྫུ་འཕྲུལ་མཐུ་ལྡན་ཐམས་ཅད་ལ། །དྲི་ཞིམ་ཤིང་རྩིའི་དུད་སྤྲིན་དང༌། །སྦྱར་བའི་འབྲུ་སྨན་དར་ཟབ་དང༌། །རིན་ཆེན་གསེར་སྐྱེམས་གཡུ་སྐྱེམས་ཕུད། །མཁོ་དགུའི་གཟུགས་འགྲོས་རྟ་ནོར་ཕྱུགས། །ཁྱད་པར་ཁྱི་དམར་མཁར་ཐབས་སོགས། །ཐུགས་ལ་ཅི་བཞེད་འཆར་བ་ཡིས། །བསང་ངོ་བཙན་གྱི་རྒྱལ་པོ་དང༌། །མཆོད་དོ་འདོད་དགུའི་སྐྱེམས་ཀྱིས་མཆོད། །དགྱེས་པར་བཞེས་ལ་ཡུལ་འདིའི་གཙོས། །ཁ་བཞི་ལྷོ་ཡི་སྨན་ལྗོངས་ཀུན། །མི་འདོད་ཉེར་འཚེ་འགལ་རྐྱེན་ཞི། །ཚེ་དཔལ་འདོད་དགུའི་དཔལ་འབྱོར་རྒྱས། །མཐུན་རྐྱེན་གང་འདོད་དབང་དུ་བསྡུས། །གནོད་བྱེད་དགྲ་བགེགས་ཚར་གཅོད་མཛོད། །འཁོན་འགྲས་ཕོག་ཐུག་ཞི་བ་དང༌། །མི་དང་ལྷ་རུ་མི་འབྲལ་བར། །སྲུང་སྐྱོབས་སྟོང་གྲོགས་གཡེལ་མེད་མཛོད། །དཀོན་མཆོག་གསུམ་གྱི་དབུ་འཕང་བསྟོད། །དགེ་འདུན་སྡེ་རྒྱས་བཤད་སྒྲུབ་དང༌། །སྣོད་བཅུད་དགེ་བཅུ་གཡང་འཁྱིལ་བའི། །ཕྲིན་ལས་གཡེལ་བ་མེད་པར་མཛོད། །ཅེས་པའང་དད་འབྱོར་ལྡན་པ་ངག་དབང་ཆོས་རྗེས་བསྐུལ་ངོར་མངྒ་ལས་བྲིས་པས་དགེ་ཞིང་བཀྲ་ཤིས་པར་གྱུར་ཅིག ༈ ལྷོ་འབྲུག་ནོར་བུ་གསེར་གཞོང་གི་ཡུལ་ལྷའི་བསང་བཀྲ་ཤིས་དཔལ་གྱི་དབྱངས་སྙན་ཞེས་བྱ་བ་བཞུགས། ཧྲཱིཿ ཆོས་དབྱིངས་སྐྱེ་མེད་ངང་ཉིད་ལས། །འགྲོ་བའི་རེ་བ་སྐོང་བའི་ཕྱིར། །སངས་རྒྱས་ཕྲིན་ལས་བསམ་མི་ཁྱབ། །དད་དང་མོས་པ་བཞིན་འཆར་བས། །དཀོན་མཆོག་སྲི་ཞུའི་མགྲོན་གྱི་འཁོར། །མགོན་པོ་ཡོན་ཏན་རིགས་དྲུག་འགྲོ། །ལན་ཆགས་མགྲོན་ཀུན་འདིར་གཤེགས་ལ། །གཙང་སྦྱར་རྨད་བྱུང་མཆོད་པའི་སྤྲིན། །ཅིར་ཡང་འཆར་ཞིང་འབྱུང་བ་འདིས། །དགྱེས་པའི་དགའ་སྟོན་བཞེས་ནས་ཀྱང༌། །ཚོགས་རྫོགས་སྒྲིབ་བྱང་དངོས་གྲུབ་སྩོལ། ཀྱཻ། ཕུན་ཚོགས་དགེ་བཅུའི་གཡང་འཁྱིལ་བའི། །བཀྲ་ཤིས་ངོ་མཚར་སྐྱེད་མོས་ཚལ། །རི་བྲག་སྨན་ཤིང་མེ་ཏོག་གི །ལྗོན་པས་མཛེས་པའི་ས་འཛིན་ལ། །ནོར་བུ་གསེར་གཞོང་མར་ཞུའི་མཚོ། །བདུད་རྩི་སྨན་ཆབ་ཀྱིས་མཛེས་པར། །གནས་སུ་འདུ་ཤེས་ཟོ་དོར་ཆེ། །ལྷ་ཀླུ་གནོད་སྦྱིན་སྣ་ཚོགས་རིགས། །གཉུག་གནས་གློ་བུར་ལྷགས་པའི་མགྲོན། །ཀུན་ཀྱང་མཆོད་པའི་གནས་འདིར་བྱོན། །སྣང་སྲིད་ཟིལ་གནོན་པད་འབྱུང་གི །བཀའ་དང་དམ་ལས་མ་འདའ་བར། །ཀུན་བཟང་མཆོད་པ་རྒྱ་མཚོའི་གཏེར། །ཟག་མེད་བདེ་སྐྱེད་དགྱེས་པའི་རྫས། །ངོ་བོ་ཡེ་ཤེས་བདུད་རྩིའི་བཅུད། །རྣམ་པ་ཅི་བཞེད་དེར་འཆར་བས། །མི་ཟད་ནམ་མཁའ་མཛོད་སྤྲིན་དུ། །སྔགས་དང་ཕྱག་རྒྱས་མཁའ་ཁྱབ་སྤེལ། །ཚོགས་དྲུག་དབང་ཡུལ་སིམ་སྟེར་བའི། །ངོ་མཚར་རྨད་བྱུང་མཆོད་པ་ཆེ། །ཀུན་ཕན་བྱང་ཆུབ་སེམས་སྤྲིན་འདིས། །དགྱེས་ཤིང་མཉེས་རབ་ཕུལ་ཕྱིན་ཏེ། །ཁྱེད་རྣམས་འཁོན་འགྲས་འཁྲུགས་པ་ཞི། །ཉམས་ཆག་འགལ་འཁྲུལ་ནོངས་པ་བཤགས། །ཅི་བཞེད་ལྷུན་གྱིས་གྲུབ་པ་ཡི། །མཐུན་རྫས་མཁོ་དགུས་ཐུགས་དམ་བསྐང༌། །ཉེས་པ་ཐམས་ཅད་སོར་ཆུད་ནས། །གནས་མགྲོན་དམ་ལས་མ་འདའ་བར། །ཁྱེད་རྣམས་མངོན་ཤེས་རྫུ་འཕྲུལ་མངའ། །སྟོབས་ཀྱི་སྣོད་བཅུད་དཔལ་ཡོན་སྤེལ། །འགྲོ་བློ་དགེ་བའི་ཕྱོགས་སུ་བསྒྱུར། །དཀོན་མཆོག་དབུ་འཕང་མཐོ་ཞིང་དར། །རྒྱལ་བསྟན་འཛིན་པའི་མཁས་གྲུབ་ཀྱིས། །ས་འདིར་བཤད་སྒྲུབ་བྱ་བ་འཕེལ། །དགེ་མཚན་དཔལ་ཀུན་རྒྱས་པ་དང༌། །མི་དབང་ཆབ་སྲིད་མངའ་ཐང་དར། །སྡེ་བློན་ཐུགས་མཐུན་གྲོས་ཐུབ་ཅིང༌། །དགྲ་གདོན་ཕྱོགས་ལས་རྣམ་པར་རྒྱལ། །བདེ་སྐྱིད་ཉི་ཟླའི་སྣང་བ་དང༌། །མི་འབྲལ་བཀྲ་ཤིས་དར་རྒྱས་མཛོད། །ཅེས་ནོར་བུ་གསེར་གཞོང་གི་གཞིས་ཆགས་གསར་པའི་ཡུལ་ལྷའི་བསང་གསོལ་དགོས་ཞེས་སྒོམ་ཆེན་གྱིས་བསྐུལ་ངོར་རྒྱལ་དབང་པདྨའི་རྗེས་འཇུག་བཀྲ་ཤིས་དཔལ་འབྱོར་གྱིས་ཕན་སེམས་ཀྱིས་བྲིས་པ་སྣོད་བཅུད་ཀྱི་དཔལ་ཡོན་རྒྱས་པའི་རྒྱུར་གྱུར་ཅིག། །།

[edit]

lho 'brug rgyal khab kyi yul lha spyi yi bsang mchod bkra shis lha yi glu dbyangs zhes bya bzhugs// oM swa sti/_bsang bya bar 'dod pas gtor ma dkar dmar zas sna 'bru sman dar zab/_ja chang gi skyems phud bcas gtsang la dag pa dang*/_shing rtsi'i dud sprin bcas chab kyis bran la/_ra~M ya~M kha~M/_oM AHhU~M dang*/_nam mkha' mdzod kyi sngags rgyas byin gyis brlabs la/_kyai/_phun tshogs skye dgu'i bsod nams kyi/_/dpal las dag pa'i snod dang bcud/_/bkod pa cir yang snang ba yi/_/bye brag lho 'brug tsan+dan tshal/_/dge bcu'i dpal yon rab rgyas pa/_/ma hA gu ru mtsho skyes rje'i/_/mtshan mchog brgyad kyi bkod pa las/_/gu ru rdo rje gro lod skur/_/bzhengs nas lha srin dam bzhag pa'i/_/mdzad pas byin rlabs rdo rje'i gnas/_/stag tshang seng ge bsam 'grub dang*/_/phrin las mi zad rgyan gyi gnas/_/ne ring seng ge rdzong chen mo/_/lho mon rdo rje'i sku yi rjes/_/byin rlabs ngo mtshar dpal 'bar ba/_/rig 'dzin pad+mas zhabs kyis bcags/_/rtsa gsum dkyil 'khor dngos su bzhugs/_/mkha' 'gro chos skyong 'du ba'i zhing*/_ngo mtshar gnas mchog thams cad dang*/_/lhun chags ri dang gangs can brag_/mtsho gling nags kyi tshal rnams la/_/gnas su 'du shes mi ma yin/_/dkar phyogs dge bsnyen mthu bo che/_/lha klu btsan rgyal gnyan sa bdag_/dmu bdud the'u rang gza' srin po/_/gshin rje gnod sbyin la sogs rigs/_/mthu dang rdzu 'phrul stobs ldan zhing*/_/snod bcud dpal yon 'dzin spel kun/_/gnas 'dir spyan 'dren gshegs su gsol/_/dgyes pa'i gdan la bzhugs nas kyang*/_/'dod dgu'i mchod pa'i dga' ston bzhes/_/dbyings phyug yum lnga'i sgyu 'phrul las/_/legs shar bzang shing spos kyi sprin/_/du bas nam mkha'i dbyings kun khyab/_/ngad pas sa bzhi'i khyon rnam brdal/_/zegs mas bar snang gang ba kun/_/'dod yon rgya mtsho'i gter 'char ba'i/_/kun bzang mchod pa'i sprin phung ches/_/rtsa brgyud bla ma dkon mchog bsang*/_/phyi nang gsang ba'i dam rdzas kyis/_/yi dam zhi khro'i dkyil 'khor bsang*/_/bde stong tshogs kyi mchod pa yis/_/gnas gsum dpa' bo mkha' 'gro bsang*/_/mchod bskang mthun rten dam rdzas kyis/_/chos skyong dam can rgya mtsho bsang*/_/bdud rtsi skyems phud mkho dgu yis/_/dkar phyogs lha gnyan tshogs kun bsang*/_/ji ltar 'os pa'i mthun rdzas kyis/_/snod bcud kun la gnas pa bsang*/_/sha khrag rta nor mi phyugs kyis/_/lha srin gdug pa'i tshogs kun bsang*/_/zas sna gsur gyi dri chen pos/_/gnyug gnas glo bur lhags pa yi/_/rgyal bsen 'byung po dam sri sogs/_/bgegs rigs lan chags mgron kun bsang*/_/nam mkha' mdzod kyi longs spyod che/_/gang bzhed yid bzhin 'char ba yi/_/'dzad pa med pa'i longs spyod kyis/_/snang srid