DKR-KABUM-02-KHA-029

From Khyentse Lineage - A Tsadra Foundation Project

བླ་མའི་རྣལ་འབྱོར་ཡེ་ཤེས་རང་ཤར།
Wylie title bla ma'i rnal 'byor ye shes rang shar DKR-KABUM-02-KHA-029.pdf
Location dil mgo mkhyen brtse bka' 'bum
Volume 2, Text 29, Pages 142-144 (Folios 1a1 to 3a6)
Author དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation Khyentse, Dilgo. Bla ma'i rnal 'byor ye shes rang shar. In Skyabs rje dil mgo mkhyen brtse rin po che'i bka' 'bum, Vol. 2: 142-144. Delhi: Shechen Publications, 1994.
Genre Guru Yoga Texts - bla ma'i rnal 'byor
Colophon

།ཞེས་པའང་ཐེག་མཆོག་སྙིང་པོའི་རྣལ་འབྱོར་པ་ཀློང་ཆེན་ཡེ་ཤེས་རྡོ་རྗེའི་གསུང་གིས་བསྐུལ་ཏེ་ལམ་འདིར་མི་ཕྱེད་པའི་དད་མོས་ཅན་སྔགས་བཙུན་རང་བྱུང་འོད་གསལ་ཐུགས་མཆོག་རྡོ་རྗེའམ། མཁྱེན་བརྩེའི་འོད་ཟེར་དུ་འབོད་པས་མཆོད་རྟེན་ཆེན་པོ་བྱ་རུང་ཁ་ཤོར་གྱི་མདུན་གནས་འབྲེལ་ལ་ལྷགས་པའི་སྐབས་སྤྲེལ་ལོ་ཟླ་དང་པོའི་ཚེས་ཅིག་ཉིན་བྲིས་པ་དོན་དང་ལྡན་པར་གྱུར་ཅིག དགེའོ།།

/zhes pa'ang theg mchog snying po'i rnal 'byor pa klong chen ye shes rdo rje'i gsung gis bskul te lam 'dir mi phyed pa'i dad mos can sngags btsun rang byung 'od gsal thugs mchog rdo rje'am/__mkhyen brtse'i 'od zer du 'bod pas mchod rten chen po bya rung kha shor gyi mdun gnas 'brel la lhags pa'i skabs sprel lo zla dang po'i tshes cig nyin bris pa don dang ldan par gyur cig___dge'o//

":Property:textsubnumber|textsubnumber" can not be assigned to a declared number type with value 1.

[edit]
༄༅། །བླ་མའི་རྣལ་འབྱོར་ཡེ་ཤེས་རང་ཤར་བཞུགས། ན་མོ་གུ་རུ། ཀློང་དྲུག་རྡོ་རྗེའི་སྔགས་དང་འབྲེལ་བའི་བླ་མའི་རྣལ་འབྱོར་བྱ་བར་འདོད་པས། ཟང་ཐལ་རང་གཞུང་གི་སྐྱབས་སེམས་སྔོན་དུ་འགྲོ་བས། སྣོད་བཅུད་རྣམ་དག་རང་སྣང་འོག་མིན་ཞིང༌། །རང་ལུས་སྣང་ལ་དེར་འཛིན་མེད་པ་ཡི། །སྤྱི་བོར་སངས་རྒྱས་ཀུན་དངོས་བླ་མ་དང༌། །དབྱེར་མེད་རིགས་ཀུན་ཁྱབ་བདག་ཀུན་ཏུ་བཟང༌། །མཐིང་མདོག་གཅེར་བུ་རྒྱན་མེད་ཚུལ་དུ་བཞུགས། །སྣང་སྟོང་འཇའ་ཟེར་ཐིག་ལེ་འཁྲུགས་པའི་ཀློང༌། །རྡོ་རྗེའི་སྐྱིལ་ཀྲུང་མཉམ་བཞག་ཕྱག་རྒྱ་ཅན། །རང་འོད