DKR-KABUM-04-NGA-008

From Khyentse Lineage - A Tsadra Foundation Project

བལ་ཡུལ་ཞེ་ཆེན་དགོན་པའི་ལོ་རྒྱུས།
Wylie title bal yul zhe chen dgon pa'i lo rgyus DKR-KABUM-04-NGA-008.pdf
Location dil mgo mkhyen brtse bka' 'bum
Volume 4, Text 8, Pages 116-126 (Folios 1a1 to 11b6)
Author དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation Khyentse, Dilgo. Bal yul zhe chen dgon pa'i lo rgyus. In Skyabs rje dil mgo mkhyen brtse rin po che'i bka' 'bum, Vol. 4: 116-126. Delhi: Shechen Publications, 1994.
Genre History Texts - lo rgyus
Colophon

།ཅེས་པའང་རྣམ་དཀར་གྱི་ལས་རྩོམ་པ་པོ་དིལ་མགོ་མཁྱེན་སྤྲུལ་བཀྲ་ཤིས་དཔལ་འབྱོར་པས་རབ་བྱུང་བཅུ་བདུན་པའི་མེ་ཡོས་མགོ་ཟླའི་ཚེས། འཕགས་པ་གནས་བརྟན་པའི་ལུགས་ལྟར་ན་སྟོན་པའི་འདས་ལོ་ ༢༥༣༡ ཕྱི་ལོ་ ༡༩༨༧ ཟླ་ཚེས་ལ་དད་ལྡན་སྤྲོ་བ་བསྐྱེད་ཕྱིར་ལོ་རྒྱུས་མདོར་བསྡུས་སུ་བརྗོད་པ་དགེ་ལེགས་འཕེལ།།

/ces pa'ang rnam dkar gyi las rtsom pa po dil mgo mkhyen sprul bkra shis dpal 'byor pas rab byung bcu bdun pa'i me yos mgo zla'i tshes/_'phags pa gnas brtan pa'i lugs ltar na ston pa'i 'das lo _2531_phyi lo _1987_zla tshes la dad ldan spro ba bskyed phyir lo rgyus mdor bsdus su brjod pa dge legs 'phel//

":Property:textsubnumber|textsubnumber" can not be assigned to a declared number type with value 1.

[edit]
༄༅། །གསུང་གི་རྡོ་རྗེས་ཡེ་ཤེས་ཉིན་མོར་བྱེད། །མཁྱེན་བརྩེ་ནུས་པའི་འོད་སྟོང་ཞིང་ཀུན་བྲེས། །ལྷག་པར་གངས་ཅན་པདྨོའི་གཉེན་གྱུར་ལ། །ཡིད་ཆེས་དད་བརྒྱས་འདུ་འབྲལ་མེད་པར་བསྟེན། །གསང་གསུམ་ཡེ་ཤེས་སྒྱུ་མའི་ཆོ་འཕྲུལ་ལས། །འཕགས་བོད་འཛིན་མར་མཛེས་པའི་མཁས་གྲུབ་དབང༌། །སངས་རྒྱས་གཉིས་པ་མཁན་སློབ་རྗེ་འབངས་གྲོགས། །བཤད་སྒྲུབ་ཤིང་རྟའི་ཚོགས་ཀུན་དྭངས་བས་བསྔགས། །ལེགས་བྱས་རྫོགས་ལྡན་སྤྲིན་གྱི་ཕྲེང་བ་བརྒྱ། །ཆོས་དབྱིངས་མཁར་རྒྱུ་སྐུ་གཉིས་ཉི་ཟླའི་འོད། །འཛུམ་ཕྱིར་ཕྲ་མོའི་རྣམ་དཀར་བ་ཐག་གི །རྟོགས་བརྗོད་སྒྲོ་སྐུར་སྐྱོན་བྲལ་ཆ་ཙམ་བརྗོད། །དེ་ཡང་སྐབས་སུ་བབ་པའི་ལེགས་བྱས་ཀྱི་ཆ་ཕྲ་མོ་སྒྲོ་བསྐུར་དང་བྲལ་བ་གསོང་པོར་སྨྲ་ན། བོད་ཆེན་པོ་མདོ་ཁམས་ཆུ་བོ་གསེར་ལྡན་གྱི་འགྲམ། ཕུན་ཚོགས་སྡེྃ་བཞི་དང༌། ཡུལ་དགེྃ་བ་བཅུས་མཛེས་པའི་ས་ཡི་ཚངས་པ་ཆེན་པོའི་རྒྱལ་ཁབ་ལུགས་བརྒྱའི་འདུན་སའི་དབང་ཕྱོགས་ལྷ་གཅིག་ཀོང་ཇོས་ཐུབ་དབང་གི་ཞལ་སྐྱིན་བོད་ཡུལ་བསྟན་འགྲོའི་བཙས་སུ་སྤྱན་དྲངས་སྐབས་བྲག་ལ་ཕྱག་སོར་གྱི་རྫུ་འཕྲུལ་བཀོད་པས་ཏཱ་རེ་པདྨོ་ཡོ་གའི་ཡེ་ཤེས་ཀྱི་སྐུ་བྲིས་པ་དངོས་སུ་བཞུགས་པའི་སྨན་ལྗོངས་འཛམ་གླིང་རྒྱན་མཆོག་སེང་ཆེན་ནོར་བུ་དགྲ་འདུལ་གྱི་བཀའི་བློན་ཆེན་གྱི་ཐུ་བོ། གྲུབ་པའི་དབང་ཕྱུག་ས་ར་ཧའི་རྣམ་འཕྲུལ་འདན་མས་གནས་གཞིར་བཟུང་ཞིང་རྒྱ་གར་གྱི་པཎ་གྲུབ་ཆེན་པོ་སྨྲྀ་ཏི་ཛྙཱ་ན། རྒྱལ་བ་གཉིས་པ་བློ་བཟང་གྲགས་པ། ཞུ་ཆེན་ལྡན་མ་ལོ་ཙཱ་བ་ཚུལ་ཁྲིམས་རིན་ཆེན། ཟུང་འཇུག་གྲུབ་པའི་རྒྱལ་པོ་སངས་རྒྱས་མཉན་པ། སྣང་བཞི་མཐར་སོན་གྱི་རྣལ་འབྱོར་ཆེན་པོ་རྫོགས་ཆེན་མི་འགྱུར་ནམ་མཁའི་རྡོ་རྗེ་སོགས་ལྡན་ལྗོངས་ལོ་པཎ་མཁས་གྲུབ་བཅོ་ལྔ་རིམ་པར་བྱོན་པ་དང་གདན་ས་མཛད་པ་སོགས་ཆོས་ཚིགས་ཀྱི་ཡུལ་དབུས་སུ་ཡ་རབས་དྲ་མ་མྱོས་ཀྱི་གདུང་དུ་སྐྱེས་པའི་ཀུན་ཏུ་རྒྱུ། འཇམ་པའི་རྡོ་རྗེ་མི་ཕམ་ཡབ་སྲས་དང་ཞེ་ཆེན་རྒྱལ་ཚབ་སོགས་འགྲན་བྲལ་གྱི་མཁས་གྲུབ་ལྔ་བཅུ་ལྷག་གིས་རྗེས་སུ་བཟུང་ཞིང༌། སྔ་འགྱུར་བཀའ་གཏེར་གཙོ་བོར་གྱུར་པའི་གངས་ཅན་བཤད་སྒྲུབ་ཀྱི་ཤིང་རྟ་བཅོ་བརྒྱད་ཀྱི་སྨིན་གྲོལ་བདུད་རྩིས་སྙིང་གི་བུམ་པ་ཁེངས་པའི་སྐལ་བཟང་ཅན་རྒྱལ་ཁམས་ངེས་མེད་དུ་རྐང་འཁྱམས་པ་མངྒ་ལ་ཤྲཱི་བྷཱུ་ཏིར་གྲགས་པ་གང༌། བསྟན་པ་སྙིགས་མའི་མཐར་ཐུག་པས་གསང་སྔགས་ཀྱི་དེ་ཉིད་བཅུ་དང་མི་ལྡན་བཞིན་རྡོ་རྗེ་སློབ་དཔོན་གྱི་མིང་ཁས་འཆེ་བའི་བརྫུ་བ་ལ་ཞུགས་པའི་ཚེ། སྡིག་པའི་རླུང་རྟ་དར་ཏེ་འདུ་འཛིའི་ཆུ་གཏེར་དབྱར་སྤྲིན་ལྟར་བརྡོལ་བས་ཟང་ཟིང་གི་ལོག་འཚོ་ནི་རང་ལུས་ཀྱི་ལྕིད་ལས་ཆེ་བས་ནོན་ཏེ་འཁུམས་པ་ན། ཀྱཻ་མ་ད་ནི་བསོད་ནམས་བྱ་བའི་དངོས་པོ་ཅི་ནུས་འདུ་མ་བྱས་ན་ཟིན་པའི་ཕུང་པོ་དམྱལ་མེའི་རླབས་ཀྱིས་བཟོད་དུ་མི་བཏུབ་པར་གདུང་ངེས་སྙམ་པའི་རྒྱུ་བྱས། ཚེ་རབས་བརྒྱུད་མར་མེ་ཏོག་ཕོག་པའི་ལྷ་སྐལ་རྒྱལ་བ་ཞེ་ཆེན་པ་རབ་འབྱམས་སྨྲ་བའི་སེང་གེའི་སྒྱུ་འཕྲུལ་ཀྱང་རིགས་ཀྱི་མྱུ་གུའི་བརྒྱུད་དུ་བྱོན་པའི་རྟེན་འབྱུང་གི་སྐལ་པ་བཟང་པོས་རྐྱེན་བྱས་ཏེ། སྔ་འགྱུར་བཤད་སྒྲུབ་བྱེ་བའི་འབྱུང་གནས་ཞེ་ཆེན་བསྟན་གཉིས་དར་རྒྱས་གླིང་གཉིས་པའི་ཆོས་སྡེ་ཞིག་རབ་བྱུང་བཅུ་དྲུག་པའི་དྲག་པོ་ཅེས་པ་འབྱུང་བ་གསུམ་ལྡན་ལྕགས་ཕོ་སྤྲེལ་ལོའི་ཟླ་ཚེས་ཉིན་འཛུགས་པ་ལ་ཡིད་གདུང་བ་སྐྱེས་པའི་ཚེ། གནའ་བོའི་མེས་པོ་ས་གསུམ་གྱི་སྒྲོན་མེ་འཇིག་རྟེན་མིག་ཅིག་མཁན་སློབ་ཆོས་གསུམ་གྱིས་གངས་ཅན་བོད་ཡུལ་གྱི་གདུལ་བྱ་ཐུགས་བསྐྱེད་ཀྱི་དཔུང་པ་བཙན་པོས་བདག་གིར་མཛད་པའི་གནས་རྡོ་རྗེ་ཐེག་པའི་གསང་སྔགས་ཀྱི་རིག་འཛིན་དང་མཁའ་འགྲོ་མ་ལུས་འདུ་བའི་ཉེ་བའི་ཚནྡྷོ་ཧ། འཇིག་རྟེན་གསུམ་གྱི་མགོན་པོ་སངས་རྒྱས་རབས་བདུན། རྒྱལ་བའི་སྲས་ཀྱི་ཐུ་བོ་འཇམ་དཔལ་དབྱངས། འཛམ་གླིང་རྒྱན་གྱུར་ཀླུ་སྒྲུབ་དང་དབྱིག་གཉེན། རྡོ་རྗེ་སློབ་དཔོན་ཆེན་པོ་པདྨ་སཾ་བྷ་ཝ་སོགས་བསྟན་འགྲོའི་དཔལ་མགོན་མཚུངས་མེད་དུ་མས་ཞབས་སེན་བཀྲ་ཤིས་རེ་ཁཱ་བཀོད་པའི་ལྗོངས། གདོད་ནས་གྲུབ་པའི་རྡོ་རྗེའི་གནས་ཆེན་དུ་མས་མཛེས་པར་བསྐོར་བའི་བལ་པོའི་ཡུལ་འདིར། རྩོད་བྲལ་སྤྲུལ་པའི་གཏེར་ཆེན་པདྨ་འོད་གསལ་མདོ་སྔགས་གླིང་པ་དང༌། མཆོག་གྱུར་བདེ་ཆེན་གླིང་པ་ཉི་ཟླ་ཟུང་གི་ཟབ་གཏེར་ཐུགས་སྒྲུབ་ཡིད་བཞིན་ནོར་བུའི་གསང་བའི་ལུང་བསྟན་ལས། སྙིགས་མའི་དུས་སུ་ལོ་པཎ་ཁ་ཡར་ཐུགས་བསྐྱེད་ཀྱི་དམ་བཅས་གནས་འདིར་འདུས་ནས་རྒྱལ་བསྟན་རིན་པོ་ཆེ་བཤད་སྒྲུབ་ལས་གསུམ་གྱི་ཕྱག་རྗེས་ཀྱིས་བསྟན་པ་ལ་ཕན་པ་འབྱུང་ངོ་ཞེས་རྡོ་རྗེའི་བདེན་ཚིག་ཀུན་གཟིགས་མཁྱེན་བརྩེ་དབང་པོའི་ཕྱག་བྲིས་དངོས་སྔར་མཇལ་བའི་དོན་ད་ལྟ་ཡིད་ཀྱི་རེ་ཁཱར་གསལ་བའི་མཐུས། བསླུ་མེད་རྡོ་རྗེའི་ལུང་དོན་བཞིན་འདོད་དོན་འགྲུབ་པའི་ཡིད་ཆེས་ཀྱིས་ཆོས་ཀྱི་སྡེ་འཛུགས་པའི་བྱ་བ་ལས་ཀྱི་འཁོར་ལོ་ལ་བརྩོན་པའི་ཚེ། སྒྱུ་མའི་ནོར་ལས་རྣམ་དཀར་གྱི་སྙིང་པོ་ལེན་པའི་བློ་དཀྱེལ་ཆེ་ཞིང༌། སྔ་འགྱུར་རྡོ་རྗེ་སྙིང་པོའི་རིང་ལུགས་ལ་ལྷག་པར་དད་པ། གཉའ་ནང་བསྟན་འཕེལ། འཆི་མེད། རྣམ་རྒྱལ་སྤུན་རྣམས་དང༌། ཁྱབ་བདག་བཀའ་འགྱུར་བ་ཆེན་པོ་མ་ཧཱ་སནྡྷི་པ་ཀློང་ཆེན་ཡེ་ཤེས་རྡོ་རྗེའི་རིགས་ཀྱི་མྱུ་གུ་མཁྱེན་ཡོན་མཚུངས་མེད་སྤྲུལ་པའི་སྐུ་མཆོག་པདྨ་དབང་རྒྱལ་དང༌། ཕྱིའི་རྒྱལ་ཁབ་ན་གནས་ཀྱང་ཐེག་མཆོག་གི་སྟོན་དང་བསྟན་པ་ལ་ཡིད་ཆེས་དད་མོས་མཁའ་ལྟར་ཡངས་པ་ཕྱི་གླིང་པ་ཀུན་བཟང་རང་གྲོལ་དང༌། ཤཱཀྱའི་དགེ་སློང་དཀོན་མཆོག་བསྟན་འཛིན་མ་བུ་དང༌། བེལ་ཇོམ་བླ་མ་ཀུན་བཟང༌། དགེ་སློང་མ་ངག་དབང་ཆོས་སྒྲོན་སོགས་ནས་ཀྱང་དཀའ་ངལ་གྱིས་གཞན་ནས་ཞལ་འདེབས་ཞུ་རྒྱུ་དང་མོ་རང་ནས་ཀྱང་ཅི་འབྱོར་སོགས་ཕྱི་ནང་གི་དད་སྦྱིན་དུ་མས་གཏོང་བ་ནམ་མཁའ་མཛོད་ཀྱི་སྒོ་ཤིན་ཏུ་ཡངས་པོར་ཕྱེས་པ་དང༌། དད་ཟས་དང་གཤིན་དཀོར་ལ་བག་མེད་དུ་སྤྱོད་པ་ནག་པོའི་རྣམ་སྨིན་གྱི་ཁུར་ལྕི་བ་དང༌། གསོག་འཇོག་ལ་སྙིང་པོ་མ་མཆིས་པར་ཤེས་པ་ཐབས་གྲོགས་ལྷ་མོ་ནས་ཀྱང་རིན་ཐང་ཅན་གྱི་རྒྱན་ཆ་གྱ་ནོམ་པ་སོགས་དངོས་རྫས་ཐམས་ཅད་བསམ་སྦྱོར་དག་པས་ཕངས་མེད་དུ་བཏང་བ་དང༌། སྔ་འགྱུར་བསྟན་པའི་ཤིང་རྟ་ཆེན་པོ་རྫོགས་པའི་སངས་རྒྱས་དྲི་མེད་འོད་ཟེར་གྱི་རྣམ་འཕྲུལ་རིམ་བྱོན་ལ་ལས་སྨོན་གྱིས་འབྲེལ་ཞིང༌། བསྟན་པའི་སྦྱིན་བདག་ཆེན་པོ་ལྷོ་འབྲུག་ཆོས་ཀྱི་རྒྱལ་པོ་འཇིགས་མེད་སེང་གེ་དབང་ཕྱུག །རྒྱལ་ཡུམ་སྐུ་བགྲེས་ཕུན་ཚོགས་ཆོས་སྒྲོན། རྒྱལ་ཡུམ་སྐལ་བཟང་ཆོས་སྒྲོན་ཡུམ་སྲས། མ་ཡུམ་ཆོས་དབྱིངས་བཟང་མོའི་དབུས། རྒྱལ་བློན་འབངས་འཁོར་མཆོག་ཕལ་ཀུན་གྱིས་དངོས་རྫས་གནང་སྐྱེས་དང༌། སི་མན་ཀྲི །ཤིང་ཆ་གཙོ་བོར་གྱུར་པའི་ཕུན་སུམ་ཚོགས་པའི་མཐུན་རྐྱེན་འདོད་དགུ་མི་ཟད་པའི་བསྟི་སྟངས་དཔག་ཏུ་མེད་པ་དང་བཅས་ཐུགས་བརྩེ་དང་ལྷག་བསམ་བཟང་པོས་བསྐྱངས་པ་དང༌། ལས་སྨོན་བཟང་པོས་འབྲེལ་ཞིང་ལྷག་བསམ་གཡོ་ཟོལ་མེད་པའི་དགེ་སྦྱོང་དངོས་གྲུབ་རྒྱ་མཚོས་གཙོས་ལས་གྲོགས་རྣམས་ཀྱི་སྒོ་གསུམ་གྱི་ངལ་བ་ཁྱད་དུ་བསད་དེ་བླ་མ་དང་བསྟན་པའི་ཞབས་ཏོག་ལ་བསམས་ནས་ཉིན་མཚན་བར་མེད་དུ་བརྩོན་པར་བྱས་ཤིང༌། བོད་བཟོའི་གཙུག་ལག་ཁང་རྟེན་དང་བརྟེན་པར་བཅས་པའི་བཟོ་ཁྱད་ལ་རང་བྱན་ཚུད་པའི་ཨེམ་ཆི་ཀུན་བཟང་ནས་ཀྱང་ལྷ་ཁང་གི་སྤྱོད་ཡུལ་དང་ཟེའུ་ཁང་གི་དཔེ་རིས་བྲི་བཀོད་སོགས་གང་དགོས་གནང་ཞིང་བལ་པོའི་ཡུལ་གྱི་རྒྱལ་པོ་ཤྲཱི་ལྔ་ལྡན་བྷི་རན་དྷར་མཆོག་གི་མངའ་ཞབས་ཀྱི་ནང་ཆོས་དབུ་འཁྲིད་གྲངས་སུ་བཞུགས་པ་སྐུ་ཞབས་ཚེས་བཅུ་རིན་པོ་ཆེ་མཆོག་ནས་ཀྱང་ཆོས་སྡེ་འཛུགས་སྐྲུན་ཆོག་པའི་ཡིག་ཆ་སོགས་གཞུང་འབྲེལ་ཞུ་དགོས་རིགས་ལ་རོགས་མགོན་བླ་ན་མེད་པ་གནང་བ་དང༌། སྔ་འགྱུར་བསྟན་པའི་སྤྱི་མེས་རྒྱལ་བ་དཔལ་ཡུལ་པའི་རྫོང་ནོར་མཆོག་སྤྲུལ་འཇམ་དཔལ་བློ་གྲོས་ཀྱིས་དཔྱད་ལེགས་པའི་ས་ཡི་མཐུན་རྐྱེན་ཀྱང་མ་བསྒྲིགས་ལྷུན་གྲུབ་ཀྱི་རྟེན་འབྲེལ་དུ་བྱུང་བ་ལ། བརྟན་མཁས་ཡོན་ཏན་རྫོགས་པའི་སྔ་འགྱུར་གྱི་རྡོ་རྗེ་འཛིན་པ་འཁྲུལ་ཞིག་རིན་པོ་ཆེ་དང༌། ཀརྨའི་ཆོས་སྒར་གྱི་མཁན་ཆེན་རྡོ་རྗེའི་མཆེད་པོ་ཁྲ་འགུ་མཆོག་སྤྲུལ་རིན་པོ་ཆེ། ཟླ་བཟང་མཆོག་སྤྲུལ་རིན་པོ་ཆེ། འབྲོང་ངུར་སྤྲུལ་སྐུ་གྲུབ་སྲས་ཆོས་ཀྱི་ཉི་མ། ཁྲ་རིག་མཆོག་སྤྲུལ་རིན་པོ་ཆེ་སོགས་མཁན་སློབ་ཁྲིམས་གཙང་གི་འདུས་པས་རབ་རྒྱལ་ གཟའ་ཚེས་མཆོག་ཏུ་དགེ་བའི་སྔ་ཆར་བཀྲ་ཤིས་པའི་གསོ་སྦྱོང་དང༌། ཐམས་ཅད་མཁྱེན་གཟིགས་མཉྫུ་གྷོ་ཥའི་མཚན་ཙམ་གྱིས་སྙན་པ་བདག་གིས་ཀྱང་དཔལ་རྡོ་རྗེ་སེམས་དཔའི་སྒོ་ནས་ས་ཆོག་དང༌། རང་གཏེར་གཉགས་ལུགས་རྡོ་རྗེ་ཕུར་པའི་ཞི་བའི་སྦྱིན་སྲེག །གྲུབ་སྲས་ཨོ་རྒྱན་སྟོབས་རྒྱལ་མཆོག་གི་མཐུན་སྦྱོར་གྱིས་ཐུགས་སྒྲུབ་བར་ཆད་ཀུན་སེལ་གྱི་ཚོགས་ཀྱི་སྒྲུབ་པ་དམ་རྫས་མྱོང་གྲོལ་ཆེན་མོ་དང་འབྲེལ་བར་ལས་བཞིའི་སྦྱིན་སྲེག་དང་བཅས་པ། བཀའ་ནན་རབ་བརྗིད་ལྷ་སྲིན་དམ་བསྒྲགས་ཀྱང་རང་ཉིད་ཀྱིས་ལེགས་པར་བསྒྲུབས་པས་ས་གཞི་བྱིན་གྱིས་བརླབས་ཏེ། རྟེན་གཞི་གཙུག་ལག་ཁང་སྲ་མཁྲེགས་རྡོ་རྗེའི་རང་བཞིན་དུ་ལེགས་པར་བཞེངས་པ་ནི་བཀོད་ལེགས་ཤིང་རྒྱུ་བཟང་བ། སྟེང་གི་གཉྫི་ར་དང་རྒྱ་ཕིབས་ཀྱི་མཐའ་ཡི་ཟ་ར་ཚགས་ཕྱོགས་བཞིའི་རྒྱལ་མཚན་བཞི། རི་དྭགས་ཆོས་འཁོར་དང་བཅས་པ་རིན་ཆེན་ཟངས་ལས་སྒྲོས་གཙང་བསྒྲུབས་པ་ལ་བཙོ་སྦྱངས་ཞུན་མས་ཁྱབ་པར་བྱུག་པའི་མདངས་འོད་ཕྱོགས་ཀུན་འཕྲོ་བར་བྱས་པ་ལ། ནང་གི་རྟེན་གྱི་གཙོ་བོ་མི་མཇེད་ཞིང་གི་ཁྱོན་དང་རྩོད་ལྡན་གྱི་དུས་ངན་འདིར། འདི་ཕྱིའི་བློ་གཏད་འཆའ་འོས་དཀོན་མཆོག་རིན་ཆེན་རྣམ་པ་གསུམ་གྱི་ཐུགས་རྗེའི་ཉི་མ་འཇིག་རྟེན་དུ་སྣང་བའི་བཀའ་དྲིན་གྱི་འབྱུང་གནས་གཅིག་པུ་ད་ལྟའི་བདག་ཅག་གི་འདྲེན་པ་མཉམ་མེད་ཐུབ་པའི་དབང་པོ། གཡས་སུ་འདས་པའི་སངས་རྒྱས་འོད་སྲུང༌། གཡོན་དུ་མ་འོངས་པའི་སངས་རྒྱས་བྱམས་པ་གསུམ་གྱི་མཐོང་གྲོལ་སྣང་བརྙན་རིན་པོ་ཆེའི་སྐུ་ཚད་ཕིཊ་བཅོ་ལྔ་ལྷག །དེ་རེ་རེ་བཞིན་ཐོག་མར་ཐུགས་བསྐྱེད་པའི་ཡུལ་གྱི་སངས་རྒྱས། ཡབ་ཡུམ་སྲས་གསུམ། མཆོག་ཟུང་གཉིས། ཉེ་གནས་བཅས་པ་སྐུ་ཡི་རྒྱབ་ཡོལ་གྱི་ནང་དུ་བཞུགས་པ་དང༌། གཞན་ཡང་དེ་རྣམས་ཀྱི་གཡས་གཡོན་དུ་གསང་སྔགས་ཀྱི་སྟོན་པ་མཚོན་ཕྱིར་རྡོ་རྗེ་སེམས་དཔའ་དང༌། རྡོ་རྗེ་འཆང་ཐེག་ཆེན་གྱི་དགེ་འདུན་མཚོན་བྱེད་རྩོད་དུས་སྣོད་བཅུད་ཀྱི་རྒུད་པ་སེལ་བ་ལ་བསྔགས་པ་ས་ཡི་སྙིང་པོ་དང༌། བྱང་ཆུབ་སེམས་དཔའི་སྨོན་ལམ་གྱི་རྒྱན་ཡོངས་སུ་རྫོགས་པ་ཀུན་ཏུ་བཟང་པོ་གཉིས། ཀ་བའི་རྩེར་སངས་རྒྱས་རབས་བདུན་དང༌། རིན་ཆེན་གཙུག་ཏོར་ཅན། བདེ་གཤེགས་སྨན་བླ་མཆེད་བརྒྱད་དེ་བསྡོམས་པས་སྐུ་ཆུང་བཅུ་དྲུག །རྟེན་གཙོ་དུས་གསུམ་རྒྱལ་བའི་ཞལ་སྐྱིན་གྱི་གཡས་གཡོན་དུ་གངས་ལྗོངས་རྒྱལ་བསྟན་ཡོངས་རྫོགས་ཀྱི་ཕྱི་མོ་སྔ་འགྱུར་རྡོ་རྗེ་སྙིང་པོའི་རིང་ལུགས་དར་ཞིང་རྒྱས་པའི་རྟེན་འབྱུང་དུ་བསྟན་པའི་གཏད་རབས་ཀྱི་གཙོ་བོ་འོད་སྲུང་དང་ཀུན་དགའ་བོ་གཉིས་ལ་གཏད་རབས་ལྷག་མ་ལྔ་དང༌། འཕགས་པའི་གནས་བརྟན་ཆེན་པོ་བཅུ་དྲུག །བོད་ཡུལ་དུ་དར་བའི་སྟོད་སྨད་འདུལ་བའི་ཤིང་རྟ་ཆེན་པོ་མཁན་ཆེན་ཞི་བ་འཚོ་དང༌། ཁ་ཆེའི་པཎ་ཆེན་ཤཱཀྱ་ཤྲཱི་གཉིས་ཀྱིས་བསྐོར་བའི་སྣང་བརྙན་བྲག་རི་མ། གཞན་ཡང་སྔ་འགྱུར་བཀའ་གཏེར་གྱི་ཤིང་རྟ་ཆེན་པོ་སྨིན་གླིང་གཏེར་ཆེན་རིན་པོ་ཆེའི་འདྲ་འབག་བཅས་ཁ་བཞི་ལྷོ་ཡི་སྨན་ལྗོངས་ཆེན་པོའི་བཟོ་རིག་ཕུལ་ཕྱིན་སློབ་དཔོན་དམ་ཆོས་དང༌། ཨཾ་སྟོང་བཅས་བཟོ་བོ་བཅུ་ཕྲག་གིས་འགྲོ་བའི་མིག་གི་བདུད་རྩིར་བསྐྲུན་པ་བཅས་ལྡེར་བཟོའི་རིགས་དང༌། ལོགས་རིས་ལ་ཀུན་གཟིགས་འཇམ་དབྱངས་མཁྱེན་བརྩེའི་དབང་པོའི་དག་སྣང་གངས་ཅན་བསྟན་པ་ཡོངས་རྫོགས་ཀྱི་ཞལ་ཐང་ཚན་དགུ། སྨིན་གླིང་གཏེར་ཆེན་རིན་པོ་ཆེ་དང༌། འཇམ་མགོན་བླ་མ་མཁྱེན་ཀོང་རྣམ་གཉིས། རྒྱལ་བ་ཞེ་ཆེན་པའི་མཆོག་སྤྲུལ་རབ་འབྱམས་དང༌། རྒྱལ་ཚབ་རྣམ་གཉིས་ཀྱི་སྐྱེས་རབས་བཀའ་སྲུང་དང་བཅས་པ། རང་སློབ་བོད་ཀྱི་ལྷ་བྲིས་དཀོན་མཆོག་འོད་ཟེར་དང༌། ལྷོ་བྲག་ནམ་སྙིང་གི་དབུ་ཆེན་པོ་དགེ་སློང་དབང་འདུས། ལྷོ་འབྲུག་གི་ལྷ་བྲིས་སློབ་དཔོན་དཔའ་བོ་རྡོ་རྗེ་དང་ཨོ་རྒྱན་བསྟན་འཛིན་དཔོན་གཡོག་རྣམས་ནས་བཀོད་མཛེས་མཐོང་བས་ཡིད་འཕྲོག་པ་བསྐྲུན་པ་དང༌། ཐུགས་རྟེན་ཙནྡན་དཀར་པོ་ལས་གྲུབ་པའི་བདེ་གཤེགས་མཆོད་རྟེན་ཆ་བརྒྱད་བཅས་འདུ་ཁང་རིག་འཛིན་ཡོངས་འདུས་དགའ་ཚལ་དུ་བཞུགས་པའི་སྐུ་དང་ཐུགས་ཀྱི་རྟེན་རྣམས་དང༌། ཡང་སྟེང་གསུང་རྟེན་བཞུགས་ཡུལ་དཔེ་མཛོད་ཆེན་པོ་ལེགས་གསུང་བདུད་རྩིའི་དགའ་ཚལ་དུ་སྐུ་རྟེན་གཙོ་བོ་ཆོས་རབ་རྣམ་པར་འབྱེད་པའི་ཡེ་ཤེས་ཀྱི་སྣང་བ་མཚོན་པའི་རྒྱུད་ལུགས་འཇམ་དཔལ་དབྱངས་ཀྱི་སྣང་བརྙན་ལ་རྒྱན་དྲུག་མཆོག་བརྒྱད་ཀྱིས་བསྐོར་བ། གཡས་སུ་གངས་ཅན་བསྟན་པའི་མིག་གཅིག་གུ་རུ་རིན་པོ་ཆེ་སྣང་སྲིད་ཟིལ་གནོན་ལ་སྒྲུབ་བརྒྱུད་ཤིང་རྟ་བརྒྱད་ཀྱིས་བསྐོར་བ། གཡོན་དུ་ཀུན་མཁྱེན་རོང་ཀློང་གཉིས་ཀྱི་ཞལ་སྐྱིན་བདག་གི་རིགས་བདག་འཇམ་དབྱངས་མི་ཕམ་རྣམ་རྒྱལ་རྒྱ་མཚོ་ལ་བཤད་བརྒྱུད་ཀ་ཆེན་བཅུས་སྐོར་བའི་མཐའ་བསྐོར་གྱི་ཀུན་དགའ་ར་བའི་དྲྭ་མིག་མངོན་པར་མཛེས་པའི་ནང་དུ་གསུང་རྟེན་རྒྱལ་བའི་བཀའ་འགྱུར་རིན་པོ་ཆེ་དང་བསྟན་འགྱུར། རྙིང་མ་རྒྱུད་འབུམ། མཛོད་ཆེན་རྣམ་པ་ལྔ་དང་མཁྱེན་བརྩེ། མི་ཕམ། རྒྱལ་ཚབ་རིན་པོ་ཆེའི་གསུང་འབུམ་གྱི་གཙོས་མདོ་སྔགས་རིག་གནས་དང་བཅས་པའི་གླེགས་བམ་བགྲང་ཡས་བཞུགས་པ་དང༌། དེའི་སྟེང་ཁང་ཀུན་བཟང་ཡང་རྩེའི་རྒྱ་ཕིབས་ནང་དུ་ཐུགས་སྒྲུབ་རྣམ་བཞིའི་གནས་ཆེན་བྱིན་འབེབས་ཀྱི་བཅའ་གཞི་ཤིན་ཏུ་རྒྱས་པ་སྒྲུབ་ཐེངས་དུ་མས་བྱིན་དབབ་པར་བྱས་པ་སྟེང་དུ་བཞུགས་པའི་ནང་དུ་ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས་མཁའ་འགྲོ་གཉིས་དང་བཅས་པ་དང༌། འདུ་ཁང་ཆེན་མོའི་སྟེང་གི་གཟིམ་སྤྱིལ་ཁག་ཏུའང་རྟེན་གསུམ་གསར་རྙིང་དུ་མ་དང༌། མགོན་ཁང་ཨུ་ཙ་ལར་སྨིན་ལུགས་སྐོང་གསོལ་དངོས་གྲུབ་རོལ་མཚོའི་ཆོས་སྐྱོང་གཙོ་དགུ་དང༌། རྗེས་འབྲང་ཁ་ཤས། གསར་རྙིང་གི་བཀའ་སྲུང་གཙོ་ཆེ་རྣམས་དང༌། གཡང་སྒྲོམ་འདོད་དགུའི་དབྱིག་མཛོད་དུ་གུ་རུ་སྐྱེས་མཆོག་ཚུལ་བཟང་གཙོ་བོར་གྱུར་བའི་བཀའ་གཏེར་གྱི་ནོར་ལྷའི་རིགས་རྣམས་ཏེ། དེ་ལྟར་སྟེང་འོག་བར་གསུམ་ཡང་སྟེང་དང་བཅས་པར་བཞུགས་པའི་སྐུ་རྟེན་གསར་བཞེངས་རྣམས་ཀྱི་ནང་གཟུངས་སུ་བཞུགས་པའང་ཆེ་བ་རྣམས་ལ་ཡེ་ཤེས་སེམས་དཔའ་ལི་སྐུ་རྟེན་རྙིང་བྱིན་ལྡན་དང༌། ཆེ་ཆུང་ཐམས་ཅད་སྨིན་ལུགས་གཟུངས་ཆེན་སྡེ་ལྔ་ཚར་གྲངས་གང་འགྲོ་དང༌། ལྷ་སོ་སོའི་མཚན་སྔགས་གྲངས་མང༌། གནས་ཆེན་དུ་སྐྱེས་པའི་སྲོག་ཤིང་རྒྱུ་བཟང༌། སངས་རྒྱས་བྱང་སེམས་ཀྱི་ཡུངས་འབྲུ་ལྟ་བུའི་རིང་བསྲེལ། སྐུ་རྟེན་ཆེ་ཆུང་ཐམས་ཅད་ལ་རྡོག་རེ་རེ་དང༌། ཤོག་སེར་དང༌། རྒྱ་དཔེ་དང་ཕྱག་བྲིས་ཆོས་ཀྱི་རིང་བསྲེལ། སྐུ་བལ། སྐུ་གདུང་སོགས་རིང་བསྲེལ་རྣམ་བཞི། རྟེན་འདུས་རྙེད་དཀའ་ཁུངས་བཙུན་ཁྱད་འཕགས་སེལ་མེད་བགྲང་ཡས་དང༌། རིན་ཆེན་འབྲུ་སྨན། དར་གོས་སོགས་ལ་གཟུངས་སྒྲུབ་ལག་ལེན་ལྟར་ཞག་བརྒྱ་ཕྲག་ལྷག་གི་རིང་བསྒྲུབས་པར་བྱས་པ་རྣམས་འབུལ་བའི་སྐབས་གོང་འོག་འཁྲུགས་པ་སོགས་ལག་ལེན་མ་འཆོལ་བར་དགེ་སློང་ཁྲིམས་གཙང་ཁོ་ནས་སྔ་འགྱུར་མཁས་གྲུབ་གོང་མའི་ཕྱག་བཞེས་བཞིན་སྦྱང་ཁྲུས་ཡང་ཡང་བྱས་ཏེ་ཕུལ་བའི་སྐུ་རྟེན་ཆེ་ཆུང་རྣམས་ལ་འབྱོར་པ་དང་བསྟུན་ཏེ་སྐུ་ཡོངས་རྫོགས་དང༌། ཞལ་ཕྱག །དབུ་དང་ཕྱག་ཞབས་ཀྱི་རྒྱན་སོགས་ལ་ཆབ་གསེར་ཞུན་གྱིས་བྱུགས་ཤིང༌། དུས་གསུམ་སངས་རྒྱས་ཀྱི་སྨིན་མཚམས་མཛོད་སྤུར་དུང་གཡས་འཁྱིལ་རེ་རེ་ཕུལ་བ་དང༌། མཆོག་སྤྲུལ་རིན་པོ་ཆེ་པདྨ་དབང་རྒྱལ་དང༌། དད་སྦྱིན་བསྟན་འཕེལ་སྤུན་གཙོས་བསྟན་སྦྱིན་ནས་ཆེད་བསྐུལ་བཞིན་ལྷ་ཁང་ཆེན་མོའི་རྒྱབ་གུ་རུ་རིན་པོ་ཆེ་སྣང་སྲིད་ཟིལ་གནོན་སྐུ་ཚད་བླ་མ་སྐུ་གསུམ། རིག་འཛིན་བརྒྱད། རྗེ་འབངས་ཉེར་ལྔ་སོགས། གཟུངས་དང་རབ་གནས་ཚད་ལྡན་བགྱིས་པའི་ཚར་བཀོད་དང་མདུན་དུ་སྒྲོལ་མ་འཇིགས་པ་བརྒྱད་སྐྱོབས་ཀྱི་གཙོ་འཁོར་དང་གཡས་གཡོན་དུ་ཉེ་སྲས་བརྒྱད་བཅས་བཙོ་སྦྱང་ཞུན་མས་བྱུགས་ཤིང་གཟུངས་འབུལ་ལག་ལེན་ཚད་ལྡན་བགྱིས་པར་བཞུགས་པའི་ལྷ་ཁང་དང༌། གཞན་ཡང་འདུ་ཁང་ཆེན་མོའི་དབང་ཕྱོགས་སུ་གསུང་རྟེན་དུང་འཁོར་ཁང་ལོག་བྲིས་ལ་རྡོར་སེམས་སྟོང་སྐུ་ཡོད་པའི་ནང་དུ་མུ་ནེ་དང༌། མ་ཎི། བཛྲ། ཡིག་བརྒྱ་སོགས་གཙོ་བོར་གྱུར་པའི་དུང་འཁོར་གསུམ་རེ་རེ་ལ་བསྙེན་པ་དུང་བཅུ་གསུམ་ལྷག་ཙམ་འགྲོ་ངེས་གསེར་ཟངས་ལ་མ་ཎི་འབུར་དོད་བརྐོས་ཅན་གྱིས་གཡོག་པ་རབ་གནས་ཚད་ལྡན་ཅན་དང༌། ཐུགས་རྟེན་སྐུ་གདུང་ཆ་བརྒྱད་དྲི་མེད་རྣམ་གཉིས་ཀྱི་སྒོ་ནས་གཟུངས་ཞུགས་ལག་ལེན་ཚད་ལྡན་བགྱིས་པ་སོགས་ཕྱི་གཙུག་ལག་ཁང་དང༌། ནང་སྐུ་གསུང་ཐུགས་ཀྱི་རྟེན་རྣམས་ལ། སྙིགས་དུས་མ་ཧཱ་གུ་རུའི་ཞལ་ཚབ་བདུད་འཇོམས་འཇིགས་བྲལ་ཡེ་ཤེས་རྡོ་རྗེ་རིན་པོ་ཆེར་རྒྱལ་བའི་ཐུགས་རྗེ་འཇུག་པ་ལ་ས་ཐག་གི་ཉེ་རིང་མེད་པས་རྒྱང་རིང་པོ་ནས་ཡེ་ཤེས་དགོངས་པས་རྡོ་རྗེའི་ཡེ་ཤེས་འབེབས་པར་གསོལ་བ་བཏབ་པ་དང༌། གངས་ལྗོངས་སྐྱེ་འགྲོའི་ལྷ་སྐལ་འཕགས་མཆོག་ཐུགས་རྗེ་ཆེན་པོའི་རྣལ་འབྱོར་པ་ཞྭ་དེའུ་འཁྲུལ་ཞིག་ངག་དབང་ཆོས་ཀྱི་བློ་གྲོས་རིན་པོ་ཆེས་སྨིན་གཏེར་ཐུགས་ཆེན་བདེ་གཤེགས་ཀུན་འདུས་སྒྲུབ་ཆེན་དང་འབྲེལ་བའི་རབ་གནས་དགེ་ལེགས་འདོད་འཇོ་ལྟར་དང༌། མཐའ་རྟེན་གར་དབང་ཚེ་སྒྲུབ་དང༌། མཁའ་འགྲོ་གསང་བ་ཡེ་ཤེས། བཀའ་སྲུང་ལྷ་ཆེན་དང་བཅས་པའི་སྒྲུབ་མཆོད་སྨིན་གླིང་ཕྱག་བཞེས་འཁྲུལ་མེད་ཀྱིས་བརྒྱན་པ་རབ་བྱུང་བཅུ་བདུན་པའི་མེ་ཡོས་དབོ་ཟླའི་གཟའ་ཚེས་དགེ་བར་རིག་པ་འཛིན་པའི་དགེ་འདུན་གྱི་སྡེ་བརྒྱ་ཕྲག་ལྷག་གིས་བསྒྲུབས་པ་དང༌། གཞན་ཡང་རིས་སུ་མ་ཆད་པའི་སྐྱེས་ཆེན་དམ་པ་གནས་འདིར་ཞབས་སོར་བཀོད་པ་རྣམས་ཀྱིས་ཡེ་ཤེས་དགོངས་པས་བྱིན་གྱིས་བརླབས་པར་མཛད་ཅིང༌། རང་ཉིད་ནས་ཀྱང་ལྷག་པའི་ལྷ་རབ་འབྱམས་ཀྱི་སྒོ་ནས་རབ་གནས་ཀྱི་ཆོ་ག་རྒྱས་བསྡུས་སུམ་བརྒྱ་ལྷག་གིས་བསྒྲུབས་པ་རྟེན་སྙིང་འབུམ་ཕྲག་འགྲོ་ངེས་བཅས་སྦྱོར་དངོས་རྗེས་གསུམ་ལེགས་པར་གྲུབ་པའོ། །དེ་ལྟར་ཕྱི་ནང་གི་རྟེན་དང་༧རྒྱལ་བསྟན་རིན་པོ་ཆེ་འཛིན་སྐྱོང་སྤེལ་གསུམ་བྱེད་པོ། ཁྲིམས་གཙང་སྤོང་ཀློག་ལས་གསུམ་ལ་བརྩོན་པའི་དགེ་འདུན་གྱི་སྡེ་མི་ཉུང་བ་བཙུགས་ཤིང༌། དེ་དག་ལ་བཞུགས་གནས་ཀྱི་གྲྭ་ཤག་དང་བསྙེན་བཀུར་གྱི་མི་ཕུངས་བའི་གཏོང་སྒོ་ཕར་གཏོང་བྱས། དེ་དག་རྣམས་ཀྱིས་ཉམས་བཞེས་ལོ་འཁོར་གྱི་དུས་མཆོད་བཀའ་གཏེར་གྱི་སྒྲུབ་མཆོད་ཀྱང༌། སྔ་འགྱུར་གྱི་བསྟན་པའི་མཚན་གཞི་ལུང་ཨ་ནུ་ཡོ་ག་ཐེག་པ་དགུ་རྫོགས་ཀྱི་ཚོགས་སྒྲུབ་མྱོང་གྲོལ་བདུད་རྩིའི་སྒྲུབ་པ་དང་འབྲེལ་བ་མཐའ་རྟེན་ལས་བཞིའི་སྦྱིན་སྲེག་དང་བཅས་པ། བླ་མ་གསང་བ་འདུས་པའི་སྒྲུབ་མཆོད་དང་འབྲེལ་བའི་མཐོང་གྲོལ་ཚེས་བཅུའི་གར་འཆམ། སྟོན་དང་བསྟན་པ་གཅིག་གྱུར་འདུལ་བ་གཞི་གསུམ་གྱི་ཕྱག་ལེན་སོགས་ད་ལྟ་མཚོན་ཙམ་ཚུགས་བཞིན་པ་དང༌། ལོ་བསྟར་རྒྱུད་རྒྱལ་གསང་བ་སྙིང་པོའི་བཤད་པ་ཉིན་བཅུ་ཉུང་མཐའ་བྱས་པ་དང༌། དབང་ལུང་གནད་ཆེ་བ་ཟླ་བ་གཅིག་ལས་མི་ཉུང་བ་འཆད་སྤེལ་མ་ཆད་པ་དང༌། སླད་ནས་རིམ་བཞིན་མདོ་ཁམས་ཞེ་ཆེན་མ་དགོན་དུ་བཀའ་གཏེར་གྱི་སྒྲུབ་པ་དང༌། སྒྲུབ་མཆོད། བཤད་སྒྲུབ་ཀྱི་སྡེ་སོགས་ཇི་ལྟར་ཡོད་པ་ལྟར་ཚུགས་པར་འགྱུར་བའི་རེ་སྨོན་ཚད་མེད་པ་ཡོད་པ་དེ་བཞིན་མཐའ་རྒྱས་སུ་འགྲུབ་པར་རྒྱལ་བ་སྲས་དང་བཅས་པས་བྱིན་གྱིས་རློབས་པར་གསོལ། གཞན་ཡང་རྒྱུན་གྱི་ཉམས་བཞེས་ཀྱི་རིམ་པ་ནི། ཟླ་བ་འབྱུང་ངོ་ཅོག་གི་ཡར་མར་གྱི་ཚེས་བཅུ་ལ་གུ་རུ་ཞི་དྲག་དང་མཁའ་འགྲོའི་ཚོགས་མཆོད། ཉ་སྟོང་སོགས་དུས་ཆེན་ཁག་ལ་ཐུབ་དབང་ཉེ་སྲས་བརྒྱད་དང༌། སྨན་བླ་མཆེད་བརྒྱད། བསྐལ་བཟང་སངས་རྒྱས་སྟོང་རྩ། བསམ་པ་ལྷུན་འགྲུབ་མ་སོགས་ཀྱི་མཆོད་ཆོག །ཉེར་དགུར་དངོས་རོལ་དམ་ཅན་སྡེ་དགུ་གཙོར་གྱུར་གྱི་གསོལ་བསྐང༌། ཉིན་ལྟར་ཞོག་དགོང་གི་ཞལ་འདོན་གྱི་རིམ་པ་ཡང༌། སྨིན་ལུགས་ཆོས་སྤྱོད་སྐྱབས་སེམས་ཡན་ལག་བདུན་པ་དང་སྨོན་འཇུག་བྱང་སེམས་ཀྱི་སྡོམ་ཆོག །རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་གསང་བ་སྙིང་པོའི་རྒྱུད་ཀྱི་ལེའུ་རེས་མོས་བཀླག་ཐབས་དང་འབྲེལ་བ། རྒྱལ་བའི་ཞལ་གསུང་འཇམ་སྡུད་བཟང་གསུམ། མངའ་རིས་པཎ་ཆེན་གྱི་སྡོམ་གསུམ་རྣམ་ངེས་ལེའུ་རེས་མོས། དཔལ་ཆེན་ཕུར་པའི་རྒྱུན་ཁྱེར་དང་སྨིན་ལུགས་དམ་ཅན་སྤྱི་གཏོར། རྒྱུད་མགོན་ལེགས་ལྡན། སྔགས་སྲུང༌། མ་ཧཱ་དེ་ཝ་དང་ཞིང་སྐྱོང་དུར་ཁྲོད་དབང་མོ། གཞན་ཡང་གསོལ་བསྡུས་རིགས་གང་འོས་སྦྱར་བ་ལ་ཆོས་སྤྱོད་བསྔོ་སྨོན་བསྟན་རྒྱས་སྨོན་ལམ་གྱིས་མཐའ་བརྒྱན་པ་སོགས་ཆོས་མཐུན་གྱི་བགྱི་བས་དུས་འདའ་བར་མཛད་པ་སྟེ། འདུས་པའི་སྡེ་དང་དེ་རྣམས་ཀྱི་ཐུགས་དམ་ཉམས་བཞེས་ཀྱི་ཚུལ་མཚོན་ཙམ་མོ། །དེ་ལྟར་རང་གཞན་སྦྱིན་པའི་བདག་པོར་བཅས་པས་ལེགས་བྱས་བསོད་ནམས་ཀྱི་ཕུང་པོ་ལེགས་པར་བསྒྲུབས་པའི་དགོས་པ་དང་ཕན་ཡོན་ཀྱང༌། ས་སྙིང་འཁོར་ལོ་བཅུ་པའི་མདོ་ལས། འཁོར་བར་ཡོངས་སུ་འཁོར་བ་ན། །སྦྱིན་པ་མ་གཏོགས་གཉེན་མེད་པས། །བློ་ལྡན་ཕུན་སུམ་ཚོགས་འདོད་ཀྱིས། །རབ་ཏུ་འབད་དེ་སྦྱིན་པ་སྦྱིན། །ཞེས་དང༌། དཔལ་ལྡན་ཟླ་བས། སྐྱེ་བོ་འདི་ཀུན་བདེ་བ་མངོན་འདོད་ཅིང༌། །མི་རྣམས་བདེ་བའང་ལོངས་སྤྱོད་མེད་མིན་ལ། །ལོངས་སྤྱོད་ཀྱང་ནི་སྦྱིན་ལས་འབྱུང་མཁྱེན་ནས། །ཐུབ་པས་དང་པོར་སྦྱིན་པའི་གཏམ་མཛད་དོ། །ཞེས་དང༌། འཕགས་པ་འཇིག་རྟེན་གྱིས་དྲིས་པའི་ལུང་བསྟན་པའི་མདོ་ལས། དེ་ལ་ཟང་ཟིང་གི་སྦྱིན་པས་ནི་བསོད་ནམས་ཀྱི་ཚོགས་རྫོགས་ལ། ཆོས་ཀྱི་སྦྱིན་པས་ནི་ཡེ་ཤེས་ཀྱི་ཚོགས་རྫོགས་ཏེ། འདི་གཉིས་ནི་རྣམ་པ་ཐམས་ཅད་མཁྱེན་པ་ཉིད་སྒྲུབ་པར་བྱེད་པའོ། །ཞེས་གསུངས། ཀུན་མཁྱེན་ཆོས་རྗེས། བདེ་གཤེགས་གཟུགས་བརྙན་ཐམས་ཅད་བཟོ་སྤྲུལ་པས། །རྒྱལ་བས་བྱིན་བརླབས་འགྲོ་ཀུན་མཆོད་པའི་ཞིང༌། །བེམ་པོ་གཞན་དང་འགྲན་དུ་ཡོད་མ་ཡིན། །དད་པའི་རང་བཞིན་བཟང་པོ་སྐྱེད་པར་མཛོད། །ཅེས་དང༌། ཆོ་འཕྲུལ་རྣམ་པར་བསྟན་པའི་མདོ་ལས། ཁ་གཅིག་གིས་མཆོད་རྟེན་བྱེད་དུ་འཇུག་པ་དང༌། གཙུག་ལག་ཁང་དུ་འཆག་པ་དང༌། སྐྱེད་མོས་ཚལ་བྱེད་དུ་གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་གཅིག་ནི་སྐུ་གཟུགས་བྱེད་དུ་གཞུག་པ་དང༌། རི་མོ་དང༌། གསེར་དང༌། དངུལ་དང༌། ར་གན་གྱི་སྐུ་གཟུགས་བྱེད་དུ་བཞུགས་པའི་དགེ་པའི་རྩ་བ་ལ་སྤྲོ་བ་བསྐྱེད་པས་འདུལ། ཞེས་དང༌། ཁྱད་པར་འཕགས་བསྟོད་འགྲེལ་པ་ལས། བརྒྱ་བྱིན་གཙུག་ལག་ཁང་གི་ཕྱིར། ས་ནི་སྦྱིན་པ་གཏོང་བྱེད་པ། །ཚངས་པའི་བསོད་ནམས་རབ་བསྐྱེད་དེ། །མཐོ་རིས་དག་ཏུ་སྐལ་པར་དགའ། །ཞེས་དང༌། དེ་བཞིན་གཤེགས་པའི་སྐུ་གཟུགས་ཀྱི་ལེའུར་ཡང༌། སའམ། རྡོ་ཐལ་ལམ། ཤིང་ངམ། རྡེའུ་འམ། ར་གན་ནམ། ལྕགས་སམ། གསེར་རམ། དངུལ་ལམ། བེཌཱུརྻ་འམ། ཤེལ་ལམ། མུ་ཏིག་དམར་པོ་འམ། རྡོའི་སྙིང་པོའམ། སྤུག་གམ། དུང་ངམ། མན་ཤེལ་ལམ། སྤོས་སམ། རས་སམ། ཤིང་ལེབ་བམ། རྩིག་ངོས་ལ་དེ་བཞིན་གཤེགས་པའི་སྐུ་གཟུགས་བཞེངས་བར་བྱ། དྲལ་བ་གསོ་བར་བྱ་བ་དང༌། གྲུམས་པ་བཅོས་པར་བྱས་ཏེ། དེ་བཞིན་གཤེགས་པའི་སྐུ་གཟུགས་བྱས་ན། རིགས་དམའ་བ་ཐམས་ཅད་དང༌། སྡིག་པ་བྱེད་པའི་རིགས་རྣམས་དང༌། ལོག་པར་ལྟ་བའི་རིགས་སུ་མི་སྐྱེ། ཡན་ལག་གང་ཡང་མ་ཚང་བར་མི་འགྱུར་རོ། །གལ་ཏེ་མཚམས་མེད་པ་ལྔ་བྱས་སུ་ཟིན་ཀྱང༌། དེ་བཞིན་གཤེགས་པ་ལ་དད་པ་རྙེད་དེ་སྐུ་གཟུགས་བྱས་ན། ལས་དེས་སེམས་ཅན་དམྱལ་བ་མྱོང་བ་ཆུང་ངུ་མྱངས་ཏེ། ཐེག་པ་གསུམ་གང་ཡང་རུང་བས་ངེས་པར་འབྱུང་བར་འགྱུར་རོ། །དཔེར་ན་མི་ཞིག་མི་གཙང་བས་རེག་པ་ལ་རབ་ཏུ་དག་པར་བཀྲུས་ཏེ། སྤོས་ཀྱི་བྱུགས་ན་དྲི་མི་ཞིམ་པ་དེ་མེད་པར་འགྱུར་རོ། །དེ་བཞིན་དུ་མཚམས་མེད་པ་བྱས་པ་དེའི་སྡིག་པ་ཡང་མེད་པར་འགྱུར་རོ། །མི་དགེ་བ་བཅུའི་ལས་ཀྱི་ལམ་དང་ལྡན་པ་ཡང༌། དེ་བཞིན་གཤེགས་པ་ལ་དད་པ་རྙེད་དེ། དེའི་སྐུ་གཟུགས་བྱས་ན་དེའི་སྡིག་པ་དེ་ཇི་ལྟར་མེའི་ཕུང་པོས་མར་འཚིག་སྟེ། དུ་བ་ཡང་མི་མངོན་པ་བཞིན་དུ་དེའི་སྡིག་པ་དེ་ཡང་མི་སྣང་བར་འགྱུར་རོ། །ཞེས་དང༌། འཕགས་པ་རྨད་དུ་བྱུང་བའི་མདོར། ཀུན་དགའ་བོ་འཛམ་བུའི་གླིང་ཡང་ལྟ་ཞོག །ཤར་གྱི་ལུས་འཕགས་གླིང་ཡང་ལྟ་ཞོག །ནུབ་ཀྱི་བ་གླང་སྤྱོད་ཀྱང་ལྟ་ཞོག །བྱང་གི་སྒྲ་མི་སྙན་ཡང་ལྟ་ཞོག །ལྷའི་དབང་པོ་བརྒྱ་བྱིན་གྱི་ཁང་བཟང་རྣམ་པར་རྒྱལ་བྱེད་ཅེས་བྱ་བ་ཡང་ལྟ་ཞོག །ཀུན་དགའ་བོ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོད་དེ། དེ་རིགས་ཀྱི་བུའམ། རིགས་ཀྱི་བུ་མོ་དད་པ་གང་ལ་ལ་ཞིག་གིས་རིན་པོ་ཆེ་སྣ་བདུན་གྱི་རང་བཞིན་དུ་བྱས་ཏེ། རྒྱུན་དུ་ཞུགས་པ་རྣམས་དང༌། ལན་གཅིག་ཕྱིར་འོང་བ་རྣམས་དང༌། ཕྱིར་མི་འོང་བ་རྣམས་དང༌། དགྲ་བཅོམ་པ་རྣམས་དང༌། ཕྱོགས་བཞིའི་དགེ་སློང་གི་དགེ་འདུན་ལ་ཕུལ་བ་བས་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པའི་མཆོད་རྟེན་སྐྱུ་རུ་རའི་འབྲུ་ཙམ་བྱས་ལ། ཁབ་ཙམ་གྱི་སྲོག་ཤིང་བཙུགས་ཏེ། རྒྱ་ཤུག་གི་ལོ་མ་ཙམ་གྱི་གདུགས་གསོལ་ནས། ནས་ཀྱི་འབྲུ་ཙམ་གྱི་སྐུ་གཟུགས་བྱས་ལ་ཡུངས་འབྲུ་ཙམ་གྱི་རིང་བསྲེལ་བཅུག་ན་དེ་ནི་དེ་བས་བསོད་ནམས་ཆེའོ། །ཞེས་པ་སོགས་བདེན་གསུང་རྒྱལ་བའི་བཀའ་དང་བསྟན་བཅོས་རྣམས་ལས་ལེགས་བྱས་འདི་ལྟ་བུའི་ཚུལ་ལ་དགོས་པ་ཕན་ཡོན་མཐའ་ཡས་པ་གསུངས་པ་ལ་ཡིད་རྟོན་ཏེ་རང་གཞན་ཐམས་ཅད་སྤྲོ་བ་བསྐྱེད་པར་བྱའོ། །ལེགས་བྱས་རྣམ་དཀར་དག་བྱེད་གཏེར་བསྐྲུན་པར། །སྲས་བཅས་རྒྱལ་བས་ཡོངས་བསྔོའི་ཟླ་ཟེར་གྱིས། །རེག་པས་བྱང་ཆུབ་སྤྱོད་པའི་རླབས་ཕྲེང་གི །འཇམ་དབྱངས་ཀུན་བཟང་རྣམ་ཐར་རྗེས་སྙེགས་ཤོག །བཀའ་དང་བསྟན་བཅོས་རྒྱ་མཚོའི་མཐར་བགྲོད་ཕྱིར། །མཁས་ཚུལ་དགུ་ཡི་བ་དན་མཛེས་གཡོ་བར། །རྒྱལ་ཀུན་དགྱེས་པའི་ལམ་བཟང་ནོར་བུའི་གཏེར། །རྣམ་དཔྱོད་རྒྱལ་མཚན་ཏོག་ཏུ་མཆོད་ནུས་ཤོག །ཟབ་དོན་སྨིན་གྲོལ་བདུད་རྩིའི་ཆར་བཟང་གིས། །རྣམ་བཞིའི་རིག་འཛིན་རིན་ཆེན་སྙེ་མའི་ཚོགས། །མཛེས་ནས་ངེས་གསང་བསྟན་མཆོག་ཀུན་དགའི་ཚལ། །དར་བབ་འབྲེལ་ཚད་རྡོ་རྗེའི་སར་ཕྱིན་ཤོག །ཅེས་པའང་རྣམ་དཀར་གྱི་ལས་རྩོམ་པ་པོ་དིལ་མགོ་མཁྱེན་སྤྲུལ་བཀྲ་ཤིས་དཔལ་འབྱོར་པས་རབ་བྱུང་བཅུ་བདུན་པའི་མེ་ཡོས་མགོ་ཟླའི་ཚེས། འཕགས་པ་གནས་བརྟན་པའི་ལུགས་ལྟར་ན་སྟོན་པའི་འདས་ལོ་ ༢༥༣༡ ཕྱི་ལོ་ ༡༩༨༧ ཟླ་ཚེས་ལ་དད་ལྡན་སྤྲོ་བ་བསྐྱེད་ཕྱིར་ལོ་རྒྱུས་མདོར་བསྡུས་སུ་བརྗོད་པ་དགེ་ལེགས་འཕེལ།། །།
[edit]

@#/__/gsung gi rdo rjes ye shes nyin mor byed/_/mkhyen brtse nus pa'i 'od stong zhing kun bres/_/lhag par gangs can pad+mo'i gnyen gyur la/_/yid ches dad brgyas 'du 'bral med par bsten/_/gsang gsum ye shes sgyu ma'i cho 'phrul las/_/'phags bod 'dzin mar mdzes pa'i mkhas grub dbang*/_/sangs rgyas gnyis pa mkhan slob rje 'bangs grogs/_/bshad sgrub shing rta'i tshogs kun dwangs bas bsngags/_/legs byas rdzogs ldan sprin gyi phreng ba brgya/_/chos dbyings mkhar rgyu sku gnyis nyi zla'i 'od/_/'dzum phyir phra mo'i rnam dkar ba thag gi_/rtogs brjod sgro skur skyon bral cha tsam brjod/_/de yang skabs su bab pa'i legs byas kyi cha phra mo sgro bskur dang bral ba gsong por smra na/_bod chen po mdo khams chu bo gser ldan gyi 'gram/_phun tshogs sde~M bzhi dang*/_yul dge~M ba bcus mdzes pa'i sa yi tshangs pa chen po'i rgyal khab lugs brgya'i 'dun sa'i dbang phyogs lha gcig kong jos thub dbang gi zhal skyin bod yul bstan 'gro'i btsas su spyan drangs skabs brag la phyag sor gyi rdzu 'phrul bkod pas tA re pad+mo yo ga'i ye shes kyi sku bris pa dngos su bzhugs pa'i sman ljongs 'dzam gling rgyan mchog seng chen nor bu dgra 'dul gyi bka'i blon chen gyi thu bo/_grub pa'i dbang phyug sa ra ha'i rnam 'phrul 'dan mas gnas gzhir bzung zhing rgya