mgron gyi tshogs kun bsang*/_/bdud rtsi can gyi bzang po'i shing*/_/dag byed nus pa'i rdzas su grub/_/sngags dang ting 'dzin rgyas btab pas/_/nyams chags nyes pa'i dri ma dag_/legs dgu lhun gyis grub gyur cig_/rig 'dzin brgyud pa'i bka' bzhin du/_/bstan 'gro'i dpal yon bde skyid spel/_/lung rtogs bshad sgrub sde rgyas shing*/_/khrims ldan 'dus pa'i sde 'phel mdzod/_/char chu dus bab lo phyug legs/_/mi phyugs nad mug mtshon 'khrugs zhi/_/snod bcud kun dga'i dpal yon gyis/_/mi bdag chab srid 'phel rgyas mdzod/_/tshe bsod dpal 'byor rlung rta 'phel/_/dgra gdon dmag jag zhi ba dang*/_/yid mthun dpal 'byor 'phel brtan gyis/_/mtho ris yon tan rdzogs par mdzod/_/khyed rnams srid pa chags pa'i lha/_/bdag cag gnas mgron dam tshig gnyan/_/mthun pa'i rdzas kyis mchod cing brngan/_/bzhes la phrin las myur du mdzod/_/rmad byung byang chub sems kyi mthus/_/bdag gzhan gnyis su med pa yi/_/phan bde'i dpal kun yid bzhin 'grub/_/bkra shis bde legs phun tshogs shog_/ces 'bul zhing phrin las bcol bas dge legs su bya'o/_ces pa'ang rab byung bcu drug pa'i bye brag 'phar ba lcags glang gi lor rdo rje'i gnas mchog stag tshang seng ge bsam 'grub du gnas chen byin 'bebs kyi cho gas bstan 'gro'i phan bde'i spel ba'i skabs phrin bcol gyi tshul du rgyal khams kun tu rgyu ba'i rgan po bkra shis dpal 'byor gyis bris pas bstan 'gro'i dge mtshan gyi dpal kun lhun gyis grub pa'i rten 'byung du gyur cig__!__stod pa'i sa yi yul lha'i bsang bkra shis lha yi rol mo bzhugs/_oM swa sti/_gtsang ma'i gnas su dkar mngar gyi zhal zas/_bsang phye/_ja chang longs spyod 'du byas te/_chab kyi bran nas nam mkha' mdzod kyi sngags rgyas byin brlab ste/_kyai/_chos nyid gdod nas dag pa'i chos/_/rten 'byung sgyu ma'i cho 'phrul gyis/_/bkod pa bsam mi khyab pa las/_/snod bcud bde sdug ma nges 'char/_/skye dgu'i las kyi snang ba las/_/phan gnod byed pa'i lha 'dre srid/_rang snang stong dang rten 'brel du/_/shes pas sgyu ma mkhan po yis/_/sgyu ma'i bde sdug bkod pa ltar/_/srid la chags pa'i lha dang 'dre/_/snying rje'i mgron du 'bod bzhin byon/_/dgyes pas 'dir bzhugs yid 'ong gi_/rnam rol dkar phyogs skyong ba'i lha/_/dge bsnyen chen po g.yos stod pa/_/dbyar sa pa dang me ri'i btsan/_/hon cu dpal 'dzom rgyal mo dang*/_/chu bdud phrin las sgang gi btsan/_/mched 'khor sprul pa dgyes sde dpung*/_/kun dang mtshams pa'i bsang gi brngan/_/dag gtsang g.yos sogs zhim dgu'i zas/_/dkar mngar phye phud gtor ma'i rigs/_/ja chang bdud rtsi'i btung ba'i skyems/_/dar gos nor dbyig yul mkhar khyim/_/rta nor ra lug bya rta glang*/_/gcan gzan ri dwags gzugs kyi tshogs/_/kha zas bzhed dgu'i dpal 'byor sogs/_/'dod yon longs spyod sprin chen po/_/bdud