DKR-KABUM-01-KA-001

From Khyentse Lineage - A Tsadra Foundation Project

རིགས་དཀྱིལ་རྒྱ་མཚོའི་ཁྱབ་བདག་རྗེ་བཙུན་བླ་མ་འཇམ་དབྱངས་ཆོས་ཀྱི་བློ་གྲོས་རིས་མེད་བསྟན་པའི་རྒྱལ་མཚན་གཙུག་ལག་ལུང་རིགས་ཉི་མ་སྨྲ་བའི་སེང་གེ་དཔལ་བཟང་པོའི་རྣམ་ཐར་ཆ་ཤས་ཙམ་བརྗོད་པ་ངོ་མཚར་ཡོངས་འདུས་དགའ་ཚལ།
Wylie title rigs dkyil rgya mtsho'i khyab bdag rje btsun bla ma 'jam dbyangs chos kyi blo gros ris med bstan pa'i rgyal mtshan gtsug lag lung rigs nyi ma smra ba'i seng ge dpal bzang po'i rnam thar cha shas tsam brjod pa ngo mtshar yongs 'dus dga' tshal DKR-KABUM-01-KA-001.pdf
Location dil mgo mkhyen brtse bka' 'bum
Volume 1, Text 1, Pages 1-207 (Folios 1a to 207a4)
Author དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Associated People འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)
Citation Khyentse, Dilgo. Rigs dkyil rgya mtsho'i khyab bdag rje btsun bla ma 'jam dbyangs chos kyi blo gros ris med bstan pa'i rgyal mtshan gtsug lag lung rigs nyi ma smra ba'i seng ge dpal bzang po'i rnam thar cha shas tsam brjod pa ngo mtshar yongs 'dus dga' tshal. In Skyabs rje dil mgo mkhyen brtse rin po che'i bka' 'bum, Vol. 1: 1-207. Delhi: Shechen Publications, 1994.
Genre Biographies - Hagiography - rnam thar
Colophon

།ཅེས་པའང་རྗེ་བཙུན་བླ་མ་ཐམས་ཅད་མཁྱེན་གཟིགས་ཆེན་པོ་འཇམ་དབྱངས་ཆོས་ཀྱི་བློ་གྲོས་རིན་པོ་ཆེའི་རྣམ་ཐར་ས་བོན་ཙམ་དུ་སྨོས་པ་འདི་ནི། རྗེ་བླ་མ་མཆོག་གི་ཚེ་འཛིན་ཌཱ་ཀིའིདབང་མོ་ཚེ་རིང་ཆོས་ཀྱི་སྒྲོན་མས་ལྷ་རྫས་ཀྱི་རྟེན་དང་བཅས་པ་དང༌། སྐུའི་དབོན་དད་དམ་དཔལ་གྱི་ཟླ་བ་ཆེས་ཆེར་དཀར་བའི་གན་མཛོད་ཚེ་དབང་དཔལ་འབྱོར་གཙོས་དད་སློབ་ཀུན་ནས་འདི་ནི་ཁྱེད་ཀྱིས་འབྲི་བར་འོས་སོ་ཞེས་པའི་གསུང་གིས་ཆེད་དུ་བསྐུལ་བ་བཞིན། ཁམས་གསུམ་ཆོས་ཀྱི་རྒྱལ་པོ་འཇམ་མགོན་ཡེ་ཤེས་མེ་ལོང་མཆོག་གིས་ཐུན་མོང་མ་ཡིན་པའི་བཀའ་དྲིན་གྱིས་རྗེས་སུ་བསྐྱངས་ཤིང༌། སློབ་འབངས་ཡོངས་ཀྱི་གྲལ་མཐར་གནས་པ་འགྱུར་མེད་ཐེག་མཆོག་བསྟན་པའི་རྒྱལ་མཚན་རང་བྱུང་མཁྱེན་བརྩེའི་འོད་ཟེར་དུ་འབོད་པས་རྣམ་ཐར་ཞལ་གསུང་ཉིད་རྩ་བར་བཟུང༌། གནས་གཟིགས་རྗེས་མའི་གཟིགས་སྣང་ཐོར་བུ་མང་པོ་མཆོད་དཔོན་བླ་མ་འཇམ་དབྱངས་བློ་གྲོས་མཆོག་ལྡན་ནས་ཞུ་སྐུལ་གྱི་ཕྱག་བྲིས་རེག་ཟིག་དངོས་རྣམས་གཞིར་བྱས་ཏེ། རྒྱ་གར་འཕགས་པའི་ཡུལ་དང་ཉེ་བའི་ས་ཡི་ཆ་ཀ་སྤུངས་རིན་ཆེན་བརྩེགས་པའི་ས་འཛིན་གྱི་རྩེ་ཟངས་མདོག་དཔལ་རིའི་ཞིང་ཁམས་བཀོད་པའི་གཙུག་ལག་གིས་མཛེས་པ་ཐུབ་བསྟན་བཤད་སྒྲུབ་དགའ་ཚལ་དུ་བྲིས་ཤིང༌། སླད་ནས་རྗེ་བཙུན་བླ་མའི་སྐུའི་ཉེ་གནས་རྡོ་རྗེའི་མཆེད་པོ་རྣམས་དང་གོ་བསྡུར་གྱིས་འཕྲི་བསྣན་ཅི་རིགས་ཞིབ་ཏུ་བགྱིས་ནས། ལྷོ་འབྲུག་ཆོས་རྒྱལ་ཆེན་པོའི་མངའ་རིས་སུ་གནས་པའི་ཚེ། གསང་ཟབ་ཐེག་པ་མཆོག་གི་ཆོས་རྫོང་ནས་དཀྱུས་གཅིག་ཏུ་བཀོད་པའི་ཡི་གེ་གཉིས་པར་འབེབས་པོ་སྡོམ་བརྩོན་སྡེ་སྣོད་འཛིན་པ་མཁན་པོ་ཐུབ་བསྟན་བརྩོན་འགྲུས་ཕུན་ཚོགས་དང༌། རེབ་ཀོང་སྔགས་པ་འཇིགས་མེད་སྐལ་བཟང་དཔལ་ལྡན་ཟུང་གིས་བགྱིས་པ་འདིས་ཀྱང་བསྟན་འགྲོའི་དཔལ་ཡོན་ཕྱོགས་དུས་གནས་སྐབས་ཀུན་ཏུ་འཕེལ་རྒྱས་བརྟན་པ་དང༌། མཁའ་ཁྱབ་ཡིད་ཅན་རྒྱ་མཚོ་རྗེ་བཙུན་མཁྱེན་པའི་བདག་པོའི་ཡེ་ཤེས་ཀྱི་གསང་བ་ལ་ལོངས་སུ་སྤྱོད་པའི་རྒྱུར་སྨོན་བཞིན་འགྲུབ་པར་གྱུར་ཅིག །སརྦ་དཱ་ཀ་ལྱཱ་ཎཾ་མངྒ་ལ་བྷ་ཝནྟུ།།

/ces pa'ang rje btsun bla ma thams cad mkhyen gzigs chen po 'jam dbyangs chos kyi blo gros rin po che'i rnam thar sa bon tsam du smos pa 'di ni/_rje bla ma mchog gi tshe 'dzin DA ki'idabang mo tshe ring chos kyi sgron mas lha rdzas kyi rten dang bcas pa dang*/_sku'i dbon dad dam dpal gyi zla ba ches cher dkar ba'i gan mdzod tshe dbang dpal 'byor gtsos dad slob kun nas 'di ni khyed kyis 'bri bar 'os so zhes pa'i gsung gis ched du bskul ba bzhin/_khams gsum chos kyi rgyal po 'jam mgon ye shes me long mchog gis thun mong ma yin pa'i bka' drin gyis rjes su bskyangs shing*/_slob 'bangs yongs kyi gral mthar gnas pa 'gyur med theg mchog bstan pa'i rgyal mtshan rang byung mkhyen brtse'i 'od zer du 'bod pas rnam thar zhal gsung nyid rtsa bar bzung*/_gnas gzigs rjes ma'i gzigs snang thor bu mang po mchod dpon bla ma 'jam dbyangs blo gros mchog ldan nas zhu skul gyi phyag bris reg zig dngos rnams gzhir byas te/_rgya gar 'phags pa'i yul dang nye ba'i sa yi cha ka spungs rin chen brtsegs pa'i sa 'dzin gyi rtse zangs mdog dpal ri'i zhing khams bkod pa'i gtsug lag gis mdzes pa thub bstan bshad sgrub dga' tshal du bris shing*/_slad nas rje btsun bla ma'i sku'i nye gnas rdo rje'i mched po rnams dang go bsdur gyis 'phri bsnan ci rigs zhib tu bgyis nas/_lho 'brug chos rgyal chen po'i mnga' ris su gnas pa'i tshe/_gsang zab theg pa mchog gi chos rdzong nas dkyus gcig tu bkod pa'i yi ge gnyis par 'bebs po sdom brtson sde snod 'dzin pa mkhan po thub bstan brtson 'grus phun tshogs dang*/_reb kong sngags pa 'jigs med skal bzang dpal ldan zung gis bgyis pa 'dis kyang bstan 'gro'i dpal yon phyogs dus gnas skabs kun tu 'phel rgyas brtan pa dang*/_mkha' khyab yid can rgya mtsho rje btsun mkhyen pa'i bdag po'i ye shes kyi gsang ba la longs su spyod pa'i rgyur smon bzhin 'grub par gyur cig_/sarba dA ka l+yA NaM mang+ga la b+ha wan+tu//

[edit]
༄༅། །རིགས་དཀྱིལ་རྒྱ་མཚོའི་ཁྱབ་བདག་རྗེ་བཙུན་བླ་མ་འཇམ་དབྱངས་ཆོས་ཀྱི་བློ་གྲོས་རིས་མེད་བསྟན་པའི་རྒྱལ་མཚན་གཙུག་ལག་ལུང་རིགས་ཉི་མ་སྨྲ་བའི་སེང་གེ་དཔལ་བཟང་པོའི་རྣམ་ཐར་ཆ་ཤས་ཙམ་བརྗོད་པ་ངོ་མཚར་ཡོངས་འདུས་དགའ་ཚལ་ཞེས་བྱ་བ་བཞུགས་སོ།། ཆོས་དབྱིངས་ཀུན་ཁྱབ་འཇམ་དབྱངས་ཡེ་ཤེས་སྐུ། །དཔག་ཡས་ཆོས་ཀྱི་འབྱུང་གནས་ཚངས་དབྱངས་གསུང༌། །མཁའ་ཁྱབ་རྡུལ་བྲལ་མི་ཕྱེད་རྡོ་རྗེའི་ཐུགས། །བློ་གྲོས་སྤོབས་པ་རྒྱ་མཚོའི་བླ་མ་རྒྱལ། །སྙིགས་འགྲོར་རྗེས་བརྩེའི་འཛུམ་གྱིས་རྟག་སྒེག་པད་དཀར་ལྟར་འཕགས་ཐུགས་བསྐྱེད་ཚལ། །ཚོགས་ཟུང་སྦྲང་རྩིའི་ཟིལ་དངར་ཆེས་ལྕི་རྫོགས་སྨིན་སྦྱང་བ་མཐར་སོན་པས། །སྙིགས་མའི་མུན་སེལ་སྐུ་དང་ཡེ་ཤེས་རབ་འབྱམས་རྣམ་འདྲེན་བཞི་པའི་ཚུལ། །ས་གསུམ་མཆོད་སྡོང་ལྷ་མིའི་སྟོན་པ་ཤཱཀྱ་སེང་གེའི་ཞབས་ལ་འདུད། །རབ་འབྱམས་རྒྱལ་བའི་གསང་བ་མི་ཟད་རྒྱན་གྱི་འཁོར་ལོའི་རིགས་ཀུན་བདག །རྨད་བྱུང་མཁྱེན་བརྩེ་ནུས་པའི་ཕྲིན་ལས་གདུལ་དཀར་དཔའ་བའི་རིག་འཛིན་ཚུལ། །གངས་ཅན་བསྟན་པའི་འབྱུང་གནས་གཅིག་པུ་ཕན་བདེའི་མཛད་པ་བསམ་ཡས་མགོན། །རྒྱལ་དབང་པདྨ་སཾ་བྷའི་ཡེ་ཤེས་སྒྱུ་འཕྲུལ་རྡོ་རྗེའི་སྤྲིན་བཀོད་འདུད། །ཐུབ་བསྟན་ལེགས་བྲིས་ཀླུང་གི་དཔལ་འཛིན་གཏད་རབས་བདུན་དང་རྒྱན་དྲུག་མཆོག །རིག་འཛིན་རྣམ་དགུ་རྣལ་འབྱོར་དབང་ཕྱུག་ཆོས་རྒྱལ་མེས་དབོན་བློན་པོར་བཅས། །མཁས་གྲུབ་ལོ་པཎ་ཤིང་རྟ་ཆེ་བརྒྱད་རྣམ་ཐར་ཨུ་དུམ་ཝཱ་རའི་ཚལ། །ངོ་མཚར་རྣམ་བཀྲའི་མཛད་པ་རྒྱ་མཚོར་དད་པའི་བུང་བ་གཡོ་བས་གུས། །ཁྱད་པར་འཇམ་མགོན་ཡེ་ཤེས་རོལ་མོའི་སྤྲིན། །རབ་འབྱམས་ཞིང་དུ་མཛེས་པར་བྲེས་པ་ལ། །བསམ་ཡས་ཕྲིན་ལས་ནོར་བུའི་གྲུ་ཆར་ཅན། །ཚེ་རབས་ཀུན་ཏུ་ཡིད་མཁར་དཀྲིགས་གྱུར་ཅིག །ཕྱོགས་སུ་མ་ལྷུང་མཛད་པ་རྒྱ་མཚོའི་རླབས། །འཕགས་པའི་རང་བཞིན་རིན་ཆེན་དབྱིག་གིས་གཏམས། །བློ་འདས་བཀོད་པའི་གཟི་བྱིན་འབུམ་ཕྲག་གིས། །སངས་རྒྱས་ཀུན་གྱི་བླ་མ་ཁྱོད་གཅིག་བསྔགས། །དེ་སྙེད་ངང་ཚུལ་ཀུན་བཟང་རྡོ་རྗེའི་གསུང༌། །ཚངས་དབྱངས་གླིང་བུས་བསྔགས་ཀྱང་རྫོགས་མིན་ཞིང༌། །མཐའ་དག་རྣམ་ཐར་འཕགས་བློས་དཔོག་མིན་ན། །བདག་ལྟའི་བསམ་བརྗོད་ཡུལ་ལས་ཀུན་ནས་འདས། །དཔག་ཡས་ཤེས་དང་ཤེས་བྱའི་ཆོས་ཐམས་ཅད། །ཡེ་ཤེས་མེ་ལོང་གཅིག་ཏུ་བཟླུམས་པའི་མཐུས། །སྲིད་ཞི་ཀུན་ཁྱབ་སྲིད་ཞིའི་མཐའ་ལས་འདས། །ཟབ་རྒྱས་ཆོས་རྣམས་ཀུན་གྱི་འབྱུང་གནས་ཕྱིར། །བསྟན་འཛིན་ཀུན་གྱི་གཙུག་རྒྱན་མཁས་གྲུབ་དབང༌། །ཐུབ་བསྟན་ཡོངས་ཀྱི་འབྱུང་གནས་ཤིང་རྟ་ཆེ། །ངོ་མཚར་ཡོངས་རྫོགས་རྣམ་ཐར་ཨུ་དུམ་ཝཱར། །མཁའ་ལམ་ཉི་ཟླ་བཞིན་དུ་འཛམ་གླིང་བརྡལ། །ངེས་འབྱུང་ཐུགས་ཀྱི་རྒྱ་མཚོ་ཆེས་ཟབ་འཕགས་ལམ་གླིང་བཞིར་ཚོགས་གཉིས་ཕྱུག །གསང་ཆེན་རྒྱུད་སྡེའི་ཉི་ཟླ་རབ་གསལ་སྨིན་གྲོལ་སྣང་བས་ཁོར་ཡུག་ཁྱབ། །ཡེ་ཤེས་དགོངས་པའི་རྣམ་སད་གྲོང་མཛེས་དཔག་ཡས་གཟུངས་སྤྲིན་བསམ་ལས་འདས། །ཕྱོགས་དུས་རྒྱལ་བའི་ཡབ་གཅིག་ཁྱོད་ནི་ས་གསུམ་གདུལ་བྱའི་གཉེན་གཅིག་པུ། །ནོར་བུའི་འོད་ཀྱིས་རྒྱ་མཚོའི་ཁ་དོག་བཞིན། །ཐུན་མོང་གྱུར་པའི་རྣམ་ཐར་ཆ་ཤས་ཀྱིས། །དུས་གསུམ་འབྱོན་དཀའི་ཚད་མའི་སྐྱེས་བུ་ཞེས། །རབ་འབྱམས་རྒྱལ་བའི་ཞིང་ན་མཛེས་པར་གྲགས། །དེ་ཕྱིར་ཕྱོགས་རེའི་གདུལ་བྱར་སྣང་བ་ཡི། །རྣམ་ཐར་ཆ་ཙམ་རིན་ཆེན་ནོར་བུའི་རྡུལ། །མཐོང་དང་ཐོས་པས་རྣམ་གྲོལ་མཐུ་བསྐྱེད་པའི། །ངང་ཚུལ་ཇི་ལྟར་དཔོག་པ་འདིར་གསལ་བྱ། །དེ་ཡང་བདག་ཅག་གི་དཔལ་ལྡན་བླ་མ་དམ་པ། ཕྱོགས་དང་རིས་སུ་མ་ཆད་པ་བསྟན་པ་དམ་པའི་ཆོས་ཀྱི་མཛོད། ཟབ་པ་དང་རྒྱ་ཆེ་བའི་འབྱོར་པ་ཟད་མི་ཤེས་པའི་དཔལ་ཐམས་ཅད་ཀྱིས་མངོན་པར་མཐོ་བའི་ཆོས་ཀྱི་རྗེ། ཆོས་ཀྱི་རྒྱལ་པོ། ཆོས་ཀྱི་དབང་ཕྱུག་དམ་པར་གྱུར་པ། ལྷ་དང་བཅས་པའི་འགྲོ་བ་ཡོངས་ཀྱི་སྐྱབས་གནས། རིགས་དང་དཀྱིལ་འཁོར་རྒྱ་མཚོའི་ཁྱབ་བདག་མཚན་བརྗོད་པར་དཀའ་བ། དོན་གྱི་སླད་དུ་མཚན་ནས་སྨོས་ན་འཇམ་དབྱངས་ཆོས་ཀྱི་བློ་གྲོས་རིས་མེད་བསྟན་པའི་རྒྱལ་མཚན་དཔལ་བཟང་པོ་ཞེས་མཚན་སྙན་གྱི་བ་དན་སྲིད་ཞིའི་བླ་ན་མངོན་པར་མཐོ་ཞིང༌། ཐུགས་བསྐྱེད་དང་ཕྲིན་ལས་ཀྱི་སྣང་བས་ཆོས་ཀྱི་དབྱིངས་ཀུན་ཏུ་ཁྱབ་པར་བརྡལ་བས་ཡིད་ཅན་ཀུན་ལ་འཕྲལ་ཡུན་གྱི་ཕན་བདེ་སྟེར་བར་མཛད་པ་གང་ཉིད། རྒྱལ་བ་ཀུན་གྱི་ཡེ་ཤེས་སེམས་དཔའི་འཇམ་དཔལ་དཔའ་བོའི་སྒྱུ་འཕྲུལ་གྱི་རོལ་པར་གསུངས་པས་ན། འཕགས་མཆོག་དེའི་རྣམ་འཕྲུལ་དང་སྤྱོད་ཡུལ་ནི་རྒྱལ་སྲས་ས་ཆེན་པོ་ལ་བཞུགས་པ་རྣམས་ཀྱིས་ཀྱང་ཇི་བཞིན་རྟོགས་དཀའི་གནས་ཏེ། འཇམ་དཔལ་སྒྱུ་འཕྲུལ་དྲྭ་བ་ལས། མཆོག་གི་དང་པོ་སྐུ་གསུམ་འཆང༌། །སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔ་ཡི་བདག །སངས་རྒྱས་ལྔ་བདག་ཅོད་པན་ཅན། །སྤྱན་ལྔ་ཆགས་པ་མེད་པ་འཆང༌། །སངས་རྒྱས་ཐམས་ཅད་སྐྱེད་པ་པོ། །སངས་རྒྱས་སྲས་པོ་དམ་པ་མཆོག །ཅེས་པ་དང༌། སངས་རྒྱས་ཀུན་གྱི་སྙིང་པོ་ཆེ། །སྤྲུལ་པའི་འཁོར་ལོ་སྣ་ཚོགས་འཆང༌། །ཞེས་སོགས་རྒྱ་ཆེར་གསུངས་པ་དང༌། གཞན་ཡང་ཕལ་པོ་ཆེ་ལས། བྱང་ཆུབ་རྒྱ་མཚོ་རབ་བརྙེས་གྱུར་ནས་ནི། །སེམས་ཅན་རྒྱ་མཚོ་རབ་ཏུ་སྨིན་བྱའི་ཕྱིར། །བྱང་ཆུབ་སེམས་བསྐྱེད་རྒྱ་མཚོ་སྟོན་མཛད་ཅིང༌། །མི་འགྲིབ་སྤྱོད་པ་རྒྱ་མཚོ་ཀུན་ཏུ་སྟོན། །བདེ་གཤེགས་རྣམས་ཀྱི་རྣམ་འཕྲུལ་དེ་འདྲའོ། །ཞེས་གསུངས་པ་ལྟར། སྲིད་ཞིའི་སྤྱི་དཔལ་ཁྱབ་བདག་དང་པོའི་སངས་རྒྱས་བཅོམ་ལྡན་འདས་འཇམ་དཔལ་ཡེ་ཤེས་སེམས་དཔའ་ཞེས་སྐུ་གསུམ་གྱི་ཞིང་དང༌། སྐུའི་བཀོད་པ་དང༌། མཚན་གྱི་རྣམ་གྲངས། མཛད་པ་ཕྲིན་ལས་སོགས་རྣམ་པ་ཐམས་ཅད་པ་བསམ་གྱིས་མི་ཁྱབ་པའི་རང་བཞིན་རྟག་ཁྱབ་ལྷུན་གྲུབ་ཆེན་པོ་ལ་མངའ་དབང་བསྒྱུར་བའི་བདག་ཉིད་ཅན་དུ་བཞུགས་པས་ན། གདུལ་བྱ་འདུལ་བྱེད་ཀྱི་རྣམ་པར་འཕྲུལ་པའང་གཅིག་ཏུ་མ་ངེས་ཤིང་གང་ལ་གང་འདུལ་གྱི་སྒྱུ་འཕྲུལ་རོལ་གར་མཐའ་ཡས་པར་བསྒྱུར་ནས་འགྲོ་བའི་དོན་མཛད་པའི་ཚུལ་བསམ་གྱིས་མི་ཁྱབ་པ་སྟེ། འཇམ་དཔལ་སྒྱུ་འཕྲུལ་དྲྭ་བ་ལས། །སངས་རྒྱས་སྤྲུལ་པའི་རྒྱུད་འཆང་བ། །ཕྱོགས་བཅུར་སྤྲུལ་པ་སྣ་ཚོགས་འགྱེད། །ཅེས་པ་དང༌། །སེམས་ཅན་ཀུན་གྱི་ཡིད་རིག་པ། །སེམས་ཅན་ཀུན་གྱི་ཡིད་ལ་གནས། །དེ་དག་སེམས་དང་མཐུན་པར་འཇུག །སེམས་ཅན་ཀུན་ཡིད་ཚིམ་པར་བྱེད། །ཅེས་དང༌། །རྣམ་པར་ཤེས་པའི་ཆོས་ཉིད་འདས། །ཡེ་ཤེས་གཉིས་མེད་ཚུལ་འཆང་བ། །རྣམ་པར་རྟོག་མེད་ལྷུན་གྱིས་གྲུབ། །དུས་གསུམ་སངས་རྒྱས་ལས་བྱེད་པ། །ཞེས་དང༌། གཞན་ཡང་དཀོན་མཆོག་སྒྲོན་མེའི་མདོ་ལས། །དེ་དག་སྙན་ངག་མཁན་རྒྱལ་སྙན་ངག་སྦྱོར། །གར་མཁན་རྔ་མཁན་གྱད་དང་རོལ་མོ་མཁན། །བཞག་མཛེས་རྒྱན་ཕྲེང་ཐོགས་ཤིང་གར་བྱེད་དང༌། །སྒྱུ་མ་མཁན་པོ་གཟུགས་མང་ཀུན་ཏུ་སྟོན། །གྲོང་དང་གྲོང་དཔོན་ཁ་ལོ་བསྒྱུར་བར་འགྱུར། །དེ་བཞིན་དེད་དཔོན་ཚོང་དཔོན་ཁྱིམ་བདག་འགྱུར། །རྒྱལ་པོ་བློན་པོ་མདུན་འདོན་ཕོ་ཉ་དང༌། །སྨན་པ་འཇིག་རྟེན་བསྟན་བཅོས་ཆོ་ག་མཁན། །དེ་དག་དགོན་པར་ལྗོན་ཤིང་ཆེན་པོར་འགྱུར། །སྨན་དང་རིན་ཆེན་མི་ཟད་གཏེར་རྣམས་དང༌། །ཡིད་བཞིན་ནོར་བུ་འདོད་སྦྱིན་སྡོང་པོ་དང༌། །ལམ་གོལ་དོང་པ་རྣམས་ལ་ལམ་སྟོན་འགྱུར། །ཞེས་གསུངས་པ་ལྟར། མཁའ་ཁྱབ་ཀྱི་འཇིག་རྟེན་རབ་འབྱམས་རྣམས་སུ་སངས་རྒྱས་བྱང་སེམས་ཉན་རང་མཁས་གྲུབ་དགེ་བའི་བཤེས་གཉེན་ལྷ་དང་དྲང་སྲོང་འཁོར་སྒྱུར་རྒྱལ་ཕྲན་བློན་འབངས་ཁྱིམ་བདག་དང་རི་དྭགས་ཀྱི་རྣམ་པར་སྣང་བ་སོགས་མཚན་དང་སྐུའི་བཀོད་པ་སྣ་ཚོགས་དང༌། བཟོའི་གནས་དང་གཞན་ལ་ཕན་པའི་རིགས་དང༌། ཉི་ཟླ་ནོར་བུ་བུམ་བཟང་སྨན་མཆོག་ལྗོན་ཤིང་གྲུ་གཟིངས་ཟམ་སྟེགས་ཟས་གོས་གནས་མལ་ལ་སོགས་ཀྱིས་མཚོན་གང་འདུལ་འགྲོ་བའི་དཔལ་དུ་གྱུར་པ་མཐའ་དག་ཀྱང་འཇམ་དཔལ་ཉིད་ཀྱི་སྒྱུ་འཕྲུལ་གྱི་རོལ་པ་ལས་མ་འདས་ཤིང༌། བྱེ་བྲག་མདོ་རྒྱུད་ནས་གསུངས་པའི་རྗེས་སུ་འབྲངས་ཏེ་འཇམ་དཔལ་གྱི་རྣམ་ཐར་ཆ་ཙམ་བརྗོད་ན། བསྐལ་པ་དཔག་ཏུ་མེད་པའི་སྔོན་རོལ་ནས་དེ་བཞིན་གཤེགས་པ་ཀླུའི་རིགས་མཆོག་དང༌། བཅོམ་ལྡན་འདས་འཇམ་པའི་ཏོག་ཏུ་མངོན་པར་སངས་རྒྱས་ཟིན་པ་དང༌། མ་འོངས་པ་ན་དེ་བཞིན་གཤེགས་པ་མགོན་པོ་ཀུན་ཏུ་གཟིགས་སུ་འཚང་རྒྱ་བར་འགྱུར་བའི་ཚུལ་སྟོན་པར་གསུངས་ཤིང༌། ད་ལྟར་མི་མཇེད་ཀྱི་བྱང་ཕྱོགས་སངས་རྒྱས་ཀྱི་ཞིང་གཞན་དུ་དེ་བཞིན་གཤེགས་པ་ནོར་བུ་བརྩེགས་པའི་རྒྱལ་པོ་ཞེས་པར་སངས་རྒྱས་ནས་གདུལ་བྱ་རྣམས་ལ་སངས་རྒྱས་ཀྱི་མཛད་པ་སྐྱོང་བཞིན་དུ་བཞུགས་པ་དང༌། ཞིང་འདིར་ཡང་བདག་ཅག་གི་སྟོན་པའི་ཡབ་རྒྱལ་པོ་ཟས་གཙང་མ་ངེས་པའི་དོན་དུ་འཇམ་དཔལ་གྱི་རྣམ་འཕྲུལ་དུ་གསུངས་པ་དང༌། སངས་རྒྱས་པའི་ཚེ་ན་ས་བཅུའི་བྱང་ཆུབ་སེམས་དཔའི་ཚུལ་བཟུང་ནས་ཆོས་ཀྱི་སྒོ་མོ་ཟབ་ཅིང་རྒྱ་ཆེ་བའི་གླེང་བསླང་བ་དང༌། རྫུ་འཕྲུལ་གྱི་བཀོད་པ་མ་ངེས་པས་གདུལ་བྱ་འདུལ་བ་དང༌། སངས་རྒྱས་ཀྱི་ཆེ་བ་བརྗོད་པ་སོགས་རྣམ་པར་རོལ་པ་བསམ་གྱིས་མི་ཁྱབ་པས་དུལ་བྱ་མཐའ་ཡས་པ་སྨིན་པར་མཛད། ཙཱི་ནའི་ཡུལ་གྱི་རི་བོ་རྩེ་ལྔར་བྲྀཀྵའི་ཤིང་གི་ལྦ་བར་བརྫུས་སྐྱེས་བྱིས་པ་ལོ་བརྒྱད་པའི་རྣམ་པས་སྤོར་ཐང་གི་གཙུག་ལག་མཐའ་དག་སྣང་བར་མཛད། ཤམྦྷ་ལའི་མིའི་བདག་པོ་གྲགས་པའི་སྐུར་བསྟན་ནས་དམ་པ་དང་པོའི་སངས་རྒྱས་ཀྱི་རྩ་བའི་རྒྱུད་ཆེན་སྟོང་ཕྲག་བཅུ་གཉིས་བསྡུས་རྒྱུད་ལེའུ་ལྔ་པར་བསྡུས་ཤིང་གདུལ་བྱ་རྣམས་རྡོ་རྗེའི་རིགས་གཅིག་ཏུ་སྨིན་པར་མཛད་ཅིང༌། མ་འོངས་པ་ན་སླར་ཡང་འཇམ་དཔལ་གྲགས་པ་ཉིད་དྲག་པོ་འཁོར་ལོ་ཅན་དུ་བཞེངས་ནས་འཛམ་བུའི་གླིང་གི་ཀླ་ཀློ་མཐའ་དག་བཅོམ་ནས་རྫོགས་ལྡན་ཕྱི་མ་འདྲེན་པར་གསུངས་པ་དང༌། གཞན་ཡང་རྣམ་རོལ་སྣ་ཚོགས་པས་འཕགས་བོད་ཀྱི་པཎ་གྲུབ་ཕལ་ཆེར་རྗེས་སུ་བཟུང་ཚུལ་སོགས་གྲངས་ལས་འདས་ཤིང༌། དེ་ལྟ་བུའི་ཡོན་ཏན་རྒྱ་མཚོ་མཐའ་ཡས་པའི་གནས་ལ་དུས་གསུམ་གྱི་རྒྱལ་བ་ཀུན་གྱིས་ཀྱང་བསྟོད་བསྔགས་ཀྱི་མེ་ཏོག་ཡང་ཡང་འཐོར་བར་མཛད་པས་ན། སྒྱུ་འཕྲུལ་རྒྱས་པ་ལས། ཐུགས་རྗེ་ཆེན་པོའི་བྱིན་རླབས་ཀྱིས། །ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་ཕྲིན་ལས་བསམ་མི་ཁྱབ། །སྐུ་གསུང་ཐུགས་དང་ཡོན་ཏན་དང༌། །ལྷུན་གྱིས་གྲུབ་པའི་ཕྲིན་ལས་ཀྱིས། །གདུལ་བྱ་རྣམས་ནི་ཆུད་མི་གསོན། །ངན་སོང་སྦྱོང་ཞིང་བྱང་ཆུབ་ཞིང༌། །ཡེ་ཤེས་ཚོགས་རྫོགས་ཀུན་ཏུ་སྟོན། །ཅེས་གསུངས་པ་ལྟར་ལས། རེ་ཞིག་རྗེ་བཙུན་འཇམ་དཔལ་དབྱངས་ཉིད་ཚུར་མཐོང་སོ་སྐྱེའི་སྣང་ངོར་རྡོ་རྗེ་སློབ་དཔོན་གྱི་ཚུལ་ཏུ་སྣང་བ་རྗེ་བླ་མ་འདི་ཉིད་ཀྱི་རྣམ་པར་རོལ་པ་དུ་མས་གདུལ་བྱ་འདུལ་བའི་ཕྲིན་ལས་ཇི་ལྟར་མཛད་ཚུལ་གྱི་ཆ་ཤས་ལས་འཕྲོས་ཏེ་ས་བོན་ཙམ་ཞིག་འགོད་པ་ལ་གསུམ། ཐོག་མར་དགེ་བ་ངོ་མཚར་སྐྱེས་རབས་ཀྱི་ཕྲེང་བ་མདོ་ཙམ་བཀོད་པ་དང༌། བར་དུ་དགེ་བ་སྐུ་དངོས་ཀྱི་རྣམ་ཐར་རྒྱས་པར་བཤད་པ། མཐའ་མར་དགེ་བ་འབྱུང་འགྱུར་ཕྲིན་ལས་ཁྱད་པར་ཅན་སྐྱོང་བའི་ཚུལ་གྱིས་དོན་བསྡུ་བའོ། །དང་པོ་ནི། འཕགས་བོད་ཀྱི་ལྗོངས་འདིར་བསྟན་དང་འགྲོ་བའི་དཔལ་དུ་སྒྱུ་འཕྲུལ་སྤྲུལ་པའི་ཟློས་གར་རིམ་དང་ཅིག་ཅར་གྱི་ཚུལ་དུ་སྣང་བར་མཛད་པ་རྣམས་འཇམ་དབྱངས་བླ་མ་མཁྱེན་བརྩེའི་དབང་པོའི་སྐྱེས་རབས་སུ་བཞུགས་པ་ནི་ཡོངས་སུ་གྲགས་ཤིང་རྣམ་ཐར་ཆེན་པོར་འཁོད་པ་ཀུན་དང༌། དེར་མི་བཞུགས་པའི་སྐྱེས་ཆེན་འགའ་ཞིག་རྗེ་བླ་མའི་ཞལ་གསུང་སྐྱེས་ཕྲེང་གསོལ་འདེབས་རྒྱས་བསྡུས་ལས་འབྱུང་བ་མཚན་ཐོ་ཙམ་བཀོད་ན། བདག་ཅག་གི་སྟོན་པས་བྱང་ཆུབ་སེམས་དཔའ་ཆེན་པོ་བློ་གྲོས་དང་སྤོབས་པ་སོགས་མཐའ་ཡས་པའི་བདག་ཉིད་ཅན་དུ་རྒྱ་ཆེར་བསྔགས་ཤིང༌། ལངྐའི་ཡུལ་གྱི་རི་མ་ལ་ཡའི་རྩེར་གསང་བའི་བདག་པོས་རྒྱུད་སྡེའི་གསང་མཛོད་ཕྱེས་ནས་འཛམ་བུའི་གླིང་དུ་རྡོ་རྗེ་ཐེག་པའི་ཤིང་རྟ་ཐོག་མར་འདྲེན་པ་ན་གདུལ་བྱའི་འདུས་པ་དང་པོ་རིགས་ཅན་དྲྭ་མ་ལྔའི་ཡ་གྱལ་དུ་གྱུར་ཅིང་ཐེག་ཆེན་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལྟ་བུའི་བདག་ཉིད་ཆེན་པོ། ཆོས་རྒྱལ་ལུང་བསྟན་རྡོ་རྗེའམ་སྐལ་ལྡན་རྒྱལ་པོ་ཛཿསོགས་རྗེས་སུ་འཛིན་པ་པོ་མིའི་རིག་འཛིན་ལི་ཙཱ་བི་དྲི་མ་མེད་པར་གྲགས་པ་བློ་གྲོས་རབ་ཞི། མཁས་གྲུབ་ཀྱི་རྣམ་ཐར་རྒྱ་གར་ཤར་ནུབ་ཏུ་འགྲན་ཟླ་བྲལ་བར་པཎྜི་ཏ་དཱ་ན་ཤི་ལས་བསྔགས་ཤིང་རྒྱ་ནག་དང་བོད་དུ་སྐུ་དངོས་སུ་བྱོན་ནས་ཆོས་ཀྱི་ཕྲིན་ལས་དང་རྫུ་འཕྲུལ་གྱི་བཀོད་པ་མཐའ་ཀླས་པའི་མ་ཧཱ་པཎྜི་ཏ་སྨྲྀ་ཏི་ཛྙཱ་ན། ཡང་དག་ཐུགས་ཀྱི་བཀའ་བབས་དཔལ་ཆེན་པོ་དང་གཉིས་སུ་མེད་པའི་མཆོག་དངོས་གྲུབ་པ་གསང་སྔགས་ཆུ་བོ་བཞིའི་བཀའ་བབས་གནུབས་ཀྱི་རིགས་འཁྲུངས་དགེ་སློང་ནམ་མཁའི་སྙིང་པོ། གུ་རུའི་ཐུགས་སྲས་མཁྱེན་བརྩེ་ནུས་པའི་མངའ་བདག་ལང་གྲོ་ལོ་ཙཱ་བ་དཀོན་མཆོག་འབྱུང་གནས། སྒྲུབ་བརྒྱུད་བསྟན་པའི་ཤིང་རྟ་དགྱེས་མཛད་ལོ་ཙཱ་ཆེན་པོའི་ཐུགས་སྲས་ཀྱི་ཐུ་བོ་གངས་ལྗོངས་གྲུབ་པའི་དབང་ཕྱུག་མི་ལ་བཞད་པ་རྡོ་རྗེ། བདེ་གཤེགས་སྨན་པའི་རྒྱལ་པོ་རིག་པ་འཛིན་པའི་ཚུལ་དུ་བཞེངས་པ་ངོ་མཚར་ཚད་བཟུང་ལས་འདས་པའི་རྣམ་ཐར་ཅན་གསོ་རིག་གཙོ་བོར་གྱུར་བའི་འགྲོ་ཕན་ཕྲིན་ལས་མཐའ་ཀླས་ཤིང་ཐུགས་རྗེ་དང་བྱིན་རླབས་ཀུན་ལས་ཁྱད་པར་དུ་གྱུར་པ་གཡུ་ཐོག་ཡོན་ཏན་མགོན་པོ། ཤིང་རྟ་ཆེན་པོ་ཀླུ་སྒྲུབ་ཀྱི་རྣམ་འཕྲུལ་འཕགས་པའི་རྣམ་ཐར་གྱི་མངའ་བདག་ཕྲིན་ལས་མཁའ་ཁྱབ་ཏུ་བརྡལ་བ་རྒྱལ་བས་ལུང་བསྟན་འབྲི་གུང་སྐྱོབ་པ་རིན་ཆེན་དཔལ། འཇམ་པའི་དབྱངས་ཀྱིས་རྗེས་སུ་བཟུང་བའི་མཁས་གྲུབ་ཆེན་པོ་གློ་བོ་ལོ་ཙཱ་བ་ཤེས་རབ་རིན་ཆེན། དཔལ་ལྡན་ས་སྐྱ་པའི་འཇམ་དབྱངས་བདུན་བརྒྱུད་དུ་བྱོན་ཅིང་མཁྱེན་བརྩེ་ནུས་པའི་གཏེར་ཆེན་མཁས་དང་གྲུབ་པའི་དབང་ཕྱུག་ཆེན་པོ་དཔལ་ལྡན་བླ་མ་དམ་པ་བསོད་ནམས་རྒྱལ་མཚན། ཀུན་མཁྱེན་ཨེ་ཝཏྟ་པའི་ཐུགས་སྲས་འཁོར་ལོ་སྡོམ་པ་རྡོ་རྗེ་འཛིན་པའི་རྣམ་པར་འཕྲུལ་པ་མུས་ཆེན་དཀོན་མཆོག་རྒྱལ་མཚན། འཕགས་བོད་མཁས་གྲུབ་མང་པོས་རྗེས་སུ་བཟུང་ཞིང་རྒྱལ་བསྟན་ཕྱོགས་མེད་དུ་འཛིན་སྐྱོང་སྤེལ་བའི་མཛད་བཟང་ཅན་ཀུན་གྱི་ཚད་མར་གྱུར་པ་འགོས་ལོ་ཡེ་བཟང་རྩེ་པའམ་གཞོན་ནུ་དཔལ་བ། ཆོས་ཀྱི་རྒྱལ་པོ་རཏྣ་གླིང་པའི་སྐུ་གསུང་ཐུགས་ཀྱི་སྲས་སྔ་འགྱུར་བསྟན་པའི་གསལ་བྱེད་དགུང་གྲངས་བརྒྱ་དང་བཅུའི་བར་འགྲོ་དོན་རྒྱ་ཆེར་མཛད་པའི་རིག་འཛིན་ཚེ་དབང་གྲགས་པ། ལོ་ཆེན་བཻ་རོའི་རྣམ་འཕྲུལ་དུ་ལུང་གིས་བསྔགས་ཤིང་ཆོས་རྗེ་ས་པཎ་གྱི་སྤྲུལ་པར་ཞལ་གྱིས་བཞེས་པ་གནས་ལྔ་རིག་པའི་མཁས་པ་ས་སྐྱ་ལོ་ཙཱ་འཇམ་པའི་རྡོ་རྗེ། འོད་གསལ་འཁོན་གྱི་གདུང་ལས་བྱོན་པ་མཁས་དང་གྲུབ་པའི་མཛད་བཟང་ཅན་འཇམ་མགོན་ཨ་མེས་ཞབས་ཀུན་དགའ་བསོད་ནམས། བཀའ་གཏེར་བསྟན་པའི་མངའ་བདག་ཨོ་རྒྱན་གཏེར་བདག་གླིང་པའི་སྲས་མཁས་དང་གྲུབ་པའི་རྣམ་སྤྱོད་འགྲན་ཟླ་དང་བྲལ་བ་དབང་ཆེན་སྤྲུལ་པ་པདྨ་འགྱུར་མེད་རྒྱ་མཚོ། གངས་ཅན་ཕན་བདེའི་གཉེན་གཅིག་པད་དཀར་འཆང་བ་༧རྒྱལ་མཆོག་བློ་བཟང་ཚངས་དབྱངས་རྒྱ་མཚོ། ལང་གྲོ་ལོ་ཙཱའི་རྣམ་འཕྲུལ་པདྨ་དྲག་པོའི་ནུས་རྩལ་འཆང་བས་སྙིགས་དུས་ཀྱི་དམ་སྲི་འབྱུང་པོ་འདུལ་མཛད་རིག་འཛིན་ཀློང་གསལ་སྙིང་པོ་པདྨ་མདོ་སྔགས་གླིང་པ། བི་མ་དངོས་སྣང་འོད་གསལ་སྣང་བཞི་མཐར་ཕྱིན་འབྲེལ་ཚད་དོན་ལྡན་ཆེན་པོ་གྲུབ་དབང་རྫོགས་ཆེན་སྐུ་ཕྲེང་བཞི་པ་མི་འགྱུར་ནམ་མཁའི་རྡོ་རྗེ་རྣམས་ཏེ། དེ་དག་ཀྱང་རྣམ་ཐར་ཞལ་གསུངས་མ་ལས། རྣམ་འཇོམས་གཟུངས་ནི་བློར་བླངས་ཚེ། །སྲོད་དུས་ཟླ་བའི་དཀྱིལ་འཁོར་ལ། །བལྟས་པའི་རྐྱེན་གྱིས་ཡིད་སྐྱོ་ཞིང༌། །དཔལ་ལྡན་ས་སྐྱའི་ཆོས་དྲྭ་དེ། །ཡང་ཡང་དྲན་པས་ཚེ་སྔོན་མར། །འཁོན་གདུང་ཞིག་ཏུ་སྐྱེས་པ་ཡི། །བག་ཆགས་ཡད་ཡུད་དྲན་པར་གྱུར། །མངའ་རིས་པཎ་ཆེན་ལྷ་བཙུན་ཆེ། །ངག་དབང་བློ་བཟང་རྒྱ་མཚོ་དང༌། །ཚངས་དབྱངས་རྒྱ་མཚོ་དཔལ་མཁྱེན་སོགས། །ཐར་ཐོར་ཙམ་ཞིག་སྐབས་རེར་དྲན། །ཞེས་དངོས་སུ་ཁ་ཤས་དང་གཞན་རྣམས་སོགས་ཁོངས་སུ་བསྡུ་བར་མཛད་པ་ལྟར། །ཁྱད་པར་དུ་ཆོས་རྒྱལ་ཁྲི་སྲོང་གི་བག་ཆགས་ཤིན་ཏུ་གསལ་ཚུལ་རྗེ་ཉིད་སྐུ་ཆུང་ངུའི་དུས་ཀཿཐོག་བཞུགས་སྐབས་སྤྲུལ་སྐུ་ལོ་ཉུང་གཞན་འགའ་དང་སྐུ་རྩེད་ལྟ་བུས་རང་རང་གི་སྐྱེ་བ་སྔོན་མ་གང་ཡིན་སེམས་ལ་ཅི་དྲན་བཅོས་མེད་བཤད་རྒྱུ་མཛད་པའི་ཚེ། །རྗེ་བླ་མ་འདིས་མི་སྐྱ་གསེར་གྱི་རྣ་རྒྱན་ཅན་དར་ཟབ་གོས་ཆེན་སྔོན་པོའི་གོས་གྱོན་པ་ཞིག་ཡིན་པ་དྲན་ཚུལ་གསུངས་པས། །གཞན་རྣམས་ནས་སྤྲུལ་སྐུ་བློ་གྲོས་ཀྱི་སྐྱེ་བ་སྔོན་མ་མི་སྐྱ་ཡིན་པ་རེད་ཅེས་ཀུ་རེ་ལབ་རྒྱུ་ཡོད་པ་བྱུང་བ། ཕྱིས་རྫོང་སར་ནས་མཁྱེན་བརྩེ་གོང་མའི་ལྗགས་བཀོད་ཞལ་ཐང་ནང་ཆོས་རྒྱལ་ཁྲི་སྲོང་ན་བཟའ་སྔོན་པོ་ཅན་མཛད་ཁོ་ན་གསུངས་འདུག་པ་རྡོ་ཆག་ལྷུ་བསྒྲིགས་འདྲ་ཞིག་བྱུང་འདུག་ཀྱང་ལོ་ཉུང་བྱིས་པའི་ཁ་ལ་སྐྱག་གཏད་ཅི་ཡོད་ཅེས་གསུངས་པ་དང༌། ལར་སྐྱེས་བུ་བོད་ཆས་གོས་སྔོན་གསེར་རྣ་སོ་བྱིས་ཅན་གྱི་བག་ཆགས་རྣམ་ཀུན་ཡིད་ལ་གསལ་བ་ཆོས་རྒྱལ་ག་ལ་ཡིན་ཏེ་བོད་པའི་ཇོ་ཇོ་ཞིག་ཡིན་པ་འདྲ་ཞེས་གསུངས་ལས་ཐོས། ཡང་རྗེ་བཙུན་མི་ལའི་བག་ཆགས་གསལ་ཚུལ་གསུངས་འཕྲོས་ནི། རྫོང་སར་བཞུགས་སྐབས་ཉི་ཁྱམས་ནས་ཕྱག་བསིལ་གྲུབ་རྗེས་ལྷོ་ཕྱོགས་རྫ་རིའི་རྩེ་ཁ་བས་གཡོགས་ཤིང་ན་བུན་འཁྲིགས་པ་ལ་གཟིགས་ཏེ་ཁྱོད་རང་རི་འདི་འདྲ་མཐོང་དུས་སྣང་བ་ཅི་ཤར་འདུག་གསུངས་པར་ཞུ་ལན་གང་ཡང་འབུལ་མ་ཤེས་པའི་ངང༌། རྗེ་ཉིད་ནས་ངེད་རི་འདི་འདྲ་མཐོང་དུས་སེམས་དགའ་སྐྱོ་འདྲེས་མ་ཤར། མགུར་ལེན་སྙིང་འདོད་པ་ཞིག་འོང་འདུག་པ་བཀའ་བརྒྱུད་པའི་བག་ཆགས་ཡིན་པ་འདྲ། ཁྱེད་ནས་དྲང་པོ་མི་ཤོད་པ་མ་གཏོགས་རྗེ་མི་ལའི་སྐུ་ཞིག་དང་འབྲལ་མེད་ཀྱི་རི་ཁྲོད་དུ་གཅེར་བུ་གཟན་དཀར་གྱོན་ནས་སྡོད་པ་ཡིན་པ་གསུངས་ནས་བཞད་མོ་གནང་བར་མཛད་པ་འདིས་ཤིན་ཏུ་གསལ་བར་རྟོགས་ནུས་སོ། །ཡང་སྐྱེས་ཕྲེང་གསོལ་འདེབས་རྒྱས་པར། ཡེ་ཤེས་རྡོ་རྗེའི་སྐུ་དང་ཀུན་དགའི་གསུང༌། །དབང་མཆོག་ཐུགས་སྤྲུལ་བློ་གསལ་ཡོན་ཏན་དང༌། །འཇམ་དཔལ་དབྱངས་དངོས་མཁྱེན་བརྩེའི་དབང་པོ་ཡི། །ཕྲིན་ལས་རྣམ་འཕྲུལ་ཆེན་པོར་གསོལ་བ་འདེབས། །ཅེས་བསྩལ་བར་མཛད་པའང་ཀུན་མཁྱེན་འཇིགས་གླིང་གི་སྤྲུལ་པའི་སྐུ་ཧེ་རུ་ཀ་དངོས་མདོ་མཁྱེན་བརྩེ་ཡེ་ཤེས་རྡོ་རྗེའི་སྐུའི་རྣམ་འཕྲུལ་དུ་གསུངས་ཏེ། འོད་གསལ་རྡོ་རྗེ་སྙིང་པོའི་སྟོན་དང་བསྟན་པ་ལ་གཤེ་སྐུར་བྱེད་པའི་རིགས་དང༌། ཁྱད་པར་མི་མ་ཡིན་པ་རྣམས་འདུལ་བ་ལ་ཆེད་དུ་སྤྲུལ་པ་བསད་གསོ་དང་སྤྲུལ་བསྒྱུར་སྣ་ཚོགས་པས་གདུལ་བྱ་འདུལ་བའི་རྣམ་ཐར་ཅན་དཔལ་རི་མཁྱེན་བརྩེ་ཧེ་རུ་ཀ་དཔལ་ཡེ་ཤེས་རྡོ་རྗེ་དང༌། གངས་ལྗོངས་བསྟན་པ་ཡོངས་སུ་རྫོགས་པའི་ཤིང་རྟ་ཆེན་པོ་རྗེ་བླ་མ་ཐམས་ཅད་མཁྱེན་གཟིགས་འཇམ་དབྱངས་མཁྱེན་བརྩེའི་དབང་པོ་སྟེ། གཉིས་ཀ་ཀུན་མཁྱེན་འཇིགས་གླིང་གི་སྤྲུལ་པ་དུས་ཐོག་མཉམ་ཞིང་ཐུགས་རྒྱུད་གཅིག་པར་ཡོངས་སུ་གྲགས་པ་ལྟར་མདོ་མཁྱེན་བརྩེའི་སྤྲུལ་པ་བསྡུས་པ་ན་རྗེ་མཁྱེན་བརྩེའི་དབང་པོ་ཉིད་ལ་ཐིམ་པར་ཞལ་གྱིས་བཞེས་པ་དང་མཐུན་པར་ཆོས་རྗེ་དཔལ་སྤྲུལ་རིན་པོ་ཆེས་ཀྱང༌། དབང་བཅུ་དང་པོ་དཔེ་བྱད་རིགས་ལྔའི་རྩེར། །མ་ཆགས་པདྨ་ཅན་གྱིས་ལུང་བསྟན་པའི། །སྐུ་ཚེ་སྔ་མའི་རྟེན་འབྲེལ་འཕྲོར་གྱུར་པ། །སྐུ་ཚེ་འདི་ལ་ཕྱག་ཏུ་སོན་ནས་ཀྱང༌། །ལུང་བསྟན་བདེན་པ་མངོན་དུ་འགྱུར་བར་ཤོག །ཅེས་ཀུན་མཁྱེན་འཇིགས་མེད་གླིང་པའི་སྐུ་ཚེའི་ཚད་བརྒྱད་ཅུ་རྩ་ལྔ་ལུང་བསྟན་པའི་རྟེན་འབྲེལ་གྱི་འཕྲོ་འཇམ་དབྱངས་མཁྱེན་བརྩེ་རིན་པོ་ཆེར་བཞུགས་པའི་ཞབས་བརྟན་ཚེ་དཔག་མེད་པའི་སྐུ་བཅུ་གསུམ་ཕུལ་བར་མཛད་པ་ལྟར། རྗེ་བླ་མ་འདི་ལའང་གྲུབ་ཆེན་འཇིགས་མེད་ཕྲིན་ལས་འོད་ཟེར་གྱི་རྣམ་འཕྲུལ་རྗེ་མཁྱེན་བརྩེའི་ཐུགས་སྲས་ཀྱི་ཐུ་བོ་ཀུན་མཁྱེན་འཇིགས་མེད་བསྟན་པའི་ཉི་མས་ཀློང་སྙིང་རིག་འཛིན་འདུས་པའི་དཀྱིལ་འཁོར་དུ་རྡོ་རྗེ་གཏོར་བླུག་གི་ཆོ་གས་སྐུ་བཞིའི་རྒྱལ་ཐབས་ཆེན་པོར་མངའ་གསོལ་བའི་སྐབས་དགོས་པ་དང་དགོངས་གཞི་ཁྱད་པར་ཅན་ལ་གཟིགས་ཏེ་གསང་མཚན་པདྨ་ཡེ་ཤེས་རྡོ་རྗེ་ཞེས་དངོས་སུ་འབུལ་བར་མཛད་པ་ལྟར། མཚུངས་མེད་གྲུབ་པའི་དབང་ཕྱུག་འདིས་གསང་བ་རྗེས་སུ་དྲན་པའི་ཐུགས་རྗེས་རྗེས་སུ་བཟུང་བར་མངོན་ཞིང༌། རྫོགས་ཆེན་མཁན་རིན་པོ་ཆེ་བསོད་ཆོས་ལས་ཨ་ཏི་འཛིན་པ་རང་གྲོལ་གྱི་དབང་ལུང་གསན་སྐབས་བཞུགས་གདན་གཟིག་ལྤགས་ཞིག་བཏིང་ནས་རྗེ་ཉིད་མཁྱེན་བརྩེ་ཡེ་ཤེས་རྡོ་རྗེ་དང་དགོངས་པ་དབྱེར་མེད་ཡིན་ཚུལ་གྱི་ལུང་བསྟན་དབུགས་དབྱུང་མཛད་པ་དེ་སྐབས་རྟེན་རབ་བྱུང་དུ་སོང་བས་སེམས་སྤྲོ་བར་མ་གྱུར་ཀྱང་ཕྱིས་འབྱུང་གི་ལྟས་ཡིན་པ་འདྲ་ཞེས་གསུངས་ཤིང༌། ཁྱད་པར་འོད་གསལ་སྙིང་ཐིག་གི་བསྟན་པ་ཆེས་ཆེར་གསལ་བར་མཛད་ཅིང་སྔགས་ཀྱི་སྤྱོད་པ་སྒྲ་ཇི་བཞིན་པ་བདག་གིར་མཛད་པ་དང༌། རྫོགས་པ་ཆེན་པོའི་གཞི་ལམ་འབྲས་བུའི་རྣམ་བཞག་ཀུན་གྱི་སྤྱོད་ཡུལ་དུ་མ་གྱུར་བའི་ཟབ་དོན་ཀྱང་ཐུགས་ལ་འཁྲུངས་པར་ཞལ་གྱིས་བཞེས། ཀུན་དགའི་གསུང་ཞེས་པ་ཙམ་ལས་སྙིང་པོ་དང་རྒྱལ་མཚན་བཟང་པོ་སོགས་དམིགས་གསལ་མ་གསུངས་པས་སྒྲ་ཡངས་པོར་བཏང་སྟེ་རྗེས་དཔག་གིས་སྨོས་ན། ངོར་ཆེན་རྡོ་རྗེ་འཆང་གིས་རྗེས་སུ་ཡང་ཡང་བཟུང་ཚུལ་བཀའ་ལས་ཐོས་པས་བྱང་ཕྱོགས་ཐུབ་པའི་རྒྱལ་ཚབ་ཀུན་མཁྱེན་ཨེ་ཝཾ་པའི་གསུང་དང༌། གཞན་ཡང་ས་པཎ་གྱིས་དངོས་ཉམས་རྗེས་སུ་བཟུང་ཚུལ་གསལ་བར་གསུངས་པའི་རྒྱུ་མཚན་འོག་ཏུ་འཆད་འགྱུར་ལྟར་ལ། བརྩེ་ཆེན་ཁུ་དབོན་རྗེས་འབྲང་བཅས་ཀྱི་གསུང་གི་གསང་བ་མདོ་སྔགས་ཀྱི་གཞུང་རྣམས་རྗེ་འདིས་ཐུགས་བསྐྱེད་དང་བཀའ་དྲིན་གྱིས་འཆད་ཉན་སྒོམ་སྒྲུབ་ཀྱི་སྡེ་ཕྱོགས་ཀུན་ཏུ་འཕེལ་རྒྱས་རྒྱ་ཆེར་བྱུང་བས་ན་དམ་པ་དེ་རྣམས་ཀྱི་གསུང་གི་ཕྲིན་ལས་གཅིག་ཏུ་བསྡུས་པའི་རྣམ་ཐར་ཅན་དུ་ཚད་མས་གྲུབ་པོ། །གཏེར་ཆེན་མཆོག་གྱུར་གླིང་པར་རིགས་གསུམ་རྣམ་འཕྲུལ་སྲས་གསུམ་འབྱུང་བར་རྡོ་རྗེའི་ལུང་གིས་བསྔགས་པ་ལ་འཇམ་དབྱངས་སྤྲུལ་པ་འགྱུར་མེད་ཚེ་དབང་གྲགས་པའམ་གསང་མཚན་དབང་མཆོག་རྡོ་རྗེ་ཞེས་མཁས་དང་གྲུབ་པའི་རྣམ་དཔྱོད་འགྲན་ཟླ་དང་བྲལ་བ་དེ་ཉིད་ཀྱི་བག་ཆགས་ཤིན་ཏུ་གསལ་བར་འདྲ་སྟེ། གུས་ལ་དགུང་སར་ཞིག་གི་སྐབས་རྗེ་བླ་མ་ཉིད་ཀྱི་སྐུ་སྐྱེ་སྔ་མ་ཇི་ལྟར་ཡིན་ཁྱོད་ནས་བརྟགས་པ་གྱིས་ཞེས་གནང་སྐྱེས་གྱ་ནོམ་པ་བཅས་བཀའ་བསྩལ་པ་ཕྲན་ལྟ་བུའི་བརྟགས་པ་ལ་ཡིད་རྟོན་མེད་པ་རང་བློ་རང་ལ་ལྐོག་ཏུ་མ་གྱུར་ཀྱང་བླ་མས་བཀའ་བསྩལ་པ་རྗེས་སུ་སྒྲུབ་པ་ལས་རྒྱུ་མཚན་གཞན་གང་ཡང་ཞུ་མ་ནུས་ཏེ་རྨི་ལམ་བརྟག་ཁུལ་བྱས་པའི་ནུབ་གཅིག་རྫོང་སར་དབང་ཁང་གི་མཁྱེན་བརྩེ་གོང་མའི་བཞུགས་ཁྲི་གཅིག་གི་སྟེང་རྗེ་བཙུན་རིན་པོ་ཆེ་གྲགས་པ་རྒྱལ་མཚན། ས་སྐྱ་པཎ་ཆེན། ཆོས་རྒྱལ་འཕགས་པ་བཅས་ལྷན་དུ་སྤུངས་ཏེ་བཞུགས་པ་རྨིས་ཏེ་ཞུས་པས། ད་དུང་བརྟགས་དགོས་གསུངས། གནུབས་ནམ་མཁའི་སྙིང་པོ་ཡིན་ཞེས་པའི་སྒྲ་ཞིག་ཐོས་ཚུལ་ཞུས་པས། མཁྱེན་ཀོང་མཆོག་གསུམ་གྱི་གཏེར་ཆོས་སུ་ནམ་སྙིང་སྤྲུལ་པ་གཏེར་སྲས་ཚེ་དབང་གྲགས་པ་དང་ཚ་བ་རིན་ཆེན་རྣམ་རྒྱལ་གཉིས་ཡིན་དར་བས་གཏེར་སྲས་ཡིན་མི་འོང་ངམ་གསུངས་པ་དེའི་ཐུགས་ཀྱི་རྣམ་འཕྲུལ་དུ་ཞལ་གྱིས་བཞེས་སམ་སྙམ། དེའང་གཏེར་སྲས་འདིའི་མཛད་པ་འཕྲོ་ཅན་དུ་གྱུར་པ་རྣམས་རྗེ་བླ་མ་ཉིད་ཀྱིས་སྐྱོང་བར་མཛད་པ་དང༌། མཆོག་གླིང་གཏེར་ཆོས་སྐོར་ཉམས་བཞེས་དང་འཆད་སྤེལ་རྒྱ་ཆེར་གནང་ཞིང༌། བཀའ་རྒྱ་ཅན་རྣམས་ཀྱི་འཆད་ཐབས་སོགས་གསལ་བྱེད་ཡིག་ཆ་ཡང་མང་དུ་མཛད། གདན་ས་གོང་འོག་ཏུ་བསྟན་རྒྱུན་ལ་སྨིན་ངེས་པའི་བཤད་སྒྲུབ་ཀྱི་སྡེ་གསར་འཛུགས་དང༌། མཆོག་སྤྲུལ་ཁག་ངོས་འཛིན་གྱིས་སྨིན་གྲོལ་རྒྱ་ཆེར་བསྩལ་ནས་ཆོས་ཀྱི་ཁྲི་ལ་དབུགས་དབྱུང་སོགས་ཕྱོགས་འདིའི་བསྟན་པ་དེར་འཛིན་བཅས་དངོས་དང་བརྒྱུད་ནས་རྗེ་འདིའི་ཐུགས་རྗེའི་གྲིབ་བསིལ་ལ་ངལ་འཚོ་ཐོབ་པ་ཁོ་ནའོ། །བློ་གསལ་ཡོན་ཏན་གྱི་སྤྲུལ་པ་ནི། ཞྭ་ལུ་ཀུན་མཁྱེན་མཆོག་གི་སྤྲུལ་པའི་སྐུ་བློ་གསལ་བསྟན་སྐྱོང་རིན་པོ་ཆེར་དད་གདུང་རྒྱུན་ཆགས་སུ་མཆིས་ཤིང་སྐུའི་བྱད་དབྱིབས་སོགས་སྐབས་རེར་ངེས་པར་དྲན་སྙམ་བྱེད་ཅེས་དངོས་སུ་ཐོས་པས་དེ་ཉིད་ཀྱི་ཡོན་ཏན་གྱི་སྤྲུལ་པ་ཡིན་ཏེ། གསང་ཆེན་རྒྱུད་སྡེའི་ཟབ་དོན་དག་འཆད་པ་ལ་ཤིན་ཏུ་ངོ་མཚར་བའི་ཁྱད་ཆོས་དང་ལྡན་ཅིང༌། ཁྱད་པར་དཔལ་དུས་ཀྱི་འཁོར་ལོའི་བཀའ་བབས་ཤིང་སྨིན་གྲོལ་རྒྱུད་བཤད་དང་བཅས་པའི་ཆོས་འཁོར་རྒྱ་ཆེར་བསྐོར་བར་མཛད་པ་དང༌། ཕྱི་མའི་དུ་སུ་ཤམྦྷ་ལར་རིགས་ལྡན་ཉེར་ལྔ་པའི་སྐུར་བཞེངས་པའང་ཞལ་གྱིས་བཞེས་པར་མཛད། རྣམ་པ་གཅིག་ཏུ་ན་ཚར་ཆེན་ཆོས་ཀྱི་རྒྱལ་པོའི་རིང་ལུགས་ལ་ཐུགས་ཤིན་ཏུ་དགྱེས་ཤིང་རྗེ་འདིས་ཡེ་ཤེས་ཀྱི་སྐུས་རྗེས་སུ་བཟུང་བར་གསུངས་པ་དང༌། གསང་ཆེན་སློབ་བཤད་ཀྱི་གདམས་ཟབ་རྣམས་ཉམས་བཞེས་དང་འཆད་སྤེལ་རྒྱ་ཆེར་གནང་ཞིང་དེ་དག་ཉམས་སུ་ལེན་པའི་སྒྲུབ་པའི་སྡེ་འཛུགས་པ་སོགས་སྙན་བརྒྱུད་ཀྱི་བསྟན་པ་རྒྱ་ཆེར་གསལ་བར་མཛད་པས་ན་ཚར་པ་ཆོས་རྗེ་བློ་གསལ་རྒྱ་མཚོའི་ཡོན་ཏན་རྫོགས་པའི་རྣམ་ཐར་བདག་གིར་མཛད་པའང་ཀུན་གྱི་སྤྱོད་ཡུལ་དུ་གྱུར་པ་དང༌། འཇམ་དཔལ་དབྱངས་མཁྱེན་བརྩེའི་ཞབས་ཀྱི་ཕྲིན་ལས་རྒྱ་མཚོ་མཐའ་ཡས་པའི་རྣམ་ཐར་འཕྲུལ་པ་ཆེན་པོར་གྱུར་པ་ནི་མངོན་སུམ་ཚད་མ་སྟེ། ཕྱོགས་དང་རིས་སུ་མ་ཆད་པའི་བསྟན་པ་མཐའ་དག་འཛིན་སྤེལ་གནང་ཞིང༌། མཐའ་དང་མུ་མེད་པའི་འགྲོ་བའི་དོན་བསམ་གྱིས་མི་ཁྱབ་པ་རྒྱ་ཆེར་སྐྱོང་བ་སོགས་རྗེ་དེ་ཉིད་ཀྱི་རྣམ་ཐར་རྣམས་ཇི་བཞིན་མངོན་དུ་མཛད་པའི་ཚུལ་འཆད་འགྱུར་ལྟར་ཞལ་གྱིས་བཞེས་པ་ཡིན་ནོ། །དེ་ལ་རྗེ་བླ་མ་མཁྱེན་བརྩེའི་དབང་པོ་ནི། ཕྱོགས་དང་རིས་སུ་མ་ཆད་པའི་བསྟན་པ་ཡོངས་སུ་རྫོགས་པའི་ཤིང་རྟ་ཆེན་པོ་འགྲན་ཟླ་ཐམས་ཅད་དང་བྲལ་བའི་རྣམ་ཐར་ཅན་དུ་ཀུན་མཁྱེན་བློ་གྲོས་མཐའ་ཡས་དང་ཕན་ཚུན་ཉམས་རྟོག་ཀྱི་གསུང་གླེང་རྟག་པར་གནང་བ་དང་མཐུན་པའི་བསྔགས་བརྗོད་དང༌། མི་ཕམ་འཇམ་དཔལ་དབྱངས་ཀྱིས་བསྟོད་བསྔགས། ཐུགས་ཀྱི་སྲས་རྡོ་གྲུབ་ཀུན་མཁྱེན་བསྟན་པའི་ཉི་མའི་གསུང་སོགས་ལས་གསལ་བར་ལྟར། གངས་ཅན་གྱི་ལྗོངས་འདིར་ཆོས་རྒྱལ་མེས་དབོན་གསུམ་གྱི་ཐུགས་བསྐྱེད་དང༌། སྤྲུལ་པའི་ལོ་པཎ་རྣམས་ཀྱི་བཀའ་དྲིན་ལས་བསྟན་པ་རིན་པོ་ཆེ་མདོ་སྔགས་རིག་གནས་བཅས་འཆད་ཉན་སྒོམ་སྒྲུབ་ཀྱིས་དར་རྒྱས་དང༌། བརྒྱུད་འཛིན་མཁས་གྲུབ་བསམ་གྱིས་མི་ཁྱབ་པ་ཞིག་བྱོན་ནའང་དུས་དབང་གིས་བཤད་སྒྲུབ་ཀྱི་རྒྱུན་ཕལ་ཆེར་དབྱིངས་སུ་ཐིམ་ལ་ཉེ་ཤིང༌། དཔྱོད་ལྡན་ཤིན་ཏུ་མཁས་པར་རློམས་པ་དག་གིས་ཀྱང་རྒྱལ་བསྟན་ཡོངས་རྫོགས་ཀྱི་སྙིང་པོ་གང་ཡིན་ངོས་འཛིན་ཙམ་ཡང་དཀོན་པར་གྱུར་པ་ན། རྗེ་འདིའི་སྔོན་གྱི་ཐུགས་བསྐྱེད་དུས་སུ་སྨིན་པས་རྒྱལ་བསྟན་རིན་པོ་ཆེ་ཁོ་ན་ཐུགས་ལ་བཅངས་ཏེ་སྙིང་སྟོབས་དང་བརྩོན་འགྲུས་ཆེན་པོས་དབུས་གཙང་བོད་ཆེན་ཀུན་ཏུ་ལན་མང་དུ་བྱ་བྲལ་ཀུན་སྤང་གི་ཚུལ་གྱིས་ཕེབས་ཤིང༌། མཛད་པའི་གཙོ་བོ་སྔ་ཕྱི་མི་ལོ་བཅུ་གསུམ་རིང་གསར་རྙིང་རིས་སུ་མ་ཆད་པའི་བཤེས་གཉེན་བརྒྱ་དང་ལྔ་བཅུ་ལྷག་མཉེས་པ་གསུམ་གྱིས་བསྟེན་ནས། ལྗོངས་འདིར་དེང་སང་འཆད་ཉན་གྱི་རྒྱུན་མཆིས་སོ་འཚལ་གྱི་མདོ་སྔགས་རིག་གནས་དང་བཅས་པ་དང༌། གསར་རྙིང་གི་སྨིན་གྲོལ་རྒྱབ་བརྟེན་བཅས་ཡོངས་སུ་གྲགས་པ་རྣམས་དང༌། རྒྱུན་ཤིན་ཏུ་དཀོན་པའི་རིགས་བཅས་འབད་པ་ཆེན་པོས་གསན་ནས་གདམས་པའི་ཡིག་ཆ་མཐའ་དག་ཀྱང་ཆེད་དུ་བསྐྲུན་པར་མཛད། བར་སྐབས་ཅི་རིགས་པ་དང་སྐུ་ཚེའི་སྨད་དུ་ཐེམ་པ་སྤངས་ཏེ་ལྷག་པའི་ལྷ་རབ་འབྱམས་ཀྱི་བསྙེན་སྒྲུབ་དང༌། རྫོགས་རིམ་ཟབ་མོ་རྣམས་ལ་ཉམས་བཞེས་ཡུན་རིང་གནང་བས་སོ་སོའི་གཞུང་ནས་བཤད་ཚོད་ཀྱི་ལམ་རྟགས་རྣམ་ཀྱང་ཞར་བྱུང་དུ་མཐར་ཕྱིན་ཅིང་རྣམ་ཀུན་མཆོག་ལྡན་གྱི་སྟོང་ཉིད་དང་མཆོག་ཏུ་མི་འགྱུར་བའི་བདེ་ཆེན་ཟུང་དུ་འཇུག་པ་མཐར་ཐུག་པའི་ཡེ་ཤེས་མངོན་དུ་མཛད་ནས་ནམ་མཁའ་ལྟ་བུའི་རྣལ་འབྱོར་དུ་ཞལ་གྱིས་བཞེས། རྩ་རླུང་ཐིག་ལེའི་འདུ་བ་དབུ་མའི་དབྱིངས་སུ་དག་སྟེ་རྡོ་རྗེ་ནང་གི་ས་ལམ་གྱི་མངོན་རྟགས་ཚད་ལ་ཕེབས། སངས་རྒྱས་བྱང་སེམས་དང་འཕགས་བོད་ཀྱི་མཁས་གྲུབ་བསྟན་པའི་ཤིང་རྟར་གྱུར་པ་རྣམས་ཀྱིས་ཡང་ཡང་རྗེས་སུ་བཟུང་ཞིང་སོ་སོའི་གདམས་པའི་གསང་མཛོད་བསྩལ་བ་ལ་བརྟེན་གསར་རྙིང་རིས་མེད་པའི་ཟབ་ཆོས་ཡོངས་སུ་རྫོགས་པ་མཐའ་དག་གི་བྱིན་རླབས་ཉེ་བརྒྱུད་ཁྱད་པར་ཅན་བརྙེས། ཟབ་མོའི་གཏེར་དང་ཡང་གཏེར་སྐོར་རྒྱ་ཆེར་ཕྱག་ཏུ་བབས། ཐུགས་བཅུད་ཀློང་ཆེན་དགོངས་པའི་གཏེར་མཛོད་རྡོལ་ཞིང་རྩ་གསུམ་རབ་འབྱམས་ཀྱི་དགྱེས་ཞལ་རྟག་པར་གཟིགས་ཤིང་དག་སྣང་དང་སྙན་བརྒྱུད་ཀྱི་ཆོས་སྒོ་མཐའ་ཡས་པ་ལ་དབང་བསྒྱུར། གསང་བའི་གནས་རྗེས་སུ་དྲན་པ་ལས་མན་ངག་གི་ངེས་པ་རྒྱ་ཆེར་བྱུང་བས་མཚོན་ཆོས་ཀྱི་རྒྱུན་གྱི་ཏིང་ངེ་འཛིན་ལ་དབང་འབྱོར་ཞིང་རྒྱལ་བསྟན་ཡོངས་རྫོགས་ཀྱི་ཤིང་རྟ་མཚན་དོན་མཐུན་པར་བཞུགས་པ་དང༌། སྤྱིར་གསང་བ་གསུམ་གྱི་རྣམ་ཐར་ཆ་ཤས་རེས་ཀྱང་བསྟན་དང་འགྲོ་བའི་ཕན་བདེ་རྒྱ་ཆེར་སྤེལ་བའི་ཕྲིན་ལས་མཐའ་དག་སོ་སྐྱེའི་བློ་ཡུལ་ལས་འདས་ཤིང༌། བྱེ་བྲག་ཏུ་གསར་རྙིང་རིས་མེད་ཀྱི་བསྟན་འཛིན་ཆེ་ཕྲ་ནས་ཕལ་པ་ཉམས་ཆུང་ཡན་ཆད་ཀྱི་དོན་གཉེར་ཀུན་ལ་སོ་སོའི་བློ་གྲོས་དང་སྐལ་པར་འཚམས་པའི་ཆོས་སྦྱིན་རྣམ་ཀུན་བར་མེད་དུ་སྤེལ་བའི་ཕྲིན་ལས་རྒྱ་ཆེར་བསྐྱངས་པས་རྒྱལ་བསྟན་ཡོངས་ཀྱི་སྲོག་མཐུད་པར་མཛད། ཁྱད་པར་དུ་ཡེ་ཤེས་དག་པའི་གཟིགས་པ་འཁྲུལ་པ་དང་བྲལ་བས་ལོ་ཆེན་བཻ་རོ་དངོས་བྱོན་འཇམ་མགོན་བློ་གྲོས་མཐའ་ཡས་ཞབས་ལ་མཛོད་ཆེན་རྣམ་ལྔའི་བཀའ་བབ་ཏུ་མངའ་གསོལ་ཞིང༌། ཀུན་མཁྱེན་རྫོགས་པའི་སངས་རྒྱས་ཀྱི་བཀའ་ལུང་ཚད་མ་དང༌། རྒྱལ་དབང་པདྨཱ་ཀ་རའི་གཏེར་ལུང་ཁག་དཔང་པོར་བཅོལ་ནས་འཆད་པ་དང་རྩོམ་པའི་ཕྲིན་ལས་མཐའ་ཡས་པས་རིས་མེད་པའི་རྒྱལ་བསྟན་གསལ་བའི་ཕྲིན་ལས་ཅན་དུ་བསྔགས་པར་མཛད་དེ། སྔར་ནས་རྗེ་ཉིད་ཀྱིས་གཏེར་རྙིང་རྒྱུན་དཀོན་པའི་རིགས་ཕྱོགས་བསྒྲིགས་མཛད་བཞེད་ཀྱི་དཀར་ཆག་དང༌། བསྒྲིགས་ཟིན་པོད་ཁ་ཤས་བཅས་པ་དབང་ལུང་གི་རྒྱུན་ཤིན་ཏུ་དཀོན་པའི་རིགས་སོགས་རྒྱ་ཆེར་བསྩལ་བར་མཛད། གཞན་ཡང་རྗེ་མཁྱེན་བརྩེས་གསར་རྙིང་གི་གདམས་ཁྲིད་གསན་པ་རྣམས་ཀྱི་སྙིང་པོ་གཅེས་བཏུས་ཟབ་ཁྲིད་རབ་འབྱམས་ཞེས་པུ་སྟི་ཉི་ཤུ་སྐོར་ཕྱོགས་བསྒྲིགས་གནང་བ་རྣམས་ཀྱི་སྨིན་གྲོལ་འཇམ་མགོན་གུ་ཎས་སྔར་མ་གསན་པའི་རིགས་དང༌། གསན་པ་རྣམས་ཀྱང་བྱིན་རླབས་ཉེ་བརྒྱུད་ཀྱི་ཁྱད་པར་གྱིས་ཡང་བསྐྱར་གསན་པར་མཛད་ཅིང༌། ཚུལ་འདི་རྣམས་ལས་གཙོ་བོར་འཕྲོས་ཏེ་འཇམ་མགོན་བློ་གྲོས་མཐའ་ཡས་དང༌། གཏེར་ཆེན་མཆོག་གླིང་བཅས་ནས་ཞུ་བསྐུལ་ནན་ཏན་དང་རྣམ་གསུམ་ཞལ་རྒྱས་ཐུགས་ཡིད་གཅིག་འདྲེས་སོགས་ཀྱི་རྟེན་འབྲེལ་ལས་སྔོན་ཆད་ཡོངས་སུ་མ་གྲགས་པའི་བཀའ་བབས་ཆེན་པོ་བདུན་གྱི་གསང་མཛོད་རྣམས་ཀྱང་རྒྱ་ཆེར་སྣང་བར་མཛད་པ་སོགས་ཀྱིས་སྔ་འགྱུར་བརྒྱུད་པ་དྲུག་ལྡན་ཟབ་གཏེར་རྒྱ་མཚོའི་ཡང་ཞུན་བཅུད་དུ་དྲིལ་བ་རིན་ཆེན་གཏེར་མཛོད་དང༌། གངས་ལྗོངས་རྒྱལ་བསྟན་ཡོངས་ཀྱི་སྙིང་བཅུད་སྒྲུབ་པ་ཉམས་ལེན་གྱི་རྒྱུན་དང་ལྡན་པ་མཐའ་དག་གི་ཡང་སྙིང་གཅེས་བཏུས་སོགས་གཅིག་ཏུ་བཞུགས་ཤིང་ངོ་མཚར་བྱིན་རླབས་ཀྱི་ཚན་ཁས་ཁྱད་པར་དུ་བྱས་པ་གདམས་ངག་རིན་པོ་ཆེའི་མཛོད་ཀྱི་ཤིང་རྟའི་ལམ་སྲོལ་གསལ་བར་ཕྱེས་ཤིང༌། དེ་དག་ལ་གསལ་བྱེད་རིགས་གང་དགོས་འཇམ་མགོན་བློ་གྲོས་མཐའ་ཡས་ཞབས་ཀྱིས་ལེགས་བཤད་ཁྱད་འཕགས་རྣམས་གསར་བསྐྲུན་དང་འཆད་སྤེལ་ཕྲིན་ལས་ཀྱི་རྒྱུན་རྒྱ་ཆེར་བསྐྱངས་པས་བསྟན་པའི་སྲོག་མཐུད་པར་མཛད་པ་དང༌། མཛོད་གཞན་གསུམ་ཡང་རྗེ་མཁྱེན་བརྩེས་དངོས་བརྒྱུད་ནས་ཞུ་བསྐུལ་སོགས་ཀྱི་བདག་རྐྱེན་ལས་གཙོ་བོར་གྱུར་ཅིང༌། ཆོས་མཛོད་ཆེན་པོ་དེ་དག་འགྲོ་དོན་གྱི་སྒོ་ཐོག་མར་འབྱེད་པའི་ཆོས་གཞི་འདིང་བ་སོགས་དང༌། རྗེས་གཏང་རག་གི་མཎྜལ་རྒྱ་ཆེ་དང་འབྲེལ་ཆོས་དང་གང་ཟག་ཚད་མར་གྱུར་ཅིང་དགོས་གནད་ཆེ་བའི་རྒྱུ་མཚན་བསྔགས་བརྗོད་བཅས་འགྲོ་དོན་འཕེལ་རྒྱས་ཡུན་གནས་ཀྱི་ཐུགས་བསྐྱེད་དང་རྟེན་འབྲེལ་ཁྱད་པར་ཅན་མཛད། གཞན་ཡང་རྡོ་རྗེའི་ལུང་གི་དགོངས་དོན་བསྟན་འགྲོའི་མཛད་པ་གལ་ཆེ་བའི་རིགས་རྣམས་ཇི་བཞིན་མངོན་དུ་འགྱུར་བའི་མཐུན་སྦྱོར་གང་དགོས་དངོས་བརྒྱུད་ནས་ཡང་ཡང་གནང་ཞིང་ཕན་ཚུན་བཀའ་ཆོས་རྒྱ་ཆེར་གསན་བཞེས་མཛད་པ་སོགས་ཐུན་མིན་སྟོན་འཁོར་དགོངས་ཀློང་གཅིག་འདྲེས་ཀྱི་ཐུགས་བསྐྱེད་དང་མཛད་ཕྲིན་ལྷན་ཅིག་གི་བདག་ཉིད་ཅན་དུ་གྱུར་བ་དང༌། འཇམ་མགོན་བློ་གྲོས་མཐའ་ཡས་ཞབས་ཀྱིས་ཀྱང་གངས་ཅན་གྱི་ལྗོངས་ན་འགྲན་ཟླ་གཉིས་པ་མ་མཆིས་པའི་མཁས་དང་གྲུབ་པ་ཆེན་པོ་ཕྱོགས་དང་རིས་སུ་མ་ཆད་པའི་རྒྱལ་བསྟན་ཡོངས་སུ་རྫོགས་པའི་ཤིང་རྟ་པ་ཞེས་དང༌། ལུས་རྟེན་འདིར་ཆོས་སྤོང་གི་ལས་མ་བསགས་ཙམ་དུ་གྱུར་པ་རྗེ་བླ་མ་འདི་ཁོ་ནའི་བཀའ་དྲིན་ཡིན་ཞེས་སོགས་ཡོན་ཏན་དང་བཀའ་དྲིན་རྗེས་དྲན་གྱི་བསྟོད་བསྔགས་ཡང་ཡང་འབུལ་བ་དང་བཅས་ཐུན་མོང་མ་ཡིན་པའི་རིགས་བདག་ཏུ་འཛིན་པར་མཛད། ཨོ་རྒྱན་མཆོག་གྱུར་གླིང་པར་རྗེ་ཉིད་ནས་ཕུར་པ་དང་ཡང་དག་ཧེ་རུ་ཀའི་སྨིན་བྱེད་ཀྱིས་བར་ཆད་བསལ་ཞིང་རྟོགས་པ་སྤར་བས་རྩོད་བྲལ་དུས་བབས་འགྲན་ཟླ་དང་བྲལ་བའི་གཏེར་ཆེན་དུ་མངའ་གསོལ་ཞིང་ཐུགས་རྒྱུད་དགོངས་པའི་བྱིན་གྱིས་བརླབས་པས་མགྲིན་པའི་རྩ་མདུད་གྲོལ་ཞིང༌། མཁྱེན་གཉིས་ཡེ་ཤེས་ཀྱི་རྩལ་ཆེན་རྫོགས། རྗེ་མངའ་བདག་ཡབ་སྲས་ཀྱི་ལས་འཕྲོ་སད་ནས་རྟེན་འབྲེལ་ཉམས་པ་རྣམས་སོར་ཆུད་ཅིང་སྔོན་བྱོན་གཏེར་འབྱིན་ཀུན་ལས་ཁྱད་པར་དུ་གྱུར་པའི་ཟབ་རྒྱས་ཀྱི་གསང་མཛོད་ངོ་མཚར་ཅན་རྒྱ་ཆེར་སྣང་བ་དང༌། གནས་གཏེར་བརྒྱ་རྩའི་ཞལ་རས་དངོས་བརྒྱུད་ནས་གསལ་བར་མཛད་ཅིང་འགྲོ་དོན་ཕྱོགས་མེད་དུ་འཕེལ། གཏེར་ཆོས་ཕལ་ཆེར་དང་ཁྱད་པར་བླ་སྒྲུབ་སྐོར་བཞི། རྫོགས་ཆེན་སྡེ་གསུམ་གཙོར་གྱུར་སྙིང་ཐིག་བདུན་གྱི་སྐོར་རྣམས་རྗེ་ཉིད་དང་ཐུན་མོང་གི་ཟབ་གཏེར་ཡིན་པར་གསུངས་ཤིང༌། གཞན་གཏེར་ཁ་མང་པོ་ཞིག་ཀྱང་རྣམ་གཉིས་ལྷན་རྒྱས་ཀྱིས་བཞེས་པ་དང་གཏན་ལ་ཕབ་པ་སོགས་མཛད། སྡེ་གསུམ་ཆ་ལག་རིགས་གསུམ་སྙིང་ཐིག་ཏུ་རྗེ་མཁྱེན་བརྩེའི་དགོངས་གཏེར་འཇམ་དཔལ་སྙིང་ཐིག་སྒྲོན་མ་བདུན་པའི་བྱིན་རླབས་ཀྱི་རྒྱུན་ཡང་འདྲེས་པར་གྲགས། གཏེར་ཆེན་འདིས་རྗེ་མཁྱེན་བརྩེ་བི་མ་ལ་དང༌། དཔལ་ཆེན་པོ། འཕགས་མ་ཡིད་བཞིན་འཁོར་ལོ་སོགས་དབང་གང་གསན་པ་དེའི་དཀྱིལ་འཁོར་གྱི་གཙོ་བོར་དངོས་སུ་མཇལ་ཚུལ་མང་ཞིང༌། གསུང་ལས་ཀྱང་མཐར་ཐུག་ངེས་པ་དོན་གྱི་རྩ་བའི་བླ་མ་པདྨ་འོད་གསལ་མདོ་སྔགས་གླིང་པ་ཞེས་ཐུན་མིན་བློ་གཏད་གཅིག་ཆོག་གི་རིགས་བདག་ཏུ་འཛིན་པར་མཛད་དོ། །གཞན་ཡང་གཏེར་སྟོན་རྒྱལ་པོ་ལྔ་ལ་བྲན་བརྒྱས་བསྐོར། །ཞེས་པ་ལྟར་གུ་རུའི་རྒྱལ་ཚབ་གཏེར་འབྱིན་གྱི་རྒྱལ་པོ་ལྔ་པར་རྡོ་རྗེའི་ལུང་གིས་མངའ་གསོལ་བར་གྱུར་པས་དུས་སྐབས་འདིའི་གཏེར་ཆེན་ལས་རབ་གླིང་པ། དྲེ་མེད་པདྨ་གླིང་པ། ཁམས སྤྲུལ་བསྟན་པའི་ཉི་མ། བོན་གཏེར་གསང་བ་ཀུན་གྲོལ་རྩལ་སོགས་སྔ་ཕྱིར་བྱོན་པའི་གཏེར་སྟོན་ཆེ་ཕྲ་ཐམས་ཅད་ཀྱང་རྗེ་འདིའི་གཏེར་སློབ་ཏུ་གྱུར་པས་དངོས་དང་བརྒྱུད་ནས་ཞབས་པད་དུ་བསྙེན་ཅིང་སོ་སོར་བར་ཆད་བསལ་བ་དང༌། ལུང་དོན་བསྟན་འགྲོའི་བདེ་ཐབས་སྒྲུབ་ཚུལ་གྱི་བསླབ་བྱ་སོགས་ཇི་ལྟར་འོས་པའི་མཐུན་སྦྱོར་ཀྱང་གསུངས་པར་མཛད་པ་དང༌། གཏེར་ཆོས་ཀུན་གྱི་ཐེ་ཚོམ་སེལ་བའི་དཔང་པོའང་རྗེ་འདི་ཁོ་ནར་བཅོལ་བ་སྟེ། འཇམ་མགོན་བློ་གྲོས་མཐའ་ཡས་ཞབས་ཀྱི་རྩ་གསུམ་དགོངས་འདུས་རྣམ་གཉིས་ཞལ་རྒྱས་ཀྱིས་འབེབས་རྒྱུའི་རྟེན་འབྲེལ་འཕྲོ་ཅན་དུ་གྱུར་པ་ཕྱིས་སུ་འཇམ་མགོན་རིན་པོ་ཆེར་བརྡ་བསྒྱུར་གསལ་ནའང་རྗེ་འདི་ཉིད་བཞུགས་མིན་གྱིས་ཐེ་ཚོམ་གྱི་གནས་སུ་གཟིགས་ནས་བཏང་སྙོམས་མཛད་པ་བཞིན་ནོ། །མ་ཧཱ་པཎྜི་ཏ་མི་ཕམ་འཇམ་དབྱངས་རྣམ་པར་རྒྱལ་བ་ལ་ཟབ་རྒྱས་ཀྱི་གདམས་པ་རྒྱ་མཚོ་ལྟ་བུས་རྗེས་སུ་བཟུང་ཞིང་མཁྱེན་རབ་ཡེ་ཤེས་ཀྱི་སྒོ་ཕྱེ་སྟེ་སྐུ་གསུང་ཐུགས་ཀྱི་རྟེན་དང་རྗེ་ཉིད་ཀྱི་དབུ་ཞྭ་པཎ་ཞུ་སོགས་བསྩལ་ནས་དོན་གྱི་རྒྱུ་མཚན་ཆེན་པོ་བཞི་དང་འབྲེལ་བའི་མཚན་མི་ཕམ་འཇམ་དབྱངས་རྣམ་རྒྱལ་རྒྱ་མཚོ་ཞེས་གནང་སྟེ། མཁས་ཚུལ་གསུམ་གྱིས་རྒྱལ་བསྟན་སྤེལ་བའི་ཕྲིན་ལས་ཅན་དུ་མངའ་གསོལ། མདོ་སྔགས་ཀྱི་ལེགས་པར་བཤད་པ་རབ་འབྱམས་མཛད་འོས་པར་བཀའ་གནང་བ་ལྟར་ཐུགས་བསྐྱེད་དང་རྟེན་འབྲེལ་གྱི་བདེན་དོན་ཇི་བཞིན་མངོན་དུ་གྱུར་ཏེ་མཁས་པའི་གྲགས་སྙན་ཕྱོགས་ཀུན་ཏུ་ཁྱབ། གཞུང་ལུགས་རབ་འབྱམས་དང་ཁྱད་པར་ནང་རྒྱུད་ཡོ་ག་གསུམ་གྱི་བཤད་སྒྲུབ་ཆེས་ཆེར་གསལ་བའི་མཛད་རྗེས་དང་ལྡན་ཅིང་སྔ་འགྱུར་བསྟན་པའི་ཤིང་རྟ་ཆེན་པོ་འགྲན་ཟླ་དང་བྲལ་བར་གྱུར། རྗེ་མཁྱེན་བརྩེའི་དབང་པོ་དང་གཏེར་ཆེན་མཆོག་གླིང་ལྷན་རྒྱས་ཀྱིས་དཔལ་ཡུལ་རྒྱ་སྤྲུལ་མདོ་སྔགས་བསྟན་འཛིན་ལ་བཀས་བསྐུལ་ཞིང་ཁྱད་པར་རྗེ་ཉིད་ནས་དབང་ལུང་རྫོགས་པར་བསྩལ་ཞིང་བཀའ་སྲུང་ལེགས་ལྡན་གྱི་དབང་གི་མཐའ་བརྟེན་བཀའ་བསྒོའི་སྐབས་ཆོས་སྐྱོང་དངོས་སུ་ཕེབས་པ་ལྟ་བུའི་སྐུའི་འཇིགས་ཟིལ་ཡང་བྱུང་ཞིང་ཕྲིན་བཅོལ་ནན་ཏན་དུ་མཛད། ལག་ལེན་གྱི་སློབ་དཔོན་དང་སྒྲུབ་ཆས་རིགས་སོགས་མཐུན་རྐྱེན་བསླབ་སྟོན་ཞིབ་པར་གནང་བ་བཞིན་ཆོས་སྡེ་ཆེན་པོ་དཔལ་ཡུལ་རྣམ་རྒྱལ་བྱང་ཆུབ་གླིང་དུ་བཀའ་མའི་དཀྱིལ་འཁོར་ཆེན་པོ་ཉེར་བདུན་གྱི་སྒྲུབ་མཆོད་ལོ་བསྟར་དུ་ཚུགས་པ་དང༌། དེ་རྗེས་རིམ་པར་གདན་ས་དེར་གཞུང་རྙིང་ཆོག་ཁྲིགས་བཅས་དཔེ་ལུང་གི་རྒྱུན་ཡོད་རིགས་ཞིབ་སྡུད་སྤར་དུ་བཀོད་ཐུབ་པ་བྱུང་ཞིང༌། དེ་བཞིན་ཀཿཐོག་ཞེ་རྫོགས་རྣམས་སུའང་སྔར་རྒྱུན་ཆོག་ཁག་ཅི་རིགས་ཡོད་པ་རྣམས་གོང་འཕེལ་རིམ་རྒྱས་ཀྱི་གཞིར་གྱུར་ཅིང༌། གཏེར་ཆེན་མཆོག་གླིང་གི་གདན་ས་གོང་འོག་ཏུའང་བཀའ་མའི་སྒྲུབ་མཆོད་འཛུགས་པའི་རྟེན་འབྲེལ་གྱི་སྒོ་ཕྱེ་བ་སོགས་ཀྱིས་རིང་བརྒྱུད་བཀའ་མའི་སྐོར་རྣམས་འཆད་སྤེལ་གྱི་རྒྱུན་རྒྱ་ཆེར་འཕེལ་བ་དག་ཀྱང་རྗེ་འདི་ཁོ་ནའི་ཕྲིན་ལས་ཀྱི་ཆ་ཤས་རྨད་དུ་བྱུང་བའོ། །གསང་བདག་རྡོ་རྗེ་འཛིན་དངོས་འཇམ་དབྱངས་བློ་གཏེར་དབང་པོ་མཆོག་ནས་རྒྱུད་སྡེའི་བཀའ་བསྡུ་མཛད་བཞེད་རྗེ་འདིར་སྐྱབས་འཇུག་ཞུ་རྒྱུ་ལས་གཞན་འགྲུབ་ཐབས་དཀའ་བར་དགོངས་ནས་ཆེད་དུ་ཞབས་པད་བསྙེན་པ་ན་ཐུགས་དགྱེས་ཚུལ་སྟོན་ཅིང་སྔར་ནས་དེ་བཞིན་བྱུང་ན་སྙམ་པ་ཡོད་ཀྱང་བགྱི་འོས་མང་བས་ལྷག །ད་རེས་ཁྱེད་ནས་བསྒྲིགས་རྒྱུ་བྱུང་ན་དགོས་གལ་ཤིན་ཏུ་ཆེ་བས་མཐུན་སྦྱོར་རིགས་གང་དགོས་མཛད་ཆོག་པའི་ཞལ་བཞེས་གནང་སྟེ། ས་ངོར་ཞྭ་ལུ་གཙོར་གྱུར་བཀའ་སྲོལ་སྣ་ཚོགས་ལས་བྱུང་བའི་རྒྱུད་སྡེ་གོང་འོག་གི་དབང་བཀའ་དང་རྫོགས་རིམ་ཟབ་ཁྲིད་རིགས། རྒྱབ་བརྟེན་རྒྱུད་བཤད་སྐོར་བཅས་རྒྱ་ཆེར་བསྩལ་ཅིང༌། བསྡུ་འོས་ཀྱི་རྐང་གྲངས་དང་གོ་རིམ་ཆོག་ཁྲིགས་རྣམས་ཀྱི་ཁུངས་དང་བརྟེན་གཞི་གང་དགོས། ཆོ་གའི་ཆིངས་དང་མཚམས་སྦྱོར་གྱི་རྒྱས་བསྡུས། རྒྱུད་སྡེ་གོང་འོག་གི་བཀའ་སྲོལ་འདྲ་མིན་གྱི་ཕྱག་ལེན་ཁྱད་པར་སོགས་ཕྱག་ཁྲིད་གནང་བར་མཛད། བསྒྲིགས་ཟིན་པ་ཕལ་ཆེར་ལ་ཞིབ་འཇུག་སོགས་ཐུགས་ཁུར་ཟབ་བཞེས་རྒྱ་ཆེར་གནང༌། འཇམ་མགོན་བློ་གྲོས་མཐའ་ཡས་མདུན་ཞུ་སྦྱོར་གནང་སྟེ། མར་རྔོག་ཇོ་ནང་སོགས་ཀྱི་རྒྱུད་སྡེ་རྣམས་དགོས་པའི་དབང་གིས་གསན་པར་བསྐུལ་བ་དང༌། གཞན་ཡང་རྗེ་ཉིད་ཀྱི་ཞལ་སློབ་བྲག་ཡབ་གདོང་ཀཏྟ་ཁྲི་པ་ངག་དབང་བློ་བཟང་དམ་ཆོས་རྒྱ་མཚོར་དཀར་ཆག་རྩོམ་རྒྱུ་དང༌། མང་ཐོས་ནོར་བུ་བསྟན་འཛིན་སོགས་གཞན་ལའང་མཐུན་སྦྱོར་ཞབས་འདེགས་སྒྲུབ་དགོས་པར་བཀའ་གནང་བ་སོགས་ཀྱིས་གསང་ཆེན་རྒྱུད་སྡེ་རབ་འབྱམས་ཀྱི་བཀའ་བསྡུ་ཟབ་མོ་གྲུབ་སྟེ། ཆོས་སྒོ་ཐོག་མར་འབྱེད་པའི་ཞུ་བ་པོས་ཆོས་གཞི་འདིང་བ་སོགས་ཀྱི་ཞལ་བཞེས་མཛད། ཚུལ་འདི་ལས་འཕྲོས་ཏེ་གསུང་ངག་ལམ་འབྲས་ཚོགས་སློབ་ཀྱི་གླེགས་བམ་ཕྱོགས་བསྒྲིགས་ཀྱང་ཞར་བྱུང་རང་ཤུགས་ཀྱིས་གྲུབ་པ་དང༌། དཀྱུས་སུ་བཞུགས་མ་གྲུབ་ཀྱང་འཇམ་མགོན་མི་ཕམ་ཞབས་ཀྱི་དུས་འཁོར་འགྲེལ་ཆེན་ཡང་གཙོ་བོར་འདི་ལས་འཕྲོས་ཏེ་བྱུང་བའོ། །ཆོས་མཛོད་ཆེན་པོ་དེ་དག་རྣམས་སུ་སྙིང་པོའི་ཚུལ་དུ་གཙོ་བོར་རྗེ་ཉིད་ཀྱི་གསུང་གི་གསང་བ་ཐུན་མོང་མ་ཡིན་པའི་སྐོར་ཕལ་ཆེར་བཞུགས་ཤིང༌། ཁྱད་པར་དུ་སྒྲུབ་ཐབས་ཀུན་ལས་བཏུས་པ་ཞེས་འཕགས་པའི་ཡུལ་གྱི་མཁས་ཤིང་གྲུབ་བརྙེས་ཀྱི་སློབ་དཔོན་རྣམས་ལ་རྒྱལ་བ་རྡོ་རྗེ་འཆང་དངོས་དང༌། ལྷག་པའི་ལྷ་སོ་སོས་བསྩལ་བའི་སྒྲུབ་ཐབས་དང་མན་ངག་གི་རིམ་པ་རྒྱུད་སྡེ་བཞི་དང་འབྲེལ་བ་མཐའ་ཡས་པ་ཞིག་ལོ་ཙཱ་རྣམས་ཀྱིས་བོད་དུ་བསྒྱུར་བཤད་མཛད་ཅིང་བརྒྱུད་འཛིན་མཁས་གྲུབ་ཚད་མར་གྱུར་པ་རྣམས་ཀྱིས་འཛིན་སྤེལ་སོགས་དར་རྒྱས་ཆེར་བྱུང་བ་རྣམས་ལས། དེང་སང་རྒྱུན་བཞུགས་པ་སོ་སོའི་ཁུངས་དང་འབྲེལ་ཞིང་རྗེས་སུ་གནང་བ་སོགས་གདམས་ངག་གི་རྒྱུན་དང་ལྡན་པའི་ཟུར་བཀའི་རིགས་གཙོ་ཆེ་བ་མཐའ་དག་དང༌། སྔ་འགྱུར་བཀའ་གཏེར་ལས་བྱོན་པའི་སྒྲུབ་སྐོར་ཁྱད་འཕགས་ཅི་རིགས་པ། སྤྱི་བཀའ་བ་རི་བརྒྱ་རྩ་དང༌། སྒྲུབ་ཐབས་རྒྱ་མཚོ། སྣར་ཐང་བརྒྱ་རྩ་དང༌། གྲུབ་བརྒྱའི་བྱིན་རླབས་རིགས་གཉིས་བཅས། དེ་དག་ཀྱང་སོ་སོའི་རྩ་བའི་ཡིག་རྙིང་ཁག་དང༌། ཚད་མར་གྱུར་བའི་བླ་མ་གོང་མ་རྣམས་ཀྱི་སྒྲུབ་ཐབས་དང་མན་ངག་གི་ཡིག་ཆ་རིགས་གཞིར་བཞག་ལ་གསལ་བྱེད་གང་དགོས་རྗེ་ཉིད་ནས་ལེགས་བཤད་ཁྱད་པར་ཅན་རྒྱ་ཆེར་སྤྲོས་པས་མཛེས་པར་བརྒྱན་ཏེ། དངོས་གྲུབ་རྣམ་པ་གཉིས་སྒྲུབ་པའི་ཚུལ་མཐའ་དག་ཚང་ལ་མ་ནོར་བར་སྟོན་པ། ཡིད་ཆེས་པའི་ཁུངས་དང་འབྲེལ་ཞིང་རྒྱས་བསྡུས་གཉིས་ཀའི་ཕྱོགས་སུ་མ་ལྷུང་བ་སོགས་ངོ་མཚར་བའི་ཁྱད་ཆོས་དུ་མ་དང་ལྡན་པའི་ཆོས་ཀྱི་མཛོད་ཆེན་པོའི་བཀའ་བསྡུ་ཁྱད་པར་ཅན་གྲུབ་པར་མཛད་པ་དང༌། དེ་དག་དུ་མ་འཁོད་པའི་བསྟོད་ཚོགས། གསུང་མགུར། རིག་གནས་སྐོར། ཟིན་བྲིས་སྣ་ཚོགས་ཤིན་ཏུ་མང་བ་སོགས་གསུང་ཐོར་བུའི་སྐོར་བཅས་རྒྱ་ཆེར་བཞུགས་ཤིང༌། གཏེར་མཛོད་དཀྱུས་སུ་མི་བཞུགས་པའི་དགོངས་གཏེར་རྩ་གསུམ་འོད་གསལ་སྙིང་ཐིག་སོགས་ཟབ་གཏེར་རིགས་ཀྱང་མང་དུ་མཆིས་སོ། །དེ་ལྟར་སྨྲོས་པ་རྣམས་ནི་ས་བོན་ཙམ་སྟེ་མདོར་ན་རྗེ་འདི་ཉིད་ཀྱི་བསམ་གྱིས་མི་ཁྱབ་པའི་ཐུགས་བསྐྱེད་དང༌། ཐབས་མཁས་ཀྱི་ཕྲིན་ལས་རྣམ་པ་ཐམས་ཅད་པའི་མཐུས་རྒྱལ་བསྟན་རིན་པོ་ཆེའི་སྲོག་མཐུད་གཅིག་པུར་གྱུར་པ་ཆོས་མཛོད་ཆེན་པོ་རྣམས་ཀྱི་བཀའ་བསྡུ་མཛད་པ་ནི་དེང་སང་གི་དུས་སྐབས་འདིར་བསྟན་སྲོག་མི་ཉམས་པ་ལ་ཆེད་དུ་དགོངས་པ་སོམ་ཉི་དང་བྲལ་ཞིང༌། བསྟན་པ་མིང་མེད་ལྟ་བུར་གྱུར་པའི་སྐབས་འདིར་ཡང་ཟབ་རྒྱས་ཆོས་ཀྱི་སྙིང་པོ་རྣམས་ཅི་དགར་སྤྱོད་དུ་ཡོད་པ་རྗེ་བླ་མ་འདིའི་བཀའ་དྲིན་རྗེས་སུ་དྲན་པས་བསྟན་པ་འཛིན་པ་ཀུན་གྱིས་འཆད་ཉན་དང་སྒོམ་སྒྲུབ་ཀྱི་སྲི་ཞུ་ལ་བརྩོན་པར་བྱ་བའི་གནས་སོ། །དེ་ལྟར་ཡང་འཇམ་མགོན་བློ་གྲོས་མཐའ་ཡས་ཞབས་ཀྱིས། བོད་ཡུལ་རྒྱལ་བའི་རིང་ལུགས་ལ། །ཀུན་གྱི་ཚོགས་རྗེར་གྱུར་པ་ཡི། །ཚུལ་འདི་ཁོ་ན་འཇིག་རྟེན་འདིར། །ཐུབ་དབང་གཉིས་པའི་རྣམ་ཐར་འཛིན། །ཞེས་པ་དང༌། །ཅེས་པ་དང༌། ས་སོགས་འབྱུང་བ་མཐུ་ཆེ་ཡང༌། །ཀུན་ཁྱབ་ནམ་མཁར་མཚུངས་མིན་ལྟར། །གངས་ཅན་བསྟན་འཛིན་སུ་དང་ཡང༌། །ཐུན་མིན་རྣམ་ཐར་རྨད་ཀྱི་ཕུལ། །ཞེས་དང༌། དེ་བཞིན་དུ་མི་ཕམ་འཇམ་དཔལ་དགྱེས་པའི་རྡོ་རྗེས་ཀྱང༌། དེང་སང་གངས་རིའི་ཁྲོད་འདི་ན། །གྲུབ་པར་གྲགས་ཀྱང་མཁས་བཙུན་བྲལ། །མཁས་ཀྱང་གྲུབ་འབྲས་མཐོང་དཀའ་བས། །ཕུན་ཚོགས་ལྡན་པ་རྙེད་པར་དཀའ། །མཁས་དང་བཙུན་དང་གྲུབ་པ་གསུམ། །འགྲན་པ་བཞིན་དུ་ཁྱོད་ལ་འཕེལ། །འདི་འདྲའི་ཕུན་ཚོགས་མཐོང་དཀའ་བས། །ངོ་མཚར་ཆེ་ཡང་ཤེས་པ་དཀོན། །ཞེས་སོགས་རྒྱ་ཆེར་བསྔགས་པར་མཛད་པ་ལྟ་བུ་སྟེ། ཞིབ་པར་རྣམ་ཐར་ཆེན་མོ་དང༌། རྗེ་བློ་གྲོས་མཐའ་ཡས་ཀྱི་རྣམ་ཐར། མཆོག་གཏེར་རྣམ་ཐར་དྲིས་ལན་བཅས། མཛོད་ཆེན་ལྔ་དང༌། རྒྱུད་སྡེ་དང་སྒྲུབ་བཏུས་སོགས་ཀྱི་བརྒྱུད་ཡིག་དང་དཀར་ཆག་རྣམས་ལས་ཤེས་པར་བྱའོ། །དེ་རྣམས་ཀྱིས་སྔོན་བྱུང་ངོ་མཚར་འཁྲུངས་རབས་ཀྱི་རིམ་པ་མདོ་ཙམ་བསྟན་ཟིན་ཏོ། །དེ་ལྟར་སྨོས་པའི་མཁས་གྲུབ་དེ་དག་ཀྱང་ལ་ལ་ནི་དུས་མཉམ་དུ་བྱོན་པ་དང༌། འགའ་ཞིག་སྐུ་ཚེའི་སྟོད་སྨད་ཀྱི་སྔ་ཕྱི་ཙམ་ཡོད་པ་དང༌། ཕལ་ཆེར་གཅིག་རྗེས་སུ་གཅིག་བྱོན་པ་དང༌། འཕགས་བོད་ཀྱི་མཁས་གྲུབ་ཡོངས་སུ་གྲགས་པ་ཐམས་ཅད་ཀྱི་སྤྲུལ་པ་ཡིན་པར་ཞལ་གྱིས་བཞེས་པ་ལྟ་བུ་སོགས་ཚུར་མཐོང་བློས་དཔྱད་པར་དཀའ་བ་ཡོད་ཀྱང༌། སོ་སྐྱེའི་རྣམ་པར་ཤེས་པ་སྔ་མ་འཕོས་ནས་ལས་རླུང་གིས་ཕྱི་མའི་མངལ་དུ་ཆུད་པ་ལྟ་བུ་ལས་ཀྱི་དབང་གིས་ཁམས་གསུམ་དུ་སྐྱེ་བ་བརྒྱུད་པ་མ་ཡིན་པ། འཕགས་པའི་ས་ལ་བཞུགས་པ་རྣམས་སྨོན་ལམ་དང་སྙིང་རྗེའི་དབང་གིས་གཅིག་དང་དུ་མའི་སྤྱོད་ཡུལ་ལས་འདས་པའི་ཡེ་ཤེས་སྒྱུ་མའི་རོལ་པ་གང་ལ་གང་འདུལ་ཅིར་ཡང་སྟོན་པ་ནི། ནམ་མཁའི་ཉི་མ་ཉིད་ས་གཞིར་ཆུའི་སྣོད་ཇི་སྙེད་པ་དེ་སྙེད་དུ་དེ་དང་འཚམས་པའི་གཟུགས་སུ་ཤར་བ་ལྟ་བུ་སྟེ། རྒྱུད་བླ་མ་ལས། ཇི་ལྟར་ཚངས་པ་ཚངས་པ་ཡི། །གནས་ནས་འཕོ་བ་མེད་བཞིན་དུ། །ལྷ་ཡི་གནས་རིས་ཐམས་ཅད་དུ། །སྣང་བ་འབད་མེད་སྟོན་པ་ལྟར། དེ་བཞིན་ཐུབ་པ་ཆོས་སྐུ་ལ། །བསྐྱོད་པ་མེད་པར་ཁམས་ཀུན་ཏུ། །སྐལ་ལྡན་རྣམས་ལ་འབད་མེད་ལྟར། །སྤྲུལ་པ་དག་ནི་སྟོན་པར་མཛད། །ཅེས་གསུངས། གཞན་དོན་དུ་སྤྲུལ་པ་འབྱུང་ཚུལ་ཡང༌། མདོ་སྡེ་རྒྱན་ལས། དེ་ལྟ་ན་ཡང་དེ་ཡི་མཐུས། །གདུལ་བྱའི་སྐལ་བ་ཇི་བཞིན་དུ། །སྲིད་པ་ཇི་སྲིད་གནས་ཀྱི་བར། །དེ་ཡི་མཛད་པ་རྒྱུན་མི་ཆད། །ཅེས་སོ། །གཉིས་པ་བར་དུ་དགེ་བ་སྐུ་དངོས་ཀྱི་རྣམ་ཐར་རྒྱས་པར་སྤྲོས་ཏེ་བཤད་པ་ལ་གཉིས། ཐུན་མོང་གཙོ་བོར་བྱས་ཏེ་སྤྱིར་བཤད་པ་དང༌། ཐུན་མིན་ཁྱད་པར་དུ་འཆད་པའོ། །དང་པོ་ནི། གདུལ་བྱ་སྐལ་མཉམ་མཐུན་སྣང་ཐུན་མོང་བ་རྣམས་ཀྱི་ངོར་ཇི་ལྟར་སྣང་བའི་མཛད་པ་ལས་གཙོ་བོར་བརྩམས་ཏེ་སྤྱིར་འཆད་པ་ལ་བདུན། ཐུགས་བསྐྱེད་དང་སྒྱུ་འཕྲུལ་གྱི་རོལ་པས་སྤྲུལ་པའི་ཟློས་གར་ཉེ་བར་བཟུང་ཞིང་མཆོག་གི་སྤྲུལ་པའི་སྐུ་མངའ་གསོལ་བའི་ཚུལ། བསྟན་པའི་འཇུག་སྒོ་སྡོམ་པ་གསུམ་གྱི་བསླབ་པ་ཇི་ལྟར་བཞེས་པའི་ཚུལ། ཡོངས་འཛིན་མཁས་གྲུབ་དམ་པ་རྣམས་བསྟེན་ཅིང་གསན་བསམ་གྱི་མཐར་སོན་པའི་ཚུལ། རིམ་གཉིས་ཟབ་མོའི་རྣལ་འབྱོར་ལ་ཐུགས་གཞོལ་བས་ལམ་གྱི་དྲོད་རྟགས་བརྙེས་པའི་ཚུལ། བསྟན་འགྲོའི་དོན་དུ་བཟང་པོའི་ཕྲིན་ལས་ཇི་ལྟར་མཛད་ཚུལ། ཞར་བྱུང་བསོད་ནམས་ཀྱི་ཚོགས་བསགས་སྒོ་དུ་མ་ནས་རྒྱ་ཆེར་སྒྲུབ་པའི་ཚུལ། རྟེན་དེས་ཐ་མའི་མཛད་པ་མཐར་ཕྱིན་པ་བསྐྱངས་ནས་སྤྲུལ་པ་དབྱིངས་སུ་བསྡུས་པའི་ཚུལ་འཕྲོས་དོན་དང་བཅས་པའོ། །དང་པོ་ནི། འཕགས་པ་རྣམས་ཀྱི་ཐུགས་བསྐྱེད་དང་ཕྲིན་ལས་གདུལ་བྱའི་ཡུལ་ལ་དུས་ལས་ཅུང་ཟད་ཀྱང་ཡོལ་བ་མེད་པས་སྙིགས་མའི་དུས་ཀྱི་སེམས་ཅན་གདུལ་དཀའ་བ་རྣམས་འདུལ་བའི་ཆེད་དུ་རྣམ་པར་གྲོལ་བའི་བདེ་བ་ལ་མི་གཞོལ་བར་སྲིད་པའི་ཚུལ་བཟུང་བ་སྟེ། སྡུད་པ་ལས། དཔའ་བོ་གར་སྤྱོད་ཤེས་རབ་ཕ་རོལ་ཕྱིན་པ་ཡིས། །ཁམས་གསུམ་ཡང་དག་འདས་ལས་རྣམ་པར་གྲོལ་བའང་མིན། །ཉོན་མོངས་བསལ་བར་གྱུར་ཀྱང་སྐྱེ་བ་སྟོན་པར་བྱེད། །རྒ་དང་ན་དང་འཆི་བ་མེད་ཀྱང་འཆི་འཕོ་སྟོན། །ཅེས་དང༌། དཔེར་ན་བྲན་མོ་དབང་མེད་རྗེ་བོའི་དབང༌། དེ་བཞིན་དཔའ་རྣམས་སེམས་ཅན་ཀུན་གྱི་དབང་གིས་འགྲོ། །ཞེས་གསུངས་པ་ལྟར་གང་ལ་གང་འདུལ་གྱི་རྣམ་འཕྲུལ་ཚད་མེད་པས་འགྲོ་བའི་དོན་རྒྱུན་མི་འཆད་པ་ནི་འཕགས་པ་རྣམས་ཀྱི་ཆོས་ཉིད་ཡིན་ཅིང༌། ལྷག་པར་རིགས་གསུམ་མགོན་པོ་དང༌། དེ་ལས་འཇམ་དཔལ་སྤྲུལ་པའི་ཆོས་རྒྱལ་ཆེན་པོ་ཉིད་བོད་འབངས་རྣམས་ལ་ཐུགས་ཤིན་ཏུ་བརྩེ་བས་སྤྲུལ་པའི་རྣམ་རོལ་སྣ་ཚོགས་ཡང་ནས་ཡང་དུ་འབྱུང་བའི་ཚུལ་སངས་རྒྱས་གཉིས་པ་གུ་རུ་པདྨས་རྡོ་རྗེའི་ལུང་དུ་རྒྱ་ཆེར་གསལ་བས་དངོས་ཤུགས་ཅི་རིགས་སུ་བསྟན་པར་ངེས་ཤིང༌། ལུང་ཟིན་སྤྲུལ་པའི་སྐྱེས་བུ་ལ་མི་ནོར་བའི་མཚན་རྟགས་དགོངས་འདུས་ལུང་བསྟན་ཆེན་མོར་གསུངས་པ་རྣམས་ཀྱང་རྗེ་བླ་མ་འདི་ལ་ཐམས་ཅད་གསལ་བར་མངའ་བ་དང༌། སྤྱིར་སྐུ་ཆུང་ངུའི་དུས་ནས་ཟབ་གཏེར་གྱི་ལས་འཕྲོ་ཅན་ཡིན་པ་གདོན་མི་འཚལ་བ་དངོས་བརྒྱུད་ཀྱི་གསུང་དང་མཛད་པ་ལ་ཤེས་ཀྱང༌། རིགས་ཀྱི་བདག་པོ་ཀཿཐོག་སི་ཏུ་རིན་པོ་ཆེས་གནས་དུས་དང་བསྟན་པའི་བབ་ལ་དགོངས་པའི་ཐུགས་བསྐྱེད་ཆེན་པོས་གཏེར་དང་ལུང་བསྟན་གྱི་རིགས་ལ་ཐུགས་མི་མཉེས་པའི་ཚུལ་གྱིས་བཀའ་བཀྱོན་ཡང་ཡང་གནང་བ་དང༌། ཡོངས་འཛིན་བླ་མ་ཡང་དེ་དང་མཚུངས་ཤིང༌། རྗེ་ཉིད་ཀྱང་གསང་བ་སྲུང་བ་ལ་ཐུགས་སྒམ་པས་དེ་རིགས་རྩལ་འདོན་མ་མཛད་པ་འདྲའོ། །རྗེ་བླ་མ་མཁྱེན་བརྩེའི་དབང་པོའི་རྣམ་ཐར་ཞལ་གསུང་དུ་མ་འོངས་པའི་རྣམ་ཐར་སྐབས་ལས། མ་འོངས་བི་མའི་བླ་སྒྲུབ་སྐབས། །ཚེ་འདི་འཕོས་མ་ཐག་པ་ན། །སྤྲུལ་གཞི་རི་བོ་རྩེ་ལྔ་རུ། །པཎ་ཆེན་བི་མའི་ཐུགས་ཀར་ཐིམ། །སྤྲུལ་པ་ལྔ་འབྱུང་སྨོན་ལམ་མཐུས། །རིས་མེད་བསྟན་པར་ཕན་ཅེས་གསུངས། །ཅེས་གསུངས་པ་ལྟར་ཀུན་གཟིགས་ཆོས་ཀྱི་རྒྱལ་པོ་མཁྱེན་བརྩེའི་ཞབས་ཉིད་སྐུ་དེའི་མཛད་པ་རྫོགས་རྗེས་སྤྲུལ་གཞིའི་ཐུགས་ཀར་ཐིམ་ནས་སླར་ཡང་གསང་བ་མི་ཟད་རྒྱན་འཁོར་ལྔའི་རྣམ་འཕྲུལ་གྱིས་རིས་མེད་པའི་བསྟན་འགྲོའི་དོན་རྒྱ་ཆེར་མཛད་པའི་བདེན་དོན་མངོན་དུ་གྱུར་ཚུལ་ནི། འཇམ་མགོན་རྡོ་རྗེ་འཆང་བློ་གྲོས་མཐའ་ཡས་ཀྱིས་མཆོག་སྤྲུལ་ངོས་འཛིན་གྱི་ལུང་བྱང་ལས། ཟིལ་ལྡན་ཆུ་བོ་གཡས་ནས་འབབ། །གསེར་ལྡན་ཆུ་བོ་གཡོན་ནས་འབབ། །ཆུ་གཉིས་འདུས་པའི་ས་མཚམས་ནས། །ཡར་ལ་བལྟས་པས་རྒྱང་གྲགས་གཅིག་སོང་མཐར། །རྣམ་འཕྲུལ་སྦྲུལ་རྟ་ལུག་གསུམ་པོ། །ཞེས་འབྱུང་བས་ཟིལ་འབྲིའི་ཆུ་གཉིས་འདུས་མཚམས་སུ་འཁྲུངས་པའི་མཆོག་སྤྲུལ་རིན་པོ་ཆེ་ངོས་འཛིན་མཚན་གསོལ་རྒྱལ་དབང་ཀརྨ་པ་བཅོ་ལྔ་པ་མཁའ་ཁྱབ་རྡོ་རྗེས་མཛད་པ་རྩ་བའི་གདན་ས་རྫོང་སར་དུ་མངའ་གསོལ་བའི་དགུང་སྙིང་རྟ་ལོ་པ་དང༌། གསུང་གི་སྤྲུལ་པ་འཇམ་མགོན་བླ་མ་ཀོང་སྤྲུལ་རིན་པོ་ཆེས་མཚན་དང་ན་བཟའ་བསྩལ་ཞིང་མཁན་ཆེན་བཀྲ་ཤིས་འོད་ཟེར་གྱིས་དཔལ་སྤུངས་གདན་སར་མངའ་གསོལ་མཛད་པ་ཏྲེ་ཤོད་བེ་རི་རྒྱལ་པོའི་སྲས་སུ་འཁྲུངས་པ་དེ་ཉིད་ཀྱི་མཁན་ཆེན་བཀྲ་ཤིས་འོད་ཟེར་ལས་སྡོམ་པ་གསུམ་ལེགས་པར་བཞེས། རྒྱལ་དབང་ཀརྨ་པ་མཁའ་ཁྱབ་རྡོ་རྗེ་ལས་རྒྱལ་བའི་བཀའ་འགྱུར་རིན་པོ་ཆེའི་ལྗགས་ལུང༌། བཀའ་བརྒྱུད་སྔགས་མཛོད་ཆེན་པོའི་དཀྱིལ་འཁོར་རྣམས་སྒྲུབ་མཆོད་ཞག་བདུན་དང་འབྲེལ་བའི་དབང་ཆེན། སྨིན་ཁྲིད་ལུང་བཅས་དང༌། ནང་བརྟག་རྒྱུད་གསུམ་གཞུང་ཆུང་གཉིས་དང་བཅས་པའི་བཤད་པ། ཟབ་ལམ་ནཱ་རོ་ཆོས་དྲུག་དང་ཕྱག་རྒྱ་ཆེན་པོའི་ཆོས་སྐོར་གྱི་སྨིན་ཁྲིད་ཞིབ་རྒྱས་དང༌། ཇོ་ནང་རིན་འབྱུང་བརྒྱ་རྩ། སྒྲོལ་མ་རྣལ་འབྱོར་མའི་དབང་དང་རྗེས་གནང་རྒྱུད་བཤད་བཅས་དང༌། ཀཏྟ་ཚང་ཐུན་མོང་མ་ཡིན་པའི་བཀའ་སྲུང་མགོན་པོའི་དབང་དང༌། མན་ངག་ཟབ་ཁྲིད་བཅས་དང༌། འཁོར་ལྔ་རྗེས་འབྲང་དང་བཅས་པའི་དབང་དང་རྗེས་གནང་ཐམས་ཅད་དང༌། ཀརྨ་པ་ཞྭ་དམར་ནག་སྐུ་ཕྲེང་ཐམས་ཅད་ཀྱི་བཀའ་འབུམ་སྐོར་གྱི་ལུང་དང༌། དཔལ་ལྡན་ཛཾ་ཐང་གི་ཆོས་རྗེ་རྣམས་ལས་ཇོ་ནང་གི་བདེ་མཆོག་དང༌། གཤིན་རྗེ་རབ་འབྱམས། རྗེ་སྒྲོལ་བའི་མགོན་པོའི་བཀའ་འབུམ་གྱི་དབང་ལུང་ཡོངས་རྫོགས། དཔལ་དུས་ཀྱི་འཁོར་ལོའི་དབང་ཆེན་ཇོ་ལུགས་ལྟར་དང༌། སྦྱོར་བ་ཡན་ལག་དྲུག་གི་རྫོགས་རིམ་གྱི་ཁྲིད་སོགས་དང༌། མཁས་དབང་བླ་མ་བཀྲ་ཤིས་ཆོས་འཕེལ་ལས་བཅུ་ཕྲག་རིག་པའི་གནས་རྣམས་ཞིབ་ཁྲིད་དང༌། དབང་ལུང་གནད་ཆེ་བ་དུ་མ། ཟུར་མང་དྲུང་རིན་པོ་ཆེ་ལས་རྒྱ་ཆེན་བཀའ་མཛོད་དང༌། གདམས་ངག་མཛོད་ཡོངས་རྫོགས། རྒྱལ་སྲས་འཇམ་མགོན་མཆོག་སྤྲུལ་ལས། རིན་ཆེན་གཏེར་མཛོད་ཡོངས་རྫོགས་ཀྱིས་མཚོན་ཐོས་བསམ་རྒྱ་ཆེར་མཛད་ཅིང༌། རྒྱ་དཀར་ནག །དབུས་གཙང༌། ལྷོ་འབྲུག་རྣམས་སུ་གནས་གཟིགས་དང༌། གདན་ས་དཔལ་སྤུངས་སུ་ཀུན་རིག་གི་སྒྲུབ་སྡེ་གཏན་འཇགས། རིགས་ཀྱི་བདག་པོ་རྒྱལ་མཆོག་བཅོ་ལྔ་པའི་བཀའ་འབུམ་ཡོངས་རྫོགས་སྤར་གསར་བཞེངས་སོགས་འཁོར་ལོ་གསུམ་གྱི་མཛད་པ་རྨད་དུ་བྱུང་བ་དང༌། ཐུགས་སྤྲུལ་གྲུབ་དབང་ཤཱཀྱ་ཤྲཱིའི་སྐུ་གསུང་ཐུགས་ཀྱི་སྲས་འཕགས་མཆོག་རྡོ་རྗེ་ནི། ཡབ་རྗེ་རྣལ་འབྱོར་གྱི་དབང་ཕྱུག་ལ་ཅི་མཛད་ལེགས་མཐོང་གི་མོས་གུས་འཕོ་འགྱུར་མེད་པས་མཉེས་པ་གསུམ་གྱི་ཞབས་ཏོག་མཐར་སོན། ཕྲིན་ལས་ཀྱི་གཙོ་བོ་སྙིང་པོའི་སྒྲུབ་པ་མཛད་པས་རྟོགས་པ་དོན་བརྒྱུད་ཀྱི་རྒྱལ་ཐབས་ལ་མངའ་བརྙེས། གཙོ་ཆེར་ཡབ་རྗེའི་མཛད་པའི་འཕྲོ་བཞིན་གདུལ་བྱ་རིས་མེད་པ་ལ་སྨིན་ཁྲིད་ཀྱི་གདམས་པས་ངེས་དོན་དགའ་ཚལ་དུ་དབུགས་དབྱུང༌། ཐམས་ཅད་མཁྱེན་གཟིགས་ཆོས་ཀྱི་བློ་གྲོས་ལ་ཉམས་རྟོགས་འཁྲུངས་ཚུལ་གྱི་གསུང་གླེང་གནང་བས་ཐེག་པ་མཆོག་གི་ལྟ་དགོངས་ལ་དབང་འབྱོར་བའི་བསྟོད་བསྔགས་དང༌། གྲུབ་དབང་རིན་པོ་ཆེའི་དགོངས་གཏེར་སྐོར་སོགས་ཀྱི་སྨིན་གྲོལ་ཀྱང་གསན། ཡབ་རྗེའི་ཕྱག་རྫོགས་ཀྱི་དམར་ཁྲིད་ཐུན་མོང་མ་ཡིན་པའི་ཞལ་ལུང་གླེགས་བམ་དུ་བཀོད་པས་ཆོས་སྐུའི་མཆོད་སྡོང་གདུལ་བྱའི་སྐལ་བར་བཞག་པ་སོགས་སྙིང་པོའི་བསྟན་པ་ལ་ཕན་པའི་ཕྱག་བཞེས་སོགས་ངོ་མཚར་ཆེན་པོ་མངའ་བའོ། །ཕྲིན་ལས་ཀྱི་སྤྲུལ་པ་ཆུ་སྦྲུལ་དགུང་ལྡན་འདི་ཉིད་དང༌། གྲུབ་དབང་རྫོགས་ཆེན་ལྔ་པ་ཐུབ་བསྟན་ཆོས་ཀྱི་རྡོ་རྗེས་ངོས་འཛིན་དང་རུ་དམ་རྫོགས་ཆེན་གྱི་གདན་སར་མངའ་གསོལ་མཛད་པའི་མཆོག་སྤྲུལ་དགུང་སྙིང་ལུག་ལོ་ཅན་མཁྱེན་རྟོགས་མཚུངས་ཟླ་བྲལ་བ་དང༌། ཡང་རྗེ་མཁྱེན་བརྩེའི་ཞལ་འཕྲོས་ཁུངས་དག་གི་རྒྱུན་ལས་དཔལ་ས་སྐྱའི་གདུང་བརྒྱུད་དུའང་སྤྲུལ་པ་གཅིག་འབྱུང་ཚུལ་གསུངས་པའི་བཤད་སྲོལ་ལྟར་བདག་ཆེན་ངག་དབང་མཐུ་སྟོབས་དབང་ཕྱུག་ཉིད་ཡིན་པར་ཞལ་གྱིས་བཞེས་ཤིང་ཡོངས་སུ་གྲགས་པ་ལྟར་ལ། ཡབ་རྗེ་དགོངས་པ་རྫོགས་པའི་ཚེ་སྐུ་དངོས་ཀྱིས་བྱང་ཤམྦྷ་ལའི་ཞིང་དུ་ཕེབས་ནས་དེའི་མེ་ཏོག་གི་ཆུན་པོ་བསྣམས་ཏེ་བྱོན་པ་ཀུན་གྱིས་མཇལ་དུ་ཡོད་པ་སོགས་གྲུབ་པའི་རྟགས་ཁྱད་དུ་འཕགས་པ་དུ་མ་བསྟན་པར་མཛད་པ་དང༌། སྤྱིར་འཇམ་དབྱངས་བླ་མ་ཐམས་ཅད་མཁྱེན་པ་ཉིད་རྒྱལ་བསྟན་རིས་སུ་མ་ཆད་པ་འཛིན་སྐྱོང་སྤེལ་བའི་ཐུགས་བསྐྱེད་ཀྱི་གཡར་དམ་ལྷུར་བཞེས་ཤིང༌། ཕྲིན་ལས་དུས་སུ་བབས་པས་མདོ་དབུས་གཙང་ཁམས་ཤར་ནུབ་རྒྱ་མཚོའི་མཐའ་ཚུན་ཆད་དུ་ཐུགས་སྲས་སྦས་མངོན་ཅི་རིགས་པ་ས་ཆེན་པོའི་རྡུལ་ལྟར་བྱོན་པས་རང་རང་གི་དད་མོས་དག་སྣང་གི་གཟིགས་པས་ངོས་འཛིན་གནང་བ་རྣམས་དང༌། དཔལ་སྤུངས་སྐྱབས་མགོན་སི་ཏུ་པདྨ་དབང་མཆོག་རྒྱལ་པོ་དེ་ཉིད་རྒྱལ་དབང་མཁའ་ཁྱབ་རྡོ་རྗེས་ངོས་འཛིན་གནང་སྟེ་དཔལ་སྤུངས་གདན་སར་ཞབས་པད་བཀོད་པའི་ཡར་ལམ་སྨན་ཤོད་རྫོང་སར་དགོན་གྱི་མདུན་ནས་ཕེབས་སྐབས་རྗེ་མཁྱེན་བརྩེའི་ཞལ་བཀོད་དུ་སི་ཏུ་མཆོག་སྤྲུལ་ཡར་ལམ་ཕྲན་རྩར་ཕེབས་མི་དགོས། སི་ཏུ་སྤྲུལ་སྐུ་རིན་པོ་ཆེས་ཕྲན་གྱི་ཁང་པ་གཟིགས་དུས་ཕྲན་མཁྱེན་བརྩེ་རེད་ཅེས་ཞུས་གསུངས་པ་ལྟར་གཟིམས་ཆུང་མཇལ་དུས་ཞུས་པས། དེའི་མཐོང་སྐར་ནས་མཁྱེན་བརྩེ་རིན་པོ་ཆེས་སྤོས་རིང་བམ་པོ་དར་གྱིས་ལྕིབས་པ་བསྣམས་བཞིན་སི་ཏུ་རིན་པོ་ཆེ་ལ་གཟིགས་ནས་རྫོགས་ཆེན་མཁན་རིན་པོ་ཆེ་པདྨ་རྡོ་རྗེ་སྐུ་མདུན་དེར་བཞུགས་པ་ལ། ཕ་ཀི་དཔལ་སྤུངས་སི་ཏུའི་སྤྲུལ་སྐུར་རྒྱལ་དབང་ཀརྨ་པ། ཀོང་སྤྲུལ་རིན་པོ་ཆེ། ངེད་རང་གསུམ་དགོངས་མཐུན་གྱིས་མཚན་གསོལ་ཁྲི་བཀོད་བྱས་པ་ཡིན། ང་དང་ཁྱེད་གཉིས་ཀྱིས་ཡེ་ཤེས་ཀྱི་དགོངས་བརྒྱུད་གཏད་དེ་གཉིས་མེད་དུ་བྱིན་གྱིས་བརླབས་དགོས་ཞེས་གསུངས་ཤིང་ཆེད་དུ་དགོངས་གཏད་གནང་བ་དང༌། ཀཿཐོག་སི་ཏུ་རིན་པོ་ཆེས་དབང་དང་གསུང་བཤད་གནང་སྐབས་གསུང་སྐད་ཀྱི་གདངས་དང་གསུང་སྟངས་སོགས་རྗེ་མཁྱེན་བརྩེའི་དབང་པོ་དང་དབྱེར་མེད་ཞིག་འདུག་པས་རྗེ་བླ་མའི་ཡེ་ཤེས་ཀྱི་སྒྱུ་འཕྲུལ་བཀོད་པ་ཡིན་སྙམ་པ་འདུག་ཅེས་ཞེ་ཆེན་རྒྱལ་ཚབ་རིན་པོ་ཆེ་པདྨ་རྣམ་རྒྱལ་དང༌། གཏེར་ཆེན་ལས་རབ་གླིང་པར་གསུངས་ཤིང༌། སྐུ་གཤེགས་རྗེས་ཐུགས་སྲས་མཁས་གྲུབ་གཞན་དག་གིས་ངོས་འཛིན་པ་སོགས་འགའ་ཞིག་མཆིས་པ་དང༌། མདོ་སྨད་རེབ་ཀོང་ཕྱོགས་སུ་པིས་མདོ་དགོན་གྱི་མཁན་ཆེན་མཁྱེན་ཡོན་རྨད་དུ་བྱུང་བ་བློ་བཟང་བསྟན་འཛིན་རྒྱ་མཚོ་ཞེས་པ་ཞིག་ལས་ངེད་རང་གིས་གསང་བདེའི་དབང་དང་རྒྱུད་ཀྱི་བཤད་པ་ཞུས་པས། ནང་མའི་གསུང་མཆིད་དུ་སློབ་མ་རྣམས་ནས་ཕྲན་ལ་སྐྱེས་ཕྲེང་གསོལ་འདེབས་དགོས་ཟེར་བ་ཕྲན་ནས་རྨི་ལམ་བརྟགས་པས། རས་ཆུང་རྡོ་རྗེ་གྲགས་པ་དང་འཇམ་དབྱངས་མཁྱེན་བརྩེ་ཡིན་ཟེར་བ་རྨིས་པས་དེའི་རྣམ་ཐར་མཇལ་དགོས་ཞེས་ཞིབ་ཏུ་གཟིགས་གནང་མཛད་ཅིང༌། ཕྲན་ཆོས་ལུགས་དགེ་ལྡན་དུ་གྱུར་པས་དཔེ་ཆ་གསར་པའི་སྐབས་ཕྱོགས་རིས་ཆེ་བ་ཡོད་ཀྱང་ཐོས་པ་ཕྱོགས་མེད་དུ་བྱས་ཤིང་ཆོས་ཀྱི་གནད་འགག་མཐོང་བས་ཆགས་སྡང་གིས་རང་གཞན་གྲུབ་མཐའ་བཟང་ངན་དུ་བལྟ་བ་འདི་ལས་སྐྱོན་ཆེ་བ་མི་འདུག །ད་ནི་བཀའ་གདམས་དགེ་བའི་བཤེས་གཉེན་གོང་མ་རྣམས་ཀྱི་རྣམ་ཐར་བཞིན་བསྟན་པ་ཐམས་ཅད་འགལ་མེད་དུ་སེམས་པས། ད་རེས་ཁྱོད་ལས་རྙིང་མའི་ཆོས་འབྲེལ་ཞིག་ཞུ་ནས་བསྙེན་སྒྲུབ་འབྲེལ་བ་དང༌། རིན་ཆེན་གཏེར་མཛོད་ཀྱི་དཔེ་ཆ་ཞིག་བླུ། ཆོས་སྐོར་ཚང་མ་ཞིབ་མཇལ་ཞུ་ནས་སྐྱེ་བ་རྗེས་མར་གཏེར་མཛོད་འཆད་ཉན་ཐུབ་པའི་སྨོན་ལམ་བྱ་གི་ཡིན་པས་རྫོང་སར་མཁྱེན་བརྩེ་རིན་པོ་ཆེ་ལའང་དེའི་དོན་ཞུ་ཡིག་སྐྱབས་རྟེན་བཅས་རང་ལ་བསྐུར་མཛད་ཅིང༌། ཁྱེད་ཀྱིས་ཀྱང་དེ་ལྟར་ཐུགས་སྨོན་མཛོད་ཅེས་ཕྲན་ལས་རྩ་གསུམ་བདེ་འདུས་ཀྱི་དབང་གསན། བསྙེན་པའང་བཏང་མཛད། གཏེར་མཛོད་ཀྱི་ཕྱག་དཔེ་བླུས་མཛད་པ་རྣམས་རྗེ་བླ་མ་ཆོས་ཀྱི་བློ་གྲོས་རིན་པོ་ཆེར་ཞུས་པས་བོད་ཀྱི་ཆོས་ལུགས་ཁག་བཞི་གཡུང་དྲུང་བོན་དང་བཅས་པ་ལ་མཁྱེན་བརྩེའི་སྤྲུལ་སྐུ་རེ་ཕེབས་པའི་ཞལ་བཞེས་གནང་སྐད་བཤད་སྲོལ་འདུག་པས་དགེ་ཕྱོགས་དེ་དེ་མིན་ནམ་གསུངས་པ་དང༌། ཁོ་བོ་ཡང་དེ་དག་གི་ལུང་དང་རྟོགས་པའི་ཡོན་ཏན་གྱི་རྗེས་སུ་མི་སྙེགས་རུང་མཚན་གྲལ་དུ་སྙན་པའི་རྒྱུ་མཚན་ནི། གསང་བདག་བློ་གཏེར་དབང་པོ་གུས་བཙས་ནས་ཟླ་གཅིག་མ་ལོང་ཙམ་དུ། རང་གི་ཁྱིམ་དུ་ཕེབས་བཞུགས་སྐབས་ཕྲན་ཨ་མས་སྐུ་མདུན་ཁུར་བ་དང༌། ངོས་ལ་རྨི་ལམ་དུ་འཇམ་དབྱངས་མཁྱེན་བརྩེའི་དབང་པོ་ཞག་གསུམ་བཏུད་མར་དགྱེས་ཉམས་ཅན་ཤིན་ཏུ་གསལ་པོར་མཇལ་བ་རྨིས་པས་བུ་འདི་མཁྱེན་བརྩེའི་སྤྲུལ་སྐུ་ཞིག་ཡིན་ངེས་ཞེས་མཁྱེན་བརྩེ་གོང་མའི་ཕྱག་ཕྲེང་རྡོག་གཅིག་དང་རྗེ་མཁྱེན་བརྩེའི་ཕྱག་མདུད་ངོ་མ། མགུལ་དར་ནང་མཛོད་བཅས་བསྩལ་བ་དང༌། ལོ་ངོ་གསུམ་ལོན་པའི་དུས་ཞེ་ཆེན་རྒྱལ་ཚབ་རིན་པོ་ཆེ་འགྱུར་མེད་པདྨ་རྣམ་རྒྱལ་ཁྱིམ་ཕེབས་སྐབས་རང་གི་སྐྱེད་ཡབ་ལ་ཁྱེད་ཀྱི་བུ་འདི་ང་ལ་བྱིན། སྤྲུལ་སྐུ་ཁྱད་འཕགས་ཞིག་ཡིན་ཞེས་གསུངས་ཤིང༌། ཕྱིས་རང་ལོ་བཅུ་དྲུག་སྟེང་མཁྱེན་བརྩེའི་སྤྲུལ་སྐུའི་མཚན་དང་མི་ཕམ་རིན་པོ་ཆེའི་ཕྱག་བྲིས་སོགས་རྟེན་གསུམ་ཁྱད་པར་ཅན་བསྩལ་བའི་སྐབས་དེར་འཇམ་མགོན་ཆོས་ཀྱི་བློ་གྲོས་ཀྱང་དེར་བཞུགས་པས། སྔར་བློ་གཏེར་དབང་པོ་དང་ད་ལམ་སྐྱབས་རྗེ་རྒྱལ་ཚབ་རིན་པོ་ཆེའི་ཡེ་ཤེས་ཀྱིས་གཟིགས་པ་ལྟར་ཕྲན་གྱི་རིག་ངོར་ཡང་མཁྱེན་བརྩེའི་ཐུགས་སྤྲུལ་ཡིན་པར་ངེས་ཞེས་སྐུ་གསུང་ཐུགས་རྟེན་དང་ལེགས་སོའི་དབུགས་དབྱུང་བསྩལ། ཕྱིས་རྫོང་སར་དུ་ཐོག་མར་བཅར་སྐབས་མདངས་རྨི་ལམ་དུ་མཁྱེན་བརྩེ་རིན་པོ་ཆེ་དེ་ཤིན་ཏུ་གསལ་པོར་མཇལ་བས་དེ་རིང་ཁྱེད་ཕེབས་པའི་རྟག་སུ་ངེས་གསུངས་པ་སོགས་དམ་པ་རྣམས་ཀྱི་དག་པའི་གཟིགས་ངོར་མཆིས་པ་ལས་རང་ལ་ནི་ཆ་ཅི་ཡང་མ་འཚལ་བ་ཞར་ལ་འཕྲོས་པ་སྟེ། སྔོན་བྱོན་གྲུབ་པའི་དབང་ཕྱུག་ཐང་སྟོང་རྒྱལ་པོ་དང༌། རྒྱལ་དབང་ཀརྨ་པ་མི་བསྐྱོད་རྡོ་རྗེའི་རྣམ་ཐར་དུ་གསལ་བ་བཞིན་འཕགས་པའི་ས་བརྙེས་པའི་སྐྱེས་ཆེན་དག་གིས་དག་དང་མ་དག་གི་སྤྲུལ་པ་མང་པོ་འགྲོ་བའི་དོན་དུ་དུས་གཅིག་ལའང་འགྱེད་པར་མཛད་པའི་ཚུལ་ཡོད་པ་ལྟར་རོ། །ད་ནི་དེ་ཐམས་ཅད་ཀྱི་ནང་ནས་རྒྱལ་མཚན་གྱི་ཏོག་ལྟར་མངོན་པར་མཐོ་ཞིང༌། རྗེ་གོང་མའི་རྣམ་ཐར་དང་ཕྲིན་ལས་མཐའ་དག་རྫོགས་པར་མངའ་བས་གསང་གསུམ་ཡོན་ཏན་དང་བཅས་པ་གཅིག་དུ་འདུས་པའི་རང་གཟུགས་ཕྲིན་ལས་མི་ཟད་རྒྱན་གྱི་འཁོར་ལོའི་རྣམ་པར་འཕྲུལ་པའི་བདག་ཉིད་ཆེན་པོར་གྱུར་པ་རྗེ་བཙུན་བླ་མ་དམ་པ་འདི་ཉིད་ཀྱི་རྣམ་ཐར་རྒྱས་པར་འཆད་པ་ལ། དེའང་གདུལ་བྱའི་ཡུལ་དང་ཐུགས་རྗེའི་རྐྱེན་ཚོགས་པ་ལ་བརྟེན་ནས་སླར་ཡང་སྲིད་པའི་གཟུགས་སུ་མངོན་པར་སྣང་བ་སྟེ། རྒྱུད་བླ་མ་ལས། ཇི་ལྟར་བཻཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་འཆར་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་གསུངས་པ་དང་རྗེས་སུ་མཐུན་པར་རྒྱལ་ཀུན་ཡེ་ཤེས་གཅིག་ཏུ་འཁྱིལ་བའི་ཉིན་བྱེད་དབང་པོ་གང་དུ་སྐྱེ་བའི་མྱུ་གུ་བཟུང་བའི་ཚུལ་བསྟན་པའི་ཡུལ་ནི། མདོ་ཁམས་ཆུ་བཞི་སྒང་དྲུག་ལས་གསེར་ལྡན་འབྲི་ཀླུང་གི་བགྲོད་པ་དལ་གྱིས་གཡོ་བའི་ཕྱོགས་མདོ་སྨད་ཟལ་མོ་སྒང་གི་ཆར་ས་ཡི་མདུད་བཞིར་གྲགས་པའི་བྱེ་བྲག་རེ་ཁེ་ས་ཡི་མདུད་པ་སྟེ། གཏེར་ཆེན་བདུད་ཀློང་རྣམ་གཉིས་ནས་ཟབ་གཏེར་བཞེས་ཞིང༌། བདེ་ཆེན་གླིང་པ་དང༌། རིག་འཛིན་ཚེ་དབང་ནོར་བུ་སོགས་ཀྱིས་རྡོ་རྗེའི་གནས་སུ་བསྔགས་ཤིང༌། ཡུལ་གཞི་སྐྱོང་བ་གནས་བདག་ཆེན་པོ་ཡོན་ཏན་རི་བཀྲ་ཞེས་ཕྲིན་ལས་ཕུར་པའི་བཀའ་སྲུང་ལྕགས་ཀྱི་སྐྱེས་བུས་བདེ་བར་སྐྱོང་བའི་ཡུལ་ལྗོངས་ས་ངན་རེ་ཁེའི་ནང་གསེས་ཨ་བྱམས་ཞེས་པའི་སའི་ཆར། ཡབ་མེས་རིག་འཛིན་རྩལ་འཆང་གི་བརྒྱུད་པ་ཤིན་ཏུ་ངོ་མཚར་བའི་རྣམ་ཐར་དང་ལྡན་པ་སྟེ། དེའང་གུ་རུའི་རྒྱལ་ཚབ་ནུས་ལྡན་ཉེར་ལྔའི་ཡ་གྱལ་ས་བཅུའི་དབང་ཕྱུག་བདུད་འདུལ་ནུས་ལྡན་རྡོ་རྗེའི་གདུང་བརྒྱུད་ཁམས་གསེར་ཐར་ཕྱོགས་སུ་བཞུགས་སྟན་ཆགས་པ་རྒྱལ་སྲས་པདྨ་རྣམ་རྒྱལ་ཏེ། འདི་ཉིད་གནས་དུས་སོགས་ཀྱི་བབས་ལ་དཔྱད་ན་འཇམ་མགོན་རིན་པོ་ཆེས་འཁོན་ཕུར་མཛད་བྱང་དུ་གསལ་བའི་ཀཿཐོག་བདུད་འདུལ་རྒྱལ་སྲས་པདྨ་རྣམ་རྒྱལ་ཞེས་པ་དུས་གསུམ་སྒྲིབ་མེད་གཟིགས་ཚུལ་སོགས་འབྱུང་བ་ཡིན་པར་མངོན་ལ། ངོ་མཚར་ཁྱད་འཕགས་ཀྱི་རྣམ་ཐར་མངའ་བ་དེ་ཉིད་ཀྱི་སྲས་གསེར་པ་གཏེར་རྒན་བདུད་འདུལ་རོལ་པ་རྩལ་ནུས་ལྡན་ནམ་མཁའི་རྣལ་འབྱོར་ཞེས་མཁྱེན་བརྩེ་ནུས་པའི་ཡོན་ཏན་འགྲན་ཟླ་དང་བྲལ་ཞིང་ཟབ་གཏེར་ཀྱང་མང་དུ་བཞེས། བདུད་འདུལ་གྱི་སྤྲུལ་པར་གྲགས་ཤིང་ཡེ་ཤེས་ཀྱི་སྐུས་རྗེས་སུ་བཟུང་ཞིང་བྱིན་གྱིས་བརླབས། སྐུ་ཚེ་ལ་མངའ་བརྙེས་པས་དགུང་ལོ་བརྒྱ་དང་བརྒྱད་ཅུ་ཙམ་བཞུགས་ཤིང་སྐུ་ཚེའི་སྨད་ལ་བྲག་ཡབ་དང་ས་ངན་ཕྱོགས་སུ་རིམ་པར་ཕེབས། མི་དང་མི་མིན་གྱི་འགལ་བྱེད་མཐའ་དག་མངོན་སྤྱོད་ནུས་མཐུས་ཚར་བཅད་ཅིང་དབང་དུ་བསྡུས་པས་ཕྲིན་ལས་འཕེལ་རྒྱས་སུ་གྱུར། ཀཿཐོག་ནས་ས་ངན་ཕྱོགས་ཀྱི་དགོན་བདག་ཏུ་མངའ་གསོལ་བ་བཞིན་ཕྱོགས་དེར་བཞུགས་སྟན་ཆགས་པར་མཛད། ཕྱིས་གཏེར་སྟོན་སྐུ་གཤེགས་རྗེས་གསང་ཡུམ་མཁྱེན་བརྩེ་རིན་པོ་ཆེའི་མདུན་དུ་བྱོན་པར་གཏེར་ཆོས་ཡོངས་རྫོགས་མཁའ་འགྲོ་གཏད་རྒྱ་བརྒྱུད་པའི་ཚུལ་དུ་བཞེས་ཤིང་གཏེར་ཆོས་སྐོར་རྫོང་སར་ཕྱག་དཔེའི་ཁྲོད་དུ་བཞུགས་པ་སྟེ། གྲུབ་བརྙེས་རྣལ་འབྱོར་དབང་པོ་དེ་ཉིད་ཀྱི་སྐུ་ཚེའི་སྨད་དུ་འཁྲུངས་ཤིང་གསང་བ་གསུམ་གྱི་བྱིན་གྱིས་བརླབས་པའི་སྲས། གསེར་པ་གཏེར་སྲས་འགྱུར་མེད་ཚེ་དབང་རྒྱ་མཚོ་ནི་རྗེ་བླ་མ་དམ་པའི་སྐྱེད་ཡབ་སྟེ། ཡབ་ཀྱིས་བདུད་འདུལ་དང་རང་གཏེར་སྐོར་གྱི་དབང་རྣམས་རྫོགས་པར་བསྩལ། སྨིན་གྲོལ་གླིང་དུ་ཁྲི་ཆེན་ཡིད་བཞིན་དབང་རྒྱལ་དང༌། རྗེ་བཙུན་མ་བདེ་ཆེན་ཡེ་ཤེས་ཆོས་སྒྲོན། རྡོར་འཛིན་དོན་གྲུབ་སོགས་ལས་བཀའ་གཏེར་གྱི་སྨིན་གྲོལ་དང་ཕྱག་ལེན་སོགས་གསན་བསམ་རྒྱ་ཆེར་མཛད་ཅིང་ཡུན་རིང་ཙམ་བཞུགས། ཁྱད་པར་རྗེ་མཁྱེན་བརྩེའི་དབང་པོས་ཐུན་མིན་ཐུགས་བརྩེས་རྗེས་སུ་བཟུང་ཞིང་ཟབ་ཆོས་རིགས་སྤྱི་དང་ཁྱད་པར་བཀའ་འདུས་ཆོས་ཀྱི་རྒྱ་མཚོའི་སྨིན་གྲོལ་ཉི་མ་ཕྱེད་ནས་ནམ་ཕྱེད་ཡོལ་གྱི་བར་དུ་ཤིན་ཏུ་རྒྱས་པར་བསྩལ། མཁའ་འགྲོ་རྣམས་ཀྱིས་ཕྱག་ཏུ་ཕུལ་བའི་བཀའ་འདུས་ཀྱི་བླ་དཔེ་བརྡ་ཡིག་དང་བོད་ཡིག་འདྲེས་མ་ལྟ་བུའི་པོད་ཆུང་གཅིག་དང་རྩ་གསུམ་སྒྱུ་འཕྲུལ་དྲྭ་བའི་ཤོག་སེར་བཏགས་གྲོལ་གླེགས་བམ་ལྟ་བུ་གཅིག་བཅས་དངོས་སུ་མཇལ་ཁ་གནང༌། གཞན་ཡང་ཐུགས་ཆེན་སེམས་ཉིད་ངལ་གསོ། མཆོག་གཏེར་ཟབ་བདུན་གཤིན་རྗེ། ཡང་གཏེར་མཁའ་འགྲོ་གསང་འདུས། འཆི་མེད་འཕགས་མའི་སྙིང་ཐིག་གི་དབང་སྐབས་གསང་མཚན་འཆི་མེད་སྣང་མཛད་རྡོ་རྗེར་གསོལ། ཆོས་སྐོར་དེ་རྣམས་ཀྱི་ཆོས་བདག་ཏུ་དབུགས་དབྱུང༌། ཁྱེད་རང་བོད་དབུས་གཙང་དུ་སོང་ན་མཁོ་གསུངས་ཏེ་ཀློང་སྙིང་པོད་གཉིས་ཀྱི་དབང་ལུང་ཁྲིད་བཅས་རྒྱས་པར་གནང༌། གསེར་པ་གཏེར་རྒན་གྱི་ན་བཟའ་སྔགས་ཆས་རྣམས་ཕུལ་བས་ཁྱེད་རང་ལ་རྗེས་སུ་མཁོ་དགོས་ཡོང་ཚུལ་གསུངས་ནས་སླར་གནང་བ་ནི་དོན་གྱི་རིག་པ་འཛིན་པ་འདིའི་སྲས་སུ་ཕེབས་པར་ལུང་བསྟན་པར་ངེས་སོ། །དེ་བཞིན་དུ་འཇམ་མགོན་བློ་གྲོས་མཐའ་ཡས་ཞབས་ཀྱིས་ཀྱང་ཐུགས་བརྩེས་རྗེས་སུ་བཟུང་ཞིང་རྗེ་ཉིད་དང་སྤྲུལ་གཞི་གཅིག་པས་རྩ་གསུམ་དགོངས་འདུས་ཀྱི་གཏེར་གཞུག་སྐྱོང་བར་འོས་པའི་ཚུལ་དང༌། གསང་ཐིག་དང་ཚིག་བདུན་སྐོར་གྱི་ཆོས་བདག་དུ་ངོས་འཛིན་གྱིས་སྨིན་གྲོལ་ཞིབ་པར་བསྩལ། གཞན་ཡང་དཔལ་ཡུལ་སྐུ་ཆེན། ཀཿཐོག་སི་ཏུ་སོགས་སྐྱེས་ཆེན་དམ་པ་མང་དུ་བསྟེན་ནས་རིན་གཏེར་ཁ་སྐོང་བཅས། མཆོག་གཏེར་ཆ་ཚང་སོགས་གསན་བསམ་རྒྱ་ཆེར་གནང༌། ཡི་དམ་ལྷག་པའི་ལྷ་དུ་མའི་བསྙེན་སྒྲུབ་དང་བསྐྱེད་རྫོགས་ཉམས་བཞེས་ཚད་དུ་ཕྱིན་ཅིང་ཆོས་སྐྱོང་རྣམས་བྲན་དུ་བཀོལ། བསྟན་འགྲོར་འཚེ་བའི་ནག་ཕྱོགས་ཀྱི་སྡེ་དཔུང་རྣམས་མངོན་སྤྱོད་ཀྱི་ལས་སྦྱོར་གྱིས་ཚར་བཅད་ཅིང༌། གཞན་འཁུ་བར་བྱེད་པའི་རིགས་ལའང་ནུས་མཐུའི་རྟགས་མཚན་མཐོང་ཆོས་སུ་བྱུང་བ་མང་པོ་དང༌། སྐབས་ཤིག་ཆང་གིས་ར་བཟི་བ་ལྟར་མཛད་ནས་གོ་འཇོ་མཁོ་ཆེན་དགོན་གྱི་མགོན་ཁང་གི་ནང་རྟེན་བསམ་ཡས་སུ་རྒྱལ་པོ་སྐུ་ལྔའི་སྐུ་གསོབ་ཀྱི་ནང་གཞུག་དཔེ་ཧར་གྱི་རྟེན་མདུང་གུ་རུ་རིན་པོ་ཆེས་བཅིངས་པ་སྨིན་གླིང་གཏེར་ཆེན་གྱིས་བཞེས་པ་གཙུག་ལག་གི་སྟེང་ནས་འཕང་བ་བར་སྣང་དུ་ཅུང་ཟད་བསྡད་ནས་སར་ལྷུང་ཡང་ཉིད་སྟོན་འཁོར་ལ་གནོད་པ་སོགས་གཏན་ནས་མ་བྱུང་བས་མཚོན་ནུས་མཐུ་ཤིན་ཏུ་ཆེ་བར་གྲགས། ལྟར་སྣང་ཀུན་སྤོང་ཞིག་པོའི་ཚུལ་དུ་བཞུགས་ནས་ཟབ་ཆོས་ཀྱི་འཆད་སྤེལ་ཡང་མང་དུ་མཛད། སྔ་འགྱུར་བཀའ་མ་མདོ་སྒྱུ་དང༌། ཁྱད་པར་རིན་ཆེན་གཏེར་མཛོད་ཞིབ་རྒྱས། མཆོག་གཏེར་ཚང་བ་སོགས་བཀའ་གཏེར་ཟབ་ཆོས་མང་ཞིག་རྗེ་བླ་མར་ཕུལ་བས་བསྟན་པ་ལ་མཛད་རྗེས་ཀྱང་ཆེ་བར་བྱུང༌། དེ་ལྟ་བུའི་མཁྱེན་བརྩེ་ནུས་པའི་ཡོན་ཏན་འགྲན་ཟླ་དང་བྲལ་བའི་རིག་པ་འཛིན་པ་ཆེན་པོ་དེ་ཉིད་དང༌། ཨ་ལྕགས་འགྲུ་ཡི་རིགས་ལས་ཨ་མདོ་གསེར་གྱི་བྱ་བྲལ་ཞེས་པའི་གྲུབ་ཐོབ་ཀྱི་རིགས་སུ་བྱུང་བ་ཚུལ་ཁྲིམས་མཚོ་ཞེས་རྒྱུད་ཞི་དུལ་སྙིང་རྗེ་ཆེ་བ་སོགས་ཌཱ་ཀིའི་རིགས་ཀྱི་མཚན་ཉིད་དང་ལྡན་པ་གཉིས་ཀྱི་སྲས་སུ་རབ་བྱུང་བཅོ་ལྔའི་རྣམ་རྒྱལ་ཞེས་པ་ཆུ་མོ་སྦྲུལ་གྱི་ལོ་སྟོན་གསུམ་འབྲས་བུ་བཅུད་དུ་སྨིན་པའི་དགའ་སྟོན་ལ་སྐྱེ་དགུ་རྣམས་རྫོགས་པར་ལོངས་སྤྱོད་པའི་དུས་སུ་མཚན་དཔེའི་དཀྱིལ་འཁོར་གསལ་བའོ། །ལྷུམས་སུ་ཞུགས་པ་དང་སྐུ་བལྟམས་པའི་གཟའ་སྐར་དུས་སྦྱོར་སོགས་ཞིབ་པར་མ་འཁོད་ཅིང༌། ལྷུམས་སུ་ཞུགས་སྐབས་ཡབ་ཡུམ་ལ་མནལ་ལྟས་དང་འཁྲུངས་པའི་ཚེ་ངོ་མཚར་བའི་རྟགས་མཚན་དགེ་བར་བྱུང་བ་གོར་མ་ཆགས་ཀྱང༌། ཡབ་རྗེ་ཉིད་འཁྲུལ་ཞིག་རྣལ་འབྱོར་དུ་སོང་བས་དམིགས་བསལ་ངག་རྒྱུན་ཁུངས་བཙུན་དང་ཕྱག་ཐོར་འཁོད་པ་སོགས་མི་འདུག་གསུངས། དེ་ནས་ཡུལ་ཆོས་དང་བསྟུན་སྐབས་སུ་བབས་པའི་ཞབས་འདེགས་བཅས་སྐུའི་སྐྱེད་རིམ་པར་བསྲིངས། ཡབ་རྗེ་རིག་པ་འཛིན་པ་ཆེན་པོས་འཇམ་དབྱངས་ཆོས་ཀྱི་བློ་གྲོས་ཞེས་པར་མཚན་གསོལ། ཁྱད་པར་འཇམ་དབྱངས་བླ་མའི་མཆོག་གི་སྤྲུལ་པའི་སྐུར་ངོས་འཛིན་ཇི་ལྟར་གནང་བའི་ཚུལ་ནི། རྗེ་འཇམ་མགོན་བློ་གྲོས་མཐའ་ཡས་མཆོག་གི་ཡེ་ཤེས་དག་པའི་གཟིགས་ངོར་གསལ་བའི་དོན་རྗེ་གོང་མའི་སྐུ་དབོན་སྐལ་བཟང་རྡོ་རྗེར་མཆོག་སྤྲུལ་སྐོར་གྱི་གསུང་ལན་དུ། ཤཱཀྱ་ཤྲཱིའི་སྲས་འཕགས་མཆོག་རྡོ་རྗེ་ཐུགས་ཀྱི་སྤྲུལ་པ་དང༌། རྗེ་འདི་ཉིད་ཕྲིན་ལས་ཀྱི་སྤྲུལ་པར་ངེས་ཤེས་རྙེད་ཚུལ་ཞིབ་འཁོད་འཇམ་མགོན་རང་གི་ཕྱག་བྲིས་དངོས་བཞུགས་པ་དང༌། ཁྱད་པར་དུ་རྗེ་གོང་མའི་སྐུ་དབོན་ཀུན་གཟིགས་སི་ཏུ་རིན་པོ་ཆེས་ཀཿཐོག་གི་གདན་སར་མཁྱེན་བརྩེའི་སྤྲུལ་སྐུ་གཅིག་གནང་གྲུབ་པར་འཇམ་མགོན་རིན་པོ་ཆེར་ཡང་ཡང་གསོལ་བ་བཏབ་པ་ལྟར། ཀུན་གཟིགས་མཁྱེན་བརྩེའི་དབང་པོ་ཉིད་ཆོས་རྒྱལ་ཁྲི་སྲོང་གི་སྐུ་དང༌། གུ་རུ་རིན་པོ་ཆེའི་གསུང༌། ནམ་མཁའི་སྙིང་པོའི་ཐུགས། བི་མ་མི་ཏྲའི་ཡོན་ཏན། ལང་གྲོ་ལོ་ཙཱ་བའི་ཕྲིན་ལས་བཅས་གཅིག་ཏུ་བསྡུས་པའི་རྣམ་རོལ་དུ་གསུངས་པ་དང༌། ཀཿཐོག་གི་གདན་ས་མདོ་ཁམས་གནས་ཆེན་ཉེར་ལྔ་ལས་ཕྲིན་ལས་འགྲོ་འདུལ་གྱི་གནས་གཙོར་བསྔགས་ཤིང༌། ལང་གྲོའི་རྣམ་འཕྲུལ་རིག་འཛིན་ཀློང་གསལ་སྙིང་པོས་བསྟན་པ་གཞིར་བཞེངས་མཛད་པའི་རྟེན་འབྲེལ་སོགས་ཀྱིས་ཕྲིན་ལས་ཀྱི་རྣམ་སྤྲུལ་རྗེ་འདི་ཉིད་སྐུ་བདག་ཞུས་ན་བསྟན་འགྲོ་སྤྱི་སྒེར་ཡོངས་ལ་ཕན་པ་རླབས་ཆེན་འབྱུང་རྒྱུ་དང༌། དེ་ལྟ་ནའང་མཁྱེན་བརྩེའི་རྣམ་འཕྲུལ་སྔགས་སྤྱོད་ཀྱི་རྣམ་ཐར་འཛིན་པ་ཞིག་ཀྱང་འབྱུང་བར་གསུངས་ན། འདི་ཉིད་རིག་པ་འཛིན་པའི་གདུང་རིགས་ལས་བྱོན་པ་སོགས་རིམ་གྱིས་སྔགས་སྤྱོད་ལ་ཞུགས་ནས་གནས་ཡུལ་འགྲིམས་པ་ཞིག་ཡོང་ནའང་ངེས་མེད་ལ། སི་ཏུ་རིན་པོ་ཆེ་རང་གི་བླ་བྲང་དེར་ཟུར་དུ་སྐུ་བདག་མཛད་པ་ལས། དགོན་པ་གཞུང་གིས་ཁྲི་སྟོན་བྱེད་པ་དང་བསྟན་པའི་འགན་བཀལ་བ་སོགས་བྱེད་མི་ཉན་པའི་བཀའ་བསླབ་དང་བཅས་གནང་བར་མཛད་པ་བཞིན། དགུང་གྲངས་བདུན་གྱི་སྟེང་འཁྲུངས་གཞིས་ནས་ཆེད་དུ་ཕེབས་བསུས་གདན་འདྲེན་བཅས་དགུན་ཟླའི་འཕེལ་ཚེས་བཟང་པོར་མདོ་ཁམས་ཕྱོགས་ཀྱི་སྔ་འགྱུར་རྙིང་མའི་ཆོས་སྡེ་ཐམས་ཅད་ཀྱི་ཐོག་མར་བྱུང་ཞིང་བཀའ་གཏེར་བཤད་སྒྲུབ་ཀྱི་འབྱུང་གནས་སུ་གྱུར་པ་འགྲན་ཟླ་དང་བྲལ་བའི་གདན་ས་ཆེན་པོ་ཤར་ཀཿཐོག་རྡོ་རྗེ་གདན་གྱི་ཆོས་གྲྭར་ཞབས་ཀྱི་པདྨོ་བཀོད་པའི་ཉིན་ཁ་བ་ཆེན་པོ་བབས་ཏེ་རི་ཀླུང་དཀར་པོར་སོང་བ་རྗེ་འདིས་ཐུགས་བསྐྱེད་དང་ཕྲིན་ལས་ཀྱི་སྣང་བས་ཕྱོགས་མཐའ་དག་དཀར་འཇམ་ཡུག་གཅིག་ཏུ་བརྡལ་བ་དང༌། དཔལ་ཀཿཐོག་པའི་བཤད་སྒྲུབ་ཆོས་ཀྱི་གྲུ་ཆར་འཇིག་རྟེན་གསུམ་དུ་རྟག་ཁྱབ་ལྷུན་གྲུབ་ཀྱི་ཕྲིན་ལས་རྩོལ་མེད་དུ་འབྱུང་བའི་རྟེན་འབྲེལ་གྱི་དགེ་མཚན་རྨད་དུ་བྱུང་བ་རང་བཞིན་ལྷུན་གྲུབ་ཏུ་འགྲིགས་པར་མངོན་ནོ། །དེར་རིག་འཛིན་ཆེན་པོ་ཀློང་གསལ་སྙིང་པོའི་གཟིམས་ཁང་རྫོང་མགོ་བཀྲ་ཤིས་ཁང་གསར་དུ་བཞུགས་སྟན་འཁོད། དེ་ནས་གཟའ་ཚེས་མཆོག་ཏུ་དགེ་བར་ཆོས་སྡེ་ཆེན་པོ་དེ་ཉིད་ཀྱི་གཙུག་ལག་ཁང་གི་དབུས་ཐུབ་དབང་སྐུ་བརྙན་ལྷ་ཆེན་དཔལ་འབར་བཞུགས་པའི་མདུན་དུ། བསྐལ་བཟང་རྣམ་འདྲེན་ལྔ་པ་ཤེས་བྱ་ཐམས་ཅད་གཟིགས་པའི་པཎྜི་ཏ་ཆེན་པོའི་ཚུལ་དུ་བྱོན་པ་སྔ་འགྱུར་བསྟན་པའི་མངའ་བདག་ཏཱའི་སི་ཏུ་ཨོ་རྒྱན་ཆོས་ཀྱི་རྒྱ་མཚོ་མཆོག་གི་ཞལ་སྔ་ནས་གཙུག་ཕུད་བཞེས་པར་མཛད་ཅིང༌། འཇམ་དབྱངས་བློ་གྲོས་རྒྱ་མཚོ་ཐུབ་བསྟན་བཤད་སྒྲུབ་རྒྱལ་མཚན་དཔལ་བཟང་པོ་ཞེས་པའི་མཚན་གྱི་ཅོད་པན་འབུལ་གནང་མཛད། དེ་ཙམ་ལས་གོང་གསལ་འཇམ་མགོན་རིན་པོ་ཆེའི་བཀའ་བསླབ་ལྟར་དམིགས་བསལ་ཁྲི་སྟོན་སོགས་མ་མཛད་པར་གྲགས། ཆོས་སྡེ་ཆེན་པོ་དེར་གསན་བསམ་གྱི་རིགས་ལ་ཐུགས་བརྩོན་རྒྱ་ཆེར་གནང་བཞིན་པའི་སྐབས། རྫོང་སར་གདན་ས་དངོས་ཀྱི་མཆོག་སྤྲུལ་གློ་བུར་དུ་སྤྲུལ་པ་བསྡུས་པ་དང༌། རྗེ་འདི་ཉིད་འཇམ་མགོན་རིན་པོ་ཆེས་ངོས་འཛིན་གནང་ཞིང་སྐུ་ཆུང་ངུ་ནས་དམ་པའི་རྣམ་ཐར་མཐའ་དག་ཡོངས་སུ་རྫོགས་པར་མངའ་བའི་དབང་གིས་གོང་མའི་སྐུ་དབོན་མཛོད་སྐལ་བཟང་རྡོ་རྗེས་སི་ཏུ་རིན་པོ་ཆེར་ཐ་ཚིག་གནད་བཀར་གྱི་ཚུལ་དུ་གདན་ས་ལྟེ་བ་རྫོང་སར་དགོན་དུ་བཞུགས་འགོད་དགོས་ནན་ཆེར་ཞུས་པ་བཞིན་དུ། དགུང་གྲངས་བཅོ་ལྔའི་ལྔའི་སྟེང་ཁམས་གསུམ་འགྲོ་པའི་དཔལ་མགོན་ཆོས་ཀྱི་རྒྱལ་པོ་འཕགས་པ་རིན་པོ་ཆེས་བྱིན་གྱིས་བརླབས་ཤིང་དཔལ་ལྡན་ས་ངོར་གྱི་རིང་ལུགས་འཛིན་པའི་ཆོས་གྲྭ་ཆེན་པོ་ཤྲཱི་ན་ལེནྡྲ་གཉིས་པ་རྫོང་སར་བཀྲ་ཤིས་ལྷ་རྩེའི་འོག་མིན་བླ་མའི་བཞུགས་གནས་བཀྲ་ཤིས་འཆི་མེད་གྲུབ་པའི་དགའ་ཚལ་དུ་རིས་བྲལ་རྒྱལ་བསྟན་ཡོངས་སུ་རྫོགས་པའི་ཆོས་ཀྱི་ཁྲི་ལ་ཞབས་པད་བཀོད་པའི་རྟེན་འབྱུང་གི་སྐྱ་རེངས་འཆར་བས་རྗེ་གོང་མའི་ཕྲིན་ལས་ཀྱི་ཉིན་བྱེད་རྟག་ཁྱབ་ལྷུན་གྱིས་གྲུབ་པའི་འོད་སྣང་གི་མུ་ཁྱུད་གངས་ཅན་འཛིན་མའི་ཁྱོན་དུ་སླར་ཡང་བརྡལ་བའི་བསྐལ་བཟང་གི་རྟེན་འབྲེལ་མཆོག་ཏུ་གྱུར་པའོ། །གཞན་ཡང་མདོ་སྡེ་རྒྱན་ལས། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང༌། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ཤེས་པར་བྱ། །ཞེས་གསུངས་པ་ལྟར་སྐྱེས་བུ་དམ་པའི་རིགས་ཀྱི་ནུས་པ་ནི་སུས་ཀྱང་འགྲན་དུ་མེད་པར་རྟག་ཏུ་དམ་པའི་ངང་ཚུལ་ཅན་རྡོ་རྗེ་རིན་པོ་ཆེའི་ཁམས་བཞིན་འཕོ་འགྱུར་དང་བྲལ་བས་རྗེ་བླ་མ་ཉིད་སྐུ་རྐྱང་ལས་ནང་རྩའི་ཡོངས་འཛིན་སོགས་གཏན་ནས་མེད་ཀྱང་སྐུ་ཚུགས་བཟང་ཞིང་བཙུན་ལ་ཐུགས་ཤིན་ཏུ་སྒམ་པའི་ཚད་དུ་ཀུན་གྱི་དཔེ་ཟླར་འོས་པར་བཞུགས་ཤིང༌། བཤེས་གཉེན་དམ་པ་རྣམས་ལས་སྔར་གྱི་གསན་བསམ་རིགས་འཕྲོ་སྐྱོང་ཞིང༌། རིས་མེད་པའི་ཟབ་ཆོས་མཐའ་དག་གསན་བཞེས་དང་དོན་གཉེར་ཅན་ལ་འཆད་པ། རྟེན་བཞེངས་དང་ཚོགས་བསགས་མཆོད་འབུལ་སོགས་རྣམ་དཀར་གྱི་མཛད་པ་མཐའ་དག་ཕལ་པའི་བློ་ངོར་ཤོང་དཀའ་བར་གནང་བས་དད་ལྡན་རྣམས་སྤྲོ་བ་ཆེས་ཆེར་འཕེལ་ཞིང༌། བླུན་རྨོངས་བདུད་ཀྱིས་བློ་བསྒྱུར་བ་འགའ་ཞིག་གི་ཡིད་ལ་ཟུག་རྔུར་གྱུར་ཏེ་དངོས་བརྒྱུད་ནས་བར་དུ་གཅོད་པ་མང་ཞིག་བརྩམས་རུང༌། རྗེ་ཉིད་ནས་གང་ལའང་སྙེངས་པ་མེད་པའི་བརྟུལ་ཞུགས་དང་བྱམས་པ་ཆེན་པོ་ལས་ཐུགས་གཡོ་བ་མེད་པ་རི་དབང་ལྷུན་པོ་ལྟར་བཞུགས་པས་མེ་འབར་བ་ལ་ཤིང་བསྣན་པ་བཞིན་དམ་པའི་རྣམ་ཐར་ཆེས་ཆེར་གསལ་བའི་རྐྱེན་དུ་གྱུར་པས། ལོག་པའི་བློ་ཅན་དེ་དག་ཀྱང་རིམ་གྱིས་སེམས་ཁོང་དུ་ཆུད་ནས་སླར་རྗེ་ཉིད་ཀྱི་ཞབས་ཀྱི་པདྨོར་གུས་ཤིང་དད་པས་འདུད་པར་གྱུར། དེའང་སྐྱེས་བུ་དམ་པ་རྣམ་སྐུ་ནར་མ་སོན་པ་དང་ཐུགས་དམ་རྩལ་མ་རྫོགས་བར་དུ་བར་གཅོད་ཀྱི་རྣམ་པ་ཆེས་མང་བར་འབྱུང་མོད། བློ་ཆེན་པོ་རྣམས་ནི་དེ་དག་གིས་བརྫི་བར་མི་ནུས་པ་བྱང་ཆུབ་སྤྱོད་པའི་རྒྱན་དུ་འགྱུར་ཚུལ་ཡང༌། སྡུད་པ་ལས། དཔེར་ན་རྒྱལ་པོའི་བུ་ཞིག་ནོར་གཏོང་དོན་འདོད་པ། །ཀུན་གྱི་གཙོ་བོར་གྱུར་ཏེ་མངོན་པར་འགྲོ་བྱ་འོས། །འདི་ནི་ད་ལྟ་ན་ཡང་སེམས་ཅན་མང་དགའ་བྱེད། །ཐབས་ཐོབ་གྱུར་ཏེ་རྒྱལ་སྲིད་གནས་ནས་སྨོས་ཅི་དགོས། །དེ་ལྟར་ཤེས་རབ་སྤྱོད་མཁས་བྱང་ཆུབ་སེམས་དཔའ་ཡང༌། །བདུད་རྩི་སྦྱིན་པར་བྱེད་ཅིང་ལྷ་དང་མི་རྣམས་དགའ། །འདི་ནི་ད་ལྟ་ན་ཡང་སེམས་ཅན་མང་ཕན་བརྩོན། །ཆོས་ཀྱི་རྒྱལ་པོར་གནས་པར་གྱུར་ནས་སྨོས་ཅི་དགོས། །དེ་ཡི་ཚེ་ན་བདུད་ནི་ཟུག་རྔུ་ལྡང་བར་འགྱུར། །མྱ་ངན་ཉམས་ཐག་སྡུག་བསྔལ་ཡིད་མི་བདེ་ཉམ་ཆུང༌། །ཇི་ལྟར་བྱང་ཆུབ་སེམས་དཔའ་འདི་ཡིད་ནུར་འགྱུར་ཞེས། །འཇིགས་པ་བསྟན་ཕྱིར་ཕྱོགས་རྣམས་བསྲེག་ཅིང་སྐར་མདའ་གཏོང༌། །གང་ཚེ་མཁས་པ་དེ་དག་བསམ་པ་རབ་ལྡན་ཞིང༌། །ཉིན་མཚན་ཤེས་རབ་ཕ་རོལ་ཕྱིན་པ་མཚན་དོན་ལྟ། །དེ་ཚེ་ལུས་སེམས་དག་ནི་མཁའ་འགྲོ་བྱ་ལྟར་རྒྱུ། །ནག་པོའི་རྩ་ལག་རྣམས་ཀྱིས་གླགས་རྙེད་ག་ལ་འགྱུར། །ཞེས་གསུངས་པ་ལྟར་རོ། །སྤྱིར་ཡང་རྗེ་བླ་མ་རིན་པོ་ཆེའི་ཡབ་རྗེ་ནི་འཁྲུལ་ཞིག་གི་རྣལ་འབྱོར་དུ་བཞུགས། སྐྱབས་རྗེ་སི་ཏུ་རིན་པོ་ཆེ་བསྟན་འགྲོའི་མཛད་སྒོ་ཤིན་ཏུ་རྒྱ་ཆེ། ཡོངས་འཛིན་དགེ་རྒན་སྐུ་གཤེགས་སྔ་བའི་དབང་གིས་སྐུ་གཞོན་པའི་སྐབས་བསླབ་སྟོན་དང་སྐུ་བཅར་དོ་དམ་དམིགས་བསལ་བྱུང་ཚོད་མི་འདུག་ཀྱང༌། བསྟན་འགྲོའི་མིག་རྒྱན་གྱི་མཛད་པ་ཆེ་ཕྲ་རང་སྟོབས་ཁོ་ནས་དངུལ་ཆུ་སར་ལྷུང་བ་བཞིན་སྐྱེས་ཆེན་སུས་ཀྱང་འགྲན་དུ་མེད་པ་བསྐྱངས་བར་མཛད་པས་ན་སོ་སྐྱེའི་སྤྱོད་ཡུལ་ལས་རིང་དུ་འདས་ཤིང༌། ཁྱད་འཕགས་དམ་པའི་ཡོན་ཏན་ཐུགས་རྗེ་ཡས་སྤྲུལ་གྱི་མཛད་པ་བླ་ན་མེད་པ་སྟེ་ཀུན་གྱིས་འགྲན་ཟླས་དབེན་པའི་རྣམ་ཐར་ཤིན་ཏུ་ངོ་མཚར་བའི་གནས་སུ་གྱུར་བའོ། །གཉིས་པ་རྒྱལ་བའི་བསྟན་པ་རིན་པོ་ཆེའི་འཇུག་སྒོ་སྡོམ་པ་གསུམ་གྱི་བསླབ་པ་ཇི་ལྟར་བཞེས་པའི་ཚུལ་ནི། སངས་རྒྱས་གཉིས་པ་དབྱིག་གཉེན་ཞབས་ཀྱིས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་གསུངས་པའི་གོ་རིམ་ལྟར་བདག་ཅག་གི་སྟོན་པ་མཉམ་མེད་ཤཱཀྱ་སེང་གེའི་བསྟན་པ་རིན་པོ་ཆེའི་འཇུག་སྒོར་དཔལ་མགོན་འཕགས་པ་ཀླུ་སྒྲུབ་ལྟར་ཐོག་མར་སྡོམ་པ་གསུམ་གྱི་བསླབ་པ་རིམ་ཅན་དུ་བཞེས་པས་ཐུགས་རྒྱུད་སྡོམ་པའི་རྒྱན་གྱིས་སྤ་ཞིང༌། ཚུལ་ཁྲིམས་རྣམ་པ་གསུམ་ལ་བསླབ་སྦྱང་མཐར་སོན་པས་ཟག་མེད་ཡེ་ཤེས་ཀྱི་ཚུལ་ཁྲིམས་གསེར་སྦྱངས་བཙོ་མའི་རྒྱན་ལྟ་བུས་སྤུད་པ་ནི། དགེ་སློང་ལ་རབ་ཏུ་གཅེས་པའི་མདོ་ལས། ཤིན་ཏུ་ལེགས་པར་ཚུལ་ཁྲིམས་གང༌། །སྡོམ་པའི་མི་དེ་མཛེས་པའི་གཟུགས། །འདུལ་བ་ལ་ནི་ཉེ་བར་གནས། །ཚུལ་ཁྲིམས་བསླབ་པར་རང་ཡིད་ཆེས། །མི་དེ་ཉི་མ་གཅིག་ལ་ཡང༌། །བསོད་ནམས་ཕུང་པོ་དཔག་ཏུ་མེད། །གསོག་ཅིང་སངས་རྒྱས་འབྲས་བུ་འགྲུབ། །ཅེས་དང༌། འཕགས་པ་ཀླུས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། ཡོན་ཏན་ཀུན་གྱི་གཞི་རྟེན་ལགས་པར་གསུངས། །ཞེས་གསུངས་པ་ལྟར་ཐུབ་བསྟན་འཛིན་སྤེལ་སྐྱོང་བའི་བྱེད་པོའི་རྣམ་ཐར་གྱི་མཆོག་ཏུ་གཟིགས་ནས། དང་པོ་སོ་སོར་ཐར་པའི་སྡོམ་པ་ཇི་ལྟར་བཞེས་ཚུལ་ནི། དགུང་གྲངས་བཅུར་ཕེབས་པའི་སྐབས་བརྟན་མཁས་ཕན་འདོགས་ཀྱི་ཡོན་ཏན་ཡོངས་སུ་རྫོགས་པའི་མངའ་བདག་ཀུན་གཟིགས་དྷརྨ་སཱ་ར་མཆོག་མཁན་པོ་དང༌། རྗེ་བླ་མ་ཡབ་སྲས་ཀྱི་ཡོངས་འཛིན་དགེ་བའི་བཤེས་གཉེན་ཆེན་པོ་ཐུབ་བསྟན་རིག་འཛིན་རྒྱ་མཚོས་ལས་སློབ་སོགས་ལྔ་ཚིག་གི་དགེ་འདུན་གྲངས་ཚང་བ་ལས། འཇམ་དབྱངས་མཁྱེན་བརྩེའི་དབང་པོ་ནས་སི་ཏུ་པཎཌི་ཏ་ལ་བརྒྱུད་པ་སོ་སོར་ཐར་པའི་དགེ་ཚུལ་གྱི་སྡོམ་པ་ཐོག་མར་ཞེས་པའི་མཚན་དུ་འཇམ་དབྱངས་བློ་གྲོས་རྒྱ་མཚོ་གཙུག་ལག་ལུང་རིགས་ཉི་མ་སྨྲ་བའི་སེང་གེ་ཐུབ་བསྟན་བཤད་སྒྲུབ་རྒྱལ་མཚན་དཔལ་བཟང་པོ་ཞེས་བྱ་བ་གནང༌། སྤྱིར་མཚན་དཔེའི་མེ་ཏོག་དང་པོར་བཞད་པའི་དུས་ནས་ཡབ་རྗེ་རིག་པ་འཛིན་པས་མཚན་འཇམ་དབྱངས་ཆོས་ཀྱི་བློ་གྲོས་ཞེས་གསོལ་བ་ནས་བརྩམས། ཀཿཐོག་སི་ཏུ་པཎཌི་ཏས་ཀུན་མཁྱེན་བླ་མའི་མཆོག་སྤྲུལ་དུ་མངའ་གསོལ་བའི་མཚན་འཇམ་དབྱངས་བློ་གྲོས་རྒྱ་མཚོ། རྒྱལ་ཚབ་པདྨ་འགྱུར་མེད་རྣམ་རྒྱལ་ལས་བྱང་ཆུབ་སེམས་སྡོམ་བཞེས་པའི་སྐབས་ཀྱི་མཚན་ཕུལ་བའང་འཇམ་དབྱངས་བློ་གྲོས་རྒྱ་མཚོ་ཞེས་གསོལ་བ་དང༌། ཝ་ར་ཐར་རྩེ་ཞབས་དྲུང་རིན་པོ་ཆེས་འཇམ་དབྱངས་ཆོས་ཀྱི་བློ་གྲོས་རིས་མེད་བསྟན་པའི་རྒྱལ་མཚན་དཔལ་བཟང་པོ་ཞེས་གནང་འདུག་པས་ཁོ་བོའི་མིང་བློ་གྲོས་ཞེས་པ་འདི་རྣམ་འདྲེན་སུས་བསྩལ་ཀྱང་ནམ་ཡང་འགྱུར་བ་མེད་པས་དགོས་པ་དང་རྟེན་འབྲེལ་གྱི་གནད་ཞིག་ཡོད་པར་མངོན་ཞེས་བཀའ་ལས་ཐོས་སོ། །དགུང་གྲངས་ཉེར་དྲུག་སྟེང་མདོ་སྨད་སྔ་འགྱུར་བསྟན་པའི་ཆུ་གཏེར་རུ་དམ་ཨོ་རྒྱན་བསམ་གཏན་ཆོས་གླིང་དུ་ཕེབས་ནས་དེའི་དབེན་གནས་ཚེ་རིང་ལྗོངས་ཀྱི་བསམ་གཏན་གྱི་སྤྱིལ་བུར་མཆོག་གསུམ་སྣང་བའི་སྤྲིན་ཕུང་དུ་གཏེར་ཆེན་མཆོག་གྱུར་གླིང་པས་ཟིལ་ཁྲོམ་གངས་ཀྱི་ར་བའི་གནས་ཡིག་དུ་མཁན་ཆེན་བྱང་ཆུབ་སེམས་དཔའི་སྤྲུལ་པར་ལུང་བསྟན་པ། དགག་སྒྲུབ་གནང་གསུམ་གྱི་སྒོ་ནས་བསླབ་པར་བྱ་བའི་གནས་རྣམས་ཉེ་བར་ལུང་འབོགས་པའམ་སྟོན་པ་ལ་ཤིན་ཏུ་མཁས་པ། བསྒྲུབ་བྱ་ལ་ཤིན་ཏུ་སྙིང་བརྩེ་བ་དང་ལྡན་པས་དམན་པའི་གནས་སུ་ལྷུང་བ་ལས་ཡོངས་སུ་འཛིན་པ། དངོས་སུ་ཆོས་འདུལ་བའི་ཚུལ་ཁྲིམས་ཀྱི་བསླབ་པ་རིན་པོ་ཆེ་ལ་ཉེ་བར་སྦྱོར་ཞིང༌། བརྒྱུད་ནས་མྱང་འདས་ཀྱི་གོ་འཕང་ལ་སྦྱོར་བར་བྱེད་པའི་ཡོན་ཏན་ཕུན་སུམ་ཚོགས་པ་དང་ལྡན་པ། དོན་གྱི་སླད་དུ་མཚན་ནས་སྨོས་ན་ཐམས་ཅད་མཁྱེན་པ་འཇིགས་མེད་པདྨ་བློ་གསལ་ལམ་དཀོན་མཆོག་གྲགས་པ་མཁན་པོ་དང༌། ལས་ཀྱི་སློབ་དཔོན་མཁན་བསོད་ནམས་ཆོས་འཕེལ་སོགས་དགེ་འདུན་ལྔ་ཚོགས་ལས་བསྙེན་རྫོགས་ཀྱི་སྡོམ་པ་བཞེས་པ་ནི་སྨད་འདུལ་གྱི་སྡོམ་རྒྱུན་རྒྱལ་སྲས་གཞན་ཕན་མཐའ་ཡས་ནས། མཁན་ཆེན་པདྨ་བློ་གསལ་ལ་བརྒྱུད་པ་དང༌། ཕྱིས་སུ་དགུང་གྲངས་སོ་ལྔ་པའི་སྟེང་དབུས་སུ་ཕེབས་པའི་སྐབས་རྗེ་གོང་མའི་ཕྱག་བཞེས་དང་མཐུན་པར་གངས་རིའི་ཁྲོད་ཀྱི་པདྨ་འོད་འོག་མིན་ཨོ་རྒྱན་སྨིན་གྲོལ་གླིང་གི་གཙུག་ལག་ཁང་ཆེན་པོའི་ཐུབ་དབང་ཞལ་རས་ལྷ་ཁང་དུ། ངག་དབང་ཐུབ་བསྟན་ནོར་བུ་ལས་ཀྱང་དབང་ཐང་ཁམས་མཐུན་ཤིང་གླང་ལོའི་དུས་ཚིགས་ལྔར་ཕྱེ་བའི་དཔྱིད་ཟླ་གསུམ་པ་སྣྲོན་གྱི་ཟླ་བའི་ཡར་ངོའི་གྲལ་ཚེས་བཅུ་གཉིས་པའི་དུས་ཚོད་ཉི་མ་བཞི་ཆ་ཤར་བའི་གྲིབ་ཚོད་རྐང་པ་གཉིས་ཀྱི་ཐོག་ཚིགས་སྔ་མ་དགེ་ཚུལ་དང༌། ཉི་མ་གུང་ཚིགས་མ་ཡོལ་བའི་གྲིབ་ཚོད་རྐང་པ་གསུམ་གྱི་ཐོག་ཚིགས་ཕྱི་མ་བསྙེན་རྫོགས་མཁན་པོ་ངག་དབང་ནོར་བུ་རྒྱ་མཚོ། ལས་སློབ་འགྱུར་མེད་རྣམ་གྲོལ་རྒྱ་མཚོ། གསང་སྟོན་འགྱུར་མེད་ཤེས་རབ་བསྟན་དར། དུས་གོ་བ་འགྱུར་མེད་ཆོས་དཔལ་བསྟན་འཛིན། གྲོགས་དན་པ་དཔལ་སྤྲུལ་འགྱུར་མེད་རིག་འཛིན་ཆོས་དབང་སོགས་བཅུ་ཚོགས་ལས་ཀྱང་བསྙེན་རྫོགས་བསྐྱར་ཏེ་བཞེས་པས་སོ་སོར་ཐར་པའི་དགེ་སློང་གི་སྡོམ་ལྡན་དུ་བསྒྲུབ་པར་མཛད་པ་ནི། པཎ་ཆེན་བློ་བཟང་ཆོས་རྒྱན་གྱིས། སྡོམ་རྒྱུན་མཁན་པོ་རིན་པོ་ཆེ། །དམ་ཆོས་ཡར་འཕེལ་ཞལ་སྔ་ནས། །དང་པོ་པཎ་ཆེན་བརྒྱུད་བསྙེན་ཏེ། །ཕྱིས་ནི་མཆོག་ཏུ་དད་པ་དང༌། །གོང་འཕེལ་ཚུལ་དུ་ཐམས་ཅད་མཁྱེན། །བསོད་ནམས་རྒྱ་མཚོར་བསྙེན་རྫོགས་པས། །ཅི་ལྟར་འདོད་པ་སྦྱར་བས་ཆོག །ཅེས་གསུངས་པ་བཞིན་ནོ། །གཉིས་པ་བྱང་ཆུབ་སེམས་ཀྱི་སྡོམ་པ་བཞེས་ཚུལ་ནི། སྡོང་པོ་བཀོད་པ་ལས། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །ཞེས་དང༌། སྡུད་པ་ལས། དེ་བཞིན་འདིར་ཡང་བྱང་ཆུབ་སེམས་མེད་བདེ་གཤེགས་ཀྱི། །ཡེ་ཤེས་འཇིག་རྟེན་འདི་དག་ཀུན་ཏུ་ག་ལ་འབྱུང༌། །ཞེས་དང༌། བྱང་ཆུབ་སེམས་དཔའི་སྡེ་སྣོད་ལས། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་འདོད་པས་ལྷག་པའི་བསམ་པ་བྱང་ཆུབ་ཀྱི་སེམས་ལ་བསླབ་པར་བྱའོ། །ཞེས་འབྱུང་བ་ལྟར་དོན་གཉིས་ཕུན་སུམ་ཚོགས་པའི་སངས་རྒྱས་ཀྱི་རྒྱུ་གཅིག་པུ་བྱང་ཆུབ་ཀྱི་སེམས་རྣམ་པ་གཉིས་ལ་གཟོད་ནས་གོམས་པ་མཐར་སོན་ཀྱང་གདུལ་བྱ་རྗེས་སུ་བཟུང་བ་ལ་དགོངས་ནས་རྡོ་རྗེ་འཛིན་དངོས་འཇམ་དབྱངས་བློ་གཏེར་དབང་པོ་དང༌། ཀཿཐོག་སི་ཏུ་ཀུན་གཟིགས་ཆོས་ཀྱི་རྒྱ་མཚོ། ཞེ་ཆེན་རྒྱལ་ཚབ་འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་རྣམ་པ་གཉིས་གསུམ་ལས་དབུ་ལུགས་སྨིན་གླིང་གཏེར་ཆེན་རིན་པོ་ཆེས་མཛད་པ་དང༌། འཇམ་མགོན་བློ་གྲོས་མཐའ་ཡས་གསུང་རྒྱ་ཆེན་སྤྱོད་བརྒྱུད་ཀུན་གཟིགས་མཁྱེན་བརྩེའི་དབང་པོའི་གསུང་ལྟར་དང༌། སྐུ་ཞབས་དགེ་མང་མཆོག་སྤྲུལ་གཞན་ཕན་སྣང་བ་ལས་དབུ་མ་ལུགས་སྨིན་གཏེར་ཡིག་ཆ་ལྟར་དང༌། མཁན་ཆེན་ཀུན་བཟང་དཔལ་ལྡན་ལས་དཔལ་སྤྲུལ་རིན་པོ་ཆེའི་ཕྱག་བཞེས་ལྟར། འཇམ་མགོན་ཆོས་རྗེ་ངག་དབང་ལེགས་པ་ལས་ཟབ་མོ་དབུ་མ་དང༌། རྒྱ་ཆེན་སྤྱོད་པའི་བཀའ་སྲོལ་གཉིས་ཀའི་བྱང་ཆུབ་མཆོག་ཏུ་སེམས་བསྐྱེད་པའི་སྡོམ་པ་མཁས་གྲུབ་སོ་སོའི་གསུང་བཞིན་ཟབ་རྒྱས་སུ་གསན་ཅིང༌། དཔལ་སྤུངས་སི་ཏུ་རིན་པོ་ཆེ་པདྨ་དབང་མཆོག་རྒྱལ་པོ་ལས་ཀྱང་རྒྱ་ཆེན་སྤྱོད་བརྒྱུད་ཀྱི་སེམས་སྡོམ་བཅས་སོ་སོར་མཆོད་པའི་སྤྲིན་དང་མཎཌལ་སོགས་རྒྱས་སྤྲོས་གཟབ་རྒྱས་དང་བཅས་བཞེས། ཀུན་གཟིགས་ཀཿཐོག་སི་ཏུ་རིན་པོ་ཆེས་འཇམ་དབྱངས་དགའ་བའི་གོ་ཆ་ཞེས་པའི་མཚན་འབུལ་མཛད་དེ་རྒྱས་སྲས་སྤྱོད་པའི་གཡར་དམ་ལེགས་པར་བཞེས་པའི་ཚུལ་གྱིས་གདོད་ནས་དག་པའི་ཐེག་པ་ཆེན་པོའི་རིགས་ཀྱི་ནུས་པ་ཡོངས་སུ་སད་པར་མཛད་དེ། བསྐལ་པ་རྒྱ་མཚོར་གཞན་ཕན་གྱི་སྤྱོད་པ་ཟབ་ཅིང་རྒྱ་ཆེ་བ་ལ་སྐད་ཅིག་རེ་རེའི་ཡུན་གྱིས་ཀྱང་འཇུག་ཅིང་ཡིད་ཅན་མཐའ་དག་ལ་སྨན་པའི་ཕྲིན་ལས་མཐའ་ཡས་པས་རྟག་པར་སྐྱོང་བའི་ཚུལ་མངོན་སུམ་དུ་གྲུབ་པ་ཉིད་དོ། །གསུམ་པ་རྡོ་རྗེ་ཐེག་པའི་དཀྱིལ་འཁོར་ཆེན་པོར་ཞུགས་ནས་མངོན་པར་དབང་བསྐུར་བས་གསང་བ་སྔགས་ཀྱི་སྡོམ་པ་བཞེས་པའི་ཚུལ་ནི། ཐོག་མར་དབང་གི་དག་བྱ་དག་བྱེད་ཀྱི་དོན་གོ་དོན་ངོ་འཕྲོད་པས་བཀའ་གཏེར་གྱི་རྒྱུད་སྡེའི་དབང་ཆེན་ཞིག་ལ་ངོས་འཛིན་དགོས་པས། རྗེ་བླ་མ་མཆོག་གི་རིགས་ཀྱི་བདག་པོ་ཐུན་མོང་མ་ཡིན་པ་སི་ཏུ་ཐམས་ཅད་མཁྱེན་གཟིགས་ལས། ཀཿཐོག་རྡོ་རྗེ་གདན་གྱི་གཙུག་ལག་ཁང་ཆེན་པོར་སྔ་འགྱུར་བཀའ་མའི་རྒྱུད་མ་ཧཱ་ཡོ་ག་ཏནྟྲ་སྡེ་བཅོ་བརྒྱད་ཀྱི་རྩ་བ་སྒྱུ་འཕྲུལ་ཞི་བ་དང་ཁྲོ་བོའི་དཀྱིལ་འཁོར་དུ་ཕྱི་ནང་གསང་བའི་ཕན་ནུས་ཟབ་མོའི་དབང་བཅས། ལུང་ཨ་ནུ་ཡོ་ག་ཚོགས་ཆེན་འདུས་པ་རྩ་བ་དང་ཡན་ལག་ཡོངས་སུ་རྫོགས་པའི་དཀྱིལ་འཁོར་དུ་ཕྱི་ནང་སྒྲུབ་གསང་གི་དབང་གི་ཆུ་བོ་བཞི་རྫོགས་གཏད་རྒྱ་དང་བཅས་པ། མན་ངག་རྫོགས་པ་ཆེན་པོ་ཨ་ཏི་ཡོ་ག་སེམས་སྡེའི་རིག་པའི་རྩལ་དབང་བཅོ་བརྒྱད། ཀློང་སྡེའི་སྒོམ་ཚུལ་བླ་མའི་བྱིན་རླབས། མན་ངག་སྡེ་བི་མ་སྙིང་ཐིག་མ་བུ་ཡང་གསང་བླ་མེད་ཀྱི་སྤྲོས་བཅས་སྤྲོས་མེད་ཤིན་ཏུ་སྤྲོས་མེད་རབ་ཏུ་སྤྲོས་མེད་བཅས། གཏེར་མ་བཀའ་བརྒྱད་བདེ་གཤེགས་འདུས་པ་བདུན་བརྒྱ་ཉེར་ལྔའི་དཀྱིལ་འཁོར་ཆེན་པོར་གདུལ་བྱ་ཞེ་སྡང་ཅན་སྒྲོལ་བ་ལམ་ཁྱེར་ཕྱི་དབང་རྫས་ལ་བརྟེན་པ་དང༌། ང་རྒྱལ་ཅན་ལྷ་ལམ་ཁྱེར་ནང་དབང་ལུས། འདོད་ཆགས་ཅན་སྦྱོར་བ་ལམ་ཁྱེར་གསང་དབང་ཡུམ། གཏི་མུག་ཅན་རྣམ་རྟོག་ལམ་ཁྱེར་དེ་ཁོ་ན་ཉིད་སེམས་ལ་བརྟེན་ནས་བསྐུར་བ་དང༌། ཤྲཱི་ནལེནྡྲ་གཉིས་པ་རྫོང་སར་བཀྲ་ཤིས་ལྷ་རྩེའི་འོག་མིན་བླ་མའི་གདན་ས་བཀྲ་ཤིས་འཆི་མེད་གྲུབ་པའི་དགའ་ཚལ་དུ་ཞབས་པད་བཀོད་པའི་རྟེན་འབྱུང་གི་སྐྱ་རེངས་འཆར་བས་རྗེ་གོང་མའི་ཕྲིན་ལས་ཀྱི་ཉིན་བྱེད་རྟག་ཁྱབ་ལྷུན་གྱིས་གྲུབ་པའི་འོད་སྣང་གི་མུ་ཁྱ⁽11e2⁾ད་གངས་ཅན་འཛིན་མའི་ཁྱོན་དུ་སླར་ཡང་བརྡལ་བའི་ཚེ་ན། འཇམ་མགོན་གོང་མའི་ཐུགས་དམ་རྩ་བ་གསང་ཆེན་རྒྱུད་སྡེའི་མཐར་ཐུགས་དཔལ་དགྱེས་པ་རྡོ་རྗེ་རྒྱུན་གྱི་ཉམས་བཞེས་སུ་མཛད་དགོས་པའི་དབང་གིས་གདན་ས་དེ་ཉིད་ཀྱི་ཆོས་རྗེ་བླ་མ་བོ་དྷི་བྷ་དྲ་ལས་དཔལ་ཀྱེ་རྡོ་རྗེའི་མན་ངག་ལུགས་ཀྱི་རྒྱུ་ལམ་གྱི་དབང་དང་པོར་གསན་བཞེས་གནང་ཞིང༌། རྗེ་འདིས་རྡོ་རྗེ་འཆང་མཁྱེན་བརྩེའི་དབང་པོ་ལས་གསན་སྙམ། ཕྱིས་སུ་དཀྱིལ་འཁོར་རྒྱ་མཚོའི་ཁྱབ་བདག་ངེས་པ་དོན་གྱི་རྡོ་རྗེ་འཆང་ཆེན་པོ་འཇམ་དབྱངས་བློ་གཏེར་དབང་པོ་མཆོག་དང༌། འཇམ་མགོན་རྡོ་རྗེ་འཆང་ངག་གི་དབང་ཕྱུག་ཀུན་དགའ་ལེགས་པའི་འབྱུང་གནས་ཕྲིན་ལས་ཀུན་ཁྱབ་དཔལ་བཟང་པོ་བཅས་ལས་གསུང་ངག་ལམ་འབྲས་དང་འབྲེལ་རྡུལ་ཚོན་ལ་བརྟེན་པའི་དཔལ་ཀྱེ་རྡོ་རྗེའི་སྨིན་བྱེད་དབང་གི་མངོན་པར་རྟོགས་པ་བརྒྱད་དང་ལྡན་པ་བཅས། ཆོས་སྡེ་ཆེན་པོ་ལྷུན་གྲུབ་སྟེང་དུ་རྡོ་རྗེ་འཛིན་དབང་བླ་མ་དམ་པ་མཁྱེན་རབ་མཐའ་ཡས་མཆོག་ལས་དུས་ཞབས་པ་ཆེན་པོ་རྗེ་མཁྱེན་བརྩེའི་དབང་པོ་བརྒྱུད་པར་བཞུགས་པའི་གཉིས་སུ་མེད་པའི་རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོའི་སྨིན་བྱེད་སློབ་མ་རྗེས་འཛིན་དང་སྟ་གོན་སྔོན་དུ་འགྲོ་བས་བྱིས་པ་འཇུག་པའི་དབང་བདུན་སོགས་དབང་གོང་མ་གོང་ཆེན་བཅས་རྡུལ་ཚོན་གྱི་དཀྱིལ་འཁོར་ལ་བརྟེན་ནས་གསན་པ་རྣམས་གཙོ་བོར་སྨོས་པ་སྟེ། གཞན་བྱ་སྤྱོད་རྣལ་འབྱོར་དང་བླ་མེད་ཀྱི་རྒྱུད་སྡེ་རྣམས་ཡོངས་འཛིན་མཁས་གྲུབ་དུ་མས་ལས་གསན་ཚུལ་འོག་ནས་རྒྱས་པར་འབྱུང་བས་མཚོན་རྡོ་རྗེ་ཐེག་པའི་རྒྱུད་སྡེ་རྒྱ་མཚོར་རིག་པ་འཛིན་པའི་སྡོམ་པ་བཞེས་ནས་སྣང་སྤྱོད་རྡོ་རྗེ་གསུམ་གྱི་རོལ་པར་དག་པ་ཆེན་པོར་འབྱམས་ཀླས་པའི་རང་བཞིན་ཆུ་བོ་རྒྱུན་གྱི་རྣལ་འབྱོར་ལས་མི་འདའ་བས་ཐ་མལ་གྱི་ཀུན་རྟོག་བདེ་སྟོང་ཕྱག་རྒྱ་ཆེན་པོའི་ཡེ་ཤེས་སུ་སྡོམ་པར་མཛད་པས་སུམ་ལྡན་རྡོ་རྗེ་འཛིན་པ་ཆེན་པོ་ཐུབ་བསྟན་མདོ་སྔགས་ཡོངས་རྫོགས་ཀྱི་མངའ་བདག་ཏུ་གྱུར་ཅིང༌། དེ་ལྟར་སྡོམ་པ་གསུམ་དང་འབྲེལ་བའི་བསླབ་པའི་གནས་ཆེ་ཕྲ་ཐམས་ཅད་ངོ་ལྐོག་མེད་པར་དྲན་ཤེས་དང་བག་ཡོད་ཀྱིས་ཐུགས་རྒྱུད་རང་བཞིན་གྱིས་བསྡམས་ནས་ལེགས་པར་བསྲུངས་པས་རྟག་ཏུ་འཁྲུལ་པ་མི་མངའ་ཞིང༌། ཀུན་གྱི་མིག་རྒྱན་དུ་གྲུབ་པའི་སྐུ་གསུང་ཐུགས་ཀྱི་མཛད་པ་མཐའ་དག་མཐོང་ན་མི་མཐུན་པ་མེད་པ་དང༌། དེ་ཡང་བག་མེད་འཆོལ་པར་སྤྱོད་པའི་རྩིང་ཧྲུལ་དང་ཧ་ཅང་གུ་དོག་གི་གཏི་ཐུག་གཉིས་ཀའི་ཕྱོགས་སུ་ལྷུང་བ་མ་ཡིན་ལ། མདོར་ན་སྐུ་གསུང་ཐུགས་ལ་ཉེས་པའི་དྲི་མས་མ་གོས་པ་ཐུགས་རྒྱུད་གཙང་ཞིང་དག་པར་བཞུགས་ཤིང༌། ཕྱིའི་རྟགས་དང་ཆ་ལུགས་ཚུན་ཆད་དགེ་སློང་གི་དངོས་པོ་ལས་ནམ་ཡང་མི་འདའ་བས་ཐུབ་བསྟན་ཡངས་པའི་ཆུ་གཏེར་མཛེས་པའི་རྒྱན་དུ་གྲུབ་པ་ནི་ཕྱི་མའི་དུས་འདིར་དཀོན་པའི་མཆོག་ཏུ་ངེས་པའི་རྣམ་ཐར་གྱི་གསང་བ་རྨད་དུ་བྱུང་བ་ཇོ་བོ་རྗེ་ཨ་ཏི་ཤ་ལྟ་བུ་སྟེ། དེང་སང་ནི་སྟོང་ལྟ་ཧད་པོའི་ཁ་ཕོ་དང༌། རྫུ་འཕྲུལ་ཡིན་པ་སྐད་ཀྱི་སྙིང་པོས་སྟོང་པའི་གྲུབ་རྟགས་དང་སྤུ་སུད་ཀྱི་མཐོང་སྣང་ཟ་ཟི་ལ་ངོ་མཚར་གྱིས་ཡིད་རྟོན་དུ་འཆའ་བ་མང་བ་ལས་འདི་དག་ནི་བསྟན་པའི་མིག་རྒྱན་དུ་ཤེས་ཤིང་ངོ་མཚར་གྱི་རྣམ་ཐར་དུ་རྟོགས་པས་དེའི་རྗེས་སུ་སློབ་པ་ཅུང་ཟད་དཀོན་ནམ་སྙམ་པའང་འདུག་གོ །གསུམ་པ་རིས་སུ་མ་ཆད་པའི་མཁས་གྲུབ་ཀྱི་སྐྱེས་བུ་དུ་མ་བསྟེན་ཏེ་གསན་བསམ་གྱི་ཕ་མཐར་སོན་པའི་ཚུལ་ནི། འཕགས་པ་སྲེད་མེད་ཀྱི་བུས་ཞུས་པའི་མདོ་ལས། རིགས་ཀྱི་བུ་ཐོས་པ་དང་ལྡན་ན་ཤེས་རབ་སྐྱེ་བར་འགྱུར། ཤེས་རབ་དང་ལྡན་ན་ཉོན་མོངས་པ་མེད་པར་འགྱུར། ཉོན་མོངས་པ་མེད་པ་ལ་བདུད་ཀྱིས་གླགས་ལྟ་བར་མི་ནུས་སོ། །ཞེས་དང༌། མདོ་སྡེ་རྒྱན་ལས། འདི་ན་དང་པོ་ཐོས་ལ་བརྟེན་ནས་ཚུལ་བཞིན་ཡིད་ལ་བྱེད་པ་འབྱུང༌། །ཚུལ་བཞིན་ཡིན་ལ་བྱེད་པ་ལས་ཀྱང་ཡང་དག་དོན་ཡུལ་ཡེ་ཤེས་འབྱུང༌། །ཞེས་དང༌། སྡུད་པ་ལས། དེ་ལྟ་བས་ན་བྱང་ཆུབ་དམ་པ་ཚོལ་བ་ཡི། །བསམ་པ་དྲག་ལྡན་མཁས་པས་ང་རྒྱལ་དེ་བཅོམ་སྟེ། །ནད་པའི་ཚོགས་ཀྱིས་གསོ་ཕྱིར་སྨན་པ་བསྟེན་པ་ལྟར། །གཡེལ་བ་མེད་པར་དགེ་བའི་བཤེས་གཉེན་བསྟེན་པར་བྱ། །སངས་རྒྱས་བྱང་ཆུབ་མཆོག་ཞུགས་བྱང་ཆུབ་སེམས་དཔའ་དག །ཕ་རོལ་ཕྱིན་དང་ལྡན་ཏེ་དགེ་བའི་བཤེས་སུ་བསྟེན། །ཞེས་གསུངས་པ་ལྟར་བསྒྲུབ་བྱ་ཐམས་ཅད་མཁྱེན་པའི་གོ་འཕང་དོན་དུ་གཉེར་བས་སྒྲུབ་བྱེད་ཀྱི་ལམ་དཔྱིས་ཕྱིན་པར་ཤེས་ཤིང་དེར་དངོས་སུ་འཇུག་པ་ལ་དང་པོ་ཉིད་ནས་ཐོས་པའི་མིག་སྒོ་ཡངས་པོར་སྒྲུབ་དགོས་པ་དང༌། ཁྱད་པར་རྒྱལ་བའི་བསྟན་པ་རིན་པོ་ཆེ་འཛིན་སྤེལ་སྐྱོང་བའི་སྐྱེས་བུ་དམ་པ་དག་ནི་ཐོས་པ་རྒྱ་མཚོས་ཐུགས་རྒྱུད་ལེགས་པར་གཏམས་པ་ཞིག་ཅིས་ཀྱང་གལ་ཆེ་ཞིང༌། དེའི་བདག་རྐྱེན་ཐུན་མོང་མ་ཡིན་པ་ནི་དགེ་བའི་བཤེས་གཉེན་བསྟེན་པ་ཁོ་ན་སྟེ། འཕགས་པ་བརྒྱད་སྟོང་པ་ལས། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱའོ། །ཞེས་དང༌། སྡུད་པ་ལས། སངས་རྒྱས་ཆོས་རྣམས་དགེ་བའི་བཤེས་ལ་བསྟེན་ཏོ་ཞེས། ཡོན་ཏན་ཀུན་གྱི་མཆོག་མངའ་རྒྱལ་བས་དེ་སྐད་གསུངས། །ཞེས་སོགས་གསུངས་པ་ལྟར་དང་པོ་ཡོན་ཏན་ཀུན་གྱི་གཞི་མ་ཡི་གེའི་ཀློག་དང་ཕྱག་བྲིས་ནི། སྔར་འཁྲུངས་གཞིས་སུ་བཞུགས་སྐབས་དགུང་ལོ་དྲུག་གི་སྟེང་ཞང་པོ་བླ་མ་དགེ་ལེགས་ཀྱི་མདུན་ནས་ལྗགས་ཀློག་བསླབས་པས་ཡིག་དཀར་ནག་བླ་མ་དགོངས་འདུས་ཀྱི་ཆོས་སྤྱོད་ཡན་ལག་བདུན་པ་དང་མཎཌལ་སོགས་ཚེགས་མེད་དུ་མཁྱེན། ཕྱིས་ཀཿཐོག་གདན་སར་ཞབས་པད་འཁོད་ནས་རིང་པོར་མ་ལོན་པར། སྐྱབས་རྗེ་སི་ཏུ་རིན་པོ་ཆེ་རང་གི་ཡོངས་འཛིན་མཁས་བཙུན་བཟང་པོའི་ཡོན་ཏན་བྱེ་བས་མངོན་པར་མཛེས་པའི་མཁན་ཆེན་ཐུབ་བསྟན་རིག་འཛིན་རྒྱ་མཚོ་བར་ཁྲོད་ཆོས་གླིང་དུ་བཞུགས་པའི་མདུན་ནས་ལྗགས་ཀློག་ཕྱག་བྲིས་ནས་བརྩམས་སྔར་གྱིས་སྦྱངས་པའི་འཕྲོས་ལ་ཐུགས་བརྩོན་གནང་བས་ལོ་གཅིག་ལྷག་གིས་ཀཿཐོག་གི་སྒྲིགས་འདོན་པུསྟི་བཅུ་སྐོར་བྱང་ཆུབ་ཅིང་སི་ཏུ་རིན་པོ་ཆེར་རྒྱུག་འབུལ་མཛད་པས་དགྱེས་རྩེར་སོན་པ་བྱུང་ཚུལ་གསུངས། སྤྱིར་ཡོངས་འཛིན་དམ་པ་འདིས་བཀའ་གཏེར་གྱི་ཕྱག་བཞེས། གསན་བསམ་སྐོར་དང་ཐ་ན་སྐུའི་བཞུགས་སྟངས་གསོལ་ཚིགས་བཞེས་སྟངས་ཚུན་དམ་པའི་ཆོས་འདུལ་བ་དང་མཐུན་པ་ཁོ་ནར་བཀའ་གནང་བས་མཚོན་ལུགས་གཉིས་ཀྱི་བསླབ་སྟོན་ཞིབ་པར་བསྩལ་བས་ད་ལྟ་མི་གྲལ་དུ་ཚུད་ཙམ་འདི་ཁོང་གི་བཀའ་དྲིན་ཁོ་ན་ཡིན་པར་གསུངས་ཤིང༌། ཕྱིས་ཡོངས་འཛིན་བླ་མ་ཉིད་ལོ་གསུམ་གྱི་རིང་བད་ཀན་བསྙུན་བཞེས་ལ། རྗེ་བླ་མ་རིན་པོ་ཆེ་གཅིག་པུས་ཆུ་ལེན་ཇ་བཀོལ་ཆབ་བསང་གི་སྣོད་བཀྲུ་བཤལ་ཡན་ཆད་ཀྱིས་མཚོན་ཞབས་ཏོག་ཆེ་ཕྲ་ཐམས་ཅད་ཉིན་མཚན་ཀུན་ཏུ་སྐྱོ་སུན་མེད་པ་དཀའ་བ་དང་ལེན་དུ་བསྒྲུབས་པས་ཡོངས་འཛིན་དམ་པས་ཀྱང་ཐུགས་ལ་ཤིན་ཏུ་བཏགས་ཏེ་ཕྱི་ནང་གི་བཀའ་སློབ་ཞིབ་རྒྱས་དང༌། རྗེ་ཉིད་ལ་ཕྱག་དཔེ་འགངས་ཆེན་མང་དུ་ཡོད་པ་རྣམས་ཕྲན་ཤི་ནས་ཁྱེད་ཀྱིས་བདག་པོ་སྤྲོད་ཅེས་གསུངས་སོ་ཞེས་བཀའ་དྲིན་དྲན་པའི་བསྔགས་བརྗོད་རྟག་པར་གནང༌། སྤྱིར་སྐྱབས་རྗེ་སི་ཏུ་ཐམས་ཅད་མཁྱེན་པ་འདི་ཉིད་མཁས་བཙུན་བཟང་པོའི་རྣམ་ཐར་རྨད་དུ་བྱུང་བས་རྒྱལ་བསྟན་རིས་མེད་པའི་ཤིང་རྟ་འཇམ་མགོན་བླ་མ་རྣམ་གཉིས་ཀྱི་རྒྱལ་ཚབ་ཏུ་གྱུར་པའི་ཐུགས་བསྐྱེད་འགྲན་ཟླ་དང་བྲལ་བའི་བདག་རྐྱེན་གྱིས་ཉེ་བར་བསྐུལ་ནས་ཤིན་ཏུ་དག་པའི་གསེར་སྦྱངས་རྒྱན་དུ་བསྐྲུན་པས་ལྷག་པར་ཡང་རིན་ཐང་དང་མཛེས་པའི་མཆོག་ཏུ་གྱུར་པ་བཞིན་རྗེ་བླ་མ་སྐྱེས་ཐོབ་ཀྱི་ཡོན་ཏན་གདོད་ནས་གནས་པ་སྦྱོར་བརྩོན་གྱིས་རྫོགས་པར་སད་པར་མཛད་དེ་བསྟན་འཛིན་ཀུན་གྱི་དབང་ཕྱུག་ཏུ་བསྒྲུབ་པའི་སླད་དུ། བྱང་ཆུབ་སེམས་དཔའི་སྡེ་སྣོད་ལས། ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་ལས་ལྡོག་པར་བྱེད། །ཐོས་པས་དོན་མ་ཡིན་པ་སྤོང༌། །ཐོས་པས་མྱ་ངན་འདས་པ་ཐོབ། །ཅེས་དང༌། རྒྱལ་ཚབ་བྱམས་པས། ཐོས་པ་ལས་བྱུང་ཤེས་པ་ཡི། །སྣང་བ་རྒྱ་ཆེ་འདིས་བརྒྱན་པས། །བློ་ཆེན་མྱུར་དུ་སངས་རྒྱས་ཀྱི། །སྤྱོད་ཡུལ་ཀུན་ལ་འཇུག་པར་འགྱུར། །ཞེས་གསུངས་ཤིང༌། དེའང་སངས་རྒྱས་སྒྲུབ་པའི་ལམ་ལ་ཞུགས་པའི་ཐོག་མར་རིག་པའི་གནས་མཐའ་དག་ལ་ཐོས་བསམ་དགོས་པའི་ཚུལ། ས་སྐྱ་པཎྜི་ཏས། རང་བློ་ཤེས་བྱའི་གནས་ལ་མ་སྦྱང་ན། །ཐམས་ཅད་མཁྱེན་པ་ནམ་མཁའི་མཐའ་ལས་རིང༌། །དེ་ལྟར་དགོངས་ནས་རྒྱལ་དང་རྒྱལ་སྲས་ཀྱིས། །རིག་པའི་གནས་རྣམས་སྦྱང་ཞེས་ལེགས་པར་གསུངས། །ཞེས་གསུངས་པ་ལྟར་ཐོག་མར་ཕྱི་ཐུན་མོང་གི་རིག་པའི་གནས་ལ་དགུང་གྲངས་བཅུ་པའི་སྟེང་ཡོངས་འཛིན་རིག་འཛིན་རྒྱ་མཚོ་ལས་སུམ་ཅུ་པ་དང༌། རྟགས་འཇུག་རྩ་འགྲེལ། དགུང་གྲངས་བཅུ་གཅིག་སྟེང་བརྡ་སྤྲོད་ཀྱི་གཞུང་དབྱངས་ཅན་མ་ཀཿཐོག་དགེ་རྩེ་པཎྜི་ཏའི་འགྲེལ་པའི་སྟེང་ནས་ཞིབ་ཁྲིད་དང༌། བཅུ་གཉིས་པའི་སྟེང་སྐར་རྩིས་ས་རིས་ལྔ་བསྡུས་ཀྱི་སྐོར་དང༌། སྔ་ཕྱི་དུས་སྐབས་ཅི་རིགས་པར་མཁས་དབང་འཇམ་དབྱངས་ལེགས་པའི་བློ་གྲོས་ཀྱི་དངོས་སློབ་དཔལ་ཡུལ་བླ་མ་ཤེར་འོད་ལས་ས་བཟང་ཊཱིཀ་སྟེང་ནས་སྒྲ་ཀཱ་ལ་པ་དང༌། མཁས་དབང་བཀྲ་ཤིས་ཆོས་འཕེལ་ལས་སྙན་ངག །བླ་སྨན་ཨ་ཚང་ལས་གསོ་བ་རིག་པ་རྒྱུད་བཞིའི་བཤད་ཁྲིད་ལག་ལེན་དང་བཅས་པ། མཁན་ཆེན་ཀུན་བཟང་དཔལ་ལྡན་ཆོས་གྲགས་ལས་ཚད་མ་རྣམ་འགྲེལ་ཕྱོགས་ལས་རྣམ་རྒྱལ་མི་ཕམ་འཇམ་པའི་དབྱངས་ཀྱི་འགྲེལ་སྟེང་ལྗགས་བཤད་སོགས་དང༌། ནང་དོན་རིག་པའི་སྐོར་རྣམས་ནི་ཀུན་གཟིགས་འཇམ་པའི་རྡོ་རྗེ་མི་ཕམ་འཇམ་དབྱངས་རྣམ་པར་རྒྱལ་བས་སྔ་འགྱུར་བསྟན་པའི་སྲོག་ཏུ་གྲུབ་པའི་དགོས་པའི་གནས་ཁྱད་པར་ཅན་དང་འབྲེལ་བར་གཟིགས་ནས་ཀུན་གཟིགས་སི་ཏུ་རིན་པོ་ཆེ་ལ་ཆེད་དུ་བཀའ་བསྩལ་པ་བཞིན་མདོ་སྨད་དབུས་འགྱུར་འཆང་ཀཿཐོག་གི་ཆོས་གྲྭར་རྒྱུད་སྡེའི་བཤད་གྲྭ་ཆེན་པོ་གསར་དུ་ཚུགས་པའི་རྟེན་འབྲེལ་གྱི་སྒོ་འཕར་ཕྱེ་བས། མདོ་རྒྱུད་ཤེས་བྱ་རབ་འབྱམས་ཀུན་མཁྱེན་ཅིང་གཟིགས་པ་ཆེན་པོ་སི་ཏུ་མ་ཧཱ་པཎྜི་ཏ་ཨོ་རྒྱན་ཆོས་ཀྱི་རྒྱ་མཚོས་འཕགས་བོད་མཁས་གྲུབ་རྣམས་ཀྱི་གཞུང་རྩ་འགྲེལ་མང་པོ་ལ་གསར་རྙིང་སོ་སོའི་བཞེད་སྲོལ་དང༌། རང་གཞན་གྲུབ་མཐའ་ཤན་འབྱེད་བཅས་ལུང་རིགས་ཀྱི་རྣམ་དཔྱོད་རྨད་དུ་བྱུང་བའི་ལྗགས་བཤད་ཞིབ་རྒྱས་སུ་བསྩལ་ཞིང༌། འཇམ་མགོན་མི་ཕམ་རིན་པོ་ཆེའི་ཐུགས་སྲས་ཀྱི་ཐུ་བོ་མཁན་ཆེན་ཀུན་བཟང་དཔལ་ལྡན་ཆོས་ཀྱི་གྲགས་པས་དེའི་སྐྱོར་དཔོན་གྱི་ཚུལ་མཛད་དེ་མཁན་སློབ་ཉི་ཟླ་ཟུང་འབྲེལ་དང༌། གཞན་ཡང་ཤར་ཀཿཐོག་གི་མཁན་ཆེན་མཁས་ཚུལ་གསུམ་གྱི་རྣམ་ཐར་འགྲན་བྲལ་མཁན་བླ་མ་བསྟན་བཟང་དང༌། ལུང་རྟོགས་ཡོན་ཏན་གྱིས་མངོན་པར་མཐོ་བའི་མཁན་ཨ་ཀ་རིན་པོ་ཆེ། སྡེ་སྣོད་འཛིན་པ་མཁན་སྐལ་བཟང་དབང་ཕྱུག་སོགས་ཀྱིས་མདོ་སྔགས་གཞུང་ལུགས་ཀྱི་བཤད་རྒྱུད་ཆུ་བོ་སྟོང་གི་འབབ་སྟེགས་མཛད་པ་ན། རྗེ་ཉིད་རིགས་པར་སྨྲ་བའི་ཐུགས་ཟིན་སྲས་ཀྱི་ཐུ་བོར་མཛད་དེ། སྐྱེས་སྦྱངས་ཀྱི་མཁྱེན་རབ་ཟབ་མོའི་དཀྱིལ་འཁོར་ཡོངས་སུ་རྫོགས་པའི་ཚུལ་གྱིས་དམ་པ་ཟུང་གི་ཞལ་སྒོ་ནས་མཁྱེན་རབ་ཀྱི་སྒོ་འབྱེད་པའི་རྟེན་འབྱུང་དུ་རྗེ་བཙུན་འཇམ་དཔལ་དབྱངས་ཀྱི་བསྟོད་པ། དཔལ་ཡེ་ཤེས་ཡོན་ཏན་བཟང་པོ་ལ་བསྟོད་པ། ཐུབ་པའི་ཁྱད་པར་འཕགས་བསྟོད། ལྷ་ལས་ཕུལ་བྱུང་གིས་ཐོག་དྲངས། སྤྱོད་འཇུག །སྡོམ་གསུམ་རྣམ་ངེས་རྩ་འགྲེལ། ཡོན་ཏན་རིན་པོ་ཆེའི་མཛོད་རྩ་འགྲེལ། ཡིད་བཞིན་རིན་པོ་ཆེའི་མཛོད་རྩ་འགྲེལ་ཡན་ལག་དང་བཅས་པ། བྱམས་ཆོས་སྡེ་ལྔ། འདུལ་བ་མདོ་རྩ་བ། དབུ་མ་རྒྱན་གྱི་འགྲེལ་ཆེན། སྒྱུ་འཕྲུལ་གསང་བ་སྙིང་པོའི་རྒྱུད་བཤད་ཟུར་ལུགས་སྨིན་གླིང་ལོ་ཆེན་དྷརྨ་ཤྲཱིས་མཛད་པའི་སྤྱི་དོན་གསང་བདག་ཞལ་ལུང་དང༌། ཚིག་འགྲེལ་གསང་བདག་དགོངས་རྒྱན་གཉིས་ཀ་མཐར་ཆགས་སུ་གསན། གཞན་ཡང་རབ་འབྱམས་པ་ཨོ་རྒྱན་ཆོས་གྲགས་ཀྱིས་མཛད་པའི་སྤྱི་དོན་རིན་ཆེན་ཕྲེང་བ། ཀཿཐོག་པ་འགྱུར་མེད་ཚེ་དབང་མཆོག་གྲུབ་ཀྱིས་མཛད་པའི་འགྲེལ་པ། སྒེག་པའི་རྡོ་རྗེའི་སྤར་ཁབ། ཉི་འོད་སེང་གེའི་རྒྱ་ཆེར་འགྲེལ། སངས་རྒྱས་གསང་བའི་ལམ་རིམ་ཆེ་ཆུང༌། རོང་ཟོམ་པའི་དཀོན་མཆོག་འགྲེལ། ཀུན་མཁྱེན་ཀློང་ཆེན་པའི་འགྲེལ་པ། གཡུང་སྟོན་པའི་འགྲེལ་པ། བཤད་པའི་ལེ་ལག་དང་བཅས་པའི་ཡིག་ཆ་ཚང་མ་གསན་པར་མཛད། གསང་བའི་བདག་པོ་བློ་གཏེར་དབང་པོ་མཆོག་ལས་དཔལ་ཀྱེ་རྡོ་རྗེའི་རྩ་རྒྱུད་བརྟག་པ་གཉིས་པ་ས་ལུགས་ཀྱི་བཤད་པ་ཞིབ་རྒྱས་སུ་གསན་པར། སློབ་དཔོན་བསོད་ནམས་རྩེ་མོའི་རྒྱུད་སྡེ་སྤྱི་རྣམ། རྗེ་བཙུན་གྲགས་པའི་ལྗོན་ཤིང་ཆེན་མོ་དང་འགྲེལ་པ་དག་ལྡན་བཅས། ཆོས་རྗེའི་ཨཥྚ་བཞི་བཤད། དཀོན་ལྷུན་ཞབས་ཀྱི་མཛེས་རྒྱན་གཉིས་དང༌། ངག་ཆོས་པའི་རྒྱུད་ཀྱི་མཆན་འགྲེལ་སོགས་གུང་སྤྲོས་པ་དང༌། ཞར་བྱུང་ཉེར་མཁོའི་ཡིག་ཆ་རྣམས་ཀྱི་བཀླག་ལུང་བཅས། མཁས་དབང་བླ་མ་བཀྲ་འཕེལ་ལས་འཇམ་མགོན་མཁྱེན་བརྩེས་འཕགས་པ་ཐོགས་མེད་ལས་ཉེ་བརྒྱུད་གསན་པའི་བྱམས་ཆོས་སྡེ་ལྔ། རྡོ་རྗེ་ཕུར་པ་རྩ་དུམ་འགྲེལ་བ་འཇམ་མགོན་གུ་ཎའི་གསུང༌། རྔོག་ལུགས་དགྱེས་རྡོར་རྩ་རྒྱུད་ཀྱི་བཤད་པ་རྔོག་ཞེ་སྡང་རྡོ་རྗེའི་འགྲེལ་པ་དང༌། འཇམ་མགོན་འགྲེལ་ཆེན་གྱི་བཤད་རྒྱུན་གཉིས་ཀ་ཞིབ་རྒྱས། བདེ་མཆོག་རྩ་རྒྱུད་ས་སྐྱའི་རྗེ་བཙུན་བསོད་ནམས་རྩེ་མོའི་འགྲེལ་པ་དང༌། བཤད་རྒྱུད་གུར་དང་སཾ་བུ་ཊིའི་བཤད་རྒྱུན་རྗེ་བླ་མ་མཁྱེན་བརྩེ་དབང་པོའི་ཉེ་བརྒྱུད་ཅན་རྣམས་དང༌། ཀུན་གཟིགས་སི་ཏུ་རིན་པོ་ཆེ་ལས་རྗེ་དགེ་འདུན་རྒྱ་མཚོའི་ཊཱིཀ་སྟེང་ནས་འཇམ་དཔལ་སྒྱུ་འཕྲུལ་དྲྭ་བའི་རྒྱུད་བཤད། ཀུན་གཟིགས་མཁྱེན་བརྩེའི་ཞལ་ལུང་ཚ་བ་ལོ་ཙཱ་རིན་ཆེན་རྣམ་རྒྱལ་གྱི་མཚན་བརྗོད་འགྲེལ་པའི་བཤད་རྒྱུན་དང༌། དབོན་སྟོད་མཁན་མཁྱེན་རབ་མདུན་ནས་འཇམ་མགོན་ཀོང་སྤྲུལ་རིན་པོ་ཆེའི་བཤད་རྒྱུན་དུས་འཁོར་བསྡུས་རྒྱུད་འགྲེལ་ཆེན་དྲི་མེད་འོད་ཀྱི་བཤད་ཁྲིད། མཁན་ཆེན་ཀུན་དཔལ་ལས་འཇམ་མགོན་མི་ཕམ་རིན་པོ་ཆེའི་འགྲེལ་ཆེན་སྟེང་ནས་རྗེ་མཁྱེན་ཀོང་རྣམ་གཉིས་ཀྱི་བཤད་རྒྱུན་དམ་པ་དང་པོའི་སངས་རྒྱས་དཔལ་དུས་ཀྱི་འཁོར་ལོའི་རྒྱུད་བཤད་དང་བཅས་གསན་པར་མཛད། ཁྱད་པར་མཁན་ཆེན་བླ་མ་ཀུན་དཔལ་གྱིས་ཁོང་ལ་གཏེར་ཆེན་བདུད་འཇོམས་རྡོ་རྗེས་ཁྱེད་རང་ལྷ་སྲས་ཚངས་པའི་མེ་ཏོག་གི་རྣམ་འཕྲུལ་ཞིག་དང་འཕྲད་དེ་ཕྲིན་ལས་རྒྱས་པར་ལུང་བསྟན་པ་བཞིན་ཀཿཐོག་བཤད་གྲྭར་འོང་བས་རྗེ་འདི་ལ་གཞུང་བཤད་རིགས་ཕུལ་ནས་ལུང་དོན་མངོན་དུ་གྱུར་པ་ཡིན་ཞེས་དད་གདུང་ཆེར་མཛད་ཅིང་ཐུགས་བརྩེས་རྟག་པར་བསྐྱངས་ནས་སྔ་འགྱུར་བའི་ལྟ་སྒོམ་སྤྱོད་པའི་ཟབ་གནད་ཐུན་མོང་མ་ཡིན་པ་དང༌། ཀུན་གཟིགས་ཕྱོགས་ལས་རྣམ་རྒྱལ་མི་ཕམ་འཇམ་པའི་དབྱངས་ཀྱི་ཞལ་ལུང་གི་བདུད་རྩི་རྣམས་ལྷུག་པར་བསྩལ་བས། སྐྱེས་སྦྱང་གི་མཁྱེན་རབ་པདྨོའི་འདབ་བརྒྱ་ཆེས་ཡངས་པའི་སྒོ་ཕྱེ་ནས་གཟུངས་སྤོབས་བློ་གྲོས་ཀྱི་ཟིལ་དངར་ཕྱོགས་ཀུན་ནས་རྒྱས་པར་མཛད། རྗེ་བླ་མ་ཉིད་ནས་ཀྱང་ཡོངས་འཛིན་བཀའ་དྲིན་ཆེ་བའི་མཆོག་ཏུ་ཐུགས་ཟིན་གྱི་གཙོ་བོར་མཛད་ལ། ཚུལ་དེ་དག་གིས་མཁྱེན་རབ་ཀྱི་སྒོ་ཕྱེ་བ་དང་བླ་མ་དང་ལྷག་པའི་ལྷས་བྱིན་རླབས་དགོངས་པ་ཀློང་རྡོལ་གྱི་སྤོབས་པའི་གཏེར་མཛོད་གྲོལ་བས་བཀའ་བསྟན་གྱི་གཞུང་རྣམས་གཟིགས་པ་ཙམ་གྱིས་སྐྱེ་བོ་ཕལ་པས་ཞིབ་རྟོག་ཅི་འདྲ་བགྱིས་པ་ལས་ལྷག་པའི་གཞུང་དེའི་གནད་དོན་མཁྱེན་པ་སོགས་རྣོ་མྱུར་ཐོགས་པ་མེད་པ་སོ་སོ་ཡང་དག་རིག་པ་བཞི་དང་སྤོབས་པའི་གཏེར་ཆེན་པོ་བརྒྱད་ཀྱི་མཛོད་བརྙེས་པའི་མཐུས་མདོ་སྔགས་ཀྱི་ཟབ་གནས་མཐའ་དག་ཐུགས་སུ་ཆུད་ཅིང་ཐུགས་ཤེས་འདྲོངས་བས་ཕྱི་ནང་གི་རིག་པའི་གནས་མཐའ་དག་མཁྱེན་ཅིང་གཟིགས་པ་ཕུལ་དུ་བྱུང་བའོ། །རྗེ་གོང་མའི་རྣམ་ཐར་ཞལ་གསུང་མར། སྔ་ཕྱིར་ཁམས་དབུས་གཙང་གསུམ་དུ། །མི་ལོ་བཅུ་གསུམ་ཐོས་པ་བཙལ། །རྡོ་རྗེ་འཛིན་དང་དགེ་བའི་བཤེས། །རིག་བྱེད་གཞུང་ལ་མཁས་པ་སོགས། །གཙུག་ནོར་བརྒྱ་དང་ལྔ་བཅུ་བསྟེན། །བཟོ་གསོ་སྒྲ་ཚད་ཡན་ལག་བཅས། །འདུལ་མཛོད་དབུ་ཕར་བཤད་སྲོལ་ཐོས། །གསར་རྙིང་རྡོ་རྗེ་ཐེག་པ་ཡི། །དབང་དང་བྱིན་རླབས་རྗེས་གནང་སོགས། །བཀའ་གཏེར་བཀའ་གདམས་ས་སྐྱ་པ། །འབྲི་སྟག་མཚུར་དང་གདན་འབྲུག་གི །སྔོན་གྱི་ལུགས་སྲོལ་མ་ཉམས་པར། །བཞུགས་པའི་སྨིན་གྲོལ་གདམས་ངག་དང༌། །བདེ་དགྱེས་གསང་གསུམ་དུས་འཁོར་ལོ། །སྒྱུ་འཕྲུལ་གསང་བ་སྙིང་པོ་སོགས། །རྒྱབ་རྟེན་རྒྱུད་ཀྱི་བཤད་པ་དང༌། །བཀའ་བསྟན་དམ་པའི་གསུང་རབ་ལུང༌། །གླེགས་བམ་བདུན་བརྒྱ་ལྷག་ཙམ་ཉན། །མདོར་ན་བཤད་བརྒྱུད་ཤིང་རྟ་བཅུའི། །རིང་ལུགས་རྒྱུན་བཞུགས་ཕལ་ཆེར་ཐོས། །ཅུང་ཟད་སྦྱངས་ཤིང་ཕྱོགས་ཙམ་ཤེས། །རང་གཞན་གྲུབ་མཐའི་ཁས་ལེན་དང༌། །ཆོས་རྒྱུས་ཤིན་ཏུ་ཆེ་བར་བྱུང༌། །ཞེས་གསུངས་པ་བཞིན་རང་ཉིད་རིགས་རུས་གོ་གནས་ཐོབ་འབྱོར་གྱིས་དྲེགས་པས་རང་ལས་དམན་པའི་བླ་མ་ལ་ཆོས་ཀྱི་ཡོན་ཏན་ཇི་ཙམ་ཡོད་ཀྱང་ཆེ་ཉམས་ཀྱི་དོགས་པས་བླ་མར་བསྟེན་མི་སྤོབས་པ་དང༌། རང་ཉིད་ཡོན་ཏན་ཅན་དུ་རློམས་པས་རྒྱུད་ཁེངས་པས་དག་སྣང་གི་མིག་འགྲིབ་ནས་གང་ཟག་སུ་ལའང་ཡོན་ཏན་ཇི་ཙམ་ཆེ་ཡང་འདུད་པར་མི་བྱེད་པ་དང༌། རང་ལུགས་ཁོ་ནར་ཞེན་ཕྱོགས་ཀྱིས་གྲུབ་མཐའ་ཆོས་བརྒྱུད་གཞན་གྱི་བརྒྱུད་འཛིན་ལ་ཡོན་ཏན་ཇི་ཙམ་ཡོད་ཀྱང་ངོ་མཚར་དུ་མི་འཛིན་པས་དོན་དུ་མི་གཉེར་བ་གལ་ཆུང་ཆོས་ལ་བྱས་ནས་བཞག་པ་མ་ཡིན་པར་གངས་རིའི་ཁྲོད་ཀྱི་ཐུབ་བསྟན་རིན་པོ་ཆེ་ཡིན་ནོ་ཅོག་སོ་སོའི་ཆོས་རྒྱུན་ཁུངས་དང་འབྲེལ་ངེས་པ་རྣམས་ཕྱོགས་རིས་དང་ཆོག་ཤེས་མེད་པ་དུས་རྟག་ཏུ་འབད་པ་ཆེན་པོས་སྐྱོ་དུབ་མི་མངའ་བའི་དབང་གིས་མང་དུ་ཐོས་པ་རྒྱ་མཚོའི་ཕ་མཐར་ལེགས་པར་སོན་པའི་ཚུལ་ནི། ཡོན་ཏན་རིན་པོ་ཆེ་སྡུད་པ་ལས། ལྷག་པའི་བསམ་པས་སངས་རྒྱས་བྱང་ཆུབ་མཆོག་ཞུགས་པས། །སློབ་མ་བཟང་པོ་བླ་མར་གུས་ལྡན་དེ་དག་གིས། །བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང༌། །ཞེས་གསུངས་པ་ལྟར་སྐུའི་སྐྱེས་རབས་ཐམས་ཅད་དུ་ཆོས་ཚོལ་བ། སྡུད་པ། འཛིན་པ། སྤེལ་བ། ཐུགས་སུ་ཆུད་པ་ལ་གོམས་པའི་རྟེན་འབྱུང་ལྷན་སྐྱེས་སུ་མངའ་བ་ཉིད་ཀྱིས་དང༌། སི་ཏུ་རིན་པོ་ཆེ་ཉིད་རྟག་ཏུ་དམ་པའི་ཆོས་ཚོལ་བ་ལ་འཕགས་པ་རྟག་ཏུ་ངུ་དང་གཞོན་ནུ་ནོར་བཟང་ལྟ་བུ་དང༌། མང་དུ་ཐོས་པའི་མཛོད་བསགས་པས་ཐུགས་རྒྱུད་ཕྱུག་པ་སངས་རྒྱས་གཉིས་པ་དབྱིག་གཉེན་ལྟ་བུའི་རྣམ་ཐར་མངའ་བའི་སྤྱན་ལྟོས་ཀྱིས། རྗེ་བླ་མ་མཆོག་གི་ཐུན་མོང་མ་ཡིན་པའི་རིགས་བརྒྱའི་ཁྱབ་བདག་གཅིག་པུ་ཨོ་རྒྱན་ཆོས་ཀྱི་རྒྱ་མཚོ་ལས་སྔ་འགྱུར་བཀའ་མ་སྒྱུ་འཕྲུལ་ཞི་ཁྲོ། དོང་སྤྲུགས་གཉིས། ཡང་དག །ཕུར་པ། གཤིན་རྗེའི་སྐོར་དང༌། མདོ་ཚོགས་ཆེན་འདུས་པ་རྩ་བ་ཡན་ལག་གི་དབང་ཚང་མ། བཀའ་བརྒྱད་རྫོང་འཕྲང་གིས་མཚོན་སྔ་འགྱུར་བཀའ་མའི་སྐོར་ཕལ་ཆེ་བ། ཉང་གཏེར་གུར་དྲག་བདེ་གཤེགས་འདུས་པའི་དབང༌། བླ་མ་དམར་ཁྲིད་ཞིབ་རྒྱས། གུར་དྲག་དང་ཐུགས་ཆེན་པོད་ལུང༌། ཁྲོས་ནག་གི་སྨིན་གྲོལ་དང་མཁའ་འགྲོ་ཆེན་མོ་བཅས་གཞུང་པོད་ལུང༌། ཆོས་དབང་བླ་མ་གསང་འདུས། རྫོགས་ཆེན་སངས་རྒྱས་མཉམ་སྦྱོར། ཐུགས་ཆེན་ཡང་སྙིང་འདུས་པ་བཅས་ཀྱི་དབང་ཁྲིད་དང་པོད་ལུང་ཚང་མ། རྒྱུད་བཅུ་བདུན་གྱི་དབང༌། སངས་གླིང་དགོངས་འདུས་དོན་དབང༌། ཀར་གླིང་ཞི་ཁྲོའི་སྨིན་གྲོལ་ཞིབ་རྒྱས་དང་པོད་ལུང་བཅས། ཀུན་གཟིགས་ལྔ་པའི་དག་སྣང་གསང་བ་རྒྱ་ཅན་ཉེར་ལྔའི་དབང་ཁྲིད་ཤིན་ཏུ་ཞིབ་རྒྱས། སྨིན་ལུགས་གཏེར་མགོན་ཞལ་བཞིའི་ཟབ་ཁྲིད་ཐུན་མིན། རྫོགས་པ་ཆེན་པོ་སྙིང་ཐིག་ཡ་བཞིའི་དབང་ཁྲིད་ལུང་བཅས་ཚང་མ། ཀློང་གསལ་བདུད་འདུལ་གཏེར་ཆོས་ཡོངས་རྫོགས་ཀྱི་དབང༌། གྲུབ་ཆེན་ཐང་སྟོང་རྒྱལ་པོའི་གསང་སྤྱོད་མཁའ་འགྲོ་སྙན་བརྒྱུད་ཀྱི་ཆོས་སྐོར་ཡོངས་རྫོགས་དང༌། ཀུན་གཟིགས་འཇམ་པའི་དབྱངས་པདྨ་འོད་གསལ་མདོ་སྔགས་གླིང་པའི་ཟབ་གཏེར་སྒྲུབ་ཐབས་སྙིང་པོ་སྐོར་ལྔ། གྲུབ་ཐོབ་ཆེན་པོའི་ཐུགས་ཐིག །གྲུབ་ཐོབ་བཀའ་བརྒྱད་སོགས་སི་ཏུ་རིན་པོ་ཆེ་ཉིད་ལུང་ཟིན་ཆོས་ཀྱི་བདག་པོར་གྱུར་པས་འཇམ་མགོན་བླ་མ་རིན་པོ་ཆེ་རྣམ་པ་གཉིས་ཀ་ལས་གསན་པ་དང༌། བླ་མ་བསྟན་གཉིས་སྐོར་གསུམ། འཆི་མེད་མཚོ་སྐྱེས་སྙིང་ཐིག །སྙན་བརྒྱུད་གཤིན་རྗེ། སྙན་བརྒྱུད་ཡང་ཕུར་སྦྲགས་མ། དག་སྣང་གཏེར་ཆེན་མཆོག་གླིང་འདས་རྗེས་རིགས་འདུས་པདྨའི་མྱུ་གུའི་རྩ་དབང་རྒྱས་པ། རྩ་གསུམ་བདེ་གཤེགས་འདུས་པ་དང་སྤྱི་འདུས། ཡང་གཏེར་རྩ་གསུམ་དྲིལ་སྒྲུབ་ཀྱི་དབང་ཁྲིད། འཆི་མེད་འཕགས་མའི་སྙིང་ཐིག་གི་སྨིན་བྱེད་རྒྱུན་ཁྱེར་ལྷ་ཁྲིད་བཅས། མི་ཏྲའི་ཚེ་དཔག་དཀར་དམར། དག་སྣང་ཁྲི་སྲོང་བླ་སྒྲུབ། སྐུ་གསུམ་བླ་མའི་རྣལ་འབྱོར། རྩ་བ་ཡན་ལག་གི་དབང་ལུང༌། མཁྱེན་བརྩེའི་གསུང་ཀརྨ་ཆགས་མེད་ཀྱི་བླ་མའི་རྣལ་འབྱོར་གྱི་དབང༌། སྙིང་ཐིག་རྡོར་སེམས་མངོན་དགའི་ཞིང་སྦྱོང་དག་སྣང་རྩ་གསུམ་འོད་གསལ་སྙིང་ཐིག་གི་ཆོས་སྐོར་ཡོངས་སུ་རྫོགས་པའི་རྩ་བ་དང་ཡན་ལག་གི་དབང༌། ཁྲིད་ལུང་བཅས་ཆིག་རྫོགས། ཀློང་ཆེན་སྙིང་ཐིག་ཡུམ་བཀའི་ནང་སྒྲུབ་སྒྲོལ་མ་ཉེར་གཅིག་གི་དབང་སོགས་ཟབ་གནད་ཆེ་ཤོས་སྐོར་ཕལ་ཆེར་དང༌། ཐམས་ཅད་གཟིགས་པ་མི་ཕམ་རིན་པོ་ཆེའི་རྒྱུད་ལུགས་འཇམ་དཔལ་ཞི་བའི་སྒྲུབ་ཐབས་ཀྱི་དབང་ཆེན། རས་ཆུང་སྙན་བརྒྱུད་ཀྱི་བདེ་མཆོག་ལྷན་སྐྱེས་ཡབ་བཀའ་དང་ཡུམ་བཀའི་བྱིན་རླབས་ཁྲིད་བཅས། མཁྱེན་གསུང་ཡིག་ཆ་རྣམས་ཀྱི་ལྗགས་ལུང༌། གྲོལ་མཆོག་ཞབས་ཀྱི་ཟབ་ཁྲིད་བརྒྱ་རྩ་ཞིབ་རྒྱས། གླིང་རྗེ་དྲུང་པདྨ་འགྲོ་འདུལ་གཏེར་ཆོས་ཚང་མ། སྔ་འགྱུར་རྒྱུད་འབུམ་རིན་པོ་ཆེ་པོད་ཉེར་ལྔའི་ལྗགས་ལུང་གིས་མཚོན་པའི་ཟབ་གསང་དབྱིག་གི་སྙིང་པོ་རྒྱ་ཆེར་གསན་པ་དང༌། དྲི་མེད་ཞིང་སྐྱོང་རྗེ་དབོན་རིན་པོ་ཆེ་པདྨ་རྒྱལ་མཚན་ལས་ཀློང་གསལ་དང་བདུད་འདུལ་ཆོས་སྐོར་གྱི་ལུང༌། མཁྱེན་བརྩེ་རིན་པོ་ཆེའི་བཀའ་འབུམ་ཟིན་བྲིས་སྐོར་པོད་གཉིས་ཙམ། ཁམས་བྱོན་མགོན་པོ་ཚོགས་བདག་གི་གཞུང་པོད། བཀའ་འདུས། མ་ཎི་བཀའ་འབུམ། སྙིང་ཐིག་རྡོར་སེམས་མངོན་དགའི་དབང་ལུང༌། རིག་འཛིན་སྲོག་སྒྲུབ་དབང་ལུང་ཆ་ཚང༌། ཕག་མོ་སོགས་རྒྱ་ཆེར་གསན་ཅིང༌། རྗེ་དབོན་འདི་ཉིད་ལུགས་གཉིས་ཀྱི་མཁྱེན་རྒྱ་དང་སྐུ་ཡོན་འགྲན་ཟླ་བྲལ་བས་བླང་དོར་གྱི་མཛད་སྒོ་རྗེ་བླ་མ་སྐུ་ན་གཞོན་པའི་སྐབས་སྐུ་ཉམས་ལ་ཕན་པའི་བཀའ་དྲིན་ཤིན་ཏུ་ཆེ་བའི་བླ་མ་ཡིན་ཅེས་བཀའ་ལས་ཐོས། དགུང་ལོ་བཅུ་བདུན་ཐོག་ཏུ་ལཱ་སྱེ་རི་ཁྲོད་དུ་ཐར་རྩེ་མཁན་ཆེན་བྱམས་པ་ཀུན་དགའ་བསྟན་པའི་རྒྱལ་མཚན་སོགས་ཀྱི་དངོས་སློབ། མཁས་བཙུན་བཟང་པོའི་རྣམ་ཐར་རྨད་དུ་བྱུང་བས་ས་ངོར་གྱི་བསྟན་པའི་མཛེས་རྒྱན་ཆེན་པོ། འཇམ་མགོན་བླ་མ་ཉི་ཟླ་ཟུང་དང་ལྷག་པར་རྗེ་བླ་མ་མཁྱེན་བརྩེ་དབང་པོའི་ཞབས་པད་བགྲང་བྱ་ཉི་ཤུའི་སྐོར་ལ་བརྟེན་ནས་གསར་རྙིང་གི་ཟབ་རྒྱས་གདམས་པའི་བཅུད་མཐའ་དག་ཡོངས་སུ་རྫོགས་ཤིང་སྐུ་གསུང་ཐུགས་ཀྱི་ཡོན་ཏན་བུམ་པ་གང་བྱོའི་ཚུལ་དུ་བཞེས་པ་ནང་ཐུགས་ཀྱི་སྲས་མཆོག་གསང་ཆེན་རྒྱུད་སྡེའི་ཤིང་རྟ་ཆེན་པོ་འཇམ་དབྱངས་བློ་གཏེར་དབང་པོའི་མདུན་ཆེད་དུ་ཕེབས་པས། བཞུགས་ཁྲི་གོས་ཆེན་སིའུའི་བཞུགས་གདན་སྙེ་འབོལ་དང་བཅས་པའི་སྟེང་བཞུགས་སུ་གསོལ་ནས་ཡབ་སྲས་འཕྲད་པ་ལྟ་བུའི་གསུང་གླེང་ཞིབ་པར་མཛད་དེ་ཐུན་མོང་མ་ཡིན་པའི་ཐུགས་བརྩེས་ལྷག་པར་བསྐྱངས་བས་རྗེ་བླ་མ་མཆོག་ཀྱང་བཅོས་མིན་གྱི་དད་གདུང་ཤུགས་འབྱུང་གིས་ཐུགས་ལ་འཁྲུངས་པའི་ངོ་མཚར་དུ་གྱུར་པ་དང༌། རིམ་པར་རྗེ་བླ་མ་རྡོ་རྗེ་འཛིན་དངོས་བློ་གཏེར་ཞབས་མཆོག་དང༌། བྲག་ར་ཞབས་དྲུང་རྡོ་རྗེ་འཆང་བཀྲ་ཤིས་རྒྱ་མཚོ་སྟེ་རྣམ་གཉིས་ལྷན་རྒྱས་པས་རྒྱུད་སྡེ་རིན་པོ་ཆེ་ཀུན་ལས་བཏུས་པའི་བཀའ་ཆོས་ཀྱི་དབུ་ཚུགས་ཏེ། བྱ་རྒྱུད་རྩ་བ་རིགས་གསུམ་སྤྱི་དཀྱིལ་ནས་བརྩམས་རྣལ་འབྱོར་རྒྱུད་ཡན་ཆད་རྫོགས་ནས་རེ་ཞིག་བཀའ་ཆོས་ཕྱིར་འགྱངས་སོང་བར། ཟུར་དུ་བློ་གཏེར་ཞབས་ལས་ཞེན་པ་བཞི་བྲལ། བློ་སྦྱོང་དོན་བདུན་མའི་ཁྲིད་སྐོར་རྩ་བ་ཡན་ལག་ཤིན་ཏུ་མང་པོ། གསང་ཆེན་རྒྱུད་སྡེའི་ཡང་སྙིང་གསུང་ངག་རིན་པོ་ཆེ་ལམ་འབྲས་བུ་དང་བཅས་པ་ཐུན་མིན་སློབ་བཤད་ཀྱི་སྨིན་གྲོལ་ཟབ་རྒྱས་སུ་གསན། ཀུན་གཞི་རྒྱུ་རྒྱུད་ཀྱི་ལྟ་བ་འཁོར་འདས་དབྱེར་མེད་ཀྱི་སེམས་ཚོལ་ངོ་སྤྲོད་རྒྱས་པར་གནང་བའི་རྐྱེན་གྱིས་རིག་སྟོང་ཡེ་ཤེས་ཀྱི་དགོངས་པ་ཐུགས་རྒྱུད་ལ་སད་པའི་ཚུལ་མཛད་པས། རྗེ་བླ་མ་འདི་ཉིད་ཐུན་མོང་མ་ཡིན་པའི་རིགས་ཀྱི་བདག་པོར་ངེས་པའི་དད་གདུང་དང་བསྔགས་བརྗོད་ཤིན་ཏུ་ཆེ་བ་ཡང་ཡང་མཛད། སྤྱིར་འཇམ་མགོན་བློ་གཏེར་ཞབས་འདི་ཉིད་ལ་ཆོས་རྗེ་དཔལ་སྤྲུལ་རིན་པོ་ཆེའི་ཐུགས་སྲས་སྨྱོ་ཤུལ་ལུང་རྟོགས་བསྟན་པའི་ཉི་མ་ལས་རྫོགས་ཆེན་མན་ངག་སྙིང་ཐིག་གི་སྨིན་ཁྲིད་ཀྱང་གསན་སྦྱང་ནན་ཆེར་མཛད་པས་འོད་གསལ་མན་ངག་སྡེའི་རྟོགས་པ་དོན་གྱི་བརྒྱུད་པའང་ཆུ་བོ་གཅིག་དྲེས་སུ་བཞུགས་པར་གསུངས་པ་ཞར་ལ་འཕྲོས་ཏེ། མདོར་ན་དོན་གྱི་གསང་བ་དཀྱིལ་འཁོར་རྒྱ་མཚོའི་ཁྱབ་བདག་དཔལ་ཧེ་རུ་ཀ་ཆེན་པོ་དང་རྣམ་དབྱེར་མེད་པའི་བདག་ཉིད་དུ་ངེས་ཀྱང་རྣམ་པ་ཚུར་མཐོང་གི་གདུལ་བྱའི་སྣང་ངོར་འཇམ་དབྱངས་བླ་མའི་རྩ་བའི་ཐུགས་དམ་དགྱེས་པ་རྡོ་རྗེ་ཡིན་པའི་སྔོན་སྨོན་གྱི་མཐུས་གསུང་ངག་སློབ་བཤད་ཚིག་ཙམ་དུ་མ་གྱུར་པ་སྙན་བརྒྱུད་ཚད་མ་བཞི་ལྡན་སྒྲ་ཇི་བཞིན་པ་མངོན་དུ་མཛད་པ་སྟེ། དེང་སང་དུས་དབང་གིས་གསར་རྙིང་ཀུན་གྱིས་གདམས་ཁྲིད་རྣམས་ཕལ་ཆེར་བཤད་ཡམ་དང་ཁྲིད་ལུང་ཙམ་དུ་སོང་ཞིང༌། རྟོགས་པའི་བསྟན་པ་མཚན་ཙམ་དུ་གྱུར་པའི་སྐབས་འདིར་ངོ་མཚར་ཁྱད་འཕགས་ཀྱི་གནས་སུ་ངེས་པས་ཆོས་འདིའི་ལུགས་འཛིན་པ་རྣམས་ནས་མཁྱེན་བརྩེ་རིན་པོ་ཆེ་རྣམ་པ་གཉིས་བཞུགས་པའི་ཁྲིད་རྒྱུན་སྐྱོང་བར་མཛད་པ་གལ་ཆེ་སྙམ་མོ། །ཞབས་དྲུང་རིན་པོ་ཆེ་བཀྲ་ཤིས་ཞབས་ལས་མི་ཏྲ་བརྒྱ་རྩ་དང༌། ངོར་དཀྱིལ་བདུན། རྭ་ལུགས་འཇིགས་བྱེད་ལྷ་དགུ། ཚར་ལུགས་ལྷ་བཅུ་གསུམ་མ་བཅས་ཀྱི་དབང་ཆེན། ངག་ཆོས་པའི་ཡིག་ཆ་སྟེང་ནས་ལམ་འབྲས་ལྗགས་བཤད་བཅས་གསན། གདན་སར་ཞབས་པད་བཀོད་ནས་ལྕགས་ཁྱི་ཆོ་འཕྲུལ་ཟླ་བའི་མར་ངོ་རྗེ་གོང་མའི་སྐུ་མཆོད་ཀྱི་རྗེས་གཟའ་སྐར་དགེ་བར་སླར་མཁས་ཤིང་གྲུབ་པ་བརྙེས་པའི་རྡོ་རྗེའི་སློབ་དཔོན་ཆེན་པོ་ཡབ་རྗེ་རིག་པ་འཛིན་པ་འགྱུར་མེད་ཚེ་དབང་རྒྱ་མཚོ་མཆོག་གི་ཞལ་སྔ་ནས་སྔ་འགྱུར་བཀའ་མ་ཚོགས་ཆེན་འདུས་པ་དང༌། ཞི་ཁྲོ་ན་རཀ་དོང་སྤྲུགས། གཏེར་མ་བཀའ་བརྒྱད་བདེ་གཤེགས་འདུས་པ་བཅས་ཀྱི་དབང་ཆེན་རྣམས་ཀྱི་སྒོ་ཕྱེ་ནས་རིན་ཆེན་གཏེར་མཛོད་ཆེན་པོའི་རྒྱུད་དང་སྒྲུབ་སྡེའི་གོ་རིམ་གཞུང་ལྟར་ཚང་བ་དང༌། གཏེར་ཆེན་མཆོག་གླིང་གི་ཆོས་སྐོར་ཡོངས་རྫོགས་ཀྱང་དེ་དང་ཆབས་ཅིག་སྨིན་གྲོལ་རྫོགས་པར་མཛད་དེ། མདོར་ན་ཟླ་བ་བརྒྱད་ཀྱི་བར་དུ་ཞིབ་རྒྱས་སུ་གསན་པར་མཛད། ལྕགས་ཕག་ལོར་རྗེ་བློ་གཏེར་ཞབས་ལ་གསོལ་བ་བཏབ་པས་དགོངས་གཏད་བཅས་བཀའ་ལུང་ཕེབས་གསལ་བཞིན་ལྷུན་གྲུབ་སྟེང་གི་མཁན་ཆེན་རྡོ་རྗེ་འཛིན་པ་ཆེན་པོ་ངག་དབང་བསམ་གཏན་བློ་གྲོས་ལས་སྒྲུབ་ཐབས་རིན་པོ་ཆེ་ཀུན་ལས་བཏུས་པའི་སྨིན་གྲོལ་ལུང་བཅས་དང༌། མཁའ་སྤྱོད་བེ་བུམ་པོད་གསུམ་གྱི་ལུང་སོགས་མང་དུ་གསན། ཆུ་བྱི་ལོར་ཝ་ར་ཐར་རྩེ་ཞབས་དྲུང་བྱམས་པ་ཀུན་བཟང་བསྟན་པའི་ཉི་མ་ལས་རྒྱུད་སྡེའི་བཀའ་ཆོས་འཕྲོ་རྣལ་འབྱོར་བླ་མེད་སྐོར་མན་ཆད་ཀྱི་དབང་ཁྲིད་ལུང་བཅས་ཞིབ་རྒྱས་ཟླ་བ་བཞི་ལྷག་པར་གསན་ཅིང༌། ཞབས་དྲུང་འདི་ཉིད་དམ་པའི་ཡོན་ཏན་གྱིས་ཐུགས་རྒྱུད་ཕྱུག་པས་སྐུ་ཚེ་རྒྱུན་རིང་དུ་བཞུགས་ན་ས་ངོར་བསྟན་པའི་མཛེས་རྒྱན་དུ་ངེས་པར་གྲུབ་པ་ཞིག་ཡོད་ཅེས་ཡང་ཡང་གསུང༌། དེ་ནས་སྔ་ཕྱི་ཅི་རིགས་པར་དཔལ་སྤུངས་མཁས་དབང་བླ་མ་ཀརྨ་བཀྲ་ཤིས་ཆོས་འཕེལ་ལས་དཔལ་ལྡན་ཤངས་པའི་གསེར་ཆོས་སྐོར་གྱི་དབང་ཁྲིད་ལུང་བཅས་ཞིབ་ཚགས། ཇོ་ལུགས་དཔལ་དུས་ཀྱི་འཁོར་ལོའི་སློབ་མ་རྗེས་འཛིན། སྟ་གོན། བྱིས་འཇུག །མཆོག་དབང་ཐུན་མོང་དང་ཐུན་མིན། རྡོ་རྗེ་སློབ་དཔོན་བདག་པོ་དང་བདག་པོ་ཆེན་པོའི་དབང་བཅས། ཁྲིད་ཡིག་ལྷན་ཐབས་སྦྱར་བའི་སྨིན་ཁྲིད། ཏཱ་ར་ནཱ་ཐའི་གསུང་བསྐྱེད་རྫོགས་རྣམ་བཤད་དང་སྒྲུབ་དཀྱིལ་སོགས་ཀྱི་ལུང་འདི་སྐོར་ཕྱོགས་གཏོགས་བཅས་དང༌། ཞི་བྱེད་དང་གཅོད་སྐོར། རྡོ་རྗེ་གསུམ་གྱི་བསྙེན་སྒྲུབ་བཅས། གདམས་མཛོད་དུ་བཞུགས་རིགས་ཀྱི་སྨིན་གྲོལ་ལུང་བཅས། སྒྲོལ་མ་རྣལ་འབྱོར་མའི་དབང་ཆེན་དང་རིག་གཏད་རྗེས་གནང་རྒྱུད་བཤད་ཁྲིད་བཅས། ཟབ་ཁྲིད་བརྒྱ་རྩ་ཁྲིད་ལུང༌། ཇོ་བོའི་ཆོས་ཆུང་བརྒྱ་རྩ། བཀའ་གདམས་གླེགས་བམ་རིན་པོ་ཆེའི་ལུང༌། མར་མིའི་རྣམ་མགུར་དང་དྭགས་པོའི་བཀའ་འབུམ་ལུང༌། ཐར་རྒྱན་དང་ལམ་མཆོག་རིན་ཆེན་ཕྲེང་བའི་བཤད་ཁྲིད་བཅས། ཡང་དགོན་པའི་རི་ཆོས་སོགས་ཀྱི་ལུང༌། འཁོན་ལུགས་ཕུར་པ་ཇོ་ནང་རྗེ་བཙུན་རིན་པོ་ཆེའི་སྒྲུབ་དཀྱིལ་ལ་འཇམ་མགོན་ཀོང་ཆེན་ཞབས་ཀྱི་མཛེས་རྒྱན་གནང་བའི་སྟེང་ནས་ཀུན་གཟིགས་མཁྱེན་བརྩེའི་ཉེ་བརྒྱུད་ཀྱི་བྱིན་རླབས་དང་ལྡན་པའི་དབང་ལུང་ཁྲིད་བཅས། ས་ལུགས་ཡིག་ཆའི་སྟེང་ནས་ཀྱང་སྟོད་སྨད་དབང་ལན་གཅིག །རྗེ་མཁྱེན་བརྩེའི་དགོངས་གཏེར་རྩ་གསུམ་འོད་གསལ་སྙིང་ཐིག་གི་དབང་ཁྲིད་ལུང་དང་བཅས་པ་དང༌། ལྕེ་བཙུན་ཆེན་པོའི་བི་མ་ལའི་ཟབ་ཏིག་གི་དབང་ཁྲིད་ཚང་མ། ཤེས་བྱ་ཀུན་ཁྱབ་ཀྱི་གཞུང་རྩ་འགྲེལ་སྦྲགས་མའི་བཤད་ལུང་རྣམས་འཇམ་མགོན་ཀོང་སྤྲུལ་རིན་པོ་ཆེ་ཁོ་ན་ལས་གསན་པ་དང༌། ཐུགས་སྒྲུབ་བར་ཆད་ཀུན་སེལ་གྱི་ཞལ་གདམས་སྙིང་བྱང་རྩ་བ་ཡན་ལག་གི་གཏེར་གཞུང་ཚང་མའི་ལུང༌། སྡོམ་གསུམ་རྣམ་ངེས་འགྲེལ་ཆེན་དཔག་བསམ་སྙེ་མའི་བཤད་ལུང༌། རྗེ་གུ་ཎའི་མར་མི་གཉིས་ཀྱི་བླ་སྒྲུབ་ཀྱི་དབང་དང༌། ཀོང་སྤྲུལ་བཀའ་འབུམ་ཚང་མའི་ལུང༌། ལམ་རིམ་ཡེ་ཤེས་སྙིང་པོའི་རྩ་འགྲེལ་གྱི་བཤད་ཁྲིད་བཅས་མཁྱེན་ཀོང་མཆོག་གསུམ་ཀ་ལས་གསན་པས་བརྒྱུད་པ་ཁུངས་བཙུན་ཞིང་ཆོས་རྒྱུན་དཀོན་པའི་སྐོར་མང་པོ་གསན་ནས་ཐུགས་ཡིད་གཅིག་འདྲེས་ཀྱི་དད་གདུང་འགྱུར་བ་མེད་པའི་འདྲེན་པ་མཆོག་ཏུ་བཀུར་ཞིང༌། བླ་མ་བཀྲ་འཕེལ་མཆོག་གི་ཞལ་སྔ་ནས་ཀྱང་འཇམ་མགོན་རྣམ་གཉིས་ལ་མཆོག་སྤྲུལ་བྱོན་པ་ཐམས་ཅད་ལས་མཁྱེན་རབ་ཀྱི་རྣམ་དཔྱོད་དང་མཛད་པ་ཐམས་ཅད་རྗེ་འདི་འགྲན་ཟླ་བྲལ་བ་ཡིན་ཞེས་བསྔགས་པ་ཡང་ཡང་མཛད། སྔ་འགྱུར་བསྟན་པའི་སྲོག་ཤིང་མཁས་གྲུབ་ཆེན་པོ་ཞེ་ཆེན་རྒྱལ་ཚབ་རིན་པོ་ཆེ་འགྱུར་མེད་པདྨ་རྣམ་རྒྱལ་བྱང་ཕྱོགས་སུ་དབྱར་བསོད་ལ་ཕེབས་སྐབས་རྗེ་བླ་མ་ཕུག་དགོན་དུ་སྨན་སྒྲུབ་ཚོགས་དབུར་བཞུགས་པ་དང་མཇལ་འཕྲད་ཐོག་མར་གནང་བའི་ཚེ། གཙུག་ལག་ཏུ་དགེ་འདུན་པས་གཏེར་གསར་སྨོན་ལམ། བསྟན་པའི་དཔལ་གྱུར་བླ་མ་རིན་ཆེན་རྣམས༔ ནམ་མཁའ་བཞིན་དུ་ཀུན་ལ་ཁྱབ་པར་ཤོག༔ ཅེས་པའི་ཚིག་མཚམས་སུ་ཁེལ་བས་རྒྱལ་ཚབ་རྡོ་རྗེ་འཆང་ཤིན་ཏུ་དགྱེས་ཉམས་གནང་ཞིང༌། དེ་སྐབས་འཆི་མེད་ཡང་སྙིང་ཀུན་འདུས་ཀྱི་ཚེ་དབང་ཆོས་འབྲེལ་ཙམ་གསན། དེ་ནས་བཟུང་རྗེ་བླ་མ་རིན་པོ་ཆེས་ཐུན་མོང་མ་ཡིན་པའི་རིགས་བདག་དུ་བསྙེན་ཞིང༌། རྒྱལ་ཚབ་རིན་པོ་ཆེས་ཀྱང་དད་གདུང་ཐུགས་བརྩེས་འབྲལ་མེད་བསྐྱངས་ཏེ་རྫོང་སར་བཀྲ་ཤིས་ལྷ་རྩེའི་གདན་སར་ཆེད་དུ་ཕེབས་ནས་རྒྱུན་རིང་དུ་བཞུགས་ཏེ་མཁྱེན་བརྩེའི་ཉེ་བརྒྱུད་བྱང་གཏེར་ཡོངས་རྫོགས་དང༌། པཎ་ཆེན་རིན་པོ་ཆེའི་བཀའ་བརྒྱད་རིག་འཛིན་ཡོངས་འདུས་ཀྱི་སྨིན་གྲོལ་ལུང་བཅས། རྩེ་ལེའི་གསུང་བྱང་ཆུབ་སེམས་སྡོམ། བཀའ་མ་གཤིན་རྗེ་ཁ་ཐུན། ཞང་ཁྲོམ་ཚེ་བདག་ལྕགས་འདྲ་སྡིག །མཁྱེན་བརྩེའི་ཉེ་བརྒྱུད་རྡོར་གླིང་བཀའ་བརྒྱད་དབང་ཆེན། ཐུགས་དམ་གུ་རུ་ཆོས་དབང་ཕུར་པ་ཡང་གསང་སྤུ་གྲི། དེའི་རྣམ་བཤད་རྗེ་ཉིད་ཀྱི་གསུངས། ཀུན་མཁྱེན་འཇིགས་གླིང་གི་ཕུར་པ་རྒྱུད་ལུགས་དབང་ཆེན། རྗེ་མཁྱེན་བརྩེའི་གཏེར་ཁ་ཡང་ཕུར་སྦྲགས་མ། དེའི་རྣམ་བཤད་རྗེ་བླ་མ་མཆོག་གི་གསུང་ངོ་མཚར་ཅན་དང༌། རྫོགས་པ་ཆེན་པོ་སྙིང་ཐིག་ཡ་བཞིའི་དབང་ཡོངས་རྫོགས་དང༌། མཆོག་གླིང་གཏེར་གསར་ཨ་ཏི་ཟབ་དོན་གྱི་རིག་པའི་རྩལ་དབང༌། དགའ་རབ་སྙིང་ཐིག་གི་རྡོར་སེམས་དང་ཡང་དག །བདེ་མཆོག་སངས་རྒྱས་མཉམ་སྦྱོར་བཅས་ཀྱི་དབང་ཁྲིད་ཀྱིས་མཚོན་འཇམ་མགོན་བླ་མ་རྣམ་གཉིས་ལས་གསན་པའི་གཏེར་རྙིང་རྒྱུན་དཀོན་རིགས་མང་པོ་དང༌། དེ་རྗེས་ཞེ་ཆེན་རི་ཁྲོད་པདྨ་འོད་གླིང་ནས་སྨིན་གཏེར་ཡོངས་རྫོགས་ཀྱི་སྨིན་གྲོལ་ལུང་བཅས་གསན། དེ་སྐབས་རྒྱལ་ཚབ་རིན་པོ་ཆེ་སྐུ་བསྙུན་ལྕི་པོ་བཞེས་པར་ཞབས་བརྟན་གསོལ་འདེབས་ཞུས་པས་བསྙུན་ལས་གྲོལ་ཞིང་ཞབས་པད་ཡུན་བརྟན་གྱི་རྟེན་འབྲེལ་ལེགས་འགྲིགས་བྱུང༌། སླར་ཡང་ཆུ་བྱ་ལོར་ཞེ་ཆེན་ཡང་ཁྲོད་བདེ་མཆོག་བཀྲ་ཤིས་དགེ་འཕེལ་དུ་གདམས་ངག་རིན་པོ་ཆེའི་མཛོད་ཀྱི་སྨིན་གྲོལ་རྒྱབ་རྟེན་བཅས་ཞིབ་རྒྱས། གཏེར་མཛོད་བཀའ་རྒྱ་པོད་གསུམ་གྱི་དབང་ལུང་དང༌། རྒྱལ་ཚབ་རིན་པོ་ཆེའི་གསུང་རབ་སྔར་མ་གསན་པ་ཚང་མའི་གདམས་གཏད་བཅས་ནན་དུ་གསན་པར་མཛད། རྒྱལ་ཚབ་རིན་པོ་ཆེས་ཀྱང་རྗེ་བླ་མ་རིན་པོ་ཆེ་འདི་ཉིད་ཀྱི་མདུན་ནས་སྒྲུབ་ཐབས་ཀུན་བཏུས་གསན་བཞེད་ཀྱི་དཀར་པོ་རྣམ་གསུམ་རྗེས་གནང་ཐོག་མར་གསན་པ་ནས་བརྩམས། བཀའ་མ་གནུབས་ལུགས་གཤིན་རྗེ་ཁ་ཐུན་གྱི་དབང་ཆེན་དང༌། སྨིན་ལོའི་ཡིག་སྟེང་ནས་ཟུར་ལུགས་གསང་བ་སྙིང་པོའི་རྒྱུད་བཤད་འཇམ་མགོན་མཁྱེན་བརྩེའི་ཉེ་བརྒྱུད་ཅན་དང༌། རྩེ་ལེ་སྣ་ཚོགས་རང་གྲོལ་གྱི་བཀའ་འབུམ་ལུང་ཡོངས་རྫོགས་ཀྱིས་མཚོན་བཀའ་གཏེར་གྱི་སྨིན་གྲོལ་མང་པོ་གསན་པ་དང༌། སྐུ་གཤེགས་པའི་སྐབས་གདུང་མཆོད་ཞག་བདུན་གསུམ་རིང་བཞུགས་ཤིང་སྐུ་གདུང་ཞུགས་འབུལ་སོགས་དགོངས་རྫོགས་ཀྱི་སྐོར་དང༌། མཆོག་གི་སྤྲུལ་པའི་སྐུ་རིན་པོ་ཆེ་ཡེ་ཤེས་གཟིགས་པས་ངོས་འཛིན་དང་རྗེ་གོང་མ་ལས་གསན་པའི་དབང་ཆོས་ཕལ་ཆེར་སླར་བསྩལ་ཏེ་ཐེག་མཆོག་ཆོས་ཀྱི་ཁྲི་ལ་དབུགས་དབྱུང་བ་སོགས་བཀའ་དྲིན་ཆེན་པོས་ཁྱབ་པར་མཛད། རྗེ་དེའི་ཐུགས་སྲས་ཀོང་སྤྲུལ་རིན་པོ་ཆེ་པདྨ་དྲི་མེད་ལེགས་པའི་བློ་གྲོས་ཞབས་ལ་ཐུགས་ཡིད་གཅིག་འདྲེས་ཀྱི་ནང་མའི་གསུང་འཕྲོས་གནང་བས་རྗེ་དེའི་ཐུགས་དམ་ཉམས་བཞེས་ལ་དོགས་སེལ་དང་བླ་མའི་མཛད་ཕྲིན་སྐྱོང་ལུགས་སྐོར་གྱི་བསླབ་སྟོན་ཞིབ་རྒྱས་སུ་གནང་བ་དང༌། རྒྱལ་ཚབ་རིན་པོ་ཆེ་ལས་གསན་པའི་རྗེ་མཁྱེན་བརྩེའི་ཉེ་བརྒྱུད་དུ་བཞུགས་པའི་བཀའ་མ་ཚོགས་ཆེན་འདུས་པའི་དབང་ཡོངས་རྫོགས་དང༌། འཇམ་མགོན་རིན་པོ་ཆེས་སྒྲུབ་དབང་མཛད་པའི་རྒྱུན་བཀའ་བརྒྱད་བདེར་འདུས་ཀྱི་སྒྲུབ་དབང་ཆེན་མོ་བཅས། སྙིང་ཐིག་ཆེན་མོ་པདྨ་དང་བི་མའི་བཀའ་སྲོལ་གྱི་ལུང་ཡོངས་རྫོགས། རབ་འབྱམས་གཉིས་པ་འགྱུར་མེད་ཀུན་བཟང་རྣམ་རྒྱལ་གྱི་བཀའ་འབུམ་ལུང༌། རྒྱལ་ཚབ་རིན་པོ་ཆེའི་གསུང་གལ་གནད་ཆེ་བ་དུ་མའི་ལུང་སོགས་དབང་ཆོས་མང་དུ་གསན་ཅིང༌། ཞེ་ཆེན་རབ་འབྱམས་ལྔ་པ་འགྱུར་མེད་ཀུན་བཟང་བསྟན་པའི་ཉི་མ་ལས་ཉང་གི་ཁྲོས་ནག་དབང་བསྡུས། སྨིན་གླིང་གཤིན་རྗེ་དྲེགས་འཇོམས་དབང༌། འཆི་མེད་ཡང་སྙིང་ཀུན་འདུས། གླིང་གཏེར་ཚེ་ཡུམ་ཙཎཌ་ལིའི་དབང༌། གཏེར་ཆེན་པད་གླིང་ཆོས་སྐོར་ཡོངས་རྫོགས་ཀྱི་དབང་ལུང་སོགས་གསན་ཅིང་ཕན་ཚུན་ཐུགས་བརྩེ་དད་དམ་མཚུངས་ཟླ་མེད་པར་བཞུགས། རྒྱལ་ཚབ་རྡོ་རྗེ་འཆང་གི་ཉེ་གནས་བླ་མ་འཇམ་དབྱངས་བློ་གསལ་ལས་རྗེའི་གསུང་སྐོར་ཕལ་ཆེ་བའི་ལྗགས་ལུང་གསན། ལྕགས་སྤྲེལ་དགུང་གྲངས་ཉེར་བརྒྱད་སྟེང་བྱང་ཕྱོགས་རྡོ་སྒར་དུ་ཆེད་ཕེབས་ཀྱིས་ཀུན་མཁྱེན་འཇིགས་མེད་བསྟན་པའི་ཉི་མའི་མདུན་ནས་རྫོགས་པ་ཆེན་པོ་ཀློང་ཆེན་སྙིང་ཐིག་གི་ནང་སྒྲུབ་རིག་འཛིན་འདུས་པའི་རྩ་དབང་རྒྱས་པ་གྲུབ་ཆེན་རིན་པོ་ཆེའི་ལྗགས་བསྒྲིགས་ལྟར། ཡང་གསང་ཐིག་ལེའི་རྒྱ་ཅན་གྱི་སྨིན་བྱེད། ཀློང་སྙིང་བསྐྱེད་རྫོགས་སྐོར་དང་ཁྱད་པར་རྫོགས་པ་ཆེན་པོ་ཡེ་ཤེས་བླ་མའི་སྨིན་ཁྲིད་ཟབ་རྒྱས། ཀུན་མཁྱེན་བླ་མ་དེ་ཉིད་ཀྱི་ལེགས་བཤད་གསང་སྙིང་སྤྱི་དོན་རིན་ཆེན་མཛོད་ལྡེའི་ལྗགས་བཤད་བཅས་དང༌། ཐུན་མིན་ཐུགས་བརྩེའི་ཞལ་གདམས་ལྷུག་པར་བསྩལ་བས་ཐུགས་ཡིད་གཅིག་འདྲེས་སུ་གྱུར་ཅིང༌། ཀུན་མཁྱེན་བླ་མ་རང་གི་གསུང་རྩོམ་ལེགས་བཤད་བསྟན་བཅོས་ཐམས་ཅད་ཀྱི་གཏད་རྒྱ་ཐུན་མིན་དུ་མཛད་ནས་འཆད་ཉན་འཛིན་སྤེལ་འོས་པའི་བཀའ་ལུང་དགྱེས་པས་བསྩལ་བ་དང༌། ཕྱིས་སུ་མཆོག་སྤྲུལ་རིན་པོ་ཆེ་འཇིགས་མེད་ཐུབ་བསྟན་ཕྲིན་ལས་དཔལ་བཟང་ལས་མཁའ་འགྲོ་སྙིང་ཐིག་སོགས་དབང་ཆོས་དུ་མ་གསན། རྡོ་སྒར་མཁན་པོ་ལས་གྲུབ་ཆེན་རིན་པོ་ཆེ་འཇིགས་མེད་ཕྲིན་ལས་འོད་ཟེར་གྱི་དགོངས་གཏེར་དམ་ཆོས་བདེ་ཆེན་ལམ་མཆོག་སྐོར་གསན་པར་མཛད། ཕེབས་ལམ་ནས་གཏེར་ཆེན་ལས་རབ་གླིང་པའི་མདུན་ཆེད་ཕེབས་མཛད་ཅིང༌། གཏེར་ཆེན་འདི་མ་མཇལ་གོང་ནས་མཚན་ཐོས་པ་ཙམ་གྱིས་བཅོས་མིན་གྱི་དད་གདུང་ཐུགས་ལ་འཁྲུངས་པ་ཞིག་མངའ་བའི་དབང་གིས་སྔ་ཕྱིར་མཇལ་འཕྲད་ལན་མང་གིས་འཇམ་མགོན་བློ་གྲོས་མཐའ་ཡས་ཞབས་ཀྱི་ཟབ་གཏེར་དགོས་པའི་དབང་གིས་གཏེར་ཆེན་འདི་ཉིད་ལ་བཀའ་བབས་པ་རྡོ་རྗེ་ཕུར་པ་ཡང་སྙིང་སྤུ་གྲིའི་དབང་ཁྲིད་ལུང་བཅས། ལས་གླིང་རང་གི་གཏེར་ཆོས་ནས་ཕུར་བ་རྡོ་རྗེ་བཀོད་པ་དང༌། རྒྱ་ཆེར་རོལ་པ་བཅས། རྟེན་འབྲེལ་ཉེས་སེལ་རྒྱས་འབྲིང༌། དགོངས་གཏེར་གེ་སར་ཆོས་སྐོར་བཅས་མང་དུ་གསན་ཅིང་གཏེར་ཆོས་ཡོངས་རྫོགས་ཀྱི་གདམས་གཏད་གནང༌། ཕྲེང་གཏེར་གྲོལ་ཐིག་དགོངས་པ་རང་གྲོལ་གྱི་དབང་དང་གཞུང་པོད་ལུང༌། ལྕེ་བཙུན་ཆེན་པོའི་བི་མ་ལའི་ཟབ་ཏིག་གི་དབང་དང་ཀུན་གཟིགས་མཁྱེན་བརྩེའི་ཞལ་ལུང་ཉམས་མེད་ཀྱི་ཁྲིད་ཟིན་སྟེང་ནས་ཁྲིད་ཀྱིས་མཚོན་ཟབ་ཆོས་མང་དུ་གསན། སྤྱིར་གཏེར་ཆེན་ལས་གླིང་འདིའི་མཚན་ཐོས་པ་ཙམ་ནས་དད་གདུང་རང་བཞིན་གྱིས་སྐྱེ་བའི་དབང་གིས་རྟེན་འབྲེལ་ཉེས་སེལ་བསྡུས་པ་ཤོག་སེར་ལས་འབེབས་བསྐུལ་ཞུས་པ་ཡིན་གསུངས། མཁས་གྲུབ་གཉིས་ཀའི་རྣམ་ཐར་ངོ་མཚར་ཅན་བཞུགས་གསུངས། ཆུ་གླང་དགུང་གྲངས་སོ་གསུམ་སྟེང་ལྷ་ལྡན་གནས་གཟིགས་དང་པོར་ཕེབས་སྐབས་སྨིན་གླིང་ཁྲི་ཆེན་འགྱུར་མེད་དོན་གྲུབ་དབང་རྒྱལ་མདུན་ནས་ཚེ་སྒྲུབ་ཡང་སྙིང་ཀུན་འདུས། གཅུང་རིན་པོ་ཆེ་ངག་དབང་ཆོས་གྲགས་ལས་པད་གླིང་ཚེ་སྒྲུབ་དང་མ་ནིང་གི་དབང༌། སྨིན་ལུགས་གསང་ཡེ་དང༌། འཆི་མེད་ཡང་སྙིང་ཀུན་འདུས་ཀྱི་ཚེ་དབང༌། མགོན་དཀར་ཚེ་དབང༌། རྡོར་གླིང་མ་ནིང་གི་སྲོག་དབང་དང་རྡོར་གླིང་ཚེ་སྒྲུབ་ཀྱི་དབང༌། གྲྭ་མངོན་ཞང་བློན་གྱི་རྗེས་གནང༌། མཁན་ཆེན་ངག་དབང་མཁྱེན་བརྩེ་ནོར་བུ་ལས་ཉང་ལུགས་མགོན་པོ་ཕྱག་བཞི་པའི་དབང༌། རྡོར་འཛིན་རིན་པོ་ཆེ་རྣམ་གྲོལ་རྒྱ་མཚོ་ལས་རིག་འཛིན་ཐུགས་ཐིག་དང་དྲག་དམར་སྐོར་བཅས་གསན། རྒྱལ་མཆོག་བཅུ་གསུམ་པ་ཐུབ་བསྟན་རྒྱ་མཚོ་ལས་བྱང་ཆུབ་ལམ་སྒྲོན་གྱི་ཆོས་འབྲེལ་གསན་ཅིང༌། གཏེར་ཆེན་ལས་གླིང་དང་པད་དཀར་འཆང་བ་ཡབ་སྲས་གངས་ཅན་བསྟན་འགྲོའི་དཔལ་དུ་ཞབས་པད་བརྟན་དགོས་པའི་རྒྱུ་མཚན་ཞུས་པས་ཐུགས་དགྱེས་ཚུལ་གྱི་དབུགས་དབྱུང་བསྩལ། ཕྱིས་སྐུ་ཚེའི་སྨད་དུ་པད་དཀར་འཆང་བ་བསྟན་འཛིན་རྒྱ་མཚོ་ལས་ཐུགས་རྗེ་ཆེན་པོ་མི་ཏྲ་ལུགས་སྟག་ཕུའི་གཏེར་བྱོན་གྱི་དབང་གསན་ཅིང༌། བཀའ་མོལ་ཞིབ་པར་གནང་ཆེད་སྦུག་མཇལ་ལན་མང་དུ་ཐུན་མིན་ཐུགས་བརྩེས་བསྐྱངས་པར་མཛད། ཨ་མདོ་དགེ་བཤེས་མཁས་པའི་དབང་པོ་འཇམ་དཔལ་རོལ་པའི་བློ་གྲོས་ལས་རྩ་རྒྱུད་གསང་བ་འདུས་པའི་དབང་ཆེན། འཇིགས་བྱེད་དཔའ་བོ་གཅིག་པ་སོགས་དབང་དུ་མ་གསན་ཅིང་ཕན་ཚུན་དད་འདུན་ཆེས་ཆེ་བར་མཛད། མཆོག་གླིང་གཏེར་སྲས་རིག་འཛིན་ཚེ་དབང་ནོར་བུ་ལས་ཐུགས་སྒྲུབ་བསམ་པ་ལྷུན་གྲུབ་ཀྱི་དབང་དང༌། པདྨ་བཀའ་ཐང་གི་ལུང་སོགས་སྐུ་གཞོན་པའི་སྐབས་ཀཿཐོག་གུ་རུའི་ལྷ་ཁང་ནས་གསན་པ་དང༌། གནས་བརྟན་དགོན་གྱི་མཆོག་གླིང་སྤྲུལ་སྐུ་རིན་པོ་ཆེ་པདྨ་འགྱུར་མེད་ཐེག་མཆོག་བསྟན་འཛིན་ལས་ཐུགས་སྒྲུབ་བར་ཆད་ཀུན་སེལ་རྩ་བ་ཡན་ལག་སྐོར་ཡོངས་རྫོགས། ཟབ་བདུན་ཡང་ཕུར་སོགས་ཆ་ཚང༌། གསང་ཐིག་སྐོར་གསུམ། པདྨ་གར་དབང༌། འཁོར་བ་དོང་སྤྲུགས། རིགས་གསུམ་སྙིང་ཐིག་ཞིབ་རྒྱས། ལམ་རིམ་ཡེ་ཤེས་སྙིང་པོའི་བཤད་ཁྲིད་སོགས། ཐུགས་སྒྲུབ་ཡིད་བཞིན་ནོར་བུའི་རྫོགས་རིམ་ཉོན་མོངས་དུག་ལྔ་རང་གྲོལ་གྱི་ཟབ་དབང༌། ཆོས་སྐྱོང་དགོངས་འདུས་སྲོག་གཏད། ཤྭ་ནའི་སྲོག་ཕུར་གཏད་པ་རྫགས་ཆེན་སྡེ་གསུམ་སོགས་བཀའ་རྒྱ་སྐོར་བཅས་མཆོག་གླིང་གཏེར་ཆོས་ཡོངས་རྫོགས་དང༌། རྗེ་ཉིད་ཀྱི་གསར་བསྒྲིགས་ཟུར་བཟའི་ཐུགས་དམ་སྐོར་དྲུག་གི་དབང༌། གཞན་ཡང་ཚ་བ་ལོ་ཙཱ་བ་རིན་ཆེན་རྣམ་རྒྱལ་གྱིས་འཇམ་མགོན་མཁྱེན་ཀོང་མཆོག་གསུམ་ལས་གསང་སྙིང་གི་བཤད་རྒྱུན་ཞིབ་པར་གསན་པའི་གསུང་རྒྱུན་ལེགས་བཤད་སྒྱུ་འཕྲུལ་གསང་སྙིང་འགྲེལ་ཆུང༌། འཇམ་དཔལ་བསྟོད་སྒྲུབ་ཀྱི་རིག་གཏད་ལན་བཅུ་གསུམ་དང༌། སྨིན་གཏེར་རྡོར་སེམས་ཐུགས་ཀྱི་སྒྲུབ་པའི་དབང་ཀུན་གཟིགས་བླ་མ་རིན་པོ་ཆེ་ལས་ལན་དྲུག་ཏུ་གསན་པ་དེ་དག་གི་དབང་སོགས་གནད་ཆེན་དུ་མ་གསན། ཙི་ཀེའི་གདན་ས་སྨིན་གྲོལ་ནོར་བུ་གླིང་གི་གཏེར་ཆེན་བླ་མའི་མཆོག་སྤྲུལ་འགྱུར་མེད་བསྟན་པའི་རྒྱལ་མཚན་ལས་ཐུགས་སྒྲུབ་ཡིད་བཞིན་ནོར་བུ་བསམ་པ་ལྷུན་གྲུབ་ཀྱི་དབང༌། དགོངས་གཏེར་བི་མའི་བླ་སྒྲུབ་ཀྱི་དབང་ཁྲིད། རིག་འཛིན་སྲོག་སྒྲུབ་ཀྱི་པོད་ལུང་སོགས་མཁྱེན་བརྩེ་རིན་པོ་ཆེའི་བརྒྱུད་པ་རྣམས་གསན་པ་དང༌། གླིང་ཆོས་རྒྱལ་རིག་པ་འཛིན་པ་པདྨ་བཞད་པ་དབང་ཆེན་བསྟན་འཛིན་ཆོས་རྒྱལ་ཡབ་ཡུམ་ནས་རྗེ་བླ་མ་དགུང་ལོ་བཅུར་ཕེབས་པ་ཀཿཐོག་བཞུགས་སྐབས་མཇལ་དུ་ཕེབས་པར་ཆོས་འབྲེལ་དུ་འཇམ་དཔལ་བསྟོད་པ་གང་བློ་མའི་ལྗགས་བཤད་ཐུགས་ཐོག་ནས་གསུངས་པས་དད་གདུང་དཔེ་མེད་མཛད་དེ་སྤྱན་ཆབ་བསིལ། ཕྱིས་རྒྱལ་པོའི་ཕོ་བྲང་དུ་སྒྲུབ་ཆེན་དང་སྨན་སྒྲུབ་དུ་མའི་དབུར་གདན་དྲངས་ཤིང༌། རིག་པ་འཛིན་པ་དེ་ཉིད་ལས་ཚེ་ཡུམ་ཙཎཌ་ལཱིའི་དབང༌། ལྷ་རིགས་བདེ་ཆེན་རོལ་པ་རྩལ་གྱི་དག་སྣང་གེ་སར་རྡོ་རྗེ་ཚེ་རྒྱལ་གྱི་སྲོག་དབང་སྐོར་འཇམ་མགོན་མི་ཕམ་རིན་པོ་ཆེའི་བརྒྱུད་པ་དང༌། ཆོས་རྒྱལ་ཉིད་ཀྱི་དགོངས་གཏེར་ཚེ་ཡུམ་གྱི་རྩ་བའི་ཆོས་བདག་ཏུ་བསྔགས་ཏེ་དབང་ལུང་ཕུལ་བས་སྐུ་ཚེའི་གེགས་ལས་གྲོལ་བ་སོགས་རྟེན་འབྲེལ་ལེགས་ཚོགས་སུ་གྱུར་ཅིང་ཕན་ཚུན་དད་དམ་མཐར་སོན་པར་གྱུར། གསུང་ངག་རིན་པོ་ཆེ་ཉམས་བཞེས་སྐུ་ཚེ་གཅིག་གིས་ཟུང་འཇུག་གི་གོ་འཕང་མངོན་དུ་མཛད་པ་སྙན་བརྒྱུད་འཛིན་པ་ཀུན་གྱི་རྒྱལ་པོ་སྒ་སྟོན་རྡོ་རྗེ་འཆང་ཆོས་རྗེ་ངག་དབང་ལེགས་པ་རིན་པོ་ཆེ་ཆེད་དུ་གདན་ཞུས་ཀྱིས་བླ་སློབ་འབྲེལ་ནས་སྔ་ཕྱི་མང་དུ་མཇལ་འཕྲད་དང༌། གཙོ་བོར་གསུང་ངག་རིན་པོ་ཆེ་ཚད་མ་བཞི་ལྡན་གྱི་སྙན་བརྒྱུད་ལམ་འབྲས་སློབ་བཤད་ཆེན་མོ་ཤིན་ཏུ་ཞིབ་རྒྱས། མཁའ་སྤྱོད་བྱིན་རླབས་ཁྲིད་བཅས། རྭ་ཚར་གྱི་འཇིགས་བྱེད་བཅུ་གསུམ་པའི་དབང༌། དམར་ཁྲིད་མཁའ་འགྲོའི་སྙན་བརྒྱུད། དམར་ཁྲིད་ཚེམ་བུ་ལུགས། སྒྲོལ་དཀར་ཚེ་ཁྲིད། མདོར་ན་ས་ལུགས་དབང་ལུང་གལ་གནད་གང་ཆེའི་སྐོར་གསན་ཅིང༌། རྗེ་འདིས་ཀྱང་འཇམ་མགོན་བླ་མ་མཆོག་རིགས་ཀྱི་བདག་པོ་ཐམས་ཅད་མཁྱེན་གཟིགས་མཁྱེན་བརྩེའི་དབང་པོ་དངོས་སུ་བྱོན་པ་ཞེས་བསྔགས་བརྗོད་དང་ཐུགས་འདུན་ཤིན་ཏུ་ཆེ་བར་གནང༌། ཨེ་ཝཾ་ཐར་རྩེའི་མཁན་ཆེན་འཇམ་དབྱངས་ཀུན་བཟང་བསྟན་པའི་ཉི་མ་ལས་ཀྱེ་རྡོར་རྒྱུ་ལམ་གྱི་དབང་ཆེན་དང༌། ལམ་ཟབ་ཕྱི་ནང་གི་བྱིན་རླབས། ཐར་རྩེ་ཞབས་དྲུང་ནམ་མཁའ་ཀུན་བཟང་བསྟན་པའི་རྒྱལ་མཚན་ལས་ཚེ་དཔག་ལྷ་དགུའི་དབང༌། སྟག་ཞོན་གྱི་རྗེས་གནང་དང་གཞུང་པོད་ཀྱི་ལུང་སོགས་གསན། ངོར་མཁན་ཆེན་རྡོ་རྗེ་འཆང་དམ་པ་ལགས་སམ་མཚན་དངོས་དོན་དཔལ་ཞབས་ལས་ཚེ་རྟ་ཟུང་འབྲེལ་གྱི་ཚེ་དབང་གསན་ཅིང༌། མཁན་ཆེན་དམ་པ་འདིས་རྗེ་བླ་མར་སྙིགས་དུས་འདིར་རྡོ་རྗེ་འཆང་གི་མཛད་པ་སྒྲ་ཇི་བཞིན་དུ་སྒྲུབ་པའི་བདག་ཉིད་ཆེན་པོ་འདི་ཉིད་ངེས་ཞེས་བསྔགས་པ་ཆེས་ཆེར་གནང༌། ཀླུ་སྡིངས་རྒྱལ་སྲས་འཇམ་དཔལ་ཆོས་ཀྱི་ཉི་མ་ལས་དཀར་པོ་ལྷ་གསུམ་གྱི་རྗེས་གནང༌། གཟིམས་འོག་མཆོག་སྤྲུལ་རིན་པོ་ཆེ་ལས་ཀྱེ་རྡོར་རྒྱུ་ལམ་གྱི་དབང༌། ལམ་ཟབ་ཀྱི་བྱིན་རླབས། ཞལ་གྱི་དབང་ཁྲིད་ཚང་མ་གསན། སྡེ་གཞུང་མཆོག་སྤྲུལ་ཀུན་དགའ་བསྟན་པའི་རྒྱལ་མཚན་རིན་པོ་ཆེ་ལས་སྒྲུབ་ཐབས་རྒྱ་མཚོའི་རྗེས་གནང་དང༌། བདེ་དྲིལ་ལུས་དཀྱིལ། མཁའ་སྤྱོད་བྱིན་རླབས། མགོན་པོ་གུར་དང་སྒྲོལ་དཀར་རྗེས་གནང་ཐུན་མིན། དགྱེས་རྡོར་ལམ་དབང་སོགས་མང་དུ་གསན་ཅིང་གསང་ཆེན་སློབ་བཤད་ཀྱི་ཟབ་གནད་ཐུན་མོང་མ་ཡིན་པ་སྒ་སྟོན་འཇམ་པའི་དབྱངས་ཀྱི་ཞལ་ལུང་གི་བགྲོ་གླེང་གནང་ཞིང་དེ་དག་ཡི་གེར་བཀོད་པར་བཀས་བསྐུལ་བ་སོགས་ལམ་འབྲས་བསྟན་པའི་སྲོག་ལྟ་བུར་གྱུར་པ་དང༌། དེང་སང་ས་སྐྱའི་ཕྱོགས་ལ་བསྟན་འཛིན་འདི་ལས་ལྷག་པའི་ཡོན་ཏན་མངའ་བ་སུའང་མེད་ཅེས་བསྟོད་བསྔགས་ཡང་ཡང་གནང་ཞིང༌། ཆོས་རྗེ་སྒ་སྟོན་རྡོ་རྗེ་འཆང་ལ་མཉེས་པ་གསུམ་གྱི་ཞབས་ཏོག་ཕུལ་དུ་སོན་པས་ཐུགས་ཡིད་གཅིག་ཏུ་འདྲེས་པ་ཡིན་ཅེས་ཐུགས་ནང་ཤིན་ཏུ་གཤིན་པར་མཛད། རྗེ་བླ་མ་ལ་ཀུན་གཟིགས་མཉྫུའི་ཞབས་དངོས་སུ་བྱོན་པ་ཞེས་མཆོག་སྤྲུལ་རིན་པོ་ཆེས་ཀྱང་བསྔགས་བརྗོད་དད་མོས་ཆེས་ཆེར་གནང༌། སྒ་སྟོད་ཐར་ལམ་སྡེ་གཞུང་སྤྲུལ་སྐུ་མཆོག་ལས་ས་སྐྱ་གོང་མ་རྣམ་ལྔ། ངོར་ཆེན་རྡོ་རྗེ་འཆང༌། ཞུ་ཆེན་མ་ཧཱ་པཎཌི་ཏའི་བཀའ་འབུམ་ལུང་སོགས་རྒྱ་ཆེར་གསན། མཁྱེན་བརྩེའི་མཆོད་དཔོན་བླ་མ་ཤེས་རབ་ལས་སྐུ་ཆུང་དུས་ས་སྐྱ་གོང་མ་རྣམ་ལྔའི་བཀའ་འབུམ་དང༌། རྩེ་ལེ་མཁས་མཆོག་པདྨ་ལེགས་གྲུབ་ཀྱི་བཀའ་འབུམ་ལུང་སོགས་གསན། ཆོས་བཞིན་སྤྱོད་པའི་དགེ་བའི་བཤེས་གཉེན་ཆེན་པོ་འཇམ་དབྱངས་རྒྱལ་མཚན་ལས་ཀྱེ་རྡོར་རྒྱུ་ལམ་གྱི་དབང༌། བདག་མེད་ལྷ་མོ་བཅོ་ལྔའི་དབང༌། ལམ་འབྲས་སློབ་བཤད་ཀྱི་ཁྲིད་ལུང་སོགས་གསན་ཅིང་རྗེ་བླ་མ་རིན་པོ་ཆེར་ཞབས་ཏོག་དང་དད་མོས་སྲི་ཞུ་ཤིན་ཏུ་ཆེ་བར་གསུང༌། རྫོང་སར་དགོན་གྱི་རྡོར་འཛིན་བླ་མ་བོ་དྷི་བྷ་དྲ་ལས་ས་ལུགས་མི་འཁྲུགས་པ། ཀྱེ་རྡོར། མཁའ་སྤྱོད་སྐོར་གྱི་དབང་ཁྲིད་རྒྱ་ཆེར་གསན། རྗེ་བཙུན་སྒྲོལ་མ་སྐུ་དངོས་ཀྱིས་རྗེས་སུ་བཟུང་བའི་སྦས་པའི་རྣལ་འབྱོར་བསྟན་འཕེལ་ལས། ཐང་སྟོང་རྒྱལ་པོའི་གསང་སྤྱོད་མཁའ་འགྲོ་སྙན་བརྒྱུད་ཀྱི་སྨིན་གྲོལ། མགོན་པོ་གུར་གྱི་དབང་དང་རྗེས་གནང་ཟབ་ཁྲིད་ཀྱི་སྐོར། རྒྱུད་སྡེ་བཞི་འབྲེལ་སྒྲོལ་མའི་དབང༌། མཁའ་སྤྱོད་མའི་བྱིན་རླབས་དང་ཁྲིད་བཅས་གསན། བྲག་ཡབ་གཙང་སར་སྤྲུལ་སྐུ་ལས་འཁོན་ལུགས་ཕུར་པ་སྟོད་སྨད་ཀྱི་དབང་ཆེན། རྣམ་སྲས་དང་མགོན་པོ་གུར་གྱི་སྐོར་སོགས་ས་སྐྱའི་ཞལ་ངོ་ནང་བརྒྱུད་ཀྱི་རིགས་མང་པོ་གསན། སྡེ་དགེ་ལྷུན་གྲུབ་སྟེང་གི་ཤར་བླ་མ་འཇམ་དབྱངས་མཁྱེན་རབ་མཐའ་ཡས་ལས་དཔལ་དུས་ཀྱི་འཁོར་ལོ་བུ་ལུགས་ཀྱི་དབང་ཆེན། འཇིགས་བྱེད་དང་ཞལ་གྱི་པོད་ལུང་རྣམས་གསན། རྡོར་འཛིན་དཔལ་ལྡན་འཇམ་དབྱངས་ལས་བདེ་མཆོག་ལུ་ཧིའི་ལུགས་ཀྱི་དབང་ཆེན། ཞལ་གྱི་སྨིན་གྲོལ་ཚང་མ། ཤར་བླ་མ་དཀོན་མཆོག་བསྟན་འཛིན་ལས་གུར་མགོན་གྱི་རྗེས་གནང་ཡོངས་རྫོགས། བཀའ་ཁྲིད་ཞིབ་རྒྱས། སྒྲོལ་དཀར་འོད་ཟེར་དྲུག་སྦྲགས་ཀྱི་ཁྲིད་བཅས་གསན། སྒ་ཐུབ་བསྟན་དགོན་གྱི་བླ་མ་སྡེ་སྣོད་འཛིན་པ་ཆེན་པོ་ངག་དབང་བསྟན་པ་མཆོག་ལས། ཆོས་བཀའ་ཆེན་པོ་འདི་ཉིད་གསན་པའི་འོས་སུ་གཟིགས་ཏེ་སྔ་མོ་ནས་ལུང་རྒྱུན་ཐ་དད་རྣམས་ཞིབ་ཚགས་ཞུ་བར་བཀས་བསྐུལ་ཞིང་མཐུན་སྦྱོར་སོགས་གནང་བ་ལྟར་བརྒྱུད་སྲོལ་མཐའ་དག་ཡོངས་སུ་རྫོགས་ཤིང་འཆད་སྤེལ་ཡང་ལན་བཅུ་གསུམ་ཙམ་ངེས་པར་སོང་བ་དེ་ཉིད་ལས་རྒྱལ་བའི་བཀའ་འགྱུར་རིན་པོ་ཆེ་ཡོངས་སུ་རྫོགས་པའི་བཀླག་ལུང་ཞིབ་རྒྱས་རིང་ཉིན་བཞིན་མཆོད་སྤྲིན་གྱི་བཀོད་པ་རྒྱས་པར་སྤྲོས་ཏེ་གསན་པར་མཛད། བླ་མ་འདིས་རྒྱལ་བཀའ་རིན་པོ་ཆེ་ལན་ཤིན་ཏུ་མང་པོར་གསུངས་པས་ངག་བདེན་ཚིག་གྲུབ་པ་ལྟ་བུ་ཡོད། སྒྲ་གསལ་དག་སྙན་གསུམ་དང་ལྡན་པས་སྤྱིར་སྟོན་པ་ཐམས་ཅད་མཁྱེན་པའི་གསུང་ལ་ངོ་མཚར་ཆེ་བ་གཞིར་བཅས། ལྷག་པར་སངས་རྒྱས་ཕལ་པོ་ཆེའི་སྡེ་སྣོད་ནི་སངས་རྒྱས་ཀྱི་གསུང་གསང་བ་བསམ་གྱིས་མི་ཁྱབ་པ་ཟབ་ཅིང་རྒྱ་ཆེ་བའི་ངོ་མཚར་རྨད་དུ་བྱུང་བས་དད་སྤྲོའི་ཡིད་ཆེས་ཐོབ་པ་བྱུང་ཞེས་གུས་ལ་བཀའ་འཕྲོས་ཕེབས། ས་སྐྱ་ཕུན་ཚོགས་ཕོ་བྲང་གི་སྐྱབས་མགོན་བདག་ཆེན་ངག་དབང་ཀུན་དགའ་བསོད་ནམས་ལས་འཁོན་ལུགས་ཕུར་པ་སྟོད་ལས་སྨད་ལས་ཀྱི་དབང་ཆེན་དང༌། ཚེ་རྟ་ཟུང་འབྲེལ་སོགས་གསན་ཅིང༌། བླ་མ་ཞི་ཁྲོའི་ཚེ་དབང༌། གསེར་ཆོས་ཁྱུང་ནག །གུར་ལྷ་བརྒྱད། ཞལ་དཀར་པོ་ཚེ་འཕེལ་སོགས་གསན། ས་སྐྱ་སྒྲོལ་མ་ཕོ་བྲང་གི་ཁྲི་ཆེན་ངག་དབང་ཀུན་དགའ་ཐེག་ཆེན་དཔལ་འབར་ཕྲིན་ལས་དབང་གི་རྒྱལ་པོ་ལས་འཁོན་ལུགས་ཕུར་པ་སོགས་དབང་ཆེན་མང་དུ་གསན། ལྷ་ཁང་མཁན་ཆེན་འཇམ་དཔལ་བཟང་པོ་ལས་རྟ་མགྲིན་ཡང་ཁྲོས་དབང་ཆེན་ས་ལུགས་ཡིག་ཆ་ལྟར་དང༌། ངོར་ཆེན་རྡོ་རྗེ་འཆང་གི་ཆོས་ཀྱི་ཁྲི་ལ་བཞུགས་པ་ངོར་ཐར་རྩེ་མཁན་རིན་པོ་ཆེ། ཕན་ཁང༌། ཀླུ་སྡིངས། ཁར་གསར་བཅས་ལའང་སྐབས་བབས་ཀྱི་ཆོས་འབྲེལ་རེ་གསན་པར་མཛད། རབ་འབྱམས་པ་ཀུན་བཟང་བསོད་ནམས་ཀྱི་ཉེ་གནས་མཁན་ཨ་དཔལ་ཞབས་ལས་རྗེའི་ལམ་རིམ་ཆེན་མོ་དང༌། ཨ་མདོ་རྨེ་བ་བླ་མ་བཤེས་གཉེན་དམ་པ་ཞིག་ལས་རྗེ་ཡབ་སྲས་སོགས་ཀྱི་བཀའ་འབུམ་སྐོར་ཞིབ་ཏུ་གསན་བཞེད་ལོ་ཟླ་སོགས་གཏན་ཁེལ་མཛད་ཀྱང་དུས་ཟིང་གིས་རྟེན་འབྲེལ་འཕྲོ་ཅན་དུ་ལྷག །མདོ་ཁམས་གྲུབ་དབང་རྫོགས་ཆེན་ལྔ་པ་ཐུབ་བསྟན་ཆོས་ཀྱི་རྡོ་རྗེ་ལས་རྗེ་གོང་མའི་ཟབ་གཏེར་འཕགས་མའི་སྙིང་ཐིག་གི་བི་མ་མི་ཏྲའི་བླ་སྒྲུབ་བྱིན་རླབས་སྙིང་པོ། བལ་པོ་ཨ་ཧཱུྃ་འབར་གྱི་ཛམ་བྷ་ལ་ནག་པོ། ཡེ་ཤེས་བླ་མའི་རིག་པའི་རྩལ་དབང༌། གྲུབ་ཆེན་ཧེ་རུ་ཀ་དཔལ་མཁྱེན་བརྩེ་ཡེ་ཤེས་རྡོ་རྗེའི་ཟབ་གཏེར་གཅོད་འཛིན་པ་རང་གྲོལ། འཇའ་ཚོན་དཀོན་མཆོག་སྤྱི་འདུས་སོགས་གནད་ཟབ་འགའ་ཞིག་གསན། སྐུ་ཕྲེང་དྲུག་པ་མཆོག་སྤྲུལ་འཇིགས་བྲལ་བྱང་ཆུབ་རྡོ་རྗེའི་ཞབས་ལས་ཀྱང་དཀོན་སྤྱིའི་ཚེ་དབང་དང་ཉི་གྲགས་ཚེ་སྒྲུབ་བདུད་བཞི་རྣམ་རྒྱལ། རྟ་མགྲིན་དྲེགས་པ་ཟིལ་གནོན། སྔགས་བདག་མའི་རྗེས་གནང་སོགས་གསན་ནས་རིམ་གྱིས་ཉི་གྲགས་དང་ཁྱེའུ་རིག་འཛིན་ཆེན་པོའི་ཆོས་སྐོར་ཚང་མ་གསན་བཞེད་གནང༌། རྫོགས་ཆེན་མཁན་རིན་པོ་ཆེ་བསོད་ནམས་ཆོས་འཕེལ་ལས་ཀྱང་གཅོད་འཛིན་པ་རང་གྲོལ་གྱི་དབང་ཁྲིད་ལུང་བཅས་ལན་གཅིག་གསན། ཉག་རོང་གཏེར་སྟོན་དྲི་མེད་འོད་ཟེར་པདྨ་གླིང་པ་ལས་སྟག་ཤམ་ཡི་དམ་དགོངས་འདུས་ཀྱི་དབང་ཆེན། ཡང་གཏེར་བླ་མ་བསྟན་གཉིས་སྐོར་གསུམ། ཐུགས་རྗེ་ཆེན་པོ་པདྨ་ཞི་ཁྲོ། སྙན་བརྒྱུད་ཡང་དག །གཤིན་རྗེ། ཕུར་པ་སོགས་རྗེ་གོང་མའི་ཟབ་གཏེར་གྱི་དབང་ཁྲིད་ལུང་བརྒྱུད་བྱིན་རླབས་དང་ལྡན་པ་དུ་མ་དང༌། མཁྱེན་བརྩེའི་ཉེ་བརྒྱུད་མཁའ་འགྲོ་ཡང་ཏིག་དང༌། ཉེ་བརྒྱུད་ངེས་དོན་སྙིང་པོ་དབང་ཁྲིད། རྒྱུད་བཅུ་བདུན་དབང༌། རྫོགས་ཆེན་ཆིག་ཆོད་ཀུན་གྲོལ་གྱི་དབང་ཁྲིད་ལུང་བཅས། བཀའ་བརྒྱད་བདེ་འདུས་དབང་འབྲིང་བསྡུས། ཕྲིན་སྒྲུབ་རིན་ཆེན་སྒྲོན་མེའི་དབང༌། གུར་དྲག་ཡེ་ཤེས་རབ་འབར། རཏ་གླིང་མ་ནིང་དང་བྱང་གཏེར་ལྷ་ཆེན་སྲོག་དབང༌། ཀློང་སྙིང་སྐོར་མང་ཙམ། འཇམ་མགོན་ཀོང་སྤྲུལ་རིན་པོ་ཆེ་ལས་གསན་པའི་ཞིག་གླིང་ཆོས་སྐོར་རྣམས་དང༌། ཐུགས་སྒྲུབ་བསམ་ལྷུན་དབང་རྒྱས་འབྲིང་བསྡུས་པ་ཚེ་དབང་བཅས། འཇམ་མགོན་ཚེ་རྟ་ཟུང་འབྲེལ། གཤིན་རྗེ་ལྕགས་སྡིག་གི་སྨིན་བྱེད་མུ་ཏིག་ཕྲེང་བ། ཐུགས་རྡོར་མིག་འབྱེད། གསང་བདག་ཉི་མ་མདུང་གང༌། གཏེར་སྟོན་ཉིད་ཀྱི་གཏེར་ཆོས་གཤིན་རྗེའི་སྐོར་སོགས་དབང་ལུང་རྒྱ་ཆེར་དང༌། རྐྱེན་སེལ་ཞབས་བརྟན་སྔ་ཕྱིར་གནང་བས་སྐུ་ཚེའི་བར་ཆད་བཟློག་པ་སོགས་ཕན་ཚུན་ཐུགས་བརྩེ་ཆེ་ཞིང༌། སྐུ་མཆེད་མཁན་ཆེན་བླ་མ་རྒྱལ་མཚན་འོད་ཟེར་ལས་སྒྱུ་འཕྲུལ་ཞི་ཁྲོ། སྙིང་ཐིག་གི་སྐོར་དང་རྡོར་སེམས་མངོན་དགའི་ཞིང་སྦྱོང་གི་དབང་སོགས་གསན། གཏེར་སྟོན་སྐུ་མཆེད་ལ་འཇམ་མགོན་རྣམ་གཉིས་ཀྱི་དབང་དང་སྒྲུབ་ཆེན་གྱི་ཕྱག་ལེན་དབང་ཁྲིད་ཀྱི་རྒྱུན་སོགས་ངོ་མཚར་ཅན་དུ་མ་བཞུགས་པ་ཐམས་ཅད་གསན་བཞེས་གནང་ཞིང༌། རྗེ་བླ་མ་རིན་པོ་ཆེ་ལའང་ཐུགས་བརྩེ་དང་དད་གདུང་ཐུན་མིན་མངའ་བར་གསུངས། གཏེར་སྟོན་དྲི་མེད་སྲས་འཇམ་མགོན་མཆོག་སྤྲུལ་པདྨ་ཐུགས་རྗེའི་དབང་ཕྱུག་ལས་དོང་སྤྲུགས་པདྨ་བརྒྱ་ལྡན་དང༌། ཞི་ཁྲོའི་ཁྲོམ་དཀྲུགས་གཉིས། གཏེར་ཆེན་ལས་རབ་གླིང་པའི་ཆོས་སྐོར་ཡོངས་རྫོགས་འདུས་པ། ཐུགས་སྒྲུབ་སྐོར་སོགས་ཀྱི་དབང་ལུང་རྒྱ་ཆེར་གསན། འཕེལ་ཚའོ་ཕུང་དགོན་གྱི་བླ་མ་ལས་སྟག་ཤམ་ཆོས་སྐོར་གྱི་ལུང་ཡོངས་རྫོགས་གསན། གྲུབ་དབང་ཤཱཀྱ་ཤྲཱིའི་སྲས་མཁྱེན་བརྩེའི་ཐུགས་སྤྲུལ་འཕགས་མཆོག་རྡོ་རྗེ་ལས་རྗེ་གོང་མས་ཆོས་བདག་ཏུ་དབུགས་ཕྱུང་སྟེ་གྲུབ་དབང་རིན་པོ་ཆེར་བཀའ་བབས་པའི་རྩ་གསུམ་སྤྱི་འདུས་དང༌། ཡང་གཏེར་བླ་མ་བདེ་མཆོག་འཁོར་ལོའི་དབང་ཁྲིད་ལུང་བཅས། དགེ་རི་ཆོས་རྒྱལ་རྡོ་རྗེའི་དྲག་མཐིང་གི་དབང༌། ཤཱཀྱ་ཤྲཱིའི་དགོངས་གཏེར་གུ་རུ་བདེ་བ་ཆེན་པོའི་དབང་སོགས་གསན། ར་སྤྲུལ་ཐུབ་བསྟན་བཤད་སྒྲུབ་ལས་གནམ་ཆོས་དབང་ལུང་ཚང་མ་དང༌། རཏ་གླིང་གཏེར་ཆོས་སྐོར་ཆ་ཚང༌། རྗེ་མཁྱེན་བརྩེའི་ཞལ་སྔ་ནས་བསྩལ་བའི་སྔ་འགྱུར་བཀའ་མ་རྒྱ་སྤྲུལ་མདོ་སྔགས་བསྟན་འཛིན་ལས་བརྒྱུད་པ་གཟིམ་འགག་མཆོག་སྤྲུལ་རིན་པོ་ཆེ་ལས་གསན། ཀཿཐོག་མཆོག་སྤྲུལ་མཁས་གྲུབ་ཆེན་པོ་རྒྱལ་སྲས་ཀུན་བཟང་བསྟན་འཛིན་ལས་བླ་མ་དགོངས་འདུས་ཀྱི་སྒྲུབ་དབང་ཆེན་མོ་རྒྱལ་དབང་ཀརྨ་པ་མཁའ་ཁྱབ་རྡོ་རྗེའི་བརྒྱུད་པ་ཞིབ་རྒྱས། པོད་བཅོ་ལྔ་ཡོངས་རྫོགས་ཀྱི་ལུང༌། སྤྱི་མདོ་དགོངས་འདུས་ཀྱི་བཤད་ལུང༌། ངལ་གསོ་སྐོར་གསུམ་དང་ཐེག་མཆོག་མཛོད་མཁྱེན་བརྩེ་རིན་པོ་ཆེའི་ཉེ་བརྒྱུད་ཅན། བི་མ་དང་མཁའ་འགྲོ་སྙིང་ཐིག་རྫོགས་ཆེན་ཕྱོགས་ཀྱི་བརྒྱུད་པའི་དབང་སོགས་གལ་གནད་ཆེ་བའི་སྐོར་རྒྱ་ཆེར་གསན། སྐུ་ཆུང་དུས་ཡབ་གཞིས་ནས་བྲག་དམར་མཆོག་སྤྲུལ་ཡིད་བཞིན་དབང་རྒྱལ་ལས་ཚེ་དབང་ཞིག་གསན། ཀཿཐོག་མཁན་ཆེན་ངག་དབང་དཔལ་བཟང་ལས་ཀློང་གསལ་དང་བདུད་འདུལ་ཆོས་སྐོར་གྱི་དབང་ལུང་ཡོངས་རྫོགས། གུ་རུ་ཆོས་ཀྱི་དབང་ཕྱུག་གི་ཟབ་གཏེར་བཀའ་བརྒྱད་གསང་བ་ཡོངས་རྫོགས་ཀྱི་དབང་ཆེན་འཇམ་མགོན་ཀོང་སྤྲུལ་རིན་པོ་ཆེའི་སྒྲུབ་དབང་གི་བརྒྱུད་པ། མཁའ་འགྲོ་ཡང་ཏིག་གི་དབང་ཁྲིད་སོགས་རྒྱ་ཆེར་གསན། ཀཿཐོག་མཁན་ལེགས་བཤད་འབྱོར་ལྡན་ལས་ཀུན་མཁྱེན་འཇིགས་མེད་གླིང་པའི་བཀའ་འབུམ་ཡོངས་རྫོགས་པོད་དགུ་དང༌། འཇའ་ཚོན་ཆོས་སྐོར་པོད་དྲུག །བཀའ་མ་ཆོག་བསྒྲིགས་པོད་དགུ་རྫོགས་ཆེན་སྤར་འཁོད་ལྟར་སོགས་ལྗགས་ལུང་རྒྱ་ཆེར་གསན། འབྲི་གཏེར་འོད་གསལ་རྡོ་རྗེ་ལས་གཏེར་སྟོན་རང་གི་ཟབ་གཏེར་སྒྲོལ་མ་དམར་མོའི་དབང༌། གཤིན་རྗེ་ཡང་བཟློག་གི་དབང་ཆེན། ཁྲོ་ཆུའི་གཏོར་དབང༌། ཟླ་གསང་ཚེ་སྒྲུབ་ཀྱི་དབང༌། འབྲི་གུང་སྲུང་མ་ཨ་ཕྱི་ཆོས་སྒྲོན་གྱི་བཀའ་གཏད། བྱད་ཁྲོལ། ཚེ་དབང་སོགས་གསན་ཅིང་སྐུ་ཚེའི་བར་ཆད་སེལ་བའི་བརྟན་བཞུགས་དང༌། སྲུང་བཟློག་གི་ཞབས་བརྟན་སྐོར་མང་དུ་བསྒྲུབ་པས་སྐུ་ཚེའི་བར་ཆད་ལས་གྲོལ། གཏེར་ཁ་འགའ་ཞིག་ཕབ་པའི་སྐབས་ཕྱག་བྲིས་གནང་བ་སོགས་ལས་འཕྲོ་སྨོན་ལམ་གཅིག་པས་འབྲེལ་བའི་གཏེར་སྟོན་ཚད་མ་ཡིན་པ་ཕྲན་ལའང་བཀའ་ལན་མང་བསྩལ། བདུད་འཇོམས་མཆོག་གི་སྤྲུལ་པའི་སྐུ་འཇིགས་བྲལ་ཡེ་ཤེས་རྡོ་རྗེ་ལས་རྗེ་ཉིད་ཀྱི་དགོངས་གཏེར་གྲོ་ལོད་ཀྱི་སྨིན་གྲོལ་ཡོངས་རྫོགས་དང༌། ཟབ་གཏེར་ཐམས་ཅད་ཀྱི་གཏད་རྒྱ་གསན་ཅིང་བསྟོད་བསྔགས་དང་ཐུགས་རྩིས་ཆེ་བར་གནང༌། བྱ་བྲལ་སངས་རྒྱས་རྡོ་རྗེ་ལས་བཀའ་གདམས་གཞུང་རྙིང་ཁ་ཤས་དང༌། ལྷ་བཙུན་ཆེན་པོའི་རྡོ་རྗེ་སྙིང་པོའི་སྐོར་ཆ་ཚང༌། རིག་འཛིན་སྲོག་སྒྲུབ་ཁ་སྐོང་སྐོར། ཆགས་མེད་རི་ཆོས་ཐེམ་མེད་སྐོར། སྣང་སྦྱོང་སོགས་བདུད་འཇོམས་ཡབ་སྲས་ཆོས་སྐོར་ཁ་ཤས། སེ་ར་མཁའ་འགྲོའི་ཆོས་སྐོར་ཡོངས་རྫོགས་ཀྱི་དབང་ལུང་བཅས། རྗེ་ཉིད་ཀྱི་གཅུང་འཆི་མེད་པདྨ་རྡོ་རྗེ་ལས་གསེར་པ་གཏེར་རྒན་གྱི་ཟབ་གཏེར་ཚེ་སྒྲུབ་དང༌། རྟ་མགྲིན་སོགས་དུ་མ་གསན། ཨ་འཛོམ་རྒྱལ་སྲས་རིན་པོ་ཆེ་འགྱུར་མེད་རྡོ་རྗེ་ལས་ཚེ་དབང༌། མཁའ་འགྲོ་སྙིང་ཐིག་གི་དབང་ཞིབ་རྒྱས། ལྗགས་ལུང་སྐོར་རྒྱ་ཆེར་གསན། རྒྱལ་སྲས་པདྨ་དབང་རྒྱལ་ལས་ཀྱང་ཁྲིད་ལུང་སྐོར་དང༌། ཀློང་སྙིང་རྩ་རླུང་གི་འཁྲུལ་འཁོར་སོགས་ཟབ་ཆོས་མང་དུ་གསན། ཐེག་མཆོག་རྫོགས་པ་ཆེན་པོའི་རྣལ་འབྱོར་པ་ཀུན་དགའ་དཔལ་ལྡན་ལས་བླ་མ་ཡང་ཏིག་གི་ཟབ་ཁྲིད་ཀྱི་དོགས་གཅོད་སྐོར་ཞིབ་ཏུ་གསན། ཟུར་མང་དྲུང་པ་རིན་པོ་ཆེ་ཀརྨ་ཆོས་ཀྱི་ཉིན་བྱེད་ཀཿཐོག་ཏུ་ཕེབས་སྐབས་བདེ་མཆོག་མཁའ་འགྲོ་སྙན་བརྒྱུད་ཀྱི་སྨིན་གྲོལ་རྒྱས་པ་ཚོགས་གར་དང་སྦྲགས་ཏེ་ཞིབ་པ་དང༌། རྡོ་རྗེ་གླིང་པའི་ལྟ་བ་ཀློང་ཡངས། ནཱ་རོ་ཆོས་དྲུག་དང་ཕྱག་ཆེན་གྱི་ཁྲིད་སྐོར་མང་པོ་ཀུན་གཟིགས་སི་ཏུ་རིན་པོ་ཆེ་དང་ཡབ་སྲས་ལྷན་རྒྱས་པས་གསན། དགེ་རྒྱས་ཟླ་བཟང་མཆོག་སྤྲུལ་རིན་པོ་ཆེ་ལས་ཀཾ་ཚང་རྒྱལ་རྒྱམ་ལྷ་དགུ། ཕག་མོ་ལྷ་ལྔ། རྗེ་མཁྱེན་བརྩེའི་ཡང་གཏེར་དྲི་མེད་ཀུན་དགའི་རྒྱལ་བ་རྒྱ་མཚོའི་ཆོས་བདག་ཏུ་འཇམ་མགོན་གོང་མས་བསྔགས་པ་དེའི་ལུང་དང་དབང་སོགས་གསན། དྲུང་ནམ་རྒྱལ་སྤྲུལ་རིན་པོ་ཆེ་དང་མཇལ་འཕྲད་མཛད་ཅིང་བདེ་མཆོག་གི་དབང་གསན། ཐུགས་དམ་གདིང་ཚད་སོགས་ལ་བཀའ་མོལ་ཞིབ་གནང་དང་གདམས་པའི་གཏད་རྒྱ་ཁྱད་པར་ཅན་སོགས་གསན་རྗེས། གུས་ལ་ཁྱོད་ཀྱི་བླ་མ་དེ་རྟོགས་ལྡན་ཙམ་ལས་མཁས་པ་རེད་མ་བསམ་ཡང་མདོ་སྔགས་ཀྱི་ཟབ་གནད་ཐམས་ཅད་ཐོགས་མེད་དུ་མཁྱེན་ཅིང་གསན་འདུག་པས་སྒོམ་བྱུང་ཀློང་རྡོལ་ཡིན་པ་འདྲ་ཞེས་གསུངས། འཇིག་རྟེན་དབང་ཕྱུག་རྒྱལ་དབང་བཅུ་དྲུག་པ་རང་བྱུང་རིག་པའི་རྡོ་རྗེ་དགུང་གྲངས་བཅོ་ལྔའི་སྐོར་འོག་མིན་གཉིས་པ་བཀྲ་ཤིས་ལྷ་རྩེར་མཐོང་གྲོལ་ཅོད་པན་ཆེན་པོའི་མཇལ་ཞུས་མཛད་པས། དད་གདུང་གི་ཤུགས་ལས་ཆོས་རྗེ་དུས་གསུམ་མཁྱེན་པར་དངོས་སུ་གཟིགས་ཤིང༌། གཞན་ཡང་སྔ་ཕྱིར་མཐོང་གྲོལ་ཅོད་པན་བཞེས་སྐབས་བི་མ་མི་ཏྲ་དང༌། ཀརྨ་པཀྴི་དངོས་སུ་གཟིགས་ཚུལ་གསུངས། ཕྱིས་དབུས་ཕེབས་སྐབས་འོག་མིན་མཚུར་གདན་དུ་ཆེད་དུ་ཞབས་པད་བཀོད་ནས་ཕན་ཚུན་སྐུ་ཚེའི་དཔལ་ཡོན་སྤེལ་བའི་རྟེན་འབྱུང་གི་སྒོ་འཕར་ཚེ་དབང་གསན་པ་དང༌། འབྲས་ལྗོངས་སྦས་གནས་ལྟེ་བ་བྲག་དཀར་བཀྲ་ཤིས་སྡིངས་དུ་རྒྱལ་དབང་ཀརྨ་པ། རྗེ་བླ་མ། འབྲས་ལྗོངས་རྒྱལ་སྲས་བླ་མ་བཅས་ཆེད་དུ་མ་བསྐུལ་བར་ལྷན་རྒྱས་སུ་ཚོགས། གནས་ཆེན་བྱིན་འབེབས། ལྷ་སྲིན་དམ་བསྒྲགས་སོགས་གཉིས་ཀས་མཛད་པ་རྟེན་འབྲེལ་ཁྱད་པར་འཕགས་པའི་ཚུལ་འོག་གི་གཟིགས་སྣང་སྐབས་སུ་གསལ། རྒྱ་གར་གནས་གཟིགས་ལྷན་རྒྱས་སུ་ཕེབས་སྐབས་ཐུགས་དམ་དགོངས་པའི་གསུང་གླེང་ཞིབ་རྒྱས་སུ་གནང་ནས་ཐུགས་ཡིད་གཅིག་འདྲེས་སུ་གྱུར་ནས་རྒྱལ་དབང་རིན་པོ་ཆེས་ཁྱེད་ནི་སྣང་སྲིད་ཆོས་སྐུར་ཤར་བས་མཛད་སྒོ་ཐམས་ཅད་རྟེན་འབྲེལ་ལེགས་ཕྱོགས་སུ་འགྲིགས་པ་ཆོས་རྒྱལ་རཏྣ་གླིང་གླིང་པ་ལྟ་བུའོ་ཞེས་བསྔགས་བརྗོད་གནང༌། དཔལ་སྤུངས་བྱམས་མགོན་སི་ཏུ་རིན་པོ་ཆེ་པདྨ་དབང་མཆོག་ལས་རྒྱ་ཆེན་སྤྱོད་བརྒྱུད་ཀྱི་སེམས་སྡོམ། མར་ལུགས་དགྱེས་པ་རྡོ་རྗེའི་དབང་ཆེན། བདག་མེད་ལྷ་མོ་བཅོ་ལྔའི་དབང༌། སྐྱེར་སྒང་ལུགས་ཀྱི་རྟ་མགྲིན། མཁྱེན་བརྩེའི་གཏེར་ཁ་མཚོ་སྐྱེས་སྙིང་ཐིག་གི་རྩ་དབང༌། གསང་ཐིག་རྡོ་རྗེ་ཕུར་པའི་གཏོར་དབང༌། འཇམ་དབྱངས་དཀར་པོ་མ་ཏིའི་ལུགས། བྲམ་ཟེ་ཕུར་བུའི་དབྱངས་ཅན། དམ་པའི་སྨྲ་སེང་རྣམས་འཇམ་མགོན་མི་ཕམ་རིན་པོ་ཆེའི་བརྒྱུད་པ། ཐུགས་དམ་ཇོ་ལུགས་སྒྲོལ་དཀར་གྱི་རྗེས་གནང་དང་ཁྲིད་ལུང༌། དཀོན་མཆོག་སྤྱི་འདུས་ཚེ་དབང༌། ཕྱག་དྲུག་པའི་གཏོར་དབང༌། རྗེས་གནང༌། མགོན་པོ་སྙིང་ཞུགས་ཀྱི་དབང་སོགས་གསན། རྗེ་ཉིད་བསྙུན་ཚབས་ཆེ་བའི་སྐབས་གདན་ཞུས་མ་མཛད་ཀྱང་ཆེད་དུ་ཕེབས་ནུབ་དེར་གྲུབ་ཆེན་ཌོམྦི་པས་བར་ཆད་སེལ་བའི་མནལ་ལྟས་གཟིགས་པ་སོགས་གུས་ལ་བཀའ་བསྩལ་ཞིང༌། ཕན་ཚུན་ཐུགས་ཡིད་གཅིག་འདྲེས་ཚུལ་གྱིས་བྱམས་མགོན་རིན་པོ་ཆེར་སྐུ་ཚེའི་བརྟན་བཞུགས་དང༌། ཕྱིས་སྐུ་གཤེགས་སྐབས་དགོངས་རྫོགས་སོགས་བཀའ་དྲིན་རྒྱ་ཆེར་བསྐྱངས། ཙཱ་འདྲའི་རྒྱལ་སྲས་འཇམ་མགོན་མཆོག་སྤྲུལ་དཔལ་ལྡན་མཁྱེན་བརྩེའི་འོད་ཟེར་ལས་རཏ་ཕུར། འཇམ་མགོན་གོང་མའི་ཟབ་གཏེར་ཡང་དག་གྲོ་ལོད་གསང་སྒྲུབ་གདུག་པ་ཀུན་འདུལ་གྱི་དབང༌། རྒ་ལོའི་ལུགས་ཀྱི་མགོན་པོ་ཕྱག་བཞི་པའི་དབང་སོགས་གསན། རྗེ་བླ་མ་མཆོག་ལས་སྔ་འགྱུར་བཀའ་མ་མདོ་ཚོགས་ཆེན་འདུས་པའི་དབང་ཆེན་དང༌། རྔོག་ལུགས་འཇམ་དཔལ་གསང་ལྡན་སོགས་གསན། གཏེར་ཆེན་རོལ་རྡོར་མཆོག་སྤྲུལ་ལྔ་པ་ལས་རོལ་རྡོར་གཏེར་ཁ་མཚོ་བྲག་སྐོར་ཡོངས་རྫོགས་གསན་པས་རྗེ་བླ་མར་ཐུགས་ཤེས་གཏིང་ནས་འདྲོངས་ཏེ་དགོངས་གཏེར་འོད་གསལ་སྙིང་ཐིག་ཡོངས་རྫོགས་གསན། གཏེར་ཆེན་རོལ་རྡོར་གཏེར་ཆོས་ཡོངས་རྫོགས་ཀྱི་གཏད་རྒྱ་མཛད་ཅིང་མཎ1$0000270ཌ1$0000300ལ་སྐུ་གསུང་ཐུགས་རྟེན་བཅས་ཕྱག་རྡོར་རྒྱུད་ལ་འགྲེལ་པ་སོགས་ཆོག་ཁྲིགས་འགའ་ཞིག་ཞུས་པ་དེ་མ་ཐག་མཛད་པས་བླ་སློབ་ནང་མར་གྱུར། སངས་རྒྱས་མཉན་སྤྲུལ་དགུ་པ་ཀརྨ་བཤད་སྒྲུབ་བསྟན་པའི་ཉི་མ་ལས་ཇོ་ལུགས་སྒྲོལ་དཀར། ཕྱག་ཆེན་ངེས་དོན་རྒྱ་མཚོ་སོགས་མང་དུ་གསན། ཁྲ་ལེགས་མཆོག་སྤྲུལ་ལས་རྩ་རྒྱུད་བརྟག་གཉིས་ཀྱི་སྤྱི་དོན་འཇམ་མགོན་ཀོང་སྤྲུལ་རིན་པོ་ཆེའི་གསུང༌། ཀར་ལུགས་མི་འཁྲུགས་པ་དང་ཚེ་དཔག་མེད་ལྷ་དགུ། རཏ་གླིང་ཚེ་སྒྲུབ་གསང་འདུས་དོན་དབང་སོགས་གསན། དཔལ་སྤུངས་སྒྲུབ་བླ་ནོར་བུ་ལས་མཁས་དབང་ཀརྨ་ཚེ་དཔལ་གསུང་ལམ་རིམ་ཡེ་ཤེས་སྙིང་པོའི་འགྲེལ་ཆེན་ལུང༌། མདོ་སྲིབ་མཁན་ཐུབ་བསྟན་ལས་དཀོན་ལྷུན་བཀའ་འབུམ་དང་རྒྱུད་བཏུས་ཕལ་ཆེ་བའི་པོད་ལུང་གསན། ཟུར་མང་བསྟན་འཛིན་སྤྲུལ་སྐུ་ལས་རོལ་རྡོར་དྲག་ཁྲོས་ཀྱི་དབང་སོགས་དང༌། མཁར་མགོ་ཨཾ་མཁར་སྤྲུལ་སྐུ་ལས་ཆོས་རྗེ་གླིང་པའི་གཏེར་ཆོས་བཀའ་འབུམ་ཡོངས་རྫོགས་ཀྱི་ལུང་སོགས་གསན་པ་བཅས་རྣམ་ཐར་ཞལ་གསུངས་ལས་གསན་བསམ་མཛད་ཚུལ་རགས་རིམ་གསལ་བ་རྣམས་གཙོ་བོར་སྨོས་པ་སྟེ། ཞིབ་པར་ནི་གསན་ཡིག་པོད་ཆེན་བཞི་ལྷག་བཞུགས་པའི་དཔེ་རྒྱུན་མ་འབྱོར་བས་མཐའ་དག་འགོད་ནུས་པ་མ་ཡིན་ལ། རྗེ་བླ་མའི་སློབ་མ་ཡོངས་ཀྱི་ཐ་ཆུང་བདག་ལའང་རང་ལོ་བཅོ་ལྔ་སྐོར་ཐོག་མར་མཇལ་བའི་སྐལ་བཟང་ཐོབ་ནས་ལུགས་གཉིས་ཀྱི་ཐུན་མོང་མ་ཡིན་པའི་ཐུགས་བརྩེ་བཀའ་དྲིན་ཆེན་པོས་བསྐྱངས་ཤིང་རྗེ་ཉིད་ཀྱིས་ཟབ་ཆོས་བཞེས་པའི་བླ་མའི་གྲལ་དུ་འཇོག་པར་མཛད་ནས་བཀའ་ལུང་བསྩལ་བ་བཞིན། རང་གིས་ཀུན་སློང་ཚེ་རབས་ཐམས་ཅད་དུ་བླ་མ་འཇམ་པའི་དབྱངས་ཀྱི་སྤྱན་སྔར་ཆོས་ཀྱི་མཆོད་སྤྲིན་འབུལ་བའི་སྨོན་འདུན་དང་བཅས་ཀློང་སྙིང་ཡུམ་བཀའི་ཚེ་དབང་ཐོག་མར་ཕུལ་ནས་བརྩམས་ཏེ། ཕུར་པ་རྒྱུད་ལུགས་སམ་རྒྱལ་པོ་ལུགས་ཀྱི་དབང་ཆེན། ཡང་གཏེར་བཀའ་འདུས་ཆོས་ཀྱི་རྒྱ་མཚོ་དང་རྟ་མགྲིན་དྲེགས་སྒྲོལ་གྱི་དབང༌། འཕགས་མའི་སྙིང་ཐིག་གི་ཡང་ཟབ་ཚེ་ཡི་བྱིན་རླབས། ཀློང་སྙིང་དཔལ་ཆེན་འདུས་པ་དང་ཁྲག་འཐུང་རིགས་བཞིའི་སྒོས་སྒྲུབ་ཆ་ཚང་བའི་དབང༌། འཇམ་མགོན་མི་ཕམ་རིན་པོ་ཆེ་དང་རྒྱལ་ཚབ་གསུང་སྐོར་མང་ཞིག་གི་ལུང༌། ཇོ་ནང་རྗེ་བཙུན་ཏཱ་ར་ནཱ་ཐའི་བཀའ་འབུམ་ཡོངས་རྫོགས། བཀའ་བརྒྱུད་སྔགས་མཛོད་བཅས་ཀྱི་དབང་ལུང་དང༌། ཞར་བྱུང་དུ་རྫུ་འཕྲུལ་དང་ཏིང་ངེ་འཛིན་གྱི་ནུས་པས་འདོད་རྒུར་དབང་ཐོབ་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཆོ་འཕྲུལ་རྨད་དུ་བྱུང་བས་བྱིན་གྱིས་བརླབས་པས་ལྗོན་ཤིང་དང་ཆུ་ཀླུང་ལས་ཆོས་ཀྱི་སྒྲ་འབྱུང་བ་དང༌། འཇམ་དཔལ་དབྱངས་ཀྱིས་བདུད་སྡིག་ཅན་སངས་རྒྱས་ཀྱི་མཚན་དཔེ་ཅན་དུ་བསྒྱུར་ནས་མདོ་སྡེ་ཟབ་ཅིང་རྒྱ་ཆེ་བ་སྟོན་ནུས་པར་གསུངས་པ་ལྟར་རང་བྲིས་དགོངས་གཏེར་དུ་མིང་བཏགས་པ་རྣམས་ཀྱང་ཐོག་མར་རྗེ་བླ་མ་མཆོག་གི་ཡེ་ཤེས་གཟིགས་པས་གཏེར་ཆོས་ཚད་ཐུབ་ཏུ་ཞལ་བཞེས་ཀྱི་དབུགས་དབྱུང་དང་ལེགས་སོའི་གཟེངས་བསྟོད་སྐུ་གསུང་ཐུགས་རྟེན་ཁྱད་པར་ཅན་སོགས་གནང་སྐྱེས་གྱ་ནོམ་པ་དང་བཅས་ཐོག་མར་འབྲི་བར་འོས་པའི་བཀའ་ཆེད་དུ་གནང་ཞིང༌། དབང་ལུང་ཡོངས་རྫོགས་གསན་བཞེས་གནང་བར་མཛད་པ་སྟེ། དེའང་རང་ལ་ནི་འདི་རིགས་འབྲི་འོས་ཀྱི་ཡོན་ཏན་དང་མི་ལྡན་མོད། རྗེ་མཁྱེན་བརྩེའི་དབང་པོ་སྐུ་གོང་འོག་གི་བྱིན་རླབས་ཀྱི་ཆ་ཤས་རྒྱུད་ལ་ཞུགས་པའི་མཐུ་ཁོ་ན་ལས་བྱུང་བར་ངེས་ཤེས་སྐྱེས་པ་ཙམ་རྒྱུ་མཚན་དུ་བཟུང་སྟེ་བཀའ་བཞིན་ཕུལ་བའང་འཕྲོས་སུ་སྨོས་པའོ། །དེ་དག་ཀྱང་འཇམ་མགོན་ཆོས་ཀྱི་རྒྱལ་པོ་ཉི་ཟླ་ཟུང་གི་ཐུགས་སྲས་ཕལ་མོ་ཆེ་ལས་རང་རང་ལ་ཆེད་དུ་བསྩལ་བའི་ཟབ་ཆོས་ཉམས་བཞེས་ཀྱི་སྐོར་ཐམས་ཅད་དམིགས་བསལ་དུ་གསན་པར་མཛད་ཅིང༌། སྤྱིར་ཡང་ཐོས་པས་ཆོས་ཚོལ་བ་ལ་ནམ་ཡང་ངོམས་པ་མེད་པས་རྟག་ཏུ་ཟབ་པ་དང་རྒྱ་ཆེ་བའི་དབང་ཁྲིད་ལུང་གི་རྒྱུན་ཐམས་ཅད་གསན་པ་དང༌། གཞན་ལའང་གསུང་གིས་བསྐུལ་བར་མཛད། གསར་རྙིང་གི་ཆོས་བཀའ་གནད་ཆེ་བ་དག་ནི་ལན་གཅིག་གསན་པས་ཚིམ་པ་མིན་པར་བརྒྱུད་པའི་ཁྱད་པར་སོགས་ལ་དགོངས་ནས་ལན་དུ་མར་བསྐྱར་ཏེ་ཡང་ཡང་གསན་པར་གནང་ཞིང༌། མདོར་ན་ཕྱི་མའི་དུས་འདིར་མཁས་ཤིང་དངོས་གྲུབ་བརྙེས་པ་དང༌། བྱང་ཆུབ་སེམས་ཀྱིས་ཐུགས་རྒྱུད་གཏམས་པའི་དགེ་བའི་བཤེས་གཉེན་སོགས་གསར་རྙིང་རིས་སུ་མ་ཆད་པའི་སྐྱེས་ཆེན་དམ་པ་ཡོངས་འཛིན་བརྒྱད་ཅུ་ལྷག་ལས་ཟབ་རྒྱས་ཆོས་ཀྱི་བདུད་རྩིའི་རྒྱུན་ཐམས་ཅད་རྒྱ་མཚོ་ཆེན་པོར་ཕྱོགས་ཀྱི་ཆུ་གཏེར་ཐམས་ཅད་ཉིན་རེ་བཞིན་འབབ་ཀྱང་ངོམས་པ་མེད་པར་ཡང་ཡང་འབབ་པ་ལྟར་རྟག་ཏུ་གསན་པ་ལྷུར་བཞེས་པས་མང་དུ་ཐོས་པ་ནོར་བུའི་གསང་མཛོད་བསགས་པ་ལ་ནམ་ཡང་ཆོག་ཤེས་པ་མི་མངའ་ཞིང༌། དེ་དག་ཀྱང་གསན་ཡུལ་གྱི་གང་ཟག་ཆོས་བརྒྱུད་ལ་སེལ་ཆགས་པ་དང༌། གང་བྱུང་མ་བརྟག་པའི་གྱ་ཚོམ་དང༌། ངོ་སྲུང་ཕྱོགས་འཛིན་དང༌། ཀླད་ཡངས་ཅོལ་ཆུང་གི་མཛད་པ་མ་ཡིན་པར་དགེ་བའི་བཤེས་གཉེན་ཕུན་སུམ་ཚོགས་པའི་ཡོན་ཏན་དང་ལྡན་པ་འབའ་ཞིག་ལ་བརྟེན་པ་དང༌། གསན་བྱའི་ཆོས་ཀྱང་སྐབས་དེའི་མཐུན་འཇུག་དང༌། གྲགས་པའི་རྗེས་འབྲང་གི་སྣང་བ་འུར་འདྲོག་དང་ཕྱོགས་ཞེན་ཙམ་མ་ཡིན་པར་རྒྱལ་བའི་བསྟན་པ་རིན་པོ་ཆེ་དངོས་དང་བརྒྱུད་ནས་ཕན་པ་རླབས་གང་ཆེ་དང༌། རྒྱུན་དཀོན་ལ་ནུབ་ཀྱིས་དོགས་པ་རྣམས་ཆེད་དུ་གསན་པར་མཛད། གསན་པ་དེ་དག་ཀྱང་གང་ལས་བྱུང་བའི་ཁུངས་དང་གྲུབ་མཐའ་སོ་སོའི་བཤད་པའི་རྣམ་གྲངས། ལྟ་སྒོམ་གྱི་འཇོག་མཚམས། བསྐྱེད་རྫོགས་སོ་སོའི་ཟབ་གནད་མན་ངག་གི་ཆེ་བ་དང༌། མཐའ་དག་གི་ཕྱག་ལེན་ཕྲ་བ་ཚུན་ཆད་རང་རང་གི་ལུགས་སྲོལ་མ་འདྲེས་པ་གསལ་བར་མཁྱེན་ཅིང་རྟག་ཏུ་བསྙེལ་བ་མེད་པའི་ཐུགས་དྲན་མངའ། ཉམས་བཞེས་འཆད་སྤེལ་གྱི་སྐབས་སུ་དེ་ལྟར་ཕྱག་ལེན་གནང་ཕྱོགས་ཀྱང་ཕན་ཚུན་འདྲེས་པ་དང་འཆོལ་བ་སོགས་གཏན་ནས་མི་མཛད། ཆོས་ལ་གཅེས་སྤྲས་ཐུགས་ཀྱི་དཀྱིལ་དུ་བཟུང་བས་གསར་རྙིང་གི་གྲུབ་མཐའ་རང་རང་གི་བསྟན་པའི་བདག་པོར་ཁས་འཆེ་བ་དག་ལས་ཀྱང་རྒྱུས་ཆེ་ཞིང་ཐུགས་ཉམས་སུ་བསྟར། བསྟན་པའི་རྒྱུན་དང་རྗེས་འཇུག་གི་མིག་ལྟོས་ལ་དགོངས་པས་གང་གསན་པ་དེ་དག་ཆུད་མི་ཟ་བའི་ཕྱིར་དཔེ་གསར་དུ་བཞེངས་པ་དང༌། དཔེ་རྒྱུན་དཀོན་པའི་རིགས་རྣམས་སྤར་དུ་བསྐྲུན་པར་མཛད་པ་དང༌། དཀྱིལ་འཁོར་ཙཀླི་གསར་བཞེངས་ལ་སོགས་པ་དེ་མ་ཐག་གནང་ཞིང༌། བསྙེན་སྒྲུབ་ཉམས་བཞེས་དང་འཆད་སྤེལ་གནང་བ་སོགས་ཕྱག་རྗེས་ཐོན་ངེས་པ་རེ་དང༌། དབང་ཆོས་གྲུབ་པའི་རྗེས་གཏང་རག་གི་དངོས་རྫས་གྱ་ནོམ་པ་སྟོབ་པ་དང༌། ཕྲིན་ལས་ཀྱི་སྒོ་ཡངས་པོར་ཕྱེ་བ་དང༌། གཞན་ཡང་བསྟན་རྒྱུན་ལ་ཕན་ངེས་པ་དང་གསན་བྱའི་ཡོན་ཏན་ཚད་དང་ལྡན་པར་གཟིགས་ན་ཆོས་པ་ཉམས་ཆུང་སྦས་ཚུལ་ཅན་དག་ལས་ཀྱང་ཆོས་གསན་དགོས་གང་ཡོད་གསན་ཅིང་བསྔགས་པས་གཟེངས་བསྟོད་དབུགས་དབྱུང་གནང༌། གསན་ཡུལ་རྣམས་ལ་དད་མོས་ངོ་ལྐོག་དང་བྲལ་བར་དམ་པའི་ཆོས་ཚོལ་བ་དང༌། བཤེས་གཉེན་བསྟེན་ཚུལ་མདོ་དང་མཐུན་པའི་མཛད་པ་ངོ་མཚར་ཅན་ལ་ཆོག་ཤེས་དང་ངལ་བ་མེད་པར་རྟག་ཏུ་བརྩོན་པར་མཛད་པ་ནི། སྡུད་པ་ལས། དེ་ལྟ་བས་ན་བྱང་ཆུབ་དམ་པ་ཚོལ་བ་ཡི། །བསམ་པ་དྲག་ལྡན་མཁས་པས་ང་རྒྱལ་དེས་བཅོམ་སྟེ། །ནད་པའི་ཚོགས་ཀྱིས་གསོ་ཕྱིར་སྨན་པ་བསྟེན་པ་ལྟར། །གཡེལ་བ་མེད་པར་དགེ་བའི་བཤེས་གཉེན་བསྟེན་པར་བྱ། །སངས་རྒྱས་བྱང་ཆུབ་མཆོག་ཞུགས་བྱང་ཆུབ་སེམས་དཔའ་དག །ཕ་རོལ་ཕྱིན་དང་བཅས་ཏེ་དགེ་བའི་བཤེས་སུ་བསྟེན། །དེ་དག་རྗེས་སུ་སྟོན་བྱེད་འདི་ནི་སྒྲུབ་པའི་ས། །རྒྱུ་རྣམ་གཉིས་ཀྱིས་སངས་རྒྱས་བྱང་ཆུབ་མྱུར་དུ་རྟོགས། །ཞེས་དང༌། མདོ་ལས། དགེ་བའི་བཤེས་གཉེན་མགུ་བར་བྱས་ན་སངས་རྒྱས་ཐམས་ཅད་ཀྱི་བྱང་ཆུབ་ཐོབ་བོ། །ཞེས་དང༌། ཀླུ་སྒྲུབ་ཀྱིས། སྐྲ་དཀར་གཉེར་མ་ལྷགས་དུས་སུ། །ཐོས་པ་མང་དུ་བསགས་བྱ་སྟེ། །གང་དུ་ཐོས་མང་འགྲོ་གྱུར་པ། །དེར་ནི་ཕུང་པོ་འགྲོ་མི་འགྱུར། །ཞེས་གསུངས་པའི་དོན་ཐུགས་ལ་བཏགས་པ་ལྟར་རོ། །གཞན་འཇིག་རྟེན་གྱི་ཆེན་པོའི་རིགས་ལ་ལུགས་དང་མཐུན་པའི་ཆེ་བཀུར་ཙམ་གནང་བ་ལས་ཆོས་སྲིད་ཀྱི་ཡོན་ཏན་ཕྲན་བུས་སེམས་དྲེགས་པ་དག་ལ་ནི་ཐད་ཀའི་ངོ་སྲུང་ཡང་གནང་དཀའ་བ་ཙམ་པས་ཁ་གསག་གི་བསྟོད་ར་དང༌། ཐབས་ཀྱི་ཆེ་བཀུར་སོགས་གཏན་ནས་མི་གནང་བར་ཚུགས་ཟིན་པར་བཞུགས་པས་ཆོས་ཀྱི་གཞུང་སྲོང་ཞིང་རང་ཚུགས་ཐུབ་པའི་བླ་སློབ་ཀྱི་རྟེན་འབྲེལ་མ་ལོག་པས་བསྟན་པའི་མིག་རྒྱན་དུ་འོས་པ་དག་ཀྱང་གཟུར་གནས་ཡེ་ཤེས་དག་པའི་སྤྱན་རས་ཀྱི་འབབ་སྟེགས་ལ་ཞིབ་ཏུ་དཔྱད་ན། རྗེ་གོང་མའི་གསུང་ལས། སྤོང་བ་བསམ་གཏན་དེ་ཁོ་ནར། །མཉམ་པར་འཇོག་པ་དཀའ་ན་ཡང༌། །ཆུང་ནས་གདུལ་བྱ་གྲོང་ཆོག་སོགས། །རྨི་ལམ་དུ་ཡང་མ་དྲན་ཅིང༌། །ཚེ་འདི་བློ་ཡིས་ཐོངས་པ་ཡིས། །བྱ་བཏང་ཁོ་ནའི་ཚུལ་དུ་འཁུམས། །མཆོག་དམན་སུ་ལའང་ངོ་སྲུང་དང༌། །རེ་དོགས་སྤྲོས་པ་དམར་ཐག་བཅད། །ཅེས་གསུངས་པ་ལྟར། འཕགས་ས་མངོན་དུ་གྱུར་ཏེ་ནང་གི་ཡེ་ཤེས་ཀྱིས་ཆོས་བརྒྱད་རོ་སྙོམས་པས་རེ་དོགས་བྲལ་བའི་འཁྲུལ་པ་གཏད་མེད་དུ་ཞིག་པས་ངོ་མཚར་གྱི་གསང་བ་རྟོགས་དཀའ་བ་ཡོད་ཀྱང་དེང་སང་རྒྱུ་མཚན་དེ་དག་ངོ་ཤེས་པ་ནི་རེ་རེ་ཙམ་དུ་བས་སོ། །འཕགས་པ་ཀླུ་སྒྲུབ་ཀྱིས། ཤེས་རབ་རྒྱས་བྱེད་པ་ནི་ཐོས་པ་སྟེ། །བསམ་པ་དང་ནི་གཉིས་པོ་ཡོད་གྱུར་ན། །དེ་ལ་སྒོམ་པ་ཡང་ནི་རབ་ཏུ་འབྱུང༌། །དེ་ལས་དངོས་གྲུབ་བླ་ན་མེད་པ་ཐོབ། །ཅེས་འབྱུང་བ་དང༌། རྒྱལ་བ་འབྲོམ་གྱིས། ང་ཐོས་དུས་ཚེ་ན་བསམ་སྒོམ་བརྡོ། །ང་བསམ་དུས་ཚེ་ན་ཐོས་སྒོམ་བརྡོ། །ང་སྒོམ་དུས་ཚེ་ན་ཐོས་བསམ་བརྡོ། །ང་གཅིག་ཏུ་མ་ལུས་བརྡོ་བྱས་ནས། །ཆོས་ལམ་དུ་ཁྱེར་ནས་འགྲོ་ཤེས་པ། །ང་བཀའ་གདམས་ཕྱོགས་ཆར་མ་ལྷུང་བ། །དོན་རྒྱ་འབག་མིག་བཞིན་འཕྲུལ་ཤེས་པའོ། །ལེགས་ཀུན་ཏུ་བརྡོ་དེ་བཀའ་གདམས་ཡིན། །ཞེས་གསུངས་པ་ལྟར། དེང་སང་རྒྱལ་བསྟན་རིས་སུ་མ་ཆད་པའི་ཆོས་ཀྱི་རྒྱ་མཚོ་ཆེན་པོའི་ཕ་མཐར་དག་པའི་སྤྱན་རས་ཀྱི་བ་དན་མཛེས་པར་གཡོ་བ་ཤེར་བརྩོན་མཐུན་པའི་རླུང་གིས་ལེགས་པར་བརྒལ་ནས་ངེས་དོན་གྱི་ཟབ་གནད་ནོར་བུ་རིན་པོ་ཆེའི་བང་མཛོད་ཐུགས་ཀྱི་དཔལ་བེའུར་འགེངས་པར་བསགས་པའི་ཚུལ་ནི། འདུལ་བ་མེ་ཏོག་ཕྲེང་རྒྱན་དང་མདོ་རྩ། མངོན་པ་གོང་འོག་དང་ཤེར་ཕྱིན་སྡུད་པ། དབུ་མ་རིག་ཚོགས་སྐོར། བཞི་བརྒྱ་པ། སོར་མདོ་དང་དགེ་ཚུལ་གྱི་ཀཱ་རི་ཀཱ་ལྔ་བཅུ་པ་དང་སུམ་བརྒྱ་པ། འཇུག་པ་རྩ་འགྲེལ། སྤྱོད་འཇུག་བཤད་ཁྲིད་དཔལ་སྤྲུལ་སེམས་དཔའ་ཆེན་པོའི་གསུང་སྒྲོས། བྱམས་ཆོས་སྡེ་ལྔ་དང་དབུ་མ་རྒྱན་བཅས་རྗེ་མཁྱེན་བརྩེའི་ཉེ་བརྒྱུད་མི་ཕམ་རིན་པོ་ཆེའི་རྣམ་བཤད་བཅས་མདོ་ཕྱོགས་རྒྱ་གཞུང་དང༌། ཡིད་བཞིན་མཛོད་རྩ་འགྲེལ་ཡན་ལག་བཅས། སྡོམ་གསུམ་རྣམ་ངེས་རྩ་འགྲེལ། ཡོན་ཏན་མཛོད་རྩ་འགྲེལ། མཁས་འཇུག་བཅས་བོད་གཞུང་སོ་སོའི་རྩ་བ་དང་ས་བཅད་རིགས་ཐུགས་འཛིན་དང༌། འགྲེལ་པ་རིགས་ལ་གཟིགས་རྟོགས་ཀྱིས་དཀའ་གནད་དོགས་དཔྱོད་གོ་དོན་རྒྱུགས་འབུལ་བཅས་བསླབས་ཞིང་བྱང་ཆུབ་པའི་སྒོ་ནས་གསན་རྒྱ་ཆེས་ཆེ་བར་མཛད། གཙོ་བོར་སྔ་འགྱུར་སྒྱུ་འཕྲུལ་གསང་བ་སྙིང་པོ་ལ་འཕགས་བོད་ཀྱི་འགྲེལ་ཆེན། སྤྱི་དོན། སྦས་དོན་སོགས་ཡིག་ཆ་མང་པོའི་སྟེང་ཀུན་གཟིགས་སི་ཏུ་རིན་པོ་ཆེས་ཀཿཐོག་རྒྱུད་སྡེའི་བཤད་གྲྭ་གསར་འཛུགས་སྐབས་ལྗགས་བཤད་ཤིན་ཏུ་རྒྱས་པ་གནང་བ་དེ་ཐམས་ཅད་གསན་ཅིང་ཐུགས་སུ་ཆུད་པར་མཛད། ཁྱད་པར་འཇམ་མགོན་མཁྱེན་བརྩེའི་ཉེ་བརྒྱུད་ཀྱི་རྒྱུད་བཤད་སྨིན་གླིང་ལོ་ཆེན་རིན་པོ་ཆེའི་གསང་བདག་དགོངས་རྒྱན་སྟེང་ནས་ར་མགོ་མཆོག་སྤྲུལ་ལས་གསན་ཏེ་ཞེ་ཆེན་རྒྱལ་ཚབ་རིན་པོ་ཆེ་དང་ཀོང་སྤྲུལ་རིན་པོ་ཆེ་སོགས་ལའང་བཤད་རྒྱུན་སྤེལ་བར་མཛད་པ་དང༌། རྡོ་གྲུབ་ཀུན་མཁྱེན་བསྟན་པའི་ཉི་མ་ལས་སྤྱི་དོན་རིན་ཆེན་མཛོད་ལྡེའི་བཤད་ཁྲིད་ཞིབ་གསན་གྱིས་དོགས་གནས་བཀའ་འདྲི་སོགས་ཡང་ཡང་མཛད། རྩ་རྒྱུད་བརྟག་གཉིས་ས་རྔོག་གི་བཤད་རྒྱུན་ཞིབ་རྒྱས་གསན་ཏེ། གུས་པར་ཡང་ཆེད་དུ་བཀའ་ཕེབས་པ་བཞིན་ནམ་མཁའ་དང་མཉམ་པའི་རྒྱུད་རྒྱལ་གསང་བ་འདུས་པའི་འགྲེལ་པ་བཞི་སྦྲགས་སུ་གྲགས་པ་དང༌། བདེ་མཆོག་གི་འགྲེལ་པ་སྦས་དོན་ཀུན་གསལ་གྱི་བཤད་ལུང་གི་རྒྱུན་ཁུངས་དག་མདོ་སྨད་ཨ་མདོ་ཕྱོགས་ཀྱི་མཁས་པ་ཤེས་རབ་རྒྱ་མཚོའི་ཡང་སློབ་བིས་མདོ་མཁན་ཆེན་ལས་ཐོས་པ་མཎ1$0000270ཌ1$0000300ལ་ཚུལ་དུ་ཕུལ། སྒ་སྟོན་འཇམ་པའི་དབྱངས། སྡེ་གཞུང་མཆོག་སྤྲུལ་རིན་པོ་ཆེ་རྣམ་པ་གཉིས། མཁས་དབང་བླ་མ་བཀྲ་ཤིས་ཆོས་འཕེལ། ཟུར་མང་དྲུང་པ་རིན་པོ་ཆེ་ཆོས་ཀྱི་ཉིན་བྱེད། ཨ་མདོ་དགེ་བཤེས་འཇམ་རོལ་སོགས་གྲུབ་མཐའ་སོ་སོའི་རྒྱུན་འཛིན་རྣམས་ལས་ཆོས་ལུགས་དེའི་ཆོས་སྐད་དང་ལྟ་གྲུབ་ཀྱི་རྣམ་བཞག་སོགས་དོགས་དཔྱོད་བཀའ་མོལ་ཞིབ་ཏུ་གནང་ཞིང༌། བླ་མ་གོང་མའི་ཞལ་རྒྱུན་རིགས་ཀྱང་གསན་ནས་ཐུགས་ཀྱི་དཔལ་བེའུར་མ་ཉམས་པར་བཟུང་བར་གནང༌། སྒ་སྟོན་འཇམ་པའི་དབྱངས་འདི་ཐོས་བསམ་གྱི་གྲྭར་ཞུགས་པ་སོགས་མ་མཛད་ཀྱང་གསུང་ངག་རིན་པོ་ཆེ་ཉམས་བཞེས་དཔྱིས་ཕྱིན་པ་གནང་བས་ནང་གི་རྩ་མདུད་གྲོལ་བ་ལྟ་བུའི་ལྟ་སྒོམ་གྱི་གནད་སྤྱི་དང་ཁྱད་པར་ལམ་འབྲས་ཀྱི་ཟབ་དོན་རིགས་ལ་ཟབ་གནད་ཐམས་ཅད་ཁྲོལ་ཞིང༌། ཉམས་མྱོང་དམར་ཁྲིད་ལྟ་བུ་ངོ་མཚར་ཆེན་པོར་བཞུགས་པའི་མཁྱེན་དཔྱོད་རླབས་ཆེ་བ་སོགས་ལ་དཔག་ན་ཆོས་རྗེ་འཇམ་པའི་དབྱངས་ས་སྐྱ་པཎ1$0000270ཌ1$0000300ི་ཏས་བྱིན་གྱིས་བརླབས་པའམ་དེའི་སྤྲུལ་པ་ཡིན་པར་ངེས་པས་རྒྱུན་གྱི་བཀའ་མོལ་ལའང་བླ་མ་གོང་མའི་རྣམ་ཐར་དང༌། ཆོས་འབྱུང་ཁུངས་བཙུན། ཟབ་དོན་ཉམས་སུ་བླང་བའི་ལམ་རྟགས་གང་ཟག་སོ་སོའི་རྒྱུད་ལ་སྐྱེས་ཚུལ་སོགས་གལ་ཆེན་དུ་མ་ཡོད་པ་དེ་རིགས་ཡི་གེར་འཁོད་པ་བྱུང་ན་ཤིན་ཏུ་གལ་ཆེ་ཞེས་ཐུགས་སྲས་གཙོ་བོ་སྡེ་གཞུང་མཆོག་སྤྲུལ་རྣམ་པ་གཉིས་ཀ་ལ་ཆེད་དུ་ཡང་ཡང་བཀས་བསྐུལ་བར་མཛད། སྤྱིར་ཞལ་གསུང་རྣམ་ཐར་ལས། ཁྱད་པར་མཁན་ཆེན་བླ་མ་ནི། །ཀུན་བཟང་དཔལ་ལྡན་ཆོས་གྲགས་ཀྱིས། །ཐུགས་བརྩེ་ཆེན་པོས་ལེགས་བསྐྱངས་ཏེ། །དབང་ལུང་འགའ་དང་རྙིང་རྒྱུད་ལུང༌། །གསང་སྙིང་བཤད་པ་རྒྱ་ཆེར་ནོས། །སྔ་རྗེས་གཞུང་གི་དཀའ་གནད་སོགས། །བཀའ་དྲིན་བསྩལ་ལས་ཨ་མྱེ་ཡི། །གོ་བ་རྒྱུད་ལ་ཆགས་ཙམ་བྱུང༌། །ཞེས་གསུངས་པ་ལྟར། ཐོག་མར་ཀཿཐོག་གི་གདན་སར་མ་ཧཱ་པཎ1$0000270ཌ1$0000300ི་ཏ་མི་ཕམ་འཇམ་པའི་དབྱངས་ཆེད་དུ་གདན་ཞུས་ཀྱིས་ཀུན་གཟིགས་སི་ཏུ་རིན་པོ་ཆེ་གཙོས་དམ་པ་དུ་མས་གསན་སྦྱོང་རྒྱ་ཆེར་མཛད་ཅིང༌། ཕྱིས་བཤད་གྲྭ་གསར་ཚུགས་སྐབས་མི་ཕམ་རིན་པོ་ཆེ་མཆོག་གི་བཀའ་ཕེབས་བཞིན་མཁན་ཆེན་བླ་མ་ཀུན་བཟང་དཔལ་ལྡན་ཆོས་གྲགས་ཕེབས་ཏེ་གཞུང་གི་སྐོར་འཆད་ཉན་རྒྱ་ཆེར་གནང་སྐབས་དེར། མཁན་ཆེན་ཨ་སྟོབས་སོགས་རྒྱུ་མཚན་ཤེས་པའི་དམ་པ་རྣམས་མགྲིན་གཅིག་གིས་མཁན་ཆེན་བླ་མ་འདི་ཉིད་མི་ཕམ་རིན་པོ་ཆེ་དངོས་ལས་གསན་བསམ་ཡང་ཡང་གནང་བས་ཀུན་མཁྱེན་རོང་ཀློང་གཉིས་ཀྱི་དགོངས་སྲོལ་དྲི་མ་མེད་པའི་རྒྱུད་གཞུང་ཐམས་ཅད་ཀྱི་ལྟ་བ་དང་གྲུབ་མཐའ་ཁྱད་ཆོས་ཐུན་མོང་མ་ཡིན་པའི་གནད་ཀྱི་ཞལ་རྒྱུན་མངའ་བས་ན། རང་རེ་རྣམས་ཀྱིས་ཐོས་བསམ་ལ་སྦྱང་བརྩོན་གལ་ཆེ་ཞེས་གསུངས་པ་ལྟར་ཐུགས་བརྩོན་གཡེལ་ལྷོད་མེད་པས་སྒྲོ་འདོགས་ཞིབ་ཏུ་བཅད་དེ་རྣམ་དཔྱོད་དཔྱིས་ཕྱིན་པར་མཛད་པས། འཕགས་བོད་ཤིང་རྟ་ཆེན་པོ་རྣམས་ཀྱི་བཞེད་སྲོལ་མ་འདྲེས་པ་ཐུགས་སུ་ཆུད་ཅིང་དེ་དག་གི་དགོངས་པའི་ཟབ་གནད་དང་བཀའ་དང་བསྟན་བཅོས་རྣམས་ཀྱི་ཟབ་དོན་ཁྱད་པར་ཅན་དུ་མ་ཐམས་ཅད་ཀྱིས་བགྲོ་གླེང་ལུང་རིགས་རྩལ་འདོན་ཡང་ཡང་གནང་སྐབས་སོ་སོའི་ལྟ་སྒོམ་གྲུབ་མཐའི་ཁྱད་ཆོས་ཀྱི་གནད་མ་འདྲེས་པར་མཁྱེན་ནའང༌། ཆགས་སྡང་གི་ཚེར་མས་གཞན་རྒྱུད་དཀྲུགས་པའི་དགག་བཞག་སོགས་གཏན་ནས་མི་མཛད་པས། ཟབ་དོན་མཐའ་དག་སོ་སོའི་བཀའ་ཁྲིད་སྐབས་རྒྱས་པར་བཀའ་བསྩལ་ཏེ་གཞུང་ལུགས་ཐམས་ཅད་གདམས་ངག་དུ་ཤར་བ་ནི་སྒྲ་ཇི་བཞིན་ཐུགས་ཉམས་སུ་བསྟར་ཞིང༌། རྟོན་པ་བཞི་ལྡན་གྱི་རྣམ་དཔྱོད་རྨད་དུ་བྱུང་བའི་ཆ་ཤས་ཡོངས་སུ་རྫོགས་པའོ། །དེ་ལྟར་ཡང་རྣམ་ཐར་ཞལ་གསུངས་མ་ལས། བོད་ཡུལ་ཤིང་རྟ་ཆེ་བརྒྱད་པོ། །ཀུན་ལ་དག་སྣང་ཆེར་བསྐྱེད་ཅིང༌། །ལོག་རྟོག་དྲི་མས་མ་གོས་ཤིང༌། །གཤེ་སྐུར་གྲུབ་མཐའི་ཕྱོགས་འཛིན་སྤངས༌། །དབང་ཁྲིད་མན་ངག་རྒྱུད་ལུང་རྣམས། །གང་བཞུགས་ཐམས་ཅད་འབད་པ་ཆེས། །ཉན་དང་མཉན་པར་འགྱུར་བར་སྨོན། །ཞེས་གསུངས་པ་ལྟར་གསན་བསམ་ཉམས་བཞེས་ཕྱོགས་མེད་དུ་གནང་བས་བསྟན་པ་ཡོངས་རྫོགས་ཀྱི་བདག་པོར་གྲུབ། སྨིན་གྲོལ་འཆད་སྤེལ་ལ་སོགས་པའི་སྐབས་གྲུབ་མཐའ་སོ་སོའི་ཕྱག་བཞེས་མན་ངག་གི་གནད་དོན་མཐའ་དག་ཕན་ཚུན་བསྲེ་བསླད་མི་མཛད་ཅིང་གདུལ་བྱའི་སྐལ་བ་དང་ཆོས་བརྒྱུད་སོ་སོར་ཇི་ལྟར་གྲགས་པ་དེ་ལྟར་རྗེས་སུ་བཟུང་བས་འཇམ་མགོན་ཆོས་ཀྱི་རྒྱལ་པོ་རྣམ་གཉིས་ཀྱི་སེང་གེའི་ཁྲི་ལ་དབང་བསྒྱུར་བའི་རྣམ་ཐར་གྱི་མིག་ལྟོས་གཙང་མ་གཡར་དམ་དུ་བཞེས་པ་ནི་རྗེ་འདི་ཙམ་ཟད་དོ། །བཞི་པ་རིམ་གཉིས་ཀྱི་ཏིང་འཛིན་ཟབ་མོ་ལ་ཐུགས་ཇི་ལྟར་གཞོལ་བའི་ཚུལ་ནི། དེའང་བསྟན་པ་རིན་པོ་ཆེ་ཐོས་བསམ་སྒོམ་པ་རིམ་ཅན་གྱི་སྲོལ་མི་ཉམས་ཤིང༌། ཐར་འདོད་རྣམས་ཀྱི་དོན་གཉིས་ཡོངས་སུ་རྫོགས་པའི་འདོད་དགུའི་དཔལ་ལ་འགོད་པའི་གཞན་ཕན་ལྷུར་བཞེས་པའི་ཕྱིར། སྐྱེས་བུ་དམ་པའི་ཐུགས་ཀྱི་བརྣགས་པ་མཐར་ཐུག་པ་ནི་ལུང་རྟོགས་དམ་པའི་ཆོས་ཀྱི་མཛོད་བསགས་པ་ཁོ་ན་ཡིན་ལ། དེའི་དང་པོ་ལུང་གི་ཆོས་ལ་གསན་བསམ་མཛད་ཚུལ་རགས་རིམ་སྨོས་ཟིན་ནས། འདིར་སྐབས་སུ་བབས་པ་ཕྱི་མ་སྟེ། རྗེ་འཇམ་དབྱངས་བླ་མ་མཆོག་ཉིད་སྐུ་ཆུང་ངུའི་དུས་ནས་རང་བཞིན་ལྷུན་གྲུབ་ངང་སྒོམ་ཆེན་པོའི་ལྟ་སྒོམ་གྱི་ལྷུམས་སུ་ཚུད་ཀྱང༌། དགུང་གྲངས་བཞི་བཅུར་ཕེབས་ཕན་ཆད་སྐུ་གཤེགས་ཀྱི་བར་ཐེམ་སྤང་གི་སྒྲུབ་པའི་རྣམ་ཐར་ལྷུར་བཞེས་གནང་བ་ལྟར། རྗེ་འདི་ཉིད་ཀྱང་གང་ཟག་རང་རྒྱུད་པ་ལྟར་ལམ་རིམ་བགྲོད་ཀྱི་འབད་རྩོལ་ལ་མི་ལྟོས་པར་ཐུགས་རྗེ་ཡས་སྤྲུལ་དུ་ངེས་མོད། ཚུར་མཐོང་གདུལ་བྱ་འདུལ་བའི་ཐབས་ཙམ་དུ་རིམ་གཉིས་ཀྱི་ཏིང་ངེ་འཛིན་ལ་ཐུགས་གཞོལ་བར་མཛད་པའི་ཚུལ་གྱི་དགོས་པ་ཡང༌། དེ་ཁོ་ན་ཉིད་ངེས་པར་བསྟན་པའི་མདོ་ལས་ཤཱ་རིའི་བུ་གང་གིས་བསྐལ་པ་གཅིག་ཏུ་ཉན་པ་བས། གང་གིས་སེ་གོལ་གཏོགས་པའི་ཡུན་ཙམ་ཞིག་དེ་ཁོ་ན་ཉིད་ཀྱི་ཏིང་ངེ་འཛིན་ལ་མཉམ་པར་བཞག་ན་བསོད་ནམས་མང་དུ་འཕེལ་ལོ། །ཤཱ་རིའི་བུ་དེ་ལྟ་བས་ན་དེ་ཁོ་ན་ཉིད་ཀྱི་ཏིང་ངེ་འཛིན་འདི་གཞན་ལ་ནན་གྱིས་གདམས་པར་བྱའོ། །ཞེས་དང༌། མདོ་སྡེ་རྒྱན་ལས། དེ་ལྟས་རྣལ་འབྱོར་ཅན་གྱི་སྒོམ་པ་གང་ཡིན་དེ་ནི་དོན་མེད་མིན། །དེ་ལྟར་བདེ་བར་གཤེགས་ཀྱི་བསྟན་པ་གང་ཡིན་དེ་ཡང་དོན་མེད་མིན། །གལ་ཏེ་ཐོས་པ་ཙམ་གྱིས་དོན་མཐོང་འགྱུར་ན་སྒོམ་པ་དོན་མེད་འགྱུར། །གལ་ཏེ་མ་ཐོས་པར་ཡང་སྒོམ་ལ་འཇུག་ན་བསྟན་པ་དོན་མེད་འགྱུར། །ཞེས་གསུངས་པའི་དོན་ཐུགས་ལ་བཅངས་ནས། སྤྱིར་དེང་སང་བྱ་བ་ལས་ཀྱི་འཁོར་ལོ་རྟེན་བཞེངས་དང༌། གཞུང་བཤད་པ། དབང་ལུང་གི་འཆད་ཉན་སོགས་དར་སྲོལ་ཆེ་བར་འདུག་ཀྱང་གཙོ་བོར་བསྙེན་སྒྲུབ་ཉམས་ལེན་ལ་འབད་པ་རྩལ་དུ་བཏོན་ན་གནད་དང་དགོས་པ་ཆེ་བར་གཞན་ལའང་བཀའ་བསྩལ་ཤིང༌། སྐུ་ཚེའི་སྨད་འགྲོ་དོན་ཤིན་ཏུ་རྒྱས་པའི་སྐབས་སུ་ཡང་དགུན་དཔྱིད་ཕལ་ཆེར་སྐུ་མཚམས་བཅད་རྒྱ་དམ་པོས་བསྙེན་སྒྲུབ་ཀྱི་གཡར་དམ་བཞེས་ཤིང༌། ཆོས་བརྒྱད་དང་འདུ་འཛི་འུར་ཟིང་གི་སྐད་གྲགས་ཆེན་པོའི་བྱ་བཞག་ལ་གཏིང་ནས་ཐུགས་མི་མཉེས་པས། རྟག་ཏུ་གཅོམ་བསྐྱུངས་མངོན་ཆུང་ཀུན་སྤང་གིས་བླ་མ་དཀྱུས་མ་ཞིག་གི་མཛད་པ་ལྟ་བུ་ལས་བླ་ཆེན་གྱི་ཚུལ་དང་བཞེས་མི་གནང༌། ཐེག་པ་ཆེན་པོའི་བློ་སྦྱོང་གི་སྐོར་རྟག་ཏུ་ཐུགས་ཉམས་སུ་བསྟར་བར་རྒྱུན་རིང་གི་ནད་པ་དང་དམག་འཁྲུག་སོགས་ཀྱི་སྐབས་དེ་དག་ལ་ཤིན་ཏུ་ཐུགས་བརྩེ་བས་བྱིན་རླབས་དང་གནས་འདྲེན་སོགས་ཡང་ཡང་བསྩལ། སློབ་མའི་ཚོགས་ལའང་གཞན་ཕན་བྱང་ཆུབ་སེམས་ལ་བློ་སྦྱངས་པས་སྙིང་རྗེ་དང་ངེས་འབྱུང་གིས་བློ་འཁུལ་བ་ཞིག་མེད་ན་ཕྱག་རྫོགས་ཀྱི་ལྟ་བ་ལ་མཐོ་བསྙབས་བྱས་པས་གར་ཡང་མི་ཕྱིན་པས་སྔོན་འགྲོའི་སྦྱོང་བ་གནད་དུ་འགྲོ་བ་ཉིད་ཤིན་ཏུ་ཟབ་ཅེས་ཞལ་གདམས་སུ་ཡང་ཡང་བསྩལ་བ་བཞིན་ཐུགས་རྒྱུད་སྙིང་རྗེ་ཆེན་པོའི་ཆ་ཤས་ཡོངས་སུ་རྫོགས་པའི་དབང་གིས་དྲེད་པོ་སྙིང་ཁམས་རྡོ་ལས་མཁྲེགས་པ་དང༌། ཆེ་རྒུའི་རིགས་རྣམས་ཞལ་མཇལ་བ་ཙམ་གྱིས་དད་གདུང་གིས་སྣང་བ་འགྱུར་བ་དང་བློ་གཏད་སྙིང་ནས་འཆའ་བ་མང་དུ་བྱུང་བས་མཚོན། ས་གསུམ་གྱི་འགྲོ་བ་དབང་དུ་འདུས་ནའང་ཆོས་བཤད་ལ་སོགས་པའི་སྐབས་ངེས་འབྱུང་ཡིན་པ་སྐད་ཀྱིས་ངུ་ཅོ་ཙིར་ཙིར་སྐད་ངན་འདོན་པའི་མངོན་ཚན་ཅན་གཏན་ནས་མི་མཛད། དགུང་གྲངས་བཅུ་བདུན་སྟེང་རྒྱུད་སྡེའི་དབང་གསན་སྐབས་སྐུ་རྩེད་ཕྲན་བུ་གནང་བ་ལྟར་ཡོད་ཀྱང་དབང་གི་རྫས་གནས་སོ་སོར་བཞག་རྒྱུ་དང་ཕྱག་རྒྱ་སོགས་ཕྱག་བཞེས་གང་གནང་ཡང་སྔ་ཕྱི་ནོར་འཁྲུལ་གཏན་ནས་མི་མངའ་བས་དུས་རྟག་ཏུ་ཐུགས་ལ་ཡེངས་འཁྲུལ་མེད་པ་རྗེ་འདི་གཞན་དང་ག་ལ་འདྲ་ཞེས་ཞབས་དྲུང་རིན་པོ་ཆེ་བཀྲ་ཤིས་རྒྱ་མཚོས་ཡང་ཡང་བསྔགས་པར་མཛད། སྤྱིར་ཟབ་ཁྲིད་རིགས་ཞུ་བའི་སྐབས་སོ་སོའི་དམིགས་ཐུན་ལ་ཤར་སྒོམ་བགྱིས་པས་སྨིན་ཁྲིད་ཀྱི་གོ་ཆོད་ཅེས་གསུང་ལས་ཐོས་པས་ཕྱག་ལེན་དུའང་དེ་ལྟར་མཛད་པར་ངེས་ཏེ། ཁྱད་པར་དུ་རྗེ་བླ་མ་མཆོག་ནས་གདམས་མཛོད་གསན་པའི་ཕྱག་ཐོར་འཁོད་པ་འདི་ལྟར། རང་རེ་ཆོས་ཞུ་བ་དཔེ་ཆ་འཛོམ་མཁན་རྣམས་ནས་ཀྱང་སེམས་རྣམ་གཡེང་གི་དབང་དུ་སོང་བའི་ཞུས་ལོ་ཐོབ་ལོ་བྱས་ལ་མ་བསགས་པའི་ལས་སུ་མི་འགྱུར་བའི་ཆེད་ཁྲིད་དཔེ་ལ་ཞིབ་ཏུ་བལྟ་ཞིང་ཚིག་རྗེས་དོན་དྲན་གྱི་དམིགས་ཐུན་ཤར་སྒོམ་བྱེད་ཁུལ་བགྱིས་པ་སོགས་རང་རྒྱུད་ལ་སྨན་པའི་ཐབས་ཚུལ་གང་དྲག་ལ་བརྩོན་པས་བྱིན་རླབས་ཀྱི་བབས་གཞན་ལས་ཁྱད་པར་འཕགས་པ་འབྱུང་ཚུལ་གསུངས་པས་ཤེས་ནུས་ལ། ཁྱད་པར་དུ་རྡོ་རྗེ་འཆང་བློ་གཏེར་དབང་པོའི་ཞབས་ལས་གསང་ཆེན་སློབ་བཤད་ཀྱི་ཁྲིད་གསན་སྐབས་དོན་གྱི་ཡེ་ཤེས་མངོན་སུམ་གཟིགས་པའི་ཚུལ་མཛད་རྗེས། རིག་འཛིན་སྣ་ཚོགས་རང་གྲོལ། རྡོ་གྲུབ་འཇིགས་མེད་བསྟན་པའི་ཉི་མ། རྫོགས་ཆེན་ལྔ་པ་ཐུབ་བསྟན་ཆོས་ཀྱི་རྡོ་རྗེ་རྣམས་ལས་རྫོགས་པ་ཆེན་པོའི་རིག་པ་རྩལ་གྱི་དབང་ཆེན་དུ་མ་གསན་པ་དང༌། སྐྱབས་རྗེ་རྒྱལ་ཚབ་རིན་པོ་ཆེས་བྱང་བདག་སྐུ་གསུམ་རིགས་འདུས་ཀྱི་དབང་གི་ངོ་སྤྲོད་སྐབས་དགོངས་པའི་བྱིན་རླབས་གཏད་པས་ཐུགས་དམ་བོགས་འབྱིན་བྱུང་ཚུལ་གསུངས་པ་སོགས་ཀྱིས་མཚོན་རྡོ་རྗེའི་ཡེ་ཤེས་ཆེན་པོའི་དགོངས་པ་ཁྱབ་བརྡལ་དུ་ཤར་བས་ལམ་རིམ་རྩོལ་གྱི་ངལ་དུབ་ལ་མ་ལྟོས་པར་སྣང་སྤྱོད་ཡེ་ཤེས་ཀྱི་རོལ་པར་འབྱམས་ཀླས་པས་ཟབ་གསལ་གཉིས་སུ་མེད་པའི་ལྟ་སྒོམ་གྱི་ལྷུམས་སུ་ཆུད་ནས་སྤོང་ཀློག་ཟུང་འབྲེལ་གྱིས་དོན་གཉིས་ལྷུན་གྱིས་གྲུབ་པ་ནི་ཀུན་གྱི་མཐུན་སྣང་དུ་གྲུབ་པ་ལགས། དམིགས་བསལ་ཉམས་བཞེས་གནང་ཚུལ་ས་བོན་ཙམ་སྨོས་ན། ཐོག་མར་རྫོགས་པ་ཆེན་པོ་ཀློང་ཆེན་སྙིང་ཐིག་གི་སྒོ་ནས་སྔོན་འགྲོ་ཐུན་མོང་དང༌། ཐུན་མིན་འབུམ་ལྔ་རྗེ་བླ་མ་སྐུ་གོང་མའི་ཕྱག་བཞེས་ལྟར་བསགས་སྦྱོང་གནད་སྨིན་དུ་གནང་བའི་ཚུལ་མཛད་པ་དང༌། དུས་སྐབས་སྔ་ཕྱི་ཅི་རིགས་སུ་གཙོ་བོར་རྗེ་མཁྱེན་བརྩེའི་ཟབ་གཏེར་རྣམས་ཀྱིས་མཚོན་སྔོན་འགྲོའི་དམིགས་ཁྲིད་དམིགས་བསལ་དུ་ཡོད་པ་རྣམས་ལ་དང་པོ་སྔོན་འགྲོའི་དམིགས་རིམ་བསགས་སྦྱོང་དང་བཅས་པ་རྒྱས་བསྡུས་ཅི་རིགས་མཐར། རིམ་པ་དང་པོའི་རྣལ་འབྱོར་དང་འབྲེལ་བར་གསར་རྙིང་ལྷག་པའི་ལྷ་རབ་འབྱམས་ལས་དུས་གྲངས་མཚན་མའི་བསྙེན་པ་དཔག་ཏུ་མེད་པ་ཞིག་གནང་བ་རགས་རིམ་ཙམ་བཀོད་པ། ངོར་པའི་ཕྱག་བཞེས་ཀྱེ་རྡོར་གཞི་བསྙེན་སྔོན་དངོས་རྗེས་ཚང་བ་ཞིབ་རྒྱས། འཁོན་ལུགས་ཕུར་པའི་གཞི་བསྙེན་ཤིན་ཏུ་ཟབ་རྒྱས། གསང་འདུས་འཇམ་རྡོར། ཚར་ལུགས་འཇིགས་བྱེད། ནཱ་རོ་མཁའ་སྤྱོད་ཀྱི་ལྗགས་བསྙེན། མགོན་པོ་གུར་གྱི་སྲུང་བ་བྲག་རྫོང་མ་ཐེངས་གསུམ། མགོན་པོའི་ནང་གསང་སོགས་དང་འབྲེལ་བའི་ཡི་གེ་བདུན་པ་འབུམ་བརྒྱད་ཅུ་ལྷག །མགོན་པོ་ཞལ་བཞི་པའི་གསང་སྒྲུབ། དེའི་ཚེ་སྒྲུབ་གུར་བདུན་མ་དང༌། དཀར་པོ་ཚེ་འཕེལ་སོགས། རས་ཆུང་སྙན་བརྒྱུད་ཀྱི་བདེ་མཆོག་ལྷན་སྐྱེས་ཡབ་བཀའ་ཡུམ་བཀའ་གཉིས། ཤངས་ཆོས་རྒྱུད་སྡེ་ལྷ་ལྔ་མདོར་བསྡུས་དང་ལྷ་བཞི་དྲིལ་སྒྲུབ་སོགས། ཕྱག་དྲུག་མཐིང་གའི་བླ་རྣལ་སོགས། སྒྲུབ་བཏུས་ཁོངས་ནས་བྱ་རྒྱུད་རིགས་གསུམ་སྤྱི་དཀྱིལ་གྱི་བསྙེན་པ་རྒྱས་པ། མི་ཏྲའི་ཚེ་དཀར། བ་རི་ལུགས་སྒྲོལ་དཀར་འོད་ཟེར་དྲུག་སྦྲགས། ས་མནཏ་ཤྲཱིའི་དབྱངས་ཅན་མ་དཀར་མོ་སྟེ་དཀར་པོ་ལྷ་གསུམ་དང༌། གྲུབ་རྒྱལ་ཚེ་དཔག་མེད། བ་རིའི་རྣམ་རྒྱལ་དཀར་མོ། སྒྲ་མི་སྙན་གྱི་ཚེ་སྒྲུབ། ཚེ་ལྷ་རྣམ་གསུམ་ལ་བསྟེན་པའི་བླ་མའི་རྣལ་འབྱོར། འཇམ་དཔལ་བསྟོད་སྒྲུབ། མ་ཏིའི་འཇམ་དཀར། དམ་པའི་ལུགས་ཀྱི་སྨྲ་སེང༌། དབྱངས་ཅན་དཀར་མོ་ཕུར་བུའི་ལུགས། དབྱངས་ཅན་དམར་མོ་བཀྵི་བཱ་རི་ལུགས། ཀངྐ་དཏྟི་ལུགས་ཀྱི་ཕག་དཀར། མི་གཡོ་བ་དཀར་པོ་དཱ་ན་ཤཱི་ལའི་ལུགས། ཇོ་ལུགས་སྒྲོལ་དཀར། ཉི་སྦས་ལུགས་ཀྱི་རྩ་བའི་སྒྲོལ་ལྗང༌། གསེར་ཆོས་འཇམ་ནག་དང་ཁྱུང་ཁྲ། རིག་བྱེད་མ་བཅས། ཕྱག་རྡོར་འབྱུང་འདུལ་དང༌། ཨུ་ཙརྻ། མདོ་ལུགས་གོས་སྔོན་ཅན་བཅས། སྐྱེར་སྒང་རྟ་མགྲིན། རྣམ་འཇོམས་བ་རི་ལུགས། སྨེ་བརྩེགས་ཇོ་བོ་ལུགས། གྲྭ་མངོན་ཛཾ་དམར། ཤངས་པའི་གསེར་ཆོས་ཕྱག་དྲུག་དཀར་པོ་བཅས། གདུགས་དཀར་མཆོག་གྲུབ་མ་ཁྲི་ཚར་སྐོར་ཞལ་འདོན་གནང་བ་སོགས་གསར་ཕྱོགས་གཙོ་ཆེ་བ་དང༌། རིགས་ཐམས་ཅད་ཀྱི་ཁྱབ་བྱེད་བཀའ་གཏེར་ཟུང་འབྲེལ་སྨིན་ལུགས་རྡོར་སེམས་ཐུགས་ཀྱི་སྒྲུབ་པ། ཡང་གཏེར་རྩ་གསུམ་དྲིལ་སྒྲུབ། ཆོས་དབང་བླ་མ་གསང་འདུས་བསྙེན་ཆེན། རཏ་གླིང་ཚེ་སྒྲུབ་གསང་འདུས། མཁའ་འགྲོ་ཡང་ཏིག་གི་བྱིན་རླབས་བླ་སྒྲུབ། འཕྲེང་གཏེར་གྲོལ་ཏིག་གི་བླ་སྒྲུབ་གདུང་བ་ཞི་བྱེད། འཇའ་ཚོན་དཀོན་མཆོག་སྤྱི་འདུས། ལྔ་པའི་རྒྱ་ཅན་ཆོས་སྡེ་ཚེ་སྒྲུབ་དྭངས་མ་བཅུད་འདྲེན། ཀློང་སྙིང་བླ་མ་རིག་འཛིན་འདུས་པ། རྗེ་མཁྱེན་བརྩེ་དང་མཆོག་གླིང་ཟུང་གི་གཏེར་ཆོས་ཕྱི་སྒྲུབ་བར་ཆད་ཀུན་སེལ། དེའི་སྒོས་སྒྲུབ་ནས་རིག་འཛིན་རྒྱལ་བའི་གདུང་འཛིན། ནང་སྒྲུབ་བསམ་པ་ལྷུན་གྲུབ་བཅས། འཇམ་མགོན་རིན་པོ་ཆེ་དང་མཁྱེན་བརྩེ་ཟུང་གི་ཆོས་བཀའ་གསང་ཐིག་བླ་སྒྲུབ། ཀློང་སྙིང་ཡང་གསང་བླ་སྒྲུབ་ཐིག་རྒྱ། གྲུབ་ཐོབ་ཐུགས་ཏིག་གི་བླ་སྒྲུབ། རྒྱ་ཅན་གྲོ་ལོད་དང༌། ཀརྨ་གུ་རུ། སྨིན་གཏེར་དྲག་དམར། གནམ་ཆོས་གུར་དྲག་ཕུར་ཤམ་ཅན། ཀློང་གསལ་གཏུམ་དྲག་དམར་ནག །ཀློང་སྙིང་བླ་མ་དྲག་པོ་དཔལ་ཆེན་འདུས་པ་དང༌། དྲག་པོ་རྟ་ཁྱུང་བཅས། ཐུགས་སྒྲུབ་གྲོ་ལོད། འཇམ་མགོན་གྲོ་ལོད་གསང་སྒྲུབ་བཅས། ཉང་གཏེར་བཀའ་བརྒྱད་བདེར་འདུས་བསྙེན་ཆེན། ཡང་གཏེར་བཀའ་འདུས་ཆོས་ཀྱི་རྒྱ་མཚོའི་བསྙེན་སྒྲུབ་གཟབ་སྤྲོས་སྒྲུབ་ཆེན་སྨན་སྒྲུབ་དང་འབྲེལ་བ། གྲུབ་ཐོབ་ཐུགས་ཐིག་བཀའ་བརྒྱད་ཁྲག་འཐུང་འདུས་པ། ཐུགས་སྒྲུབ་བླ་མ་སྨྲ་སེང༌། རྒྱུད་ལུགས་འཇམ་དཔལ་ཞི་བའི་བསྙེན་ཆེན། བྱང་ལུགས་ཞང་ཁྲོམ་གཤིན་རྗེ་ཚེ་བདག་གཞི་བསྙེན། སྙན་བརྒྱུད་གཤིན་རྗེ་ཐེངས་གཉིས། འོད་གསལ་སྙིང་ཐིག་གི་འཇམ་དཔལ་འཆི་བདག་ཟིལ་གནོན། ཐུགས་སྒྲུབ་ཕ་རོལ་རྒོལ་འཇོམས་ལན་གཉིས། གྲོལ་ཏིག་ཡང་བཟློག །རིན་ཆེན་གླིང་པའི་ནཱ་ག་རཀྵ་བཅས། བྱང་གཏེར་ཚེ་སྒྲུབ་ལྕགས་སྡོང་མ། ཐུགས་སྒྲུབ་ཚེ་དམར། ཐུགས་ཆེན་ཡང་སྙིང་འདུས་པ། འཁོར་བ་དོང་སྤྲུགས། ཡང་གཏེར་རྟ་མགྲིན་དྲེགས་སྒྲོལ། གནམ་ལྕགས་མེ་འཁོར། གཉེན་པོ་ལྷ་ལྔ། རྒྱ་ཅན་རྟ་མགྲིན་ཁམས་གསུམ་ཟིལ་གནོན། སྙན་བརྒྱུད་རྟ་མཆོག་རོལ་པ་བཅས། སྙན་བརྒྱུད་ཡང་དག་ཟབ་ཏིག །ཡང་ཕུར་སྦྲགས་མ། ཡང་གཏེར་ཕྱག་རྡོར་རྡོ་རྗེ་མེ་འབར། ཀློང་གསལ་ཕྱག་རྡོར། ཐུགས་སྒྲུབ་ཕྱག་རྡོར་རྡོ་རྗེ་བེ་ཅོན། གཡུ་ཐོག་སྙིང་ཐིག་བླ་སྒྲུབ། སྨན་བླ་ལོངས་སྐུ་ཟུར་མཁར་ལུགས། བླ་སྒྲུབ་བྱིན་རླབས་སྙིང་པོ་བཅས། ཆོས་དབང་ཕུར་པ་ཡང་གསང་སྤུ་གྲི། རཏ་གླིང་ཕུར་པའི་གསང་སྒྲུབ། བདུད་འདུལ་ཕུར་པའི་གསང་སྒྲུབ། ཀློང་སྙིང་ཕུར་པ་བདུད་དཔུང་ཟིལ་གནོན། སྙན་བརྒྱུད་ཕུར་པ། འོད་གསལ་སྙིང་ཐིག་གི་ཕུར་པ་འདུས་པའི་དྲིལ་སྒྲུབ། མཆོག་གཏེར་ཟབ་བདུན་ཕུར་པ་དང༌། དེའི་རྣོ་སོ་ཁྲོ་རྒྱལ་སྟོབས་འདུས། གསང་ཐིག་ཕུར་པ་ཐེངས་གཉིས་བཅས། ཉང་གཏེར་ཁྲོས་ནག །ཆོས་དབང་སྒྲོལ་དཀར། རྒྱ་ཅན་སྒྲོལ་དཀར་ཡིད་བཞིན་ནོར་མཆོག །ཀློང་སྙིང་ཡུམ་བཀའ་བདེ་ཆེན་རྒྱལ་མོ། ཡང་གཏེར་མཁའ་འགྲོ་གསང་འདུས་དཀྱིལ་འཁོར་ཡོངས་རྫོགས་ལ་བརྟེན་པའི་བསྙེན་སྒྲུབ་སྦྲགས་མ་དང༌། རྒྱུན་ཁྱེར་ལ་བརྟེན་པའི་བསྙེན་རྐྱང༌། དེའི་ཞི་རྒྱས་དབང་གསུམ་གྱི་ཕག་མོ། ཞིག་གླིང་སྒྲོལ་དཀར། རྒྱ་ཅན་གསང་སྒྲུབ་སེང་གདོང་མ། ཇོ་ལུགས་སྒྲོལ་དཀར་བརྒྱུད་པ་གསུམ་ལྡན་འཇིགས་གླིང་ལ་བཀའ་བབས་པ། ཐུགས་སྒྲུབ་སྒྲོལ་ལྗང༌། མཆོག་གཏེར་བི་མ་ལའི་སེང་གདོང༌། ཡང་གཏེར་ཞི་བྱེད་གདུགས་དཀར། རྨ་བྱ་ཆེན་མོ། ཀློང་གསལ་ཛཾ་སེར། དག་སྣང་ཚེ་ཡུམ་ཙཎ1$0000270ཌ1$0000300ལཱི་ཐེངས་གསུམ། དགོངས་གཏེར་ཕག་དཀར་ཤེས་རབ་གསལ་བྱེད། ཡང་གཏེར་རོང་ཟོམ་པདྨ་མཁའ་འགྲོ། བྱང་ལུགས་ཀིང་དམར། དམ་གྲིབ་ཉེས་སེལ། ཐུགས་སྒྲུབ་སྨེ་བརྩེགས། དག་སྣང་མི་ཏྲའི་ཚེ་དཔག་མེད་དཀར་དམར་གཉིས། ཡང་གཏེར་དྲང་སྲོང་དྲི་མེད་ཞི་བའི་ཚེ་སྒྲུབ། དགོངས་གཏེར་འཕགས་མའི་སྙིང་ཐིག་ལན་གསུམ། གླིང་གཏེར་ཚེ་ཡུམ་ཙཎ1$0000270ཌ1$0000300་ལི། རྒྱ་ཅན་དམག་ཟོར་ཞི་བའི་ཚེ་སྒྲུབ། ཉང་གཏེར་ཕྱག་བཞི་པ་དཀར་པོ་ཚེ་འཕེལ་བཅས་ལ་དུས་གྲངས་མཚན་མ་ཅི་རིགས་པའི་ལྗགས་བསྙེན་གནང་བ་འདི་དག་དགུང་གྲངས་ང་དྲུག་བཞེས་པ་ཡན་གཙོ་བོར་རྣམ་ཐར་ཞལ་གསུངས་ལས་འབྱུང་བ་དང༌། དེ་རྗེས་ལྗགས་བསྙེན་གནང་བ་སོགས་ཕྱག་ཐོར་མ་འཁོད་པའི་རིགས་དམིགས་བསལ་རྗེ་བླ་མ་དངོས་ཀྱི་ཞལ་དང༌། ངེས་པ་ཅན་གཞན་དག་ལས་ཐོས་པ་རྣམས་གོ་རིམ་ཅུང་ཟད་བསྡེབས་ཏེ་དཀྱུས་གཅིག་ཏུ་བཀོད་པའོ། །གཞན་ཡང་རིག་འཛིན་གོང་མ་རྣམས་ཀྱི་ཕྱག་བཞེས་ལྟར་མཆོག་གི་ལས་སྦྱོར་བདུད་རྩི་སྨན་སྒྲུབ་དང་སྒྲུབ་མཆོད་རིགས་གྲངས་མང༌། ཚེས་བཅུ་གཉིས་སོགས་དུས་དང་ནར་མར་ཚོགས་དང་མཆོད་པ་རྒྱས་བསྡུས་སྐབས་བསྟུན་བསགས་སྦྱོང་སྤེལ་བའི་རིམ་པ་རྒྱ་ཆེར་གནང༌། མཚན་བཅས་གཙོ་བོར་གྱུར་པའི་རྫོགས་རིམ། གསུང་ངག་རིན་པོ་ཆེ་ལམ་འབྲས་བུ་དང་བཅས་པ། རྣལ་འབྱོར་མའི་རྫོགས་རིམ། ནཱི་གུ་ཆོས་དྲུག །སྙིང་ཐིག་གི་དབང་གཉིས་པ་དང་གསུམ་པའི་ལམ་རྣམས་ལ་ཉམས་བཞེས་གནང་སྙམ་པ་གསུང་འཕྲོས་ཀྱི་ཤུགས་ལས་གསལ་ཞིང༌། སྐྱེས་ཐོབ་ཀྱི་ནུས་པས་མཚན་བཅས་རྩ་རླུང་ཐིག་ལེའི་རྣལ་འབྱོར་དང༌། འོད་གསལ་གྱི་སྣང་བ་སྐུ་དང་ཐིག་ལེའི་འཆར་སྒོ་འབད་རྩོལ་ཆུང་ངུས་འབྱུང་བ་གོར་མ་ཆགས་ཤིང༌། བྱེ་བྲག་མཚན་མེད་ཀྱི་རྣལ་འབྱོར་ཕྱག་རྫོགས་ཀྱི་ཁྲིད་སྲོལ་རྣམས་དང༌། ཁྱད་པར་སྙིང་ཐིག་གསར་རྙིང་རྣམས་ལ་གཙོ་བོར་ཉམས་བཞེས་གནང་བར་ངེས་ཏེ། འོན་ཀྱང་གསར་རྙིང་གདམས་པ་རྒྱ་མཚོ་ལྟ་བུའི་གནས་ལ་ཐོས་བསམ་སྒོམ་གསུམ་གྱི་རང་བྱན་ཚུད་པའི་སྟོབས་ཀྱིས་ཟབ་ཁྲིད་སོགས་གནང་བའི་ཚེ་གཅིག་དཔེ་ཀུན་འགེབས་ཀྱི་སྟོང་ལྟ་ཧད་པོའི་འུར་སྒྲ་མ་ཡིན་པར་གདུལ་བྱའི་བློ་རིམ་དང་མཐུན་པར་གང་འཆད་བྱའི་ཆོས་སྐད་དང་སྒོ་བསྟུན་པའི་ལམ་གྱི་རྣམ་བཞག་ཉམས་མྱོང་དང་འདྲེས་པ་ཅན་ཁོ་ན་མཛད། རྣམ་ཀུན་ཤིན་ཏུ་ཐུགས་སྒམ་ཞིང་གསང་བ་སྲུང་བ་ལ་གཙོ་བོར་མཛད་པས། སྐབས་སུ་གཅོམ་བསྐྱུངས་པའི་གསུང་གིས་ངེད་ནི་ཞུས་ཞུས་ཐོབ་ཐོབ་མང་བ་ལས་འདི་དག་ལ་ཉམས་ལེན་བྱས་པ་ནི་མེད་ཅེས་གསུངས་ཀྱང༌། སྨིན་ཁྲིད་གནང་བའི་གསུང་བཤད་སྐབས་སུ་གང་བབས་ཀྱི་ཆོས་དེའི་དགོངས་པ་གཏིང་ཕྱིན་པ་དང་སྦྱངས་པ་མཐར་སོན་པའི་ཉམས་མྱོང་གི་དམར་ཁྲིད་སེམས་རྒྱུད་ལ་ཤིན་ཏུ་སྨིན་ངེས་གསུངས་བཞིན་ཉམས་ལེན་གནད་དུ་བརྡེགས་པས་རྒྱུད་ཐོག་ཏུ་འབྱོར་བ་དང༌། ཁྱད་པར་ཕུར་ཚུགས་ཉམས་ལེན་བརྩོན་པའི་རིགས་ལ་སྤམ་ཡོར་ཙམ་དུ་མ་སོང་བར་སོ་སོར་མྱོང་བ་སྐྱེས་རིམ་གྱི་ངོ་སྤྲོད་གེགས་སེལ་བོགས་འདོན་སོགས་གང་འོས་ཞིབ་ཏུ་གནང་བ་དང༌། ལྷག་པར་སྐུ་ཚེའི་སྨད་ནས་ཆིག་བརྒྱུད་སྨིན་ཁྲིད་གནང་བ་གཙོ་བོར་མཛད། དེས་ན་སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་ཆོས་ཚུལ་མ་ལུས་པ་སྐུའི་སྐྱེ་བའི་ཕྲེང་བ་དཔག་ཏུ་མེད་པར་ཐུགས་ཀྱི་བུམ་བཟང་དུ་བསྐྱིལ་བས་གསང་བ་རྒྱ་མཚོའི་བདག་པོར་གྲགས་པ་དོན་ལ་གནས་པའི་ཕྱིར། སྒྲུབ་བརྒྱུད་ཤིང་རྟ་ཆེ་བརྒྱད་སྨིན་གྲོལ་གྱི། །གདམས་ཟབ་གསང་བའི་མཛོད་ཀྱི་གླེགས་བམ་ཆེ། །མཁྱེན་དང་བརྩེ་བའི་ཡོན་ཏན་དཔལ་མངའ་བ། པདྨ་ཡེ་ཤེས་རྡོ་རྗེར་གསོལ་བ་འདེབས། །ཞེས་ཁོ་བོས་གསོལ་བ་བཏབ་པའི་ངོར་བསྩལ་བའི་ཞལ་གསུང་གསོལ་འདེབས་སུ་ཞལ་བཞེས་གནང་བ་ཉིད་ངེས་པ་དོན་གྱི་རྣམ་ཐར་དུ་མངོན་པས། ལོ་ཟླའི་གྲངས་དང༌། རི་མཚམས་སྡུག་རྒུར་གྱི་བྱས་ཡུས་ཙམ་ལ་མ་ལྟོས་པར་སྒྲུབ་བརྒྱུད་གོང་མའི་མཛད་པ་ཤུགས་འབྱུང་གིས་བསྐྱངས་པས་ནང་གི་རྡོ་རྗེའི་ལམ་གྱི་ཡོན་ཏན་རྫོགས་པའི་དྲོད་རྟགས་བརྙེས་པའི་ཚུལ་ཡང༌། སྐྱེས་བུ་དམ་པ་རྣམས་ཀྱི་ཡོན་ཏན་གྱི་རྒྱ་མཚོ་ནི་ཇི་ལྟར་རྒྱ་ཆེ་བཞིན་སྙེམས་པ་མེད་པའི་བརྟུལ་ཞུགས་ཀྱིས་སྦས་ཤིང༌། སྐུ་གསུང་ཐུགས་ཀྱི་གསང་བ་ཟབ་མོ་འཕགས་པའི་བློ་གྲོས་ཀྱིས་ཀྱང་སྒྲ་ཇི་བཞིན་དུ་དཔག་པར་མི་ནུས་པས་ཕྱོགས་ཙམ་བརྗོད་པའང་ཆེས་དཀའ་བའི་གནས་སུ་གྱུར་ཅིང༌། ཁབ་མིག་གཅིག་གི་བུ་ག་ནས་ནམ་མཁའ་མཐོང་བས་ནམ་མཁའི་མཚན་ཉིད་ཤེས་པ་ལྟར་དམ་པའི་ཡོན་ཏན་རིན་པོ་ཆེ་རིན་ཐང་དང་བྲལ་བའི་རྡུལ་གྱི་ཕྱེ་མ་ལྟ་བུའི་ཆ་ཤས་ཙམ་མཐོང་ཐོས་དྲན་པས་ཡིད་ལ་མངོན་མཐོ་ངེས་ལེགས་ཀྱི་དཔལ་སྦྱིན་ཅིང༌། བསམ་གྱིས་མི་ཁྱབ་པའི་གསང་བ་མངའ་བ་ཤུགས་འབྱུང་དུ་རྟོགས་པས་ན། གདུལ་བྱ་དད་དང་མོས་པའི་རྗེས་འབྲང་རྣམས་ལ་ཡིད་ཆེས་ཀྱི་དང་བ་འདྲེན་པའི་གསོས་སུ་ཤེས་པས་རང་གིས་མཐོང་ཐོས་དང་ཡིད་ཀྱིས་རྗེས་སུ་དཔག་པ་སྒྲོ་སྐུར་དང་བྲལ་བར་བརྗོད་ན། དེའང་རྗེ་འདི་ཉིད་ཐུགས་རྗེ་ཡས་སྤྲུལ་དུ་ཤར་བས་མཛད་སྤྱོད་རྣམས་ཀྱང་གང་ཟག་ཐ་མལ་པའི་བློ་ཡུལ་ལས་འདས་ཤིང༌། སྐུ་ན་ཤིན་ཏུ་ཕྲ་བའི་དུས་ནས་གཞུང་ལུགས་རྣམས་འཆད་པ་དང༌། རྡོ་རྗེ་སློབ་དཔོན་གྱི་ལས་སུ་བྱ་བ་རྣམས་ཐོགས་མེད་དུ་གནང༌། ཁྱད་པར་དུ་རྗེ་གོང་མའི་རྣམ་ཐར་བཞིན་དུ་བསྟན་འགྲོའི་དོན་འབའ་ཞིག་ཐུགས་ལ་བརྣགས་པས་སྤོང་དང་ཀློག་པའི་འཁོར་ལོས་ལུང་རྟོགས་ཆོས་མཛོད་བསགས་པ་ལ་ཆོག་ཤེས་སྐྱོ་སུན་དང་བྲལ་ཞིང༌། ཞར་བྱུང་བྱ་བ་ལས་ཀྱི་འཁོར་ལོས་ཕྱོགས་དང་རིས་སུ་མ་ཆད་པའི་མཆོག་ཕལ་རྣམས་ལ་ཆོས་ཀྱི་བགོ་སྐལ་རྒྱུན་ཆད་མེད་པར་བསྩལ་བས་བསྟན་པའི་སྲོག་རྩ་མཐའ་དག་སྦོམ་པོར་མཛད། བསྟན་རྒྱུན་དང་བསོད་ནམས་ཀྱི་ཞིང་དུ་རྟེན་གསུམ་བགྲང་ལས་འདས་པ་གསར་བཞེངས་དང༌། བཤད་སྒྲུབ་ཀྱི་སྡེ་ཁྱད་པར་ཅན་མང་དུ་བཙུགས་ཏེ། གཞན་བསྐུལ་སོགས་ཀྱིས་བསྟན་པ་རྣལ་མ་དར་རྒྱས་ཀྱི་སྲོལ་བཏོད། ཐམས་ཅད་སྒྱུ་མར་གཟིགས་པས་བསྟན་དོན་མཛད་དཀའ་བ་ཅི་འདྲ་ཞིག་བྱུང་ནའང་ཐུགས་སུན་པའི་རྣམ་པ་དང་འོལ་ཆེ་ཕྲ་མོ་ཙམ་མི་མངའ་ཞིང་རྣམ་ཀུན་ཁུ་སིམ་མེར་བཞུགས། རྟག་ཏུ་སྦས་ཚུལ་གྱི་རྣམ་ཐར་ལྷུར་བཞེས་ཀྱང་ནང་གི་ཡེ་ཤེས་སྟོབས་སུ་གྱུར་པས་དམ་པའི་ཡོན་ཏན་གྱི་སྙན་གྲགས་ཕྱོགས་ཀྱི་ཐ་གྲུ་ཀུན་ཏུ་ཁྱབ་ནས་རིས་མེད་པའི་སྐྱེས་ཆེན་དམ་པ་ཀུན་གྱིས་བསྔགས་ཤིང་དངོས་བརྒྱུད་ནས་ཞབས་པད་ལ་བསྙེན། ཡེ་ཤེས་བརྙེས་པའི་གཟིགས་སྣང་ལ་ཁྱབ་བརྡལ་དུ་སྤྱོད་པའང་གསང་བ་སྲུང་བ་ལ་ཐུགས་ཤིན་ཏུ་སྒམ་པས་ཀུན་དང་ཐུན་མོང་ལྟ་བུར་བཞུགས། ས་གཞི་སྐྱོང་བ་ཆེ་ཕྲ་མཐའ་དག་གིས་ཞབས་ནས་བཏེགས་ཀྱང་ཆོས་བརྒྱད་ཀྱི་འདུ་འགོད་ཕྲ་མོ་ཙམ་ཡང་མི་གནང་ཞིང་ཀུན་སྤོང་གི་རྣམ་ཐར་གཙོ་བོར་མཛད། ཆོས་ཉིད་ཀྱི་དགོངས་པ་ཀློང་དུ་གྱུར་པས་མཛད་སྒོ་ཆེ་ཕྲ་མཐའ་དག་འཕྲལ་འཕྲལ་ཐད་ཀར་གནང་བའང་ཕལ་པའི་བློར་ཆུད་དཀའ་བའི་ངོ་མཚར་ཅན་རྣམས་རྣམ་ཀུན་ཐོགས་མེད་དུ་འགྲུབ་པའི་ཕྲིན་ལས་ལ་མངའ་བརྙེས། ཐུགས་རྗེ་ཆེན་པོ་དུས་ལས་ཡོལ་བ་མི་མངའ་བས་བོད་ཆེན་ལྗོངས་ནས་འཕགས་བལ་བར་གྱི་གདུལ་བྱ་བསམ་གྱིས་མི་ཁྱབ་པའི་རྒྱུད་ལ་ཐར་པའི་ས་བོན་འཇོག་པར་དངོས་ཀྱི་ཞབས་བསྐྱོད་ནས་ཚོགས་ཟུང་འབུམ་གྱིས་བསྐྲུན་པའི་སྐུའི་དཀྱིལ་འཁོར་བསྟན་ཅིང༌། གང་འདུལ་གྱི་གསུང་གི་བདུད་རྩི་དང་དམིགས་པ་མེད་པའི་ཐུགས་ཀྱིས་ཀུན་ལ་ཁྱབ་པར་གནང་ནས་ཕྲིན་ལས་མཐར་ཕྱིན་མཛད་པ་མདོར་ན་སྐུ་གསུང་ཐུགས་ཀྱི་གསང་བ་མཐའ་དག་ཆོས་དང་ཞུ་དག་འཕེར་བའི་རྣམ་ཐར་གཙང་མ་འདི་ལྟ་བུ་ནི་ལྷ་དང་བཅས་པའི་འཇིག་རྟེན་ཀུན་གྱིས་ཕྱག་བྱ་བའི་འོས་སུ་གྱུར་ཅིང༌། སངས་རྒྱས་སྲས་དང་བཅས་པས་བསྔགས་པར་མཛད་པའང༌། སྡུད་པ་ལས། དཔེར་ན་སངས་རྒྱས་སྤྲུལ་པ་སངས་རྒྱས་མཛད་པ་བྱེད། །བྱེད་པ་དེ་ལ་དྲེགས་པ་ཅུང་ཟད་སྐྱེ་མི་འགྱུར། །དེ་བཞིན་ཤེས་རབ་སྤྱོད་མཁས་བྱང་ཆུབ་སེམས་དཔའ་ཡང༌། །སྤྲུལ་པ་སྒྱུ་མ་བཞིན་དུ་བྱ་བ་ཐམས་ཅད་སྟོན། །ཤིང་མཁན་བཟོ་བོ་མཁས་པས་སྐྱེས་པ་བུད་མེད་དང༌། །འདྲ་བའི་བཟོ་བྱས་དེ་ཡང་བྱ་བ་ཐམས་ཅད་བྱེད། །དེ་བཞིན་ཤེས་རབ་སྤྱོད་མཁས་བྱང་ཆུབ་སེམས་དཔའ་ཡང༌། །རྣམ་པར་མི་རྟོག་ཡེ་ཤེས་བྱ་བ་ཐམས་ཅད་བྱེད། །དེ་ལྟར་སྤྱོད་མཁས་རྣམས་ལ་ལྷ་ཚོགས་མང་པོ་དག །ཐལ་མོ་སྦྱར་བས་བཏུད་ནས་ཕྱག་ཀྱང་འཚལ་བར་བྱེད། །ཕྱོགས་བཅུའི་འཇིག་རྟེན་ཁམས་ཀྱི་སངས་རྒྱས་ཇི་སྙེད་པའང༌། །ཡོན་ཏན་བསྔགས་པའི་ཕྲེང་བ་ཡོངས་སུ་བརྗོད་པར་མཛད། །ཅེས་གསུངས་པ་ཉིད་དོ། །ཁྱད་པར་དུ་རྒྱུན་གྱི་ཞལ་འཕྲོས་སུ་ཕྲན་སྲོག་རླུང་པའི་ཁོག་པར་གདོན་ཞུགས་པས་མི་མཐོང་བ་དང་མི་བྱེད་པ་མེད་ཅེས་གསུངས་པ་ཡང་དོན་དུ་ནང་གི་རྣལ་འབྱོར་གྱི་བྱེད་པས་རྩ་ཐིག་རླུང་གསུམ་ལ་རང་དབང་འབྱོར་ཞིང་སྲོག་རྩོལ་དབུ་མར་དག་པའི་བདེན་དོན་མངོན་དུ་གྱུར་པ་སྟེ། བསྡུས་རྒྱུད་ལས། སྲོག་གི་རྩོལ་བས་དག་པ་རི་བོང་ཅན་དང་ཉི་མ་དང་བྲལ་བྱང་ཆུབ་སེམས་དཔའ་རྣམས་ཀྱིས་མཆོད། །ཅེས་པ་དྲི་མེད་འོད་དུ། སྲོག་གི་རྩོལ་བ་དག་པ་ཞེས་པ་ནི། འདིར་གང་གི་ཚེ་རྣལ་འབྱོར་པ་ཉི་མ་རི་བོང་ཅན་གྱི་ལམ་དང་བྲལ་ཏེ་རྟག་ཏུ་དབུ་མར་འབབ་པར་གྱུར་པ་དེའི་ཚེ་སྲོག་གི་རྩོལ་བས་དག་པར་གྱུར་པས་ན། བྱང་ཆུབ་སེམས་དཔའ་རྣམས་ཀྱིས་མཆོད་དེ་བསྔགས་པར་བྱེད་དོ་ཞེས་པའི་དོན་ཏོ། །ཞེས་རྣལ་འབྱོར་པ་གཡས་གཡོན་ནས་རྒྱུ་བའི་རོ་རྐྱང་གི་རླུང་དབུ་མར་ཚུད་པ་ན། གཟུང་འཛིན་གྱི་འཆིང་བ་གྲོལ་ཏེ་རྡོ་རྗེ་ནང་གི་ས་བཅུའི་སྤང་རྟོགས་ཡོངས་སུ་རྫོགས་ཏེ་སོ་སོ་ཡང་དག་པའི་རིག་པ་བཞི་ལ་དབང་འབྱོར། གཟུངས་དང་སྤོབས་པ་དང་མངོན་ཤེས་ཚད་མེད་པའི་གཏེར་རྡོལ། ཡེ་ཤེས་ཀྱི་སྤྱོད་ཡུལ་ཡོངས་སུ་དག་པས་བྱ་རྩོལ་དང་བྲལ་བའི་ཕྲིན་ལས་ཀྱིས་འགྲོ་བའི་དོན་གྱི་མཛད་པ་ལྷུན་གྱིས་གྲུབ་པའི་རྟེན་འབྲེལ་གྱིས་བྱང་ཆུབ་སེམས་དཔའ་རྣམས་ཀྱིས་མཆོད་ཅིང༌། སངས་རྒྱས་རྣམས་ཀྱི་ལུང་བསྟན་ཐོབ། སྙན་པའི་གྲགས་པ་ཆེན་པོ་འབྱུང་ཞིང༌། རླུང་དབང་དུ་འདུས་པའི་རྟེན་འབྲེལ་གྱིས་བྱང་ཆུབ་སེམས་དཔའ་ལ་སོགས་དབང་དུ་འདུ་བར་གསུངས་པ་ཉིད་ཇི་བཞིན་མངོན་དུ་གྱུར་པར་ངེས་པས་ན་གྲུབ་པའི་རྟགས་མཚན་ཀུན་གྱི་མཆོག་ཏུ་གྲུབ་པའོ། །དགུང་གྲངས་རེ་བཞིར་ཕེབས་པ་མེ་སྤྲེལ་ས་ག་ཟླ་བའི་ཡར་ཚེས་སྐོར་ཡར་ལུང་སྣེ་གདོང་བན་གཙང་དུ་ཡང་གཏེར་བཀའ་འདུས་སྒོ་ནས་སྤྲོས་བཅས་སྒྲུབ་ཆེན་རྒྱས་པར་གནང༌། ཟླ་བ་དེའི་དམར་ཕྱོགས་ཀྱི་ཚེས་བཅུར་ཁྲ་འབྲུག་གི་གཙུག་ལག་ཁང་དུ་ཚོགས་དང་མཆོད་པ་གཟབ་རྒྱས་ཀྱིས་ཁྱམས་སྟོད་སྟེགས་བུར་རས་བྲིས་ལ་བརྟེན་པའི་ཡང་གཏེར་བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་སྒྲུབ་མཆོད་དང་འབྲེལ་རབ་ཏུ་གནས་པའི་ཆོ་གས་ནང་གི་ལྷ་ཁང་ཆེ་ཕྲ་ཚང་མ་དང༌། ཕྱི་རོལ་གླིང་སྐོར་གྱི་མཆོད་རྟེན་ཁག་བཅས་ལ་ཁྲུས་གསོལ་དང་རབ་གནས་མེ་ཏོག་འཐོར་བ། མཆོག་གི་ལས་སྦྱོར་བདུད་རྩི་སྨན་སྒྲུབ། ཐུན་མོང་དུ་ཚེའི་སྒྲུབ་པ། དྲག་པོའི་ལས་སྦྱོར་གཏོར་ཟློག །སྐོང་བཤགས་དང་ཚོགས་ཀྱི་མཆོད་པ་བརྒྱ་ཕྲག་ལྷག་གྲངས་གསོག་བཅས་སོ་སོར་གཟབ་རྒྱས་ཉིན་གཅིག་གི་ཁོངས་སུ་གྲུབ་པར་མཛད། དེའི་ཉིན་ཐུགས་སྣང་ཤིན་ཏུ་སྤྲོ་བའི་ཚུལ་གྱིས་སྔར་བན་གཙང་དུ་སྒྲུབ་ཆེན་ལས་ད་རེས་དགོས་པ་ཆེ་སོང་ཞེས་གསུང་འཕྲོས་ཀྱང་ཕེབས། དེའང་གསུང་ཆོག་དབུ་ཉི་དྲོས་ཙམ་དུ་ཚུགས་ཤིང༌། བར་མཚམས་གུང་གསེང་སོགས་ཡུན་རིང་ཙམ་གནང་མོད། དགོང་ཀ་སྔ་ཆར་ནས་གྲུབ་ཅིང་ནམ་མཁར་སྤྲིན་འཇའ་ཤར་བ་སོགས་དེར་ཡོད་རྣམས་ངོ་མཚར་གྱི་གནས་ལ་བཀོད་པར་མཛད། རྫོང་སར་གཙུག་ལག་ཁང་དུ་སྒྲུབ་ཐབས་ཀུན་བཏུས་ཀྱི་དབང་ལུང་གསུང་སྐབས་རྣམ་སྲས་སེར་ཆེན་གྱི་རྗེས་གནང་སྐབས་ཚོགས་གྲལ་གྱི་བར་དུ་གསེར་འཐོར་བ་སློབ་མ་ཁ་ཤས་ནས་རྙེད་པ། རིམ་གྱིས་ཐམས་ཅད་ནས་ཞིབ་ཏུ་བཙལ་ཚེ་ལྷ་ཁང་དེའི་བླ་བྲེའི་སྟེང་ཚུན་མང་པོ་བབས་པ་དང༌། མདོར་ན་རིན་ཆེན་དང་པོ་སིལ་མར་བརྡལ་བས་ལྷ་ཁང་གི་ཕྱི་ནང་ཐམས་ཅད་ཁྱབ་པ་དངོས་སུ་གསེར་དད་རྟེན་དུ་ཁྱེར་རྒྱུ་ཡོད་པ་བྱུང༌། དགུང་གྲངས་རེ་གཉིས་པ་རྟ་ལོར་གཟིམ་ཆུང་དབང་ཁང་དུ་སྒྲུབ་བཏུས་གསུངས་སྐབས་དབང་རྒྱས་ལྷ་རྣམས་ཀྱི་རྗེས་གནང་སྐོར་ལ་ཆབ་མདོ་ཡབ་ཚང་ནས་བཀའ་འགྱུར་སྤར་གསར་བཞེངས་ཀྱི་སྤར་ཕུད་འབུལ་དུ་བྱུང་བར་བཀའ་ཆོས་འདི་སྔར་འདོན་སྐབས་གསེར་གྱི་ཆར་བབས་པ་རེད་ཅེས་སྒྲོ་བཏགས་བྱས་པ་དོན་ལ་གནས་སྲིད་ནའང་ཐུན་མོང་ཙམ་རེད། ད་རེས་ཐུན་མིན་རྒྱལ་བཀའ་རིན་པོ་ཆེའི་ཆོས་ཀྱི་མཛོད་ཆེན་པོ་དངོས་སུ་ཐོབ་པ་རེད་ཅེས་ཞལ་རྩེད་བཅས་དེ་འཕྲལ་ནས་འདུས་པ་རྣམས་ལ་བསྙེན་བཀུར་གྱིས་དག་འདོན་གནང་བར་མཛད་པའང་ཐུན་མིན་ཆོས་ཀྱི་མཛོད་ལ་དབང་འབྱོར་བའི་རྟགས་སུ་ངེས། སྔར་ཀཿཐོག་ཏུ་བཞུགས་སྐབས་དངུལ་ཆུ་ཀར་ཡོལ་ཕྱེད་ཙམ་བཞེས་མཛད་པ་སྐུ་ལུས་ལ་ཅིའང་མ་གནོད་པར་ཐམས་ཅད་བཞུགས་གདན་སྟེང་དུ་ཐོན་པར་མཛད་པས། འགའ་ཞིག་གིས་ལོ་ཉུང་བསམ་མེད་ཀྱི་བྱ་སྤྱོད་དུ་བརྩིས་ནས་མ་ཤི་བ་དེ་ཙམ་ལམ་འགྲོ་བྱུང་བ་རེད་ཅེས་ལབ་སྐད་ཀྱང་དོན་ལ་གྲུབ་རྟགས་ཡིན་པར་ངེས། གདན་སར་ཕེབས་ནས་ཡུན་རིང་མ་ལོན་པའི་སྐབས་ཤིག་རིན་ཆེན་སྣ་ཚོགས་འདྲེས་པའི་ཕྱེ་མ་ཞིག་གཟིགས་པ་སྐུ་ཚབ་ཀྱི་ཕབ་གཏའ་ཡིན་རྒྱུ་གནང་ནས་སྐུ་ཁ་ཤས་བཏབ་པ་སྒྲོམ་དུ་བཅུག་སྟེ་ཞག་ཁ་ཡར་སྒྲུབ་པ་མཛད་ཅིང་ཞལ་ཕྱེ་བ་ན་ཕྱག་གིས་རེག་དཀའ་བ་ཙམ་གྱི་དྲོད་དང་གཟི་བརྗིད་ཅན་དུ་གྱུར་འདུག་པ་སྐུ་ཚབ་ཀྱི་རྒྱུ་སོགས་གཏན་ནས་རེད་མི་འདུག་ཀྱང་ཡིད་གཉིས་མེད་པའི་དད་མོས་ཀྱིས་འགྲུབ་པར་གསུངས་པ་དོན་ལ་གནས་འདུག་ཅེས་ཕེབས། ཤིང་ལུག་ས་ཟླའི་དམར་ཕྱོགས་གྲུབ་ཐོབ་ཐུགས་ཐིག་གི་བཀའ་བརྒྱད་ཁྲག་འཐུང་འདུས་པའི་སྒོ་ནས་སྨན་སྒྲུབ་གནང་སྐབས་ཕྱེ་མར་སྒྲུབ་པ་ཚུགས་ནས་སྒྲུབ་ཁང་ལ་འཇའ་འོད་ཡང་ཡང་ཟུག་པ་ཀུན་གྱིས་མཐོང་བ་དང༌། འདིས་མཚོན་ཏེ་དབང་དང་སྒྲུབ་ཆེན་སོགས་གནང་སྐབས་ཆར་དཀོན་པ་ན་ཆར་རྒྱུན་ཆེར་འབབ་འཇའ་ཤར་བ་སོགས་ཤིན་ཏུ་མང་ཞིང༌། གཞན་ཡང་ཚེ་ཆང་ཞོ་ལྟར་དུ་ཆགས་པ། བུམ་ཆུ་བདུད་རྩི། ཚེ་རིལ་སོགས་ཉུང་ངུ་རེས་སློབ་མ་བརྒྱ་ཕྲག་ཁ་ཡར་ལ་རྒྱས་པར་ཁྱབ་པ་སོགས་རྣམ་ཀུན་ཤིན་ཏུ་མང་བས་ཀུན་ལ་ཐུན་མོང་ཡོངས་སུ་གྲགས་པའོ། །འཛིང་རྣམ་རྒྱལ་མགོན་པོ་ཞེས་པ་སྔར་ཆོས་རྗེ་ཁུ་དབོན་རྒྱ་ནག་ཏུ་ཕེབས་སྐབས་བཞེངས་ཞིང་ནང་རྟེན་དུ་སྟོན་མཆོག་ཐུབ་དབང་གི་འཁར་གསིལ་སོགས་བཞུགས་པའི་ལོ་རྒྱུས་ངོ་མཚར་ཅན་དེ་ཉིད་ཕྱིས་སུ་ཆ་ཕྲེང་བའི་གྲྭ་དམག་གིས་ཉམས་ཆག་བཏང་བ། རྗེ་འདིས་ཉམས་གསོས་ཀྱི་རབ་གནས་གནང་བའི་བགེགས་བསྐྲད་སྐབས་དགོངས་གཏད་ཀྱིས་དྲག་ཏུ་གཟིར་བས་དངོས་སུ་སྐུ་རྟེན་གཡོ་འགུལ་ཆེར་བྱུང་བའི་མདུན་དེར་ལས་རྡོར་ནས་གུ་གུལ་བདུག་ཅིང་ཡོད་པ་བྲེད་བསྔངས་ཀྱིས་བྲོས་དགོས་བྱུང་བ་ཡོངས་གྲགས་དང༌། བསྟན་འགྲོའི་དུས་རིམ་དུ་ཐུགས་སྒྲུབ་བསམ་ལྷུན་གྱི་བཀའ་སྲུང་རྣམ་སྲས་དྲག་པོ་རྟ་སྔོན་ཅན་གྱི་དམག་བཟློག་ཆེད་དུ་གནང་བའི་ཉིན་དེར་ཤར་ལྷོའི་ཕྱོགས་ནས་ནག་ཕྱོགས་ཀྱི་དམག་གཏོས་ཆེ་བ་ཞིག་ལམ་དུ་ཞུགས་ཏེ་འོང་སྐབས་ཐམས་ཅད་ཆུར་བྱིངས་ནས་རྨིང་མེད་དུ་གྱུར་པའི་རྟག་མཚན་མངོན་དུ་གྱུར། འདི་ལྟ་བུའི་མངོན་སྤྱོད་ནུས་མཐུའི་གདིང་ཚད་ལ་མངའ་བརྙེས་ཀྱང་ཤུགས་འབྱུང་ལུང་བསྟན་ཐོག་བབས་ལྟ་བུའི་བསྟན་རིམ་གནད་དུ་འགྲོ་བ་རེ་རེ་ཙམ་ལས་རྣམ་ཀུན་དྲག་པོའི་ལས་སྦྱོར་ལ་གཏན་ནས་ཐུགས་མི་དགྱེས་ཤིང་དངོས་བརྒྱུད་ནས་གནང་བར་མི་མཛད། སྤྱི་སྒེར་ཞབས་བརྟན་རིགས་ལའང་བཀའ་ལས། བསྟན་འགྲོ་སྤྱིའི་ཞབས་བརྟན་ཤིན་ཏུ་གལ་ཆེ་ཡང་དེང་སང་དུས་དབང་གིས་བླ་མ་རྣམས་དཀོར་ལ་རྔམས་ཤིང་ལྟ་དགོངས་ཀྱི་གདིང་ཐོབ་པ་དཀའ། སྦྱིན་བདག་དམ་ཚིག་དང་ལྡན་པ་དཀོན། སེམས་ཅན་བསོད་ནམས་དམན་པས་མངོན་སྤྱོད་ཀྱི་ལས་སྦྱོར་སྲུང་ཟློག་བསད་མནན་འདི་ཁེ་ཉེན་ཆེ་བས་གཙོ་བོར་ལས་འཇམ་པོ་གསུམ་ཁོ་ན་བསྔགས་ཤིང་འདོམས་པར་མཛད། གུས་ལ་རྣམ་སྲས་འདིའི་སྲོག་དབང་བསྩལ་སྐབས་ཐུན་མོང་དངོས་གྲུབ་ཀྱི་དབང་དུ་བྱས་ན་མགོན་པོ་གུར་ལ་བརྟེན་ན་ནོར་གྱི་དངོས་གྲུབ་དང༌། རྣམ་ཐོས་སྲས་ལ་བརྟེན་ན་དྲག་པོ་མཐུ་ཡི་དངོས་གྲུབ་ཡོད་ཀྱང་ཤེས་མཁན་མི་འདུག་ཅེས་ཞལ་རྩེད་ཀྱི་ཚུལ་དུ་གསུངས་པ་དོན་དུ་སྨོས་མ་ཐག་པ་ལ་དགོངས་སྙམ། ཐུགས་དམ་ཕྱག་དཔེའི་ཁྲོད་ནས་མགོན་པོ་ཞལ་པོད་ཀྱི་གདོང་དར་བྱི་བས་ཁྱེར་བ་ཆོས་སྐྱོང་ལ་ཕྲིན་བཅོལ་གནང་བས་ཕྱིར་ནངས་གླེགས་བམ་གྱི་འཁྲིས་དེར་ཚུར་བཞག་པ་དང༌། རྗེ་གོང་མའི་སྐུ་ཉེ་གདོང་ཐོག་ཁྱིམ་དུ་མཁྱེན་བརྩེ་རིན་པོ་ཆེས་སྙིང་ཐིག་ཡུམ་བཀའ་དང་ཚེ་རིང་མའི་གཡང་སྒྲུབ་ཀྱི་རྟེན་དུ་བཞག་པའི་བླ་རྡོ་ངོ་མཚར་ཅན་ཞིག་ཡོད་པ་ཕྱིས་དུས་འགྱུར་གྱི་ཚེ་བོར་བརླག་སོང་བ། རྗེ་ཉིད་ཀཿཐོག་ནས་ཡར་ཡོང་སྐབས་ཐང་ཞིག་ནས་རྙེད་པ་སླར་རང་གནས་བཞག་ཡོད་གསུངས་པ་སོགས་དམ་ཅན་དྲེགས་པས་བཀའ་བཞིན་སྒྲུབ་པའི་མངོན་རྟགས་སུ་ངེས་སོ། །སོག་ཙན1$0000240ད1$0000300ན་དགོན་གྱི་ཆར་ཉི་གྲགས་ཨ་ཙ་རྟོགས་ལྡན་གྱི་སྐུ་སྐྱེ་ཀུན་བཟང་རྣམ་གྲོལ་ནས་སངས་གླིང་གཏེར་མ་ཡིན་སྐད་རོལ་མོ་སོགས་ཕུལ་བར། ཁོ་ལ་གྲིབ་བཙན་འཁོར་ཆེས་པ་ཡིན་ནམ་དེའི་ནུབ་གྲིབ་བཙན་དངོས་སུ་བྱུང་སྙམ་བྱེད་པར་བཀའ་བསྒོ་དམ་བསྒྲགས་བྱས་ཁུལ་ཞེས་གསུངས། དྲྭ་སྒང་སྒྲུབ་གྲྭ་གསར་འཛུགས་སྐབས་འཁྲིས་དེར་སྔར་ནས་ཡོད་པའི་ཤུགས་ལྡན་སྐུ་གསོབ་གཉན་པར་བརྩི་བ་ཞིག་ཡོད་པ་དགོན་ཆེན་རྒྱལ་ཁང་དུ་སྤོ་འཇོག་གནང་སྐབས་གནས་དེ་ནས་མི་མཐོང་བའི་སར་སླེབས་པ་ན་ཤིན་ཏུ་ལྕི་ཞིང་ཐེག་དཀར་གྱུར་པ། སྔར་ཤུལ་དུ་ཏིང་ཕོར་ཡ་དང་སྙན་ཤལ་ཚལ་པ་ཕྲན་ཚེག་ལྷག་འདུག་པ་རྣམས་ལ་རྗེ་ཉིད་ཀྱི་ལྗགས་སྔགས་བཅས་ཕྱག་འབྲུ་གནང་ནས་འདིས་བྲོབས་ལ་ཁྱེར་ཅིག་ཅེས་ཐུགས་ཁྲོས་པའི་ཚུལ་གྱིས་བཀའ་ཕེབས་པ་ལྟར་བགྱིས་པས་རིམ་གྱིས་ཡང་དུ་སོང་ནས་མཐར་ཅི་བདེར་ཁྱེར་ཆོག་པ་བྱུང་བ་དང༌། དེའི་ནུབ་མོ་དགོན་ཆེན་རྒྱལ་ཁང་དུ་སིལ་ཆོལ་གྱི་སྒྲ་དང་ཁྱི་འུར་བ་སོགས་འཚུབས་ལྷོངས་ཆེ་བར་བྱུང་བ་ཀུན་གྱི་མཐོང་ཐོས་སུ་གྱུར་ཅིང༌། ལས་བྱེད་སུ་ལའང་གནོད་འཚེའི་རྣམ་པ་ཅུང་ཟད་མ་བྱུང་བས་ངོ་མཚར་ཡིད་ཆེས་ཀྱི་གནས་སུ་གྱུར། ལར་རྒྱལ་པོ་འདི་མཁྱེན་བརྩེ་གོང་མས་ལྷུན་གྲུབ་སྟེང་དུ་སྔ་འགྱུར་བཀའ་མ་ཚོགས་ཆེན་འདུས་པའི་སྒྲུབ་དབང་ཆེན་མོ་གནང་སྐབས་དངོས་སུ་དབང་གྲལ་དུ་འདུས་ནས་མདོ་ཚིག་ནོད་པའི་གཟིགས་སྣང་དམིགས་བསལ་བྱུང་བའི་གསུངས་འཕྲོས་ངག་རྒྱུན་ཁུངས་དག་ལས་འབྱུང་བ་ལྟར། རྫོང་སར་དགོན་གཞུང་དུའང་སྔར་ནས་རྒྱལ་པོ་འདིའི་རྟེན་དང་གསོལ་རྒྱུན་ཡོད་ཀྱང༌། བཀའ་གཏེར་གྱི་སྨིན་གྲོལ་རྒྱ་ཆེ་རྒྱུན་དུ་གསུང་བཞིན་པ་དང༌། སྒྲུབ་ཆེན་ལན་མང་འཛུགས་པ་དང་རྒྱལ་མདོས་སོགས་སྐབས་གང་ལའང་འཇམ་མགོན་བླ་མ་སྐུ་གོང་འོག་གཉིས་ཀས་ཆེད་དུ་སྙན་དར་དང་ཕྲིན་བཅོལ་ཙམ་ཡང་མི་གནང་མོད། བར་ཆད་ཀྱི་རྣམ་པ་ཅུང་ཟད་ཀྱང་མེད་པ་སོགས་རྗེ་མཁྱེན་བརྩེའི་དབང་པོ་སྐུ་གོང་འོག་གི་དམ་འོག་ཏུ་ཆུད་པ་ཞིག་ངེས་པར་ཡིན་འདྲ། དགུང་གྲངས་ལྔ་བཅུར་ཕེབས་པ་ཆུ་རྟ་ལོར་ཁམས་ཀྱི་ཕྱོགས་སུ་ཕྱུགས་ནད་ཀྱི་རྒྱུན་ཆེན་པོ་མཆེད་པའི་ཚེ། འོད་དཔག་བྱང་ཆོག་མཛད་པར་ཕྱུགས་ཀྱི་ནད་བདག་གཟུགས་དངོས་སུ་བསྟན་ནས་སྲོག་སྙིང་ཕུལ་བའི་གཟིགས་སྣང་བྱུང་བ་དེ་ཉིད་ལ་གསུར་བསྔོ་བསྡུས་པ་གསར་རྩོམ་གནང་ནས་ཕྱོགས་ཀུན་བཀྲམ་པས་ཁྱབ་ཚད་ཀྱི་ཕྱུགས་ནད་རྒྱུན་ཆད་པ་མངོན་སུམ་ཡོངས་གྲགས། གཏེར་ལྷུང་ཕྱོགས་རིམས་ནད་ཀྱིས་མི་མང་པོ་ཤི་ནས་རོ་གདོན་ཅན་ཞིག་བླ་སེར་མང་པོས་གསུང་ཆོག་གནང་ཡང་དྲུང་དུ་འགྲོ་དཀའ་བར་ལངས་དུ་ཉེ་བ་ན། རྒྱང་རིང་ནས་ཕེབས་ཞོར་ཁེལ་བར་སྐྱབས་འཇུག་ཞུས་པས་དེ་འཕྲལ་རོའི་ཁ་སྣ་ནས་ཁྲག་རྒྱུན་ཐོན་ཏེ་གདོན་རང་ཞིར་སོང༌། དེར་ཡོད་འགའ་ཞིག་གིས་མཁྱེན་བརྩེ་སྤྲུལ་སྐུའི་ཐུགས་རྗེ་ནི་རྒྱ་མདའ་འདྲ་འདུག་ཅེས་ཁ་མཚར་ལབ་སྐད། བྲག་ཡབ་འདྲེ་ངན་གྱི་བློན་པོ་སྔགས་པ་ཞྭ་ནག་ཕོད་ཁ་གྱོན་པ་ཞིག་གིས་མདོ་སྨད་ཀྱི་ཆེ་རྒུ་མང་པོའི་སྲོག་དབུགས་སྡུད་ཚུལ་ཀུན་གྱིས་ཟེར་བ་གཡོན་རུ་བླ་མ་ལ་ཉང་གི་རྟ་ནག་གི་དབང་མཛད་སྐབས་སྒྲོལ་དབང་དུས་སྔགས་པ་དེ་བསྒྲལ་བའི་གཟིགས་སྣང་བྱུང་བས་མཚོན་གཤིན་པོ་ཟ་འདྲེ་སྟོབས་ཅན་གྱིས་བཟུང་བ་དང༌། ནད་པ་གདོན་དྲག་པོས་བརླམས་པ་སོགས་ཐུགས་རྗེས་བསྐྱབས་པའི་ཚུལ་མང་ཞིང༌། དངོས་སུ་མི་མ་ཡིན་གྱིས་ཁྲིད་ནས་ཞག་ཁ་ཡར་སོང་བ་འགའ་ལ་སྐྱབས་འཇུག་གནང་བས་སླར་འཁོར་ནས་དེའི་སྐོར་ལོ་རྒྱུས་ཡིད་ཆེས་སྐྱེ་བ་མང་པོ་བཤད་དུ་ཡོད་པ་དང༌། རྟག་པར་ལོ་ཏོག་ལ་སྲོག་ཆགས་དང་སེར་བ་སོགས་ཀྱིས་འཚེ་བར་སྐྱབས་འཇུག་གནང་བས་རྒྱུན་ཆད་པ་ཤིན་ཏུ་མང་ཡང་ཡིག་ཚོགས་ལ་འཛེམས་ནས་མ་སྤྲོས་སོ། །སྡེ་དགེའི་སྲས་མོ་གཡུ་སྒྲོན་གྱིས་ནང་ཆེན་རྒྱལ་ཁབ་ཏུ་ཚེ་ལྷ་རྣམ་གསུམ་གཙོ་བོར་བྱས་སྒྲོལ་མ་ཉེར་གཅིག་གི་ལྷ་ཁང་གསར་བཞེངས་ལ་རྟེན་གྱི་ནང་གཞུག་རབ་གནས་དགོངས་གཏད་སོགས་ཡང་ཡང་གསོལ་བ་བཏབ་པ་བཞིན་ཞལ་བཞེས་གནང་བས་སྒྲོལ་མ་ཉེར་གཅིག་ནང་ནས་སྐུ་གཅིག་གི་སྤྱན་གཉིས་ཀར་རང་བྱུང་གསལ་བར་བྱོན་པ་དང༌། ཁམས་སྡེ་དགེ་རྨུགས་སངས་སྤྲུལ་སྐུ་ཀུན་བཟང་བོད་ཏུ་ཕེབས་ཏེ་ཟླ་བ་གསུམ་པའི་ཚེས་བཅུའི་ཉིན་གངས་རི་ཐོད་དཀར་དུ་བདུད་རྩི་སྨན་སྒྲུབ་གཟུག་པར་དགོངས་གཏད་ཞུས་པ་ལྟར་ཐུགས་སྨོན་གནང་ཆོག་པའི་ཕྱག་བྲིས་འབྱོར་བ། ཟླ་བ་དེར་སྨན་སྒྲུབ་གཟུག་རྒྱུ་མ་བྱུང་ཡང་ཚེས་བཅུའི་ཉིན་ཀུན་མཁྱེན་གཟིམ་ཕུག་ནས་ཤུག་གསེབ་བླ་བྲང་བར་སྨན་དྲིས་ཁྱབ་སྟེ་ངོ་མཚར་གྱི་གནས་ལ་བཀོད་པ་དང༌། དགུང་གྲངས་རེ་གསུམ་པ་ཆུ་ལུག་ལོར་དབུས་ཕེབས་སྐབས་ཟླ་༧ཚེས་༣ཉིན་རི་མདའ་སྟོད་དུ་ཕེབས་པ་ན། དུང་མདོ་དགོན་པའི་གཙུག་ལག་ཁང་རྟེན་དང་བརྟེན་པར་བཅས་པ་བཞེངས་གྲུབ་པ་ལ་རབ་གནས་ཞུས་པར་ཟླ་བ་དེའི་ཚེས་བཅོ་ལྔའི་ཉིན་རབ་གནས་དགོངས་གཏད་མཛད་རྒྱུར་ཞལ་བཞེས་གནང་བ་བཞིན་གོང་ཚེས་ཉིན་དགེ་འདུན་འདུས་ཏེ་བསྟན་པ་རྒྱས་ཆོག་དང་འབྲེལ་མཆོད་པ་རྒྱས་སྤྲོས་བཅས་ཉི་དྲོས་ལ་ལྷ་ཁང་གི་སྟེང་ནས་ཡོ་བྱད་དང་རོལ་མོ་སོགས་ཀྱི་མཆོད་སྤྲིན་འབུལ་སྐབས་སྟེང་གི་ནམ་མཁར་འཇའ་འོད་ཤར་བ་བཅས་དངོས་སུ་རབ་གནས་ཀྱི་མེ་ཏོག་སྔོན་པོ་ཤས་ཆེ་བའི་འབྲས་ཁ་དོག་སྣ་ཚོགས་པ་ཆར་བཞིན་དུ་བབས་པས་གཙུག་ལག་ཁང་གི་ཕྱི་ནང་ཀུན་ཏུ་ཁྱབ་པའི་ངོ་མཚར་བྱུང་བ་དེར་ཡོད་ཀུན་གྱིས་མངོན་སུམ་དུ་མཐོང་ཞིང་རབ་གནས་མེ་ཏོག་དད་རྟེན་དུའང་མང་དུ་ཐོབ་ཚུལ་གོ་ཐོས་བྱུང་བ་འདིའི་ཕྱོགས་ནས་ཡོང་བའི་རིགས་ལ་དངོས་བརྒྱུད་རྩད་གཅོད་ཡང་ཡང་བྱས་པས་ཐམས་ཅད་ངག་མཐུན་པར་འདུག་པས་ངོ་མཚར་ཤིན་ཏུ་ཆེ་བར་སོམ་ཉི་དང་བྲལ་བར་བཀོད་པ་དང༌། སྔོན་ཆད་གདན་སར་བཞུགས་བཞིན་ཉིན་ལམ་མང་པོས་ཆོད་པར་རབ་གནས་མེ་ཏོག་ཟང་ཐལ་དུ་གནང་བའི་ལོ་རྒྱུས་མང་དུ་མངའ་བའོ། །སྔར་གུས་ནས་རྗེ་ཉིད་ཀྱི་རྣམ་ཐར་ཞིག་མཛད་ཐུབ་གསོལ་བ་ཡང་ཡང་བཏབ་པས། ངོས་ལ་རྣམ་ཐར་ཞེས་དོན་ལོ་ལ་བྲི་རྒྱུ་མི་འདུག་ཀྱང་ཁྱོད་ནས་ནན་ཏན་ཆེན་པོས་བརྗོད་པ་ལ་ད་ལྟ་བསྡུས་ཙམ་ཞིག་རང་ནས་བྲི་ཆོག །ལར་ངེས་ཏིག་ཅན་ཟེར་ཅི་ཤེས་མ་གཏོགས་ལོ་ཆེ་ཆུང་ལ་དཔག་ན་ཕྲན་གཉིས་ཁྱོད་རྗེས་མ་འབྱུང་ཚོད་རེད་པས་ང་ཤི་རྗེས་རྒྱས་པར་ཁྱོད་ཀྱིས་བྲིས་ཞེས་ཕེབས། ཕྱིས་དབུས་ཕེབས་ཀྱི་ལོ་དེར་གཟིམ་ཆུང་སྦུག་མར་རྗེ་བླ་མ་ཉིད་ཀྱི་དགོངས་གཏེར་སྐོར་གྱི་དབང་ཞིག་གནང་རྗེས་ཕྲན་ནས་མཐོང་སྣང་རབ་རིབ་བྲིས་པ་འདི་རེད་ཅེས་སྐུ་ཚེའི་སྨད་ཀྱི་གཟིགས་སྣང་སྐོར་ཕྱག་བྲིས་ཤོག་དྲིལ་མང་ཙམ་འདུག་པ་ཕྱག་ཏུ་བསྣམས་ཏེ་ཕྲན་ལ་གཟིགས་བྱུང་བ་དང་སྔར་གྱི་གསུང་དེ་ཡིད་ལ་ལྷང་གིས་དྲན་ནས་ལག་ཏུ་ཞུ་མ་ནུས་པས་ད་ལྟ་ཤིན་ཏུ་ནོངས། འོན་ཀྱང་གསང་བ་ཟབ་མོའི་ཆ་ཤས་ངེས་ཏིག་ཅན་སྒྲོ་སྐུར་བྲལ་བ་རྣམས་ཕལ་ཆེར་ཁྱད་པར་གྱི་རྣམ་ཐར་སྐབས་འབྱུང་ཞིང༌། འདིར་ཡང་ཅུང་ཟད་ཙམ་སྨོས་ན། རྫོང་སར་དུ་ཕེབས་ནས་རིང་པོར་མ་ལོན་པའི་སྐབས་ཤིག་ཏུ་གྲུབ་ཐོབ་ཐུགས་ཐིག་ལ་ཉམས་བཞེས་གནང་པའི་ཚེ། རྗེ་གོང་མའི་གཟིམ་སྦུག་ཏུ་གྲུབ་ཐོབ་ཆེན་པོ་སྐུ་ཆེ་ཆུང་ཁྲུ་གང་གི་ཚད་ཙམ་དངོས་སུ་བཞུགས་པར་གུས་འདུད་མཛད་པས་མདུན་དེར་ཤེལ་རྡོའི་གོང་བུ་ཞིག་བཞག་ནས། གཟུང་བའི་ཡུལ་གྱིས་མ་གོས་ཤིང༌། །འཛིན་པའི་རྟོག་པས་མ་བསླད་པ། །རང་སེམས་རྗེན་པར་བསྐྱངས་པ་འདི། །སངས་རྒྱས་ཀུན་གྱི་དགོངས་པའོ། །ཞེས་རྗེ་མཁྱེན་བརྩེར་གུ་རུ་རིན་པོ་ཆེས་ངོ་སྤྲོད་གནང་བའི་རྡོ་རྗེའི་ཚིག་དེས་ངོ་སྤྲོད་གནང་བའི་གསལ་སྣང་གཟིམ་ལམ་དུ་བྱུང་བས་ཐུགས་དམ་ཉམས་བཞེས་ལ་བོགས་འདོན་བྱུང་ཚུལ་གསུངས་པ་དང་མཐུན་པར་སྨན་སྐུ་ཞིག་ཀྱང་བཞེངས་ནས་གཟིམ་སྦུག་ཏུ་བཞུགས་སུ་གསོལ་བ་དང༌། རྣམ་ཐར་ཞལ་གསུངས་ལས། དྲན་པས་སྲིད་ཞིའི་གདུང་སེལ་མགོན། །སི་ཏུ་ཐམས་ཅད་མཁྱེན་པ་ཆེ། །ཆུ་གླང་ལོ་ལ་སྐུ་གཤེགས་པའི། །གཏམ་ངན་སྐལ་མེད་རྣ་བར་སོན། །དགོངས་རྫོགས་གསོལ་འདེབས་མཆོད་འབུལ་བྱས། །རྗེ་དེ་གཤེགས་ནས་ལོ་མང་པོར། །རྨི་ལམ་གནས་སྐབས་ཕལ་ཆེར་མཇལ། མགོན་ཁྱོད་དབྱིངས་སུ་གཤེགས་ན་ཡང༌། །བདག་ཉིད་ཐུགས་བརྩེས་བཟུང་ངེས་སྙམ། །དགའ་སྐྱོ་འདྲེས་མར་རྒྱུན་དུ་མཆིས། །ཞེས་གསུངས་པ་ལྟར་འཇམ་དབྱངས་མཁྱེན་བརྩེའི་དབང་པོ་དང་སི་ཏུ་རིན་པོ་ཆེ་རྣམ་པ་གཉིས་དབྱེར་མེད་པའི་དགྱེས་ཞལ་རྟག་ཏུ་གཟིགས་ཤིང་ལེགས་ཉེས་ཐམས་ཅད་ལུང་སྟོན་པ་ཞིག་ཡོད་ཅེས་དང༌། སི་ཏུ་རིན་པོ་ཆེའི་མཛད་སྤྱོད། རྗེ་ཉིད་ལ་ཐུགས་བརྩེས་ཐུན་མིན་དུ་བསྐྱངས་ཚུལ་གསུངས་འཕྲོས་སྐབས་དད་གདུང་གིས་ཞལ་རས་གནས་འགྱུར་བ་ལྟར་དུས་རྟག་པར་མཛད། རྗེ་བླ་མ་དབུས་ནས་གདན་སར་ཕེབས་འཕྲལ་སྐྱབས་རྗེ་རྒྱལ་ཚབ་རིན་པོ་ཆེར་མཇལ་དར་ཕུལ་བའི་གསུང་ལན་དུ། ཀཿཐོག་སི་ཏུ་པཎ་ཆེན་གཤེགས། །རྒན་བུ་ཡང་ནི་འཆི་ཉེར་གྱུར། །རྙིང་བསྟན་སྣུམ་ཟད་མར་མེ་ལྟར། །གྱུར་པ་འདི་ལ་ཁྱོད་ཉིད་ཀྱིས། །བློ་སྟོབས་རྒྱ་ཆེར་བསྐྱེད་བྱས་ཏེ། །བསྟན་ལ་བྱ་བ་བྱེད་པར་རིགས། །ཞེས་ཞལ་ཆེམས་སུ་བསྩལ་ནས་རིང་མིན་དགོངས་པ་ནང་དབྱིངས་སུ་བསྡུས་པའི་ཚེ་ཆེད་ཕེབས་གནང་བས་དཔའ་འོག་ནས་སྐུ་གདུང་རིན་པོ་ཆེའི་མདུན་ཕེབས་ཀྱི་བར་ཞག་གསུམ་བཏུད་མར་རྗེ་བླ་མ་ཉིད་གཟིམས་ལམ་དུ་གསལ་བར་མཇལ་ནས་བསྟན་བཅོས་ཆེན་པོ་ཤེས་བྱ་ཀུན་ཁྱབ་འཆད་སྤེལ་དགོས་ཚུལ་གསུང་གླེང་མང་པོ་ཞིག་གནང་བྱུང་དོན་དུ་འཇམ་མགོན་རྣམ་གཉིས་ཀྱི་བསྟན་པ་ལ་བྱ་བ་བྱེད་དགོས་པའི་ཞལ་ཆེམས་བསྩལ་བར་གོ་ཞེས་གསུངས་ལ། ཕྱིས་ཞེ་ཆེན་དུ་བཤད་གྲྭ་གསར་ཚུགས་སྐབས་གཞུང་འདིས་བཤད་པ་ཚུགས་དགོས་ཞེས་བླ་སྤྲུལ་རྣམས་ལ་ཆེད་དུ་བཀའ་གནང་བའི་དགོས་པ་འདི་ཡིན་པར་འདུག །ཤིང་བྱ་ལོར་རིན་གཏེར་དབང་ལུང་གྲུབ་ནས་བླ་མ་དགོངས་འདུས་ཀྱི་པུསྟི་ལུང་དབང་གི་དབང་སྒྲུབ་སྐབས་འཇམ་མགོན་བླ་མ་སྐུ་གོང་འོག་བཀའ་གཏེར་གྱི་གདམས་པ་རྒྱ་མཚོའི་མངའ་བདག་ཏུ་བཞུགས་པ་ཐམས་ཅད་ཀྱི་གཏད་རྒྱ་རྫོགས་པའི་དགོངས་གཏད་བྱིན་རླབས་གསོལ་བ་བཏབ་པས་དགྱེས་ཚུལ་གྱིས་མདངས་རྨི་ལམ་དུ་ཛཾ་ནང་པདྨ་ཤེལ་ཕུག་གི་གཡས་ཀྱི་རི་གདོང་བྲག་དཀར་དཔལ་ཆེན་པོའི་སྐུའི་དབྱིབས་ཅན་དེར་སྤྲུལ་སྐུ་རིན་པོ་ཆེ་རྒྱལ་ཚབ་བཞུགས་ནས་གཏེར་མཛོད་ཀྱི་དབང་ལུང་ཡོངས་རྫོགས་མཛད་སོང་བ། མཁྱེན་བརྩེ་རིན་པོ་ཆེའི་སྙན་བརྒྱུད་ཡང་ཕུར་སྦྲགས་མའི་དབང་གིས་མཐའི་ཆོས་མཚམས་བཞག་པ་ཞིག་བྱུང་ཞེས་གུས་རྨོངས་ལ་སྤྲོ་བ་བསྐྱེད་པའི་གསུང་དུ་བཀའ་བསྩལ། དགུང་གྲངས་བཅོ་ལྔའི་སྟེང་རྫོང་སར་བླ་བྲང་དུ་ཐོག་མར་ཁྱུག་ཙམ་ཕེབས་ནས་སླར་ཀཿཐོག་ཏུ་ཕྱིར་ཕེབས་པ་ན། མཁན་བླ་མ་ཀུན་དཔལ་གྱིས། མཁྱེན་བརྩེ་རིན་པོ་ཆེའི་གཟིམ་ཆུང་ག་འདྲ་འདུག་གསུངས་པར། མཁྱེན་བརྩེ་སྤྲུལ་པ་བསྡུས་པའི་གཟིམ་མལ་དུ་ཀུན་མཁྱེན་ཀློང་ཆེན་པའི་སྐུ་ཞིག་འདུག་ཞུས་པ་དེ་རྗེས་དེ་འདྲ་འདིར་གཏན་ནས་མི་འདུག་པས་ཁོ་བོས་བརྫུན་ཞུས་ཆེན་པོ་ཞིག་བྱས་འདུག་གསུངས་ཀྱང་དེ་འདྲའི་གཟིགས་སྣང་བྱུང་བར་ངེས། ཐོག་མར་ཀཿཐོག་ཏུ་ཕེབས་ནས་རིང་པོར་མ་ལོན་པར་དཔལ་ཡེ་ཤེས་ཀྱི་མ་མོ་སྔགས་སྲུང་མས་ཡང་ཡང་བསྐྱངས་བའི་གཟིམས་ལམ་བྱུང་ཚུལ་སི་ཏུ་རིན་པོ་ཆེར་ཞུས་པས་ཀློང་གསལ་སྔགས་སྲུང་གསོལ་ཁ་ཞལ་འདོན་དགོས་པར་བཀའ་གནང་ཞིང༌། སྐབས་ཤིག་གུས་ལ་ཁྱོད་ཀྱི་ལག་ཏུ་གཏེར་སྒྲོམ་དང་ཤོག་སེར་འདྲ་ཅི་ཨི་བྱུང༌། ད་ནངས་ཐོ་རངས་རྫོང་སར་བཀྲ་ཤིས་འཆི་མེད་གྲུབ་པའི་དགའ་ཚལ་གྱི་དབང་ཁང་གི་མཁྱེན་བརྩེ་རྡོ་རྗེ་འཆང་གི་འདྲ་སྐུ་གསུང་བྱོན་མའི་མདུན་དེར་སྔགས་སྲུང་མ་ཡིན་སྙམ་འཇའ་སྤྲིན་གྱི་གོས་གྱོན་པ་ཞིག་གིས་གཏེར་སྒྲོམ་འདྲ་ཞིག་བཞག་སོང་བའི་མཐོང་སྣང་བྱུང་གསུངས། མེ་བྱི་ལོར་ཁམས་སུ་མཐའ་དམག་གིས་ཉེན་ཆེའི་སྐབས་ད་ནངས་ཐོ་རངས་སྤྲིན་ལྟར་ཤིག་ཤིག་གཡོ་བའི་སྐུ་ཅན་གྱི་ཚེ་རིང་མ་སེང་གེ་ལ་ཞོན་པ་ཞིག་མདུན་དུ་བྱུང་བས་དེ་རིང་ཉང་གཏེར་བརྟན་མའི་མདོས་བཏང་བ་ཡིན་ཞེས་ཕེབས། དགྱེས་རྡོར་ལྗགས་བསྙེན་གནང་སྐབས་ཡིན་འདྲ་དཔལ་ཀཿཐོག་ཏུ་བཞུགས་སྐབས་མནལ་ལམ་གྱི་སྣང་ཆར་ལྷ་མོ་རེ་མ་ཏི་དང་པོ་བུད་མེད་གཞོན་པ་ཞབས་ལ་ལྕགས་སྒྲོག་གསོལ་བས་ཕེབས་མི་ཐུབ་པ་འདྲ་བ་དང༌། མཐར་རྗེའི་ཞལ་དུ་མཁའ་གསང་སྦྱོར་བས་སྐྱུག་བྲོ་བའི་ཐུགས་སྣང་བྱུང་བ་དང་མཁའ་ལས་དྲི་ཆུ་བཏང་བས་ཞལ་ནས་བརྩམས་སྐུའི་གནས་ཐམས་ཅད་ཁྱབ་པར་བཀྲམ་མཐར་ནམ་མཁའ་ལ་རྫུ་འཕྲུལ་གྱིས་ཕེབས་པའི་མནལ་ལྟས་ཞག་ལྔ་བར་བཏུད་མར་བྱུང་ཚུལ་དང༌། དེ་སྐབས་ལྷ་མོའི་གསོལ་ཀ་ཞིག་ཀྱང་མཛད། ཛཾ་ནང་པདྨ་ཤེལ་ཕུག་གི་གནས་འདུས་ལོར་གནས་འདབས་བཻ་རོའི་སྒྲུབ་ཕུག་ཏུ་ཚོགས་འབུམ་གསུངས་སྐབས་འཕྲོས་ཟུར་ཕེབས་པ་བཞིན། ལྷ་མོ་དུད་སོལ་མ་རྟག་པར་འགོ་ཞིང་ཕྲིན་ལས་སྒྲུབ་ཚུལ་དུ་མ་ཞིག་ཀྱང་ཡོད་འདུག་ཀཿཐོག་སི་ཏུ་རིན་པོ་ཆེའི་མཆོག་སྤྲུལ་དང༌། གུས་བཅས་ལ་སྔ་འགྱུར་བཀའ་མའི་སྨིན་གྲོལ་བསྩལ་སྐབས་རྒྱུད་མགོན་ལེགས་ལྡན་གྱི་དབང་གི་རྗེས་གནང་གཙང་ཤོད་པའི་ཡིག་ཆའི་སྟེང་མདོ་མགོན་ལེགས་ལྡན་ལྗང་སྔོན་དྲག་པོའི་དབང་རྒྱུན་ཡོད་ཚུལ་བཀའ་གནང་བར་དེ་ཉིད་བསྩལ་ཐུབ་པར་གསོལ་བ་བཏབ་པས་རྗེས་འབྲེལ་དུ་གནང་བ་གཏོར་མའི་བཀའ་བསྒོ་སྐབས་དཔལ་ཡེ་ཤེས་མགོན་པོ་རྒྱུད་མགོན་ལེགས་ལྡན་དང་མཐུན་པ། མདུན་གྱི་གོ་སར་བཞུགས་པའི་གསལ་སྣང་བྱུང་བ་ཕྱག་ཐོར་བསྩལ་བའང་གུས་ནས་མཇལ། དེའི་ཉིན་བཀའ་ལས། མཁྱེན་བརྩེ་གོང་མའི་བཀས་བསྐུལ་ཏེ་དཔལ་ཡུལ་རྒྱ་སྤྲུལ་རིན་པོ་ཆེས་དཔལ་ཡུལ་དགོན་དུ་སྔ་འགྱུར་བཀའ་མའི་གཞུང་རྣམས་ཀྱི་སྒྲུབ་མཆོད་གསར་དུ་བཙུགས་ཤིང་དབང་ལུང་གི་རྒྱུན་ཕྱོགས་ཀུན་ཏུ་འཕེལ་བ་དང༌། རིམ་གྱིས་བཀའ་མའི་གཞུང་རྙིང་སྐོར་བཅས་ཆོས་སྐོར་ཚང་མ་སྤར་དུ་འཁོད་པ་སོགས་བསྟན་པ་ལ་བྱ་བ་ཆེར་མཛད་པའི་རྟེན་འབྲེལ་ཡིན་ཞེས་བཀའ་བསྩལ་པ་དང༌། ཤིང་སྤྲེལ་ནག་ཟླའི་ཡར་ཚེས་ལ་རྫོང་སར་གཙུག་ལག་ཁང་གི་རྩེར་ཐུགས་སྒྲུབ་བར་ཆད་ཀུན་སེལ་གྱི་སྒོ་ནས་ལྷ་སྲིན་དམ་བསྒྲགས་གནང་སྐབས་ཐོག་མར་རླུང་འཚུབས་ཤིན་ཏུ་ཆེ་བར་བྱུང་ཞིང་སླར་ནམ་མཁའ་དྭངས་པར་གྱུར་པ་དེའི་ཚེ་ནག་ཕྱོགས་ཀྱི་འབྱུང་པོ་ཞིག་དམ་ལ་བཏགས་ཏེ་སྲོག་སྙིང་འབུལ་དུ་བྱུང་བའི་གཟིགས་སྣང་བྱུང་བ་དང༌། གཞན་ཡང་དགུང་གྲངས་ཞེ་གཉིས་བཞེས་པ་ཤིང་ཁྱི་ལོར་གཟིམས་ལམ་སོགས་ཀྱི་ཕྱག་ཐོ་འགའ་ཞིག་རྙེད་པ། གནས་བརྟན་དགོན་གྱི་ཉེ་སྐོར་སྔར་ཆོས་རྒྱལ་སྲོང་བཙན་དུས་ཀྱི་ལྷ་ཁང་ཤུལ་ཁ་བ་སྟེང་དུ་དམ་བསྒྲགས་དང་བྱིན་འབེབས་སྐབས་རྩ་གསུམ་རབ་འབྱམས་དང་ཡུལ་ལྷ་གཞི་བདག་མང་པོ་ཡོད་པའི་ཉམས་དང༌། རྟ་བྲོ་ལ་སྦ་དོང་དུ་དམིགས་པ་བྱས་པས། རྒྱ་འདྲེ་གཟུགས་ཤིན་ཏུ་ཆེ་བ་སྤྱིའུ་ཚུགས་བྱས་ནས་དོང་ནང་དུ་སོང་བའི་ཉམས་བྱུང༌། དེའི་ཕྱིར་ནངས་ལྷ་ཁང་ས་འདུལ་སྐབས་སུ་དབྱིངས་མཁར་རིག་འཛིན་བླ་མ་མང་པོ་དང༌། གུ་རུ་རིན་པོ་ཆེས་མཁའ་ལ་གར་མཛད་པ་ན་རང་ཡང་ཉམས་འབར་ནས་གར་བྱེད་དགོས་པ་བྱུང་ཡང་ཤེས་ཉམས་བན་བུན་ལ་ཡིད་རྟོན་ཅི་ཡོད། ཚེས་༦ལ་ཡི་གེར་བྲིས། དགུང་གྲངས་ཞེ་གཉིས་བཞེས་པ་ཤིང་ཁྱི་ལོར་བྲོ་ནད་འཚལ་བ་ཅུང་དྭངས་པའི་ཚེས་དགུའི་ཐོ་རངས་སྟོད་ཀྱི་ཆར་གསར་ཕྱོགས་ནས་བླ་མེད་ཀྱི་ཡི་དམ་འབྲེལ་གང་ཆེ་བརྟགས་དགོས་སྙམ་པའི་མོད་ལས་གཉིད་སྲབ་མོས་ནོན་པའི་གསལ་སྣང་ལ། གཉན་ལོ་ཙཱ་ཡིན་རྒྱུ་སྐུ་བོང་ཐུང་བ་གཟན་རིང་ཅན་ཞལ་རས་ཅུང་སྨུག་པ་དབུ་སྐྲ་ཅུང་ཟད་རིང་པོར་ཡོད་པ་ཕོ་ཁྲེབ་ཅན་བོད་ཆས་རིང་འགག་མནབ་པ་ཞིག་གི་མདུན་གསང་བ་འདུས་པ་འཇམ་པའི་རྡོ་རྗེའི་དཀྱིལ་འཁོར་དང་པོ་རྡུལ་ཚོན་ཡིན་པ་འདྲ་བ་སྐད་ཅིག་གིས་གཞལ་ཡས་ཁང་དངོས་སུ་གྱུར་པའི་ནང་འཇམ་པའི་རྡོ་རྗེ་གུར་གུམ་གྱི་མདོག་ཅན་འོད་འབར་བ་མཐོ་གང་ཙམ་པ་བཞུགས་པའི་ལྷོ་ངོས་དེར་ངེད་རང་འདུག་པ་དབང་ཞུ་བའི་འདུན་པ་བྱས་པས། བླ་མ་འཇམ་པའི་རྡོ་རྗེས། གཟུང་འཛིན་གཉིས་མེད་རྟོག་མེད་པ། །རྡུལ་བྲལ་ཤིན་ཏུ་འདུས་མ་བྱས། །རང་རིག་རྣམ་དག་རབ་དགྱེས་ཆེ། །སངས་རྒྱས་ཀུན་གྱི་བདེ་ཆེན་ཉིད། །གསུངས་པའི་མཐར་ཡུམ་སྔོན་མོ་ཞིག་སྤྲོས་ཏེ་རང་ལུས་དྭངས་པའི་རྣམ་པ་ཅན་ལ་འཁྱུད་པས་ལྷན་སྐྱེས་ཡེ་ཤེས་ཀྱི་བདེ་བ་མྱོང་བའི་མཐར། འཇམ་པའི་རྡོ་རྗེའི་ཐུགས་ཀ་ནས་དྷཱིཿཡིག་ཁ་དོག་སྣ་ཚོགས་པ་ཅན་གྱི་མཐར་ཐིག་ལེའི་རྣམ་པ་མང་པོས་བསྐོར་བ་རང་ལ་ཐིམ། མཐར་འཇམ་པའི་རྡོ་རྗེ་ཡང་རང་ལ་ཐིམ་པའི་ངང་རྟོག་བྲལ་ནམ་མཁའ་ལྟར་གནས་པའི་ངང་ནས་སད། ཡང་མནལ་བ་ན། རྗེ་མཉྫུ་གྷོཥ་རབ་བྱུང་སྔོ་སངས་བཞེངས་སྟབས་ཀྱིས་བྱོན་ནས་ཕྱག་བདག་གི་སྤྱི་བོར་བཞག་སྟེ། ཁྱེད་ཀྱི་ཚེ་རབས་ནས་འབྲེལ་བའི་ཡི་དམ་གསང་འདུས་འཇམ་པའི་རྡོ་རྗེ་དང་བཛྲ་བྷཻ་ར་ཝ་གཉིས་ཡིན་པས་དེ་གཉིས་སྒྲུབ་ན་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་འགྱུར་རོ་གསུངས་པའི་མཐར་སད་པར་གྱུར་ཏོ། །ཁྲི་སྨོན་གཟིམ་ཤག་ཏུ་ཁྱུང་སྤྲུལ་དང་ལྷན་དུ་དཀོན་སྤྱིའི་ཚོགས་བཏང༌། བཀའ་མོལ་ཞིབ་ཆ་བྱུང༌། ཆོས་གླིང་གཏེར་ཕུར་ལག་ཏུ་སོན། དེ་དགོང་ཐོ་རངས་ལ་ཁྱུང་སྤྲུལ་ནས་གླིང་གེ་སར་དུས་ཀྱི་དཔའ་ཐུལ་ཕོ་རྣམས་གཡས་གྲལ་བོད་ཀྱི་གདུང་རིགས་ལས་འཁྲུངས་པའི་མི་འདི་ཡིན་ཅེས་དེ་རྣམས་དངོས་སུ་ཡོད་པར་ངོ་སྤྲད་པ་དང༌། གཡོན་ཕྱོགས་ནས་ཆོས་རྒྱལ་ལྷ་རིགས་ཀྱི་གདུང་ལས་འཁྲུངས་པའི་བུད་མེད་རིགས་ཤིན་ཏུ་མཐོ་བ་མིང་འདི་ཡིན་ཅེས་ངོ་སྤྲད་པ་དང་བུད་མེད་འགའ་ཞིག་གིས་ཕྱག་གསུམ་རེ་བཙལ་བ་སོགས་ཀྱང་རྨིས་མཐར། བཀའ་སྲུང་མཐར་ཐུག་རྡོ་རྗེ་གུར་གྱི་མགོན། །ཅེས་དང༌། སྤྱན་རས་གཟིགས་མི་ཏྲ་ལུགས་འགྲོ་དོན་མཁའ་ཁྱབ་ཅེས་ཟེར་བ་དང་གཉིད་སད་ནམ་ལངས་སོ། །བསམ་ཡས་སུ་ཐོག་མར་ཕེབས་སྐབས་འཇའ་ཚོན་ཤིན་ཏུ་བཀྲག་མདངས་ཅན་དབུ་རྩེའི་སྟེང་ནས་འཁོར་བའི་ཚུལ་ལྟ་བུར་ཤར་ཞིང༌། ཆར་ཟིམ་བུར་འབེབས་པ་སོགས་བྱུང༌། བར་ཁང་དུ་ཐུགས་སྒྲུབ་བར་ཆད་ཀུན་སེལ་གྱི་ཚོགས་འབུམ་ཐེར་ལྷག་དང་མཆོད་འབུལ་ཞིབ་རྒྱས། གཞུང་གི་བཀའ་འབྲེལ་རབ་གནས་སོགས་གནང་སྐབས་མཆོད་རྟེན་ཞིག་ལས་མཚན་མོ་ཆུ་ཚོད་གཅིག་གི་ཡུན་ཙམ་དུ་མེ་འབར་བ་ཀུན་གྱིས་མཐོང༌། ཁྱད་པར་དུ་ཟླ་༣ཚེས་༡༥ཉིན་ཧས་པོ་རིར་ལྷ་བསང་དང༌། རི་ཁྲུས། རབ་གནས། ལྷ་སྲིན་དམ་བསྒྲགས་སྐབས་བསྐུལ་དབུ་ཚུགས་པ་དང་མོས་གུས་ཀྱི་རྐྱེན་ལས་གུ་རུ་རིན་པོ་ཆེ་གྲོ་ལོད་སོགས་ནམ་མཁའ་གང་བས་རྡོ་རྗེའི་གར་བསྒྱུར་བ་དང་རང་ཡང་སྣང་བ་གཏད་མེད་ཀྱིས་འཆམ་སྟབས་བྱས། དམ་བསྒྲགས་དངོས་གཞི་ལ་ལྷ་སྲིན་སྡེ་བརྒྱད་ཀླུ་དང་གཞི་བདག་གྲངས་མེད་ཡོད་སྙམ་གྱིས་འདུད་ཅིང་སྲོག་སྙིང་བླངས་ཏེ་རང་དྲག་པོར་གསལ་བའི་གདན་དང་ཐུགས་ཀར་བསྟིམས་ནས་སྲོག་དང་དབྱེར་མེད་བྱས། ཟོར་སྐབས་ཀླ་ཀློ་དམ་སྲིའི་གྲོང་ཁྱེར་བརླགས་པའི་གསལ་སྣང་དང༌། བྱིན་འབེབས་སོགས་རྒྱས་པར་བྱས། མདོར་ན་འདིའི་ཉིན་ཁམས་དྭངས། འདོན་སྤྲོ། རིག་ངར་ཐོན་པ་སོགས་ཅུང་ཞིག་བསྟན་འགྲོར་ཕན་སྙམ་པ་བྱུང་ངོ༌། །རྒྱ་གར་ལྷ་བབས་གནས་ཀྱི་འདབས་ཉེར་མེ་སྤྲེལ་ཟླ་ཚེས་ལ་སྡོད་ནུབ་རྨི་ལམ་དུ། རྒས་པོ་རལ་པ་སེ་ཆོབ་བེ་བ་ཞིག་གིས་རས་ནག་སྒྲིལ་ཁུད་དུ་སྦྲུལ་ནག་པོ་ཆེ་ཆུང་མང་པོ་དང༌། ལྕོང་མོ། མཚོ་པདྨའི་གཟེ་མ་འདྲ་བའི་སེམས་ཅན་ནག་པོ། སྦྲུལ་ཁ་དོག་སྣ་ལྔ་ཆུན་གཅིག་ཁྱེར་ནས་ཁ་འབྱེད་པ་དེ་རྫོང་སར་གཟིམ་ཆུང་དུ་ཡོད་སྙམ་པ་སྦྲུལ་རྣམས་རིང་ཐུང་སྣ་ཚོགས་སུ་འཐོར་ནས་རྒྱུག་བྱུང་བར། རྣམ་རྒྱལ་དྲག་མོ་ལ་བརྟེན་པའི་མནན་པ་དགོས་རྒྱུར་འདུག་པ་དེ་སྟབས་འགྲིགས་མིན་ལྟ་བུ་དེ་རྣམས་དམར་གོང་ཕྱོགས་ཀྱི་ཡིན་རྒྱུ་འདུག་པ་དང༌། རྣམ་རྒྱལ་དྲག་མོ་མཁྱེན་བརྩེའི་འབེབས་འཕྲོ་འདུག་པ་བཀའ་གཏེར་ན་མེད་སྙམ་པ་སོགས། དེ་ལ་མདོས་བཟློག་སོགས་ཡོད་པ་ཅན་རྨིས། ཚེས་༦ལ་རྟེན་འབྲེལ་རང་འགྲིགས་སུ་འཁྲུལ་རྨིས་དང་མཐུན་པའི་ལིངྒ་བྲང་ཆིས་སྐབས་ཨ་ཙ་ར་རལ་པ་སེ་ཆོབ་བེ་བ་མདོག་ནག་པོ་སྣོད་ཞིག་གི་རྒྱབ་ལ་སེམས་ཅན་འདྲ་མིན་གྱི་རི་མོ་བྲིས་པ་ཐོགས་པ་གཟིག་གདན་ཁྱེར་བ་ཞིག་འཛུམ་པས་སྐད་ཁ་ཤས་ཟེར་བ་མ་གོ་ཡང་ལྟས་ལེགས། ལྷ་བབ་ཏུ་ཕུར་པའི་མནན་པ་ཡང་བསྟན་འགྲོར་བསམ་པ་བཟང་པོས་བྱེད་ཁུལ་བགྱིས་སྐབས་མནན་པ་བྱེད་རན་ཁར་འབྲུག་སྒྲ་བསྒྲགས། ཆར་ཆེན་པོ་བབས། དེའི་ནུབ་མོ་ཆར་རླུང་ཤིན་ཏུ་དྲག་པོ་བྱུང་བ་འཚུབས་བསྟན་པ་རེད་སྙམ་ལ་རྡོ་རྗེ་གཞོན་ནུའི་ང་རྒྱལ་ཤིན་ཏུ་བརྗིད་པའི་གཙོ་འཁོར་བསྒོམ་པའི་གསལ་སྣང་བྱུང་བས་འཇམ་སོང་གསུངས། ས་ཁྱི་ཟླ་༧ཚེས་༤ལ་རྡོ་རྗེ་གླིང་དུ་གཞུང་གི་ཞབས་བརྟན་གཙོར་གྱུར་གཡག་ཕྱར་སྒྲོལ་མདོས་དཔོན་གཡོག་བཅུ་གསུམ་སྐོར་དཔེ་ཆ་འབྱོར་རིམ་དང་བསྟུན་བཏོན་པས། ཚེས་༩ཡས་ལམ་བྱང་ཤར་སྟེང་ཕྱི་དྲོའི་ཆུ་ཚོད་བཞི་པ་སྐོར་མདོས་བཏང་བ་ན། ཆར་ཟིམ་བུ་བབས། ཡང་ཅུང་དྭངས་པའི་ཉི་མ་འགྲོ་སའི་སྨུག་པ་དཀར་པོའི་སྟེང་ཐད་འཇའ་འོད་ཟླུམ་པོ་ཕྱི་ནང་ཅན་དང༌། འཇའ་ཚོན་གྱི་གོང་བུ་མང་པོ་ཐམས་ཅད་ནས་མཐོང་བས་ངོ་མཚར་བྱེད། གང་ལྟར་ལམ་འགྲོ་བྱུང༌། ཚེས་༡༠སྔ་ཆར་རིག་ཁམས་དྭངས་པར། ཤར་གླང་ཆེན་འགྱིང་འདྲའི་གངས་ཀྱི་རྩེར། །རྗེ་དུས་གསུམ་སངས་རྒྱས་བཞུགས་པའི་གནས། །གཙུག་ལག་ཁང་མི་ཆུང་ཙམ་བཞེངས་ན། །སྤྱིར་སངས་རྒྱས་བསྟན་ལ་ཕན་པ་དང༌། །སྒོས་སྤུར་རྒྱལ་བོད་ཀྱི་རྒྱལ་ཁམས་བདེ། །ཞེས་པའང་ཤར། གཞན་ཡང་རྣམ་ཀུན་ལྐོག་གྱུར་རིགས་མི་མཁྱེན་པའི་ཚུལ་ཁོ་ན་གསུངས་མོད། བསྟན་དོན་དོ་གལ་ཆེ་དུས་ནམ་རྒྱུན་གསུང་འཕྲོས་ཕེབས་ཁར་ཤུགས་འབྱུང་དུ་ཐར་ཐོར་རེ་གསུངས་པ་རྣམས་ཐོག་ཏུ་ཁེལ་བ་དང༌། ལྷག་པར་སྤྲུལ་སྐུ་ངོས་འཛིན་སྐབས་སོགས་སུ་འཁྲུངས་ཡུལ་ཐག་རིང་ཐུང༌། ཕ་མའི་མིང་བཀྲ་དང་ཁྱིམ་ཕྱུག་དབུལ། ཡུལ་གྱི་ཆགས་ཚུལ། ཁང་པའི་ཉེ་སྐོར་ས་རྡོ་ཆུ་ཤིང་སོགས་མཚན་མ་གང་ཡོད་མངོན་སུམ་དུ་གཟིགས་ཏེ། དཔེར་ན་སྐྱབས་རྗེ་རྒྱལ་ཚབ་དམ་པའི་སྐྱེ་སྲིད་སྔ་མ་མདོ་ཝཾ་ཅོ་ལེའི་མཆོད་རྟེན་དཀར་ཆུང་ཉེ་སྐོར་དུ་འཁྲུངས་སོ་ཞེས་བཀའ་བསྩལ་པ་དང༌། ཡང་དུ་ས་སྦྲུལ་ཟླ་༡༡ཚེས་༡༨ནུབ་མོ་དེ་དང་ཆ་མཚུངས་མདོ་ཝཾ་མཆོད་རྟེན་དང་ཀརྨ་དགོན་གཉིས་པར། ཕ་པདྨའམ་རྡོ་རྗེ། མ་ཚེ་དགའ་འམ་ལྷ་མོའི་མིང༌། བུ་རྟ་ལུག་གང་རུང་ཐོབ་པ། དུད་པ་དང་རྡ་ཡི་མིང་ཐོབ། སྒོ་ཁྱི་དཀར། ཁང་ལྟག་དར་ཅོག །ཆུ་ཉིན་ལ་ཡོད་པ། འབྲོག་པ་ཡིན་པ་ཤས་ཆེ་ཞེས་ཕེབས་པར་ཡང་སྲིད་རྩད་གཅོད་སྐབས་མདོ་ཝཾ་མཆོད་རྟེན་དཀར་ཆུང་ཀྱི་ཉེ་ཕྱོགས། ཀུ་རྒྱལ་བཙན་རྒོད་ཆེན་པོའི་མདུན། བསམ་འགྲུབ་གླིང་གི་ས་ཕྱོགས། གླིང་གདོང་ཆོས་ལུ་དར་འཕན་གྱི་བརྒྱུད་པ། ཡབ་རྡོ་རྗེ་རབ་བརྟན། ཡུམ་མེ་ཏོག་ལྷ་མཛེས་ཀྱི་བུར་ཟླ་ཚེས་ལ་འཁྲུངས་པ་ཀརྨ་དགོན་དུ་བརྒྱད་སྟོང་པ་རྡོ་ལ་གསར་བརྐོས་ཁྲི་བཀོད་དང༌། འཚོགས་ཟངས་གསར་པ་གཟུག་པའི་གཟའ་སྐར་དུས་ཚེས་ཤིན་ཏུ་བཟང་བ་མ་བསྒྲིགས་ལྷུན་སྒྲུབ་བྱུང་ཞིང་གོང་དུ་ཇི་ལྟར་ཕེབས་པ་འཁྲུལ་བྲལ་ངེས་རྙེད་བྱུང་བ་དང༌། རྨེ་ཤོད་ཧག་མདའ་གྲོང་པར་གུར་མགོན་སྐུ་དངོས་གནམ་ས་གང་བ་ཞིག་བཞུགས་པར་རྨིས་པས་གླེ་མདའ་སྤྲུལ་སྐུ་དེར་འཁྲུངས་པའི་རྟགས་སུ་ངེས་ཞེས་ཞལ་ལས་ཐོས་པ་དང༌། གྲུབ་དབང་རིན་པོ་ཆེ་ཤཱཀྱ་ཤྲཱིའི་མཆོག་སྤྲུལ་ངོས་འཛིན་གནང་བའི་ཕྱག་བྲིས་སུ་ཡབ་ཡུམ་སོགས་ཀྱི་མཚན་གསལ་པོ་དང༌། ཁྱིམ་དེའི་མཆོད་ཁང་དུ་སྐུ་གསུང་ཐུགས་རྟེན་ཞལ་ཐང་དུ་ཡོད་ཀ་བ་ཅུང་ཟད་འཁྱོག་པའང་ཕྱག་བྲིས་སུ་གསལ་བ་སོགས་ངོ་མཚར་བ་དུ་མ་ཡོད་ཀྱང་ངོས་འཛིན་གྱི་ཕྱག་བྲིས་རྣམས་མེད་པས་ཞིབ་འགོད་མ་ཤེས། དེ་འདྲའི་རིགས་ཤིན་ཏུ་མང་བས་མཁས་དང་གྲུབ་པའི་ཡོན་ཏན་ལ་མཁྱེན་ལྡན་གཟུར་གནས་ཀུན་གྱིས་བསྔགས་པའི་ཡུལ་དུ་གྱུར་པའི་རྣམ་པར་ཐར་པ་བསམ་གྱིས་མི་ཁྱབ་པའི་བདག་ཉིད་ཅན་དུ་བཞུགས་པས་གནས་ཚུལ་གྱི་ཡོན་ཏན་ཇི་བཞིན་པ་ལྟ་ཅི། ཕྱོགས་ཙམ་ཡང་སོ་སོའི་སྐྱེ་བོའི་དཔྱོད་ཡུལ་དུ་མ་གྱུར་མོད། དད་པའི་བློས་གང་དཔོག་ཙམ་ཞིག་བཀོད་པའང་ཆུ་ཐིག་གཅིག་མྱོང་བས་རྒྱ་མཚོ་ཆེན་པོའི་ཆུའི་རོ་རྟོགས་ནུས་པ་ལྟར་འགལ་བ་མེད་པར་སེམས་སོ། །ལྔ་པ་བསྟན་འགྲོའི་དོན་དུ་བཟང་པོའི་ཕྲིན་ལས་ཀྱི་ཕྱག་རྗེས་ཇི་ལྟར་གནང་བའི་ཚུལ་ནི། རྒྱལ་བའི་སྲས་ཀྱི་སྤྱོད་པ་རྒྱ་མཚོར་དབང་འབྱོར་བ་རྣམས་ནི་སྐུ་གསུང་ཐུགས་ཀྱི་མཛད་པ་ཐམས་ཅད་ཤུགས་འབྱུང་གིས་གཞན་ཕན་མཐའ་ཡས་པ་ཆོས་ཉིད་ཀྱིས་འབྱུང་བས་ཕན་བདེ་འདོད་དགུའི་དཔལ་ལྷུན་གྲུབ་ཏུ་སྟེར་བར་མཛད་པ་ལས། དམིགས་བསལ་བསྟན་འཛིན་གྱི་སྐྱེས་ཆེན་རྣམས་ཀྱི་ཕྱག་བཞེས་སུ་གནང་བའི་གཙོ་བོ་ཟབ་རྒྱས་ཆོས་ཀྱི་འཁོར་ལོས་བསྟན་འགྲོར་ཕན་བདེ་སྤེལ་བའི་ཚུལ་སྐབས་སུ་བབས་པ་སྟེ། མདོ་ལས། དགེ་སློང་དག་གང་ཟག་གཉིས་པོ་འདིས་བསོད་ནམས་མང་པོ་བསྐྱེད་དེ། སྡིག་པའི་རྩ་བ་འབྱིན་ཅིང་བདུད་དང་གཡུལ་འགྱེད་པར་བྱེད། བདུད་ཀྱི་རྒྱལ་མཚན་སྙིལ་བར་བྱེད། ཆོས་ཀྱི་རྒྱལ་མཚན་སྒྲེང་བར་བྱེད། དེ་བཞིན་གཤེགས་པའི་ཆོས་ཀྱི་འཁོར་ལོ་བསྐོར་བར་བྱེད་དོ། །གཉིས་གང་ཞེ་ན། གང་གུས་པར་བྱས་ཏེ་ཆོས་འཆད་པ་དང༌། གང་འདི་ན་གུས་པར་བྱས་ཏེ་ཆོས་ཉན་པའོ། །དེ་བས་ན་ཁྱོད་ཀྱིས་གུས་པས་ཆོས་བཤད་པར་བྱ་ཞིང་བླ་མ་རྣམས་ལ་གུས་པར་བྱས་ཏེ་ཆོས་མཉན་པར་བྱའོ། །ཞེས་གསུངས་པ་ལྟར་དང༌། ཁྱད་པར་ཤིན་ཏུ་སྙིགས་མའི་དུས་འདིར་བསྟན་པ་ཡུན་དུ་གནས་པ་དང་གདུལ་བྱར་ཕན་པའི་ལྷག་བསམ་ཟོལ་མེད་ཀྱི་ཆོས་འཆད་པ་ནི་བསོད་ནམས་བསམ་གྱིས་མི་ཁྱབ་པའི་ཚུལ། བྱམས་པས་སེང་གེའི་སྒྲ་བསྒྲགས་པའི་མདོ་ལས། གངྒཱའི་བྱེ་སྙེད་འཇིག་རྟེན་གསེར་དག་གིས། །བཀང་སྟེ་གང་ལ་སྦྱིན་པ་བྱིན་པ་བས། །དུས་ངན་ཚེ་ན་ཚིགས་བཅད་གཅིག་འཆད་པ། །དེ་ཡི་བསོད་ནམས་ཅི་འདྲ་སྔ་མར་མེད། །ཅེས་དང༌། རྗེ་མཁྱེན་བརྩེའི་ཟབ་གཏེར་ཐུགས་ཆེན་སེམས་ཉིད་ངལ་བསོའི་ལུང་བྱང་ལས། ནམ་ཞིག་སྤྲུལ་པའི་རྒྱལ་པོ་ཡི༔ སྐུ་གསུང་ཐུགས་ཡོན་ཕྲིན་ལས་ཀྱི༔ རྣམ་པར་རོལ་པ་མཐའ་ཀླས་པས༔ བོད་ཁམས་འགྲོ་རྣམས་སྐྱོབ་པ་དང་༔ བསྟན་པའི་མེ་རོ་ཡང་ཡང་གསོ༔ ཞེས་གསུངས་པ་དང་མཐུན་པར་བསྟན་འགྲོའི་ཆེད་དུ་དགོངས་པས་ཆོས་སྦྱིན་འཆད་སྤེལ་རྒྱ་ཆེ་རྒྱུན་ཆགས་སུ་གནང་བའི་ཚུལ་ཡང༌། རྗེ་བླ་མ་ཉིད་མཁྱེན་གཉིས་ཡེ་ཤེས་ཀྱི་གསང་མཛོད་ལ་ཡེ་ནས་དབང་བསྒྱུར་བས་དགུང་གྲངས་བཅུ་སྐོར་ཕེབས་པ་ན་ཐོག་མར་སུམ་རྟགས་དང་དག་ཡིག་གསན་སྦྱོང་གནང་ཞིང་གཞན་ལ་སྐྱོར་ཏེ་འཆད་ནུས་པ་དང༌། ཀཿཐོག་པའི་དབྱར་གནས་ཀྱི་ཚོགས་གྲལ་དུ་ཕེབས་ཏེ་བཤད་བྱའི་ཡན་ལག་ཚོགས་བཤད་གནང་བ་དང༌། ཁྱད་པར་ཚོགས་ཁང་ཆེན་པོར་བདེ་ཆེན་ཞིང་སྒྲུབ་ཀྱི་ཚོགས་དབུར་ཕེབས་ནས་བདེ་སྨོན་གྱི་ལྗགས་བཤད་རྒྱས་པར་གནང་བས་མཆོག་ཕལ་འདུས་པ་ཐམས་ཅད་ཡ་མཚན་ཆེན་པོའི་གནས་ལ་བཀོད། གདན་ས་རུ་བཞུགས་ནས་ཡུན་རིང་མ་ལོན་པར་མངའ་རིས་སྤྲུལ་སྐུ་གཙོས་རྫོང་སར་བླ་གྲྭ་ཉི་ཤུ་སྐོར་ལ་སྤྱོད་འཇུག །སྡོམ་གསུམ་རྣམ་ངེས། ཤེར་ཕྱིན་སྡུད་པ། རྒྱུད་བླ་མ། བཟང་སྤྱོད་སོགས་ཀྱི་བཤད་ཁྲིད་གནང༌། ལཱ་སྱེ་རི་ཁྲོད་དུ་ཁྱབ་བདག་བློ་གཏེར་ཡབ་སྲས་ཀྱིས་རྒྱུད་སྡེའི་དབང་ཆེན་གནང་སྐབས་བློ་སྦྱོང་དོན་བདུན་མའི་ཁྲིད་དང༌། རྩ་རྒྱུད་བརྟག་གཉིས་ཀྱི་རྒྱུད་བཤད་ལ་མཁན་ཆེན་གཞན་དགའ་རིན་པོ་ཆེས་སྐྱོར་དཔོན་མཛད་པའི་སྐབས་རྒྱུད་སྡེའི་སྤྱི་རྣམ་དང་ལྗོན་ཤིང་ཕྱེད་ཡན་ཆད་ལ་ཡང་སྐྱོར་གནང༌། སྔ་རྗེས་སུམ་རྟགས། དག་ཡིག །སྙན་ངག་སོགས་རིག་གནས་སྐོར་རྣམས་ཀྱང་བར་མཚམས་ཅི་རིགས་སུ་གསུངས་པར་མཛད། དགུང་གྲངས་སོ་གསུམ་སྟེང་ཧོར་སྤྱི་གཡུ་ཐོག་མཁན་ཆུང་དབང་འདུས་ནོར་བུས་གདན་དྲངས་ཏེ་སྙིང་ཐིག་ཡ་བཞི་དང་ཀློང་ཆེན་སྙིང་ཐིག་གི་དབང་ཁྲིད་དད་འདུས་ཤིན་ཏུ་མང་པོ་ལ་གསུངས་པ་དང༌། ཁམས་བྱེའི་བཤད་གྲྭ་བརྗེ་བཀྲོལ་རེའི་མཚམས་དབང་ཆོས་རྒྱ་ཆེ་རེ་གསུངས་སྲོལ་གྱིས་མཚོན་དད་ལྡན་ཆེ་ཕྲ་སུ་ཞིག་གིས་གསོལ་བ་བཏབ་པ་ལྟར་ཆོས་འཁོར་རྒྱ་ཆེར་བསྐོར་ཞིང༌། སྐུ་ཚེའི་སྨད་དབུས་ཕྱོགས་ལྷ་ལྡན། རྡོར་སྨིན་གཉིས། ལྷོ་བྲག་སྨྲ་བོ་ཅོག །མཁར་ཆུ། ལྷ་ལུང༌། ཡར་འབྲོག་སྟག་ལུང༌། གཙང་གླིང་བུ་དགོན། ས་སྐྱ་གོང༌། འབྲས་ལྗོངས་རྒྱལ་ས། པདྨ་ཡང་རྩེ། རྡོ་རྗེ་གླིང་སོགས་སུའང་བཀའ་ཆོས་འགའ་ཞིག་གསུངས་པ་རྣམས་ལས། གཙོ་བོར་གདན་ས་རང་ནས་ཆོས་འཁོར་རྒྱུན་ཆད་མེད་པ་བསྐོར་བ་དེའང་སྦྱིན་བདག་སོགས་གཞན་ལ་བསྐུལ་བའམ། ཞུ་བ་པོས་ཆོས་གཞི་འདིང་དགོས་པ་ལྟ་བུ་མ་ཡིན་པར་རྗེ་མཁྱེན་བརྩེ་གོང་མའི་ཕྱག་རྒྱུན་བཞིན་བསྟན་འཛིན་སྐྱེས་ཆེན་དམ་པ་རྣམས་ནས་ཕལ་པ་ཉམས་ཆུང་གི་རིགས་ཡན་ཆད་ལ་མཐོ་དམན་དང་ཕྱོགས་རིས་མེད་པར་ཇི་ལྟར་གསོལ་བ་བཏབ་པ་བཞིན་སོ་སོའི་བློ་མོས་དང་འཚམས་པའི་ཟབ་རྒྱས་ཆོས་ཀྱི་སྦྱིན་པ་ཟད་མེད་དུ་བསྩལ་བར་མཛད་པ་ལས། གཙོ་ཆེ་བ་རགས་རིམ་ཙམ་སྨོས་ན། བསྟན་པའི་གཞི་རྟེན་སོ་ཐར་དགེ་ཚུལ་སློང་གི་སྡོམ་པ་ཕྱིས་སྔགས་སྤྱོད་མཛད་ཀྱི་བར་བགྲངས་ལས་འདས་པ་སྒྲུབ་གནང་མཛད། བྱང་ཆུབ་སེམས་སྡོམ་བཀའ་སྲོལ་གཉིས་གསར་རྙིང་ཡིག་ཆ་སྣ་ཚོགས་སྟེང་ནས་སྔ་ཕྱིར་ལན་གྲངས་ཆེས་ཤིན་ཏུ་མང་བ། རྡོ་རྗེ་ཐེག་པའི་ཆོས་འཁོར་གཙོ་བོ་མཁྱེན་བརྩེའི་དབང་པོས་གངས་ལྗོངས་སྒྲུབ་བརྒྱུད་ཤིང་རྟ་ཆེན་པོ་བརྒྱད་ཞར་བྱུང་ཁྲིད་ཕྲན་སྐོར་བཅས་རིང་བརྒྱུད་རྫོགས་པར་གསན་ཅིང་སོ་སོའི་ཉམས་བཞེས་དང་བྱིན་རླབས་ཉེ་བརྒྱུད་ཀྱིས་ཁྱད་པར་དུ་བྱས་པའི་སྨིན་གྲོལ་རྒྱབ་བརྟེན་བཅས་བཞུགས་པའི་ཆོས་སྡེ་ཆེན་པོ་གདམས་ངག་རིན་པོ་ཆེའི་མཛོད་པོད་ཆེན་བཅུའི་དབང་ཁྲིད་ལུང་བཅས་ཤིན་ཏུ་ཞིབ་རྒྱས་ལན་གཉིས། རྗེ་མཁྱེན་བརྩེའི་དབང་པོས་བཀའ་བསྡུ་གནང་བའི་སྒྲུབ་ཐབས་རིན་པོ་ཆེ་ཀུན་ལས་བཏུས་པ་པོད་བཅུ་བཞིའི་དབང་ལུང་ལན་བཞི། རྣལ་འབྱོར་དབང་ཕྱུག་བི་རཱུ་པའི་ཐུགས་བཅུད་གསུང་ངག་རིན་པོ་ཆེ་ལམ་འབྲས་སློབ་བཤད་ཞིབ་རྒྱས་ལན་གསུམ། ཚོགས་བཤད་ལན་གཉིས། རྩ་རྒྱུད་བརྟག་པ་གཉིས་པའི་རྒྱུད་བཤད་རྗེ་བཙུན་གོང་མ་བརྒྱུད་འཛིན་བཅས་པའི་ཡིག་ཆ་རྣམས་གུང་བསྡེབས་པའི་ཤིན་ཏུ་ཞིབ་རྒྱས་ལན་བཞི། གུར་སཾ་གྱི་བཤད་པ་མཁྱེན་བརྩེ་རིན་པོ་ཆེའི་ཉེ་བརྒྱུད་ཅན་ལན་གསུམ། ངོར་ལུགས་དཀྱིལ་འཁོར་བདུན་གྱི་དབང་ཆེན་ཡོངས་རྫོགས་ལན་བཞི། གསང་འདུས་རིགས་གཉིས་དང༌། བདག་མེད་མའི་དབང་ཆེན་ལན་ཁ་ཤས། ཀུན་རིག་དང་མི་འཁྲུགས་པ། ཚེ་དཔག་ལྷ་དགུ། དྲི་མེད་རྣམ་གཉིས་སོགས་ལན་མང༌། སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་དབང་ཆེན་ཚར་གསུམ། མར་ལུགས་བརྟག་གཉིས་རྒྱུད་བཤད་ལན་ཁ་ཤས། རྒྱུད་བླ་མ་ལན་གཉིས། ཟབ་མོ་ནང་དོན་དང་གཞུང་ཆུང་གཉིས་བཅས་ཀྱི་བཤད་ཁྲིད་ལན་མང༌། ཆགས་མེད་དང་ཀོང་སྤྲུལ་གསུང་ཕྱག་ཆེན་ཁྲིད་ལན་མང༌། རས་ཆུང་སྙན་བརྒྱུད་ཀྱི་བདེ་མཆོག་ལྷན་སྐྱེས་ཡབ་བཀའ་དང་ཡུམ་བཀའི་བྱིན་རླབས་དང་ཟབ་ཁྲིད་མཁྱེན་གསུང་ཡིག་ཆ་རྣམས་ཀྱི་ལུང་བཅས། ཤངས་ཆོས་ཀྱི་བྱིན་རླབས་རྣམས་དང་ཁྲིད་བཅས་ལན་ཁ་ཤས། རྒྱལ་ཐང་གཅོད་དབང་ཁྲིད་བཅས་ལན་མང༌། ཀར་གཅོད་གཏོར་དབང་དང་འདོན་ཆའི་ལུང་བཅས་ལན་ཁ་ཤས། དཔལ་དུས་ཀྱི་འཁོར་ལོ་ཇོ་ཞལ་ཤིང་རྟ་གཉིས་ཀྱི་དབང་ཆེན་ལན་བརྒྱད་དང་མཆོག་དབང་དང་སྦྱོར་དྲུག་ཁྲིད་ལན་འགའ་ཞིག །རྗེ་མཁྱེན་ཀོང་གཉིས་བརྒྱུད་པར་བཞུགས་པའི་འཇམ་མགོན་མི་ཕམ་རིན་པོ་ཆེའི་འགྲེལ་ཆེན་སྟེང་ནས་དུས་འཁོར་རྒྱུད་བཤད་ལན་གཅིག །གྲུབ་ཆེན་ཐང་རྒྱལ་ལ་གནས་བརྟན་ཡན་ལག་འབྱུང་གིས་བསྩལ་བའི་ཉེ་བརྒྱུད་ཤེར་ཕྱིན་བརྒྱད་སྟོང་པའི་ལྗགས་ལུང་ལན་གསུམ། ཐམས་ཅད་མཁྱེན་གཟིགས་མཁྱེན་བརྩེའི་དབང་པོས་སློབ་དཔོན་འཇམ་དཔལ་བཤེས་གཉེན་ལས་གསན་པའི་ཤེར་ཕྱིན་སྡུད་པ་དང་སྤྱོད་འཇུག་སོགས་ཀྱི་བཤད་ཁྲིད་ལན་མང༌། བཀའ་གདམས་གླེགས་བམ་རིན་པོ་ཆེ་དང་མར་པའི་རྣམ་མགུར་གྱི་ལུང༌། དྭགས་པོའི་ཐར་རྒྱན་དང་ལམ་མཆོག་རིན་ཆེན་ཕྲེང་བའི་བཤད་ལུང༌། ས་སྐྱ་གོང་མ་རྣམ་ལྔ་དང་ངོར་ཆེན་རྡོ་རྗེ་འཆང་གི་བཀའ་འབུམ་བཅས་ལྗགས་ལུང་ལན་གཅིག །སྡོམ་གསུམ་རབ་དབྱེ་སོགས་ལན་མང༌། དངུལ་ཆུ་ཐོགས་མེད་ཀྱི་བཀའ་འབུམ་དང་རྗེ་ཙོང་ཁ་པའི་ལམ་རིམ་ཆེན་མོ། ཆགས་མེད་ཞབས་ཀྱི་རི་ཆོས་སོགས་ཀྱི་ལྗགས་ལུང་ལན་ཅི་རིགས་བཅས། མངོན་རྟོགས་རྒྱན་རྩ་བ་དང་རོང་སྟོན་འགྲེལ་ཆེན་ཚར་གཅིག །འདུལ་བ་མེ་ཏོག་ཕྲེང་རྒྱུད་ལན་ཁ་ཤས། བདེ་མཆོག་ལཱུ་ནག་དྲིལ་གསུམ་གྱི་དབང་ཆེན་ལན་དུ་མ། བདེ་མཆོག་རྩ་རྒྱུད་ཀྱི་བཤད་པ་ལན་གཅིག །མཁའ་སྤྱོད་བེའུ་བུམ་གྱི་ལུང་ལན་གཉིས། ཨིནྡྲ་དང་མཻ་ཏྲི་མཁའ་སྤྱོད། ཆོས་ཉིད་དངོས་བསྟན་དང་སྔགས་བཏུའི་བྱིན་རླབས་རྣམས་ལན་མང་ཙམ། དམར་པོ་སྐོར་གསུམ་རྗེས་གནང་ཐུན་མོང་ཐུན་མིན་ལན་གསུམ་རེ། གཞན་ཡང་ཐུགས་ཆེན་བཅུ་གཅིག་ཞལ། དོན་ཡོད་ཞགས་པ། གདུགས་དཀར། གཟའ་ཡུམ། སྨན་བླ་ཞེ་བདུན། འཇམ་དཔལ་གསང་ལྡན། རས་ཆུང་ཕྱག་རྡོར། དགེ་ལྡན་འཇིགས་བྱེད་དཔའ་གཅིག །འབྲུག་ལུགས་བདེ་མཆོག་བཅུ་གསུམ་མ་སོགས་རྒྱུད་སྡེ་གོང་འོག་གི་དབང་ཆེན་རྣམས་ཐོར་བུའི་ཚུལ་དུ་རྒྱ་ཆེར་གསུངས་རིགས་ཞིབ་ཏུ་འགོད་མ་ཤེས་སོ། །ངོར་ཚར་འཇིགས་བྱེད་དབང་ཆེན་ལན་མང་དང་ཁྲིད་དང་པོད་ལུང་ལན་གཅིག །གཤེད་དམར་དབང་ལན་ཁ་ཤས་པོད་ལུང་གཅིག །གུར་གྱི་དབང་ཁྲིད་ལན་བཞི་པོད་ལུང་ལན་གཉིས། ཞལ་གྱི་དབང་ཁྲིད་ལན་གཉིས་པོད་ལུང་ལན་གཅིག །སྔ་འགྱུར་རྙིང་མ་བཀའ་མའི་སྐོར་གྱི་དབང་ཡོངས་རྫོགས་ཞིབ་རྒྱས་ལན་གསུམ་དང༌། སྒྱུ་འཕྲུལ་ཞི་ཁྲོ། དོང་སྤྲུགས། ཚོགས་ཆེན་འདུས་པ། འཁོན་ལུགས་ཡང་ཕུར་རྣམས་ཀྱི་དབང་དེ་ལས་མང་བ། བཀའ་མའི་གཞུང་རྙིང་པོད་བཅུ་སྐོར་ལོང་བའི་ལྗགས་ལུང་ལན་བཞི། སྒྱུ་འཕྲུལ་རྩ་རྒྱུད་གསང་བ་སྙིང་པོ་དང༌། སྤྱི་མདོ་དགོངས་པ་འདུས་པ་དང་ཕུར་པ་རྩ་དུམ་གྱི་རྒྱུད་བཤད་ལན་བཞི་ལྔ། སངས་རྒྱས་གསང་བའི་ལམ་ཆེན་དང༌། ཉི་མ་སེང་གེའི་རྒྱ་ཆེར་འགྲེལ། རྒྱུད་འབུམ་རིན་པོ་ཆེ་དཀར་ཆག་བཅས་པོད་ཉེར་དྲུག་གི་ལྗགས་ལུང་ལན་གཅིག །རིན་ཆེན་གཏེར་མཛོད་ཆེན་མོའི་དབང་ཁྲིད་ལུང་དང་བཅས་པ་ལན་གཅིག །གཏེར་མཛོད་བཀའ་རྒྱའི་དབང་ལན་གསུམ། རྒྱུད་བཅུ་བདུན་གྱི་དབང་ཁ་ཤས་དང་ལུང་ཚར་གཉིས། ཉང་གཏེར་བཀའ་བརྒྱད་བདེར་འདུས་དབང་ཆེན་ལན་གསུམ། དབང་འབྲིང་བསྡུས་ཁྲིད་སོགས་ལན་ཁ་ཤས། གུར་དྲག་དང་ཐུགས་ཆེན། མཁའ་འགྲོ་ཆེན་མོ་རྣམས་ཀྱི་པོད་ལུང་ལན་རེ། ཁྲོས་ནག་གི་སྨིན་གྲོལ་དང་པོད་ལུང་ལན་རེ་ཟུང༌། ཆོས་དབང་བླ་མ་གསང་འདུས་དང༌། ཐུགས་ཆེན་ཡང་འདུས། ཕུར་པ་སོགས་ཀྱི་དབང་དང་པོད་ལུང་ལན་ཅི་རིགས། ཡང་ཏི་སངས་རྒྱས་མཉམ་སྦྱོར་གྱི་སྨིན་གྲོལ་པོད་ལུང་ཐེངས་གཅིག །གཡུ་ཐོག་སྙིང་ཐིག་གི་དབང་ཁྲིད་ལན་ལྔ། པོད་ལུང་ལན་གཅིག །རྒྱུད་བཞིའི་ལུང་ལན་གཅིག །སྙིང་ཐིག་ཡ་བཞི་ཚར་ལྔ། ཡང་ཏིག་རྣམ་པ་གཉིས་ཀྱི་དབང་ཁྲིད་ལན་དུ་མ། ཀློང་ཆེན་མཛོད་བདུན་ལྗགས་ལུང་ལན་གཉིས། ངལ་གསོ་སྐོར་གསུམ་རྩ་འགྲེལ་དང་ཁྲིད་བཅས། ཡིད་བཞིན་མཛོད་རྩ་འགྲེལ། ཆོས་དབྱིངས་མཛོད་རྣམས་ལན་དུ་མ། བླ་མ་དགོངས་འདུས་ཀྱི་སྒྲུབ་དབང་ཆེན་མོ་ཞིབ་རྒྱས་ལན་གཉིས། དོན་དབང་ལན་མང༌། བྱང་གཏེར་སྐོར་གྱི་དབང་ལུང་ལན་གཅིག །བྱང་གཏེར་ཀུན་བཟང་དགོངས་པ་ཟང་ཐལ་དང་ཀ་དག་རང་ཤར་བཅས་ཀྱི་དབང་ཁྲིད་ལུང་བཅས་ཞིབ་རྒྱས། ཐུགས་སྒྲུབ་དྲག་མཐིང་དང༌། ཐུགས་ཆེན། ཕུར་པ་སྤུ་གྲི། ཞང་ཁྲོམ་ཚེ་བདག་པད་གནུབས་ཆུ་བོ་གཅིག་འདྲེས་དབང་ཆོག་བཅས་ལན་མང༌། ཚེ་བདག་གནུབས་ལུགས་མུ་ཏིག་ཕྲེང་བ་ལན་གཅིག །རཏྣའི་ཚེ་གསང་དང་ཕུར་པའི་དབང་རྒྱས་བསྡུས་ལན་གསུམ་བཞི། གྲུབ་ཆེན་ཐང་རྒྱལ་སྙན་བརྒྱུད་མཁའ་འགྲོ་གསང་སྤྱོད་ཀྱི་དབང་ཁྲིད་ལན་བཞི། མངའ་རིས་པཎ་ཆེན་རིག་འཛིན་ཡོངས་འདུས་ཀྱི་སྨིན་བྱེད་ཐེངས་གསུམ། པོད་ལུང་ལན་གཅིག །རྡོར་གླིང་ལྟ་བ་ཀློང་ཡངས་དབང་ལུང་ལན་གཅིག །ཀློང་གསལ་འབར་མ་དང་ཧཱུྃ་སྐོར་སྙིང་ཐིག་གི་སྨིན་གྲོལ་ལན་གཉིས། ཀར་གླིང་ཞི་ཁྲོའི་དབང་རྒྱས་བསྡུས་དང་བར་དོ་དྲུག་ཁྲིད་ལན་ཁ་ཤས། འཇའ་ཚོན་པོད་དྲུག་གི་དབང་ལུང་ཆ་ཚང་ལན་གཅིག །དཀོན་སྤྱིའི་དབང་ཁྲིད་པོད་ལུང་བཅས་ལན་མང༌། ལྷ་བཙུན་རིག་འཛིན་སྲོག་སྒྲུབ་ཀྱི་སྨིན་གྲོལ་ལུང་བཅས་དང་རྡོ་རྗེ་སྙིང་པོའི་དབང་ལན་མང༌། རྒྱལ་དབང་ལྔ་པ་ཆེན་པོའི་དག་སྣང་རྒྱ་ཅན་ཉེར་ལྔའི་དབང་ལུང་ཞིབ་རྒྱས་ལན་བཞི། སྨིན་གླིང་གཏེར་ཆེན་རིན་པོ་ཆེའི་གཏེར་ཆོས་ཡོངས་རྫོགས་ལན་བཞི། བདེ་ཀུན་དང་ཁྱད་པར་རྡོར་སེམས་དབང་ཁྲིད་ལན་མང༌། སྒྲུབ་ཐབས་འདོད་འཇོའི་བུམ་བཟང་གི་དབང་ལུང་ཐེངས་གསུམ། སྨིན་གཏེར་དང་རྩེ་ལེ་མཁས་གྲུབ་པདྨ་ལེགས་གྲུབ་ཀྱི་བཀའ་འབུམ་ལུང་ལན་རེ། གཏེར་ཆེན་བདུད་འདུལ་རྡོ་རྗེ་ཀློང་གསལ་སྙིང་པོའི་ཆོས་སྐོར་གྱི་དབང་ལུང་ཚར་གཉིས། བདུད་འདུལ་ཕུར་པ་དང་ཀློང་གསལ་གུར་དྲག་དབང་ལན་མང༌། གུར་དྲག་དང་རྡོར་སྙིང་ཁྲིད་ལན་ཅི་རིགས་ཁ་སྐོང་བཅས། ཀློང་ཆེན་སྙིང་ཐིག་རྩ་པོད་གཉིས་ཀྱི་དབང་ཁྲིད་ལུང་བཅས་ལན་གྲངས་མང་བ་དང༌། ཀུན་བཟང་བླ་མའི་ཞལ་ལུང་དེ་མཚུངས། ཡོན་ཏན་རིན་པོ་ཆེའི་མཛོད་ཀྱི་རང་འགྲེལ་དང་སོག་པོ་དགེ་བཤེས་བསྟན་དར་གྱི་འགྲེལ་པ་བཅས་ཀྱི་བཤད་ཁྲིད་ལན་གསུམ། རྒྱུད་ལུགས་ཕུར་པའི་དབང་ཆེན་ཐེངས་བཞི། པོད་ལུང་ལན་གཉིས། ཀུན་གཟིགས་མཁྱེན་བརྩེ་རིན་པོ་ཆེའི་གཏེར་ཆོས་ཡོངས་རྫོགས་ཀྱི་དབང་ཁྲིད་ལུང་དང༌། བཀའ་འབུམ་ལུང་ཚར་གཉིས། དགོངས་གཏེར་ཐུགས་ཆེན་རྒྱལ་རྒྱམ། བཀའ་འདུས་ཆོས་ཀྱི་རྒྱ་མཚོ། མཁའ་འགྲོ་གསང་འདུས། གྲུབ་ཐོབ་ཐུགས་ཐིག་དང༌། སྙན་བརྒྱུད་སྐོར་དང༌། རྩ་གསུམ་འོད་གསལ་སྙིང་ཐིག་སོགས་ལན་མང་ཙམ། གཏེར་ཆེན་མཆོག་གླིང་གི་གཏེར་ཆོས་ཡོངས་རྫོགས་ཀྱི་དབང་ལུང་ཚར་གསུམ། སྡོམ་གསུམ་རྩ་འགྲེལ་སྐོར་དང༌། ལམ་རིམ་ཡེ་ཤེས་སྙིང་པོའི་རྩ་འགྲེལ་ལན་དུ་མར་གསུངས་པ་རྣམས་རྣམ་ཐར་ཞལ་གསུང་གི་གྲངས་དང་ཅུང་མི་མཐུན་ཀྱང་རྣམ་ཐར་གསུངས་རྗེས་སྐུ་ཚེའི་སྨད་དུ་གསུངས་པ་རྣམས་བརྩིས་པ་ཡིན་ལ། གཞན་ཡང་མཁྱེན་བརྩེ་ཡེ་ཤེས་རྡོ་རྗེའི་གཅོད་འཛིན་པ་རང་གྲོལ་དང༌། འགྲོ་འདུལ་དཔའ་བོ་རྡོ་རྗེའི་དགོངས་གཏེར་སྐོར་དང༌། མི་ཕམ་འཇམ་དཔལ་དགྱེས་པའི་རྡོ་རྗེའི་རྒྱུད་ལུགས་འཇམ་དཔལ་གྱི་དབང༌། གླིང་རྒྱལ་ཚེ་ཡུམ། ལས་རབ་གླིང་པའི་ཆོས་སྐོར་ཕུར་པ་རྣམས་ཀྱང་ལན་ཇི་ལྟར་རིགས་པ། ཁྱད་པར་དཔལ་དགྱེས་པ་རྡོ་རྗེའི་རྒྱུ་ལམ་དབང་ཆེན་དང༌། ནཱ་རོ་མཁའ་སྤྱོད་ཀྱི་བྱིན་རླབས། ཚར་ངོར་ལུགས་གཉིས་ཀྱི་ཁྲིད་བཅས་བློ་སྦྱོང་སྐོར་དང༌། ཐུགས་ཆེན་རྗེས་གནང༌། ཀློང་སྙིང་སྔོན་དངོས་ཁྲིད་བཅས་ལན་ཅི་རིགས། ཐུགས་སྒྲུབ་རྣམ་གཉིས་དང་ལྕེ་བཙུན་སྙིང་ཐིག་སྨིན་གྲོལ་ལན་མང༌། སྐྱེར་སྒང་རྟ་མགྲིན་དང༌། སྒྲོལ་དཀར་རྗེས་གནང༌། ཚེ་ཁྲིད་བཅས། སྙན་བརྒྱུད་ཕུར་པ། འཕགས་མའི་སྙིང་ཐིག་དང་རྩ་གསུམ་དྲིལ་སྒྲུབ། རྩ་གསུམ་སྤྱི་འདུས། ཕྱག་རྡོར་མེ་དབལ། རྟ་མགྲིན་གནམ་ལྕགས་མེ་འཁོར། གཉེན་པོ་ལྷ་ལྔ། ཞི་བྱེད་ལྷ་བདུན་སྐོར། ཐུགས་ཆེན་འཁོར་བ་དོང་སྤྲུགས། མཆོག་གཏེར་འོད་ཆོག །ཀློང་སྙིང་རྩ་གསུམ་དང་ཡང་གསང་བླ་སྒྲུབ་རྟ་ཕྱག་རྗེས་གནང༌། ཐང་རྒྱལ་ཚེ་དབང་རྒྱས་བསྡུས་སོགས་ཞུ་མཁན་རྒྱུན་ཆད་མེད་པའི་རེ་བ་སྐོང་བར་མཛད་པས་མཚོན། མདོར་ན་རྒྱུད་སྡེ་ཀུན་བཏུས་ཡོངས་རྫོགས་སྡེབས་གཅིག་གསུངས་རྒྱུ་མ་བྱུང་ནའང་རྒྱུད་སྡེ་གོང་འོག་གི་དབང་ཆེན་ཐོར་བུའི་ཚུལ་དུ་ལྷག་ལུས་མེད་པར་གསུངས་གྲུབ་པ་སོགས་བཀའ་འགྱུར་ཙམ་ལས་གང་གསན་པ་དེ་དག་ཚར་རེ་མ་འཆད་པ་མེད་པ་ལྟ་བུས་མདོར་ན་སྐུ་ཚེ་གཅིག་གི་མཛད་པ་ཆོས་འཆད་ཉན་ཁོ་ནས་དུས་འདའ་བས་སྐུ་མཚམས་བཅད་རྒྱའི་སྐབས་དང་ཡར་མར་ཕེབས་པའི་རིང་ལས་ཉིན་རེར་དབང་རྗེས་གནང་ཐེངས་རེ་མི་གསུངས་པ་གཏན་ནས་མེད་པ་ལྟ་བུ་ཡིན། དབུ་མ་ལུགས་ཀྱི་སེམས་བསྐྱེད་དང༌། ཐུགས་རྗེ་ཆེན་པོའི་དབང་རྗེས་ཐུན་མོང་བ། འཕོ་ལུང༌། རྐྱེན་སེལ་དབང་རྗེས་ཕྲན་ཚེགས། ཚེ་དབང་སོགས་ཀུན་ལ་འཆད་རུང་རིགས་ཁྱབ་གདལ་དུ་གནང་བ་ཙམ་ལས། གཞན་ཐམས་ཅད་གང་བྱུང་བྱུང་ཁྲོམ་ཆོས་སུ་གྱུར་པ་གཏན་ནས་མི་མཛད་ཅིང༌། ཁྱིམ་པ་ཕོ་མོ་ལ་ཡི་གེ་དྲུག་པའི་བསྒོམ་བཟླས་དང༌། ཐེག་ཆེན་ལམ་གྱི་རྩ་བ་དམ་པ་གསུམ་དང་བསགས་སྦྱོང་གི་སྒོ་ནས་རྣམ་དཀར་སྒྲུབ་པ་དང༌། དགེ་ཚུལ་སློང་གི་སྡོམ་པའི་རྟེན་ཅན་གདམས་ཟབ་དོན་དུ་གཉེར་བ་དག་ལ་གཙོ་བོར་རང་རང་བློ་མོས་དང་འཚམས་པར་རྟེན་ཁྲིམས་གཙང་དང་ཆོས་ལུགས་རང་རང་གི་ཡི་དམ་བསྙེན་སྒྲུབ་ཉམས་ལེན་སོགས་གསར་རྙིང་ཆོས་བཀའ་གང་དགོས་སོ་སོར་སྟོན་པར་མཛད་ལ། བསྟན་པ་རིས་མེད་ལ་དག་སྣང་གིས་ཆོས་སྒོ་མཐའ་ཡས་པ་གསན་བསམ་འཛིན་སྤེལ་སྐྱོང་བའི་མཁས་བཙུན་དམ་པའི་ངང་ཚུལ་དང་ཐུགས་བསྐྱེད་ཅན་དག་ལ་ལྷག་པར་དགྱེས་པས་ཟབ་ཅིང་རྒྱ་ཆེའི་ཆོས་སྒོ་ཡངས་པོར་སྟོན། གསར་རྙིང་གྲུབ་མཐའ་རང་རང་ཆོས་བརྒྱུད་ལ་ཡིད་ཆེས་ཀྱི་ངེས་པས་ཐོས་བསམ་སྒོམ་པ་རྩལ་དུ་འདོན་པ་རྣམས་ལའང་སོ་སོའི་ལྟ་གྲུབ་ཀྱི་འཇོག་མཚམས། བརྒྱུད་འཛིན་གྱི་རྣམ་ཐར། ཆོས་ཀྱི་ཆེ་བ། ཐ་ན་ཕྱག་བཞེས་དབྱངས་རོལ་ཚུན་ཞིབ་པར་ཐུགས་ལ་མངའ་ཞིང་སོ་སོར་མ་འདྲེས་པར་བཀའ་ལུང་རྗེན་པར་བསྩལ་བས་རེ་བ་རྫོགས་པར་བསྐངས་ཤིང་ཡིད་ཆེས་ལྷག་པར་འཕེལ་བར་མཛད། གྲུབ་མཐའ་ཆོས་ལུགས་ཕན་ཚུན་གཡོ་ཐབས་སམ་དབང་ཆེ་ཆུང་གིས་བསྒྱུར་བ་དང༌། རང་ལུགས་བཞག་ནས་ཨ་གསར་ཅོལ་ཆུང་ཀླད་ཡངས་ཀྱིས་རེ་རེ་རྙེད་དུས་རེ་རེ་བོར་བའི་རིགས་རྣམས་དང༌། ལྷག་པར་དུ་ཡང་གྲུབ་མཐའི་ཕྱོགས་ཁྱེར་གྱིས་ཆོས་དང་གང་ཟག་ལ་སྐྱོན་འདོགས། སྤྲིངས་ཡིག །དྲི་བ། འབྱམས་ཡིག་སོགས་ཤེས་རྒྱུད་ཟིང་ཟིང་པོ་བྱེད་ཅིང་རྩོད་པ་འཕེལ་བྱེད་ཀྱི་རིགས་ལ་གཏན་ནས་མི་དགྱེས། བཀའ་ལས་ཀྱང༌། དེང་སང་རྩོད་ལྡན་སྙིགས་ལྔའི་ལྟ་བའི་སྙིགས་མ་ཆེས་བདོ་བས་བོད་མི་རེའི་རྒྱུད་ལ་ལྟ་བ་རེ་འབྱུང་བར་གསུངས་པ་བཞིན། བསྟན་ལ་ཞུགས་པ་རྣམས་ལྟ་ཅི། སོ་སྐྱེ་ཁྱིམ་པ་ཡན་ཆད་ཀྱི་ཁ་ལ་ལྟ་གྲུབ་རེ་ཁྱེར་ནས་ཆོས་ལུགས་ཕན་ཚུན་ལྟ་གྲུབ་དག་མིན་ལབ་གླེང་འདི་ནི་གཟུར་གནས་ཀྱི་རྩོད་པ་ལྟ་གྲུབ་རྣམ་དག་གི་སྒྲུབ་བྱེད་ཕར་ཞོག །ཀུན་གྱི་ཤེས་རྒྱུད་བདུད་ཀྱིས་བརླམས་པས་བསྟན་པ་ནང་དབྱེན་དང༌། བསྟན་སེལ་ཕུང་དཀྲུག་གི་གཞིར་སོང་ནས་བསྟན་པའི་རྒྱུན་དང་འགྲོ་བའི་བདེ་སྐྱིད་མྱུར་དུ་ཉམས་བྱེད་འབའ་ཞིག་གི་རྒྱུར་འགྲོ་བ་ཤས་ཆེ། ལར་ཡང་བསྟན་པའི་སྲོལ་འབྱེད་ཆེན་པོ་འཕགས་པའི་ས་ལ་བཞུགས་ངེས་པ་རྣམས་དང༌། བསྟན་འཛིན་མཁས་གྲུབ་རིམ་བྱོན་དག་གིས་དཔྱད་གསུམ་དག་པས་གཏན་ལ་ཕབ། སྒོམ་སྒྲུབ་ཉམས་བཞེས་ཀྱིས་ལམ་རྟགས་དང་མཆོག་གི་གྲུབ་འབྲས་མངོན་དུ་མཛད་པའི་བསྟན་པ་རྣམ་དག་གསེར་ཞུན་མ་འདྲ་བ་རྣམས་ལ་སོ་སྐྱེའི་རྣམ་རྟོག་གིས་དཔྱད་པར་འདོད་པ་ནི་རང་ཉིད་ཉམས་པའི་རྒྱུ་ལས་གཞན་མེད། དེས་ན་རང་རང་བསྟན་པ་གང་གི་སྒོར་ཞུགས་པ་དེའི་ལྟ་གྲུབ་ལ་ངེས་ཤེས་སྐྱེ་བའི་ཐབས་ལ་ནན་དུ་བརྩོན་ཅིང་ཉམས་ལེན་སྙིང་པོར་བྱེད་པ་ཤིན་ཏུ་ལེགས། འོན་ཀྱང་གྲུབ་མཐའ་ཀུན་ལ་ཕྱོགས་རིས་ཀྱི་ངན་རྟོག་མཐའ་དག་དོར་ལ་དག་སྣང་སྦྱོང་བ་གལ་ཆེ་ཞིང༌། དེར་མ་ཟད་རིས་མེད་པའི་མདོ་སྔགས་ཀྱི་གཞུང་འགྲེལ་རྣམས་ལ་དག་པའི་སྣང་བས་ཞིབ་ཏུ་མཇལ་ན་འཆད་ཐབས་དང་འགྲེལ་ཚུལ་འདྲ་མིན་དག་ལ་སོ་སོར་སྐབས་སུ་བབས་པའི་ཁྱད་ཆོས་ངོ་མཚར་ཅན་རེ་བཞུགས་ཤིང༌། མཐར་འབྲས་ཀྱི་དོན་གཅིག་ཏུ་འབབ་པས་ན། རང་རང་ངེས་ཤེས་སྐྱེས་པའི་ལྟ་བ་དེའི་དོགས་སེལ་དང་ཆེ་བ་འདོན་པའི་སྒྲུབ་བྱེད་དུ་འགྱུར་ཞིང་ཐོས་བསམ་གྱི་བློ་སྐྱེད་གོང་འཕེལ་བྱེད། ཀུན་ལ་རྒྱུ་མཚན་ཤེས་པས་དད་པའི་སྣང་བ་རང་ཤུགས་ཀྱིས་འབྱུང་བ་སོགས་དགོས་པ་ཤིན་ཏུ་ཆེ། དུས་དབང་གིས་སྣང་སྟོང་གི་སྒྲུབ་ཕྱོགས་རྩལ་འདོན་ཆེ་ཆུང་དང༌། བརྒྱུད་པ་ཕན་ཚུན་ཐུགས་ནང་མཐུན་མི་མཐུན་ཕྲན་བུས་ཆོས་མཐུན་རྩོད་པ་བསྟན་པའི་རྒྱན་དུ་འགྱུར་བ་འོང་དཀའ་བས་ཐམས་ཅད་ནས་བསྟན་པ་ནང་མཐུན་འབྱུང་ཐབས་རེ་མཛད་ན་ཕན་ཆེ་ཚུལ་འདོམས་པར་མཛད་ཅིང༌། གཏེར་ཆེན་མཆོག་གླིང་གི་ཐུགས་སྒྲུབ་ཡིད་བཞིན་ནོར་བུའི་ལུང་བྱང་དུ། དུས་ཀྱི་མཐའ་ལ་བསྟན་སེལ་འབྱུང་བ་མངའ་བདག་སྤྲུལ་པ་ཞིག་གིས་དེ་ཉིད་དབྱེན་བཟླུམས་མཛད་ནས་བསྟན་འགྲོ་ལ་ཕན་པ་འབྱུང་ཞེས་གསུངས་པ་བཀའ་ལས་ཐོས་ཤིང་རྣམ་ཐར་དུའང་དེ་ལྟར་གནང་བ་བསྟན་འཛིན་སྐྱེས་བུ་དང་བསྟན་པའི་སྦྱིན་བདག་ཁག་ལ་ཡང་ནས་ཡང་དུ་ཞལ་གདམས་བསྩལ། གསར་རྙིང་གི་ཆོ་གའི་ཆིངས་དང་དབང་གི་ཕྱག་བཞེས་སྒོ་ཡངས་དོགས་རྣམས་ལ་གཅིག་དཔེ་ཀུན་འགེབས་ཀྱི་སྲོལ་ངན་མ་ཡིན་པར་རྒྱུད་སྡེ་གོང་འོག་དང་བླ་མ་བརྒྱུད་པའི་ཕྱག་བཞེས་ཀྱི་ཁྱད་པར་ལས་ཇི་ལྟར་འབྱུང་བ་བཞིན་དང༌། ཁྱད་པར་དབང་དང་སྒྲུབ་པའི་ཕྱག་བཞེས་ཕལ་ཆེར་རྗེས་གནང་དང་གཏོར་དབང་ཙམ་ལའང་རྗེ་འཇམ་མགོན་རྣམ་གཉིས་ཀྱི་ཕྱག་སྲོལ་ཞིབ་ཅིང་རྒྱས་པ་ཁོ་ནར་གནང་བ་ལས། ཕྱིས་སྐུ་ན་སྨིན་པ་དང་སློབ་ཚོགས་ཆེས་མང་སྐབས་ཀྱང་གཞུང་དོན་རས་བོར་གྱི་སླ་ཆོས་དང་བྱས་ལོ་དེས་ཆོག་གཏན་ནས་མི་མཛད། ཁྲིད་ཀྱི་རིགས་ལམ་འབྲས་ཚོགས་སློབ་སོགས་ས་སྐྱའི་སྐོར་རྣམས་སུམ་ཁྲིད་དང་བཞི་ཁྲིད་མཛད། དེ་མཐུན་གདམས་མཛོད་དུ་བཞུགས་པའི་ཟབ་ཁྲིད་རྙིང་སྐོར་མ་གཏོགས་པ་རྣམས་ཁྲིད་བརྒྱ་དང་སྦྲགས་ཏེ་སུམ་ཁྲིད་མཛད་པ་འཇམ་མགོན་རྣམ་གཉིས་ཀྱི་བཞེད་སྲོལ་ཡིན་པས་ཤིན་ཏུ་གལ་ཆེ་ཞེས་ཡང་ཡང་གསུངས། བརྒྱུད་འཛིན་རྣམས་ནས་ཀྱང་དེ་ལྟར་དགོས་པར་བླ་མ་བརྒྱུད་པས་བཀའ་གཙིགས་སུ་གདམས་ཚུལ་གསུངས། གཞན་གསར་རྙིང་གི་ཁྲིད་རྣམས་བརྡ་འཕྲོད་ངེས་པ་ལན་རེས་ཁྲིད་ལུང་གི་རྒྱུན་ལ་ཆོག་པར་གསུངས་ཤིང་དེ་བཞིན་དུ་གནང༌། རྟག་པར་ཆོས་སྦྱིན་ཆད་མེད་དུ་བསྩལ་ཀྱང་འབའ་སམ་གྱི་ཟས་འབག་བཙོག་ཅན་བྱ་ཁྱིས་ཟོས་པ་ལྟར་དོན་གཉེར་ཡོད་མེད་དང༌། ཆོས་ཀྱི་གནད་དོན་དཔོག་མིན་སོགས་དཔྱད་པ་གང་ཡང་མེད་པར་ཤུགས་འབྱུང་གིས་ཅི་འདོད་བྱུང་རྒྱལ་ཆོག་པ་ལྟ་བུའང་མ་ཡིན་པར་གདམས་ངག་ཟབ་མོ་རྣམས་བཀའ་གཙིགས་ཀྱི་ཕྱག་རྒྱས་བཏབ་ནས་སོ་སོའི་བརྒྱུད་འཛིན་དང་མོས་ལྡན་ལ་ཆེད་དུ་གདམས་ཤིང་མནོག་ཆོས་སུ་བསྩལ་བས་རྗེས་འཇུག་དག་གིས་ཟབ་ཆོས་ཀྱི་རིན་ཐང་དང་དཀོན་པར་འདུ་ཤེས་པས་ཟབ་དོན་ལ་ཡིད་ཆེས། ཧ་ཅང་གཏི་ཐུག་གི་ཆོས་བརྒྱུད་འཛིན་པ་དག་གིས་ཀྱང་ཅི་ཡོད་ཆ་མི་འཚལ་ཞིང་བརྒྱུད་པ་ཆད་འགྲོ་བའང་མ་ཡིན་པར་སྣོད་ལྡན་གྱི་རིགས་ལ་ཐུགས་ལྕོགས་མིན་སྐབས་སྐུ་ངལ་ཁྱད་དུ་བསད་ནས་མཚན་མོ་ཡང་རྒྱུན་རིང་པོར་དབང་ཁྲིད་མང་དུ་གསུངས། དེའང་ཆོས་བཀའ་རྒྱ་ཆེ་ཆུང་གང་ཡིན་རུང་ཀུན་སློང་བཅོས་པའི་ཚུལ་ལ་ཡང་ཡང་ནན་ཏན་གྱིས། ཆོས་འཆད་ཉན་སྒོམ་སྒྲུབ་ཅི་བྱེད་ཀྱང་ལམ་རྣམ་དག་ཏུ་འགྱུར་མིན་ཀུན་སློང་འདི་ཁོ་ན་ལ་རག་ལས་པས་ཤིན་ཏུ་གལ་ཆེ་བར་གདམས་པའི་སྒོ་ནས་གདུལ་བྱའི་བློ་རྒྱུད་སྨིན་ངེས་སུ་མཛད། འཆད་བྱའི་ཆོས་དེ་དག་ཀྱང་དབང༌། ཁྲིད། རྩ་བ་དང་ཡན་ལག་གི་ཡིག་ཆའི་ལུང་སོགས་ཁུངས་དང་འབྲེལ་ཞིང་རྒྱུ་མཚན་འདི་ལྟ་བུའོ་ཞེས་ཆེད་དུ་གསོལ་བ་བཏབ་མ་ནུས་ཀྱང་རྒྱས་པར་བཀའ་བསྩལ་བས་གདུལ་བྱའི་རེ་འདོད་ཡོངས་སུ་རྫོགས་ཤིང་བསྟན་རྒྱུན་ལ་སྨན་པ་དང༌། དཔྱོད་ལྡན་དྭངས་བ་འདྲེན་ཅིང་ངོ་མཚར་ལྷག་པར་སྐྱེ་བར་སྣང༌། རྟེན་འབྲེལ་དང་དགོས་པའི་སྐབས་དང་འབྲེལ་ན་དཔེ་ཆ་སོགས་བསྩལ་ཞིང་རྗེས་སུ་སྤྲོ་བ་བསྐྱེད་པའི་ཚུལ་དུ། ཁོ་བོས་བླ་མ་དམ་པ་འདི་རྣམས་ལས་ལན་གྲངས་འདི་ལྟ་བུ་ནོས། དེའང་གཅིག་ལ་ཡིད་མ་ཆེས་པར་ཡང་ཡང་ཞུས་པ་མིན་ཀྱང་ཞུ་ཡུལ་བླ་མ་དེ་དག་སྤྱིར་དམ་པའི་ཡོན་ཏན་ཕུན་སུམ་ཚོགས་པ་དང་ལྡན་ལ། ཁྱད་པར་རྗེ་འཇམ་མགོན་རྣམ་གཉིས་ཀྱིས་སོ་སོར་སྒེར་ཆོས་ཆེད་དུ་བསྩལ་བ་བཞིན་ཐུགས་དམ་ཉམས་བཞེས་ལྷག་པར་གནང་བའི་བྱིན་རླབས་ཀྱི་བརྒྱུད་པ་ངོ་མཚར་ཅན་རེ་བཞུགས་པའི་རྒྱུན་ལ་བསམས་ནས་ནན་བསྐྱར་ཞུས་པས་བརྒྱུད་པ་ཁྱད་འཕགས་ཕལ་ཆེར་འདུས་པའི་ཁུལ་ཡིན་ལ། བརྒྱུད་པ་དེ་ལྡན་གྱི་གདམས་པ་ཟབ་མོ་བླ་མ་དམ་པ་རྣམས་ཀྱི་དགོངས་པ་བསྐང་ཞིང་བསྟན་རྒྱུན་ལ་ཅུང་ཟད་ཕན་དུ་རེ་བས་གཞུང་དང་བརྒྱུད་པའི་ཕྱག་རྒྱུན་བཞིན་ཆད་ལྷག་མེད་པ་ཞིབ་རྒྱས་སུ་འཆད་གྲུབ་པ་སྟེ། ཆོས་ཞུས་པའི་ལག་རྗེས་ཉམས་བཞེས་གནང་ལུགས་སོ་སོར་རག་ལས་ཤིང༌། ཁོ་བོས་རྒྱལ་པོ་བཀས་བཅད་དེ་གྱིས་འདི་དགོས་ཀྱི་ཁས་ལེན་བསྙགས་པ་གང་ཡང་མེད་ཅེས་དང༌། སྤྱིར་བསྟན་པ་ཉམས་པའི་སྔ་ལྟས་ཀུན་གྱིས་གལ་ཆུང་ཆོས་ལ་བྱེད་སྐབས་འདིར་རང་དོན་ཡིད་བྱེད་ཀྱི་བློ་ངན་མ་ཡིན་པར་ལྷག་བསམ་རྣམ་དག་གིས་འཆད་སྤེལ་བྱེད་ནུས་པ་རེ་བྱུང་ན་ལེགས་ཚུལ་གྱི་བསླབ་སྟོན་ཙམ་ལས་ཤིན་ཏུ་སྒྲུབ་པར་དཀའ་བའི་ཁས་ལེན་གྱི་གནད་ལ་བཀར་བ་སོགས་མི་མཛད། རྒྱུད་དང་གཞུང་གི་བཤད་ཁྲིད་དག་ཀྱང་ཟབ་དོན་མན་ངག་གིས་དབུལ་བའི་རྟོག་གེའི་བཤད་ཡམ་དང༌། གང་ཤེས་གང་དྲན་ཤ་ཟིན་སྤུ་བསྡུས་ལྟ་བུ་མ་ཡིན་པར་རྒྱས་བཤད་རྣམས་ཀྱི་ཟབ་དོན་དངོས་པོར་དྲིལ། བསྡུས་པའི་རིགས་ཞིབ་ཅིང་རྒྱས་པར་བཀྲལ་ཏེ་བློ་གྲོས་དམན་མཆོག་ཀུན་གྱི་རྒྱུད་ལ་སྨན་ངེས་པའི་འཆད་བྱ་མདོ་སྔགས་གང་ཡིན་གྱི་གཞུང་དོན་ཐད་ཀར་གསལ་རྒྱས་སུ་སྟོན་པར་མཛད་ཅིང༌། སྐབས་ཐོབ་གསར་རྙིང་གི་བཤད་རྒྱུན་དང་ཡིག་ཆ་སོགས་གང་ལ་བརྟེན་པའི་དགོངས་དོན་མཐའ་དག་གསལ་བར་མཛད་པ་ཙམ་ལས། གཞན་དགོངས་པ་མཐུན་མིན་དང་འཐད་མི་འཐད་ཀྱི་དགག་སྒྲུབ་རིགས་གཏན་ནས་མི་མཛད། སྣོད་ལྡན་བློ་གྲོས་མཆོག་གྱུར་གྱི་རིགས་ལ་ཟབ་དོན་ལས་འཕྲོས་པའི་གསུང་བཤད་ཤིན་ཏུ་ངོ་མཚར་བ་རྒྱས་པར་གནང༌། རྐྱེན་སེལ་བཀའ་བསྒོ་བྱིན་རླབས་དང་ཚེ་འགུགས་ཙམ་ལའང་ཁུངས་དང་འབྲེལ་ཞིང་སྔོན་དངོས་རྗེས་ཚང་གིས་ཞིབ་པར་ཐུགས་ལྷོད་དེ་དང་བ་འདྲེན་པར་གནང་བ་ལས། ལྟ་སྒོམ་མཐོན་པོའི་སྟོང་སྐད་ཀྱིས་གྱ་ཚོམ་དུ་གཏན་ནས་མི་མཛད། རྟག་ཏུ་དངོས་མཚན་གྱི་འཛིན་པས་བཅིངས་བའི་གླེན་གཏམ་སྦུག་དོག་གཏི་ཐུག་ཅན་མ་ཡིན་པར་ཆོས་དང་རྟེན་འབྲེལ་གྱི་གནད་མཁྱེན་པས་ཐུགས་དགོངས་ཤིན་ཏུ་གུ་ཡངས་པར་བཞུགས། མདོར་ན་ཐུན་མོང་ཐུན་མིན་གྱི་ཟབ་རྒྱས་ཆོས་ཀྱི་གསང་བ་གང་སྟོན་ཀྱང་སྔ་སོར་དཔེ་གཟིགས་གནང་བ་སོགས་མི་མཛད་མོད། གཞུང་བཞིན་རང་བྱན་ཆུད་པ་ཤ་སྟག་ལས་མཁྱེན་པས་ཁྱབ་མ་ཁྱབ་ཀྱི་ཁྱད་གཏན་ནས་མི་མངའ་ཞིང༌། ལྷག་པར་མདོ་སྔགས་གཞུང་དོན་དཀའ་གནད་དང༌། དབང་ཁྲིད་དང་ཆོ་གའི་གབ་དཀྲུག་སོགས་ཇི་ཙམ་ཕྱག་ལེན་དཀའ་བ་དེ་ཙམ་གྱི་མཁྱེན་རབ་དང་རྣམ་དཔྱོད་ཇེ་ཆེར་འགྲོ་བ་ལྟ་བུའི་ངོ་མཚར་དང་ལྡན་པ་སྟེ། ཚུལ་འདི་དག་དཀྱིལ་འཁོར་རྒྱ་མཚོའི་ཁྱབ་བདག་འཇམ་པའི་རྡོ་རྗེ་ཉིད་སུམ་ལྡན་རྡོ་རྗེ་འཛིན་པའི་སྐུར་བཞེངས་པའི་མངོན་རྟགས་དང༌། རྒྱལ་བསྟན་ཡོངས་སུ་རྫོགས་པའི་ཤིང་རྟ་ཆེན་པོ་མཚན་དོན་མཐུན་པའི་རྣམ་ཐར་བསྟན་འཛིན་གྱི་སྐྱེས་བུ་གཞན་ལས་ཁྱད་པར་དུ་གྱུར་པའི་གནས་སོ། །དེ་དག་གིས་ཕྱོགས་ཙམ་མཚོན་ཏེ་མདོར་ན་རྗེ་བླ་མ་འདི་ཉིད་ཀྱི་མཛད་སྤྱོད་ཆེ་ཕྲ་མཐའ་དག་ལ་དཔག་ན་རྗེ་འཇམ་དབྱངས་བླ་མ་སྐུ་གོང་མའི་རྣམ་པར་ཐར་པ་དང་ཁྱད་པར་ཅུང་ཟད་ཙམ་མེད་པ་ལྟ་བུར་བཞུགས་ཀྱང༌། ཁོ་བོ་དེའི་སྤྲུལ་པ་ཡིན་དགོངས་པ་དང་ཡོན་ཏན་གྱི་ཚོགས་དེ་དག་ལ་ཐུགས་སྙེམས་རྡུལ་ཙམ་མི་མངའ་བས་དམན་ས་འཛིན་ཞིང་ང་རྒྱལ་སྤོང་བ་ཉིད་ལྷུར་བཞེས་ཏེ་སློབ་མ་རྣམས་ལ་གསུང་འཕྲོས་བསྩལ་སྐབས་ཡང༌། ཁྱེད་རྣམས་ཀྱིས་ཁོ་བོ་མཁྱེན་བརྩེ་རིན་པོ་ཆེ་དངོས་ཡིན་པའམ་ཁོ་བོ་འདྲ་ཞིག་ཡོད་པར་མ་སེམས་མ་གཏོགས་དེ་ནི་ལོག་ལྟ་དེ་ལས་ཆེ་བ་མེད་པ་ཞིག་རེད། རྗེ་མཁྱེན་བརྩེའི་དབང་པོ་ཟེར་བ་དེ་སྙིགས་མའི་དུས་འདིར་ངེས་པར་སངས་རྒྱས་དངོས་སུ་བྱོན་པ་འདྲ་ཞིག་ཡོད་རྒྱུ་རེད་མ་གཏོགས་ང་འདྲ་བའི་དཀོར་རྒན་གྱི་ཕུང་པོ་ལས་ཡོན་ཏན་གྱི་ཆ་ཅུང་ཟད་ཙམ་ཡང་མེད་པ་ཞིག་ག་ལ་ཡིན། དེས་ན་སྐྱབས་རྗེ་སི་ཏུ་རིན་པོ་ཆེས་ཕྲན་གདན་ས་འདིར་དང་པོར་སླེབས་སྐབས་མཁྱེན་བརྩེ་གོང་མའི་བཞུགས་གདན་འདིའི་འཁྲིས་སུ་འབོལ་གདན་ཞིག་ལ་བཀོད་ནས། ཁྱོད་རང་གནས་སྐབས་དེར་སྡོད་ན་ལེགས་རྒྱུ་དང༌། ཁྱེད་རང་མཁྱེན་བརྩེ་རིན་པོ་ཆེ་བཞུགས་མལ་དུ་སྡོད་སྔ་ན་མི་སྡོད་སར་ཁྱི་ཉལ་བ་འདྲ་ཞིག་ཡོང་ཞེས་གསུངས་པར། སྐབས་དེར་ལོ་ཉུང་སྣང་མཐོའི་དབང་གིས་བཀའ་བཀྱོན་ལྟ་བུར་གོ་ནས་དེ་ཙམ་ཡིད་ལ་བབས་པ་མ་བྱུང་མོད། རྗེས་སོར་རྒྱུ་མཚན་ཤེས་པ་ནས་བཟུང་གསུང་དེ་ལ་ཡང་ཡང་ངེས་ཤེས་འཁྲུངས་ཏེ། མཁྱེན་བརྩེ་རིན་པོ་ཆེ་དེ་ང་རང་ཡིན་སྙམ་པའི་རྟོག་པ་མེད་ཅིང༌། རྗེ་བླ་མ་དེ་ཉིད་སྤྱི་གཙུག་དང་སྙིང་དབུས་སུ་བསྒོམས་ནས་གསང་གསུམ་བྱིན་རླབས་རང་རྒྱུད་ལ་ཞུགས་ཤིང་མཛད་སྤྱོད་ཐམས་ཅད་ལ་ཚུལ་བཞིན་དུ་སློབ་ནུས་པ་དང༌། ཐུགས་ཀྱི་བཞེད་དོན་གང་ཡོད་སྒྲུབ་ནུས་པའི་གསོལ་འདེབས་དང་སྨོན་ལམ་ལ་ཡང་ཡང་བརྩོན་པ་ཡིན་ཚུལ་ཕེབས་ཤིང༌། རྣམ་པ་ཙམ་དུའང་རྟག་ཏུ་ངེས་འབྱུང་གི་ཏིང་ངེ་འཛིན་དང་ཐུགས་འདུ་འབྲལ་མེད་པའི་ཚུལ་གྱིས་རྒྱུན་དུ་ཞལ་བཀོད་མཛད་པ་གང་ལའང་གློ་བུར་འཆི་བདག་གིས་ཚེ་སྲོག་ལ་བར་དུ་མ་བཅད་ན་དེ་ལྟར་བགྱིད་ཆོག་གསུངས་ཏེ་མཛད་པ་གང་གནང་ནའང་དེ་བཞིན་མཛད། བཤད་སྒྲུབ་ཀྱི་བསྟན་པའི་རྒྱུན་དང་འགྲོ་བའི་བདེ་སྐྱིད་ཀྱི་གཞི་ལ་ངང་ཐུང་གཏན་ནས་མི་མཛད། རྒྱུ་འབྲས་ཕྲ་ཞིབ་ལ་བག་ཡོད་གནང་སྟེ་རྒྱལ་ཁྲིམས་ཀྱིས་སྲོག་གི་འཇིགས་པར་ཐུག་པ་འགའ་ཞིག་དངོས་སུ་བསྐྱབས་ཤིང༌། ལོ་རེ་བཞིན་བཤས་རར་ཚུད་པའི་སེམས་ཅན་མང་པོའི་སྲོག་བླུ་བ་དང༌། འབྲོག་སྡེ་ཁག་ལ་བྱིན་རླབས་ལྗགས་མདུད་སོགས་རྒྱ་ཆེར་བཀྲམ་ནས་སེམས་ཅན་ཁྲི་ཕྲག་ལོང་བ་ཚེ་ཐར་གཏོང་བའི་དགེ་བསྐུལ་ཡང་ཡང་མཛད། ཕྱག་ཁར་བྱུང་བའི་སེམས་ཅན་ཐམས་ཅད་ཚེ་ཐར་དུ་གཏོང་བ་ལས་ཚོང་བསྒྱུར་སོགས་གཏན་ནས་མི་མཛད། རྟེན་བཞེངས་ཀྱི་ལས་ཚན་སྐོར་ཇི་ཙམ་མང་རུང་དངོས་སུ་སེམས་ཅན་བཤས་ལ་ཕབ་པ་དང་བསྔོས་ཤར་འགྱུར་བའི་རིགས་གཏན་ནས་མི་མཛད་ཅིང༌། བཀའ་ལས་ཀྱང༌། ནང་པ་སངས་རྒྱས་པའི་ཁྱད་ཆོས་ལས་འབྲས་བླང་དོར་ལ་བརྩོན་རྒྱུ་འདི་རེད། དེས་ནས་གཞན་ལ་དངོས་བརྒྱུད་ནས་གནོད་འཚེ་ཅན་གྱི་དགེ་རྩ་སྒྲུབ་ཁུལ་བྱེད་པ་ལ་སྙིང་པོ་ཅི་ཡང་མེད། ཡང་སྒོས་སེམས་ཅན་ཆེ་ཕྲ་ཀུན་ལ་སྲོག་འདི་ལས་གཅེས་པ་མེད་པས་ན་སྲོག་གཅོད་ལ་འཛེམ་པ་ཤིན་ཏུ་གལ་ཆེ། ལྟ་སྒོམ་མཐོན་པོར་རློམས་པ་དང་ལྟར་སྣང་གི་དགེ་བ་རྒྱ་ཆེན་སྒྲུབ་ཁུལ་བྱས་རུང་ལས་འབྲས་འཆོལ་ཉོག་ཏུ་སྤྱོད་པ་དག་ངན་སོང་གི་རྒྱུ་ལས་དགེ་རྩ་རྣམ་དག་ཏུ་འགྲོ་དཀའ་བས་ཤིན་ཏུ་གཟབ་དགོས་པར་གསུངས། མངོན་སྤྱོད་ཀྱི་མཐུས་བསྒྲལ་བ་སོགས་གསན་པ་ལའང་ཐུགས་བག་འཁུམས་པ་ལྟར་མཛད། ཆང་འཐུང་གླུ་གར་སོགས་བག་མེད་ཀྱི་སྤྱོད་པ་ཡེ་ནས་མི་མངའ་བས་དུས་ཀུན་དྲན་ཤེས་ལས་མི་འདའ་བའི་རང་ཚུགས་བརྟན་པོར་བཞུགས། དད་ཟས་དང་གཤིན་དཀོར་ལ་ཡ་ང་བས་བསྔོ་རྟེན་བྱུང་ཚད་ཕྱག་ཐོ་གནང་སྟེ་ཁྲུས་ཆོག་ལན་གསུམ་རེ་དང༌། འཇམ་དབྱངས་མཁྱེན་བརྩེའི་ཕྱག་སྲོལ་ལོ་གཅིག་འཁོར་བ་དང་གཤིན་པོའི་མིང་ཡིག་ཐམས་ཅད་བཀོད་པ་རྫོང་སར་འདུས་སྡེས་ཀུན་རིག་སྒྲུབ་མཆོད་ཟླ་གཅིག་ལྷག་ཙམ་ལོ་བསྟར་གནང་བའི་མཇུག་ཏུ་བྱང་བཞུ་དང་བསྔོ་སྨོན་ལོ་རེ་བཞིན་མ་ཆགས་པར་མཛད། བྱང་རོ་ཐམས་ཅད་ལ་སཱཙྪ་སྒྲུབ་གནང་གི་ཕྱག་བཞེས་ཀྱང་ཡོད་ཅེས་གསུངས། ཕྱོགས་ཕེབས་སྐྱེས་ཆེན་ཁག་ལའང་བྱང་ཆོག་བསྔོ་རྟེན་རྟག་ཏུ་ཞུ་བར་མཛད། བདུན་ཚིགས་བྱང་ཞུས་ཀྱང་མ་བསྙེལ་བར་གནང་ཞིང་སྙིང་རྗེས་གསུར་བསྔོ་བ་འདི་བསྐྱེད་རྫོགས་ཀྱི་གདིང་ཡོད་མེད་དང་སྤྲོས་པ་ཆེ་ཆུང་ལ་མ་ལྟོས་པར་ཀུན་ལ་ཕན་པ་ཆེ་ཞེས་ཡང་ཡང་དུ་གནང༌། གཤིན་པོ་འགའ་ཞིག་རྒྱལ་འགོང་དམ་སྲིས་སྐྱེ་གནས་བཟང་པོ་ཐོབ་པ་ལ་བར་དུ་གཅོད་པ་ལས་དབུགས་དབྱུང་བ་སོགས་དུ་མ་ཡོད་པས་ཤེས། མཆོད་སྦྱིན་དང་གཏོང་བ་ལ་མཉེས་པས་རྒྱུན་རིང་གི་ནད་པ། ཐག་རིང་གི་ཨ་ཅོ། དབུལ་ཕོངས་འོན་ལོང་རིགས་ལ་ཆོས་དང་ཟང་ཟིང་འཚོ་སྨན་སོགས་ཀྱི་གནང་སྦྱིན་རྟག་པར་བསྩལ། ཡར་ངོ་མར་ངོའི་ཚེས་བཅུར་ཚོགས་མཆོད། རྒྱལ་བའི་དུས་ཆེན་ཁག་ལ་མཆོད་པ་སོགས་ཤིན་ཏུ་རྒྱ་ཆེ་རྒྱུན་ཆགས་སུ་གནང༌། རྐྱེན་སེལ་མདོས་གླུད་རྣམས་ལའང་མདོས་རྫས་སྐོར་གཏོས་ཆེ་བ་དུས་དང་རྒྱུན་དུ་བཞག་པར་མཛད། དབང་དང་སྒྲུབ་ཆེན་སོགས་གང་ལའང་མཆོད་གཏོར་རྒྱ་ཆེ་གམ་གཙང༌། གཙང་སྦྲ་གད་ཕྱིས་ལེགས་པར་དགོས་པའི་བཀའ་བསྩལ། གཟུངས་འབུལ། དམ་རྫས་གཏའ་སྤེལ། ཁྲུས་ཆབ། བུམ་ཆུ་སོགས་ལའང་གཙང་སྦྲ་ཤིན་ཏུ་ཆེ་བ་མཛད། རྒྱུན་དུ་ནངས་རེ་བཞིན་ཞལ་ཕྱག་བསིལ་བ་དང༌། ངུར་སྨྲིག་གི་ན་བཟའ་ལེགས་པར་བཞེས་པ་སོགས་ཉིན་གཅིག་ལྟར་གནང༌། གནས་རྟེན་མཇལ་བསྐོར་དུ་ཕེབས་པ་ན་སྐུ་ཕྱག་དང་ཞབས་བསྐོར་སོགས་སྐུ་ངལ་དུབ་ཀྱི་རྣམ་པ་མེད་པས་གཅིག་ཏུ་བརྩོན་པ་བཀའ་གདམས་གོང་མའི་ཕྱག་སྲོལ་ལ་ཤིན་ཏུ་མཉེས། གཟིམས་ཆུང་དུ་སྔོན་གྱི་སྐུ་ཆས་རྙིང་པ་རྒྱུན་འཇགས་གང་ཡོད་པ་དེ་ལས་གསེར་དངུལ་གྱི་སྤུས་ནོམ་ཅན་གསར་བསྐྲུན་དང༌། དེང་སང་རྒྱ་བོད་ཀྱི་འཕྲུལ་ཆས་གསར་པ་སོགས་གཏན་ནས་བཞག་པར་མི་མཛད། རྒྱུན་ཏུ་ན་བཟའ་བཞེས་ལུགས། སྲུང་བྱིན་རྗེ་རང་གི་ཕྱག་གིས་གཞན་ལ་སྩོལ་བ་དང༌། གསོལ་ཆས་སོགས་ཐམས་ཅད་ཀྱང་མངོན་ཆུང་སྦས་ཚུལ་འབའ་ཞིག་གིས་བྱ་བྲལ་དཀྱུས་མའི་བརྟུལ་ཞུགས་རྗེ་གོང་མའི་མཛད་པ་ཇི་ལྟར་བསྐྱངས། རི་བོང་ཅལ་འདྲོག་གི་འུར་གཏམ་དང་དོན་མེད་ཀྱི་བྱ་བ་རྔམ་རྔམ་རྫིག་རྫིག་བྱེད་པ་ལ་གཏན་ནས་ཐུགས་མི་མཉེས། བསོད་ནམས་ཀྱི་གཟི་བརྗིད་དང་ནང་གི་ཏིང་ངེ་འཛིན་གྱི་རྩལ་འབར་བས་ཆེ་བཙན་སུ་འདྲ་ཞིག་ཡིན་རུང་སྐུའི་འཁྲིས་སུ་བཅར་ན་ཞུམ་སྟེ་གུས་པས་མི་འཁོད་པ་སུ་ཡང་མེད་ལ། སྐུ་གསུང་ཐུགས་ལ་ཡོན་ཏན་གྱི་དཔལ་གཟི་ཆེ་བས་སྐུ་མདུན་དུ་ཞལ་འདྲིས་ཆེ་བཞིན་དད་གདུང་ཇེ་ཆེར་འགྲོ། རྒྱལ་ཁམས་སྤྱི་དང་སྦྱིན་བདག་གི་ཞབས་བརྟན་ལའང་ཞི་རྒྱས་ཀྱི་ལས་གཙོ་བོར་གནང་ཞིང༌། རྣམ་དཀར་གང་ལའང་གཞན་ཕན་གྱི་ཐུགས་བསྐྱེད་དང་མཛད་པ་ལྷུར་ལེན་པ་ལས་རང་དོན་གཅེས་འཛིན་སོགས་གཏན་ནས་མི་མངའ། བསྟན་འགྲོའི་བྱ་བ་རླབས་ཆེན་དང་རྣམ་དཀར་མཆོད་སྦྱིན་རྒྱ་གང་ཆེ་ཕྱག་བཞེས་གནང་ཡང་འདི་ལྟ་བུའི་ལས་གྲུབ་སྙམ་པའི་མངོན་རློམས་དང་ཞེན་འཛིན་ངོམ་ཆོས་གཏན་ནས་མི་མངའ། མི་ཆོས་ཀྱི་ཕྱོགས་ནས་བསླབ་སྟོན་ཞུས་གནང་ལའང་ཐུགས་རྒྱུད་དྲང་ཞིང་ཕྱི་ཐག་རིང་བ། ལག་ཏུ་ལོན་ངེས་པ་ལུགས་མཐུན་ཚུལ་གནས་ཀྱི་ཞལ་གདམས་རང་ཉམས་སྨན་ངེས་མཆོག་དམན་སྤྲོས་པ་ཆེ་ཆུང་ཉམས་འོག་ཏུ་ཆུད་པ་ཤ་སྟག་བསྩལ། ཆེད་དུ་ལུང་བསྟན་སོགས་དམིགས་བསལ་མི་མཛད་ཀྱང་བློ་ཇི་ཙམ་འགེལ་བ་དེ་ཙམ་དུ་ཕྱི་མཐའ་གཟིགས་པའི་གསུང་དུ་ངེས་པ་བཀའ་སློབ་ཀྱི་ཚུལ་དུ་གནང༌། རང་ཕྱོགས་གཞན་ཕྱོགས་ཆགས་སྡང་འཐེན་ཁྱེར་གྱིས་བསྟན་སེལ་ཕུང་བཤིག་གི་གཏམ་ཟུར་ཙམ་གསན་པར་དཀའ་བས་ཞུ་ཕོད་པ་སུ་ཡང་མེད། ཆེ་བཙན་གྱི་རིགས་ལ་དགོས་པ་དང་འབྲེལ་ན་སྐྱོན་དང་ནོར་འཁྲུལ་གྱི་སྤྱོད་པ་རྣམས་དྲང་པོའི་ལམ་དུ་སྲོང་བར་མཛད། གདམས་ངག་ཞུ་བ་པོ་གསར་བུའི་རིགས་ལ་ཁྱེད་རང་ད་ལྟ་ལོ་གཞོན་འདོད་ཡོན་གྱིས་སེམས་གཡེངས་ཏེ་ཡོད་འགྲོ་བས་སྔོན་འགྲོ་བློ་སྦྱོང་དང་རྒྱུ་འབྲས་ཀྱི་རྣམ་བཞག་དཔེ་བལྟས་དང་དོན་ལ་བློ་ཡང་ཡང་བཀོལ་ན་སེམས་རྒྱུད་ཞི་དུལ་འབྱུང་རྒྱུ་རེད་ཅེས་ཞལ་རྩེད་དང་བཅས་གསུང་ལྷོད་པོར་གནང་བས་དབུགས་དབྱུང་བ་ལས་ཟུར་ཟ་དང་ཁྱད་གསོད་མི་མཛད་པས་མཚོན་གོང་འོག་གསུང་གི་ཟུར་ལ་དཔག་ན་ངེས་འབྱུང་དང་རྨད་བྱུང་བྱང་ཆུབ་སེམས་ཀྱི་མངའ་བདག་ཏུ་གྱུར་པ་དངོས་ཤུགས་ནས་ཤེས་ནུས། ནང་དུ་སྙིང་རྗེ་ཆེན་པོ་བཅོས་མིན་དུ་མངའ་བས་རྒྱུས་མེད་པའི་ཡུལ་དང༌། སྐད་རིགས་མི་གཅིག་པ་རྣམས་དང༌། གྲུབ་མཐའ་ཆོས་བརྒྱུད་སུ་ཡིན་ཀྱང་རང་རང་གི་བརྒྱུད་འཛིན་གྱི་བླ་མ་ཞིག་ལས་ལྷག་པའི་དད་གདུང་དང༌། མོས་གུས་བཅོས་མིན་དུ་སྐྱེ་བར་འདུག །དེས་ན་སྐྱེས་བུ་དམ་པའི་ངང་ཚུལ་བཅུ་གཉིས་ཞེས་གྲགས་པ་ལྟར་གསར་རྙིང་བཀའ་གཏེར་གྱི་གཞུང་དང་མན་ངག་བསམ་གྱིས་མི་ཁྱབ་པའི་ཆོས་ཀྱི་རྒྱུན་མཐའ་ཡས་པ་མཐའ་དག་ལེགས་པར་གསན་ཅིང༌། སྐུ་ཚེ་རིལ་པོར་ཟབ་རྒྱས་ཀྱི་ཆུ་ཀླུང་ངོམས་པ་མེད་པར་འཁྱིལ་ཞིང་འབབ་པའི་གནས་གཅིག་པུར་གྱུར། བསམ་བྱུང་གི་རིགས་པའི་གྲུ་གཟིངས་ངེས་དོན་ནོར་བུའི་དབྱིག་གིས་གཏམས་པས་རང་གཞན་གྱི་གྲུབ་མཐའི་ཤན་འབྱེད་མཐར་ཐུག་གི་འཇོག་སོའི་ཟབ་དོན་གྱི་དཔལ་འབྱོར་ཐམས་ཅད་ལྷུན་གྱིས་གྲུབ་པའི་ཚུལ་རྗེ་འདིས་ཀུན་མཁྱེན་བླ་མ་འཇིགས་མེད་བསྟན་པའི་ཉི་མ་ལ་རྫོགས་པ་ཆེན་པོའི་གཞི་ལམ་འབྲས་བུའི་ཆོས་སྐོར་གྱི་དྲིས་ལན་དུ་འགྲན་ཟླ་བྲལ་བའི་མཁྱེན་རབ་ཀྱི་འཇུག་པ་ཅན་དུ་བསྔགས་ཤིང༌། མཛོད་བདུན་དང་ཡོན་ཏན་མཛོད་ཀྱི་གཞི་ལམ་འབྲས་བུའི་སྐོར་ལ་གསན་བསམ་མཛད་པར་ཆེད་དུ་གདམས་པ་སོགས་ལ་དཔག་པས་ཤེས། གང་གསན་པ་དག་ཚིག་ཙམ་དུ་མ་བཞག་པར་སྒོམ་པས་རྩེ་གཅིག་དུ་ཉམས་ལེན་གྱི་གནད་ལ་དྲིལ་བས་ས་ལམ་གྱི་ཡོན་ཏན་གྲུབ་གཉིས་འདོད་དགུའི་གཏེར་ཤུགས་འབྱུང་དུ་བརྡོལ། སྐྱེས་སྦྱང་གི་མཁྱེན་རབ་འགྲན་ཟླ་བྲལ་བས་ཕྱོགས་རེའི་གཞུང་ཙམ་མཁྱེན་པ་ལ་མཁས་པར་གྲགས་པ་མ་ཡིན་པར་རིག་པའི་གནས་དང་འདུལ་མངོན་དབུ་ཕར་རྡོ་རྗེ་ཐེག་པའི་རྒྱུད་སྡེའི་གསང་བ་ནས་བརྩམས་ཚིག་གི་བརྡ་ཁྱད་ཕྲན་ཚེགས་ཡན་ཆད་ཀྱི་ཤེས་བྱའི་གནས་ཐམས་ཅད་ལ་ཐོགས་པ་མེད་པར་གཟིགས་པའི་སྤྱན་རས་ཤིན་ཏུ་ཡངས། དེའང་རྗེ་འདིས་ཐོག་མར་གཞུང་སྐོར་གསན་སྦྱང་སྐབས་དང་པོར་མཁྱེན་དཀའ་བ་ལྟ་བུའི་གོ་བ་གཏིང་ཆོད་པ་མ་བྱུང་ཡང༌། ཡོན་ཏན་རིན་པོ་ཆེའི་མཛོད་ལ་གཟིགས་རྟོགས་མཛད་ནས་བཟུང་བློ་གྲོས་ཀྱི་འཇུག་སྒོ་ཡངས་པར་ཕྱེ་བར་གྱུར་ཅིང་དེ་ཕྱིན་གཞུང་གང་གཟིགས་ཀྱང་དཀའ་བ་མེད་པར་གོ་སྙམ་འདུག་པས་གཞུང་འདི་ནི་བྱིན་རླབས་ཤིན་ཏུ་ཆེ་བ་ཞིག་ཡིན་ཞེས་བཀའ་ལས་ཐོས། དུས་རྟག་ཏུ་སྡོམ་པ་གསུམ་གྱི་བཅས་མཚམས་ལས་འདའ་བ་མེད་པའི་དཔལ་རང་གཤིས་སུ་གྲུབ་པས་ཉེས་སྤྱོད་ཕྲ་མོས་ཀྱང་མ་གོས་པའི་མཛད་སྤྱོད་ཐམས་ཅད་ཤིན་ཏུ་བཙུན་པ་རྒྱལ་བསྟན་རིན་པོ་ཆེ་མཛེས་པའི་རྒྱན་ཏུ་གྲུབ། གཞན་ཕན་གྱི་མཛད་པ་རྒྱུན་མི་ཆད་པས་བཟང་པོའི་ཕྲིན་ལས་ཀྱི་སྒོ་ཀུན་ནས་ཡངས་ཤིང༌། མཛད་སྒོ་ཐམས་ཅད་ཐོག་མཐའ་བར་གསུམ་དུ་འདི་བྱ་དེ་བྱེད་ཀྱི་འཆར་གཞི་དང་ཤོམ་ར་སོགས་གང་ཡང་མེད་པར་ཐོག་བབས་ཀྱི་ཚུལ་དུ་ཕྱག་ཆགས་གནང་བས། ཆེན་པོ་དང་དཔྱོད་ལྡན་སུས་ཀྱང་སྤྱོད་ཡུལ་མ་གྱུར་པ་དག་ཀྱང་ཤུགས་འབྱུང་གིས་བར་ཆད་མེད་པར་ལྷུན་གྱིས་གྲུབ་པས་བསྟན་འགྲོའི་ཕན་བདེ་སྤེལ་བར་མཛད། ཆོས་འཆད་པའི་ཚེ་དཔེ་གཟིགས་དང་ཐུགས་བསམ་སོགས་ལ་མ་ལྟོས་པར་གསར་རྙིང་གི་གཞུང་སོ་སོའི་ཆོས་སྐད་ཕན་ཚུན་མ་འདྲེས་པ་དང༌། རང་གཞན་གྱི་གྲུབ་མཐའི་འཛིན་སྟངས་ཤན་འབྱེད་པ། ཟློས་པའི་སྐྱོན་དང་བྲལ་ཞིང་ཚིག་གི་ཟུར་ཕྱིན་པ། འཛིན་བདེ་ཞིང་གཏིང་ཟབ་པ། གནད་དོན་ཉིད་གསལ་བར་སྟོན་པའི་ཚུལ་ལ་ནམ་ཡང་ཐོགས་པ་མེད། ཞལ་གསུང་རྣམ་ཐར་ལས་ཀྱང༌། བསྡུས་གྲྭའི་རིག་ལམ་ཞིག་སྦྱངས་ན། །རྩོད་པའི་རིགས་པ་སྐྱོན་མེད་ཞིག །འབྱུང་ངམ་སྙམ་ཡང་དགོས་པ་ཆུང༌། །ཞེས་གསུངས་པ་ལྟར་སྔོན་གྱི་བག་ཆགས་ལྟ་བུའི་བསྡུས་ཚད་ཀྱི་རིགས་པ་ལ་ཤིན་ཏུ་མཉེས་ཤིང་བློ་གསལ་དག་མདུན་དུ་ཕྱིན་པ་ཙམ་གྱིས་དེ་ཉིད་གང་ལ་འདྲིས་ཆ་ཆེ་བའི་གཞུང་ལས་བརྩམས་ཏེ་རྩོད་པ་གནང་ཞིང་བརྒལ་བརྟག་མཛད་པ་ཞིག་ཡིན་ལ། དེ་ཡང་ཇི་ལྟར་ཞལ་བཞེས་གནང་བ་ལུང་དང་རིགས་པས་བརྒལ་བརྟགས་ཇི་ཙམ་བྱས་ཀྱང་གཏིང་ཇེ་ཟབ་དང༌། སྒྲུབ་བྱེད་ཀྱི་རིགས་པ་རྣོ་མྱུར་ཐོགས་མེད་དུ་མངའ། སྐབས་རེར་ཐོལ་བྱུང་དུ་གསུང་རབ་དང་བསྟན་བཅོས་ཀྱི་ལུང་འདྲེན་མུ་མཐུད་ཟད་མི་ཤེས་པར་གནང་བས་ཀུན་ཡ་མཚན་གྱི་གནས་ལ་བཀོད་ཅིང༌། དེ་ཡང་བགྲོ་གླེང་གནང་ཡུལ་ཡང་དག་པའི་ལུང་རིགས་ཇི་ཙམ་བཟང་བཞིན་ཐུགས་དགྱེས་པས་ཡང་ཡང་བགྲོ་གླེང་གནང་ཞིང་དེ་ཉིད་ཀྱི་བསྔགས་པ་གཞན་ལའང་བརྗོད་པར་མཛད། རྩོམ་པའི་ཡོན་ཏན་སྐུ་གཞོན་པའི་སྐབས་གསུང་རྩོམ་གནང་སྒོ་དོག་ཙམ་ཡོད་ཀྱང༌། སྐྱབས་རྗེ་རྒྱལ་ཚབ་རིན་པོ་ཆེའི་གསུང་རྩོམ་མང་པོ་གཟིགས་པས་མཁྱེན་རབ་ཀྱི་སྒོ་ཕྱེ་བ་ལྟ་བུར་གྱུར་ནས་རྩོམ་གནས་འགྱུར་བ་ཞིག་བྱུང་བ་ཀུན་གཟིགས་སི་ཏུ་རིན་པོ་ཆེར་རྩོམ་རིགས་གཟིགས་འབུལ་དང་རྒྱུ་མཚན་ཞུས་པས། ངེས་པར་བླ་མའི་བྱིན་རླབས་ཞུགས་ཟེར་བ་དེ་རེད་ཅེས་གསུངས། དོན་དུ་བརྩམ་བྱའི་དོན་གསལ་ལ་རྒྱས་པར་གོ་བ། ཚིག་སྦྱོར་ཉབ་ཉོབ་དང་ཧ་ཅང་མང་བ་མ་ཡིན་པ། རྒྱས་བསྡུས་འཚམས་ཤིང་སྡེབ་ལེགས་པ། རྒྱུན་གྱི་རྩོམ་རྣམས་གོ་སླ་བ་གཙོ་བོར་མཛད་ཅིང་བསྟོད་ཚོགས་སོགས་དཎ1$0000270ཌ1$0000300ི་གཞུང་ལས་དྲངས་པའི་སྙན་ངག་གི་ཉམས་འགྱུར་ཕུན་སུམ་ཚོགས་པས་མཛེས་པར་སྤ་བ། ཐོལ་བྱུང་གི་གསུང་སྐོར་ཡེ་ཤེས་ཀྱི་རྩ་མདུད་གྲོལ་བས་གཞོམ་མེད་རྡོ་རྗེའི་དོ་ཧ་དངོས་སུ་སྣང་ཞེས་མཁས་པ་རྣམས་ཀྱིས་ཡང་ཡང་བསྔགས། མཁྱེན་གཉིས་ཀྱི་གསང་མཛོད་ལ་རང་དབང་ཐོབ་པས་ཆོས་ཐམས་ཅད་གཟིགས་པ་ཙམ་གྱིས་ཟབ་གནད་ཀྱི་དོན་དེ་དང་དེ་ལྟ་བུ་གཞུང་དེའི་སྟོད་སྨད་དེར་བཤད་ཡོད་ཅེས་ཞིབ་པར་བསྩལ་དུ་ཡོད་པས་དབུ་ཞབས་ཡོངས་རྫོགས་ཐུགས་སུ་ཆུད་པའི་ངོ་མཚར་ངེས་པར་མངའ་ཞིང༌། རྣམ་འདྲེན་དམ་པ་རྣམས་ལས་ཆོས་གསན་པ་སོགས་ཀྱི་ཟླ་ཚོད་ཚེས་གྲངས། གསན་པའི་གནས་མཆེད་གྲོགས་སུ་བཞུགས་ཡན་ཆད་ཁུངས་དང་གཏན་ཚིགས་ཤིན་ཏུ་ཞིབ་པར་བཀའ་བསྩལ་བས་ཐེ་ཚོམ་སེལ་བྱེད་ཀྱི་ཐུགས་དྲན་བསྙེལ་མེད་དུ་མངའ། ཕྱག་དཔེ་ཚོལ་དགོས་ཚེ་དཔེ་མཛོད་ཁག་མང་ཤིན་ཏུ་རྒྱ་ཆེའི་ཁྲོད་ནས་དེབ་ཐེར་ལ་གཟིགས་རྟོག་མ་དགོས་པར་ཕྱོགས་འདིའི་སྟོད་སྨད་འདི་ལྟ་བུར་གླེགས་བམ་འདི་འདྲ་ཡོད་ཅེས་དང༌། གླེགས་བམ་སྟོད་སྨད་གང་དུ་ཞལ་ཕྱེས་པ་དེར་གཟིགས་ནས་ཡོད་པ་ལྟ་བུ་རྒྱུན་པར་མཆིས། བརྩེ་བའི་ཐུགས་རྗེ་མཁའ་ཁྱབ་ཏུ་བརྡལ་ཞིང་ཐུགས་བསྐྱེད་དང་ཕྲིན་ལས་ཀྱི་ཟླ་བས་རྩོད་དུས་སྙིགས་མའི་བསྟན་འགྲོའི་རྒུད་པ་མཐའ་དག་སེལ་བའི་སྨན་དུ་སིམ། ནུས་རྩལ་གྱི་དགོངས་པས་གཟིར་བ་ཙམ་གྱིས་དམ་སྲི་རྒྱལ་འགོང་ཚར་བཅད་པ་དང༌། མཐའ་དམག་ཀླ་ཀློའི་ཚ་དབལ་འཇོམས་ཚུལ་ཆ་ཙམ་སྨོས་པས་མཚོན་ནག་ཕྱོགས་འབྱུང་པོ་ཟིལ་གྱིས་གནོན་ཅིང་བདུད་སྡེ་འདུལ་བའི་མཐུ་སྟོབས་ཐོགས་པ་མེད་པ་ཅན་དུ་གྱུར་པའོ། །དེས་ན་འཛམ་གླིང་རྒྱལ་བསྟན་ཡོངས་སུ་རྫོགས་པའི་མངའ་བདག་གངས་ཅན་མགོན་པོ་རྒྱལ་མཆོག་བཅུ་བཞི་པ་ཆེན་པོ་ངག་དབང་བློ་བཟང་བསྟན་འཛིན་རྒྱ་མཚོ་ཐམས་ཅད་མཁྱེན་གཟིགས་མཆོག་གི་ཞལ་སྔ་ནས་ཀྱང༌། འཇམ་དཔལ་རྡོ་རྗེ་གྲུབ་པའི་དྲུག་ཅུའི་དབྱངས། །ཆོས་ཚུལ་རྒྱ་མཚོར་འཁྲོལ་བའི་དཔྱིད་ཀྱི་གླུས། །བློ་ལྡན་བྱེ་བའི་སྙིང་ལ་གྲོས་འདེབས་པའི། །འགྲོ་མགོན་དཔལ་ལྡན་བླ་མར་གསོལ་བ་འདེབས། །ཞེས་བསྔགས་བརྗོད་ཐུན་མིན་དུ་བསྩལ་བར་མཛད་པ་ལྟར། རིས་བྲལ་རྒྱལ་བསྟན་ཡོངས་འདུའི་དགའ་ཚལ་ཆེན་པོར་འདུས་པའི་བསྟན་འཛིན་སྐྱེས་ཆེན་དམ་པ་ཡོངས་གྲགས་རྣམས་དང༌། ཀུན་སྤོང་སྦས་ཚུལ་འཛིན་པ་སོགས་ཁྱད་པར་འཕགས་པའི་སློབ་ཚོགས་གྲངས་ལས་འདས་པའི་དབུས་ནས་ཐུགས་སྲས་མཁས་གྲུབ་གཙོ་ཆེ་བ་ནི་འཇམ་མགོན་གོང་མའི་ཕྲིན་ལས་ཀྱི་ཤིང་རྟ་འདྲེན་པའི་མངའ་བདག་རྗེ་ཉིད་ཀྱི་རིགས་བདག་ཏུ་གྱུར་པ་ཞེ་ཆེན་རྒྱལ་ཚབ་རིན་པོ་ཆེ། མཁན་ཆེན་ཀུན་བཟང་དཔལ་ལྡན་ཆོས་ཀྱི་གྲགས་པ། འཇམ་མགོན་ངག་དབང་ལེགས་པ་གཙོས་ཕལ་ཆེར་ནས་ཟབ་ཆོས་ཀྱི་བདུད་རྩི་དུ་མ་སླར་བཞེས་པ་དང༌། དེ་དག་གིས་ཞབས་བརྟན་དང་གསོལ་འདེབས་སོགས་དོན་ལ་གནས་པའི་བསྟོད་བསྔགས་ཕུལ་བར་མཛད་པའང༌། དུས་གསུམ་རྒྱལ་བ་ཀུན་གྱི་གདུང་འཛིན་ཅིང༌། །ཐེག་གསུམ་ཆོས་ཀྱི་དགའ་སྟོན་འགྱེད་མཁས་པ། །ཁམས་གསུམ་འགྲོ་བའི་འདྲེན་པ་གཅིག་གྱུར་པ། །འཇམ་དབྱངས་ཆོས་ཀྱི་བློ་གྲོས་ཞབས་བརྟན་གསོལ། །ཞེས་སྒ་སྟོན་འཇམ་པའི་དབྱངས་ཀྱིས་ཕུལ་ནས་བླ་སློབ་ཀུན་གྱིས་ཞལ་འདོན་དགོས་པར་ཡང་ཡང་གསུངས་པས་མཚོན་དུ་མ་ཡོད་པ་དང༌། སྐྱེས་ཆེན་དམ་པའི་རིགས་དཔལ་ས་སྐྱའི་ཕོ་བྲང་ཁག་གི་ཁྲི་ཆེན་གཞུང་ཟུར། སྐུ་མཆེད། ཞལ་དའི་རིགས་རྣམས་དང༌། ལྷ་ཁང་མཁན་ཆེན་སོགས། ངོར་ཨེ་ཝཾ་པའི་མཁན་ཞབས་རྣམ་པ། ན་ལེནྡྲའི་གཟིམ་འོག་དང་བཅོ་བརྒྱད་ཁྲི་ཆེན། ཡར་ཀླུང་དབོན་སྤྲུལ་སོགས་དབུས་གཙང་དང༌། རྒྱ་གར་ནུབ་ཕྱོགས་ཁུ་ནུ་བླ་མ་རིན་པོ་ཆེ་བསྟན་འཛིན་རྒྱལ་མཚན། བྲག་ཡབ་གཙང་སར་མཆོག་སྤྲུལ། བླ་མ་འཇམ་དབྱངས་རྒྱལ་མཚན་སྐུ་མཆེད། ས་སྐྱོང་སྡེ་དགེའི་དབུ་བླ་ཆོས་སྡེ་ལྷུན་གྲུབ་སྟེང་གི་ཤར་ནུབ་རྒྱལ་མཚན་བླ་མ། དྲ་སྒང་མཁན་སྤྲུལ། སྡེ་གཞུང་མཆོག་སྤྲུལ་རྣམ་གཉིས། དབོན་སྟོད་མཁན་མཁྱེན་རབ། དགེ་བའི་བཤེས་གཉེན་ཆོས་འཕེལ་རབ་རྒྱས། མདོ་སྲིབ་མཁན་ཐུབ་བསྟན། མཁར་མདོ་དགོན་གྱི་སྤྲུལ་སྐུ་དང་ཆོས་རྗེ་སོགས་སྡེ་དགེའི་མངའ་ཁུལ་གྱི་སྡེ་སྣོད་འཛིན་པ་རྣམས་དང༌། ཨ་མདོ་རྡིའུ་ཆོས་རྗེ། དཔེ་ཝར་སྤྲུལ་སྐུ་སོགས་རྒྱུད་སྡེའི་ཉམས་བཞེས་འཆད་སྤེལ་ནུས་པའི་རྡོ་རྗེ་འཛིན་པ་གྲངས་མང་བཅས་ས་སྐྱ་པ། སྐུ་ཞབས་སི་ཏུ་པདྨ་དབང་ཆེན་ཡབ་སྲས། རྒྱལ་སྲས་འཇམ་མགོན་མཆོག་སྤྲུལ། དབོན་རྒན་ཡང་སྲིད་རིན་པོ་ཆེ། སྒ་སྟོད། ཟུར་མང༌། ཕྱི་འབྲོག །ནང་ཆེན་སོགས་ཀྱི་ཀར་དགོན་གྲངས་མང་གི་སྤྲུལ་སྐུ་དང་བླ་མ། འབྲུག་ཆེན་རིན་པོ་ཆེ། ཡོངས་འཛིན་སྤྲུལ་སྐུ། མདོ་ཁམས་བརྒྱད་པ། ལྡིང་ཆེའི་ཅོག་གྲྭ་སྤྲུལ་སྐུ་སོགས་བཀའ་བརྒྱུད་ཆེ་བཞི་ཆུང་བརྒྱད། སྨིན་གླིང་མཁན་གཅུང་རྣམ་གཉིས་དང་གདུང་སྲས་སྐུ་མཆེད། རྡོར་བྲག་རིག་འཛིན་ཆེན་པོ། མཁར་ཆུའི་ནམ་སྙིང་སྤྲུལ་སྐུ། མདོ་ཁམས་རྫོགས་ཆེན་དྲུག་པ་རིན་པོ་ཆེ། སྐུ་ཞབས་དགེ་མང་མཆོག་སྤྲུལ། སྤྲུལ་སྐུ་དྲི་མེད་འོད་ཟེར། རྫོགས་ཆེན་མཁྱེན་བརྩེ། ཞེ་ཆེན་རབ་འབྱམས་དྲུག་པ། རྒྱལ་ཚབ་བཞི་པ། ཀོང་སྤྲུལ་རིན་པོ་ཆེ། གུས་ཕྲན་བཅས། ཀཿཐོག་སི་ཏུ་མཆོག་སྤྲུལ་རིན་པོ་ཆེ། གྲ་ལག་ཕྱག་ཚ་སོགས་གསེར་ཁྲི་ཁག་གི་སྤྲུལ་སྐུ་རྣམ་པ། དཔལ་ཡུལ་གཟིམ་འགག་མཆོག་སྤྲུལ། ར་སྤྲུལ་རིན་པོ་ཆེ། རྨུགས་སངས་སྤྲུལ་སྐུ། ཨ་འཛོམ་སྲས་སྐུ་མཆེད། གཏེར་སྟོན་ལས་རབ་གླིང་པ་དང་དྲི་མེད། གྲུ་གུ་རྟོགས་ལྡན་བཅས་ཀྱི་སྲས་སྤྲུལ་རིགས། མཆོག་གླིང་སྤྲུལ་སྐུ་རྣམ་པ་གཉིས། འབྲི་གཏེར་འོད་གསལ་རྡོ་རྗེ་སོགས་རྙིང་མའི་ཕྱོགས། མཁས་དབང་དགེ་བཤེས་འཇམ་དཔལ་རོལ་པའི་བློ་གྲོས་ཀྱིས་ཆབ་མདོ་འཇིགས་བྱེད་ལྷ་ཁང་དུ་རྗེ་བླ་མ་ཉིད་བོད་ཡུལ་ཤིང་རྟ་ཆེན་པོ་བརྒྱད་ཀྱི་བསྟན་པའི་མངའ་བདག་ཏུ་བསྔགས་པའི་ཞབས་བརྟན་གསོལ་འདེབས་བཅས་སྐུ་ཚེའི་བརྟན་བཞུགས་འབུལ་བ་དང་དད་གུས་བསྔགས་བརྗོད་ཆེ་བར་མཛད་ཅིང་ཞབས་སུ་བསྙེན། ཀུན་གླིང་རྟ་ཚག་རྗེ་དྲུང་རིན་པོ་ཆེ། མི་ཉག་སྐྱིད་གླིང་སྐྱབས་མགོན། ཏྲེ་ཧོར་དགེ་རྟག་མཆོག་སྤྲུལ། གོ་འཇོ་འགྲོ་འདྲེན་སྤྲུལ་སྐུ་སོགས་དགེ་ལུགས་ཕྱོགས་ཀྱིས་མཚོན་གྲུབ་མཐའ་རིས་མེད་པའི་ཞལ་སློབ་དོན་གཉིས་ནུས་པ་ཤིན་ཏུ་མང་ནའང་འདིར་ས་བོན་ཙམ་དུ་བསྡུས་པ་ལགས། བོད་ཀྱི་མི་ཆེན་བཀའ་མདའ་རྩིས་གསུམ་ཕལ་ཆེར། སྡེ་དགེ་ཆོས་རྒྱལ་ཆེན་པོ། གླིང་རྒྱལ། སྒོམ་སྡེ་ནང་ཆེན་བཅས་ཀྱི་རྒྱལ་བཙུན་སྲས་བློན་རིགས། རི་ཆེ། ཆབ་མདོ། བྲག་ཡབ། སྨར་ཁམས། གོ་འཇོ། ཉག་རོང༌། ཏྲེ་བོ། མི་ཉག །རྒྱལ་རོང༌། མགོ་ལོག །ཨ་མདོ་ཡན་གྱི་དཔོན་རིགས། འབྲས་ལྗོངས་ཆོས་རྒྱལ། ལྷ་སྡེ་མི་སྡེའི་གཙོ་འཛིན་སོགས་མདོར་ན་ཕྱི་དུས་འདིར་ཁམས་བོད་དབུས་གཙང་རྒྱ་དཀར་ནག་གི་ཁྱོན་ན་མཆིས་སོ་ཅོག་གི་བསྟན་འཛིན་སྐྱེས་ཆེན་དམ་པ། དད་བློ་གཏོང་བའི་མིག་ཡངས་བསྟན་པའི་སྦྱིན་བདག །རི་ཁྲོད་ཀྱི་སྒྲུབ་བརྩོན་པ་སོགས་ཀྱིས་མཚོན་དངོས་དང་བརྒྱུད་ནས་ཟབ་ཆོས་ཀྱི་བཀའ་དྲིན་ཐོབ་པ་སྨོས་ཀྱིས་མི་ལང་བར་བཞུགས་པས་དོན་གཉིས་ཀྱི་ཕྲིན་ལས་རྒྱ་ཆེར་བསྐྱངས་དང་སྐྱོང་བཞིན་པ་ལགས་སོ། །དྲུག་པ་ཞར་བྱུང་བསོད་ནམས་ཀྱི་ཚོགས་བསགས་སྒོ་དུ་མ་ནས་རྒྱ་ཆེར་སྒྲུབ་པའི་ཚུལ་ནི། དམ་པའི་སྐྱེས་ཆེན་དག་གི་ཕྱག་བཞེས་ཀྱི་གཙོ་བོ་བཤད་སྒྲུབ་ཀྱི་བསྟན་པའི་རྒྱུན་སྐྱོང་བ་ཉིད་ཡིན་ཀྱང༌། ཞར་བྱུང་དགེ་འདུན་གྱི་གནས་གཞི་འདིང་པ། གཙུག་ལག་ཁང་དང་རྟེན་གསུམ་གསར་བཞེངས། དེ་དག་ལ་མཆོད་འབུལ། ཡུལ་དམ་པ་ལ་བསྙེན་བསྐུར་དང༌། དམན་པ་ལ་སྦྱིན་གཏོང་སོགས་བྱ་བ་ལས་ཀྱི་འཁོར་ལོས་རྒྱལ་བསྟན་རིན་པོ་ཆེའི་མངའ་ཐང་སྤེལ་བའང་སངས་རྒྱས་གཉིས་པ་ཀླུ་སྒྲུབ་ཀྱི་རྣམ་ཐར་ལས་འབྱུང་བ་བཞིན། རྗེ་བླ་མ་མཆོག་འདིས་སྤོང་ཀློག་གཉིས་དང་བྱ་བ་ལས་ཀྱི་འཁོར་ལོ་གཅིག་གིས་གཅིག་གོ་མ་བཀག་པར་ཐམས་ཅད་སྒོ་ཀུན་ནས་ལྷུན་གྲུབ་ཏུ་གནང་བར་མཛད་པ་སྟེ། དེ་ལ་བྱ་བ་ལས་ཀྱི་འཁོར་ལོའི་གཙོ་བོ་དམ་པའི་ཆོས་འཆད་སྤེལ་གནང་ཚུལ་རགས་རིམ་སྨོས་མ་ཐག་པ་ལྟར་དང༌། འདིར་ཐུན་མོང་གི་བྱ་བ་ལས་ཀྱི་འཁོར་ལོའི་ཕྱག་རྗེས་གནང་ཚུལ་ཡང་སྐུ་ཚེའི་སྟོད་ཕྲིན་ལས་ཆེར་མ་རྒྱས་པའི་སྐབས་འདི་རིགས་གནང་དཀའ་ཙམ་བྱུང་རུང་ཞུམ་པ་མེད་པའི་ཐུགས་སྟོབས་ཀྱིས་ཐུགས་བཞེད་གང་ཡོད་ཐད་ཀར་གནང་ཞིང༌། དབྱར་དགུན་སྡོམ་སྐོར་ཐེངས་འགར་ཕེབས་རྗེས། ཇི་སྐད་དུ། མེ་ཏོག་དྲི་ནི་རྫི་ཕྱོགས་མིན་མི་འགྲོ། །རྩ་བརྒྱ་སྤོས་སམ་ཙནྡན་ཡང་མ་ཡིན། །དམ་པའི་དྲི་ནི་རྫི་ཕྱོགས་མི་འགྲོ་སྟེ། །ཕྱོགས་རྣམས་ཀུན་ཏུ་མི་མཆོག་དྲི་ཡིས་ཁྱབ། །ཅེས་པ་ལྟར་རིམ་གྱིས་དམ་པའི་ཡོན་ཏན་གྱི་གྲགས་སྙན་མ་ལ་ཡ་རླུང་གིས་ཕྱོགས་མཐར་ཁྱབ་པས་བགྲང་ལས་འདས་པའི་མཆོག་ཕལ་དད་འདུས་རྣམས་ནས་འབྱོར་འཁོས་ཀྱི་མཆོད་སྤྲིན་སྐྱབས་ཞུས་བསྔོ་རྟེན་བར་མེད་བྱུང་བ་ཐམས་ཅད་གནས་མིན་ཆུད་ཟོས་སུ་མ་སོང་བར་རྟེན་བཞེངས་དང་མཆོད་སྦྱིན་སོགས་གཏོང་བ་ནམ་མཁའ་མཛོད་ཀྱི་སྒོ་གཏན་པ་མེད་པར་དབྱེ་བར་མཛད་པའི་གཙོ་བོ་བསྡུས་ཙམ་སྨོས་ན། དེའང་རྗེ་བླ་མ་ཉིད་རྫོང་སར་དུ་བཞུགས་ནས་ལོ་ཤས་སོང་བ་ན་ཀུན་གཟིགས་སི་ཏུ་རིན་པོ་ཆེས་གསུང་འཕྲོས་སུ། ཁྱེད་རང་འཇམ་མགོན་རིན་པོ་ཆེས་མཁྱེན་བརྩེའི་ཕྲིན་ལས་ཀྱི་སྤྲུལ་པར་ངོས་འཛིན་གནང་བའི་རྟེན་འབྲེལ་གྱིས་ཀཿཐོག་པའི་བསྟན་པ་སྤྱི་དང༌། ཁྱད་པར་རྒྱུད་སྡེའི་བཤད་གྲྭ་དང་རྟེན་བཞེངས་སྐོར་ཕྲན་ལ་ཕན་ཐོག་ཡོང་དགོས་པ་ཡིན་ནའང་སྐལ་བཟང་རྡོ་རྗེའི་ཁ་ཆེམས་བཞིན་འདིར་བཞག་དགོས་བྱུང་སོང༌། ད་ནི་ཁོ་རང་ཚོར་འདོད་བབས་ཡོད་མེད་སྣ་ཚོགས་འདི་ལྟར་ལ། སླར་ཀཿཐོག་ཏུ་བཞུགས་དགོས་ཚུལ་ཕེབས་པར་ཞུ་ལན་དུ། གུས་པ་འདིར་སྡོད་རྒྱུར་མིང་བཏགས་ཚར་དུས་གདན་ས་འདི་ལ་ཞབས་ཕྱི་ཅུང་ཟད་འགྲུབ་རེ་ཆེ་ཞིང༌། ཀཿབསྟན་ལ་རིན་པོ་ཆེ་རང་བཞུགས་པ་འདི་ལྷག་སུས་ཀྱང་ཅི་ཐོན་མེད་ངེས། ནམ་ཞིག་དགོས་གལ་བྱུང་ཚེ་ལོ་བཅུ་གཉིས་རིང་གུས་ནས་འགན་ཧྲིལ་ལེན་གྱི་ཞབས་ཕྱི་ཞུ་ངེས་གཏན་ཡིན་ཚུལ་ཞུས་པ་ན། སི་ཏུ་རིན་པོ་ཆེ་རྗེ་བླ་མར་སྤྱན་ཅེར་གྱིས་ཡུན་རིང་ཙམ་གཟིགས་མཐར་ཨ་ཙི་དེ་ལས་ལྷག་ཞིག་ཅི་བྱེད། ད་ནི་ཁྱེད་རང་ཟེར་བ་ལྟར་གྱིས་དང་ཕྲན་གྱི་བསམ་པའང་དེས་རྫོགས་པར་འདུག་ཅེས་ཤིན་ཏུ་དགྱེས་བརྩེས་བཀའ་འཕྲོས་ཞིབ་ཏུ་ཕེབས་པའི་དགོངས་དོན་བཞིན། ཐོག་མར་སྔ་འགྱུར་བསྟན་པའི་འབྱུང་གནས་དཔལ་ཀཿཐོག་རྡོ་རྗེ་གདན་དུ་ཀུན་གཟིགས་སི་ཏུ་རིན་པོ་ཆེས་གསར་བཞེངས་རྒྱུད་སྡེའི་བཤད་གྲྭ་ཐུབ་བསྟན་ནོར་བུའི་ལྷུན་པོའི་སྤྱི་རྐང་གཏན་མེད་གྱུར་པ་གཞིར་བཞེངས་ཀྱི་ཉམས་གསོ་ཞལ་གྲངས་སྔར་ཡོད་སྟེང་གསུམ་འཕར་བས་མཁན་སློབ་བཞི་བཅུ་ཞེ་ལྔའི་གྲངས། ཟངས་མདོག་དཔལ་རིའི་ཞིང་བཀོད་བློས་བསླངས་མཇུག་སྐྱོང་བཅས་ལ་གཙོ་བོར་རྗེ་ཉིད་ཀྱི་ཕྱག་རྫས་བཏང༌། དགོན་གཞུང་གི་མི་ཆེན་བསྐོ་བཞག་གི་སྲོལ་བཙུགས་པས་ཀུན་གྱིས་བསྔགས་འོས་ཕྱི་མཐའ་གཟིགས་པ་ལྟ་བུའི་ལེགས་ལམ་ཆེར་བྱུང༌། ཁྱད་པར་རྗེ་ཉིད་ནས་ཐོག་མཐའ་བར་གསུམ་ཕྱག་འདོན་གྱིས་ཐུབ་ཆེན་ལྷ་ཁང་སུམ་ཐོག་ཁང་བརྩེགས་མཆོད་རྟེན་གྱི་བཟོ་དབྱིབས་ཆེ་ལེགས་ནང་རྟེན་གཙོ་གསེར་ཟངས་ཀྱི་སྟོན་པའི་སྐུ་ཐོག་སོ་གསུམ་པ་རྒྱུ་ཚད་བཟོ་དབྱིབས་ནང་གཞུག་བཅས་འགྲན་ཟླས་དབེན་པ། འཁོར་སྨན་འདམ་གྱི་གནས་བརྟན་བཅུ་དྲུག་རྒྱལ་ཆེན་བཞི་བཅས་ཐོག་ཚད་རེ། ལོགས་བྲིས་སོགས་ཁྱད་པར་འཕགས་པ། སྟེང་དུ་ཟངས་གསེར་གྱི་གཉྫི་ར་བཅས། རྗེ་བླ་མ་རང་གི་གཟིམ་ཆུང་གསེར་ཁང་གདོང་དུ་ལྷ་ཁང་དང་རྟེན་གསུམ་མང་དུ་བཞུགས་ཀྱང་ངེས་ཏིག་མ་ཤེས། ཆོས་སྡེ་ཆེན་པོ་འདི་ལས་གྱེས་པའི་ཕྱོགས་མཐའི་དགོན་ལག་རྣམས་སུའང་རྟེན་གསུམ་དང་བཤད་སྒྲུབ་ཀྱི་སྡེ་གསར་བཞེངས་ལ་མཐུན་སྦྱོར་བཅས་སྔ་ཕྱི་ལོ་ངོ་བཅུ་བཞིའི་རིང་ཀཿཐོག་པའི་བསྟན་སྲིད་ཀྱི་འགན་བཞེས་གནང་ཞིང༌། ཀུན་གཟིགས་སི་ཏུའི་མཆོག་སྤྲུལ་རྫོགས་ཆེན་ལྔ་པ་རིན་པོ་ཆེ་ཐུབ་བསྟན་ཆོས་ཀྱི་རྡོ་རྗེས་ངོས་འཛིན་གནང་བ་རྩད་གཅོད་ཁྲི་འདོན་མངའ་གསོལ་དང༌། རྨོག་རྩ་སྤྲུལ་པའི་སྐུ། རྗེ་དབོན་མཆོག་སྤྲུལ། དྲི་མེད་ཞིང་སྐྱོང་གི་ཡང་སྲིད་སོགས་རྗེ་ཉིད་ནས་ངོས་འཛིན་དང་ཁྲིར་བཀོད་གནང་ནས་སྨིན་གྲོལ་གདམས་ཟབ་རྒྱ་མཚོ་ལྟ་བུས་ལུང་རྟོགས་ཆོས་ཀྱི་མཛོད་ཆེན་གཉེར་དུ་གཏད་པར་མཛད། མདོར་ན་སྐུ་ཚེ་ཞི་བར་གཤེགས་ཀྱི་བར་དུ་དངོས་དང་བརྒྱུད་ནས་གཟིགས་སྐྱོང་ཡང་ཡང་གནང་བས་ཀཿཐོག་པའི་བསྟན་པ་ལ་གཅིག་ཏུ་བཀའ་དྲིན་ཆེ། རུ་དམ་རྫོགས་ཆེན་པའི་གཙུག་ལག་མེས་འཇིག་སྐབས་ཉམས་གསོའི་ཆ་རྐྱེན་ཅི་རིགས་དང༌། གུ་རུ་མཚན་བརྒྱད་གཙོ་བོར་བཞུགས་པའི་རྣམ་ཐར་པདྨ་བཀའ་ཐང་གི་བཀོད་པ་ཐང་ཤར་དགུ་ལ་བཟང་གོས་ཀྱི་གོང་ཤམ་ཅན་དང་རོལ་སིལ་སོགས་གཏན་འཇོག་མང་དུ་གནང༌། ཞེ་ཆེན་དུ་རྒྱལ་ཚབ་རིན་པོ་ཆེས་མི་ཕམ་གསུང་སྐོར། དེ་རྗེས་ཀོང་སྤྲུལ་དང་རྗེ་དབོན་དགེ་ལེགས་རྒྱ་མཚོ་ཟུང་ནས་རྒྱལ་ཚབ་གསུང་འབུམ་བཅས་སྤར་དུ་བསྐྲུན་པར་དབུ་འདོན་མཐུན་རྐྱེན་དང་ཞལ་འདེབས་ཡང་ཡང་གནང༌། བཤད་གྲྭ་གསར་འཛུགས་ལ་བསླབ་སྟོན་དང༌། རྒྱལ་ཚབ་རིན་པོ་ཆེའི་མཆོག་སྤྲུལ་ངོས་བཟུང་ནས་ཆོས་ཀྱི་ཁྲི་ལ་བཀོད་པ་སོགས་ཆོས་སྡེ་འདིར་བཀའ་དྲིན་རྒྱ་ཆེར་གནང༌། གཏེར་ཆེན་མཆོག་གྱུར་གླིང་པའི་གདན་ས་གནས་བརྟན་དགོན་དུ་རི་ནང་དཔོན་ཁག་ལ་ཆེད་དུ་བཀའ་ཆབ་དང་འབྲེལ་བཤད་གྲྭ་ཉི་ཤུ་རྩ་ལྔ་གསར་འཛུགས་ལ་ཀཿཐོག་མཁན་པོ་ཚུལ་ཁྲིམས་ཉི་མ་དང་མཁས་དབང་ཁང་དམར་རིན་ཆེན་སོགས་སྔ་རྗེས་ཆེད་བཏང་གཞུང་ཆེན་རྩ་འགྲེལ་གྱི་ཕྱག་དཔེ་གནང་བ་སོགས་གཟིགས་སྐྱོང་མཐིལ་ཕྱིན་པ། མཆོག་སྤྲུལ་རིན་པོ་ཆེ་ངོས་འཛིན་ཁྲིར་བཀོད་དང་སྨིན་གྲོལ་གདམས་ཟབ་རྒྱ་ཆེར་བསྩལ། དེ་བཞིན་རྩི་ཀེའི་གདན་ས་ལའང་ཐུགས་བསྐྱེད་ཆེར་གནང་བ་སོགས་ཆོས་བརྒྱུད་འདི་འཛིན་པ་རྣམས་རྗེ་མཁྱེན་བརྩེ་སྐུ་གོང་འོག་གི་བཀའ་དྲིན་གྱིས་ངལ་འཚོ་བ་ཁོ་ནའོ། །བཀའ་བརྒྱུད་ཕྱོགས་སྡེ་དགེ་ཕྱི་འབྲོག་དང་ནང་ཆེན་ཁུལ་གྱི་དགོན་སྡེ་ཆེ་ཕྲ་ཕལ་ཆེར་ལའང་བཤད་སྒྲུབ་གསར་འཛུགས་ཀྱི་མཐུན་རྐྱེན་ཞལ་འདེབས་དང་མཁན་པོ་བཏང་བ་སོགས་མང་དུ་མཛད། ཆོས་རྒྱལ་སྡེ་དགེས་སྔོན་དུ་སྦྱོར་འཇགས་གནང་ཡང་ཕྱིས་ཉམས་ཆག་གྱུར་པ་དྲྭ་སྒང་སྒྲུབ་སྡེ་གསར་དུ་བཞེངས་ནས་སྒྲུབ་གྲྭ་ལྔ་བཅུ་ཐམ་པ་ཇི་སྲིད་བསྟན་པ་གནས་ཀྱི་བར་དུ་བཞུགས་པའི་ཕོགས་ཐེབས་འབྲི་བརྒྱ་ལྷག་དང་དངུལ་རྡིལ་ཚད་སུམ་ཅུ་སྐོར་གྱི་རྟེན་རྩ་དང༌། གསུང་ངག་རིན་པོ་ཆེ་ལམ་འབྲས་ཀྱི་ཉམས་བཞེས་གཙོ་བོར་གྱུར་པའི་དཔལ་ལྡན་ས་སྐྱའི་སྙན་བརྒྱུད་ཚད་མ་བཞི་ལྡན་ཉམས་སུ་ལེན་པའི་སྒྲུབ་སྡེ་ཁྱད་འཕགས། རྫོང་སར་དུ་འཇམ་དབྱངས་མཁྱེན་བརྩེའི་དབང་པོས་བོད་ཁམས་བསྟན་འགྲོར་ཕན་བདེའི་བཙས་སུ་དཔལ་བསམ་ཡས་ཀྱི་གཙུག་ལག་ཁང་གཉིས་པའི་རྣམ་ཐར་བཞེངས་པའི་དགོངས་བཞེད་བཞིན་ཀུན་གཟིགས་བློ་གྲོས་མཐའ་ཡས་ཀྱིས་ས་མིག་ཆེད་བཙལ་གནང་བའི་ཁམས་ཀྱི་བྱེ་མ་ཐང་རིགས་གསུམ་སྤྲུལ་པའི་ལྷ་ཁང་ཐུབ་བསྟན་བཤད་སྒྲུབ་དར་རྒྱས་གླིང་དུ་བློ་གསལ་དགེ་འདུན་ལྔ་བཅུ་ཐམ་པར་གསོལ་ཕོགས་མཆོད་ཐེབས་རྒྱས་འདང་གི་རྟེན་རྩ་སྦྱོར་འཇགས་དང༌། དེ་དག་བཞུགས་ཤག་མདོ་སྦུག །མཆོད་ཁང་རེ་རེ་བཞིན་ཐུབ་དབང་གནས་བརྟན་བཅུ་དྲུག་རྒྱལ་ཆེན་ཧ་ཤང་བཅས་ཀྱི་སྣང་བརྙན་བྲག་རིའི་ཡུལ་བཀོད་མཛེས་པ་མཆོད་ཏིང་བདུན་ཚར་རེ་བཅས། དགེ་འདུན་པ་རྣམས་ཀུན་སྤྱོད་གཙང་ལ་དག་པ་འདུལ་བ་དང་མཐུན་པའི་ཕྱག་བཞེས་ལྷུར་ལེན་པས་ཐོས་བསམ་གྱི་བྱ་བས་དུས་འདའ་བའི་བཅའ་བསྒྲིགས་བཅས་ཉིན་བཞིན་སྔ་དྲོ་རྒྱུན་ཆགས་གསུམ་པ་དང༌། དགོང་མོ་གཏོར་བསྔོ་བསྡུས་ཙམ་རེ། རྒྱལ་བའི་དུས་ཆེན་བཞི་དང༌། གསར་རྙིང་རིས་མེད་པའི་བསྟན་འཛིན་སྐྱེས་ཆེན་གཙོ་ཆེ་བ་རྣམས་ཀྱི་སྐུ་མཆོད་དུ་དགོང་མོར་ཕྱི་ནས་སྣང་གསལ་གྱི་ཕྲེང་བ་བཅས་གླིང་མཆོད་འབུལ་བའི་སྲོལ་བཟང་ངོ་མཚར་དང་བ་འདྲེན་པའི་རྒྱུན་བཙུགས་པ་ལ། མཁན་ཐོག་དང་པོ་ཀུན་གཟིགས་སི་ཏུ་རིན་པོ་ཆེའི་བཀའ་ལྟར་མཁས་བཙུན་བཟང་པོའི་ཡོན་ཏན་གྱིས་མཛེས་པའི་མཁན་ཆེན་གཞན་ཕན་བྱམས་པའི་གོ་ཆ་ཆེད་དུ་གདན་གྲངས་ནས་ལོ་གསུམ་བཞུགས་རིང་འདུལ་མངོན། དབུ་མ་རིགས་ཚོགས། བཞི་བརྒྱ་པ་དང་འཇུག་པ། བྱམས་ཆོས་ལྔ་དང་སྤྱོད་འཇུག་བཅས་གཞུང་ཆེན་རྣམས་རྒྱ་འགྲེལ་ལྟར་འཆད་པའི་རྒྱུན་བཙུགས་ཤིང༌། མཁན་ཆེན་བླ་མ་མཆོག་གི་ཕྲིན་ལས་ཆེས་ཆེར་རྒྱས་པར་གྱུར། རིམ་གྱིས་དེ་དག་གི་སྟེང་དུ་ཚད་མ་རྣམ་འགྲེལ། རིགས་གཏེར་སོགས་དང༌། མཁན་ཆེན་འཇམ་དབྱངས་རྒྱལ་མཚན་དང་ལྷན་རྒྱས། ཀྱིས་ཀུན་མཁྱེན་གོ་རམས་པ་བསོད་ནམས་སེང་གེའི་གཞུང་བཤད་མཁས་དབང་དེའི་བཞེད་སྲོལ་ལྟར་འཆད་པར་མཛད་ལ། དབུས་གཙང༌། འབྲུག་ཡུལ། མདོ་ཁམས་ཤར་ལྷོའི་ས་རྙིང་བཀའ་དགེ་གཙོར་གྱུར་རིས་མེད་པའི་དགེ་འདུན་བརྒྱ་ཕྲག་ལྷག་བཞུགས་ནང་ནས་གཞུང་དེ་དག་འཆད་སྤེལ་ནུས་པའི་སྡེ་སྣོད་འཛིན་པ་མང་ཞིག་ཐོན་པ་སོགས་ཤིན་ཏུ་འཕེལ་རྒྱས་སུ་གྱུར་པར་བརྟེན། མདོ་ཁམས་སྟོད་སྨད་ཀྱི་ཆོས་སྡེ་ཆེ་ཕྲ་མང་པོར་བཤད་གྲྭ་རྒྱུན་འཛུགས་འཕེལ་རྒྱས་ཀྱིས་ཁམས་དབུས་ཀུན་ཏུ་བཤད་པའི་སྡེ་རྒྱ་ཆེར་འཕེལ་བའི་བདག་རྐྱེན་དུ་གྱུར། ཕྱིས་གནས་དེར་གཙུག་ལག་ཁང་ཆེས་ཆེ་བ་གསར་བསྐྲུན་གྱི་རྟེན་གཙོ་མགོན་པོ་མ་ཕམ་པའི་སྣང་བརྙན་ཐོག་ཚད་ལྔ་པ་གསེར་ཟངས་ལས་གྲུབ་པ་ཕྲ་རྒྱན་དང་བཟོ་ཁྱད་ཀྱི་བཀོད་པ་འགྲན་ཟླས་དབེན་པའི་ནང་གཞུག་རིང་བསྲེལ་རྣམ་བཞིས་ཕྱུར་བུར་བཀང་བའི་བྱིན་ལྡན་སེང་ཁྲི་རྒྱབ་ཡོལ་རྒྱན་དྲུག་བཅས། ལོགས་རིས་སུ་གསར་རྙིང་སྡོམ་གསུམ་བླ་བརྒྱུད་དང་གངས་ཅན་བསྟན་པའི་སྲོལ་འབྱེད་ཉེར་ལྔ། ཡི་དམ་དང་ཆོས་སྐྱོང་བཅས་བྲིས་བཀོད་ཕུན་སུམ་ཚོགས་པ། བཟང་གོས་ཀྱི་གནམ་རྒྱན་དང་ཀ་འཕན། སྟེང་དུ་གསེར་ཟངས་ཀྱི་གཉྫི་ར། སྐུ་གོང་མའི་དགོངས་བཞེད་རྫོང་སར་དབུ་རྩེའི་ལྷ་ཁང་ཞབས་མར་རྟེན་གཙོ་གསེར་ཟངས་ལས་གྲུབ་པའི་འཇམ་པའི་དབྱངས་ཀྱི་སྐུ་བཞུགས་ཁྲི་རྒྱབ་ཡོལ་ཕྲ་རྒྱན་བཟོ་བཀོད་ཕུན་སུམ་ཚོགས་པ། འཁོར་གུ་རུ་རྒྱ་གར་མ། ཇོ་བོ་རྗེ། གོང་མ་རྣམ་ལྔ། ངོར་ཆེན་བཅས་གསེར་ཟངས་ལས་ཤིན་ཏུ་བྱོན་ལེགས། སོ་སོར་བཞུགས་ཁྲི་རྒྱབ་ཡོལ་རིན་པོ་ཆེ་སྣ་ཚོགས་ཀྱི་ཕྲ་རྒྱན། གཞན་ཡང་གནས་བཅུ། སྒྲོལ་མ་ཉེར་གཅིག་སོགས་སྐུ་བརྙན་གྲངས་མང༌། གསུང་རྟེན་རྒྱལ་བཀའ་རིན་པོ་ཆེ། བསྟན་བཅོས་འགྱུར་རོ་འཚལ་བཅས། ཐུགས་རྟེན་ཟངས་གསེར་གྱི་དུས་འཁོར་ཡེ་ཤེས་མཆོད་རྟེན་ཐོག་ཚད་བཟོ་བཀོད་ཕྲ་རྒྱན་སོགས་ཕུན་སུམ་ཚོགས་པ། ཆོས་སྐྱོང་རྟེན་བྲིས་སྐུའི་ཆོ་ག་མན་ངག་བཞིན་གཞུང་མཐུན་གནང་བའི་མགོན་པོ་ལྕམ་དྲལ་ཐང་ཆེན་ཐོག་ཚད་བཅས་ཀྱིས་མཚོན་རྟེན་གསུམ་གྲངས་མང་གི་ལྷ་ཁང་དེའི་ཀ་བ་བཞུགས་ཁྲིའི་དྲྭ་མིག་ཤིང་ལོ་པ་ཏྲ་བྱ་འབྲུག་སོགས་ཤིང་བརྐོས་ཤིན་ཏུ་སྒྲོས་གཙང་ལ་གསེར་རིས་ཚོན་དབྱེས་ལྡན་པ། བཟང་གོས་གསེར་མ་ཤས་ཆེ་བའི་གནམ་རྒྱན་ཀ་འཕན་བཅས། ཕྱིས་དེ་དང་འདབས་འབྱོར་བའི་གཟིམ་ཆུང་ཤར་ནུབ་དབུས་གསུམ་བཀོད་མཛེས་ཐོག་རྩག་བཞི་པ་གསར་བཞེངས་ཆེ་ལེགས་སྤུས་དག་བཅས། བཀྲ་ཤིས་འཆི་མེད་གྲུབ་པའི་དགའ་ཚལ་གྱི་གཟིམ་ཆུང་དབང་ཁང་དུ་འཕགས་མའི་སྙིང་ཐིག་གི་གཙོ་བོ་ཛི་ཀྵིཾ་དང༌། དཀྱིལ་འཁོར་ལྷ་དང་རིག་འཛིན་རྣམ་གསུམ་གྱི་སྐུ་བརྙན་གསེར་ཟངས། ཛི་ཀྵིཾ་གྱི་དཔལ་དུས་ཀྱི་འཁོར་ལོ་མདའ་ཚད། གསེར་ཟངས་ཀྱི་སྒྲོལ་མ་ཉེར་གཅིག །བདེ་གཤེགས་སོ་ལྔ། གསང་བདེ་འཇིགས་གསུམ་ཀྱེ་རྡོར་སོགས་ཡི་དམ་རིགས། མགོན་པོ་ཕྱག་བཞི་དྲུག་སོགས་ཆོས་སྐྱོང་རིགས་བཅས་ལི་སྐུ་ཤས་ཆེ་བ། དྲྭ་མིག་རྣམས་ཤིང་བརྐོས་གཟབ་སྤྲོས། ལོགས་གཅིག་ཏུ་རྒྱ་བཟོས་སྐུ་ཁང་སྒྲོས་གཙང་དུ་གཤིན་རྗེ་དགྲ་ནག་གི་ལི་སྐུ་ཁྲུ་ཚད་ལྷག །སངས་རྒྱས་འོད་སྲུང་ལི་སྐུ་ཁྱད་འཕགས། སྟོན་པའི་སྐུ་ཤར་ལི། སྟོན་པ་དང་སྒྲོལ་མའི་སྐུ་གཏེར་བྱོན། སངས་གླིང་གཏེར་བྱོན་གུ་རུའི་སྐུ་ཚབ། ནཱ་རོ་མཁའ་སྤྱོད་དང་འཇིགས་བྱེད་བཅས་སོ་སོར་གསེར་དངུལ་བཀྲ་བའི་གྭའུ་རེ་བཅས། ཕག་གྲུའི་སྐུ་དང༌། ཚོང་དཔོན་དགེ་ལེགས་སུ་གྲགས་པའི་རྗེའི་སྐུ་བརྙན། སྨིན་གླིང་གཏེར་ཆེན་རིན་པོ་ཆེའི་སྐུ་ཛི་ཀྵིཾ་སོགས། རྡོ་རྗེ་འཆང༌། ཚེ་དཔག་མེད། ས་ར་ཧ། བི་རཱུ་པ། གུ་རུ་ཧེ་རུ་ཀའི་ཆས་སོགས་སྐུ་བརྙན་སྣ་ཚོགས་བཞུགས་པའི་དྲྭ་མིག་གིས་མཚོན་རྟེན་གསུམ་ཤིན་ཏུ་མང་བར་བཞུགས། དེའི་གཡས་ཟུར་དུ་གཟིམ་ཆུང་གསར་པ་མཆོད་ཁང་གཉིས་དང་ཚོམ་ཆེན་བཅས་ཐོག་སོ་གསུམ་པའི་མཆོད་ཁང་ཤར་མར་རྟེན་གཙོ་ཐུབ་དབང་སྐུ་ཏ་མིང་ལི་མ་ཆེ་ལེགས་ལ། འཁོར་གནས་བཅུ་གསེར་ཟངས་ཁྲུ་ཚད། རྒྱལ་བཀའ་རིན་པོ་ཆེ་སྡེ་སྤར་མཚལ་ཤོག་གདོང་དར་གླེགས་ཤིང་ཐག་ཤིན་ཏུ་སྤུས་ལྡན། མཆོད་ཁང་ནུབ་མར་སྐུ་རྟེན་ཅི་རིགས་དང༌། ཤེར་ཕྱིན་སྟོང་ཕྲག་བརྒྱ་པ། གདམས་ངག་རིན་པོ་ཆེའི་མཛོད། སྒྲུབ་ཐབས་ཀུན་བཏུས། རྒྱུད་སྡེ་ཀུན་བཏུས། དྭགས་པོ། རོང་ཟོམ་པ། རྗེ་ཙོང་ཁ་པ། ཀུན་མཁྱེན་གོ་རམས་པ། ཞེ་ཆེན་རྒྱལ་ཚབ། འཇམ་མགོན་མི་ཕམ་བཅས་ཀྱི་གསུང་འབུམ། ས་བཟང་གི་ཀ་ལཱ་པ། སི་ཏུའི་ཙནྡྲ་པ། དགེ་པཎ་དབྱངས་ཅན་མ་བཅས་ཀྱི་ཊི་ཀཱ །ཁམས་བོད་མཁས་པའི་སྙན་འགྲེལ། རྩིས་སྐར་ནག །མངོན་བརྗོད། སྡེབ་སྦྱོར་སོགས་ཆ་ཚང་བ། གསེར་དངུལ་བཀྲ་མའི་སྐུ་གདུང་ཆ་བརྒྱད། སྨན་འདམ་གྱི་གཏེར་ཆེན་མཆོག་གླིང་འདྲ་ཞལ། སྐུ་གོང་འོག་གི་སྒེར་གྱི་བཀའ་སྲུང་གཉན་ཆེན་ཐང་ལྷའི་རྟེན། དེ་དག་ལ་བཟང་གོས་ཀྱི་གནམ་རྒྱན། གཟིམ་ཁང་སྟེང་དུ་གནས་ཆེན་བྱིན་འབེབས་དང་འཛུགས་ཆོག་ལྡན་པའི་ཟངས་གསེར་གྱི་རྒྱལ་མཚན་ཆེ་ལེགས། བོད་ཁམས་བཀྲ་ཤིས་འབྱུང་བའི་གནས་རོང་རྨེ་དཀར་མོ་སྟག་ཚང་དུ་མཁྱེན་ཀོང་མཆོག་གསུམ་གྱི་ཟབ་གཏེར་རྩ་གསུམ་གཙོ་ཆེ་བའི་རིགས་དང་ཞར་བྱུང་སྒྲུབ་བརྒྱུད་ཤིང་རྟ་ཆེན་པོ་བརྒྱད་ལ་འབྲེལ་འཇོག་ཉམས་བཞེས་ལོ་ལྔ་རེའི་ཡུན་ལ་གནང་བའི་སྒྲུབ་གྲྭ་དཔོན་སློབ་དགུ་གསར་འཛུགས་ལ་སྒྲུབ་ཕོགས་དང་འབྲེལ་བའི་སྒྲུབ་ཁང་སྔར་ཡོད་རྒྱ་བསྐྱེད་ཚོགས་ཁང་ཆེ་ལེགས། སྒྲུབ་པ་སོ་སོར་གཤག་མིག་རེ། སྟེང་དུ་གཟིམ་ཆུང༌། སྒོ་ཁྱམས་བཅས། ལོགས་སུ་མགོན་ཁང་དང་ཐབ་ཚང་བཅས་པར་རྟེན་གསུམ་མཆོད་ཆས་ཡོ་བྱད་རིགས་དང་སྒྲུབ་པའི་ཉམས་བཞེས་ཕྱག་དཔེས་མཚོན་ཉེར་སྤྱད་རིགས་གང་དགོས་ཚང་བ། སྒྲུབ་གཡོག་བཅས་མཆོད་ཐེབས་དང་གསོལ་ཕོགས་རྒྱས་འདང་སྦྱོར་འཇགས་གནང༌། ཁྱུང་སྟག་གནས་ཕུག་ཏུ་སྨན་འདམ་གྱི་གུ་རུ་སྣང་སྲིད་ཟིལ་གནོན་མདའ་ཚད། གུ་རུ་བདེ་བ་ཆེན་པོའི་སྐུ་ཁྲུ་གང་བ་བཅས་ཚོན་རྩི་དང་ནང་གཞུག་ཁྱད་འཕགས་བྱིན་ཅན། དབུ་རྩེ་ལྷ་ཁང་གི་རི་རྩེར་ལྷ་བསངས་ཁང་དུ་སྐུ་རྟེན་གུ་རུ་ཁྱད་པར་འཕགས་པའི་རིག་འཛིན་མདའ་ཚད་མ། འཁོར་དུ་གེ་སར། ཐང་ལྷ། སྤོམ་ར། ཟིལ་ཁྲོམ། ཚེ་རིང་མཆེད་ལྔ། བརྟན་མ་བཅུ་གཉིས་བཅས་སྨན་འདམ་སྒྲོས་གཙང་ཚོན་རྩི་ནང་གཟུངས་ལྡན་པ་བཅས་འདི་རིགས་རྗེ་བླ་མ་མཆོག་ནས་གསར་བཞེངས་གནང་པ་འབའ་ཞིག་དང༌། གཞན་ཡང་ཤར་མི་ཉག་ནས་བྱང་རེ་ཀོང་ཚུན་གྱི་གསར་རྙིང་གྲུབ་མཐའ་རིས་མེད་ཀྱི་ཆོས་སྡེ་མང་པོར་ལྷ་ཁང་གསར་བཞེངས་དང་ཉམས་གསོའི་རིགས་ལ་སྐབས་བབས་ཀྱི་བསླབ་སྟོན་དང་རྟེན་གསུམ་མཆོད་ཆས་ཡོ་བྱད་སོགས་ཅི་རིགས་གཏན་འཇགས་དང་ཞལ་འདེབས་ཀྱི་བདག་རྐྱེན་གནང་བ་ནི་སྨོས་ཀྱིས་མི་ལྡང༌། ཐ་ན་གྲྭ་ཤག་དཀྱུས་མར་སྐུ་དང་མཆོད་སྟེགས་ཙམ་གསར་བཞེངས་ལའང་ལེགས་སོའི་དབུགས་དབྱུང༌། ཚོན་རྩི་སོགས་ཀྱི་མཐུན་རྐྱེན། གཟུངས་འབུལ་རབ་གནས་གསེར་ཆབ་སོགས་ཤུགས་འབྱུང་དུ་གནང་ཞིང་སྙན་ཤལ་དང་སྦྲགས་ནས་བསྩལ་བས་དད་སྤྲོའི་སྣང་བ་གོང་འཕེལ་དུ་འགྱུར་བའི་ཕྱག་བཞེས་རྒྱུན་ལྡན་དུ་གནང༌། གསུང་རྟེན་སྐོར་ལ། རྗེ་མཁྱེན་བརྩེ་གོང་མའི་གསུང་མཛོད་ཆེན་ལྔ་དང་རྒྱུད་སྡེ་སྒྲུབ་བཏུས་བཅས་ཀྱི་ཁོངས་སུ་མ་བཞུགས་པ་ཐོར་བུའི་རིགས་ཐུགས་རྩོལ་ཆེན་པོས་ཞིབ་སྡུད་གནང་བའི་གླེགས་བམ་ཆེ་བ་བཅུ་གསུམ་ལྷག་མཁས་དབང་བླ་མ་བཀྲ་འཕེལ་ནས་ལྗགས་རྩོམ་དཀར་ཆག་བཅས། མཁའ་སྤྱོད་བེ་བུམ་རྩ་བ་ཡན་ལག་བཅས་པོད་གསུམ། དགོངས་གཏེར་རྩ་གསུམ་འོད་གསལ་སྙིང་ཐིག་དང༌། ཡང་གཏེར་མཁའ་འགྲོ་གསང་འདུས། འཆི་མེད་འཕགས་མའི་སྙིང་ཐིག །སྙན་བརྒྱུད་གནད་ཏིག་ཕུར་པ། ལྕེ་བཙུན་སྙིང་ཐིག་བཅས་གཏེར་གཞུང་དང་སོ་སོའི་གསལ་བྱེད་བཅས། འཇམ་མགོན་མི་ཕམ་རིན་པོ་ཆེའི་གསུང་སྐོར་བསྟོད་ཚོགས། གཏམ་ཚོགས། ཞལ་གདམས། སྒྲུབ་ཐབས་ཐོར་བུའི་རིགས། རྫོགས་ཆེན་སྐོར། ཚིག་བདུན་གསོལ་འདེབས་རྣམ་བཤད། སྨོན་ལམ་ཤིས་བརྗོད་བཅས་པོད་གཉིས་ལྷག །རྡོ་གྲུབ་བསྟན་ཉིའི་གསུང་རྗེ་མཁྱེན་བརྩེའི་རྣམ་ཐར། མཁན་ཀུན་དཔལ་གསུང་ཆོས་རྗེ་དཔལ་སྤྲུལ་རིན་པོ་ཆེའི་རྣམ་ཐར། འདུལ་བ་མདོ་རྩ་སོགས་གཞུང་གི་རྩ་བ་གོང་མས་སྤར་བརྐོ་བཞེད་གནང་བ་དུ་མ་དང༌། རྒྱུད་བརྟག་གཉིས། ཕུར་པ་རྩ་དུམ། དྲི་མེད་བཤགས་རྒྱུད། ཆོས་སྤྱོད་སྐོར་གསོལ་འདེབས་དང་སྨོན་ལམ་རིགས་འགའ་བཅས། གནུབས་ཆེན་གསུང་སྤྱི་མདོ་དགོངས་འདུས་ཀྱི་དཀའ་འགྲེལ་དང༌། གསང་སྙིང་འགྲེལ་པ་བཀའ་འཆིམས་ཕུ་མ་སོགས་གསར་རྙིང་གི་གཞུང་རྒྱུན་དཀོན་རིགས་དུ་མ་བཅས་པོད་ཉེར་ལྔ་ལོང་ངེས་ཀྱི་ཤིང་སྤར་རྗེ་ཉིད་ནས་འགྲོ་སོང་ཕྱག་བསྟར་གྱིས་བཞེངས་ཤིང༌། མདོ་འགྲེལ་དང་གསང་སྙིང་འགྲེལ་པ་ཀཿཐོག །མི་ཕམ་སྐོར་ལྷུན་གྲུབ་སྟེང་དུ་བཀའ་འབུམ་སྡེབས་ཚང་བའི་ཆེད་དུ་འཇོག་པར་མཛད་པ་ལས་གཞན་ཚང་མ་རྫོང་སར་དུ་བཞུགས། འབྱོར་ལྡན་གཞན་ལ་བསྐུལ་ནས་བཞེངས་པའི་མདོ་ཏིང་འཛིན་རྒྱལ་པོ། ཤེར་ཕྱིན་གཡག་ཊཱི་ཀ་རོང་སྟོན་དབུ་མ་འཇུག་འགྲེལ་སོགས་སྤར་དུ་བཀོད། གཞན་ཡང་རིན་ཆེན་གཏེར་མཛོད་ཀྱི་དཀྱིལ་ཐང་དང་དབང་ཙཀ་སོགས་གསར་བཞེངས་ལ་སྤར་གཞི་ཆ་ཚང་ཕྱག་བསྟར་གྱིས་དག་ཐེར་དང་སྤར་ཡོན་དངོས་རྫས་རྒྱ་ཆེར་སྩོལ་བར་མཛད། གསེར་བྲིས་ཀྱི་རྒྱུད་བཅུ་བདུན་ཚང་བ་པོད་བཞི། ལམ་རིམ་ཡེ་ཤེས་སྙིང་པོ་རྩ་འགྲེལ་པོད་ཀྱིས་གཙོས་གསར་རྙིང་གྲུབ་མཐའ་རིས་མེད་ཀྱི་གཞུང་གདམས་མན་ངག་གནད་ཆེ་དང་དཔེ་རྒྱུན་དཀོན་པའི་རིགས་གཙོར་གྱུར་གླེགས་བམ་ཉིས་བརྒྱ་ལྷག །རྒྱལ་བཀའ་རིན་པོ་ཆེ་མཚལ་སྤར་ཆ་གསུམ། སྣག་སྤར་ཆ་གཉིས། བསྟན་འགྱུར་ཆ་གཅིག་རྣམས་གཙོར་གྱུར་དབུས་གཙང་མདོ་ཁམས་ཨ་མདོ་ཚུན་ནས་གནད་གལ་གང་ཆེའི་གསར་རྙིང་མཁས་གྲུབ་མང་པོའི་གསུང་འབུམ་དང་མདོ་སྔགས་གཞུང་འགྲེལ་སྤར་དུ་བཞུགས་རིགས་ཆེད་བཏབ་གནང་བའི་པུསྟ་ཀཿགཅིག་སྟོང་ལྔ་བརྒྱ་ལྷག་གསར་དུ་བཞེངས། དེ་དག་ལ་གླེགས་ཤིང་ཐག་ཆབ་མགོ་གདོང་དར་ན་བཟའ་བཅས་སྤུས་དག་དཔེར་འོས་པ་འབའ་ཞིག་མཛད། ཐུགས་རྟེན་དུ་གོང་གསལ་དུས་འཁོར་ཡེ་ཤེས་མཆོད་རྟེན་དང༌། ཀཿཐོག་ཏུ་ཕྱི་དབྱིབས་ཁང་བུ་བརྩེགས་པའི་མཆོད་རྟེན་གྱི་རྣམ་པ་ཐུབ་ཆེན་ཁང༌། ཟིལ་རྒྱུད་རྡོ་ཁོ་མར་བྱང་ཆུབ་མཆོད་རྟེན་ཤིན་ཏུ་ཆེ་ལེགས། ཁམས་བྱེ་སློབ་གྲྭའི་ཕྱི་ནས་ཁང་བརྩེགས་མཆོད་རྟེན་གྱིས་འཁོར་བར་བསྐོར་བ་དང༌། རྗེ་ཉིད་ནས་ཕྱག་བསྟར་དང་གཞན་ལ་བསྐུལ་བ་སོགས་ཀྱིས་དྲི་མེད་རྣམ་གཉིས་ལག་ལེན་ལྡན་པའི་མཆོད་རྟེན་ཆེ་ཕྲ་མང་ཞིག་བསྐྲུན་པར་མཛད། དུས་དང་རྒྱུན་གྱི་མཆོད་པའང་གོང་གསལ་རྟེན་གསུམ་རིགས་གཙོ་བོར་བཞུགས་པའི་ལྷ་ཁང་རྣམས་སུ་མཆོད་པའི་ཡོ་བྱད་དེ་དག་ཀྱང་རྣམ་གྲངས་ཙམ་བགྲང་རྒྱུའི་གང་བྱུང་གིས་ཆོག་པ་མ་ཡིན་པར་བྲིས་འབུར་ཐིག་རྩ་སོགས་ཉམས་འོག་ཆུད་པའི་ཐུགས་བཞེད་གང་ཡོད་བཟོ་ལས་རྣམས་ལ་ཞིབ་པར་བཀོད་འདོམས་དང༌། སྐབས་སུ་གཟིགས་སྐོར་གྱི་གཟི་བརྗིད་ཐོན་པ་རྣམས་ལ་བྱས་རྗེས་གསོལ་རས་སྤམ་མཐོ་བ་རེ་གནང་སྲོལ་བཅས་ཀྱིས་རྟེན་གསུམ་རིགས་ཁྱད་འཕགས་ཀུན་གྱི་དཔེར་འོས་བ་ཤ་སྟག་བཞུགས་སོ། །བྲིས་ཐང་སྐོར། སྟོན་པའི་སྐྱེས་རབས་དཔག་བསམ་འཁྲི་ཤིང་ཐང་ཤར་ཉེར་གཅིག །ཆོས་རྒྱལ་བདུན་རིགས་ལྡན་ཉེར་ལྔ་ཕྱེད་དུམ་སྐྱོང༌། བུ་དོལ་གཉིས་དང་རང་བྱུང་ཞབས། སི་ཏུ་དྷརྨ་ཀ་ར་སོགས་བཞུགས་པའི་ཞལ་ཐང་སོ་བདུན་པ། དཔལ་སྤུངས་འཇམ་མགོན་ཆོས་འབྱུང་ཕྱག་བཀོད་ལྟར། རྒྱན་དྲུག་མཆོག་གཉིས། གྲུབ་བརྒྱད། གུ་རུ་མཚན་བརྒྱད། སྒྲོལ་མ་ཉེར་གཅིག་དང་འཇིགས་པ་བརྒྱད་སྐྱོབས་སོགས་ཀྱི་གྲྭ་ཐང་དགུ་ཚར་དང་ལྔ་ཚར་སྣ་ཚོགས། མཁྱེན་བརྩེའི་དབང་པོའི་འཁྲུངས་རབས་ཐང་ཤར་བཅུ་དགུ། མཁྱེན་གཏེར་ཡོངས་རྫོགས་ཐང་ཤར་སོ་ལྔ་སོགས་སངས་རྒྱས་བྱང་སེམས་རྩ་གསུམ་ཆོས་སྐྱོང་བཅས་ཀྱི་ཞལ་ཐང་ཆེ་ཆུང་སྣ་ཚོགས་སུམ་བརྒྱར་ཉེ་བ་བཟང་གོས་གསེར་མའི་གོང་གཤམ་དང་ཞལ་ཁེབས། དངུལ་དང་ལྕགས་གསེར་ཤས་ཆེའི་བསྒྲིལ་ཏོག་བཅས་སྤུས་ནོམ་ལྡན་པ་ཤ་སྟག །རིན་གཏེར་དབང་ཙཀ་ཞིབ་རྒྱས་ཉིས་སྟོང་ཉིས་བརྒྱར་ཉེ་བ་དང༌། དཀྱིལ་ཐང་སུམ་བརྒྱ་ལྔ་བཅུ་ལྷག་གཙོར་གྱུར་བཀའ་གཏེར་དབང་ཙཀ་དང་དཀྱིལ་འཁོར་རིགས་ཀྱང་གསར་བཞེངས་མང༌། མཆོད་པ་སྤྱི་དང་བྱེ་བྲག་སྦོས་མར་མེ་སོགས་ཀྱི་རྒྱུན་ཐེབས་སྦྱོར་འཇགས། ཁྱད་པར་རྫོང་སར་དགོན་དུ་རྒྱལ་བ་ལྷ་ལས་བབས་པའི་དུས་ཆེན་དང༌། ཞར་དུ་བརྩེ་ཆེན་ཀུན་དགའ་སྙིང་པོ། མཁས་གྲུབ་ཁྱུང་པོ་རྣལ་འབྱོར་སོགས་ཀྱི་སྐུ་མཆོད་དང་ཁེལ་བར་འཁོན་ལུགས་རྡོ་རྗེ་ཕུར་པའི་སྒྲུབ་མཆོད་རྩ་འཆམ་དང༌། སྨད་ལས་བསྒྲལ་འཆམ་སོགས་སྤྲོས་བཅས་ཕྱག་བཞེས་ཅན་རྒྱུན་འཛུགས་མཛད་པའི་སྒྲུབ་རྟེན་མཆོད་རྫས་ཡོ་བྱད་འཆམ་ཆས་སོགས་གཟབ་རྒྱས་དངོས་གཙང་དང༌། ཚོགས་ཐེབས་རྒྱས་འདང་སྦྱོར་འཇགས། འདིའི་ཚོགས་དབུར་སྐབས་སུ་རྗེ་ཉིད་དངོས་ཕེབས་ཀྱིས་ཕྱག་བཞེས་བསྒྲིགས་ལམ་གང་ཅིར་ཞིབ་གཟིགས་གནང༌། གཏེར་ལུང་ཁང་དམར་དགོན་དུ་སྨིན་ལུགས་རྡོར་སེམས་ཀྱི་སྒྲུབ་ཐེབས་རྒྱུན་སྦྱོར་གནང༌། སྔ་རྗེས་དུས་སྐབས་ཅི་རིགས་པར་བསྙེན་སྒྲུབ་གནས་འབྲེལ་བསྟན་རིམ་སོགས་ལ་རྗེ་ཉིད་ཀྱི་ཕྱག་བསྟར་དང༌། དད་སྦྱིན་གྱིས་ཆེད་དུ་གསོལ་བ་བཏབ་པ་བཅས་བཀའ་གཏེར་སྒྲུབ་ཆེན་ཕལ་ཆེར་སྨན་སྒྲུབ་དང་འབྲེལ་བ་ལན་གྲངས་སུམ་ཅུར་ཉེ་བ་སྤྲོས་པ་རྒྱས་བསྡུས་ཅི་རིགས་གནང་བ་རང་གིས་ཤེས་ཚོར་རགས་པ་ཙམ་ཡིན་ཅིང༌། སྐུ་ཚེའི་སྟོད་དུ་གནང་རིགས་ངེས་ཏིག་འགོད་མ་ཤེས། དེར་མ་ཟད་ཡར་ཀླུང་ཤེལ་བྲག །འཕགས་ཡུལ་རྡོ་རྗེ་གདན། བལ་ཡུལ་ཡང་ལེ་ཤོད་རྣམས་སུ་བདུད་རྩི་གཅིག་སྒྲུབ་ཉིན་གང་རེ་གནང་བའང་གནས་དུས་ཀྱི་ཁྱད་པར་གཞན་གྱི་ཚོགས་སྒྲུབ་ལས་དགོས་དོན་ཆེ་བར་ངེས་ཤིང༌། སྤྲེལ་ལོ་སྤྲེལ་ཟླ་ནམ་ཁེལ་ལ་ཚོགས་འབུམ་ཐེར་དང་འབྲེལ་བར་གུ་རུའི་སྐུ་ཚབ་བརྒྱ་ཕྲག་རེ་གཏའ་སྤེལ་ཕྱག་བསྟར་དང༌། གཞན་ཚོགས་མཆོད་སྟོང་ནས་ཁྲི་འབུམ་བར། བརྒྱ་ཕྲག་ཡན་དང་འབྲེལ་བར་མཁའ་འགྲོའི་མེ་མཆོད་སོགས་བར་མེད་དུ་གཏོང་བར་མཛད། ཁྱད་པར་མདོ་ཁམས་ནས་དབུས་གཙང་འབྲས་ལྗོངས་བར་གྱི་གནས་ཆེན་གནས་ཕྲན་དུ་མར་ཕེབས་ནས་བསྙེན་སྒྲུབ། མཆོད་འབུལ། ཁྲུས་གསོལ་རབ་གནས། ཚོགས་བསྐང་མེ་མཆོད། བསང་བརྔན་དང་ལྷ་སྲིན་དམ་བསྒྲགས་སོགས་རྒྱས་བསྡུས་ཅི་རིགས་ཚོགས་དང་མཆོད་པའི་དངོས་པོ་ཕུན་སུམ་ཚོགས་པ་ཕྱག་བསྟར་དང༌། ཆོས་འཁོར་རྣམ་གསུམ། རྒྱ་གར་རྡོ་རྗེ་གདན། ཝཱ་རཱ་ཎ་སཱི། མཉན་ཡོད། བལ་ཡུལ་མཆོད་རྟེན་རྣམ་གསུམ་གཙོ་བོར་གྱུར་པའི་གནས་ཆེན་ཁག་ལ་ཉེར་སྤྱོད་ཀྱི་མཆོད་པ་ཁྲི་ཚར་ཅན་ལན་མང༌། རྟེན་རྣམས་ལ་ཞལ་གསེར་དང་ན་བཟའ་རྒྱས་འབུལ། མཎ1$0000270ཌ1$0000300ལ་རྟེན་སྙན་ཤལ་སོགས་རྒྱས་པར་གནང་ཚུལ་རྒྱས་པ་ལམ་ཡིག་ལས་གསལ་ཞིང༌། རྒྱུན་དུ་ཡར་མར་ཚེས་བཅུར་ཚོགས་སྐོང་རྒྱས་པ་ཆགས་མེད། རྒྱལ་བའི་དུས་ཆེན་ཁག་བཞི། ཉ་སྟོང་བརྒྱད་གསུམ། གསར་རྙིང་གི་སྐྱེས་ཆེན་དམ་པ་དང༌། རྗེ་ཉིད་ཀྱི་རིགས་བདག་བླ་མ་དམ་པ་རྣམས་ཀྱི་སྐུ་མཆོད་དུ་མཆོད་སྤྲིན་གཟབ་རྒྱས་དང་འབྲེལ་གསུང་ཆོག་སྐབས་སུ་གང་བབས། དམིགས་བསལ་དུ་རྗེ་གོང་མའི་སྐུ་མཆོད་མཁའ་འགྲོ་གསང་འདུས་སྒྲུབ་མཆོད་ཉིན་བདུན་རིང་ཤིན་ཏུ་རྒྱས་པ། རྗེ་གོང་མའི་ཕྱག་རྒྱུན་ལོ་བསྟར་སྤྲེལ་ཟླའི་ཚེས་བཅུར་བླ་མ་གསང་འདུས་ཀྱི་ཚོགས་བརྒྱ། དགུང་གསར་ཚེས་གཅིག་ལ་ཆོས་རྒྱལ་ཁྲི་སྲོང་གི་སྐུ་མཆོད་ཉང་གཏེར་ཕྲིན་སྒྲུབ་རིན་ཆེན་སྒྲོན་མེའི་ཚོགས་མཆོད་བཅས། གཟིམ་ཆུང་ཕྱི་ནང་དུ་མཆོད་མེ་རྒྱུན་འབར། ཡོན་ཆབ་ཤིན་ཏུ་གྲངས་མང༌། ཞལ་ཟས་ཀྱི་ཕྲེང་བ་སོགས། ཐ་ན་མཆོད་པའི་ཞལ་ཟས་དང་ཚོགས་མཆོད་མཐོ་ཚད་ལས་ཆུང་དུ་མི་གཏོང་བར་ཡོ་བྱད་ཐམས་ཅད་གཙང་དག་གང་རྒྱས་ལོ་ཟླ་བསྟར་ཆགས་སུ་ཚོགས་བསགས་ཀྱི་སྒོ་མཐའ་ཡས་པ་ལ་གཅིག་ཏུ་བརྩོན་པར་མཛད། ཡུལ་དམ་པ་རྣམས་ལ་བསྙེན་བཀུར་མཛད་པའང་ཟབ་ཆོས་ཀྱི་བདུད་རྩི་བཞེས་པའི་བླ་མ་དང་དགེ་བའི་བཤེས་གཉེན་ལས་བཀའ་ཆོས་གསན་སྐབས་ཐོག་མཐའ་བར་གསུམ་དུ་མཎ1$0000270ཌ1$0000300ལ་བརྟན་བཞུགས། གཏང་རག་ལ་རྟེན་གསུམ་རྩ་ཆེས་ཐོག་དྲངས། དངོས་རྫས་ཉེར་སྤྱད་མཁོ་དགུ་གཙང་དག་གི་རིགས་རྒྱ་གང་ཆེ་རྟག་པར་འབུལ་བར་མཛད་པ་དང༌། རྗེ་ཉིད་ཀྱི་མདུན་དབང་ཆོས་གསན་བཞེས་ཀྱི་བླ་ཆེན། མཁན་སྤྲུལ། འཁོས་ཆུང་གི་ཆོས་པ་ཡན་མཆོག་ཕལ་སུ་ལའང་འོས་བསྟུན་གྱི་དངོས་འབུལ། འཚོ་བའི་མཐུན་རྐྱེན། ཆོས་གོས་ལྷུང་བཟེད། རྡོར་དྲིལ། སྒྲུབ་རྟེན་གང་དགོས་ལྷུག་པར་བསྩལ་ཤིང༌། གདན་ས་ཆེན་པོའི་བཤད་སྒྲུབ་ཀྱི་སྡེ་དང་རིས་མེད་པའི་ཆོས་སྡེ་ཁག་ལ་བསྙེན་བཀུར་དང་འབྲེལ་བར་རྒྱལ་བཀའ་རིན་པོ་ཆེ་དག་སྒྲོག །མདོ་རྒྱུད་ཀྱི་གཟུངས་སྔགས་ཕན་ཡོན་དང་དགོས་པ་ཆེ་བའི་རིགས་ཁྲི་འབུམ་ནས་དུང་ཕྱུར་ཁ་ཡར་བར། བསྔོ་སྨོན་སོགས་ལ་སྐུ་ཡོན་ཕྱག་རྫས་གཏོས་ཆེ་བ་ལོ་བསྟར་གནང་སྦྱིན་དང་སྐབས་སུ་བབས་པའི་བསླབ་སྟོན་སོགས་བསྩལ་བས་སྔོན་བྱོན་གོང་མའི་ཕྱག་སྲོལ་ཁྱད་པར་ཅན་རྣམས་མ་ཉམས་གོང་འཕེལ་དུ་གནང་བས་རྒྱལ་བསྟན་བཤད་སྒྲུབ་ཀྱི་ཆོས་རྒྱུན་དར་རྒྱས་འཕེལ་བའི་བཀའ་དྲིན་རླབས་ཆེར་བསྐྱངས། ཁྱད་པར་ལམ་ཡིག་ལས་འབྱུང་བའི་བོད་ཕྱོགས་ལྷ་ལྡན་སྨོན་ལམ་ཆེན་མོར་ཕྱག་འགྱེད་དང༌། རྭ་སྒྲེང་ནས་བཟུང་གཙང་པོ་ལྷོ་བྱང་ལྷོ་བྲག་ཁུལ་ས་སྐྱ་གོང་བར་ཕེབས་ལམ་དུ་ཁེལ་བའི་ས་དགེ་ཀར་རྙིང་གི་དགོན་སྡེ་ཆེ་ཕྲ་ཚང་མར་མང་ཇ་དང་ཕྱག་འགྱེད་ཀྱི་བསྙེན་བཀུར་རྣམ་དག་ཕྱག་ལེན་དུ་བསྟར་བར་མཛད། ཕལ་པའི་སྐྱེ་འགྲོ་མཐའ་དག་ལ་དངོས་དང་བརྒྱུད་ནས་ཕན་བདེའི་རྒྱུར་འགྱུར་བའང་སྐུ་གོང་མར་བོད་ཁམས་བདེ་བའི་ལུང་དོན་དང་མཐུན་པར་སྐྱབས་རྗེ་སི་ཏུ་ཐམས་ཅད་མཁྱེན་པའི་དགོངས་བཞེད་ཡིན་ཅེས་མདོ་ཁམས་སྟོད་སྨད་ཀུན་ཏུ་ཐུགས་རྗེ་ཆེན་པོའི་མ་ཎི་དུང་སྒྲུབ་ཚུགས་ན་དུས་ཀྱི་རྒུད་པ་ཞི་ཞིང་ལེགས་ཚོགས་རྒྱས་པའི་ཚུལ་ཕྱོགས་ཀུན་ཏུ་བཀའ་ཆབ་གནང་བ་ལྟར་ཕྱོགས་སོ་སོར་དགེ་བའི་ལམ་སྲོལ་སྔར་མེད་གསར་ཚུགས་འབྲེལ་ཚད་དོན་ལྡན་དུ་གྱུར་པ་དང༌། གཞན་ཡང་ས་བདག་སྙིང་གཏེར། ཀླུ་བུམ། ནོར་བུམ་སོགས་བརྒྱ་ཕྲག་མང་པོ་དུས་དང་དུས་སུ་བཅའ་སྒྲུབ་ཀྱི་ཡུལ་ཚོ་སོ་སོར་ཆེད་དུ་བཀྲམ་པར་མཛད་ཅིང༌། ཀླུ་སྨན་ཚད་ལྡན་བསྡུ་སྒྲུབ་གནང་བ་གནམ་ཆར་དཀོན་པའི་ཚེ་མཚོ་དང་ཆུ་མིག་ལ་བཀྲམ་ཞིང་ཆར་སྒྲུབ་ཀྱང་ནན་དུ་མཛད། དེར་མ་ཟད་སྨན་གྱི་བསྡུ་སྦྱོར་ཚད་ལྡན་ཆ་ཚང་གནང་བ་མཁོ་དགོས་ཅན་གྱི་ནད་པ་ལ་དགེ་སྨན་རྒྱུན་མི་ཆད་པ་དང༌། ཁྱད་པར་དུ་ལག་ལེན་དཀའ་ཞིང་འགྲོ་སོང་ཆེ་བ་སོགས་ཀུན་གྱི་ཡིད་སྨོན་ཙམ་དུ་གྱུར་པའི་དངུལ་ཆུ་བཙོ་བཀྲུ་ཆེན་མོ་ཤིན་ཏུ་ཕོན་ཆེ་བ་ཕྱག་ལེན་གནང་ནས་རིན་ཆེན་རིལ་ནག་ཆེན་མོ། ཡང་ཟབ། མང་སྦྱོར། ཤེལ་དཀར་མཆོད་རྟེན། རཏྣ་བསམ་འཕེལ། དབང་རིལ་ཉེར་ལྔ། ཟླ་ཤེལ་ཆེན་མོ་བཅས་སྦྱོར་ཚད་སོགས་གཞུང་མཐུན་བསྡུ་སྒྲུབ་ཚད་ལྡན་གནང་བ་དང༌། གི་ཝཾ། དབང་རིལ། ཁ་ཆེ། བསེ་རུ་སོགས་རིན་ཐང་ཆེ་བའི་རིགས། ཁྱད་པར་དངུལ་ཆུ་བཙོ་བཀྲུ་ལྡན་པའི་ཟླ་ཤེལ་ཆེན་མོ་ཤིན་ཏུ་ཕོན་མང་ཡང་ཡང་བསྡུ་སྒྲུབ་མཛད་པས་ཕན་སྟོབས་ཀྱང་ལྷག་པར་ཆེ་བས་ཀུན་གྱི་སྲོག་འཚོ་ལྟ་བུར་གྱུར་པ་རྣམས་དང༌། གཞན་ཡང་སྨན་རཀ་གཏོར་གསུམ། གཡང་རྫས། གླུད་རྫས། སྦྱིན་སྲེག་གི་རྫས་སོགས་ཉེར་མཁོའི་རིགས་ཞུ་མཁན་སུ་བྱུང་ལ་ཕངས་མེད་དུ་གནང༌། བཀའ་ལས་ཀྱང་འདིའི་རིགས་གཞན་ལ་ཕན་དུ་རེ་ནས་ལག་ལེན་བྱས་པ་ཡིན་པས་དེ་ལྟར་ཕན་ཐོགས་རེ་བྱུང་ན་ལེགས་ཤིང༌། དེ་མིན་ཞུ་རྟེན་སོགས་གཏན་ནས་མི་དགོས་པ་ཡང་ཡང་ཕེབས་པ་ལྟར་དངོས་བརྒྱུད་གང་ས་ནས་བཞེས་སྲོལ་མེད། རྟག་པར་ཞལ་མཇལ་སྐྱབས་ཞུས་བསྔོ་རྟེན་རིགས་ལའང་སོ་སོར་དམ་རྫས་སོགས་ཇི་ལྟར་འདོད་པ་དང་ཟང་ཟིང་གི་གསོལ་རས་གྱ་ནོམ་པས་མཆོག་ཕལ་ཡོངས་ཀྱི་རེ་བ་སྐོང་བའི་ཕྲིན་ལས་ལ་སྐྱོ་ངལ་དང་རེས་འཇོག་མེད་ཅིང༌། དབང་ཆོས་རྒྱ་ཆེར་འབྲེལ་བ་ནས་ཆོས་འབྲེལ་ཐོབ་པ་ཡན་ཆད་རྟག་པར་ཐུགས་རྗེས་བཟུང་སྟེ་དངོས་ཤུགས་ནས་ཆོས་ལ་བསྐུལ་བར་མཛད་ཅིང༌། ཤིན་ཏུ་དམན་པ་དབུལ་ཕོངས་དབང་པོ་ཡན་ལག་སྐྱོན་ཅན་དང་བྱ་ཁྱི་ཡན་ལ་ནད་འཚོའི་སྨན་དང་ཟས་གོས་སོགས་ཀྱིས་ལུས་སེམས་ལ་ཕན་པར་མཛད་པ་དང༌། སྤྲོ་བ་བསྐྱེད་པའི་གསུང་འཕྲོས་ཁྱད་པར་ཅན་གྱིས་དབུགས་དབྱུང་བས་མཚོན་བསྡུ་བའི་དངོས་པོ་རྣམ་པ་བཞིས་ཡིད་ཅན་མགུ་བ་བསྐྱེད་པ་སོགས་མདོར་ན་ནམ་མཁའ་མཛོད་ཀྱི་གཏོང་བའི་སྒོ་འཕར་གཏན་པ་མེད་པར་ཕྱེ་བས་རླབས་ཆེན་བསོད་ནམས་ཀྱི་ཚོགས་བསགས་པའི་དཔལ་གྱིས་སྲིད་ཞིའི་རྒུད་པ་གཅིག་ཅར་དུ་བཅོམ་པར་མཛད་པའང་སྐྱེས་རབས་ལས། ཟླ་བས་ཀུན་དགའ་ཉི་མས་རབ་གསལ་དང༌། །མེ་ཡིས་ཚ་བ་རླུང་གིས་མགྱོགས་པ་དང༌། །སྙིང་རྗེས་ནམ་བ་སྐྱེ་བོ་ཆེ་རྣམས་ཀྱིས། །གཞན་ལ་ཕན་པ་ལྷན་སྐྱེས་རང་བཞིན་ཡིན། །ཞེས་གསུངས་པ་ལྟར་རོ། །བདུན་པ་སྤྲུལ་པ་དབྱིངས་སུ་བསྡུས་པའི་ཚུལ་འཕྲོས་དོན་དང་བཅས་པ་ནི། དེའང་རྗེ་བླ་མ་ཉིད་དམིགས་པ་མེད་པའི་ཐུགས་རྗེའི་བདག་ཉིད་བསྟན་དང་འགྲོ་བའི་དཔུང་གཉེན་ཆེན་པོར་གྱུར་པ་གང་གིས་བྱང་ཆུབ་ཀྱི་སྤྱོད་པ་རྒྱ་མཚོ་ལྟ་བུ་བདག་གིར་བཞེས་ཏེ་རིས་མེད་པའི་བསྟན་པ་དང་མཆོག་དམན་བར་མའི་འགྲོ་བ་མཐའ་དག་ལ་ཕན་བདེའི་ཕྲིན་ལས་རྒྱ་ཆེར་སྐྱོང་བཞིན་པ་ནས། དགུང་གྲངས་རེ་གསུམ་པ་ཤིང་ལུག་ཟླ་བ་བཞི་པའི་ཚེས་སྐོར་འདུས་པ་ཧ་ཅང་མི་མང་བ་ཞིག་ལ་བཀའ་ཆོས་གྲུབ་རྗེས་བསླབ་བྱ་བསྡུས་ཙམ་ཞིག་གནང་བའི་ཞོར་དུ། དེང་སང་རང་གཞན་སུ་ཡིན་རུང་ཆོས་རྣམ་དག་བྱེད་མཁན་ནི་ཉིན་སྐར་ལས་ཀྱང་དཀོན། ཐམས་ཅད་ཀྱི་རྒྱུད་ལྷ་མིན་གྱིས་བརླམས་པས་དགེ་བཅུའི་བཅའ་ཁྲིམས་དང་འབྲེལ་བའི་གནའ་སྲོལ་བཟང་པོ་ལ་སྐྱོན་དུ་བརྩི་ཞིང་ཡ་རབས་ཆོས་ལྡན་གྱི་རིགས་རྣམས་དམངས་སུ་འབེབས། རང་གཞན་ཕུང་ལ་སྦྱོར་བྱེད་མཐའ་མའི་གཡོ་ཐབས་ཀྱི་རྗེས་སུ་འབྲང༌། ལས་འབྲས་ཐམས་ཅད་ཁྱད་དུ་གསོད་ཅིང་བུ་བརྒྱུད་ཕ་མ་ལ་ཡིད་མི་ཆེས། བླ་དགོན་རྣམས་བསྟན་པའི་སྙིང་པོ་ཉན་བཤད་སྒོམ་སྒྲུབ་མིང་ཙམ་དུ་གྱུར་ནས་ཕོ་ཚོད་སྒོ་ནས་དཔུང་དང་ལོངས་སྤྱོད་ཀྱིས་བསྟན་པ་འཛིན་པར་རློམས། བླུན་པོ་རྣམས་ལྟ་ཅི་མཁས་པར་རློམས་པ་དག་གིས་ཀྱང་ཕྱོགས་ལྷུང་ཆོས་སྤོང་གི་རྒྱབ་རྟེན་དུ་ལུང་དང་རིགས་པའི་རྩལ་ཅི་ཡོད་ཀྱིས་རྒྱལ་བསྟན་རྙོགས་པར་བྱེད་ཅིང་ལྟོས་བཅས་ལོག་ལམ་དུ་ཁྲིད། ཀུན་གྱིས་བསྟན་དོན་ལ་བསྙད་པའི་ཚོང་དང་བུན་སྐྱེད་སོགས་གཡོ་སྒྱུ་ཁོ་ན་ལ་བརྩོན། གསོན་གཤིན་གྱི་དཀོར་ནག་ཧབ་ཐོབ་བྱེད། ཆང་དང་ཐ་མག་ཤྭ་རྒྱན་བཤས་ཚོང་སོགས་ཁྱིམ་པ་སུན་འབྱིན་ཤ་སྟག་ལས་སྲུང་སྡོམ་རྣམས་འཕོང་གི་རྡོ་བཞིན་དུ་འདོར། ཐ་ན་སངས་རྒྱས་ཀྱི་རྗེས་འཇུག་རྟགས་ཀྱི་ཆེ་བར་གསུངས་པ་གཟན་ཤམ་ཙམ་ཞིག་ལེགས་པར་གྱོན་པའང་ཉུང་ཞིང༌། ཕལ་ཆེར་ཁྱིམ་པའི་ཆས་དང་གྲི་མཚོན་ལ་གཙིགས་སུ་བྱེད་པ་སོགས་དངོས་བརྒྱུད་ནས་བསྟན་པ་འཛིན་པ་ཕར་ཞོག་མྱུར་དུ་ཉམས་པའི་ཐབས་ལ་བརྩོན། མདོར་ན་ཀུན་གྱིས་མི་དགེ་བ་འབའ་ཞིག་ལ་སྤྱད་པའི་དབང་གིས་ནད་མུག་མཚོན་འཁྲུགས་སོགས་ཤིན་ཏུ་བཟོད་པར་དཀའ་བའི་སྡུག་བསྔལ་མཐོང་ཆོས་སུ་བྱུང་དང་འབྱུང་བཞིན་པ་ནི་རྒྱུ་འབྲས་མི་བསླུ་བའི་ཆོས་ཉིད་ལགས་ཀྱང༌། ད་དུང་ཡི་ཆད་མཆོག་གསུམ་ལ་བྱེད་ཅིང་རྒྱབ་བརྟེན་གདུག་འདྲེ་ལ་བཅོལ་བ་སོགས་སྙིགས་མའི་སྤྱོད་ཚུལ་འདི་ལ་གང་ནས་བསམས་ཀྱང་ཤིན་ཏུ་ཡིད་སྐྱོ་བའི་གནས་ལས་མི་འདུག །ཁོ་བོས་ཁྱེད་རྣམས་ལ་ཆོས་ཕྲན་ཚེགས་སྟོན་པའི་བྱས་ཡུས་བགྲང་བ་གཏན་ནས་མིན་ཀྱང་བན་རྒན་སྙིང་རླུང་ལྡང་བའི་བཅོས་གཏམ་ཆལ་ཆོལ་དུ་ཤོར་བ་རེད་ཅེས་སྤྱན་ཆབ་ཀྱང་བསིལ་བར་མཛད། དེ་ནས་མི་རིང་བར་རྗེ་ཉིད་ཀྱི་དགོངས་ཉམས་སོགས་འཚུབས་པར་བཅད་རྒྱ་དམ་བཞུགས་དང་གནས་འབྲེལ་ཕེབས་རྒྱུ་གནད་དུ་གང་ཆེ་སྐུ་ཚབ་རིན་པོ་ཆེའི་མདུན་བརྟག་བསྒྲིལ་ཞུས་དོན། སྤྲོས་མེད་སྐུ་འཁོར་ཧྲག་བསྡུས་གནས་འབྲེལ་ཕེབས་ན་ལེགས་བབས་དགོན་ཡུལ་རྣམས་ལ་བཀའ་བསྒྲགས་གནང་བའང༌། དོན་དུ་གསང་བ་བསྲུངས་ཏེ་སྐུ་རྟེན་འདིས་གདུལ་བར་བྱ་བ་ཕྲིན་ལས་དུས་ལས་ཡོལ་བ་མེད་པར་རྒྱ་ཆེར་སྐྱོང་བའི་མཛད་པ་མཐར་ཕྱིན་པ་ཉིད་རྒྱུ་དང༌། འབྱུང་འགྱུར་དུས་འཁྲུག་གི་ཉེན་ཁ་ཚབ་ཆེ་བཟློག་ཏུ་མེད་པ་མངོན་སུམ་དུ་མཁྱེན་པའི་རྐྱེན་གྱིས་བསྐུལ་བར་དངོས་སུ་གྲུབ་མོད། འོན་ཀྱང་འཕྲལ་དུ་གདན་སར་ཞབས་བཀོད་ཐུབ་པའི་ཞལ་བཞེས་བཅས་ཐམས་ཅད་ལ་ཞལ་མཇལ་ཚེ་དབང་སྨོན་ལམ་དང་མྱོང་གྲོལ་རིགས་ཟང་ཟིང་གི་གསོལ་རས་སོགས་ཀྱིས་ཡིད་ཚིམ་པར་མཛད། གཙུག་ལག་དང་མགོན་ཁང་ཁག་ལ་ཕེབས་ནས་མཆོད་འབུལ་སྙན་ཤལ་ཕྲིན་བཅོལ་བརྟན་བཞུགས་སྨོན་ལམ་ཤིས་བརྗོད་བཅས་རྒྱས་པར་གནང༌། དགོན་ཡུལ་བཤད་སྒྲུབ་ཀྱི་སྡེ་བཅས་ལ་སྐབས་སུ་བབས་པའི་བསླབ་བྱ་སྒོ་ཀུན་ནས་སོ་སོར་བསྩལ་ཏེ་ཧོར་ཟླ་དྲུག་པ་སྤྲེལ་ཟླའི་ཚེས་བཅུ་རྒྱས་པར་བཏང་ནས་ཚེས་ཉེར་གསུམ་ལ་སྐུ་འཁོར་ཤིན་ཏུ་ཉུང་བསྡུས་ཆིབས་བཏེགས། གངས་རིའི་ལྗོངས་ཙམ་ན་མངོན་པར་མཐོ་བའི་སྒྲུབ་གནས་ཀྱི་རྒྱལ་པོ་པདྨ་ཤེལ་ཕུག་མདུན་བཞུགས་སྒར་བཏབ་ནས་ཐུགས་སྒྲུབ་བསམ་ལྷུན་གྱི་ཚོགས་བརྒྱ་མཛད། དད་འདུས་མང་པོར་ཞལ་མཇལ་སོགས་གནང༌། དེ་ནས་རིམ་པར་ཡར་མར་ལམ་ལྕོགས་བཅས་བཞུགས་ཞག་ཕལ་ཆེར་གནས་རི་རེ་དང་ཁེལ་བ་མཛད་དེ་སྐབས་སུ་བཅག་མལ་དང་བཅས་སོ་སོར་ཚོགས་བསྐང་དང་མེ་མཆོད། ལྷ་བསང༌། རི་ཁྲུས། བཀའ་ནན་རབ་བརྗིད་དང་བྱིན་འབེབས་སོགས་གང་ལ་གང་འོས་དང༌། ཞལ་མཇལ་བའི་སྐྱེ་འགྲོ་རྣམས་ཀྱི་རེ་བ་སྐོང་བཞིན་ཁམས་ནས་རིམ་པར་བྱང་ནག་ཆུ་ཁ་དང་རྭ་སྒྲེང་བརྒྱུད་དེ་བོད་ཀྱི་ཆོས་འཁོར་ལྟེ་བ་ལྷ་ས། བསམ་ཡས། ཁྲ་འབྲུག་སོགས་ལྷོ་གནས་བརྒྱུད། གཙང་སྟོད་ས་སྐྱ་ནས་སྦས་གནས་འབྲས་མོ་ལྗོངས། རིམ་པར་རྡོ་རྗེ་གདན་སོགས་འཕགས་ཡུལ་དུ་ཐེངས་གཉིས། བལ་ཡུལ་དུ་ཐེངས་གཅིག་ཕེབས་པའི་ལམ་འཁོད་གནས་རྟེན་ཁག་དང་གསར་རྙིང་དགོན་སྡེ་མཐའ་དག་ལ་མཆོད་འབུལ་བསྙེན་བཀུར་གང་རྒྱས། ཁྱད་པར་དུ་བགྲང་ལས་འདས་པའི་སྐྱེ་བོ་མཆོག་ཕལ་ཡོངས་ལ་མཚན་དཔེའི་དཀྱིལ་འཁོར་གསལ་བར་བསྟན་ནས་སྐལ་བ་དང་འཚམ་པའི་གསུང་གི་བདུད་རྩི་རྒྱ་ཆེར་བསྩལ་ཞིང༌། དམིགས་པ་མེད་པའི་ཐུགས་རྗེ་ཆེན་པོས་ཀུན་ལ་ཁྱབ་པའི་འབྲེལ་ཚད་དོན་ལྡན་གྱི་ཕྲིན་ལས་རྒྱ་ཆེ་དང་བཅས་རེ་ཞིག་འབྲས་ལྗོངས་སུ་བཞུགས་ཏེ། རྩ་གསུམ་རིག་འཛིན་སྲོག་སྒྲུབ་ཀྱི་བདུད་རྩི་སྨན་སྒྲུབ་ཞིག་ཀྱང་གནང༌། བཀྲ་ཤིས་སྡིངས་དུ་གནས་ཆེན་བྱིན་འབེབས་དང་གཞི་བདག་རྟེན་བཀོལ། གཙུག་ལག་ཁང་དང་ཕོ་བྲང་ལ་རབ་ཏུ་གནས་པའི་ཆོ་ག་སོགས་ཇི་ལྟར་གསོལ་བ་བཏབ་པ་ལྟར་རྒྱས་པར་གནང༌། སྒང་ཐོག་དང༌། ལྷ་སྡེའི་གཙོ་བོ་པདྨ་ཡང་རྩེ། རྡོར་གླིང་ཁུལ་རྣམས་སུ་དད་འདུས་རྣམས་ཀྱི་ཞུས་ངོར་བཀའ་ཆོས་རིགས་ནར་མར་གསུངས། རྒྱ་གར་དང་ཡོ་རོབ་ཀྱི་མི་སྣ་མང་པོར་ཆོས་དང་འབྲེལ་བའི་གསུང་གིས་དངོས་བརྒྱུད་ནས་གཏན་བདེའི་ས་བོན་བསྐྲུན་པར་མཛད། འདི་སྐོར་རྒྱས་པར་བཀོད་འོས་ཀྱང་ལམ་ཡིག་ལས་ཟུར་དུ་གསལ་བས་འདིར་ས་བོན་ཙམ་གྱིས་འཐུས་པར་བྱས་པ་དང༌། དགུང་གྲངས་རེ་དྲུག་ཕེབས་པ་ས་ཕག་གནམ་ལོ་གསར་ཚེས་སྐོར་ནས་སྐུ་ཁམས་ཅུང་འཁྲུགས། ཚེས་བཅོ་ལྔའི་ཉིན་བློ་སྦྱོང་དོན་བདུན་ཞུ་མཁན་བྱུང་བར་དགྱེས་བཞིན་གནང་ནས་དུས་སྐབས་འདི་འདྲར་དེ་རིང་ཆོ་འཕྲུལ་ཟླ་བའི་དུས་ཆེན་ལ་ཟབ་ཆོས་འདི་ལྟ་བུ་འདོན་རྒྱུ་བྱུང་བ་བསོད་ནམས་ཁྱད་པར་ཅན་བསགས་སོང་ཞེས་ཕེབས། དེ་ནས་སྙུན་རིམ་ལྗིར་བཞེས་ཀྱང་ཁུ་ནུ་བ། འབྲུག་པ། དབྱིན་ཅི་ནང་ཆོས་ལ་དད་པ་སོགས་དད་འདུས་སྣ་ཚོགས་ལ་ཀློང་སྙིང་རྩ་གསུམ། མཆོག་གཏེར་སྒྱུ་འཕྲུལ་བཅས་གསུང་བཞིན། ཀུན་གྱི་རེ་འདོད་སྐོང་ཐུབ་ཟེར་བ་དཀའ་ནའང་ཆེད་དུ་རེ་ལྟོས་མཁན་འདི་རྣམས་ལ་འདོད་སྐོང་ཅི་ནུས་སྒྲུབ་དགོས་ཚུལ་སོགས་ཕེབས། འདི་རྣམས་གདུལ་བྱའི་ཐ་མ་ཡིན་འདུག །དེ་ལྟར་ན་གངས་ལྗོངས་རྒྱལ་བསྟན་རིས་སུ་མ་ཆད་པའི་མངའ་བདག་ཆོས་ཀྱི་འཁོར་ལོས་བསྒྱུར་བ་ཆེན་པོ་ཐམས་ཅད་མཁྱེན་གཟིགས་འཇམ་དབྱངས་མཁྱེན་བརྩེའི་དབང་པོ་ཞེས་སྙིགས་མའི་དུས་འདིར་རྒྱལ་བའི་བསྟན་པ་ལ་སྟོན་པ་གཉིས་པ་ལྟ་བུའི་མཛད་རྗེས་ཅན་དེ་དང་རྣམ་དབྱེར་མེད་པའི་ཐུགས་བསྐྱེད་དང་ཕྲིན་ལས་སྒོ་ཀུན་ནས་སྐྱོང་བར་མཛད་པ་ནི་བདག་ཅག་གི་དཔལ་ལྡན་བླ་མ་འདི་ཁོ་ན་ཙམ་དུ་ངེས་པ་བསྟོད་འདོད་དང་སྒྲོ་བཏགས་ཙམ་མ་ཡིན་པར་རྣམ་ཐར་འོད་ཟེར་བརྒྱ་པའི་སྣང་བ་འཇིག་རྟེན་ཀུན་ལ་ཐུན་མོང་དུ་གྱུར་པའོ། །དེ་ལྟ་བུའི་བསམ་གྱིས་མི་ཁྱབ་པའི་རྣམ་ཐར་འགྲན་ཟླ་དང་བྲལ་བའི་ཕྲིན་ལས་ཐམས་ཅད་མཐར་ཕྱིན་ནས། སྒྱུ་འཕྲུལ་ལས། མ་རིག་སྨིན་མཛད་འདུལ་བའི་ཕྱིར། །བྱུང་ནས་མྱ་ངན་འདའ་བར་སྟོན། །ཅེས་དང༌། གསེར་འོད་དམ་པའི་མདོ་ལས། གཞན་ཡང་རིགས་ཀྱི་བུ་དེ་བཞིན་གཤེགས་པ་དེ་མྱ་ངན་ལས་འདའ་བར་བསྟན་པ་དང༌། སེམས་ཅན་རྣམས་དེ་དཀོན་པ་དང་འཕྲད་པར་དཀའ་བའི་འདུ་ཤེས་དང༌། མྱ་ངན་དང་སྡུག་བསྔལ་གྱི་འདུ་ཤེས་ལ་སོགས་པ་བསྐྱེད་པས། སངས་རྒྱས་བཅོམ་ལྡན་འདས་ཀྱིས་གསུངས་པའི་མདོ་འདི་དག་མྱུར་དུ་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། གཞན་དག་ལའང་རྒྱ་ཆེར་ཡང་དག་པར་སྟོན་པ་ལ་སྐུར་པ་འདེབས་པ་མེད་པར་འགྱུར་བས། དེའི་ཕྱིར་དེ་བཞིན་གཤེགས་པ་སྐུ་ཚེ་ཐུང་བར་བསྟན་ཏོ། །ཞེས་སོགས་ནས། རིགས་ཀྱི་བུ་དེ་ལྟ་བས་ན་དེ་བཞིན་གཤེགས་པ་རྒྱུ་མཚན་དང་རྐྱེན་དེའི་ཕྱིར་འཇིག་རྟེན་ན་ཡུན་རིང་དུ་མི་བཞུགས་ཤིང་མྱུར་དུ་མྱ་ངན་ལས་འདའ་བར་མཛད་པས་དེ་བཞིན་གཤེགས་པ་རྣམས་ནི་ཐབས་མཁས་པ་ཕུན་སུམ་ཚོགས་པ་དེ་ལྟ་བུས་སེམས་ཅན་རྣམས་ཡོངས་སུ་སྨིན་པར་མཛད་དོ། །ཞེས་དེ་བཞིན་གཤེགས་པའི་སྐུ་ཚེའི་ཚད་མཐའ་མེད་པའང་གདུལ་བྱ་འདུལ་བའི་ཐབས་མཁས་ཀྱིས་མྱ་ངན་ལས་འདའ་ཚུལ་སྟོན་པར་གསུངས་པ་བཞིན། རྗེ་བླ་མ་དམ་པ་འདི་ཉིད་ཀྱང་ངེས་པའི་དོན་དུ་དུས་གསུམ་གྱི་རྒྱལ་བ་ཐམས་ཅད་སྐྱེད་པའི་ཡབ་དུ་གྱུར་པ་བཅོམ་ལྡན་འདས་ཁྱབ་བདག་འཇམ་པའི་རྡོ་རྗེ་ཉིད་སུམ་ལྡན་རྡོ་རྗེ་འཛིན་པའི་རྣམ་པར་འཕྲུལ་བས་ན་རྟེན་འདིས་བགྲེས་རྒུད་མེད་པར་ཇི་སྲིད་བསྐལ་པའི་བར་སོགས་སུ་འཚོ་ཞིང་གཞེས་པའང་དོན་དུ་འགྱུར་བར་དགོངས་ན་བཞུགས་པར་ངེས་ཀྱང༌། གཤེགས་བཞུགས་བགྲེས་རྒུད་ཀྱི་རྣམ་པ་ཐམས་ཅད་ཚུར་མཐོང་གདུལ་བྱའི་སྣང་ངོར་ཤར་བས་ན་སྙིགས་མའི་སྐྱེ་བོ་རྣམས་བསོད་ནམས་དང་སྐལ་བ་དམན་པས་དེ་ལྟ་བུའི་ཐུགས་རྗེ་འཇུག་པའི་ཡུལ་དུ་མ་གྱུར་ཅིང༌། ཞིང་ཁམས་གཞན་དང་གཞན་དུ་ཕྲིན་ལས་འཇུག་པ་ལ་དོན་ཆེ་བར་གཟིགས་ཏེ་ཡུན་རིང་པོར་མི་བཞུགས་པའི་གསུང་འཕྲོས། སྔ་མ་སྙུན་ཁམས་ཅུང་ཟད་རེ་འཁྲུགས་སྐབས་ནས་ངེད་ཀྱི་ནད་འདི་དཔལ་སྤུངས་སྐྱབས་མགོན་བདེ་གཤེགས་ཀྱི་སྙུན་ཁམས་དང་གཅིག་པ་ཉིད་འདུག་ཅེས་ལན་མང་གསུངས་ཞིང༌། ཉེ་ཆར་ལོ་སྔ་མར་ཞབས་བརྟན་ཕུལ་སྐབས་བཀའ་གསལ་ཕེབས་པའི་དོན་སྙིང་རགས་བསྡུས། ངོས་རང་ཐོག་མར་འཇམ་མགོན་རིན་པོ་ཆེས་ངོས་འཛིན་གནང་བ་ནས་བཟུང་བསྟན་འགྲོར་མཛད་རྗེས་གནང་བ་རྣམས་དམིགས་བསལ་གྱི་རྗེ་མཁྱེན་བརྩེའི་དབང་པོའི་ཕྲིན་ལས་ཀྱི་མཇུག་སྐྱོང་ཡིན་པའི་རྒྱུ་མཚན་བཅས་གསུངས་འཕྲོས། རང་ལོ་རེ་གསུམ་ནས་སྐུ་ཚབ་རིན་པོ་ཆེར་བརྟག་བསྒྲིལ་ཞུས་དོན་གནས་འབྲེལ་བསྐྱོད་རྒྱུ་བྱུང་བ་མདོ་ཁམས་ནས་དབུས་གཙང་འཕགས་བལ་བར་གནས་རྟེན་ཞིབ་མཇལ་ཕྱག་བསྐོར་མཆོད་འབུལ་དང༌། ཞར་བྱུང་སྐྱེ་འགྲོ་མཆོག་ཕལ་མང་པོར་དངོས་བརྒྱུད་ནས་ཐར་པའི་ས་བོན་ཅི་ཐེབས་ཀྱི་རྣམ་དཀར་ལ་འབད་པ་རྣམས་གཙོ་བོར་རྒྱལ་བསྟན་རིན་པོ་ཆེ་དར་རྒྱས་ཡུན་གནས་དང༌། རང་གཞན་ཐམས་ཅད་འཕྲལ་ཡུན་ཀུན་ཏུ་དགེ་བའི་དམིགས་འདུན་གང་ཤེས་བགྱིས་པ་ཡིན། སླར་ཡང་རྒྱ་གར་དུ་གནས་བསྐོར་འགྲོ་རྒྱུ་བྱུང་བའང་རྗེ་མཁྱེན་བརྩེས་བོད་ཕྱོགས་གནས་གཟིགས་ལན་མང་གནང་ཡང་རྒྱ་གར་དུ་ཕེབས་མ་མཛད་པ་གུས་པའི་བགོ་སྐལ་ཡིན་རྒྱུའི་དེ་བཞིན་ཕྱག་མཆོད་སྨོན་ལམ་ཡིད་ཚིམ་པ་ཞུས། རྣམ་ཀུན་འབྲེལ་ཚད་དོན་ལྡན་གྱི་སྨོན་འདུན་ལ་བརྩོན་བཞིན་པ་སོགས་རང་ངོས་ནས་ལེགས་བྱས་ཀྱི་ཕྱོགས་ཙམ་སྟེ། དེ་ཐམས་ཅད་ཀྱང་རྗེ་བླ་མ་དམ་པ་གང་གི་ཕྲིན་ལས་ཀྱི་ཆ་ཤས་དང་ཟབ་དགོངས་རྫོགས་པའི་ཐབས་ཁོ་ན་ཡིན་པར་རློམས་པ་སྟེ། སྤྱིར་འཕགས་པའི་ཐུགས་བསྐྱེད་དང་ཕྲིན་ལས་མཐའ་དག་རྫོགས་པར་སོ་སོའི་སྐྱེ་བོས་སྒྲུབ་ག་ལ་ནུས་ཀྱང༌། རང་བློ་དང་འཚམ་པའི་བགོ་སྐལ་ཆ་ཤས་རིགས་ཅི་ལྟར་ནུས་པ་བསྒྲུབས་ཟིན་ཅིང༌། རྒྱ་ལ་ཁམས་སུ་སླེབས་རྒྱུ་འདྲ་ཡོད་དར་ནའང་སྐུ་ཆ་ཤས་གསེར་དང་གཟུངས་འབུལ་ལྷག་སོང་བ་དེ་ཙམ་བྱུང་ན་དང༌། བཟང་སྤྱོད་སྨོན་ལམ་འབུམ་ཐེར་གཅིག་ངེས་པར་འགྲུབ་ན་སྙམ་པ་ལས་གཞན་བསྒྲུབ་དགོས་འདི་ལྷག་སོང་སྙམ་པ་ཆེར་མེད་པ་མ་ཟད། གྲུབ་ཟིན་རྣམས་ཀྱང་རང་གི་བསོད་ནམས་ནི་ལེགས་པར་བསགས་ཟིན་པས་བདག་ཏུ་འཛིན་པ་གང་ཡང་མེད། ད་ནི་བགྲང་བྱ་ཡང་མཐོ་ཙམ་དུ་སོན་ཅིང་ལྷག་པར་ནད་མནར་ཤིན་ཏུ་ལྕི་བ་དང༌། གནས་དུས་ཀྱི་འགྱུར་བ་སོགས་གང་ཅིར་འཆི་བྲོད་དང་མི་འཇིགས་པའི་གདིང་ཚད་དང་མི་ལྡན་མོད། སྐྱེས་ཟིན་འཆི་བ་ལས་མ་འདས་པས་འགྱོད་ཀྱང་ཕན་པ་མེད་པ་དེར་ཟད། ཁྱེད་རྣམ་པས་ཡུན་རིང་སྡོད་དགོས་ཚུལ་གསུངས་ནའང་སྐྱེ་འཆི་ལ་དབང་ཐོབ་ཟེར་བ་ཤིན་ཏུ་དཀའ་བས་དེ་བཞིན་ཁས་ལེན་ཞུ་ནུས་ཀྱི་གདིང་ནི་ཅུང་ཟད་མེད་པ་རང་བློ་རང་ལ་ལྐོག་ཏུ་མ་གྱུར་པ་ཁོ་ན་ལགས། འོན་ཀྱང་བླ་མ་དཀོན་མཆོག་ཐུགས་རྗེས་ལོ་རེ་ཟླ་ཤས་ཙམ་མ་ཤི་ན་རང་ངོས་ནས་ཀྱང་ངེས་པར་དགའ་བས། དེ་བཞིན་རིང་དུ་འཚོ་བའི་སྨོན་འདུན་ཅི་ནུས་བྱེད་བཞིན་དང༌། ཞབས་བརྟན་ཡང་སྔར་ནས་ལབ་ཟིན་པ་ལྟར་གཙོ་བོར་བསྟན་འགྲོ་བདེ་ཐབས་སུ་བསྒྲུབ་རྒྱུ་ཉིད་དགོས་གལ་ཆེ་ཞིང་ཕྲན་གྱི་རྐྱེན་སེལ་དུའང་ཞར་བྱུང་དོན་གྱིས་འགྱུར་བས། བསྒྲུབ་འོས་རྣམས་བརྟག་པ་རིམ་གྱིས་གནང་ཆོག་ཚུལ་གྱི་གསུང་ཟབ་ཞིབ་ཏུ་བསྩལ་བ་དང་མཐུན་པར། ཟླ་བ་དེའི་ཚེས་ཉེར་གཅིག་ནས་རྗེ་གོང་མའི་སྐུ་མཆོད་མཁའ་འགྲོ་གསང་འདུས་སྒྲུབ་མཆོད་ཀྱི་དབུ་བཞུགས་གནང་སྟེ་ཚེས་ཉེར་ལྔའི་ཉིན་ཚོགས་དང་མཆོད་པ་རྒྱས་འཕར་མཁའ་འགྲོའི་བསྟོད་བསྐུལ་སོགས་ཆོ་ག་ཤིན་ཏུ་རྒྱས་པར་གནང་བའི་ཕྱི་དྲོ་ནས་སྙུན་ཁམས་ཆེར་འཁྲུགས་ཚུལ་བསྟན་པ་ན། ངོར་པ་ཐར་རྩེ་དང་ཀླུ་སྡིངས་རྣམས་དབུས་བཞུགས་ཀྱིས་སྒྲོལ་མ་གཡུལ་མདོས། བརྒྱ་བཞི། བདུད་བཟློག །གསུར་དང་ཆུ་གཏོར། ཚེ་ལྷ་རྣམ་གསུམ་མཆོད་ཆོག །གནས་ཆོག །སྒྲོལ་ཆོག །ཆོས་སྐྱོང་བསྐང་གསོ། རྩ་གསུམ་ཚོགས་བསྐང་བརྟན་བཞུགས་བཅས། རྒྱ་སྟོན་བླ་མས་གཅོད་ཚོགས་དང་མདོས་གླུད་རིགས་གྲངས་མང༌། ཚེ་སྒྲུབ་སོགས་ཕུལ། སྤྲུལ་སྐུ་བསོད་རྒྱལ་གཙོས་ནང་སྐོར་ཞབས་གྲས་རྣམས་ནས་མཁའ་འགྲོའི་ཚོགས་བསྐང་དང་སུན་བཟློག་སོགས་ཞབས་བརྟན་རིགས་མུ་མཐུད་སྒྲུབ་མུས། དབོ་ཟླའི་ཡར་ཚེས་སྐོར་སྙུན་ཁམས་ཅུང་ཟད་དྭངས་ཚུལ་བསྟན། ཀ་སྦུག་ནས་བདུད་འཇོམས་རིན་པོ་ཆེས་ཞབས་བརྟན་ཆེད་ཕུལ་བྱུང་བར་སླར་སྐྱེས་ལན་དུའང་ཞབས་བརྟན་ཕུལ། ཚེས་བཅུར་ཚོགས་བསྐང་རྒྱས་པར་གནང༌། འདི་སྐོར་ནས་བོད་དུ་འཁྲུག་ཟིང་རིམ་པར་བྱུང་འདུག །སྤྱིར་བསྟན་འཛིན་སྐྱེས་ཆེན་དམ་པ་རྣམས་དང་ལྷག་པར་རྗེ་འདི་ཉིད་ཀྱི་ཐུགས་ཀྱི་བརྣག་པ་མཐར་ཐུག་པ་ནི་བསྟན་འགྲོའི་དོན་ཉག་གཅིག་ཏུ་གྱུར་པ་བཞིན། སྔ་རྗེས་གསུང་འཕྲོས་སུ་ད་སྐབས་ཕྱིའི་རྒྱལ་ཁབ་རྣམས་ནང་པའི་ཆོས་ལ་དང་ལེན་གྱི་སོ་སོའི་སྐད་ཡིག་ཏུ་བསྒྱུར་བ་དང༌། ཆོས་ཚོགས་འཛུགས་པ་སོགས་ཀྱི་གཅེས་སྤྲས་བྱེད་སྐད་མང་པོ་བཤད་འདུག་པ་རྗེས་སུ་ཡི་རང་གི་ཡུལ་དུ་གྱུར་ཅིང༌། རྒྱལ་བའི་ཕྲིན་ལས་ཀྱི་འཇུག་པ་བསམ་གྱིས་མི་ཁྱབ་པས་དེ་ལྟར་མི་འབྱུང་བའི་ངེས་པའང་ཅི་ཡོད་དེ། རང་རེ་བོད་འདི་སྤྲུལ་པའི་ཆོས་རྒྱལ་ལོ་པཎ་རྣམས་ཀྱི་ཐུགས་རྗེས་མདོ་སྔགས་བསྟན་པ་ཡོངས་རྫོགས་དར་ཞིང་རྒྱས་པ་ད་ལྟའང་ས་བོན་མ་ནུབ་ཙམ་དུ་གནས་པ་འདི་ལ་ཀུན་གྱིས་རྒྱུ་མཚན་ཤེས་པའི་གཅེས་སྤྲས་ཀྱིས་མྱུར་དུ་ཉམས་ཆག་མ་ཤོར་ཐབས་ཁོ་ན་འབད་དགོས་ཤིན་ཏུ་གལ་ཆེ། ཐ་ན་བསམ་པ་བཟང་པོའི་སྨོན་འདུན་རེ་བྱས་ནའང་དགོས་པ་ཆེ་ཚུལ་ཡང་ཡང་ཕེབས་ཤིང༌། རྗེ་ཉིད་ནས་གསུང་ཆོག་རིགས་བར་མེད་ཀྱི་ཁུར་བཞེས་དང་ཐུགས་ཁྲལ་ཤིན་ཏུ་ཆེ་བར་གནང༌། དགོས་པ་དགོངས་གཞི་གང་ཡིན་སུས་རྟོགས་ཀྱང་བོད་ཕྱོགས་སུ་ཕེབས་བཞེད་ཀྱི་རྣམ་པ་འདྲ་ཞིག་བརྒྱུད་མར་མཛད་ཅིང༌། གུས་ལྷ་ལྡན་དུ་ཡོད་སྐབས་ཕྱག་བྲིས་བསྩལ་བ་ཐམས་ཅད་དུ་སྨོན་ཚིག་ཡན་ཆད་བོད་དུ་ཕེབས་རྒྱུ་ཁོ་ནར་གནང༌། བོད་ཀྱི་བསྟན་པ་ལ་ཉམས་ཆག་བྱུང་ཚུལ་གསན་པ་དེ་ཕྱིན་ཐམས་ཅད་མཁྱེན་པ་དབུ་ཐོན་ཡོད་རྒྱུར་ཐུགས་བདེའི་རྣམ་པ་ཙམ་ལས། གཞན་བོད་ཀྱི་དོན་སྐོར་གསུང་ཟུར་ཙམ་ཕྱི་ནང་སུ་ལའང་གནང་བར་མ་མཛད། སློབ་མ་ཁྲིད་ཞུ་བ་རྣམས་ལ་ཡེ་ཤེས་བླ་མ་ཞིག་འདོན་རྒྱུ་བྱུང་ན་སྙམ་ཡང༌། ཁོང་ཚོས་ཁྲིད་སྦྱང་ཇི་བཞིན་བྱུང་མི་འདུག་ཅེས་ཕེབས་བཞིན། གཟིམ་མལ་ནས་བཞེངས་བཞུགས་སྐབས་སྐུ་བརྡབས་ཤོར་བའི་རྣམ་པས་སྙུན་ཁམས་སླར་འཁྲུགས། ཞབས་བརྟན་དུ་མཆོག་གླིང་རིན་པོ་ཆེ་དང༌། རྒྱ་སྟོན་སོགས་དཔོན་སློབ་སུམ་ཅུར་ཉེ་བས་འཕགས་མའི་སྙིང་ཐིག་གི་སྒྲུབ་ཆེན་ཚུགས། ནག་ཟླའི་ཡར་ཚེས་ལ་ལྷ་ཡུམ་ནས་འགན་བཞེས་ཏེ་རྒྱ་སྟོན་འཁྲུལ་ཞིག་ཟུང་གིས་དཀོན་སྤྱིའི་སྒོ་ནས་སུན་བཟློག་བརྟན་བཞུགས་དང༌། སྒྲུབ་ཆེན་དངོས་གྲུབ་བླང་བ་དང་འབྲེལ་བརྟན་བཞུགས་རྣམས་རིམ་པར་ཕུལ། རྒྱ་བོད་སྨན་བཅོས་ཀྱང་གང་ཟབ་ཞུ་བཞིན་བརྡབས་རྐྱེན་གྱི་སྙུན་ཟུག་རིམ་ཞིར་གྱུར་ཀྱང་སྙུན་ཁམས་སྤྱིར་གཞི་ལྕི་བ་ལས་མ་གཡོས་ཤིང་བཞེངས་བཞུགས་གནང་དཀའ་བར་གྱུར། ས་སྐྱ་བདག་ཆེན་རིན་པོ་ཆེ་ལ་ཆེན་དུ་བཞུགས་པ་ཆེད་དུ་གདན་ཞུས་དང༌། བདུད་འཇོམས་རིན་པོ་ཆེ། རྡོ་གྲུབ་སྤྲུལ་སྐུ། བྱ་བྲལ་སངས་རྒྱས་རྡོ་རྗེ་སོགས་ལ་བརྟན་བཞུགས་ཐུགས་སྨོན་དང་གདན་འདྲེན་སོགས་ཕུལ། སྐུ་ཞབས་ཁམས་སྤྲུལ་རིན་པོ་ཆེས་གཤིན་རྗེ་ཁྲོ་ཆུའི་གཏོར་བཟློག །དཀོན་སྤྱིའི་ཚོགས་བསྐང་སུན་བཟློག་བརྟན་བཞུགས་ཀྱིས་མཚོན་ཞབས་བརྟན་རིགས་བརྒྱུད་མར་སྒྲུབ་བཞིན། ནག་ཟླའི་ཚེས་བཅོ་ལྔར་དམིགས་བསལ་བཀའ་ཕེབས་ཏེ་མཆོད་ཚོགས་རྒྱས་སྤྲོས་རྗེ་ཉིད་སྐུ་རྐྱང་གིས་དུས་ཀྱི་འཁོར་ལོའི་མཆོད་ཆོག་རྒྱས་པར་མཛད་རྗེས་གསུང་ཆོག་གཞན་མ་གནང༌། འདི་སྐོར་ནས་སྙུན་ཁམས་ཀྱང་བཞེངས་བཞུགས་དཀའ་བ་ཙམ་ལས་གཞན་ཚབས་ཆེར་མེད་པའི་ཚུལ་ལྟ་བུར་བཞུགས། ས་ཟླའི་ཡར་ཚེས་ལ་ངོར་པའི་མཁན་ཁག་གསུམ། མཆོག་གླིང་རིན་པོ་ཆེ། རྒྱ་སྟོན་སོགས་བླ་སྤྲུལ་མཁན་སློབ་ཉི་ཤུ་སྐོར་ནས་རྩ་གསུམ་ཚོགས་བསྐང་སུན་བཟློག་བརྟན་བཞུགས་དང་འབྲེལ་ཞབས་པད་ཡུན་དུ་བརྟན་བཞུགས་གྲུབ་པ་ཞེས་མགྲིན་གཅིག་གིས་གསོལ་བ་བཏབ་པའི་ལན་དུ་རྟེན་འབྲེལ་ལ་དགོངས་པའི་གསུང་ལན་ཅི་བདེར་གནང༌། ཡང་བསྐྱར་དུ་ད་ལྟའི་སྙུན་ཁམས་བཞེས་ཚུལ་བསྟན་པ་འདི་འཕྲལ་དྭངས་ཡོང་བའི་ཐབས་ཚུལ་ཞབས་རིམ་བསྒྲུབ་འོས་གང་ཟབ་བཀའ་གནང་གྲུབ་པའི་ཞུ་ནན་ཆེར་ཕུལ་བར། ད་ལྟ་ན་རྒྱུ་འདི་ནི་ཚབས་ཆེན་ཅི་ཡང་མ་རེད་པས་ཡུན་རིང་མི་དགོས་པར་དྭངས་འགྲོ་རྒྱུ་ཐག་ཆོད། ཁྱེད་རྣམས་པས་ཀྱང་དེ་བཞིན་དགོངས་ཤིང་ལོས་ཡོད། ཞབས་བརྟན་ཀྱང་ད་སྔ་རྒྱ་ཆེར་གྲུབ་སོང་བ་ད་ནི་དམིགས་བསལ་བསྒྲུབ་འོས་ཆེར་མི་འདུག །མཁན་རིན་པོ་ཆེ་རྣམ་པས་བྱབ་ཁྲུས་རེ་གནང་ན་བཀའ་དྲིན་ཆེ་ཚུལ་ཙམ་ཞིག་ཕེབས། ས་སྐྱ་བདག་ཆེན་རིན་པོ་ཆེ་ཡང་ཞབས་སོར་འཁོད་ནས་ཚེ་དབང་དགུང་གྲངས་དང་བརྟན་བཞུགས་བཅས་ཞབས་པད་ཡུན་རིང་བརྟན་བཞུགས་གྲུབ་པ་དང༌། ཞབས་རིམ་བསྒྲུབ་འོས་བཀའ་གསལ་གནང་གྲུབ་ཀྱི་ཞུ་ནན་ཕུལ་བ་ལའང་རྟེན་འབྲེལ་ལ་དགོངས་པའི་ཞལ་བཞེས་གསུང་ལན་ཅི་བདེར་འབུལ་གནང་ལ། བདག་ཆེན་རིན་པོ་ཆེས་སླར་ཡང་ཞབས་པད་བརྟན་པའི་ཞུ་ནན་དང་བཅས་སྐུ་ཁྲུས་ཚེ་དབང་རིགས་དང༌། ཐུགས་བཞེད་འཇམ་དཔལ་ཨ་ར་པ་ཙ་ནའི་རྗེས་གནང་བཅས་ཕུལ། ངོར་མཁན་ཁག་ལ་འདི་རྣམས་རྗེ་རྡོ་རྗེ་འཆང་ཀུན་དགའ་བཟང་པོའི་བཞུགས་ཁྲིར་ཕེབས་པའི་སྐྱེས་ཆེན་དམ་པ་ཡིན་པས་ཞོར་དུ་ཆོས་འབྲེལ་རེ་གནད་ཆེ་གསུངས་པ་ལྟར་སོ་སོ་ནས་རྗེས་གནང་བྱབ་ཁྲུས་རྣམས་རིམ་པར་ཕུལ། གཞན་ཡང་བླ་སྤྲུལ་དང་དད་འདུས་སློབ་འབངས་བཅས་ནས་ཚེ་ལྷ་རྣམ་གསུམ་མཆོད་ཆོག །ཕྱོགས་བཞིའི་འབར་མ། ཆོས་སྤྱོད་གཏོར་བསྔོ་འབུམ་ཐེར། དམ་ཚིག་རྡོ་རྗེའི་བསྒོམ་བཟླས་སོགས་བར་མེད་དུ་སྒྲུབ་བཞིན་པ་དང༌། མཆོག་གླིང་རིན་པོ་ཆེ་རྒྱ་སྟོན་དཔོན་སློབ་ནས་ཕ་རོལ་རྒོལ་འཇོམས་གཏོར་བཟློག །རྡོ་གྲུབ་དཔོན་སློབ་ནས་ཡུམ་བཀའི་ཚོགས་དང་མེ་མཆོད། དད་སློབ་སྦྱིན་བདག་གཞན་ནས་ཀྱང་རྩ་གསུམ་ཚོགས་འབུམ་སོགས་ཞབས་བརྟན་རྒྱ་ཆེར་སྒྲུབ་མུས། འདི་སྐོར་ནས་ཤེར་ཕྱིན་སྡུད་པ་སོགས་ཞལ་འདོན་ཕྱག་དཔེའི་སྟེང་ནས་གསུངས་དགོས་རྣམས་ཞག་འགར་ཉིན་རིང་ནན་གསུངས་གནང་ཞིང༌། ད་ནི་དེ་རྣམས་བསྒྲིལ་ལུགས་ལེགས་པར་གྱིས་ལ་སྟེགས་ཁར་ཡར་ཞོག་ཅིག་ཅེས་གསོལ་དཔོན་ལ་གནང༌། གཟིམ་ལམ་དུ་སྒྲུབ་ཆེན་གྲོལ་རྒྱུའི་མར་མེ་སྨོན་ལམ་གནང་བ་ལན་བཏུད་མར་བྱུང་ཚུལ་དང༌། ལན་གཅིག་བཀའ་བརྒྱད་སྒྲུབ་ཆེན་གྲོལ་རྒྱུའི་དཀྱིལ་འཁོར་ཕལ་ཆེར་བསྡུས་ཟིན་ནས་མར་མེའི་སྨོན་ལམ་བྱེད་བཞིན་མར་མེ་རྣམས་ཧ་ཅང་མི་གསལ་བར་འདུག་པ་ཤིན་ཏུ་གསལ་པོརསྨིས་ཚུལ་ཕེབས། ཚེས་ཉེར་ལྔར་ཞབས་གྲས་རྣམས་ནས་སྙིང་ཐིག་ཡུམ་བཀའི་ཚོགས་བསྐང་བཀའ་བཞིན་ཕུལ། འདི་ནུབ་སྲོད་ཡོལ་དུ་ས་གཡོས་ཆེ་ཙམ་ཡང་བྱུང་ཞིང༌། ཕྱི་ཉིན་སྔ་དྲོའི་ཆར་ཐུགས་ཁམས་ཤིན་ཏུ་གསལ་དྭངས་ལྟ་བུར་དེ་རིང་ན་རྒྱུ་དྭངས་ཚར་བ་འདྲ་ཞིག་རེད། ད་ནི་ལངས་སྟེ་འགྲོ་སྙིང་འདོད་པ་འདུག་ཅེས་སྐུ་བཞེངས་པའི་གཡས་ནས་ཕྱག་བརྟེན་བཅས་ཉེ་སྐོར་ཕར་ཕེབས་ཚུར་ཕེབས་རིང་ཙམ་མཛད། འབྲུག་ནས་ཀརྨ་པ་དང༌། སྐུ་ཞབས་སི་ཏུ་རིན་པོ་ཆེ་སོགས་ཕེབས། འབྲུག་དབང་མོ་སོགས་ལ་མཇལ་འཕྲད་བཀའ་མོལ་ཞིབ་པར་གནང༌། ཕྱི་ཉིན་ནས་སླར་ཡང་སྙུན་ཁམས་རིམ་ལྕིར་ཕེབས་ཚུལ་བསྟན། སྣྲོན་ཟླའི་ཡར་ཚེས་ནས་ས་སྐྱ་བདག་ཆེན་རིན་པོ་ཆེ་དང༌། རྒྱལ་དབང་ཀརྨ་པའི་མདུན་ནས་ཞབས་པད་བརྟན་དགོས་གསུང་ནན་གནང་བར་རིན་པོ་ཆེ་རྣམ་པས་ཐུགས་སྨོན་འདྲ་གནང་ན་དྲགས་ཤིང་ཡོད་འགྲོ་ཞེས་གསུང་ལན་གནང༌། འཁྲུལ་ཞིག་ནས་ཀྱང་ཞབས་པད་བརྟན་དགོས་ཀྱི་ཞུ་ནན་དང་སྐུ་ཁྲུས་སོགས་ཕུལ། ཚེས་གསུམ་ཉིན་འབྲས་ལྗོངས་སྲས་ཡུམ་ནས་ཐུགས་འགན་བཞེས་ཏེ་རྒྱ་བོད་སྨན་པས་སྙུན་ཁམས་མཇལ་རྟོག་ཞུས་པར་ཕྱག་རྩ་སོགས་ལ་སྐྱོན་གང་ཡང་མེད་ཚུལ་བཤད། སྲས་ཡུམ་ཟུང་ལ་སྤྱན་ཅེར་གྱིས་གཟིགས་ཏེ་ཞལ་འཛུམ་པ་གནང༌། ཞབས་བརྟན་དུ་རྡོར་སེམས་ཚོགས་འབུམ་དཔོན་སློབ་ཉི་ཤུ་སྐོར་ནས་ཚུགས། ཚེས་ལྔ་ཉིན་རྒྱལ་དབང་རིན་པོ་ཆེས་དཀོན་སྤྱིའི་ཚེ་དབང་དང་བཀའ་མོལ་གནང་ནས་རུམ་བཏེགས་སུ་ཆིབས་བསྒྱུར་གནང༌། ས་སྐྱ་བདག་ཆེན་ནས་ཕུར་པའི་སྲི་མནན་ཁག་བཞི་དང་ཚེ་དབང་སྐུ་ཁྲུས་སོགས་བར་མེད་དུ་གནང༌། འདི་སྐོར་ཐུགས་ཡེངས་པའི་རྣམ་པས་ངོས་ཀྱི་རྩ་བའི་བླ་མ་ཐམས་ཅད་བྱོན་ནས་འདུག་ཀྱང་རྡོ་རྗེ་འཆང་བློ་གཏེར་དབང་པོ་ད་སྔོན་ཕེབས་མ་བྱུང་ཞེས་གསང་ཡུམ་ལ་ཞལ་འཕྲོས་གནང༌། དེ་འཕྲལ་ནས་རྨི་ལམ་རྨིས་པ་རེད། འཁྲུལ་སྣང་ཟ་ཟིའི་རྨི་ལམ་མི་འབྱུང་བ་ཅི་ཡོད་ཅེས་ཞལ་བསྒྱུར་བར་མཛད། དེ་ནས་གསུང་ཆེར་མ་བྱོན། སྐབས་མཚམས་ཕྱག་གཡས་སྡིག་མཛུབ་ཐུགས་ཀ་དང་པུས་སྟེང༌། སྤྱན་ལྟ་སྟངས་ཀྱིས་ནམ་མཁར་ཡུན་རིང་ཙམ་དང་བྱང་ཤར་ཕྱོགས་སུ་ཡང་ཡང་གཟིགས་པར་མཛད། ཚེས་དྲུག་གི་དགོང་ཁར་བཞེས་ཐང༌། གསོལ་ཆང༌། འོ་མ་སོགས་ཕུལ་བ་སོ་སོ་ནས་ཅུང་ཟད་རེ་བཞེས་ཤིང་ཐུགས་ཁམས་ཀྱང་བག་ཙམ་གསལ་བའི་རྣམ་པར་བཞུགས། ཕྱེད་ཡོལ་གླང་གི་ཕྱི་ཆ་ཙམ་ནས་སྐྱེ་མེད་ཀྱི་ཡི་གེའི་སྒྲ་གདངས་བརྩེགས་མ་ལན་འགའ་དང་བཅས་དགོངས་པ་ནང་གསལ་གདོད་མའི་གཞི་དབྱིངས་ཆེན་པོར་མངོན་པར་བྱང་ཆུབ་པའི་ཚུལ་བསྟན་པར་མཛད་དོ། །དེ་འཕྲལ་རང་བྱུང་བསྟན་པའི་བཙས་འདས་རྗེས་ཀྱི་གླེགས་བམ་དང་འཁོར་ལོ་སྐུ་ལུས་ལ་ཕུལ་ནས་ཞག་གསུམ་གྱི་བར་དུ་གསང་རྒྱས་བཏབ། ཚེས་དགུ་ཉིན་བདག་ཆེན་རིན་པོ་ཆེ་དབུས་གསར་རྙིང་མཁན་ཁག་བླ་སྤྲུལ་རྣམས་ནས་བླ་མ་མཆོད་ཆོག་དང་འབྲེལ་སྤྱི་མཐུན་ཐུགས་དམ་བཞེངས་གསོལ་བཅས་གསང་རྒྱ་བརྟོལ། ཀྱེ་རྡོར། རྡོར་སེམས། རྣམ་སྨེ་སོགས་ཀྱིས་བསྒྲུབ་པའི་བུམ་ཆུ་དང་དྲི་བཟང་གི་ཆུས་སྐུ་གདུང་རིན་པོ་ཆེ་ལེགས་པར་བཀྲུས་ཤིང་ཆོས་སྨན་དང་ག་པུར་སྨན་སྣ་སོགས་ཀྱིས་བྱུགས། གསར་རྙིང་གི་རྒྱུད་སྡེ་ནས་བྱུང་བའི་གནས་ཡིག་གསེར་ཞུན་གྱིས་བྲིས་པ་དང༌། བཏགས་གྲོལ། རྒྱུད་ཀྱི་གླེགས་བམ་རྣམས་སྐུའི་གནས་སོ་སོར་མ་འཁྲུལ་བར་ཕུལ་ཞིང༌། རས་དཀར་དྲི་བཟང་གིས་བསྒོས་པ་དང་བཟང་གོས་སེར་པོས་ལེགས་པར་དཀྲིས་པའི་བར་རྣམས་སྨན་སྣའི་ཕུར་མས་གཅེར། ལོངས་སྐུའི་རྒྱན་ཆས་དང་ཕྱག་ཏུ་རྡོར་དྲིལ་འབུལ་བ། བསྙེན་བཀུར་བཅས་བཀའ་འགྱུར་ལྷ་ཁང་དུ་བཞུགས་ཁྲིར་བཞུགས་སུ་གསོལ་ནས་མཆོད་པའི་ཡོ་བྱད་རྒྱས་པར་བཤམས། ཐོག་མར་བདག་ཆེན་རིན་པོ་ཆེ་དབུས་བླ་སྤྲུལ་རྣམས་ནས་སྦྱང་ཁྲུས་བཅས་ལྷག་པའི་ལྷར་བསྐྱེད་བསྟིམ་མཆོད་བསྟོད་གསོལ་གདབ་སོགས་སྔོན་དུ་འགྲོ་བས་དེར་འདུས་རྣམས་དང་རིམ་པར་མཆོག་དམན་བར་མའི་འགྲོ་བ་གྲངས་མང་རྒྱུན་མི་ཆད་པར་སྐུ་གདུང་རིན་པོ་ཆེའི་མཇལ་ཁ་དང༌། གདུང་ཁྲུས་སྦྱིན་པ་སོགས་འབྲེལ་ཚད་དོན་ལྡན་གྱི་ཕྲིན་ལས་རྒྱ་ཆེར་འཕེལ། དེ་ཡང་ཇི་སྐད་དུ། རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ལས། མྱ་ངན་ལས་འདས་པ་དེ་ཡང་གཉིས་ཏེ། །ཡང་དག་པར་རྫོགས་པར་སངས་རྒྱས་པ་དང༌། མངོན་པར་རྫོགས་པར་སངས་རྒྱས་པའོ། །དེ་ལ་ཡང་དག་པར་རྫོགས་པར་སངས་རྒྱས་པ་ནི་ཕུང་པོ་ལྷག་མ་མེད་པར་སངས་རྒྱས་པའོ། །མངོན་པར་རྫོགས་པར་སངས་རྒྱས་པའི་སྐྱེས་བུ་དེ་ལ་འོད་དང༌། སྒྲ་དང༌། གདུང་དང༌། སྐུ་དང༌། ས་གཡོ་བ་ལ་སོགས་པ་འབྱུང་ངོ༌། །ཞེས་དང༌། དེ་ལྟར་འོད་ཀྱི་དཀྱིལ་འཁོར་དུ། །གང་ཞིག་བྱང་ཆུབ་རྙེད་པའི་མི། །འདི་ནི་སྐལ་ལྡན་སེམས་ཅན་གྱི། །སྤྲུལ་པ་ཡིན་གྱི་ཕྱོགས་བཅུ་རུ། །སེམས་ཅན་དོན་ཀྱང་རང་བཞིན་དུ། །འདི་ཡིས་བྱེད་དོ་མཁའ་འགྲོ་མ། །ཞེས་སོགས་གསུངས་པ་ལྟར་འདི་ནུབ་ས་རུབ་རྗེས་གློག་སྤར་བ་ཡང་མོག་པོར་བགྱིད་པའི་འོད་ཀྱི་སྣང་བ་ཤིན་ཏུ་གསལ་བས་ཕྱོགས་ཐམས་ཅད་ཁྱབ་པར་ཡུན་རིང་དུ་བྱུང་བར་ཀུན་ཀྱང་དད་གུས་ཆེས་ཆེར་འཕེལ། ཕྱི་རྒྱལ་མི་སྣ་ཁག་གིས་ཀྱང་འདི་ནི་ངེས་པར་དམ་པའི་སྐྱེས་བུ་དེ་ཉིད་དགོངས་པ་རྫོགས་པའི་རྟགས་སུ་ངེས་སོ་ཞེས་ངོ་མཚར་དུ་གླེང་བར་གྲགས། དེ་ནས་ཇི་སྐད་དུ། འདུལ་བ་ལུང་ལས། སཱ་ལའི་ཤིང་ལ་འཁྲི་ཤིང་བཞིན། །དམ་པ་རྣམས་ནི་བསྟེན་གྱུར་པ། །བཟང་པོའི་དཔལ་གྱིས་འཁྱུད་པར་བྱེད། །ཅེས་གསུངས་པ་ལྟར། ལྷར་བཅས་འགྲོ་བའི་འདྲེན་མཆོག་དམ་པ་གང་གི་རྣམ་ཐར་བཟང་པོའི་ཙན1$0000240ད1$0000300ན་གྱི་ཚལ་དུ་སྡོང་དུམ་ཕལ་པ་ས་ལ་ལྷུང་ཡང་མངར་པོའི་དྲིས་འཁྱུད་པ་བཞིན་ཞབས་འབྲེང་དུ་འཁོད་པ་དག་ཀྱང་ཡོན་ཏན་གྱིས་མཛའ་བ་ཆོས་ཉིད་དེ། རྗེ་བླ་མ་མཆོག་གི་སྐུའི་དབོན་མཛོད་སོགས་ནས་གུས་ཤིང་དང་བའི་བློ་གྲོས་དྲི་མ་མེད་པ་རྣམ་པར་དཀར་བས་མཚམས་སྦྱར་ཏེ་རྟག་གུས་ཀྱི་བརྩོན་པ་ཆེན་པོས་གཤེགས་རྗེས་དགོངས་རྫོགས་མཆོད་འབུལ་ཕངས་མེད་གཟབ་རྒྱས་སུ་ཇི་ལྟར་བསྒྲུབས་པའང༌། ཐོག་མར་གསང་རྒྱ་བརྟོལ་འཕྲལ་༧་གོང་ས་སྐྱབས་མགོན་ཏཱ་ལའི་བླ་མ་མཆོག་གི་མདུན་ཏར་འཕྲིན་ཕུལ་བར་བསྟན་འགྲོ་སྤྱི་བྱེར་གྱོང་ཆེ་ནའང་དོན་ཁྱད་པར་ཅན་གཞན་དུ་གཟིགས་ངེས་པས་དགོངས་བཞེད་ལེགས་འགྲུབ་ཀྱི་ཐུགས་སྨོན་གནང་རྒྱུའི་ཏར་ལན་ཕེབས། དེ་རྗེས་ཐུགས་དམ་སྟོན་པའི་ལི་སྐུ་ཁྱད་འཕགས་གཙོས་མཆོད་བསྔོ་རྟེན་འབུལ་ལམ་ཞུས་པར་ལྗགས་རྩོམ་མྱུར་འབྱོན་གསོལ་འདེབས་ངོ་མཚར་ཅན་སོགས་ཞིབ་གནང་གི་བཀའ་དྲིན་བསྩལ། རྒྱལ་དབང་ཀརྨ་པ་ཕེབས་ལམ་ཆར་ཞོད་ཀྱིས་བཀག་པས་བསྔོ་རྟེན་གཟབ་བཏུས་འབུལ་ལམ་དང༌། སླད་ནས་ཆེད་དུ་ཆིབས་བསྒྱུར་དང་འབྲེལ་གསུང་ཆོག་དང་སྐུ་གདུང་རིན་པོ་ཆེའི་མདུན་དུ་ཐུགས་སྨོན་ཟབ་རྒྱས་གནང༌། བདུད་འཇོམས་རིན་པོ་ཆེ་དབུས་ཀ་རྡོར་ཁུལ་བཞུགས་བླ་སྤྲུལ་རྣམས་ལའང་མཆོད་བསྔོ་སོ་སོར་བཀྲམ། གཙོ་བོར་སྐུ་ཚིགས་དང་པོར་ས་སྐྱ་སྒྲོལ་ཕོའི་སྐྱབས་མགོན་བདག་ཁྲི་རིན་པོ་ཆེ་དབུས། ངོར་མཁན་ཁག་ཞབས་དྲུང་ཆོག་རོག་པ་བཅས་ཀྱིས་ས་སྟ་སྔོན་དུ་འགྲོ་བས་འཁོན་ལུགས་རྡོ་རྗེ་ཕུར་པའི་སྒྲུབ་པ་གདུང་མཆོད་དང་འབྲེལ་བ་བདུན་ཕྲག་གཅིག །སྐུ་ཞབས་སི་ཏུ་རིན་པོ་ཆེ་རྒྱ་སྟོན་དཔོན་སློབ་ནས་ཀར་གླིང་ཞི་ཁྲོ། མཆོག་གླིང་རིན་པོ་ཆེ་དཔོན་སློབ་ནས་སྔགས་ཀྱི་གསོ་སྦྱོང༌། སློབ་ཚོགས་བྱིངས་ནས་དམ་ཚིག་རྡོ་རྗེའི་བཟླས་པ་འབུམ་ཐེར་བཅོ་བརྒྱད་གྲུབ་པ་དང་ལྷན་དུ་རྗེ་བླ་མ་རང་གི་དགོངས་བཞེད་བཟང་སྤྱོད་སྨོན་ལམ་འབུམ་ཐེར་གྱི་དབུ་ཚུགས། ཉིན་ལྟར་མར་མེ་སྟོང་དང་མཆོད་པ་གཟབ་རྒྱས་བཅས་ས་དགེ་ཀར་རྙིང་ཞྭ་ལུ་སོགས་རིས་མེད་པའི་དགེ་འདུན་དགེ་ཚུལ་སློང་གི་རྟེན་ཅན་དྲུག་ཅུ་ནས་བརྒྱ་སྐོར་བར་གྱིས་གསུངས། གཟིམ་ཆུང་དུ་གསང་ཡུམ་དབུས་ནང་སྐོར་ནས་ཚེས་བཅུར་སྙིང་ཐིག་ཡབ་བཀའི་ཚོགས་སྐོང་དང་ཞི་ཁྲོའི་སྐོང་ཆོག་ཚུགས། འདི་ནས་བརྩམས་སྐུ་གདུང་བཞུགས་རིང་ཚོགས་སྐོང་དང་ན་རཀ་སྐོང་བཤགས་ནར་མར་གསུངས། གོང་གསལ་རྡོར་སེམས་ཚོགས་འབུམ་སྐབས་འདིར་གྲུབ་པའི་སྐུ་ཡོན་སོགས་འབྲས་ལྗོངས་གཞུང་ནས་གཏོང་གནང་མཛད། དེ་ནས་གསར་རྙིང་ཆོག་ཁག་གཉིས་རེས་གདུང་མཆོད་འབུལ་རྒྱུར། སྐུ་ཚིགས་གཉིས་པ་ལ། ས་སྐྱ་ཕུན་ཕོའི་སྐྱབས་མགོན་གདུང་སྲས་སྐུ་བགྲེས་རིན་པོ་ཆེ་དབུར་བཞུགས། ཐར་རྩེ་མཁན་པོ། སྒ་ཐར་ལམ་མཆོག་སྤྲུལ་རྣམས་ཀྱེ་རྡོར་སྒྲུབ་མཆོད་བདུན་ཕྲག །རྡོ་གྲུབ་ནས་ཐུགས་ཆེན་སྡུག་བསྔལ་རང་གྲོལ། སྐུ་ཚིགས་གསུམ་པར་ས་སྐྱའི་རྗེ་བཙུན་མ་དང་མངའ་རིས་སྤྲུལ་སྐུ་སོགས་ནས་མཁའ་སྤྱོད་མའི་སྒྲུབ་མཆོད། རྒྱ་སྟོན་སྤྲུལ་སྐུས་ཇོ་ལུགས་དུས་འཁོར་མཆོད་ཆོག །སྐབས་འདིར་མར་ངོའི་ཚེས་བཅུར་ཁེལ་བས་སྐུ་གདུང་རིན་པོ་ཆེའི་མདུན་མཆོད་ཚོགས་གཟབ་སྤྲོས་ཀྱིས་བདག་ཁྲི་རིན་པོ་ཆེ་དབུས་ངོར་པའི་མཁན་ཞབས་སོགས་བླ་གྲྭ་བཞི་བཅུར་ཉེ་བས་རྣལ་འབྱོར་མའི་སྒྲུབ་མཆོད། རྡོ་གྲུབ་དང་མཆོག་གླིང་དབུས་བླ་གྲྭ་མང་བས་ཡུམ་བཀའི་ཚོགས་སྐོང༌། བཟང་སྤྱོད་འདུས་སྡེ་བཅས་ཡོངས་རྫོགས་ལ་བསྙེན་བཀུར་དང་ཕྱག་འགྱེད་བཅས་གསང་ཡུམ་མདུན་ནས་འཕར་མ་གནང༌། གཟིམ་ཆུང་དུ་བླ་སྒྲུབ་བྱིན་རླབས་སྙིང་པོའི་ཆོ་ག་ཚུགས། སྐུ་ཚིགས་བཞི་པར་ངོར་ཁང་གསར་མཁན་པོ་དབུར་བཞུགས་ཀྱི་ཀུན་རིག་སྒྲུབ་མཆོད། པདྨ་ཡང་རྩེའི་བླ་གྲྭ་ནས་བདེ་གཤེགས་ཀུན་འདུས་ཚུགས། བཟང་སྤྱོད་གསུང་མཁན་བྱིངས་ལ་སྐུ་ཡོན་ཕུལ། སྔ་མ་རྗེ་ཉིད་ཀྱི་གསུང་འཕྲོས་སུ་ཕྱོགས་འདིར་ཕེབས་པའི་དགེ་ཚུལ་སློང་རྣམས་གསོ་སྦྱོང་རེ་གནང་ན་ཤིན་ཏུ་ལེགས་ཚུལ་བཀའ་བསྩལ་བའི་དགོངས་དོན་ལྟར་སོ་ཐར་གྱི་སྡོམ་པའི་རྟེན་ཅན་དྲུག་ཅུ་སྐོར་ཐོག་མར་བཀྲ་ཤིས་པའི་གསོ་སྦྱོང་དང༌། ཉིན་བཞིན་གསོ་སྦྱོང་རེ་དང་བཅས་སྐུ་གདུང་རིན་པོ་ཆེའི་མདུན་བཟང་སྤྱོད་ཚུགས། མཆོད་པ་རྣམ་ལྔ་སོ་སོ་ནས་སྟོང་རྩ་རེ་ཉིན་བཞིན་ཕུལ། ཆུ་སྟོད་ཟླ་བའི་ཚེས་བཞིའི་དུས་ཆེན་ཉིན་བླ་གྲྭ་ཐམས་ཅད་གདན་ཞུས་ཀྱི་བཟང་སྤྱོད་སྨོན་ལམ་འབུམ་ཐེར་ཁ་སྐོང་བཅས་ལེགས་པར་གྲུབ། གཟིམ་ཆུང་དུ་སྙིང་ཐིག་དང་ཐུགས་སྒྲུབ་བླ་མཆོད་ཞག་འགའ་ཚུགས། སྐུ་ཚིགས་ལྔ་པར་རྫོང་སར་མངའ་རིས་སྤྲུལ་སྐུ་དབུར་བཞུགས་ཀུན་རིག་སྒྲུབ་མཆོད། དབེན་དགོན་ལུང་རྟོགས་སྒོམ་ཆེན་དབུར་བཞུགས་ཀྱི་སྨིན་གླིང་རྡོར་སེམས་ཚུགས། སྤྲེལ་ཟླའི་ཚེས་བཅུར་གཟིམ་ཆུང་དུ་བླ་མ་གསང་འདུས་ཚོགས་བརྒྱ་དང༌། སྐུ་གདུང་རིན་པོ་ཆེའི་མདུན་དད་ལྡན་འགའ་ནས་གཞི་ལེན་གྱི་རྡོ་གྲུབ་དང་མཆོག་གླིང་དབུར་བཞུགས་རིགས་འདུས་དང་ཐུགས་སྒྲུབ་བར་ཆད་ཀུན་སེལ་གྱི་ཚོགས་བརྒྱ་རེ། སྐུ་ཚིགས་དྲུག་པར་མཁར་མདོ་ཁང་གསར་ཞབས་དྲུང་དབུར་བཞུགས་ཀྱི་ཀུན་རིག་དང༌། གཡོན་རུ་གཏེར་སྲས་བླ་མ་སོགས་ནས་ཞི་ཁྲོའི་སྐོང་ཆོག་ཚུགས། བདུན་ཕྲག་རྗེས་མར་ཐར་རྩེ་རིན་པོ་ཆེ་དབུར་བཞུགས་ཀུན་རིག་སྒྲུབ་མཆོད། གནམ་མཚོ་དོ་སྐྱ་སྤྲུལ་སྐུ། མཆོག་གླིང་རིན་པོ་ཆེ་བཅས་དབུར་བཞུགས་གཏེར་གསར་ཞི་ཁྲོ་ན་རཀ་དོང་སྤྲུགས། ཚེས་ཉེར་ལྔར་ཆོག་ཁག་གཉིས་ལ་ཁ་གསབ་གསར་རྙིང་བླ་གྲྭ་ཡོད་རིགས་གདན་འདྲེན་དང་སྟོང་མཆོད་བཅས་འདིའི་ནུབ་སྐུ་གདུང་རིན་པོ་ཆེའི་མདུན་མཁའ་འགྲོ་གསང་འདུས་ཀྱི་ཆོ་ག་མཆོད་སྐོང་བྱེ་བྲག་པ་སོགས་གཟབ་རྒྱས། ཚེས་ཉེར་དྲུག་ཉིན་ཆོག་ཁག་སོ་སོས་སྦྱོང་ཁྲུས་བཅས་བསྔོ་ཡིག་རྣམས་བསྲེགས། གཉིས་ཀ་ལྷན་ཚོགས་གསར་རྙིང་བསྟན་པ་རྒྱས་ཆོག་རིགས་དང༌། བཟང་སྤྱོད་སོགས་སྨོན་ལམ་ཉིན་འགའི་བར་གསུངས་པ་རགས་རིམ་ཙམ་དང༌། གཞན་ཡང་དད་ལྡན་སློབ་ཚོགས་རྣམས་དང༌། སྦྱིན་བདག་ཆེ་ཕྲ་སོགས་མཆོག་ཕལ་ཀུན་ནས་རང་རང་འབྱོར་རྒུ་རྩལ་སྤྲུགས་ཀྱིས་མཆོད་འབུལ་དང་ཚོགས་བསགས། བློ་ནུས་དང་འཚམ་པའི་དགེ་སྦྱོར་ཆོས་འཆད་ཉན། གསོལ་འདེབས་སྨོན་ལམ་བཅས་ལ་ཉིན་མཚན་བར་མེད་དུ་བརྩོན་པས་དུས་འདའ་བརྣམས་ཀྱང་ཞར་བྱུང་ངོ༌། །དེ་ལྟར་གསོལ་དགུང་གི་གསུང་ཆོག་སོ་སོར་མཆོད་ཚོགས་རིགས་གཟབ་རྒྱས། སྐྱབས་མགོན་བདག་ཆེན་རིན་པོ་ཆེ་གཙོས་དབུར་བཞུགས་ཁག་ལ་རྟེན་གསུམ་གྱིས་ཐོག་དྲངས། མཁན་སྤྲུལ་བྱིངས་དང་ཆོག་གྲྭ་སོ་སོར་འོས་བསྟུན་དངོས་འབུལ་རྒྱ་ཆེ་སྤུས་ནོམ་ལྡན་པས་མཉེས་པ་སྒྲུབ་ཚུལ་ཞིབ་ཆ་དེབ་འཁོད་ལས་གསལ་ཏེ། དེའང་སྡོམ་འབྱུང་ལས། མཆོད་པ་ཐམས་ཅད་ཡོངས་སྤང་ནས། །བླ་མ་མཆོད་པ་ཡང་དག་བརྩམ། །དེ་མཉེས་པ་ལས་ཀུན་མཁྱེན་པའི། །ཡེ་ཤེས་མཆོག་ནི་ཐོབ་པར་འགྱུར། །ཞེས་དང༌། གསང་སྙིང་ལས། དབང་ཕྱུག་ལོངས་སྤྱོད་ལྔས་མཆོད་ན། །དཀྱིལ་འཁོར་ཐམས་ཅད་མཆོད་པ་ཡིན། །ཉེ་བའི་དཀྱིལ་འཁོར་སྨོས་ཅི་དགོས། །ཉེས་པ་ཐམས་ཅད་དག་པར་འགྱུར། །ཞེས་དང༌། སྤྱི་མདོ་དགོངས་འདུས་ལས། བསྐལ་པ་སྟོང་གི་སངས་རྒྱས་ལས། །བླ་མ་གཉན་པར་ཤེས་པར་བྱ། །ཅི་ཕྱིར་བསྐལ་པའི་སངས་རྒྱས་ནི། །བླ་མ་དག་ལ་བརྟེན་ནས་འབྱུང༌། །ཞེས་དང༌། ཀུན་འདུས་རིན་པོ་ཆེའི་རྒྱུད་ལས། གང་གིས་བསྐལ་པ་འབུམ་ཕྲག་ཏུ། །ལྷ་སྐུ་འབུམ་ཕྲག་བསྒོམས་པ་བས། །བླ་མ་ཅུང་ཟད་དྲན་པ་མཆོག །བསོད་ནམས་འདི་ནི་ཕ་མཐའ་ཡས། །ཞེས་དང༌། ནམ་མཁའ་དྲི་མ་མེད་པའི་མདོ་ལས། ཀུན་དགའ་བོ། དེ་བཞིན་གཤེགས་པ་རྣམས་ནི་སེམས་ཅན་ཐམས་ཅད་ལ་སྣང་བ་མ་ཡིན་གྱི། །དགེ་བའི་བཤེས་གཉེན་ནི་ཡོངས་སུ་སྣང་ལ་ཆོས་སྟོན་ཅིང་ཐར་པའི་ས་བོན་འདེབས་པའི་ཕྱིར། དེ་བཞིན་གཤེགས་པ་རྣམས་ལས་དགེ་བའི་བཤེས་གཉེན་ལྷག་པར་ཟུངས་ཤིག །ཅེས་མདོ་རྒྱུད་རྣམས་ནས་སངས་རྒྱས་ཐམས་ཅད་མཆོད་པ་ལས་ཀྱང་བླ་མ་གཅིག་པུ་མཆོད་པ་ཁྱད་པར་འཕགས་ཚུལ་རྒྱ་ཆེར་གསུངས་པ་ལྟར། དམ་པ་གང་གི་ཟག་པ་མེད་པའི་ཐུགས་ཀྱི་དགོངས་པ་རྫོགས་པའི་ཐབས་སུ་རྣམ་དཀར་ཚོགས་བསགས་རླབས་ཆེན་ཀུན་གྱིས་བསྔགས་འོས་ཅན་གྲོ་བཞིན་ཟླ་བའི་ཡར་ཚེས་ལ་གྲུབ་ནས་ངོར་ཨེ་ཝཾ་ཐར་རྩེ་མཁན་རིན་པོ་ཆེས་ཡོན་བསྔོ་སོགས་རྒྱས་པར་གནང༌། དེའི་ཕྱི་ཉིན་ནས་བཀྲ་ཤིས་པའི་གསོ་སྦྱོང་དང༌། དེ་ནས་བཟུང་སྐུ་གདུང་རིན་པོ་ཆེ་བཞུགས་རིང་ཉིན་བཞིན་མཆོད་སྤྲིན་གཟབ་ཅིང་རྒྱས་སྤྲོས། ཡར་མར་ཚེས་བཅུར་ཚོགས་བསྐང༌། ཚེས་བཅོ་ལྔ་དང་གནམ་སྟོང་ལ་གསོ་སྦྱོང་དང་འབྲེལ་བསྟན་པ་རྒྱས་ཆོག་སྨོན་ལམ་སོགས་དང༌། འདི་ནས་བརྩམས་ཏེ་ཕྱོགས་འདིར་གསོ་སྦྱོང་དང་དབྱར་གནས་ཀྱི་སྲོལ་ཚུགས་པའང་རྗེ་བླ་མ་འདིའི་ཐུགས་བསྐྱེད་ལས་བྱུང་བ་དང༌། གཞན་ཡང་རྒྱན་སྟུག་པོ་བཀོད་པའི་མདོ་ལས། འཇམ་དཔལ་ཕྱོགས་གང་ན་ཆོས་སྨྲ་བ་དེ་འདུག་གམ། དེའི་རུས་བུའམ། རོ་བམ་པ་ཞིག་ཡོད་པར་མཐོང་ནའང་མཚམས་མེད་པའི་ལས་བྱང་བར་འགྱུར་རོ། །ཞེས་འབྲེལ་ཚད་དོན་ལྡན་གྱི་ཕྲིན་ལས་ཁྱད་པར་ཅན་དུ་གསུངས་པ་ལྟར། ཕྱོགས་མཐའི་སྐྱེ་འགྲོ་བགྲང་ལས་འདས་པ་དང༌། ལྷག་པར་ཁམས་བོད་མི་གྲངས་ཤིན་ཏུ་མང་བར་སྐུ་གདུང་རིན་པོ་ཆེ་མཇལ་ཁ་དང་གདུང་ཁྲུས་སོགས་ཞིབ་ཏུ་བསྩལ་བས་ཀུན་གྱིས་ཕྱག་མཆོད་སྨོན་ལམ་དགེ་སྒྲུབ་སྡིག་སྤོང་སོགས་རྣམ་དཀར་རྒྱ་ཆེར་བསྐྱེད་གཞིར་གྱུར་པས་རྟེན་འདིས་གདུལ་འོས་ལ་ཕྲིན་ལས་ཀྱི་འཇུག་པ་མི་ཡོལ་བའི་རླབས་ཆེན་ཐུགས་བསྐྱེད་ཀྱི་རང་འབྲས་ངོ་མཚར་ཅན་དུ་ངེས་པའོ། །གུས་ཕྲན་ནས་ཀྱང་དགོངས་པ་ནང་དབྱིངས་སུ་ཐིམ་ཚུལ་ཐོས་ནས་མཆོད་འབུལ་གསོལ་འདེབས་ཅི་ནུས་ལ་བརྩོན་མུས། སྐུ་ཚིགས་རྫོགས་འཕྲལ་སླེབས་པས་རང་འཁོས་མཆོད་འབུལ་སོགས་དང༌། དབོན་མཛོད་ནས་མཆོད་ཚོགས་གཟབ་གནང་གིས་ཁམས་སྤྲུལ་རིན་པོ་ཆེ་གུས་དཔོན་སློབ་ནས་སྨིན་གླིང་རྡོར་སེམས་བདུན་གཅིག་དང༌། ཟླ་བཤོལ་གྱི་སྤྲེལ་ཟླའི་ཚེས་བཅུར་ཡང་གཏེར་རྩ་གསུམ་དྲིལ་སྒྲུབ་ཚོགས་བརྒྱ་བཤགས་བསྐང་བཅས་གཟབ་རྒྱས། དོན་གཉེར་བ་རྣམས་ལ་དྲི་མེད་རྣམ་གཉིས་ཀྱི་དབང་སོགས་འདོན་སྒྲུབ་ཞུ་རྒྱུ་ཙམ་བྱུང༌། སྐུ་ཚིགས་རྫོགས་ནས་གདུང་རྟེན་ཁག་བཞེངས་རྒྱུའི་སྟ་གོན་ཚུགས། འབྲས་ལྗོངས་སུ་སྨིན་གླིང་གཟུངས་སྤར་བཞུགས་པའི་སྟེང་དྲི་མེད་རྣམ་གཉིས་ཀྱི་མཆོད་རྟེན་ལ་ཆེད་དུ་དགོས་པ་རྣམས་སྤར་གསར་བརྐོས་བཅས་ཤིང་ཤོག་ཁོ་ན་ལ་བཏབ་པར་རྫས་བྱུགས། དྲས་མཐུད། བསྒྲིལ་དང་ན་བཟའ་གསོལ་རྒྱུ་བཅས་ཆད་ལྷག་ནོར་འཁྲུལ་མེད་པ་དང༌། གཞན་ཡང་བྲི་དགོས་པ་རྒྱུད་དང་གཟུངས་མདོའི་གླེགས་བམ་རྣམས་དང་མཐོང་གྲོལ་བཏགས་གྲོལ་འཁོར་ལོ། ཁྱད་པར་དུ་ཚད་དང་ལྡན་པའི་སྲོག་ཤིང་ཁག་བྱང་ཆུབ་ཤིང་གི་རིགས་ལས་བསྐྲུན་པ། གལ་ཆེ་བའི་གཟུངས་རྣམས་གསེར་ཞུན་གྱིས་བྲིས་པ། གསེར་ཟངས་ཀྱི་བྱང་བུར་གཟོང་རིས་ཀྱིས་བརྐོས་པའི་གནོད་སྦྱིན་འཁོར་ལོ་ཆ་གསུམ་བཅས་ལ་དར་གོས་རྒྱུ་བཟང་ཁོ་ནའི་ན་བཟའ་དང༌། དྲི་མེད་རྣམ་གཉིས་ཀྱི་དཀྱིལ་འཁོར་དང་མཆོད་ཆས་ཡོ་བྱད་རིགས། ཀླུ་དང་ས་བདག་ནོར་ལྷ་ཉེས་སེལ་སོགས་ཀྱི་བུམ་གཏེར་གྲངས་མང༌། དེ་རྣམས་སོ་སོའི་རྫས་ཆ། ཐུན་མོང་དུ་ལྔ་ཚན་ལྔ་དང༌། སྨན་སྣ། བསང་སྣ། འབྲུ་སྣ། དར་ཟབ། གོས་སྣ། རིན་ཆེན་ཕྱེ་མ། ས་ཆུ་འབྱུང་བཅུད་སོགས་འགྲོ་སོང་སྐུ་ངལ་འཛེམ་མེད་རྩོལ་སྒྲུབ་དང༌། ལག་ལེན་རྣམས་མཆོད་དཔོན་བླ་མ་འཇམ་དབྱངས་བློ་གྲོས་མཆོག་ལྡན་ནས་འཇམ་མགོན་རྣམ་གཉིས་ཕྱག་བཞེས་ལྟར་ཞལ་བཀོད་དང་བཅས་དགེ་ཚུལ་སློང་སྡོམ་ལྡན་གཙང་སྦྲ་ལ་གནས་པ་ཤ་སྟག་གིས་ཡུན་རིང་དུ་ཞིབ་བསྒྲུབས་ཟིན་པ་དང༌། ངོས་རང༌། མཁར་མདོ་ཞབས་དྲུང༌། རྒྱ་སྟོན་རིན་པོ་ཆེ་ཆོག་རོག་བཅས་ནས་སྦྱོང་ཁྲུས་རབ་གནས་སྔོན་དུ་འགྲོ་བས་གཟུངས་སྒྲུབ་དང༌། སྲོག་ཤིང༌། གླེགས་བམ། འཁོར་ལོ། བུམ་གཏེར་རྣམས་སོ་སོའི་ཆོ་གས་ཡུན་རིང་དུ་སྒྲུབ་པ་བགྱིས། གདུང་རྟེན་ཟངས་གསེར་ཡང་ཁམས་བྲག་ཡབ་པའི་བཟོ་བོ་མཁས་པ་བཞི་ནས་བརྡུང་སྒྲོས་གཟབ་བསྐྲུན་གསེར་རྩི་བཅས་གང་ལེགས་མཐའ་འདུས་གྲུབ། དེ་ཡང་སྐུ་གདུང་རིན་པོ་ཆེ་ཞུགས་འབུལ་ཞུས་ན་ལེགས་ཚུལ་སྐུ་གོང་འོག་ཞལ་མཐུན་གསུང་འཕྲོས་ཁྱད་པར་ཅན་གཞིར་བཞག་གིས། རྡོ་རྗེ་གདན་ལྟ་བུ་གནས་ཁྱད་པར་ཅན་ཞིག་ཏུ་གདན་འདྲེན་ཞུ་རྒྱུའི་གླེང་བསླངས་ལ། འཁྲུལ་ཞིག་དཔའ་བོ་རྡོ་རྗེ་ནས་འབྲས་ལྗོངས་གནས་མཐིལ་བཀྲ་ཤིས་སྡིངས་རང་དུ་ཞུགས་འབུལ་དང་གདུང་རྟེན་བཞེངས་གྲུབ་ན་སྐུ་ཕྲེང་གོང་མ་ལྷ་བཙུན་ཆེན་པོའི་དུས་དང༌། རྗེ་བླ་མ་རང་ཉིད་ཀྱི་ཐུགས་བསྐྱེད་རྟེན་འབྲེལ་བསམ་གྱིས་མི་ཁྱབ་པས་སྦས་གནས་འདིས་མཚོན་ཡངས་པའི་རྒྱལ་ཁམས་ཀུན་ཏུ་རྒྱལ་བསྟན་རིན་པོ་ཆེ་དར་རྒྱས་ཡུན་གནས་དང༌། སྐྱེ་རྒུ་ཡོངས་ལ་ཕན་བདེ་རྒྱ་ཆེར་འབྱུང་བའི་བཙས་སུ་འགྱུར་ཚུལ་ནན་གསུངས་དང༌། རྗེ་བླ་མ་གནས་ནང་ཕེབས་སྐབས་སྔར་ནས་ངེད་རང་ཕུང་པོ་འདོར་བའི་གནས་ཀྱི་བཀོད་པ་ཞིག་རྨི་ལམ་དང་རིག་ངོར་ཡང་ཡང་གསལ་བ་བཀྲ་ཤིས་སྡིངས་འདི་རང་རེད་འདུག་ཅེས་གསུང་འཕྲོས་ཕེབས་པ་དང་གུང་མཐུན་པས། གདུང་དཀྲིས་རྙིང་གསོལ་ཞིབ་བསལ་གྱིས་སྐུའི་གནས་རྣམས་སུ་གསེར་ཆབ་དང་གནས་ཡིག་རྣམས་གསར་དུ་བྲིས། བཏགས་གྲོལ་རིགས་དང་གསར་རྙིང་རྒྱུད་སྡེའི་སྙིང་པོ་སོགས་གསེར་བྲིས་ཚར་མང༌། སྤར་བཏབ་ཕོན་ཆེར་ཕུལ་ཞིང་དར་གོས་དྲི་བཟང་གིས་བགོས་པས་གསར་དུ་ལེགས་པར་དཀྲིས། རིན་པོ་ཆེའི་རྒྱན་སོགས་ལོངས་སྐུའི་ཆས་ཀྱི་བསྙེན་བཀུར་ཞུས་ཏེ་རྩིས་ཁོག་དང་བསྟུན་པར། སྨལ་ཟླའི་ཡར་ངོའི་གཟའ་ཚེས་དགེ་བར་བཀུར་སྟི་དང་བཅས་འབྲས་ལྗོངས་གནས་ཀྱི་ལྟེ་བ་བཀྲ་ཤིས་སྡིངས་དུ་གདན་འདྲེན་ཞུས། དེར་བཀྲ་ཤིས་པའི་གསོ་སྦྱོང་སྔོན་དུ་འགྲོ་བས་ལྟོ་འཕྱེའི་ཁ་རྒྱུ་ཕྱོགས་དང་བསྟུན། བསྙེན་སོང་སློབ་དཔོན་རྒྱ་སྟོན་རིན་པོ་ཆེ་དང་མཁར་མདོ་ཞབས་དྲུང་ཆོག་རོག་པ་བཅས་ནས་འོད་ཟེར་དྲི་མེད་ཀྱི་སའི་ཆོ་ག་དང་འབྲེལ་རྨང་གི་ཕྱོགས་བཞི་དབུས་ལྔར་ཀླུ་ཆེན་ནོར་རྒྱས་དང་ས་སྙིང་བསྟན་མ་སྦྲགས་སྒྲུབ་བཅས་ཀྱི་གཏེར་བུམ་ཚད་ལྡན་རེ། ས་འཛིན་ནས་ཐེམ་སྐས་བར་བརྩིགས་པའི་སྟེང་དུ་སྤུར་ཁང་མྱང་འདས་མཆོད་རྟེན་རྣམ་པ་ཅན་གྱི་སེང་ཁྲིའི་མཐིལ་དུ་ཐབ་དཀྱིལ་ཁག་རྣམས་དང༌། བུམ་པའི་དབུས་སུ་སྐུ་གདུང་རིན་པོ་ཆེ་ཞལ་ཤར་དུ་ཕྱོགས་པར་བཞུགས་སུ་གསོལ། བྲེའི་སྟེང་གདུགས་དང་རྒྱལ་མཚན་བ་དན་སོགས་ཀྱིས་ལེགས་པར་རྒྱན། མཆོད་པའི་ཡོ་བྱད་རྒྱས་པར་བཤམས། ངོར་ཐར་རྩེ་མཁན་པོ། ཁང་གསར་ཞབས་དྲུང༌། མཁན་ཡོན་ཏན་བཟང་པོ་སོགས་ཀྱིས་ཀྱེ་རྡོར། གནས་བརྟན་མཆོག་གླིང་རིན་པོ་ཆེ་རྒྱ་སྟོན་ལྷན་རྒྱས་པས་སྨིན་གླིང་རྡོར་སེམས། རྡོ་གྲུབ་མཆོག་སྤྲུལ། ཀཿཐོག་རྗེ་དབོན། ཁོ་བོ་བཅས་ནས་ཀློང་སྙིང་ཞི་ཁྲོ་ཁྲོམ་དཀྲུག །རྫོང་སར་མངའ་རིས་སྤྲུལ་སྐུ། མཁན་བློ་གྲོས་བཟང་པོ་སོགས་ནས་ནཱ་རོ་མཁའ་སྤྱོད། པདྨ་ཡང་རྩེའི་མཁའ་སྤྱོད་སྤྲུལ་སྐུ། སེར་སྒྲུབ་གདུང་འཛིན་ལྷན་རྒྱས་པས་རྩ་གསུམ་རིག་འཛིན་སྲོག་སྒྲུབ་བཅས་གསར་རྙིང་ཆོག་ཁག་ལྔ་ལ་ཞལ་གྲངས་དྲུག་ཅུ་སྐོར་གྱིས་སོ་སོའི་དཀྱིལ་འཁོར་གྱི་གཙོ་བོ་དང་དབྱེར་མེད་སྲེག་བླུགས་ཀྱི་མཆོད་པ་དང༌། ཙན1$0000240ད1$0000300ན་དཀར་དམར་དང་ཨ་ག་རུ་སོགས་བུད་ཤིང་དྲི་ལྡན་ཕོན་མང་གིས་བསྲེགས་བཞུ་གྲུབ་ཅིང༌། ཆོ་གའི་ལས་རིམ་རྫོགས་ནས་གདུང་ཁང་གི་སྒོ་རྣམས་རིགས་ལྔའི་རྟགས་ཀྱིས་རྒྱས་བཏབ་ཅིང་ཞག་གསུམ་རིང་མཆོད་འབུལ་གྲུབ་པའི་ཉི་ཤར་ལ་ཞལ་ཕྱེས་ཏེ་ཆོ་ག་བཞིན་དུ་གདུང་རུས་རྣམས་དང་གདུང་ཐལ་བཅས་འཐོར་མེད་བསྡུས་ཏེ་སྤྱན་དྲངས་པ་མཆོད་པའི་རྟེན་དུ་བཞུགས་སུ་གསོལ། དཔལ་རྡོ་རྗེ་སེམས་དཔའི་མཆོད་ཚོགས་འབུལ་བ་སོགས་གྲུབ་པ་དང༌། དགེ་ཚུལ་སློང་ཁོ་ནས་ཉིན་བཞིན་གསོ་སྦྱོང་བླང་བ་དང་བདག་གི་རྣལ་འབྱོར་བཅས་གདུང་རུས་གདུང་ཐལ་ཞིབ་བཏུལ་ལ་རིན་ཆེན་ཕྱེ་མ་དང་སྨན་སྣ་ཕོན་ཆེར་བསྲེས་ནས་གཞུང་གསལ་ལག་ལེན་གྱིས་སཱཙྪ་རྣམས་རིམ་པར་བཏབ་ཅིང་སོ་སོར་ཚོན་དང༌། ཉིས་བརྒྱ་ལྷག་ལ་གསེར་དངུལ་བཏུལ་མ་གསོལ་གྲུབ་བསྟུན་བསྙེན་སོང་དབུར་བཞུགས་ཆོག་ཁག་གཉིས་ནས་རིམ་པར་བསྒྲུབས། ས་རྡོ་སྐྱེལ་འདྲེན་སོགས་དད་སློབ་མཆོག་དམན་བགྲེས་གཞོན་གྱིས་གུས་སྤྲོ་བཅས་བརྩོན་ནས། གདུང་ཁང་དངོས་ཀྱི་ས་རྡོའི་ཆ་ཤས་སཱཙྪར་བསྲེས་ཤིང་གཞན་དུ་མ་འཐོར་བ་མཆོད་རྟེན་གྱི་ཁོངས་བཞུགས་སུ་གསོལ་ཏེ་སྔ་མའི་འཕྲོས་ནས་རིམ་བརྩིགས་ཀྱི་སེང་ཁྲིའི་ནང་དུ་གཙོ་བོར་གནོད་སྦྱིན་ལྷ་མང་གི་ཙཀྲ་དང་དེའི་ཡོ་བྱད་རིགས། ནོར་ལྷའི་གཏེར་བུམ་འདྲ་མིན་ཁག །ཉེས་སེལ་དབང་བུམ་བཅས་སོ་སོའི་ཆོ་གས་བསྐྱེད་བསྟིམ་བཞུགས་སུ་གསོལ། བང་རིམ་སྟོད་ཙམ་དུ་གཙུག་ཏོར་དྲི་མེད་ཀྱི་ཆོ་གས་དེའི་དཀྱིལ་འཁོར། གཟའ་ཚེས་དགེ་བར་བཀྲ་ཤིས་གསོ་སྦྱོང་བཅས་བུམ་པར་འོད་ཟེར་དྲི་མེད་ཀྱི་དཀྱིལ་འཁོར་དུ་སྲོག་ཤིང་འཛུགས་ཆོག་བསྙེན་སོང་ཁག་དབུར་བཞུགས་ཀྱི་ཤིན་ཏུ་གཟབ་རྒྱས། ནང་གཞུག་གཙོ་བོ་རིང་བསྲེལ་རྣམ་པ་བཞིའམ་ལྔར་གྲགས་པའི་ཡུངས་འབྲུ་ལྟ་བུའི་རིང་བསྲེལ་ལ་བདག་ཅག་གི་སྟོན་པའི་རིང་བསྲེལ་སྡེ་སྲིད་རིན་སྤུངས་པའི་ནང་རྟེན་ལས་བྱུང་བ་འཁྲུལ་མེད་རྡོག་གཅིག །འོད་སྲུང་རིང་བསྲེལ་འཇའ་ཚོན་གཏེར་མ་དང༌། བལ་ཡུལ་མཆོད་རྟེན་ལས་བྱུང་བ་གྲངས་མང༌། གུ་རུའི་ཚེམས་ལས་སྤྲུལ་པའི་རིང་བསྲེལ་སོགས། ཆོས་ཀྱི་རིང་བསྲེལ་གཟུངས་ཆེན་སྡེ་ལྔ་ཚར་བདུན་བརྒྱ་ལྷག །ཉེ་སྙིང་ཤིན་ཏུ་གྲངས་མང༌། རྙིང་གཟུངས་ཚར་བཅོ་ལྔ་སྐོར། བླ་མ་ཞི་དྲག་དང་མཚན་སྔགས་སྣ་ཚོགས་མང་ཙམ། གཏེར་ཤོག་དང་རྒྱ་དཔེ་བྱིན་ལྡན་ལྡེབ་ཁ་ཤས། ཟབ་བདུན་ཡང་དག་གསེར་བྱང་སོགས་ཀྱི་ཐོག་མའི་འབེབས་གཞི་མཁྱེན་བརྩེ་གོང་མའི་ཕྱག་བྲིས་ངོ་མ། རྗེ་ཉིད་ཀྱི་ཕྱག་བྲིས་ཚན་ཁ་ཤས་སོགས། སྐུ་གདུང་རིང་བསྲེལ་ཀུན་མཁྱེན་ཀློང་ཆེན་པའི་དབུ་ཀླད་རིང་བསྲེལ་ཕུང་པོ་གཙོས་གསར་རྙིང་སྐྱེས་ཆེན་མང་པོའི་གདུང་རུས་དང༌། ཁྱད་པར་རྗེ་ཉིད་ཀྱི་གདུང་རུས་རིན་པོ་ཆེ་གསེར་ཞུན་གྱིས་བྱུགས་པར་ཡི་དམ་གྱི་སྙིང་པོ་བྲིས་པ་ན་བཟའ་བཅས་ཟ་མ་ཏོག་ཏུ་བཅུག་པ་སོགས། སྐུ་བལ་རིང་བསྲེལ་གུ་རུ་རིན་པོ་ཆེའི་ན་བཟའ། གནུབས་ཆེན་དང་ཉང་གི་དབུ་ལྗོན་གཙོས་གསར་རྙིང་བླ་མ་གོང་མའི་ན་བཟའ་དང་དབུ་ལྗོན་གྲངས་མང༌། རྗེ་ཉིད་ཀྱི་དབུ་ལྗོན་དང་ཕྱག་སེན། སྐབས་མཚམས་རྟེན་འབྲེལ་དུ་བཞེས་པའི་ན་བཟའ་འོག་འཇུག་དཀར་པོ་བུབ་ཚང༌། ཆོས་སྐུའི་རིང་བསྲེལ་རྩྭ་མཆོག་གྲོང་ནས་ཐོན་པའི་མཆོད་རྟེན་སོགས་འགའ་དང༌། གསར་རྙིང་སྐྱེས་ཆེན་རྣམས་ཀྱི་ཕྱག་ཚཱ་བྱིན་ལྡན་ཁ་ཤས། རྗེ་ཉིད་ཀྱི་གདུང་རུས་གདུང་ཐལ་ཚད་ལྡན་བཏབ་སྒྲུབ་ཀྱི་སཱཙྪ་སུམ་སྟོང་ལྷག་བཅས། གཞན་ཡང་སྐུ་རྟེན་གུ་རུའི་སྐུ་གསེར་ལི་བྱིན་ལྡན། གཏེར་བྱོན་བྱེ་མ་ཨ་ཀྲོང་གི་ཕྱག་རྡོར་སྐུ་ངོ་མཚར་ཅན་སོགས། གསུང་རྟེན་བླ་མ་དགོངས་འདུས་དང༌། གུར་དྲག་ཡེ་འབར་རྩ་རྒྱུད་གླེགས་བམ། ཐུགས་སྒྲུབ་བར་ཆད་ཀུན་སེལ་གཏེར་གཞུང་ཆ་ཚང་སོགས། འཇམ་དཔལ་མཚན་བརྗོད། ཤེར་ཕྱིན་སྡུད་པ། རྒྱུད་བླ་སོགས་མདོ་སྔགས་བསྟན་བཅོས་བཅས་ཀྱི་པུསྟ་ཀ་ཁ་ཤས། ཆོས་དབང་སྲོག་ཤིང་བརྟན་པའི་ཙཀྲ་གནམ་ཆོས་དགེ་འདུན་འདུ་འཁོར་ཆེན་མོ་སོགས་ཚད་ལྡན་བཅའ་སྒྲུབ་ཀྱི་འཁོར་ལོ་འདྲ་མིན་འགའ་བཅས། ཐུགས་རྟེན་ལི་དམར་རྡོ་རྗེ་བྱིན་ལྡན། ཡོན་ཏན་རྟེན་མཁྱེན་ཀོང་མཆོག་གསུམ། རྗེ་བླ་མ་རང་ཉིད་བཅས་ཀྱི་བཀའ་གཏེར་སྒྲུབ་ཆེན་ལན་གྲངས་ཐེམས་པའི་ཆོས་སྨན་དང༌། བདུད་རྩི་རིལ་བུ་ཁག །ཚེ་རིལ་རིགས་འདྲ་མིན་བཅས་ཀྱི་ཟ་མ་ཏོག །ཕྲིན་ལས་རྟེན་མངའ་བདག་ཉང་གི་གཏེར་མ་གནམ་ལྕགས་ཕུར་པ་བཅས། བྲེ་ནང་སྲོག་ཤིང་རྩེ་མོར་བསྟན་པ་བུ་གཅིག་སོགས་བཏགས་གྲོལ་གླེགས་བམ་དང་འཁོར་ལོའི་རིགས་རྗེ་བླ་མ་མཆོག་གིས་སྒྲུབ་གནང་ཅན་དར་གྱི་ན་བཟའ་བཅས་ཙན་དན་བྱང་བུའི་བར་གཏམས་པ་དང༌། གཞན་བཏགས་གྲོལ་རིགས་འགའ། ཞར་བྱུང་ཐུགས་སྒྲུབ་ཆ་ལག་ཤཱཀ་ཐུབ་དྲན་གྲོལ་མཆོད་རྟེན་གྱི་སེམས་ཉིད་ངལ་གསོའི་མཐོང་གྲོལ་འཁོར་ལོ་བཅས། བུམ་སྒོར་ཡང་དེ་ཉིད་ལས་བྱུང་བའི་ཕྱག་རྒྱ་མཐོང་གྲོལ་རྡོ་རྗེ་མི་འཁྲུགས་པའི་སྐུ་ཀཿཐོག་དབོན་སྤྲུལ་ཕྱག་བཟོ་ནང་གཞུག་དང་ཆ་ཚད་ལྡན་པ། རྩེ་མོར་གསེར་ཟངས་ཀྱི་ཟར་ཚགས་ཉི་ཟླ་ཏོག་བཅས་ཀྱི་ནང་དུ་གདུགས་དཀར་ཙཀྲ། རྒྱལ་མཚན་རྩེ་མོའི་གླེགས་བམ། གཟུངས་ཆེན་དང་མཐོང་གྲོལ་རིགས་བཅས་བཞུགས་སུ་གསོལ་ཏེ། ཕྱག་ལེན་གཙང་དག་གི་སྒོ་ནས་བྱང་ཆུབ་ཆེན་པོའི་མཆོད་རྟེན་རྗེ་མཁྱེན་བརྩེ་གོང་མས་ཆོས་སྡེ་ཆེན་པོ་ལྷུན་གྲུབ་སྟེང་དུ་མཆོད་སྡོང་མཐོང་གྲོལ་ཆེན་མོ་བཞེངས་སྐབས་གསར་བསྐྲུན་གནང་བའི་ཐིག་རྩ་འཆུགས་མེད་དུ་ལེགས་པར་བཞེངས་པའི་དཀར་ཆག་ལོགས་སུ་བཀོད་པ་ལས་ཤེས་པར་བྱའོ། །དེ་ལྟར་གྲུབ་ཟིན་པ་དང་བཀྲ་ཤིས་པའི་གསོ་སྦྱོང་དང་མཆོད་པའི་ཚོགས་གཟབ་རྒྱས་དང་བཅས་མཁན་སྤྲུལ་རྣམས་དབུར་བཞུགས་གསར་རྙིང་འདུས་པ་ལྷན་ཚོགས་ཀྱིས་ཡང་གཏེར་རྩ་གསུམ་དྲིལ་སྒྲུབ་སྒོ་ནས་རབ་གནས་ཉིན་འཁྱོངས་དང༌། ཉིན་རྗེས་མར་ཐར་རྩེ་མཁན་རིན་པོ་ཆེ། ཁང་སར་ཞབས་དྲུང༌། མངའ་རིས་སྤྲུལ་སྐུ། མཁན་ཡོན་ཏན་བཟང་པོ། བློ་གྲོས་བཟང་པོ་སོགས་ནས་ཀྱེ་རྡོར། ཀཿཐོག་དབོན་སྤྲུལ་དང་ཁོ་བོ་སོགས་ཀྱིས་སྨིན་གླིང་རྡོར་སེམས་སྒོ་ནས་རབ་ཏུ་གནས་པའི་ཆོ་ག་ཚོགས་སྐོང་མཆོད་འབུལ། ཆོས་སྐྱོང་དང་ཡོན་བདག་བསྒོ་བ་སོགས། རྒྱ་སྟོན་མཆོག་སྤྲུལ་དཔོན་སློབ་ནས་ཤཱཀ་ཐུབ་དྲན་གྲོལ་མཆོད་རྟེན་གྱི་ཆོ་ག་དང༌། མི་འཁྲུགས་པའི་ཕྱག་རྒྱ་མཐོང་གྲོལ་བཅས་སྒྲུབ་གནང་གིས་ཡེ་ཤེས་སེམས་དཔའ་ནན་དུ་བསྟིམས་ཤིང་བཞུགས་སུ་གསོལ་བར་མཛད་པ་སོགས་ཀྱི་སྒོ་ནས་ཕྱི་རྟེན་མཆོད་སྡོང་རིན་པོ་ཆེ་བཀྲ་ཤིས་གྲོལ་བ་བཞི་ལྡན་བྱིན་རླབས་དཔལ་འབར་ཞེས་སྲིད་ཞིའི་བླ་ན་མངོན་པར་མཐོ་བའི་ཆོས་སྐུའི་རྟེན་མཆོག་དམ་པར་མངའ་གསོལ་བས་ལྷར་བཅས་འགྲོ་བ་ཀུན་གྱི་ཕྱག་མཆོད་བསོད་ནམས་ཀྱི་ཞིང༌། སྦས་གནས་འདིས་མཚོན་བགྲང་ཡས་བསྟན་འགྲོའི་དགེ་ལེགས་ཀྱི་དཔལ་དུ་སྲིད་པ་ཇི་སྲིད་བར་བཞུགས་སུ་གསོལ་བ་དང་འབྲེལ། སླར་ཡང་ཕུན་སུམ་ཚོགས་པའི་མཁན་སློབ་དགེ་འདུན་རྣམས་ནས་གསོ་སྦྱོང་དང་འབྲེལ་བར་བསྟན་པ་རྒྱས་ཆོག་དང་སྨོན་ཚིག་ཤིས་བརྗོད་རྒྱས་པར་བསྒྲུབས་པས་ཤིན་ཏུ་དགེ་ལེགས་ཆེས་ཆེར་འཕེལ་རྒྱས་སུ་གྲུབ་པའོ། །ཞར་བྱུང་དེ་ལྟར་བཞེངས་པའི་ཕན་ཡོན་དང་དགོས་པའམ། སྤྱིར་རིང་བསྲེལ་རྣམ་བཞིའི་སྙིང་པོ་ཅན་གྱི་མཆོད་རྟེན་གསར་དུ་བཞེངས་པའམ། ཉམས་གསོས་དང་ཕྱག་མཆོད་བཀུར་བསྟི་བགྱིས་པ་སོགས་དང༌། ཁྱད་པར་དུའང་དྲི་མེད་རྣམ་གཉིས་ཀྱི་དཀྱིལ་འཁོར་དང་འབྲེལ་བར་སྲོག་ཤིང་འཛུགས་ཆོག་ལྡན་པའི་མཆོད་རྟེན་བཞེངས་པ་ནི་ཕན་ཡོན་ཆེས་ཤིན་ཏུ་ཆེ་བར་གཟུངས་མདོ་ཁག་དང༌། གཟུངས་ཆེན་སྡེ་ལྔ་སོ་སོའི་མདོ་དང་རྟོགས་པ། མཆོད་རྟེན་བསྐོར་བའི་ཚིགས་བཅད་སོགས་ལས་གཙོ་བོར་རྫོགས་པའི་སངས་རྒྱས་དངོས་ཀྱིས་རྒྱ་ཆེར་གསུངས་པ་དང༌། དེ་བཞིན་དུ་བཏགས་གྲོལ་དང་མཐོང་གྲོལ་རིགས། མཆོད་རྟེན་དྲན་གྲོལ། ཕྱག་རྒྱ་མཐོང་གྲོལ། ཙཀྲ་དང་གླེགས་བམ་སྐོར། གཏེར་བུམ་སོགས་བཅའ་སྒྲུབ་གཞུང་མཐུན་གྱི་རྟེན་འདིར་བཞུགས་སོ་ཅོག་རྣམས་ལ་རེ་རེ་བཞིན་ཕན་ཡོན་མང་དུ་གསུངས་པ་ཐམས་ཅད་རྫོགས་པར་ཚང་བས་ན་ངེས་པར་བསྟན་དང་འགྲོ་བའི་བཙས་དམ་པར་གྱུར་ཅིང་ཀུན་གྱིས་བསོད་ནམས་བསགས་པའི་ཞིང་བླ་ན་མེད་པ་གྲོལ་བ་བཞི་ལྡན་ཆེན་པོར་ཚད་མས་གྲུབ་པ་སྟེ་ཞིབ་ཏུ་རྟོགས་པར་འདོད་ན་སོ་སོའི་གཞུང་རྣམས་ལས་ཤེས་པར་བྱ་ཞིང༌། འདིར་གང་དུ་ཞི་བ་མངོན་དུ་མཛད་པའི་གནས་དེར་ཡེ་ཤེས་རང་སྣང་གི་ཞིང་ཁམས་རང་ཆས་ལྷུན་གྲུབ་ཏུ་བཞུགས་པར་གསུངས་པ་ལ་ངེས་ཤེས་བརྟན་པོས་ཐུགས་ཡིད་དྲངས་ཏེ། དཔལ་ལྡན་བླ་མ་རྡོ་རྗེ་འཆང་མཆོག་གི་ཟབ་དགོངས་དབྱིངས་སུ་རྫོགས་པའི་སྲི་ཞུ་དང༌། གདུལ་བྱའི་བསོད་ནམས་བསགས་པའི་ཞིང་དུ་གསང་ཡུམ་མཆོག་ནས་གཟིམ་སྦུག་དེར་ནང་རྟེན་དུ་རྗེ་ཉིད་ཀྱི་སྐུ་ཚད་ལས་མི་དམན་པའི་མཆོད་སྡོང་བཞེངས་རྒྱུར་ཐུགས་དགོངས་ཟབ་བཞེས་ཀྱིས་གསེར་ཟངས་མཆོད་རྟེན་ཐོག་ཚད་ཅན་དང༌། འབྱུང་འགྱུར་ཁམས་བོད་དུ་དུས་བདེའི་སྐབས་གདན་འདྲེན་ཞུ་རྩིས་མཆོད་རྟེན་མདའ་ཚད་ལྷག་བཅས་ལ། ལྕགས་བྱི་ཆོ་འཕྲུལ་ཟླ་བའི་ཡར་ཚེས་ལ་སོ་སོའི་ས་འཛིན་ནས་བརྩམས་གཟུངས་རྣམས་རིམ་འབུལ་གྱིས་མཆོད་རྟེན་ཆེ་བར་དྲི་མེད་རྣམ་གཉིས་ཀྱི་དཀྱིལ་འཁོར་སྲོག་ཤིང་འཛུགས་ཆོག་བཅས་ཞིབ་རྒྱས་དང༌། སོ་སོའི་སཱཙྪ་རྣམས་ཀྱང་གདུང་རུས་ལས་བཏབ་པ་གྲངས་ཚང་བར་བཞུགས། ཆུང་བར་གཙོ་བོ་ཤཱཀ་ཐུབ་དྲན་གྲོལ་མཆོད་རྟེན་བཅའ་གཞི་ལ་འོད་དྲིའི་དཀྱིལ་འཁོར་ཟུར་དུ་བཞེངས་ནས་སྲོག་ཤིང་འཛུགས་ཆོག་བགྱིས་པ་དང༌། ནང་གཞུག་ལ་སཱཙྪ་མང་ཉུང་ཙམ་ལས་ཕལ་ཆེར་ཕྱི་རྟེན་སྐབས་དང་མཚུངས་ཤིང༌། མཆོད་རྟེན་ཆེ་བའི་བུམ་སྒོར་རྡོ་རྗེ་འཆང་གི་སྐུ་གསེར་ལི་མཐོ་ཚད་ཁྱད་འཕགས་བྱིན་ལྡན་དང༌། ཆུང་བར་སྤྱན་རས་གཟིགས་ཀྱི་སྐུ་ལི་མ་བྱིན་ལྡན་བཅས་བཞུགས། གཉིས་ཀའི་ཐིག་རྩ་གོང་སྨོས་བྱང་ཆུབ་མཆོད་རྟེན་གྱི་མཚན་ཉིད་ཡོངས་སུ་རྫོགས་པ་གསེར་ཤས་ཅི་ཆེ་གཡུ་བྱུ་རུ་གཟི་མཆོང་སྤོས་ཤེལ་མུ་མེན་མུ་ཏིག་ཕ་ལམ་སོགས་རིན་པོ་ཆེ་སྣ་ཚོགས་པའི་ཕྲ་རྒྱན་ཕུན་སུམ་ཚོགས་པ་མིག་གི་བདུད་རྩིར་གྱུར་པ་དང༌། ཞར་དུ་སྐུ་རྟེན་རིགས་མང་ཙམ་ལའང་གཟུངས་འབུལ་མཉམ་དུ་གྲུབ་སྟེ། དབོ་ཟླའི་ཡར་ཚེས་དགེ་བར་དཔལ་སྤུངས་སྐུ་ཞབས་ཏཱའི་སི་ཏུའི་མཆོག་སྤྲུལ་རིན་པོ་ཆེ་དབུས། དཔོན་སློབ་མང་ཚོགས་ཀྱིས་ཡང་ཟབ་དཀོན་མཆོག་སྤྱི་འདུས་ཀྱི་སྒོ་ནས་རབ་ཏུ་གནས་པར་མཛད་པ་དང༌། རྒྱལ་དབང་ཀརྨ་པ་མཆོག་གིས་ཀྱང་ཡེ་ཤེས་དགོངས་པའི་ལྷག་གནས་ཐུན་མིན་དུ་བསྩལ་བར་མཛད། སླར་ཡང་སྣྲོན་ཟླའི་ཡར་ཚེས་རྗེ་བླ་མ་མངོན་པར་བྱང་ཆུབ་པའི་དུས་མཆོད་དང་འབྲེལ་དཔལ་ས་སྐྱའི་སྐྱབས་མགོན་བདག་ཁྲི་རིན་པོ་ཆེ་དབུར་བཞུགས་ཀྱི་རབ་གནས་ཉིན་འཁྱོངས་གཟབ་རྒྱས་སོགས་སྔ་ཕྱི་རབ་ཏུ་གནས་པ་ལན་མང་གིས་ཡེ་ཤེས་སེམས་དཔའ་ཡང་ཡང་བསྟིམས་ཞིང་བཞུགས་སུ་གསོལ་བ་བཅས་ཀྱིས་འཇིག་རྟེན་ལྷ་དང་བཅས་པ་ཀུན་གྱི་རྣམ་དཀར་བསོད་ནམས་ཀྱི་ཞིང་མཆོག་ཕུལ་དུ་བྱུང་བར་འབྲས་ལྗོངས་སྒང་ཏོག་གཙུག་ལག་ཁང་གི་གཟིམ་སྤྱིལ་འོག་མར་རྗེ་བླ་མ་མཆོག་གིས་བསྟན་འགྲོའི་དོན་རྒྱ་ཆེར་གནང་ཞིང་མངོན་པར་བྱང་ཆུབ་པའི་གནས་རྒྱལ་བསྟན་རིས་མེད་ཆོས་ཀྱི་དགའ་ཚལ་འོག་མིན་རྡོ་རྗེ་བཀོད་པའི་ཕོ་བྲང་ཆེན་པོར་བཞུགས་སུ་གསོལ་བའོ། །སྐབས་དེ་དག་གི་གསུང་ཆོག་སྔ་ཕྱིའི་དབུ་བཞུགས་དང་བླ་གྲྭ་བྱིངས། བཟོ་རིག་ལས་བྱེད་ཁག་ལ་དངོས་འབུལ་དང་གླ་ཆ་གནང་སྦྱིན་སོགས་ཀྱི་བསྙེན་བཀུར་དགྱེས་ཤིང་ཡི་རང་བར་བགྱིས་ཏེ་སྡིག་དང་མ་འདྲེས་པའི་རྣམ་དཀར་གཙང་དག་ཏུ་བསྒྲུབས་པའི་དངོས་པོའི་འགྲོ་སོང་སྐོར་ཞིབ་ཏུ་བཀོད་ན་དགེ་བ་ངོམ་པའི་སྐྱོན་དུ་དོགས་ཏེ་མ་སྤྲོས་ལ། རྣམ་དཀར་རླབས་ཆེའི་ཤུགས་ཀྱིས་ཀྱང་རྟོགས་པར་ནུས་པ་ཉིད་དོ། །དེ་ལྟར་བཞེངས་པའི་གདུང་རྟེན་ཆོས་སྐུའི་མཆོད་སྡོང་རིན་པོ་ཆེ་དང་གཟིམ་སྤྱིལ་བཅས་ལ་དུས་དང་རྒྱུན་གྱི་མཆོད་པའང་ཉིན་བཞིན་མཆོད་ཡོན་གྲངས་མང་དང་མར་མེའི་ཕྲེང་བ། སྣང་གསལ་རྒྱུན་འབར་ཁ་ཤས། ཉ་སྟོང་བརྒྱད་དྲུག་ཏུ་འཕར་མ་གང་རྒྱས། ཡར་མར་ཚེས་བཅུར་ཚོགས་བསྐང་དང༌། འདུལ་བ་མདོ་རྩ་བར། དེ་ལ་དུས་སྟོན་བྱའོ། །བལྟམས་པ་དང༌། གཙུག་ཕུད་དང༌། དབུ་སྐྲ་དང༌། བྱང་ཆུབ་པའི་དུས་སྟོན་དག་ཀྱང་ངོ༌། །ཞེས་གསུངས་པ་ལྟར་རྗེ་བཙུན་བླ་མ་རིན་པོ་ཆེ་མངོན་པར་བྱང་ཆུབ་པའི་སྐུ་མཆོད་དུ་རྗེ་གོང་མའི་དགོངས་གཏེར་འཆི་མེད་འཕགས་མའི་སྙིང་ཐིག་གི་ཆོས་སྡེ་བླ་སྒྲུབ་བྱིན་རླབས་སྙིང་པོའི་སྐོང་ཆོག་བདུན་ཕྲག་གི་ཁོངས་སུ་སྤྲེལ་ཟླ་སྔ་མར་ཁེལ་བས་ཚེས་བཅུར་གསང་སྒྲུབ་མཚོ་སྐྱེས་སྙིང་ཐིག་གི་ཚོགས་བརྒྱ་རྒྱས་པ་རེ་བཅས་ལོ་བསྟར། སླར་ཡང་ལོ་དེའི་དགུན་ཐོག་གསང་ཡུམ་མཆོག་ཉིད་དགོངས་རྫོགས་མཇུག་སྐྱོང་ཆེད་ཕེབས་གནང་ནས་རྡོ་རྗེ་གདན་དུ་ཁྲི་མཆོད་ལྷག་བཅས། གནྡྷོ་ལའི་ཕྱི་ནང་གློག་རྣམས་མཚན་ཐོག་ཐག་སྤར་བ་སོགས་མཆོད་ཚོགས་གཟབ་འབུལ། དགོན་པར་ཡང་མང་ཇ་སྐུ་འགྱེད། ཝཱ་རཱ་ཎ་སཱི་བོད་དགོན་པར་ཡང་དེ་མཚུངས། གཞན་ཡང་མཚོ་པདྨ་དང་གནས་ཆེན་ཁག་ཚང་མར་མཆོད་འབུལ་གཟབ་རྒྱས། བལ་ཡུལ་མཆོད་རྟེན་རྣམ་གསུམ་སོ་སོར་སྐུ་དཀར་དང་དྲི་བཟང་ན་བཟའ། སྟོང་མཆོད་གཟབ་རྒྱས། ཡང་ལེ་ཤོད་དུ་ཚོགས་མཆོད་སོགས་སྐབས་བབས་གསུང་ཆོག་དང་གསོལ་འདེབས་སྨོན་ལམ་ནན་དུ་གནང༌། ཞར་དུ་གདུང་ཞུན་གྱིས་བགོས་པའི་སྤུར་ཚྭ་རྣམས་དད་ལྡན་དོན་གཉེར་རིགས་ལ་གནང་བ་དང༌། ཕོན་མང་བ་ཆེད་དུ་གདན་འདྲེན་གྱིས་ཆུ་བོ་གངྒཱར་གཤེགས་སུ་གསོལ་བའང་རྒྱལ་སྲས་ལྷ་རྗེའི་སྐྱེས་རབས་རིམ་བྱོན་མྱོང་གྲོལ་སྐྱེ་བདུན་ཆེན་པོར་ཐང་ཡིག་ལས་ལུང་བསྟན་བཅས་རྒྱ་ཆེར་གསུངས་པ་ཉིད་ཨོ་རྒྱན་གླིང་པའི་སྐུ་གདུང་གི་ལོ་རྒྱུས་དང༌། ཀུན་མཁྱེན་འཇིགས་གླིང་གིས་ཞལ་བཞེས་གནང་བ་བཞིན་འདི་ཁོ་ནའང་ཕྲིན་ལས་ཀྱི་ཆ་ཤས་བསམ་གྱིས་མི་ཁྱབ་པར་ངེས་པ་སོགས་མདོར་ན་ལྟོས་བཅས་མཆོག་ཕལ་ཀུན་གྱིས་སྒོ་ཐམས་ཅད་ནས་ཟབ་དགོངས་ཡོངས་སུ་རྫོགས་པའི་ཐབས་ལ་གཅིག་དུ་བརྩོན་པས་རྣམ་དཀར་གྱི་རིམ་པ་བློ་ནུས་དང་འཚམ་པར་སྒྲུབ་བཞིན་པ་ལགས་སོ། །དེ་ལྟ་བུར་བླ་མའི་ཟབ་དགོངས་རྫོགས་པའི་ཐབས་ལ་བརྩོན་པ་ནི་བསགས་སྦྱོང་ཀུན་གྱི་མཆོག་ཏུ་འགྱུར་བ་སོགས་ཕན་ཡོན་དང་དགོས་པ་བསམ་གྱི་མི་ཁྱབ་པའང༌། དུས་ཀྱི་འཁོར་ལོའི་རྩ་བའི་རྒྱུད་ཀྱི་དུམ་བུ་བླ་མའི་ཡོན་ཏན་བཟུང་བའི་རྒྱུད་ལས། ཉེ་དུ་འབྲེལ་བ་ཤུལ་ན་གནས་པ་ཡིས། །གཤིན་གྱི་དོན་དུ་དགེ་བ་གང་བྱས་པའི། །རྣམ་པར་སྨིན་པ་མ་ཕྱིར་བེའུ་བཞིན། །གང་དུ་སྐྱེ་བ་དེ་ཡི་རྗེས་སུ་འབྲང༌། །དེ་བཞིན་མོས་གུས་ལྡན་པའི་སློབ་མ་ཡིས། །བླ་མ་འདས་ནས་གདུང་བས་མཆོད་བྱས་ན། །ཐུགས་ཀྱི་དགོངས་པ་གོང་དུ་ཡོངས་རྫོགས་ཤིང༌། །སློབ་མས་བླ་མའི་རྣམ་ཐར་སྙོགས་པར་འགྱུར། །བླ་མ་འདས་པའི་ལོ་ཟླ་ཚེས་གྲངས་དག །ངེས་པར་བཟུང་སྟེ་མཆོད་པ་བྱས་གྱུར་ན། །བསྐལ་པར་བསགས་པའི་སྡིག་ཆེན་རབ་བཅོམ་ནས། །ཤིན་ཏུ་མི་བཟད་གཤིན་རྗེའི་གྲོང་ལས་ཐར། །སྟོང་གསུམ་སྐྱེ་བོ་མིག་བྲལ་སྲོག་ཉམས་ལ། །མིག་སྲོག་བྱིན་ཡང་དེ་ཡི་དཔེར་མི་ཕོད། །དེ་སྙེད་སྐྱེ་བོ་དགྲ་བཅོམ་ལ་བཀོད་ནས། །བསྐལ་པར་མཆོད་པའི་དགེ་བས་དཔེར་མི་ཕོད། །བསྐལ་པ་གྲངས་མེད་བྱས་པའི་སྡིག་པ་ཡང༌། །མུན་ལ་ཉི་མ་ཇི་བཞིན་མ་ལུས་སེལ། །ཞེས་རྒྱུད་ཀྱི་རྡོ་རྗེའི་ལུང་སོགས་ལས་རྒྱ་ཆེར་འབྱུང་བ་ལྟར་རོ། །དེ་ལྟར་ལེགས་བྱས་ཀྱི་ཐོག་མཐའ་བར་གསུམ་དུ་ས་གཞི་སྐྱོང་བའི་མངའ་བདག་འབྲས་ལྗོངས་ཆོས་རྒྱལ་དཔལ་ལྡན་དོན་གྲུབ་རྣམ་རྒྱལ་སྲས་ཡུམ་ཟུང་གིས་དད་དམ་འགྱུར་བ་མེད་པའི་ཐུགས་བསྐྱེད་ལྷུར་བཞེས་ཀྱི་བདག་རྐྱེན་བླ་མེད་གནང་ཞིང༌། ཤུལ་བཞུགས་ལྟོས་བཅས་ཀྱང་རྣམ་ཀུན་ཐུགས་བརྩེ་ཆེན་པོས་བསྐྱངས་པ་ནི། འཇམ་མགོན་བླ་མ་རིན་པོ་ཆེའི་ཆོས་ཀྱི་བཀའ་དྲིན་གསོབ་པའི་དམ་ཚིག་གི་གཞུང་རྣམ་པར་དཀར་བ་དམ་པའི་ངང་ཚུལ་བསྔགས་འོས་མཛད་བཟང་ཟླ་མེད་ལ་རྗེས་སུ་ཡི་རང་བའི་གནས་སུ་ངེས་པའོ། ༈ །གཉིས་པ་ཐུན་མིན་ཁྱད་པར་གྱི་རྣམ་ཐར་བྱེ་བྲག་ཏུ་བཤད་པ་ལ་གཉིས། ནང་དང་གསང་བའི་རྟོགས་པ་བརྗོད་པའོ། །དང་པོ་ནི། ཟབ་མོའི་རྣལ་འབྱོར་གྱི་བྱེད་པས་ཡེ་ཤེས་དག་པའི་སྣང་བ་ལ་དབང་འབྱོར་བ་རྣམས་ཀྱི་སྤྱོད་ཡུལ་དུ་གྱུར་པ་ནང་གི་རྣམ་ཐར་ཏེ། དེ་ལའང་ནང་གསེས་གསུམ་དུ་དབྱེ་བ་ལས། དང་པོ་སྒྲུབ་བརྒྱུད་ཤིང་རྟ་བརྒྱད་ཀྱི་བསྟན་པའི་མངའ་བདག་སྨིན་གྲོལ་ཡོངས་རྫོགས་ཀྱི་བཀའ་སྲོལ་འདྲེན་པའི་ཤིང་རྟ་ཆེན་པོར་དོན་གྱིས་གྲུབ་ཚུལ་གཙོ་བོར་སྨོས་པའི་ཁོངས་སུ་འབྲེལ་མཚུངས་གཟིགས་སྣང་རིགས་སྐབས་སོ་སོར་འགོད་པར་བྱ་སྟེ། མཁས་གྲུབ་ཆེན་པོ་པྲཛྙཱ་ར་རྨིས། །དཔལ་ལྡན་རྡོ་རྗེ་འཆང་ནས་ལེགས་འོངས་པའི། །གངས་རིའི་ཁྲོད་འདིར་སྒྲུབ་བརྒྱུད་སྲོལ་ཆེན་བརྒྱད། །དེ་དག་གྲུབ་ཐོབ་གོང་མའི་གཤེགས་ཤུལ་ཡིན། །ཐར་འདོད་རྣམས་ཀྱང་ལམ་དེའི་རྗེས་སུ་ཞུགས། །ཞེས་དང༌། ཀུན་གཟིགས་གུ་ཎ་སཱ་རས། བོད་ཡུལ་སྒྲུབ་བརྒྱུད་ཤིང་རྟ་ཆེན་པོ་བརྒྱད། །རྙིང་མ་བཀའ་གདམས་ལམ་འབྲས་བཀའ་བརྒྱུད་པ། །ཤངས་པ་ཞི་བྱེད་སྦྱོར་དྲུག་བསྙེན་སྒྲུབ་བོ། །ཞེས་གསུངས་པ་ལྟར། ལྗོངས་འདིར་སྤྲུལ་པའི་ལོ་པཎ་སྐྱེས་མཆོག་རྣམས་ཀྱི་བཀའ་དྲིན་ལས་ལེགས་པར་བྱོན་ཅིང༌། དེ་དག་ཐུགས་ཉམས་སུ་བཞེས་པས་གྲུབ་འབྲས་མངོན་དུ་མཛད་ནས་དམ་པའི་སྐྱེས་བུ་རེ་རེས་ཀྱང་གདུལ་བྱ་མཐའ་ཡས་པ་བྱང་ཆུབ་ཆེན་པོའི་གོ་འཕང་ལ་དབུགས་དབྱུང་བར་མཛད་པ་སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་གཞུང་གདམས་མན་ངག་གི་རྒྱུན་སོ་སོའི་རིང་བརྒྱུད་བར་མ་ཆད་པ་བཞུགས་སོ་ཅོག་ཀུན་ལྷག་ལུས་མེད་པ་ཀུན་གཟིགས་འཇམ་པའི་དབྱངས་མཁྱེན་བརྩེའི་དབང་པོས་ཤིན་ཏུ་དོན་གཉེར་ཆེན་པོས་གསན་ཏེ་ཐུགས་དམ་ཉམས་བཞེས་ཡུན་རིང་དུ་གནང༌། ཤིང་རྟ་སོ་སོའི་བསྟན་པའི་མངའ་བདག་ཆེན་པོ་རྣམས་དང་ཡི་དམ་ལྷ་དང་མཁའ་འགྲོས་ཡང་ཡང་རྗེས་སུ་བཟུང་ཞིང་བྱིན་གྱིས་བརླབས་པས་ཉེ་བརྒྱུད་གདམས་པའི་བཀའ་བབས་ཁྱད་པར་ཅན་བརྙེས་ཏེ་དབང་ཁྲིད་མན་ངག་གི་རྒྱུན་རྣམས་རིས་མེད་པའི་བསྟན་འཛིན་སྐྱེས་ཆེན་དང༌། ཁྱད་པར་དུ་འཇམ་མགོན་བློ་གྲོས་མཐའ་ཡས་ཞབས་ལ་བུམ་པ་གང་བྱོའི་ཚུལ་དུ་རྫོགས་པར་བསྩལ་ནས་བསྟན་པའི་སྲོག་མཐུད་པར་མཛད་པའི་རྒྱུན་མཐའ་དག་སླར་ཡང་རྗེ་བླ་མ་དམ་པ་མཆོག་གིས་ཀྱང་ཕྲ་ཞིང་ཕྲ་བར་རྩད་གཅོད་དང་འབྲེལ་ཡོངས་རྫོགས་ཞིབ་ཚང་དང༌། གཙོ་ཆེ་བ་རྣམས་ལན་གྲངས་དུ་མར་གསན་ཅིང༌། ཐུགས་དམ་ཉམས་བཞེས་དང་འཆད་སྤེལ་སོགས་སྒོ་ཀུན་ནས་འགྲན་ཟླ་བྲལ་བའི་ཕྱག་རྗེས་ལས། དོན་གྱིས་སྒྲུབ་བརྒྱུད་ཤིང་རྟ་བརྒྱད་ཀྱི་བསྟན་པའི་གསལ་བྱེད་ཆེན་པོར་ངེས་པའི་ཚུལ་རྒྱ་ཆེར་སྔར་སྨོས་པས་སྤྱིར་བཏང་ཤེས་ནུས་ལ། བྱེ་བྲག་ཏུ་ཐམས་ཅད་མཁྱེན་གཟིགས་རྗེ་བཙུན་བླ་མ་མཆོག་ལ་གཟིགས་སྣང་དུ་བཀའ་བབས་བརྙེས་ཚུལ་དམིགས་བསལ་ས་བོན་ཙམ་སྨོས་ན། ཐོག་མར་སྔ་འགྱུར་བསྟན་པའི་བདག་པོར་ངེས་པའི་ཚུལ་ནི། རྗེ་ཉིད་ཀུན་གཟིགས་མཁྱེན་བརྩེའི་མཆོག་སྤྲུལ་དུ་ཐོག་མར་མཚན་བཞེས་གནང་ཡུལ་དང༌། སྡོམ་པ་གསུམ་གྱི་གཡར་དམ་ཐོག་མར་བཞེས་ཤིང་མདོ་སྔགས་རིག་གནས་གསན་བསམ་ཡོངས་སུ་རྫོགས་པའི་གནས་སྔ་འགྱུར་རྙིང་མའི་ཆོས་སྡེ་དཔལ་ཀཿཐོག་རྡོ་རྗེ་གདན་དུ་གྱུར་ཅིང༌། འཇམ་མགོན་མཁྱེན་བརྩེའི་ཞབས་གངས་ལྗོངས་རྒྱལ་བསྟན་ཡོངས་རྫོགས་ཀྱི་མངའ་བདག་ཆེན་པོར་ངེས་པའི་ཁྱད་པར་ལས་བཀའ་བབས་བདུན་གྱི་གསང་མཛོད་ཀྱང་སྔ་འགྱུར་བཀའ་གཏེར་གྱི་རིང་ལུགས་ལས་གཙོ་བོར་འཕྲོས་པས་ན། རྣམ་ཐར་གྱི་ངེས་གསང་དེ་དང་རྗེས་མཐུན་པར་རྗེ་འཇམ་མགོན་རྣམ་གཉིས་ཀྱི་ཞལ་སློབ་སྔ་འགྱུར་བསྟན་པའི་གསལ་བྱེད་མཁས་དང་གྲུབ་པའི་རྣམ་ཐར་ཅན་ཀཿཐོག་སི་ཏུ་པཎ་ཆེན། ཞེ་ཆེན་རྒྱལ་ཚབ་རིན་པོ་ཆེ། རྡོ་གྲུབ་ཀུན་མཁྱེན་བསྟན་པའི་ཉི་མ། གཏེར་ཆེན་ལས་རབ་གླིང་པ། འབྲུག་པ་རྡོ་རྗེ་འཆང་སྣ་ཚོགས་རང་གྲོལ་སོགས་ཀྱི་ཐུགས་བཅུད་རྫོགས་པར་གསན་ཅིང་སོ་སོའི་དགོངས་གཏད་ཐུན་མིན་དང་བཅས་བསྟན་པའི་བདག་པོར་མངའ་གསོལ་བ་དང༌། གཞན་ཡང་མི་ཕམ་འཇམ་པའི་དབྱངས་ཀྱིས་ཀྱང་བདག་གི་བླ་མ་མཁྱེན་བརྩེ་རིན་པོ་ཆེའི་མཆོག་སྤྲུལ་རྫོང་སར་དུ་བཞུགས་པ་འདི་ཉིད་ངོ་མཚར་ཆེ་བར་འབྱུང་ཞེས་འབྱུང་འགྱུར་མངོན་སུམ་གཟིགས་པས་བསྔགས་པར་མཛད་པ་བཞིན། བཀའ་གཏེར་རྩ་གསུམ་ལྷག་པའི་ལྷ་རབ་འབྱམས་ཀྱི་བསྙེན་པ། ཉེ་བསྙེན། སྒྲུབ་པ། སྒྲུབ་ཆེན་བཅས་མཐར་ཕྱིན་པར་གནང་ཞིང༌། ཟབ་མོའི་རྫོགས་རིམ་རྣམས་ལ་ཉམས་བཞེས་དང་ཁྱད་པར་འོད་གསལ་རྫོགས་པ་ཆེན་པོ་ཁྱབ་བརྡལ་ཡེ་ཤེས་ཀྱི་ཏིང་ངེ་འཛིན་ལས་ནམ་ཡང་མི་འདའ་བ་ཀློང་ཆེན་ནམ་མཁའི་རྣལ་འབྱོར་ཆེན་པོར་བཞུགས་ནས། སྔ་འགྱུར་བཀའ་མ་དྲི་མེད་རྣམ་གཉིས་སོགས་རྒྱུད་སྡེ་ཆེ་ཕྲ་དང༌། ཁྱད་པར་དུ་ནང་རྒྱུད་ཡོ་ག་རྣམ་གསུམ་ཡོངས་སུ་རྫོགས་པའི་སྨིན་གྲོལ། རྒྱུད་རྒྱལ་གསང་བ་སྙིང་པོ་དང༌། འཇམ་དཔལ་སྒྱུ་འཕྲུལ་དྲྭ་བ། སྤྱི་མདོ་དགོངས་འདུས་བཅས་ཀྱི་རྒྱུད་བཤད། དེ་རྣམས་ཀྱི་གཞུང་པོད་དང་ཆོག་ཁྲིགས་སྐོར། རྙིང་རྒྱུད་བཅས་ཀྱི་ལུང༌། གཏེར་མ་མཆོག་གི་སྤྲུལ་སྐུ་རྣམ་གསུམ། གླིང་པ་ཆེན་པོ་བཅུ་གཉིས། དྲི་མེད་རྣམ་གསུམ་ནས། ཕྱིས་བྱོན་རིག་འཛིན་རྩལ་འཆང་རྣམ་གསུམ། ལས་རབ་གླིང་པ། དྲི་མེད་པདྨ་གླིང་པ་ཡབ་སྲས་བར་དུ་བྱོན་པའི་གཏེར་ཆོས་རྩོད་བྲལ་རྒྱུན་བཞུགས་ཕལ་ཆེ་བའི་དབང་ལུང་ཁྲིད། གཞུང་པོད་ཀྱི་ལུང་དང༌། རིན་ཆེན་གཏེར་གྱི་མཛོད་ཆེན་མོ་བཅས། རྙིང་ཕྱོགས་བསྟན་འཛིན་ཆེ་ཕྲ་ལ་གང་ལ་གང་དགོས་བར་མ་ཆད་པར་སྤེལ་མཛད་པའི་རྒྱུན་ལས་ཞེ་ཆེན་རབ་འབྱམས་ལྔ་པས་གདན་ས་ཆེན་པོ་འོག་མིན་ཨོ་རྒྱན་སྨིན་གྲོལ་གླིང་དུ་རིན་གཏེར་གསུངས་པས་མཚོན། ཁམས་བོད་སྟོད་སྨད་ནས། བྱང་རེབ་ཀོང་གི་ཡུལ་ཚུན་ཆད་དུ་སྔ་འགྱུར་བཀའ་གཏེར་འཆད་ཉན་གྱི་རྒྱུན་རྒྱ་ཆེར་འཕེལ་ཞིང༌། ཞར་བྱུང་གཏེར་མཛོད་དཀྱིལ་ཙཀ་ཆ་ཚང་སྤར་དུ་འཁོད་པ་སོགས་བྱུང་བ་དང༌། ཁྱད་པར་དུ་ཀུན་གཟིགས་མཁྱེན་བརྩེའི་དབང་པོས་སྔ་འགྱུར་བའི་ཆོས་ཀྱི་སྲོག་ལྟ་བུ་བཀའ་མ་འདི་ཡིན་པའི་བསྔགས་བརྗོད་དང་ཐུགས་རྩིས་ཆེ་བར་གནང་ཞིང༌། གཏེར་ཆེན་མཆོག་གླིང་ལའང་སྐྱེས་སྦྱང་གི་ཡོན་ཏན་སད་བྱེད་དུ་འཇམ་མགོན་རིན་པོ་ཆེ་ལས་གསང་སྙིང་རྒྱུད་བཤད་ཆེད་དུ་གསན་པར་བསྐུལ་བ་དང༌། དཔལ་ཡུལ་རྒྱ་སྤྲུལ་མདོ་སྔགས་བསྟན་འཛིན་སོགས་ལ་བཀའ་མ་འདི་ཁོ་ན་གལ་གནད་ཆེ་བར་ཡང་ཡང་གདམས་པ་ལྟར་རྗེ་ཉིད་ནས་ཀྱང་སྔ་ཕྱིར་ལན་མང་དུ་གནང་བས། ཀཿདཔལ། ཞེ་རྫོགས། མཆོག་གླིང་གདན་ས་གོང་འོག་སོགས་ཀྱི་བསྟན་རྒྱུན་ལ་དམིགས་བསལ་དུ་བཀའ་དྲིན་ཆེ་ཞིང༌། དེ་དག་གི་བཤད་གྲྭའི་རྒྱུན་ལ་སོ་ཟུར་གནུབས་གསུམ་སོགས་མཁས་གྲུབ་སྤྱི་དང༌། ཁྱད་པར་ཀུན་མཁྱེན་རོང་ཀློང་རྣམ་གཉིས་ཀྱི་གསུང་རབ་དགོངས་དོན་འཇམ་མགོན་མི་ཕམ་རིན་པོ་ཆེའི་ལེགས་བཤད་ཀྱིས་བཀྲལ་བའི་སྲོལ་འཛུགས་གནང་བའི་ཆོས་སྡེ་དེ་རྣམས་གཙོར་གྱུར་སངས་རྒྱས་གཉིས་པའི་རིང་ལུགས་འཛིན་པ་མཐའ་ཡས་པའི་གཙུག་ནོར་གཅིག་པུར་གྱུར་པ་སོགས་ཐུགས་བསྐྱེད་དང་ཕྲིན་ལས་སྒོ་ཀུན་ནས་འགྲན་པའི་ཟླ་ཐམས་ཅད་དང་བྲལ་ཞིང་རྙིང་བསྟན་གཞིར་བཞེངས་ཀྱི་ཚུལ་དུ་གསལ་བར་མཛད་པ་སྟེ། སྔ་འགྱུར་རིག་པ་འཛིན་པ་ཡོངས་ཀྱི་འཁོར་ལོས་སྒྱུར་བ་ཆེན་པོར་གྱུར་ཅིང༌། དུས་ཀུན་ཏུ་འོད་གསལ་ཡེ་ཤེས་ཀྱི་སྐུ་ཅན་ལྷ་དང་རིག་འཛིན་ཌཱ་ཀིས་བྱིན་གྱིས་བརླབས་ཏེ་རྗེས་སུ་བཟུང་བས་དག་པའི་གཟིགས་སྣང་ལ་ཁྱབ་བརྡལ་དུ་སྤྱོད་པར་མཛད་པའི་ཚུལ་ཕྱོགས་མཚོན་ཙམ་སྨོས་ན། རྗེ་ཉིད་ཀྱི་ཕྱག་ཐོར་འཁོད་པ། མེ་སྤྲེལ་སྨིན་ཟླའི་ཚེས་ཉེར་དགུར་མཚོ་པདྨར་འབྱོར་ནས་བསྐོར་བ་ཞིག་ཕྱིན། སྡོད་གནས་སུ་འབྱོར་ཏེ་མོས་གུས་ཀྱི་རྐྱེན་ལས་གུ་རུ་རིན་པོ་ཆེ་སྟོང་གཟུགས་ཀྱི་འོད་སྐྱ་ལམ་ཞིག་ཤེས་ཉམས་སུ་མཇལ་རྐྱེན་གྱིས་བླ་མའི་རྣལ་འབྱོར་ཞིག་བྲི་འདོད་བྱུང་བཞིན་དེ་འཕྲལ་བྲིས་ཞེས་དང༌། ཡང་ལོ་དེའི་ཟླ་༩ཕྱི་མའི་ཚེས༡༩་ལ་སྦྲུལ་གཞུང་རྫ་འགག་སྡོད་ནུབ་ཁོག་སྟོད་དང་རྒྱུ་ཞབས་ལ་གཟེར་ཐུང་ཙམ་བྱུང་བ་སྨན་གྷི་ཏིག་དང༌། གུ་རུའི་ཐུགས་རྗེས་བསྐྱབས། ཚེས༢༠་སྦྲུལ་མགུ་རྫ་འགག་ནས་མར་འོང་སྐབས་གུ་རུ་མཚོ་སྐྱེས་རྡོ་རྗེ་འཆང་མི་ཕམ་རིན་པོ་ཆེའི་ཚིག་བདུན་བླ་སྒྲུབ་ནང་གསལ་འདྲ་ཞིག་ཤེས་ཉམས་ལ་ཤར་བ་དེའི་རྐྱེན་གྱིས་ཚར་ཆེན་རིན་པོ་ཆེའི་བླ་སྒྲུབ་ཞིག་ཡིད་ངོར་དྲན། ཟླ་༩ཕྱི་མའི་ཚེས༡༩་ཐང་ཁུ་ནས་མར་འོང་བའི་ཤིང་རོང་སྟུག་པོ་ནས་འོང་བར་ཆར་ཟིམ་བུ་བབས། གནམ་གཞུང་སྔོ་དྭངས། གཡས་གཡོན་སྤྲིན་འཁྲིགས་པས་ཉམས་སྐྱིད་པ་བྱུང༌། དེས་རྐྱེན་བྱས་ནམ་མཁའ་སྔོ་དྭངས་དབུས་གུ་རུ་རིན་པོ་ཆེ་གསང་གོས་ཟབ་བེར་མནབ་པའི་སྟེང་རུས་རྒྱན་ཐོད་སྐམ་བཞེས་པ། གཡས་རྡོ་རྗེ་འཕྱར། གཞན་རྣམས་ཟ་ཧོར་མ་སྤྱི་ལྟར་ཅན་དང༌། ས་ར་ཧ། ཤ་ཝ་རི། ཀུ་ཀུ་རི་པ། མཻ་ཏྲི་པ། མར་པ་ལོ་ཙཱ་སོགས་བཞུགས་པའི་ཤེས་ཉམས་ཟ་ཟི་བྱུང༌། །ཆུ་བུར་མིག་གིས་མཐོང་ཞེས་བཤད་ནའང༌། །བལྟར་མེད་འདྲེན་བྱེད་ཅེ་རེ་བལྟ་དགོས་ཤིང༌། །དེ་འདྲའི་ཤེས་ཉམས་རྫུན་རིས་སྣང་བ་འདིས། །ཅོལ་ཆུང་རྒན་པོ་ང་ནི་བསླུས་སམ་སྙམ། །ཞེས་གསུངས། ཡང་མེ་བྱ་ཟླ་༥ཚེས༡༠་ཆད་པའི་དགུ་ལ་འབྲས་ལྗོངས་ལྷ་ཡུམ་གྱིས་ཐུགས་ཁུར་བཞེས་ནས་ཐུགས་སྒྲུབ་བར་ཆད་ཀུན་སེལ་གྱི་ཚོགས་བཏང་སྐབས་གུ་རུ་རིན་པོ་ཆེར་དད་མོས་འབར་ཞིང་དགའ་སྐྱོ་འདྲེས་མའི་ངང་གུ་རུ་མཁའ་འགྲོའི་ཚོགས་འལ་འོལ་ཙམ་ཡོད་སྙམ་དང༌། དུས་ཀྱི་མི་འཇིགས་པའང་སྦྱིན་པའི་ཉམས་ཞིག་བྱུང་ཡང་གཤོབ་རྐྱལ་གྱི་ཤེས་ཉམས་རང་བཟོ་ལ་སྐྱག་གཏད་གང་ཡང་མེད། །ཅེས་གསུངས། གལ་གནད་དགོས་པ་གང་ཆེའི་སྐབས་གུ་རུ་རིན་པོ་ཆེར་གསོལ་འདེབས་མཛད་པ་ཙམ་གྱིས་ཞལ་གཟིགས་ལུང་བསྟན་འབྱུང་ངེས་པའི་གསུང་འཕྲོས་ཕེབས་པ་དང༌། སྤྱིར་འཇམ་དབྱངས་མཁྱེན་བརྩེའི་དབང་པོ་ཉིད་དབུས་གཙང་གི་རྡོ་རྗེའི་གནས་རྣམས་སུ་ཕེབས་པའི་ཚེ་གདོད་ནས་གྲུབ་པའི་གནས་ཡུལ་རྣམས་དང་གཉིས་སུ་མ་མཆིས་པར་མཁས་གྲུབ་རིག་འཛིན་དབང་པོ་རྣམས་ཀྱིས་བྱིན་གྱིས་བརླབས་པའི་མཐུས་གནས་དེར་ཕེབས་པ་ཙམ་གྱིས་ལྷ་དང་ཌཱ་ཀིས་རྗེས་སུ་བཟུང་ཞིང་བྱིན་གྱིས་བརླབས་ནས་ཆོས་ཀྱི་མཛོད་གཏད་པ་སོགས་རྣམ་ཐར་ཆེན་མོར་གསལ་བ་བཞིན། རྗེ་འདི་ལའང་དེ་དང་རྣམ་དབྱེར་མ་མཆིས་པར་ངེས་པའི་ཚུལ་གཟིགས་སྣང་ཁྱད་པར་ཅན་འདི་དག་ལ་དཔྱད་པས་ཤེས་ནུས་སོ། །མེ་བྱ་ཟླ་༩ཚེས་ལ། རྡོ་རྗེ་གླིང་གི་རི་རྒྱུད་སེང་ཆེན་ནམ་རྒྱུན་ཤར་ཉི་མ་འཆར་དུས་བལྟ་བར་སོང་བས། ཉི་མ་འཆར་ཕྱོགས་འདིར་རྒྱ་ནག་རི་བོ་རྩེ་ལྔ་ཡོད་སྙམ་བི་མ་ལར་མོས་གུས་བྱས་པས་ཉི་མའི་དཀྱིལ་ཟེར་དང་འགྲོགས་པའི་བི་མ་ལ་ཡེ་རེ་རེ་བྱོན་ནས་རང་ལ་ཐིམ་པའི་སྣང་བ་བྱུང༌། བི་མའི་བླ་རྣལ་གསོག་སྐབས་དཔེ་རྙིང་ཤོག་སེར་རྒྱལ་པོའི་བླ་དཔེ་འདྲ་བ་ལྡེབ་རིང་སྔར་གྱི་བྲིས་རྙིང་ཕྲེང་ཞིབ་ལ་མང་བ་རྫོགས་པ་ཆེན་པོའི་ཁྲིད་སྐོར་ཞིག་གི་དབུ་ནས་མ་ཚང་བ་པོད་ཆེན་གཅིག་ཀློག་ནས་ཐར་ཐོར་བཏོན་པ་རྨིས། ཡང་ནུབ་གཅིག་བི་མ་ལའི་བླ་སྒྲུབ་མཁྱེན་གཏེར་ནང་ནས་ཁྲོམ་སེར་སྐྱ་མང་ཤོས་ལ་གཙུག་ལག་ཁང་ཞིག་ཏུ་སྐུ་གསུང་ཐུགས་དབང་གི་བྱིན་རླབས་འདོན་པ་དང༌། འཇམ་མགོན་ལེགས་པ་རིན་པོ་ཆེ་ལས་སྔགས་ཆོས་ཤིག་ཞུས་པའི་འཕྲོས་རེ་བདུན་དུས་ཁོང་བྱོན་ནས་འདོན་ཆོག་གསུངས་པ་སོགས་རྨིས། ཁྲོ་རྫོང་མདར་སྡོད་ནུབ་འཇམ་མགོན་ལེགས་པ་རིན་པོ་ཆེར་རོང་ཕུར་དང་རོག་ཕུར་པོད་གཉིས་བཟང་གོས་ནག་པོའི་ཐུམ་ཅན་འབྱོར་བ་དེའི་ནང་ནས་ཕུར་འགྲེལ་འབུམ་ནག་གི་དཔེ་མཇལ་ནས་གསུང་གླེང་མང་དུ་བྱེད་པ་རྨིས། ས་ཁྱི་ཟླ་ཚེས་ནམ་ལངས་ཁར་རྨི་ལམ་དུ་གསང་བ་འདུས་པ་སྒྱུ་འཕྲུལ་མི་བསྐྱོད་པ་གང་ཡིན་ཆོག་པའི་སྐུ་མདོག་སྔོ་དྭངས་ཧྲིལ་སྐུ་བྱིས་པ་ལོ་བརྒྱད་ལོན་པའི་ཚད་ཙམ་ཞིག་ཡེ་རེ་རེ་མཇལ་བ་རྨིས། འདི་སྐབས་མདོ་རྒྱུད་མ་འབུམ་ཐེར་ཚར་ཉེ་དང་གསང་སྙིང་རྒྱུད་འཆད་སྐབས་ཡིན། མེ་ཡོས་ཟླ་བ་བདུན་པའི་ཚེས་བཅུ་གཉིས་ལ་ཤར་ཀཿཐོག་ཏུ་ཡོད་སྐབས་རྨི་ལམ་ལ་ཁང་པ་ཞིག་གི་ནང་ཡི་གེ་རྙིང་པ་དང་གསར་པ་ཤིན་ཏུ་མང་པོ་བརྩིགས་པའི་རབ་གསལ་ངོས་ངེད་རང་འདུག་པའི་མདུན་དེར་མི་རྒན་སྣུམ་བེར་པགས་པའི་དུག་ལོག་ཆེན་པོ་མནབ་པ་འབྲོག་པ་ལྟ་བུ་ཞིག་འདུག་པ་གནུབས་ཆེན་སངས་རྒྱས་ཡེ་ཤེས་རེད་ཟེར་བ་དེ་ལ་མདོ་དགོངས་འདུས་འགྲེལ་བ་ཞུ་དགོས་སྙམ་པས་པོད་རིང་བཞི་བརྒྱ་ཡོད་རྒྱུའི་ངེད་ནས་ལུང་སྤེལ་བྱས་ན། དང་པོ་རང་གིས་ཚར་གཅིག་བཏོན། དེ་ནས་འདོན་རྒྱུ་བྱེད་སྲོལ་འདུག་པས་བཀའ་འགྱུར་ལས་མང་བས་འདོན་ཚོད་མེད་བྱས་པ། མི་རྒན་དེས་པོད་འདི་རྣམས་མདོ་དགོངས་འདུས་ཀྱི་འགྲེལ་པ་ཡིན་པས་ཐམས་ཅད་ཁྱོད་ཀྱིས་ཐོབ་པར་གྱུར་ཅིག་ཟེར་བས་རང་གི་བསམ་པར་གསར་རྙིང་མདོ་སྔགས་ཐམས་ཅད་མདོ་དགོངས་འདུས་སུ་འདུས་ཤིང་བསྟན་པ་ཀུན་གྱི་གསང་བའི་མཛོད་ཆེན་པོ་ཡིན་པས་དེས་གསུངས་པ་འདྲ་སྙམ། དེ་ནས་ཡིག་རྙོག་པོད་བཞི་བཅུ་ཙམ་དང༌། པོད་ཁ་ཤས་ལག་ཏུ་བཞག་ནས་གདམས་གཏད་ལྟ་བུ་མཛད་སོང༌། དེ་ནས་རྒས་པོ་དེ་མངའ་བདག་མར་པར་གནས་གྱུར་པ་མགུལ་ལྦ་བ་ཆེན་པོ་སྨུག་ཛི་རེ་བ་ཞིག་རེད་འདུག་པས་འདི་མར་པ་རེད་དགྱེས་རྡོར་དངོས་ཡིན་སྙམ་མོས་གུས་བྱས་པས་སེམས་ཉམས་ལ་དགྱེས་རྡོར་དངོས་སུ་སྣང་བ་ལྟར་བྱུང་དབང་ཞུ་དགོས་སྙམ་པས་སྨུག་ཛི་རེ་བ་དེའི་མཆུ་མུར་མུར་འདོན་པ་ལྟ་བུ་ཞིག་མཛད་ཀྱང་སྒྲ་མ་ཐོས། དེ་འདྲ་མང་དུ་རྨིས་མཐར་གཉིད་སད། ཞིབ་ཆ་ནི་དཀོར་ནག་གིས་སྒྲིབ་པས་བརྗེད་འབྱམས་སུ་གྱུར་ཏོ། །མེ་སྤྲེལ་ཟླ་བ་བཅུ་གཉིས་པའི་ཚེས་བཅོ་ལྔ་འབྲས་ལྗོངས་སྒང་ཐོག་ཏུ་སྡོད་ནུབ་རྨི་ལམ་དུ་ལྷ་ཁང་ཆུང་ངུ་ཞིག་གི་ནང་དུ་ཕྱིན་པས་ཕུག་ཏུ་སྙན་ཤལ་མང་པོའི་གསེབ་ཞིག་ཏུ་སྔོན་བྱོན་རྙིང་མའི་རིག་འཛིན་ཆེན་པོ་གནུབས་ཆེན་ཡིན་རྒྱུ་དབུ་ཟླུམ་འདྲ་ཞལ་མི་ཚད་གཅིག་འདུག་པ་དེ་ཉིད་མིར་དངོས་སུ་གྱུར་པ་འདྲ་ཞིག་གི་ཕྱག་གཡས་རང་གི་དཔྲལ་བར་སྦྱར་བ་དང་སྐུ་ལུས་འགུལ་བ་སྙམ་བྱུང་བ་དགའ་སྐྲག་གཉིས་ཀ་སྐྱེས། གུ་རུའི་གསོལ་འདེབས་ཤློ་ཀ་གཅིག་ཀྱང་གསུངས་པ་ནི། རྩ་གསུམ་ཀུན་འདུས་རྒྱལ་དབང་པདྨ་འབྱུང༌། །རང་བཞིན་དབྱེར་མེད་ངང་ནས་གསོལ་བ་འདེབས། །ནད་གདོན་བར་ཆད་ཐམས་ཅད་ཞི་བ་དང༌། །དོན་གཉིས་བསམ་པ་ལྷུན་གྱིས་གྲུབ་པར་ཤོག །ཅེས་སོ། ཡང་ལོག་གཅིག་ནས་འདྲ་ཞལ་ལྡེར་སྐུ་ཁྲུ་གང་བ་ཞིག་གཏད་བྱུང་བ་ཕག་གྲུ་ཡིན་སྙམ་གསུས་པ་ཆེ་བ། ཤ་བརྒྱག་པ། །ཞལ་ངོ་ཆེ་ཞིང་སྒོམ་ཐག་ཅན་ཞབས་པུས་ཕྱེད་སློང༌། གཡས་རྭ་དུང་པུས་སྟེང་གཡོན་མཉམ་བཞག་ཐོད་པ་ཅན་དེ་རང་གི་སྐྱེ་བ་གོང་མ་ཞིག་ཡིན་སྙམ་བྱེད་པ། སམྱཀྶཾ། ཡང་དག་པ། མཆན། །ཞེས་པའི་ཡི་གེ་གཅིག་ཀྱང་འདུག་པ་རྨིས། མེ་བྱ་ཟླ་བ་གསུམ་པའི་ཚེས་ཉེར་བདུན་ནུབ་ཆོས་དཔེ་ཁང་ཞིག་གི་ནང་མཇལ་འགྲོ་ཟེར་ནས་སོང་བས་གཙུག་ལག་ཁང་རྩག་མཐོ་བ་ཞིག་གི་ནང་ཆོས་བརྩིགས་དཔག་ཏུ་མེད་པའི་ནང་སྣར་ཐང་སྤར་མ་བཀའ་བསྟན་ལྟ་བུ་པོད་ཁ་མཐོ་བ་དྲས་ཁ་དམར་སྨུག་ཅན་འདུག་པ་བལྟས་པས། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་དང༌། དེའི་སྐོར་ཁ་ཤས་འདུག་པ་མཆོག་ལྡན་ནས་ཆོས་དབང་གཏེར་མ་རེད་ཟེར། ཆོས་དབང་ལ་ཡོད་པ་གོ་མ་མྱོང་བྱས། ཡང་པོད་ཁ་ཤས་ཞལ་ཕྱེས་པས་ཉང་གི་གཏེར་མ་ཡིན་རྒྱུར་རྙིང་མའི་སྔགས་གཞུང་གི་འགྲེལ་པ་མང་པོ་འདུག་པ་རྒྱུན་རིང་མཇལ་བ་རྨིས། མེ་སྤྲེལ་ཟླ་ཚེས་ལ་ལྷོ་བྲག་སྨྲ་བོ་ཅོག་མཇལ་འགྲོ་སྐབས་དགོན་གྱི་གཤམ་ཉེར་སླེབས་པ་ན། བླ་མ་མངའ་བདག་ཆེན་པོ་དགེ་བསྙེན་ཆས་དབུ་སྐྲ་ཐོར་ཅོག་ཡོད་པ། གཡས་རྡོ་རྗེ། གཡོན་ཐོད་པ་བསྣམས་པ་སྐུ་ཆེ་ཙམ་མཇལ་ཞིང་མཐར་རང་ལ་ཐིམ་པའི་སྣང་བ་བྱུང༌། སྔར་རྫོང་སར་བཞུགས་སྐབས་སྤྲུལ་སྐུ་ཨ་བན་ནས་བསམ་གཏན་གླིང་པའི་བཀའ་བརྒྱད་དྲེགས་འདུལ་ལ་དབང་དཔེ་ཡོད་ཚུལ་གསུངས་པ་དེ་འབྱོར་ན་དབང་ཞིག་བཀའ་དྲིན་བསྐྱང་དགོས། གཏེར་མཛོད་དུ་དབང་དཔེ་དང་དབང་རྒྱུན་མི་འདུག་ཞུས་པས་མདངས་ཕྲན་ནས་གླེགས་བམ་ཞིག་རྙེད་པ་རྨིས་པ་དེ་ལ་བལྟ་བ་ཡིན་འདྲ་གསུངས། མེ་སྤྲེལ་ཟླ་བ་གཉིས་པའི་ཚེས་ཉེར་ལྔ་ལ་འོག་མིན་ཨོ་རྒྱན་སྨིན་གྲོལ་གླིང་དུ་ཡོད་སྐབས་དེ་ནུབ་གཉིད་སྲབ་མོར་ཀུན་མཁྱེན་ཀློང་ཆེན་པ་བྱིས་པ་ལོ་བརྒྱད་ཙམ་དབུ་ཞྭ་རྩེ་སྒྲིལ། ཆོས་གོས་བཙག་ཁ། ཕྱག་གཉིས་ས་གནོན། སྐུའི་སྟོད་ལས་འོད་ཟེར་སྣ་ལྔ་གྱེན་དུ་འཕྲོ་བ་ཞིག་རྒྱུན་རིང་ཙམ་དུ་མཇལ་ལོ། །གཞན་ཡང་ཀློང་ཆེན་པའི་བླ་རྣལ་མཛད་བྱང་དུ་རྗེས་སུ་བཟུང་ཞིང་བྱིན་གྱིས་བརླབས་ཚུལ་གསུངས་པས་མཚོན། རྣམ་ཐར་ཞལ་གསུང་ལས་ཀྱང་ཀློང་ཆེན་པས་རྗེས་སུ་བཟུང་ཚུལ་གསུངས་པ་སོགས་དང༌། རྡོ་གྲུབ་མཆོག་སྤྲུལ་འཇིགས་མེད་བསྟན་པའི་ཉི་མ་ལས་ཀློང་སྙིང་ཡང་གསང་བླ་སྒྲུབ་ཐིག་རྒྱའི་དབང་གསན་སྐབས་བླ་མ་ཉིད་ཀུན་མཁྱེན་དངོས་སུ་མཇལ་བའི་གསུང་འཕྲོས་ཀྱང་ཐོས། གོང་ཟླའི་ཚེས་༡༧ལ་གནས་དེར་རྡོར་གླིང་ཀློང་གསལ་དབང་སྒྲུབ་སྐབས་དང་པོ་སྨིན་གཏེར་ལམ་ཙམ་གསལ། དེ་གནས་འགྱུར་གྱི་རྒྱལ་སྲས་རྡོ་རྗེ་གླིང་པ་ན་བཟའ་སྔོན་པོ་ཕུ་དུང་ཅན། སྐུ་སྨད་ཕྱམ་ཙེ་དཀྲིས་པ། དབུ་ལ་པད་ཞྭ་སྔོན་པོ་མནབ་པས་དཀྱིལ་འཁོར་མང་ཤས་སྤྲུལ་ནས་རང་གཏེར་རྣམས་ཀྱི་དབང་དང༌། མཐར་གླེགས་བམ་མང་ཙམ་གྱི་བཀའ་གཏད་མཛད་པའི་སྣང་བ་བྱུང་ངོ་གསུངས། ཕྱིས་དཔེ་རྒྱུན་གསར་རྙེད་རྒྱུད་བཅུ་བདུན་ནས་སྒྲ་ཐལ་འགྱུར་སོགས་རྒྱུད་ཁ་ཤས་ཀྱི་འགྲེལ་པ་བི་མ་ལས་མཛད་པ་རྣམས་ཀྱི་ལུང་ཀཿཐོག་མཁན་ཆེན་ནུས་ལྡན་སོགས་ལ་འཆད་སྤེལ་གནང་སྐབས། གུས་ནས་ཞལ་རྩེད་ཞུ་ཟོལ་གྱིས་ལུང་འདི་ཉེ་བརྒྱུད་ཡིན་རྒྱུ་བྱས་ན་རུང་ངམ་ཞུས་པས། འགྲེལ་པ་འདི་རིགས་ཕལ་ཆེར་ཐེག་མཆོག་མཛོད་སོགས་དང་དོན་གཅིག་པར་འདུག་པས་མཛོད་བདུན་ནི་མང་པོ་ཐོབ། དཔེ་རྒྱུན་ཡོད་དུས་ལུང་རྒྱུན་ཞིག་ཀྱང་མིང་བཏགས་ན་དགའ་སྙམ། མཁྱེན་བརྩེའི་གདན་ས་འདིར་དབང་ཁྲིད་ལུང་གི་རྒྱུན་གསར་སྤེལ་ལ་བཀྲ་ཤིས་ཞལ་དྲོ་རེད་པས་ད་རེས་བཏོན་པ་ཡིན་ཞེས་གསུངས་པ་འདི་ལའང་དོན་གྱི་རྒྱུ་མཚན་གོ་རྒྱུ་ཆེ་བ་ཞིག་ཡོད་འདྲ། །གཉིས་པ་ནི། ལྷ་ཆོས་བདུན་ལྡན་བཀའ་གདམས་རིན་པོ་ཆེ་རྗེས་འབྲེལ་དང་བཅས་པའི་མངའ་བདག་ཇོ་བོ་ཡབ་སྲས་དང༌། རྗེ་བླ་མ་སོགས་དགེ་བའི་བཤེས་གཉེན་ཆེན་པོ་རྣམས་ཀྱི་མཛད་སྤྱོད་དང་རྣམ་ཐར་ལྷག་པར་གུས་པའི་བསྟོད་བསྔགས་བཅས་སྐུ་མཆོད་སོ་སོར་མཆོད་འབུལ་གཟབ་རྒྱས་གནང་བས་མཚོན་མཆོད་སྦྱིན་གྱི་སྒོ་འཕར་རྒྱ་ཆེར་འགྱེད་པ་དང་བསགས་སྦྱོང་ལ་འབད་བརྩོན་བཏུད་མར་གནང་ཞིང༌། བཀའ་གདམས་རིན་པོ་ཆེའི་གཞུང་གདམས་མན་ངག་སྤྱི་དང་བྱང་ཆུབ་ལམ་གྱི་སྒྲོན་མ་སོགས་ལམ་རིམ་སྔ་ཕྱི། བློ་སྦྱོང་རྒྱས་བསྡུས་སྐོར་ལ་ཉམས་བཞེས་ཀྱིས་བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་ལ་རྩལ་འབྱོངས་པས་སྐུ་ཚེ་དང་ཕྲིན་ལས་ལ་བར་དུ་གཅོད་པའི་མི་དང་མི་མིན་གྱིས་བརྫི་བར་མ་ནུས་ཤིང་ཐུགས་དམ་གྱི་བོགས་འདོན་དུ་གྱུར་ཚུལ་ཞལ་ལས་ཐོས། རྣམ་ཀུན་བྱམས་སྙིང་རྗེ་བྱང་ཆུབ་ཀྱི་སེམས་འདི་ཁོ་ན་རྒྱུད་ལ་འབྱོང་བ་གལ་ཆེ་ཞེས་ནན་དུ་གདམས་པར་མཛད། འཕགས་ཡུལ་ཤིང་རྟ་ཆེན་པོ་གཉིས་ཀྱི་གཞུང་བཀའ་པོད་ལྔའི་འཆད་ཉན་གྱི་སྡེ་ཐུབ་བསྟན་བཤད་སྒྲུབ་དར་རྒྱས་གླིང་གསར་དུ་བཙུགས་ཏེ་མདོ་སྨད་མཁས་པའི་འབྱུང་གནས་ལེགས་བཤད་ཆུ་བོ་སྟོང་གི་འཆད་རྩོད་ཀྱི་མགྲིན་རྔ་བར་མེད་སྒྲོག་པའི་དགེ་འདུན་གྱི་སྡེ་རྣམས་ཀུན་སྤྱོད་འདུལ་བ་དང་མཐུན་པར་བཀས་བཅད། སྔ་ཕྱིར་བཤེས་གཉེན་དམ་པ་དག་ལས་གསང་བདེ་འཇིགས་གསུམ་སོགས་ཀྱི་དབང་དང་བཤད་བཀའ་ཆེད་དུ་གསན་བཞེས་གནང་ཞིང༌། ཁྱད་པར་དུ་རྒྱལ་བསྟན་ཡོངས་རྫོགས་ཀྱི་མངའ་བདག་སྐྱབས་མགོན་བཅུ་གསུམ་པ་ཆེན་པོ་ཐུབ་བསྟན་རྒྱ་མཚོ་དང༌། བཅུ་བཞི་པ་བསྟན་འཛིན་རྒྱ་མཚོ་སོགས་ཀྱིས་ཐུགས་བརྩེ་ཐུན་མིན་དུ་རྗེས་སུ་བཟུང་ནས་གསུང་གི་བདུད་རྩིས་ཐུགས་རྒྱུད་གཏམས་པ་དང༌། བསྟོད་བསྔགས་ཀྱི་མེ་ཏོག་ཆར་དུ་བསྙིལ་ཏེ་མངའ་གསོལ་བས་མཚོན་བཀའ་གདམས་གསར་རྙིང་གི་བསྟན་འཛིན་ཆེས་མང་བས་དངོས་བརྒྱུད་ནས་ཞབས་པད་ལ་བསྙེན་པས་ན་བསྟན་འཛིན་དགེ་བའི་བཤེས་གཉེན་ཆེན་པོར་དོན་གྱིས་གྲུབ་པ་དང༌། དེ་དང་འབྲེལ་བའི་གཟིགས་སྣང་ནི། དབུས་ཕེབས་དང་པོའི་སྐབས་ཇོ་བོ་རྗེའི་བླ་མའི་རྣལ་འབྱོར་གྱི་མཛད་བྱང་དུ་ཇོ་འབྲོམ་ཡབ་སྲས་ཀྱིས་རྗེས་སུ་བཟུང་བའི་ཚུལ་དང༌། ཁྱད་པར་དུ་ཤིང་ལུག་ཟླ་༩ཚེས༡༩་ལ་རྭ་སྒྲེང་དུ་གླིང་བསྐོར་ཕྱིན་པས། ཤར་ཤེལ་ལྡིང་གི་གཡུ་ཤུག་སྡོང་པོའི་རྩེར་སྤྱན་གཟིགས་ཕྱག་བཞི་དཀར་པོ་ལ་ཇོ་འབྲོམ་སྐུ་མཆེད་རྣམ་གསུམ་སོགས་བཞུགས་པའི་ཉམས་ཤར་བས། གསོལ་འདེབས་དབང་བླང་སོགས་བྱས། ཡང་འབྲོམ་གྱི་གཟིམ་ཕུག་དུ་འབྲོམ་རྗེའི་ཐུགས་ཀར་མི་གཡོ་བ་སོགས་ཐིག་ལེའི་ལྷ་ཚོགས་བཞུགས་པ་ལས་འོད་འཕྲོ་བའི་གསལ་ཉམས་བྱུང་བར་ཡིད་ཆེས་ཀྱིས་མཆོད་པ་དང་གསོལ་འདེབས་སོགས་བྱས་པའི་འཁྲུལ་ཤེས་བྱུང་བ་རང་ཉིད་མོས་པ་ཆེ་བའི་ཡིད་དཔྱོད་ཀྱི་འཁྲུལ་ཆ་ལས་དག་པའི་སྣང་བ་ལྟ་ཅི་ཞིག །ཅེས་གསུངས། ཚེས༢༠་ལ་ནུབ་ཕྱོགས་ཕ་ཝཾ་རྟ་འབུར་མ་བསྐོར། སྐྲ་སེན་གཏོར། དེའི་རྒྱབ་ཕྱོགས་ཤུག་སྡོང་རྩ་བར་ངལ་གསོ་སྐབས་གོང་བུའི་མདའ་རྒྱང་གི་ནམ་མཁའ་སྔོ་དྭངས་ལ་བཀའ་གདམས་བརྒྱུད་པ་གསུམ་གྱི་བླ་མ། ཇོ་འབྲོམ་ཡབ་སྲས། ཡི་དམ་ཆོས་སྐྱོང་བསམ་གྱིས་མི་ཁྱབ་པར་བཞུགས་པ་རྣམས་ལས་འོད་ཟེར་ཁ་དོག་སྣ་ཚོགས་པའི་འཇའ་ཐིག་ཕྱག་མཚན་སྣ་ཚོགས་པས་བརྒྱན་པ་ཉི་རྡུལ་ལྟར་འཁྲིགས་པ་བྱུང་ནས་རང་ལ་ཐིམ་མཐར་ཐམས་ཅད་འདུས་ནས་ཇོ་འབྲོམ་ལ་ཐིམ། དེ་ནས་འབྲོམ་ཇོ་བོའི་ཐུགས་ཀར་ཐིམ། དེའི་ཐུགས་ཀར་ཡུམ་ཆེན་མོ། དེའི་ཐུགས་ཀར་ཐིག་ལེ་སེར་པོ་བཀྲག་གསལ་ཅན། མཐར་རང་ལ་ཐིམ་པའི་ཤེས་ཉམས་དང་ལུས་འཕར་གཡོ་བྱེད་ལ་ཁད་པ་བྱུང་ངོ༌། །གཞན་ཡང་རྗེ་བླ་མ་ཙོང་ཁ་པ་ལས་འདུས་པ་ཉེ་བརྒྱུད་གསན་པའི་གཟིགས་སྣང་གི་གཤམ་དུ་བླ་མ་རྒྱང་འབོད་ཡོད་པའི་གསུང་མགུར་ཞིག་མཇལ་བ་གཟིགས་འབུལ་གྱིས་དེའི་ལུང་དང༌། གསང་འདུས་རྗེ་ལས་ཉེ་བརྒྱུད་ཀྱི་དགོངས་གཏད་བྱིན་རླབས་མཛད་པར་གསོལ་བ་བཏབ་པས། གསང་འདུས་འགྲེལ་པ་བཞི་སྦྲགས་རྗེ་གོང་མའི་ཕྱག་དཔེ་བདག་གི་མགོར་བཞག་སྟེ་དགོངས་གཏད་སྨོན་ལམ་མཛད། གུས་ནས་གསང་འདུས་འགྲེལ་པ་བཞི་སྦྲགས་རྒྱུད་བཤད་འབུལ་སྐབས། སྔར་ཀུན་གཟིགས་མཁྱེན་བརྩེའི་དབང་པོས་གསང་འདུས་རྒྱུད་བཤད་གནང་བཞེད་ཤིན་ཏུ་ཆེ་ཡང་རྟེན་འབྲེལ་འཕྲོ་ཅན་དུ་སོང༌། ད་རེས་རང་རེ་གཉིས་ནས་གདན་ས་འདིར་རྒྱུད་འཆད་ཉན་བྱུང་བ་དགོས་པ་ཆེ། ཕྲན་འཁྲུལ་སྣང་ལ་ཡིད་རྟོན་ཅི་ཡོད་མ་གཏོགས། རྗེ་བླ་མ་ནི་སྐུ་ཆེ་བར་རི་རབ་ཙམ་དང༌། མི་ཚད་ཙམ་ཞལ་མཇལ་ཐེངས་མང་བྱུང་ཚུལ་གསུང་གི་བདུད་རྩི་དངོས་སུ་ཐོས། ས་སྦྲུལ་ཟླ་༡༡ཚེས་སྐོར་ལྷ་ཁང་གཙང་ཁང་དུ་ཐུབ་པ་ཆེན་པོར་ཡོད་སར་རྡོ་སྐས་ལ་འཛེག །ངོས་ཆོས་གོས་དམར་པོ་གྱོན་ནས་དེ་མདུན་ཕྱག་འཚལ། བཟང་སྤྱོད་ཡན་ལག་བདུན་པ་ཕུལ་ནས་སྒོ་ཁྱམས་སུ་ཕྱིར་འོང་སྐབས་བླ་མ་སྐུ་བོང་མཐོན་པོ་ཆོས་གོས་དམར་པོ་མནབ་པ། དཔོན་གཡོག་གཉིས་ཡར་ཐོན་སོང་བ་ཐུའུ་བཀྭན་རྡོ་རྗེ་འཆང་བློ་བཟང་བསྟན་པའི་དབང་ཕྱུག་རེད་ཟེར་བ་སོགས་རྨིས། །གསུམ་པ་སྙན་བརྒྱུད་ཚད་མ་བཞི་ལྡན་གསུང་ངག་རིན་པོ་ཆེ་ལམ་འབྲས་བུ་དང་བཅས་པའང་ཀུན་གཟིགས་མཁྱེན་བརྩེ་གོང་མ་ངོར་ཨེ་ཝཾ་ཐར་རྩེའི་སྤྲུལ་སྐུར་སྐུ་བདག་ཞུས་པ་ནས་བཟུང་སྐུ་གོང་འོག་སྐུ་ཚེ་རིལ་པོར་བཞུགས་སྟན་ཆགས་པའི་གནས་གདན་སའི་གཙོ་བོ་དཔལ་ལྡན་ས་སྐྱའི་རིང་ལུགས་འཛིན་པའི་ཆོས་སྡེ་ཆེན་པོ་བཀྲ་ཤིས་ལྷ་རྩེ་ཉིད་ཡིན་ལ། རྗེ་གོང་མའི་ཐུགས་སྲས་ཀྱི་ཐུ་བོ་གསང་བདག་རྡོ་རྗེ་འཆང་དངོས་འཇམ་པའི་དབྱངས་བློ་གཏེར་དབང་པོ་དང༌། འཇམ་མགོན་ངག་དབང་ལེགས་པ་གཙོ་བོར་གྱུར་པའི་ས་ངོར་བསྟན་འཛིན་དམ་པ་རྣམས་ཀྱིས་རྗེ་འདི་ཉིད་ཐུན་མིན་ཐུགས་ཀྱི་སྲས་སུ་གྱུར་ཅིང༌། བཀའ་སྲོལ་དེ་ལས་རྒྱུན་བཞུགས་པའི་གདམས་པ་ཡོངས་རྫོགས་ནན་བསྐྱར་དུ་གསན་བཞེས་དང༌། དེ་དག་གི་བསྐྱེད་བཟླས་རྫོགས་གསུམ་གྱི་རྣལ་འབྱོར་ལ་ཉམས་བཞེས་ཐུགས་དམ་ཆག་མེད་གནང་བ་དང་བཅས་བླ་མ་དང་ལྷག་པའི་ལྷས་བྱིན་གྱིས་བརླབས་ཤིང་གུར་ཞལ་སོགས་ཆོས་སྐྱོང་བྲན་དུ་ཁོལ་བས་ནུས་པའི་གདིང་ཚད་བརྙེས་པར་ཞལ་གྱིས་བཞེས། རྡོ་རྗེ་རྣལ་འབྱོར་མས་རྗེས་སུ་བཟུང་ཞིང་འབར་དང་འདུ་བ་གསུམ་གྱི་དྲོད་རྟགས་ཀྱང་མངོན་དུ་མཛད། བསྙེན་སྒྲུབ་དང་དབང་ཆོས་ཀྱི་ཕྱག་ལེན་ས་ངོར་ཚར་གསུམ་སོ་སོའི་ལུགས་བཞིན་ཕྲ་ཞིབ་ཆེར་གནང་བ་སོགས་རྡོ་རྗེ་འཛིན་པའི་མཆོག་དུ་གྱུར། གངས་ཅན་བསྟན་པའི་མངའ་བདག་ས་སྐྱ་པ་ཞེས་མཚན་དོན་མཐུན་པར་ས་ངོར་ཚར་གསུམ་ལ་བཞུགས་པའི་རྒྱུད་སྡེ་གོང་འོག་རྣམས་ཀྱི་དབང་བཀའ་བྱིན་རླབས་རྗེས་གནང་བཅས། དེ་དག་གི་རྫོགས་རིམ་གྱི་ཁྲིད་ངང་རྒྱུད་ཀྱི་བཤད་པ་རྣམས་དང༌། བཀའ་འབུམ་གྱི་ལུང་སོགས་ལན་གྲངས་མང་དུ་འཆད་སྤེལ་གནང༌། ཁྱད་པར་དུ་རྒྱ་གཞུང་ཆེན་པོ་རྣམས་གཞིར་བཟུང་རྗེ་བཙུན་གོང་མའི་དགོངས་པ་གསལ་བྱེད་ཀུན་མཁྱེན་གོ་རམས་བསོད་ནམས་སེང་གེའི་ཡིག་ཆ་རྣམས་ལུང་རིགས་ཀྱི་ལམ་ནས་དྲངས་ཏེ་འཆད་ཉན་གྱིས་འཕེལ་རྒྱས་སུ་མཛད་པའི་ཀློག་པ་ཐོས་བསམ་གྱི་སྡེ་དང༌། གསང་ཆེན་སྙན་བརྒྱུད་སློབ་བཤད་ཀྱི་གདམས་པ་སྒོམ་སྒྲུབ་ཀྱིས་ཉམས་སུ་ལེན་པའི་སྤོང་བ་བསམ་གཏན་གྱི་སྡེ་བཅས་གསར་འཛུགས་མཛད་པས་སྟོད་སྨད་ཀུན་ཏུ་འཆད་ཉན་སྒྲུབ་པའི་རྒྱུན་མང་དུ་འཕེལ་བས་གསང་ཆེན་རྒྱུད་སྡེ་རྒྱ་མཚོའི་མངའ་བདག་ཏུ་གྱུར་ཅིང༌། གཞན་ཡང་གདན་ས་ཁག་རྣམས་གཙོར་བྱས་གཙུག་ལག་ཁང་དང༌། སྐུ་གསུང་ཐུགས་ཀྱི་རྟེན་རྒྱ་ཆེ་གྲངས་མང་གསར་བཞེངས། འཁོན་ལུགས་ཡབ་ཆོས་ཕུར་པའི་སྒྲུབ་མཆོད་རྒྱས་སྤྲོས་ཀྱི་རྒྱུན་འཛུགས་པ་སོགས་ཞིབ་པར་གོང་དུ་སྨོས་ཟིན་པ་ལྟར། མདོར་ན་འཇམ་མགོན་ས་སྐྱ་པ་ཡབ་སྲས་ཀྱི་རིང་ལུགས་མཐའ་བདག་བཤད་སྒྲུབ་ལས་གསུམ་གྱི་སྒོ་ནས་ཕྱོགས་ཐམས་ཅད་དུ་ཆེས་ཆེར་གསལ་བར་མཛད་ཅིང༌། འཁོན་རིགས་དཔལ་ས་སྐྱའི་བདག་ཆེན་ཁྲི་འཛིན་གཞུང་ཟུར་གྱིས་གཙོས་ས་ངོར་སྐྱེས་ཆེན་བརྒྱུད་འཛིན་དང་བཅས་པའི་རིགས་བདག་དུ་གྱུར་པ་སོགས་ཀྱིས་བརྩེ་ཆེན་ཡབ་སྲས་བརྒྱུད་པར་བཅས་པའི་ཐུགས་བསྐྱེད་ཕྲིན་ལས་གཅིག་ཏུ་བསྡུས་པའི་རང་གཟུགས་བསྟན་པའི་གསལ་བྱེད་ཆེན་པོར་མངོན་སུམ་དུ་གྲུབ་པ་དང༌། དེ་དང་འབྲེལ་བར་ཡེ་ཤེས་དག་པའི་གཟིགས་སྣང་ནི། མང་མཁར་ཀ་ལ་ཕུག་ཅེས་པ་སྒྲ་བསྒྱུར་ཕུག་རེད་ཟེར་བ་དེར་ལམ་ཟབ་བཏོན་པས། འབྲོག་མི་ལོ་ཙཱ་ཕུག་ཆེན་ནང་གི་འདྲ་ཞལ་འདྲ་བ། དབུ་ཞྭ་པཎ་ཞུ། ཕྱག་གཉིས་རྡོར་དྲིལ་བསྣོལ་བ། རབ་བྱུང་ཆས་ཅན་ཞིག་རང་གི་མདུན་གྱི་ཐད་དེར་བཞུགས་པ་རེས་རང་དང་གཅིག་ཏུ་གྱུར། རེས་ཐ་དད་དུ་གྱུར་པའི་ཉམས་ཤིག་བྱུང་གསུངས། རྡོར་གླིང་དུ་ས་ཁྱི་ཟླ་༧ཚེས་སྐོར་གཙང་གཡང་ཆོས་སྤྲུལ་སྐུ་སོགས་ལ་སྡོམ་གསུམ་རབ་དབྱེ་བཤད་ཉེའི་སྐབས། ཆོས་ཀྱི་རྗེ་ས་སྐྱ་པཎྜི་ཏ་དེ་ཉིད་ཞབས་ཕྱེད་སྐྱིལ་གྱིས་བཞུགས་པ་རྒྱ་གར་པཎྜི་ཏའི་ཆས་ལྟ་བུ། ཕྱག་གཉིས་ཆོས་འཆད་ཀྱི་རྒྱ་ཅན། དཔྲལ་བར་འཇམ་དབྱངས་དཀར་པོ། མགྲིན་པར་སྨྲ་སེང༌། ཐུགས་ཀར་འཇམ་དཔལ་ཡེ་ཤེས་སེམས་དཔའ། ལྟེ་བར་དབྱངས་ཅན་དཀར་མོ། གསང་བར་མི་གཡོ་བ་དཀར་པོ་རྣམས་བཞུགས་པ་ལ་མོས་གུས་བྱས་པས། ལྷ་དེ་རྣམས་ལས་འོད་ཟེར་འཕྲོ་བསྟིམ་སོགས་ཀྱི་ཉམས་ཟ་ཟི་བྱུང་ཡང་ཞག་ཤས་ཡི་གེ་འགོད་རྒྱུ་མ་བྱུང་བས་བརྗེད། ཟླ་༡༠ཚེས་སྒང་ཐོག་ཏུ་སྡོད་པའི་སྐབས་ཤིག་ཉམས་སྣང་ལ་ཆོས་རྗེ་ས་པཎ་གཡས་ཆོས་འཆད་རལ་གླེགས། གཡོན་མཉམ་བཞག་ཚེ་བུམ། ཐུགས་ཀར་ཚེ་དཔག་མེད་དཀར་པོ། དེའི་བདུད་རྩིའི་འོད་ཟེར་ཚེ་བུམ་སྟེང་བབས། དེ་ལས་བདུད་རྩི་རང་ཐོག་འབབ་པ་སོགས་ཀྱི་ཉམས་བྱུང༌། དགུང་གྲངས་སུམ་ཅུ་སྐོར་ཡིན་སྙམ་བ་ཞིག་ཏུ་ཆོས་རྗེ་ལས་ཚད་མ་རིག་གཏེར་གསན་པའི་དག་སྣང་གི་ཕྱག་ཐོ་ཞིག་ཀྱང་མཇལ། མེ་བྱ་ཟླ་ཚེས་ནུབ་ངོར་དགོན་ལྟ་བུ་ཞིག་ཏུ་རྡོ་རྗེ་འཆང་ཀུན་དགའ་བཟང་པོ་རབ་རིབ་ཞིག་དང༌། ཁོང་གི་དབང་བུམ་ཆུ་ཡིན་ཟེར་བ་དངུལ་གྱི་རིལ་བ་སྤྱི་བླུགས་ཞིག་ཏུ་ཆུ་འདུག་པ་རང་གིས་བཏུང་ནས་སྤྱི་བོར་བླུགས་པས་དགའ་བ་ཆེན་པོ་ཐོབ་པར་རྨིས། དཔལ་མགོན་ཞལ་གྱི་གསོལ་ཕྲིན་མཛད་བྱང་གི་མཚན་དུ་ཀུན་དགའ་ཕྲིན་ལས་རྒྱ་མཚོ་ཞེས་གསུངས་པ་འདིའི་མཚན་སུས་གསོལ་བ་རེད་ཞུས་པས། སྔར་རྨི་ལམ་དུ་ངོར་གྱི་གདན་ས་ནས་ངོར་ཆེན་རྡོ་རྗེ་འཆང་དངོས་ལས་རབ་བྱུང་བསྙེན་རྫོགས་སྒྲུབ་པར་རྨིས་སྐབས་མིང་དེ་གནང་བྱུང་ཞེས་གསུངས་པ་འདི་མཚན་སུས་གསོལ་བ་རེད་ཞུས་པས། སྔར་རྨི་ལམ་དུ་ངོར་གྱི་གདན་ས་ནས་ངོར་ཆེན་རྡོ་རྗེ་འཆང་དངོས་ལས་རབ་བྱུང་བསྙེན་རྫོགས་སྒྲུབ་པར་རྨིས་སྐབས་མིང་དེ་གནང་བྱུང་ཞེས་ཞལ་ལས་ཐོས་ཤིང༌། ངོར་ཆེན་ལས་བརྒྱུད་པའི་སྡོམ་རྒྱུན་ལ་ཤིན་ཏུ་ཐུགས་རྩིས་ཆེ་བར་གནང༌། མེ་བྱ་ཟླ་༤ཚེས༢༥་ལ། ངེད་རང་ངོར་དུ་འབྱོར་ནས་ཁང་པ་ཞིག་གི་ནང་སྡོད་པར་མགོན་པོ་གུར་གྱི་སྡེར་སྐུ་ཞལ་ངོ་ཤིན་ཏུ་ཆེན་པོ་ཐོག་ཚད་གཅིག་ཡོད་པ་ཡེར་རེ་རེ་གཤམ་སྒོ་ཆེན་གཅིག་ནས་ཡར་བྱོན་པ་དང༌། ཡང་ཆོས་སྐྱོང་སྐུ་ཆུང་བ་འདྲ་མིན་མང་པོ་ཞིག་ཀྱང་ཡོད་པར་རྨིས། ཡང་དེའི་སྔ་ཚེས་གང་ཡིན་བརྗེད། རང་ངོར་དུ་འདུ་ཁང་སྦུག་ཁྲི་གསུམ་གྱི་དབུས་མར་བསྡད་ནས་འཚོགས་པ་དང་ལྷན་དུ་ཞལ་འདོན་བྱས་པ་སྙམ་ཡང་ཞིབ་ཆ་བརྗེད། ཟླ་བ་བརྒྱད་པའི་ཚེས་སྟོད་ཞིག་ལ་དཔལ་ལྡན་བླ་མ་བསོད་ནམས་རྒྱལ་མཚན་ཡིན་རྒྱུའི་བླ་མ་རྒུར་ཉམས་ཅན་ན་གཟ་ཁ་ནེམ་གསོལ་བ་ཞིག་ལས་ཀྱེ་རྡོར་དབང་དང༌། ལམ་འབྲས་ལྟ་ཁྲིད་ནས་རྒྱུད་གསུམ་མདོར་བསྡུས་ཤིག་ཐོབ་པའི་ཉམས་བྱུང༌། མེ་བྱ་ཟླ་༨ཚེས་ལ་མང་མཁར་ཐུབ་བསྟན་དགེ་འཕེལ་གྱིས་ཚར་ཆེན་རྡོ་རྗེ་འཆང་གི་འདྲ་ཞལ་རིན་པོ་ཆེའི་མདུན་ནས་དད་མོས་དྲག་པོས་གསོལ་བ་བཏབ་པས་ཕཊ྄ཿལན་གཉིས་གསུང་སྙམ་བྱེད་པ་དང་ཤེས་པ་རྟོག་མེད་ལུས་འཕར་སྤྲུགས་བྱེད་པ་བྱུང༌། ཡང་མེ་སྤྲེལ་ཟླ་༡༢ཚེས༢༠་ལ། ཚར་ཆེན་རྡོ་རྗེ་འཆང་གི་བླ་རྣལ་འདོན་སྐབས་མོས་གུས་ཀྱི་རྐྱེན་ལས་ཚར་ཆེན་རྡོ་རྗེ་འཆང་སྐུ་མདོག་སོགས་ཐུབ་བསྟན་དགེ་འཕེལ་གྱི་འདྲ་ཞལ་རིན་པོ་ཆེ་དང་དབྱིབས་འདྲ་བ་མི་ཚད་གཅིག་ཙམ་ཡོད་སྙམ་ལུང་བསྟན་ཞིག་གནང༌། རང་གིས་དབང་བཞི་བླངས་ཏེ་རང་ལ་བསྟིམས་པས་རང་དགྱེས་རྡོར་དུ་གྱུར་པའི་ཐུགས་ཀར་བདག་མེད་ལྷ་མོ་བཅོ་ལྔ་བཞུགས་པའི་སྣང་བ་བན་བུན་བྱུང་ངོ༌། །ཤིང་ལུག་ཟླ་༧ཚེས༢༠་ལ་ཧོར་ཡེ་ཐའི་རྡ་ཆེན་བརྒྱུད་ནས་འོང་སྐབས་ཚེས༡༩་ནུབ་ཕྱོགས་གནམ་སྔོན་དྭངས་པར་ཟླ་བ་མཐོང་བས་རྐྱེན་བྱས། རྗེ་བློ་གཏེར་དབང་པོ་དྲན་པ་དང་རྗེ་དེ་ཉིད་ཟླ་བ་ལ་རྒྱབ་ཡོལ་བྱས་པ་ལྟ་བུའི་གསང་བདག་ཁྲོ་བོའི་སྐུར་གྱུར་པ་ལ་མོས་གུས་དང་དབང་བླང་བྱས། བླ་མ་རང་ལ་ཐིམ་པས་རང་རིག་གསལ་དྭངས་ཀྱི་ཉམས་ཤར་བས། དེའི་ཉིན་གཡའ་མ་སྔོན་པོའི་ཁུག་གི་ཐང་སྒར་དུ་རྗེ་ཉིད་ཀྱི་བླ་རྣལ་ཞིག་བྲིས། །ཞེས་གསུངས། མེ་བྱ་ཟླ་ཚེས༢༩་ནུབ་ཡར་ཀླུང་རྩེ་ཐང་བསམ་གཏན་གླིང་དགོན་པ་ཡིན་སྙམ་པ་ཞིག་གི་ནང་ཆོས་རྒྱལ་འཕགས་པའི་གདུང་རུས་དང་བླ་མ་དམ་པའི་དབུ་ཐོད་རེད་ཟེར་བའི་གདུང་རུས་ཚལ་པ་དང༌། དབུ་ཐོད་དུམ་བུ་ཆེ་ཙམ་གཉིས་མཇལ་ཁ་ཞུས། བན་རྒན་ཞིག་གིས་གདུང་རུས་དེ་ལས་ཡུངས་ཀར་འབྲུ་ཙམ་ཁ་ཤས་བྱིན། ངོས་རང་གི་ལག་པར་བླངས་བས་དུམ་བུ་ཆེ་བ་ཞིག་གོག་བྱུང་བ་ངོས་རང་ནས་ཚག་བྱས། དབུ་ཐོད་དུམ་བུ་ཡང་ཚེ་ཙམ་རྙེད། དེ་ནས་ན་བཟའ་རྙིང་པ་མང་པོ་བརྩེགས་འདུག་པ་དེའང་བླ་མ་དམ་པའི་ན་བཟའ་རེད་ཟེར་བ་དེ་ལས་དངོས་གྲུབ་ཞུ་དགོས་སྙམ། ཞུ་རྒྱུ་དངོས་བྱུང་མིན་བརྗེད་གསུངས། གཞན་ཡང་ལམ་འབྲས་བརྒྱུད་པའི་བླ་མ་འགའ་རེས་རྗེས་སུ་བཟུང་ཚུལ་ཞལ་གསུང་རྣམ་ཐར་ལས་ཀྱང་འབྱུང་ངོ༌། །ཚར་ཆེན་གསོལ་འདེབས་མཇུག །ཀུན་དགའ་ཕྲིན་ལས་རྒྱ་མཚོ་དོན་གྲུབ་དབང་གི་རྒྱལ་པོས་འདར་གྲོང་ཆེན་སོགས་སྦྱར་བྱང་ཅན་གྱི་གཤམ་དུ། མེ་སྤྲེལ་ཟླ་དགུ་པ་ཕྱི་མའི་ཚེས༧་ལ་མཆོད་སྡོང་མདུན་སྡོད་ནུབ་འཇམ་དཔལ་ཆོས་དབྱིངས་གསུང་དབང་གི་དབང་གཞན་ལ་བསྐུར་བ་སོགས་དང༌། གོང་མིང་སྔར་ཡོད་པ་ལ་དོན་གྲུབ་དབང་གི་རྒྱལ་པོ་ཟེར་བ་སོགས་རྨིས། ས་སྐྱ་བདག་ཆེན་ཨཱ་ཡུ་བཛྲས་ཕུར་པའི་སྨད་ལས་གནང་སྐབས་སྔགས་འཆང་ཆེན་མོ་མདུན་ཐད་བཞུགས་པའི་ཉམས་དང༌། འཇམ་དབྱངས་གཟི་འོད་འབར་བར་གསོལ་སྨོན་སྐབས་བྱིན་རླབས་ཀྱི་མཚན་མ་ཕྲན་བུ་བྱུང་བ་བརྗེད་དེ་ཐལ། །ཞེས་ཕྱག་ཐོར་འཁོད་འདུག །གཞན་ཡང་འཇམ་མགོན་ལེགས་པ་རིན་པོ་ཆེའི་རྣམ་ཐར་དུ། རྗེ་འདི་ལ་ལམ་འབྲས་སློབ་བཤད་དང་འབྲེལ་ཀྱེ་རྡོར་རྒྱུ་དབང་གྲུབ་འཕྲལ་ཀུན་གཟིགས་མཁྱེན་བརྩེའི་དབང་པོ་ལ་གུར་ལྷ་བརྒྱད་ཀྱིས་བསྐོར་བ་ཞལ་གཟིགས་པས། ཁོང་གི་སྤྲུལ་སྐུ་ལ་དབང་ཕུལ་བས་ཐུགས་དགྱེས་པ་ཡིན་འདུག་གསུངས། དེ་སྐབས་རྗེ་འདིས་ཀྱང་ལེགས་པ་རིན་པོ་ཆེ་སྒོ་རུམ་པ་ཀུན་དགའ་ལེགས་པའི་འབྱུང་གནས་ཀྱི་རྣམ་འཕྲུལ་དུ་ངེས་ཤེས་འཁྲུངས་པར་ལམ་འབྲས་བླ་མ་བརྒྱུད་པའི་རྣམ་ཐར་ལྗགས་ལུང་གནང་བར་སྒོ་རུམ་པའི་རྣམ་ཐར་མཇུག་ཏུ་ལེགས་པ་རིན་པོ་ཆེས་དེ་ལྟ་བུའི་རྣམ་པར་ཐར་པ་བྱིས་པའི་བློས་བསམ་པར་དཀའ་བ་ཞེས་གསུངས་ཤིང་རྗེ་འདི་ཉིད་ལ་སྤྱན་ཅེར་གྱིས་ཡུན་རིང་དུ་གཟིགས་སོང་བར། ཁོང་ལ་ངེས་ཤེས་སྐྱེས་པ་དེ་བླ་མས་དགོངས་སོང་སྙམ་པ་བྱུང་གསུངས། ཡང་ལེགས་པ་རིན་པོ་ཆེས་མཁྱེན་སྤྲུལ་རིན་པོ་ཆེ་འདི་ངེད་ཀྱི་སློབ་མའི་གཙོ་བོ་ཡིན། བླ་མའང་ཡིན་པས་ལམ་འབྲས་བླ་བརྒྱུད་ཀྱི་ཞལ་ཐང་དུའང་བྲིས་ཡོད། ཞབས་བརྟན་གསོལ་འདེབས་ཤྭ་ལོ་ཀ་གཅིག་རྒྱུན་འདོན་ཞུ་བཞིན་ཡོད། སློབ་ཚོགས་ཐམས་ཅད་ཀྱིས་ཀྱང་དེ་བཞིན་གསོལ་འདེབས་ཞབས་བརྟན་བསྒྲུབ་པ་ལ་འབད་དགོས་པར་གསུངས་ཤིང༌། ཁྱད་པར་དུ་འཇམ་མགོན་ལེགས་པ་རིན་པོ་ཆེས་རང་གི་ཐུགས་སྲས་ཐུ་བོ་སྡེ་གཞུང་མཆོག་སྤྲུལ་ལ་བཀའ་བསླབ་གནང་བར། མཁྱེན་བརྩེའི་སྤྲུལ་སྐུ་རིན་པོ་ཆེ་འདི་བརྟག་མི་དགོས་པའི་རྡོ་རྗེ་སློབ་དཔོན་མཚན་ཉིད་དང་ལྡན་པ་ཡིན་པས་ཁྱེད་ཀྱིས་ཀྱང་བླ་མར་བརྟེན་དགོས་ཞེས་ཕེབས་པ་ནས་བཟུང་རྗེ་འདི་ཉིད་བླ་མའི་དམ་པར་བཟུང་སྟེ། ཕྱིས་དགུང་གྲངས་མཐོན་པོར་ཕེབས་པ་ན་ཡང་ལི་ཐང་ནས་རྫོང་སར་བར་ལམ་ཐག་རིང་པོར་དབང་ལེན་ལ་ཡང་ཡང་ཕེབས། ལན་གཅིག་སླར་ཕེབས་ཆོས་སུ་འཇམ་དཔལ་མཚན་བརྗོད་ལྗགས་ལུང་མཛད་སྐབས་རྗེ་འདི་འཇམ་དཔལ་གཞོན་ནུ་དངོས་ཡིན་པའི་ངེས་ཤེས་བྱུང་ཚུལ་དང༌། སློབ་མ་རྣམས་ལ་ཆོས་འཆད་པའི་སྐབས་སུ་ཡང་སངས་རྒྱས་ཀུན་འདུས་ཕྱི་ཡི་བླ་མ་ཞེས་མཚན་ཉིད་དང་ལྡན་པ་ནི་མཁྱེན་སྤྲུལ་རིན་པོ་ཆེ་ལྟ་བུ་ཡིན་ཞེས་རྒྱུན་དུ་གསུངས་པར་གྲགས། གཞན་ཡང་འཁོར་འདས་དབྱེར་མེད་ལས་འཕྲོས་པའི་ཐུགས་དམ་ཉམས་བཞེས་ཀྱི་བགྲོ་གླེང་ཐུན་མིན་དུ་གནང་བ་སོགས་ཐུགས་ཡིད་གཅིག་འདྲེས་སུ་བཞུགས་པའོ། །བཞི་པ་ནི་མཆོག་གི་དངོས་གྲུབ་མངོན་དུ་བྱེད་པའི་གསེང་ལམ་འཕགས་ཡུལ་བཀའ་བཞི་བརྒྱུད་པའི་གདམས་ཟབ་མངའ་བདག་མར་པའི་བཀའ་སྲོལ་རྩ་བ་ཡན་ལག་བཅས་ཀྱི་གདམས་ངག་ཆེ་ཕྲ་མཐའ་དག་གསན་བཞེས་གནང་བས་རྣམ་ཀུན་འདིར་སྣང་ཆོས་བརྒྱད་ཀྱི་སྙེམས་རྟོག་བྲལ་ཞིང༌། རྣམ་གཡེང་དང་སྙོམས་ལས་ཀྱི་བྱ་བ་ངན་པ་ཤུགས་འབྱུང་དུ་སྤོང་བ་སོགས་སྒྲུབ་བརྒྱུད་གོང་མའི་རྣམ་ཐར་ལྷུར་བཞེས་ཀྱིས། ནང་གི་རྣལ་འབྱོར་འོད་གསལ་ཕྱག་རྒྱ་ཆེན་པོའི་ལྟ་དགོངས་མཐར་སོན་པས་ཉམས་རྟོགས་ཀྱི་གསང་མཛོད་བརྡོལ། རིགས་ཀྱི་བདག་པོ་རྣམས་ལ་དད་མོས་དང་དག་སྣང་ཤིན་ཏུ་ཆེ་བས་མོས་གུས་དང་རྟོགས་པའི་བཀའ་བབས་ཁྱད་པར་ཅན་བརྙེས། མར་མི་དྭགས་གསུམ་ནས་དེང་གི་བར་སྒྲུབ་པ་ཉམས་ལེན་གྱི་ཕྱག་སྲོལ་བར་མ་ཆད་པ་བཞུགས་པའི་བདེ་དགྱེས་སོགས་རྒྱུད་སྡེའི་བསྐྱེད་རྫོགས་དང༌། ཁྱད་པར་རས་ཆུང་སྙན་བརྒྱུད་ཀྱི་བྱིན་རླབས་ཁྲིད་བཅས་རྗེ་མཁྱེན་བརྩེ་ནས་ཀཿཐོག་སི་ཏུ་རིན་པོ་ཆེར་བརྒྱུད་པ་དང༌། ཀར་འབྲུག་གི་ཆོས་དྲུག་དང་ཕྱག་ཆེན་ཁྲིད་སྐོར་མཁྱེན་བརྩེ་ནས་རྒྱལ་ཚབ་རིན་པོ་ཆེ་ལ་བརྒྱུད་པ། ཆགས་མེད་ཞབས་ཀྱི་ཕྱག་ཆེན་དམར་ཁྲིད་བཅས་ལ་ཐུགས་རྩིས་ཆེར་མཛད་ཅིང་ཉམས་བཞེས་གནང་བར་མངོན། དོན་གཉེར་བ་རྣམས་ལ་གོང་འཁོད་རིགས་དང༌། ལམ་མཆོག་རིན་ཆེན་ཕྲེང་བ། ཐར་རྒྱན། ནང་བརྟག་རྒྱུད་གསུམ་སོགས་མོས་པ་དང་མཐུན་པར་རེ་བ་ཡོངས་སུ་བསྐངས་ཤིང༌། འབྲི་གུང་དགོངས་གཅིག་ལ་མདོ་སྔགས་ཟབ་དོན་དང་འབྲེལ་བའི་གསུང་བཤད་བསྩལ་བས་ཐམས་ཅད་ངོ་མཚར་གྱི་གནས་ལ་བཀོད། རྒྱལ་དབང་བཅུ་དྲུག་པ་རང་བྱུང་ཁྱབ་བདག་རིག་པའི་རྡོ་རྗེ་མཆོག་དང༌། བྱམས་ཆེན་སི་ཏུ་པདྨ་དབང་མཆོག་རྒྱལ་པོ། ཟུར་མང་དྲུང་པ་རིན་པོ་ཆེ་སྐུ་ཕྲེང་བཅུ་པ་ཆོས་ཀྱི་ཉིན་བྱེད། རྒྱལ་སྲས་འཇམ་མགོན་མཆོག་སྤྲུལ་རིན་པོ་ཆེ་བཅས་ཡབ་སྲས་རྣམས་དང་ཐུགས་དགོངས་དབྱེར་མེད་པའི་ཐུགས་བསྐྱེད་ཕྲིན་ལས་ཀྱི་རྒྱུན་གཅིག་འདྲེས་སུ་གྱུར། སྐུ་ཞབས་སི་ཏུ་རིན་པོ་ཆེ་མཆོག་གིས་དེང་སང་ཁམས་བོད་ཀྱི་ལྗོངས་འདིར་ཚད་མའི་སྐྱེས་ཆེན་བློ་གཏད་ཞུ་ཡུལ་རྗེ་འདི་ཉིད་ཁོ་ནར་ངེས་ཞེས་སྡེ་དགེ་ས་སྐྱོང་ལ་ཡང་ནས་ཡང་དུ་བཀའ་གནང་བར་མཛད། སྐུ་ཞབས་རིན་པོ་ཆེ་ཞིང་ཁམས་སུ་གཤེགས་རྗེས་དགོངས་རྫོགས་སོགས་དཔལ་སྤུངས་བསྟན་པ་ལ་དངོས་བརྒྱུད་ནས་བཀའ་དྲིན་ཆེ་བར་བསྐྱངས། ཀར་འབྲུག་བསྟན་འཛིན་སྐྱེས་ཆེན་རྣམས་ཀྱི་གཙུག་ནོར་དུ་གྱུར་ཅིང་རིང་ལུགས་འདི་དག་འཛིན་པའི་ཆོས་སྡེ་ཆེ་ཕྲ་མང་པོར་བཤད་སྒྲུབ་ཀྱི་རྒྱུན་སྔར་མེད་གསར་བསྐྲུན་གྱི་ཐུགས་བསྐྱེད་དང་ཕྲིན་ལས་ཀྱིས་ཁྱབ་པས་ན། མངའ་བདག་མར་པ་བཀའ་བརྒྱུད་ཀྱི་བསྟན་འཛིན་མཁས་གྲུབ་རྣལ་འབྱོར་གྱི་དབང་ཕྱུག་ཆེན་པོར་གྲུབ་པ་དང༌། དག་པའི་གཟིགས་སྣང་ནི། མེ་སྤྲེལ་ཟླ་བ་བཅུ་གཅིག་པའི་ཚེས་གཉིས་ལ་བལ་ཡུལ་ཏུ་ཏཻ་ལོ་དང་ནཱ་རོའི་སྒྲུབ་ཕུག་ཏུ་ཅུང་ཟད་སྡོད་སྐབས། ནཱ་རོ་པ་སྐུ་མདོག་སྔོ་སྐྱ་ཐོར་ཅོག་རུས་རྒྱན། གཡས་ཐོད་པ། གཡོན་པའི་མཐེབ་སྲིན་གྱིས་བདུད་རྩི་འཐོར་བ། ཞབས་ཙོག་པུ་ཕྱེད་སྐྱིལ་ཅན་མཇལ་སྙམ་པར་དབང་བླང་རང་ལ་བསྟིམ་དམིགས་སོགས་བྱས་སོ། །མཎ1$0000270ཌ1$0000300ིའི་རྒྱལ་ས་ནས་རིམ་པར་ཛ་ལནདཧ་ར་བརྒྱུད་རི་ལིར་བགྲོད་ལམ་ནས་དགེ་འདུན་ཆོས་འཕེལ་གྱི་གནས་ཡིག་ཏུ་ཛ་ལནདཧ་ར་ནི་གྲུབ་ཐོབ་ཨོ་རྒྱན་པ་དང༌། རྒོད་ཚང་པའི་རྣམ་ཐར་དུ་གསལ་ཞེས་པའི་གནས་ཀང་ར་མནྡིར་གྲགས་པའི་དེའི་ཐད་ཙམ་དུ་སླེབས་པ་ཡིན་འདྲ་སེམས་སྐྱིད་དེ་བའི་ངང་ནས་མཁའ་དབྱིངས་སུ་ཀུ་ཀུ་རི་པ་སོགས་གྲུབ་ཆེན་མང་ཤས་བཞུགས་ཡོད་པའི་ཉམས་སྣང་གསལ་པོར་བྱུང༌། གྲོ་བོ་ལུང་གི་ལྷ་ཁང་དམར་པོར་མར་པའི་འདྲ་ཞལ་མཇལ་སྐབས་དད་མོས་ཆེན་པོས་གསོལ་འདེབས་དང༌། དགྱེས་རྡོར་དབང་བླང་སྔགས་ཀྱི་བཟླས་པའི་སྔགས་འཁོར་སྤྲོ་བསྡུའི་དམིགས་པ་སོགས་བྱས་པས་སྤྱན་ཧྲིག་བྱས་ཤིང༌། དངོས་པོའི་གནས་ལུགས་ལམ་དང་ནི། །འབྲས་བུ་སྐྱེ་བ་མེད་པ་སྟེ། །སེམས་ཉིད་མ་བཅོས་སོ་མ་འདི། །རང་བྱུང་ཡེ་ཤེས་ཕྱག་རྒྱ་ཆེ། །ཞེས་གསུངས་པའི་སྣང་བ་དང་རིག་པ་རྟོག་མེད་དུ་རྒྱང་ཙམ་གནས་པའི་ཉམས་བྱུང་ངོ༌། །རྔོག་སྤྲེལ་གཞུང་གི་མར་པའི་གདུང་འབུམ་མཇལ་སྐབས་སུ། གདུང་འབུམ་ཉིད་དགྱེས་པ་རྡོ་རྗེ་ལྷ་དགུར་གྱུར་པའི་སྔགས་ཨཥྚའི་ཕྲེང་བ་རང་ལ་འཕྲོས་པའི་སྣང་བ་འཆར། མེ་བྱ་ཟླ་༥ཚེས༡༩་ནུབ་ལྷོ་བྲག་མར་པ་ཡིན་རྒྱུའི་མར་པའི་སྐུ་དབྱིབས་དང་ཆས་ལྟ་བུ་ཞིག་གིས་འཕོ་བ་གྲོང་འཇུག་བྱེད་ཐུབ་མིན་བཤད་འདུག །དར་མ་མདོ་སྡེས་བྱས་པ་སྐད་ཟེར། མཐར་ལི་འདྲ་དཀར་པོའི་བླ་སྐུ་ཞིག་འདུག་པ་དར་མ་མདོ་སྡེའི་འདྲ་ཞལ་ཡིན་རྒྱུ་ཞིག་རང་གི་ལག་ན་ཐོགས་པ་རྨིས་ཀྱང་གསལ་པོ་མ་དྲན། གནམ་མཚོ་ཐོག་མར་མཐོང་སྐབས་རང་གི་དད་མོས་རྐྱེན་ལས་དཔལ་འཁོར་ལོ་བདེ་མཆོག་གི་ཕོ་བྲང་ཐུགས་གསུང་སྐུའི་དཀྱིལ་འཁོར་དང་བཅས་པ་དཔའ་བོ་མཁའ་འགྲོ་མང་པོས་གར་སྟབས་བྱེད་པའི་འཁྲུལ་ཉམས་རབ་རིབ་བྱུང་བས་རང་གིས་ཀྱང་བདེ་མཆོག་གི་སྔགས་གང་ཤེས་བརྗོད་ཅིང་དེ་དག་དང་སྐལ་པ་མཉམ་པའི་སྨོན་འདུན་ཡང་ཡང་བྱས། རྡོ་རྗེ་གླིང་དུ་ས་ཁྱི་ཟླ་༧ཚེས༡༩་ལ་རྨི་ལམ་དུ་རྫོང་སར་གཟིམ་ཁང་ནང་རྗེ་མི་ལའི་སྐུ་མཆོད་ཉིན་གཅིག་འདོན་རྒྱུ་གང་ཡིན་བརྗེད། མཆོད་པ་དེམ་བསྒྲིགས་རྣམས་བསྡུས། དེའི་ཕྱིར་ཉིན་ཡང་འཚོགས་དགོས་པ་འཁྲུལ་འཁོར་གཅིག་བསྐོར་དུས་མཆོད་པ་རྣམ་ལྔ་ཐམས་ཅད་བསྒྲིགས་མ་དགོས་པ་སེར་སྦྲེང་གཤར་བ་ལྟར་དེམ་ཐོག་གཅིག་རྗེས་ཉིས་མཐུད་བྱུང་བར་ངོ་མཚར་སྙམ་བྱེད་པ་རྨིས། གཉིད་སད་དུས་རྗེ་བཙུན་ལ་མོས་གུས་ཆེན་པོས་མཚན་གྱི་གསོལ་འདེབས་བཏོན་པས། གངས་རི་ཏི་སེའི་ངོས་ལ་ཕོ་བྲང་ལྟ་བུའི་ནང་རྗེ་བཙུན་ཉིད་བདེ་མཆོག་ཞལ་ཕྱག་རྒྱས་པའི་སྐུར་གྱུར་པ་ལ་སྙན་བརྒྱུད་ཐོབ་རེའི་གསོལ་བ་བཏབ་པས་དབང་རྒྱས་བསྡུས་དང་གླེགས་བམ་གྱི་སྡོམ་གཏད་རྣམས་སྤྲུལ་པའི་དཀྱིལ་འཁོར་ལྟ་བུར་སྐད་ཅིག་གིས་ཐོབ་པའི་ཉམས་འལ་འོལ་ཞིག་བྱུང་གསུངས། སྟོད་ལུང་མཚུར་ཕུར་འགྲོ་སྐབས་རྒྱབ་རི་བདེ་མཆོག་ཞལ་ཕྱག་ཡོངས་རྫོགས་རི་ཡི་གཏོས་དང་མཉམ་པ་མཐོང་སྙམ་དང༌། མདུན་རིའི་མར་རྒྱབ་བྲག་ཀརྨ་པཀྴི་སྐུ་མདོག་སྨུག་པོ་ཤིན་ཏུ་ཆེ་བ་མཐོང་སྙམ་བྱུང༌། ས་ཁྱི་ཟླ་༡ཚེས༡༥་ལ་བྲོ་ནད་ཀྱིས་མནར་བཞིན་དཔེ་ཁང་ནས་དཔེ་པོད་གཅིག་ཞལ་ཕྱེས་པས། པཀྴིའི་གསུང་གསང་སྔགས་ཀྱི་རྒྱུད་སྡེའི་སྤྱི་རྣམ་སྐོར་ཞིག་འདུག་པ་ལམ་ཙམ་མཇལ་ནས་ཆུ་ཚོད་གཉིས་ཙམ་སོང་བ་ན། དེས་རྐྱེན་བྱས་པ་ལྟ་བུས་ཉམས་སྣང་ལ་མདུན་མཁར་པཀྴི་དེ་ཉིད་སྐུ་མདོག་དམར་སྨུག་ཨག་ཚོམ་ནག་ཁྱུག་གེ་བ་ཞལ་རས་ཁྲོ་འཛུམ་སྤྱན་ལྟ་སྟངས་ཕྱག་ས་གནོན་ཟིལ་ཅན་གྱི་མདུན་དེར་ཌཱ་ཀི་མ་སྦོམ་ཐུང་ཁ་ཤས་ཡོད་པའི་ཉམས་བྱུང༌། ང་རང་ནད་དྲག་པའི་གསོལ་བ་བཏབ་པས། ཌཱ་ཀི་དེ་རྣམས་དང་བླ་མས་ཕྱག་གིས་བྱབས་པ་འདྲ་ཁ་ཤས་བྱས། བླ་མ་དང་ཌཱ་ཀི་དེ་རྣམས་ལས་མེ་ལྕེ་ལྟ་བུ་དམར་ཐར་ཐར་འཕྲོས་ནས་རང་ལུས་བསྲེགས། རང་བླ་མ་པཀྴིའི་སྐུར་གྱུར་པའི་འཁྲུལ་སྣང་ཞིག་བྱུང་བ་ལ་བརྟེན་ནས་བླ་སྒྲུབ་ཞིག་ཡིད་ངོར་གསལ་བཞིན་བྲིས། ས་ཁྱི་ཧོར་ཟླ་༩ཚེས་ལ་ཟབ་མོ་ནང་དོན་བཤད་ལུང་མཆོག་ལྡན་སོགས་ལ་བགྱིས་པའི་ཚེས་བཅུའི་ནུབ་ནམ་སྨད་རྒྱལ་དབང་རང་བྱུང་རྡོ་རྗེ་དྲན་པའི་རྐྱེན་གྱིས་རྗེ་དེ་ཉིད་མི་ཚད་ཙམ་ཞྭ་ནག་ཆོས་གོས་ཕྱག་གཉིས་ཆོས་འཆད་མཛད་པ་ཞིག་ལ་གསུང་འབུམ་དགོངས་གཏད་ཞུ་སྙམ་པ་དང༌། ཡིག་པོད་སྐྱ་མ་ཁ་ཤས་ཡོད་སྙམ། རེས་ཤོག་ནག་གསེར་བྲིས་ལྟ་བུ། རེས་ཞལ་ནང་ནས་ཡི་གེ་མང་པོ་ཐོར་ཐོར་བྱུང་བ་རང་ལ་ཐིམ་པའི་ཉམས་ཤར་རོ། །ཟླ་ཚེས༡༣་ནུབ་མཚུར་ཕུར་རྒྱལ་དབང་བཅུ་དྲུག་པ་མཇལ། ངོས་ལ་བྱིན་རྟེན་གནང་རྩིས་ཀྱིས་རྟེན་སྒམ་མང་པོའི་དཀྱིལ་དུ་སྒམ་གཅིག་རང་ནས་ཞལ་ཕྱེས་པས། གནམ་ལྕགས་རྡོ་རྗེ་ཕུར་པ་ཁ་ཤས་དང༌། གཟུངས་ཐག་རྡོ་རྗེ་རྙིང་པ་ལི་མ་ལྟ་བུ་འཕན་ཛར་ལྡན་པ་ཁ་ཤས་འདུག །རྒྱལ་དབང་ནས་ཁྱེད་རང་བྱིན་རྟེན་གང་དགོས་ཁྱེར་གསུངས་ཏེ་རིན་པོ་ཆེ་རང་གཟིགས་ལོང་མེད་པར་སྐུ་འཆགས་མཛད་པ་དང༌། སྐུ་ཞབས་སི་ཏུ་གོང་མ་དེའང་རྨིས་ཀྱང་བརྗེད། མེ་བྱ་ཟླ་༢ཚེས༡༥་ཉི་མ་མེ་བཞིའི་འགྲུབ་སྦྱོར་ཉིན་རྩ་གསུམ་སྤྱི་འདུས་ཀྱི་དབང་ཞིག་ཀྱང་བསྐུར། འཇའ་ཚོན་ཚེ་སྒྲུབ་སོགས་ལུང་འདོན་སྐབས་དེའི་ནུབ་གནས་མདོ་ཆགས་མེད་རིན་པོ་ཆེའི་གདན་ས་སྐོར་གྱི་རྨི་ལམ་མང་ཞིག་བྱུང་བ་བརྗེད། ཡང་མནལ་བ་ན་གཉིད་སྲབ་མོའི་ཉམས་སྣང་ལ། ཆགས་མེད་རིན་པོ་ཆེ་དང་པོ་དབུ་ལ་སྒོམ་ཞྭ་མནབ་པ། དར་ཅིག་ནས་ཐང་ཆེ་བ་ཞིག་གི་སྟེང་རང་དང་ཅུང་ཐག་རིང་ཙམ་ན་དགེ་སློང་དབུ་ཟླུམ་བགྲེས་ཉམས་མེད་པ་ཞིག་བཞུགས་འདུག་པ་ཁོང་གི་གསུང་རྣམས་ལུང་ཞུ་དགོས་སྙམ་པ་ཕྱག་དཔེ་ནི་བླ་མ་ཁོང་རང་གསུང་འབྱུང་བའི་གཞི་ཡིན་སྙམ་བྱིན་རླབས་ཞུ་བའི་དམིགས་འདུན་བྱས་པ་དང༌། ཕྱག་ན་བཻཌཱུརཡའི་ཤོག་གུ་ལ་མཐིང་སྐྱ་ཞིག་གིས་བྲིས་པ་ལྡེབ་གཅིག་གནང་ནས་གསུང་ཐམས་ཅད་ཀྱི་རྩ་བ་ཡིན་རྒྱུ་དེ་འདྲ་ཞིག་གཏད་པ་དང༌། བླ་མ་འོད་དུ་ཞུ། གླེགས་བམ་ཆོས་རྩིགས་ཆུང་ངུ་ཞིག་ཏུ་གྱུར། དེ་གནས་གྱུར་ཏེ་ཐུགས་ཆེན་འཁོར་བ་དོང་སྤྲུགས་ལྟ་བུ་གཡས་རིལ་བ་སྤྱི་བླུགས་ལྟ་བུའི་ཁྲུས་བུམ་མཆོག་སྦྱིན་གྱིས་འཛིན་པ། གཡོན་སྐྱབས་སྦྱིན་ཐུགས་ཀར་པད་ཕྲེང་འཛིན་པ་ཞིག་ཏུ་གྱུར། དེ་རང་ལ་ཐིམ་པས་རང་ཡང་དེ་འདྲར་གྱུར་ངང་ཉམས་སད་དོ། །ལྔ་པ་ནི་མཁས་གྲུབ་ཁྱུང་པོའི་གསེར་ཆོས་ཤངས་པ་བཀའ་བརྒྱུད་སྐོར། ལམ་འདིའི་བཀའ་བབས་འཇམ་མགོན་གུ་ཎའི་ཞབས་ཀྱི་ཐུགས་སྲས་མཁས་དབང་བླ་མ་བཀྲ་ཤིས་ཆོས་འཕེལ་ཞབས་དང༌། སྒྲུབ་དཔོན་བླ་མ་ཀརྨ་རང་བྱུང་ཀུན་ཁྱབ་སོགས་ལས་སྨིན་གྲོལ་དང་གདམས་སྐོར་གཞུང་རྙིང་ཡོངས་རྫོགས་ནན་ཏན་ཞིབ་གསན་གྱིས་ཉམས་བཞེས་དང༌། རྒྱུད་སྡེ་ལྷ་ལྔ། ལྷ་བཞི་དྲིལ་སྒྲུབ། བླ་མགོན་དབྱེར་མེད་སོགས་ལྗགས་བསྙེན། སྟག་ཚང་སྒྲུབ་སྡེར་ལུགས་འདིའི་ཉམས་ལེན་དང་འཁྲུལ་འཁོར་སོགས་རྒྱུན་འཇགས་གནང༌། དོན་གཉེར་ལ་སྨིན་གྲོལ་འཆད་སྤེལ་གྱི་ཐུགས་བསྐྱེད་དང་ཕྲིན་ལས་རྒྱ་ཆེ་བ་སོགས་ཤངས་ཆོས་རིན་ཆེན་བདུན་བརྒྱུད་ཀྱི་བསྟན་པ་འཛིན་སྐྱོང་སྤེལ་བའི་གསལ་བྱེད་དམ་པར་གྲུབ་པ་དང༌། ཡེ་ཤེས་དག་པའི་གཟིགས་སྣང་ལ། མེ་སྤྲེལ་ཟླ་༡༠ཚེས་ལ་དུར་ཁྲོད་བསིལ་ཚལ་ཤ་ཝ་རིའི་སྒྲུབ་ཕུག་ཏུ་མཆོད་པ་འདོན་སྐབས། ཤ་ཝ་རི་པ་རི་དྭགས་ཀྱི་རོ་ཕྲག་པར་བཀལ་ནས་གཡས་མདའ། གཡོན་གཞུ་བསྣམས་པ་ཞིག་ལ་གནས་ལྔའི་ལྷ་རྣམས་ཀྱང་རབ་རིབ་ཡོད་སྙམ་རིག་པ་གསལ་དྭངས་བྱིན་རླབས་ཀྱི་ཟིལ་ཅུང་ཟད་བྱུང་བས་ལུས་འཕར་བ་མདུན་དུ་མགོན་པོ་ཚེ་བརྟན་ཡོད་པས་མཐོང་ངོ༌། །བླ་སྒྲུབ་ཞིག་རིག་ངོར་ཐོན་པ་དེའི་ཕྱི་རོལ་ལྷ་ཁང་དུ་བྲིས་པ་ལགས་ཞེས་དང༌། སྔར་ཞེ་ཆེན་ནས་རྒྱལ་ཚབ་རིན་པོ་ཆེ་ལས་གདམས་མཛོད་ནང་གི་ཤངས་ཆོས་གསན་སྐབས་གཟིམ་ལམ་ངོ་མཚར་ཅན་ཁ་ཤས་བྱུང་ཡང་དེ་སྐབས་ཐོ་མ་འཁོད་པས་ད་ལྟ་བརྗེད། དེ་རིགས་ལ་དོན་ཆེར་ཅི་ཡོད་ཅེས་གུས་ལ་བཀའ་བསྩལ་བ་ཙམ་ལས་ཕྱག་ཐོར་འཁོད་རིགས་མི་སྣང་ལ། བཀའ་སྲོལ་འདིའི་ཤིང་རྟ་གྲུབ་ཆེན་ཐང་སྟོང་རྒྱལ་པོས་རྗེས་སུ་བཟུང་ཚུལ་གོང་གསལ་ལྟར་རོ། །དྲུག་པ་ནི་ཕ་གཅིག་དམ་པ་སངས་རྒྱས་ཀྱི་གདམས་ཟབ་ཞི་བྱེད་སྐོར་དང༌། མ་གཅིག་ལབ་སྒྲོན་གྱི་བཀའ་སྲོལ་དམ་ཆོས་བདུད་གཅོད་བཅས་ཀྱི་སྨིན་གྲོལ་གདམས་པའི་རྒྱུན་བཞུགས་རིགས་ཞིབ་ཏུ་གསན་བཞེས་ཀྱིས་སྐབས་སུ་བབ་པའི་ཐུགས་དམ་ཉམས་བཞེས་མཐར་ཕྱིན་ཅིང་འཆད་སྤེལ་འཛིན་སྐྱོང་གི་ཕྲིན་ལས་ཀྱང་གཡེལ་མེད་བརྒྱུད་མར་སྐྱོང་བར་མཛད་པ་དང༌། གྲུབ་ཆེན་དམ་པ་སངས་རྒྱས་ཀྱི་གདམས་ཟབ་ཞི་བྱེད་ལམ་ལྔ་སྐོར་དང༌། མ་གཅིག་ལབ་སྒྲོན་གྱི་གཅོད་ཡུལ་ལམ་ཁྱེར་ལུགས་སྲོལ་རྣམས་ཀྱི་སྨིན་གྲོལ་རྒྱབ་བརྟེན་བཅས་ཞིབ་ཏུ་གསན་བསམ་སྒོམ་པའི་ཕ་མཐར་སོན། གདུལ་བྱ་གང་ལ་གང་འོས་ལ་འཆད་སྤེལ་དང་བཅས་བསྟན་པའི་རྒྱུན་ཉམས་མེད་འཛིན་སྐྱོང་གནང་ཞིང༌། ཁྱད་པར་དུ་མ་གཅིག་ལབ་སྒྲོན་དང་རྡོ་རྗེ་རྣལ་འབྱོར་མ་དབྱེར་མེད་པས་རྗེ་གྲུབ་ཐོབ་ཆེན་པོར་དངོས་སུ་གདམས་པའི་གསང་སྤྱོད་སྙན་བརྒྱུད་ཆེན་མོ་ཞེས་ཉམས་ལེན་བྱིན་རླབས་ཀྱི་རྒྱུན་ཁྱད་པར་འཕགས་པ་ཤིན་ཏུ་གཅེས་སྤྲས་ཀྱིས་ཐུགས་ཉམས་སུ་བསྟར་ཞིང་ཉེར་མཁོའི་ཡིག་ཆ་གསར་སྤེལ་ཅི་རིགས་ཀྱང་གནང་ནས་མོས་ལྡན་དོན་གཉེར་རིགས་ལ་མནོག་ཆོས་ཀྱི་ཚུལ་དུ་སྤེལ་བར་མཛད་ཅིང༌། སྣོད་ལྡན་ལ་གཏད་རྒྱ་བཅས་རྫོགས་པར་གདམས་པ་སོགས་ཞི་གཅོད་ཀྱི་བསྟན་པ་འཛིན་པའི་མངའ་བདག་ཆེན་པོར་ངེས་ལ། གཟིགས་སྣང་ནི། སྐུ་གོང་མའི་དམ་པའི་བླ་སྒྲུབ་སྙན་བརྒྱུད་སྙིང་གི་ཐིག་ལེའི་དབང་དཔེ་དགོངས་ཀློང་དུ་གསལ་བ་ལྟར་གཏན་ལ་ཕབ་པའི་མཛད་བྱང་ལས། ཁོ་བོ་པདྨ་ཡེ་ཤེས་རྡོ་རྗེ་རང་ལོ་༦༥་མེ་བྱ་ཟླ་༡༢ཚེས༢༢་ལ་དམ་པ་སངས་རྒྱས་དེ་ཉིད་ཀྱི་སྐུའི་སྣང་བརྙན་རབ་རིབ་འཆར་བའི་རྐྱེན་གྱིས་ཡིད་ངོར་ཤར་བ་བཞིན་རྗེ་བླ་མ་པདྨ་འོད་གསལ་མདོ་སྔགས་གླིང་པའི་དམ་པའི་བླ་སྒྲུབ་དག་སྣང་སྙན་བརྒྱུད་ཀྱི་སྨིན་བྱེད་དུ་ཡིན་པར་རློམས་ནས་འབྲས་ལྗོངས་མཁའ་སྤྱོད་ཌཱ་ཀིའི་ཕོ་བྲང་ངོ་མཚར་སྤྲུལ་པའི་ཞིང་གི་གཙུག་ལག་ཁང་ཆེན་པོའི་འགྲམ་ལོགས་ཀྱི་བ་གམ་དུ་ཤར་མར་བྲིས་པ་སོགས་དང༌། དེའི་གཤམ་དུ་ཕྱག་བྲིས་མར། གོང་གི་རྒྱལ་ཟླའི་ཚེས༢༠་སྐོར་འགོས་ལོའི་དེབ་ཐེར་སྔོན་པོ་མཇལ་བའི་ཚེ་ཞི་བྱེད་སྐོར་གྱི་རྣམ་ཐར་ལམ་ཙམ་རེ་བལྟས་སྐབས་དམ་པ་སངས་རྒྱས་སྐུ་མདོག་དམར་སྨུག་དབུ་སྐྲ་ནག་པོ་རལ་པ་རིང་པོའང་མིན་པ་ཐུང་ངུའང་མིན་པའི་ཨར་བད་ཅན་ལྟ་བུ། ཕྱག་གཉིས་རེས་དཔྲལ་བར་ནམ་མཁའ་མཛོད་རྒྱ། རེས་ཌཱ་རུ་ཐོད་པ་བསྣམས་པ་ཞིག་ཡིད་ངོར་ལམ་ཙམ་གསལ་ལོ། །ཞེས་བཀོད་པར་མཛད་འདུག །ཟངས་རི་མཁར་དམར་གྱི་མ་གཅིག་འདྲ་ཞལ་མདུན་བཞུགས་ཞག་གི་རིང་གསུང་ཆོག་གནང་སྐབས་གཟིགས་སྣང་ངོ་མཚར་ཅན་མང་དུ་ཡོད་པར་ངེས་ཀྱང་ཕྱག་ཐོར་འཁོད་པ་བཞུགས་མི་འདུག །བདུན་པ་ནི་གཉིས་མེད་རྒྱུད་རྒྱལ་དཔལ་དུས་ཀྱི་འཁོར་ལོའི་ཟབ་དོན་རྡོ་རྗེའི་རྣལ་འབྱོར་སྦྱོར་བ་ཡན་ལག་དྲུག་གི་སྐོར་གངས་རིའི་ཁྲོད་ཀྱི་དུས་ཞབས་པ་ཆེན་པོ་འཇམ་མགོན་མཁྱེན་ཀོང་རྣམ་གཉིས་ལ་དཔལ་དུས་ཀྱི་འཁོར་ལོའི་བཤད་སྒྲུབ་ཤིང་རྟ་ཇོ་ཞལ་གཉིས་ཀྱི་བཀའ་སྲོལ་སྨིན་གྲོལ་རྒྱུད་བཤད་དང་བཅས་པའི་ཆུ་བོ་ཐམས་ཅད་རྫོགས་པར་འབབ་ཅིང་དེ་ཐམས་ཅད་ཚང་བ་རྗེ་བླ་མ་མཆོག་གི་ཐུགས་མཚོར་བསྐྱིལ་བ་ཉིད་འཆད་སྤེལ་གྱི་ཕྲིན་ལས་རྒྱ་ཆེར་བསྐྱངས་ཤིང༌། སྟོན་པ་ཆོས་རྒྱལ་ཉེར་ལྔ་ཕྱེད་དུམ་སྐྱོང་བརྒྱུད་འཛིན་བཅས་ཀྱི་གྲྭ་ཐང་སུམ་ཅུ་སོ་བདུན་ཤིན་ཏུ་ཁྱད་འཕགས་གསར་བཞེངས་དང༌། ནག་ཟླའི་དུས་ཆེན་ལ་མཆོད་ཆོག་གཟབ་རྒྱས་མ་ཆགས་པར་གནང་ཞིང༌། གུས་པ་ལའང་དེ་བཞིན་གྲུབ་ན་ལེགས་པའི་བཀའ་འཕྲོས་གནང་ཞིང༌། རྒྱུད་རྒྱལ་འདིའི་ཟབ་དོན་རྣམས་ལ་གཞན་གྱི་ལད་མོ་ཙམ་མ་ཡིན་པའི་ངེས་ཤེས་ཁྱད་པར་ཅན་ཐུགས་ལ་འཁྲུངས་ཚུལ་ངེས་པ་དོན་གྱི་ཞལ་བཞེས་གནང་ཞིང༌། ཞིང་འདིའི་གདུལ་བྱ་རྫོགས་ལ་ཉེ་བ་ནའང་གསུང་ཆོག་ཀུན་གྱི་རྗེས་མར་དུས་ཆེན་དང་ཁེལ་བས་འདི་ཉིད་ཀྱི་མཆོད་ཆོག་གཟབ་རྒྱས་སུ་གནང་བ་དང༌། མ་འོངས་པ་ན་རིག་ལྡན་ཉེར་ལྔ་དྲག་པོ་འཁོར་ལོ་ཅན་གྱི་སྐུར་བཞེངས་པར་ཞལ་གསུང་གསོལ་འདེབས་ཁག་ལས་ཡང་ཡང་གསལ་བ་ལྟར་རྒྱུད་ཀྱི་རྒྱལ་པོ་འདི་ཉིད་ཀྱི་བསྟན་པའི་བདག་པོར་ངེས་པ་སོམ་ཉི་དང་བྲལ་ཞིང༌། གཟིགས་སྣང་སྐོར། མེ་སྤྲེལ་ཟླ་༡༡ཚེས་ལ་ལྷ་བབས་གནས་སུ་བསྟན་རིམ་མནན་པ་ཚར་བའི་ནུབ་རྨི་ལམ་དུ་དུས་འཁོར་བློས་བསླངས་ཆེ་བ་ཞིག་གི་ནང་དུ་ཞུགས་པ་དང་སྐུ་འཁོར་གྱི་ཕྱིའི་འདོད་མ་རྣམས་ཧྲིལ་པོ་ལེབ་མོར་བཞུགས་པ་རྣམས་ནས། ནང་འཁོར་འདོད་མ་རྣམས་ཀྱི་སྐུ་གཅིག་གན་རྐྱལ་ཡོད་པར་ཅུང་སྡོད་པ་འདོད་མ་སྔོན་མ་དེའི་བྱེ་བྲག་རེད་ཟེར། དེ་ནས་ནང་འཁོར་གྱི་མདུན་ཕྱོགས་ཞིག་ནས་སྒྲུབ་མཆོད་བཏང༌། བདུད་རྩི་ནང་མཆོད་ལ་མི་ཁ་ཤས་འཛོམ་དགོས་གྲྭ་པ་འགའ་ལ་སྐད་བཏང༌། དེ་འདྲའི་ངང་གཉིད་སད་དོ། །ས་ཁྱི་ཟླ་ཚེས༢༠་ནུབ་རྡོ་རྗེ་གདན་གྱི་སངས་རྒྱས་ཡེ་ཤེས་ཞབས་ཀྱི་དུས་འཁོར་དཀྱིལ་འཁོར་གྱི་རྡོ་དེ་གནམ་གྲུ་ནང་ཁྱེར་འོང་བ་རེད་ཀྱང་ཟེར། མིས་པང་ནས་ཁུར་བ་རེད་ཀྱང་ཟེར་འབྱོར་འདུག །དེའི་སྟེང་མེ་མཆོད་བླུགས་གྲབས་བྱེད་པ་དང༌། ཡང་རྡོ་སྟེགས་ལ་མཁའ་འགྲོའི་དཀྱིལ་འཁོར་ཡོད་པ་ཆུང་ཙམ་ཞིག་གི་སྟེང་མེ་མཆོད་བླུགས་གྲབ་བྱེད་པ་རྨིས། མེ་སྤྲེལ་ཟླ་༩ཚེས༢༣་ལ། ལོ་དེའི་རྒྱལ་ཟླའི་ཚེས་ཉེར་གསུམ། །ཀུན་མཁྱེན་དོལ་པོ་སངས་རྒྱས་དྲན། །ཡང་ཡང་གསོལ་བཏབ་སྐུའི་སྣང་བ། །ཆུང་ངུ་ཞིག་ལས་ཆེར་མ་དྲན། །གཉིད་ནི་སད་རེས་དུས་དག་ཏུ། །གསོལ་བཏབ་ནམ་སྨད་ཆ་ཞིག་ལ། །ཁྲི་ནི་མཛེས་པ་ཞིག་གི་སྟེང༌། །ཀུན་མཁྱེན་དེ་ཉིད་མི་ཚད་ཙམ། །སྐུ་ཅམ་སེར་པོ་གསོལ་བ་དང༌། །རྗེ་ཡི་ཐུགས་དམ་སྐུ་དབྱིབས་འདྲ། །ཡེར་གྱིས་བཞུགས་ལ་གསོལ་བ་བཏབ། །བར་ཆད་ཞི་བའི་སྨོན་ལམ་བྱས། །ཡང་གཅིག་རྒྱ་མི་འདྲ་བ་དང༌། །ལྷ་ཁང་གསར་བཟོས་ཚད་བླངས་པ། །ཐག་པ་ལྟ་བུ་ཞིག་གི་ཚད། །ངོས་རེར་འདོམ་པ་སུམ་ཅུ་རེ། །བབས་འདུག་ཟེར་བ་ལ་སོགས་རྨིས། །དམར་ཕྱོགས་ཚེས་ནི་ཉེར་བཞིའི་ནུབ། །འཇམ་དབྱངས་བསྟོད་པ་གང་བློ་དང༌། །འགྲེལ་པ་སུམ་ཅུ་སོ་གཉིས་པོ། །རྔོག་ལོས་ཐུགས་གཙིགས་མཛད་པ་དེ། །གཟུགས་སུ་གྱུར་ནས་ཡི་གེ་ནི། །མེ་འོད་ལྟ་བུར་གྱུར་པའི་ནང༌། །རང་ཉིད་ཞུགས་པ་ལ་སོགས་པ། །བཤད་དཀའི་རྨི་ལམ་མང་པོ་ཞིག །ནམ་གྱི་རྒྱུན་རིང་རྨིས་པ་དང༌། །ཀུན་མཁྱེན་དོལ་པོའི་སྐུ་ལ་ནི། །རིགས་གསུམ་སེམས་དཔའ་བཞུགས་པ་སོགས། །འལ་འོལ་གསལ་བཞིན་བླ་སྒྲུབ་ནི། །འདྲེ་ཡིས་ལག་བསྒུལ་བྲིས་པ་ལགས། །གཞན་ཡང་སྐུ་ཚེའི་སྟོད་དུ་དོལ་པོའི་བླ་རྣལ་གྱི་མཛད་བྱང་ལའང་ཀུན་མཁྱེན་ཉིད་ཀྱིས་རྗེས་སུ་བཟུང་ཚུལ་ཅན་མཇལ་བས་མཚོན། དཔལ་རྩེ་རྡོར་དབྱིངས་སོགས་ཀྱི་རྒྱུད་སྡེའི་དབང་དང་བསྐྱེད་རྫོགས་སྐོར་དེང་སང་རྒྱུན་དཀོན་པས་དེ་དག་འཆད་ཉན་འཛིན་སྤེལ་ལ་ཐུགས་ཀྱི་གཡར་དམ་དུ་བཟུང་བས་ན། བུ་དོལ་ཇོ་ཞལ་གྱི་བསྟན་པའི་སྲོག་མཐུད་པར་མཛད་དོ། །བརྒྱད་པ་ནི་གྲུབ་ཐོབ་ཆེན་པོ་ཨོ་རྒྱན་པ་ལ་རྡོ་རྗེ་བཙུན་མོས་དངོས་སུ་བསྩལ་བའི་མན་ངག་རྡོ་རྗེ་གསུམ་གྱི་བསྙེན་སྒྲུབ་སྐོར་གཞུང་གདམས་མན་ངག་གི་རྒྱུན་བཞུགས་རིགས་རྫོགས་པར་གསན་ཏེ་འཛིན་སྐྱོང་སྤེལ་བའི་ཐུགས་བསྐྱེད་དང་ཕྲིན་ལས་རྒྱ་ཆེར་བདག་གིར་མཛད་པས་དོན་གྱི་བསྟན་པའི་གསལ་བྱེད་དམ་པར་ངེས་ཤིང༌། འདི་སྐོར་ཐུགས་དམ་ཉམས་བཞེས་ཀྱི་མངོན་རྟགས་ཞལ་གཟིགས་ཉམས་སྣང་ཅི་རིགས་བཞུགས་པར་ངེས་ཀྱང་དམིགས་བསལ་གསུང་འཕྲོས་དང་ཕྱག་ཐོར་གནང་བ་དངོས་སུ་མཐོང་ཐོས་ཀྱི་སྐལ་པར་མ་གྱུར་ལ། དེར་མ་ཟད་གཡུང་དྲུང་བོན་གྱི་བསྟན་འཛིན་མདོ་སྨད་ཤར་རྫ་རྟོགས་ལྡན་སློབ་བརྒྱུད་དང་བཅས་པ་ལ་རང་ལུགས་སྨིན་གྲོལ་ཉམས་ཁྲིད་ཀྱི་ཡི་གེ་གསར་དུ་མཛད་པར་བསྐུལ་ཞིང༌། བརྒྱུད་འཛིན་ཀུན་ལ་བསྟོད་བསྔགས་ཀྱིས་དབུགས་དབྱུང་གནང་བ་ལས་ནམ་ཡང་ཁྱད་དུ་གསོད་པར་མི་མཛད་དོ། །དེ་དག་ཀྱང་རྣམ་ཐར་རྩ་བར། གོང་མ་འཇམ་མགོན་བླ་མ་དེ། །གྲུབ་མཐའ་ཀུན་ལ་མ་ལྟར་མཛའ། །རང་རང་རྒྱུད་ལུང་མན་ངག་གི །རྣམ་དབྱེ་མ་འདྲེས་སོ་སོར་མཁྱེན། །ཕན་ཚུན་བསྲེ་བསླད་མི་མཛད་ཅིང༌། །གང་ལ་གང་འདུལ་ཆོས་སྟོན་པས། །ས་དགེ་ཀར་རྙིང་ཐམས་ཅད་ཀྱིས། །རང་གི་བླ་མ་བཞིན་དུ་འཛིན། །བདག་ནི་དེ་ལྟར་མ་ལགས་ཀྱང༌། །བོད་ཡུལ་ཤིང་རྟ་ཆེ་བརྒྱད་པོ། །ཀུན་ལ་དག་སྣང་ཆེར་བསྐྱེད་ཅིང༌། །ལོག་རྟོག་སྒྲིབ་པས་མ་གོས་པར། །གཤེ་སྐུར་གྲུབ་མཐའི་ཕྱོགས་འཛིན་སྤངས། །དབང་ཁྲིད་མན་ངག་རྒྱུད་ལུང་རྣམས། །རྒྱུན་བཞུགས་ཐམས་ཅད་འབད་པ་ཆེས། །ཉན་དང་མཉན་པར་འགྱུར་བར་སྨོན། །བསྟན་པ་རིང་དུ་གནས་པ་ཡི། །ལྷག་བསམ་བཟང་པོས་ཐོབ་པ་རྣམས། ཕྱོགས་རིས་མེད་པར་སྤེལ་བ་དང༌། །སྐྱེ་འགྲོ་མཆོག་ཕལ་ཐམས་ཅད་ལ། །ཟུར་ཟ་ཕྲག་དོག་བརྙས་བཅོས་སྤངས། །ཀུན་ལ་ཕན་པའི་བསམ་པ་ནི། །དུང་དང་པད་རྩ་ལྟར་དཀར་བའི། །སེམས་བསྐྱེད་སྨོན་ལམ་བཟང་པོ་བཏབ། །འབྲེལ་པ་ཐམས་ཅད་དོན་ཡོད་བྱས། །དེ་ནི་རྣམ་ཐར་སྙིང་པོ་ཡིན། །ཞེས་གསུངས་པ་ལྟར། གངས་ལྗོངས་རྒྱལ་བསྟན་ཡོངས་རྫོགས་འཛིན་སྐྱོང་སྤེལ་བའི་རྣམ་ཐར་ལ་འགྲན་ཟླས་དབེན་པ་རྗེ་བླ་མ་འཇམ་པའི་དབྱངས་སྐུ་གོང་མའི་རྣམ་ཐར་གྱི་གསང་བ་ནི། ཐམས་ཅད་མཁྱེན་གཟིགས་ཡོན་ཏན་རྒྱ་མཚོའི་ཞལ་ནས། ཐོབ་འཇལ་རིག་པ་ནོར་སོགས་ཀྱི། །དབང་དུ་གྱུར་མིན་སྐྱེས་སྦྱངས་ལས། །བོད་ཡུལ་རྒྱལ་བའི་རིང་ལུགས་པ། །ཀུན་གྱི་ཚོགས་རྗེར་གྱུར་པ་ཡི། །ཚུལ་འདི་ཁོ་ནས་འཇིག་རྟེན་འདིར། །ཐུབ་དབང་གཉིས་པའི་རྣམ་ཐར་འཛིན། །བཤད་བརྒྱུད་འདེགས་པའི་ཀ་ཆེན་བཅུ། །སྒྲུབ་བརྒྱུད་ཤིང་རྟ་ཆེ་བརྒྱད་ཀྱི། །གཞུང་ལུགས་སྨིན་གྲོལ་གདམས་པའི་བཅུད། །གངས་ཅན་ལྗོངས་སུ་བཞུགས་སོ་འཚལ། །གསན་བསམ་སྒོམ་པ་མཐར་ཕྱིན་མཛད། །སྐྱེ་བ་མེད་ལས་སྐྱེ་ཚུལ་དང༌། །འཕོ་བ་མེད་ལས་འཕོ་ཚུལ་བཞིན། །སྤངས་རྟོགས་ཀུན་གྱི་མཐར་སོན་ཀྱང༌། །གདུལ་བྱ་ཐབས་ཀྱིས་འདུལ་བར་བསྟན། །ཅེས་རྗེས་སུ་བསྔགས་པར་མཛད་པ་ཉིད་དོན་ལ་གནས་སོ། །གཉིས་པ་བཤད་མ་ཐག་པ་དེ་དག་ལས་གཞན་པའི་གཟིགས་སྣང་སྣ་ཚོགས་རིགས་རྗེ་བླ་མ་ཉིད་ཀྱི་ཕྱག་ཐོར་བཏབ་པ་རགས་རིམ་རྙེད་པ་རྣམས་བཅོས་བསྒྱུར་མེད་པར་ཕྱོགས་གཅིག་ཏུ་བཀོད་པ་འདི་ལྟ་སྟེ། ལེགས་ཉེས་བླང་དོར་སྟོན་མཛད་ཅིང༌། །འགྲོ་བའི་མུན་སེལ་ཆོས་ཀྱི་རྗེ། །དཔལ་ལྡན་འདྲེན་པ་མཆོག་རྣམས་ཀྱིས། །བདག་ལ་རྟག་ཏུ་ཐུགས་རྗེས་གཟིགས། །བློ་གྲོས་བློ་ངན་ཉོན་མོངས་ཀྱི། །དྲྭ་བའི་སྦུབས་སུ་རབ་འཐུམས་བདག །བཅུ་ཕྲག་དྲུག་ལ་ལྔར་ལྷག་པའི། །མགོ་ཟླའི་ཚེས་ལ་འཕགས་ཡུལ་གྱི། །རྡོ་རྗེ་གདན་མཇལ་ཕྱིན་པའི་ཚེ། །རྒྱལ་གྱི་ཟླ་བའི་ཚེས་ལྔ་པ། །ཉིས་བརྩེགས་སྔ་མའི་དུས་ཀྱི་ཆར། །བྱང་ཆུབ་ཆེན་པོའི་མདུན་ས་རུ། །གསོལ་བཏབ་བགྱིད་སྐབས་དེ་ཉིད་ནི། །ཐུབ་དབང་དངོས་སུ་གྱུར་པ་ཡི། །ཐུགས་ཀར་རྡོ་རྗེ་འཆང་ཆེན་སྔོ། །ཡུམ་མེད་ལོངས་སྐུ་རྡོར་དྲིལ་བསྣམས། །དེ་ཡི་ཐུགས་ཀར་ཀུན་ཏུ་བཟང༌། །རྒྱན་མེད་ཡབ་ཡུམ་འཁྲིལ་སྦྱོར་བཞུགས། །ཕྱི་རོལ་འོད་ཟེར་ཕུང་པོའི་ཀློང༌། །སངས་རྒྱས་མང་པོ་བཞུགས་པ་ཡི། །ཉམས་ཀྱི་སྣང་བ་རབ་རིབ་བྱུང༌། །ཚེས་ལྔ་ཕྱི་མར་ཡང་དེ་འདྲའི། །སྣང་བ་བྱུང་བས་བླ་རྣལ་བྲིས། །མགོན་པོ་ཕྱག་བཞིར་གཏོར་འབུལ་ཞིག །བྱ་དགོས་སྙམ་རུང་དཔེ་མ་འཛོམས། །དེ་ནུབ་ཡེ་ཤེས་མགོན་པོ་ནི། །རྡོ་སྐུ་ནག་པོའི་སྨད་ཆ་ནས། །ཞབས་སོགས་ཆེ་སྦོམ་ལྡན་པ་ཞིག །མཇལ་ཞིང་དེ་ཡི་ཕྱི་ཉིན་ལ། །མཆོད་དཔོན་ལགས་ཀྱིས་བཀའ་འགྱུར་གྱི། །རྒྱུད་འབུམ་ག་པར་དངོས་གྲུབ་འབྱུང༌། །རྒྱུད་གཞུང་ཟེར་བར་དྲན་པ་ལ། །རྒྱུད་དཔེ་རྙེད་ན་དེའི་སྟེང་ནས། །ཆོ་ག་བསྡེབས་ཏེ་འདོན་རུང་སྙམ། །དེ་ནུབ་རྒྱུད་རྒྱལ་དེ་ཉིད་ཀྱི། །སྟེང་ནས་ཆོ་ག་བྱ་བ་རྨིས། །དེས་རྐྱེན་གསོལ་སྐོང་བྲི་འདོད་བྱུང༌། །ཉུང་ངུ་ཞིག་ནི་ཤར་མར་བྲིས། །མཉན་ཡོད་མཆོད་འབུལ་བྱ་བའི་སྐབས། །སྟེང་གི་ནམ་མཁའ་སྔོ་སངས་ཆེར། །དེ་བཞིན་གཤེགས་པའི་སྐུ་ཆེ་བར། །སངས་རྒྱས་ལ་སོགས་མང་པོས་བསྐོར། །བཞུགས་སྙམ་འལ་འོལ་ཙམ་ཞིག་བྱུང༌། །སྒང་ཐོག་འབྱོར་ནས་རྨི་ལམ་དུ། །བྱ་རྒོད་སྤུངས་པའི་རི་བོའི་མདུན། །མཆོད་སྟེགས་མཛེས་པ་ཞིག་གི་ཁར། །སྟོན་པའི་རྡོ་སྐུ་ཆེ་ཙམ་མདུན། །མཆོད་པ་མང་པོ་བཤམས་པ་རྨིས། །ཡང་གཅིག་ནད་མནར་རྨི་ལམ་དུ། །རྫོང་སར་གཟིམ་ཆུང་རྙིང་པ་རུ། །འཁྲུལ་ཞིག་བྱོན་ནས་བདག་ལ་ནི། །ཞལ་གཏུགས་ལྗགས་ཕུ་ཞིག་མཛད་ཅིང༌། །ཐང་རྒྱལ་གསེར་སྐུ་ཁྲུ་གང་ཙམ། །གཡས་པས་ས་གནོན་གཡོན་མཉམ་བཞག །ཐོད་ཆང་མཐོན་པོར་འཕྱུར་བའི་རྩེར། ཚེ་བུམ་ཆུང་ངུ་ཡོད་པ་ཞིག །འཇོག་སྣོད་ཐོད་སྒྱེད་དང་བཅས་པ། སྒྲོས་ལེགས་གསལ་འཚེར་འབར་བ་ཞིག །བསྣམས་པའི་སྐུ་དེ་དེམ་སྟེང་བཞག །ཐོད་བུམ་འགྲིལ་དོགས་ཟུར་དུ་བླང༌། དེ་ནས་ཕྱག་སྟེང་བཞག་པ་སོགས། མང་པོ་རྨིས་ཀྱང་ཕལ་ཆེར་བརྗེད། །འཕགས་ཡུལ་རྡོ་རྗེ་གདན་བྱང་ཆུབ་ཤིང་གི་ཉེ་འགྲམ་ཞིག་ནས་མཆོད་འབུལ་སྨོན་ལམ་བྱེད་སྐབས་སུ་གནདཧོ་ལའི་ཕྱོགས་མཚམས་སྟེང་མཁར་ཐམས་ཅད་དུ་སངས་རྒྱས་བྱང་སེམས་མང་པོ་བཞུགས་པའི་སྣང་བ་བྱུང༌། མཉན་ཡོད་གནས་མཇལ་བ་ན་སངས་རྒྱས་སེར་འཇམ་མང་པོ་ཞིག་མཁའ་དབྱིངས་སུ་བཞུགས་སྙམ་པ་དང༌། ལྷ་བབས་མཇལ་དུས་དེ་བཞིན་གཤེགས་པ་ཆོས་འཁོར་གྱི་ཕྱག་རྒྱ་ཅན་ཤིན་ཏུ་ཆེ་བ་མཁའ་དབྱིངས་སུ་བཞུགས་པ་ལས་དབང་བླངས་ཤིང༌། མཐར་དྷཱིཿསེར་པོར་གྱུར་ནས་རང་ལ་ཐིམ་པའི་ཤེས་ཉམས་བྱུང་བའང་རང་མཐོང༌། མེ་སྤྲེལ་ཟླ་༡༢ཚེས༥་ཉིས་བརྩེགས་ཀྱི་ཕྱི་མར། བྱ་རུང་ཁ་ཤོར་གྱི་མཆོད་རྟེན་བང་རིམ་སྟེང་ནས་གནས་ཆོག་རྒྱས་པ་གཏོང་སྐབས་སངས་རྒྱས་བྱང་སེམས་གནས་བརྟན་དགྲ་བཅོམ་མང་པོ་ནམ་མཁར་བཞུགས་སྙམ་བྱུང༌། དེའི་དགོང་མོར་བསྐོར་བ་བྱས་པས་མཆོད་རྟེན་དེ་ཉིད་བདེ་གཤེགས་ཞི་ཁྲོ་སྒྲུབ་པ་སྡེ་བརྒྱད་ཀྱི་དཀྱིལ་འཁོར་ལྷ་ཚོགས་ཕྱི་མཆོད་རྟེན་ལ་ནང་ན་སྒྲིབ་མེད་བཞུགས་པ་འདྲ་ཞིག་ཤར་བས་ཕྱག་དང་སྦྲགས་ན་རཀ་བསྐང་བཤགས་སྨོན་ལམ་དང་བཅས་པ་བཏོན། རླུང་རིག་དྭངས་ཤིང་བདེ་བ་བྱུང་ངོ༌། །འཕགས་པའི་གནས་བརྟན་ཆེན་པོ་ཡན་ལག་འབྱུང་གིས་རྗེས་སུ་བཟུང་ཚུལ་རྣམ་ཐར་ཞལ་གསུང་མ་ལས་གསལ་བ་དང༌། ཡང་ཚེས༡༡་ནུབ་རི་ལིའི་ནང་ཉལ་འདུག་སྐབས་བལ་ཡུལ་དུ་ཡོད་པའི་དབྱིག་གཉེན་གདུང་འབུམ་དེ་དྲན་པའི་རྐྱེན་གྱིས། དབྱིག་གཉེན་པཎ1$0000270ཌ1$0000300ི་ཏའི་ཆས་པཎ་ཞུ་དང་ཕྱག་གཡས་སྐྱབས་སྦྱིན་ཐུགས་ཀ་གཡོན་མཆོག་སྦྱིན། ཞབས་རོལ་སྟབས་འགྱིང་ཉམས་ཅན་ཤར་བ་ལ་མོས་གུས་དང་གསོལ་འདེབས་བྱས། དད་པ་ལ་ལ་གདོན་གྱིས་བྱས་གསུངས་པ་དེ་མིན་ན་ལེགས། །ས་ཁྱི་ཟླ་༡ཚེས་ན་འབྲས་ལྗོངས་སྒང་ཐོག་ཏུ་བྲོ་ནད་རྒྱུན་རིང་མནར་སྐབས། སློབ་དཔོན་ཙནྡྲ་གོ་མི་ཡིན་རྒྱུ་རྒྱན་དྲུག་ཀཿཐོག་ཏུ་ཕུར་བུའི་ཕྱག་བྲིས་ནང་གི་དབྱིབས་དང་སྐུ་ཆས་དེ་ལྟ་བུ་ཞིག་གིས་རྣམ་འཇོམས་ཀྱི་བཀྲུ་བྱབས་ཞིག་མཛད་པའི་འཁྲུལ་ཉམས་བྱུང་བས་ནད་ཁམས་ཅུང་ཟད་དྭངས། ཡང་ཟླ་༢ཚེས༢༧་དགོངས་འདུས་བསྐང་ཆོག་སྐབས་ཤ་ཟ་ཁ་མོ་ཆེ་ཞི་བའི་གཟུགས་ཅན་གྱི་ངོས་ལ་འཁྱུད་ནས་བྷ་ག་ནས་རྡོ་རྗེ་འཇིབས་ཏེ་ཁྲག་ཆུ་སེར་སོགས་འཐེན་སོང་བའི་སྣང་བ་བྱུང་རྐྱེན་གྱིས་ནད་ཁམས་ལ་ཕན་རྐྱེན་ཆེར་བྱུང་སྙམ། མེ་བྱ་ཟླ་༩ཚེས༡༡་ནུབ་རྫོང་སར་གཟིམ་ཆུང་དབང་ཁང་དུ་མི་ཕམ་རིན་པོ་ཆེ་རེད་ཟེར་བའི་བླ་མ་ན་ཁྲེབ་ཞིག་འདུག་པ་དེ་ལ་དགའ་སྤྲོ་ལྟ་བུའི་ངང་དེར་སློབ་གཉེར་བ་ཞིག་འདུག་པ་དེ་ལ་བླ་མས་རྩོད་པའི་ཐལ་ངག་ཁ་ཤས་བཏང་འདུག །དེ་ནས་ཉི་ཡོལ་དུ་སོང་སྟེ། ངེད་ནས་ཐལ་འགྱུར་བའི་ལུགས་ཀྱི་ཉན་རང་གིས་བདག་མེད་རྟོགས་མ་རྟོགས་འདི་མི་གོ་འདུག་པས་རྩོད་ངག་ཞིག་གཏོང་ཆོག་པར་ཞུས། རང་ནས་བླ་མ་ལ་ཕྱག་འཚལ། རིག་སྟོང་འཇམ་དཔལ་འདོན་དྲན་ཀྱང་ཚིག་འགོ་གཏན་ནས་མ་དྲན། གཞན་ཞིག་བཏོན། གང་ཞིག་ལྟ་ངན་གྱིས་སོགས་འཇམ་དཔལ་མཆོད་བརྗོད་ནི་བློར་འགྲོ་མི་ཐུབ་སྙམ་ནས་འདོན་མ་སྤོབས་པ་བླ་མ་ཉིད་ཀྱིས་གསུངས། དེ་ནས་ངེད་ཀྱིས་ཐལ་བ་ཁ་ཤས་འཕང་བར་བླ་མས་མང་པོ་ཞིག་གསུངས་ཀྱང་གསུང་མི་གསལ་བ་ལྟ་བུས་ཆེར་གོ་མ་ཐུབ་པ་སོགས་རྨིས། ཚེས༢༢་ནུབ་ཞེ་ཆེན་ཀོང་སྤྲུལ་རིན་པོ་ཆེའི་ཕྱག་བྲིས་ཤོག་ལྷེ་ཞིག་འབྱོར་བ། ངེད་ཟླ་བ་གསུམ་པའི་ནང་ཞིང་ཁམས་འགྲོ་བ་ཡིན་གསུངས་པས་དེ་ལ་ཕན་བྱེད་ཙཱ་རིའམ། ཨཛྙ་ཕུག་གམ་ཅོང་ཞི་ཕུག་ལ་སྐུ་མཚམས་བཞུགས་དགོས་ཟེར་བ་དང༌། གཞན་ཡིག་ཕྲེང་ཁ་ཤས་ནང་ལུང་བསྟན་འགའ་འདུག་ཀྱང་མ་དྲན་བརྗེད་དེ་ཐལ་ལོ། །ས་ཁྱི་ཟླ་༩ཚེས༢༦་ལ་རྨི་ལམ་དུ་ངོས་དང་གསོལ་མཆོད་གཉིས་སོགས་སྡེ་དགེ་ལྷུན་གྲུབ་སྟེང་གི་གཙུག་ལག་ཁང་ཆེན་པོའི་ནང་འབྱོར་ནས་ཡུན་རིང་ཙམ་བསྡད། ངེད་ཀྱི་ཟུར་དེར་ངོར་མཁན་ཆེན་དཔལ་ཆོས་ཀྱི་གདུང་རྟེན་བུམ་པ་མན་ཡོད་པ་ལ། བུམ་པའི་ཁ་སྤང་ལེབ་ཀྱིས་བཅད་འདུག །འདིའི་ནང་སྐུ་གདུང་ཧྲིལ་བུ་ཡོད་པ་མཇལ་ཟེར་ཤིང་ལེབ་རྣམས་བསལ། དེའི་འོག་སྙུག་གིས་བསླས་པའི་ཁ་ཆོད་འདུག་པ་བླངས། དེའི་གསེབ་ནས་ལག་པ་བརྒྱབ་པས་དྲི་བཟང་ཕུར་མ་མང་པོ་བརླན་ཞད་ཅན་དང༌། རིལ་རིལ་ལྟ་བུ་འགའ་འདུག་པ་གཅིག་བླངས་པས་ལ་ཕུག་ལོ་མ་དང་བཅས་པ་ཆུང་ངུ་གཅིག་བྱུང་བ་ཕྱིར་བཞག །ཡང་རིལ་རིལ་མང་པོ་ལག་གིས་མྱོང་འདུག་པ་གདུང་རུས་དང་ཐུགས་འདྲ་མིན་ནམ་སྙམ། ཡང་ཁ་རྒྱབ་ནས་བཞག་པ། དར་ཅིག་ནས་མཆོད་དཔོན་མཆོག་ལྡན་ལྟ་བུས་སྐུ་གདུང་དེ་མར་ཙམ་དྲངས་ནས་བུམ་པ་ཞལ་ཕྱེས་པའི་ནང་དྲི་བཟང་རློན་པ་དྲོད་ཅན་དྲི་ཞིམ་འཐུལ་ཞིང་དེའི་ནང་ནས་སྐུ་གདུང་ཁྲུ་གང་ཙམ་ཞལ་ངོ་བགྲེས་ཉམས་དབུ་སྐྲ་སེ་ཆོབ་སྐྲ་མཐུག་པོ་རང་མེད་པའི་ཅུང་རིང་ཞད། ཞབས་གཉིས་བྱིས་པའི་རྐང་པ་ལྟ་བུ་གཞོན་ཤ་ཆགས་པ། རྒོ་ལོགས་མིན་པའི་གསོན་པོ་དངོས་འདྲ་བ། ཞབས་གཉིས་པུས་བསླངས་རྐང་མགོ་ཕྱིར་བསྟན་བྱས་པ་ཡར་བླངས་ནས་ངོས་ཀྱི་རྒྱབ་ཕྱོགས་གཏུག །སྤྱི་བོར་བཞག །དེ་ནས་རང་གི་མདུན་དུ་བླངས་ནས་གསོལ་འདེབས་དབང་ལེན་སྨོན་ལམ་དོས་དྲགས་པ་བྱས། སྐུའི་གནས་རྣམས་ལ་ཞལ་གཏུགས་པས་ལྗགས་དབུགས་འཕྲོ་བ་དང་དྲོད་ཚ་ཆི་ལེ་བར་བཞུགས། ཤིན་ཏུ་མོས་གུས་བྱས་ནས་བུམ་པའི་ནང་ཕྱིར་བཞག །གདུང་རས་ན་བཟའ་ལྟ་བུ་དྲི་བཟང་གི་བརླན་ཅན་འདུག་པ་ལས་ཚལ་པ་ཆེ་ཙམ་ཞུས་ནས་ཁ་གཅོད་སོགས་སྔར་བཞིན་བྱས་པ་ཡ་མཚན་ཅན་ཞིག་རྨིས། ཡང་ཚེ་དབང་རྡོ་རྗེས་གུ་རུ་བླ་མ་ནོར་ལྷ་གསེར་སྐུ་རྙིང་པ་མཐོ་གང་ཙམ། གཡས་རྡོ་རྗེ་རྒྱལ་མཚན། ཡང་ཁ་ཊྭཱཾ་ལྟ་བུ་རིང་པོ་ཞིག་དང་ནེའུ་ལེ་དང་བུམ་གཏེར་སོགས་འཛིན་པ་ཞིག་བྱིན་པ་རྨིས། ཚར་ཆེན་རིན་པོ་ཆེའི་གསོལ་འདེབས་གསོག་སྐབས། ས་ཁྱི་ཟླ་ཚེས་ནུབ་རྨི་ལམ་ཆབ་ཆོབ་མང་པོ་དང༌། སྡེ་དགེའི་སྤར་མ་ཆོས་རྩིགས་མང་པོ་ཡོད་པའི་སར་སླེབས་པ་དང༌། ཐུགས་སྒྲུབ་བསམ་ལྷུན་དང་ཐུགས་སྒྲུབ་སྒྲོལ་མ་གཉིས་ཡི་དམ་དགོས་པ་དང༌། གུར་མགོན་གྱི་གཞུང་པོད་མེ་འབར་མ་ཡིན་རྒྱུའི་པོད་གཅིག་ཤོག་གུ་ཁ་དོག་སྣ་ཚོགས་ལ་བྲིས་པ་སྡེབ་ཁ་ཤས་རེ་ཕྱར་ནས་གཞན་ལ་ངོམས་པ་ལྟ་བུས་བཤད་མི་ཤེས་པ་ཞིག་རྨིས་པ་རང་ལ་གཙོ་ཆེ་བ་ཡིན་ནམ། ཟླ་ཚེས་སྐོར་རྨི་ལམ་དུ། རྡོ་རྗེ་འཇིགས་བྱེད་ཞལ་ཐང་གསར་པ་ཆེ་ཆུང་གཉིས་དང༌། མཐར་མི་ཕམ་ཐུགས་དམ་ཞལ་ཐང་བགྲེས་པོ་གཙུག་ལག་ཁང་གི་ངོས་ཤིག་ལ་དཔྱངས་ཡོད་པ་དང༌། གངས་ཅན་རི་རྩེར་ལན་ཁ་ཤས་ཕྱིན་པས་ལན་གཉིས་པའི་སྐབས་དགོན་པ་འདེབས་ནས་དཔྱད་ཅི་འདུག་ལྟ་བར་ཕྱིན་པས་དེ་ཉིན་མི་མང་པོ་མེད། དབེན་པར་འདུག་པས་ཤིང་སྟེགས་ལ་ཅུང་བསྡད་པ་དང་ནམ་མཁའ་སྔོ་དྭངས་ནས་ཕྱག་རྡོར་ཁྲོ་བོ་ཕུར་པ་སོགས་སྟོང་གཟུགས་ལྟ་བུ་འལ་འོལ་ཡོད་སྙམ་བྱེད། ཡང་མེ་བྱ་ཟླ་༢ཚེས༡༡་ནུབ་སྒྲོལ་ལྗང་གསེར་སྐུ་ཁྲུ་གང་པ་བྱིན་ཅན་གཉིས་སྔ་རྗེས་བྱས་ནས་རྨིས་ཀྱང་སེམས་ལ་དད་འདུན་དགའ་ཚོར་ཡོད་པ་ལས་སྐུ་དངོས་ཤོག་གུ་སེར་ཁག་གིས་ཐུམ་པས་མི་མཇལ་འདུག །ཚེས༣༠་ནུབ་སྤྲེའུ་ཞིག་གིས་ངེད་ལ་གནོད་འཚེ་བྱས་པ་རྒྱུན་ལྕག་བྲབ་ཀྱང་ཆེར་མ་ཐུབ། རྡོ་རྗེས་བརྡུངས་པས་ཅུང་ཐུབ་སོང་བ་རྨིས། ས་ཁྱི་ཟླ་༡༢ཚེས༡་ལ་ཉིན་མོ་ཅུང་ཟད་མནལ་བར་གྱུར་པ་ལྟ་བུའི་ངང་བདེ་བ་ཅན་གྱི་ཞིང་ཁམས་ཡིན་རྒྱུའི་ནམ་མཁའ་སྔོ། རི་རྒྱ་ཆེན་པོ་ཞིག་ཏུ་ཡུལ་བཀོད་འཇའ་འོད་འཆར་བ་ལྟ་བུ་སྣ་ཚོགས་པ་དང༌། བཞུགས་ཁྲི་འདེགས་པའི་རྨ་བྱ་ཤིན་ཏུ་ཆེ་བ། རི་དིལ་ཆུང་ཙམ་གཉིས་སོགས་ཡོད་པ་ལ་ཧ་ཅང་གསལ་པོ་མིན་པ་ན་བུན་གྱིས་སྒྲིབ་པ་ལྟ་བུ་རབ་རིབ་ཞིག་གི་སྣང་བ་རིང་ཙམ་བྱུང༌། ཚེས༤་ནུབ་དགོན་པ་ཆུང་ངུ་ཞིག་རྫོང་སར་དགོན་པ་ཆགས་པའི་རི་ལས་དམའ་ཙམ་དབྱིབས་དེ་འདྲ་བར་ངོས་ཅག་འབྱོར། གྲྭ་པ་གཟན་ཤམ་ཅན་ཁ་ཤས་ནས་དར་བཏང༌། མར་གཤམ་དེར་སྡོད་ནས་ངེད་ཞབས་པད་བརྟན་དགོས་ཚུལ་དང༌། འདི་ཇོ་བོ་སྨྲྀ་ཏི་ཛྙ་ནའི་དགོན་པ་ཡིན། དེའི་རྟེན་ཐམས་ཅད་ཡོད་ས་འདི་ཡིན་ཟེར། ཆོས་ལུགས་གང་ཡིན་ལབ་པས་ཤབ་ཤུབ་མང་པོ་ཟེར་དགེ་ལྡན་ཡིན་རྒྱུ་འདྲ་ཞིག་བཤད། དེ་ནས་ངེད་ཅག་དགོན་པའི་གླིང་བསྐོར་ལ་སོང་བས་མགོན་ཁང་ལྟ་བུ་ཞིག་ཏུ་སླེབས། དེར་གུ་རུ་རིན་པོ་ཆེའི་སྐུ་ཚབ་གསེར་མ་སོགས་རྟེན་མང་པོ་དང༌། ལྡེར་སྐུ་མང་པོའི་དབུས་དམ་ཅན་ཆོས་ཀྱི་རྒྱལ་པོ་ཡིན་པའི་ཁྲོ་བོ་ཞལ་གསུམ་མི་ཚད་གཅིག་ཡོད་པ་སོགས་མང་པོ་ཞིག་མཇལ་ངང་གཉིད་སད་དོ། །ཟླ་ཚེས་ནུབ་རྨི་ལམ་དུ་སྡེ་དགེ་ལྷ་སྲས་ངག་དབང་འཇམ་དཔལ་རིན་ཆེན་རེད་ཟེར་བ་ངོས་ཞིག་གི་གཤམ་གྲོང་ཁ་ཤས་ཡོད་པ་ཞིག་གི་ནང་བཞུགས་ཟེར་བ། དགོང་མོ་ས་རུབ་ནས་མཇལ་ཞུས་སོང་བར། ཁང་པ་དཀྱུས་མ་ཞིག་གི་ནང་རྩྭའི་སྤྱིལ་བུ་སྒོ་ཤིན་ཏུ་དོགས་པའི་ནང༌། དབུ་སྐྲ་ནག་པོ་ཐོར་ཅོག་ཆུང་ངུ་གཞོན་ཤ་ཅན་སར་གཟིགས་ནས་ལོ་མ་སྔོ་ལྗང་གི་ན་བཟའ་བཞེས་ནས་འདུག་པ། ངེད་ནས་དགའ་དང་གུས་པའི་རྣམ་འགྱུར་བྱས། ཁྱིམ་ཕྲུག་དམར་ཧྲལ་གྱི་ན་བཟའ་བཞེས་འདུག །དེ་འདྲ་ཞིག་ངེད་ལའང་བསྐོན། ཁོང་རང་བཞེངས་ནས་ཕྱི་འཁྱམ་ཞིག་དུ་སོང༌། ངེད་ཀྱང་སོང༌། ངོས་ནས་ཕྲུག་ཆས་དེ་ཕུད་ནས་ཁོ་རང་ལ་ཕར་ཕུལ། ང་རང་གཅེར་བུར་སོང༌། དད་རྟེན་ཞིག་ཞུ་དགོས་སྙམ་དུམ་བུ་ཞིག་བཅད། ཁོང་ནས་གྲལ་རིམ་དེར་ཡོད་པ་རྣམས་སྨག་ནག་པས་ཞིབ་ཆ་མ་མཐོང་ཡང་བརྡེག་པ་བྱེད་སྙམ། ལ་དཀར་བསོད་རྒྱལ་དེར་འདུག་པ་ལ་ཕྱག་འབེབས་གནང༌། ཁོ་སྨྱོ་འདུག །དེ་ནས་ཁོ་གཅེར་བུར་རྒྱབ་བསྙལ་ལྟ་བུ་མཛད་ནས་བུ་འདི་སྨྱོ་ནས་ནང་འཁྲུགས་ཞིག་བྱེད་པ་འདྲ་ཞེས་གསུངས་པ་དེ་འདྲ་མང་མཐར་གཉིད་སད། ཡང་མནལ་བས་སྔ་མ་དེ་འདྲ་ལ། ད་ལྟ་དེ་ཁོང་དང་ཙི་ཀེ་མཆོག་གླིང་རྣམས་མཁྱེན་བརྩེའི་མདུན་དབང་ཆོས་མང་པོ་ལྷན་ཞུ་འདི་བཞིན་མཛད་གསུངས་སྟངས་ཀ་མང་པོ་དང༌། དར་ཅིག་ནས་ཌཱ་དྲིལ་འཁྲོལ་སྔོན་བསྐལ་མ་གསུངས། ངེད་ནས་འདི་གྲུབ་ཐོབ་རེད་སྙམ། དད་མོས་བྱས་པས་ཡེ་ཤེས་ཕེབས་པའི་ཉམས་བྱུང༌། མོས་གུས་ཚད་མེད་སྐྱེས། ཁོང་ལ་ཡེ་ཤེས་རྒྱ་མཚོ་མཚན་ཟེར་བ་སོགས་རྨིས། དེའི་ཕྱི་ཉིན་ལྕགས་ཐག་གྲུབ་ཆེན་འདས་སྐད་ཐོས་ཁོང་མཇལ་ན་སྙམ་ཡང་མ་བྱུང་བས་བྱིན་གྱིས་བརླབས་པ་འདྲ་མིན་ནམ་སྙམ། །དབུས་ཕེབས་སྔོན་མའི་སྐབས་ཡིན་འདྲ། ཤིང་གླང་ཟླ་༩ཚེས༡༨་ལ་ཨ་ཙ་དགོན་ཞོལ་དུ་སྡོད་པའི་རྨི་ལམ་དུ། ལྷ་ཁང་ཡིད་དུ་འོང་བ་ཞིག་གི་ནང་དུ་ཁྲི་ཆེན་པོའི་སྟེང་གོས་འབོལ་ཤིན་ཏུ་མཐོ་བ་ཞིག་འདུག །བླ་མ་འཇམ་རྒྱལ་ཡིན་ནམ་སྙམ་པ་ངེས་ཏིག་མ་བྱུང༌། རྒྱུད་སྡེའི་དབང་ཆེན་ཞིག་བསྐུར་བ་ཐུན་མོང་རིག་པའི་དབང་ལྔ་བུམ་དབང་རྫོགས་སྐབས་རྡོ་རྗེ་སློབ་དཔོན་གྱི་དབང་མཇུག་ཆོས་འཆད་པའི་རྗེས་གནང་སྐབས་དུང་དཀར་ཆེན་པོ་ཞིག་འདུག །ངོས་ནས་བུས། དེ་ནས་ངོས་རང་ཁྲི་སྟེང་སོང་ནས་ཆོས་འཆད་རྒྱ་བཅས་བསྡད་ཀྱང་ཁྲི་ཧ་ཅང་མཐོ་དྲགས་པས་ཅུང་འཇིགས། དབང་ལྷ་བསྟན་པ་སོགས་གསུངས་མཐར་ཁྲི་ལས་བབས། དབང་འོག་མ་གསུམ་སོ་སོའི་མཐར་རྗེས་གནང་བཅས་ཐོབ་པ་རྨིས། དེ་རྗེས་ཐོ་རངས་ཁར་རི་བྲག་ཞིག་ཏུ་དགོན་པ་ཞིག་གི་ནང་རྟེན་མཇལ་བྱས་མཐར་ཁང་པ་ཆུང་ངུ་ཞིག་ཏུ་ཀརྨ་པ་མཁའ་ཁྱབ་རྡོ་རྗེ་ཞྭ་ནག་གསོལ་བཞིན་བཞུགས་པའི་སྐུ་པང་དུ་རྟེན་སྒམ་ཞིག་ཞལ་ཕྱེས་འདུག་པ་ངེད་ལ་བྱིན་རྟེན་གནང་དགོས་ཞུས་པས། རྒྱལ་པོ་ཀ་ནིཤཀ་རྟེན་སྐལ་དེ་བཞིན་གཤེགས་པའི་རིང་བསྲེལ་ཡིན་ཞེས་གསེར་སྒྲོམ་ཞིག་ནས་སྒོ་ང་ཙམ་པའི་དཀྱིལ་རིང་བསྲེལ་གཅིག་འདུག་པ་ཡང་བསྐྱར་བསྟན་བྱུང་བ་ཁོག་གིས་འཇིམ་པ་འདི་ཀླུ་སྒྲུབ་ཕྱག་བཟོ་ཡིན་གསུངས། རིང་བསྲེལ་ཡང་གསུམ་ཙམ་འདུག །འཇིམ་པ་དེ་ལ་རིང་བསྲེལ་གྱི་ཤུལ་ཁུང་བུ་མང་པོ་སྣང༌། ངེད་ལ་གནང་དགོས་ཞུས་པས་ཀརྨ་དུས་གསུམ་མཁྱེན་པའི་ན་བཟའ་རེད་ཅེས་གོས་ཆེན་མི་ཤ་ཁ་ནག་ལྗིབ་བེ་བ་ཞིག་ཕྱག་གྲིས་ཆེ་ཙམ་གཏུབ་ནས་གནང་བྱུང་བས་བྱིན་རླབས་ཀྱི་ཟིལ་དང་མོས་གུས་ཚད་མེད་འབར། རིང་བསྲེལ་འདི་གནང་རིན་མེད། ཤཱཀ་ཐུབ་རིང་བསྲེལ་མིན་ཀྱང་འཕེལ་མ་གཞན་ཞིག་སྦྱིན་རྒྱུ་ཡོད་ཅེས་གསུངས་མཐར་མནལ་སད་དོ། །ཚེས༡༩་བྱང་ལྷ་རི་མགོ་ཀླུ་སྒྲུབ་ཚང་རྩར་སྡོད་ནུབ། ལྷོ་རྒྱུད་གཡོ་རུ་ཁྲ་འབྲུག་ཏུ་འབྱོར། དེར་སྔོན་མེད་པའི་ལྷ་ཁང་ཤིན་ཏུ་སྤུས་ལེགས་གནམ་རྒྱན་སོགས་སྔར་གྱི་རྒྱན་བཞི་སིའུ་ཁ་གསར་ཤ་སྟག་འདུག །གསེར་སྐུ་ཁྲུ་གང་ཙམ་ཞི་ཁྲོ་ཤིན་ཏུ་མང་བ་ཞིག་ཏུ་ཕྱིན། སྔོན་མ་ང་རང་འོང་སྐབས་ཞིབ་ཆ་མ་མཇལ་བའི་ལྷ་ཁང་དེ་དང༌། ཡང་ཀུན་རིག་ལྷ་ཁང་ཞེས་པ་ཞིག་ཟུར་དུ་འདུག །ལྷ་ཁང་སྔོན་མ་དེར་མཆོད་རྟེན་ལྟ་བུ་བུམ་སྒོའི་ཁར་ཀློང་ཆེན་པའི་ཐུགས་དམ་རྟེན་སྒྲོལ་མ་ཁུ་ཚུར་ཙམ་ཤིན་ཏུ་བྱོན་ལེགས་དང༌། དེའི་སྟེང་བལ་པོ་བྷ་རོའི་ཐུགས་དམ་རྟེན་ཛམ་དཀར་འབྲུག་ཞོན་རྒྱ་གར་ལི་མ་བཟོ་བྱད་ལྟ་བས་ཆོག་མི་ཤེས་པ་འདུག །དེ་ལག་ཏུ་བླངས་བྱིན་རླབས་ཞུས། ཡང་བཅུ་གཅིག་ཞལ་ཞིག་གི་དབུ་རྒྱན་ཁར་ཀློང་ཆེན་པའི་གདུང་ལས་བྱོན་པའི་བཅུ་གཅིག་ཞལ་གྲང་གསེར་བྱུགས་པ་ཞལ་བསྒྲིགས་ལུགས་རིམ་གསུམ་བྱས་པ་ཡང་ཡང་མཇལ། ལྷ་ཁང་ཁག་གཉིས་ཀའི་ལྷ་རྣམས་ལ་གསེར་ཆབ་ཐིག་བདུན་སྦྱངས་ནས་འབུལ་གྲབ་བྱས། ཀུན་རིག་ལྷ་ཁང་དུ་ཚོགས་པ་ཞིག་འདུག་པ་ཀྱེ་རྡོར་འཚོགས་ནས་ཕྱི་རོལ་ངོར་པའི་ལུགས་ལྟར་སིལ་སྙན་སྐད་ཆེན་ཞིག་བརྡུང་ནས་བྱོན་བྱུང་བ་སིལ་སྙན་མིང་ལ་གར་གྱི་ཚིག་འགོ་ཞིག་ཟེར་ཡང་བརྗེད། ལྷ་ཁང་ནང་དེར་ཕྱིན་པ་ཙམ་ལས་ཞིབ་ཆ་མ་དྲན། སྦུག་དེར་མགོན་ཁང་ཞིག་ཡོད་སྙམ། དེ་ནས་དཀོར་གཉེར་དཔོན་རེད་ཟེར་བའི་བན1$0000240ད1$0000300ེ་ཞིག་གིས་ཁྱེད་རང་མཆོད་མཇལ་སྐབས་ཁོང་མེད་པས་རྟེན་འདི་རྣམས་ཨི་མཇལ་ཟེར་རེ་རེ་ནས་དྲིས་བྱུང་ཡང་ཞིབ་ཆ་མ་དྲན། མཐར་རྫ་སའི་ཐབ་ཀ་ཞིག་གྲུ་མོ་ནང་ཁྱེར། དེ་ནང་སོལ་མེ་དམར་ཧུ་རེ་སྦར་ནས་འདི་གཉན་ལོའི་གསོལ་ཐབ་ཡིན་ཞེས་ས་ཁར་འཕངས་བྱུང་བ་ཐབ་དེ་འགྲོ་ལོག་བརྒྱབས་ཀྱང་སྟེང་འོག་ཀུན་ནས་མེ་འབར་བ་མེ་ཕྱིར་ཡང་མ་བོ། མཐར་མེ་འབར་བཞིན་དུ་ཡར་ཁྱེར་སོང་མཐར་མནལ་སད། ཟླ༧་ཚེས༡༠་ལ་ཀོང་པོ་ཇུ་ཆེ་མདོར་སྡོད་པའི་ཐོ་རངས་ཁང་པ་ཉམས་དགའ་བ་ཞིག་ཏུ་རྒྱལ་ཚབ་རིན་པོ་ཆེ་བཞུགས་སྟན་མཐོ་བ་ཞིག་གི་ཁར་བཞུགས་ནས་སེམས་བསྐྱེད་སྡོམ་པ་འབོག་ཆོག་གནང་ཤོམ་གྱིས་ང་ཅག་འདུས་པ་ཁ་ཤས་ལ་རིན་པོ་ཆེའི་ཞལ་ནས་མཎ1$0000270ཌ1$0000300ལ་ཕུལ་གསོལ་བ་ཐོབ་གསུངས་བྱུང་བ། ཕྱག་དང་མཎ1$0000270ཌ1$0000300ལ་གསོལ་བ་བཏབ། ལྕེ་བཙུན་སྙིང་ཐིག་གི་ཐུན་གྱི་སྔོན་འགྲོའི་གསོལ་འདེབས་ལ་བྱང་ཆུབ་ཀྱི་སེམས་རྒྱུད་ལ་སྐྱེ་བའི་གསོལ་བཏབ་མཐར། རིན་པོ་ཆེས་ཁྲུས་ལྟ་བུ་ཞིག་ཕྱག་དྲིལ་དཀྲོལ་ནས་གསུངས། སྤྱན་སྙུན་བ་ལྟ་བུ་གཡས་བཙུམ་གཡོན་གཟིགས་འགའ་མཛད། ཞལ་ཉམས་ཤིན་ཏུ་རྒྱས། དེ་ནས་སྤྱན་ཧུ་རེ་གཟིགས་ནས་དབྱངས་གསལ་རྟེན་སྙིང་ལན་མང་གསུངས་མཐར་མནལ་སད། །ཚེས༡༢་ནུབ་ཐོ་རངས་མནལ་ལམ་དུ་དགོན་པ་ལྟ་བུའི་ཁང་པ་ཞིག་ཏུ་སྐྱབས་རྗེ་ཀཿསི་རྡོ་རྗེ་འཆང་རེད་ཟེར་ཞལ་རས་ནི་མི་འདྲ། དབུ་སྐྲ་སེ་ཆོབ། ཞལ་ཟླུམ་པོ་གཞོན་ཤ་ཆགས་པ་སྐུ་གཟུགས་སྒེག་པ་ཞིག་ལ་མཁའ་འགྲོ་སྙིང་ཐིག་གི་དབང་ཉིན་བཞི་ཙམ་གནང་བའི་ཉིན་རྗེས་མར་ངོས་རང་གི་གཟབ་སྤྲོད་ལྟ་བུའི་ཐོན་ཞུ་མཛོད་ཀྱི་རྒྱབ་འཕན་ཡོད་པ་གྱོན་ནས་དབང་ཁང་དེར་ཕྱིན་པ་དང༌། བླ་མ་ཉིད་བཞེངས་བྱུང་བ་ཞྭ་ཕུད་ཙམ་བྱས་དབུ་གཏུགས་གནང་རྗེས་བླ་མའི་ཁྲིའི་གཡོན་ཁྲི་སྟན་མཐོ་བ་ཞིག་ཏུ་སྡོད་ནས་དབང་ཕལ་ཆེར་ཆོག་རོགས་ཁ་ཤས་འདུག་པ་མཉམ་གསུངས་དང༌། གཅོད་མཁའ་འགྲོའི་གད་རྒྱངས་འདྲ་ཞིག་ཀྱང་གསུངས། རིག་པའི་དབང་གསུམ་ཞེས་པའི་རྗེས་གཏུམ་མོའི་མེ་དབང་འདྲ་ཞིག་ཀྱང་གནང༌། མཁའ་འགྲོ་སྙིང་ཐིག་གི་དབང་གཞུང་སྔར་ཡོད་འདི་འདྲ་ཞིག་ནི་རེད། མཐར་དབང་རྫོགས་ནས་དབང་གི་དཀྱིལ་ཐང་རྣམས་བསྒྲིལ་བའི་ཁྲེས་པོ་ཞིག་ཁྱེར་ཤོག་བྱས་ནས་ཐེག་ལ་ཁད་པ་ཞིག་ལ་མནལ་སད་པས་བྲག་དཀར་ལྷ་ཆུའི་གནས་ཀྱི་བྱིན་རླབས་ཞིག་ཡིན་ནམ་སྙམ་པ་འདུག །ལྕགས་རྟ་ཧོར་ཟླ་༩ཚེས༢༧་ནུབ་ངོས་རང་ཕུ་མར་ཡོད་པ་མཆོད་ཁང་ནང་གྲུབ་བརྒྱའི་ཞལ་ཐང་རྙིང་པ་བྱིན་ལྡན་བཤམས་འདུག །ཐང་ཀ་གཅིག་གསར་དུ་བཞེངས་པ་ཡིན་རྒྱུ་ཞིག་གི་གསེར་ཐང་ཞིག་འདུག་པ་གཙོ་བོ་རྒྱལ་བ་བྱམས་པ་བཞེངས་སྐུ་དང༌། འཁོར་ལྷ་མོ་བཞེངས་པ་ཁ་ཤས་འདུག །ངོས་ནས་སྒྲོལ་མ། ལྷ་མོ་ཙནྡན། རྨ་བྱའི་སྨད་ཁེབས་མནབ་པ་ཞིག་འདུག་པ་རྨ་བྱ་ཆེན་མོ་གཡས་ནོར་བུ་བསྣམ་པ། ནོར་རྒྱུན་མ་རྣམས་རེད་ཟེར་འདུག །དེ་ནས་མཆོད་ཁང་བང་བའི་ཨརྒ་གས་སྲུབ་ཆེན་པོ་ཞིག་འདུག་པ་ཡང་ལས་དགོས་ཟེར་གྲི་རྩེས་བཀོག་འདུག་པས་ཀ་བ་བཞི་མིག་གཅིག་ལིང་གིས་བཀོག་ནས་རྒྱ་མཐོང་འདྲ་བ་ཞིག་རེད་ཟེར། དེ་ནང་ནས་མར་བལྟས་པས་བསོད་ནམས་དབང་རྒྱལ་དེ་སྨིན་མཚམས་ཁྲོ་གཉེར་ཡོད་པ་ཞིག་ཡར་འགྲོ་ཕྱིར་འགྲོ་བྱེད་འདུག །ཡང་ཐང་ཀ་རྙིང་པ་གོང་ཤམ་ཅན་གཅིག་འདུག་པས་གཙོ་བོ་གང་ཡིན་བརྗེད། མདུན་ཀློང་ཆེན་པ། གཡོན་མཁྱེན་བརྩེ། གཡས་བིརཝ་པ་གོང་གཡས་མཁས་གྲུབ་རྒྱ་མཚོ། གཡོན་བརྗེད། དེ་རྣམས་ཁ་བྱང་འདུག །ཚེམ་ཐང་ཡིན་པ་འདྲའང་འདུག །ཀློང་ཆེན་བིརཝ་རྣམས་ཅུང་ཁྲོ་ཉམས་སྐུ་མདོག་སྔོ་སངས་ཅན་ཞིག་རེད། སྔར་གྱི་རྨི་ལམ་ཕུའི་ས་ཕྱོགས་འདྲ་བ་དེར་དཔྱད་དགོས། མེ་སྤྲེལ་ཟླ་༡༡ཚེས༡༤་ལ་རག་སོར་དུ་སྡོད་ནུབ་དབོན་པོ་སྟོད་མཁན་པོ་མཁྱེན་རབ་ཀྱི་གཟིམ་ཁང་ཡིན་རྒྱུ། མཁྱེན་རབ་ཀྱང་བཞུགས་ཁང་ཚོན་ཁྲ་ཅན་སྐྱོན་མེད་ཞིག་ཏུ་འབྱོར། དེའི་ནང་ལི་སྐུ་གསེར་མ་ལས་བཟོས་པའི་བདུད་རྩི་ཁྲོ་མཁར་ལྟ་བུ་བར་ལམ་ཞིག་ཏུ་པདྨའི་འཁོར་ལོ་ཡོད་པ་འཕྲུལ་བཟོ་བྱས་བ་ལྟ་བུ་ངོ་མཚར་བ་ལུས་ཚད་ཙམ་དང༌། ཡང་ལི་དཀར་ལས་འཇིགས་བྱེད་ཞལ་དགུ་ཡུམ་ཅན་ལུས་ཚད་གཅིག་དང༌། ཡང་དེ་ལས་ཆུང་ཙམ་བཟོ་ཁྱད་ངོ་མཚར་བ་དང༌། གཞན་ཡང་སྐུ་མང་པོའི་ནང་ནས་ངེད་ལ་གཅིག་སྦྱིན་གྲབ་འདུག །ཆེ་བ་འདི་ནི་སྦྱིན་མི་འོང་སྙམ། རྡོ་སྐུ་ལེབ་མོ་སོར་བཞི་ཙམ་པ་ཞིག་འདི་ཁྱེར་བྱས་ནས་དྲི་རྡུལ་ཆུས་བཀྲུས་པས་སྐུ་གང་ཡིན་མི་འདུག །སོ་ཕག་རྒྱ་གར་གྱི་བྷི་ལ་སས་བཟོས་པ་འདྲ་བ་ཞིག་འདུག་པས་ཡིད་མ་རངས། ཁྲོ་མཁར་དེ་ལ་ཞིབ་ཏུ་བརྟགས་པས་ནང་དུ་ཐུགས་ཆེན་བཞེངས་སྐུ་ཕྱག་མང་ཙམ་གཡས་པ་གཅིག་མཆོག་སྦྱིན་བྱས་པ། གཞན་རྣམས་བརྗེད། དེའི་ཕྱི་དང་སྤྱི་གཙུག་ཏུ་ལྷ་ཁ་ཤས་བརྗོད་མི་ཤེས་པ་ལྟ་བུ་འདུག་པས་ངེད་ལ་འདི་སྦྱིན་དགོས་བྱས། འབུལ་ཆོག་ཟེར་བ་ད་ལྟ་ཁུར་གྲབས་ཀྱི་སྒམ་སོགས་བཟོ་དགོས་བྱས་པས་ཟླ་བ་བཅུ་གཅིག་ནང་བསྐྱལ་འོང་ད་ལྟ་མ་བསྣམས་ན་མཁན་པོས་ཟེར་བ་སོགས་རྨིས། དེའི་སྔ་ནུབ་ཞེ་ཆེན་རབ་འབྱམས་སོགས་བླ་སྤྲུལ་མང་ཤས་ལ་རྒྱ་ཅན་ཉེར་ལྔ་རིན་གཏེར་དུ་ཡོད་པ་མི་དགོས་ཟེར། གཞན་ཚང་མའི་དབང་བཏོན། རིན་གཏེར་དུ་ཡོད་པའི་དྭངས་མ་བཅུད་འདྲེན། གྲོ་ལོད་ལས་བྱང་འདོན་བཞིན་ངང་གཉིད་སད། མེ་སྤྲེལ་ཟླ་༡༡ཚེས༡༦་བྷིར་ཁཉྩི་ར་ཚེ་ལུ་ན་སྐབས་ཞི་བྱེད་རྨ་བྱ་ཆེན་མོའི་བཟླས་ཐུན་སྐབས་མངའ་རིས་རིག་འཛིན་ལེགས་ལྡན། བྱང་བདག །མཆོག་གླིང་གསུམ་གཤིབས་ཏེ་བསྒྲུབ་བྱའི་སྤྱི་བོའི་ཐད་ཡོད་པའི་སྣང་བ་བྱུང་འཕྲལ་གསོལ་འདེབས་བྲིས། ཧོར་ཟླ་༨ཚེས༡༣་ནུབ་ས་ཆ་གང་ཡིན་མ་འཚལ་བའི་ལུང་སྟོང་ཞིག་ཏུ་མཆོད་རྟེན་ལྟ་བུའི་འབུམ་པའམ་ལྷ་ཁང་གང་ཡིན་ངོས་མ་འབྱེད་པའི་ཆེན་པོ་ཞིག་ལ་བསྐོར་ནས་བང་རིམ་སྟེང་ཤོད་ནས་ཕར་ཕྱིན་པས་ལྷོ་སྟོད་དུ་གནས་སྒོ་འབྱེད་རྒྱུ་ཡོད་པ་རེད་ཟེར། དེ་ནས་བར་སྒོ་ལྟ་བུ་ཞིག་ལ་བསལ་ནས་བལྟས་པས་ནང་ན་མི་མང་པོ་ཞིག་ཀྱང་འདུག །དེ་ནས་མར་ཕྱིན་ཤར་ལྷོ་ནས་སྒོ་བསལ་བས་ནང་ཁྱོན་ཆེ་བར་འགྲོ་ས་འདུག །མང་པོ་ཤོང་བར་གདའ་ཟེར་བ་སོགས་རྨིས་ཀྱང་ཕལ་ཆེར་བརྗེད། ཡང་གཉིད་སད་པས་སྔ་མ་དེའི་འཕྲོས་ལྟ་བུའི་སྒོ་གཉིས་གསུམ་ཞིག་ཕྱེས་ནས་ཌཱ་ཀི་བཅུ་གསུམ་རེས་སྐད་གདངས་བསྒྲིགས་ནས་གླུ་ལེན་པ་སོགས་རྨིས་པ་ནི། རྡོ་རྗེ་གླིང་དབྱར་ལྟས་སྐྱེད་ཚལ་དུ་སོང་བས་དེ་ཉིན་གཞས་དང་གླུ་གར་མང་པོ་བྱེད་ཀྱིན་སྣང་བའི་སེམས་རྨིས་ཡིན་ནམ། གང་ལྟར་ཡང་པདྨ་བཀོད་གནས་སྒོ་འབྱེད་པའི་ལྟས་འདྲ་མིན་ནམ་སྙམ། ཟླ་༨ཚེས༢༩་ནུབ་ཟིལ་ཁྲོམ་སྦས་སྡེ་འབྱེད་པ་ཡིན་ཟེར་ངོས་རང་དཔོན་སློབ་ཁ་ཤས་བྲག་རི་དཀར་པོའི་གཡོན་ཟུར་རྫ་ཤུར་ཞིག་ནས་འཛེག་པ་དང༌། ཡང་དེ་རྒྱབ་རྫ་ལུང་ཞིག་ནས་འགྲོ་བ་སོགས་རྨིས། ཚེས༢༡་ནུབ་པད་སྡོང་ཞིག་གི་སྟེང་སློབ་དཔོན་རིན་པོ་ཆེ་ཟ་ཧོར་མ་ཡུམ་མཚོ་རྒྱལ་གྱིས་འཁྲིལ་བ་ཁྲུ་གང་ཙམ་པ་ཞིག་རང་གི་མདུན་ཐད་ཉེ་བར་མཇལ་སྙམ་ལ་མཆོག་གི་དངོས་གྲུབ་ཞུས་པ་དང༌། ཁྱད་པར་ཚེ་གེགས་སེལ་བའི་སྨོན་ལམ་དྲག་པོ་བཏབ། སྦྱོར་མཚམས་ནས་བདུད་རྩི་འབབ་པ་སྤྱི་བོར་ཟག་པའི་ཉམས་བྱུང༌། མེ་བྱ་ཟླ་ཚེས་ལ་འབྲས་ལྗོངས་སྒང་ཐོག་ཏུ་འཇའ་ཚོན་ཆོས་སྐོར་དབང་ལུང་འདོན་པའི་དཀོན་སྤྱིའི་དྲག་པོའི་དབང་སྒྲུབ་སྐབས་རིག་པ་ངར་ཐོན་ཏེ་སྐུའི་གསལ་སྣང་ཤིན་ཏུ་ཐོན་ལ་ལྟོས་ཆེ་བ་ནམ་མཁའི་ཁམས་གང་བ་ལས་སྤྲུལ་པ་མང་དུ་འཕྲོ་བ། ལྷ་སྲིན་ཐམས་ཅད་དམ་ལ་བཏགས་ནས་སྲོག་སྙིང་རྣམས་དམར་ནར་གྱིས་དྲངས་ཏེ་གདན་ལ་བསྟིམས་པའི་ཉམས་བྱུང་ཞིང༌། དངོས་སུ་དམ་བསྒྲགས་བྱ་དགོས་པ་འདྲ་ཡང་ཉམས་གཡས་ཆུང་དུ་བཏང་ནས་མ་བྱས། ཧོར་ཟླ་༨་ཚེས༡་རྡོ་རྗེ་གླིང་དུ་སྔགས་གྲྭ་རྣམས་དང༌། ཐར་མཁན་བསོད་ནམས་རྒྱ་མཚོ། འབྲས་ལྗོངས་ལྷ་ཡུམ་སོགས་དགུ་བཅུ་ལྷག་ཙམ་ལ་བྱང་གཏེར་དྲག་མཐིང་གི་དབང་འདོན་པའི་སྟ་གོན་ནུབ་རྫོང་སར་གཟིམ་སྤྱིལ་ཇ་ཁང་དུ་རྒྱལ་འགོང་ཞིག་ཡོད་པ་དེ་འདུལ་དགོས་ཟེར་ནས་ཐུགས་སྒྲུབ་དྲག་པོའི་ང་རྒྱལ་བརྟན་པོས་མེ་དམིགས་བྱས་ནས་འདུལ་ཐུབ་པ་རྨིས། མེ་བྱ་ཧོར་ཟླ་༡༠་ཚེས༤་ནུབ་རྨི་ལམ་དུ་འཇིགས་སྐྲག་ཞིག་གི་རྐྱེན་བྱས། ཨོ་རྒྱན་རིན་པོ་ཆེ་ལ་གསོལ་བ་འདེབས། །ཞེས་པའི་ཤྭ་ལོ་ཀ་དང༌། རྗེ་བཙུན་པདྨ་ཐོད་ཕྲེང་རྩལ། །དྲག་པོ་ཡེ་ཤེས་རབ་འབར་ལ། །ཞེས་པའི་གསོལ་འདེབས་སྐད་ཆེན་པོས་ཚར་ཁ་ཤས་བཏོན་པ་དང༌། མོས་གུས་དྲག་ཏུ་སྐྱེས་པའི་རྐྱེན་གྱིས་གུ་རུ་དྲག་པོ་ཡེ་ཤེས་རབ་འབར་ཞལ་གསུམ་ཕྱག་དྲུག་པ་བྱིས་པ་ལོ་ལྔའི་ཚད་ཙམ་དང་པོ་ལྡེར་སྐུ་ཡིན་པ་ལྟ་བུ་སྐབས་རེར་ཕྱི་ནང་སྒྲིབ་མེད་དངོས་ལྟ་བུ་མིག་གིས་དངོས་སུ་བལྟར་ཡོད་པ་ཅན་དུ་འཆར་བ་ལ་གསོལ་འདེབས་དབང་བླང་བྱས་པ་རྨིས། སད་ནས་ཀྱང་དངོས་རྨིས་གང་ཡིན་མ་འབྱེད་པ་ཞིག་བྱུང༌། ས་ཁྱི་ཟླ་༡༠ཚེས་ནང་ཞིག་ཏུ་རོང་གི་རི་མགོ་སེ་ལ་ལྟ་བུ་ནས་ངོས་ཅག་རྟ་དྲེལ་བཅས་ལ་གཟར་པོ་ཞིག་ལ་འཛེག་ནས་རི་སྐེད་སྒང་ཕར་རྒྱབ་སྦྲ་གུར་ཁ་ཤས་ཕུབ་པ་བྲག་འདྲེའི་སྒར་པ་ཡིན་སྙམ་གྱི། བཀྲ་རྣམ་དང་གྲྭ་པ་གཅིག་རྣམས་སྔོན་དུ་རྒྱང་ཆད་ནས་སོང༌། འདྲེ་སྒར་དེ་ནས་རླུང་འཚུབས་ལྟ་བུ་དང་མི་ཁ་ཤས་སྔོན་རྒྱུག་རྗེས་དེད་དང༌། ངོས་ལའང་གནོད་འཚེ་བྱེད་ཤོམ་ལ་རང་གཤིན་རྗེ་ཚེ་བདག་གི་གསལ་སྣང་ཆེ་བརྗིད་ལྡན་པས་འདྲེ་དེ་རྣམས་ཞལ་གསུམ་དུ་བསྟབ་པ་ཡང་ཡང་བྱས་པས་འཇམ་སོང་བ་རྨིས། ཟླ་༡༠ཚེས༡་ནུབ་ངེད་རང་རི་རྩེ་ཞིག་ལ་རྟ་ཞོན་ནས་སོང༌། དེ་ནས་གསེར་ཐེབ་གྱོན་བཞིན་མཐུར་གཟར་པོ་ལ་ལོ་ཆུང་དུས་སོང་བ་ལྟར་བྱས་ནས་རི་གཤམ་དུ་སླེབས་པ་དང་མཁའ་འགྲོའི་ཚོགས་གཞོང་རེད་ཟེར་བའི་བྲག་སྔོན་པོ་རུ་དྲའི་ཁོག་པ་གཞོང་པ་དང༌། དེ་ལ་མགོ་ཡོད་པ། དེའི་ནང་སོང་ནས་གཞན་ལའང་དེ་ཚུལ་བཤད། དེ་ནས་ཕར་ཙམ་ན་ས་སྔོན་ལྟ་བུའི་བང་རིམ་བཞི་ཡོད་པའི་ངོས་གཅིག་ལ་གཏེར་རྟགས་ལྟ་བུ་འདུག་པ་རྡོས་བསྣུན་ནས་ཁྲོལ་གྱིས་ཞིག་པའི་ནང་དཔེ་ཆ་རས་ལྗང་གུས་དྲིལ་ཆས་ཅན་མང་ཙམ་དང༌། ཕུག་པ་དེ་ཇེ་ཆེར་གྱུར་པ། རྡོ་རྗེ་ཕག་མོའི་ལི་སྐུ་ལྟ་བུ་ཁྲུ་གང་ལྷག་ཙམ་དང༌། གཞན་མཆོད་ཆ་སོགས་མང་པོ་ཡོད་པ་རྨིས་ཀྱང་ཞིབ་ཆ་བརྗེད་དོ། །གུར་དཀར་ཕུག་ཏུ་འགྲོ་སྐབས་ཆེ་མཆོག་གི་བྲག་རི་དེ་བཀའ་བརྒྱད་ཞལ་ཕྱག་རྒྱས་པ་ཤིན་ཏུ་ཆེ་བ་ནམ་མཁའི་གཟུགས་ཅན་ཞིག་མཇལ་སྙམ། ཉང་གི་གཏེར་གནས་ལྷོ་བྲག་སྲིན་མོ་སྦར་རྗེས་གུ་རུའི་སྒྲུབ་ཕུག་ཏུ་ཡུམ་ཀྱི་སྤྱན་འདྲེན་ལ་ཉེ་སྐབས་ཉམས་ཅུང་ཟད་འབར་ནས་གར་འཁྲབ་སྙིང་འདོད་པ་བྱུང་ཡང་མི་མང་བས་ཉམས་འགོག་པར་བྱས་སོ། །མེ་སྤྲེལ་ཟླ༣་ཚེས་ལ་རྡོར་བྲག་ཏུ་འབྱོར་ཉེར་ཀོ་གྲུ་དང་གཟིངས་དོན་ཁར། དགོན་པའི་རྒྱབ་ལོགས་བྲག་རིའི་སྟེང་མཁར་རིག་འཛིན་ལེགས་ལྡན་རྗེ་སྔགས་འཆང་ཆས་ཐོར་ཅོག་ཕུར་པ་དང་ཐོད་པ་བསྣམ་པ། གཞན་ཡང་རིག་འཛིན་མང་ཙམ་བཞུགས་སྙམ་བྱུང༌། ནམ་མཁའ་ལ་སྤྲིན་འཇའ་ཡང་འདུག །མེ་བྱ་ཟླ་༡ཚེས༡༤་ལ་འབྲས་ལྗོངས་བྲག་དཀར་བཀྲ་ཤིས་སྡིངས་སུ་ཕྱིན། རྒྱལ་དབང་ཀརྨ་བཅུ་དྲུག་པའི་གསེར་ཞལ་ཡང་ཡང་མཇལ། མཐོང་གྲོལ་ཅོད་པན་རིན་པོ་ཆེ་ཐེངས་ལྔ་རྒྱང་མཇལ་མདུན་ཐད་ནས་ཤིན་ཏུ་གསལ་པོར་ཞུས། དད་མོས་དྲག་ཏུ་བསྐྱེད། ཡན་ལག་བདུན་པ་མཎྜལ་འདོན། ཞབས་བརྟན་བྲིས། སྔར་མཚུར་ཕུར་མཇལ་སྐབས་ཀྱི་སྣང་ཉམས་འདྲ་བ་ཞིག་ཀྱང་བྱུང༌། བྱིན་འབེབས་གཏེར་བུམ་དང་གཞི་བདག་གཏེར་བུམ་ལ་ཕྱག་ནས་ཐུགས་སྨོན་ཞུས། ས་མིག་དགོངས་བབས་སར་གསས་མཁར་བརྩིགས་ནས་ཚེས་བཅུ་དྲུག་ལ་གཞི་བདག་བུམ་པ་ཐོག་འོག་འཇོག །ཚེས་བཅུ་བདུན་དཀྱིལ་འཁོར་གཏེར་བུམ་འཇོག་པའི་བཅའ་གཞི་བསྒྲིགས་སྐབས་གསོལ་འདེབས་མགུར་མ་བྲི་སྐབས་ལྷ་བཙུན་ཆེན་པོར་ཐུག་པ་དང༌། དད་སློབ་ལི་ཐང་དགེ་མ་ནས་དར་དང་དངུལ་ཏོག་རྟགས་བརྒྱད་རི་མོ་ཡོད་པ། མཎྜལ་ཟངས་བཟོས་རྫས་བརྒྱད་རི་མོ་ཡོད་པ་སོགས་བྱུང་བ་རྟེན་འབྲེལ་བཟང་བས་དངུལ་ཏོག་བླང༌། གཞན་རྣམས་ཕར་བྱིན། དངུལ་ཏོག་དེ་རྒྱལ་སྲས་རིན་པོ་ཆེར་སྨོན་ལམ་དང་སྦྲེལ་བཀྲ་ཤིས་ཁ་བཏགས་ཀྱིས་ལྕིབས་ཏེ་ཕུལ། གཏེར་བུམ་བཞག་ནས་དཀོན་སྤྱི་དང་འབྲེལ་བྱིན་འབེབས་བརྟན་བཞུགས་བྱས། ཚེས་བཅུ་བདུན་ཕྱི་མའི་ཞོག་པར་དར་བཙུགས་ནས་གསས་མཁར་བསྟོད་པ་དང་བཀྲ་ཤིས་བརྗོད། གྱམ་ལ་ཞུགས་ཏེ་མར་ཙམ་ཕྱིན། མཆོད་རྟེན་ལྟ་བུ་ཆུང་ངུ་མང་ཙམ་བསྒྲིགས་པར་ཕྱིན་པ་ན་ནམ་མཁར་ལྷ་བཙུན་ཆེན་པོ་ཧེ་རུ་ཀའི་ཆས་གཡས་རྐང་གླིང༌། གཡོན་ཐོད་ཆང༌། སྐུ་ཆེ་བ། འཁོར་དུ་ཌཱ་ཀི་མང་པོ་གར་སྟབས་མཛད་པར་རབ་རིབ་མཇལ་སྙམ་བྱུང༌། པདྨ་ཡང་རྩེར་ཚེས་ཉེར་ལྔ་ལ་མཁའ་སྤྱོད་རིན་པོ་ཆེ་དབུས་དཔོན་སློབ་ཉེར་གཅིག་ཙམ་གྱིས་རིག་འཛིན་སྲོག་སྒྲུབ་ཀྱི་སུན་བཟློག་བརྟན་བཞུགས་སྤྲོས་བཅས་ཀྱི་བྱིན་འབེབས་སྐབས་ཡིན་སྙམ། ལྷ་བཙུན་ཆེན་པོ་གཡས་མཆོག་སྦྱིན་ཚེ་བུམ། གཡོན་ཐོད་ཆང་ཧེ་རུ་ཀའི་ཆས་ཅན་གྱི་ཚེ་བུམ་རང་གི་མགོ་ཐོག་བཞག་པ་སོགས་བྱུང་ཡང་དེ་རིང་ཚེས༣༠་བར་ཡི་གེར་འགོད་རྒྱུ་མ་བྱུང་བས་ཞིབ་ཆ་བརྗེད། ཚེས༢༥་ནུབ་ཀུན་མཁྱེན་ཀློང་ཆེན་པའི་གདུང་འབུམ་ཡིན་རྒྱུའི་མཆོད་རྟེན་མང་པོའི་ནང་ནས་གཅིག་གཉིས་ཧྲལ་ཡོ་ནང་སྐུ་གདུང་དམར་ཧྲིལ་ཉལ་སྟབས་ཡོད་པའི་སྒལ་ཚིགས་གཞུང་ནས་འཇའ་ཚོན་སྣ་ལྔ་ཡོད་པ་འདྲ་ཞིག་རེས་དུམ་བུར་འཐོར་བ་རེས་གཅིག་པ་ལྟ་བུ་ལ་ཞིག་གསོས་བྱེད་པ་རྨིས་པས། ཚེས༢༦་ལ་གསང་ཆོས་མར་ཞབས་རྗེས་སྒང་དུ་ཕ་ཝཾ་རང་བྱོན་ཅན་དང༌། དེའི་སྒང་ཁར་པད་གླིང་གི་དགོན་ཤུལ་ཡོད་སྐད་ཟེར་བ་དེ་ལ་བལྟའམ་སྙམ། མེ་སྤྲེལ་ཟླ་༢་ཚེས༢༠་གཡོན་རུ་གཏེར་སྲས་འཇམ་དབྱངས་བསོད་ནམས་ལ་ཐིག་རྒྱའི་དབང་གི་སྐབས་བསྙེན་པའི་ནང་སླེབས་པ་དང༌། བི་མ་ལར་མོས་གུས་དྲན་པའི་རྐྱེན་གྱིས་ལྷ་བཙུན་ནམ་མཁའ་འཇིགས་མེད་སྐུ་ན་ཁྲེབ། རལ་ཅོག །ན་བཟའ་ཕུ་དུང་གཟན་ཤམ་ཡེ་མི་གསལ་བ་གཡས་ཆོས་འཆད། གཡོན་མཉམ་བཞག་ཐོད་ཆང་ཅན། སྐུ་ལས་སྟོང་གཟུགས་ཀྱི་ཌཱ་ཀིའི་སྔོ་སྐྱ་རིབ་བེ་མང་དུ་སྤྲོ་བ་ལ་གསོལ་འདེབས་དབང་བླངས་དང་དགྱེས་པའི་དབུགས་དབྱུང་བཅས་རང་ལ་ཐིམ་པའི་ཤེས་ཉམས་བྱུང་ངོ༌། །ཧོར་ཟླ་༡༠ཚེས༣༠་ནུབ་ནམ་སྨད་རྨི་ཉམས་འདྲེས་མར་གཏེར་ཆེན་མཆོག་གླིང་གུ་རུའི་ཆས་ཞུགས་མཛད་ནས་ཕེབས། བཞེངས་བཞིན་དུ་བྱབས་ཁྲུས་ཤིག་དང་ཚེ་དབང་བསྐུར་དགོས་ཀྱི་སྒྱུ་འཕྲུལ་ཚེ་དཀར་གྱི་དཀྱིལ་འཁོར་སྤྲུལ་ནས། ཐོག་མར་བུམ་པ་ལྔའི་དང༌། དེ་ནས་ལྷར་བསྐྱེད་བུམ་པ་དང་སྐུ་གསུང་ཐུགས་དབང༌། གསང་ཤེར་སྐབས་དཔའ་བོ་ཡབ་ཡུམ་མི་ཚད་ཆེ་ཙམ་གར་སྟབས་མཛད་པ་དང༌། དབང་བཞི་པ་མེ་ལོང་ཤེལ་རྡོ་རྨ་བྱའི་སྒྲོ་རྣམས་ཀྱིས་བརྡ་དང་ཚིག་གི་ངོ་སྤྲོད། མཐར་བཀྲ་ཤིས་ཤྭ་ལོ་ཀ་ཁ་ཤས་ཡོད་ཀྱང་ལས་ངན་སྡིག་སྒྲིབ་ཆེ་བས་བརྗེད་དེ་ཐལ། ཧོར་ཟླ་༡༠ཚེས༡་ལ་པདྨ་ཡང་རྩེའི་མཁའ་སྤྱོད་རིན་པོ་ཆེ་དབུས་དཔོན་སློབ་བཅུ་བདུན་སྐོར་གྱིས་རིག་འཛིན་སྲོག་སྒྲུབ་སྒོ་ནས་སུན་བཟློག་ཞབས་བརྟན་འབུལ་སྐབས། དང་པོར་ནམ་མཁའ་ནས་སྔགས་ཆས་ཅན་གྱིས་དྲག་པོའི་འཆམས་སྟབས་བྱས་པའི་ཉམས་བྱུང༌། དེ་ཕྱིན་ཅིའང་མ་གསལ། བུམ་པ་ལྔ་འདུག་པ་སྔ་དགོང་གི་རྨིས་ལྟས་དེ་ལ་ལྟ་བ་ཡིན་ནམ་སྙམ། ཟླ་༡༡ཚེས༡༩་ནུབ་གཏེར་སྟོན་ལས་རབ་གླིང་པ་དང་མཇལ། བདུད་རྩི་སྨན་སྒྲུབ་བྱ་རྩིས་ཀྱིས་ཨ་རུ་སོགས་སྨན་སྣ་ཉུང་ཙམ་འདུ་བྱས། གཏེར་སྟོན་ཉིད་སྟག་ཞིག་ཏུ་བརྫུས་ནས་ངོས་ཁང་པ་ཞིག་ནང་མནལ་ནས་ཡོད་པའི་སྟེང་ནས་མནན་ཏེ། དང་པོ་སྐྲག་སྔངས་ཕུད་མཐར་འདྲིས་བྲོད་བྱས་ཏེ་དགའ་བའི་རྣམ་འགྱུར་སྟོན། ངེད་ཡར་ལངས་ནས་སྟག་དེ་རྡོ་རྗེ་གཞོན་ནུའི་སྐུར་བསྐྱེད་པས་རྡོ་རྗེ་གཞོན་ནུར་གྱུར་པ་སོགས་མཚར་པོ་མང་ཞིག་རྨིས། ལས་གླིང་ཕུར་པ་ཡང་སྙིང་སྤུ་གྲིའི་ཐུན་བཟུང་ཕྲིན་ལས་ལ་བརྟེན་ཚོགས་འབུམ་ཐེར་བསགས་སྐབས་གཏེར་སྟོན་ཉིད་མཇལ་སྙམ་བྱུང་ཡང་ཡི་གེར་མ་འཁོད་པས་ད་ལྟ་མ་དྲན། ཟླ་༡༠ཚེས༡༧་ལ་རྡོ་གྲུབ་སྤྲུལ་སྐུ་རིན་པོ་ཆེས་ཀློང་སྙིང་ཡུམ་བཀའི་སུན་བཟློག་བརྟན་བཞུགས་སྐབས། རབ་གསལ་ཕྱེས་པའི་ནམ་མཁར་འཇིགས་མེད་གླིང་པ་སོགས་བླ་མ་ཁ་ཤས་དང༌། སྔགས་པ་དབུ་སྐྲ་ནག་པོ་ཐོར་ཅོག་ཅན་ཞལ་རས་ཟླུམ་པོ་ཨག་ཚོམ་ཅུང་ཟད་ཡོད་པ་གསལ་བ་ཞིག་བཞུགས་པ་ངོས་མ་འབྱེད་དེ་འདྲའི་ཉམས་བྱུང༌། ཟླ་༣ཚེས་སྐོར་ཞིག་ལ་མཁྱེན་བརྩེ་རྡོ་རྗེ་འཆང་ཕྱག་གཡས་ཚེ་བུམ་བསྣམས་པ་རབ་བྱུང་ཆས་ཅན་གྱིས་ཐང་རྒྱལ་ཚེ་དབང་གནང་ནས་ལོ་གྲངས་ཁ་ཤས་བར་སྐྱོན་མེད་པའི་དབུགས་དབྱུང་བསྩལ་བ་ཞིག་ཀྱང་བྱུང༌། སྔར་རྫོང་སར་དུ་མཁྱེན་བརྩེ་རིན་པོ་ཆེའི་སྐྱེས་ཕྲེང་ཞལ་ཐང་བཞེངས་སྐབས་ཐང་རྒྱལ་དང་མཁྱེན་བརྩེ་རིན་པོ་ཆེའི་ཕྱག་གི་ཚེ་བུམ་ལས་བདུད་རྩི་འཕྱུར་བ་རྗེ་བླ་མའི་ཕྱག་གི་ཚེ་བུམ་དུ་བབས་པའི་ཞལ་བཀོད་གནང་འདུག་པའང་གཟིགས་སྣང་ཞིག་ཡིན་སྙམ། ཟླ་༩ཚེས༡༤་ནུབ་འཇམ་མགོན་ཀོང་སྤྲུལ་རིན་པོ་ཆེ་མཇལ། ཕྱག་རྡོར་རྡོ་རྗེ་བེ་ཅོན་གྱི་འབེབས་གཞི་ཤོག་སེར་ལྡེབ་ཁ་ཤས་འདུག་པ། འཇམ་མགོན་ཕྱག་བྲིས་ནི་མ་རེད། རྗེ་ཉིད་ཀྱི་གཏེར་ཆོས་མིན་འདྲ་སྙམ། གཏེར་སྟོན་གཞན་ཞིག་གི་གཏེར་ཆོས་ཡིན་སྙམ་དང༌། ཡང་ཤོག་སེར་དམ་རྫས་རྙིང་ཧྲུལ་ཞིག་ཀྱང་ལག་ཏུ་རྙེད་པས་དགའ་ཚོར་དང༌། ཀོང་ཆེན་པ་རེས་དངོས། རེས་ཀརྨའི་ཐུགས་སྲས་ཡིན་རྒྱུ་ངེས་མེད་དུ་བྱུང་བ་རྨིས། ས་ཁྱི་ཟླ་༦ཚེས༡་ནུབ་དགོན་གནས་ངོ་མི་འཚལ་བ་ཞིག་གི་འདུ་ཁང་ནང་དུ་ངེད་ནས་ཁྲོམ་སེར་སྐྱ་སུམ་བརྒྱ་ཙམ་ལ་དབང་ཞིག་བསྐུར། ངོས་རང་ནས་གསེར་གྭ་ཆུང་ཞིག་མགོ་ལ་བཞག །དེ་ནས་གྲུབ་ཐོབ་བརྒྱད་ཅུ་དང་འབྲེལ་བའི་ཆོ་ག་ཞིག་བཏང་ནས་ཚོགས་ཀྱི་སྐབས་ཡིན་རྒྱུ་ཞིག་ལ་ངོས་ནས་རྡོར་དྲིལ་ཆུང་ངུ་བཟུང་སྟེ་ཚོགས་གར་རྒྱུན་རིང་འཁྲབ་མཐར་བཀྲ་ཤིས་ཞབས་བྲོ་དགའ་བ་འཁྱིལ་པ་ཞེས་པའི་འགོར་གར་གྱི་བཤད་པ་ལྟ་བུ་མང་ཙམ་ངོས་རང་གིས་བྱེད་པ་དང་ཞབས་བྲོ་འཁྲབ་རྒྱུ་མ་བྱུང་བ་སོགས་རྨིས། ཤིང་སྤྲེལ་ས་ག་ཟླ་བར་བཀའ་བརྒྱད་བདེར་འདུས་ཀྱི་སྨན་སྒྲུབ་རྒྱས་སྤྲོས་གནང་སྐབས་སྒྲུབ་དཀྱིལ་སྟེང་ནས་བཀའ་བབས་རིག་འཛིན་བརྒྱད་ཀྱིས་རྡོ་རྗེའི་གར་སྟབས་བསྒྱུར་བའི་གཟིགས་སྣང་ཆེས་གསལ་བར་བྱུང་ཚུལ་གསུངས་ཤིང༌། རྒྱ་ཅན་ཉེར་ལྔའི་ཐུགས་དམ་ཕྱག་དཔེའི་གསེབ་ཏུ་ཚེ་ཡུམ་ཙཎྡན་ལཱིས་རྗེས་སུ་བཟུང་ཚུལ་གྱི་ཕྱག་བྲིས་ཀྱང་མཇལ། དགུང་གྲངས༤༡་ཕེབས་པ་ཆུ་སྟག་ཟླ་ཚེས་སྐོར་རྒྱུད་ལུགས་འཇམ་དཔལ་གྱི་བཅུད་ལེན་བདུད་རྩི་རིལ་བུ་སྒྲུབ་པའི་བཟླས་ཐུན་གནང་སྐབས་སྒྲུབ་དཀྱིལ་སྟེང་ནས་གཟིགས་སྣང་དུ་འཇམ་དཔལ་ཡབ་ཡུམ་འཁོར་དབྱངས་ཅན་རིགས་བཞི་བཅས་ཤིན་ཏུ་གསལ་བའི་ངང༌། ཡུམ་བཞིར་རིམ་བཞིན་མཉམ་པར་སྦྱོར་བས་བདེ་བའི་ཡེ་ཤེས་ཀྱི་ཉམས་ཁྱད་པར་ཅན་རེ་རེ་སྐྱེས་པའི་གསལ་སྣང་ཡུན་རིང་ཤར་ནས་སད་པ་ན་ཆོག་རོགས་ཞབས་ཕྱི་ནས་སྙུན་ཁམས་བཞེས་པར་དོགས་ནས་གྲིབ་བསང་སོགས་བྱས་འདུག་ཚུལ་ཕྱག་བྲིས་མཇལ། གཞན་ཡང་དཔལ་སྤྲུལ་སེམས་དཔའ་ཆེན་པོ་ཨོ་རྒྱན་འཇིགས་མེད་ཆོས་ཀྱི་དབང་པོ་ལས་ཀློང་སྙིང་སྔོན་འགྲོ་ཁྲིད་ཡིག་ཀུན་བཟང་བླ་མའི་ཞལ་ལུང་ཉེ་བརྒྱུད་གསན་ཚུལ་སོགས་རྣམ་ཐར་ཞལ་གསུང་དུའང་གསལ་བ་ལྟར་རོ། །གསུམ་པ་ཞར་བྱུང་ཟབ་མོ་གཏེར་གྱི་བཀའ་བབས་བཞུགས་ཚུལ་ས་བོན་ཙམ་སྨོས་ན། སྤྱིར་རྗེ་བླ་མ་མཆོག་འདིའི་རྣམ་ཐར་མཛད་སྤྱོད་ཐམས་ཅད་ཀུན་གཟིགས་མཁྱེན་བརྩེའི་དབང་པོ་དང་རྣམ་དབྱེར་མེད་པ་ཀུན་ལ་ཐུན་མོང་དུ་གྱུར་པ་བཞིན། རྗེ་མཁྱེན་བརྩེའི་ཐུན་མིན་གྱི་གསང་མཛོད་མཐའ་དག་ལ་དབང་བསྒྱུར་བར་སོམ་ཉི་དང་བྲལ་ཡང་བསྟན་འགྲོའི་བསོད་ནམས་ཀྱི་སྐལ་པས་ཕོངས་པས་དེ་རིགས་བཏང་སྙོམས་སུ་བཞག་ནས་རྒྱ་ཆེར་སྣང་བར་མ་མཛད་མོད། འོན་ཀྱང་ཕྱོགས་ཙམ་མཚོན་བྱེད་གསང་བ་ཟབ་མོའི་ཆ་ཤས་འགའ་ཞིག་མཐོང་ཐོས་སུ་གྱུར་པ་ནི། སྤྱིར་ཤོག་སེར་གྱི་རིགས་ལ་གཟིགས་པ་ཙམ་གྱིས་དེར་བསྟན་ཆོས་བཀའ་གང་བཞུགས་ཐུགས་ལ་གསལ་བ་དང༌། བརྡ་བསྒྱུར་རྒྱས་འབྲིང་བསྡུས་གསུམ་གྱི་བབས་ཚུལ། རྟེན་འབྲེལ་གྱི་གནད་གསང་སོགས་ཐོགས་མེད་དུ་མཁྱེན་པས་ཟབ་གཏེར་གྱི་མངའ་བདག་ཆེན་པོར་ངེས་ཤིང༌། གནས་ཁྱད་པར་ཅན་དུ་ཕེབས་པའམ། ཐོལ་བྱུང་གིས་རི་བྲག་མཚོ་སོགས་ལ་ཟབ་གཏེར་གང་ཡོད་གཟིགས་པ་དང༌། གཏེར་རྟགས་ངོས་འཛིན་མང་དུ་མཛད། རྗེ་ཉིད་ཀྱི་སྐུའི་གཅུང་སྤྲུལ་སྐུ་འཆི་མེད་ལ་རྨེ་ཤོད་མུ་ནང་རྡོ་རྗེ་བྲག་དམར་གྱི་གནས་ནས་གཏེར་འདོན་དགོས་པའི་ཁ་བྱང་བསྩལ་བ་དང༌། གུས་པ་ལའང་རྫོང་སར་བརྒྱབ་རི་བཀྲ་ཤིས་དིལ་ལྷག་ཏུ་གཏེར་འདོན་རྒྱུ་ཡོད་པའི་ཁ་བྱང་བསྩལ་བ་དང༌། གོ་འཇོའི་ཕྱོགས་སུ་མཁའ་འགྲོའི་རིགས་ཅན་བུ་མོ་གཅིག་ལ་བརྡ་ཡིག་ཤོག་ལྡེབ་མང་པོ་བྲི་རྒྱུ་ཡོད་པ་ཕྲན་ལ་ལྡེབ་ཁ་ཤས་བྱིན་པ་ཁྱོད་ལ་སྤྲོད་དགོས་འདྲ་ཡང་མེད་པ་བྱེད་ཚར་སོང་ཞེས་གསུངས་པ་དང༌། གཏེར་སྟོན་བསོད་རྒྱལ་ཡིན་སྙམ་གྱིས་གཏེར་ཤོག་གླེགས་བམ་གཅིག་གནང་བྱུང་བ་ཁྱོད་ལ་འབེབས་རྒྱུའི་གསལ་སྣང་བྱུང་ན་སྤྲད་ཆོག་གསུངས་ཀྱང༌། སླད་ནས་རང་གིས་ཞུ་བསྐུལ་མ་བྱུང་ལ་རྗེ་བླ་མས་ཀྱང་རྗེས་ནས་གང་ཡང་མ་གསུངས། དེ་ཙམ་ལས་ཐུན་མོང་གདུལ་བྱའི་སྣང་ངོར་དམིགས་བསལ་དུ་དངོས་གཏེར་བཞེས་ཚུལ་མ་གནང་ཞིང༌། དག་སྣང་དང་དགོངས་གཏེར་གྱི་རིགས་བསམ་གྱིས་མི་ཁྱབ་པར་བཞུགས་པ་ལས། མེ་སྤྲེལ་ནག་ཟླའི་ཚེས་ཉེར་དྲུག་ལ་བྲག་དམར་མགྲིན་བཟང་དུ་ཐུགས་ཆེན་སེམས་ཉིད་ངལ་གསོའི་ཚོགས་ཕུལ་སྐབས། མཁྱེན་བརྩེ་རིན་པོ་ཆེའི་སྐུའི་གསལ་སྣང་ལ་སེམས་ཉིད་ངལ་གསོའི་དཀྱིལ་འཁོར་སྤྲུལ་ནས་སྟ་གོན་སྐྱེ་མཆེད་བྱིན་རླབས་ཡོད་པ། དངོས་གཞི་ཕྱི་ནང་གི་འཇུག་པ། རིག་དབང༌། བུམ་དབང༌། གསང་དབང་ལ་ཡུམ་བཞི་དང་སྦྱོར་བ། ཤེར་དབང༌། བཞི་པའི་དབང༌། གཏོར་དབང་བཅས་ཡུད་ཙམ་གྱིས་ཐོབ་པའི་སྣང་ཉམས་ཟ་ཟི་བྱུང་ཡང་ཞག་ཤས་བར་ཐོ་རྒྱབ་རྒྱུ་མ་བྱུང་བས་གསལ་པོར་མ་དྲན། ཞེས་རྗེ་མཁྱེན་བརྩེའི་ས་གཏེར་གཙོ་བོ་ཐུགས་ཆེན་སེམས་ཉིད་ངལ་གསོའི་ལས་བྱང་གི་ལུང་ཙམ་ལས་མི་བཞུགས་པར་རྗེ་བླ་མས་སྨིན་བྱེད་ཀྱི་རྒྱུན་ཉེ་བརྒྱུད་དུ་གསན་པར་མཛད་ནའང་བདག་ཅག་གི་སྐལ་བར་མ་གྱུར་པས་ཆེས་ཤིན་ཏུ་ཕོངས་ཤིང་འགྱོད་པའི་གནས་སོ། །ཀཿཐོག་མཁན་ཚུལ་ཁྲིམས་ཉི་མས་ཆེད་དུ་ནང་ཞུས་ངོར་གནང་བའི་གུ་རུའི་བླ་སྒྲུབ་རྩ་གསུམ་སྤྱི་དྲིལ་ཅན་དབང་དང་བཅས་པ་འདི་ནི་སྐུ་གོང་མའི་རྡོ་རྗེའི་དོ་ཧ་སྐོར་གྱི་ཐོག་མ་དེར། ནང་རྡོ་རྗེའི་ཕུང་ཁམས་ལ་བརྟེན་ནས་རྩ་བ་གསུམ་སྒྲུབ་ཚུལ་ཚིགས་བཅད་དེའི་སྒྲུབ་ཐབས་ཡིན་པར་གསུངས་ཤིང༌། མཛད་བྱང་དུའང་རྩ་གསུམ་ཀུན་འདུས་ཨོ་རྒྱན་རྡོ་རྗེ་འཆང་གི་རྣམ་ཐར་རྗེས་སུ་དྲན་པའི་དད་མོས་ཀྱི་གསོས་ཙམ་དུ་བླ་སྒྲུབ་འོད་གསལ་སྙིང་ཐིག་ཏུ་གྲགས་པ་འདིའང་མཁས་གྲུབ་རྒྱ་མཚོའི་སྤྱི་རྗེ་པདྨ་འོད་གསལ་མདོ་སྔགས་གླིང་པའི་བྱིན་རླབས་ཀྱི་སྣང་བ་ལས་རང་ཤར་བའི་ཚུལ་གྱིས་རྗེ་དེ་ཉིད་ཀྱི་ཕྲིན་ལས་ཀྱི་བྱེད་པོར་སྨོན་པ་འཇམ་དབྱངས་ཆོས་ཀྱི་བློ་གྲོས་སམ་རིག་འཛིན་ཀུན་བཟང་འོད་གསལ་སྙིང་པོ་རྩལ་གྱིས་སོགས་འགོད་པར་མཛད། ཕྱག་དཔེའི་ཁྲོད་དུ་འཇམ་དཔལ་བཤེས་གཉེན་གྱི་སྙིང་ཐིག་སྒྲོན་མ་བདུན་པའི་ཆོས་སྐོར་ཡིན་སྙམ་འཇམ་དཔལ་གྱི་རྒྱུད་ཕབ་འཕྲོ་བཞུགས་པ་མཇུག་སྐྱོང་བའི་ཕབ་བྱང་དུ། །ཅེས་འཇམ་དཔལ་ཡེ་ཤེས་སྙིང་པོའི་རྒྱུད་ལེའུ་ལྔ་པ་འདི་པདྨ་འོད་གསལ་མདོ་སྔགས་གླིང་པའི་དགོངས་པའི་གཏེར་ལ་བྱུང་བ་འབེབས་འཕྲོ་ལུས་པའི་དཔེ་ཉིད་ནམ་མཇལ་རེས་བྲི་རྒྱུ་ཡོད་སྙམ་ངང་ལེ་ལོའི་གཞན་དབང་དུ་གྱུར་པ་ས་གླང་སྣྲོན་ཟླའི་ཚེས༢༦་ལ་དཔེ་མཐོང་བ་ན་རང་སློབ་དད་ལྡན་བློ་གྲོས་མཆོག་ལྡན་གྱིས་བྲི་བར་བསྐུལ་ངོར་ཟླ་བ་དེའི་ཚེས༢༧་ལ་རིག་གསང་ནས་ཐོན་པ་བཞིན་ཡི་གེར་བཀོད་པ་ངེས་དོན་འཇམ་དཔལ་རྫོགས་པ་ཆེན་པོའི་བསྟན་པ་དར་ཞིང་རྒྱས་པའི་རྟེན་འབྲེལ་མཆོག་ཏུ་གྱུར་ཅིག མངྒ་ལཾ། ཤུ་བྷཾ། དེ་བཞིན་དུ་རྒྱུད་དང་སྒྲུབ་ཐབས་དབང་བཅས་མཐར་དབྱུང་བའི་རིགས་དང༌། ཡར་གཏེར་མཁའ་འགྲོ་གསང་འདུས་ཀྱི་བདུད་རྩིའི་རྟོགས་བརྗོད། སྙན་བརྒྱུད་དམ་པའི་བླ་སྒྲུབ་ཀྱི་དབང་ཆོག །སྙན་བརྒྱུད་རྟ་མགྲིན་གྱི་རྟ་སྐད་ཐེངས་གསུམ་གྱི་དགོངས་པ་རྡོ་རྗེའི་ཚིག་རྐང༌། གནས་ལྔ་རིག་པ་མཁན་རྣམ་བཟང་ནས་ཞུས་ངོར་སྙན་བརྒྱུད་ཡང་དག་ཟབ་ཏིག་གི་གར་དང༌། སྙན་བརྒྱུད་ཕུར་པའི་བསྒྲལ་འཆམ་དང་རྩ་ཚིག་སོགས། མཆོད་གར་མདོར་བསྡུས་བཅས། སྙན་བརྒྱུད་ཡང་ཕུར་སྦྲགས་མའི་རྫོགས་རིམ་ཁྱད་འཕགས་གུས་ལ་བསྩལ་བ། རྗེ་གོང་མའི་དག་སྣང་འཇའ་ལུས་རྡོ་རྗེའི་སྲོག་སྒྲུབ་ཀྱི་ཁོངས་སུ་གཏོགས་པ་གྲུབ་པའི་རྒྱལ་མོའི་ཚེ་སྒྲུབ་བཅས། ཁྱད་པར་དུ་རྗེ་གོང་མར་བཀའ་བབས་ཀྱི་གསང་བ་ཟབ་མོ་ཀུན་ལས་ངོ་མཚར་བ་དང་ཆེ་བ་དུ་མས་འཕགས་པ་རྒྱལ་པོ་ཨིནྡྲ་བྷཱུ་ཏིའམ་བྲམ་ཟེ་ཆེན་པོ་མདའ་བསྣུན་དངོས་ལས་རྡོ་རྗེ་ཐེག་པའི་ཐབས་ལམ་ཟབ་མོ་བཞི་ཚན་བཞི་བཅུ་ཅན་གསན་ཏེ་བཀའ་བབ་པར་གསུངས་པའི་ལོ་རྒྱུས་ཙམ་ལས་ཆོས་ཚན་གཏན་ལ་ཕབ་མ་གྲུབ་པ། རྗེ་བླ་མས་དེའི་དུམ་བུ་ཞིག་སྣང་བར་མཛད་པའི་ཕབ་བྱང་དུ། ཨེ་མ་ཤིན་ཏུ་གསང་བ་ཡི། །རྒྱ་ཆེའི་དུམ་བུ་བཞི་བཅུ་པ། །མདའ་བསྣུན་བདག་གི་གསང་བའི་ཚིག །སྤྲུལ་པའི་རིག་འཛིན་ལ་གཏད་པ། །མངོན་དུ་སྣང་བའི་སྐལ་མེད་ཀྱང༌། །དུམ་བུ་གཅིག་གི་བྱེ་བྲག་ནི། །ཡེ་ཤེས་རྡོ་རྗེའི་སྙིང་ལ་སྣང༌། །འདི་ཡི་ས་བོན་རབ་འཕྲོས་པས། །རིག་འཛིན་གྲུབ་པར་མངོན་སྣང་འགྱུར། ས་མ་ཡ། རྒྱ་རྒྱ་རྒྱ། །ཞེས་པའང་ཁོ་བོ་པདྨ་ཡེ་ཤེས་རྡོ་རྗེ་འཆི་མེད་འཕགས་མའི་བསྙེན་སྒྲུབ་ཀྱི་སྐབས་ཆུ་སྦྲུལ་དབོ་ཟླའི་ཚེས༨་ལ་རིག་ངོར་སྣང་བ་དང༌། མདའ་བསྣུན་པའི་སྐུ་འལ་འོལ་མཇལ་བ་དང་བྲིས་པའོ། །ཞེས་སྣང་བར་མཛད་པ་ཆེས་ཤིན་ཏུ་ངོ་མཚར་བའི་གནས་སུ་ངེས་ཤིང༌། འདི་རིགས་ཀྱང་རང་བཞིན་རྟེན་འབྲེལ་ཤུགས་འབྱུང་ལྟ་བུར་སྣང་བར་མཛད་པ་སྟེ། གཞན་དུ་ན་རྗེ་གོང་མའི་ཟབ་གཏེར་ཕབ་འཕྲོ་ཐམས་ཅད་མཇུག་སྐྱོང་གནང་ཆོག་ཡོད་ངེས་ཀྱང༌། དེ་འདྲའི་འཕྲོས་ཞུས་ཚེ་གདུལ་བྱའི་གང་ཟག་གིས་ཉམས་སུ་ལེན་ནུས་ན་འཇམ་མགོན་མཁྱེན་བརྩེ་རིན་པོ་ཆེའི་གཏེར་ཁ་ཆོས་ཚན་རེ་རེ་ཡང་བསྐྱེད་རྫོགས་ལས་ཚོགས་དང་བཅས་པ་ཁ་ཚང་དོན་འདྲིལ་ཤ་སྟག་མི་ཚེ་གཅིག་གི་ཉམས་ལེན་ཚང་བར་ཡོད། བདག་འདྲའི་རྣམ་རྟོག་ཡིག་གཟུགས་སུ་བྲིས་ཀྱང་ཕན་གནོད་གང་བྱེད་མི་ཤེས་གསུངས་ཏེ་ཆེད་གཉེར་བྲི་སྤེལ་མི་མཛད་པར་འདུག །སྔར་དུས་སྐུ་མདུན་དུ་རྡོ་ལྟ་བུ་མདོག་ལྗང་ཁྲ་ནོར་བུའི་དབྱིབས་ཅན་ཞིག་འདུག་པ་བླ་མ་རིན་འབྱུང་གི་སྐུ་ཞིག་གི་གཟུངས་སུ་ཕུལ་མཛད་པ་དེ་མཁྱེན་བརྩེའི་གཏེར་མ་གནོད་སྦྱིན་གངས་བཟང་གི་བླ་རྡོ་སྡེ་དགེ་ལྷུན་གྲུབ་སྟེང་དུ་བླ་མ་ནོར་ལྷའི་སྐུའི་ནང་རྟེན་དུ་གནང་བ་ཕྱིས་སྐུ་རྟེན་ཉམས་ཆག་སོང་བས་བླ་རྡོ་དེ་ཡིན་སྙམ་རང་གི་ལག་ཏུ་སོན་པ་ཡིན་གསུངས། སྐུ་གོང་མར་གཉན་ཆེན་ཐང་ལྷས་ཕུལ་བའི་གུ་རུའི་ཚེམས་ལས་སྤྲུལ་པའི་རིང་བསྲེལ་མཁྱེན་བརྩེ་སྐུ་གཤེགས་པའི་སྔ་ལོ་ནས་གཏེར་སྲུང་གིས་བདག་བྱས་པ་རེད་ཅེས་མེད་སོང་ཚུལ་རྣམ་ཐར་དུ་འཇམ་མགོན་རིན་པོ་ཆེས་གསུངས་པ། རྗེ་བླ་མས་རྫོང་སར་ནས་རྟེན་བྱིན་མང་ཞིག་བསྡུ་མཛད་སྐབས་སྒྲོམ་དེ་ཕྱག་ཁར་བསྣམས་ནས་གུས་ལ་ཞལ་རྩེད་ཚུལ་དུ་འདི་ཕྲན་གྱི་གཏེར་མ་རེད་ཅེས་གསུངས་ཤིང༌། ཞུ་མཁན་སུ་བྱུང་ལ་གནང་ཡང་རྫོགས་རྒྱུ་མེད་པ་དེ་སླར་གཏེར་སྲུང་གིས་ཕུལ་བར་ངེས་པས་མཚོན། རྗེ་གོང་མའི་ཟབ་གཏེར་ཆོས་དང་རྫས་ལ་རྫོགས་པར་དབང་བསྒྱུར་ངེས་པ་སོམ་ཉི་དང་བྲལ་བར་རྟོགས་ནུས་སོ། །མདོ་མཁྱེན་བརྩེ་ཡེ་ཤེས་རྡོ་རྗེས་བྱིན་གྱིས་བརླབས་པའི་བཀའ་བབས་ཁྱད་འཕགས་བཞུགས་པའང་རྗེ་ཉིད་ཀྱི་བླ་སྒྲུབ་སྙིང་ཐིག་གསལ་སྒྲོན་དེ་ཚིག་རིས་སོགས་གང་ཅིར་དགོངས་གཏེར་དུ་ངེས་སྙམ་ཐབས་མཁས་ཀྱི་ཞུ་བསྐུལ་ལྟ་བུས་འདི་མཁྱེན་བརྩེ་ཡེ་ཤེས་རྡོ་རྗེའི་བླ་སྒྲུབ་བྱས་ན་རུང་ངམ་ཞུས་པས། རྒྱུ་མཚན་ཅིའི་ཕྱིར་གསུངས། སྐུ་ཧེ་རུ་ཀའི་ཆས་དང་མཚན་ཡེ་ཤེས་རྡོ་རྗེ་ཞེས་གཅིག་ཏུ་འདུག་ལགས་ན་ཞུས་པས། ངོས་ལ་པདྨ་སྙིང་ཐིག་ཅེས་པའི་ཆོས་ཚན་མང་ཙམ་མདོ་མཁྱེན་བརྩེ་ཡེ་ཤེས་རྡོ་རྗེས་བྱིན་གྱིས་བརླབས་ཏེ་ཡིད་ངོར་གསལ་བ། དེ་སྐབས་བླ་སྒྲུབ་འདི་ཞུ་མཁན་བྱུང་བས་བྲིས་པ་མདོ་མཁྱེན་བརྩེའི་བླ་སྒྲུབ་ཕྲན་ལ་ཁ་བསྒྱུར་བ་འདྲ་ཞིག་རེད་གསུངས། དེས་ན་བླ་སྒྲུབ་དགོངས་གཏེར་དུ་ངེས་ཞིང་སྨིན་བྱེད་ཚོགས་མཆོད་ཟིན་བྲིས་སོགས་བཞུགས་ལ། རྗེ་བླ་མའི་གསང་མཚན་པདྨ་ཡེ་ཤེས་རྡོ་རྗེ་ཞེས་རྡོ་གྲུབ་ཐམས་ཅད་མཁྱེན་པ་ལས་ཀློང་སྙིང་རིག་འདུས་ཀྱི་དབང་གསན་སྐབས་མཚན་དུ་བྱུང་ཞེས་རྟེན་འབྲེལ་དགོས་པ་ཆེན་པོའི་གནས་སུ་མཛད་པ་དང༌། མདོ་མཁྱེན་བརྩེའི་ཆོས་སྐོར་གཅོད་འཛིན་པ་རང་གྲོལ་ཙམ་ལས་གཞན་ཕལ་ཆེར་ཚིག་བརྒྱུད་མི་འདུག་ཀྱང་དོན་བརྒྱུད་ལྟ་བུ་སྔར་མདོ་རིན་པོ་ཆེ་ལས་ཆོས་སྐོར་ཚང་བའི་གཏད་རྒྱ་ཞིག་གསན་པ་ཡིན་གསུངས། ཕྱིས་སུ་རྗེའི་མནལ་ལམ་དུ་རྒྱམ་རྡོ་ཐི་ཡིན་རྒྱུའི་ལུང་པ་ཕུ་གངས་རི་གཤམ་དུ་མཚོ། དེའི་གཞུག་ཆུ་ཆེན་པོ་འབབ་ཅིང་ཁ་ལྷོར་བལྟ་བ་ཞིག་གི་མདའ་ནས་སྟོན་འཁོར་ཁ་ཤས་ཆིབས་ཐོག་ནས་གྱེན་དུ་ཕེབས་པ་ན། སྔགས་པ་རལ་པ་ནག་ཉི་ལེ་བ། གླེགས་བམ་མང་པོ་བསྣམས་པ་ཞིག་མར་ཕེབས་བྱུང་བ་དེ་ཉིད་མདོ་མཁྱེན་བརྩེ་ཡེ་ཤེས་རྡོ་རྗེ་རེད་འདུག་པས་རྗེ་བླ་མ་ཉིད་ལ་གཏད་རྒྱ་དབང་བསྐུར་མཛད་དེ་གླེགས་བམ་རྣམས་གནང་བ། རྗེའི་གཡོན་ཕྱོགས་དེར་གུས་པ་བསྡད་འདུག་པ་ལ་གཏད་པ་རྨིས་གསུངས་པས་གུས་སྐལ་པ་བཟང་བས་དེ་བཞིན་བྱིན་རླབས་དགོངས་གཏད་གནང་གྲུབ་ཞུས་པར་ཞལ་བཞེས་ཀྱི་དབུགས་དབྱུང་ཐོབ་པ་དང༌། གཅོད་འཛིན་པ་རང་གྲོལ་གྱི་ཁྲིད་ཡིག་རྣམ་གསུམ་གྱི་སྒོ་ནས་ཀྱང་དགོངས་པའི་གཏད་རྒྱ་བྱིན་རླབས་རྫོགས་པར་ཐོབ་པའི་སྐལ་པ་བཟང་པོར་གྱུར། གཞན་འདི་སྐོར་ཆོས་བཀའ་རིགས་གཏན་ལ་ཕབ་པ་དང་གཞན་ལ་སྤེལ་བ་སོགས་བཞུགས་མིན་ཞིབ་ཏུ་མ་ངེས། གཞན་ཡང་གུས་ནས་ཆེད་དུ་རྗེ་བླ་མ་ཉིད་ཀྱི་གཏེར་བྱོན་གུ་རུའི་བླ་སྒྲུབ་ཀྱི་དབང་ལུང་གནང་གྲུབ་ཞུས་པ་ལྟར་བཀའ་དྲིན་བསྩལ་སྐབས་དབང་བཤད་དུ། ཀུན་གཟིགས་སི་ཏུ་རྡོ་རྗེ་འཆང་དགོངས་པ་ཆོས་དབྱིངས་སུ་ཐིམ་པ་ལ་ཐུགས་མྱ་ངན་གྱིས་ནོན་ཏེ་གསོལ་བ་ཡང་ཡང་བཏབ་པའི་བྱིན་རླབས་ལས་བྱུང་བའི་བླ་མ་སྒྲུབ་པའི་སྐོར་ཞེས་ཕེབས་པར་མཛད་པས། དེ་ཉིད་ཀྱི་འདས་རྗེས་ཚུལ་དུ་བཀའ་བབས་པའི་གུ་རུ་རིན་པོ་ཆེ་རིགས་གསུམ་སེམས་དཔའ་དང་འབྲེལ་བའི་བླ་སྒྲུབ་སྨིན་བྱེད་ཁྲིད་བཅས་བཞུགས། གཏེར་སྟོན་དྲི་མེད་འོད་ཟེར་རམ་པདྨ་གླིང་པ་དགོངས་པ་རྫོགས་སྐབས་གདུང་མཆོད་དང་ཞུགས་འབུལ་སོགས་གནང་སྐབས་གཏེར་སྟོན་ཟངས་མདོག་དཔལ་རིར་ཕེབས་པའི་གཟིགས་སྣང་དང་འབྲེལ་འདས་རྗེས་རྩ་བ་རྡོ་རྗེ་ཚིག་རྐང་དང༌། དེ་ལས་འཕྲོས་པའི་བླ་སྒྲུབ་དབང་དང་བཅས་གཏེར་སྲས་བདེ་ཆེན་རྣམ་རྒྱལ་སྐུ་མཆེད་ལ་སྨིན་གྲོལ་ཕྱག་བྲིས་བཅས་བསྩལ་བའང་བཞུགས། ཤ་ཝ་རི་དང་ཚར་ཆེན་བླ་སྒྲུབ་སྐོར་གོང་དུ་གསལ་ཞིང༌། གུ་རུའི་ཐུགས་སྒྲུབ་རྒྱས་ཙམ་ཞིག་དང༌། ས་ར་ཧའི་བླ་སྒྲུབ། ཆོས་རྗེ་ས་པཎ་གྱི་བླ་སྒྲུབ་ཕྱི་ནང་གསང་བ་བཅས་བཞུགས། སོ་སོའི་ལོ་རྒྱུས་དམིགས་བསལ་མ་ངེས། རྫོགས་ཆེན་མཆོག་སྤྲུལ་དྲུག་པའི་ཐུགས་དམ་རྟེན་ཁྱེའུ་རིག་འཛིན་ཆེན་པོའི་གཏེར་ཁ་གུ་རུའི་སྐུ་ཚབ་གདན་མེད་མ་ཞེས་པའི་སྐུ་ལས་གསལ་བའི་བརྡ་རིས་ཕབ་པ་གུ་རུ་དྲག་པོའི་སྒྲུབ་སྐོར་གུས་པར་བསྩལ་བ་དང༌། སྒྲུབ་ཐབས་སྨིན་བྱེད་ལས་སྦྱོར་བཅས། འཁྲུལ་ཞིག་དཔའ་བོ་རྡོ་རྗེའི་ཞུ་བསྐུལ་གྱི་རྐྱེན་ལས་བལ་ཡུལ་མཆོད་རྟེན་བྱ་རུང་ཁ་ཤོར་གྱི་དྲུང་ནས་ཡི་གེར་སྣང་བར་མཛད་པ་སེང་གདོང་མའི་སྒྲུབ་སྐོར་དབང་དང༌། རྫོགས་རིམ་ལས་ཚོགས་སོགས་ཆ་ཚང་བར་བཞུགས་པ། བཀའ་གཏེར་སེང་གདོང་རིགས་རྣམས་ཀྱི་བྱིན་རླབས་གཅིག་ཏུ་དྲིལ་ཞིང་ཁྱད་པར་བི་མ་ལའི་སྙན་བརྒྱུད་གསུངས་པ་ལ་དཔགས་ན་རྩ་བའི་ལོ་རྒྱུས་དམིགས་བསལ་བཞུགས་ཚོད་ཀྱང་ཕྱག་བྲིས་འཁོད་པ་མ་མཇལ། ཞར་བྱུང་ལྟ་བུར་ས་ཁྱི་ཟླ༤་ཚེས༣་ལ་རྡོ་རྗེ་གླིང་དུ་སོང༌། རྒྱལ་པོ་ཀོ་ཊི་མེ་ཤུལ་ཅན་དུ་སྡོད་པའི་ཚེས་ལྔའི་ནུབ་རྨི་ལམ་དུ། རི་སྒང་ཞིག་ཏུ་དགོན་པ་གཅིག་ཡོད་པའི་ཞབས་ཕྱོགས་ལམ་བརྒྱུད་སོང་བས། གྲྭ་ཁང་ཞིག་གི་ནང་དཔལ་སྤུངས་སྐུ་ཞབས་སི་ཏུ་གོང་མ་རེད་ཟེར་བའི་དཔོན་སློབ་མང་པོའི་ཞིག་གིས་མངོན་རྟོགས་ཚིག་ལྷུག་ཅན་མང་པོ་གསུངས་པ་ཐོས། དར་ཅིག་ནས་རང་ཡང་ཚོགས་གྲལ་དེར་སླེབས། ཁོང་རྣམས་སེང་གདོང་དཀར་མོའི་སྒྲུབ་མཆོད་གསུངས་པ་ཡིན་ཟེར། སྐུ་ཞབས་རིན་པོ་ཆེ་དངོས་ནི་མིན་པ་འདྲ། ཡིན་རྒྱུའི་བླ་མ་ལོ་ཉུང་ཅན་གཅིག་འདུག །སེང་གདོང་དབང་ཐོབ་དགོས་སྙམ་ཞུས་པས་དབང་ཆུང་ངུ་ཞིག་གནང་སོང་བ་སྔར་ངེད་རང་གིས་བྲིས་པའི་སེང་གདོང་དེའི་སྐོར་ལས་འཕྲོས་པ་ཞིག་རེད་འདུག་སྙམ། འདི་ལ་དཀྱིལ་ཆོག་དང་སྒྲུབ་ཐབས་དབང་ཆེན་ཞིག་ཡོད་རྒྱུར་སྒྲུབ་ཐབས་ཕྲིན་ལས་དེ་ལ་དངོས་གྲུབ་རྒྱ་མཚོ་ཟེར་དགོས་བསམ། སེང་གདོང་དབང་དང་འབྲེལ་བའི་སྒྲུབ་ཕྲིན་ཆེ་བ་དེ་ལ་འཁོར་དབྱིངས་ཕྱུག་ཁྲོ་མོ་རྣམ་དགུ་སོགས་ཀྱང་ཡོད་པ་དེ་འདྲ་ཞིག་གི་ངང་གཉིད་སད། ཡང་མནལ་བ་ན་སྔར་གྱི་འཕྲོས་དེ་རྨིས་ནས་རྒྱ་གར་ལྷོ་ནུབ་དུར་ཁྲོད་རྔམས་པ་སྒྲ་སྒྲོགས་ཤིང་སེ་བའི་ཕུང་པོའི་རྩར་སེང་གདོང་མའི་སྒྲུབ་སྐོར་གཏེར་དུ་ཡོད་པ་དེ་ཉིད་འདོན་དགོས་ཟེར་བ་བྱུང༌། རྒྱས་པར་བརྗེད་ནས་ཐལ། །ཞེས་གསུངས། གཞན་ཡང་དཔལ་མགོན་ཞལ་བཞི་པ་དང༌། སྙིང་ཐིག་མ་བུའི་བཀའ་སྲུང་གཡུ་སྒྲོན་མ་བཅས་ཀྱི་རྗེས་གནང་ཡི་གེ །ལྷ་མོའི་རྒྱུན་བཟླས་དང་ཞིང་སྐྱོང་གི་རྒྱུན་བསྙེན་སོགས་ཐོལ་བྱུང་དུ་གསུངས་པའི་རྡོ་རྗེ་ཚིག་རྐང་རིགས་དང༌། རྫོགས་རིམ་སྐོར་སོགས་ཕྱོགས་འདིར་གཏོགས་པ་ཕྲན་ཚེག་མང་ཙམ་བཞུགས། དེར་མ་ཟད་གཏེར་སྟོན་རིགས་གཞན་ལའང་མཐུན་སྦྱོར་གནང་ཚུལ་ནི། ཀུན་གཟིགས་མཁྱེན་བརྩེའི་དབང་པོ་ཉིད་གཏེར་སྟོན་རྒྱལ་པོ་ལྔའི་ཡ་གྱལ་དུ་གྱུར་པས་དུས་སྐབས་དེར་བྱོན་པའི་གཏེར་སྟོན་ཆེ་ཕྲ་ཀུན་གྱིས་ཞབས་པད་ལ་བཏུད་ནས། སོ་སོར་བཀའ་སློབ་དང་མཐུན་སྦྱོར་གྱིས་དབུ་འདོན་གནང་བ་དང་མཐུན་པར། རྗེ་བླ་མ་འདིས་ཀྱང་གཏེར་སྟོན་དྲི་མེད་པདྨ་གླིང་པའི་སྲས་བདེ་ཆེན་རྣམ་རྒྱལ་ཟབ་གཏེར་བྱུང་ཚུལ་བཀའ་སློབ་ཞུས་པར་གཏེར་སྟོན་ཚད་ལྡན་ཡིན་པའི་ངེས་རྙེད་དང༌། ད་ལྟའི་སྐབས་འདིར་ཟབ་གཏེར་གྱི་སྟོན་པ་ཞིག་ལ་ལས་རབ་གླིང་པ་འདི་ལས་ལྷག་མི་འདུག་པས་དེའི་མདུན་ཕེབས་ན་སྨོན་ལམ་ལས་འཕྲོ་གཅིག་པར་འདུག་པས་ལེགས་ཞེས་ཕེབས་པ་ལྟར་དྭངས་ལེན་ཞུས་པས་ཆོས་ནོར་རྫས་ཀྱི་གཏེར་ཁ་རྒྱ་ཆེར་ཕྱག་ཏུ་སོན་ཅིང་ཐོག་མའི་རྟེན་འབྲེལ་ལེགས་ཚོགས་སུ་གྱུར། འབྲི་གཏེར་འོད་གསལ་རྡོ་རྗེ་ལ་སྐུ་ཚེའི་བར་ཆད་སེལ་བའི་ཞབས་བརྟན་བསྒྲུབ་པར་བཀས་གནང་ཞིང་ཟབ་གཏེར་གྱི་སྨིན་གྲོལ་གསན་པ་དང༌། ཆོས་སྐོར་འབེབས་ཐབས་མཐུན་སྦྱོར་བཀའ་བསླབ་སོགས་གནང་ཞིང་རྟེན་འབྲེལ་ལེགས་ཚོགས་སུ་གྱུར་པས་གཏེར་སྟོན་གྱི་ཆོས་དང་ཕྲིན་ལས་འཕེལ་བའི་བདག་རྐྱེན་བཀའ་དྲིན་ཆེས་ཆེ་བར་གྱུར། ཞེ་ཆེན་རབ་འབྱམས་རིན་པོ་ཆེའི་སྐུ་མཆེད་གཏེར་སྟོན་སྤྲུལ་སྐུ་དོན་ཁོ་ལའང་དེ་བཞིན་མཐུན་སྦྱོར་དང༌། ཁྱད་པར་ཐུགས་སྒྲུབ་ཡིད་བཞིན་ནོར་བུའི་དབང་དང་འབྲེལ་བར་སྐུ་ཚབ་དངོས་གྲུབ་དཔལ་འབར་གྱི་བྱིན་རླབས་མཛད། རྗེ་བླ་མར་སྔ་ཕྱིར་སྐྱབས་ཞུས་སོགས་ལན་མང་དང༌། བརྟན་བཞུགས་ཕུལ་སྐབས་གཏེར་སྟོན་ནས་རྗེ་བླ་མ་དང་སྐུ་ཚབ་དབྱེར་མེད་པ་གུ་རུ་རིན་པོ་ཆེ་དངོས་སུ་ཡུན་རིང་མཇལ་བ་དང༌། དུས་འཁོར་གྱི་དབང་སྐབས་རྡོ་རྗེ་ཤུགས་བབས་པ་སོགས་བྱུང་ཞིང་རྫས་དང་ཆོས་གཏེར་མང་དག་ཕྱག་ཏུ་སོན། སྐུའི་གཅུང་སྤྲུལ་སྐུ་འཆི་མེད་ལའང་མཐུན་སྦྱོར་ཐུགས་བསྐྱེད་ཀྱི་མཐུ་ལས་གནས་གཏེར་རིགས་གསར་འབྱེད། དབང་ཆོས་འཆད་སྤེལ། མདོ་ཁམས་གནས་ཆེན་ཉེར་ལྔའི་བྱེ་བྲག་ཝརྟིའི་གནས་ཞལ་གསར་འབྱེད་དང༌། གནས་དེར་བཤད་སྒྲུབ་ཀྱི་སྡེ་འཛུགས་པ། བསྟན་འགྲོར་སྨན་པའི་ཕྲིན་ལས་རྣམ་བཞི་སོགས་ཆེས་ཆེར་འཕེལ་རྒྱས་སུ་གྱུར། བདུད་འཇོམས་མཆོག་སྤྲུལ་འཇིགས་བྲལ་ཡེ་ཤེས་རྡོ་རྗེར་ཟབ་གསང་ཐུན་མིན་གྱི་མངའ་བདག་ཆེན་པོར་ངེས་པའི་བདེན་ཚིག་ཞབས་བརྟན་ཆེད་འབུལ་གནང་བ་སོགས་རྟེན་འབྱུང་ལེགས་ཚོགས་ཁྱད་པར་འཕགས་པའི་བདག་རྐྱེན་དུ་གྱུར། གོ་འཇོ་ར་ཁྲིད་གཏེར་སྟོན་ནས་ཀྱང་ཆོས་སྐོར་གཟིགས་འབུལ་སྐབས་བསྟན་འགྲོའི་ཞབས་རིམ་བསྒྲུབ་དགོས་ཀྱི་བཀའ་བསླབ་དང་འབྲེལ་གཏེར་སྟོན་སྐུ་ཚེ་བརྟན་ཅིང་ཟབ་ཆོས་འཕེལ་རྒྱས་འབྱུང་བའི་སྨོན་ཚིག་ལྗགས་རྩོམ་ཕྱག་རྟགས་ཀྱིས་སྤྲས་པ་གནང༌། གཞན་ཡང་འདི་གྲས་ཆེ་ཕྲ་འགའ་རེ་ཡོད་པ་དང༌། རྒྱ་རོང་མཁའ་འགྲོ་ཞེས་རང་གྲོལ་གྱི་རྣལ་འབྱོར་མ་དང་རྗེ་བླ་མ་ལྷན་རྒྱས་པས་རྫོང་སར་དགོན་གྱི་ཕུ་རྒྱ་རྒན་ཁྱུང་སྟག་གནས་ཞལ་གསར་འབྱེད་དང་གནས་ཡིག་གཏན་ལ་འབེབས་སྐབས། གནས་དེའི་སྒྲུབ་ཕུག་ནས་ཛྷི་ཀྵིཾ་སྨུག་པོའི་ཕུར་པ་ཁྱད་འཕགས་གཏེར་དུ་བཞེས་ཤིང་དེ་ལ་ཕུར་པའི་ཆོས་སྐོར་ཉུང་ཙམ་མཁའ་འགྲོས་གཏན་ལ་ཕབ་འདུག །མཁའ་འགྲོ་འདིས་གནས་དེར་རྗེའི་ཞབས་བརྟན་ཚོགས་དང་མེ་མཆོད་ཡུན་རིང་གནང་སྐབས་རྗེ་བླ་མ་མཆོག་ཡེ་ཤེས་ཀྱི་སྐུ་ལ་དཔའ་བོ་མཁའ་འགྲོས་བསྐོར་བ་ཚོགས་ཀྱི་འདུ་བར་ཕེབས་པའི་དག་སྣང་ཡང་ཡང་བྱུང་ཚུལ་བཤད། གུ་རུས་རྗེས་བཟུང་ལས་འཕྲོའི་གཏེར་བརྒྱུད་ལ་དབང་བའི་གྲལ་དུ་མ་མཆིས་པ་སོ་སྐྱེ་འཆིང་བ་ཀུན་ལྡན་དུ་ངེས་པ་རང་བློ་རང་ལ་ལྐོག་ཏུ་མ་གྱུར་ཀྱང༌། རྗེ་བཙུན་བླ་མ་འཇམ་པའི་དབྱངས་སྐུ་གོང་འོག་གི་ཐུགས་རྗེ་བྱིན་རླབས་ཁོ་ནའི་མཐུ་ལ་བརྟེན་ནས། བླུན་རྨོངས་བདག་ལའང་དུས་དང་རྐྱེན་གྱིས་དགོངས་གཏེར་ལྟ་བུ་ཐར་ཐོར་ཤར་བ་བྲི་རྒྱུ་རེད་སོང་བ་རྣམས་རྒྱུ་མཚན་བཅས་གཟིགས་འབུལ་ཞུས་མ་ཐག་ཐུགས་ལ་ངེས་ཤེས་ཟབ་མོ་འདྲོངས་ཟིན་པའི་གསུང་གིས་འཇམ་དབྱངས་བླ་མ་མཁྱེན་བརྩེའི་དབང་པོའི་ཐུགས་ཀྱི་བྱིན་རླབས་འཕོས་པའི་རྟེན་འབྲེལ་ལས་བྱུང་བར་དབུགས་དབྱུང་བཅས་ཐམས་ཅད་གསན་བཞེས་གནང་བ་དང༌། ཤིང་སྤྲེལ་སྤྲེལ་ཟླའི་ཚེས་བཅུར་སྒྲུབ་གནས་ཀྱི་རྒྱལ་པོ་ཛཾ་ནང་པདྨ་ཤེལ་ཕུག་གི་མདུན་དུ་རྩ་གསུམ་ཚོགས་འབུམ་ཐེར། བོད་དུ་མཆིམས་ཕུ། ཁམས་སུ་ཛཾ་ནང་པདྨ་ཤེལ་ཕུག་གཉིས་གུ་རུ་རིན་པོ་ཆེའི་སྒྲུབ་གནས་ཀུན་གྱི་རྒྱལ་པོ་ཡིན་ཅིང༌། སྒྲུབ་ཕུག་འདིར་བཀའ་བརྒྱད་བདུན་བརྒྱ་ཉེར་ལྔ་རང་བྱོན་དུ་བཞུགས་པས་ལྷ་ཁང་བཞེངས་སྐབས་ཀ་བ་དང་གདུང་མས་རང་བྱོན་ལ་སྐྱོན་མ་ཕོག་པ་དགོས་ཞེས་ཐམས་ཅད་མཁྱེན་གཟིགས་མཉྫུའི་ཞབས་དངོས་ཀྱིས་ཀ་གདུང་བཞག་ཡུལ་ཕྱག་རྟགས་གནང་བ་ཡིན་ཚུལ་སོགས་རྒྱུ་མཚན་དུ་མ་དང་བཅས་སྒྲུབ་ཕུག་དངོས་སུ་བཀའ་འདུས་ཆོས་ཀྱི་རྒྱ་མཚོའི་ཚོགས་སྒྲུབ་བདུད་རྩི་སྨན་སྒྲུབ་བཅས། གཟིམས་སྤྱིལ་བཀྲ་ཤིས་འཆི་མེད་གྲུབ་པའི་དགའ་ཚལ་དུ་ཐུགས་སྒྲུབ་བར་ཆད་ཀུན་སེལ་དང༌། སྙན་བརྒྱུད་ཡང་དག་གི་བདུད་རྩིའི་སྒྲུབ་པ་དང་འབྲེལ་བའི་སྒྲུབ་ཆེན། མཁའ་འགྲོ་གསང་འདུས་ཀྱི་སྒྲུབ་མཆོད། ལན་མང་བདུད་རྩིའི་སྒྲུབ་པ་དང་འབྲེལ་བ། ཚོགས་འབུམ་སོགས་ལན་དུ་མའི་ཚོགས་གྲལ་དུ་རྗེ་བླ་མ་ཉིད་དཀྱིལ་འཁོར་གྱི་གཙོ་བོར་བཞུགས་པས་རྟེན་འབྲེལ་མཐུན་སྦྱོར་དབུགས་དབྱུང་མཛད། རིན་གཏེར་ཡོངས་རྫོགས་དང་རྩ་གསུམ་འོད་གསལ་སྙིང་ཐིག་སོགས་རྗེ་གོང་མའི་བཀའ་བབས་བདུན་གྱི་གསང་མཛོད་རྣམས་ཀྱི་དབང་ཁྲིད་ལུང་བཅས་བྱིན་རླབས་དགོངས་པའི་གཏད་རྒྱ་ཐུན་མིན་ཡང་ཡང་དུ་གནང་བའི་དམིགས་མེད་ཐུགས་རྗེ་ཆེན་པོའི་ཉེར་ལེན་ཁོ་ན་ལ་བརྟེན་ནས་ཀུན་གཟིགས་གོང་མའི་གསང་མཛོད་ཀྱི་ཆ་ཤས་འགའ་ཞིག་ཐོག་མར་རྗེ་བླ་མ་ཉིད་ཀྱི་གཟིགས་སྣང་དུ་བརྡ་རིས་གསལ་ཞིང་ཆོས་སྐོར་དེར་བཞུགས་ཀྱི་ཞལ་བཀོད་གནང་བ་ཐེ་ཚོམ་དོགས་སེལ་དང་ཡིད་ཆེས་ཀྱི་དཔང་པོར་བཀོད་ནས་གུས་ཕྲན་ནས་ཞབས་ཏོག་ཏུ་རློམས་ཏེ་ཕབ་སྤེལ་ཞུས་པའང་ཞར་བྱུང་ས་བོན་ཙམ་སྟེ། མདོར་ན་རང་གི་དད་མོས་ཤུགས་ཞན་པ་དང་རིག་རྩལ་བརྟུལ་ཞུགས་གཏད་མེད་དུ་སྐྱོང་མ་ནུས་པས་ནོངས་པ་ལས། རང་བས་སྐལ་པ་བཟང་ཙམ་ཡིན་ན་གཏེར་ཆེན་མཆོག་གླིང་དང་འཇམ་དབྱངས་བླ་མ་ཡབ་སྲས་ཞལ་རྒྱས་པ་ལྟ་བུར་འབྱུང་སྙམ་པའི་ངེས་ཤེས་འདྲོངས་ཤིང༌། སྤྱིར་འདི་དག་དབང་བཅུ་ཐོབ་པའི་བྱང་ཆུབ་སེམས་དཔས་ཕལ་པའི་ས་རྡོ་གསེར་དུ་བསྒྱུར་བ་དང་ཆོས་མཚུངས་པར་རིག་འཛིན་བླ་མ་མཆོག་གི་ཡེ་ཤེས་འདོད་དགུའི་རྩལ་གྱི་ཆེ་བས་བྱིན་གྱིས་བརླབས་པའི་ཚུལ་བཤད་པ་ལས། བདག་ལྟ་དགོངས་མཐོན་པོ་དང་སྐལ་པ་རབ་ཀྱི་ཟབ་ཆོས་དེ་དག་ལ་དབང་བའི་ཆེ་བརྗོད་སྨྲས་པ་མིན་པས་དཔྱོད་ལྡན་དག་གིས་རྒྱུ་མཚན་མཁྱེན་པར་གསོལ། རྫས་གཏེར་རིགས་དམིགས་བསལ་དུ། རག་ཆབ་ནས་སྔགས་རྒན་གཅིག་གིས་ཞིང་ཁ་ནས་ཕྲ་མན་ལས་མགོན་པོ་གུར་གྱི་སྐུ་རྙེད་པ་སྐུ་མདུན་གཟིགས་ཕུལ་བས་རྟེན་དེ་ཁོང་གི་ཕྱག་ཏུ་འབྱོར་དགོས་རྒྱུ་ཡིན་ཚུལ་རྟེན་ཚབ་གཞན་ཞིག་དང་གནང་སྦྱིན་བཅས་བཞེས། གཟིམ་ཆུང་སྦུག་མ་མཛོད་ཚེ་དཔལ་སྔ་ཆར་མཆོད་པ་འབུལ་དུ་འགྲོ་སྐབས་སྒོའི་སྟེང་ན་ལི་སྨུག་གི་རྡོ་རྗེ་ཤིན་ཏུ་ཁྱད་འཕགས་མཐོང་བ་དེ་འཕྲལ་གཟིགས་ཕུལ་བས་ཞལ་རྩེད་བཅས་ཐུགས་བདག་གནང༌། དབུས་ཕེབས་རྗེས་མར་ལམ་ཁ་ན་ཚོང་པ་འདྲ་ཞིག་གིས་སྐུ་རྒྱུ་ལི་ལྟ་བུ་ཤིན་ཏུ་རྙིང་ཉམས་ཅན་རལ་གྲི་བེ་ཅོན་མདའ་གཞུ་དབྱུག་པ་སོགས་མཐོ་རེའི་ཚད་ལྷག་ཡོད་པ་རྣམས་ཕུལ་བ་དེ་ཚེ་དགྱེས་ཉམས་ཆེར་མ་གནང་ཡང༌། འབུལ་མཁན་འགྲོ་ཚར་རྗེས་ངའི་འཇམ་དཔལ་ཞི་དྲག་གི་ཕྱག་མཚན་ད་རེས་འབྱོར་བྱུང་གསུངས་ནས་རྩ་བ་ཆེ་ཆེ་ལྟར་མཛད་པས་མཚོན་སྐུ་དང་ཕྱག་མཚན་ཆེས་མང་དངོས་བརྒྱུད་ནས་བཞེས་ཤིང༌། གནས་ཞལ་དངོས་སུ་སྣང་བར་མཛད་པ་ཁྱུང་སྟག་གནས་དང༌། རྫོང་སར་བཀྲ་ཤིས་ལྷ་རྩེའི་གདན་ས་ཡང་སྔར་ནས་འཇམ་དཔལ་གཤིན་རྗེའི་གནས་ཡིན་པའི་གཟིགས་སྣང་བྱུང་བས་གནས་ཡིག་བྲི་དགོས་པར་གུས་ལ་བཀའ་གནང་ཞིང༌། ལྷ་སྲིན་དམ་བསྒྲགས་དང་གནས་ལམ་གསར་བཏོད་གནང༌། གཞན་ཡང་སྡེ་དགེ་ཁྲོ་རི་ཟིལ་ཁྲོམ་གྱི་སྦས་གནས་སྒོ་མཎྜལ་སྟེང་གི་ཕ་ཝཾ་གུར་འདྲ་བརྒྱུད་སྦས་གནས་སུ་འགྲོ་ལམ་གྱི་ལུང་བྱང་དང༌། དཔའ་འོག་དབང་ཆེན་བྲག །སྡེ་དགེ་དང་ལྷ་ཐོག་བར་དུ་ཡོད་པའི་ཤ་རི་གསང་ཆེན། ནང་ཆེན་གཟེ་རྒྱལ། ཁྱུང་པོའི་སྤུ་རྒྱལ་གངས་རི། ཡར་འབྲོག་སྟག་ལུང༌། འབྲས་མོ་ལྗོངས་ཀྱི་གནས་ཀྱི་ཆ་ཤས། བལ་ཡུལ་ཡང་ལེ་ཤོད་ཀྱི་གནས་ཡིག་མདོ་བྱང་རྣམས་བཞུགས། འདི་དག་ས་བོན་ཙམ་སྟེ་ཀུན་གཟིགས་གོང་མ་དང་རྣམ་དབྱེར་མེད་པའི་ཡེ་ཤེས་དག་པའི་གཟིགས་པ་འབྱམས་ཀླས་ཤིང་ཐུན་མིན་བཀའ་བབས་བདུན་ལ་རྫོགས་པར་དབང་བསྒྱུར་བར་ངེས་ཀྱང༌། ཇི་སྐད་དུ། རེས་འགའ་མི་འབྱིན་གཏེར་རྙིང་བསྟན་པ་སྐྱོང༌། །ཞེས་པ་དང་ཆོས་མཚུངས་པར་གསར་རྙིང་བཀའ་གཏེར་གྱི་ཆོས་སྒོར་རབ་འབྱམས་གདུལ་བྱ་གང་ལ་གང་འདུལ་དུ་འཆད་སྤེལ་གནང་བ་ཉིད་གཙོ་བོར་མཛད་པ་ལས། རྗེ་ཉིད་ཀྱི་གསུང་དང་དགོངས་ཀློང་ལས་ཕྱུང་བའི་ཟབ་ཆོས་སྐོར་སྤེལ་གྲུབ་པར་གསོལ་བ་བཏབ་ཚེ། བདག་ལྟ་བུའི་འཁྲུལ་སྣང་ལ་ཡིད་རྟོན་ཅི་ཡོད། རང་གཞན་གྱི་རྒྱུད་ལ་ཕན་གནོད་གང་གི་རྒྱུར་འགྱུར་མི་ཤེས། དཔེར་ན་སྔར་དུས་ཀུན་གཟིགས་སི་ཏུ་རྡོ་རྗེ་འཆང་ལ་ཀཿདམ་པ་བདེ་གཤེགས་ཀྱིས་རྗེས་སུ་བཟུང་བའི་གཟིགས་སྣང་དང༌། ཀཿཐོག་པའི་ཆོས་མང་པོའི་ཉེ་བརྒྱུད་བྱུང་བའི་ལོ་རྒྱུས་ཕྱག་བྲིས་མཁན་ཆེན་བླ་མ་སྟོབས་ལྡན་གྱིས་གཟིགས་ནས་དེ་རིགས་སྤེལ་མཛད་རྒྱུ་དང༌། གཟིགས་སྣང་ལོ་རྒྱུས་མཛད་འཕྲོ་ལུས་པ་མཐར་བཏོན་ཐུབ་པའི་ཞུ་ནན་ཕུལ་བའི་ལན་དུ། ཕྲན་ལག་པ་འདུག་མ་ཐུབ་པས་བྲིས་པ་དེ་རིགས་ལ་དགོས་པ་མེད། མི་རེས་འཁྲུལ་སྣང་འདི་འདྲ་མང་པོ་བྲིས་ན་བདག་ཅག་གི་རྩ་བའི་བླ་མ་མཁྱེན་བརྩེ་རིན་པོ་ཆེའི་དག་སྣང་ཉེ་བརྒྱུད་ཀྱི་ཆེ་བ་ཉམས་བྱེད་དང༌། དེའི་ལད་མོ་ཟློས་ཀྱང་མེ་ཁྱེར་གྱིས་ཉི་མ་ལ་འགྲན་པ་ལྟར་མཁས་གྲུབ་རྣམས་ཐུགས་ཁྲེལ་གྱི་གཞི་ལས་མ་འདས་ལུགས་བཀའ་གནང་སོང་བ་ངེས་པར་དོན་ལ་གནས་པ་ཡིན་གསུངས་ཏེ། དེ་རིགས་གཡས་ཆུང་ཁོ་ནར་མཛད་པ་དང༌། ཐུགས་ཤིན་ཏུ་སྒམ་པས་གུས་ནས་ཀྱང་ཆེད་དུ་བཀའ་འདྲི་སོགས་ཞིབ་ཆ་ཞུ་མ་སྤོབས། གཞན་ཞལ་ལུང་དངོས་དང་ཕྱག་ཐོར་འཁོད་པ་རྒྱ་ཆེར་མ་བཞུགས་པས་རེ་ཞིག་དེ་ཙམ་མོ། །ད་ནི་ལམ་རྟགས་ཀྱི་ཡོན་ཏན་བརྙེས་ཚུལ་ཁྱད་པར་ཅན་ཅུང་ཞིག་བརྗོད་ན། ཤེར་ཕྱིན་བརྒྱད་སྟོང་པ་ལས། རབ་འབྱོར་གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཆོས་གང་དང་གང་དུ་ཀུན་ཆུབ་པར་བྱེད་པ་དང༌། སྦྱིན་པར་བྱེད་པ་དེ་དང་དེ་ཉིད་སེམས་ལ་ཀུན་ཆུབ་པར་བྱེད་པ་དང་སྦྱིན་པར་བྱེད་པ་དེ་དང་དེ་ཉིད་སེམས་ལ་ཀུན་ཆུབ་པར་བྱེད་ཅིང་སྦྱིན་པར་བྱེད་དོ། །བདག་གི་ཆོས་འདི་སེམས་ཅན་ཐམས་ཅད་ཀྱི་དོན་དང་ཕན་པ་དང་བདེ་བའི་ཕྱིར་སྦྱིན་པར་བྱ་སྟེ། ཆོས་བསྟན་པ་འདིས་ཀྱང་སེམས་ཅན་ཐམས་ཅད་ཆོས་ཀྱི་བསམ་པ་ཡོངས་སུ་རྫོགས་པར་གྱུར་ཅིག་ཅེས་ཆོས་ཀྱི་སྦྱིན་པ་དེ་ཡང་སེམས་ཅན་ཐམས་ཅད་ལ་ཐུན་མོང་དུ་བྱེད་དེ། རབ་འབྱོར་རྣམ་པ་དེ་དག་དང་རྟགས་དེ་དག་དང་མཚན་མ་དེ་དག་དང་ཡང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །ཞེས་པས་མཚོན་བྱང་ཆུབ་སེམས་དཔའ་ཕྱིར་མི་ལྡོག་པའི་རྟགས་མཚན་གྱི་ཡོན་ཏན་རྣམས་ཐེག་པ་ཆེན་པོའི་མདོ་སྡེ་དག་ལས་འབྱུང་བ་ལྟར་བཞུགས་ཤིང༌། ཁྱད་པར་རྡོ་རྗེ་ཐེག་པའི་ལམ་གྱི་ཡོན་ཏན་སྣང་སྲིད་དག་པ་རབ་འབྱམས་ལྷའི་འཁོར་ལོར་ཤར་ཞིང༌། མཐར་འབྲས་ཉེ་རྒྱུའི་སྤྱོད་པ་ལ་བརྟེན་ནས་མི་སློབ་པའི་ས་མངོན་དུ་མཛད་ཚུལ་ཞིབ་པར་ནང་གསང་གི་རྟོགས་བརྗོད་ཀྱི་དངོས་ཤུགས་ལས་འབྱུང་ཞིང༌། སྐབས་འདིར་ཉེ་རྒྱུའི་སྤྱོད་པ་ལ་ཇི་ལྟར་འཇུག་པར་མཛད་པའི་ཚུལ་ཅུང་ཟད་བརྗོད་ན། དེའང་འདིའི་དངོས་དོན་ནི་གསར་རྙིང་གི་རྒྱུད་སྡེ་ཆེན་པོ་རྣམས་ཀྱི་རྫོགས་རིམ་ནས་མཐུན་པར་གསུངས་པའི་མཐར་འབྲས་ཀྱི་ས་མངོན་དུ་བྱེད་པའི་སྔོན་དུ་ལྷ་དང་བླ་མས་ལུང་བསྟན་བྱུང་པའི་དངོས་རིག་གི་ཕྱག་རྒྱ་དང་ལྷན་ཅིག་ཉེ་རྒྱུའི་སྤྱོད་པས་འགྲོ་ཀུན་ཧེ་རུ་ཀ་རྡོ་རྗེའི་རིགས་སུ་བསྒྲུབས་པས་ཚོམ་བུ་དང་བཅས་པ་གྲོལ་བར་བྱེད་དགོས་ཚུལ་གསུངས་པའི་ས་མཚམས་སུ་སླེབས་པ་སྟེ། རྗེ་གོང་མའི་རྡོ་རྗེ་དོ་ཧའི་ཚུལ་དུ་ལུང་བསྟན་གྱི་ཚིག །ཤར་ཕྱོགས་ཌཱ་ཀི་འདུ་བའི་པི་ཝང་གི་སྙན་འགྱུར། །ལྷོ་མོན་སྨྱུག་མའི་ཚལ་གྱི་ཁུ་བྱུག་གིས་བླངས་ནས། །དབྱར་སྐྱེས་མྱུ་གུ་འདྲེན་པའི་སྐྱོ་གྲོགས་ལ་ཕེབས་དང༌། །ཉམས་དགའི་པདྨོ་རྒྱས་པའི་ངོ་མཚར་ཞིག་ཡོད་དོ། །ཞེས་སོགས་མ་འོངས་འབྱུང་འགྱུར་སྟོན་པའི་གསུང་དངོས་དང༌། ས་སྐྱ་ཕུན་ཚོགས་ཕོ་བྲང་གི་བདག་ཁྲི་ཡབ་སྲས་ལ་སྒྲུབ་ཐབས་ཀུན་བཏུས་ཀྱི་བཀའ་དབང་གནང་བའི་ཐོག་མར་སྨིན་གྲོལ་སྒོ་འབྱེད་དཀར་པོ་རྣམ་གསུམ་གྱི་རྗེས་གནང་ཉིན་ན་བཟའ་སྐུ་འཇུག་དཀར་པོ་བཞེས། སྐུ་མཚམས་ལས་བཞེངས་མ་ཐག་ཡིན་པས་དབུ་སྐྲ་ཡང་རིང་པོར་སྐྱེས་འདུག །གུས་ནས་སྔགས་ཀྱི་སྤྱོད་པས་ན་བཟའ་དཀར་ཆས་བཞེས་ན་རྟེན་འབྲེལ་ཆེ་ཚུལ་ཞུས་པའི་གསུང་འཕྲོས་སུ། རྗེ་བླ་མ་ཉིད་ཀྱི་ཡེ་ཤེས་དག་པའི་སྣང་ངོར་ཤྲཱི་ཧེ་རུ་ཀ་ནམ་མཁའ་འཇིགས་མེད་ཞབས་ཀྱི་ཐུགས་བརྩེ་བས་སྐྱོང་ཚུལ་གྱིས་དབུ་ལ་ཕྱག་གིས་ཡང་ཡང་བྱུགས་ཤིང༌། རིག་པ་བརྟུལ་ཞུགས་ཀྱི་སྤྱོད་པས་གནས་ཡུལ་ངེས་མེད་དུ་ཕེབས་པའི་དུས་ལ་བབས་ཚུལ་གྱི་ལུང་བསྟན་པའི་ཉིན་དེར། གུ་རུ་ཧེ་རུ་ཀའི་ཆས་ཅན་སྐུ་ལི་མ་ཆུང་ངུ་གཉིས་ཕྱག་ཏུ་སོན་པ་སོགས་རྟེན་འབྲེལ་ལེགས་འགྲིགས་བྱུང་ཚུལ་གུས་རྨོངས་ལ་བཀའ་བསྩལ་བ་དང༌། གུས་ནས་ཀྱང་ཧེ་རུ་ཀའི་ཆས་དང་སྤྱོད་པ་ལ་དགོས་པ་ཆེ་བས་དགོངས་སྤྱོད་དེ་ལ་བསྐུལ་བའི་མགུར་ཞིག་ཕུལ་བ་དེ་ལ་དགྱེས་ཚུལ་གྱིས་ཡང་ནས་ཡང་དུ་གཟིགས་པ་དང༌། མདོ་མཁྱེན་བརྩེ་ཡེ་ཤེས་རྡོ་རྗེས་ཀྱང་ལུང་བསྟན་དང་སྔོན་གནས་རྗེས་དྲན་མངའ་ཚུལ་ལམ་ཙམ་གསུངས་པས་མཚོན་ལྷག་པའི་ལྷ་རིག་འཛིན་བླ་མ་རྣམས་ཀྱིས་སྔགས་ཀྱི་སྤྱོད་པ་ལ་བསྐུལ་བའི་གཟིགས་སྣང་དང་ལུང་བསྟན་སྔ་ཕྱི་ལན་དུ་མར་བྱུང་ཞིང༌། ནང་དུ་ལམ་རྟགས་ཀྱི་རྩ་རླུང་ཐིག་ལེའི་ཁམས་འདུས་པའི་རྟགས་སུ་དགུང་གྲངས་བཞི་བཅུའི་སྐོར་ནས་ཕྱི་རོལ་ཀུན་གྱི་མཐུན་སྣང་དུ་སྐུ་འཕར་གཡོ་ལྟ་བུའི་མཇུག་ནས་གསུང་འབྱོན་མི་ཐུབ་པ་ཡུན་རིང་ཐུང་སྣ་ཚོགས་ཀྱིས་ཉིན་རེར་ཡང་ལན་མང་འཕར་ལྡང་གི་བསྙུན་ཁམས་བཞེས་ཚུལ་བསྟན་ཅིང༌། ལར་རྗེ་འདི་ས་ལམ་མཐོན་པོར་གཤེགས་པའི་རྟགས་མཚན་བསྙུན་ཁམས་ལྕི་བའི་ཚེ་ན་ཕྱག་ཆབ་ཀྱང་དྭངས་སུ་སོང་བ་དང༌། དེ་དག་ཤིན་ཏུ་འཁྲུགས་སྐབས་སྐུ་ཁམས་གསལ་དྭངས་སུ་བཞུགས་པ་རླུང་མཁྲིས་བད་ཀན་སོགས་ཀྱི་རྟགས་གོ་ལྡོག་ལྟ་བུར་འབྱུང་ཞིང༌། སྐུ་ཁམས་ཤིན་ཏུ་འཁྲུགས་སྐབས་གསོལ་སྨན་ཇི་ཙམ་ཕུལ་རུང་ཕན་སྐྱེད་མེད་པར་གློ་བུར་སྔ་ཕྱི་དྲོའི་ཡུད་རེ་ཙམ་གྱི་སྟོད་སྨད་ལ་མཚན་དཀྱིལ་གསལ་དྭངས་སུ་ཕེབས་པ་ལྟ་བུ་མདོར་ན་སྨན་པ་སོགས་ཐུན་མོང་གི་དཔྱོད་ཡུལ་ལས་འདས་ཤིང་ཤིན་ཏུ་ངོ་མཚར་བའི་གནས་སུ་བཞུགས་ལ། སྐབས་དེར་གསོ་དཔྱད་པ་རྣམས་ཀྱིས་གྲིབ་རླུང་སོགས་ངོས་འཛིན་སྣ་ཚོགས་པས་དེར་མཐུན་སྨན་དཔྱད་དང་ཞབས་བརྟན་རྒྱ་གང་ཆེའི་རིགས་བསྒྲུབ་ནའང་ཕན་སྐྱེད་ཆེར་མེད་པའི་ཚུལ་བསྟན་པ་སོགས་ཉེ་རྒྱུའི་སྤྱོད་པ་སྐྱོང་བའི་དུས་ལ་ངེས་པར་བབས་པའི་རྟགས་མཚན་མངོན་དུ་གྱུར་པ་སྟེ། རྗེ་ཉིད་ཀྱི་གསུང་འཕྲོས་ལས་ཀྱང་ཁོ་བོའི་ནད་འདི་ལམ་བསྒོམ་པའི་ལག་རྗེས་ནི་ག་ལ་ཡིན། དེ་ནི་རང་རྒྱུད་ཉམས་ལེན་གྱིས་དབུལ་བས་འོང་དོན་མེད། ཚེ་སྔ་མའི་ལས་ལྷག་འདྲ་གང་ཡིན་ན་རྩ་རླུང་ཐིག་ལེའི་ཁམས་འདུས་པའི་རྣམ་པ་འདྲ་ཞིག་བྱུང་བ་རེད་ཅེས་ཕེབས་པ་ལ་བརྟགས་ན་ངེས་ཤེས་ལྷག་པར་སྐྱེ་བའི་གནས་སོ། །དེ་ལྟ་ནའང་གསང་བ་སྲུང་བ་ལ་ཐུགས་ཤིན་ཏུ་སྒམ་པས་སྐུ་ཚེའི་རྟེན་འབྲེལ་གྱི་དགོས་པ་ཙམ་ཡིན་ཚུལ་དང༌། དེར་མ་ཟད་བསྟན་པའི་མིག་ལྟོས་གང་ཅིར་དེ་རིགས་ལ་དགོས་པའང་མེད་ཅེས་བཏང་སྙོམས་སུ་འཇོག་པར་མཛད་པ་ན། དགོས་དོན་རྒྱུ་མཚན་ཤེས་པའི་སློབ་འབངས་ཀུན་དང༌། ཁྱད་པར་དུ་འཇམ་མགོན་རྣམ་གཉིས་ཀྱི་ཐུགས་སྲས་སྒྲུབ་བརྒྱུད་བསྟན་པའི་མངའ་བདག་ཆེན་པོ་བྱམས་མགོན་ཏཱའི་སི་ཏུ་པདྨ་དབང་མཆོག་རྒྱལ་པོ་མཆོག་གི་ཞལ་ནས། ཁོ་བོས་སྔ་ཕྱིར་འཇམ་མགོན་བླ་མ་མཆོག་གི་སྐུ་ཕྱྭར་བརྟགས་པ་བྱ་དགོས་ཡང་ཡང་བྱུང་བ་ཀུན་ལ་ཞབས་བརྟན་བསྒྲུབ་བྱ་གཙོ་བོར་རྗེ་ཉིད་ཀྱི་དགོངས་ཉམས་གང་ཡོད་འཐུས་ཤོར་མེད་པ་བསྒྲུབ་གལ་ཆེ་ཚུལ་བརྗོད་པ་རྣམས་ཚུལ་འདི་ལ་བསམ་པ་ཡིན། ཅུང་ཟད་ཕྱིས་སྐྱོན་ལས་མི་སྣང་ཡང་ད་རེས་རྟེན་འབྲེལ་ལེགས་འགྲིགས་འབྱུང་ཐབས་ཤིན་ཏུ་གལ་ཆེ་ཚུལ་གྱི་བཀའ་ཡིག་དང༌། རྒྱལ་སྲས་འཇམ་མགོན་མཆོག་སྤྲུལ་རིན་པོ་ཆེས་ཀྱང་གསང་སྤྱོད་དང་བཞེས་མཛད་ན་རྟེན་འབྲེལ་དུས་ལས་ཡོལ་མི་འདུག་ཅིང༌། འཇམ་མགོན་བླ་མ་མཆོག་ཉིད་བསྟན་འགྲོའི་མགོན་དུ་ཞབས་པད་བརྟན་པའི་ཐུགས་བསྐྱེད་ལྷུར་བཞེས་དགོས་ཚུལ་གྱི་བརྟན་བཞུགས་ལེགས་འབུལ་བཅས་བསྩལ་བ་དང༌། ས་སྐྱོང་སྡེ་དགེའི་སྲས་ཡུམ་བློན་འཁོར་སོགས་རྒྱུ་མཚན་ཤེས་པ་ཀུན་གྱིས་ཀྱང་ནན་ཏན་དུ་གསོལ་བ་བཏབ་ཅིང༌། འབྲི་གཏེར་འོད་གསལ་རྡོ་རྗེས་ཚེ་ལམ་ཕྱག་རྒྱའི་རྟེན་འབྲེལ་དང་དུ་བཞེས་དགོས་པའི་ལུང་བྱང་ཕུལ་བ་དང༌། སྐུའི་གཅུང་འཆི་མེད་པདྨ་རྡོ་རྗེ། གུས་ཕྲན་བཅས་ཀྱི་ལུང་བསྟན་ཁག་མང་མཐུན་པར་བྱུང་བས་རྟེན་འབྲེལ་གྱི་གསལ་འདེབས་ལྟ་བུར་གྱུར་ཏེ། གཙོ་བོར་རྗེ་བླ་མ་མཆོག་གི་ཡེ་ཤེས་གཟིགས་ངོར་གསལ་བའི་ལུང་དོན་བཞིན་ཚེ་ལམ་ཕྱག་རྒྱའི་ཉེ་རྒྱུའི་སྤྱོད་པ་དང་དུ་བཞེས་པའི་ཚུལ་མཛད་པ་སྟེ། དེའང་སྤྱིར་རྗེ་བླ་མ་མཆོག་ཉིད་རྟག་པར་ན་བཟའ་བཞེས་སྟངས་གསོལ་ཇ་སོགས་མཛད་སྤྱོད་ཐམས་ཅད་འདུལ་བ་དང་གཞི་མཐུན་པ་འབའ་ཞིག་གནང༌། སྐུ་ཤམ་ཡང་ལེའུ་ཅན་ཁོ་ན་བཞེས་ཤིང་སྤྱོད་པ་ལ་གཤེགས་པའི་རྣམ་ཐར་ཞལ་གསུང་དུ། ད་ནི་རང་ལོ་བརྒྱ་ཕྱེད་ལ། །འདོད་ཡོན་བསེ་རུའི་གྲངས་ལྷག་སོན། །གཏེར་སྟོན་དང་ནི་གྲུབ་ཐོབ་ཀྱི། །ཤས་ཙམ་བདག་ལ་མི་བདོག་ཀྱང༌། །རེ་ཞིག་མ་ཤི་གསོན་གྱུར་ན། །རང་དོན་སྒྲུབ་པའི་ཞར་བྱུང་དུ། །གཞན་ལ་ཕན་པའང་ཆ་ཤས་འབྱུང༌། །དེ་ཕྱིར་གོང་མ་ཀུན་གཟིགས་རྗེའི། །གསང་བའི་ལུང་གི་ཚིག་ཟུར་དང༌། །འཇམ་མགོན་ཀོང་ཆེན་ཞལ་འཕྲོས་སོགས། །དམ་པ་རྣམས་ཀྱི་ལུང་བྱང་དང༌། །རང་གི་རིག་ངོར་ཐོན་པ་བཞིན། །ཚེ་ལམ་ཕྱག་རྒྱའི་རྟེན་འབྲེལ་བསྒྲིགས། །ཐེག་དམན་སོར་སྡོམ་ཕུལ་བྱས་ཤིང༌། དེར་བརྟེན་རྟོགས་པ་མི་ལྡན་ཀྱང༌། །སེམས་བསྐྱེད་དགེ་བ་ཉིད་དུ་སྨོན། །འདི་ཡིས་ཕན་པར་འགྱུར་བ་ཡི། །དམ་བཅའ་བྱེད་དུ་མ་མཆིས་ཀྱང༌། །རང་གཞན་རྐྱེན་དབང་མ་གྱུར་ན། རེ་ཞིག་འཚོ་བར་འགྱུར་ཡང་སྲིད། །ཅེས་གསུངས་པ་ལྟར་དང༌། མཁས་གྲུབ་ཆེན་པོ་སྡེ་གཞུང་མཆོག་སྤྲུལ་རིན་པོ་ཆེས་རྗེ་འདི་ཉིད་ཀྱི་ས་ལམ་དྲོད་རྟགས་ཡོན་ཏན་གྱིས་ཐུགས་འཕྲོག་ནས། ཁྱེད་ལྟ་བུའི་རྡོ་རྗེ་འཛིན་པ་ཆེན་པོས་དགེ་སློང་གི་བསླབ་པ་ཕུལ་ག་ལ་དགོས་གསུངས་ཏེ། རྒྱུ་མཚན་དེའང་རྡོ་རྗེ་འཆང་འདི་ནི་ངེས་པར་གྲུབ་པའི་ས་མཐོར་གཤེགས་པས་ན། རྒྱུད་ལས། དམ་ཚིག་སྡོམ་ལས་རྣམ་པར་གྲོལ། །ཞེས་གསུངས་པ་ལྟར་བསླབ་བྱའི་ཚོགས་ཐམས་ཅད་བྱ་བ་གྲུབ་པའི་ཡེ་ཤེས་སུ་གྲོལ་ཟིན་པས་སོ་སྐྱེའི་སྡོམ་པ་སྲུང་ཚུལ་དང་བསྒྲིགས་མི་དགོས་ཤིང༌། ཚུལ་བསྟན་དུའང་ཉམས་དང་རྟོགས་པའི་དབང་ཕྱུག་ཆེན་པོར་བཞུགས་པས་ན་དགེ་ཚུལ་སློང་གི་བསླབ་པ་མ་ཕུལ་བར་ཕྱག་རྒྱའི་ཉེ་རྒྱུ་བསྟེན་རུང་བ་ནི། འཕགས་ཡུལ་གྲུབ་པའི་གཙོ་བོ་ས་ར་ཧས་མདའ་མཁན་ཕྱག་རྒྱར་བཞེས་པའི་རྗེས། །ཁ་ཙང་ཕན་ཆད་བྲམ་ཟེ་ཡིན། ཁ་ཙང་ཕན་ཆད་དགེ་སློང་མིན། །དེ་རིང་ཕྱིན་ཆད་དགེ་སློང་ཡིན། །ཧེ་རུ་ཀ་དཔལ་དགེ་སློང་མཆོག །ཅེས་གསུངས་ཤིང་དེའི་རྗེས་ལ་ཀླུ་སྒྲུབ་ཀྱི་མཁན་པོ་མཛད་པ་ལྟ་བུ་དང་ཁྱད་མེད་པ་ངེས་པར་ཡིན་མོད། འོན་ཀྱང་རྗེ་འདི་ནི་རང་རྒྱུད་ཀྱི་ཡོན་ཏན་སྦས་ཚུལ་ཁོ་ནས་གདུལ་བྱའི་དོན་འབའ་ཞིག་ལ་དགོངས་ཏེ་སྡོམ་པ་གསུམ་གྱི་བསླབ་བྱ་ཐམས་ཅད་ལམ་རིམ་བགྲོད་ཀྱི་གང་ཟག་གི་ཉམས་ལེན་ལྟར་རང་རང་གི་གཞུང་བཞིན་མ་འདྲེས་པར་སྤྱོད་པས་སྙིགས་དུས་ཀྱི་གང་ཟག་རྣམས་བསྟན་པའི་རྩ་བ་དམ་པའི་ཆོས་འདུལ་བའི་སྤྱོད་པ་ལྷོད་པར་མི་འགྱུར་བའི་དགོས་དབང་ལ་གཟིགས་ནས་ཆོས་བརྒྱད་ཀྱི་ཞེན་པ་སྔར་ནས་སྤངས་ཤིང་རྒྱུད་དང་མན་ངག་རྒྱ་མཚོའི་དགོངས་དོན་གསང་སྔགས་ཀྱི་ཐབས་ལམ་ཟབ་མོ་ཉམས་སུ་བཞེས་པ་གཙོ་བོར་གྱུར་པའི་སྐབས་སུ་རྟེན་བསྒྱུར་བར་མཛད་པ་ཡིན་ལ། དེ་ཡང་ནང་གི་དགོངས་པ་ལྟ་སྒོམ་མཐོན་པོར་ཇི་ཙམ་ཕེབས་ཀྱང་ཕྱིའི་རྟགས་དང་ཀུན་སྤྱོད་སྟོན་མཆོག་ཐུབ་པའི་དབང་པོའི་སོ་ཐར་གྱི་བཅས་པའི་བསླབ་པ་གལ་ཆུང་ཁྱད་གསོད་དུ་མི་འགྱུར་ཞིང༌། བསྟན་པའི་ཆེ་བ་འབྱིན་པ་དང༌། ཁྱད་པར་སྙིགས་དུས་འདིར་དགོས་པ་མེད་པར་གཏེར་ལུང་དང་སྔགས་ལ་ཁས་འཆེ་བས་ལྟ་སྒོམ་གྱི་གདིང་ཚད་གང་ཡང་མེད་པར་བསླབ་སྡོམ་འཇོལ་ཉོག་ཏུ་སྤྱོད་པ་ཤིན་ཏུ་མང་བས་དེ་དག་བག་ཡོད་པར་འགྱུར་བ་སོགས་ཀུན་གྱི་མིག་ལྟོས་ལ་ཕན་པའི་ཆེད་དུ་དགེ་འདུན་གྱི་སྡེ་ལ་བསྙེན་བཀུར་དང་འབྲེལ་སྔོན་ལྷ་བཙུན་ཆེན་པོ་ནམ་མཁའ་འཇིགས་མེད་སྤྱོད་པ་ལ་གཤེགས་པའི་ཚེ། ཆོས་གོས་དང་ལྷུང་བཟེད་རྣམས་རྡོ་རྗེ་གདན་གྱི་ཐུབ་དབང་དང་དགེ་འདུན་གྱི་དྲུང་དུ་ཕུལ་ནས་ཧེ་རུ་ཀའི་ཆས་བཞེས་པ་ལྟར། རྗེ་ཉིད་ཀྱི་རྒྱུན་བཞེས་ཆོས་གོས་རྣམ་གསུམ་ཚུལ་ཁྲིམས་ཀྱི་དྲི་བཟང་རིང་དུ་འཕྲོ་བ་སོགས་རབ་དུ་བྱུང་བའི་ཡོ་བྱད་རྣམས་ཆོས་སྡེ་སོ་སོར་ཕུལ་ནས་ཇི་སྲིད་བསྟན་པ་གནས་ཀྱི་བར་དུས་ཆེན་ལ་བསྟན་རྒྱས་ཆོ་ག་རེའི་སྐབས་མཆོད་པའི་ཡོ་བྱད་དུ་བཤམས་དགོས་པའི་རྒྱུ་མཚན་བཀའ་ལུང་ཞིབ་རྒྱས་ཀྱི་སྙན་གསན་དང་འབྲེལ་ཐེག་དམན་སོ་ཐར་ལུགས་ཀྱི་སྡོམ་པ་འབུལ་བའི་ཚུལ་མཛད་པ་ནི། བསྟན་པ་སྤྱིའི་བབས་ལ་དགག་བྱ་ཆུང་ཞིང་དགོས་པ་ཤིན་ཏུ་ཆེ་བ་དང༌། དེར་མ་ཟད་རྒྱ་གར་འཕགས་པའི་ཡུལ་གྱི་བསྟན་པའི་ཤིང་རྟ་ཆེན་པོ་རྣམས་སྔགས་ཀྱི་སྤྱོད་པ་བསྐྱངས་ནས་དགེ་འདུན་གྱི་ཚོགས་དཔོན་དང་མཁན་པོ་མ་མཛད་པའི་རྣམ་ཐར་དང་མཐུན་པར་བསྐྱང་བ་ནི་དཔྱོད་ལྡན་དང་བ་འདྲེན་པའི་གནས་སོ། །དེ་ལྟར་སྤྱོད་པ་ལ་ཞུགས་པའི་དགོས་དོན་སྙིང་པོར་དྲིལ་བ་རྗེ་ཉིད་ཀྱི་རྡོ་རྗེའི་གསུང་མ་ཉམས་པར་བཀོད་པ་འདི་ལྟར། ༈ །རང་ལྟོས་ཀྱི་སློབ་བུའི་ཚོགས་ལ་འཕྲིན་དུ་གསོལ་བ་རབ་རིབ་མུན་སེལ་ཞེས་བྱ་བ་བཞུགས་སོ། །བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། ཨོཾ་སྭསྟི། བདག་བློ་དམ་པའི་དེད་དཔོན་གྱིས་བཟུང་ཞིང༌། །རྣམ་དཀར་དགེ་བའི་གྲུ་གཟིངས་ལ་བརྟེན་ཏེ། །དད་བརྩོན་ཤེས་རབ་བ་དན་དཀར་པོ་ཡིས། །རྣམ་གྲོལ་གླིང་དུ་བསྐྱོད་པར་དམ་བཅས་ཤིང༌། ༡ །ཕུན་ཚོགས་འབྱོར་པའི་རིན་ཆེན་རྟེན་བཟང་པོ། །ལྷག་པའི་ཚུལ་ཁྲིམས་གསེར་གྱི་ས་གཞི་ལ། །ལྷག་པའི་ཏིང་འཛིན་དཔག་བསམ་ལྗོན་པའི་རྩེར། །ལྷག་པའི་ཤེས་རབ་འབྲས་བཟང་མཚར་དུ་སྡུག ༢ །ཀུན་མཁྱེན་ཉི་མའི་གཉེན་གྱི་བསྟན་པ་ལ། །གཅིག་ཏུ་སེམས་པའི་དམ་བཅའི་རི་མོ་ནི། །རྡོ་བར་བྲིས་བཞིན་མཐར་ཐུག་སྙིང་པོའི་བར། །ཡིད་ཀྱི་ཐིག་ལེར་དབྱེར་མེད་རོ་གཅིག་འདྲེས། ༣ །འཇམ་མགོན་དགྱེས་པའི་མཚན་སྙན་དྲི་བཞོན་གྱིས། །རེག་པས་མཐོང་བ་དོན་ལྡན་གྲགས་མོད་ཀྱང༌། །ཀུན་མཁྱེན་ཆེ་དེ་གཙུག་གི་རྒྱན་བསྙེན་ནས། །དེ་ཡི་ཕྲིན་ལས་ནམ་མཁའི་མཐའ་ཁྱབ་སྤེལ། ༤ །དགོས་འབྱུང་བསམ་འཕེལ་རྒྱལ་མཚན་རྩེར་མཆོད་དེ། །འགྲོ་སེམས་མཆོག་ཕལ་སུ་ཡིས་གསོལ་བཏབ་ཀྱང༌། །དེ་ལ་འདོད་དགུའི་དངོས་གྲུབ་སྟེར་བ་བཞིན། །མཁྱེན་བརྩེའི་ཡེ་ཤེས་བྱིན་རླབས་ཆ་ཤས་དཔོག ༥ །དེ་ཡི་དྲིན་གྱིས་དལ་བའི་རྟེན་མཆོག་འདིར། །ཀུན་རྟོག་རྙོགས་པའི་གཞན་དབང་བཙན་པོ་ཡིས། །མཐའ་གཅིག་དཀར་པོའི་སྣང་བས་དབེན་གྱུར་ཀྱང༌། །ཕལ་ཆེར་བསམ་སྦྱོར་དག་པས་ཁྱབ་པར་གྱུར། ༦ །ད་ནི་མི་ཚེའི་ཉི་མ་ནུབ་རིའི་ཕག །ཡོལ་བའི་སྔ་ལྟས་ཤིན་ཏུ་གསལ་བ་དང༌། །གཤིན་རྗེའི་ལམ་དུ་མྱུར་བར་ཆས་པ་ཡི། བདོག་པའི་སྟ་གོན་དག་ཀྱང་ཉེ་བར་མཐོང༌། ༧ །དེ་ལ་ཉེར་བསྡོག་སྒྱུ་མའི་རིག་སྔགས་ཀྱི། །ཐབས་ཚུལ་སྒྱུ་འཕྲུལ་སོལ་ཀའི་མེ་ཏོག་ནི། །རྣམ་མང་ལྷ་ཡི་དགའ་ཚལ་བཀྲག་གྱུར་ཀྱང༌། །སྨན་བྱེད་སྲོག་གི་བདུད་རྩིའི་ཟིལ་ཐིག་ཕྲ། ༨ །ཨེ་ཝཾ་ཕྱག་རྒྱས་སྡོམ་པའི་རྡོ་རྗེ་ཅན། །གང་གི་ཏནྟྲ་རྒྱ་མཚོའི་ཡང་སྙིང་ནི། །རྣལ་འབྱོར་ཆེན་པོ་བླ་ན་མེད་པ་ལས། །ཕྱག་རྒྱ་རྣམ་བཞིར་ཉེར་བརྟེན་གསེང་ལམ་ཆེ། ༩ །དམན་འབྲིང་བློ་ཅན་ཕལ་གྱིས་སྤྱོད་པ་ན། །སྦྲུལ་གདུག་མགོ་ཡི་ནོར་བུ་བླངས་པ་བཞིན། །ཁེ་ཉེན་ཆེན་པོས་ལོག་པར་ལྟུང་སྲིད་ཀྱང༌། །བློ་ཆེན་འགའ་ལ་དེར་ཐོབ་ཉེ་བར་འཚེངས། ༡༠ །མཆོག་ཏུ་སྦས་པའི་ངོ་མཚར་སྒྱུ་མ་ནི། །བདེ་ཆེན་ཡེ་ཤེས་དྷཱ་ཀི་ནི་གུའི་གཟུགས། །རྣམ་བཅས་བདེ་བའི་པདྨོ་འཛུམ་པ་དེས། །རྣམ་མེད་ཡེ་ཤེས་གྲུབ་པའི་ས་ལ་སྦྱོར། ༡༡ །དེ་ཕྱིར་སྟོན་པས་རབ་བསྔགས་ཉེ་ལམ་འདིར། །འཇུག་པའི་སྤོབས་པ་བ་ཐག་ལྟར་ཕྲ་ཡང༌། །རྣལ་འབྱོར་མོས་པ་ལམ་དུ་བྱེད་པ་ཡི། །ཀུན་བཟང་བདེ་སྟོང་རོལ་པའི་གར་གྱིས་རྩེན། ༡༢ །དེ་ཡི་སྟོབས་ཀྱི་དཔུང་ཤུགས་བཙན་པོ་དེས། འཆི་བདུད་རྟོག་པ་རིང་དུ་བསྐྲད་བྱས་ཏེ། །འཆི་མེད་གཉུག་མའི་གར་མཁན་དཔའ་བོ་ཆེའི། །བརྟུལ་ཞུགས་མཆོག་ལ་ཉེ་བར་འདུན་ཅིང་སྨོན། ༡༣ །སྲིད་པའི་གྲོང་ཁྱེར་སྒྱུ་མའི་གར་མཁན་བཞིན། །སྣང་སེམས་དབྱེར་མེད་རོ་གཅིག་འདྲེས་པ་ལས། །ཕྱོགས་ལས་རྣམ་རྒྱལ་འཇིགས་མེད་བློ་གྲོས་ཀྱིས། །གཞན་ཕན་བསམ་པ་གསེར་ཞུན་ལྟར་སྤྱོད་ལ། ༡༤ །གལ་ཏེ་རང་འདོད་སྲེད་པའི་འཆིང་ཐག་གིས། །དམ་པོར་བསྡམས་པའི་སེམས་ངན་དབང་ཡིན་ན། །ལྷ་དང་བླ་མས་ཀྱང་ནི་ཐུགས་ཁྲེལ་ཞིང༌། །རྡོ་རྗེ་ཅན་གྱིས་བདག་གི་མགོ་བོ་འགེམས། ༡༥ །རང་གི་སེམས་ལ་ཟོལ་ཟོག་མ་མཆིས་ཤིང༌། །རྒྱལ་བའི་བསྟན་དང་འགྲོ་ལ་བདེ་སྐྱིད་ཀྱི། །ངེས་སེམས་དང་ལྡན་འཇམ་མགོན་བླ་མ་རྗེའི། །ཐུན་མོང་ཐུན་མིན་བསྟན་པ་སྲིད་མཐའི་བར། ༡༦ །སྤེལ་བའི་གཡར་དམ་ཟླ་ཞུན་ཐགས་བཏག་གི །སྒོ་གསུམ་དར་ཡུག་སྟོང་ཆེན་ཁྱབ་པ་འདི། །ཉེས་པའི་དྲི་མས་ནོངས་པར་མ་གྱུར་ན། །སྲས་བཅས་རྒྱལ་བ་དགྱེས་པའི་མཆོད་སྤྲིན་འབུལ། ༡༧ །དེ་ལྟར་བདག་གི་སྤྱོད་པ་འདི་འདྲ་བར། །ཀུན་རྟོག་རླུང་དམར་དྲག་ཏུ་རྒོད་རྣམས་ཀྱིས། །འཕྱ་དང་གླེང་གཞིའི་ཡ་ག་སྒྲོགས་བྱེད་ཀྱང༌། །བདག་སེམས་ཀུ་ཤའི་རྩེ་ཙམ་གཡོ་རེ་ཀན། །༡༨ གང་ཞིག་འདྲེན་བྱེད་འཁྲུལ་པར་ཞུགས་རྣམས་ཀྱིས། །ཡང་དག་དངོས་ལ་ལོག་འཛིན་ཞུགས་པ་ལྟར། །སྐྱོན་ཟད་ཡོན་ཏན་རྫོགས་པའི་རྒྱལ་བ་ལའང༌། །སྐྱོན་དུ་མཐོང་ན་བདག་འདྲ་སྨོས་ཅི་ཞིག ༡༩ །མདོ་རྒྱུད་རྣམས་ནས་བླ་མར་བསྟེན་ཕྱིན་ཆད། །གུས་པས་མཆོད་དང་ཅི་མཛད་ཚད་མར་བལྟ། །རྒྱལ་བ་དང་འདྲར་དད་གསུམ་སེམས་ཀྱིས་འདུད། །དེ་ལ་མཆོག་དངོས་ལག་མཐིལ་གཏེར་བཞིན་གསུངས། ༢༠ །ཟབ་རྒྱས་ཆོས་ཀྱི་འབྲེལ་པས་བསྲུངས་རྣམས་ཀྱིས། །ལོག་པར་བལྟས་ན་ས་སྤྱོད་བསྟི་གནས་ཆེར། །འཚིགས་པར་དོགས་པའི་སྡུག་བསྔལ་མ་བཟོད་པས། །བརྩེ་བའི་སེམས་ཀྱིས་རབ་ཏུ་སྤྲིངས་པ་འདིས། ༢༡ །ཐར་པའི་མིག་གི་རབ་རིབ་རྣམ་སེལ་ཞིང༌། །ཡང་དག་ལེགས་པར་མཐོང་བའི་སྤྱན་སྟོང་བཀྲ། །གསང་གསུམ་བྱིན་རླབས་རྒྱུད་ལ་འཇུག་པ་དང༌། །ཉམས་རྟོགས་ཡོན་ཏན་གོང་ནས་གོང་འཕེལ་ཤོག ༢༢ །བདག་རྗེས་ཞུགས་རྣམས་འཆོལ་བར་མི་སྤྱོད་ཅིང༌། །ཉེས་ལྟུང་སྡོམ་པའི་ཚུལ་ཁྲིམས་ལ་བརྩོན་ཏེ། །ཐུབ་པའི་རིང་ལུགས་གཙང་མར་སྤྱོད་པ་དང༌། ཐམས་ཅད་མཁྱེན་པའི་གོ་འཕང་ཐོབ་གྱུར་ཅིག ༢༣ །རྩ་གསུམ་རྒྱ་མཚོའི་མཐུ་བྱིན་རབ་ཞུགས་ནས། །ལྷ་མིན་སྡེར་བཅས་དྲེགས་ལྡན་དཔུང་ཚོགས་རྣམས། །འཁོར་ལོ་རྡོ་རྗེ་འབར་བའི་མཚོན་རྣོན་པོས། །མིང་གི་ལྷག་མ་ཙམ་དུ་བགྱིད་གྱུར་ཅིག ༢༤ །བདག་ཀྱང་འཆི་མེད་རྡོ་རྗེའི་དཔལ་ལ་སྤྱོད། །རྒྱལ་ཁམས་ཀུན་ཏུ་དུས་ཀྱི་རྒུད་པ་ཞི། །རྫོགས་ལྡན་གསར་པའི་དགའ་སྟོན་དར་བབས་ཞིང༌། །བསྟན་དང་བསྟན་འཛིན་དར་ཞིང་ལ་རྒྱས་པར་ཤོག ༢༥ །དེ་སྐད་དྲང་པོར་སྨྲ་བའི་བློ་ཅན་ནི། །འཇམ་དབྱངས་ཕྱག་གིས་ཅོ་ཏོ་ནས་བཟུང་བའི། །ཆོས་ཀྱི་བློ་གྲོས་ཞེས་བྱའི་བེན་ཧྲུལ་དེས། །བཀྲ་ཤིས་འཆི་མེད་གྲུབ་པའི་དགའ་ཚལ་ཆེ། ༢༦ །མཁས་གྲུབ་རྒྱ་མཚོ་འདུ་བའི་བསྟི་གནས་སུ། །དུས་ཀྱི་དགེ་མཚན་ཕུན་སུམ་ཚོགས་པའི་ཆར། །བཀྲ་ཤིས་དཔལ་ཡོན་བརྒྱ་ཕྲག་འཆར་བ་ན། །བྲིས་འདིས་དག་པའི་སྣང་བ་རྒྱས་གྱུར་ཅིག ༢༧ །སརྦ་དཱ་མངྒ་ལཾ། །ཞེས་སྐལ་བ་དམན་པ་དག་གི་ཐེ་ཚོམ་བསལ་ཞིང་དད་ལྡན་སློབ་ཚོགས་རྣམས་སྤྲོ་བ་སྐྱེད་བྱེད་དུ་གསང་བ་ཆེན་པོའི་རྡོ་རྗེའི་དོ་ཧ་ལྷུག་པར་བསྩལ་བ་རྣམས་ལས་དོན་གྱི་དགོས་པ་དགོངས་གཞིའི་གསང་བ་ཟབ་མོ་རྟོགས་པར་བྱ་བ་ཁོ་ན་ལས། འོལ་ཚོད་ཙམ་དུ་འཆད་པའི་ནོངས་པ་ལྷ་དང་བླ་མ་མཁའ་འགྲོའི་ཚོགས་ཀྱིས་བཟོད་པར་བཞེས་སུ་གསོལ། །དེ་ནས་སྔ་མ་སྐུ་ལུས་འཕར་གཡོའི་བསྙུན་ཁམས་ཀྱང་སེང་དྭངས་སུ་ཕེབས་ཏེ་ཁམས་བྱེའི་མཁན་སློབ་ལ་གསང་ཡུམ་སྐོར་གྱི་ཞལ་འཕྲོས་གནང་སྐབས། སྐུ་ལུས་འཕར་གཡོ་ཆེ་ཙམ་གྱི་སྙུན་གཞི་སྔར་ནས་བྱུང་བ་དེ་ནི་ལམ་འབྲས་ལས་ཁམས་འདུས་པ་དང་པོའི་སྐབས་སུ་འབྱུང་བར་གསུངས་ཡོད་ཅེས་བཀའ་བསྩལ་པ་དང༌། དད་སློབ་གཞན་ལ་གསང་སྤྱོད་ཀྱི་རྟེན་འབྲེལ་བསྒྲིགས་རྒྱུ་འདི་ཅུང་ཟད་ཕྱི་སྐྱོན་ལས་མི་འདུག་ཅེས་བཀའ་འཕྲོས་གནང་རིགས་ལ་དཔྱད་ན། ཁམས་འདུས་ཐོག་མཐའ་བར་གསུམ་ལས་མཐར་ཕྱིན་འབྲས་བུའི་ཁམས་འདུས་ཐ་མར་ལུང་བསྟན་པའི་ཕྱག་རྒྱ་པདྨ་ཅན་ལ་བརྟེན་ནས་ལམ་བཞི་པ་རྡོ་རྗེའི་རྦ་རླབས་བསྒོམ་པར་གསུངས་པའི་གནད། དཔེར་ན་མར་དྭངས་སྙིགས་འབྱེད་ཅིང་མར་མེ་སོགས་ཀྱི་དགོས་པ་རྫོགས་པ་ལ་བཞུ་དགོས། འཇུ་བ་ལ་མེ་དགོས། མེ་ལ་ཤིང་དགོས་པ་བཞིན་དུ་མཚོན་བྱ་དོན་གྱི་ཡེ་ཤེས་ཀྱི་གྲུབ་མཐའ་སྙེགས་པ་ལ་མཚོན་བྱེད་དཔེའི་ཡེ་ཤེས་དགོས། དེ་ལ་ཚོར་བ་བདེ་བ་དགོས། དེ་ལ་ལུས་ཀྱི་ཁམས་དྭངས་མ་བཞུ་དགོས། དེ་འཇུ་བ་ལ་རྗེས་སུ་ཆགས་པའི་མེ་དགོས། དེ་ལ་རིག་མ་དག་པའི་ཤིང་དགོས་པས། ཀྱེ་རྡོར་རྩ་རྒྱུད་ལས། དངོས་གྲུབ་མཚན་ཉིད་མི་ཕྱེད་པ། །ཕྱག་རྒྱའི་རྣལ་འབྱོར་པ་ཡིས་འགྲུབ། །ཅེས་དང༌། བཤད་རྒྱུད་གུར་ལས། ཕྱག་རྒྱའི་དངོས་གྲུབ་དངོས་གྲུབ་ཆེ། །དངོས་གྲུབ་ཀུན་གྱི་སྤྱོད་ཡུལ་མིན། །ཞེས་དང༌། སཾ་བྷུ་ཊི་ལས། ཆོས་ཀྱི་ཕུང་པོ་བརྒྱད་ཁྲི་དང༌། །བཞི་སྟོང་གི་ནི་ཆོ་ག་ཡང༌། །ལུས་ཀྱི་དེ་ཉིད་མི་ཤེས་པ། །དེ་དག་ཐམས་ཅད་འབྲས་མེད་འགྱུར། །ཞེས་དང༌། ཡེ་ཤེས་རྡོ་རྗེ་ཀུན་ལས་བཏུས་པ་ལས། ཇི་ལྟར་འོ་མ་དང་ཏིལ་དག་ལ་མངོན་པར་འདུ་བྱས་པ་མེད་པར་མར་དང་ཏིལ་མར་མི་འབྱུང་བ་དེ་བཞིན་དུ། སྔགས་དང་ཕྱག་རྒྱ་དང་མངོན་པར་འདུ་བྱས་པའི་རྡོ་རྗེ་དང་པདྨ་མཉམ་པར་སྦྱར་བ་མེད་པར་རྣམ་པར་ཤེས་པ་གསུམ་མཚོན་པར་མི་ནུས་སོ། །གང་གིས་བྷ་ག་དང་ལིངྒ་ཡང་དག་པར་མཉམ་པར་སྦྱོར་བ་མི་ནུས་པ་དེས་ནི་བདེ་བ་ཆེན་པོའི་ཏིང་ངེ་འཛིན་མི་རྙེད་དོ། བདེ་བ་ཆེན་པོའི་ཏིང་ངེ་འཛིན་འབའ་ཞིག་ལ་ལྷག་པར་མོས་པ་ཙམ་གྱིས་ལས་དང་པོའི་ས་ལ་གནས་པར་འགྱུར་ཏེ། ཕྱིར་མི་ལྡོག་པའི་ས་ལ་ཡང་སློབ་པར་འགྱུར་རོ། །ཞེས་དང༌། རྣལ་འབྱོར་མའི་རྒྱུད་ཀུན་སྤྱོད་ལས། གཉིས་མེད་ཡེ་ཤེས་སེམས་ལྡན་པས། མི་བྱ་བ་ནི་ཅི་ཡང་མེད། །མི་རྟོག་བདག་ཉིད་སེམས་ཀྱིས་ནི། །འདོད་པའི་ཡོན་ཏན་ལྔ་རྣམས་སྤྱད། །ཅེས་སོགས་རྒྱུད་རྣམས་ལས་རྒྱ་ཆེར་གསུངས་པ་ལྟར་རྟེན་འབྲེལ་གྱི་གཞི་རྟེན་དཀྱིལ་འཁོར་བཞི་རྡོ་རྗེའི་ལུས་ལ་ཚང་བ་ལ་གནད་དུ་བསྣུན་པས། བརྟེན་པ་སེམས་ལ་རྟོགས་པ་བདེ་བླག་ཏུ་འཆར་བའི་གནད་ཉིད་ཆེས་ཟབ་པས། ལྟ་བ། བསྐྱེད་རྫོགས། སྤྱོད་པ། ཉེ་རྒྱུའི་མངོན་རྟོགས་ལྔ་ཚང་དགོས་པར་གསུངས། དཔལ་ཡང་དག་པར་སྦྱོར་བའི་རྒྱུད་ལས། སྐྱེ་བ་འདིར་སངས་རྒྱས་པ་ཉིད་དམ། རྡོ་རྗེ་སེམས་དཔའ་ཐོབ་པར་འགྱུར་ཏེ། གང་དག་བསམ་གྱིས་མི་ཁྱབ་པའི་གནས་ཐོབ་པ་ནི་བདེ་བར་གཤེགས་པ་སྟེ་སངས་རྒྱས་ཡིན་ལ། མཚན་གཞི་མཚོན་པ་ནི་རྡོ་རྗེ་སེམས་དཔའ་ཡང་དག་པའོ། །ཞེས་གསུངས་པ་ལྟར། ཕར་ཕྱིན་ཐེག་པ་དང་རྒྱུད་སྡེ་འོག་མ་གསུམ་དང་བཅས་པའི་ལམ་གྱིས་སྣང་གསུམ་འཕོ་བའི་བག་ཆགས་སྦྱོང་མི་ནུས་པའི་གནད་ཀྱིས་སྤང་ཐོབ་ཡོངས་སུ་རྫོགས་པ་རྡོ་རྗེ་འཛིན་པའི་ས་བགྲོད་མི་ནུས་པས། རྡོ་རྗེ་ཐེག་པས་རྟེན་དཀྱིལ་འཁོར་བཞིར་དབང་བཞིས་སྨིན། ལམ་བཞིས་གནད་དུ་བསྣུན་པས་སྤང་བགྲོད་གཉིས་ཀ་ལུས་ལ་གནད་དུ་བསྣུན་ནས་མཐར་ཐུག་འབྲས་བུའི་དུས་སུ་རིག་མ་དག་པའི་ཕྱག་རྒྱ་ལ་བརྟེན་པས་འགྲོས་བཞི་ཐིམ་སྟེ། རྟེན་དཀྱིལ་འཁོར་བཞི་བརྟེན་པ་རིག་མ་དང་བཅས་པ་སྐུ་ལྔ་དབྱེར་མི་ཕྱེད་པའི་ཡེ་ཤེས་སུ་གནས་གྱུར་ཏེ་རིག་པའི་སྐྱེས་བུའམ་ཕྱག་རྒྱ་ཆེན་པོའི་དངོས་གྲུབ་བརྙེས་ནས་རྟག་ཁྱབ་ལྷུན་གྱིས་གྲུབ་པའི་ཕྲིན་ལས་ཀྱིས་གདུལ་བྱའི་དོན་མཛད་པ་ཡང༌། བདེ་མཆོག་སངས་རྒྱས་མཉམ་སྦྱོར་ལས། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་ཆེ། །ཞེས་དང༌། གཏུམ་པོ་དཔའ་གཏུམ་ཡང་དག་པས། ཆགས་བྲལ་ལས་ནི་སྡིག་གཞན་མེད། །བདེ་ལས་བསོད་ནམས་གཞན་པ་མེད། །དེ་ཕྱིར་སེམས་ནི་མཉམ་བཞག་པས། །འདོད་པའི་བདེ་བ་བསྐྱེད་པར་བྱ། །ཞེས་དང༌། གཞན་ཡང་རྫོགས་པ་ཆེན་པོ་སྒྲ་ཐལ་འགྱུར་རྩ་བའི་རྒྱུད་ཀྱི་དགོངས་པ་ཐེག་མཆོག་རིན་པོ་ཆེའི་མཛོད་དང༌། ཡིད་བཞིན་མཛོད་རྩ་འགྲེལ་ལས་གསུངས་པ་རྣམས་སྒྲ་ཇི་བཞིན་དུ་སྤྱོད་པས་རྡོ་རྗེ་ཐེག་པའི་རྒྱུད་དོན་ཟབ་མོའི་དགོངས་སྤྱོད་ལ་དབང་བསྒྱུར་བར་ངེས་པའི་གསང་བ་ཆེན་པོ་ཟུར་ཙམ་སྨོས་པ་འདི་དག་གཟུར་གནས་ཀྱི་ཐུགས་ལ་ངེས་ཤེས་འདྲོངས་པའི་ཕྱིར་དང༌། དེང་སང་སྔགས་ལ་ཁ་གཡར་ནས་ཐོ་ཅོའི་སྤྱོད་པས་བསྟན་པ་ནང་བཤིག་པ་ལ་ཕན་པའི་ཆེད་དུ་རྡོ་རྗེའི་གསང་ལམ་གྱི་ལྟ་སྤྱོད་སྒྲ་ཇི་བཞིན་ལམ་དུ་ལོངས་པ་འདི་ལྟར་ཡིན་ཞེས་ལྷག་པའི་བསམ་པས་རང་བློས་གང་དཔོག་ཅུང་ཟད་ཙམ་བརྗོད་པའོ། །སྐབས་དེ་ཙམ་ན་སྐྱེ་རྒུ་ཀུན་གྱི་ཡིད་མཁར་ངོ་མཚར་དགའ་སྤྲོའི་ཉི་མ་གསར་པ་ཤར་བས་གྲུབ་མཐའ་རིས་མེད་ཀྱི་ཆོས་སྡེ་ཁག་དང༌། ས་སྐྱོང་རྒྱལ་ཁབ་ཆེ་ཕྲ་དཔོན་བློན་འབངས་འཁོར་སོགས་མཆོག་དམན་ཀུན་གྱིས་དགའ་སྤྲོའི་ལེགས་འབུལ་དང་འབྲེལ་མཇལ་ཕྱག་ཞུ་མཁན་ལྷ་མིའི་འདུ་བས་ས་གཞི་དོག་པོར་བྱེད་པས་མཚོན་དགེ་ལེགས་འབུམ་གྱི་སྣང་བས་ཡོངས་སུ་ཁྱབ་པར་གྱུར་ཏོ། །དེ་ལྟར་ཉེ་རྒྱུའི་སྤྱོད་པ་ལ་ཞུགས་པས་ལུང་དོན་བཞིན་གནས་ཡུལ་ངེས་མེད་དུ་ཕྱོགས་ལས་རྣམ་རྒྱལ་རིག་པ་བརྟུལ་ཞུགས་ཀྱི་སྤྱོད་པས་གཤེགས་པར་བཞེད་ནས་རྡོ་རྗེ་ཁ་ཊྭཱཾ་སྐུའི་ཚད་དང་མཉམ་པ་སོགས་ཧེ་རུ་ཀའི་ཆས་རྣམས་མངོན་པར་འདུ་མཛད་པ་ན། མཆོག་དམན་ཀུན་གྱིས་རྗེ་གོང་མའི་གདན་ས་ལས་མི་གཡོ་བར་བཞུགས་གྲུབ་པའི་གསོལ་བ་ནན་དུ་བཏབ་པས་རྒྱལ་སྲས་རྣམས་ཐུགས་ཀྱི་བརྣག་བྱ་སེམས་ཅན་མགུ་བར་བྱེད་པ་ཉིད་ཡིན་པས་ཐམས་ཅད་ཡིད་ཕམ་གྱི་གནས་སུ་འགྲོ་བར་གཟིགས་ནས་དེ་བཞིན་དུ་ཞལ་བཞེས་གནང༌། ས་སྐྱ་ཕུན་ཕོའི་བདག་ཆེན་ཡབ་སྲས་ལ་ལམ་འབྲས་གནང་སྐབས་དེར་གུས་ལ་བཀའ་ཕེབས་སུ། ཕྲན་སྔགས་ལམ་དུ་ཞུགས་ཀྱང་སངས་རྒྱས་ཀྱི་བསྟན་པ་རྟགས་ཀྱི་ཆེ་བའི་དགོས་པ་ལ་བསམ་ནས་སོ་ཐར་གྱི་རྟགས་གཟན་ཤམ་ཡང་མ་བོར། དབང་ཆོས་འཆད་པ་ན་ཆོས་གོས་སྣམ་སྦྱར་ཡང་གྱོན་པ་ཡིན་ཞེས་གསུངས་པ་དང༌། ཁོ་བོ་སྔགས་ལམ་ཞུགས་ནས་གདན་ས་ཡིན་མདོག་གི་ཁང་གོག་མགོ་གྱོན་བྱེད་ནས་སྡོད་རྒྱུ་འདི་ཅུང་ཡོང་བ་མིན་ཀྱང༌། རྒྱུ་རྐྱེན་རྟེན་འབྲེལ་གྱི་བྱེད་པས་བྱ་ཐབས་བྲལ་བ་ལྟ་བུ་ཞིག་རེད། འོན་ཀྱང་རྟེན་འབྲེལ་ཟེར་བ་དེ་རང་ཤུགས་ཀྱིས་འགྲིགས་པ་ལས་ཆེད་དུ་བསྒྲིགས་པས་འགྲིགས་དཀའ་ལ། གནས་སྐབས་འགྲིགས་པ་ལྟར་ཡང་དེ་ཙམ་གྱི་དགོས་དོན་མེད་པ་འདྲ་ཞིག་རེད། སྔགས་སྤྱོད་འདིའང་དེ་ལས་སྔ་ཙམ་བྱུང་ན་ཅུང་ཟད་དགོས་པ་ཡོད་ཚོད་འདུག་ཀྱང་རང་ཉིད་རེ་དོགས་ཀྱི་འཆིང་བས་ད་བར་བཏང་སྙོམས་སུ་ལུས། ཡིན་ནའང་གནས་སྐབས་འདིར་ཐོག་མའི་རྟེན་འབྲེལ་སྐྱོན་མེད་བྱུང་བས་ལོ་༥༦་དེའི་ཚེ་གེགས་ལས་ངེས་པར་གྲོལ་ཞིང༌། བྱ་བ་བཏང་ནས་གནས་ངེས་མེད་དུ་འགྲོ་རྒྱུའི་སྐོར་ལ་ཕྱི་ནང་མཆོག་དམན་སུ་ཡང་ཡིད་ལ་འཐད་མཁན་མི་འདུག་པས། བླ་མ་དཀོན་མཆོག་གི་ཐུགས་རྗེས་གར་བཞག་བལྟས་ནས་སྡོད་པ་ལས་བྱེད་ཐབས་ཀྱང་དཀའ་བར་སྣང༌། དེས་ན་རྗེ་མཁྱེན་བརྩེའི་གདན་ས་བྱིན་རླབས་ཅན་འདི་ལ་བཀུར་སྟི་ཅི་འགྲུབ་དང༌། བསྟན་འགྲོར་ཕན་རེས་ཆོས་འཆད་སྤེལ་གང་ནུས་བྱས་ན་བླ་མ་དམ་པ་རྣམས་ཀྱི་དགོངས་པ་རྫོགས་ཤིང༌། བསྟན་རྒྱུན་ལ་སྨན་པ་དང༌། གང་ཟག་རེ་རེའི་རྒྱུད་ལ་ཐར་པའི་ས་བོན་ཐེབས་ནའང་དགོས་དོན་ཤིན་ཏུ་ཆེ་བས་ལོ་ཤས་སྡོད་རྒྱུ་བྱུང་རིང་ལ་དེ་བཞིན་ཅི་འགྲུབ་བྱེད་རྒྱུ་ཡིན་ཚུལ་སོགས་གསུངས། དེ་སྔོན་ས་བྱ་ལོར་གཏེར་མཛོད་ཆོས་འཁོར་གྲུབ་རྗེས་གུས་ནས་བརྟན་བཞུགས་ཕུལ་བའི་གསུང་ལན་དུ། ལོ་ལྔ་བཅུ་དང་དྲུག་ཅུར་སོན་སྐབས་ཁྱེད་ལྟ་བུ་ཞིག་བྱས་ན་ལས་འཚོ་ཐབས་གཞན་མི་འདུག །སྐབས་དེར་བརྟུལ་ཞུགས་ཀྱི་སྤྱོད་པ་ཚུལ་བཞིན་བྱེད་རྒྱུ་བྱུང་ན་སྐུ་ཚེ་ཡུན་རིང་ཙམ་བཞུགས་མཐར་འཕོ་ཆེན་རྡོ་རྗེའི་སྐུ་མངོན་དུ་མཛད་རྒྱུ་ཡིན་པ་དྲན་ནའང་སེམས་ལ་མི་འཆར་བ་ཅི་ཡོད་ཅེས་གསུངས་པ་ལུང་བསྟན་དུས་བབས་བཞིན་བྱུང་ན་རྗེ་གོང་མའི་རྟེན་འབྲེལ་འཕྲོ་བསྐྱང་རྒྱུ་ཡིན་པར་ངེས་ཀྱང༌། དེ་ནི་བསྟན་འགྲོའི་བསོད་ནམས་ཀྱིས་མ་ཆུན་པར་དེང་དུས་གདུལ་བྱའི་སྐལ་བ་དང་མཐུན་པའི་མཛད་པས་བསྟན་འགྲོའི་དོན་འབའ་ཞིག་ཐུགས་ལ་བརྣག་པས་ཕྱོགས་དང་རིས་སུ་མ་ཆད་པའི་ཟབ་རྒྱས་ཆོས་ཀྱི་འཁོར་ལོ་རྒྱུན་ཆད་མེད་པར་བསྐོར་ནས་གང་ལ་གང་འདུལ་གྱིས་གདུལ་བྱ་མཐའ་ཡས་པ་སྨིན་གྲོལ་དུ་བཀོད་བཞིན་པར། རིས་མེད་བསྟན་པ་རྒྱ་མཚོའི་བཀའ་གཏེར་ཆོས་ཀྱི་གསང་མཛོད་ཤྲཱི་ན་ལེནྡྲ་གཉིས་པ་འོག་མིན་བླ་མའི་གདན་ས་བཀྲ་ཤིས་འཆི་མེད་གྲུབ་པའི་དགའ་ཚལ་ཆེན་པོར་སྐུ་ཚེ་རིལ་པོ་བཞུགས་སྟན་ཆགས་པའོ། །ཡེ་ཤེས་རྡོ་རྗེའི་སྒྱུ་འཕྲུལ་བཀོད་པས་འཁོར་འདས་ཀུན་ལ་མཉམ་པར་འཇུག །ཟག་མེད་གསང་བ་སྤངས་རྟོགས་རྒྱ་མཚོའི་ནོར་བུ་རིན་ཆེན་ཐང་མར་བརྡལ། །དགེ་ལེགས་ཕན་བདེའི་དངོས་པོ་ཀུན་གྱིས་འབྲེལ་ཚད་དབུགས་འབྱིན་མེས་པོ་མཆོག །འཁོར་ལོའི་དབང་ཕྱུག་དཔལ་ལྡན་བླ་མ་སྲིད་ཞིའི་གཙུག་རྒྱན་སླར་ཡང་གུས། །ཁྱོད་ཀྱི་ངང་ཚུལ་དྲན་དང་བསྟོད་པའི་ངག །མ་ལུས་ལེགས་བྱས་རིན་ཐང་བྲལ་བའི་དབྱིག །མདོ་རྒྱུད་ཀུན་ནས་བསྔགས་པ་རྗེས་དྲན་པས། །ཇི་ལྟར་རྟོགས་པ་གཟུར་གནས་ཡིད་ཀྱིས་བཀོད། །སྙིགས་མའི་མུན་པས་འཁོར་ཡུག་བརྡལ་བའི་ཁྲོད། །དྲི་མེད་འཕགས་པའི་ཡེ་ཤེས་ཉིན་མོར་བྱེད། །མངོན་སུམ་བསྟན་འགྲོའི་མཁའ་ལ་སྒྲིབ་མེད་དུ། །གསལ་བའི་ངོ་མཚར་གནས་ལ་མི་བསྔགས་སུ། །མཐའ་དག་ཐུབ་བསྟན་རྒྱུ་སྐར་ཕྲེང་བའི་ཚོགས། །ཐུགས་བསྐྱེད་ཀུན་གསལ་ངོགས་སུ་ལེགས་བཀོད་མཐུས། །ལུང་རྟོགས་སྣང་བྱེད་ཟུང་གི་འོད་སྟོང་གིས། །རྫོགས་ལྡན་པདྨོ་བཞད་པའི་དགའ་སྟོན་མཐོང༌། །རྒྱ་བོད་མཁས་གྲུབ་སུམ་རྩེན་དགའ་ཚལ་དུ། །རྨད་བྱུང་རྣམ་ཐར་ལེགས་བྲིས་རྔ་གསང་གིས། །ཀུན་དགའི་དཔལ་ཡོན་སྤེལ་བའི་གཏམ་འདི་ཡིས། །དམ་པའི་ཡོན་ཏན་རྒྱལ་ཐབས་སྐྱོང་བར་བསྐུལ། །ཟབ་རྒྱས་ཆོས་ཀྱི་མགྲིན་པར་རྟག་སིམ་ཞིང༌། །ཐོས་བསམ་སྒོམ་པའི་འདབ་མ་རབ་ཡངས་པས། །ཐུབ་དབང་བསྟན་མཆོག་པད་ཚལ་སྐྱོང་མཛད་ཀུན། །འདྲེན་མཆོག་རྗེས་དྲན་དགའ་སྟོན་འོས་སམ་སྙམ། །དད་དང་མོས་པའི་རྩ་བ་དུང་ལྟར་དཀར། །གུས་བརྩོན་ཡལ་འདབ་སྟུག་པོར་རྒྱས་པའི་དབུས། །རྣམ་ཐར་མེ་ཏོག་འབྲས་བུས་བརྒྱན་པ་འདི། །གངས་ཅན་བསྟན་པའི་དཔལ་དུ་འགྱུར་ཡང་སྲིད། །མི་ཤེས་བློ་ཡིས་གསང་བའི་དོན་མ་རྟོགས། །གསང་སྒོ་འཆོལ་སོགས་ཉེས་པར་སྤྱད་པའི་ནོངས། །དམིགས་མེད་ཐུགས་རྗེའི་བདག་ཉིད་བླ་མའི་མདུན། །བཤགས་པས་འགྱོད་ཚངས་དབུགས་འབྱིན་ད་ལྟར་སྩོལ། །མོས་གུས་རིན་ཆེན་འདྲེན་བྱེད་རབ་དྭངས་པས། །བླ་མའི་རྣམ་ཐར་རིན་ཆེན་གཏེར་མཐོང་ནས། །རྒྱུ་མཚན་ཤེས་པའི་བློ་ཡིས་སྨྲ་བ་དང༌། །ཚེ་རབས་ཀུན་ཏུ་དེ་རྗེས་སློབ་པར་སྨོན། །ལེགས་སྤྱད་དགེ་ཚོགས་དག་བྱེད་གཏེར་བཞིས་བསྟན་འགྲོའི་དབྱིག་འཛིན་མཛེས་བྱས་མཐུས། །ཕན་བདེའི་དབྱར་སྐྱེས་དར་ལ་བབས་པར་བཤད་དང་སྒྲུབ་པའི་ཟློས་གར་མཁན། །མཁས་གྲུབ་བུང་བས་རྩེན་པའི་མགྲིན་རྔ་ཐེག་གསུམ་ཆོས་ཀྱི་གླིང་བུ་ཡིས། །སྲིད་པའི་གདུང་བ་ཡུད་ཀྱིས་བསལ་བའི་དགའ་སྟོན་འགྲོ་འདིའི་དཔལ་དུ་ཤོག །ཐུགས་བསྐྱེད་རྟ་ལྗང་བགྲོད་པའི་མཐུ་ལས་མཆོག་སྤྲུལ་ཉིན་བྱེད་མྱུར་དུ་འཆར། །གདུལ་བྱའི་ལྷག་མ་ཉེ་བར་བསྐྱངས་པས་ཐུབ་བསྟན་རྒྱལ་ཐབས་མགྲོན་དུ་ཁུག །འཇམ་དབྱངས་བླ་མའི་རྣམ་ཐར་ནོར་བུ་གཙུག་གི་རྒྱན་དུ་མི་འབྲལ་བའི། །ངང་ཚུལ་རྨད་བྱུང་མྱུར་དུ་མཐོང་ནས་བདག་སོགས་དབུགས་འབྱིན་མཛད་གྱུར་ཅིག །རིས་མེད་ཐུབ་བསྟན་ལུང་རྟོགས་རྒྱན་གྱིས་སྒེག །ཐེག་མཆོག་ཆོས་ཀྱི་མངའ་ཐང་མི་ཉམས་བསྐྱངས། །སྲས་བཅས་རྒྱལ་བའི་བཞེད་པ་སྒྲུབ་ནུས་པའི། །ངོ་མཚར་མཛད་བཟང་བདག་གི་དཔལ་གྱུར་ཅིག །བཀྲ་ཤིས་རྨད་བྱུང་མཁའ་ཁྱབ་ཡེ་ཤེས་དཔལ། །རབ་འབྱམས་འཇིག་རྟེན་ཀུན་གྱིས་མངོན་གྱུར་ཏེ། །དགེ་ལེགས་མི་ཟད་རྟག་པའི་རོལ་སྒེག་ཆེས། །མཁའ་ཁྱབ་ཆོས་དབྱིངས་ཀུན་ཏུ་ལྷུན་གྲུབ་ཤོག །ཅེས་པའང་རྗེ་བཙུན་བླ་མ་ཐམས་ཅད་མཁྱེན་གཟིགས་ཆེན་པོ་འཇམ་དབྱངས་ཆོས་ཀྱི་བློ་གྲོས་རིན་པོ་ཆེའི་རྣམ་ཐར་ས་བོན་ཙམ་དུ་སྨོས་པ་འདི་ནི། རྗེ་བླ་མ་མཆོག་གི་ཚེ་འཛིན་ཌཱ་ཀིའིདབང་མོ་ཚེ་རིང་ཆོས་ཀྱི་སྒྲོན་མས་ལྷ་རྫས་ཀྱི་རྟེན་དང་བཅས་པ་དང༌། སྐུའི་དབོན་དད་དམ་དཔལ་གྱི་ཟླ་བ་ཆེས་ཆེར་དཀར་བའི་གན་མཛོད་ཚེ་དབང་དཔལ་འབྱོར་གཙོས་དད་སློབ་ཀུན་ནས་འདི་ནི་ཁྱེད་ཀྱིས་འབྲི་བར་འོས་སོ་ཞེས་པའི་གསུང་གིས་ཆེད་དུ་བསྐུལ་བ་བཞིན། ཁམས་གསུམ་ཆོས་ཀྱི་རྒྱལ་པོ་འཇམ་མགོན་ཡེ་ཤེས་མེ་ལོང་མཆོག་གིས་ཐུན་མོང་མ་ཡིན་པའི་བཀའ་དྲིན་གྱིས་རྗེས་སུ་བསྐྱངས་ཤིང༌། སློབ་འབངས་ཡོངས་ཀྱི་གྲལ་མཐར་གནས་པ་འགྱུར་མེད་ཐེག་མཆོག་བསྟན་པའི་རྒྱལ་མཚན་རང་བྱུང་མཁྱེན་བརྩེའི་འོད་ཟེར་དུ་འབོད་པས་རྣམ་ཐར་ཞལ་གསུང་ཉིད་རྩ་བར་བཟུང༌། གནས་གཟིགས་རྗེས་མའི་གཟིགས་སྣང་ཐོར་བུ་མང་པོ་མཆོད་དཔོན་བླ་མ་འཇམ་དབྱངས་བློ་གྲོས་མཆོག་ལྡན་ནས་ཞུ་སྐུལ་གྱི་ཕྱག་བྲིས་རེག་ཟིག་དངོས་རྣམས་གཞིར་བྱས་ཏེ། རྒྱ་གར་འཕགས་པའི་ཡུལ་དང་ཉེ་བའི་ས་ཡི་ཆ་ཀ་སྤུངས་རིན་ཆེན་བརྩེགས་པའི་ས་འཛིན་གྱི་རྩེ་ཟངས་མདོག་དཔལ་རིའི་ཞིང་ཁམས་བཀོད་པའི་གཙུག་ལག་གིས་མཛེས་པ་ཐུབ་བསྟན་བཤད་སྒྲུབ་དགའ་ཚལ་དུ་བྲིས་ཤིང༌། སླད་ནས་རྗེ་བཙུན་བླ་མའི་སྐུའི་ཉེ་གནས་རྡོ་རྗེའི་མཆེད་པོ་རྣམས་དང་གོ་བསྡུར་གྱིས་འཕྲི་བསྣན་ཅི་རིགས་ཞིབ་ཏུ་བགྱིས་ནས། ལྷོ་འབྲུག་ཆོས་རྒྱལ་ཆེན་པོའི་མངའ་རིས་སུ་གནས་པའི་ཚེ། གསང་ཟབ་ཐེག་པ་མཆོག་གི་ཆོས་རྫོང་ནས་དཀྱུས་གཅིག་ཏུ་བཀོད་པའི་ཡི་གེ་གཉིས་པར་འབེབས་པོ་སྡོམ་བརྩོན་སྡེ་སྣོད་འཛིན་པ་མཁན་པོ་ཐུབ་བསྟན་བརྩོན་འགྲུས་ཕུན་ཚོགས་དང༌། རེབ་ཀོང་སྔགས་པ་འཇིགས་མེད་སྐལ་བཟང་དཔལ་ལྡན་ཟུང་གིས་བགྱིས་པ་འདིས་ཀྱང་བསྟན་འགྲོའི་དཔལ་ཡོན་ཕྱོགས་དུས་གནས་སྐབས་ཀུན་ཏུ་འཕེལ་རྒྱས་བརྟན་པ་དང༌། མཁའ་ཁྱབ་ཡིད་ཅན་རྒྱ་མཚོ་རྗེ་བཙུན་མཁྱེན་པའི་བདག་པོའི་ཡེ་ཤེས་ཀྱི་གསང་བ་ལ་ལོངས་སུ་སྤྱོད་པའི་རྒྱུར་སྨོན་བཞིན་འགྲུབ་པར་གྱུར་ཅིག །སརྦ་དཱ་ཀ་ལྱཱ་ཎཾ་མངྒ་ལ་བྷ་ཝནྟུ།། །།
[edit]

@#/__/rigs dkyil rgya mtsho'i khyab bdag rje btsun bla ma 'jam dbyangs chos kyi blo gros ris med bstan pa'i rgyal mtshan gtsug lag lung rigs nyi ma smra ba'i seng ge dpal bzang po'i rnam thar cha shas tsam brjod pa ngo mtshar yongs 'dus dga' tshal zhes bya ba bzhugs so//


chos dbyings kun khyab 'jam dbyangs ye shes sku/_/dpag yas chos kyi 'byung gnas tshangs dbyangs gsung*/_/mkha' khyab rdul bral mi phyed rdo rje'i thugs/_/blo gros spobs pa rgya mtsho'i bla ma rgyal/_/snyigs 'gror rjes brtse'i 'dzum gyis rtag sgeg pad dkar ltar 'phags thugs bskyed tshal/_/tshogs zung sbrang rtsi'i zil dngar ches lci rdzogs smin sbyang ba mthar son pas/_/snyigs ma'i mun sel sku dang ye shes rab 'byams rnam 'dren bzhi pa'i tshul/_/sa gsum mchod sdong lha mi'i ston pa shAkya seng ge'i zhabs la 'dud/_/rab 'byams rgyal ba'i gsang ba mi zad rgyan gyi 'khor lo'i rigs kun bdag_/rmad byung mkhyen brtse nus pa'i phrin las gdul dkar dpa' ba'i rig 'dzin tshul/_/gangs can bstan pa'i 'byung gnas gcig pu phan bde'i mdzad pa bsam yas mgon/_/rgyal dbang pad+ma saM b+ha'i ye shes sgyu 'phrul rdo rje'i sprin bkod 'dud/_/thub bstan legs bris klung gi dpal 'dzin gtad rabs bdun dang rgyan drug mchog_/rig 'dzin rnam dgu rnal 'byor dbang phyug chos rgyal mes dbon blon por bcas/_/mkhas grub lo paN shing rta che brgyad rnam thar u dum wA ra'i tshal/_/ngo mtshar rnam bkra'i mdzad pa rgya mtshor dad pa'i bung ba g.yo bas gus/_/khyad par 'jam mgon ye shes rol mo'i sprin/_/rab 'byams zhing du mdzes par bres pa la/_/bsam yas phrin las nor bu'i gru char can/_/tshe rabs kun tu yid mkhar dkrigs gyur cig_/phyogs su ma lhung mdzad pa rgya mtsho'i rlabs/_/'phags pa'i rang bzhin rin chen dbyig gis gtams/_/blo 'das bkod pa'i gzi byin 'bum phrag gis/_/sangs rgyas kun gyi bla ma khyod gcig bsngags/_/de snyed ngang tshul kun bzang rdo rje'i gsung*/_/tshangs dbyangs gling bus bsngags kyang rdzogs min zhing*/_/mtha' dag rnam thar 'phags blos dpog min na/_/bdag lta'i bsam brjod yul las kun nas 'das/_/dpag yas shes dang shes bya'i chos thams cad/_/ye shes me long gcig tu bzlums pa'i mthus/_/srid zhi kun khyab srid zhi'i mtha' las 'das/_/zab rgyas chos rnams kun gyi 'byung gnas phyir/_/bstan 'dzin kun gyi gtsug rgyan mkhas grub dbang*/_/thub bstan yongs kyi 'byung gnas shing rta che/_/ngo mtshar yongs rdzogs rnam thar u dum wAr/_/mkha' lam nyi zla bzhin du 'dzam gling brdal/_/nges 'byung thugs kyi rgya mtsho ches zab 'phags lam gling bzhir tshogs gnyis phyug_/gsang chen rgyud sde'i nyi zla rab gsal smin grol snang bas khor yug khyab/_/ye shes dgongs pa'i rnam sad grong mdzes dpag yas gzungs sprin bsam las 'das/_/phyogs dus rgyal ba'i yab gcig khyod ni sa gsum gdul bya'i gnyen gcig pu/_/nor bu'i 'od kyis rgya mtsho'i kha dog bzhin/_/thun mong gyur pa'i rnam thar cha shas kyis/_/dus gsum 'byon dka'i tshad ma'i skyes bu zhes/_/rab 'byams rgyal ba'i zhing na mdzes par grags/_/de phyir phyogs re'i gdul byar snang ba yi/_/rnam thar cha tsam rin chen nor bu'i rdul/_/mthong dang thos pas rnam grol mthu bskyed pa'i/_/ngang tshul ji ltar dpog pa 'dir gsal bya/_/de yang bdag cag gi dpal ldan bla ma dam pa/_phyogs dang ris su ma chad pa bstan pa dam pa'i chos kyi mdzod/_zab pa dang rgya che ba'i 'byor pa zad mi shes pa'i dpal thams cad kyis mngon par mtho ba'i chos kyi rje/_chos kyi rgyal po/_chos kyi dbang phyug dam par gyur pa/_lha dang bcas pa'i 'gro ba yongs kyi skyabs gnas/_rigs dang dkyil 'khor rgya mtsho'i khyab bdag mtshan brjod par dka' ba/_don gyi slad du mtshan nas smos na 'jam dbyangs chos kyi blo gros ris med bstan pa'i rgyal mtshan dpal bzang po zhes mtshan snyan gyi ba dan srid zhi'i bla na mngon par mtho zhing*/_thugs bskyed dang phrin las kyi snang bas chos kyi dbyings kun tu khyab par brdal bas yid can kun la 'phral yun gyi phan bde ster bar mdzad pa gang nyid/_rgyal ba kun gyi ye shes sems dpa'i 'jam dpal dpa' bo'i sgyu 'phrul gyi rol par gsungs pas na/_'phags mchog de'i rnam 'phrul dang spyod yul ni rgyal sras sa chen po la bzhugs pa rnams kyis kyang ji bzhin rtogs dka'i gnas te/_'jam dpal sgyu 'phrul drwa ba las/_mchog gi dang po sku gsum 'chang*/_/sangs rgyas sku lnga'i bdag nyid can/_/khyab bdag ye shes lnga yi bdag_/sangs rgyas lnga bdag cod pan can/_/spyan lnga chags pa med pa 'chang*/_/sangs rgyas thams cad skyed pa po/_/sangs rgyas sras po dam pa mchog_/ces pa dang*/_sangs rgyas kun gyi snying po che/_/sprul pa'i 'khor lo sna tshogs 'chang*/_/zhes sogs rgya cher gsungs pa dang*/_gzhan yang phal po che las/_byang chub rgya mtsho rab brnyes gyur nas ni/_/sems can rgya mtsho rab tu smin bya'i phyir/_/byang chub sems bskyed rgya mtsho ston mdzad cing*/_/mi 'grib spyod pa rgya mtsho kun tu ston/_/bde gshegs rnams kyi rnam 'phrul de 'dra'o/_/zhes gsungs pa ltar/_srid zhi'i spyi dpal khyab bdag dang po'i sangs rgyas bcom ldan 'das 'jam dpal ye shes sems dpa' zhes sku gsum gyi zhing dang*/_sku'i bkod pa dang*/_mtshan gyi rnam grangs/_mdzad pa phrin las sogs rnam pa thams cad pa bsam gyis mi khyab pa'i rang bzhin rtag khyab lhun grub chen po la mnga' dbang bsgyur ba'i bdag nyid can du bzhugs pas na/_gdul bya 'dul byed kyi rnam par 'phrul pa'ang gcig tu ma nges shing gang la gang 'dul gyi sgyu 'phrul rol gar mtha' yas par bsgyur nas 'gro ba'i don mdzad pa'i tshul bsam gyis mi khyab pa ste/_'jam dpal sgyu 'phrul drwa ba las/_/sangs rgyas sprul pa'i rgyud 'chang ba/_/phyogs bcur sprul pa sna tshogs 'gyed/_/ces pa dang*/_/sems can kun gyi yid rig pa/_/sems can kun gyi yid la gnas/_/de dag sems dang mthun par 'jug_/sems can kun yid tshim par byed/_/ces dang*/_/rnam par shes pa'i chos nyid 'das/_/ye shes gnyis med tshul 'chang ba/_/rnam par rtog med lhun gyis grub/_/dus gsum sangs rgyas las byed pa/_/zhes dang*/_gzhan yang dkon mchog sgron me'i mdo las/_/de dag snyan ngag mkhan rgyal snyan ngag sbyor/_/gar mkhan rnga mkhan gyad dang rol mo mkhan/_/bzhag mdzes rgyan phreng thogs shing gar byed dang*/_/sgyu ma mkhan po gzugs mang kun tu ston/_/grong dang grong dpon kha lo bsgyur bar 'gyur/_/de bzhin ded dpon tshong dpon khyim bdag 'gyur/_/rgyal po blon po mdun 'don pho nya dang*/_/sman pa 'jig rten bstan bcos cho ga mkhan/_/de dag dgon par ljon shing chen por 'gyur/_/sman dang rin chen mi zad gter rnams dang*/_/yid bzhin nor bu 'dod sbyin sdong po dang*/_/lam gol dong pa rnams la lam ston 'gyur/_/zhes gsungs pa ltar/_mkha' khyab kyi 'jig rten rab 'byams rnams su sangs rgyas byang sems nyan rang mkhas grub dge ba'i bshes gnyen lha dang drang srong 'khor sgyur rgyal phran blon 'bangs khyim bdag dang ri dwags kyi rnam par snang ba sogs mtshan dang sku'i bkod pa sna tshogs dang*/_bzo'i gnas dang gzhan la phan pa'i rigs dang*/_nyi zla nor bu bum bzang sman mchog ljon shing gru gzings zam stegs zas gos gnas mal la sogs kyis mtshon gang 'dul 'gro ba'i dpal du gyur pa mtha' dag kyang 'jam dpal nyid kyi sgyu 'phrul gyi rol pa las ma 'das shing*/_bye brag mdo rgyud nas gsungs pa'i rjes su 'brangs te 'jam dpal gyi rnam thar cha tsam brjod na/_bskal pa dpag tu med pa'i sngon rol nas de bzhin gshegs pa klu'i rigs mchog dang*/_bcom ldan 'das 'jam pa'i tog tu mngon par sangs rgyas zin pa dang*/_ma 'ongs pa na de bzhin gshegs pa mgon po kun tu gzigs su 'tshang rgya bar 'gyur ba'i tshul ston par gsungs shing*/_da ltar mi mjed kyi byang phyogs sangs rgyas kyi zhing gzhan du de bzhin gshegs pa nor bu brtsegs pa'i rgyal po zhes par sangs rgyas nas gdul bya rnams la sangs rgyas kyi mdzad pa skyong bzhin du bzhugs pa dang*/_zhing 'dir yang bdag cag gi ston pa'i yab rgyal po zas gtsang ma nges pa'i don du 'jam dpal gyi rnam 'phrul du gsungs pa dang*/_sangs rgyas pa'i tshe na sa bcu'i byang chub sems dpa'i tshul bzung nas chos kyi sgo mo zab cing rgya che ba'i gleng bslang ba dang*/_rdzu 'phrul gyi bkod pa ma nges pas gdul bya 'dul ba dang*/_sangs rgyas kyi che ba brjod pa sogs rnam par rol pa bsam gyis mi khyab pas dul bya mtha' yas pa smin par mdzad/_tsI na'i yul gyi ri bo rtse lngar br-ik+Sha'i shing gi lba bar brdzus skyes byis pa lo brgyad pa'i rnam pas spor thang gi gtsug lag mtha' dag snang bar mdzad/_sham+b+ha la'i mi'i bdag po grags pa'i skur bstan nas dam pa dang po'i sangs rgyas kyi rtsa ba'i rgyud chen stong phrag bcu gnyis bsdus rgyud le'u lnga par bsdus shing gdul bya rnams rdo rje'i rigs gcig tu smin par mdzad cing*/_ma 'ongs pa na slar yang 'jam dpal grags pa nyid drag po 'khor lo can du bzhengs nas 'dzam bu'i gling gi kla klo mtha' dag bcom nas rdzogs ldan phyi ma 'dren par gsungs pa dang*/_gzhan yang rnam rol sna tshogs pas 'phags bod kyi paN grub phal cher rjes su bzung tshul sogs grangs las 'das shing*/_de lta bu'i yon tan rgya mtsho mtha' yas pa'i gnas la dus gsum gyi rgyal ba kun gyis kyang bstod bsngags kyi me tog yang yang 'thor bar mdzad pas na/_sgyu 'phrul rgyas pa las/_thugs rje chen po'i byin rlabs kyis/_/phyogs bcu'i 'jig rten rdul snyed du/_/rgyal ba'i phrin las bsam mi khyab/_/sku gsung thugs dang yon tan dang*/_/lhun gyis grub pa'i phrin las kyis/_/gdul bya rnams ni chud mi gson/_/ngan song sbyong zhing byang chub zhing*/_/ye shes tshogs rdzogs kun tu ston/_/ces gsungs pa ltar las/_re zhig rje btsun 'jam dpal dbyangs nyid tshur mthong so skye'i snang ngor rdo rje slob dpon gyi tshul tu snang ba rje bla ma 'di nyid kyi rnam par rol pa du mas gdul bya 'dul ba'i phrin las ji ltar mdzad tshul gyi cha shas las 'phros te sa bon tsam zhig 'god pa la gsum/_thog mar dge ba ngo mtshar skyes rabs kyi phreng ba mdo tsam bkod pa dang*/_bar du dge ba sku dngos kyi rnam thar rgyas par bshad pa/_mtha' mar dge ba 'byung 'gyur phrin las khyad par can skyong ba'i tshul gyis don bsdu ba'o/__/dang po ni/_'phags bod kyi ljongs 'dir bstan dang 'gro ba'i dpal du sgyu 'phrul sprul pa'i zlos gar rim dang cig car gyi tshul du snang bar mdzad pa rnams 'jam dbyangs bla ma mkhyen brtse'i dbang po'i skyes rabs su bzhugs pa ni yongs su grags shing rnam thar chen por 'khod pa kun dang*/_der mi bzhugs pa'i skyes chen 'ga' zhig rje bla ma'i zhal gsung skyes phreng gsol 'debs rgyas bsdus las 'byung ba mtshan tho tsam bkod na/_bdag cag gi ston pas byang chub sems dpa' chen po blo gros dang spobs pa sogs mtha' yas pa'i bdag nyid can du rgya cher bsngags shing*/_lang+ka'i yul gyi ri ma la ya'i rtser gsang ba'i bdag pos rgyud sde'i gsang mdzod phyes nas 'dzam bu'i gling du rdo rje theg pa'i shing rta thog mar 'dren pa na gdul bya'i 'dus pa dang po rigs can drwa ma lnga'i ya gyal du gyur cing theg chen byang chub sems dpa'i spyod pa rgya mtsho lta bu'i bdag nyid chen po/_chos rgyal lung bstan rdo rje'am skal ldan rgyal po dzaHsogs rjes su 'dzin pa po mi'i rig 'dzin li tsA bi dri ma med par grags pa blo gros rab zhi/_mkhas grub kyi rnam thar rgya gar shar nub tu 'gran zla bral bar paN+Di ta dA na shi las bsngags shing rgya nag dang bod du sku dngos su byon nas chos kyi phrin las dang rdzu 'phrul gyi bkod pa mtha' klas pa'i ma hA paN+Di ta smr-i ti dz+nyA na/_yang dag thugs kyi bka' babs dpal chen po dang gnyis su med pa'i mchog dngos grub pa gsang sngags chu bo bzhi'i bka' babs gnubs kyi rigs 'khrungs dge slong nam mkha'i snying po/_gu ru'i thugs sras mkhyen brtse nus pa'i mnga' bdag lang gro lo tsA ba dkon mchog 'byung gnas/_sgrub brgyud bstan pa'i shing rta dgyes mdzad lo tsA chen po'i thugs sras kyi thu bo gangs ljongs grub pa'i dbang phyug mi la bzhad pa rdo rje/_bde gshegs sman pa'i rgyal po rig pa 'dzin pa'i tshul du bzhengs pa ngo mtshar tshad bzung las 'das pa'i rnam thar can gso rig gtso bor gyur ba'i 'gro phan phrin las mtha' klas shing thugs rje dang byin rlabs kun las khyad par du gyur pa g.yu thog yon tan mgon po/_shing rta chen po klu sgrub kyi rnam 'phrul 'phags pa'i rnam thar gyi mnga' bdag phrin las mkha' khyab tu brdal ba rgyal bas lung bstan 'bri gung skyob pa rin chen dpal/_'jam pa'i dbyangs kyis rjes su bzung ba'i mkhas grub chen po glo bo lo tsA ba shes rab rin chen/_dpal ldan sa skya pa'i 'jam dbyangs bdun brgyud du byon cing mkhyen brtse nus pa'i gter chen mkhas dang grub pa'i dbang phyug chen po dpal ldan bla ma dam pa bsod nams rgyal mtshan/_kun mkhyen e wat+ta pa'i thugs sras 'khor lo sdom pa rdo rje 'dzin pa'i rnam par 'phrul pa mus chen dkon mchog rgyal mtshan/_'phags bod mkhas grub mang pos rjes su bzung zhing rgyal bstan phyogs med du 'dzin skyong spel ba'i mdzad bzang can kun gyi tshad mar gyur pa 'gos lo ye bzang rtse pa'am gzhon nu dpal ba/_chos kyi rgyal po rat+na gling pa'i sku gsung thugs kyi sras snga 'gyur bstan pa'i gsal byed dgung grangs brgya dang bcu'i bar 'gro don rgya cher mdzad pa'i rig 'dzin tshe dbang grags pa/_lo chen bai ro'i rnam 'phrul du lung gis bsngags shing chos rje sa paN gyi sprul par zhal gyis bzhes pa gnas lnga rig pa'i mkhas pa sa skya lo tsA 'jam pa'i rdo rje/_'od gsal 'khon gyi gdung las byon pa mkhas dang grub pa'i mdzad bzang can 'jam mgon a mes zhabs kun dga' bsod nams/_bka' gter bstan pa'i mnga' bdag o rgyan gter bdag gling pa'i sras mkhas dang grub pa'i rnam spyod 'gran zla dang bral ba dbang chen sprul pa pad+ma 'gyur med rgya mtsho/_gangs can phan bde'i gnyen gcig pad dkar 'chang ba 7rgyal mchog blo bzang tshangs dbyangs rgya mtsho/_lang gro lo tsA'i rnam 'phrul pad+ma drag po'i nus rtsal 'chang bas snyigs dus kyi dam sri 'byung po 'dul mdzad rig 'dzin klong gsal snying po pad+ma mdo sngags gling pa/_bi ma dngos snang 'od gsal snang bzhi mthar phyin 'brel tshad don ldan chen po grub dbang rdzogs chen sku phreng bzhi pa mi 'gyur nam mkha'i rdo rje rnams te/_de dag kyang rnam thar zhal gsungs ma las/_rnam 'joms gzungs ni blor blangs tshe/_/srod dus zla ba'i dkyil 'khor la/_/bltas pa'i rkyen gyis yid skyo zhing*/_/dpal ldan sa skya'i chos drwa de/_/yang yang dran pas tshe sngon mar/_/'khon gdung zhig tu skyes pa yi/_/bag chags yad yud dran par gyur/_/mnga' ris paN chen lha btsun che/_/ngag dbang blo bzang rgya mtsho dang*/_/tshangs dbyangs rgya mtsho dpal mkhyen sogs/_/thar thor tsam zhig skabs rer dran/_/zhes dngos su kha shas dang gzhan rnams sogs khongs su bsdu bar mdzad pa ltar/_/khyad par du chos rgyal khri srong gi bag chags shin tu gsal tshul rje nyid sku chung ngu'i dus kaHthog bzhugs skabs sprul sku lo nyung gzhan 'ga' dang sku rtsed lta bus rang rang gi skye ba sngon ma gang yin sems la ci dran bcos med bshad rgyu mdzad pa'i tshe/_/rje bla ma 'dis mi skya gser gyi rna rgyan can dar zab gos chen sngon po'i gos gyon pa zhig yin pa dran tshul gsungs pas/_/gzhan rnams nas sprul sku blo gros kyi skye ba sngon ma mi skya yin pa red ces ku re lab rgyu yod pa byung ba/_phyis rdzong sar nas mkhyen brtse gong ma'i ljags bkod zhal thang nang chos rgyal khri srong na bza' sngon po can mdzad kho na gsungs 'dug pa rdo chag lhu bsgrigs 'dra zhig byung 'dug kyang lo nyung byis pa'i kha la skyag gtad ci yod ces gsungs pa dang*/_lar skyes bu bod chas gos sngon gser rna so byis can gyi bag chags rnam kun yid la gsal ba chos rgyal ga la yin te bod pa'i jo jo zhig yin pa 'dra zhes gsungs las thos/_yang rje btsun mi la'i bag chags gsal tshul gsungs 'phros ni/_rdzong sar bzhugs skabs nyi khyams nas phyag bsil grub rjes lho phyogs rdza ri'i rtse kha bas g.yogs shing na bun 'khrigs pa la gzigs te khyod rang ri 'di 'dra mthong dus snang ba ci shar 'dug gsungs par zhu lan gang yang 'bul ma shes pa'i ngang*/_rje nyid nas nged ri 'di 'dra mthong dus sems dga' skyo 'dres ma shar/_mgur len snying 'dod pa zhig 'ong 'dug pa bka' brgyud pa'i bag chags yin pa 'dra/_khyed nas drang po mi shod pa ma gtogs rje mi la'i sku zhig dang 'bral med kyi ri khrod du gcer bu gzan dkar gyon nas sdod pa yin pa gsungs nas bzhad mo gnang bar mdzad pa 'dis shin tu gsal bar rtogs nus so/__/yang skyes phreng gsol 'debs rgyas par/_ye shes rdo rje'i sku dang kun dga'i gsung*/_/dbang mchog thugs sprul blo gsal yon tan dang*/_/'jam dpal dbyangs dngos mkhyen brtse'i dbang po yi/_/phrin las rnam 'phrul chen por gsol ba 'debs/_/ces bstsal bar mdzad pa'ang kun mkhyen 'jigs gling gi sprul pa'i sku he ru ka dngos mdo mkhyen brtse ye shes rdo rje'i sku'i rnam 'phrul du gsungs te/_'od gsal rdo rje snying po'i ston dang bstan pa la gshe skur byed pa'i rigs dang*/_khyad par mi ma yin pa rnams 'dul ba la ched du sprul pa bsad gso dang sprul bsgyur sna tshogs pas gdul bya 'dul ba'i rnam thar can dpal ri mkhyen brtse he ru ka dpal ye shes rdo rje dang*/_gangs ljongs bstan pa yongs su rdzogs pa'i shing rta chen po rje bla ma thams cad mkhyen gzigs 'jam dbyangs mkhyen brtse'i dbang po ste/_gnyis ka kun mkhyen 'jigs gling gi sprul pa dus thog mnyam zhing thugs rgyud gcig par yongs su grags pa ltar mdo mkhyen brtse'i sprul pa bsdus pa na rje mkhyen brtse'i dbang po nyid la thim par zhal gyis bzhes pa dang mthun par chos rje dpal sprul rin po ches kyang*/_dbang bcu dang po dpe byad rigs lnga'i rtser/_/ma chags pad+ma can gyis lung bstan pa'i/_/sku tshe snga ma'i rten 'brel 'phror gyur pa/_/sku tshe 'di la phyag tu son nas kyang*/_/lung bstan bden pa mngon du 'gyur bar shog_/ces kun mkhyen 'jigs med gling pa'i sku tshe'i tshad brgyad cu rtsa lnga lung bstan pa'i rten 'brel gyi 'phro 'jam dbyangs mkhyen brtse rin po cher bzhugs pa'i zhabs brtan tshe dpag med pa'i sku bcu gsum phul bar mdzad pa ltar/_rje bla ma 'di la'ang grub chen 'jigs med phrin las 'od zer gyi rnam 'phrul rje mkhyen brtse'i thugs sras kyi thu bo kun mkhyen 'jigs med bstan pa'i nyi mas klong snying rig 'dzin 'dus pa'i dkyil 'khor du rdo rje gtor blug gi cho gas sku bzhi'i rgyal thabs chen por mnga' gsol ba'i skabs dgos pa dang dgongs gzhi khyad par can la gzigs te gsang mtshan pad+ma ye shes rdo rje zhes dngos su 'bul bar mdzad pa ltar/_mtshungs med grub pa'i dbang phyug 'dis gsang ba rjes su dran pa'i thugs rjes rjes su bzung bar mngon zhing*/_rdzogs chen mkhan rin po che bsod chos las a ti 'dzin pa rang grol gyi dbang lung gsan skabs bzhugs gdan gzig lpags zhig bting nas rje nyid mkhyen brtse ye shes rdo rje dang dgongs pa dbyer med yin tshul gyi lung bstan dbugs dbyung mdzad pa de skabs rten rab byung du song bas sems spro bar ma gyur kyang phyis 'byung gi ltas yin pa 'dra zhes gsungs shing*/_khyad par 'od gsal snying thig gi bstan pa ches cher gsal bar mdzad cing sngags kyi spyod pa sgra ji bzhin pa bdag gir mdzad pa dang*/_rdzogs pa chen po'i gzhi lam 'bras bu'i rnam bzhag kun gyi spyod yul du ma gyur ba'i zab don kyang thugs la 'khrungs par zhal gyis bzhes/_kun dga'i gsung zhes pa tsam las snying po dang rgyal mtshan bzang po sogs dmigs gsal ma gsungs pas sgra yangs por btang ste rjes dpag gis smos na/_ngor chen rdo rje 'chang gis rjes su yang yang bzung tshul bka' las thos pas byang phyogs thub pa'i rgyal tshab kun mkhyen e waM pa'i gsung dang*/_gzhan yang sa paN gyis dngos nyams rjes su bzung tshul gsal bar gsungs pa'i rgyu mtshan 'og tu 'chad 'gyur ltar la/_brtse chen khu dbon rjes 'brang bcas kyi gsung gi gsang ba mdo sngags kyi gzhung rnams rje 'dis thugs bskyed dang bka' drin gyis 'chad nyan sgom sgrub kyi sde phyogs kun tu 'phel rgyas rgya cher byung bas na dam pa de rnams kyi gsung gi phrin las gcig tu bsdus pa'i rnam thar can du tshad mas grub po/_/gter chen mchog gyur gling par rigs gsum rnam 'phrul sras gsum 'byung bar rdo rje'i lung gis bsngags pa la 'jam dbyangs sprul pa 'gyur med tshe dbang grags pa'am gsang mtshan dbang mchog rdo rje zhes mkhas dang grub pa'i rnam dpyod 'gran zla dang bral ba de nyid kyi bag chags shin tu gsal bar 'dra ste/_gus la dgung sar zhig gi skabs rje bla ma nyid kyi sku skye snga ma ji ltar yin khyod nas brtags pa gyis zhes gnang skyes gya nom pa bcas bka' bstsal pa phran lta bu'i brtags pa la yid rton med pa rang blo rang la lkog tu ma gyur kyang bla mas bka' bstsal pa rjes su sgrub pa las rgyu mtshan gzhan gang yang zhu ma nus te rmi lam brtag khul byas pa'i nub gcig rdzong sar dbang khang gi mkhyen brtse gong ma'i bzhugs khri gcig gi steng rje btsun rin po che grags pa rgyal mtshan/_sa skya paN chen/_chos rgyal 'phags pa bcas lhan du spungs te bzhugs pa rmis te zhus pas/_da dung brtags dgos gsungs/_gnubs nam mkha'i snying po yin zhes pa'i sgra zhig thos tshul zhus pas/_mkhyen kong mchog gsum gyi gter chos su nam snying sprul pa gter sras tshe dbang grags pa dang tsha ba rin chen rnam rgyal gnyis yin dar bas gter sras yin mi 'ong ngam gsungs pa de'i thugs kyi rnam 'phrul du zhal gyis bzhes sam snyam/_de'ang gter sras 'di'i mdzad pa 'phro can du gyur pa rnams rje bla ma nyid kyis skyong bar mdzad pa dang*/_mchog gling gter chos skor nyams bzhes dang 'chad spel rgya cher gnang zhing*/_bka' rgya can rnams kyi 'chad thabs sogs gsal byed yig cha yang mang du mdzad/_gdan sa gong 'og tu bstan rgyun la smin nges pa'i bshad sgrub kyi sde gsar 'dzugs dang*/_mchog sprul khag ngos 'dzin gyis smin grol rgya cher bstsal nas chos kyi khri la dbugs dbyung sogs phyogs 'di'i bstan pa der 'dzin bcas dngos dang brgyud nas rje 'di'i thugs rje'i grib bsil la ngal 'tsho thob pa kho na'o/__/blo gsal yon tan gyi sprul pa ni/_zhwa lu kun mkhyen mchog gi sprul pa'i sku blo gsal bstan skyong rin po cher dad gdung rgyun chags su mchis shing sku'i byad dbyibs sogs skabs rer nges par dran snyam byed ces dngos su thos pas de nyid kyi yon tan gyi sprul pa yin te/_gsang chen rgyud sde'i zab don dag 'chad pa la shin tu ngo mtshar ba'i khyad chos dang ldan cing*/_khyad par dpal dus kyi 'khor lo'i bka' babs shing smin grol rgyud bshad dang bcas pa'i chos 'khor rgya cher bskor bar mdzad pa dang*/_phyi ma'i du su sham+b+ha lar rigs ldan nyer lnga pa'i skur bzhengs pa'ang zhal gyis bzhes par mdzad/_rnam pa gcig tu na tshar chen chos kyi rgyal po'i ring lugs la thugs shin tu dgyes shing rje 'dis ye shes kyi skus rjes su bzung bar gsungs pa dang*/_gsang chen slob bshad kyi gdams zab rnams nyams bzhes dang 'chad spel rgya cher gnang zhing de dag nyams su len pa'i sgrub pa'i sde 'dzugs pa sogs snyan brgyud kyi bstan pa rgya cher gsal bar mdzad pas na tshar pa chos rje blo gsal rgya mtsho'i yon tan rdzogs pa'i rnam thar bdag gir mdzad pa'ang kun gyi spyod yul du gyur pa dang*/_'jam dpal dbyangs mkhyen brtse'i zhabs kyi phrin las rgya mtsho mtha' yas pa'i rnam thar 'phrul pa chen por gyur pa ni mngon sum tshad ma ste/_phyogs dang ris su ma chad pa'i bstan pa mtha' dag 'dzin spel gnang zhing*/_mtha' dang mu med pa'i 'gro ba'i don bsam gyis mi khyab pa rgya cher skyong ba sogs rje de nyid kyi rnam thar rnams ji bzhin mngon du mdzad pa'i tshul 'chad 'gyur ltar zhal gyis bzhes pa yin no/__/de la rje bla ma mkhyen brtse'i dbang po ni/_phyogs dang ris su ma chad pa'i bstan pa yongs su rdzogs pa'i shing rta chen po 'gran zla thams cad dang bral ba'i rnam thar can du kun mkhyen blo gros mtha' yas dang phan tshun nyams rtog kyi gsung gleng rtag par gnang ba dang mthun pa'i bsngags brjod dang*/_mi pham 'jam dpal dbyangs kyis bstod bsngags/_thugs kyi sras rdo grub kun mkhyen bstan pa'i nyi ma'i gsung sogs las gsal bar ltar/_gangs can gyi ljongs 'dir chos rgyal mes dbon gsum gyi thugs bskyed dang*/_sprul pa'i lo paN rnams kyi bka' drin las bstan pa rin po che mdo sngags rig gnas bcas 'chad nyan sgom sgrub kyis dar rgyas dang*/_brgyud 'dzin mkhas grub bsam gyis mi khyab pa zhig byon na'ang dus dbang gis bshad sgrub kyi rgyun phal cher dbyings su thim la nye shing*/_dpyod ldan shin tu mkhas par rloms pa dag gis kyang rgyal bstan yongs rdzogs kyi snying po gang yin ngos 'dzin tsam yang dkon par gyur pa na/_rje 'di'i sngon gyi thugs bskyed dus su smin pas rgyal bstan rin po che kho na thugs la bcangs te snying stobs dang brtson 'grus chen pos dbus gtsang bod chen kun tu lan mang du bya bral kun spang gi tshul gyis phebs shing*/_mdzad pa'i gtso bo snga phyi mi lo bcu gsum ring gsar rnying ris su ma chad pa'i bshes gnyen brgya dang lnga bcu lhag mnyes pa gsum gyis bsten nas/_ljongs 'dir deng sang 'chad nyan gyi rgyun mchis so 'tshal gyi mdo sngags rig gnas dang bcas pa dang*/_gsar rnying gi smin grol rgyab brten bcas yongs su grags pa rnams dang*/_rgyun shin tu dkon pa'i rigs bcas 'bad pa chen pos gsan nas gdams pa'i yig cha mtha' dag kyang ched du bskrun par mdzad/_bar skabs ci rigs pa dang sku tshe'i smad du them pa spangs te lhag pa'i lha rab 'byams kyi bsnyen sgrub dang*/_rdzogs rim zab mo rnams la nyams bzhes yun ring gnang bas so so'i gzhung nas bshad tshod kyi lam rtags rnam kyang zhar byung du mthar phyin cing rnam kun mchog ldan gyi stong nyid dang mchog tu mi 'gyur ba'i bde chen zung du 'jug pa mthar thug pa'i ye shes mngon du mdzad nas nam mkha' lta bu'i rnal 'byor du zhal gyis bzhes/_rtsa rlung thig le'i 'du ba dbu ma'i dbyings su dag ste rdo rje nang gi sa lam gyi mngon rtags tshad la phebs/_sangs rgyas byang sems dang 'phags bod kyi mkhas grub bstan pa'i shing rtar gyur pa rnams kyis yang yang rjes su bzung zhing so so'i gdams pa'i gsang mdzod bstsal ba la brten gsar rnying ris med pa'i zab chos yongs su rdzogs pa mtha' dag gi byin rlabs nye brgyud khyad par can brnyes/_zab mo'i gter dang yang gter skor rgya cher phyag tu babs/_thugs bcud klong chen dgongs pa'i gter mdzod rdol zhing rtsa gsum rab 'byams kyi dgyes zhal rtag par gzigs shing dag snang dang snyan brgyud kyi chos sgo mtha' yas pa la dbang bsgyur/_gsang ba'i gnas rjes su dran pa las man ngag gi nges pa rgya cher byung bas mtshon chos kyi rgyun gyi ting nge 'dzin la dbang 'byor zhing rgyal bstan yongs rdzogs kyi shing rta mtshan don mthun par bzhugs pa dang*/_spyir gsang ba gsum gyi rnam thar cha shas res kyang bstan dang 'gro ba'i phan bde rgya cher spel ba'i phrin las mtha' dag so skye'i blo yul las 'das shing*/_bye brag tu gsar rnying ris med kyi bstan 'dzin che phra nas phal pa nyams chung yan chad kyi don gnyer kun la so so'i blo gros dang skal par 'tshams pa'i chos sbyin rnam kun bar med du spel ba'i phrin las rgya cher bskyangs pas rgyal bstan yongs kyi srog mthud par mdzad/_khyad par du ye shes dag pa'i gzigs pa 'khrul pa dang bral bas lo chen bai ro dngos byon 'jam mgon blo gros mtha' yas zhabs la mdzod chen rnam lnga'i bka' bab tu mnga' gsol zhing*/_kun mkhyen rdzogs pa'i sangs rgyas kyi bka' lung tshad ma dang*/_rgyal