་བཟང་མོ་དཀར་གསལ་མཉམ་པར་སྦྱོར། །སྐུ་གསུང་ཐུགས་དང་ཡོན་ཏན་ཕྲིན་ལས་དབྱིངས། །བདེ་གཤེགས་རིགས་ལྔ་བསམ་ཡས་དཀྱིལ་འཁོར་རྫོགས། །འཁོར་དུ་བརྒྱུད་གསུམ་བླ་མ་སྤྲིན་ལྟར་གཏིབས། །ཡེ་ཤེས་རང་སྣང་ཁྱབ་བརྡལ་ཆོས་ཉིད་ཀློང༌། །སྐྱབས་གནས་རྒྱ་མཚོ་སྤྲོ་བསྡུའི་ཚུལ་དུ་བཞུགས། །དྲན་པ་ཙམ་གྱིས་བྱིན་རླབས་དངོས་གྲུབ་ཚོགས། །འབད་མེད་སྩོལ་པའི་བདག་ཉིད་ཆེན་པོར་གསལ། །ཞེས་གསལ་བཏབ་སྟེ་བླ་མ་བརྒྱུད་པའི་གསོལ་འདེབས་ནི། ཨོཾ་ཨཱཿཧཱུྃ། རྒྱལ་བ་དགོངས་པའི་བརྒྱུད་པ་ལ་གསོལ་བ་འདེབས༔ རིག་འཛིན་རིག་པའི་བརྒྱུད་པ་ལ་གསོལ་བ་འདེབས༔ གང་ཟག་སྙན་ཁུང་བརྒྱུད་པ་ལ་གསོལ་བ་འདེབས༔ རྫོགས་ཆེན་བརྒྱུད་པའི་བླ་མ་ལ་གསོལ་བ་འདེབས༔ སྐྱེ་མེད་ཀ་དག་ཆེན་པོའི་ཞིང་ཁམས་སུ༔ ཆོས་སྐུ་ཀུན་བཟང་ཡབ་ཡུམ་ལ་གསོལ་བ་འདེབས༔ རྣམ་དག་འོད་ལྔ་གསལ་བའི་ཕོ་བྲང་དུ༔ ལོངས་སྐུ་ཞི་ཁྲོ་རབ་འབྱམས་ལ་གསོལ་བ་འདེབས༔ ཆོས་དབྱིངས་ཀློང་ཡངས་ཆེན་པོའི་ཞིང་ཁམས་སུ༔ དྲུག་པ་རྡོ་རྗེ་འཆང་ཆེན་ལ་གསོལ་བ་འདེབས༔ སུམ་ཅུ་རྩ་གསུམ་ལྷ་ཡི་ཕོ་བྲང་དུ༔ སྟོན་པ་རྡོ་རྗེ་སེམས་དཔའ་ལ་གསོལ་བ་འདེབས༔ དྷཱ་ན་ཀོ་ཥ་ཀླུ་ཡི་ཕོ་བྲང་ནས༔ སྤྲུལ་སྐུ་དགའ་རབ་རྡོ་རྗེ་ལ་གསོལ་བ་འདེབས༔ སིང་གྷ་ལ་ཡི་ནགས་ཚལ་ཆེན་པོ་རུ༔ སློབ་དཔོན་འཇམ་དཔལ་བཤེས་གཉེན་ལ་གསོལ་བ་འདེབས༔ རིག་འཛིན་གྲུབ་པའི་ཀེའུ་ཚང་འོག་མ་རུ༔ མཁས་པ་ཤྲཱི་སེངྷ་ལ་གསོལ་བ་འདེབས༔ ཨོ་རྒྱན་མཁའ་འགྲོ་འདུ་བའི་གནས་མཆོག་ཏུ༔ རིག་འཛིན་པདྨ་འབྱུང་གནས་ལ་གསོལ་བ་འདེབས༔ རྒྱ་གར་འཕགས་ཡུལ་སྤྲུལ་སྐུའི་འབྱུང་གནས་སུ༔ པཎ་ཆེན་བི་མ་མི་ཏྲ་ལ་གསོལ་བ་འདེབས༔ ཐུགས་རྗེས་གདུལ་བྱ་བོད་ཀྱི་ཞིང་ཁམས་སུ༔ སྒྲ་བསྒྱུར་བཻ་རོ་ཙཱ་ན་ལ་གསོལ་བ་འདེབས༔ བསམ་ཡས་དབུ་རྩེ་རིགས་གསུམ་ཕོ་བྲང་དུ༔ ཆོས་རྒྱལ་ཁྲི་སྲོང་ལྡེའུ་བཙན་ལ་གསོལ་བ་འདེབས༔ བསམ་ཡས་མཆིམས་ཕུའི་བྲག་དམར་ཀེའུ་ཚང་དུ༔ མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས༔ བྱང་ཕྱོགས་རི་བོ་བཀྲ་བཟང་ཤར་འདབས་སུ༔ གཏེར་སྟོན་རིག་འཛིན་ཆེན་པོ་ལ་གསོལ་བ་འདེབས༔ སྤྲོ་ན་ཁམས་དབུས་ཀྱི་སྲས་སློབ་བརྒྱུད་པ་རང་རང་གི་ལུགས་ལྟར་རམ། ཡང་ན། བརྒྱུད་པ་ཀུན་འདུས་ཀུན་བཟང་རྡོ་རྗེ་སེམས། །དབྱེར་མེད་དཔལ་ལྡན་བླ་མར་གསོལ་བ་འདེབས། ཞེས། གང་ལྟར་ཡང༌། གཏེར་མཛོད་བསེ་སྒྲོམ་སྨུག་པོའི་ཕོ་བྲང་དུ༔ གསང་སྔགས་སྙིང་པོའི་མཐར་ཐུག་ལ་གསོལ་བ་འདེབས༔ ཕུང་ཁམས་རྣམ་པར་དག་པའི་དཀྱིལ་འཁོར་ནས༔ ཡི་དམ་མཁའ་འགྲོའི་ལྷ་ཚོགས་ལ་གསོལ་བ་འདེབས༔ སྨུག་ནག་གྲུ་གསུམ་འབར་པའི་ཕོ་བྲང་དུ༔ བཀའ་སྲུང་ཨེ་ཀ་ཛཱ་ཊི་ལ་གསོལ་བ་འདེབས༔ སྐུ་གསུམ་བརྒྱུད་པའི་བླ་མ་དམ་པ་རྣམས༔ ཆོས་ཀྱི་དབྱིངས་ནས་བདག་ལ་བརྩེར་དགོངས་ལ༔ ཐུགས་རྒྱུད་རང་གྲོལ་མཆོག་གི་དངོས་གྲུབ་སྩོལ༔ རང་སྣང་ལོངས་སྤྱོད་རྫོགས་པའི་སྣང་བ་ལ༔ ཐུགས་རྗེའི་སྤྲུལ་པ་ཕྱོགས་བཅུར་འགྱེད་དུ་གསོལ༔ བདག་ལ་ཆོས་ཉིད་མངོན་སུམ་བསྟན་དུ་གསོལ༔ བླ་མ་འཇའ་དང་འོད་དུ་ཆི་ལི་ལི༔ རིག་འཛིན་སྐུ་དང་ཐིག་ལེར་ཤིགས་སེ་ཤིག༔ སྣང་བ་བཞི་ཡི་ཉམས་ལེན་རྫོགས་པ་དང་༔ ཀ་དག་ཀུན་བཟང་ཀློང་དུ་སྨིན་གྲོལ་ཤོག༔ དངོས་འབྱོར་ཡིད་ཀྱིས་སྤྲུལ་པའི་མཆོད་པ་འབུལ༔ སྨིན་གྲོལ་དབང་དང་དངོས་གྲུབ་བསྩལ་དུ་གསོལ༔ རང་བྱུང་རྫོགས་པ་ཆེན་པོར་ལྷུན་གྲུབ་ཤོག༔ བླ་མ་སྐུ་ཁམས་བཟང་ལ་སོགས་བརྗོད་དོ། གསོལ་འདེབས་གྲངས་བསག་ན་འདིར་བྱ། བླ་མའི་ཐུགས་ནི་རྡོ་རྗེའི་ཡེ་ཤེས་དྲུག །ཆོས་ཉིད་རང་སྒྲ་ཀློང་དྲུག་སྔགས་ཀྱི་ཚུལ། མཐོང་ཐོས་དྲན་རེག་གྲོལ་བ་དྲུག་ལྡན་པའི། །རྡོ་རྗེའི་གསང་བ་ཆེན་པོས་ཀུན་ལ་ཁྱབ། །སྣང་སྲིད་མ་ལུས་རྒྱལ་བའི་དཀྱིལ་འཁོར་ཏེ། །ཡེ་ཤེས་ཆེན་པོའི་ཐིག་ལེ་གཅིག་ཏུ་བརྡལ། །འགག་མེད་སྔགས་ཀྱི་བཟླས་པ་རང་ཤར་རོ། །ཞེས་བླ་མ་ཀུན་ཏུ་བཟང་པོའི་ཡེ་ཤེས་ཀྱི་སྣང་བས་སྲིད་ཞི་ཀུན་ལ་གདོད་ནས་ཁྱབ་པའི་དོན་རང་གི་རིག་སྟོང་ཡེ་ཤེས་ཆེན་པོ་དང་ཐ་མི་དད་པའི་ངང་དུ་མཉམ་པར་བཞག་སྟེ། འཿཨཿཤཿསཿམཿཧཿ ཞེས་ཅི་ནུས་བཟླ། མཐར། སྣང་སྟོང་མཁའ་ཁྱབ་ཡེ་ཤེས་རྡོ་རྗེའི་སྐུ། །གསལ་དག་ཀུན་ཁྱབ་རང་བྱུང་རྡོ་རྗེའི་སྔགས། །འོད་གསལ་འགྲོ་འོང་བྲལ་བའི་ཟང་ཐལ་ཐུགས། །ཀུན་བཟང་ཡེ་ཤེས་ཀློང་དུ་གདོད་ནས་དག །མོས་གུས་ཤུགས་ཀྱིས་གནས་གསུམ་འོད་ཟེར་གྱིས། །དབང་བཞི་བསྐུར་ཞིང་སྒྲིབ་བཞི་དབྱིངས་སུ་སྦྱངས། །ལམ་བཞི་སྒོམ་པ་ལ་དབང་སྣང་བ་བཞིའི། །ཡེ་ཤེས་མཐར་ཕྱིན་སྐུ་བཞིའི་ཀློང་ཆེན་པོར། །མངོན་པར་བྱང་ཆུབ་གདོད་ནས་གཉིས་མེད་པའི། །སྣང་བ་མ་འགག་ཡེ་ཤེས་རོལ་པའི་རྒྱན། །སྲིད་པ་རང་གྲོལ་དག་པ་ཆེན་པོའི་ཀློང༌། ཀ་དག་རང་བྱུང་བླ་མ་ཀུན་བཟང་ནི། །ཡེ་ཤེས་ཐིག་ལེ་གཅིག་ཏུ་ལྷུན་གྱིས་གྲུབ། །ཅེས་བརྗོད་ལ་ཐུགས་ཡིད་བསྲེས་ཏེ་མཉམ་པར་བཞག །དེ་ལས་ལྡང་བ་ན་སྣང་གྲགས་རིག་པ་རྡོ་རྗེ་གསུམ་གྱི་འཁོར་ལོར་མོས་ལ་བསྔོ་སྨོན་གྱིས་མཚམས་སྦྱོར་བྱའོ། །ཞེས་པའང་ཐེག་མཆོག་སྙིང་པོའི་རྣལ་འབྱོར་པ་ཀློང་ཆེན་ཡེ་ཤེས་རྡོ་རྗེའི་གསུང་གིས་བསྐུལ་ཏེ་ལམ་འདིར་མི་ཕྱེད་པའི་དད་མོས་ཅན་སྔགས་བཙུན་རང་བྱུང་འོད་གསལ་ཐུགས་མཆོག་རྡོ་རྗེའམ། མཁྱེན་བརྩེའི་འོད་ཟེར་དུ་འབོད་པས་མཆོད་རྟེན་ཆེན་པོ་བྱ་རུང་ཁ་ཤོར་གྱི་མདུན་གནས་འབྲེལ་ལ་ལྷགས་པའི་སྐབས་སྤྲེལ་ལོ་ཟླ་དང་པོའི་ཚེས་ཅིག་ཉིན་བྲིས་པ་དོན་དང་ལྡན་པར་གྱུར་ཅིག དགེའོ།། །།