gar gyi paN grub chen po smr-i ti dz+nyA na/_rgyal ba gnyis pa blo bzang grags pa/_zhu chen ldan ma lo tsA ba tshul khrims rin chen/_zung 'jug grub pa'i rgyal po sangs rgyas mnyan pa/_snang bzhi mthar son gyi rnal 'byor chen po rdzogs chen mi 'gyur nam mkha'i rdo rje sogs ldan ljongs lo paN mkhas grub bco lnga rim par byon pa dang gdan sa mdzad pa sogs chos tshigs kyi yul dbus su ya rabs dra ma myos kyi gdung du skyes pa'i kun tu rgyu/_'jam pa'i rdo rje mi pham yab sras dang zhe chen rgyal tshab sogs 'gran bral gyi mkhas grub lnga bcu lhag gis rjes su bzung zhing*/_snga 'gyur bka' gter gtso bor gyur pa'i gangs can bshad sgrub kyi shing rta bco brgyad kyi smin grol bdud rtsis snying gi bum pa khengs pa'i skal bzang can rgyal khams nges med du rkang 'khyams pa mang+ga la shrI b+hU tir grags pa gang*/_bstan pa snyigs ma'i mthar thug pas gsang sngags kyi de nyid bcu dang mi ldan bzhin rdo rje slob dpon gyi ming khas 'che ba'i brdzu ba la zhugs pa'i tshe/_sdig pa'i rlung rta dar te 'du 'dzi'i chu gter dbyar sprin ltar brdol bas zang zing gi log 'tsho ni rang lus kyi lcid las che bas non te 'khums pa na/_kyai ma da ni bsod nams bya ba'i dngos po ci nus 'du ma byas na zin pa'i phung po dmyal me'i rlabs kyis bzod du mi btub par gdung nges snyam pa'i rgyu byas/_tshe rabs brgyud mar me tog phog pa'i lha skal rgyal ba zhe chen pa rab 'byams smra ba'i seng ge'i sgyu 'phrul kyang rigs kyi myu gu'i brgyud du byon pa'i rten 'byung gi skal pa bzang pos rkyen byas te/_snga 'gyur bshad sgrub bye ba'i 'byung gnas zhe chen bstan gnyis dar rgyas gling gnyis pa'i chos sde zhig rab byung bcu drug pa'i drag po ces pa 'byung ba gsum ldan lcags pho sprel lo'i zla tshes nyin 'dzugs pa la yid gdung ba skyes pa'i tshe/_gna' bo'i mes po sa gsum gyi sgron me 'jig rten mig cig mkhan slob chos gsum gyis gangs can bod yul gyi gdul bya thugs bskyed kyi dpung pa btsan pos bdag gir mdzad pa'i gnas rdo rje theg pa'i gsang sngags kyi rig 'dzin dang mkha' 'gro ma lus 'du ba'i nye ba'i tshan+d+ho ha/_'jig rten gsum gyi mgon po sangs rgyas rabs bdun/_rgyal ba'i sras kyi thu bo 'jam dpal dbyangs/_'dzam gling rgyan gyur klu sgrub dang dbyig gnyen/_rdo rje slob dpon chen po pad+ma saM b+ha wa sogs bstan 'gro'i dpal mgon mtshungs med du mas zhabs sen bkra shis re khA bkod pa'i ljongs/_gdod nas grub pa'i rdo rje'i gnas chen du mas mdzes par bskor ba'i bal po'i yul 'dir/_rtsod bral sprul pa'i gter chen pad+ma 'od gsal mdo sngags gling pa dang*/_mchog gyur bde chen gling pa nyi zla zung gi zab gter thugs sgrub yid bzhin nor bu'i gsang ba'i lung bstan las/_snyigs ma'i dus su lo paN kha yar thugs bskyed kyi dam bcas gnas 'dir 'dus nas rgyal bstan rin po che bshad sgrub las gsum gyi phyag rjes kyis bstan pa la phan pa 'byung ngo zhes rdo rje'i bden tshig kun gzigs mkhyen brtse dbang po'i phyag bris dngos sngar mjal ba'i don da lta yid kyi re khAr gsal ba'i mthus/_bslu med rdo rje'i lung don bzhin 'dod don 'grub pa'i yid ches kyis chos kyi sde 'dzugs pa'i bya ba las kyi 'khor lo la brtson pa'i tshe/_sgyu ma'i nor las rnam dkar gyi snying po len pa'i blo dkyel che zhing*/_snga 'gyur rdo rje snying po'i ring lugs la lhag par dad pa/_gnya' nang bstan 'phel/_'chi med/_rnam rgyal spun rnams dang*/_khyab bdag bka' 'gyur ba chen po ma hA san+d+hi pa klong chen ye shes rdo rje'i rigs kyi myu gu mkhyen yon mtshungs med sprul pa'i sku mchog pad+ma dbang rgyal dang*/_phyi'i rgyal khab na gnas kyang theg mchog gi ston dang bstan pa la yid ches dad mos mkha' ltar yangs pa phyi gling pa kun bzang rang grol dang*/_shAkya'i dge slong dkon mchog bstan 'dzin ma bu dang*/_bel jom bla ma kun bzang*/_dge slong ma ngag dbang chos sgron sogs nas kyang dka' ngal gyis gzhan nas zhal 'debs zhu rgyu dang mo rang nas kyang ci 'byor sogs phyi nang gi dad sbyin du mas gtong ba nam mkha' mdzod kyi sgo shin tu yangs por phyes pa dang*/_dad zas dang gshin dkor la bag med du spyod pa nag po'i rnam smin gyi khur lci ba dang*/_gsog 'jog la snying po ma mchis par shes pa thabs grogs lha mo nas kyang rin thang can gyi rgyan cha gya nom pa sogs dngos rdzas thams cad bsam sbyor dag pas phangs med du btang ba dang*/_snga 'gyur bstan pa'i shing rta chen po rdzogs pa'i sangs rgyas dri med 'od zer gyi rnam 'phrul rim byon la las smon gyis 'brel zhing*/_bstan pa'i sbyin bdag chen po lho 'brug chos kyi rgyal po 'jigs med seng ge dbang phyug_/rgyal yum sku bgres phun tshogs chos sgron/_rgyal yum skal bzang chos sgron yum sras/_ma yum chos dbyings bzang mo'i dbus/_rgyal blon 'bangs 'khor mchog phal kun gyis dngos rdzas gnang skyes dang*/_si man kri_/shing cha gtso bor gyur pa'i phun sum tshogs pa'i mthun rkyen 'dod dgu mi zad pa'i bsti stangs dpag tu med pa dang bcas thugs brtse dang lhag bsam bzang pos bskyangs pa dang*/_las smon bzang pos 'brel zhing lhag bsam g.yo zol med pa'i dge sbyong dngos grub rgya mtshos gtsos las grogs rnams kyi sgo gsum gyi ngal ba khyad du bsad de bla ma dang bstan pa'i zhabs tog la bsams nas nyin mtshan bar med du brtson par byas shing*/_bod bzo'i gtsug lag khang rten dang brten par bcas pa'i bzo khyad la rang byan tshud pa'i em chi kun bzang nas kyang lha khang gi spyod yul dang ze'u khang gi dpe ris bri bkod sogs gang dgos gnang zhing bal po'i yul gyi rgyal po shrI lnga ldan b+hi ran d+har mchog gi mnga' zhabs kyi nang chos dbu 'khrid grangs su bzhugs pa sku zhabs tshes bcu rin po che mchog nas kyang chos sde 'dzugs skrun chog pa'i yig cha sogs gzhung 'brel zhu dgos rigs la rogs