dbang pad+mA ka ra'i gter lung khag dpang por bcol nas 'chad pa dang rtsom pa'i phrin las mtha' yas pas ris med pa'i rgyal bstan gsal ba'i phrin las can du bsngags par mdzad de/_sngar nas rje nyid kyis gter rnying rgyun dkon pa'i rigs phyogs bsgrigs mdzad bzhed kyi dkar chag dang*/_bsgrigs zin pod kha shas bcas pa dbang lung gi rgyun shin tu dkon pa'i rigs sogs rgya cher bstsal bar mdzad/_gzhan yang rje mkhyen brtses gsar rnying gi gdams khrid gsan pa rnams kyi snying po gces btus zab khrid rab 'byams zhes pu sti nyi shu skor phyogs bsgrigs gnang ba rnams kyi smin grol 'jam mgon gu Nas sngar ma gsan pa'i rigs dang*/_gsan pa rnams kyang byin rlabs nye brgyud kyi khyad par gyis yang bskyar gsan par mdzad cing*/_tshul 'di rnams las gtso bor 'phros te 'jam mgon blo gros mtha' yas dang*/_gter chen mchog gling bcas nas zhu bskul nan tan dang rnam gsum zhal rgyas thugs yid gcig 'dres sogs kyi rten 'brel las sngon chad yongs su ma grags pa'i bka' babs chen po bdun gyi gsang mdzod rnams kyang rgya cher snang bar mdzad pa sogs kyis snga 'gyur brgyud pa drug ldan zab gter rgya mtsho'i yang zhun bcud du dril ba rin chen gter mdzod dang*/_gangs ljongs rgyal bstan yongs kyi snying bcud sgrub pa nyams len gyi rgyun dang ldan pa mtha' dag gi yang snying gces btus sogs gcig tu bzhugs shing ngo mtshar byin rlabs kyi tshan khas khyad par du byas pa gdams ngag rin po che'i mdzod kyi shing rta'i lam srol gsal bar phyes shing*/_de dag la gsal byed rigs gang dgos 'jam mgon blo gros mtha' yas zhabs kyis legs bshad khyad 'phags rnams gsar bskrun dang 'chad spel phrin las kyi rgyun rgya cher bskyangs pas bstan pa'i srog mthud par mdzad pa dang*/_mdzod gzhan gsum yang rje mkhyen brtses dngos brgyud nas zhu bskul sogs kyi bdag rkyen las gtso bor gyur cing*/_chos mdzod chen po de dag 'gro don gyi sgo thog mar 'byed pa'i chos gzhi 'ding ba sogs dang*/_rjes gtang rag gi maN+Dal rgya che dang 'brel chos dang gang zag tshad mar gyur cing dgos gnad che ba'i rgyu mtshan bsngags brjod bcas 'gro don 'phel rgyas yun gnas kyi thugs bskyed dang rten 'brel khyad par can mdzad/_gzhan yang rdo rje'i lung gi dgongs don bstan 'gro'i mdzad pa gal che ba'i rigs rnams ji bzhin mngon du 'gyur ba'i mthun sbyor gang dgos dngos brgyud nas yang yang gnang zhing phan tshun bka' chos rgya cher gsan bzhes mdzad pa sogs thun min ston 'khor dgongs klong gcig 'dres kyi thugs bskyed dang mdzad phrin lhan cig gi bdag nyid can du gyur ba dang*/_'jam mgon blo gros mtha' yas zhabs kyis kyang gangs can gyi ljongs na 'gran zla gnyis pa ma mchis pa'i mkhas dang grub pa chen po phyogs dang ris su ma chad pa'i rgyal bstan yongs su rdzogs pa'i shing rta pa zhes dang*/_lus rten 'dir chos spong gi las ma bsags tsam du gyur pa rje bla ma 'di kho na'i bka' drin yin zhes sogs yon tan dang bka' drin rjes dran gyi bstod bsngags yang yang 'bul ba dang bcas thun mong ma yin pa'i rigs bdag tu 'dzin par mdzad/_o rgyan mchog gyur gling par rje nyid nas phur pa dang yang dag he ru ka'i smin byed kyis bar chad bsal zhing rtogs pa spar bas rtsod bral dus babs 'gran zla dang bral ba'i gter chen du mnga' gsol zhing thugs rgyud dgongs pa'i byin gyis brlabs pas mgrin pa'i rtsa mdud grol zhing*/_mkhyen gnyis ye shes kyi rtsal chen rdzogs/_rje mnga' bdag yab sras kyi las 'phro sad nas rten 'brel nyams pa rnams sor chud cing sngon byon gter 'byin kun las khyad par du gyur pa'i zab rgyas kyi gsang mdzod ngo mtshar can rgya cher snang ba dang*/_gnas gter brgya rtsa'i zhal ras dngos brgyud nas gsal bar mdzad cing 'gro don phyogs med du 'phel/_gter chos phal cher dang khyad par bla sgrub skor bzhi/_rdzogs chen sde gsum gtsor gyur snying thig bdun gyi skor rnams rje nyid dang thun mong gi zab gter yin par gsungs shing*/_gzhan gter kha mang po zhig kyang rnam gnyis lhan rgyas kyis bzhes pa dang gtan la phab pa sogs mdzad/_sde gsum cha lag rigs gsum snying thig tu rje mkhyen brtse'i dgongs gter 'jam dpal snying thig sgron ma bdun pa'i byin rlabs kyi rgyun yang 'dres par grags/_gter chen 'dis rje mkhyen brtse bi ma la dang*/_dpal chen po/_'phags ma yid bzhin 'khor lo sogs dbang gang gsan pa de'i dkyil 'khor gyi gtso bor dngos su mjal tshul mang zhing*/_gsung las kyang mthar thug nges pa don gyi rtsa ba'i bla ma pad+ma 'od gsal mdo sngags gling pa zhes thun min blo gtad gcig chog gi rigs bdag tu 'dzin par mdzad do/_/gzhan yang gter ston rgyal po lnga la bran brgyas bskor/_/zhes pa ltar gu ru'i rgyal tshab gter 'byin gyi rgyal po lnga par rdo rje'i lung gis mnga' gsol bar gyur pas dus skabs 'di'i gter chen las rab gling pa/_dre med pad+ma gling pa/_khams_sprul bstan pa'i nyi ma/_bon gter gsang ba kun grol rtsal sogs snga phyir byon pa'i gter ston che phra thams cad kyang rje 'di'i gter slob tu gyur pas dngos dang brgyud nas zhabs pad du bsnyen cing so sor bar chad bsal ba dang*/_lung don bstan 'gro'i bde thabs sgrub tshul gyi bslab bya sogs ji ltar 'os pa'i mthun sbyor kyang gsungs par mdzad pa dang*/_gter chos kun gyi the tshom sel ba'i dpang po'ang rje 'di kho nar bcol ba ste/_'jam mgon blo gros mtha' yas zhabs kyi rtsa gsum dgongs 'dus rnam gnyis zhal rgyas kyis 'bebs rgyu'i rten 'brel 'phro can du gyur pa phyis su 'jam mgon rin po cher brda bsgyur gsal na'ang rje 'di nyid bzhugs min gyis the tshom gyi gnas su gzigs nas btang snyoms mdzad pa bzhin no/__/ma hA paN+Di ta mi pham 'jam dbyangs rnam par rgyal ba la zab rgyas kyi gdams pa rgya mtsho lta bus rjes su bzung zhing mkhyen rab ye shes kyi sgo phye ste sku gsung thugs kyi rten dang rje nyid kyi dbu zhwa paN zhu sogs bstsal nas don gyi rgyu mtshan chen po bzhi dang 'brel ba'i mtshan mi pham 'jam dbyangs rnam rgyal rgya mtsho zhes gnang ste/_mkhas tshul gsum gyis rgyal bstan spel ba'i phrin las can du mnga' gsol/_mdo sngags kyi legs par bshad pa rab 'byams mdzad 'os par bka' gnang ba ltar thugs bskyed dang rten 'brel gyi bden don ji bzhin mngon du gyur te mkhas pa'i grags snyan phyogs kun tu khyab/_gzhung lugs rab 'byams dang khyad par nang rgyud yo ga gsum gyi bshad sgrub ches cher gsal ba'i mdzad rjes dang ldan cing snga 'gyur bstan pa'i shing rta chen po 'gran zla dang bral bar gyur/_rje mkhyen brtse'i dbang po dang gter chen mchog gling lhan rgyas kyis dpal yul rgya sprul mdo sngags bstan 'dzin la bkas bskul zhing khyad par rje nyid nas dbang lung rdzogs par bstsal zhing bka' srung legs ldan gyi dbang gi mtha' brten bka' bsgo'i skabs chos skyong dngos su phebs pa lta bu'i sku'i 'jigs zil yang byung zhing phrin bcol nan tan du mdzad/_lag len gyi slob dpon dang sgrub chas rigs sogs mthun rkyen bslab ston zhib par gnang ba bzhin chos sde chen po dpal yul rnam rgyal byang chub gling du bka' ma'i dkyil 'khor chen po nyer bdun gyi sgrub mchod lo bstar du tshugs pa dang*/_de rjes rim par gdan sa der gzhung rnying chog khrigs bcas dpe lung gi rgyun yod rigs zhib sdud spar du bkod thub pa byung zhing*/_de bzhin kaHthog zhe rdzogs rnams su'ang sngar rgyun chog khag ci rigs yod pa rnams gong 'phel rim rgyas kyi gzhir gyur cing*/_gter chen mchog gling gi gdan sa gong 'og tu'ang bka' ma'i sgrub mchod 'dzugs pa'i rten 'brel gyi sgo phye ba sogs kyis ring brgyud bka' ma'i skor rnams 'chad spel gyi rgyun rgya cher 'phel ba dag kyang rje 'di kho na'i phrin las kyi cha shas rmad du byung ba'o/__/gsang bdag rdo rje 'dzin dngos 'jam dbyangs blo gter dbang po mchog nas rgyud sde'i bka' bsdu mdzad bzhed rje 'dir skyabs 'jug zhu rgyu las gzhan 'grub thabs dka' bar dgongs nas ched du zhabs pad bsnyen pa na thugs dgyes tshul ston cing sngar nas de bzhin byung na snyam pa yod kyang bgyi 'os mang bas lhag_/da res khyed nas bsgrigs rgyu byung na dgos gal shin tu che bas mthun sbyor rigs gang dgos mdzad chog pa'i zhal bzhes gnang ste/_sa ngor zhwa lu gtsor gyur bka' srol sna tshogs las byung ba'i rgyud sde gong 'og gi dbang bka' dang rdzogs rim zab khrid rigs/_rgyab brten rgyud bshad skor bcas rgya cher bstsal cing*/_bsdu 'os kyi rkang grangs dang go rim chog khrigs rnams kyi khungs dang brten gzhi gang dgos/_cho ga'i chings dang mtshams sbyor gyi rgyas bsdus/_rgyud sde gong 'og gi bka' srol 'dra min gyi phyag len khyad par sogs phyag khrid gnang bar mdzad/_bsgrigs zin pa phal cher la zhib 'jug sogs thugs khur zab bzhes rgya cher gnang*/_'jam mgon blo gros mtha' yas mdun zhu sbyor gnang ste/_mar rngog jo nang sogs kyi rgyud sde rnams dgos pa'i dbang gis gsan par bskul ba dang*/_gzhan yang rje nyid kyi zhal slob brag yab gdong kat+ta khri pa ngag dbang blo bzang dam chos rgya mtshor dkar chag rtsom rgyu dang*/_mang thos nor bu bstan 'dzin sogs gzhan la'ang mthun sbyor zhabs 'degs sgrub dgos par bka' gnang ba sogs kyis gsang chen rgyud sde rab 'byams kyi bka' bsdu zab mo grub ste/_chos sgo thog mar 'byed pa'i zhu ba pos chos gzhi 'ding ba sogs kyi zhal bzhes mdzad/_tshul 'di las 'phros te gsung ngag lam 'bras tshogs slob kyi glegs bam phyogs bsgrigs kyang zhar byung rang shugs kyis grub pa dang*/_dkyus su bzhugs ma grub kyang 'jam mgon mi pham zhabs kyi dus 'khor 'grel chen yang gtso bor 'di las 'phros te byung ba'o/__/chos mdzod chen po de dag rnams su snying po'i tshul du gtso bor rje nyid kyi gsung gi gsang ba thun mong ma yin pa'i skor phal cher bzhugs shing*/_khyad par du sgrub thabs kun las btus pa zhes 'phags pa'i yul gyi mkhas shing grub brnyes kyi slob dpon rnams la rgyal ba rdo rje 'chang dngos dang*/_lhag pa'i lha so sos bstsal ba'i sgrub thabs dang man ngag gi rim pa rgyud sde bzhi dang 'brel ba mtha' yas pa zhig lo tsA rnams kyis bod du bsgyur bshad mdzad cing brgyud 'dzin mkhas grub tshad mar gyur pa rnams kyis 'dzin spel sogs dar rgyas cher byung ba rnams las/_deng sang rgyun bzhugs pa so so'i khungs dang 'brel zhing rjes su gnang ba sogs gdams ngag gi rgyun dang ldan pa'i zur bka'i rigs gtso che ba mtha' dag dang*/_snga 'gyur bka' gter las byon pa'i sgrub skor khyad 'phags ci rigs pa/_spyi bka' ba ri brgya rtsa dang*/_sgrub thabs rgya mtsho/_snar thang brgya rtsa dang*/_grub brgya'i byin rlabs rigs gnyis bcas/_de dag kyang so so'i rtsa ba'i yig rnying khag dang*/_tshad mar gyur ba'i bla ma gong ma rnams kyi sgrub thabs dang man ngag gi yig cha rigs gzhir bzhag la gsal byed gang dgos rje nyid nas legs bshad khyad par can rgya cher spros pas mdzes par brgyan te/_dngos grub rnam pa gnyis sgrub pa'i tshul mtha' dag tshang la ma nor bar ston pa/_yid ches pa'i khungs dang 'brel zhing rgyas bsdus gnyis ka'i phyogs su ma lhung ba sogs ngo mtshar ba'i khyad chos du ma dang ldan pa'i chos kyi mdzod chen po'i bka' bsdu khyad par can grub par mdzad pa dang*/_de dag du ma 'khod pa'i bstod tshogs/_gsung mgur/_rig gnas skor/_zin bris sna tshogs shin tu mang ba sogs gsung thor bu'i skor bcas rgya cher bzhugs shing*/_gter mdzod dkyus su mi bzhugs pa'i dgongs gter rtsa gsum 'od gsal snying thig sogs zab gter rigs kyang mang du mchis so/__/de ltar smros pa rnams ni sa bon tsam ste mdor na rje 'di nyid kyi bsam gyis mi khyab pa'i thugs bskyed dang*/_thabs mkhas kyi phrin las rnam pa thams cad pa'i mthus rgyal bstan rin po che'i srog mthud gcig pur gyur pa chos mdzod chen po rnams kyi bka' bsdu mdzad pa ni deng sang gi dus skabs 'dir bstan srog mi nyams pa la ched du dgongs pa som nyi dang bral zhing*/_bstan pa ming med lta bur gyur pa'i skabs 'dir yang zab rgyas chos kyi snying po rnams ci dgar spyod du yod pa rje bla ma 'di'i bka' drin rjes su dran pas bstan pa 'dzin pa kun gyis 'chad nyan dang sgom sgrub kyi sri zhu la brtson par bya ba'i gnas so/__/de ltar yang 'jam mgon blo gros mtha' yas zhabs kyis/_bod yul rgyal ba'i ring lugs la/_/kun gyi tshogs rjer gyur pa yi/_/tshul 'di kho na 'jig rten 'dir/_/thub dbang gnyis pa'i rnam thar 'dzin/_/zhes pa dang*/_/ces pa dang*/_sa sogs 'byung ba mthu che yang*/_/kun khyab nam mkhar mtshungs min ltar/_/gangs can bstan 'dzin su dang yang*/_/thun min rnam thar rmad kyi phul/_/zhes dang*/_de bzhin du mi pham 'jam dpal dgyes pa'i rdo rjes kyang*/_deng sang gangs ri'i khrod 'di na/_/grub par grags kyang mkhas btsun bral/_/mkhas kyang grub 'bras mthong dka' bas/_/phun tshogs ldan pa rnyed par dka'/_/mkhas dang btsun dang grub pa gsum/_/'gran pa bzhin du khyod la 'phel/_/'di 'dra'i phun tshogs mthong dka' bas/_/ngo mtshar che yang shes pa dkon/_/zhes sogs rgya cher bsngags par mdzad pa lta bu ste/_zhib par rnam thar chen mo dang*/_rje blo gros mtha' yas kyi rnam thar/_mchog gter rnam thar dris lan bcas/_mdzod chen lnga dang*/_rgyud sde dang sgrub btus sogs kyi brgyud yig dang dkar chag rnams las shes par bya'o/__/de rnams kyis sngon byung ngo mtshar 'khrungs rabs kyi rim pa mdo tsam bstan zin to/_/de ltar smos pa'i mkhas grub de dag kyang la la ni dus mnyam du byon pa dang*/_'ga' zhig sku tshe'i stod smad kyi snga phyi tsam yod pa dang*/_phal cher gcig rjes su gcig byon pa dang*/_'phags bod kyi mkhas grub yongs su grags pa thams cad kyi sprul pa yin par zhal gyis bzhes pa lta bu sogs tshur mthong blos dpyad par dka' ba yod kyang*/_so skye'i rnam par shes pa snga ma 'phos nas las rlung gis phyi ma'i mngal du chud pa lta bu las kyi dbang gis khams gsum du skye ba brgyud pa ma yin pa/_'phags pa'i sa la bzhugs pa rnams smon lam dang snying rje'i dbang gis gcig dang du ma'i spyod yul las 'das pa'i ye shes sgyu ma'i rol pa gang la gang 'dul cir yang ston pa ni/_nam mkha'i nyi ma nyid sa gzhir chu'i snod ji snyed pa de snyed du de dang 'tshams pa'i gzugs su shar ba lta bu ste/_rgyud bla ma las/_ji ltar tshangs pa tshangs pa yi/_/gnas nas 'pho ba med bzhin du/_/lha yi gnas ris thams cad du/_/snang ba 'bad med ston pa ltar/_de bzhin thub pa chos sku la/_/bskyod pa med par khams kun tu/_/skal ldan rnams la 'bad med ltar/_/sprul pa dag ni ston par mdzad/_/ces gsungs/_gzhan don du sprul pa 'byung tshul yang*/_mdo sde rgyan las/_de lta na yang de yi mthus/_/gdul bya'i skal ba ji bzhin du/_/srid pa ji srid gnas kyi bar/_/de yi mdzad pa rgyun mi chad/_/ces so/__/gnyis pa bar du dge ba sku dngos kyi rnam thar rgyas par spros te bshad pa la gnyis/_thun mong gtso bor byas te spyir bshad pa dang*/_thun min khyad par du 'chad pa'o/__/dang po ni/_gdul bya skal mnyam mthun snang thun mong ba rnams kyi ngor ji ltar snang ba'i mdzad pa las gtso bor brtsams te spyir 'chad pa la bdun/_thugs bskyed dang sgyu 'phrul gyi rol pas sprul pa'i zlos gar nye bar bzung zhing mchog gi sprul pa'i sku mnga' gsol ba'i tshul/_bstan pa'i 'jug sgo sdom pa gsum gyi bslab pa ji ltar bzhes pa'i tshul/_yongs 'dzin mkhas grub dam pa rnams bsten cing gsan bsam gyi mthar son pa'i tshul/_rim gnyis zab mo'i rnal 'byor la thugs gzhol bas lam gyi drod rtags brnyes pa'i tshul/_bstan 'gro'i don du bzang po'i phrin las ji ltar mdzad tshul/_zhar byung bsod nams kyi tshogs bsags sgo du ma nas rgya cher sgrub pa'i tshul/_rten des tha ma'i mdzad pa mthar phyin pa bskyangs nas sprul pa dbyings su bsdus pa'i tshul 'phros don dang bcas pa'o/__/dang po ni/_'phags pa rnams kyi thugs bskyed dang phrin las gdul bya'i yul la dus las cung zad kyang yol ba med pas snyigs ma'i dus kyi sems can gdul dka' ba rnams 'dul ba'i ched du rnam par grol ba'i bde ba la mi gzhol bar srid pa'i tshul bzung ba ste/_sdud pa las/_dpa' bo gar spyod shes rab pha rol phyin pa yis/_/khams gsum yang dag 'das las rnam par grol ba'ang min/_/nyon mongs bsal bar gyur kyang skye ba ston par byed/_/rga dang na dang 'chi ba med kyang 'chi 'pho ston/_/ces dang*/_dper na bran mo dbang med rje bo'i dbang*/_de bzhin dpa' rnams sems can kun gyi dbang gis 'gro/_/zhes gsungs pa ltar gang la gang 'dul gyi rnam 'phrul tshad med pas 'gro ba'i don rgyun mi 'chad pa ni 'phags pa rnams kyi chos nyid yin cing*/_lhag par rigs gsum mgon po dang*/_de las 'jam dpal sprul pa'i chos rgyal chen po nyid bod 'bangs rnams la thugs shin tu brtse bas sprul pa'i rnam rol sna tshogs yang nas yang du 'byung ba'i tshul sangs rgyas gnyis pa gu ru pad+mas rdo rje'i lung du rgya cher gsal bas dngos shugs ci rigs su bstan par nges shing*/_lung zin sprul pa'i skyes bu la mi nor ba'i mtshan rtags dgongs 'dus lung bstan chen mor gsungs pa rnams kyang rje bla ma 'di la thams cad gsal bar mnga' ba dang*/_spyir sku chung ngu'i dus nas zab gter gyi las 'phro can yin pa gdon mi 'tshal ba dngos brgyud kyi gsung dang mdzad pa la shes kyang*/_rigs kyi bdag po kaHthog si tu rin po ches gnas dus dang bstan pa'i bab la dgongs pa'i thugs bskyed chen pos gter dang lung bstan gyi rigs la thugs mi mnyes pa'i tshul gyis bka' bkyon yang yang gnang ba dang*/_yongs 'dzin bla ma yang de dang mtshungs shing*/_rje nyid kyang gsang ba srung ba la thugs sgam pas de rigs rtsal 'don ma mdzad pa 'dra'o/__/rje bla ma mkhyen brtse'i dbang po'i rnam thar zhal gsung du ma 'ongs pa'i rnam thar skabs las/_ma 'ongs bi ma'i bla sgrub skabs/_/tshe 'di 'phos ma thag pa na/_/sprul gzhi ri bo rtse lnga ru/_/paN chen bi ma'i thugs kar thim/_/sprul pa lnga 'byung smon lam mthus/_/ris med bstan par phan ces gsungs/_/ces gsungs pa ltar kun gzigs chos kyi rgyal po mkhyen brtse'i zhabs nyid sku de'i mdzad pa rdzogs rjes sprul gzhi'i thugs kar thim nas slar yang gsang ba mi zad rgyan 'khor lnga'i rnam 'phrul gyis ris med pa'i bstan 'gro'i don rgya cher mdzad pa'i bden don mngon du gyur tshul ni/_'jam mgon rdo rje 'chang blo gros mtha' yas kyis mchog sprul ngos 'dzin gyi lung byang las/_zil ldan chu bo g.yas nas 'bab/_/gser ldan chu bo g.yon nas 'bab/_/chu gnyis 'dus pa'i sa mtshams nas/_/yar la bltas pas rgyang grags gcig song mthar/_/rnam 'phrul sbrul rta lug gsum po/_/zhes 'byung bas zil 'bri'i chu gnyis 'dus mtshams su 'khrungs pa'i mchog sprul rin po che ngos 'dzin mtshan gsol rgyal dbang karma pa bco lnga pa mkha' khyab rdo rjes mdzad pa rtsa ba'i gdan sa rdzong sar du mnga' gsol ba'i dgung snying rta lo pa dang*/_gsung gi sprul pa 'jam mgon bla ma kong sprul rin po ches mtshan dang na bza' bstsal zhing mkhan chen bkra shis 'od zer gyis dpal spungs gdan sar mnga' gsol mdzad pa tre shod be ri rgyal po'i sras su 'khrungs pa de nyid kyi mkhan chen bkra shis 'od zer las sdom pa gsum legs par bzhes/_rgyal dbang karma pa mkha' khyab rdo rje las rgyal ba'i bka' 'gyur rin po che'i ljags lung*/_bka' brgyud sngags mdzod chen po'i dkyil 'khor rnams sgrub mchod zhag bdun dang 'brel ba'i dbang chen/_smin khrid lung bcas dang*/_nang brtag rgyud gsum gzhung chung gnyis dang bcas pa'i bshad pa/_zab lam nA ro chos drug dang phyag rgya chen po'i chos skor gyi smin khrid zhib rgyas dang*/_jo nang rin 'byung brgya rtsa/_sgrol ma rnal 'byor ma'i dbang dang rjes gnang rgyud bshad bcas dang*/_kat+ta tshang thun mong ma yin pa'i bka' srung mgon po'i dbang dang*/_man ngag zab khrid bcas dang*/_'khor lnga rjes 'brang dang bcas pa'i dbang dang rjes gnang thams cad dang*/_karma pa zhwa dmar nag sku phreng thams cad kyi bka' 'bum skor gyi lung dang*/_dpal ldan dzaM thang gi chos rje rnams las jo nang gi bde mchog dang*/_gshin rje rab 'byams/_rje sgrol ba'i mgon po'i bka' 'bum gyi dbang lung yongs rdzogs/_dpal dus kyi 'khor lo'i dbang chen jo lugs ltar dang*/_sbyor ba yan lag drug gi rdzogs rim gyi khrid sogs dang*/_mkhas dbang bla ma bkra shis chos 'phel las bcu phrag rig pa'i gnas rnams zhib khrid dang*/_dbang lung gnad che ba du ma/_zur mang drung rin po che las rgya chen bka' mdzod dang*/_gdams ngag mdzod yongs rdzogs/_rgyal sras 'jam mgon mchog sprul las/_rin chen gter mdzod yongs rdzogs kyis mtshon thos bsam rgya cher mdzad cing*/_rgya dkar nag_/dbus gtsang*/_lho 'brug rnams su gnas gzigs dang*/_gdan sa dpal spungs su kun rig gi sgrub sde gtan 'jags/_rigs kyi bdag po rgyal mchog bco lnga pa'i bka' 'bum yongs rdzogs spar gsar bzhengs sogs 'khor lo gsum gyi mdzad pa rmad du byung ba dang*/_thugs sprul grub dbang shAkya shrI'i sku gsung thugs kyi sras 'phags mchog rdo rje ni/_yab rje rnal 'byor gyi dbang phyug la ci mdzad legs mthong gi mos gus 'pho 'gyur med pas mnyes pa gsum gyi zhabs tog mthar son/_phrin las kyi gtso bo snying po'i sgrub pa mdzad pas rtogs pa don brgyud kyi rgyal thabs la mnga' brnyes/_gtso cher yab rje'i mdzad pa'i 'phro bzhin gdul bya ris med pa la smin khrid kyi gdams pas nges don dga' tshal du dbugs dbyung*/_thams cad mkhyen gzigs chos kyi blo gros la nyams rtogs 'khrungs tshul gyi gsung gleng gnang bas theg pa mchog gi lta dgongs la dbang 'byor ba'i bstod bsngags dang*/_grub dbang rin po che'i dgongs gter skor sogs kyi smin grol kyang gsan/_yab rje'i phyag rdzogs kyi dmar khrid thun mong ma yin pa'i zhal lung glegs bam du bkod pas chos sku'i mchod sdong gdul bya'i skal bar bzhag pa sogs snying po'i bstan pa la phan pa'i phyag bzhes sogs ngo mtshar chen po mnga' ba'o/__/phrin las kyi sprul pa chu sbrul dgung ldan 'di nyid dang*/_grub dbang rdzogs chen lnga pa thub bstan chos kyi rdo rjes ngos 'dzin dang ru dam rdzogs chen gyi gdan sar mnga' gsol mdzad pa'i mchog sprul dgung snying lug lo can mkhyen rtogs mtshungs zla bral ba dang*/_yang rje mkhyen brtse'i zhal 'phros khungs dag gi rgyun las dpal sa skya'i gdung brgyud du'ang sprul pa gcig 'byung tshul gsungs pa'i bshad srol ltar bdag chen ngag dbang mthu stobs dbang phyug nyid yin par zhal gyis bzhes shing yongs su grags pa ltar la/_yab rje dgongs pa rdzogs pa'i tshe sku dngos kyis byang sham+b+ha la'i zhing du phebs nas de'i me tog gi chun po bsnams te byon pa kun gyis mjal du yod pa sogs grub pa'i rtags khyad du 'phags pa du ma bstan par mdzad pa dang*/_spyir 'jam dbyangs bla ma thams cad mkhyen pa nyid rgyal bstan ris su ma chad pa 'dzin skyong spel ba'i thugs bskyed kyi g.yar dam lhur bzhes shing*/_phrin las dus su babs pas mdo dbus gtsang khams shar nub rgya mtsho'i mtha' tshun chad du thugs sras sbas mngon ci rigs pa sa chen po'i rdul ltar byon pas rang rang gi dad mos dag snang gi gzigs pas ngos 'dzin gnang ba rnams dang*/_dpal spungs skyabs mgon si tu pad+ma dbang mchog rgyal po de nyid rgyal dbang mkha' khyab rdo rjes ngos 'dzin gnang ste dpal spungs gdan sar zhabs pad bkod pa'i yar lam sman shod rdzong sar dgon gyi mdun nas phebs skabs rje mkhyen brtse'i zhal bkod du si tu mchog sprul yar lam phran rtsar phebs mi dgos/_si tu sprul sku rin po ches phran gyi khang pa gzigs dus phran mkhyen brtse red ces zhus gsungs pa ltar gzims chung mjal dus zhus pas/_de'i mthong skar nas mkhyen brtse rin po ches spos ring bam po dar gyis lcibs pa bsnams bzhin si tu rin po che la gzigs nas rdzogs chen mkhan rin po che pad+ma rdo rje sku mdun der bzhugs pa la/_pha ki dpal spungs si tu'i sprul skur rgyal dbang karma pa/_kong sprul rin po che/_nged rang gsum dgongs mthun gyis mtshan gsol khri bkod byas pa yin/_nga dang khyed gnyis kyis ye shes kyi dgongs brgyud gtad de gnyis med du byin gyis brlabs dgos zhes gsungs shing ched du dgongs gtad gnang ba dang*/_kaHthog si tu rin po ches dbang dang gsung bshad gnang skabs gsung skad kyi gdangs dang gsung stangs sogs rje mkhyen brtse'i dbang po dang dbyer med zhig 'dug pas rje bla ma'i ye shes kyi sgyu 'phrul bkod pa yin snyam pa 'dug ces zhe chen rgyal tshab rin po che pad+ma rnam rgyal dang*/_gter chen las rab gling par gsungs shing*/_sku gshegs rjes thugs sras mkhas grub gzhan dag gis ngos 'dzin pa sogs 'ga' zhig mchis pa dang*/_mdo smad reb kong phyogs su pis mdo dgon gyi mkhan chen mkhyen yon rmad du byung ba blo bzang bstan 'dzin rgya mtsho zhes pa zhig las nged rang gis gsang bde'i dbang dang rgyud kyi bshad pa zhus pas/_nang ma'i gsung mchid du slob ma rnams nas phran la skyes phreng gsol 'debs dgos zer ba phran nas rmi lam brtags pas/_ras chung rdo rje grags pa dang 'jam dbyangs mkhyen brtse yin zer ba rmis pas de'i rnam thar mjal dgos zhes zhib tu gzigs gnang mdzad cing*/_phran chos lugs dge ldan du gyur pas dpe cha gsar pa'i skabs phyogs ris che ba yod kyang thos pa phyogs med du byas shing chos kyi gnad 'gag mthong bas chags sdang gis rang gzhan grub mtha' bzang ngan du blta ba 'di las skyon che ba mi 'dug_/da ni bka' gdams dge ba'i bshes gnyen gong ma rnams kyi rnam thar bzhin bstan pa thams cad 'gal med du sems pas/_da res khyod las rnying ma'i chos 'brel zhig zhu nas bsnyen sgrub 'brel ba dang*/_rin chen gter mdzod kyi dpe cha zhig blu/_chos skor tshang ma zhib mjal zhu nas skye ba rjes mar gter mdzod 'chad nyan thub pa'i smon lam bya gi yin pas rdzong sar mkhyen brtse rin po che la'ang de'i don zhu yig skyabs rten bcas rang la bskur mdzad cing*/_khyed kyis kyang de ltar thugs smon mdzod ces phran las rtsa gsum bde 'dus kyi dbang gsan/_bsnyen pa'ang btang mdzad/_gter mdzod kyi phyag dpe blus mdzad pa rnams rje bla ma chos kyi blo gros rin po cher zhus pas bod kyi chos lugs khag bzhi g.yung drung bon dang bcas pa la mkhyen brtse'i sprul sku re phebs pa'i zhal bzhes gnang skad bshad srol 'dug pas dge phyogs de de min nam gsungs pa dang*/_kho bo yang de dag gi lung dang rtogs pa'i yon tan gyi rjes su mi snyegs rung mtshan gral du snyan pa'i rgyu mtshan ni/_gsang bdag blo gter dbang po gus btsas nas zla gcig ma long tsam du/_rang gi khyim du phebs bzhugs skabs phran a mas sku mdun khur ba dang*/_ngos la rmi lam du 'jam dbyangs mkhyen brtse'i dbang po zhag gsum btud mar dgyes nyams can shin tu gsal por mjal ba rmis pas bu 'di mkhyen brtse'i sprul sku zhig yin nges zhes mkhyen brtse gong ma'i phyag phreng rdog gcig dang rje mkhyen brtse'i phyag mdud ngo ma/_mgul dar nang mdzod bcas bstsal ba dang*/_lo ngo gsum lon pa'i dus zhe chen rgyal tshab rin po che 'gyur med pad+ma rnam rgyal khyim phebs skabs rang gi skyed yab la khyed kyi bu 'di nga la byin/_sprul sku khyad 'phags zhig yin zhes gsungs shing*/_phyis rang lo bcu drug steng mkhyen brtse'i sprul sku'i mtshan dang mi pham rin po che'i phyag bris sogs rten gsum khyad par can bstsal ba'i skabs der 'jam mgon chos kyi blo gros kyang der bzhugs pas/_sngar blo gter dbang po dang da lam skyabs rje rgyal tshab rin po che'i ye shes kyis gzigs pa ltar phran gyi rig ngor yang mkhyen brtse'i thugs sprul yin par nges zhes sku gsung thugs rten dang legs so'i dbugs dbyung bstsal/_phyis rdzong sar du thog mar bcar skabs mdangs rmi lam du mkhyen brtse rin po che de shin tu gsal por mjal bas de ring khyed phebs pa'i rtag su nges gsungs pa sogs dam pa rnams kyi dag pa'i gzigs ngor mchis pa las rang la ni cha ci yang ma 'tshal ba zhar la 'phros pa ste/_sngon byon grub pa'i dbang phyug thang stong rgyal po dang*/_rgyal dbang karma pa mi bskyod rdo rje'i rnam thar du gsal ba bzhin 'phags pa'i sa brnyes pa'i skyes chen dag gis dag dang ma dag gi sprul pa mang po 'gro ba'i don du dus gcig la'ang 'gyed par mdzad pa'i tshul yod pa ltar ro/__/da ni de thams cad kyi nang nas rgyal mtshan gyi tog ltar mngon par mtho zhing*/_rje gong ma'i rnam thar dang phrin las mtha' dag rdzogs par mnga' bas gsang gsum yon tan dang bcas pa gcig du 'dus pa'i rang gzugs phrin las mi zad rgyan gyi 'khor lo'i rnam par 'phrul pa'i bdag nyid chen por gyur pa rje btsun bla ma dam pa 'di nyid kyi rnam thar rgyas par 'chad pa la/_de'ang gdul bya'i yul dang thugs rje'i rkyen tshogs pa la brten nas slar yang srid pa'i gzugs su mngon par snang ba ste/_rgyud bla ma las/_ji ltar baiDUr sa gzhi gtsang ma la/_/lha dbang lus kyi gzugs brnyan 'char ba ltar/_/de bzhin 'gro sems sa gzhi gtsang ma la/_/thub pa'i dbang po'i sku yi gzugs brnyan 'char/_/zhes gsungs pa dang rjes su mthun par rgyal kun ye shes gcig tu 'khyil ba'i nyin byed dbang po gang du skye ba'i myu gu bzung ba'i tshul bstan pa'i yul ni/_mdo khams chu bzhi sgang drug las gser ldan 'bri klung gi bgrod pa dal gyis g.yo ba'i phyogs mdo smad zal mo sgang gi char sa yi mdud bzhir grags pa'i bye brag re khe sa yi mdud pa ste/_gter chen bdud klong rnam gnyis nas zab gter bzhes zhing*/_bde chen gling pa dang*/_rig 'dzin tshe dbang nor bu sogs kyis rdo rje'i gnas su bsngags shing*/_yul gzhi skyong ba gnas bdag chen po yon tan ri bkra zhes phrin las phur pa'i bka' srung lcags kyi skyes bus bde bar skyong ba'i yul ljongs sa ngan re khe'i nang gses a byams zhes pa'i sa'i char/_yab mes rig 'dzin rtsal 'chang gi brgyud pa shin tu ngo mtshar ba'i rnam thar dang ldan pa ste/_de'ang gu ru'i rgyal tshab nus ldan nyer lnga'i ya gyal sa bcu'i dbang phyug bdud 'dul nus ldan rdo rje'i gdung brgyud khams gser thar phyogs su bzhugs stan chags pa rgyal sras pad+ma rnam rgyal te/_'di nyid gnas dus sogs kyi babs la dpyad na 'jam mgon rin po ches 'khon phur mdzad byang du gsal ba'i kaHthog bdud 'dul rgyal sras pad+ma rnam rgyal zhes pa dus gsum sgrib med gzigs tshul sogs 'byung ba yin par mngon la/_ngo mtshar khyad 'phags kyi rnam thar mnga' ba de nyid kyi sras gser pa gter rgan bdud 'dul rol pa rtsal nus ldan nam mkha'i rnal 'byor zhes mkhyen brtse nus pa'i yon tan 'gran zla dang bral zhing zab gter kyang mang du bzhes/_bdud 'dul gyi sprul par grags shing ye shes kyi skus rjes su bzung zhing byin gyis brlabs/_sku tshe la mnga' brnyes pas dgung lo brgya dang brgyad cu tsam bzhugs shing sku tshe'i smad la brag yab dang sa ngan phyogs su rim par phebs/_mi dang mi min gyi 'gal byed mtha' dag mngon spyod nus mthus tshar bcad cing dbang du bsdus pas phrin las 'phel rgyas su gyur/_kaHthog nas sa ngan phyogs kyi dgon bdag tu mnga' gsol ba bzhin phyogs der bzhugs stan chags par mdzad/_phyis gter ston sku gshegs rjes gsang yum mkhyen brtse rin po che'i mdun du byon par gter chos yongs rdzogs mkha' 'gro gtad rgya brgyud pa'i tshul du bzhes shing gter chos skor rdzong sar phyag dpe'i khrod du bzhugs pa ste/_grub brnyes rnal 'byor dbang po de nyid kyi sku tshe'i smad du 'khrungs shing gsang ba gsum gyi byin gyis brlabs pa'i sras/_gser pa gter sras 'gyur med tshe dbang rgya mtsho ni rje bla ma dam pa'i skyed yab ste/_yab kyis bdud 'dul dang rang gter skor gyi dbang rnams rdzogs par bstsal/_smin grol gling du khri chen yid bzhin dbang rgyal dang*/_rje btsun ma bde chen ye shes chos sgron/_rdor 'dzin don grub sogs las bka' gter gyi smin grol dang phyag len sogs gsan bsam rgya cher mdzad cing yun ring tsam bzhugs/_khyad par rje mkhyen brtse'i dbang pos thun min thugs brtses rjes su bzung zhing zab chos rigs spyi dang khyad par bka' 'dus chos kyi rgya mtsho'i smin grol nyi ma phyed nas nam phyed yol gyi bar du shin tu rgyas par bstsal/_mkha' 'gro rnams kyis phyag tu phul ba'i bka' 'dus kyi bla dpe brda yig dang bod yig 'dres ma lta bu'i pod chung gcig dang rtsa gsum sgyu 'phrul drwa ba'i shog ser btags grol glegs bam lta bu gcig bcas dngos su mjal kha gnang*/_gzhan yang thugs chen sems nyid ngal gso/_mchog gter zab bdun gshin rje/_yang gter mkha' 'gro gsang 'dus/_'chi med 'phags ma'i snying thig gi dbang skabs gsang mtshan 'chi med snang mdzad rdo rjer gsol/_chos skor de rnams kyi chos bdag tu dbugs dbyung*/_khyed rang bod dbus gtsang du song na mkho gsungs te klong snying pod gnyis kyi dbang lung khrid bcas rgyas par gnang*/_gser pa gter rgan gyi na bza' sngags chas rnams phul bas khyed rang la rjes su mkho dgos yong tshul gsungs nas slar gnang ba ni don gyi rig pa 'dzin pa 'di'i sras su phebs par lung bstan par nges so/__/de bzhin du 'jam mgon blo gros mtha' yas zhabs kyis kyang thugs brtses rjes su bzung zhing rje nyid dang sprul gzhi gcig pas rtsa gsum dgongs 'dus kyi gter gzhug skyong bar 'os pa'i tshul dang*/_gsang thig dang tshig bdun skor gyi chos bdag du ngos 'dzin gyis smin grol zhib par bstsal/_gzhan yang dpal yul sku chen/_kaHthog si tu sogs skyes chen dam pa mang du bsten nas rin gter kha skong bcas/_mchog gter cha tshang sogs gsan bsam rgya cher gnang*/_yi dam lhag pa'i lha du ma'i bsnyen sgrub dang bskyed rdzogs nyams bzhes tshad du phyin cing chos skyong rnams bran du bkol/_bstan 'gror 'tshe ba'i nag phyogs kyi sde dpung rnams mngon spyod kyi las sbyor gyis tshar bcad cing*/_gzhan 'khu bar byed pa'i rigs la'ang nus mthu'i rtags mtshan mthong chos su byung ba mang po dang*/_skabs shig chang gis ra bzi ba ltar mdzad nas go 'jo mkho chen dgon gyi mgon khang gi nang rten bsam yas su rgyal po sku lnga'i sku gsob kyi nang gzhug dpe har gyi rten mdung gu ru rin po ches bcings pa smin gling gter chen gyis bzhes pa gtsug lag gi steng nas 'phang ba bar snang du cung zad bsdad nas sar lhung yang nyid ston 'khor la gnod pa sogs gtan nas ma byung bas mtshon nus mthu shin tu che bar grags/_ltar snang kun spong zhig po'i tshul du bzhugs nas zab chos kyi 'chad spel yang mang du mdzad/_snga 'gyur bka' ma mdo sgyu dang*/_khyad par rin chen gter mdzod zhib rgyas/_mchog gter tshang ba sogs bka' gter zab chos mang zhig rje bla mar phul bas bstan pa la mdzad rjes kyang che bar byung*/_de lta bu'i mkhyen brtse nus pa'i yon tan 'gran zla dang bral ba'i rig pa 'dzin pa chen po de nyid dang*/_a lcags 'gru yi rigs las a mdo gser gyi bya bral zhes pa'i grub thob kyi rigs su byung ba tshul khrims mtsho zhes rgyud zhi dul snying rje che ba sogs DA ki'i rigs kyi mtshan nyid dang ldan pa gnyis kyi sras su rab byung bco lnga'i rnam rgyal zhes pa chu mo sbrul gyi lo ston gsum 'bras bu bcud du smin pa'i dga' ston la skye dgu rnams rdzogs par longs spyod pa'i dus su mtshan dpe'i dkyil 'khor gsal ba'o/__/lhums su zhugs pa dang sku bltams pa'i gza' skar dus sbyor sogs zhib par ma 'khod cing*/_lhums su zhugs skabs yab yum la mnal ltas dang 'khrungs pa'i tshe ngo mtshar ba'i rtags mtshan dge bar byung ba gor ma chags kyang*/_yab rje nyid 'khrul zhig rnal 'byor du song bas dmigs bsal ngag rgyun khungs btsun dang phyag thor 'khod pa sogs mi 'dug gsungs/_de nas yul chos dang bstun skabs su babs pa'i zhabs 'degs bcas sku'i skyed rim par bsrings/_yab rje rig pa 'dzin pa chen pos 'jam dbyangs chos kyi blo gros zhes par mtshan gsol/_khyad par 'jam dbyangs bla ma'i mchog gi sprul pa'i skur ngos 'dzin ji ltar gnang ba'i tshul ni/_rje 'jam mgon blo gros mtha' yas mchog gi ye shes dag pa'i gzigs ngor gsal ba'i don rje gong ma'i sku dbon skal bzang rdo rjer mchog sprul skor gyi gsung lan du/_shAkya shrI'i sras 'phags mchog rdo rje thugs kyi sprul pa dang*/_rje 'di nyid phrin las kyi sprul par nges shes rnyed tshul zhib 'khod 'jam mgon rang gi phyag bris dngos bzhugs pa dang*/_khyad par du rje gong ma'i sku dbon kun gzigs si tu rin po ches kaHthog gi gdan sar mkhyen brtse'i sprul sku gcig gnang grub par 'jam mgon rin po cher yang yang gsol ba btab pa ltar/_kun gzigs mkhyen brtse'i dbang po nyid chos rgyal khri srong gi sku dang*/_gu ru rin po che'i gsung*/_nam mkha'i snying po'i thugs/_bi ma mi tra'i yon tan/_lang gro lo tsA ba'i phrin las bcas gcig tu bsdus pa'i rnam rol du gsungs pa dang*/_kaHthog gi gdan sa mdo khams gnas chen nyer lnga las phrin las 'gro 'dul gyi gnas gtsor bsngags shing*/_lang gro'i rnam 'phrul rig 'dzin klong gsal snying pos bstan pa gzhir bzhengs mdzad pa'i rten 'brel sogs kyis phrin las kyi rnam sprul rje 'di nyid sku bdag zhus na bstan 'gro spyi sger yongs la phan pa rlabs chen 'byung rgyu dang*/_de lta na'ang mkhyen brtse'i rnam 'phrul sngags spyod kyi rnam thar 'dzin pa zhig kyang 'byung bar gsungs na/_'di nyid rig pa 'dzin pa'i gdung rigs las byon pa sogs rim gyis sngags spyod la zhugs nas gnas yul 'grims pa zhig yong na'ang nges med la/_si tu rin po che rang gi bla brang der zur du sku bdag mdzad pa las/_dgon pa gzhung gis khri ston byed pa dang bstan pa'i 'gan bkal ba sogs byed mi nyan pa'i bka' bslab dang bcas gnang bar mdzad pa bzhin/_dgung grangs bdun gyi steng 'khrungs gzhis nas ched du phebs bsus gdan 'dren bcas dgun zla'i 'phel tshes bzang por mdo khams phyogs kyi snga 'gyur rnying ma'i chos sde thams cad kyi thog mar byung zhing bka' gter bshad sgrub kyi 'byung gnas su gyur pa 'gran zla dang bral ba'i gdan sa chen po shar kaHthog rdo rje gdan gyi chos grwar zhabs kyi pad+mo bkod pa'i nyin kha ba chen po babs te ri klung dkar por song ba rje 'dis thugs bskyed dang phrin las kyi snang bas phyogs mtha' dag dkar 'jam yug gcig tu brdal ba dang*/_dpal kaHthog pa'i bshad sgrub chos kyi gru char 'jig rten gsum du rtag khyab lhun grub kyi phrin las rtsol med du 'byung ba'i rten 'brel gyi dge mtshan rmad du byung ba rang bzhin lhun grub tu 'grigs par mngon no/__/der rig 'dzin chen po klong gsal snying po'i gzims khang rdzong mgo bkra shis khang gsar du bzhugs stan 'khod/_de nas gza' tshes mchog tu dge bar chos sde chen po de nyid kyi gtsug lag khang gi dbus thub dbang sku brnyan lha chen dpal 'bar bzhugs pa'i mdun du/_bskal bzang rnam 'dren lnga pa shes bya thams cad gzigs pa'i paN+Di ta chen po'i tshul du byon pa snga 'gyur bstan pa'i mnga' bdag tA'i si tu o rgyan chos kyi rgya mtsho mchog gi zhal snga nas gtsug phud bzhes par mdzad cing*/_'jam dbyangs blo gros rgya mtsho thub bstan bshad sgrub rgyal mtshan dpal bzang po zhes pa'i mtshan gyi cod pan 'bul gnang mdzad/_de tsam las gong gsal 'jam mgon rin po che'i bka' bslab ltar dmigs bsal khri ston sogs ma mdzad par grags/_chos sde chen po der gsan bsam gyi rigs la thugs brtson rgya cher gnang bzhin pa'i skabs/_rdzong sar gdan sa dngos kyi mchog sprul glo bur du sprul pa bsdus pa dang*/_rje 'di nyid 'jam mgon rin po ches ngos 'dzin gnang zhing sku chung ngu nas dam pa'i rnam thar mtha' dag yongs su rdzogs par mnga' ba'i dbang gis gong ma'i sku dbon mdzod skal bzang rdo rjes si tu rin po cher tha tshig gnad bkar gyi tshul du gdan sa lte ba rdzong sar dgon du bzhugs 'god dgos nan cher zhus pa bzhin du/_dgung grangs bco lnga'i lnga'i steng khams gsum 'gro pa'i dpal mgon chos kyi rgyal po 'phags pa rin po ches byin gyis brlabs shing dpal ldan sa ngor gyi ring lugs 'dzin pa'i chos grwa chen po shrI na len+d+ra gnyis pa rdzong sar bkra shis lha rtse'i 'og min bla ma'i bzhugs gnas bkra shis 'chi med grub pa'i dga' tshal du ris bral rgyal bstan yongs su rdzogs pa'i chos kyi khri la zhabs pad bkod pa'i rten 'byung gi skya rengs 'char bas rje gong ma'i phrin las kyi nyin byed rtag khyab lhun gyis grub pa'i 'od snang gi mu khyud gangs can 'dzin ma'i khyon du slar yang brdal ba'i bskal bzang gi rten 'brel mchog tu gyur pa'o/_/gzhan yang mdo sde rgyan las/_sbyor ba'i sngon du snying rje dang /_/mos pa dang ni bzod pa dang*/_/dge la yang dag spyod pa ni/_/rigs kyi rtags su shes par bya/_/zhes gsungs pa ltar skyes bu dam pa'i rigs kyi nus pa ni sus kyang 'gran du med par rtag tu dam pa'i ngang tshul can rdo rje rin po che'i khams bzhin 'pho 'gyur dang bral bas rje bla ma nyid sku rkyang las nang rtsa'i yongs 'dzin sogs gtan nas med kyang sku tshugs bzang zhing btsun la thugs shin tu sgam pa'i tshad du kun gyi dpe zlar 'os par bzhugs shing*/_bshes gnyen dam pa rnams las sngar gyi gsan bsam rigs 'phro skyong zhing*/_ris med pa'i zab chos mtha' dag gsan bzhes dang don gnyer can la 'chad pa/_rten bzhengs dang tshogs bsags mchod 'bul sogs rnam dkar gyi mdzad pa mtha' dag phal pa'i blo ngor shong dka' bar gnang bas dad ldan rnams spro ba ches cher 'phel zhing*/_blun rmongs bdud kyis blo bsgyur ba 'ga' zhig gi yid la zug rngur gyur te dngos brgyud nas bar du gcod pa mang zhig brtsams rung*/_rje nyid nas gang la'ang snyengs pa med pa'i brtul zhugs dang byams pa chen po las thugs g.yo ba med pa ri dbang lhun po ltar bzhugs pas me 'bar ba la shing bsnan pa bzhin dam pa'i rnam thar ches cher gsal ba'i rkyen du gyur pas/_log pa'i blo can de dag kyang rim gyis sems khong du chud nas slar rje nyid kyi zhabs kyi pad+mor gus shing dad pas 'dud par gyur/_de'ang skyes bu dam pa rnam sku nar ma son pa dang thugs dam rtsal ma rdzogs bar du bar gcod kyi rnam pa ches mang bar 'byung mod/_blo chen po rnams ni de dag gis brdzi bar mi nus pa byang chub spyod pa'i rgyan du 'gyur tshul yang*/_sdud pa las/_dper na rgyal po'i bu zhig nor gtong don 'dod pa/_/kun gyi gtso bor gyur te mngon par 'gro bya 'os/_/'di ni da lta na yang sems can mang dga' byed/_/thabs thob gyur te rgyal srid gnas nas smos ci dgos/_/de ltar shes rab spyod mkhas byang chub sems dpa' yang*/_/bdud rtsi sbyin par byed cing lha dang mi rnams dga'/_/'di ni da lta na yang sems can mang phan brtson/_/chos kyi rgyal por gnas par gyur nas smos ci dgos/_/de yi tshe na bdud ni zug rngu ldang bar 'gyur/_/mya ngan nyams thag sdug bsngal yid mi bde nyam chung*/_/ji ltar byang chub sems dpa' 'di yid nur 'gyur zhes/_/'jigs pa bstan phyir phyogs rnams bsreg cing skar mda' gtong*/_/gang tshe mkhas pa de dag bsam pa rab ldan zhing*/_/nyin mtshan shes rab pha rol phyin pa mtshan don lta/_/de tshe lus sems dag ni mkha' 'gro bya ltar rgyu/_/nag po'i rtsa lag rnams kyis glags rnyed ga la 'gyur/_/zhes gsungs pa ltar ro/_/spyir yang rje bla ma rin po che'i yab rje ni 'khrul zhig gi rnal 'byor du bzhugs/_skyabs rje si tu rin po che bstan 'gro'i mdzad sgo shin tu rgya che/_yongs 'dzin dge rgan sku gshegs snga ba'i dbang gis sku gzhon pa'i skabs bslab ston dang sku bcar do dam dmigs bsal byung tshod mi 'dug kyang*/_bstan 'gro'i mig rgyan gyi mdzad pa che phra rang stobs kho nas dngul chu sar lhung ba bzhin skyes chen sus kyang 'gran du med pa bskyangs bar mdzad pas na so skye'i spyod yul las ring du 'das shing*/_khyad 'phags dam pa'i yon tan thugs rje yas sprul gyi mdzad pa bla na med pa ste kun gyis 'gran zlas dben pa'i rnam thar shin tu ngo mtshar ba'i gnas su gyur ba'o/__/gnyis pa rgyal ba'i bstan pa rin po che'i 'jug sgo sdom pa gsum gyi bslab pa ji ltar bzhes pa'i tshul ni/_sangs rgyas gnyis pa dbyig gnyen zhabs kyis/_tshul gnas thos dang bsam ldan pas/_/sgom pa la ni rab tu sbyor/_/zhes gsungs pa'i go rim ltar bdag cag gi ston pa mnyam med shAkya seng ge'i bstan pa rin po che'i 'jug sgor dpal mgon 'phags pa klu sgrub ltar thog mar sdom pa gsum gyi bslab pa rim can du bzhes pas thugs rgyud sdom pa'i rgyan gyis spa zhing*/_tshul khrims rnam pa gsum la bslab sbyang mthar son pas zag med ye shes kyi tshul khrims gser sbyangs btso ma'i rgyan lta bus spud pa ni/_dge slong la rab tu gces pa'i mdo las/_shin tu legs par tshul khrims gang*/_/sdom pa'i mi de mdzes pa'i gzugs/_/'dul ba la ni nye bar gnas/_/tshul khrims bslab par rang yid ches/_/mi de nyi ma gcig la yang*/_/bsod nams phung po dpag tu med/_/gsog cing sangs rgyas 'bras bu 'grub/_/ces dang*/_'phags pa klus/_khrims ni rgyu dang mi rgyu'i sa bzhin du/_yon tan kun gyi gzhi rten lags par gsungs/_/zhes gsungs pa ltar thub bstan 'dzin spel skyong ba'i byed po'i rnam thar gyi mchog tu gzigs nas/_dang po so sor thar pa'i sdom pa ji ltar bzhes tshul ni/_dgung grangs bcur phebs pa'i skabs brtan mkhas phan 'dogs kyi yon tan yongs su rdzogs pa'i mnga' bdag kun gzigs d+harma sA ra mchog mkhan po dang*/_rje bla ma yab sras kyi yongs 'dzin dge ba'i bshes gnyen chen po thub bstan rig 'dzin rgya mtshos las slob sogs lnga tshig gi dge 'dun grangs tshang ba las/_'jam dbyangs mkhyen brtse'i dbang po nas si tu paNaDi ta la brgyud pa so sor thar pa'i dge tshul gyi sdom pa thog mar zhes pa'i mtshan du 'jam dbyangs blo gros rgya mtsho gtsug lag lung rigs nyi ma smra ba'i seng ge thub bstan bshad sgrub rgyal mtshan dpal bzang po zhes bya ba gnang*/_spyir mtshan dpe'i me tog dang por bzhad pa'i dus nas yab rje rig pa 'dzin pas mtshan 'jam dbyangs chos kyi blo gros zhes gsol ba nas brtsams/_kaHthog si tu paNaDi tas kun mkhyen bla ma'i mchog sprul du mnga' gsol ba'i mtshan 'jam dbyangs blo gros rgya mtsho/_rgyal tshab pad+ma 'gyur med rnam rgyal las byang chub sems sdom bzhes pa'i skabs kyi mtshan phul ba'ang 'jam dbyangs blo gros rgya mtsho zhes gsol ba dang*/_wa ra thar rtse zhabs drung rin po ches 'jam dbyangs chos kyi blo gros ris med bstan pa'i rgyal mtshan dpal bzang po zhes gnang 'dug pas kho bo'i ming blo gros zhes pa 'di rnam 'dren sus bstsal kyang nam yang 'gyur ba med pas dgos pa dang rten 'brel gyi gnad zhig yod par mngon zhes bka' las thos so/__/dgung grangs nyer drug steng mdo smad snga 'gyur bstan pa'i chu gter ru dam o rgyan bsam gtan chos gling du phebs nas de'i dben gnas tshe ring ljongs kyi bsam gtan gyi spyil bur mchog gsum snang ba'i sprin phung du gter chen mchog gyur gling pas zil khrom gangs kyi ra ba'i gnas yig du mkhan chen byang chub sems dpa'i sprul par lung bstan pa/_dgag sgrub gnang gsum gyi sgo nas bslab par bya ba'i gnas rnams nye bar lung 'bogs pa'am ston pa la shin tu mkhas pa/_bsgrub bya la shin tu snying brtse ba dang ldan pas dman pa'i gnas su lhung ba las yongs su 'dzin pa/_dngos su chos 'dul ba'i tshul khrims kyi bslab pa rin po che la nye bar sbyor zhing*/_brgyud nas myang 'das kyi go 'phang la sbyor bar byed pa'i yon tan phun sum tshogs pa dang ldan pa/_don gyi slad du mtshan nas smos na thams cad mkhyen pa 'jigs med pad+ma blo gsal lam dkon mchog grags pa mkhan po dang*/_las kyi slob dpon mkhan bsod nams chos 'phel sogs dge 'dun lnga tshogs las bsnyen rdzogs kyi sdom pa bzhes pa ni smad 'dul gyi sdom rgyun rgyal sras gzhan phan mtha' yas nas/_mkhan chen pad+ma blo gsal la brgyud pa dang*/_phyis su dgung grangs so lnga pa'i steng dbus su phebs pa'i skabs rje gong ma'i phyag bzhes dang mthun par gangs ri'i khrod kyi pad+ma 'od 'og min o rgyan smin grol gling gi gtsug lag khang chen po'i thub dbang zhal ras lha khang du/_ngag dbang thub bstan nor bu las kyang dbang thang khams mthun shing glang lo'i dus tshigs lngar phye ba'i dpyid zla gsum pa snron gyi zla ba'i yar ngo'i gral tshes bcu gnyis pa'i dus tshod nyi ma bzhi cha shar ba'i grib tshod rkang pa gnyis kyi thog tshigs snga ma dge tshul dang*/_nyi ma gung tshigs ma yol ba'i grib tshod rkang pa gsum gyi thog tshigs phyi ma bsnyen rdzogs mkhan po ngag dbang nor bu rgya mtsho/_las slob 'gyur med rnam grol rgya mtsho/_gsang ston 'gyur med shes rab bstan dar/_dus go ba 'gyur med chos dpal bstan 'dzin/_grogs dan pa dpal sprul 'gyur med rig 'dzin chos dbang sogs bcu tshogs las kyang bsnyen rdzogs bskyar te bzhes pas so sor thar pa'i dge slong gi sdom ldan du bsgrub par mdzad pa ni/_paN chen blo bzang chos rgyan gyis/_sdom rgyun mkhan po rin po che/_/dam chos yar 'phel zhal snga nas/_/dang po paN chen brgyud bsnyen te/_/phyis ni mchog tu dad pa dang*/_/gong 'phel tshul du thams cad mkhyen/_/bsod nams rgya mtshor bsnyen rdzogs pas/_/ci ltar 'dod pa sbyar bas chog_/ces gsungs pa bzhin no/__/gnyis pa byang chub sems kyi sdom pa bzhes tshul ni/_sdong po bkod pa las/_rigs kyi bu byang chub kyi sems ni sangs rgyas kyi chos thams cad kyi sa bon lta bu'o/_/zhes dang*/_sdud pa las/_de bzhin 'dir yang byang chub sems med bde gshegs kyi/_/ye shes 'jig rten 'di dag kun tu ga la 'byung*/_/zhes dang*/_byang chub sems dpa'i sde snod las/_myur du bla na med pa yang dag par rdzogs pa'i byang chub tu 'tshang rgya bar 'dod pas lhag pa'i bsam pa byang chub kyi sems la bslab par bya'o/__/zhes 'byung ba ltar don gnyis phun sum tshogs pa'i sangs rgyas kyi rgyu gcig pu byang chub kyi sems rnam pa gnyis la gzod nas goms pa mthar son kyang gdul bya rjes su bzung ba la dgongs nas rdo rje 'dzin dngos 'jam dbyangs blo gter dbang po dang*/_kaHthog si tu kun gzigs chos kyi rgya mtsho/_zhe chen rgyal tshab 'jam dbyangs blo gros rgya mtsho'i sgra dbyangs rnam pa gnyis gsum las dbu lugs smin gling gter chen rin po ches mdzad pa dang*/_'jam mgon blo gros mtha' yas gsung rgya chen spyod brgyud kun gzigs mkhyen brtse'i dbang po'i gsung ltar dang*/_sku zhabs dge mang mchog sprul gzhan phan snang ba las dbu ma lugs smin gter yig cha ltar dang*/_mkhan chen kun bzang dpal ldan las dpal sprul rin po che'i phyag bzhes ltar/_'jam mgon chos rje ngag dbang legs pa las zab mo dbu ma dang*/_rgya chen spyod pa'i bka' srol gnyis ka'i byang chub mchog tu sems bskyed pa'i sdom pa mkhas grub so so'i gsung bzhin zab rgyas su gsan cing*/_dpal spungs si tu rin po che pad+ma dbang mchog rgyal po las kyang rgya chen spyod brgyud kyi sems sdom bcas so sor mchod pa'i sprin dang maNaDal sogs rgyas spros gzab rgyas dang bcas bzhes/_kun gzigs kaHthog si tu rin po ches 'jam dbyangs dga' ba'i go cha zhes pa'i mtshan 'bul mdzad de rgyas sras spyod pa'i g.yar dam legs par bzhes pa'i tshul gyis gdod nas dag pa'i theg pa chen po'i rigs kyi nus pa yongs su sad par mdzad de/_bskal pa rgya mtshor gzhan phan gyi spyod pa zab cing rgya che ba la skad cig re re'i yun gyis kyang 'jug cing yid can mtha' dag la sman pa'i phrin las mtha' yas pas rtag par skyong ba'i tshul mngon sum du grub pa nyid do/__/gsum pa rdo rje theg pa'i dkyil 'khor chen por zhugs nas mngon par dbang bskur bas gsang ba sngags kyi sdom pa bzhes pa'i tshul ni/_thog mar dbang gi dag bya dag byed kyi don go don ngo 'phrod pas bka' gter gyi rgyud sde'i dbang chen zhig la ngos 'dzin dgos pas/_rje bla ma mchog gi rigs kyi bdag po thun mong ma yin pa si tu thams cad mkhyen gzigs las/_kaHthog rdo rje gdan gyi gtsug lag khang chen por snga 'gyur bka' ma'i rgyud ma hA yo ga tan+t+ra sde bco brgyad kyi rtsa ba sgyu 'phrul zhi ba dang khro bo'i dkyil 'khor du phyi nang gsang ba'i phan nus zab mo'i dbang bcas/_lung a nu yo ga tshogs chen 'dus pa rtsa ba dang yan lag yongs su rdzogs pa'i dkyil 'khor du phyi nang sgrub gsang gi dbang gi chu bo bzhi rdzogs gtad rgya dang bcas pa/_man ngag rdzogs pa chen po a ti yo ga sems sde'i rig pa'i rtsal dbang bco brgyad/_klong sde'i sgom tshul bla ma'i byin rlabs/_man ngag sde bi ma snying thig ma bu yang gsang bla med kyi spros bcas spros med shin tu spros med rab tu spros med bcas/_gter ma bka' brgyad bde gshegs 'dus pa bdun brgya nyer lnga'i dkyil 'khor chen por gdul bya zhe sdang can sgrol ba lam khyer phyi dbang rdzas la brten pa dang*/_nga rgyal can lha lam khyer nang dbang lus/_'dod chags can sbyor ba lam khyer gsang dbang yum/_gti mug can rnam rtog lam khyer de kho na nyid sems la brten nas bskur ba dang*/_shrI nalen+d+ra gnyis pa rdzong sar bkra shis lha rtse'i 'og min bla ma'i gdan sa bkra shis 'chi med grub pa'i dga' tshal du zhabs pad bkod pa'i rten 'byung gi skya rengs 'char bas rje gong ma'i phrin las kyi nyin byed rtag khyab lhun gyis grub pa'i 'od snang gi mu khya[⁽11e2⁾]da gangs can 'dzin ma'i khyon du slar yang brdal ba'i tshe na/_'jam mgon gong ma'i thugs dam rtsa ba gsang chen rgyud sde'i mthar thugs dpal dgyes pa rdo rje rgyun gyi nyams bzhes su mdzad dgos pa'i dbang gis gdan sa de nyid kyi chos rje bla ma bo d+hi b+ha dra las dpal kye rdo rje'i man ngag lugs kyi rgyu lam gyi dbang dang por gsan bzhes gnang zhing*/_rje 'dis rdo rje 'chang mkhyen brtse'i dbang po las gsan snyam/_phyis su dkyil 'khor rgya mtsho'i khyab bdag nges pa don gyi rdo rje 'chang chen po 'jam dbyangs blo gter dbang po mchog dang*/_'jam mgon rdo rje 'chang ngag gi dbang phyug kun dga' legs pa'i 'byung gnas phrin las kun khyab dpal bzang po bcas las gsung ngag lam 'bras dang 'brel rdul tshon la brten pa'i dpal kye rdo rje'i smin byed dbang gi mngon par rtogs pa brgyad dang ldan pa bcas/_chos sde chen po lhun grub steng du rdo rje 'dzin dbang bla ma dam pa mkhyen rab mtha' yas mchog las dus zhabs pa chen po rje mkhyen brtse'i dbang po brgyud par bzhugs pa'i gnyis su med pa'i rgyud kyi rgyal po dpal dus kyi 'khor lo'i smin byed slob ma rjes 'dzin dang sta gon sngon du 'gro bas byis pa 'jug pa'i dbang bdun sogs dbang gong ma gong chen bcas rdul tshon gyi dkyil 'khor la brten nas gsan pa rnams gtso bor smos pa ste/_gzhan bya spyod rnal 'byor dang bla med kyi rgyud sde rnams yongs 'dzin mkhas grub du mas las gsan tshul 'og nas rgyas par 'byung bas mtshon rdo rje theg pa'i rgyud sde rgya mtshor rig pa 'dzin pa'i sdom pa bzhes nas snang spyod rdo rje gsum gyi rol par dag pa chen por 'byams klas pa'i rang bzhin chu bo rgyun gyi rnal 'byor las mi 'da' bas tha mal gyi kun rtog bde stong phyag rgya chen po'i ye shes su sdom par mdzad pas sum ldan rdo rje 'dzin pa chen po thub bstan mdo sngags yongs rdzogs kyi mnga' bdag tu gyur cing*/_de ltar sdom pa gsum dang 'brel ba'i bslab pa'i gnas che phra thams cad ngo lkog med par dran shes dang bag yod kyis thugs rgyud rang bzhin gyis bsdams nas legs par bsrungs pas rtag tu 'khrul pa mi mnga' zhing*/_kun gyi mig rgyan du grub pa'i sku gsung thugs kyi mdzad pa mtha' dag mthong na mi mthun pa med pa dang*/_de yang bag med 'chol par spyod pa'i rtsing hrul dang ha cang gu dog gi gti thug gnyis ka'i phyogs su lhung ba ma yin la/_mdor na sku gsung thugs la nyes pa'i dri mas ma gos pa thugs rgyud gtsang zhing dag par bzhugs shing*/_phyi'i rtags dang cha lugs tshun chad dge slong gi dngos po las nam yang mi 'da' bas thub bstan yangs pa'i chu gter mdzes pa'i rgyan du grub pa ni phyi ma'i dus 'dir dkon pa'i mchog tu nges pa'i rnam thar gyi gsang ba rmad du byung ba jo bo rje a ti sha lta bu ste/_deng sang ni stong lta had po'i kha pho dang*/_rdzu 'phrul yin pa skad kyi snying pos stong pa'i grub rtags dang spu sud kyi mthong snang za zi la ngo mtshar gyis yid rton du 'cha' ba mang ba las 'di dag ni bstan pa'i mig rgyan du shes shing ngo mtshar gyi rnam thar du rtogs pas de'i rjes su slob pa cung zad dkon nam snyam pa'ang 'dug go__/gsum pa ris su ma chad pa'i mkhas grub kyi skyes bu du ma bsten te gsan bsam gyi pha mthar son pa'i tshul ni/_'phags pa sred med kyi bus zhus pa'i mdo las/_rigs kyi bu thos pa dang ldan na shes rab skye bar 'gyur/_shes rab dang ldan na nyon mongs pa med par 'gyur/_nyon mongs pa med pa la bdud kyis glags lta bar mi nus so/_/zhes dang*/_mdo sde rgyan las/_'di na dang po thos la brten nas tshul bzhin yid la byed pa 'byung*/_/tshul bzhin yin la byed pa las kyang yang dag don yul ye shes 'byung*/_/zhes dang*/_sdud pa las/_de lta bas na byang chub dam pa tshol ba yi/_/bsam pa drag ldan mkhas pas nga rgyal de bcom ste/_/nad pa'i tshogs kyis gso phyir sman pa bsten pa ltar/_/g.yel ba med par dge ba'i bshes gnyen bsten par bya/_/sangs rgyas byang chub mchog zhugs byang chub sems dpa' dag_/pha rol phyin dang ldan te dge ba'i bshes su bsten/_/zhes gsungs pa ltar bsgrub bya thams cad mkhyen pa'i go 'phang don du gnyer bas sgrub byed kyi lam dpyis phyin par shes shing der dngos su 'jug pa la dang po nyid nas thos pa'i mig sgo yangs por sgrub dgos pa dang*/_khyad par rgyal ba'i bstan pa rin po che 'dzin spel skyong ba'i skyes bu dam pa dag ni thos pa rgya mtshos thugs rgyud legs par gtams pa zhig cis kyang gal che zhing*/_de'i bdag rkyen thun mong ma yin pa ni dge ba'i bshes gnyen bsten pa kho na ste/_'phags pa brgyad stong pa las/_dge ba'i bshes gnyen gyis yongs su zin pa'i byang chub sems dpa' ni bla na med pa yang dag par rdzogs pa'i byang chub tu 'tshang rgya'o/_/zhes dang*/_sdud pa las/_sangs rgyas chos rnams dge ba'i bshes la bsten to zhes/_yon tan kun gyi mchog mnga' rgyal bas de skad gsungs/_/zhes sogs gsungs pa ltar dang po yon tan kun gyi gzhi ma yi ge'i klog dang phyag bris ni/_sngar 'khrungs gzhis su bzhugs skabs dgung lo drug gi steng zhang po bla ma dge legs kyi mdun nas ljags klog bslabs pas yig dkar nag bla ma dgongs 'dus kyi chos spyod yan lag bdun pa dang maNaDal sogs tshegs med du mkhyen/_phyis kaHthog gdan sar zhabs pad 'khod nas ring por ma lon par/_skyabs rje si tu rin po che rang gi yongs 'dzin mkhas btsun bzang po'i yon tan bye bas mngon par mdzes pa'i mkhan chen thub bstan rig 'dzin rgya mtsho bar khrod chos gling du bzhugs pa'i mdun nas ljags klog phyag bris nas brtsams sngar gyis sbyangs pa'i 'phros la thugs brtson gnang bas lo gcig lhag gis kaHthog gi sgrigs 'don pusti bcu skor byang chub cing si tu rin po cher rgyug 'bul mdzad pas dgyes rtser son pa byung tshul gsungs/_spyir yongs 'dzin dam pa 'dis bka' gter gyi phyag bzhes/_gsan bsam skor dang tha na sku'i bzhugs stangs gsol tshigs bzhes stangs tshun dam pa'i chos 'dul ba dang mthun pa kho nar bka' gnang bas mtshon lugs gnyis kyi bslab ston zhib par bstsal bas da lta mi gral du tshud tsam 'di khong gi bka' drin kho na yin par gsungs shing*/_phyis yongs 'dzin bla ma nyid lo gsum gyi ring bad kan bsnyun bzhes la/_rje bla ma rin po che gcig pus chu len ja bkol chab bsang gi snod bkru bshal yan chad kyis mtshon zhabs tog che phra thams cad nyin mtshan kun tu skyo sun med pa dka' ba dang len du bsgrubs pas yongs 'dzin dam pas kyang thugs la shin tu btags te phyi nang gi bka' slob zhib rgyas dang*/_rje nyid la phyag dpe 'gangs chen mang du yod pa rnams phran shi nas khyed kyis bdag po sprod ces gsungs so zhes bka' drin dran pa'i bsngags brjod rtag par gnang*/_spyir skyabs rje si tu thams cad mkhyen pa 'di nyid mkhas btsun bzang po'i rnam thar rmad du byung bas rgyal bstan ris med pa'i shing rta 'jam mgon bla ma rnam gnyis kyi rgyal tshab tu gyur pa'i thugs bskyed 'gran zla dang bral ba'i bdag rkyen gyis nye bar bskul nas shin tu dag pa'i gser sbyangs rgyan du bskrun pas lhag par yang rin thang dang mdzes pa'i mchog tu gyur pa bzhin rje bla ma skyes thob kyi yon tan gdod nas gnas pa sbyor brtson gyis rdzogs par sad par mdzad de bstan 'dzin kun gyi dbang phyug tu bsgrub pa'i slad du/_byang chub sems dpa'i sde snod las/_thos pas chos rnams shes par 'gyur/_/thos pas sdig las ldog par byed/_/thos pas don ma yin pa spong*/_/thos pas mya ngan 'das pa thob/_/ces dang*/_rgyal tshab byams pas/_thos pa las byung shes pa yi/_/snang ba rgya che 'dis brgyan pas/_/blo chen myur du sangs rgyas kyi/_/spyod yul kun la 'jug par 'gyur/_/zhes gsungs shing*/_de'ang sangs rgyas sgrub pa'i lam la zhugs pa'i thog mar rig pa'i gnas mtha' dag la thos bsam dgos pa'i tshul/_sa skya paN+Di tas/_rang blo shes bya'i gnas la ma sbyang na/_/thams cad mkhyen pa nam mkha'i mtha' las ring*/_/de ltar dgongs nas rgyal dang rgyal sras kyis/_/rig pa'i gnas rnams sbyang zhes legs par gsungs/_/zhes gsungs pa ltar thog mar phyi thun mong gi rig pa'i gnas la dgung grangs bcu pa'i steng yongs 'dzin rig 'dzin rgya mtsho las sum cu pa dang*/_rtags 'jug rtsa 'grel/_dgung grangs bcu gcig steng brda sprod kyi gzhung dbyangs can ma kaHthog dge rtse paN+Di ta'i 'grel pa'i steng nas zhib khrid dang*/_bcu gnyis pa'i steng skar rtsis sa ris lnga bsdus kyi skor dang*/_snga phyi dus skabs ci rigs par mkhas dbang 'jam dbyangs legs pa'i blo gros kyi dngos slob dpal yul bla ma sher 'od las sa bzang TIka steng nas sgra kA la pa dang*/_mkhas dbang bkra shis chos 'phel las snyan ngag_/bla sman a tshang las gso ba rig pa rgyud bzhi'i bshad khrid lag len dang bcas pa/_mkhan chen kun bzang dpal ldan chos grags las tshad ma rnam 'grel phyogs las rnam rgyal mi pham 'jam pa'i dbyangs kyi 'grel steng ljags bshad sogs dang*/_nang don rig pa'i skor rnams ni kun gzigs 'jam pa'i rdo rje mi pham 'jam dbyangs rnam par rgyal bas snga 'gyur bstan pa'i srog tu grub pa'i dgos pa'i gnas khyad par can dang 'brel bar gzigs nas kun gzigs si tu rin po che la ched du bka' bstsal pa bzhin mdo smad dbus 'gyur 'chang kaHthog gi chos grwar rgyud sde'i bshad grwa chen po gsar du tshugs pa'i rten 'brel gyi sgo 'phar phye bas/_mdo rgyud shes bya rab 'byams kun mkhyen cing gzigs pa chen po si tu ma hA paN+Di ta o rgyan chos kyi rgya mtshos 'phags bod mkhas grub rnams kyi gzhung rtsa 'grel mang po la gsar rnying so so'i bzhed srol dang*/_rang gzhan grub mtha' shan 'byed bcas lung rigs kyi rnam dpyod rmad du byung ba'i ljags bshad zhib rgyas su bstsal zhing*/_'jam mgon mi pham rin po che'i thugs sras kyi thu bo mkhan chen kun bzang dpal ldan chos kyi grags pas de'i skyor dpon gyi tshul mdzad de mkhan slob nyi zla zung 'brel dang*/_gzhan yang shar kaHthog gi mkhan chen mkhas tshul gsum gyi rnam thar 'gran bral mkhan bla ma bstan bzang dang*/_lung rtogs yon tan gyis mngon par mtho ba'i mkhan a ka rin po che/_sde snod 'dzin pa mkhan skal bzang dbang phyug sogs kyis mdo sngags gzhung lugs kyi bshad rgyud chu bo stong gi 'bab stegs mdzad pa na/_rje nyid rigs par smra ba'i thugs zin sras kyi thu bor mdzad de/_skyes sbyangs kyi mkhyen rab zab mo'i dkyil 'khor yongs su rdzogs pa'i tshul gyis dam pa zung gi zhal sgo nas mkhyen rab kyi sgo 'byed pa'i rten 'byung du rje btsun 'jam dpal dbyangs kyi bstod pa/_dpal ye shes yon tan bzang po la bstod pa/_thub pa'i khyad par 'phags bstod/_lha las phul byung gis thog drangs/_spyod 'jug_/sdom gsum rnam nges rtsa 'grel/_yon tan rin po che'i mdzod rtsa 'grel/_yid bzhin rin po che'i mdzod rtsa 'grel yan lag dang bcas pa/_byams chos sde lnga/_'dul ba mdo rtsa ba/_dbu ma rgyan gyi 'grel chen/_sgyu 'phrul gsang ba snying po'i rgyud bshad zur lugs smin gling lo chen d+harma shrIs mdzad pa'i spyi don gsang bdag zhal lung dang*/_tshig 'grel gsang bdag dgongs rgyan gnyis ka mthar chags su gsan/_gzhan yang rab 'byams pa o rgyan chos grags kyis mdzad pa'i spyi don rin chen phreng ba/_kaHthog pa 'gyur med tshe dbang mchog grub kyis mdzad pa'i 'grel pa/_sgeg pa'i rdo rje'i spar khab/_nyi 'od seng ge'i rgya cher 'grel/_sangs rgyas gsang ba'i lam rim che chung*/_rong zom pa'i dkon mchog 'grel/_kun mkhyen klong chen pa'i 'grel pa/_g.yung ston pa'i 'grel pa/_bshad pa'i le lag dang bcas pa'i yig cha tshang ma gsan par mdzad/_gsang ba'i bdag po blo gter dbang po mchog las dpal kye rdo rje'i rtsa rgyud brtag pa gnyis pa sa lugs kyi bshad pa zhib rgyas su gsan par/_slob dpon bsod nams rtse mo'i rgyud sde spyi rnam/_rje btsun grags pa'i ljon shing chen mo dang 'grel pa dag ldan bcas/_chos rje'i aSh+Ta bzhi bshad/_dkon lhun zhabs kyi mdzes rgyan gnyis dang*/_ngag chos pa'i rgyud kyi mchan 'grel sogs gung spros pa dang*/_zhar byung nyer mkho'i yig cha rnams kyi bklag lung bcas/_mkhas dbang bla ma bkra 'phel las 'jam mgon mkhyen brtses 'phags pa thogs med las nye brgyud gsan pa'i byams chos sde lnga/_rdo rje phur pa rtsa dum 'grel ba 'jam mgon gu Na'i gsung*/_rngog lugs dgyes rdor rtsa rgyud kyi bshad pa rngog zhe sdang rdo rje'i 'grel pa dang*/_'jam mgon 'grel chen gyi bshad rgyun gnyis ka zhib rgyas/_bde mchog rtsa rgyud sa skya'i rje btsun bsod nams rtse mo'i 'grel pa dang*/_bshad rgyud gur dang saM bu Ti'i bshad rgyun rje bla ma mkhyen brtse dbang po'i nye brgyud can rnams dang*/_kun gzigs si tu rin po che las rje dge 'dun rgya mtsho'i TIka steng nas 'jam dpal sgyu 'phrul drwa ba'i rgyud bshad/_kun gzigs mkhyen brtse'i zhal lung tsha ba lo tsA rin chen rnam rgyal gyi mtshan brjod 'grel pa'i bshad rgyun dang*/_dbon stod mkhan mkhyen rab mdun nas 'jam mgon kong sprul rin po che'i bshad rgyun dus 'khor bsdus rgyud 'grel chen dri med 'od kyi bshad khrid/_mkhan chen kun dpal las 'jam mgon mi pham rin po che'i 'grel chen steng nas rje mkhyen kong rnam gnyis kyi bshad rgyun dam pa dang po'i sangs rgyas dpal dus kyi 'khor lo'i rgyud bshad dang bcas gsan par mdzad/_khyad par mkhan chen bla ma kun dpal gyis khong la gter chen bdud 'joms rdo rjes khyed rang lha sras tshangs pa'i me tog gi rnam 'phrul zhig dang 'phrad de phrin las rgyas par lung bstan pa bzhin kaHthog bshad grwar 'ong bas rje 'di la gzhung bshad rigs phul nas lung don mngon du gyur pa yin zhes dad gdung cher mdzad cing thugs brtses rtag par bskyangs nas snga 'gyur ba'i lta sgom spyod pa'i zab gnad thun mong ma yin pa dang*/_kun gzigs phyogs las rnam rgyal mi pham 'jam pa'i dbyangs kyi zhal lung gi bdud rtsi rnams lhug par bstsal bas/_skyes sbyang gi mkhyen rab pad+mo'i 'dab brgya ches yangs pa'i sgo phye nas gzungs spobs blo gros kyi zil dngar phyogs kun nas rgyas par mdzad/_rje bla ma nyid nas kyang yongs 'dzin bka' drin che ba'i mchog tu thugs zin gyi gtso bor mdzad la/_tshul de dag gis mkhyen rab kyi sgo phye ba dang bla ma dang lhag pa'i lhas byin rlabs dgongs pa klong rdol gyi spobs pa'i gter mdzod grol bas bka' bstan gyi gzhung rnams gzigs pa tsam gyis skye bo phal pas zhib rtog ci 'dra bgyis pa las lhag pa'i gzhung de'i gnad don mkhyen pa sogs rno myur thogs pa med pa so so yang dag rig pa bzhi dang spobs pa'i gter chen po brgyad kyi mdzod brnyes pa'i mthus mdo sngags kyi zab gnas mtha' dag thugs su chud cing thugs shes 'drongs bas phyi nang gi rig pa'i gnas mtha' dag mkhyen cing gzigs pa phul du byung ba'o/__/rje gong ma'i rnam thar zhal gsung mar/_snga phyir khams dbus gtsang gsum du/_/mi lo bcu gsum thos pa btsal/_/rdo rje 'dzin dang dge ba'i bshes/_/rig byed gzhung la mkhas pa sogs/_/gtsug nor brgya dang lnga bcu bsten/_/bzo gso sgra tshad yan lag bcas/_/'dul mdzod dbu phar bshad srol thos/_/gsar rnying rdo rje theg pa yi/_/dbang dang byin rlabs rjes gnang sogs/_/bka' gter bka' gdams sa skya pa/_/'bri stag mtshur dang gdan 'brug gi_/sngon gyi lugs srol ma nyams par/_/bzhugs pa'i smin grol gdams ngag dang*/_/bde dgyes gsang gsum dus 'khor lo/_/sgyu 'phrul gsang ba snying po sogs/_/rgyab rten rgyud kyi bshad pa dang*/_/bka' bstan dam pa'i gsung rab lung*/_/glegs bam bdun brgya lhag tsam nyan/_/mdor na bshad brgyud shing rta bcu'i/_/ring lugs rgyun bzhugs phal cher thos/_/cung zad sbyangs shing phyogs tsam shes/_/rang gzhan grub mtha'i khas len dang*/_/chos rgyus shin tu che bar byung*/_/zhes gsungs pa bzhin rang nyid rigs rus go gnas thob 'byor gyis dregs pas rang las dman pa'i bla ma la chos kyi yon tan ji tsam yod kyang che nyams kyi dogs pas bla mar bsten mi spobs pa dang*/_rang nyid yon tan can du rloms pas rgyud khengs pas dag snang gi mig 'grib nas gang zag su la'ang yon tan ji tsam che yang 'dud par mi byed pa dang*/_rang lugs kho nar zhen phyogs kyis grub mtha' chos brgyud gzhan gyi brgyud 'dzin la yon tan ji tsam yod kyang ngo mtshar du mi 'dzin pas don du mi gnyer ba gal chung chos la byas nas bzhag pa ma yin par gangs ri'i khrod kyi thub bstan rin po che yin no cog so so'i chos rgyun khungs dang 'brel nges pa rnams phyogs ris dang chog shes med pa dus rtag tu 'bad pa chen pos skyo dub mi mnga' ba'i dbang gis mang du thos pa rgya mtsho'i pha mthar legs par son pa'i tshul ni/_yon tan rin po che sdud pa las/_lhag pa'i bsam pas sangs rgyas byang chub mchog zhugs pas/_/slob ma bzang po bla mar gus ldan de dag gis/_/bla ma mkhas pa rnams la rtag tu bsten par bya/_/ci phyir zhe na mkhas pa'i yon tan de las 'byung*/_/zhes gsungs pa ltar sku'i skyes rabs thams cad du chos tshol ba/_sdud pa/_'dzin pa/_spel ba/_thugs su chud pa la goms pa'i rten 'byung lhan skyes su mnga' ba nyid kyis dang*/_si tu rin po che nyid rtag tu dam pa'i chos tshol ba la 'phags pa rtag tu ngu dang gzhon nu nor bzang lta bu dang*/_mang du thos pa'i mdzod bsags pas thugs rgyud phyug pa sangs rgyas gnyis pa dbyig gnyen lta bu'i rnam thar mnga' ba'i spyan ltos kyis/_rje bla ma mchog gi thun mong ma yin pa'i rigs brgya'i khyab bdag gcig pu o rgyan chos kyi rgya mtsho las snga 'gyur bka' ma sgyu 'phrul zhi khro/_dong sprugs gnyis/_yang dag_/phur pa/_gshin rje'i skor dang*/_mdo tshogs chen 'dus pa rtsa ba yan lag gi dbang tshang ma/_bka' brgyad rdzong 'phrang gis mtshon snga 'gyur bka' ma'i skor phal che ba/_nyang gter gur drag bde gshegs 'dus pa'i dbang*/_bla ma dmar khrid zhib rgyas/_gur drag dang thugs chen pod lung*/_khros nag gi smin grol dang mkha' 'gro chen mo bcas gzhung pod lung*/_chos dbang bla ma gsang 'dus/_rdzogs chen sangs rgyas mnyam sbyor/_thugs chen yang snying 'dus pa bcas kyi dbang khrid dang pod lung tshang ma/_rgyud bcu bdun gyi dbang*/_sangs gling dgongs 'dus don dbang*/_kar gling zhi khro'i smin grol zhib rgyas dang pod lung bcas/_kun gzigs lnga pa'i dag snang gsang ba rgya can nyer lnga'i dbang khrid shin tu zhib rgyas/_smin lugs gter mgon zhal bzhi'i zab khrid thun min/_rdzogs pa chen po snying thig ya bzhi'i dbang khrid lung bcas tshang ma/_klong gsal bdud 'dul gter chos yongs rdzogs kyi dbang*/_grub chen thang stong rgyal po'i gsang spyod mkha' 'gro snyan brgyud kyi chos skor yongs rdzogs dang*/_kun gzigs 'jam pa'i dbyangs pad+ma 'od gsal mdo sngags gling pa'i zab gter sgrub thabs snying po skor lnga/_grub thob chen po'i thugs thig_/grub thob bka' brgyad sogs si tu rin po che nyid lung zin chos kyi bdag por gyur pas 'jam mgon bla ma rin po che rnam pa gnyis ka las gsan pa dang*/_bla ma bstan gnyis skor gsum/_'chi med mtsho skyes snying thig_/snyan brgyud gshin rje/_snyan brgyud yang phur sbrags ma/_dag snang gter chen mchog gling 'das rjes rigs 'dus pad+ma'i myu gu'i rtsa dbang rgyas pa/_rtsa gsum bde gshegs 'dus pa dang spyi 'dus/_yang gter rtsa gsum dril sgrub kyi dbang khrid/_'chi med 'phags ma'i snying thig gi smin byed rgyun khyer lha khrid bcas/_mi tra'i tshe dpag dkar dmar/_dag snang khri srong bla sgrub/_sku gsum bla ma'i rnal 'byor/_rtsa ba yan lag gi dbang lung*/_mkhyen brtse'i gsung karma chags med kyi bla ma'i rnal 'byor gyi dbang*/_snying thig rdor sems mngon dga'i zhing sbyong dag snang rtsa gsum 'od gsal snying thig gi chos skor yongs su rdzogs pa'i rtsa ba dang yan lag gi dbang*/_khrid lung bcas chig rdzogs/_klong chen snying thig yum bka'i nang sgrub sgrol ma nyer gcig gi dbang sogs zab gnad che shos skor phal cher dang*/_thams cad gzigs pa mi pham rin po che'i rgyud lugs 'jam dpal zhi ba'i sgrub thabs kyi dbang chen/_ras chung snyan brgyud kyi bde mchog lhan skyes yab bka' dang yum bka'i byin rlabs khrid bcas/_mkhyen gsung yig cha rnams kyi ljags lung*/_grol mchog zhabs kyi zab khrid brgya rtsa zhib rgyas/_gling rje drung pad+ma 'gro 'dul gter chos tshang ma/_snga 'gyur rgyud 'bum rin po che pod nyer lnga'i ljags lung gis mtshon pa'i zab gsang dbyig gi snying po rgya cher gsan pa dang*/_dri med zhing skyong rje dbon rin po che pad+ma rgyal mtshan las klong gsal dang bdud 'dul chos skor gyi lung*/_mkhyen brtse rin po che'i bka' 'bum zin bris skor pod gnyis tsam/_khams byon mgon po tshogs bdag gi gzhung pod/_bka' 'dus/_ma Ni bka' 'bum/_snying thig rdor sems mngon dga'i dbang lung*/_rig 'dzin srog sgrub dbang lung cha tshang*/_phag mo sogs rgya cher gsan cing*/_rje dbon 'di nyid lugs gnyis kyi mkhyen rgya dang sku yon 'gran zla bral bas blang dor gyi mdzad sgo rje bla ma sku na gzhon pa'i skabs sku nyams la phan pa'i bka' drin shin tu che ba'i bla ma yin ces bka' las thos/_dgung lo bcu bdun thog tu lA s+ye ri khrod du thar rtse mkhan chen byams pa kun dga' bstan pa'i rgyal mtshan sogs kyi dngos slob/_mkhas btsun bzang po'i rnam thar rmad du byung bas sa ngor gyi bstan pa'i mdzes rgyan chen po/_'jam mgon bla ma nyi zla zung dang lhag par rje bla ma mkhyen brtse dbang po'i zhabs pad bgrang bya nyi shu'i skor la brten nas gsar rnying gi zab rgyas gdams pa'i bcud mtha' dag yongs su rdzogs shing sku gsung thugs kyi yon tan bum pa gang byo'i tshul du bzhes pa nang thugs kyi sras mchog gsang chen rgyud sde'i shing rta chen po 'jam dbyangs blo gter dbang po'i mdun ched du phebs pas/_bzhugs khri gos chen si'u'i bzhugs gdan snye 'bol dang bcas pa'i steng bzhugs su gsol nas yab sras 'phrad pa lta bu'i gsung gleng zhib par mdzad de thun mong ma yin pa'i thugs brtses lhag par bskyangs bas rje bla ma mchog kyang bcos min gyi dad gdung shugs 'byung gis thugs la 'khrungs pa'i ngo mtshar du gyur pa dang*/_rim par rje bla ma rdo rje 'dzin dngos blo gter zhabs mchog dang*/_brag ra zhabs drung rdo rje 'chang bkra shis rgya mtsho ste rnam gnyis lhan rgyas pas rgyud sde rin po che kun las btus pa'i bka' chos kyi dbu tshugs te/_bya rgyud rtsa ba rigs gsum spyi dkyil nas brtsams rnal 'byor rgyud yan chad rdzogs nas re zhig bka' chos phyir 'gyangs song bar/_zur du blo gter zhabs las zhen pa bzhi bral/_blo sbyong don bdun ma'i khrid skor rtsa ba yan lag shin tu mang po/_gsang chen rgyud sde'i yang snying gsung ngag rin po che lam 'bras bu dang bcas pa thun min slob bshad kyi smin grol zab rgyas su gsan/_kun gzhi rgyu rgyud kyi lta ba 'khor 'das dbyer med kyi sems tshol ngo sprod rgyas par gnang ba'i rkyen gyis rig stong ye shes kyi dgongs pa thugs rgyud la sad pa'i tshul mdzad pas/_rje bla ma 'di nyid thun mong ma yin pa'i rigs kyi bdag por nges pa'i dad gdung dang bsngags brjod shin tu che ba yang yang mdzad/_spyir 'jam mgon blo gter zhabs 'di nyid la chos rje dpal sprul rin po che'i thugs sras smyo shul lung rtogs bstan pa'i nyi ma las rdzogs chen man ngag snying thig gi smin khrid kyang gsan sbyang nan cher mdzad pas 'od gsal man ngag sde'i rtogs pa don gyi brgyud pa'ang chu bo gcig dres su bzhugs par gsungs pa zhar la 'phros te/_mdor na don gyi gsang ba dkyil 'khor rgya mtsho'i khyab bdag dpal he ru ka chen po dang rnam dbyer med pa'i bdag nyid du nges kyang rnam pa tshur mthong gi gdul bya'i snang ngor 'jam dbyangs bla ma'i rtsa ba'i thugs dam dgyes pa rdo rje yin pa'i sngon smon gyi mthus gsung ngag slob bshad tshig tsam du ma gyur pa snyan brgyud tshad ma bzhi ldan sgra ji bzhin pa mngon du mdzad pa ste/_deng sang dus dbang gis gsar rnying kun gyis gdams khrid rnams phal cher bshad yam dang khrid lung tsam du song zhing*/_rtogs pa'i bstan pa mtshan tsam du gyur pa'i skabs 'dir ngo mtshar khyad 'phags kyi gnas su nges pas chos 'di'i lugs 'dzin pa rnams nas mkhyen brtse rin po che rnam pa gnyis bzhugs pa'i khrid rgyun skyong bar mdzad pa gal che snyam mo/__/zhabs drung rin po che bkra shis zhabs las mi tra brgya rtsa dang*/_ngor dkyil bdun/_rwa lugs 'jigs byed lha dgu/_tshar lugs lha bcu gsum ma bcas kyi dbang chen/_ngag chos pa'i yig cha steng nas lam 'bras ljags bshad bcas gsan/_gdan sar zhabs pad bkod nas lcags khyi cho 'phrul zla ba'i mar ngo rje gong ma'i sku mchod kyi rjes gza' skar dge bar slar mkhas shing grub pa brnyes pa'i rdo rje'i slob dpon chen po yab rje rig pa 'dzin pa 'gyur med tshe dbang rgya mtsho mchog gi zhal snga nas snga 'gyur bka' ma tshogs chen 'dus pa dang*/_zhi khro na raka dong sprugs/_gter ma bka' brgyad bde gshegs 'dus pa bcas kyi dbang chen rnams kyi sgo phye nas rin chen gter mdzod chen po'i rgyud dang sgrub sde'i go rim gzhung ltar tshang ba dang*/_gter chen mchog gling gi chos skor yongs rdzogs kyang de dang chabs cig smin grol rdzogs par mdzad de/_mdor na zla ba brgyad kyi bar du zhib rgyas su gsan par mdzad/_lcags phag lor rje blo gter zhabs la gsol ba btab pas dgongs gtad bcas bka' lung phebs gsal bzhin lhun grub steng gi mkhan chen rdo rje 'dzin pa chen po ngag dbang bsam gtan blo gros las sgrub thabs rin po che kun las btus pa'i smin grol lung bcas dang*/_mkha' spyod be bum pod gsum gyi lung sogs mang du gsan/_chu byi lor wa ra thar rtse zhabs drung byams pa kun bzang bstan pa'i nyi ma las rgyud sde'i bka' chos 'phro rnal 'byor bla med skor man chad kyi dbang khrid lung bcas zhib rgyas zla ba bzhi lhag par gsan cing*/_zhabs drung 'di nyid dam pa'i yon tan gyis thugs rgyud phyug pas sku tshe rgyun ring du bzhugs na sa ngor bstan pa'i mdzes rgyan du nges par grub pa zhig yod ces yang yang gsung*/_de nas snga phyi ci rigs par dpal spungs mkhas dbang bla ma karma bkra shis chos 'phel las dpal ldan shangs pa'i gser chos skor gyi dbang khrid lung bcas zhib tshags/_jo lugs dpal dus kyi 'khor lo'i slob ma rjes 'dzin/_sta gon/_byis 'jug_/mchog dbang thun mong dang thun min/_rdo rje slob dpon bdag po dang bdag po chen po'i dbang bcas/_khrid yig lhan thabs sbyar ba'i smin khrid/_tA ra nA tha'i gsung bskyed rdzogs rnam bshad dang sgrub dkyil sogs kyi lung 'di skor phyogs gtogs bcas dang*/_zhi byed dang gcod skor/_rdo rje gsum gyi bsnyen sgrub bcas/_gdams mdzod du bzhugs rigs kyi smin grol lung bcas/_sgrol ma rnal 'byor ma'i dbang chen dang rig gtad rjes gnang rgyud bshad khrid bcas/_zab khrid brgya rtsa khrid lung*/_jo bo'i chos chung brgya rtsa/_bka' gdams glegs bam rin po che'i lung*/_mar mi'i rnam mgur dang dwags po'i bka' 'bum lung*/_thar rgyan dang lam mchog rin chen phreng ba'i bshad khrid bcas/_yang dgon pa'i ri chos sogs kyi lung*/_'khon lugs phur pa jo nang rje btsun rin po che'i sgrub dkyil la 'jam mgon kong chen zhabs kyi mdzes rgyan gnang ba'i steng nas kun gzigs mkhyen brtse'i nye brgyud kyi byin rlabs dang ldan pa'i dbang lung khrid bcas/_sa lugs yig cha'i steng nas kyang stod smad dbang lan gcig_/rje mkhyen brtse'i dgongs gter rtsa gsum 'od gsal snying thig gi dbang khrid lung dang bcas pa dang*/_lce btsun chen po'i bi ma la'i zab tig gi dbang khrid tshang ma/_shes bya kun khyab kyi gzhung rtsa 'grel sbrags ma'i bshad lung rnams 'jam mgon kong sprul rin po che kho na las gsan pa dang*/_thugs sgrub bar chad kun sel gyi zhal gdams snying byang rtsa ba yan lag gi gter gzhung tshang ma'i lung*/_sdom gsum rnam nges 'grel chen dpag bsam snye ma'i bshad lung*/_rje gu Na'i mar mi gnyis kyi bla sgrub kyi dbang dang*/_kong sprul bka' 'bum tshang ma'i lung*/_lam rim ye shes snying po'i rtsa 'grel gyi bshad khrid bcas mkhyen kong mchog gsum ka las gsan pas brgyud pa khungs btsun zhing chos rgyun dkon pa'i skor mang po gsan nas thugs yid gcig 'dres kyi dad gdung 'gyur ba med pa'i 'dren pa mchog tu bkur zhing*/_bla ma bkra 'phel mchog gi zhal snga nas kyang 'jam mgon rnam gnyis la mchog sprul byon pa thams cad las mkhyen rab kyi rnam dpyod dang mdzad pa thams cad rje 'di 'gran zla bral ba yin zhes bsngags pa yang yang mdzad/_snga 'gyur bstan pa'i srog shing mkhas grub chen po zhe chen rgyal tshab rin po che 'gyur med pad+ma rnam rgyal byang phyogs su dbyar bsod la phebs skabs rje bla ma phug dgon du sman sgrub tshogs dbur bzhugs pa dang mjal 'phrad thog mar gnang ba'i tshe/_gtsug lag tu dge 'dun pas gter gsar smon lam/_bstan pa'i dpal gyur bla ma rin chen rnams:_nam mkha' bzhin du kun la khyab par shog:_ces pa'i tshig mtshams su khel bas rgyal tshab rdo rje 'chang shin tu dgyes nyams gnang zhing*/_de skabs 'chi med yang snying kun 'dus kyi tshe dbang chos 'brel tsam gsan/_de nas bzung rje bla ma rin po ches thun mong ma yin pa'i rigs bdag du bsnyen zhing*/_rgyal tshab rin po ches kyang dad gdung thugs brtses 'bral med bskyangs te rdzong sar bkra shis lha rtse'i gdan sar ched du phebs nas rgyun ring du bzhugs te mkhyen brtse'i nye brgyud byang gter yongs rdzogs dang*/_paN chen rin po che'i bka' brgyad rig 'dzin yongs 'dus kyi smin grol lung bcas/_rtse le'i gsung byang chub sems sdom/_bka' ma gshin rje kha thun/_zhang khrom tshe bdag lcags 'dra sdig_/mkhyen brtse'i nye brgyud rdor gling bka' brgyad dbang chen/_thugs dam gu ru chos dbang phur pa yang gsang spu gri/_de'i rnam bshad rje nyid kyi gsungs/_kun mkhyen 'jigs gling gi phur pa rgyud lugs dbang chen/_rje mkhyen brtse'i gter kha yang phur sbrags ma/_de'i rnam bshad rje bla ma mchog gi gsung ngo mtshar can dang*/_rdzogs pa chen po snying thig ya bzhi'i dbang yongs rdzogs dang*/_mchog gling gter gsar a ti zab don gyi rig pa'i rtsal dbang*/_dga' rab snying thig gi rdor sems dang yang dag_/bde mchog sangs rgyas mnyam sbyor bcas kyi dbang khrid kyis mtshon 'jam mgon bla ma rnam gnyis las gsan pa'i gter rnying rgyun dkon rigs mang po dang*/_de rjes zhe chen ri khrod pad+ma 'od gling nas smin gter yongs rdzogs kyi smin grol lung bcas gsan/_de skabs rgyal tshab rin po che sku bsnyun lci po bzhes par zhabs brtan gsol 'debs zhus pas bsnyun las grol zhing zhabs pad yun brtan gyi rten 'brel legs 'grigs byung*/_slar yang chu bya lor zhe chen yang khrod bde mchog bkra shis dge 'phel du gdams ngag rin po che'i mdzod kyi smin grol rgyab rten bcas zhib rgyas/_gter mdzod bka' rgya pod gsum gyi dbang lung dang*/_rgyal tshab rin po che'i gsung rab sngar ma gsan pa tshang ma'i gdams gtad bcas nan du gsan par mdzad/_rgyal tshab rin po ches kyang rje bla ma rin