[edit]

@#/____/bla ma'i rnal 'byor ye shes rang shar bzhugs/__na mo gu ru/__klong drug rdo rje'i sngags dang 'brel ba'i bla ma'i rnal 'byor bya bar 'dod pas/__zang thal rang gzhung gi skyabs sems sngon du 'gro bas/__snod bcud rnam dag rang snang 'og min zhing*/__/rang lus snang la der 'dzin med pa yi/__/spyi bor sangs rgyas kun dngos bla ma dang*/__/dbyer med rigs kun khyab bdag kun tu bzang*/__/mthing mdog gcer bu rgyan med tshul du bzhugs/__/snang stong 'ja' zer thig le 'khrugs pa'i klong*/__/rdo rje'i skyil krung mnyam bzhag phyag rgya can/__/rang 'od bzang mo dkar gsal mnyam par sbyor/__/sku gsung thugs dang yon tan phrin las dbyings/__/bde gshegs rigs lnga bsam yas dkyil 'khor rdzogs/__/'khor du brgyud gsum bla ma sprin ltar gtibs/__/ye shes rang snang khyab brdal chos nyid klong*/__/skyabs gnas rgya mtsho spro bsdu'i tshul du bzhugs/__/dran pa tsam gyis byin rlabs dngos grub tshogs/__/'bad med stsol pa'i bdag nyid chen por gsal/__/zhes gsal btab ste bla ma brgyud pa'i gsol 'debs ni/__oM AHhU~M/__rgyal ba dgongs pa'i brgyud pa la gsol ba 'debs:__rig 'dzin rig pa'i brgyud pa la gsol ba 'debs:__gang zag snyan khung brgyud pa la gsol ba 'debs:__rdzogs chen brgyud pa'i bla ma la gsol ba 'debs:__skye med ka dag chen po'i zhing khams su:__chos sku kun bzang yab yum la gsol ba 'debs:__rnam dag 'od lnga gsal ba'i pho brang du:__longs sku zhi khro rab 'byams la gsol ba 'debs:__chos dbyings klong yangs chen po'i zhing khams su:__drug pa rdo rje 'chang chen la gsol ba 'debs:__sum cu rtsa gsum lha yi pho brang du:__ston pa rdo rje sems dpa' la gsol ba 'debs:__d+hA na ko Sha klu yi pho brang