mgon bla na med pa gnang ba dang*/_snga 'gyur bstan pa'i spyi mes rgyal ba dpal yul pa'i rdzong nor mchog sprul 'jam dpal blo gros kyis dpyad legs pa'i sa yi mthun rkyen kyang ma bsgrigs lhun grub kyi rten 'brel du byung ba la/_brtan mkhas yon tan rdzogs pa'i snga 'gyur gyi rdo rje 'dzin pa 'khrul zhig rin po che dang*/_karma'i chos sgar gyi mkhan chen rdo rje'i mched po khra 'gu mchog sprul rin po che/_zla bzang mchog sprul rin po che/_'brong ngur sprul sku grub sras chos kyi nyi ma/_khra rig mchog sprul rin po che sogs mkhan slob khrims gtsang gi 'dus pas rab rgyal gza' tshes mchog tu dge ba'i snga char bkra shis pa'i gso sbyong dang*/_thams cad mkhyen gzigs many+dzu g+ho Sha'i mtshan tsam gyis snyan pa bdag gis kyang dpal rdo rje sems dpa'i sgo nas sa chog dang*/_rang gter gnyags lugs rdo rje phur pa'i zhi ba'i sbyin sreg_/grub sras o rgyan stobs rgyal mchog gi mthun sbyor gyis thugs sgrub bar chad kun sel gyi tshogs kyi sgrub pa dam rdzas myong grol chen mo dang 'brel bar las bzhi'i sbyin sreg dang bcas pa/_bka' nan rab brjid lha srin dam bsgrags kyang rang nyid kyis legs par bsgrubs pas sa gzhi byin gyis brlabs te/_rten gzhi gtsug lag khang sra mkhregs rdo rje'i rang bzhin du legs par bzhengs pa ni bkod legs shing rgyu bzang ba/_steng gi gany+dzi ra dang rgya phibs kyi mtha' yi za ra tshags phyogs bzhi'i rgyal mtshan bzhi/_ri dwags chos 'khor dang bcas pa rin chen zangs las sgros gtsang bsgrubs pa la btso sbyangs zhun mas khyab par byug pa'i mdangs 'od phyogs kun 'phro bar byas pa la/_nang gi rten gyi gtso bo mi mjed zhing gi khyon dang rtsod ldan gyi dus ngan 'dir/_'di phyi'i blo gtad 'cha' 'os dkon mchog rin chen rnam pa gsum gyi thugs rje'i nyi ma 'jig rten du snang ba'i bka' drin gyi 'byung gnas gcig pu da lta'i bdag cag gi 'dren pa mnyam med thub pa'i dbang po/_g.yas su 'das pa'i sangs rgyas 'od srung*/_g.yon du ma 'ongs pa'i sangs rgyas byams pa gsum gyi mthong grol snang brnyan rin po che'i sku tshad phiT bco lnga lhag_/de re re bzhin thog mar thugs bskyed pa'i yul gyi sangs rgyas/_yab yum sras gsum/_mchog zung gnyis/_nye gnas bcas pa sku yi rgyab yol gyi nang du bzhugs pa dang*/_gzhan yang de rnams kyi g.yas g.yon du gsang sngags kyi ston pa mtshon phyir rdo rje sems dpa' dang*/_rdo rje 'chang theg chen gyi dge 'dun mtshon byed rtsod dus snod bcud kyi rgud pa sel ba la bsngags pa sa yi snying po dang*/_byang chub sems dpa'i smon lam gyi rgyan yongs su rdzogs pa kun tu bzang po gnyis/_ka ba'i rtser sangs rgyas rabs bdun dang*/_rin chen gtsug tor can/_bde gshegs sman bla mched brgyad de bsdoms pas sku chung bcu drug_/rten gtso dus gsum rgyal ba'i zhal skyin gyi g.yas g.yon du gangs ljongs rgyal bstan yongs rdzogs kyi phyi mo snga 'gyur rdo rje snying po'i ring lugs dar zhing rgyas pa'i rten 'byung du bstan pa'i gtad rabs kyi gtso bo 'od srung dang kun dga' bo gnyis la gtad rabs lhag ma lnga dang*/_'phags pa'i gnas brtan chen po bcu drug_/bod yul du dar ba'i stod smad 'dul ba'i shing rta chen po mkhan chen zhi ba 'tsho dang*/_kha che'i paN chen shAkya shrI gnyis kyis bskor ba'i snang brnyan brag ri ma/_gzhan yang snga 'gyur bka' gter gyi shing rta chen po smin gling gter chen rin po che'i 'dra 'bag bcas kha bzhi lho yi sman ljongs chen po'i bzo rig phul phyin slob dpon dam chos dang*/_aM stong bcas bzo bo bcu phrag gis 'gro ba'i mig gi bdud rtsir bskrun pa bcas lder bzo'i rigs dang*/_logs ris la kun gzigs 'jam dbyangs mkhyen brtse'i dbang po'i dag snang gangs can bstan pa yongs rdzogs kyi zhal thang tshan dgu/_smin gling gter chen rin po che dang*/_'jam mgon bla ma mkhyen kong rnam gnyis/_rgyal ba zhe chen pa'i mchog sprul rab 'byams dang*/_rgyal tshab rnam gnyis kyi skyes rabs bka' srung dang bcas pa/_rang slob bod kyi lha bris dkon mchog 'od zer dang*/_lho brag nam snying gi dbu chen po dge slong dbang 'dus/_lho 'brug gi lha bris slob dpon dpa' bo rdo rje dang o rgyan bstan 'dzin dpon g.yog rnams nas bkod mdzes mthong bas yid 'phrog pa bskrun pa dang*/_thugs rten tsan+dan dkar po las grub pa'i bde gshegs mchod rten cha brgyad bcas 'du khang rig 'dzin yongs 'dus dga' tshal du bzhugs pa'i sku dang thugs kyi rten rnams dang*/_yang steng gsung rten bzhugs yul dpe mdzod chen po legs gsung bdud rtsi'i dga' tshal du sku rten gtso bo chos rab rnam par 'byed pa'i ye shes kyi snang ba mtshon pa'i rgyud lugs 'jam dpal dbyangs kyi snang brnyan la rgyan drug mchog brgyad kyis bskor ba/_g.yas su gangs can bstan pa'i mig gcig gu ru rin po che snang srid zil gnon la sgrub brgyud shing rta brgyad kyis bskor ba/_g.yon du kun mkhyen rong klong gnyis kyi zhal skyin bdag gi rigs bdag 'jam dbyangs mi pham rnam rgyal rgya mtsho la bshad brgyud ka chen bcus skor ba'i mtha' bskor gyi kun dga' ra ba'i drwa mig mngon par mdzes pa'i nang du gsung rten rgyal ba'i bka' 'gyur rin po che dang bstan 'gyur/_rnying ma rgyud 'bum/_mdzod chen rnam pa lnga dang mkhyen brtse/_mi pham/_rgyal tshab rin po che'i gsung 'bum gyi gtsos mdo sngags rig gnas dang bcas pa'i glegs bam bgrang yas bzhugs pa dang*/_de'i steng khang kun bzang yang rtse'i rgya phibs nang du thugs sgrub rnam bzhi'i gnas chen byin 'bebs kyi bca' gzhi shin tu rgyas pa sgrub thengs du mas byin dbab par byas pa steng du bzhugs pa'i nang du chos sku snang ba mtha' yas/_longs sku thugs rje chen po/_sprul sku pad+ma 'byung gnas mkha' 'gro gnyis dang bcas pa dang*/_'du khang chen mo'i steng gi gzim spyil khag tu'ang rten gsum gsar rnying du ma dang*/_mgon khang u tsa lar smin