rtsi'i shing dang me sbyar ba'i/_/dud sprin phyogs kun khyab pa yi/_/ngad pas grib mnol 'khon pa sbyangs/_/zegs dang dgyes pa'i bskang rdzas 'char/_/kun phan byang chub sems sprin gyis/_/gnas mgron dam tshig ma g.yel skyongs/_/nyin srung mtshan skyobs lam 'phrang sgrol/_/lo legs 'bru dang gnag phyugs 'phel/_/char chu dus babs dgra rkun srung*/_/sad ser btsan than med pa dang*/_/'gro rgyud snang blo dge la sbyor/_/snod bcud g.yang 'phel longs spyod rgyas/_/mchog gsum thugs rje'i rtag skyongs ba'i/_/bkra shis bde legs 'phel rgyas mdzod/_/ces brjod cing las mjug bsdu'o/_ces pa'ang stod pa sde spyi'i bskul ba bzhin mang+ga las bris pa phan bde'i dpal du gyur cig__!__gnas bsang dge legs dpal bskyed bzhugs/_hrIH_rtsa gsum kun 'dus mtsho las skyes/_/'chi med ye shes rdo rje'i sku/_/bsam yas rnam thar bkod pa ni/_/sgyu 'phrul rdo rje'i rol mo can/_/sangs rgyas pad+ma thod phreng rtsal/_/tshogs brgyad ye shes klong dgu ru/_/dag pa'i mtshan mchog brgyad kyi gtso/_/'chol ba'i khro rgyal he ru kaH_/rig 'dzin rdo rje gro lod kyis/_/lha srin sde brgyad dbang bsdus shing*/_/bran bkol bka' yi 'bangs thams cad/_/bstan pa skyong bar gnyer gtad gnas/_/sman shing nags tshal ri brag mtsho/_/gangs ris rab mdzes ljongs chen por/_/bzhugs pa'i rtsa gsum dkyil 'khor lha/_/bsam mi khyab pa thams cad dang*/_/dbang byed dkar phyogs yul lha'i gtso/_/zo dor gnyan po 'khor dang bcas/_/'dir gshegs dgyes pa'i gdan la bzhugs/_/dri zhim bdud rtsi'i zil mngar can/_/bzang shing sman spos 'bru dar zab/_/dkar mngar phud dang ja chang skyems/_/rin chen gtor ma mthun rdzas sogs/_/thugs la bzhed rgu'i dpal mtha' dag_/'bad med 'char ba'i bsang gi sprin/_/mdog dkar dri bsung mngar po'i tshul/_/nam mkha' ltar snang 'gengs byed cing*/_/grib rmug kun sel mchod pa'i sprin/_/ngo mtshar rmad byung 'di 'bul na/_/dgyes pa'i zhal bzang zla ltar dkar/_/'khon mnol nyams chag rgud pa bsang*/_/sku gsung thugs la gzi brjid dang*/_/stobs kyi dpal kun dgyes bskyed nas/_/khyed la 'dod don gsol ba ni/_/lho ljongs chos kyi rgyal khab gtsos/_/snod bcud dpal 'byor dge mtshan rgyas/_/skye dgu rnam dkar las kyis 'tsho/_/kun kyang theg mchog chos bzhin spyod/_/sangs rgyas bstan dang bstan 'dzin dar/_/dge 'dun thugs 'dun khrims gtsang rgyas/_/bshad sgrub las kyi 'khor lo gsum/_/zla ba yar ngo ltar 'phel bas/_/dkon mchog gsum gyi dbu 'phang mtho/_/nad mug dus 'khrugs rgud kun zhi/_/rdzogs ldan dga' ston mi nyams rgyas/_/bkra shis bde legs phun tshogs shog_/ces pa'ang sgrub gnas chen po de nyid dang gos dang gong ba bzhin 'dabs 'brel ba'i skyer chu'i gtsug lag khang du gnas pa'i skabs pad+ma'i sngags rig 'dzin pa mang+ga la'i ming gis bris pa dge legs 'phel/__!