nas:__sprul sku dga' rab rdo rje la gsol ba 'debs:__sing [⁽1494⁾⁽14ab⁾] la yi nags tshal chen po ru:__slob dpon 'jam dpal bshes gnyen la gsol ba 'debs:__rig 'dzin grub pa'i ke'u tshang 'og ma ru:__mkhas pa shrI seng+ha la gsol ba 'debs:__o rgyan mkha' 'gro 'du ba'i gnas mchog tu:__rig 'dzin pad+ma 'byung gnas la gsol ba 'debs:__rgya gar 'phags yul sprul sku'i 'byung gnas su:__paN chen bi ma mi tra la gsol ba 'debs:__thugs rjes gdul bya bod kyi zhing khams su:__sgra bsgyur bai ro tsA na la gsol ba 'debs:__bsam yas dbu rtse rigs gsum pho brang du:__chos rgyal khri srong lde'u btsan la gsol ba 'debs:__bsam yas mchims phu'i brag dmar ke'u tshang du:__mkha' 'gro ye shes mtsho rgyal la gsol ba 'debs:__byang phyogs ri bo bkra bzang shar 'dabs su:__gter ston rig 'dzin chen po la gsol ba 'debs:__spro na khams dbus kyi sras slob brgyud pa rang rang gi lugs ltar ram/__yang na/__brgyud pa kun 'dus kun bzang rdo rje sems/__/dbyer med dpal ldan bla mar gsol ba 'debs/__zhes/__gang ltar yang*/__gter mdzod bse sgrom smug po'i pho brang du:__gsang sngags snying po'i mthar thug la gsol ba 'debs:__phung khams rnam par dag pa'i dkyil 'khor nas:__yi dam mkha' 'gro'i lha tshogs la gsol ba 'debs:__smug nag gru gsum 'bar pa'i pho brang du:__bka' srung e ka dzA Ti la gsol ba 'debs:__sku gsum brgyud pa'i bla ma dam pa rnams:___chos kyi dbyings nas bdag la brtser dgongs la:__thugs rgyud rang grol mchog gi dngos grub stsol:__rang snang longs spyod rdzogs pa'i snang ba la:__thugs rje'i sprul pa phyogs bcur 'gyed du gsol:__bdag la chos nyid mngon sum bstan du gsol:__bla ma 'ja' dang 'od du chi li li:__rig 'dzin sku dang thig ler shigs se shig:__snang ba bzhi yi nyams len rdzogs pa dang :__ka dag kun bzang klong du smin grol shog:__dngos 'byor yid kyis sprul pa'i mchod pa 'bul:__smin grol dbang dang dngos grub bstsal du gsol:__rang byung