po che 'di nyid kyi mdun nas sgrub thabs kun btus gsan bzhed kyi dkar po rnam gsum rjes gnang thog mar gsan pa nas brtsams/_bka' ma gnubs lugs gshin rje kha thun gyi dbang chen dang*/_smin lo'i yig steng nas zur lugs gsang ba snying po'i rgyud bshad 'jam mgon mkhyen brtse'i nye brgyud can dang*/_rtse le sna tshogs rang grol gyi bka' 'bum lung yongs rdzogs kyis mtshon bka' gter gyi smin grol mang po gsan pa dang*/_sku gshegs pa'i skabs gdung mchod zhag bdun gsum ring bzhugs shing sku gdung zhugs 'bul sogs dgongs rdzogs kyi skor dang*/_mchog gi sprul pa'i sku rin po che ye shes gzigs pas ngos 'dzin dang rje gong ma las gsan pa'i dbang chos phal cher slar bstsal te theg mchog chos kyi khri la dbugs dbyung ba sogs bka' drin chen pos khyab par mdzad/_rje de'i thugs sras kong sprul rin po che pad+ma dri med legs pa'i blo gros zhabs la thugs yid gcig 'dres kyi nang ma'i gsung 'phros gnang bas rje de'i thugs dam nyams bzhes la dogs sel dang bla ma'i mdzad phrin skyong lugs skor gyi bslab ston zhib rgyas su gnang ba dang*/_rgyal tshab rin po che las gsan pa'i rje mkhyen brtse'i nye brgyud du bzhugs pa'i bka' ma tshogs chen 'dus pa'i dbang yongs rdzogs dang*/_'jam mgon rin po ches sgrub dbang mdzad pa'i rgyun bka' brgyad bder 'dus kyi sgrub dbang chen mo bcas/_snying thig chen mo pad+ma dang bi ma'i bka' srol gyi lung yongs rdzogs/_rab 'byams gnyis pa 'gyur med kun bzang rnam rgyal gyi bka' 'bum lung*/_rgyal tshab rin po che'i gsung gal gnad che ba du ma'i lung sogs dbang chos mang du gsan cing*/_zhe chen rab 'byams lnga pa 'gyur med kun bzang bstan pa'i nyi ma las nyang gi khros nag dbang bsdus/_smin gling gshin rje dregs 'joms dbang*/_'chi med yang snying kun 'dus/_gling gter tshe yum tsaNaDa li'i dbang*/_gter chen pad gling chos skor yongs rdzogs kyi dbang lung sogs gsan cing phan tshun thugs brtse dad dam mtshungs zla med par bzhugs/_rgyal tshab rdo rje 'chang gi nye gnas bla ma 'jam dbyangs blo gsal las rje'i gsung skor phal che ba'i ljags lung gsan/_lcags sprel dgung grangs nyer brgyad steng byang phyogs rdo sgar du ched phebs kyis kun mkhyen 'jigs med bstan pa'i nyi ma'i mdun nas rdzogs pa chen po klong chen snying thig gi nang sgrub rig 'dzin 'dus pa'i rtsa dbang rgyas pa grub chen rin po che'i ljags bsgrigs ltar/_yang gsang thig le'i rgya can gyi smin byed/_klong snying bskyed rdzogs skor dang khyad par rdzogs pa chen po ye shes bla ma'i smin khrid zab rgyas/_kun mkhyen bla ma de nyid kyi legs bshad gsang snying spyi don rin chen mdzod lde'i ljags bshad bcas dang*/_thun min thugs brtse'i zhal gdams lhug par bstsal bas thugs yid gcig 'dres su gyur cing*/_kun mkhyen bla ma rang gi gsung rtsom legs bshad bstan bcos thams cad kyi gtad rgya thun min du mdzad nas 'chad nyan 'dzin spel 'os pa'i bka' lung dgyes pas bstsal ba dang*/_phyis su mchog sprul rin po che 'jigs med thub bstan phrin las dpal bzang las mkha' 'gro snying thig sogs dbang chos du ma gsan/_rdo sgar mkhan po las grub chen rin po che 'jigs med phrin las 'od zer gyi dgongs gter dam chos bde chen lam mchog skor gsan par mdzad/_phebs lam nas gter chen las rab gling pa'i mdun ched phebs mdzad cing*/_gter chen 'di ma mjal gong nas mtshan thos pa tsam gyis bcos min gyi dad gdung thugs la 'khrungs pa zhig mnga' ba'i dbang gis snga phyir mjal 'phrad lan mang gis 'jam mgon blo gros mtha' yas zhabs kyi zab gter dgos pa'i dbang gis gter chen 'di nyid la bka' babs pa rdo rje phur pa yang snying spu gri'i dbang khrid lung bcas/_las gling rang gi gter chos nas phur ba rdo rje bkod pa dang*/_rgya cher rol pa bcas/_rten 'brel nyes sel rgyas 'bring*/_dgongs gter ge sar chos skor bcas mang du gsan cing gter chos yongs rdzogs kyi gdams gtad gnang*/_phreng gter grol thig dgongs pa rang grol gyi dbang dang gzhung pod lung*/_lce btsun chen po'i bi ma la'i zab tig gi dbang dang kun gzigs mkhyen brtse'i zhal lung nyams med kyi khrid zin steng nas khrid kyis mtshon zab chos mang du gsan/_spyir gter chen las gling 'di'i mtshan thos pa tsam nas dad gdung rang bzhin gyis skye ba'i dbang gis rten 'brel nyes sel bsdus pa shog ser las 'bebs bskul zhus pa yin gsungs/_mkhas grub gnyis ka'i rnam thar ngo mtshar can bzhugs gsungs/_chu glang dgung grangs so gsum steng lha ldan gnas gzigs dang por phebs skabs smin gling khri chen 'gyur med don grub dbang rgyal mdun nas tshe sgrub yang snying kun 'dus/_gcung rin po che ngag dbang chos grags las pad gling tshe sgrub dang ma ning gi dbang*/_smin lugs gsang ye dang*/_'chi med yang snying kun 'dus kyi tshe dbang*/_mgon dkar tshe dbang*/_rdor gling ma ning gi srog dbang dang rdor gling tshe sgrub kyi dbang*/_grwa mngon zhang blon gyi rjes gnang*/_mkhan chen ngag dbang mkhyen brtse nor bu las nyang lugs mgon po phyag bzhi pa'i dbang*/_rdor 'dzin rin po che rnam grol rgya mtsho las rig 'dzin thugs thig dang drag dmar skor bcas gsan/_rgyal mchog bcu gsum pa thub bstan rgya mtsho las byang chub lam sgron gyi chos 'brel gsan cing*/_gter chen las gling dang pad dkar 'chang ba yab sras gangs can bstan 'gro'i dpal du zhabs pad brtan dgos pa'i rgyu mtshan zhus pas thugs dgyes tshul gyi dbugs dbyung bstsal/_phyis sku tshe'i smad du pad dkar 'chang ba bstan 'dzin rgya mtsho las thugs rje chen po mi tra lugs stag phu'i gter byon gyi dbang gsan cing*/_bka' mol zhib par gnang ched sbug mjal lan mang du thun min thugs brtses bskyangs par mdzad/_a mdo dge bshes mkhas pa'i dbang po 'jam dpal rol pa'i blo gros las rtsa rgyud gsang ba 'dus pa'i dbang chen/_'jigs byed dpa' bo gcig pa sogs dbang du ma gsan cing phan tshun dad 'dun ches che bar mdzad/_mchog gling gter sras rig 'dzin tshe dbang nor bu las thugs sgrub bsam pa lhun grub kyi dbang dang*/_pad+ma bka' thang gi lung sogs sku gzhon pa'i skabs kaHthog gu ru'i lha khang nas gsan pa dang*/_gnas brtan dgon gyi mchog gling sprul sku rin po che pad+ma 'gyur med theg mchog bstan 'dzin las thugs sgrub bar chad kun sel rtsa ba yan lag skor yongs rdzogs/_zab bdun yang phur sogs cha tshang*/_gsang thig skor gsum/_pad+ma gar dbang*/_'khor ba dong sprugs/_rigs gsum snying thig zhib rgyas/_lam rim ye shes snying po'i bshad khrid sogs/_thugs sgrub yid bzhin nor bu'i rdzogs rim nyon mongs dug lnga rang grol gyi zab dbang*/_chos skyong dgongs 'dus srog gtad/_shwa na'i srog phur gtad pa rdzags chen sde gsum sogs bka' rgya skor bcas mchog gling gter chos yongs rdzogs dang*/_rje nyid kyi gsar bsgrigs zur bza'i thugs dam skor drug gi dbang*/_gzhan yang tsha ba lo tsA ba rin chen rnam rgyal gyis 'jam mgon mkhyen kong mchog gsum las gsang snying gi bshad rgyun zhib par gsan pa'i gsung rgyun legs bshad sgyu 'phrul gsang snying 'grel chung*/_'jam dpal bstod sgrub kyi rig gtad lan bcu gsum dang*/_smin gter rdor sems thugs kyi sgrub pa'i dbang kun gzigs bla ma rin po che las lan drug tu gsan pa de dag gi dbang sogs gnad chen du ma gsan/_tsi ke'i gdan sa smin grol nor bu gling gi gter chen bla ma'i mchog sprul 'gyur med bstan pa'i rgyal mtshan las thugs sgrub yid bzhin nor bu bsam pa lhun grub kyi dbang*/_dgongs gter bi ma'i bla sgrub kyi dbang khrid/_rig 'dzin srog sgrub kyi pod lung sogs mkhyen brtse rin po che'i brgyud pa rnams gsan pa dang*/_gling chos rgyal rig pa 'dzin pa pad+ma bzhad pa dbang chen bstan 'dzin chos rgyal yab yum nas rje bla ma dgung lo bcur phebs pa kaHthog bzhugs skabs mjal du phebs par chos 'brel du 'jam dpal bstod pa gang blo ma'i ljags bshad thugs thog nas gsungs pas dad gdung dpe med mdzad de spyan chab bsil/_phyis rgyal po'i pho brang du sgrub chen dang sman sgrub du ma'i dbur gdan drangs shing*/_rig pa 'dzin pa de nyid las tshe yum tsaNaDa lI'i dbang*/_lha rigs bde chen rol pa rtsal gyi dag snang ge sar rdo rje tshe rgyal gyi srog dbang skor 'jam mgon mi pham rin po che'i brgyud pa dang*/_chos rgyal nyid kyi dgongs gter tshe yum gyi rtsa ba'i chos bdag tu bsngags te dbang lung phul bas sku tshe'i gegs las grol ba sogs rten 'brel legs tshogs su gyur cing phan tshun dad dam mthar son par gyur/_gsung ngag rin po che nyams bzhes sku tshe gcig gis zung 'jug gi go 'phang mngon du mdzad pa snyan brgyud 'dzin pa kun gyi rgyal po sga ston rdo rje 'chang chos rje ngag dbang legs pa rin po che ched du gdan zhus kyis bla slob 'brel nas snga phyi mang du mjal 'phrad dang*/_gtso bor gsung ngag rin po che tshad ma bzhi ldan gyi snyan brgyud lam 'bras slob bshad chen mo shin tu zhib rgyas/_mkha' spyod byin rlabs khrid bcas/_rwa tshar gyi 'jigs byed bcu gsum pa'i dbang*/_dmar khrid mkha' 'gro'i snyan brgyud/_dmar khrid tshem bu lugs/_sgrol dkar tshe khrid/_mdor na sa lugs dbang lung gal gnad gang che'i skor gsan cing*/_rje 'dis kyang 'jam mgon bla ma mchog rigs kyi bdag po thams cad mkhyen gzigs mkhyen brtse'i dbang po dngos su byon pa zhes bsngags brjod dang thugs 'dun shin tu che bar gnang*/_e waM thar rtse'i mkhan chen 'jam dbyangs kun bzang bstan pa'i nyi ma las kye rdor rgyu lam gyi dbang chen dang*/_lam zab phyi nang gi byin rlabs/_thar rtse zhabs drung nam mkha' kun bzang bstan pa'i rgyal mtshan las tshe dpag lha dgu'i dbang*/_stag zhon gyi rjes gnang dang gzhung pod kyi lung sogs gsan/_ngor mkhan chen rdo rje 'chang dam pa lags sam mtshan dngos don dpal zhabs las tshe rta zung 'brel gyi tshe dbang gsan cing*/_mkhan chen dam pa 'dis rje bla mar snyigs dus 'dir rdo rje 'chang gi mdzad pa sgra ji bzhin du sgrub pa'i bdag nyid chen po 'di nyid nges zhes bsngags pa ches cher gnang*/_klu sdings rgyal sras 'jam dpal chos kyi nyi ma las dkar po lha gsum gyi rjes gnang*/_gzims 'og mchog sprul rin po che las kye rdor rgyu lam gyi dbang*/_lam zab kyi byin rlabs/_zhal gyi dbang khrid tshang ma gsan/_sde gzhung mchog sprul kun dga' bstan pa'i rgyal mtshan rin po che las sgrub thabs rgya mtsho'i rjes gnang dang*/_bde dril lus dkyil/_mkha' spyod byin rlabs/_mgon po gur dang sgrol dkar rjes gnang thun min/_dgyes rdor lam dbang sogs mang du gsan cing gsang chen slob bshad kyi zab gnad thun mong ma yin pa sga ston 'jam pa'i dbyangs kyi zhal lung gi bgro gleng gnang zhing de dag yi ger bkod par bkas bskul ba sogs lam 'bras bstan pa'i srog lta bur gyur pa dang*/_deng sang sa skya'i phyogs la bstan 'dzin 'di las lhag pa'i yon tan mnga' ba su'ang med ces bstod bsngags yang yang gnang zhing*/_chos rje sga ston rdo rje 'chang la mnyes pa gsum gyi zhabs tog phul du son pas thugs yid gcig tu 'dres pa yin ces thugs nang shin tu gshin par mdzad/_rje bla ma la kun gzigs many+dzu'i zhabs dngos su byon pa zhes mchog sprul rin po ches kyang bsngags brjod dad mos ches cher gnang*/_sga stod thar lam sde gzhung sprul sku mchog las sa skya gong ma rnam lnga/_ngor chen rdo rje 'chang*/_zhu chen ma hA paNaDi ta'i bka' 'bum lung sogs rgya cher gsan/_mkhyen brtse'i mchod dpon bla ma shes rab las sku chung dus sa skya gong ma rnam lnga'i bka' 'bum dang*/_rtse le mkhas mchog pad+ma legs grub kyi bka' 'bum lung sogs gsan/_chos bzhin spyod pa'i dge ba'i bshes gnyen chen po 'jam dbyangs rgyal mtshan las kye rdor rgyu lam gyi dbang*/_bdag med lha mo bco lnga'i dbang*/_lam 'bras slob bshad kyi khrid lung sogs gsan cing rje bla ma rin po cher zhabs tog dang dad mos sri zhu shin tu che bar gsung*/_rdzong sar dgon gyi rdor 'dzin bla ma bo d+hi b+ha dra las sa lugs mi 'khrugs pa/_kye rdor/_mkha' spyod skor gyi dbang khrid rgya cher gsan/_rje btsun sgrol ma sku dngos kyis rjes su bzung ba'i sbas pa'i rnal 'byor bstan 'phel las/_thang stong rgyal po'i gsang spyod mkha' 'gro snyan brgyud kyi smin grol/_mgon po gur gyi dbang dang rjes gnang zab khrid kyi skor/_rgyud sde bzhi 'brel sgrol ma'i dbang*/_mkha' spyod ma'i byin rlabs dang khrid bcas gsan/_brag yab gtsang sar sprul sku las 'khon lugs phur pa stod smad kyi dbang chen/_rnam sras dang mgon po gur gyi skor sogs sa skya'i zhal ngo nang brgyud kyi rigs mang po gsan/_sde dge lhun grub steng gi shar bla ma 'jam dbyangs mkhyen rab mtha' yas las dpal dus kyi 'khor lo bu lugs kyi dbang chen/_'jigs byed dang zhal gyi pod lung rnams gsan/_rdor 'dzin dpal ldan 'jam dbyangs las bde mchog lu hi'i lugs kyi dbang chen/_zhal gyi smin grol tshang ma/_shar bla ma dkon mchog bstan 'dzin las gur mgon gyi rjes gnang yongs rdzogs/_bka' khrid zhib rgyas/_sgrol dkar 'od zer drug sbrags kyi khrid bcas gsan/_sga thub bstan dgon gyi bla ma sde snod 'dzin pa chen po ngag dbang bstan pa mchog las/_chos bka' chen po 'di nyid gsan pa'i 'os su gzigs te snga mo nas lung rgyun tha dad rnams zhib tshags zhu bar bkas bskul zhing mthun sbyor sogs gnang ba ltar brgyud srol mtha' dag yongs su rdzogs shing 'chad spel yang lan bcu gsum tsam nges par song ba de nyid las rgyal ba'i bka' 'gyur rin po che yongs su rdzogs pa'i bklag lung zhib rgyas ring nyin bzhin mchod sprin gyi bkod pa rgyas par spros te gsan par mdzad/_bla ma 'dis rgyal bka' rin po che lan shin tu mang por gsungs pas ngag bden tshig grub pa lta bu yod/_sgra gsal dag snyan gsum dang ldan pas spyir ston pa thams cad mkhyen pa'i gsung la ngo mtshar che ba gzhir bcas/_lhag par sangs rgyas phal po che'i sde snod ni sangs rgyas kyi gsung gsang ba bsam gyis mi khyab pa zab cing rgya che ba'i ngo mtshar rmad du byung bas dad spro'i yid ches thob pa byung zhes gus la bka' 'phros phebs/_sa skya phun tshogs pho brang gi skyabs mgon bdag chen ngag dbang kun dga' bsod nams las 'khon lugs phur pa stod las smad las kyi dbang chen dang*/_tshe rta zung 'brel sogs gsan cing*/_bla ma zhi khro'i tshe dbang*/_gser chos khyung nag_/gur lha brgyad/_zhal dkar po tshe 'phel sogs gsan/_sa skya sgrol ma pho brang gi khri chen ngag dbang kun dga' theg chen dpal 'bar phrin las dbang gi rgyal po las 'khon lugs phur pa sogs dbang chen mang du gsan/_lha khang mkhan chen 'jam dpal bzang po las rta mgrin yang khros dbang chen sa lugs yig cha ltar dang*/_ngor chen rdo rje 'chang gi chos kyi khri la bzhugs pa ngor thar rtse mkhan rin po che/_phan khang*/_klu sdings/_khar gsar bcas la'ang skabs babs kyi chos 'brel re gsan par mdzad/_rab 'byams pa kun bzang bsod nams kyi nye gnas mkhan a dpal zhabs las rje'i lam rim chen mo dang*/_a mdo rme ba bla ma bshes gnyen dam pa zhig las rje yab sras sogs kyi bka' 'bum skor zhib tu gsan bzhed lo zla sogs gtan khel mdzad kyang dus zing gis rten 'brel 'phro can du lhag_/mdo khams grub dbang rdzogs chen lnga pa thub bstan chos kyi rdo rje las rje gong ma'i zab gter 'phags ma'i snying thig gi bi ma mi tra'i bla sgrub byin rlabs snying po/_bal po a hU~M 'bar gyi dzam b+ha la nag po/_ye shes bla ma'i rig pa'i rtsal dbang*/_grub chen he ru ka dpal mkhyen brtse ye shes rdo rje'i zab gter gcod 'dzin pa rang grol/_'ja' tshon dkon mchog spyi 'dus sogs gnad zab 'ga' zhig gsan/_sku phreng drug pa mchog sprul 'jigs bral byang chub rdo rje'i zhabs las kyang dkon spyi'i tshe dbang dang nyi grags tshe sgrub bdud bzhi rnam rgyal/_rta mgrin dregs pa zil gnon/_sngags bdag ma'i rjes gnang sogs gsan nas rim gyis nyi grags dang khye'u rig 'dzin chen po'i chos skor tshang ma gsan bzhed gnang*/_rdzogs chen mkhan rin po che bsod nams chos 'phel las kyang gcod 'dzin pa rang grol gyi dbang khrid lung bcas lan gcig gsan/_nyag rong gter ston dri med 'od zer pad+ma gling pa las stag sham yi dam dgongs 'dus kyi dbang chen/_yang gter bla ma bstan gnyis skor gsum/_thugs rje chen po pad+ma zhi khro/_snyan brgyud yang dag_/gshin rje/_phur pa sogs rje gong ma'i zab gter gyi dbang khrid lung brgyud byin rlabs dang ldan pa du ma dang*/_mkhyen brtse'i nye brgyud mkha' 'gro yang tig dang*/_nye brgyud nges don snying po dbang khrid/_rgyud bcu bdun dbang*/_rdzogs chen chig chod kun grol gyi dbang khrid lung bcas/_bka' brgyad bde 'dus dbang 'bring bsdus/_phrin sgrub rin chen sgron me'i dbang*/_gur drag ye shes rab 'bar/_rata gling ma ning dang byang gter lha chen srog dbang*/_klong snying skor mang tsam/_'jam mgon kong sprul rin po che las gsan pa'i zhig gling chos skor rnams dang*/_thugs sgrub bsam lhun dbang rgyas 'bring bsdus pa tshe dbang bcas/_'jam mgon tshe rta zung 'brel/_gshin rje lcags sdig gi smin byed mu tig phreng ba/_thugs rdor mig 'byed/_gsang bdag nyi ma mdung gang*/_gter ston nyid kyi gter chos gshin rje'i skor sogs dbang lung rgya cher dang*/_rkyen sel zhabs brtan snga phyir gnang bas sku tshe'i bar chad bzlog pa sogs phan tshun thugs brtse che zhing*/_sku mched mkhan chen bla ma rgyal mtshan 'od zer las sgyu 'phrul zhi khro/_snying thig gi skor dang rdor sems mngon dga'i zhing sbyong gi dbang sogs gsan/_gter ston sku mched la 'jam mgon rnam gnyis kyi dbang dang sgrub chen gyi phyag len dbang khrid kyi rgyun sogs ngo mtshar can du ma bzhugs pa thams cad gsan bzhes gnang zhing*/_rje bla ma rin po che la'ang thugs brtse dang dad gdung thun min mnga' bar gsungs/_gter ston dri med sras 'jam mgon mchog sprul pad+ma thugs rje'i dbang phyug las dong sprugs pad+ma brgya ldan dang*/_zhi khro'i khrom dkrugs gnyis/_gter chen las rab gling pa'i chos skor yongs rdzogs 'dus pa/_thugs sgrub skor sogs kyi dbang lung rgya cher gsan/_'phel tsha'o phung dgon gyi bla ma las stag sham chos skor gyi lung yongs rdzogs gsan/_grub dbang shAkya shrI'i sras mkhyen brtse'i thugs sprul 'phags mchog rdo rje las rje gong mas chos bdag tu dbugs phyung ste grub dbang rin po cher bka' babs pa'i rtsa gsum spyi 'dus dang*/_yang gter bla ma bde mchog 'khor lo'i dbang khrid lung bcas/_dge ri chos rgyal rdo rje'i drag mthing gi dbang*/_shAkya shrI'i dgongs gter gu ru bde ba chen po'i dbang sogs gsan/_ra sprul thub bstan bshad sgrub las gnam chos dbang lung tshang ma dang*/_rata gling gter chos skor cha tshang*/_rje mkhyen brtse'i zhal snga nas bstsal ba'i snga 'gyur bka' ma rgya sprul mdo sngags bstan 'dzin las brgyud pa gzim 'gag mchog sprul rin po che las gsan/_kaHthog mchog sprul mkhas grub chen po rgyal sras kun bzang bstan 'dzin las bla ma dgongs 'dus kyi sgrub dbang chen mo rgyal dbang karma pa mkha' khyab rdo rje'i brgyud pa zhib rgyas/_pod bco lnga yongs rdzogs kyi lung*/_spyi mdo dgongs 'dus kyi bshad lung*/_ngal gso skor gsum dang theg mchog mdzod mkhyen brtse rin po che'i nye brgyud can/_bi ma dang mkha' 'gro snying thig rdzogs chen phyogs kyi brgyud pa'i dbang sogs gal gnad che ba'i skor rgya cher gsan/_sku chung dus yab gzhis nas brag dmar mchog sprul yid bzhin dbang rgyal las tshe dbang zhig gsan/_kaHthog mkhan chen ngag dbang dpal bzang las klong gsal dang bdud 'dul chos skor gyi dbang lung yongs rdzogs/_gu ru chos kyi dbang phyug gi zab gter bka' brgyad gsang ba yongs rdzogs kyi dbang chen 'jam mgon kong sprul rin po che'i sgrub dbang gi brgyud pa/_mkha' 'gro yang tig gi dbang khrid sogs rgya cher gsan/_kaHthog mkhan legs bshad 'byor ldan las kun mkhyen 'jigs med gling pa'i bka' 'bum yongs rdzogs pod dgu dang*/_'ja' tshon chos skor pod drug_/bka' ma chog bsgrigs pod dgu rdzogs chen spar 'khod ltar sogs ljags lung rgya cher gsan/_'bri gter 'od gsal rdo rje las gter ston rang gi zab gter sgrol ma dmar mo'i dbang*/_gshin rje yang bzlog gi dbang chen/_khro chu'i gtor dbang*/_zla gsang tshe sgrub kyi dbang*/_'bri gung srung ma a phyi chos sgron gyi bka' gtad/_byad khrol/_tshe dbang sogs gsan cing sku tshe'i bar chad sel ba'i brtan bzhugs dang*/_srung bzlog gi zhabs brtan skor mang du bsgrub pas sku tshe'i bar chad las grol/_gter kha 'ga' zhig phab pa'i skabs phyag bris gnang ba sogs las 'phro smon lam gcig pas 'brel ba'i gter ston tshad ma yin pa phran la'ang bka' lan mang bstsal/_bdud 'joms mchog gi sprul pa'i sku 'jigs bral ye shes rdo rje las rje nyid kyi dgongs gter gro lod kyi smin grol yongs rdzogs dang*/_zab gter thams cad kyi gtad rgya gsan cing bstod bsngags dang thugs rtsis che bar gnang*/_bya bral sangs rgyas rdo rje las bka' gdams gzhung rnying kha shas dang*/_lha btsun chen po'i rdo rje snying po'i skor cha tshang*/_rig 'dzin srog sgrub kha skong skor/_chags med ri chos them med skor/_snang sbyong sogs bdud 'joms yab sras chos skor kha shas/_se ra mkha' 'gro'i chos skor yongs rdzogs kyi dbang lung bcas/_rje nyid kyi gcung 'chi med pad+ma rdo rje las gser pa gter rgan gyi zab gter tshe sgrub dang*/_rta mgrin sogs du ma gsan/_a 'dzom rgyal sras rin po che 'gyur med rdo rje las tshe dbang*/_mkha' 'gro snying thig gi dbang zhib rgyas/_ljags lung skor rgya cher gsan/_rgyal sras pad+ma dbang rgyal las kyang khrid lung skor dang*/_klong snying rtsa rlung gi 'khrul 'khor sogs zab chos mang du gsan/_theg mchog rdzogs pa chen po'i rnal 'byor pa kun dga' dpal ldan las bla ma yang tig gi zab khrid kyi dogs gcod skor zhib tu gsan/_zur mang drung pa rin po che karma chos kyi nyin byed kaHthog tu phebs skabs bde mchog mkha' 'gro snyan brgyud kyi smin grol rgyas pa tshogs gar dang sbrags te zhib pa dang*/_rdo rje gling pa'i lta ba klong yangs/_nA ro chos drug dang phyag chen gyi khrid skor mang po kun gzigs si tu rin po che dang yab sras lhan rgyas pas gsan/_dge rgyas zla bzang mchog sprul rin po che las kaM tshang rgyal rgyam lha dgu/_phag mo lha lnga/_rje mkhyen brtse'i yang gter dri med kun dga'i rgyal ba rgya mtsho'i chos bdag tu 'jam mgon gong mas bsngags pa de'i lung dang dbang sogs gsan/_drung nam rgyal sprul rin po che dang mjal 'phrad mdzad cing bde mchog gi dbang gsan/_thugs dam gding tshad sogs la bka' mol zhib gnang dang gdams pa'i gtad rgya khyad par can sogs gsan rjes/_gus la khyod kyi bla ma de rtogs ldan tsam las mkhas pa red ma bsam yang mdo sngags kyi zab gnad thams cad thogs med du mkhyen cing gsan 'dug pas sgom byung klong rdol yin pa 'dra zhes gsungs/_'jig rten dbang phyug rgyal dbang bcu drug pa rang byung rig pa'i rdo rje dgung grangs bco lnga'i skor 'og min gnyis pa bkra shis lha rtser mthong grol cod pan chen po'i mjal zhus mdzad pas/_dad gdung gi shugs las chos rje dus gsum mkhyen par dngos su gzigs shing*/_gzhan yang snga phyir mthong grol cod pan bzhes skabs bi ma mi tra dang*/_karma pak+shi dngos su gzigs tshul gsungs/


phyis dbus phebs skabs 'og min mtshur gdan du ched du zhabs pad bkod nas phan tshun sku tshe'i dpal yon spel ba'i rten 'byung gi sgo 'phar tshe dbang gsan pa dang*/_'bras ljongs sbas gnas lte ba brag dkar bkra shis sdings du rgyal dbang karma pa/_rje bla ma/_'bras ljongs rgyal sras bla ma bcas ched du ma bskul bar lhan rgyas su tshogs/_gnas chen byin 'bebs/_lha srin dam bsgrags sogs gnyis kas mdzad pa rten 'brel khyad par 'phags pa'i tshul 'og gi gzigs snang skabs su gsal/_rgya gar gnas gzigs lhan rgyas su phebs skabs thugs dam dgongs pa'i gsung gleng zhib rgyas su gnang nas thugs yid gcig 'dres su gyur nas rgyal dbang rin po ches khyed ni snang srid chos skur shar bas mdzad sgo thams cad rten 'brel legs phyogs su 'grigs pa chos rgyal rat+na gling gling pa lta bu'o zhes bsngags brjod gnang*/_dpal spungs byams mgon si tu rin po che pad+ma dbang mchog las rgya chen spyod brgyud kyi sems sdom/_mar lugs dgyes pa rdo rje'i dbang chen/_bdag med lha mo bco lnga'i dbang*/_skyer sgang lugs kyi rta mgrin/_mkhyen brtse'i gter kha mtsho skyes snying thig gi rtsa dbang*/_gsang thig rdo rje phur pa'i gtor dbang*/_'jam dbyangs dkar po ma ti'i lugs/_bram ze phur bu'i dbyangs can/_dam pa'i smra seng rnams 'jam mgon mi pham rin po che'i brgyud pa/_thugs dam jo lugs sgrol dkar gyi rjes gnang dang khrid lung*/_dkon mchog spyi 'dus tshe dbang*/_phyag drug pa'i gtor dbang*/_rjes gnang*/_mgon po snying zhugs kyi dbang sogs gsan/_rje nyid bsnyun tshabs che ba'i skabs gdan zhus ma mdzad kyang ched du phebs nub der grub chen Dom+bi pas bar chad sel ba'i mnal ltas gzigs pa sogs gus la bka' bstsal zhing*/_phan tshun thugs yid gcig 'dres tshul gyis byams mgon rin po cher sku tshe'i brtan bzhugs dang*/_phyis sku gshegs skabs dgongs rdzogs sogs bka' drin rgya cher bskyangs/_tsA 'dra'i rgyal sras 'jam mgon mchog sprul dpal ldan mkhyen brtse'i 'od zer las rata phur/_'jam mgon gong ma'i zab gter yang dag gro lod gsang sgrub gdug pa kun 'dul gyi dbang*/_rga lo'i lugs kyi mgon po phyag bzhi pa'i dbang sogs gsan/_rje bla ma mchog las snga 'gyur bka' ma mdo tshogs chen 'dus pa'i dbang chen dang*/_rngog lugs 'jam dpal gsang ldan sogs gsan/_gter chen rol rdor mchog sprul lnga pa las rol rdor gter kha mtsho brag skor yongs rdzogs gsan pas rje bla mar thugs shes gting nas 'drongs te dgongs gter 'od gsal snying thig yongs rdzogs gsan/_gter chen rol rdor gter chos yongs rdzogs kyi gtad rgya mdzad cing maN[1$0000270]Da[1$0000300]la sku gsung thugs rten bcas phyag rdor rgyud la 'grel pa sogs chog khrigs 'ga' zhig zhus pa de ma thag mdzad pas bla slob nang mar gyur/_sangs rgyas mnyan sprul dgu pa karma bshad sgrub bstan pa'i nyi ma las jo lugs sgrol dkar/_phyag chen nges don rgya mtsho sogs mang du gsan/_khra legs mchog sprul las rtsa rgyud brtag gnyis kyi spyi don 'jam mgon kong sprul rin po che'i gsung*/_kar lugs mi 'khrugs pa dang tshe dpag med lha dgu/_rata gling tshe sgrub gsang 'dus don dbang sogs gsan/_dpal spungs sgrub bla nor bu las mkhas dbang karma tshe dpal gsung lam rim ye shes snying po'i 'grel chen lung*/_mdo srib mkhan thub bstan las dkon lhun bka' 'bum dang rgyud btus phal che ba'i pod lung gsan/_zur mang bstan 'dzin sprul sku las rol rdor drag khros kyi dbang sogs dang*/_mkhar mgo aM mkhar sprul sku las chos rje gling pa'i gter chos bka' 'bum yongs rdzogs kyi lung sogs gsan pa bcas rnam thar zhal gsungs las gsan bsam mdzad tshul rags rim gsal ba rnams gtso bor smos pa ste/_zhib par ni gsan yig pod chen bzhi lhag bzhugs pa'i dpe rgyun ma 'byor bas mtha' dag 'god nus pa ma yin la/_rje bla ma'i slob ma yongs kyi tha chung bdag la'ang rang lo bco lnga skor thog mar mjal ba'i skal bzang thob nas lugs gnyis kyi thun mong ma yin pa'i thugs brtse bka' drin chen pos bskyangs shing rje nyid kyis zab chos bzhes pa'i bla ma'i gral du 'jog par mdzad nas bka' lung bstsal ba bzhin/_rang gis kun slong tshe rabs thams cad du bla ma 'jam pa'i dbyangs kyi spyan sngar chos kyi mchod sprin 'bul ba'i smon 'dun dang bcas klong snying yum bka'i tshe dbang thog mar phul nas brtsams te/_phur pa rgyud lugs sam rgyal po lugs kyi dbang chen/_yang gter bka' 'dus chos kyi rgya mtsho dang rta mgrin dregs sgrol gyi dbang*/_'phags ma'i snying thig gi yang zab tshe yi byin rlabs/_klong snying dpal chen 'dus pa dang khrag 'thung rigs bzhi'i sgos sgrub cha tshang ba'i dbang*/_'jam mgon mi pham rin po che dang rgyal tshab gsung skor mang zhig gi lung*/_jo nang rje btsun tA ra nA tha'i bka' 'bum yongs rdzogs/_bka' brgyud sngags mdzod bcas kyi dbang lung dang*/_zhar byung du rdzu 'phrul dang ting nge 'dzin gyi nus pas 'dod rgur dbang thob pa'i sangs rgyas dang byang chub sems dpa' rnams kyi ye shes kyi cho 'phrul rmad du byung bas byin gyis brlabs pas ljon shing dang chu klung las chos kyi sgra 'byung ba dang*/_'jam dpal dbyangs kyis bdud sdig can sangs rgyas kyi mtshan dpe can du bsgyur nas mdo sde zab cing rgya che ba ston nus par gsungs pa ltar rang bris dgongs gter du ming btags pa rnams kyang thog mar rje bla ma mchog gi ye shes gzigs pas gter chos tshad thub tu zhal bzhes kyi dbugs dbyung dang legs so'i gzengs bstod sku gsung thugs rten khyad par can sogs gnang skyes gya nom pa dang bcas thog mar 'bri bar 'os pa'i bka' ched du gnang zhing*/_dbang lung yongs rdzogs gsan bzhes gnang bar mdzad pa ste/_de'ang rang la ni 'di rigs 'bri 'os kyi yon tan dang mi ldan mod/_rje mkhyen brtse'i dbang po sku gong 'og gi byin rlabs kyi cha shas rgyud la zhugs pa'i mthu kho na las byung bar nges shes skyes pa tsam rgyu mtshan du bzung ste bka' bzhin phul ba'ang 'phros su smos pa'o/__/de dag kyang 'jam mgon chos kyi rgyal po nyi zla zung gi thugs sras phal mo che las rang rang la ched du bstsal ba'i zab chos nyams bzhes kyi skor thams cad dmigs bsal du gsan par mdzad cing*/_spyir yang thos pas chos tshol ba la nam yang ngoms pa med pas rtag tu zab pa dang rgya che ba'i dbang khrid lung gi rgyun thams cad gsan pa dang*/_gzhan la'ang gsung gis bskul bar mdzad/_gsar rnying gi chos bka' gnad che ba dag ni lan gcig gsan pas tshim pa min par brgyud pa'i khyad par sogs la dgongs nas lan du mar bskyar te yang yang gsan par gnang zhing*/_mdor na phyi ma'i dus 'dir mkhas shing dngos grub brnyes pa dang*/_byang chub sems kyis thugs rgyud gtams pa'i dge ba'i bshes gnyen sogs gsar rnying ris su ma chad pa'i skyes chen dam pa yongs 'dzin brgyad cu lhag las zab rgyas chos kyi bdud rtsi'i rgyun thams cad rgya mtsho chen por phyogs kyi chu gter thams cad nyin re bzhin 'bab kyang ngoms pa med par yang yang 'bab pa ltar rtag tu gsan pa lhur bzhes pas mang du thos pa nor bu'i gsang mdzod bsags pa la nam yang chog shes pa mi mnga' zhing*/_de dag kyang gsan yul gyi gang zag chos brgyud la sel chags pa dang*/_gang byung ma brtag pa'i gya tshom dang*/_ngo srung phyogs 'dzin dang*/_klad yangs col chung gi mdzad pa ma yin par dge ba'i bshes gnyen phun sum tshogs pa'i yon tan dang ldan pa 'ba' zhig la brten pa dang*/_gsan bya'i chos kyang skabs de'i mthun 'jug dang*/_grags pa'i rjes 'brang gi snang ba 'ur 'drog dang phyogs zhen tsam ma yin par rgyal ba'i bstan pa rin po che dngos dang brgyud nas phan pa rlabs gang che dang*/_rgyun dkon la nub kyis dogs pa rnams ched du gsan par mdzad/_gsan pa de dag kyang gang las byung ba'i khungs dang grub mtha' so so'i bshad pa'i rnam grangs/_lta sgom gyi 'jog mtshams/_bskyed rdzogs so so'i zab gnad man ngag gi che ba dang*/_mtha' dag gi phyag len phra ba tshun chad rang rang gi lugs srol ma 'dres pa gsal bar mkhyen cing rtag tu bsnyel ba med pa'i thugs dran mnga'/_nyams bzhes 'chad spel gyi skabs su de ltar phyag len gnang phyogs kyang phan tshun 'dres pa dang 'chol ba sogs gtan nas mi mdzad/_chos la gces spras thugs kyi dkyil du bzung bas gsar rnying gi grub mtha' rang rang gi bstan pa'i bdag por khas 'che ba dag las kyang rgyus che zhing thugs nyams su bstar/_bstan pa'i rgyun dang rjes 'jug gi mig ltos la dgongs pas gang gsan pa de dag chud mi za ba'i phyir dpe gsar du bzhengs pa dang*/_dpe rgyun dkon pa'i rigs rnams spar du bskrun par mdzad pa dang*/_dkyil 'khor tsakli gsar bzhengs la sogs pa de ma thag gnang zhing*/_bsnyen sgrub nyams bzhes dang 'chad spel gnang ba sogs phyag rjes thon nges pa re dang*/_dbang chos grub pa'i rjes gtang rag gi dngos rdzas gya nom pa stob pa dang*/_phrin las kyi sgo yangs por phye ba dang*/_gzhan yang bstan rgyun la phan nges pa dang gsan bya'i yon tan tshad dang ldan par gzigs na chos pa nyams chung sbas tshul can dag las kyang chos gsan dgos gang yod gsan cing bsngags pas gzengs bstod dbugs dbyung gnang*/_gsan yul rnams la dad mos ngo lkog dang bral bar dam pa'i chos tshol ba dang*/_bshes gnyen bsten tshul mdo dang mthun pa'i mdzad pa ngo mtshar can la chog shes dang ngal ba med par rtag tu brtson par mdzad pa ni/_sdud pa las/_de lta bas na byang chub dam pa tshol ba yi/_/bsam pa drag ldan mkhas pas nga rgyal des bcom ste/_/nad pa'i tshogs kyis gso phyir sman pa bsten pa ltar/_/g.yel ba med par dge ba'i bshes gnyen bsten par bya/_/sangs rgyas byang chub mchog zhugs byang chub sems dpa' dag_/pha rol phyin dang bcas te dge ba'i bshes su bsten/_/de dag rjes su ston byed 'di ni sgrub pa'i sa/_/rgyu rnam gnyis kyis sangs rgyas byang chub myur du rtogs/_/zhes dang*/_mdo las/_dge ba'i bshes gnyen mgu bar byas na sangs rgyas thams cad kyi byang chub thob bo/_/zhes dang*/_klu sgrub kyis/_skra dkar gnyer ma lhags dus su/_/thos pa mang du bsags bya ste/_/gang du thos mang 'gro gyur pa/_/der ni phung po 'gro mi 'gyur/_/zhes gsungs pa'i don thugs la btags pa ltar ro/__/gzhan 'jig rten gyi chen po'i rigs la lugs dang mthun pa'i che bkur tsam gnang ba las chos srid kyi yon tan phran bus sems dregs pa dag la ni thad ka'i ngo srung yang gnang dka' ba tsam pas kha gsag gi bstod ra dang*/_thabs kyi che bkur sogs gtan nas mi gnang bar tshugs zin par bzhugs pas chos kyi gzhung srong zhing rang tshugs thub pa'i bla slob kyi rten 'brel ma log pas bstan pa'i mig rgyan du 'os pa dag kyang gzur gnas ye shes dag pa'i spyan ras kyi 'bab stegs la zhib tu dpyad na/_rje gong ma'i gsung las/_spong ba bsam gtan de kho nar/_/mnyam par 'jog pa dka' na yang*/_/chung nas gdul bya grong chog sogs/_/rmi lam du yang ma dran cing*/_/tshe 'di blo yis thongs pa yis/_/bya btang kho na'i tshul du 'khums/_/mchog dman su la'ang ngo srung dang*/_/re dogs spros pa dmar thag bcad/_/ces gsungs pa ltar/_'phags sa mngon du gyur te nang gi ye shes kyis chos brgyad ro snyoms pas re dogs bral ba'i 'khrul pa gtad med du zhig pas ngo mtshar gyi gsang ba rtogs dka' ba yod kyang deng sang rgyu mtshan de dag ngo shes pa ni re re tsam du bas so/__/'phags pa klu sgrub kyis/_shes rab rgyas byed pa ni thos pa ste/_/bsam pa dang ni gnyis po yod gyur na/_/de la sgom pa yang ni rab tu 'byung*/_/de las dngos grub bla na med pa thob/_/ces 'byung ba dang*/_rgyal ba 'brom gyis/_nga thos dus tshe na bsam sgom brdo/_/nga bsam dus tshe na thos sgom brdo/_/nga sgom dus tshe na thos bsam brdo/_/nga gcig tu ma lus brdo byas nas/_/chos lam du khyer nas 'gro shes pa/_/nga bka' gdams phyogs char ma lhung ba/_/don rgya 'bag mig bzhin 'phrul shes pa'o/_/legs kun tu brdo de bka' gdams yin/_/zhes gsungs pa ltar/_deng sang rgyal bstan ris su ma chad pa'i chos kyi rgya mtsho chen po'i pha mthar dag pa'i spyan ras kyi ba dan mdzes par g.yo ba sher brtson mthun pa'i rlung gis legs par brgal nas nges don gyi zab gnad nor bu rin po che'i bang mdzod thugs kyi dpal be'ur 'gengs par bsags pa'i tshul ni/_'dul ba me tog phreng rgyan dang mdo rtsa/_mngon pa gong 'og dang sher phyin sdud pa/_dbu ma rig tshogs skor/_bzhi brgya pa/_sor mdo dang dge tshul gyi kA ri kA lnga bcu pa dang sum brgya pa/_'jug pa rtsa 'grel/_spyod 'jug bshad khrid dpal sprul sems dpa' chen po'i gsung sgros/_byams chos sde lnga dang dbu ma rgyan bcas rje mkhyen brtse'i nye brgyud mi pham rin po che'i rnam bshad bcas mdo phyogs rgya gzhung dang*/_yid bzhin mdzod rtsa 'grel yan lag bcas/_sdom gsum rnam nges rtsa 'grel/_yon tan mdzod rtsa 'grel/_mkhas 'jug bcas bod gzhung so so'i rtsa ba dang sa bcad rigs thugs 'dzin dang*/_'grel pa rigs la gzigs rtogs kyis dka' gnad dogs dpyod go don rgyugs 'bul bcas bslabs zhing byang chub pa'i sgo nas gsan rgya ches che bar mdzad/_gtso bor snga 'gyur sgyu 'phrul gsang ba snying po la 'phags bod kyi 'grel chen/_spyi don/_sbas don sogs yig cha mang po'i steng kun gzigs si tu rin po ches kaHthog rgyud sde'i bshad grwa gsar 'dzugs skabs ljags bshad shin tu rgyas pa gnang ba de thams cad gsan cing thugs su chud par mdzad/_khyad par 'jam mgon mkhyen brtse'i nye brgyud kyi rgyud bshad smin gling lo chen rin po che'i gsang bdag dgongs rgyan steng nas ra mgo mchog sprul las gsan te zhe chen rgyal tshab rin po che dang kong sprul rin po che sogs la'ang bshad rgyun spel bar mdzad pa dang*/_rdo grub kun mkhyen bstan pa'i nyi ma las spyi don rin chen mdzod lde'i bshad khrid zhib gsan gyis dogs gnas bka' 'dri sogs yang yang mdzad/_rtsa rgyud brtag gnyis sa rngog gi bshad rgyun zhib rgyas gsan te/_gus par yang ched du bka' phebs pa bzhin nam mkha' dang mnyam pa'i rgyud rgyal gsang ba 'dus pa'i 'grel pa bzhi sbrags su grags pa dang*/_bde mchog gi 'grel pa sbas don kun gsal gyi bshad lung gi rgyun khungs dag mdo smad a mdo phyogs kyi mkhas pa shes rab rgya mtsho'i yang slob bis mdo mkhan chen las thos pa maN[1$0000270]Da[1$0000300]la tshul du phul/_sga ston 'jam pa'i dbyangs/_sde gzhung mchog sprul rin po che rnam pa gnyis/_mkhas dbang bla ma bkra shis chos 'phel/_zur mang drung pa rin po che chos kyi nyin byed/_a mdo dge bshes 'jam rol sogs grub mtha' so so'i rgyun 'dzin rnams las chos lugs de'i chos skad dang lta grub kyi rnam bzhag sogs dogs dpyod bka' mol zhib tu gnang zhing*/_bla ma gong ma'i zhal rgyun rigs kyang gsan nas thugs kyi dpal be'ur ma nyams par bzung bar gnang*/_sga ston 'jam pa'i dbyangs 'di thos bsam gyi grwar zhugs pa sogs ma mdzad kyang gsung ngag rin po che nyams bzhes dpyis phyin pa gnang bas nang gi rtsa mdud grol ba lta bu'i lta sgom gyi gnad spyi dang khyad par lam 'bras kyi zab don rigs la zab gnad thams cad khrol zhing*/_nyams myong dmar khrid lta bu ngo mtshar chen por bzhugs pa'i mkhyen dpyod rlabs che ba sogs la dpag na chos rje 'jam pa'i dbyangs sa skya paN[1$0000270]Da[1$0000300\u0f72] tas byin gyis brlabs pa'am de'i sprul pa yin par nges pas rgyun gyi bka' mol la'ang bla ma gong ma'i rnam thar dang*/_chos 'byung khungs btsun/_zab don nyams su blang ba'i lam rtags gang zag so so'i rgyud la skyes tshul sogs gal chen du ma yod pa de rigs yi ger 'khod pa byung na shin tu gal che zhes thugs sras gtso bo sde gzhung mchog sprul rnam pa gnyis ka la ched du yang yang bkas bskul bar mdzad/_spyir zhal gsung rnam thar las/_khyad par mkhan chen bla ma ni/_/kun bzang dpal ldan chos grags kyis/_/thugs brtse chen pos legs bskyangs te/_/dbang lung 'ga' dang rnying rgyud lung*/_/gsang snying bshad pa rgya cher nos/_/snga rjes gzhung gi dka' gnad sogs/_/bka' drin bstsal las a mye yi/_/go ba rgyud la chags tsam byung*/_/zhes gsungs pa ltar/_thog mar kaHthog gi gdan sar ma hA paN[1$0000270]Da[1$0000300\u0f72] ta mi pham 'jam pa'i dbyangs ched du gdan zhus kyis kun gzigs si tu rin po che gtsos dam pa du mas gsan sbyong rgya cher mdzad cing*/_phyis bshad grwa gsar tshugs skabs mi pham rin po che mchog gi bka' phebs bzhin mkhan chen bla ma kun bzang dpal ldan chos grags phebs te gzhung gi skor 'chad nyan rgya cher gnang skabs der/_mkhan chen a stobs sogs rgyu mtshan shes pa'i dam pa rnams mgrin gcig gis mkhan chen bla ma 'di nyid mi pham rin po che dngos las gsan bsam yang yang gnang bas kun mkhyen rong klong gnyis kyi dgongs srol dri ma med pa'i rgyud gzhung thams cad kyi lta ba dang grub mtha' khyad chos thun mong ma yin pa'i gnad kyi zhal rgyun mnga' bas na/_rang re rnams kyis thos bsam la sbyang brtson gal che zhes gsungs pa ltar thugs brtson g.yel lhod med pas sgro 'dogs zhib tu bcad de rnam dpyod dpyis phyin par mdzad pas/_'phags bod shing rta chen po rnams kyi bzhed srol ma 'dres pa thugs su chud cing de dag gi dgongs pa'i zab gnad dang bka' dang bstan bcos rnams kyi zab don khyad par can du ma thams cad kyis bgro gleng lung rigs rtsal 'don yang yang gnang skabs so so'i lta sgom grub mtha'i khyad chos kyi gnad ma 'dres par mkhyen na'ang*/_chags sdang gi tsher mas gzhan rgyud dkrugs pa'i dgag bzhag sogs gtan nas mi mdzad pas/_zab don mtha' dag so so'i bka' khrid skabs rgyas par bka' bstsal te gzhung lugs thams cad gdams ngag du shar ba ni sgra ji bzhin thugs nyams su bstar zhing*/_rton pa bzhi ldan gyi rnam dpyod rmad du byung ba'i cha shas yongs su rdzogs pa'o/__/de ltar yang rnam thar zhal gsungs ma las/_bod yul shing rta che brgyad po/_/kun la dag snang cher bskyed cing*/_/log rtog dri mas ma gos shing*/_/gshe skur grub mtha'i phyogs 'dzin spangs*/_/dbang khrid man ngag rgyud lung rnams/_/gang bzhugs thams cad 'bad pa ches/_/nyan dang mnyan par 'gyur bar smon/_/zhes gsungs pa ltar gsan bsam nyams bzhes phyogs med du gnang bas bstan pa yongs rdzogs kyi bdag por grub/_smin grol 'chad spel la sogs pa'i skabs grub mtha' so so'i phyag bzhes man ngag gi gnad don mtha' dag phan tshun bsre bslad mi mdzad cing gdul bya'i skal ba dang chos brgyud so sor ji ltar grags pa de ltar rjes su bzung bas 'jam mgon chos kyi rgyal po rnam gnyis kyi seng ge'i khri la dbang bsgyur ba'i rnam thar gyi mig ltos gtsang ma g.yar dam du bzhes pa ni rje 'di tsam zad do/__/bzhi pa rim gnyis kyi ting 'dzin zab mo la thugs ji ltar gzhol ba'i tshul ni/_de'ang bstan pa rin po che thos bsam sgom pa rim can gyi srol mi nyams shing*/_thar 'dod rnams kyi don gnyis yongs su rdzogs pa'i 'dod dgu'i dpal la 'god pa'i gzhan phan lhur bzhes pa'i phyir/_skyes bu dam pa'i thugs kyi brnags pa mthar thug pa ni lung rtogs dam pa'i chos kyi mdzod bsags pa kho na yin la/_de'i dang po lung gi chos la gsan bsam mdzad tshul rags rim smos zin nas/_'dir skabs su babs pa phyi ma ste/_rje 'jam dbyangs bla ma mchog nyid sku chung ngu'i dus nas rang bzhin lhun grub ngang sgom chen po'i lta sgom gyi lhums su tshud kyang*/_dgung grangs bzhi bcur phebs phan chad sku gshegs kyi bar them spang gi sgrub pa'i rnam thar lhur bzhes gnang ba ltar/_rje 'di nyid kyang gang zag rang rgyud pa ltar lam rim bgrod kyi 'bad rtsol la mi ltos par thugs rje yas sprul du nges mod/_tshur mthong gdul bya 'dul ba'i thabs tsam du rim gnyis kyi ting nge 'dzin la thugs gzhol bar mdzad pa'i tshul gyi dgos pa yang*/_de kho na nyid nges par bstan pa'i mdo las shA ri'i bu gang gis bskal pa gcig tu nyan pa bas/_gang gis se gol gtogs pa'i yun tsam zhig de kho na nyid kyi ting nge 'dzin la mnyam par bzhag na bsod nams mang du 'phel lo/_/shA ri'i bu de lta bas na de kho na nyid kyi ting nge 'dzin 'di gzhan la nan gyis gdams par bya'o/_/zhes dang*/_mdo sde rgyan las/_de ltas rnal 'byor can gyi sgom pa gang yin de ni don med min/_/de ltar bde bar gshegs kyi bstan pa gang yin de yang don med min/_/gal te thos pa tsam gyis don mthong 'gyur na sgom pa don med 'gyur/_/gal te ma thos par yang sgom la 'jug na bstan pa don med 'gyur/_/zhes gsungs pa'i don thugs la bcangs nas/_spyir deng sang bya ba las kyi 'khor lo rten bzhengs dang*/_gzhung bshad pa/_dbang lung gi 'chad nyan sogs dar srol che bar 'dug kyang gtso bor bsnyen sgrub nyams len la 'bad pa rtsal du bton na gnad dang dgos pa che bar gzhan la'ang bka' bstsal shing*/_sku tshe'i smad 'gro don shin tu rgyas pa'i skabs su yang dgun dpyid phal cher sku mtshams bcad rgya dam pos bsnyen sgrub kyi g.yar dam bzhes shing*/_chos brgyad dang 'du 'dzi 'ur zing gi skad grags chen po'i bya bzhag la gting nas thugs mi mnyes pas/_rtag tu gcom bskyungs mngon chung kun spang gis bla ma dkyus ma zhig gi mdzad pa lta bu las bla chen gyi tshul dang bzhes mi gnang*/_theg pa chen po'i blo sbyong gi skor rtag tu thugs nyams su bstar bar rgyun ring gi nad pa dang dmag 'khrug sogs kyi skabs de dag la shin tu thugs brtse bas byin rlabs dang gnas 'dren sogs yang yang bstsal/_slob ma'i tshogs la'ang gzhan phan byang chub sems la blo sbyangs pas snying rje dang nges 'byung gis blo 'khul ba zhig med na phyag rdzogs kyi lta ba la mtho bsnyabs byas pas gar yang mi phyin pas sngon 'gro'i sbyong ba gnad du 'gro ba nyid shin tu zab ces zhal gdams su yang yang bstsal ba bzhin thugs rgyud snying rje chen po'i cha shas yongs su rdzogs pa'i dbang gis dred po snying khams rdo las mkhregs pa dang*/_che rgu'i rigs rnams zhal mjal ba tsam gyis dad gdung gis snang ba 'gyur ba dang blo gtad snying nas 'cha' ba mang du byung bas mtshon/_sa gsum gyi 'gro ba dbang du 'dus na'ang chos bshad la sogs pa'i skabs nges 'byung yin pa skad kyis ngu co tsir tsir skad ngan 'don pa'i mngon tshan can gtan nas mi mdzad/_dgung grangs bcu bdun steng rgyud sde'i dbang gsan skabs sku rtsed phran bu gnang ba ltar yod kyang dbang gi rdzas gnas so sor bzhag rgyu dang phyag rgya sogs phyag bzhes gang gnang yang snga phyi nor 'khrul gtan nas mi mnga' bas dus rtag tu thugs la yengs 'khrul med pa rje 'di gzhan dang ga la 'dra zhes zhabs drung rin po che bkra shis rgya mtshos yang yang bsngags par mdzad/_spyir zab khrid rigs zhu ba'i skabs so so'i dmigs thun la shar sgom bgyis pas smin khrid kyi go chod ces gsung las thos pas phyag len du'ang de ltar mdzad par nges te/_khyad par du rje bla ma mchog nas gdams mdzod gsan pa'i phyag thor 'khod pa 'di ltar/_rang re chos zhu ba dpe cha 'dzom mkhan rnams nas kyang sems rnam g.yeng gi dbang du song ba'i zhus lo thob lo byas la ma bsags pa'i las su mi 'gyur ba'i ched khrid dpe la zhib tu blta zhing tshig rjes don dran gyi dmigs thun shar sgom byed khul bgyis pa sogs rang rgyud la sman pa'i thabs tshul gang drag la brtson pas byin rlabs kyi babs gzhan las khyad par 'phags pa 'byung tshul gsungs pas shes nus la/_khyad par du rdo rje 'chang blo gter dbang po'i zhabs las gsang chen slob bshad kyi khrid gsan skabs don gyi ye shes mngon sum gzigs pa'i tshul mdzad rjes/_rig 'dzin sna tshogs rang grol/_rdo grub 'jigs med bstan pa'i nyi ma/_rdzogs chen lnga pa thub bstan chos kyi rdo rje rnams las rdzogs pa chen po'i rig pa rtsal gyi dbang chen du ma gsan pa dang*/_skyabs rje rgyal tshab rin po ches byang bdag sku gsum rigs 'dus kyi dbang gi ngo sprod skabs dgongs pa'i byin rlabs gtad pas thugs dam bogs 'byin byung tshul gsungs pa sogs kyis mtshon rdo rje'i ye shes chen po'i dgongs pa khyab brdal du shar bas lam rim rtsol gyi ngal dub la ma ltos par snang spyod ye shes kyi rol par 'byams klas pas zab gsal gnyis su med pa'i lta sgom gyi lhums su chud nas spong klog zung 'brel gyis don gnyis lhun gyis grub pa ni kun gyi mthun snang du grub pa lags/_dmigs bsal nyams bzhes gnang tshul sa bon tsam smos na/_thog mar rdzogs pa chen po klong chen snying thig gi sgo nas sngon 'gro thun mong dang*/_thun min 'bum lnga rje bla ma sku gong ma'i phyag bzhes ltar bsags sbyong gnad smin du gnang ba'i tshul mdzad pa dang*/_dus skabs snga phyi ci rigs su gtso bor rje mkhyen brtse'i zab gter rnams kyis mtshon sngon 'gro'i dmigs khrid dmigs bsal du yod pa rnams la dang po sngon 'gro'i dmigs rim bsags sbyong dang bcas pa rgyas bsdus ci rigs mthar/_rim pa dang po'i rnal 'byor dang 'brel bar gsar rnying lhag pa'i lha rab 'byams las dus grangs mtshan ma'i bsnyen pa dpag tu med pa zhig gnang ba rags rim tsam bkod pa/_ngor pa'i phyag bzhes kye rdor gzhi bsnyen sngon dngos rjes tshang ba zhib rgyas/_'khon lugs phur pa'i gzhi bsnyen shin tu zab rgyas/_gsang 'dus 'jam rdor/_tshar lugs 'jigs byed/_nA ro mkha' spyod kyi ljags bsnyen/_mgon po gur gyi srung ba brag rdzong ma thengs gsum/_mgon po'i nang gsang sogs dang 'brel ba'i yi ge bdun pa 'bum brgyad cu lhag_/mgon po zhal bzhi pa'i gsang sgrub/_de'i tshe sgrub gur bdun ma dang*/_dkar po tshe 'phel sogs/_ras chung snyan brgyud kyi bde mchog lhan skyes yab bka' yum bka' gnyis/_shangs chos rgyud sde lha lnga mdor bsdus dang lha bzhi dril sgrub sogs/_phyag drug mthing ga'i bla rnal sogs/_sgrub btus khongs nas bya rgyud rigs gsum spyi dkyil gyi bsnyen pa rgyas pa/_mi tra'i tshe dkar/_ba ri lugs sgrol dkar 'od zer drug sbrags/_sa mnata shrI'i dbyangs can ma dkar mo ste dkar po lha gsum dang*/_grub rgyal tshe dpag med/_ba ri'i rnam rgyal dkar mo/_sgra mi snyan gyi tshe sgrub/_tshe lha rnam gsum la bsten pa'i bla ma'i rnal 'byor/_'jam dpal bstod sgrub/_ma ti'i 'jam dkar/_dam pa'i lugs kyi smra seng*/_dbyangs can dkar mo phur bu'i lugs/_dbyangs can dmar mo bak+Shi bA ri lugs/_kang+ka dat+ti lugs kyi phag dkar/_mi g.yo ba dkar po dA na shI la'i lugs/_jo lugs sgrol dkar/_nyi sbas lugs kyi rtsa ba'i sgrol ljang*/_gser chos 'jam nag dang khyung khra/_rig byed ma bcas/_phyag rdor 'byung 'dul dang*/_u tsar+Ya/_mdo lugs gos sngon can bcas/_skyer sgang rta mgrin/_rnam 'joms ba ri lugs/_sme brtsegs jo bo lugs/_grwa mngon dzaM dmar/_shangs pa'i gser chos phyag drug dkar po bcas/_gdugs dkar mchog grub ma khri tshar skor zhal 'don gnang ba sogs gsar phyogs gtso che ba dang*/_rigs thams cad kyi khyab byed bka' gter zung 'brel smin lugs rdor sems thugs kyi sgrub pa/_yang gter rtsa gsum dril sgrub/_chos dbang bla ma gsang 'dus bsnyen chen/_rata gling tshe sgrub gsang 'dus/_mkha' 'gro yang tig gi byin rlabs bla sgrub/_'phreng gter grol tig gi bla sgrub gdung ba zhi byed/_'ja' tshon dkon mchog spyi 'dus/_lnga pa'i rgya can chos sde tshe sgrub dwangs ma bcud 'dren/_klong snying bla ma rig 'dzin 'dus pa/_rje mkhyen brtse dang mchog gling zung gi gter chos phyi sgrub bar chad kun sel/_de'i sgos sgrub nas rig 'dzin rgyal ba'i gdung 'dzin/_nang sgrub bsam pa lhun grub bcas/_'jam mgon rin po che dang mkhyen brtse zung gi chos bka' gsang thig bla sgrub/_klong snying yang gsang bla sgrub thig rgya/_grub thob thugs tig gi bla sgrub/_rgya can gro lod dang*/_karma gu ru/_smin gter drag dmar/_gnam chos gur drag phur sham can/_klong gsal gtum drag dmar nag_/klong snying bla ma drag po dpal chen 'dus pa dang*/_drag po rta khyung bcas/_thugs sgrub gro lod/_'jam mgon gro lod gsang sgrub bcas/_nyang gter bka' brgyad bder 'dus bsnyen chen/_yang gter bka' 'dus chos kyi rgya mtsho'i bsnyen sgrub gzab spros sgrub chen sman sgrub dang 'brel ba/_grub thob thugs thig bka' brgyad khrag 'thung 'dus pa/_thugs sgrub bla ma smra seng*/_rgyud lugs 'jam dpal zhi ba'i bsnyen chen/_byang lugs zhang khrom gshin rje tshe bdag gzhi bsnyen/_snyan brgyud gshin rje thengs gnyis/_'od gsal snying thig gi 'jam dpal 'chi bdag zil gnon/_thugs sgrub pha rol rgol 'joms lan gnyis/_grol tig yang bzlog_/rin chen gling pa'i nA ga rak+Sha bcas/_byang gter tshe sgrub lcags sdong ma/_thugs sgrub tshe dmar/_thugs chen yang snying 'dus pa/_'khor ba dong sprugs/_yang gter rta mgrin dregs sgrol/_gnam lcags me 'khor/_gnyen po lha lnga/_rgya can rta mgrin khams gsum zil gnon/_snyan brgyud rta mchog rol pa bcas/_snyan brgyud yang dag zab tig_/yang phur sbrags ma/_yang gter phyag rdor rdo rje me 'bar/_klong gsal phyag rdor/_thugs sgrub phyag rdor rdo rje be con/_g.yu thog snying thig bla sgrub/_sman bla longs sku zur mkhar lugs/_bla sgrub byin rlabs snying po bcas/_chos dbang phur pa yang gsang spu gri/_rata gling phur pa'i gsang sgrub/_bdud 'dul phur pa'i gsang sgrub/_klong snying phur pa bdud dpung zil gnon/_snyan brgyud phur pa/_'od gsal snying thig gi phur pa 'dus pa'i dril sgrub/_mchog gter zab bdun phur pa dang*/_de'i rno so khro rgyal stobs 'dus/_gsang thig phur pa thengs gnyis bcas/_nyang gter khros nag_/chos dbang sgrol dkar/_rgya can sgrol dkar yid bzhin nor mchog_/klong snying yum bka' bde chen rgyal mo/_yang gter mkha' 'gro gsang 'dus dkyil 'khor yongs rdzogs la brten pa'i bsnyen sgrub sbrags ma dang*/_rgyun khyer la brten pa'i bsnyen rkyang*/_de'i zhi rgyas dbang gsum gyi phag mo/_zhig gling sgrol dkar/_rgya can gsang sgrub seng gdong ma/_jo lugs sgrol dkar brgyud pa gsum ldan 'jigs gling la bka' babs pa/_thugs sgrub sgrol ljang*/_mchog gter bi ma la'i seng gdong*/_yang gter zhi byed gdugs dkar/_rma bya chen mo/_klong gsal dzaM ser/_dag snang tshe yum tsaN[1$0000270]Da[1$0000300]lI thengs gsum/_dgongs gter phag dkar shes rab gsal byed/_yang gter rong zom pad+ma mkha' 'gro/_byang lugs king dmar/_dam grib nyes sel/_thugs sgrub sme brtsegs/_dag snang mi tra'i tshe dpag med dkar dmar gnyis/_yang gter drang srong dri med zhi ba'i tshe sgrub/_dgongs gter 'phags ma'i snying thig lan gsum/_gling gter tshe yum tsaN[1$0000270]Da[1$0000300] li/_rgya can dmag zor zhi ba'i tshe sgrub/_nyang gter phyag bzhi pa dkar po tshe 'phel bcas la dus grangs mtshan ma ci rigs pa'i ljags bsnyen gnang ba 'di dag dgung grangs nga drug bzhes pa yan gtso bor rnam thar zhal gsungs las 'byung ba dang*/_de rjes ljags bsnyen gnang ba sogs phyag thor ma 'khod pa'i rigs dmigs bsal rje bla ma dngos kyi zhal dang*/_nges pa can gzhan dag las thos pa rnams go rim cung zad bsdebs te dkyus gcig tu bkod pa'o/__/gzhan yang rig 'dzin gong ma rnams kyi phyag bzhes ltar mchog gi las sbyor bdud rtsi sman sgrub dang sgrub mchod rigs grangs mang*/_tshes bcu gnyis sogs dus dang nar mar tshogs dang mchod pa rgyas bsdus skabs bstun bsags sbyong spel ba'i rim pa rgya cher gnang*/_mtshan bcas gtso bor gyur pa'i rdzogs rim/_gsung ngag rin po che lam 'bras bu dang bcas pa/_rnal 'byor ma'i rdzogs rim/_nI gu chos drug_/snying thig gi dbang gnyis pa dang gsum pa'i lam rnams la nyams bzhes gnang snyam pa gsung 'phros kyi shugs las gsal zhing*/_skyes thob kyi nus pas mtshan bcas rtsa rlung thig le'i rnal 'byor dang*/_'od gsal gyi snang ba sku dang thig le'i 'char sgo 'bad rtsol chung ngus 'byung ba gor ma chags shing*/_bye brag mtshan med kyi rnal 'byor phyag rdzogs kyi khrid srol rnams dang*/_khyad par snying thig gsar rnying rnams la gtso bor nyams bzhes gnang bar nges te/_'on kyang gsar rnying gdams pa rgya mtsho lta bu'i gnas la thos bsam sgom gsum gyi rang byan tshud pa'i stobs kyis zab khrid sogs gnang ba'i tshe gcig dpe kun 'gebs kyi stong lta had po'i 'ur sgra ma yin par gdul bya'i blo rim dang mthun par gang 'chad bya'i chos skad dang sgo bstun pa'i lam gyi rnam bzhag nyams myong dang 'dres pa can kho na mdzad/_rnam kun shin tu thugs sgam zhing gsang ba srung ba la gtso bor mdzad pas/_skabs su gcom bskyungs pa'i gsung gis nged ni zhus zhus thob thob mang ba las 'di dag la nyams len byas pa ni med ces gsungs kyang*/_smin khrid gnang ba'i gsung bshad skabs su gang babs kyi chos de'i dgongs pa gting phyin pa dang sbyangs pa mthar son pa'i nyams myong gi dmar khrid sems rgyud la shin tu smin nges gsungs bzhin nyams len gnad du brdegs pas rgyud thog tu 'byor ba dang*/_khyad par phur tshugs nyams len brtson pa'i rigs la spam yor tsam du ma song bar so sor myong ba skyes rim gyi ngo sprod gegs sel bogs 'don sogs gang 'os zhib tu gnang ba dang*/_lhag par sku tshe'i smad nas chig brgyud smin khrid gnang ba gtso bor mdzad/_des na sgrub brgyud shing rta chen po brgyad kyi chos tshul ma lus pa sku'i skye ba'i phreng ba dpag tu med par thugs kyi bum bzang du bskyil bas gsang ba rgya mtsho'i bdag por grags pa don la gnas pa'i phyir/_sgrub brgyud shing rta che brgyad smin grol gyi/_/gdams zab gsang ba'i mdzod kyi glegs bam che/_/mkhyen dang brtse ba'i yon tan dpal mnga' ba/_pad+ma ye shes rdo rjer gsol ba 'debs/_/zhes kho bos gsol ba btab pa'i ngor bstsal ba'i zhal gsung gsol 'debs su zhal bzhes gnang ba nyid nges pa don gyi rnam thar du mngon pas/_lo zla'i grangs dang*/_ri mtshams sdug rgur gyi byas yus tsam la ma ltos par sgrub brgyud gong ma'i mdzad pa shugs 'byung gis bskyangs pas nang gi rdo rje'i lam gyi yon tan rdzogs pa'i drod rtags brnyes pa'i tshul yang*/_skyes bu dam pa rnams kyi yon tan gyi rgya mtsho ni ji ltar rgya che bzhin snyems pa med pa'i brtul zhugs kyis sbas shing*/_sku gsung thugs kyi gsang ba zab mo 'phags pa'i blo gros kyis kyang sgra ji bzhin du dpag par mi nus pas phyogs tsam brjod pa'ang ches dka' ba'i gnas su gyur cing*/_khab mig gcig gi bu ga nas nam mkha' mthong bas nam mkha'i mtshan nyid shes pa ltar dam pa'i yon tan rin po che rin thang dang bral ba'i rdul gyi phye ma lta bu'i cha shas tsam mthong thos dran pas yid la mngon mtho nges legs kyi dpal sbyin cing*/_bsam gyis mi khyab pa'i gsang ba mnga' ba shugs 'byung du rtogs pas na/_gdul bya dad dang mos pa'i rjes 'brang rnams la yid ches kyi dang ba 'dren pa'i gsos su shes pas rang gis mthong thos dang yid kyis rjes su dpag pa sgro skur dang bral bar brjod na/_de'ang rje 'di nyid thugs rje yas sprul du shar bas mdzad spyod rnams kyang gang zag tha mal pa'i blo yul las 'das shing*/_sku na shin tu phra ba'i dus nas gzhung lugs rnams 'chad pa dang*/_rdo rje slob dpon gyi las su bya ba rnams thogs med du gnang*/_khyad par du rje gong ma'i rnam thar bzhin du bstan 'gro'i don 'ba' zhig thugs la brnags pas spong dang klog pa'i 'khor los lung rtogs chos mdzod bsags pa la chog shes skyo sun dang bral zhing*/_zhar byung bya ba las kyi 'khor los phyogs dang ris su ma chad pa'i mchog phal rnams la chos kyi bgo skal rgyun chad med par bstsal bas bstan pa'i srog rtsa mtha' dag sbom por mdzad/_bstan rgyun dang bsod nams kyi zhing du rten gsum bgrang las 'das pa gsar bzhengs dang*/_bshad sgrub kyi sde khyad par can mang du btsugs te/_gzhan bskul sogs kyis bstan pa rnal ma dar rgyas kyi srol btod/_thams cad sgyu mar gzigs pas bstan don mdzad dka' ba ci 'dra zhig byung na'ang thugs sun pa'i rnam pa dang 'ol che phra mo tsam mi mnga' zhing rnam kun khu sim mer bzhugs/_rtag tu sbas tshul gyi rnam thar lhur bzhes kyang nang gi ye shes stobs su gyur pas dam pa'i yon tan gyi snyan grags phyogs kyi tha gru kun tu khyab nas ris med pa'i skyes chen dam pa kun gyis bsngags shing dngos brgyud nas zhabs pad la bsnyen/_ye shes brnyes pa'i gzigs snang la khyab brdal du spyod pa'ang gsang ba srung ba la thugs shin tu sgam pas kun dang thun mong lta bur bzhugs/_sa gzhi skyong ba che phra mtha' dag gis zhabs nas btegs kyang chos brgyad kyi 'du 'god phra mo tsam yang mi gnang zhing kun spong gi rnam thar gtso bor mdzad/_chos nyid kyi dgongs pa klong du gyur pas mdzad sgo che phra mtha' dag 'phral 'phral thad kar gnang ba'ang phal pa'i blor chud dka' ba'i ngo mtshar can rnams rnam kun thogs med du 'grub pa'i phrin las la mnga' brnyes/_thugs rje chen po dus las yol ba mi mnga' bas bod chen ljongs nas 'phags bal bar gyi gdul bya bsam gyis mi khyab pa'i rgyud la thar pa'i sa bon 'jog par dngos kyi zhabs bskyod nas tshogs zung 'bum gyis bskrun pa'i sku'i dkyil 'khor bstan cing*/_gang 'dul gyi gsung gi bdud rtsi dang dmigs pa med pa'i thugs kyis kun la khyab par gnang nas phrin las mthar phyin mdzad pa mdor na sku gsung thugs kyi gsang ba mtha' dag chos dang zhu dag 'pher ba'i rnam thar gtsang ma 'di lta bu ni lha dang bcas pa'i 'jig rten kun gyis phyag bya ba'i 'os su gyur cing*/_sangs rgyas sras dang bcas pas bsngags par mdzad pa'ang*/_sdud pa las/_dper na sangs rgyas sprul pa sangs rgyas mdzad pa byed/_/byed pa de la dregs pa cung zad skye mi 'gyur/_/de bzhin shes rab spyod mkhas byang chub sems dpa' yang*/_/sprul pa sgyu ma bzhin du bya ba thams cad ston/_/shing mkhan bzo bo mkhas pas skyes pa bud med dang*/_/'dra ba'i bzo byas de yang bya ba thams cad byed/_/de bzhin shes rab spyod mkhas byang chub sems dpa' yang*/_/rnam par mi rtog ye shes bya ba thams cad byed/_/de ltar spyod mkhas rnams la lha tshogs mang po dag_/thal mo sbyar bas btud nas phyag kyang 'tshal bar byed/_/phyogs bcu'i 'jig rten khams kyi sangs rgyas ji snyed pa'ang*/_/yon tan bsngags pa'i phreng ba yongs su brjod par mdzad/_/ces gsungs pa nyid do/__/khyad par du rgyun gyi zhal 'phros su phran srog rlung pa'i khog par gdon zhugs pas mi mthong ba dang mi byed pa med ces gsungs pa yang don du nang gi rnal 'byor gyi byed pas rtsa thig rlung gsum la rang dbang 'byor zhing srog rtsol dbu mar dag pa'i bden don mngon du gyur pa ste/_bsdus rgyud las/_srog gi rtsol bas dag pa ri bong can dang nyi ma dang bral byang chub sems dpa' rnams kyis mchod/_/ces pa dri med 'od du/_srog gi rtsol ba dag pa zhes pa ni/_'dir gang gi tshe rnal 'byor pa nyi ma ri bong can gyi lam dang bral te rtag tu dbu mar 'bab par gyur pa de'i tshe srog gi rtsol bas dag par gyur pas na/_byang chub sems dpa' rnams kyis mchod de bsngags par byed do zhes pa'i don to/__/zhes rnal 'byor pa g.yas g.yon nas rgyu ba'i ro rkyang gi rlung dbu mar tshud pa na/_gzung 'dzin gyi 'ching ba grol te rdo rje nang gi sa bcu'i spang rtogs yongs su rdzogs te so so yang dag pa'i rig pa bzhi la dbang 'byor/_gzungs dang spobs pa dang mngon shes tshad med pa'i gter rdol/_ye shes kyi spyod yul yongs su dag pas bya rtsol dang bral ba'i phrin las kyis 'gro ba'i don gyi mdzad pa lhun gyis grub pa'i rten 'brel gyis byang chub sems dpa' rnams kyis mchod cing*/_sangs rgyas rnams kyi lung bstan thob/_snyan pa'i grags pa chen po 'byung zhing*/_rlung dbang du 'dus pa'i rten 'brel gyis byang chub sems dpa' la sogs dbang du 'du bar gsungs pa nyid ji bzhin mngon du gyur par nges pas na grub pa'i rtags mtshan kun gyi mchog tu grub pa'o/__/dgung grangs re bzhir phebs pa me sprel sa ga zla ba'i yar tshes skor yar lung sne gdong ban gtsang du yang gter bka' 'dus sgo nas spros bcas sgrub chen rgyas par gnang*/_zla ba de'i dmar phyogs kyi tshes bcur khra 'brug gi gtsug lag khang du tshogs dang mchod pa gzab rgyas kyis khyams stod stegs bur ras bris la brten pa'i yang gter bka' 'dus chos kyi rgya mtsho'i dkyil 'khor sgrub mchod dang 'brel rab tu gnas pa'i cho gas nang gi lha khang che phra tshang ma dang*/_phyi rol gling skor gyi mchod rten khag bcas la khrus gsol dang rab gnas me tog 'thor ba/_mchog gi las sbyor bdud rtsi sman sgrub/_thun mong du tshe'i sgrub pa/_drag po'i las sbyor gtor zlog_/skong bshags dang tshogs kyi mchod pa brgya phrag lhag grangs gsog bcas so sor gzab rgyas nyin gcig gi khongs su grub par mdzad/_de'i nyin thugs snang shin tu spro ba'i tshul gyis sngar ban gtsang du sgrub chen las da res dgos pa che song zhes gsung 'phros kyang phebs/_de'ang gsung chog dbu nyi dros tsam du tshugs shing*/_bar mtshams gung gseng sogs yun ring tsam gnang mod/_dgong ka snga char nas grub cing nam mkhar sprin 'ja' shar ba sogs der yod rnams ngo mtshar gyi gnas la bkod par mdzad/_rdzong sar gtsug lag khang du sgrub thabs kun btus kyi dbang lung gsung skabs rnam sras ser chen gyi rjes gnang skabs tshogs gral gyi bar du gser 'thor ba slob ma kha shas nas rnyed pa/_rim gyis thams cad nas zhib tu btsal tshe lha khang de'i bla bre'i steng tshun mang po babs pa dang*/_mdor na rin chen dang po sil mar brdal bas lha khang gi phyi nang thams cad khyab pa dngos su gser dad rten du khyer rgyu yod pa byung*/_dgung grangs re gnyis pa rta lor gzim chung dbang khang du sgrub btus gsungs skabs dbang rgyas lha rnams kyi rjes gnang skor la chab mdo yab tshang nas bka' 'gyur spar gsar bzhengs kyi spar phud 'bul du byung bar bka' chos 'di sngar 'don skabs gser gyi char babs pa red ces sgro btags byas pa don la gnas srid na'ang thun mong tsam red/_da res thun min rgyal bka' rin po che'i chos kyi mdzod chen po dngos su thob pa red ces zhal rtsed bcas de 'phral nas 'dus pa rnams la bsnyen bkur gyis dag 'don gnang bar mdzad pa'ang thun min chos kyi mdzod la dbang 'byor ba'i rtags su nges/_sngar kaHthog tu bzhugs skabs dngul chu kar yol phyed tsam bzhes mdzad pa sku lus la ci'ang ma gnod par thams cad bzhugs gdan steng du thon par mdzad pas/_'ga' zhig gis lo nyung bsam med kyi bya spyod du brtsis nas ma shi ba de tsam lam 'gro byung ba red ces lab skad kyang don la grub rtags yin par nges/_gdan sar phebs nas yun ring ma lon pa'i skabs shig rin chen sna tshogs 'dres pa'i phye ma zhig gzigs pa sku tshab kyi phab gta' yin rgyu gnang nas sku kha shas btab pa sgrom du bcug ste zhag kha yar sgrub pa mdzad cing zhal phye ba na phyag gis reg dka' ba tsam gyi drod dang gzi brjid can du gyur 'dug pa sku tshab kyi rgyu sogs gtan nas red mi 'dug kyang yid gnyis med pa'i dad mos kyis 'grub par gsungs pa don la gnas 'dug ces phebs/_shing lug sa zla'i dmar phyogs grub thob thugs thig gi bka' brgyad khrag 'thung 'dus pa'i sgo nas sman sgrub gnang skabs phye mar sgrub pa tshugs nas sgrub khang la 'ja' 'od yang yang zug pa kun gyis mthong ba dang*/_'dis mtshon te dbang dang sgrub chen sogs gnang skabs char dkon pa na char rgyun cher 'bab 'ja' shar ba sogs shin tu mang zhing*/_gzhan yang tshe chang zho ltar du chags pa/_bum chu bdud rtsi/_tshe ril sogs nyung ngu res slob ma brgya phrag kha yar la rgyas par khyab pa sogs rnam kun shin tu mang bas kun la thun mong yongs su grags pa'o/__/'dzing rnam rgyal mgon po zhes pa sngar chos rje khu dbon rgya nag tu phebs skabs bzhengs zhing nang rten du ston mchog thub dbang gi 'khar gsil sogs bzhugs pa'i lo rgyus ngo mtshar can de nyid phyis su cha phreng ba'i grwa dmag gis nyams chag btang ba/_rje 'dis nyams gsos kyi rab gnas gnang ba'i bgegs bskrad skabs dgongs gtad kyis drag tu gzir bas dngos su sku rten g.yo 'gul cher byung ba'i mdun der las rdor nas gu gul bdug cing yod pa bred bsngangs kyis bros dgos byung ba yongs grags dang*/_bstan 'gro'i dus rim du thugs sgrub bsam lhun gyi bka' srung rnam sras drag po rta sngon can gyi dmag bzlog ched du gnang ba'i nyin der shar lho'i phyogs nas nag phyogs kyi dmag gtos che ba zhig lam du zhugs te 'ong skabs thams cad chur byings nas rming med du gyur pa'i rtag mtshan mngon du gyur/_'di lta bu'i mngon spyod nus mthu'i gding tshad la mnga' brnyes kyang shugs 'byung lung bstan thog babs lta bu'i bstan rim gnad du 'gro ba re re tsam las rnam kun drag po'i las sbyor la gtan nas thugs mi dgyes shing dngos brgyud nas gnang bar mi mdzad/_spyi sger zhabs brtan rigs la'ang bka' las/_bstan 'gro spyi'i zhabs brtan shin tu gal che yang deng sang dus dbang gis bla ma rnams dkor la rngams shing lta dgongs kyi gding thob pa dka'/_sbyin bdag dam tshig dang ldan pa dkon/_sems can bsod nams dman pas mngon spyod kyi las sbyor srung zlog bsad mnan 'di khe nyen che bas gtso bor las 'jam po gsum kho na bsngags shing 'doms par mdzad/_gus la rnam sras 'di'i srog dbang bstsal skabs thun mong dngos grub kyi dbang du byas na mgon po gur la brten na nor gyi dngos grub dang*/_rnam thos sras la brten na drag po mthu yi dngos grub yod kyang shes mkhan mi 'dug ces zhal rtsed kyi tshul du gsungs pa don du smos ma thag pa la dgongs snyam/_thugs dam phyag dpe'i khrod nas mgon po zhal pod kyi gdong dar byi bas khyer ba chos skyong la phrin bcol gnang bas phyir nangs glegs bam gyi 'khris der tshur bzhag pa dang*/_rje gong ma'i sku nye gdong thog khyim du mkhyen brtse rin po ches snying thig yum bka' dang tshe ring ma'i g.yang sgrub kyi rten du bzhag pa'i bla rdo ngo mtshar can zhig yod pa phyis dus 'gyur gyi tshe bor brlag song ba/_rje nyid kaHthog nas yar yong skabs thang zhig nas rnyed pa slar rang gnas bzhag yod gsungs pa sogs dam can dregs pas bka' bzhin sgrub pa'i mngon rtags su nges so/_/sog tsan[1$0000240]da[1$0000300]na dgon gyi char nyi grags a tsa rtogs ldan gyi sku skye kun bzang rnam grol nas sangs gling gter ma yin skad rol mo sogs phul bar/_kho la grib btsan 'khor ches pa yin nam de'i nub grib btsan dngos su byung snyam byed par bka' bsgo dam bsgrags byas khul zhes gsungs/_drwa sgang sgrub grwa gsar 'dzugs skabs 'khris der sngar nas yod pa'i shugs ldan sku gsob gnyan par brtsi ba zhig yod pa dgon chen rgyal khang du spo 'jog gnang skabs gnas de nas mi mthong ba'i sar slebs pa na shin tu lci zhing theg dkar gyur pa/_sngar shul du ting phor ya dang snyan shal tshal pa phran tsheg lhag 'dug pa rnams la rje nyid kyi ljags sngags bcas phyag 'bru gnang nas 'dis brobs la khyer cig ces thugs khros pa'i tshul gyis bka' phebs pa ltar bgyis pas rim gyis yang du song nas mthar ci bder khyer chog pa byung ba dang*/_de'i nub mo dgon chen rgyal khang du sil chol gyi sgra dang khyi 'ur ba sogs 'tshubs lhongs che bar byung ba kun gyi mthong thos su gyur cing*/_las byed su la'ang gnod 'tshe'i rnam pa cung zad ma byung bas ngo mtshar yid ches kyi gnas su gyur/_lar rgyal po 'di mkhyen brtse gong mas lhun grub steng du snga 'gyur bka' ma tshogs chen 'dus pa'i sgrub dbang chen mo gnang skabs dngos su dbang gral du 'dus nas mdo tshig nod pa'i gzigs snang dmigs bsal byung ba'i gsungs 'phros ngag rgyun khungs dag las 'byung ba ltar/_rdzong sar dgon gzhung du'ang sngar nas rgyal po 'di'i rten dang gsol rgyun yod kyang*/_bka' gter gyi smin grol rgya che rgyun du gsung bzhin pa dang*/_sgrub chen lan mang 'dzugs pa dang rgyal mdos sogs skabs gang la'ang 'jam mgon bla ma sku gong 'og gnyis kas ched du snyan dar dang phrin bcol tsam yang mi gnang mod/_bar chad kyi rnam pa cung zad kyang med pa sogs rje mkhyen brtse'i dbang po sku gong 'og gi dam 'og tu chud pa zhig nges par yin 'dra/_dgung grangs lnga bcur phebs pa chu rta lor khams kyi phyogs su phyugs nad kyi rgyun chen po mched pa'i tshe/_'od dpag byang chog mdzad par phyugs kyi nad bdag gzugs dngos su bstan nas srog snying phul ba'i gzigs snang byung ba de nyid la gsur bsngo bsdus pa gsar rtsom gnang nas phyogs kun bkram pas khyab tshad kyi phyugs nad rgyun chad pa mngon sum yongs grags/_gter lhung phyogs rims nad kyis mi mang po shi nas ro gdon can zhig bla ser mang pos gsung chog gnang yang drung du 'gro dka' bar langs du nye ba na/_rgyang ring nas phebs zhor khel bar skyabs 'jug zhus pas de 'phral ro'i kha sna nas khrag rgyun thon te gdon rang zhir song*/_der yod 'ga' zhig gis mkhyen brtse sprul sku'i thugs rje ni rgya mda' 'dra 'dug ces kha mtshar lab skad/_brag yab 'dre ngan gyi blon po sngags pa zhwa nag phod kha gyon pa zhig gis mdo smad kyi che rgu mang po'i srog dbugs sdud tshul kun gyis zer ba g.yon ru bla ma la nyang gi rta nag gi dbang mdzad skabs sgrol dbang dus sngags pa de bsgral ba'i gzigs snang byung bas mtshon gshin po za 'dre stobs can gyis bzung ba dang*/_nad pa gdon drag pos brlams pa sogs thugs rjes bskyabs pa'i tshul mang zhing*/_dngos su mi ma yin gyis khrid nas zhag kha yar song ba 'ga' la skyabs 'jug gnang bas slar 'khor nas de'i skor lo rgyus yid ches skye ba mang po bshad du yod pa dang*/_rtag par lo tog la srog chags dang ser ba sogs kyis 'tshe bar skyabs 'jug gnang bas rgyun chad pa shin tu mang yang yig tshogs la 'dzems nas ma spros so/__/sde dge'i sras mo g.yu sgron gyis nang chen rgyal khab tu tshe lha rnam gsum gtso bor byas sgrol ma nyer gcig gi lha khang gsar bzhengs la rten gyi nang gzhug rab gnas dgongs gtad sogs yang yang gsol ba btab pa bzhin zhal bzhes gnang bas sgrol ma nyer gcig nang nas sku gcig gi spyan gnyis kar rang byung gsal bar byon pa dang*/_khams sde dge rmugs sangs sprul sku kun bzang bod tu phebs te zla ba gsum pa'i tshes bcu'i nyin gangs ri thod dkar du bdud rtsi sman sgrub gzug par dgongs gtad zhus pa ltar thugs smon gnang chog pa'i phyag bris 'byor ba/_zla ba der sman sgrub gzug rgyu ma byung yang tshes bcu'i nyin kun mkhyen gzim phug nas shug gseb bla brang bar sman dris khyab ste ngo mtshar gyi gnas la bkod pa dang*/_dgung grangs re gsum pa chu lug lor dbus phebs skabs zla 7tshes 3nyin ri mda' stod du phebs pa na/_dung mdo dgon pa'i gtsug lag khang rten dang brten par bcas pa bzhengs grub pa la rab gnas zhus par zla ba de'i tshes bco lnga'i nyin rab gnas dgongs gtad mdzad rgyur zhal bzhes gnang ba bzhin gong tshes nyin dge 'dun 'dus te bstan pa rgyas chog dang 'brel mchod pa rgyas spros bcas nyi dros la lha khang gi steng nas yo byad dang rol mo sogs kyi mchod sprin 'bul skabs steng gi nam mkhar 'ja' 'od shar ba bcas dngos su rab gnas kyi me tog sngon po shas che ba'i 'bras kha dog sna tshogs pa char bzhin du babs pas gtsug lag khang gi phyi nang kun tu khyab pa'i ngo mtshar byung ba der yod kun gyis mngon sum du mthong zhing rab gnas me tog dad rten du'ang mang du thob tshul go thos byung ba 'di'i phyogs nas yong ba'i rigs la dngos brgyud rtsad gcod yang yang byas pas thams cad ngag mthun par 'dug pas ngo mtshar shin tu che bar som nyi dang bral bar bkod pa dang*/_sngon chad gdan sar bzhugs bzhin nyin lam mang pos chod par rab gnas me tog zang thal du gnang ba'i lo rgyus mang du mnga' ba'o/__/sngar gus nas rje nyid kyi rnam thar zhig mdzad thub gsol ba yang yang btab pas/_ngos la rnam thar zhes don lo la bri rgyu mi 'dug kyang khyod nas nan tan chen pos brjod pa la da lta bsdus tsam zhig rang nas bri chog_/lar nges tig can zer ci shes ma gtogs lo che chung la dpag na phran gnyis khyod rjes ma 'byung tshod red pas nga shi rjes rgyas par khyod kyis bris zhes phebs/_phyis dbus phebs kyi lo der gzim chung sbug mar rje bla ma nyid kyi dgongs gter skor gyi dbang zhig gnang rjes phran nas mthong snang rab rib bris pa 'di red ces sku tshe'i smad kyi gzigs snang skor phyag bris shog dril mang tsam 'dug pa phyag tu bsnams te phran la gzigs byung ba dang sngar gyi gsung de yid la lhang gis dran nas lag tu zhu ma nus pas da lta shin tu nongs/_'on kyang gsang ba zab mo'i cha shas nges tig can sgro skur bral ba rnams phal cher khyad par gyi rnam thar skabs 'byung zhing*/_'dir yang cung zad tsam smos na/_rdzong sar du phebs nas ring por ma lon pa'i skabs shig tu grub thob thugs thig la nyams bzhes gnang pa'i tshe/_rje gong ma'i gzim sbug tu grub thob chen po sku che chung khru gang gi tshad tsam dngos su bzhugs par gus 'dud mdzad pas mdun der shel rdo'i gong bu zhig bzhag nas/_gzung ba'i yul gyis ma gos shing*/_/'dzin pa'i rtog pas ma bslad pa/_/rang sems rjen par bskyangs pa 'di/_/sangs rgyas kun gyi dgongs pa'o/__/zhes rje mkhyen brtser gu ru rin po ches ngo sprod gnang ba'i rdo rje'i tshig des ngo sprod gnang ba'i gsal snang gzim lam du byung bas thugs dam nyams bzhes la bogs 'don byung tshul gsungs pa dang mthun par sman sku zhig kyang bzhengs nas gzim sbug tu bzhugs su gsol ba dang*/_rnam thar zhal gsungs las/_dran pas srid zhi'i gdung sel mgon/_/si tu thams cad mkhyen pa che/_/chu glang lo la sku gshegs pa'i/_/gtam ngan skal med rna bar son/_/dgongs rdzogs gsol 'debs mchod 'bul byas/_/rje de gshegs nas lo mang por/_/rmi lam gnas skabs phal cher mjal/_mgon khyod dbyings su gshegs na yang*/_/bdag nyid thugs brtses bzung nges snyam/_/dga' skyo 'dres mar rgyun du mchis/_/zhes gsungs pa ltar 'jam dbyangs mkhyen brtse'i dbang po dang si tu rin po che rnam pa gnyis dbyer med pa'i dgyes zhal rtag tu gzigs shing legs nyes thams cad lung ston pa zhig yod ces dang*/_si tu rin po che'i mdzad spyod/_rje nyid la thugs brtses thun min du bskyangs tshul gsungs 'phros skabs dad gdung gis zhal ras gnas 'gyur ba ltar dus rtag par mdzad/_rje bla ma dbus nas gdan sar phebs 'phral skyabs rje rgyal tshab rin po cher mjal dar phul ba'i gsung lan du/_kaHthog si tu paN chen gshegs/_/rgan bu yang ni 'chi nyer gyur/_/rnying bstan snum zad mar me ltar/_/gyur pa 'di la khyod nyid kyis/_/blo stobs rgya cher bskyed byas te/_/bstan la bya ba byed par rigs/_/zhes zhal chems su bstsal nas ring min dgongs pa nang dbyings su bsdus pa'i tshe ched phebs gnang bas dpa' 'og nas sku gdung rin po che'i mdun phebs kyi bar zhag gsum btud mar rje bla ma nyid gzims lam du gsal bar mjal nas bstan bcos chen po shes bya kun khyab 'chad spel dgos tshul gsung gleng mang po zhig gnang byung don du 'jam mgon rnam gnyis kyi bstan pa la bya ba byed dgos pa'i zhal chems bstsal bar go zhes gsungs la/_phyis zhe chen du bshad grwa gsar tshugs skabs gzhung 'dis bshad pa tshugs dgos zhes bla sprul rnams la ched du bka' gnang ba'i dgos pa 'di yin par 'dug_/shing bya lor rin gter dbang lung grub nas bla ma dgongs 'dus kyi pusti lung dbang gi dbang sgrub skabs 'jam mgon bla ma sku gong 'og bka' gter gyi gdams pa rgya mtsho'i mnga' bdag tu bzhugs pa thams cad kyi gtad rgya rdzogs pa'i dgongs gtad byin rlabs gsol ba btab pas dgyes tshul gyis mdangs rmi lam du dzaM nang pad+ma shel phug gi g.yas kyi ri gdong brag dkar dpal chen po'i sku'i dbyibs can der sprul sku rin po che rgyal tshab bzhugs nas gter mdzod kyi dbang lung yongs rdzogs mdzad song ba/_mkhyen brtse rin po che'i snyan brgyud yang phur sbrags ma'i dbang gis mtha'i chos mtshams bzhag pa zhig byung zhes gus rmongs la spro ba bskyed pa'i gsung du bka' bstsal/_dgung grangs bco lnga'i steng rdzong sar bla brang du thog mar khyug tsam phebs nas slar kaHthog tu phyir phebs pa na/_mkhan bla ma kun dpal gyis/_mkhyen brtse rin po che'i gzim chung ga 'dra 'dug gsungs par/_mkhyen brtse sprul pa bsdus pa'i gzim mal du kun mkhyen klong chen pa'i sku zhig 'dug zhus pa de rjes de 'dra 'dir gtan nas mi 'dug pas kho bos brdzun zhus chen po zhig byas 'dug gsungs kyang de 'dra'i gzigs snang byung bar nges/_thog mar kaHthog tu phebs nas ring por ma lon par dpal ye shes kyi ma mo sngags srung mas yang yang bskyangs ba'i gzims lam byung tshul si tu rin po cher zhus pas klong gsal sngags srung gsol kha zhal 'don dgos par bka' gnang zhing*/_skabs shig gus la khyod kyi lag tu gter sgrom dang shog ser 'dra ci i byung*/_da nangs tho rangs rdzong sar bkra shis 'chi med grub pa'i dga' tshal gyi dbang khang gi mkhyen brtse rdo rje 'chang gi 'dra sku gsung byon ma'i mdun der sngags srung ma yin snyam 'ja' sprin gyi gos gyon pa zhig gis gter sgrom 'dra zhig bzhag song ba'i mthong snang byung gsungs/_me byi lor khams su mtha' dmag gis nyen che'i skabs da nangs tho rangs sprin ltar shig shig g.yo ba'i sku can gyi tshe ring ma seng ge la zhon pa zhig mdun du byung bas de ring nyang gter brtan ma'i mdos btang ba yin zhes phebs/_dgyes rdor ljags bsnyen gnang skabs yin 'dra dpal kaHthog tu bzhugs skabs mnal lam gyi snang char lha mo re ma ti dang po bud med gzhon pa zhabs la lcags sgrog gsol bas phebs mi thub pa 'dra ba dang*/_mthar rje'i zhal du mkha' gsang sbyor bas skyug bro ba'i thugs snang byung ba dang mkha' las dri chu btang bas zhal nas brtsams sku'i gnas thams cad khyab par bkram mthar nam mkha' la rdzu 'phrul gyis phebs pa'i mnal ltas zhag lnga bar btud mar byung tshul dang*/_de skabs lha mo'i gsol ka zhig kyang mdzad/_dzaM nang pad+ma shel phug gi gnas 'dus lor gnas 'dabs bai ro'i sgrub phug tu tshogs 'bum gsungs skabs 'phros zur phebs pa bzhin/_lha mo dud sol ma rtag par 'go zhing phrin las sgrub tshul du ma zhig kyang yod 'dug kaHthog si tu rin po che'i mchog sprul dang*/_gus bcas la snga 'gyur bka' ma'i smin grol bstsal skabs rgyud mgon legs ldan gyi dbang gi rjes gnang gtsang shod pa'i yig cha'i steng mdo mgon legs ldan ljang sngon drag po'i dbang rgyun yod tshul bka' gnang bar de nyid bstsal thub par gsol ba btab pas rjes 'brel du gnang ba gtor ma'i bka' bsgo skabs dpal ye shes mgon po rgyud mgon legs ldan dang mthun pa/_mdun gyi go sar bzhugs pa'i gsal snang byung ba phyag thor bstsal ba'ang gus nas mjal/_de'i nyin bka' las/_mkhyen brtse gong ma'i bkas bskul te dpal yul rgya sprul rin po ches dpal yul dgon du snga 'gyur bka' ma'i gzhung rnams kyi sgrub mchod gsar du btsugs shing dbang lung gi rgyun phyogs kun tu 'phel ba dang*/_rim gyis bka' ma'i gzhung rnying skor bcas chos skor tshang ma spar du 'khod pa sogs bstan pa la bya ba cher mdzad pa'i rten 'brel yin zhes bka' bstsal pa dang*/_shing sprel nag zla'i yar tshes la rdzong sar gtsug lag khang gi rtser thugs sgrub bar chad kun sel gyi sgo nas lha srin dam bsgrags gnang skabs thog mar rlung 'tshubs shin tu che bar byung zhing slar nam mkha' dwangs par gyur pa de'i tshe nag phyogs kyi 'byung po zhig dam la btags te srog snying 'bul du byung ba'i gzigs snang byung ba dang*/_gzhan yang dgung grangs zhe gnyis bzhes pa shing khyi lor gzims lam sogs kyi phyag tho 'ga' zhig rnyed pa/_gnas brtan dgon gyi nye skor sngar chos rgyal srong btsan dus kyi lha khang shul kha ba steng du dam bsgrags dang byin 'bebs skabs rtsa gsum rab 'byams dang yul lha gzhi bdag mang po yod pa'i nyams dang*/_rta bro la sba dong du dmigs pa byas pas/_rgya 'dre gzugs shin tu che ba spyi'u tshugs byas nas dong nang du song ba'i nyams byung*/_de'i phyir nangs lha khang sa 'dul skabs su dbyings mkhar rig 'dzin bla ma mang po dang*/_gu ru rin po ches mkha' la gar mdzad pa na rang yang nyams 'bar nas gar byed dgos pa byung yang shes nyams ban bun la yid rton ci yod/_tshes 6la yi ger bris/_dgung grangs zhe gnyis bzhes pa shing khyi lor bro nad 'tshal ba cung dwangs pa'i tshes dgu'i tho rangs stod kyi char gsar phyogs nas bla med kyi yi dam 'brel gang che brtags dgos snyam pa'i mod las gnyid srab mos non pa'i gsal snang la/_gnyan lo tsA yin rgyu sku bong thung ba gzan ring can zhal ras cung smug pa dbu skra cung zad ring por yod pa pho khreb can bod chas ring 'gag mnab pa zhig gi mdun gsang ba 'dus pa 'jam pa'i rdo rje'i dkyil 'khor dang po rdul tshon yin pa 'dra ba skad cig gis gzhal yas khang dngos su gyur pa'i nang 'jam pa'i rdo rje gur gum gyi mdog can 'od 'bar ba mtho gang tsam pa bzhugs pa'i lho ngos der nged rang 'dug pa dbang zhu ba'i 'dun pa byas pas/_bla ma 'jam pa'i rdo rjes/_gzung 'dzin gnyis med rtog med pa/_/rdul bral shin tu 'dus ma