__skyer chu'i klu bsang bkra shis rol mo bzhugs/_kyai/_yul ni lho ljongs chos kyi zhing*/_/phun tshogs sman gyi ljongs chen po'i/_/bye brag skyer chu'i gtsug lag gi_/gnas gzhi skyongs ba'i klu yi rgyal/_/dkar gsal zhi 'dzum gzhon sgeg tshul/_/rin chen dbu rgyan nor phreng 'phyang*/_/dar zab lha yi gos kyis bklubs/_/phyag na nor bu bum bzang bsnams/_/sbrul mgo bdun gyi lding ka can/_/sku smad gser sbrul ser po 'khyil/_/bdud rtsi'i rgya mtsho'i dbus na 'gying*/_/dpag bsam shing la sku rgyab brten/_/dgyes yum klu sman bka' 'khor sras/_/bran g.yog sprul pa bsam mi khyab/_/dkar phyogs klu rigs bye bas bskor/_/nor bu sna tshogs mdzod kyis phyug_/snod bcud dge ba'i dpal g.yang bskyed/_/sgrub pa po la gdung zhing 'go_/sngon gyi tha tshig rjes dgongs la/_/gnas 'dir spyan 'dren gshegs su gsol/_/rin chen gtsang ma'i gdan la bzhugs/_/bkra shis 'o ma'i mchod yon dang*/_/ga bur chab kyi byug pa 'bul/_/dri zhim me tog bzhad pa'i tshal/_/tsan+dan a gar bzang spos dri/_/dkar mngar zhal zas bdud rtsi'i skyems/_/snyan brjid yid 'ong rol mo'i dbyangs/_/bstod pa'i glu dang dgyes rgu'i gar/_/klu nor ri dwags chu gnas tshogs/_/gter bum ma rmos snye ma'i zhing*/_/dpag bsam ljon tshal nor bu'i ri/_/lha rdzas gser dngul rin chen spungs/_/dpag yas nam mkha'i dbyings khyab cing*/_/sa gzhi khyab par brdal ba yi/_/mthun rdzas bzhed rgu dpag med du/_/'char zhing char chu 'bebs pa yi/_/dri zhim bsang dang bdud rtsi'i skyems/_/rmad byung gtor ma bza' bca'i phud/_/mi zad nam mkha' mdzod chen po/_/sku gsung thugs la dgyes bskyed nas/_/sngon tshe slob dpon pad+ma dang*/_/chos rgyal srong btsan sgam po sogs/_/rig 'dzin bla ma'i spyan snga ru/_/zhal bzhes tha tshig ma bsnyel bar/_/yul gyi snod bcud dpal 'phel te/_/lo phyug 'bru sman rtsi shing rgyas/_/mi rnams dkar po'i chos la spyod/_/gnag phyugs rta nor 'phel zhing dar/_/nad mug 'khrugs rtsod rgyun chad de/_/chos ldan rgyal po'i mnga' thang rgyas/_/lha sras sku tshe'i dpal 'phel zhing*/_/legs rgu'i bsod nams rlung rta dar/_/rgyal bstan spyi dang khyad par du/_/dwags rnying bstan pa nyi bzhin gsal/_/bstan 'dzin skyes kun zhabs pad brtan/_/bshad sgrub mdzad phrin mkha' mtha' brdal/_/khrims ldan 'dus pa'i sde 'phel zhing*/_/spang klog yar zla lta bur rgyas/_/khyad par gtsug lag mchog 'di yi/_/ston mchog zhal skyin rin po che/_/mchod dang bkur bsti'i legs byas kyis/_/byin rlabs phrin las dpal yon rgyas/_/chos kyi rgyal po'i thugs bskyed bzhin/_/nag phyogs phas rgol mtha' dmag 'joms/_/rnam dkar phrin las thogs med myur/_/chos srid nyi zla'i snang ba yis/_/dzam gling tha grur mdzes bzhin du/_/nam yang 'phel 'grib med par mdzod/_/klu rgyal