lugs skong gsol dngos grub rol mtsho'i chos skyong gtso dgu dang*/_rjes 'brang kha shas/_gsar rnying gi bka' srung gtso che rnams dang*/_g.yang sgrom 'dod dgu'i dbyig mdzod du gu ru skyes mchog tshul bzang gtso bor gyur ba'i bka' gter gyi nor lha'i rigs rnams te/_de ltar steng 'og bar gsum yang steng dang bcas par bzhugs pa'i sku rten gsar bzhengs rnams kyi nang gzungs su bzhugs pa'ang che ba rnams la ye shes sems dpa' li sku rten rnying byin ldan dang*/_che chung thams cad smin lugs gzungs chen sde lnga tshar grangs gang 'gro dang*/_lha so so'i mtshan sngags grangs mang*/_gnas chen du skyes pa'i srog shing rgyu bzang*/_sangs rgyas byang sems kyi yungs 'bru lta bu'i ring bsrel/_sku rten che chung thams cad la rdog re re dang*/_shog ser dang*/_rgya dpe dang phyag bris chos kyi ring bsrel/_sku bal/_sku gdung sogs ring bsrel rnam bzhi/_rten 'dus rnyed dka' khungs btsun khyad 'phags sel med bgrang yas dang*/_rin chen 'bru sman/_dar gos sogs la gzungs sgrub lag len ltar zhag brgya phrag lhag gi ring bsgrubs par byas pa rnams 'bul ba'i skabs gong 'og 'khrugs pa sogs lag len ma 'chol bar dge slong khrims gtsang kho nas snga 'gyur mkhas grub gong ma'i phyag bzhes bzhin sbyang khrus yang yang byas te phul ba'i sku rten che chung rnams la 'byor pa dang bstun te sku yongs rdzogs dang*/_zhal phyag_/dbu dang phyag zhabs kyi rgyan sogs la chab gser zhun gyis byugs shing*/_dus gsum sangs rgyas kyi smin mtshams mdzod spur dung g.yas 'khyil re re phul ba dang*/_mchog sprul rin po che pad+ma dbang rgyal dang*/_dad sbyin bstan 'phel spun gtsos bstan sbyin nas ched bskul bzhin lha khang chen mo'i rgyab gu ru rin po che snang srid zil gnon sku tshad bla ma sku gsum/_rig 'dzin brgyad/_rje 'bangs nyer lnga sogs/_gzungs dang rab gnas tshad ldan bgyis pa'i tshar bkod dang mdun du sgrol ma 'jigs pa brgyad skyobs kyi gtso 'khor dang g.yas g.yon du nye sras brgyad bcas btso sbyang zhun mas byugs shing gzungs 'bul lag len tshad ldan bgyis par bzhugs pa'i lha khang dang*/_gzhan yang 'du khang chen mo'i dbang phyogs su gsung rten dung 'khor khang log bris la rdor sems stong sku yod pa'i nang du mu ne dang*/_ma Ni/_badz+ra/_yig brgya sogs gtso bor gyur pa'i dung 'khor gsum re re la bsnyen pa dung bcu gsum lhag tsam 'gro nges gser zangs la ma Ni 'bur dod brkos can gyis g.yog pa rab gnas tshad ldan can dang*/_thugs rten sku gdung cha brgyad dri med rnam gnyis kyi sgo nas gzungs zhugs lag len tshad ldan bgyis pa sogs phyi gtsug lag khang dang*/_nang sku gsung thugs kyi rten rnams la/_snyigs dus ma hA gu ru'i zhal tshab bdud 'joms 'jigs bral ye shes rdo rje rin po cher rgyal ba'i thugs rje 'jug pa la sa thag gi nye ring med pas rgyang ring po nas ye shes dgongs pas rdo rje'i ye shes 'bebs par gsol ba btab pa dang*/_gangs ljongs skye 'gro'i lha skal 'phags mchog thugs rje chen po'i rnal 'byor pa zhwa de'u 'khrul zhig ngag dbang chos kyi blo gros rin po ches smin gter thugs chen bde gshegs kun 'dus sgrub chen dang 'brel ba'i rab gnas dge legs 'dod 'jo ltar dang*/_mtha' rten gar dbang tshe sgrub dang*/_mkha' 'gro gsang ba ye shes/_bka' srung lha chen dang bcas pa'i sgrub mchod smin gling phyag bzhes 'khrul med kyis brgyan pa rab byung bcu bdun pa'i me yos dbo zla'i gza' tshes dge bar rig pa 'dzin pa'i dge 'dun gyi sde brgya phrag lhag gis bsgrubs pa dang*/_gzhan yang ris su ma chad pa'i skyes chen dam pa gnas 'dir zhabs sor bkod pa rnams kyis ye shes dgongs pas byin gyis brlabs par mdzad cing*/_rang nyid nas kyang lhag pa'i lha rab 'byams kyi sgo nas rab gnas kyi cho ga rgyas bsdus sum brgya lhag gis bsgrubs pa rten snying 'bum phrag 'gro nges bcas sbyor dngos rjes gsum legs par grub pa'o/__/de ltar phyi nang gi rten dang 7rgyal bstan rin po che 'dzin skyong spel gsum byed po/_khrims gtsang spong klog las gsum la brtson pa'i dge 'dun gyi sde mi nyung ba btsugs shing*/_de dag la bzhugs gnas kyi grwa shag dang bsnyen bkur gyi mi phungs ba'i gtong sgo phar gtong byas/_de dag rnams kyis nyams bzhes lo 'khor gyi dus mchod bka' gter gyi sgrub mchod kyang*/_snga 'gyur gyi bstan pa'i mtshan gzhi lung a nu yo ga theg pa dgu rdzogs kyi tshogs sgrub myong grol bdud rtsi'i sgrub pa dang 'brel ba mtha' rten las bzhi'i sbyin sreg dang bcas pa/_bla ma gsang ba 'dus pa'i sgrub mchod dang 'brel ba'i mthong grol tshes bcu'i gar 'cham/_ston dang bstan pa gcig gyur 'dul ba gzhi gsum gyi phyag len sogs da lta mtshon tsam tshugs bzhin pa dang*/_lo bstar rgyud rgyal gsang ba snying po'i bshad pa nyin bcu nyung mtha' byas pa dang*/_dbang lung gnad che ba zla ba gcig las mi nyung ba 'chad spel ma chad pa dang*/_slad nas rim bzhin mdo khams zhe chen ma dgon du bka' gter gyi sgrub pa dang*/_sgrub mchod/_bshad sgrub kyi sde sogs ji ltar yod pa ltar tshugs par 'gyur ba'i re smon tshad med pa yod pa de bzhin mtha' rgyas su 'grub par rgyal ba sras dang bcas pas byin gyis rlobs par gsol/_gzhan yang rgyun gyi nyams bzhes kyi rim pa ni/_zla ba 'byung ngo cog gi yar mar gyi tshes bcu la gu ru zhi drag dang mkha' 'gro'i tshogs mchod/_nya stong sogs dus chen khag la thub dbang nye sras brgyad dang*/_sman bla mched brgyad/_bskal bzang sangs rgyas stong rtsa/_bsam pa lhun 'grub ma sogs kyi mchod chog_/nyer dgur dngos rol dam can sde dgu gtsor gyur gyi gsol bskang*/_nyin ltar zhog dgong gi zhal 'don gyi rim pa yang*/_smin lugs chos spyod skyabs sems yan lag bdun pa dang smon 'jug byang sems kyi sdom chog_/rdo rje sems dpa' sgyu 'phrul drwa ba gsang ba snying po'i rgyud kyi le'u res