rdzogs pa chen por lhun grub shog:__bla ma sku khams bzang la sogs brjod do/__gsol 'debs grangs bsag na 'dir bya/__bla ma'i thugs ni rdo rje'i ye shes drug__/chos nyid rang sgra klong drug sngags kyi tshul/__mthong thos dran reg grol ba drug ldan pa'i/__/rdo rje'i gsang ba chen pos kun la khyab/__/snang srid ma lus rgyal ba'i dkyil 'khor te/__/ye shes chen po'i thig le gcig tu brdal/__/'gag med sngags kyi bzlas pa rang shar ro/__/zhes bla ma kun tu bzang po'i ye shes kyi snang bas srid zhi kun la gdod nas khyab pa'i don rang gi rig stong ye shes chen po dang tha mi dad pa'i ngang du mnyam par bzhag ste/__'aHaHshaHsaHmaHhaH__zhes ci nus bzla/__mthar/__snang stong mkha' khyab ye shes rdo rje'i sku/__/gsal dag kun khyab rang byung rdo rje'i sngags/__/'od gsal 'gro 'ong bral ba'i zang thal thugs/__/kun bzang ye shes klong du gdod nas dag__/mos gus shugs kyis gnas gsum 'od zer gyis/__/dbang bzhi bskur zhing sgrib bzhi dbyings su sbyangs/__/lam bzhi sgom pa la dbang snang ba bzhi'i/__/ye shes mthar phyin sku bzhi'i klong chen por/__/mngon par byang chub gdod nas gnyis med pa'i/__/snang ba ma 'gag ye shes rol pa'i rgyan/__/srid pa rang grol dag pa chen po'i klong*/__ka dag rang byung bla ma kun bzang ni/__/ye shes thig le gcig tu lhun gyis grub/__/ces brjod la thugs yid bsres te mnyam par bzhag__/de las ldang ba na snang grags rig pa rdo rje gsum gyi 'khor lor mos la bsngo smon gyis mtshams sbyor bya'o/__/zhes pa'ang theg mchog snying po'i rnal 'byor pa klong chen ye shes rdo rje'i gsung gis bskul te lam 'dir mi phyed pa'i dad mos can sngags btsun rang byung 'od gsal thugs mchog rdo rje'am/__mkhyen brtse'i 'od zer du 'bod pas mchod rten chen po bya rung kha shor gyi mdun gnas 'brel la lhags pa'i skabs sprel lo zla dang po'i tshes cig nyin bris pa don dang ldan par gyur cig___dge'o//___//

Footnotes

Other Information