byang chub sems dpa' yang*/_/gnas 'dir mi nyams rtag bzhugs te/_/snod bcud gtsug lag gnyer 'dzin cing*/_/legs tshogs rgyas pa'i phrin las mdzod/_/ces pa'ang bod yul bkra shis 'byung ba'i sa gnad kyi me btsa' spa gro skyer chu'i gtsug lag khang du sangs rgyas gnyis pa slob dpon chen po'i zhal skyin lho ljongs sa skyong dbang mo skal bzang chos kyi sgron mas gsar bzhengs mdzad pa'i skabs gnas bdag gnyan por phrin las bcol ba'i tshul du mtsho skyes rgyal ba dgyes pa'i bka' 'bangs 'jigs med mkhyen brtse'i 'od zer gyis bris pa chos ldan gyi mdzad pas bstan 'gro yongs kyi gsos sman du 'gyur ba'i rgyur gyur cig__!_yul lha'i bsang mchod bzhugs/_kyai/_phun tshogs sde bzhi'i 'byor pa yi/_/lho ljongs tsan dan nags tshal gyi/_/bye brag g.yung drung chos gling gi_/gnas srung tshe 'dzin dbang mo dang*/_/thabs mchog bdud rje 'khor dang bcas/_/dgyes bskyed bdud rtsi'i bsang gi sprin/_/mi zad nam mkha' mdzod lta bu/_/nyer spyod 'dod yon char du 'bebs/_/gnag phyugs rta nor sa gzhi khebs/_/gcan gzan ri dwags bya rigs sogs/_/spu sdug gra rgyas skad snyan sgrogs/_/gser dngul dar zab nor bu'i rigs/_/lhun po ltar spungs bza' bca' btung*/_/zhim mngar sna tshogs cir yang bkra/_/mchod bskang mthun pa'i rdzas rnams kyis/_/mnyes nas gnas mgron dam tshig srungs_/mi shes rmongs pa'i bya spyod kyis/_/sa brko ri bsnyil shing gnyan bcad/_/thab gzhob phog thug nongs pa bshags/_/yul 'dir char chu 'bru nor spel/_/mi phyugs 'khrugs rtsod nad mug zhi/_/lo legs phyugs dar tshe bsod dang*/_/rlung rta dar rgyas dge legs stsol/_/slob dpon pad+ma 'byung gnas sogs/_/sngon byon skyes bu'i tha tshig las/_/ma 'da' kun phan bde legs kyi/_/snang bas rtag tu mdzes gyur cig_/ces pa'ang yul der bsti ba'i slob dpon bkra shis dbang 'dus kyis bskul ngor dil mkhyen mang+ga las bris pa dge zhing bkra shis par gyur cig__!__'kheng skyid khar yul lha'i bsang mchod bkra shis lha yi rol mo bzhugs/_oM swasti/_bsang bya bar 'dod pas gtsang ma'i gnas su stegs kheb dkar po'i steng gtor ma dkar dmar/_gser skyems/_phud rgod 'bru sman dar zab gtsang phye/_dkar mngar/_shing thog zas sna sogs bdud rtsi chos sman gyis sbags pa/_shing sna'i mer bsregs te/_rang nyid thugs rje chen po'i nga rgyal la gnas pa'i yig drug cung zad bzla/_bdag nyid lhar gsal thugs ka'i sa bon las/_/'od 'phros mgron kun mdun du spyan drangs gyur/_kyai/_chos nyid bde ba chen po la/_/bzang ngan gnyis su ma dmigs kyang*/_/rten 'byung sgyu ma'i 'char sgo las/_/'khor 'das snod bcud cir yang 'char/_/snod kyi ri gling mtsho brag chur/_/yid kyi gzugs can lha dang 'dre/_/gnas mgron bkod pa 'dod dgu 'char/_/kha bzhi lho yi sman ljongs kyi/_/bye brag 'kheng yul skyid khar ru/_/gnas