mos bklag thabs dang 'brel ba/_rgyal ba'i zhal gsung 'jam sdud bzang gsum/_mnga' ris paN chen gyi sdom gsum rnam nges le'u res mos/_dpal chen phur pa'i rgyun khyer dang smin lugs dam can spyi gtor/_rgyud mgon legs ldan/_sngags srung*/_ma hA de wa dang zhing skyong dur khrod dbang mo/_gzhan yang gsol bsdus rigs gang 'os sbyar ba la chos spyod bsngo smon bstan rgyas smon lam gyis mtha' brgyan pa sogs chos mthun gyi bgyi bas dus 'da' bar mdzad pa ste/_'dus pa'i sde dang de rnams kyi thugs dam nyams bzhes kyi tshul mtshon tsam mo/_/de ltar rang gzhan sbyin pa'i bdag por bcas pas legs byas bsod nams kyi phung po legs par bsgrubs pa'i dgos pa dang phan yon kyang*/_sa snying 'khor lo bcu pa'i mdo las/_'khor bar yongs su 'khor ba na/_/sbyin pa ma gtogs gnyen med pas/_/blo ldan phun sum tshogs 'dod kyis/_/rab tu 'bad de sbyin pa sbyin/_/zhes dang*/_dpal ldan zla bas/_skye bo 'di kun bde ba mngon 'dod cing*/_/mi rnams bde ba'ang longs spyod med min la/_/longs spyod kyang ni sbyin las 'byung mkhyen nas/_/thub pas dang por sbyin pa'i gtam mdzad do/_/zhes dang*/_'phags pa 'jig rten gyis dris pa'i lung bstan pa'i mdo las/_de la zang zing gi sbyin pas ni bsod nams kyi tshogs rdzogs la/_chos kyi sbyin pas ni ye shes kyi tshogs rdzogs te/_'di gnyis ni rnam pa thams cad mkhyen pa nyid sgrub par byed pa'o/_/zhes gsungs/_kun mkhyen chos rjes/_bde gshegs gzugs brnyan thams cad bzo sprul pas/_/rgyal bas byin brlabs 'gro kun mchod pa'i zhing*/_/bem po gzhan dang 'gran du yod ma yin/_/dad pa'i rang bzhin bzang po skyed par mdzod/_/ces dang*/_cho 'phrul rnam par bstan pa'i mdo las/_kha gcig gis mchod rten byed du 'jug pa dang*/_gtsug lag khang du 'chag pa dang*/_skyed mos tshal byed du gzhug pa'i dge ba'i rtsa ba la spro ba bskyed pas 'dul/_kha gcig ni sku gzugs byed du gzhug pa dang*/_ri mo dang*/_gser dang*/_dngul dang*/_ra gan gyi sku gzugs byed du bzhugs pa'i dge pa'i rtsa ba la spro ba bskyed pas 'dul/_zhes dang*/_khyad par 'phags bstod 'grel pa las/_brgya byin gtsug lag khang gi phyir/_sa ni sbyin pa gtong byed pa/_/tshangs pa'i bsod nams rab bskyed de/_/mtho ris dag tu skal par dga'/_/zhes dang*/_de bzhin gshegs pa'i sku gzugs kyi le'ur yang*/_sa'am/_rdo thal lam/_shing ngam/_rde'u 'am/_ra gan nam/_lcags sam/_gser ram/_dngul lam/_beDUr+Ya 'am/_shel lam/_mu tig dmar po 'am/_rdo'i snying po'am/_spug gam/_dung ngam/_man shel lam/_spos sam/_ras sam/_shing leb bam/_rtsig ngos la de bzhin gshegs pa'i sku gzugs bzhengs bar bya/_dral ba gso bar bya ba dang*/_grums pa bcos par byas te/_de bzhin gshegs pa'i sku gzugs byas na/_rigs dma' ba thams cad dang*/_sdig pa byed pa'i rigs rnams dang*/_log par lta ba'i rigs su mi skye/_yan lag gang yang ma tshang bar mi 'gyur ro/__/gal te mtshams med pa lnga byas su zin kyang*/_de bzhin gshegs pa la dad pa rnyed de sku gzugs byas na/_las des sems can dmyal ba myong ba chung ngu myangs te/_theg pa gsum gang yang rung bas nges par 'byung bar 'gyur ro/__/dper na mi zhig mi gtsang bas reg pa la rab tu dag par bkrus te/_spos kyi byugs na dri mi zhim pa de med par 'gyur ro/__/de bzhin du mtshams med pa byas pa de'i sdig pa yang med par 'gyur ro/__/mi dge ba bcu'i las kyi lam dang ldan pa yang*/_de bzhin gshegs pa la dad pa rnyed de/_de'i sku gzugs byas na de'i sdig pa de ji ltar me'i phung pos mar 'tshig ste/_du ba yang mi mngon pa bzhin du de'i sdig pa de yang mi snang bar 'gyur ro/__/zhes dang*/_'phags pa rmad du byung ba'i mdor/_kun dga' bo 'dzam bu'i gling yang lta zhog_/shar gyi lus 'phags gling yang lta zhog_/nub kyi ba glang spyod kyang lta zhog_/byang gi sgra mi snyan yang lta zhog_/lha'i dbang po brgya byin gyi khang bzang rnam par rgyal byed ces bya ba yang lta zhog_/kun dga' bo/_stong gsum gyi stong chen po'i 'jig rten gyi khams yod de/_de rigs kyi bu'am/_rigs kyi bu mo dad pa gang la la zhig gis rin po che sna bdun gyi rang bzhin du byas te/_rgyun du zhugs pa rnams dang*/_lan gcig phyir 'ong ba rnams dang*/_phyir mi 'ong ba rnams dang*/_dgra bcom pa rnams dang*/_phyogs bzhi'i dge slong gi dge 'dun la phul ba bas gang gis de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten skyu ru ra'i 'bru tsam byas la/_khab tsam gyi srog shing btsugs te/_rgya shug gi lo ma tsam gyi gdugs gsol nas/_nas kyi 'bru tsam gyi sku gzugs byas la yungs 'bru tsam gyi ring bsrel bcug na de ni de bas bsod nams che'o/__/zhes pa sogs bden gsung rgyal ba'i bka' dang bstan bcos rnams las legs byas 'di lta bu'i tshul la dgos pa phan yon mtha' yas pa gsungs pa la yid rton te rang gzhan thams cad spro ba bskyed par bya'o/__/legs byas rnam dkar dag byed gter bskrun par/_/sras bcas rgyal bas yongs bsngo'i zla zer gyis/_/reg pas byang chub spyod pa'i rlabs phreng gi_/'jam dbyangs kun bzang rnam thar rjes snyegs shog_/bka' dang bstan bcos rgya mtsho'i mthar bgrod phyir/_/mkhas tshul dgu yi ba dan mdzes g.yo bar/_/rgyal kun dgyes pa'i lam bzang nor bu'i gter/_/rnam dpyod rgyal mtshan tog tu mchod nus shog_/zab don smin grol bdud rtsi'i char bzang gis/_/rnam bzhi'i rig 'dzin rin chen snye ma'i tshogs/_/mdzes nas nges gsang bstan mchog kun dga'i tshal/_/dar bab 'brel tshad rdo rje'i sar phyin shog_/ces pa'ang rnam dkar gyi las rtsom pa po dil mgo mkhyen sprul bkra shis dpal 'byor pas rab byung bcu bdun pa'i me yos mgo zla'i tshes/_'phags pa gnas brtan pa'i lugs ltar na ston pa'i 'das lo _2531_phyi lo _1987_zla tshes la dad ldan spro ba bskyed phyir lo rgyus mdor bsdus su brjod pa dge legs 'phel//__//

Footnotes

Other Information