bdag sring sring grags pa dang*/_/nor 'dzin rgyal mo'i sras kyi mchog_/e ka dong legs sprul 'khor bcas/_/phu mda' nyin srib ri brag mtsho/_/chu klung ljon shing la gnas pa'i/_/sde brgyad 'byung po mi ma yin/_/lha klu btsan sogs tshul can la/_/zhi zhing phan pa'i sems mchog gis/_/gtsang sbyar gtor ma bdud rtsi'i skyems/_/ja chang phud rgod 'bru sman zas/_/bdud rtsi shing rtsi'i dud sprin dang*/_/sbyar ba'i nam mkha' mdzod kyi gter/_/rta nor ri dwags gcan gzan phyugs/_/khang bzang bkra shis rdzas rtags brgyad/_/rgyal srid rin chen bdun gyi dpal/_/zas gos longs spyod 'dod dgu dang*/_/sha khrag gsur gyi dud pa sogs/_/yid kyi re ba bzhin 'char bas/_/dgyes mnyes rab tu gyur nas kyang*/_/phog thug 'gras 'khrugs gnod pa zhi/_/nad gdon 'khon kun byang nas kyang*/_/yul 'di'i mi la mgon skyabs mdzod/_/gnas mgron dam tshig mi g.yel bas/_/ris med rgyal bstan dar zhing rgyas/_/kha bzhi lho yi sman ljongs kyi/_/dge 'dun sde rgyas bshad sgrub dar/_/mnga' bdag rgyal po'i chos srid brtan/_/dge bcu'i khrims kyi dpung ba btsan/_/mi nor phyugs gsum dar zhing rgyas/_/bsod nams rlung rta mi rgud pas/_/phas rgol g.yul las rnam par rgyal/_/nad mug mtshon gyi skal ngan zhi/_/yid mthun grus thub tshe g.yang rgyas/_/snod bcud legs pa'i dpal 'phel bas/_/bde skyid dbyar mtsho ltar rgyas mdzod/_/mnyam nyid byang chub sems kyi mthus/_/phan tshun pha ma bu bzhin mdza'/_/bkra shis dge mtshan snang ba yis/_/'jig rten gsum du khyab gyur cig_/bsang gzhung gzhan dang ma 'brel na yig brgya dang sarba b+hu ta gats+tshas gshegs su gsol/_dge bsngo smon lam shis brjod bya'o/__/zhes pa'ang dad 'byor ldan pa ngag dbang chos rjes bskul ngor 'gyur med bstan pa'i rgyal mtshan gyis sku rjes rdo rje brtsegs pa'i ke'u tshang nas bka' brgyad bde gshegs 'dus pa'i sgrub chen gyi skabs su bris pas yul de'i snod bcud kyi rgud pa zhi zhing phan bde'i dga' ston rgyas pa'i rgyur gyur cig_/sarba mang+ga laM/__!_kyai/_yul gyi ming ni 'khen zhes sar/_/btsan rgyal grags pa rgyal mtshan dang*/_/dgyes yum dngos grub dbang mo yi/_/sprul 'khor pho nya las byed tshogs/_/rdzu 'phrul mthu ldan thams cad la/_/dri zhim shing rtsi'i dud sprin dang*/_/sbyar ba'i 'bru sman dar zab dang*/_/rin chen gser skyems g.yu skyems phud/_/mkho dgu'i gzugs 'gros rta nor phyugs/_/khyad par khyi dmar mkhar thabs sogs/_/thugs la ci bzhed 'char ba yis/_/bsang ngo btsan gyi rgyal po dang*/_/mchod do 'dod dgu'i skyems kyis mchod/_/dgyes par bzhes la yul 'di'i gtsos/_/kha bzhi lho yi sman ljongs kun/_/mi 'dod nyer 'tshe 'gal rkyen zhi/_/tshe dpal 'dod dgu'i dpal 'byor rgyas/_/mthun rkyen gang 'dod dbang du bsdus/_/gnod byed dgra bgegs tshar gcod mdzod/_/'khon 'gras phog thug zhi ba dang*/_/mi dang lha ru mi 'bral bar/_/srung skyobs stong grogs g.yel med mdzod/_/dkon mchog gsum gyi dbu 'phang bstod/_/dge 'dun sde rgyas bshad sgrub dang*/_/snod bcud dge bcu g.yang 'khyil ba'i/_/phrin las g.yel ba med par mdzod/_/ces pa'ang dad 'byor ldan pa ngag dbang chos rjes bskul ngor mang+ga las bris pas dge zhing bkra shis par gyur cig__!__lho 'brug nor bu gser gzhong gi yul lha'i bsang bkra shis dpal gyi dbyangs snyan zhes bya ba bzhugs/_hrIH_chos dbyings skye med ngang nyid las/_/'gro ba'i re ba skong ba'i phyir/_/sangs rgyas phrin las bsam mi khyab/_/dad dang mos pa bzhin 'char bas/_/dkon mchog sri zhu'i mgron gyi 'khor/_/mgon po yon tan rigs drug 'gro/_/lan chags mgron kun 'dir gshegs la/_/gtsang sbyar rmad byung mchod pa'i sprin/_/cir yang 'char zhing 'byung ba 'dis/_/dgyes pa'i dga' ston bzhes nas kyang*/_/tshogs rdzogs sgrib byang dngos grub stsol/_kyai/_phun tshogs dge bcu'i g.yang 'khyil ba'i/_/bkra shis ngo mtshar skyed mos tshal/_/ri brag sman shing me tog gi_/ljon pas mdzes pa'i sa 'dzin la/_/nor bu gser gzhong mar zhu'i mtsho/_/bdud rtsi sman chab kyis mdzes par/_/gnas su 'du shes zo dor che/_/lha klu gnod sbyin sna tshogs rigs/_/gnyug gnas glo bur lhags pa'i mgron/_/kun kyang mchod pa'i gnas 'dir byon/_/snang srid zil gnon pad 'byung gi_/bka' dang dam las ma 'da' bar/_/kun bzang mchod pa rgya mtsho'i gter/_/zag med bde skyed dgyes pa'i rdzas/_/ngo bo ye shes bdud rtsi'i bcud/_/rnam pa ci bzhed der 'char bas/_/mi zad nam mkha' mdzod sprin du/_/sngags dang phyag rgyas mkha' khyab spel/_/tshogs drug dbang yul sim ster ba'i/_/ngo mtshar rmad byung mchod pa che/_/kun phan byang chub sems sprin 'dis/_/dgyes shing mnyes rab phul phyin te/_/khyed rnams 'khon 'gras 'khrugs pa zhi/_/nyams chag 'gal 'khrul nongs pa bshags/_/ci bzhed lhun gyis grub pa yi/_/mthun rdzas mkho dgus thugs dam bskang*/_/nyes pa thams cad sor chud nas/_/gnas mgron dam las ma 'da' bar/_/khyed rnams mngon shes rdzu 'phrul mnga'/_/stobs kyi snod bcud dpal yon spel/_/'gro blo dge ba'i phyogs su bsgyur/_/dkon mchog dbu 'phang mtho zhing dar/_/rgyal bstan 'dzin pa'i mkhas grub kyis/_/sa 'dir bshad sgrub bya ba 'phel/_/dge mtshan dpal kun rgyas pa dang*/_/mi dbang chab srid mnga' thang dar/_/sde blon thugs mthun gros thub cing*/_/dgra gdon phyogs las rnam par rgyal/_/bde skyid nyi zla'i snang ba dang*/_/mi 'bral bkra shis dar rgyas mdzod/_/ces nor bu gser gzhong gi gzhis chags gsar pa'i yul lha'i bsang gsol dgos zhes sgom chen gyis bskul ngor rgyal dbang pad+ma'i rjes 'jug bkra shis dpal 'byor gyis phan sems kyis bris pa snod bcud kyi dpal yon rgyas pa'i rgyur gyur cig/__//