byas/_/rang rig rnam dag rab dgyes che/_/sangs rgyas kun gyi bde chen nyid/_/gsungs pa'i mthar yum sngon mo zhig spros te rang lus dwangs pa'i rnam pa can la 'khyud pas lhan skyes ye shes kyi bde ba myong ba'i mthar/_'jam pa'i rdo rje'i thugs ka nas d+hIHyig kha dog sna tshogs pa can gyi mthar thig le'i rnam pa mang pos bskor ba rang la thim/_mthar 'jam pa'i rdo rje yang rang la thim pa'i ngang rtog bral nam mkha' ltar gnas pa'i ngang nas sad/_yang mnal ba na/_rje many+dzu g+hoSha rab byung sngo sangs bzhengs stabs kyis byon nas phyag bdag gi spyi bor bzhag ste/_khyed kyi tshe rabs nas 'brel ba'i yi dam gsang 'dus 'jam pa'i rdo rje dang badz+ra b+hai ra wa gnyis yin pas de gnyis sgrub na phyag rgya chen po mchog gi dngos grub thob par 'gyur ro gsungs pa'i mthar sad par gyur to/__/khri smon gzim shag tu khyung sprul dang lhan du dkon spyi'i tshogs btang*/_bka' mol zhib cha byung*/_chos gling gter phur lag tu son/_de dgong tho rangs la khyung sprul nas gling ge sar dus kyi dpa' thul pho rnams g.yas gral bod kyi gdung rigs las 'khrungs pa'i mi 'di yin ces de rnams dngos su yod par ngo sprad pa dang*/_g.yon phyogs nas chos rgyal lha rigs kyi gdung las 'khrungs pa'i bud med rigs shin tu mtho ba ming 'di yin ces ngo sprad pa dang bud med 'ga' zhig gis phyag gsum re btsal ba sogs kyang rmis mthar/_bka' srung mthar thug rdo rje gur gyi mgon/_/ces dang*/_spyan ras gzigs mi tra lugs 'gro don mkha' khyab ces zer ba dang gnyid sad nam langs so/__/bsam yas su thog mar phebs skabs 'ja' tshon shin tu bkrag mdangs can dbu rtse'i steng nas 'khor ba'i tshul lta bur shar zhing*/_char zim bur 'bebs pa sogs byung*/_bar khang du thugs sgrub bar chad kun sel gyi tshogs 'bum ther lhag dang mchod 'bul zhib rgyas/_gzhung gi bka' 'brel rab gnas sogs gnang skabs mchod rten zhig las mtshan mo chu tshod gcig gi yun tsam du me 'bar ba kun gyis mthong*/_khyad par du zla 3tshes 15nyin has po rir lha bsang dang*/_ri khrus/_rab gnas/_lha srin dam bsgrags skabs bskul dbu tshugs pa dang mos gus kyi rkyen las gu ru rin po che gro lod sogs nam mkha' gang bas rdo rje'i gar bsgyur ba dang rang yang snang ba gtad med kyis 'cham stabs byas/_dam bsgrags dngos gzhi la lha srin sde brgyad klu dang gzhi bdag grangs med yod snyam gyis 'dud cing srog snying blangs te rang drag por gsal ba'i gdan dang thugs kar bstims nas srog dang dbyer med byas/_zor skabs kla klo dam sri'i grong khyer brlags pa'i gsal snang dang*/_byin 'bebs sogs rgyas par byas/_mdor na 'di'i nyin khams dwangs/_'don spro/_rig ngar thon pa sogs cung zhig bstan 'gror phan snyam pa byung ngo*/__/rgya gar lha babs gnas kyi 'dabs nyer me sprel zla tshes la sdod nub rmi lam du/_rgas po ral pa se chob be ba zhig gis ras nag sgril khud du sbrul nag po che chung mang po dang*/_lcong mo/_mtsho pad+ma'i gze ma 'dra ba'i sems can nag po/_sbrul kha dog sna lnga chun gcig khyer nas kha 'byed pa de rdzong sar gzim chung du yod snyam pa sbrul rnams ring thung sna tshogs su 'thor nas rgyug byung bar/_rnam rgyal drag mo la brten pa'i mnan pa dgos rgyur 'dug pa de stabs 'grigs min lta bu de rnams dmar gong phyogs kyi yin rgyu 'dug pa dang*/_rnam rgyal drag mo mkhyen brtse'i 'bebs 'phro 'dug pa bka' gter na med snyam pa sogs/_de la mdos bzlog sogs yod pa can rmis/_tshes 6la rten 'brel rang 'grigs su 'khrul rmis dang mthun pa'i ling+ga brang chis skabs a tsa ra ral pa se chob be ba mdog nag po snod zhig gi rgyab la sems can 'dra min gyi ri mo bris pa thogs pa gzig gdan khyer ba zhig 'dzum pas skad kha shas zer ba ma go yang ltas legs/_lha bab tu phur pa'i mnan pa yang bstan 'gror bsam pa bzang pos byed khul bgyis skabs mnan pa byed ran khar 'brug sgra bsgrags/_char chen po babs/_de'i nub mo char rlung shin tu drag po byung ba 'tshubs bstan pa red snyam la rdo rje gzhon nu'i nga rgyal shin tu brjid pa'i gtso 'khor bsgom pa'i gsal snang byung bas 'jam song gsungs/_sa khyi zla 7tshes 4la rdo rje gling du gzhung gi zhabs brtan gtsor gyur g.yag phyar sgrol mdos dpon g.yog bcu gsum skor dpe cha 'byor rim dang bstun bton pas/_tshes 9yas lam byang shar steng phyi dro'i chu tshod bzhi pa skor mdos btang ba na/_char zim bu babs/_yang cung dwangs pa'i nyi ma 'gro sa'i smug pa dkar po'i steng thad 'ja' 'od zlum po phyi nang can dang*/_'ja' tshon gyi gong bu mang po thams cad nas mthong bas ngo mtshar byed/_gang ltar lam 'gro byung*/_tshes 10snga char rig khams dwangs par/_shar glang chen 'gying 'dra'i gangs kyi rtser/_/rje dus gsum sangs rgyas bzhugs pa'i gnas/_/gtsug lag khang mi chung tsam bzhengs na/_/spyir sangs rgyas bstan la phan pa dang*/_/sgos spur rgyal bod kyi rgyal khams bde/_/zhes pa'ang shar/_gzhan yang rnam kun lkog gyur rigs mi mkhyen pa'i tshul kho na gsungs mod/_bstan don do gal che dus nam rgyun gsung 'phros phebs khar shugs 'byung du thar thor re gsungs pa rnams thog tu khel ba dang*/_lhag par sprul sku ngos 'dzin skabs sogs su 'khrungs yul thag ring thung*/_pha ma'i ming bkra dang khyim phyug dbul/_yul gyi chags tshul/_khang pa'i nye skor sa rdo chu shing sogs mtshan ma gang yod mngon sum du gzigs te/_dper na skyabs rje rgyal tshab dam pa'i skye srid snga ma mdo waM co le'i mchod rten dkar chung nye skor du 'khrungs so zhes bka' bstsal pa dang*/_yang du sa sbrul zla 11tshes 18nub mo de dang cha mtshungs mdo waM mchod rten dang karma dgon gnyis par/_pha pad+ma'am rdo rje/_ma tshe dga' 'am lha mo'i ming*/_bu rta lug gang rung thob pa/_dud pa dang rda yi ming thob/_sgo khyi dkar/_khang ltag dar cog_/chu nyin la yod pa/_'brog pa yin pa shas che zhes phebs par yang srid rtsad gcod skabs mdo waM mchod rten dkar chung kyi nye phyogs/_ku rgyal btsan rgod chen po'i mdun/_bsam 'grub gling gi sa phyogs/_gling gdong chos lu dar 'phan gyi brgyud pa/_yab rdo rje rab brtan/_yum me tog lha mdzes kyi bur zla tshes la 'khrungs pa karma dgon du brgyad stong pa rdo la gsar brkos khri bkod dang*/_'tshogs zangs gsar pa gzug pa'i gza' skar dus tshes shin tu bzang ba ma bsgrigs lhun sgrub byung zhing gong du ji ltar phebs pa 'khrul bral nges rnyed byung ba dang*/_rme shod hag mda' grong par gur mgon sku dngos gnam sa gang ba zhig bzhugs par rmis pas gle mda' sprul sku der 'khrungs pa'i rtags su nges zhes zhal las thos pa dang*/_grub dbang rin po che shAkya shrI'i mchog sprul ngos 'dzin gnang ba'i phyag bris su yab yum sogs kyi mtshan gsal po dang*/_khyim de'i mchod khang du sku gsung thugs rten zhal thang du yod ka ba cung zad 'khyog pa'ang phyag bris su gsal ba sogs ngo mtshar ba du ma yod kyang ngos 'dzin gyi phyag bris rnams med pas zhib 'god ma shes/_de 'dra'i rigs shin tu mang bas mkhas dang grub pa'i yon tan la mkhyen ldan gzur gnas kun gyis bsngags pa'i yul du gyur pa'i rnam par thar pa bsam gyis mi khyab pa'i bdag nyid can du bzhugs pas gnas tshul gyi yon tan ji bzhin pa lta ci/_phyogs tsam yang so so'i skye bo'i dpyod yul du ma gyur mod/_dad pa'i blos gang dpog tsam zhig bkod pa'ang chu thig gcig myong bas rgya mtsho chen po'i chu'i ro rtogs nus pa ltar 'gal ba med par sems so/__/lnga pa bstan 'gro'i don du bzang po'i phrin las kyi phyag rjes ji ltar gnang ba'i tshul ni/_rgyal ba'i sras kyi spyod pa rgya mtshor dbang 'byor ba rnams ni sku gsung thugs kyi mdzad pa thams cad shugs 'byung gis gzhan phan mtha' yas pa chos nyid kyis 'byung bas phan bde 'dod dgu'i dpal lhun grub tu ster bar mdzad pa las/_dmigs bsal bstan 'dzin gyi skyes chen rnams kyi phyag bzhes su gnang ba'i gtso bo zab rgyas chos kyi 'khor los bstan 'gror phan bde spel ba'i tshul skabs su babs pa ste/_mdo las/_dge slong dag gang zag gnyis po 'dis bsod nams mang po bskyed de/_sdig pa'i rtsa ba 'byin cing bdud dang g.yul 'gyed par byed/_bdud kyi rgyal mtshan snyil bar byed/_chos kyi rgyal mtshan sgreng bar byed/_de bzhin gshegs pa'i chos kyi 'khor lo bskor bar byed do/_/gnyis gang zhe na/_gang gus par byas te chos 'chad pa dang*/_gang 'di na gus par byas te chos nyan pa'o/__/de bas na khyod kyis gus pas chos bshad par bya zhing bla ma rnams la gus par byas te chos mnyan par bya'o/_/zhes gsungs pa ltar dang*/_khyad par shin tu snyigs ma'i dus 'dir bstan pa yun du gnas pa dang gdul byar phan pa'i lhag bsam zol med kyi chos 'chad pa ni bsod nams bsam gyis mi khyab pa'i tshul/_byams pas seng ge'i sgra bsgrags pa'i mdo las/_gang+gA'i bye snyed 'jig rten gser dag gis/_/bkang ste gang la sbyin pa byin pa bas/_/dus ngan tshe na tshigs bcad gcig 'chad pa/_/de yi bsod nams ci 'dra snga mar med/_/ces dang*/_rje mkhyen brtse'i zab gter thugs chen sems nyid ngal bso'i lung byang las/_nam zhig sprul pa'i rgyal po yi:_sku gsung thugs yon phrin las kyi:_rnam par rol pa mtha' klas pas:_bod khams 'gro rnams skyob pa dang :_bstan pa'i me ro yang yang gso:_zhes gsungs pa dang mthun par bstan 'gro'i ched du dgongs pas chos sbyin 'chad spel rgya che rgyun chags su gnang ba'i tshul yang*/_rje bla ma nyid mkhyen gnyis ye shes kyi gsang mdzod la ye nas dbang bsgyur bas dgung grangs bcu skor phebs pa na thog mar sum rtags dang dag yig gsan sbyong gnang zhing gzhan la skyor te 'chad nus pa dang*/_kaHthog pa'i dbyar gnas kyi tshogs gral du phebs te bshad bya'i yan lag tshogs bshad gnang ba dang*/_khyad par tshogs khang chen por bde chen zhing sgrub kyi tshogs dbur phebs nas bde smon gyi ljags bshad rgyas par gnang bas mchog phal 'dus pa thams cad ya mtshan chen po'i gnas la bkod/_gdan sa ru bzhugs nas yun ring ma lon par mnga' ris sprul sku gtsos rdzong sar bla grwa nyi shu skor la spyod 'jug_/sdom gsum rnam nges/_sher phyin sdud pa/_rgyud bla ma/_bzang spyod sogs kyi bshad khrid gnang*/_lA s+ye ri khrod du khyab bdag blo gter yab sras kyis rgyud sde'i dbang chen gnang skabs blo sbyong don bdun ma'i khrid dang*/_rtsa rgyud brtag gnyis kyi rgyud bshad la mkhan chen gzhan dga' rin po ches skyor dpon mdzad pa'i skabs rgyud sde'i spyi rnam dang ljon shing phyed yan chad la yang skyor gnang*/_snga rjes sum rtags/_dag yig_/snyan ngag sogs rig gnas skor rnams kyang bar mtshams ci rigs su gsungs par mdzad/_dgung grangs so gsum steng hor spyi g.yu thog mkhan chung dbang 'dus nor bus gdan drangs te snying thig ya bzhi dang klong chen snying thig gi dbang khrid dad 'dus shin tu mang po la gsungs pa dang*/_khams bye'i bshad grwa brje bkrol re'i mtshams dbang chos rgya che re gsungs srol gyis mtshon dad ldan che phra su zhig gis gsol ba btab pa ltar chos 'khor rgya cher bskor zhing*/_sku tshe'i smad dbus phyogs lha ldan/_rdor smin gnyis/_lho brag smra bo cog_/mkhar chu/_lha lung*/_yar 'brog stag lung*/_gtsang gling bu dgon/_sa skya gong*/_'bras ljongs rgyal sa/_pad+ma yang rtse/_rdo rje gling sogs su'ang bka' chos 'ga' zhig gsungs pa rnams las/_gtso bor gdan sa rang nas chos 'khor rgyun chad med pa bskor ba de'ang sbyin bdag sogs gzhan la bskul ba'am/_zhu ba pos chos gzhi 'ding dgos pa lta bu ma yin par rje mkhyen brtse gong ma'i phyag rgyun bzhin bstan 'dzin skyes chen dam pa rnams nas phal pa nyams chung gi rigs yan chad la mtho dman dang phyogs ris med par ji ltar gsol ba btab pa bzhin so so'i blo mos dang 'tshams pa'i zab rgyas chos kyi sbyin pa zad med du bstsal bar mdzad pa las/_gtso che ba rags rim tsam smos na/_bstan pa'i gzhi rten so thar dge tshul slong gi sdom pa phyis sngags spyod mdzad kyi bar bgrangs las 'das pa sgrub gnang mdzad/_byang chub sems sdom bka' srol gnyis gsar rnying yig cha sna tshogs steng nas snga phyir lan grangs ches shin tu mang ba/_rdo rje theg pa'i chos 'khor gtso bo mkhyen brtse'i dbang pos gangs ljongs sgrub brgyud shing rta chen po brgyad zhar byung khrid phran skor bcas ring brgyud rdzogs par gsan cing so so'i nyams bzhes dang byin rlabs nye brgyud kyis khyad par du byas pa'i smin grol rgyab brten bcas bzhugs pa'i chos sde chen po gdams ngag rin po che'i mdzod pod chen bcu'i dbang khrid lung bcas shin tu zhib rgyas lan gnyis/_rje mkhyen brtse'i dbang pos bka' bsdu gnang ba'i sgrub thabs rin po che kun las btus pa pod bcu bzhi'i dbang lung lan bzhi/_rnal 'byor dbang phyug bi rU pa'i thugs bcud gsung ngag rin po che lam 'bras slob bshad zhib rgyas lan gsum/_tshogs bshad lan gnyis/_rtsa rgyud brtag pa gnyis pa'i rgyud bshad rje btsun gong ma brgyud 'dzin bcas pa'i yig cha rnams gung bsdebs pa'i shin tu zhib rgyas lan bzhi/_gur saM gyi bshad pa mkhyen brtse rin po che'i nye brgyud can lan gsum/_ngor lugs dkyil 'khor bdun gyi dbang chen yongs rdzogs lan bzhi/_gsang 'dus rigs gnyis dang*/_bdag med ma'i dbang chen lan kha shas/_kun rig dang mi 'khrugs pa/_tshe dpag lha dgu/_dri med rnam gnyis sogs lan mang*/_sbyong rgyud dkyil 'khor bcu gnyis kyi dbang chen tshar gsum/_mar lugs brtag gnyis rgyud bshad lan kha shas/_rgyud bla ma lan gnyis/_zab mo nang don dang gzhung chung gnyis bcas kyi bshad khrid lan mang*/_chags med dang kong sprul gsung phyag chen khrid lan mang*/_ras chung snyan brgyud kyi bde mchog lhan skyes yab bka' dang yum bka'i byin rlabs dang zab khrid mkhyen gsung yig cha rnams kyi lung bcas/_shangs chos kyi byin rlabs rnams dang khrid bcas lan kha shas/_rgyal thang gcod dbang khrid bcas lan mang*/_kar gcod gtor dbang dang 'don cha'i lung bcas lan kha shas/_dpal dus kyi 'khor lo jo zhal shing rta gnyis kyi dbang chen lan brgyad dang mchog dbang dang sbyor drug khrid lan 'ga' zhig_/rje mkhyen kong gnyis brgyud par bzhugs pa'i 'jam mgon mi pham rin po che'i 'grel chen steng nas dus 'khor rgyud bshad lan gcig_/grub chen thang rgyal la gnas brtan yan lag 'byung gis bstsal ba'i nye brgyud sher phyin brgyad stong pa'i ljags lung lan gsum/_thams cad mkhyen gzigs mkhyen brtse'i dbang pos slob dpon 'jam dpal bshes gnyen las gsan pa'i sher phyin sdud pa dang spyod 'jug sogs kyi bshad khrid lan mang*/_bka' gdams glegs bam rin po che dang mar pa'i rnam mgur gyi lung*/_dwags po'i thar rgyan dang lam mchog rin chen phreng ba'i bshad lung*/_sa skya gong ma rnam lnga dang ngor chen rdo rje 'chang gi bka' 'bum bcas ljags lung lan gcig_/sdom gsum rab dbye sogs lan mang*/_dngul chu thogs med kyi bka' 'bum dang rje tsong kha pa'i lam rim chen mo/_chags med zhabs kyi ri chos sogs kyi ljags lung lan ci rigs bcas/_mngon rtogs rgyan rtsa ba dang rong ston 'grel chen tshar gcig_/'dul ba me tog phreng rgyud lan kha shas/_bde mchog lU nag dril gsum gyi dbang chen lan du ma/_bde mchog rtsa rgyud kyi bshad pa lan gcig_/mkha' spyod be'u bum gyi lung lan gnyis/_in+d+ra dang mai tri mkha' spyod/_chos nyid dngos bstan dang sngags btu'i byin rlabs rnams lan mang tsam/_dmar po skor gsum rjes gnang thun mong thun min lan gsum re/_gzhan yang thugs chen bcu gcig zhal/_don yod zhags pa/_gdugs dkar/_gza' yum/_sman bla zhe bdun/_'jam dpal gsang ldan/_ras chung phyag rdor/_dge ldan 'jigs byed dpa' gcig_/'brug lugs bde mchog bcu gsum ma sogs rgyud sde gong 'og gi dbang chen rnams thor bu'i tshul du rgya cher gsungs rigs zhib tu 'god ma shes so/__/ngor tshar 'jigs byed dbang chen lan mang dang khrid dang pod lung lan gcig_/gshed dmar dbang lan kha shas pod lung gcig_/gur gyi dbang khrid lan bzhi pod lung lan gnyis/_zhal gyi dbang khrid lan gnyis pod lung lan gcig_/snga 'gyur rnying ma bka' ma'i skor gyi dbang yongs rdzogs zhib rgyas lan gsum dang*/_sgyu 'phrul zhi khro/_dong sprugs/_tshogs chen 'dus pa/_'khon lugs yang phur rnams kyi dbang de las mang ba/_bka' ma'i gzhung rnying pod bcu skor long ba'i ljags lung lan bzhi/_sgyu 'phrul rtsa rgyud gsang ba snying po dang*/_spyi mdo dgongs pa 'dus pa dang phur pa rtsa dum gyi rgyud bshad lan bzhi lnga/_sangs rgyas gsang ba'i lam chen dang*/_nyi ma seng ge'i rgya cher 'grel/_rgyud 'bum rin po che dkar chag bcas pod nyer drug gi ljags lung lan gcig_/rin chen gter mdzod chen mo'i dbang khrid lung dang bcas pa lan gcig_/gter mdzod bka' rgya'i dbang lan gsum/_rgyud bcu bdun gyi dbang kha shas dang lung tshar gnyis/_nyang gter bka' brgyad bder 'dus dbang chen lan gsum/_dbang 'bring bsdus khrid sogs lan kha shas/_gur drag dang thugs chen/_mkha' 'gro chen mo rnams kyi pod lung lan re/_khros nag gi smin grol dang pod lung lan re zung*/_chos dbang bla ma gsang 'dus dang*/_thugs chen yang 'dus/_phur pa sogs kyi dbang dang pod lung lan ci rigs/_yang ti sangs rgyas mnyam sbyor gyi smin grol pod lung thengs gcig_/g.yu thog snying thig gi dbang khrid lan lnga/_pod lung lan gcig_/rgyud bzhi'i lung lan gcig_/snying thig ya bzhi tshar lnga/_yang tig rnam pa gnyis kyi dbang khrid lan du ma/_klong chen mdzod bdun ljags lung lan gnyis/_ngal gso skor gsum rtsa 'grel dang khrid bcas/_yid bzhin mdzod rtsa 'grel/_chos dbyings mdzod rnams lan du ma/_bla ma dgongs 'dus kyi sgrub dbang chen mo zhib rgyas lan gnyis/_don dbang lan mang*/_byang gter skor gyi dbang lung lan gcig_/byang gter kun bzang dgongs pa zang thal dang ka dag rang shar bcas kyi dbang khrid lung bcas zhib rgyas/_thugs sgrub drag mthing dang*/_thugs chen/_phur pa spu gri/_zhang khrom tshe bdag pad gnubs chu bo gcig 'dres dbang chog bcas lan mang*/_tshe bdag gnubs lugs mu tig phreng ba lan gcig_/rat+na'i tshe gsang dang phur pa'i dbang rgyas bsdus lan gsum bzhi/_grub chen thang rgyal snyan brgyud mkha' 'gro gsang spyod kyi dbang khrid lan bzhi/_mnga' ris paN chen rig 'dzin yongs 'dus kyi smin byed thengs gsum/_pod lung lan gcig_/rdor gling lta ba klong yangs dbang lung lan gcig_/klong gsal 'bar ma dang hU~M skor snying thig gi smin grol lan gnyis/_kar gling zhi khro'i dbang rgyas bsdus dang bar do drug khrid lan kha shas/_'ja' tshon pod drug gi dbang lung cha tshang lan gcig_/dkon spyi'i dbang khrid pod lung bcas lan mang*/_lha btsun rig 'dzin srog sgrub kyi smin grol lung bcas dang rdo rje snying po'i dbang lan mang*/_rgyal dbang lnga pa chen po'i dag snang rgya can nyer lnga'i dbang lung zhib rgyas lan bzhi/_smin gling gter chen rin po che'i gter chos yongs rdzogs lan bzhi/_bde kun dang khyad par rdor sems dbang khrid lan mang*/_sgrub thabs 'dod 'jo'i bum bzang gi dbang lung thengs gsum/_smin gter dang rtse le mkhas grub pad+ma legs grub kyi bka' 'bum lung lan re/_gter chen bdud 'dul rdo rje klong gsal snying po'i chos skor gyi dbang lung tshar gnyis/_bdud 'dul phur pa dang klong gsal gur drag dbang lan mang*/_gur drag dang rdor snying khrid lan ci rigs kha skong bcas/_klong chen snying thig rtsa pod gnyis kyi dbang khrid lung bcas lan grangs mang ba dang*/_kun bzang bla ma'i zhal lung de mtshungs/_yon tan rin po che'i mdzod kyi rang 'grel dang sog po dge bshes bstan dar gyi 'grel pa bcas kyi bshad khrid lan gsum/_rgyud lugs phur pa'i dbang chen thengs bzhi/_pod lung lan gnyis/_kun gzigs mkhyen brtse rin po che'i gter chos yongs rdzogs kyi dbang khrid lung dang*/_bka' 'bum lung tshar gnyis/_dgongs gter thugs chen rgyal rgyam/_bka' 'dus chos kyi rgya mtsho/_mkha' 'gro gsang 'dus/_grub thob thugs thig dang*/_snyan brgyud skor dang*/_rtsa gsum 'od gsal snying thig sogs lan mang tsam/_gter chen mchog gling gi gter chos yongs rdzogs kyi dbang lung tshar gsum/_sdom gsum rtsa 'grel skor dang*/_lam rim ye shes snying po'i rtsa 'grel lan du mar gsungs pa rnams rnam thar zhal gsung gi grangs dang cung mi mthun kyang rnam thar gsungs rjes sku tshe'i smad du gsungs pa rnams brtsis pa yin la/_gzhan yang mkhyen brtse ye shes rdo rje'i gcod 'dzin pa rang grol dang*/_'gro 'dul dpa' bo rdo rje'i dgongs gter skor dang*/_mi pham 'jam dpal dgyes pa'i rdo rje'i rgyud lugs 'jam dpal gyi dbang*/_gling rgyal tshe yum/_las rab gling pa'i chos skor phur pa rnams kyang lan ji ltar rigs pa/_khyad par dpal dgyes pa rdo rje'i rgyu lam dbang chen dang*/_nA ro mkha' spyod kyi byin rlabs/_tshar ngor lugs gnyis kyi khrid bcas blo sbyong skor dang*/_thugs chen rjes gnang*/_klong snying sngon dngos khrid bcas lan ci rigs/_thugs sgrub rnam gnyis dang lce btsun snying thig smin grol lan mang*/_skyer sgang rta mgrin dang*/_sgrol dkar rjes gnang*/_tshe khrid bcas/_snyan brgyud phur pa/_'phags ma'i snying thig dang rtsa gsum dril sgrub/_rtsa gsum spyi 'dus/_phyag rdor me dbal/_rta mgrin gnam lcags me 'khor/_gnyen po lha lnga/_zhi byed lha bdun skor/_thugs chen 'khor ba dong sprugs/_mchog gter 'od chog_/klong snying rtsa gsum dang yang gsang bla sgrub rta phyag rjes gnang*/_thang rgyal tshe dbang rgyas bsdus sogs zhu mkhan rgyun chad med pa'i re ba skong bar mdzad pas mtshon/_mdor na rgyud sde kun btus yongs rdzogs sdebs gcig gsungs rgyu ma byung na'ang rgyud sde gong 'og gi dbang chen thor bu'i tshul du lhag lus med par gsungs grub pa sogs bka' 'gyur tsam las gang gsan pa de dag tshar re ma 'chad pa med pa lta bus mdor na sku tshe gcig gi mdzad pa chos 'chad nyan kho nas dus 'da' bas sku mtshams bcad rgya'i skabs dang yar mar phebs pa'i ring las nyin rer dbang rjes gnang thengs re mi gsungs pa gtan nas med pa lta bu yin/_dbu ma lugs kyi sems bskyed dang*/_thugs rje chen po'i dbang rjes thun mong ba/_'pho lung*/_rkyen sel dbang rjes phran tshegs/_tshe dbang sogs kun la 'chad rung rigs khyab gdal du gnang ba tsam las/_gzhan thams cad gang byung byung khrom chos su gyur pa gtan nas mi mdzad cing*/_khyim pa pho mo la yi ge drug pa'i bsgom bzlas dang*/_theg chen lam gyi rtsa ba dam pa gsum dang bsags sbyong gi sgo nas rnam dkar sgrub pa dang*/_dge tshul slong gi sdom pa'i rten can gdams zab don du gnyer ba dag la gtso bor rang rang blo mos dang 'tshams par rten khrims gtsang dang chos lugs rang rang gi yi dam bsnyen sgrub nyams len sogs gsar rnying chos bka' gang dgos so sor ston par mdzad la/_bstan pa ris med la dag snang gis chos sgo mtha' yas pa gsan bsam 'dzin spel skyong ba'i mkhas btsun dam pa'i ngang tshul dang thugs bskyed can dag la lhag par dgyes pas zab cing rgya che'i chos sgo yangs por ston/_gsar rnying grub mtha' rang rang chos brgyud la yid ches kyi nges pas thos bsam sgom pa rtsal du 'don pa rnams la'ang so so'i lta grub kyi 'jog mtshams/_brgyud 'dzin gyi rnam thar/_chos kyi che ba/_tha na phyag bzhes dbyangs rol tshun zhib par thugs la mnga' zhing so sor ma 'dres par bka' lung rjen par bstsal bas re ba rdzogs par bskangs shing yid ches lhag par 'phel bar mdzad/_grub mtha' chos lugs phan tshun g.yo thabs sam dbang che chung gis bsgyur ba dang*/_rang lugs bzhag nas a gsar col chung klad yangs kyis re re rnyed dus re re bor ba'i rigs rnams dang*/_lhag par du yang grub mtha'i phyogs khyer gyis chos dang gang zag la skyon 'dogs/_springs yig_/dri ba/_'byams yig sogs shes rgyud zing zing po byed cing rtsod pa 'phel byed kyi rigs la gtan nas mi dgyes/_bka' las kyang*/_deng sang rtsod ldan snyigs lnga'i lta ba'i snyigs ma ches bdo bas bod mi re'i rgyud la lta ba re 'byung bar gsungs pa bzhin/_bstan la zhugs pa rnams lta ci/_so skye khyim pa yan chad kyi kha la lta grub re khyer nas chos lugs phan tshun lta grub dag min lab gleng 'di ni gzur gnas kyi rtsod pa lta grub rnam dag gi sgrub byed phar zhog_/kun gyi shes rgyud bdud kyis brlams pas bstan pa nang dbyen dang*/_bstan sel phung dkrug gi gzhir song nas bstan pa'i rgyun dang 'gro ba'i bde skyid myur du nyams byed 'ba' zhig gi rgyur 'gro ba shas che/_lar yang bstan pa'i srol 'byed chen po 'phags pa'i sa la bzhugs nges pa rnams dang*/_bstan 'dzin mkhas grub rim byon dag gis dpyad gsum dag pas gtan la phab/_sgom sgrub nyams bzhes kyis lam rtags dang mchog gi grub 'bras mngon du mdzad pa'i bstan pa rnam dag gser zhun ma 'dra ba rnams la so skye'i rnam rtog gis dpyad par 'dod pa ni rang nyid nyams pa'i rgyu las gzhan med/_des na rang rang bstan pa gang gi sgor zhugs pa de'i lta grub la nges shes skye ba'i thabs la nan du brtson cing nyams len snying por byed pa shin tu legs/_'on kyang grub mtha' kun la phyogs ris kyi ngan rtog mtha' dag dor la dag snang sbyong ba gal che zhing*/_der ma zad ris med pa'i mdo sngags kyi gzhung 'grel rnams la dag pa'i snang bas zhib tu mjal na 'chad thabs dang 'grel tshul 'dra min dag la so sor skabs su babs pa'i khyad chos ngo mtshar can re bzhugs shing*/_mthar 'bras kyi don gcig tu 'bab pas na/_rang rang nges shes skyes pa'i lta ba de'i dogs sel dang che ba 'don pa'i sgrub byed du 'gyur zhing thos bsam gyi blo skyed gong 'phel byed/_kun la rgyu mtshan shes pas dad pa'i snang ba rang shugs kyis 'byung ba sogs dgos pa shin tu che/_dus dbang gis snang stong gi sgrub phyogs rtsal 'don che chung dang*/_brgyud pa phan tshun thugs nang mthun mi mthun phran bus chos mthun rtsod pa bstan pa'i rgyan du 'gyur ba 'ong dka' bas thams cad nas bstan pa nang mthun 'byung thabs re mdzad na phan che tshul 'doms par mdzad cing*/_gter chen mchog gling gi thugs sgrub yid bzhin nor bu'i lung byang du/_dus kyi mtha' la bstan sel 'byung ba mnga' bdag sprul pa zhig gis de nyid dbyen bzlums mdzad nas bstan 'gro la phan pa 'byung zhes gsungs pa bka' las thos shing rnam thar du'ang de ltar gnang ba bstan 'dzin skyes bu dang bstan pa'i sbyin bdag khag la yang nas yang du zhal gdams bstsal/_gsar rnying gi cho ga'i chings dang dbang gi phyag bzhes sgo yangs dogs rnams la gcig dpe kun 'gebs kyi srol ngan ma yin par rgyud sde gong 'og dang bla ma brgyud pa'i phyag bzhes kyi khyad par las ji ltar 'byung ba bzhin dang*/_khyad par dbang dang sgrub pa'i phyag bzhes phal cher rjes gnang dang gtor dbang tsam la'ang rje 'jam mgon rnam gnyis kyi phyag srol zhib cing rgyas pa kho nar gnang ba las/_phyis sku na smin pa dang slob tshogs ches mang skabs kyang gzhung don ras bor gyi sla chos dang byas lo des chog gtan nas mi mdzad/_khrid kyi rigs lam 'bras tshogs slob sogs sa skya'i skor rnams sum khrid dang bzhi khrid mdzad/_de mthun gdams mdzod du bzhugs pa'i zab khrid rnying skor ma gtogs pa rnams khrid brgya dang sbrags te sum khrid mdzad pa 'jam mgon rnam gnyis kyi bzhed srol yin pas shin tu gal che zhes yang yang gsungs/_brgyud 'dzin rnams nas kyang de ltar dgos par bla ma brgyud pas bka' gtsigs su gdams tshul gsungs/_gzhan gsar rnying gi khrid rnams brda 'phrod nges pa lan res khrid lung gi rgyun la chog par gsungs shing de bzhin du gnang*/_rtag par chos sbyin chad med du bstsal kyang 'ba' sam gyi zas 'bag btsog can bya khyis zos pa ltar don gnyer yod med dang*/_chos kyi gnad don dpog min sogs dpyad pa gang yang med par shugs 'byung gis ci 'dod byung rgyal chog pa lta bu'ang ma yin par gdams ngag zab mo rnams bka' gtsigs kyi phyag rgyas btab nas so so'i brgyud 'dzin dang mos ldan la ched du gdams shing mnog chos su bstsal bas rjes 'jug dag gis zab chos kyi rin thang dang dkon par 'du shes pas zab don la yid ches/_ha cang gti thug gi chos brgyud 'dzin pa dag gis kyang ci yod cha mi 'tshal zhing brgyud pa chad 'gro ba'ang ma yin par snod ldan gyi rigs la thugs lcogs min skabs sku ngal khyad du bsad nas mtshan mo yang rgyun ring por dbang khrid mang du gsungs/_de'ang chos bka' rgya che chung gang yin rung kun slong bcos pa'i tshul la yang yang nan tan gyis/_chos 'chad nyan sgom sgrub ci byed kyang lam rnam dag tu 'gyur min kun slong 'di kho na la rag las pas shin tu gal che bar gdams pa'i sgo nas gdul bya'i blo rgyud smin nges su mdzad/_'chad bya'i chos de dag kyang dbang*/_khrid/_rtsa ba dang yan lag gi yig cha'i lung sogs khungs dang 'brel zhing rgyu mtshan 'di lta bu'o zhes ched du gsol ba btab ma nus kyang rgyas par bka' bstsal bas gdul bya'i re 'dod yongs su rdzogs shing bstan rgyun la sman pa dang*/_dpyod ldan dwangs ba 'dren cing ngo mtshar lhag par skye bar snang*/_rten 'brel dang dgos pa'i skabs dang 'brel na dpe cha sogs bstsal zhing rjes su spro ba bskyed pa'i tshul du/_kho bos bla ma dam pa 'di rnams las lan grangs 'di lta bu nos/_de'ang gcig la yid ma ches par yang yang zhus pa min kyang zhu yul bla ma de dag spyir dam pa'i yon tan phun sum tshogs pa dang ldan la/_khyad par rje 'jam mgon rnam gnyis kyis so sor sger chos ched du bstsal ba bzhin thugs dam nyams bzhes lhag par gnang ba'i byin rlabs kyi brgyud pa ngo mtshar can re bzhugs pa'i rgyun la bsams nas nan bskyar zhus pas brgyud pa khyad 'phags phal cher 'dus pa'i khul yin la/_brgyud pa de ldan gyi gdams pa zab mo bla ma dam pa rnams kyi dgongs pa bskang zhing bstan rgyun la cung zad phan du re bas gzhung dang brgyud pa'i phyag rgyun bzhin chad lhag med pa zhib rgyas su 'chad grub pa ste/_chos zhus pa'i lag rjes nyams bzhes gnang lugs so sor rag las shing*/_kho bos rgyal po bkas bcad de gyis 'di dgos kyi


khas len bsnyags pa gang yang med ces dang*/_spyir bstan pa nyams pa'i snga ltas kun gyis gal chung chos la byed skabs 'dir rang don yid byed kyi blo ngan ma yin par lhag bsam rnam dag gis 'chad spel byed nus pa re byung na legs tshul gyi bslab ston tsam las shin tu sgrub par dka' ba'i khas len gyi gnad la bkar ba sogs mi mdzad/_rgyud dang gzhung gi bshad khrid dag kyang zab don man ngag gis dbul ba'i rtog ge'i bshad yam dang*/_gang shes gang dran sha zin spu bsdus lta bu ma yin par rgyas bshad rnams kyi zab don dngos por dril/_bsdus pa'i rigs zhib cing rgyas par bkral te blo gros dman mchog kun gyi rgyud la sman nges pa'i 'chad bya mdo sngags gang yin gyi gzhung don thad kar gsal rgyas su ston par mdzad cing*/_skabs thob gsar rnying gi bshad rgyun dang yig cha sogs gang la brten pa'i dgongs don mtha' dag gsal bar mdzad pa tsam las/_gzhan dgongs pa mthun min dang 'thad mi 'thad kyi dgag sgrub rigs gtan nas mi mdzad/_snod ldan blo gros mchog gyur gyi rigs la zab don las 'phros pa'i gsung bshad shin tu ngo mtshar ba rgyas par gnang*/_rkyen sel bka' bsgo byin rlabs dang tshe 'gugs tsam la'ang khungs dang 'brel zhing sngon dngos rjes tshang gis zhib par thugs lhod de dang ba 'dren par gnang ba las/_lta sgom mthon po'i stong skad kyis gya tshom du gtan nas mi mdzad/_rtag tu dngos mtshan gyi 'dzin pas bcings ba'i glen gtam sbug dog gti thug can ma yin par chos dang rten 'brel gyi gnad mkhyen pas thugs dgongs shin tu gu yangs par bzhugs/_mdor na thun mong thun min gyi zab rgyas chos kyi gsang ba gang ston kyang snga sor dpe gzigs gnang ba sogs mi mdzad mod/_gzhung bzhin rang byan chud pa sha stag las mkhyen pas khyab ma khyab kyi khyad gtan nas mi mnga' zhing*/_lhag par mdo sngags gzhung don dka' gnad dang*/_dbang khrid dang cho ga'i gab dkrug sogs ji tsam phyag len dka' ba de tsam gyi mkhyen rab dang rnam dpyod je cher 'gro ba lta bu'i ngo mtshar dang ldan pa ste/_tshul 'di dag dkyil 'khor rgya mtsho'i khyab bdag 'jam pa'i rdo rje nyid sum ldan rdo rje 'dzin pa'i skur bzhengs pa'i mngon rtags dang*/_rgyal bstan yongs su rdzogs pa'i shing rta chen po mtshan don mthun pa'i rnam thar bstan 'dzin gyi skyes bu gzhan las khyad par du gyur pa'i gnas so/_/de dag gis phyogs tsam mtshon te mdor na rje bla ma 'di nyid kyi mdzad spyod che phra mtha' dag la dpag na rje 'jam dbyangs bla ma sku gong ma'i rnam par thar pa dang khyad par cung zad tsam med pa lta bur bzhugs kyang*/_kho bo de'i sprul pa yin dgongs pa dang yon tan gyi tshogs de dag la thugs snyems rdul tsam mi mnga' bas dman sa 'dzin zhing nga rgyal spong ba nyid lhur bzhes te slob ma rnams la gsung 'phros bstsal skabs yang*/_khyed rnams kyis kho bo mkhyen brtse rin po che dngos yin pa'am kho bo 'dra zhig yod par ma sems ma gtogs de ni log lta de las che ba med pa zhig red/_rje mkhyen brtse'i dbang po zer ba de snyigs ma'i dus 'dir nges par sangs rgyas dngos su byon pa 'dra zhig yod rgyu red ma gtogs nga 'dra ba'i dkor rgan gyi phung po las yon tan gyi cha cung zad tsam yang med pa zhig ga la yin/_des na skyabs rje si tu rin po ches phran gdan sa 'dir dang por slebs skabs mkhyen brtse gong ma'i bzhugs gdan 'di'i 'khris su 'bol gdan zhig la bkod nas/_khyod rang gnas skabs der sdod na legs rgyu dang*/_khyed rang mkhyen brtse rin po che bzhugs mal du sdod snga na mi sdod sar khyi nyal ba 'dra zhig yong zhes gsungs par/_skabs der lo nyung snang mtho'i dbang gis bka' bkyon lta bur go nas de tsam yid la babs pa ma byung mod/_rjes sor rgyu mtshan shes pa nas bzung gsung de la yang yang nges shes 'khrungs te/_mkhyen brtse rin po che de nga rang yin snyam pa'i rtog pa med cing*/_rje bla ma de nyid spyi gtsug dang snying dbus su bsgoms nas gsang gsum byin rlabs rang rgyud la zhugs shing mdzad spyod thams cad la tshul bzhin du slob nus pa dang*/_thugs kyi bzhed don gang yod sgrub nus pa'i gsol 'debs dang smon lam la yang yang brtson pa yin tshul phebs shing*/_rnam pa tsam du'ang rtag tu nges 'byung gi ting nge 'dzin dang thugs 'du 'bral med pa'i tshul gyis rgyun du zhal bkod mdzad pa gang la'ang glo bur 'chi bdag gis tshe srog la bar du ma bcad na de ltar bgyid chog gsungs te mdzad pa gang gnang na'ang de bzhin mdzad/_bshad sgrub kyi bstan pa'i rgyun dang 'gro ba'i bde skyid kyi gzhi la ngang thung gtan nas mi mdzad/_rgyu 'bras phra zhib la bag yod gnang ste rgyal khrims kyis srog gi 'jigs par thug pa 'ga' zhig dngos su bskyabs shing*/_lo re bzhin bshas rar tshud pa'i sems can mang po'i srog blu ba dang*/_'brog sde khag la byin rlabs ljags mdud sogs rgya cher bkram nas sems can khri phrag long ba tshe thar gtong ba'i dge bskul yang yang mdzad/_phyag khar byung ba'i sems can thams cad tshe thar du gtong ba las tshong bsgyur sogs gtan nas mi mdzad/_rten bzhengs kyi las tshan skor ji tsam mang rung dngos su sems can bshas la phab pa dang bsngos shar 'gyur ba'i rigs gtan nas mi mdzad cing*/_bka' las kyang*/_nang pa sangs rgyas pa'i khyad chos las 'bras blang dor la brtson rgyu 'di red/_des nas gzhan la dngos brgyud nas gnod 'tshe can gyi dge rtsa sgrub khul byed pa la snying po ci yang med/_yang sgos sems can che phra kun la srog 'di las gces pa med pas na srog gcod la 'dzem pa shin tu gal che/_lta sgom mthon por rloms pa dang ltar snang gi dge ba rgya chen sgrub khul byas rung las 'bras 'chol nyog tu spyod pa dag ngan song gi rgyu las dge rtsa rnam dag tu 'gro dka' bas shin tu gzab dgos par gsungs/_mngon spyod kyi mthus bsgral ba sogs gsan pa la'ang thugs bag 'khums pa ltar mdzad/_chang 'thung glu gar sogs bag med kyi spyod pa ye nas mi mnga' bas dus kun dran shes las mi 'da' ba'i rang tshugs brtan por bzhugs/_dad zas dang gshin dkor la ya nga bas bsngo rten byung tshad phyag tho gnang ste khrus chog lan gsum re dang*/_'jam dbyangs mkhyen brtse'i phyag srol lo gcig 'khor ba dang gshin po'i ming yig thams cad bkod pa rdzong sar 'dus sdes kun rig sgrub mchod zla gcig lhag tsam lo bstar gnang ba'i mjug tu byang bzhu dang bsngo smon lo re bzhin ma chags par mdzad/_byang ro thams cad la sAts+tsha sgrub gnang gi phyag bzhes kyang yod ces gsungs/_phyogs phebs skyes chen khag la'ang byang chog bsngo rten rtag tu zhu bar mdzad/_bdun tshigs byang zhus kyang ma bsnyel bar gnang zhing snying rjes gsur bsngo ba 'di bskyed rdzogs kyi gding yod med dang spros pa che chung la ma ltos par kun la phan pa che zhes yang yang du gnang*/_gshin po 'ga' zhig rgyal 'gong dam sris skye gnas bzang po thob pa la bar du gcod pa las dbugs dbyung ba sogs du ma yod pas shes/_mchod sbyin dang gtong ba la mnyes pas rgyun ring gi nad pa/_thag ring gi a co/_dbul phongs 'on long rigs la chos dang zang zing 'tsho sman sogs kyi gnang sbyin rtag par bstsal/_yar ngo mar ngo'i tshes bcur tshogs mchod/_rgyal ba'i dus chen khag la mchod pa sogs shin tu rgya che rgyun chags su gnang*/_rkyen sel mdos glud rnams la'ang mdos rdzas skor gtos che ba dus dang rgyun du bzhag par mdzad/_dbang dang sgrub chen sogs gang la'ang mchod gtor rgya che gam gtsang*/_gtsang sbra gad phyis legs par dgos pa'i bka' bstsal/_gzungs 'bul/_dam rdzas gta' spel/_khrus chab/_bum chu sogs la'ang gtsang sbra shin tu che ba mdzad/_rgyun du nangs re bzhin zhal phyag bsil ba dang*/_ngur smrig gi na bza' legs par bzhes pa sogs nyin gcig ltar gnang*/_gnas rten mjal bskor du phebs pa na sku phyag dang zhabs bskor sogs sku ngal dub kyi rnam pa med pas gcig tu brtson pa bka' gdams gong ma'i phyag srol la shin tu mnyes/_gzims chung du sngon gyi sku chas rnying pa rgyun 'jags gang yod pa de las gser dngul gyi spus nom can gsar bskrun dang*/_deng sang rgya bod kyi 'phrul chas gsar pa sogs gtan nas bzhag par mi mdzad/_rgyun tu na bza' bzhes lugs/_srung byin rje rang gi phyag gis gzhan la stsol ba dang*/_gsol chas sogs thams cad kyang mngon chung sbas tshul 'ba' zhig gis bya bral dkyus ma'i brtul zhugs rje gong ma'i mdzad pa ji ltar bskyangs/_ri bong cal 'drog gi 'ur gtam dang don med kyi bya ba rngam rngam rdzig rdzig byed pa la gtan nas thugs mi mnyes/_bsod nams kyi gzi brjid dang nang gi ting nge 'dzin gyi rtsal 'bar bas che btsan su 'dra zhig yin rung sku'i 'khris su bcar na zhum ste gus pas mi 'khod pa su yang med la/_sku gsung thugs la yon tan gyi dpal gzi che bas sku mdun du zhal 'dris che bzhin dad gdung je cher 'gro/_rgyal khams spyi dang sbyin bdag gi zhabs brtan la'ang zhi rgyas kyi las gtso bor gnang zhing*/_rnam dkar gang la'ang gzhan phan gyi thugs bskyed dang mdzad pa lhur len pa las rang don gces 'dzin sogs gtan nas mi mnga'/_bstan 'gro'i bya ba rlabs chen dang rnam dkar mchod sbyin rgya gang che phyag bzhes gnang yang 'di lta bu'i las grub snyam pa'i mngon rloms dang zhen 'dzin ngom chos gtan nas mi mnga'/_mi chos kyi phyogs nas bslab ston zhus gnang la'ang thugs rgyud drang zhing phyi thag ring ba/_lag tu lon nges pa lugs mthun tshul gnas kyi zhal gdams rang nyams sman nges mchog dman spros pa che chung nyams 'og tu chud pa sha stag bstsal/_ched du lung bstan sogs dmigs bsal mi mdzad kyang blo ji tsam 'gel ba de tsam du phyi mtha' gzigs pa'i gsung du nges pa bka' slob kyi tshul du gnang*/_rang phyogs gzhan phyogs chags sdang 'then khyer gyis bstan sel phung bshig gi gtam zur tsam gsan par dka' bas zhu phod pa su yang med/_che btsan gyi rigs la dgos pa dang 'brel na skyon dang nor 'khrul gyi spyod pa rnams drang po'i lam du srong bar mdzad/_gdams ngag zhu ba po gsar bu'i rigs la khyed rang da lta lo gzhon 'dod yon gyis sems g.yengs te yod 'gro bas sngon 'gro blo sbyong dang rgyu 'bras kyi rnam bzhag dpe bltas dang don la blo yang yang bkol na sems rgyud zhi dul 'byung rgyu red ces zhal rtsed dang bcas gsung lhod por gnang bas dbugs dbyung ba las zur za dang khyad gsod mi mdzad pas mtshon gong 'og gsung gi zur la dpag na nges 'byung dang rmad byung byang chub sems kyi mnga' bdag tu gyur pa dngos shugs nas shes nus/_nang du snying rje chen po bcos min du mnga' bas rgyus med pa'i yul dang*/_skad rigs mi gcig pa rnams dang*/_grub mtha' chos brgyud su yin kyang rang rang gi brgyud 'dzin gyi bla ma zhig las lhag pa'i dad gdung dang*/_mos gus bcos min du skye bar 'dug_/des na skyes bu dam pa'i ngang tshul bcu gnyis zhes grags pa ltar gsar rnying bka' gter gyi gzhung dang man ngag bsam gyis mi khyab pa'i chos kyi rgyun mtha' yas pa mtha' dag legs par gsan cing*/_sku tshe ril por zab rgyas kyi chu klung ngoms pa med par 'khyil zhing 'bab pa'i gnas gcig pur gyur/_bsam byung gi rigs pa'i gru gzings nges don nor bu'i dbyig gis gtams pas rang gzhan gyi grub mtha'i shan 'byed mthar thug gi 'jog so'i zab don gyi dpal 'byor thams cad lhun gyis grub pa'i tshul rje 'dis kun mkhyen bla ma 'jigs med bstan pa'i nyi ma la rdzogs pa chen po'i gzhi lam 'bras bu'i chos skor gyi dris lan du 'gran zla bral ba'i mkhyen rab kyi 'jug pa can du bsngags shing*/_mdzod bdun dang yon tan mdzod kyi gzhi lam 'bras bu'i skor la gsan bsam mdzad par ched du gdams pa sogs la dpag pas shes/_gang gsan pa dag tshig tsam du ma bzhag par sgom pas rtse gcig du nyams len gyi gnad la dril bas sa lam gyi yon tan grub gnyis 'dod dgu'i gter shugs 'byung du brdol/_skyes sbyang gi mkhyen rab 'gran zla bral bas phyogs re'i gzhung tsam mkhyen pa la mkhas par grags pa ma yin par rig pa'i gnas dang 'dul mngon dbu phar rdo rje theg pa'i rgyud sde'i gsang ba nas brtsams tshig gi brda khyad phran tshegs yan chad kyi shes bya'i gnas thams cad la thogs pa med par gzigs pa'i spyan ras shin tu yangs/_de'ang rje 'dis thog mar gzhung skor gsan sbyang skabs dang por mkhyen dka' ba lta bu'i go ba gting chod pa ma byung yang*/_yon tan rin po che'i mdzod la gzigs rtogs mdzad nas bzung blo gros kyi 'jug sgo yangs par phye bar gyur cing de phyin gzhung gang gzigs kyang dka' ba med par go snyam 'dug pas gzhung 'di ni byin rlabs shin tu che ba zhig yin zhes bka' las thos/_dus rtag tu sdom pa gsum gyi bcas mtshams las 'da' ba med pa'i dpal rang gshis su grub pas nyes spyod phra mos kyang ma gos pa'i mdzad spyod thams cad shin tu btsun pa rgyal bstan rin po che mdzes pa'i rgyan tu grub/_gzhan phan gyi mdzad pa rgyun mi chad pas bzang po'i phrin las kyi sgo kun nas yangs shing*/_mdzad sgo thams cad thog mtha' bar gsum du 'di bya de byed kyi 'char gzhi dang shom ra sogs gang yang med par thog babs kyi tshul du phyag chags gnang bas/_chen po dang dpyod ldan sus kyang spyod yul ma gyur pa dag kyang shugs 'byung gis bar chad med par lhun gyis grub pas bstan 'gro'i phan bde spel bar mdzad/_chos 'chad pa'i tshe dpe gzigs dang thugs bsam sogs la ma ltos par gsar rnying gi gzhung so so'i chos skad phan tshun ma 'dres pa dang*/_rang gzhan gyi grub mtha'i 'dzin stangs shan 'byed pa/_zlos pa'i skyon dang bral zhing tshig gi zur phyin pa/_'dzin bde zhing gting zab pa/_gnad don nyid gsal bar ston pa'i tshul la nam yang thogs pa med/_zhal gsung rnam thar las kyang*/_bsdus grwa'i rig lam zhig sbyangs na/_/rtsod pa'i rigs pa skyon med zhig_/'byung ngam snyam yang dgos pa chung*/_/zhes gsungs pa ltar sngon gyi bag chags lta bu'i bsdus tshad kyi rigs pa la shin tu mnyes shing blo gsal dag mdun du phyin pa tsam gyis de nyid gang la 'dris cha che ba'i gzhung las brtsams te rtsod pa gnang zhing brgal brtag mdzad pa zhig yin la/_de yang ji ltar zhal bzhes gnang ba lung dang rigs pas brgal brtags ji tsam byas kyang gting je zab dang*/_sgrub byed kyi rigs pa rno myur thogs med du mnga'/_skabs rer thol byung du gsung rab dang bstan bcos kyi lung 'dren mu mthud zad mi shes par gnang bas kun ya mtshan gyi gnas la bkod cing*/_de yang bgro gleng gnang yul yang dag pa'i lung rigs ji tsam bzang bzhin thugs dgyes pas yang yang bgro gleng gnang zhing de nyid kyi bsngags pa gzhan la'ang brjod par mdzad/_rtsom pa'i yon tan sku gzhon pa'i skabs gsung rtsom gnang sgo dog tsam yod kyang*/_skyabs rje rgyal tshab rin po che'i gsung rtsom mang po gzigs pas mkhyen rab kyi sgo phye ba lta bur gyur nas rtsom gnas 'gyur ba zhig byung ba kun gzigs si tu rin po cher rtsom rigs gzigs 'bul dang rgyu mtshan zhus pas/_nges par bla ma'i byin rlabs zhugs zer ba de red ces gsungs/_don du brtsam bya'i don gsal la rgyas par go ba/_tshig sbyor nyab nyob dang ha cang mang ba ma yin pa/_rgyas bsdus 'tshams shing sdeb legs pa/_rgyun gyi rtsom rnams go sla ba gtso bor mdzad cing bstod tshogs sogs daN[1$0000270]Da[1$0000300\u0f72] gzhung las drangs pa'i snyan ngag gi nyams 'gyur phun sum tshogs pas mdzes par spa ba/_thol byung gi gsung skor ye shes kyi rtsa mdud grol bas gzhom med rdo rje'i do ha dngos su snang zhes mkhas pa rnams kyis yang yang bsngags/_mkhyen gnyis kyi gsang mdzod la rang dbang thob pas chos thams cad gzigs pa tsam gyis zab gnad kyi don de dang de lta bu gzhung de'i stod smad der bshad yod ces zhib par bstsal du yod pas dbu zhabs yongs rdzogs thugs su chud pa'i ngo mtshar nges par mnga' zhing*/_rnam 'dren dam pa rnams las chos gsan pa sogs kyi zla tshod tshes grangs/_gsan pa'i gnas mched grogs su bzhugs yan chad khungs dang gtan tshigs shin tu zhib par bka' bstsal bas the tshom sel byed kyi thugs dran bsnyel med du mnga'/_phyag dpe tshol dgos tshe dpe mdzod khag mang shin tu rgya che'i khrod nas deb ther la gzigs rtog ma dgos par phyogs 'di'i stod smad 'di lta bur glegs bam 'di 'dra yod ces dang*/_glegs bam stod smad gang du zhal phyes pa der gzigs nas yod pa lta bu rgyun par mchis/_brtse ba'i thugs rje mkha' khyab tu brdal zhing thugs bskyed dang phrin las kyi zla bas rtsod dus snyigs ma'i bstan 'gro'i rgud pa mtha' dag sel ba'i sman du sim/_nus rtsal gyi dgongs pas gzir ba tsam gyis dam sri rgyal 'gong tshar bcad pa dang*/_mtha' dmag kla klo'i tsha dbal 'joms tshul cha tsam smos pas mtshon nag phyogs 'byung po zil gyis gnon cing bdud sde 'dul ba'i mthu stobs thogs pa med pa can du gyur pa'o/__/des na 'dzam gling rgyal bstan yongs su rdzogs pa'i mnga' bdag gangs can mgon po rgyal mchog bcu bzhi pa chen po ngag dbang blo bzang bstan 'dzin rgya mtsho thams cad mkhyen gzigs mchog gi zhal snga nas kyang*/_'jam dpal rdo rje grub pa'i drug cu'i dbyangs/_/chos tshul rgya mtshor 'khrol ba'i dpyid kyi glus/_/blo ldan bye ba'i snying la gros 'debs pa'i/_/'gro mgon dpal ldan bla mar gsol ba 'debs/_/zhes bsngags brjod thun min du bstsal bar mdzad pa ltar/_ris bral rgyal bstan yongs 'du'i dga' tshal chen por 'dus pa'i bstan 'dzin skyes chen dam pa yongs grags rnams dang*/_kun spong sbas tshul 'dzin pa sogs khyad par 'phags pa'i slob tshogs grangs las 'das pa'i dbus nas thugs sras mkhas grub gtso che ba ni 'jam mgon gong ma'i phrin las kyi shing rta 'dren pa'i mnga' bdag rje nyid kyi rigs bdag tu gyur pa zhe chen rgyal tshab rin po che/_mkhan chen kun bzang dpal ldan chos kyi grags pa/_'jam mgon ngag dbang legs pa gtsos phal cher nas zab chos kyi bdud rtsi du ma slar bzhes pa dang*/_de dag gis zhabs brtan dang gsol 'debs sogs don la gnas pa'i bstod bsngags phul bar mdzad pa'ang*/_dus gsum rgyal ba kun gyi gdung 'dzin cing*/_/theg gsum chos kyi dga' ston 'gyed mkhas pa/_/khams gsum 'gro ba'i 'dren pa gcig gyur pa/_/'jam dbyangs chos kyi blo gros zhabs brtan gsol/_/zhes sga ston 'jam pa'i dbyangs kyis phul nas bla slob kun gyis zhal 'don dgos par yang yang gsungs pas mtshon du ma yod pa dang*/_skyes chen dam pa'i rigs dpal sa skya'i pho brang khag gi khri chen gzhung zur/_sku mched/_zhal da'i rigs rnams dang*/_lha khang mkhan chen sogs/_ngor e waM pa'i mkhan zhabs rnam pa/_na len+d+ra'i gzim 'og dang bco brgyad khri chen/_yar klung dbon sprul sogs dbus gtsang dang*/_rgya gar nub phyogs khu nu bla ma rin po che bstan 'dzin rgyal mtshan/_brag yab gtsang sar mchog sprul/_bla ma 'jam dbyangs rgyal mtshan sku mched/_sa skyong sde dge'i dbu bla chos sde lhun grub steng gi shar nub rgyal mtshan bla ma/_dra sgang mkhan sprul/_sde gzhung mchog sprul rnam gnyis/_dbon stod mkhan mkhyen rab/_dge ba'i bshes gnyen chos 'phel rab rgyas/_mdo srib mkhan thub bstan/_mkhar mdo dgon gyi sprul sku dang chos rje sogs sde dge'i mnga' khul gyi sde snod 'dzin pa rnams dang*/_a mdo rdi'u chos rje/_dpe war sprul sku sogs rgyud sde'i nyams bzhes 'chad spel nus pa'i rdo rje 'dzin pa grangs mang bcas sa skya pa/_sku zhabs si tu pad+ma dbang chen yab sras/_rgyal sras 'jam mgon mchog sprul/_dbon rgan yang srid rin po che/_sga stod/_zur mang*/_phyi 'brog_/nang chen sogs kyi kar dgon grangs mang gi sprul sku dang bla ma/_'brug chen rin po che/_yongs 'dzin sprul sku/_mdo khams brgyad pa/_lding che'i cog grwa sprul sku sogs bka' brgyud che bzhi chung brgyad/_smin gling mkhan gcung rnam gnyis dang gdung sras sku mched/_rdor brag rig 'dzin chen po/_mkhar chu'i nam snying sprul sku/_mdo khams rdzogs chen drug pa rin po che/_sku zhabs dge mang mchog sprul/_sprul sku dri med 'od zer/_rdzogs chen mkhyen brtse/_zhe chen rab 'byams drug pa/_rgyal tshab bzhi pa/_kong sprul rin po che/_gus phran bcas/_kaHthog si tu mchog sprul rin po che/_gra lag phyag tsha sogs gser khri khag gi sprul sku rnam pa/_dpal yul gzim 'gag mchog sprul/_ra sprul rin po che/_rmugs sangs sprul sku/_a 'dzom sras sku mched/_gter ston las rab gling pa dang dri med/_gru gu rtogs ldan bcas kyi sras sprul rigs/_mchog gling sprul sku rnam pa gnyis/_'bri gter 'od gsal rdo rje sogs rnying ma'i phyogs/_mkhas dbang dge bshes 'jam dpal rol pa'i blo gros kyis chab mdo 'jigs byed lha khang du rje bla ma nyid bod yul shing rta chen po brgyad kyi bstan pa'i mnga' bdag tu bsngags pa'i zhabs brtan gsol 'debs bcas sku tshe'i brtan bzhugs 'bul ba dang dad gus bsngags brjod che bar mdzad cing zhabs su bsnyen/_kun gling rta tshag rje drung rin po che/_mi nyag skyid gling skyabs mgon/_tre hor dge rtag mchog sprul/_go 'jo 'gro 'dren sprul sku sogs dge lugs phyogs kyis mtshon grub mtha' ris med pa'i zhal slob don gnyis nus pa shin tu mang na'ang 'dir sa bon tsam du bsdus pa lags/_bod kyi mi chen bka' mda' rtsis gsum phal cher/_sde dge chos rgyal chen po/_gling rgyal/_sgom sde nang chen bcas kyi rgyal btsun sras blon rigs/_ri che/_chab mdo/_brag yab/_smar khams/_go 'jo/_nyag rong*/_tre bo/_mi nyag_/rgyal rong*/_mgo log_/a mdo yan gyi dpon rigs/_'bras ljongs chos rgyal/_lha sde mi sde'i gtso 'dzin sogs mdor na phyi dus 'dir khams bod dbus gtsang rgya dkar nag gi khyon na mchis so cog gi bstan 'dzin skyes chen dam pa/_dad blo gtong ba'i mig yangs bstan pa'i sbyin bdag_/ri khrod kyi sgrub brtson pa sogs kyis mtshon dngos dang brgyud nas zab chos kyi bka' drin thob pa smos kyis mi lang bar bzhugs pas don gnyis kyi phrin las rgya cher bskyangs dang skyong bzhin pa lags so/__/drug pa zhar byung bsod nams kyi tshogs bsags sgo du ma nas rgya cher sgrub pa'i tshul ni/_dam pa'i skyes chen dag gi phyag bzhes kyi gtso bo bshad sgrub kyi bstan pa'i rgyun skyong ba nyid yin kyang*/_zhar byung dge 'dun gyi gnas gzhi 'ding pa/_gtsug lag khang dang rten gsum gsar bzhengs/_de dag la mchod 'bul/_yul dam pa la bsnyen bskur dang*/_dman pa la sbyin gtong sogs bya ba las kyi 'khor los rgyal bstan rin po che'i mnga' thang spel ba'ang sangs rgyas gnyis pa klu sgrub kyi rnam thar las 'byung ba bzhin/_rje bla ma mchog 'dis spong klog gnyis dang bya ba las kyi 'khor lo gcig gis gcig go ma bkag par thams cad sgo kun nas lhun grub tu gnang bar mdzad pa ste/_de la bya ba las kyi 'khor lo'i gtso bo dam pa'i chos 'chad spel gnang tshul rags rim smos ma thag pa ltar dang*/_'dir thun mong gi bya ba las kyi 'khor lo'i phyag rjes gnang tshul yang sku tshe'i stod phrin las cher ma rgyas pa'i skabs 'di rigs gnang dka' tsam byung rung zhum pa med pa'i thugs stobs kyis thugs bzhed gang yod thad kar gnang zhing*/_dbyar dgun sdom skor thengs 'gar phebs rjes/_ji skad du/_me tog dri ni rdzi phyogs min mi 'gro/_/rtsa brgya spos sam tsan+dan yang ma yin/_/dam pa'i dri ni rdzi phyogs mi 'gro ste/_/phyogs rnams kun tu mi mchog dri yis khyab/_/ces pa ltar rim gyis dam pa'i yon tan gyi grags snyan ma la ya rlung gis phyogs mthar khyab pas bgrang las 'das pa'i mchog phal dad 'dus rnams nas 'byor 'khos kyi mchod sprin skyabs zhus bsngo rten bar med byung ba thams cad gnas min chud zos su ma song bar rten bzhengs dang mchod sbyin sogs gtong ba nam mkha' mdzod kyi sgo gtan pa med par dbye bar mdzad pa'i gtso bo bsdus tsam smos na/_de'ang rje bla ma nyid rdzong sar du bzhugs nas lo shas song ba na kun gzigs si tu rin po ches gsung 'phros su/_khyed rang 'jam mgon rin po ches mkhyen brtse'i phrin las kyi sprul par ngos 'dzin gnang ba'i rten 'brel gyis kaHthog pa'i bstan pa spyi dang*/_khyad par rgyud sde'i bshad grwa dang rten bzhengs skor phran la phan thog yong dgos pa yin na'ang skal bzang rdo rje'i kha chems bzhin 'dir bzhag dgos byung song*/_da ni kho rang tshor 'dod babs yod med sna tshogs 'di ltar la/_slar kaHthog tu bzhugs dgos tshul phebs par zhu lan du/_gus pa 'dir sdod rgyur ming btags tshar dus gdan sa 'di la zhabs phyi cung zad 'grub re che zhing*/_kaHbstan la rin po che rang bzhugs pa 'di lhag sus kyang ci thon med nges/_nam zhig dgos gal byung tshe lo bcu gnyis ring gus nas 'gan hril len gyi zhabs phyi zhu nges gtan yin tshul zhus pa na/_si tu rin po che rje bla mar spyan cer gyis yun ring tsam gzigs mthar a tsi de las lhag zhig ci byed/_da ni khyed rang zer ba ltar gyis dang phran gyi bsam pa'ang des rdzogs par 'dug ces shin tu dgyes brtses bka' 'phros zhib tu phebs pa'i dgongs don bzhin/_thog mar snga 'gyur bstan pa'i 'byung gnas dpal kaHthog rdo rje gdan du kun gzigs si tu rin po ches gsar bzhengs rgyud sde'i bshad grwa thub bstan nor bu'i lhun po'i spyi rkang gtan med gyur pa gzhir bzhengs kyi nyams gso zhal grangs sngar yod steng gsum 'phar bas mkhan slob bzhi bcu zhe lnga'i grangs/_zangs mdog dpal ri'i zhing bkod blos bslangs mjug skyong bcas la gtso bor rje nyid kyi phyag rdzas btang*/_dgon gzhung gi mi chen bsko bzhag gi srol btsugs pas kun gyis bsngags 'os phyi mtha' gzigs pa lta bu'i legs lam cher byung*/_khyad par rje nyid nas thog mtha' bar gsum phyag 'don gyis thub chen lha khang sum thog khang brtsegs mchod rten gyi bzo dbyibs che legs nang rten gtso gser zangs kyi ston pa'i sku thog so gsum pa rgyu tshad bzo dbyibs nang gzhug bcas 'gran zlas dben pa/_'khor sman 'dam gyi gnas brtan bcu drug rgyal chen bzhi bcas thog tshad re/_logs bris sogs khyad par 'phags pa/_steng du zangs gser gyi gany+dzi ra bcas/_rje bla ma rang gi gzim chung gser khang gdong du lha khang dang rten gsum mang du bzhugs kyang nges tig ma shes/_chos sde chen po 'di las gyes pa'i phyogs mtha'i dgon lag rnams su'ang rten gsum dang bshad sgrub kyi sde gsar bzhengs la mthun sbyor bcas snga phyi lo ngo bcu bzhi'i ring kaHthog pa'i bstan srid kyi 'gan bzhes gnang zhing*/_kun gzigs si tu'i mchog sprul rdzogs chen lnga pa rin po che thub bstan chos kyi rdo rjes ngos 'dzin gnang ba rtsad gcod khri 'don mnga' gsol dang*/_rmog rtsa sprul pa'i sku/_rje dbon mchog sprul/_dri med zhing skyong gi yang srid sogs rje nyid nas ngos 'dzin dang khrir bkod gnang nas smin grol gdams zab rgya mtsho lta bus lung rtogs chos kyi mdzod chen gnyer du gtad par mdzad/_mdor na sku tshe zhi bar gshegs kyi bar du dngos dang brgyud nas gzigs skyong yang yang gnang bas kaHthog pa'i bstan pa la gcig tu bka' drin che/_ru dam rdzogs chen pa'i gtsug lag mes 'jig skabs nyams gso'i cha rkyen ci rigs dang*/_gu ru mtshan brgyad gtso bor bzhugs pa'i rnam thar pad+ma bka' thang gi bkod pa thang shar dgu la bzang gos kyi gong sham can dang rol sil sogs gtan 'jog mang du gnang*/_zhe chen du rgyal tshab rin po ches mi pham gsung skor/_de rjes kong sprul dang rje dbon dge legs rgya mtsho zung nas rgyal tshab gsung 'bum bcas spar du bskrun par dbu 'don mthun rkyen dang zhal 'debs yang yang gnang*/_bshad grwa gsar 'dzugs la bslab ston dang*/_rgyal tshab rin po che'i mchog sprul ngos bzung nas chos kyi khri la bkod pa sogs chos sde 'dir bka' drin rgya cher gnang*/_gter chen mchog gyur gling pa'i gdan sa gnas brtan dgon du ri nang dpon khag la ched du bka' chab dang 'brel bshad grwa nyi shu rtsa lnga gsar 'dzugs la kaHthog mkhan po tshul khrims nyi ma dang mkhas dbang khang dmar rin chen sogs snga rjes ched btang gzhung chen rtsa 'grel gyi phyag dpe gnang ba sogs gzigs skyong mthil phyin pa/_mchog sprul rin po che ngos 'dzin khrir bkod dang smin grol gdams zab rgya cher bstsal/_de bzhin rtsi ke'i gdan sa la'ang thugs bskyed cher gnang ba sogs chos brgyud 'di 'dzin pa rnams rje mkhyen brtse sku gong 'og gi bka' drin gyis ngal 'tsho ba kho na'o/__/bka' brgyud phyogs sde dge phyi 'brog dang nang chen khul gyi dgon sde che phra phal cher la'ang bshad sgrub gsar 'dzugs kyi mthun rkyen zhal 'debs dang mkhan po btang ba sogs mang du mdzad/_chos rgyal sde dges sngon du sbyor 'jags gnang yang phyis nyams chag gyur pa drwa sgang sgrub sde gsar du bzhengs nas sgrub grwa lnga bcu tham pa ji srid bstan pa gnas kyi bar du bzhugs pa'i phogs thebs 'bri brgya lhag dang dngul rdil tshad sum cu skor gyi rten rtsa dang*/_gsung ngag rin po che lam 'bras kyi nyams bzhes gtso bor gyur pa'i dpal ldan sa skya'i snyan brgyud tshad ma bzhi ldan nyams su len pa'i sgrub sde khyad 'phags/_rdzong sar du 'jam dbyangs mkhyen brtse'i dbang pos bod khams bstan 'gror phan bde'i btsas su dpal bsam yas kyi gtsug lag khang gnyis pa'i rnam thar bzhengs pa'i dgongs bzhed bzhin kun gzigs blo gros mtha' yas kyis sa mig ched btsal gnang ba'i khams kyi bye ma thang rigs gsum sprul pa'i lha khang thub bstan bshad sgrub dar rgyas gling du blo gsal dge 'dun lnga bcu tham par gsol phogs mchod thebs rgyas 'dang gi rten rtsa sbyor 'jags dang*/_de dag bzhugs shag mdo sbug_/mchod khang re re bzhin thub dbang gnas brtan bcu drug rgyal chen ha shang bcas kyi snang brnyan brag ri'i yul bkod mdzes pa mchod ting bdun tshar re bcas/_dge 'dun pa rnams kun spyod gtsang la dag pa 'dul ba dang mthun pa'i phyag bzhes lhur len pas thos bsam gyi bya bas dus 'da' ba'i bca' bsgrigs bcas nyin bzhin snga dro rgyun chags gsum pa dang*/_dgong mo gtor bsngo bsdus tsam re/_rgyal ba'i dus chen bzhi dang*/_gsar rnying ris med pa'i bstan 'dzin skyes chen gtso che ba rnams kyi sku mchod du dgong mor phyi nas snang gsal gyi phreng ba bcas gling mchod 'bul ba'i srol bzang ngo mtshar dang ba 'dren pa'i rgyun btsugs pa la/_mkhan thog dang po kun gzigs si tu rin po che'i bka' ltar mkhas btsun bzang po'i yon tan gyis mdzes pa'i mkhan chen gzhan phan byams pa'i go cha ched du gdan grangs nas lo gsum bzhugs ring 'dul mngon/_dbu ma rigs tshogs/_bzhi brgya pa dang 'jug pa/_byams chos lnga dang spyod 'jug bcas gzhung chen rnams rgya 'grel ltar 'chad pa'i rgyun btsugs shing*/_mkhan chen bla ma mchog gi phrin las ches cher rgyas par gyur/_rim gyis de dag gi steng du tshad ma rnam 'grel/_rigs gter sogs dang*/_mkhan chen 'jam dbyangs rgyal mtshan dang lhan rgyas/_kyis kun mkhyen go rams pa bsod nams seng ge'i gzhung bshad mkhas dbang de'i bzhed srol ltar 'chad par mdzad la/_dbus gtsang*/_'brug yul/_mdo khams shar lho'i sa rnying bka' dge gtsor gyur ris med pa'i dge 'dun brgya phrag lhag bzhugs nang nas gzhung de dag 'chad spel nus pa'i sde snod 'dzin pa mang zhig thon pa sogs shin tu 'phel rgyas su gyur par brten/_mdo khams stod smad kyi chos sde che phra mang por bshad grwa rgyun 'dzugs 'phel rgyas kyis khams dbus kun tu bshad pa'i sde rgya cher 'phel ba'i bdag rkyen du gyur/_phyis gnas der gtsug lag khang ches che ba gsar bskrun gyi rten gtso mgon po ma pham pa'i snang brnyan thog tshad lnga pa gser zangs las grub pa phra rgyan dang bzo khyad kyi bkod pa 'gran zlas dben pa'i nang gzhug ring bsrel rnam bzhis phyur bur bkang ba'i byin ldan seng khri rgyab yol rgyan drug bcas/_logs ris su gsar rnying sdom gsum bla brgyud dang gangs can bstan pa'i srol 'byed nyer lnga/_yi dam dang chos skyong bcas bris bkod phun sum tshogs pa/_bzang gos kyi gnam rgyan dang ka 'phan/_steng du gser zangs kyi gany+dzi ra/_sku gong ma'i dgongs bzhed rdzong sar dbu rtse'i lha khang zhabs mar rten gtso gser zangs las grub pa'i 'jam pa'i dbyangs kyi sku bzhugs khri rgyab yol phra rgyan bzo bkod phun sum tshogs pa/_'khor gu ru rgya gar ma/_jo bo rje/_gong ma rnam lnga/_ngor chen bcas gser zangs las shin tu byon legs/_so sor bzhugs khri rgyab yol rin po che sna tshogs kyi phra rgyan/_gzhan yang gnas bcu/_sgrol ma nyer gcig sogs sku brnyan grangs mang*/_gsung rten rgyal bka' rin po che/_bstan bcos 'gyur ro 'tshal bcas/_thugs rten zangs gser gyi dus 'khor ye shes mchod rten thog tshad bzo bkod phra rgyan sogs phun sum tshogs pa/_chos skyong rten bris sku'i cho ga man ngag bzhin gzhung mthun gnang ba'i mgon po lcam dral thang chen thog tshad bcas kyis mtshon rten gsum grangs mang gi lha khang de'i ka ba bzhugs khri'i drwa mig shing lo pa tra bya 'brug sogs shing brkos shin tu sgros gtsang la gser ris tshon dbyes ldan pa/_bzang gos gser ma shas che ba'i gnam rgyan ka 'phan bcas/_phyis de dang 'dabs 'byor ba'i gzim chung shar nub dbus gsum bkod mdzes thog rtsag bzhi pa gsar bzhengs che legs spus dag bcas/_bkra shis 'chi med grub pa'i dga' tshal gyi gzim chung dbang khang du 'phags ma'i snying thig gi gtso bo dzi k+ShiM dang*/_dkyil 'khor lha dang rig 'dzin rnam gsum gyi sku brnyan gser zangs/_dzi k+ShiM gyi dpal dus kyi 'khor lo mda' tshad/_gser zangs kyi sgrol ma nyer gcig_/bde gshegs so lnga/_gsang bde 'jigs gsum kye rdor sogs yi dam rigs/_mgon po phyag bzhi drug sogs chos skyong rigs bcas li sku shas che ba/_drwa mig rnams shing brkos gzab spros/_logs gcig tu rgya bzos sku khang sgros gtsang du gshin rje dgra nag gi li sku khru tshad lhag_/sangs rgyas 'od srung li sku khyad 'phags/_ston pa'i sku shar li/_ston pa dang sgrol ma'i sku gter byon/_sangs gling gter byon gu ru'i sku tshab/_nA ro mkha' spyod dang 'jigs byed bcas so sor gser dngul bkra ba'i gwa'u re bcas/_phag gru'i sku dang*/_tshong dpon dge legs su grags pa'i rje'i sku brnyan/_smin gling gter chen rin po che'i sku dzi k+ShiM sogs/_rdo rje 'chang*/_tshe dpag med/_sa ra ha/_bi rU pa/_gu ru he ru ka'i chas sogs sku brnyan sna tshogs bzhugs pa'i drwa mig gis mtshon rten gsum shin tu mang bar bzhugs/_de'i g.yas zur du gzim chung gsar pa mchod khang gnyis dang tshom chen bcas thog so gsum pa'i mchod khang shar mar rten gtso thub dbang sku ta ming li ma che legs la/_'khor gnas bcu gser zangs khru tshad/_rgyal bka' rin po che sde spar mtshal shog gdong dar glegs shing thag shin tu spus ldan/_mchod khang nub mar sku rten ci rigs dang*/_sher phyin stong phrag brgya pa/_gdams ngag rin po che'i mdzod/_sgrub thabs kun btus/_rgyud sde kun btus/_dwags po/_rong zom pa/_rje tsong kha pa/_kun mkhyen go rams pa/_zhe chen rgyal tshab/_'jam mgon mi pham bcas kyi gsung 'bum/_sa bzang gi ka lA pa/_si tu'i tsan+d+ra pa/_dge paN dbyangs can ma bcas kyi Ti kA_/khams bod mkhas pa'i snyan 'grel/_rtsis skar nag_/mngon brjod/_sdeb sbyor sogs cha tshang ba/_gser dngul bkra ma'i sku gdung cha brgyad/_sman 'dam gyi gter chen mchog gling 'dra zhal/_sku gong 'og gi sger gyi bka' srung gnyan chen thang lha'i rten/_de dag la bzang gos kyi gnam rgyan/_gzim khang steng du gnas chen byin 'bebs dang 'dzugs chog ldan pa'i zangs gser gyi rgyal mtshan che legs/_bod khams bkra shis 'byung ba'i gnas rong rme dkar mo stag tshang du mkhyen kong mchog gsum gyi zab gter rtsa gsum gtso che ba'i rigs dang zhar byung sgrub brgyud shing rta chen po brgyad la 'brel 'jog nyams bzhes lo lnga re'i yun la gnang ba'i sgrub grwa dpon slob dgu gsar 'dzugs la sgrub phogs dang 'brel ba'i sgrub khang sngar yod rgya bskyed tshogs khang che legs/_sgrub pa so sor gshag mig re/_steng du gzim chung*/_sgo khyams bcas/_logs su mgon khang dang thab tshang bcas par rten gsum mchod chas yo byad rigs dang sgrub pa'i nyams bzhes phyag dpes mtshon nyer spyad rigs gang dgos tshang ba/_sgrub g.yog bcas mchod thebs dang gsol phogs rgyas 'dang sbyor 'jags gnang*/_khyung stag gnas phug tu sman 'dam gyi gu ru snang srid zil gnon mda' tshad/_gu ru bde ba chen po'i sku khru gang ba bcas tshon rtsi dang nang gzhug khyad 'phags byin can/_dbu rtse lha khang gi ri rtser lha bsangs khang du sku rten gu ru khyad par 'phags pa'i rig 'dzin mda' tshad ma/_'khor du ge sar/_thang lha/_spom ra/_zil khrom/_tshe ring mched lnga/_brtan ma bcu gnyis bcas sman 'dam sgros gtsang tshon rtsi nang gzungs ldan pa bcas 'di rigs rje bla ma mchog nas gsar bzhengs gnang pa 'ba' zhig dang*/_gzhan yang shar mi nyag nas byang re kong tshun gyi gsar rnying grub mtha' ris med kyi chos sde mang por lha khang gsar bzhengs dang nyams gso'i rigs la skabs babs kyi bslab ston dang rten gsum mchod chas yo byad sogs ci rigs gtan 'jags dang zhal 'debs kyi bdag rkyen gnang ba ni smos kyis mi ldang*/_tha na grwa shag dkyus mar sku dang mchod stegs tsam gsar bzhengs la'ang legs so'i dbugs dbyung*/_tshon rtsi sogs kyi mthun rkyen/_gzungs 'bul rab gnas gser chab sogs shugs 'byung du gnang zhing snyan shal dang sbrags nas bstsal bas dad spro'i snang ba gong 'phel du 'gyur ba'i phyag bzhes rgyun ldan du gnang*/_gsung rten skor la/_rje mkhyen brtse gong ma'i gsung mdzod chen lnga dang rgyud sde sgrub btus bcas kyi khongs su ma bzhugs pa thor bu'i rigs thugs rtsol chen pos zhib sdud gnang ba'i glegs bam che ba bcu gsum lhag mkhas dbang bla ma bkra 'phel nas ljags rtsom dkar chag bcas/_mkha' spyod be bum rtsa ba yan lag bcas pod gsum/_dgongs gter rtsa gsum 'od gsal snying thig dang*/_yang gter mkha' 'gro gsang 'dus/_'chi med 'phags ma'i snying thig_/snyan brgyud gnad tig phur pa/_lce btsun snying thig bcas gter gzhung dang so so'i gsal byed bcas/_'jam mgon mi pham rin po che'i gsung skor bstod tshogs/_gtam tshogs/_zhal gdams/_sgrub thabs thor bu'i rigs/_rdzogs chen skor/_tshig bdun gsol 'debs rnam bshad/_smon lam shis brjod bcas pod gnyis lhag_/rdo grub bstan nyi'i gsung rje mkhyen brtse'i rnam thar/_mkhan kun dpal gsung chos rje dpal sprul rin po che'i rnam thar/_'dul ba mdo rtsa sogs gzhung gi rtsa ba gong mas spar brko bzhed gnang ba du ma dang*/_rgyud brtag gnyis/_phur pa rtsa dum/_dri med bshags rgyud/_chos spyod skor gsol 'debs dang smon lam rigs 'ga' bcas/_gnubs chen gsung spyi mdo dgongs 'dus kyi dka' 'grel dang*/_gsang snying 'grel pa bka' 'chims phu ma sogs gsar rnying gi gzhung rgyun dkon rigs du ma bcas pod nyer lnga long nges kyi shing spar rje nyid nas 'gro song phyag bstar gyis bzhengs shing*/_mdo 'grel dang gsang snying 'grel pa kaHthog_/mi pham skor lhun grub steng du bka' 'bum sdebs tshang ba'i ched du 'jog par mdzad pa las gzhan tshang ma rdzong sar du bzhugs/_'byor ldan gzhan la bskul nas bzhengs pa'i mdo ting 'dzin rgyal po/_sher phyin g.yag TI ka rong ston dbu ma 'jug 'grel sogs spar du bkod/_gzhan yang rin chen gter mdzod kyi dkyil thang dang dbang tsaka sogs gsar bzhengs la spar gzhi cha tshang phyag bstar gyis dag ther dang spar yon dngos rdzas rgya cher stsol bar mdzad/_gser bris kyi rgyud bcu bdun tshang ba pod bzhi/_lam rim ye shes snying po rtsa 'grel pod kyis gtsos gsar rnying grub mtha' ris med kyi gzhung gdams man ngag gnad che dang dpe rgyun dkon pa'i rigs gtsor gyur glegs bam nyis brgya lhag_/rgyal bka' rin po che mtshal spar cha gsum/_snag spar cha gnyis/_bstan 'gyur cha gcig rnams gtsor gyur dbus gtsang mdo khams a mdo tshun nas gnad gal gang che'i gsar rnying mkhas grub mang po'i gsung 'bum dang mdo sngags gzhung 'grel spar du bzhugs rigs ched btab gnang ba'i pusta kaHgcig stong lnga brgya lhag gsar du bzhengs/_de dag la glegs shing thag chab mgo gdong dar na bza' bcas spus dag dper 'os pa 'ba' zhig mdzad/_thugs rten du gong gsal dus 'khor ye shes mchod rten dang*/_kaHthog tu phyi dbyibs khang bu brtsegs pa'i mchod rten gyi rnam pa thub chen khang*/_zil rgyud rdo kho mar byang chub mchod rten shin tu che legs/_khams bye slob grwa'i phyi nas khang brtsegs mchod rten gyis 'khor bar bskor ba dang*/_rje nyid nas phyag bstar dang gzhan la bskul ba sogs kyis dri med rnam gnyis lag len ldan pa'i mchod rten che phra mang zhig bskrun par mdzad/_dus dang rgyun gyi mchod pa'ang gong gsal rten gsum rigs gtso bor bzhugs pa'i lha khang rnams su mchod pa'i yo byad de dag kyang rnam grangs tsam bgrang rgyu'i gang byung gis chog pa ma yin par bris 'bur thig rtsa sogs nyams 'og chud pa'i thugs bzhed gang yod bzo las rnams la zhib par bkod 'doms dang*/_skabs su gzigs skor gyi gzi brjid thon pa rnams la byas rjes gsol ras spam mtho ba re gnang srol bcas kyis rten gsum rigs khyad 'phags kun gyi dper 'os ba sha stag bzhugs so/__/bris thang skor/_ston pa'i skyes rabs dpag bsam 'khri shing thang shar nyer gcig_/chos rgyal bdun rigs ldan nyer lnga phyed dum skyong*/_bu dol gnyis dang rang byung zhabs/_si tu d+harma ka ra sogs bzhugs pa'i zhal thang so bdun pa/_dpal spungs 'jam mgon chos 'byung phyag bkod ltar/_rgyan drug mchog gnyis/_grub brgyad/_gu ru mtshan brgyad/_sgrol ma nyer gcig dang 'jigs pa brgyad skyobs sogs kyi grwa thang dgu tshar dang lnga tshar sna tshogs/_mkhyen brtse'i dbang po'i 'khrungs rabs thang shar bcu dgu/_mkhyen gter yongs rdzogs thang shar so lnga sogs sangs rgyas byang sems rtsa gsum chos skyong bcas kyi zhal thang che chung sna tshogs sum brgyar nye ba bzang gos gser ma'i gong gsham dang zhal khebs/_dngul dang lcags gser shas che'i bsgril tog bcas spus nom ldan pa sha stag_/rin gter dbang tsaka zhib rgyas nyis stong nyis brgyar nye ba dang*/_dkyil thang sum brgya lnga bcu lhag gtsor gyur bka' gter dbang tsaka dang dkyil 'khor rigs kyang gsar bzhengs mang*/_mchod pa spyi dang bye brag sbos mar me sogs kyi rgyun thebs sbyor 'jags/_khyad par rdzong sar dgon du rgyal ba lha las babs pa'i dus chen dang*/_zhar du brtse chen kun dga' snying po/_mkhas grub khyung po rnal 'byor sogs kyi sku mchod dang khel bar 'khon lugs rdo rje phur pa'i sgrub mchod rtsa 'cham dang*/_smad las bsgral 'cham sogs spros bcas phyag bzhes can rgyun 'dzugs mdzad pa'i sgrub rten mchod rdzas yo byad 'cham chas sogs gzab rgyas dngos gtsang dang*/_tshogs thebs rgyas 'dang sbyor 'jags/_'di'i tshogs dbur skabs su rje nyid dngos phebs kyis phyag bzhes bsgrigs lam gang cir zhib gzigs gnang*/_gter lung khang dmar dgon du smin lugs rdor sems kyi sgrub thebs rgyun sbyor gnang*/_snga rjes dus skabs ci rigs par bsnyen sgrub gnas 'brel bstan rim sogs la rje nyid kyi phyag bstar dang*/_dad sbyin gyis ched du gsol ba btab pa bcas bka' gter sgrub chen phal cher sman sgrub dang 'brel ba lan grangs sum cur nye ba spros pa rgyas bsdus ci rigs gnang ba rang gis shes tshor rags pa tsam yin cing*/_sku tshe'i stod du gnang rigs nges tig 'god ma shes/_der ma zad yar klung shel brag_/'phags yul rdo rje gdan/_bal yul yang le shod rnams su bdud rtsi gcig sgrub nyin gang re gnang ba'ang gnas dus kyi khyad par gzhan gyi tshogs sgrub las dgos don che bar nges shing*/_sprel lo sprel zla nam khel la tshogs 'bum ther dang 'brel bar gu ru'i sku tshab brgya phrag re gta' spel phyag bstar dang*/_gzhan tshogs mchod stong nas khri 'bum bar/_brgya phrag yan dang 'brel bar mkha' 'gro'i me mchod sogs bar med du gtong bar mdzad/_khyad par mdo khams nas dbus gtsang 'bras ljongs bar gyi gnas chen gnas phran du mar phebs nas bsnyen sgrub/_mchod 'bul/_khrus gsol rab gnas/_tshogs bskang me mchod/_bsang brngan dang lha srin dam bsgrags sogs rgyas bsdus ci rigs tshogs dang mchod pa'i dngos po phun sum tshogs pa phyag bstar dang*/_chos 'khor rnam gsum/_rgya gar rdo rje gdan/_wA rA Na sI/_mnyan yod/_bal yul mchod rten rnam gsum gtso bor gyur pa'i gnas chen khag la nyer spyod kyi mchod pa khri tshar can lan mang*/_rten rnams la zhal gser dang na bza' rgyas 'bul/_maN[1$0000270]Da[1$0000300]la rten snyan shal sogs rgyas par gnang tshul rgyas pa lam yig las gsal zhing*/_rgyun du yar mar tshes bcur tshogs skong rgyas pa chags med/_rgyal ba'i dus chen khag bzhi/_nya stong brgyad gsum/_gsar rnying gi skyes chen dam pa dang*/_rje nyid kyi rigs bdag bla ma dam pa rnams kyi sku mchod du mchod sprin gzab rgyas dang 'brel gsung chog skabs su gang babs/_dmigs bsal du rje gong ma'i sku mchod mkha' 'gro gsang 'dus sgrub mchod nyin bdun ring shin tu rgyas pa/_rje gong ma'i phyag rgyun lo bstar sprel zla'i tshes bcur bla ma gsang 'dus kyi tshogs brgya/_dgung gsar tshes gcig la chos rgyal khri srong gi sku mchod nyang gter phrin sgrub rin chen sgron me'i tshogs mchod bcas/_gzim chung phyi nang du mchod me rgyun 'bar/_yon chab shin tu grangs mang*/_zhal zas kyi phreng ba sogs/_tha na mchod pa'i zhal zas dang tshogs mchod mtho tshad las chung du mi gtong bar yo byad thams cad gtsang dag gang rgyas lo zla bstar chags su tshogs bsags kyi sgo mtha' yas pa la gcig tu brtson par mdzad/_yul dam pa rnams la bsnyen bkur mdzad pa'ang zab chos kyi bdud rtsi bzhes pa'i bla ma dang dge ba'i bshes gnyen las bka' chos gsan skabs thog mtha' bar gsum du maN[1$0000270]Da[1$0000300]la brtan bzhugs/_gtang rag la rten gsum rtsa ches thog drangs/_dngos rdzas nyer spyad mkho dgu gtsang dag gi rigs rgya gang che rtag par 'bul bar mdzad pa dang*/_rje nyid kyi mdun dbang chos gsan bzhes kyi bla chen/_mkhan sprul/_'khos chung gi chos pa yan mchog phal su la'ang 'os bstun gyi dngos 'bul/_'tsho ba'i mthun rkyen/_chos gos lhung bzed/_rdor dril/_sgrub rten gang dgos lhug par bstsal shing*/_gdan sa chen po'i bshad sgrub kyi sde dang ris med pa'i chos sde khag la bsnyen bkur dang 'brel bar rgyal bka' rin po che dag sgrog_/mdo rgyud kyi gzungs sngags phan yon dang dgos pa che ba'i rigs khri 'bum nas dung phyur kha yar bar/_bsngo smon sogs la sku yon phyag rdzas gtos che ba lo bstar gnang sbyin dang skabs su babs pa'i bslab ston sogs bstsal bas sngon byon gong ma'i phyag srol khyad par can rnams ma nyams gong 'phel du gnang bas rgyal bstan bshad sgrub kyi chos rgyun dar rgyas 'phel ba'i bka' drin rlabs cher bskyangs/_khyad par lam yig las 'byung ba'i bod phyogs lha ldan smon lam chen mor phyag 'gyed dang*/_rwa sgreng nas bzung gtsang po lho byang lho brag khul sa skya gong bar phebs lam du khel ba'i sa dge kar rnying gi dgon sde che phra tshang mar mang ja dang phyag 'gyed kyi bsnyen bkur rnam dag phyag len du bstar bar mdzad/_phal pa'i skye 'gro mtha' dag la dngos dang brgyud nas phan bde'i rgyur 'gyur ba'ang sku gong mar bod khams bde ba'i lung don dang mthun par skyabs rje si tu thams cad mkhyen pa'i dgongs bzhed yin ces mdo khams stod smad kun tu thugs rje chen po'i ma Ni dung sgrub tshugs na dus kyi rgud pa zhi zhing legs tshogs rgyas pa'i tshul phyogs kun tu bka' chab gnang ba ltar phyogs so sor dge ba'i lam srol sngar med gsar tshugs 'brel tshad don ldan du gyur pa dang*/_gzhan yang sa bdag snying gter/_klu bum/_nor bum sogs brgya phrag mang po dus dang dus su bca' sgrub kyi yul tsho so sor ched du bkram par mdzad cing*/_klu sman tshad ldan bsdu sgrub gnang ba gnam char dkon pa'i tshe mtsho dang chu mig la bkram zhing char sgrub kyang nan du mdzad/_der ma zad sman gyi bsdu sbyor tshad ldan cha tshang gnang ba mkho dgos can gyi nad pa la dge sman rgyun mi chad pa dang*/_khyad par du lag len dka' zhing 'gro song che ba sogs kun gyi yid smon tsam du gyur pa'i dngul chu btso bkru chen mo shin tu phon che ba phyag len gnang nas rin chen ril nag chen mo/_yang zab/_mang sbyor/_shel dkar mchod rten/_rat+na bsam 'phel/_dbang ril nyer lnga/_zla shel chen mo bcas sbyor tshad sogs gzhung mthun bsdu sgrub tshad ldan gnang ba dang*/_gi waM/_dbang ril/_kha che/_bse ru sogs rin thang che ba'i rigs/_khyad par dngul chu btso bkru ldan pa'i zla shel chen mo shin tu phon mang yang yang bsdu sgrub mdzad pas phan stobs kyang lhag par che bas kun gyi srog 'tsho lta bur gyur pa rnams dang*/_gzhan yang sman raka gtor gsum/_g.yang rdzas/_glud rdzas/_sbyin sreg gi rdzas sogs nyer mkho'i rigs zhu mkhan su byung la phangs med du gnang*/_bka' las kyang 'di'i rigs gzhan la phan du re nas lag len byas pa yin pas de ltar phan thogs re byung na legs shing*/_de min zhu rten sogs gtan nas mi dgos pa yang yang phebs pa ltar dngos brgyud gang sa nas bzhes srol med/_rtag par zhal mjal skyabs zhus bsngo rten rigs la'ang so sor dam rdzas sogs ji ltar 'dod pa dang zang zing gi gsol ras gya nom pas mchog phal yongs kyi re ba skong ba'i phrin las la skyo ngal dang res 'jog med cing*/_dbang chos rgya cher 'brel ba nas chos 'brel thob pa yan chad rtag par thugs rjes bzung ste dngos shugs nas chos la bskul bar mdzad cing*/_shin tu dman pa dbul phongs dbang po yan lag skyon can dang bya khyi yan la nad 'tsho'i sman dang zas gos sogs kyis lus sems la phan par mdzad pa dang*/_spro ba bskyed pa'i gsung 'phros khyad par can gyis dbugs dbyung bas mtshon bsdu ba'i dngos po rnam pa bzhis yid can mgu ba bskyed pa sogs mdor na nam mkha' mdzod kyi gtong ba'i sgo 'phar gtan pa med par phye bas rlabs chen bsod nams kyi tshogs bsags pa'i dpal gyis srid zhi'i rgud pa gcig car du bcom par mdzad pa'ang skyes rabs las/_zla bas kun dga' nyi mas rab gsal dang*/_/me yis tsha ba rlung gis mgyogs pa dang*/_/snying rjes nam ba skye bo che rnams kyis/_/gzhan la phan pa lhan skyes rang bzhin yin/_/zhes gsungs pa ltar ro/__/bdun pa sprul pa dbyings su bsdus pa'i tshul 'phros don dang bcas pa ni/_de'ang rje bla ma nyid dmigs pa med pa'i thugs rje'i bdag nyid bstan dang 'gro ba'i dpung gnyen chen por gyur pa gang gis byang chub kyi spyod pa rgya mtsho lta bu bdag gir bzhes te ris med pa'i bstan pa dang mchog dman bar ma'i 'gro ba mtha' dag la phan bde'i phrin las rgya cher skyong bzhin pa nas/_dgung grangs re gsum pa shing lug zla ba bzhi pa'i tshes skor 'dus pa ha cang mi mang ba zhig la bka' chos grub rjes bslab bya bsdus tsam zhig gnang ba'i zhor du/_deng sang rang gzhan su yin rung chos rnam dag byed mkhan ni nyin skar las kyang dkon/_thams cad kyi rgyud lha min gyis brlams pas dge bcu'i bca' khrims dang 'brel ba'i gna' srol bzang po la skyon du brtsi zhing ya rabs chos ldan gyi rigs rnams dmangs su 'bebs/_rang gzhan phung la sbyor byed mtha' ma'i g.yo thabs kyi rjes su 'brang*/_las 'bras thams cad khyad du gsod cing bu brgyud pha ma la yid mi ches/_bla dgon rnams bstan pa'i snying po nyan bshad sgom sgrub ming tsam du gyur nas pho tshod sgo nas dpung dang longs spyod kyis bstan pa 'dzin par rloms/_blun po rnams lta ci mkhas par rloms pa dag gis kyang phyogs lhung chos spong gi rgyab rten du lung dang rigs pa'i rtsal ci yod kyis rgyal bstan rnyogs par byed cing ltos bcas log lam du khrid/_kun gyis bstan don la bsnyad pa'i tshong dang bun skyed sogs g.yo sgyu kho na la brtson/_gson gshin gyi dkor nag hab thob byed/_chang dang tha mag shwa rgyan bshas tshong sogs khyim pa sun 'byin sha stag las srung sdom rnams 'phong gi rdo bzhin du 'dor/_tha na sangs rgyas kyi rjes 'jug rtags kyi che bar gsungs pa gzan sham tsam zhig legs par gyon pa'ang nyung zhing*/_phal cher khyim pa'i chas dang gri mtshon la gtsigs su byed pa sogs dngos brgyud nas bstan pa 'dzin pa phar zhog myur du nyams pa'i thabs la brtson/_mdor na kun gyis mi dge ba 'ba' zhig la spyad pa'i dbang gis nad mug mtshon 'khrugs sogs shin tu bzod par dka' ba'i sdug bsngal mthong chos su byung dang 'byung bzhin pa ni rgyu 'bras mi bslu ba'i chos nyid lags kyang*/_da dung yi chad mchog gsum la byed cing rgyab brten gdug 'dre la bcol ba sogs snyigs ma'i spyod tshul 'di la gang nas bsams kyang shin tu yid skyo ba'i gnas las mi 'dug_/kho bos khyed rnams la chos phran tshegs ston pa'i byas yus bgrang ba gtan nas min kyang ban rgan snying rlung ldang ba'i bcos gtam chal chol du shor ba red ces spyan chab kyang bsil bar mdzad/_de nas mi ring bar rje nyid kyi dgongs nyams sogs 'tshubs par bcad rgya dam bzhugs dang gnas 'brel phebs rgyu gnad du gang che sku tshab rin po che'i mdun brtag bsgril zhus don/_spros med sku 'khor hrag bsdus gnas 'brel phebs na legs babs dgon yul rnams la bka' bsgrags gnang ba'ang*/_don du gsang ba bsrungs te sku rten 'dis gdul bar bya ba phrin las dus las yol ba med par rgya cher skyong ba'i mdzad pa mthar phyin pa nyid rgyu dang*/_'byung 'gyur dus 'khrug gi nyen kha tshab che bzlog tu med pa mngon sum du mkhyen pa'i rkyen gyis bskul bar dngos su grub mod/_'on kyang 'phral du gdan sar zhabs bkod thub pa'i zhal bzhes bcas thams cad la zhal mjal tshe dbang smon lam dang myong grol rigs zang zing gi gsol ras sogs kyis yid tshim par mdzad/_gtsug lag dang mgon khang khag la phebs nas mchod 'bul snyan shal phrin bcol brtan bzhugs smon lam shis brjod bcas rgyas par gnang*/_dgon yul bshad sgrub kyi sde bcas la skabs su babs pa'i bslab bya sgo kun nas so sor bstsal te hor zla drug pa sprel zla'i tshes bcu rgyas par btang nas tshes nyer gsum la sku 'khor shin tu nyung bsdus chibs btegs/_gangs ri'i ljongs tsam na mngon par mtho ba'i sgrub gnas kyi rgyal po pad+ma shel phug mdun bzhugs sgar btab nas thugs sgrub bsam lhun gyi tshogs brgya mdzad/_dad 'dus mang por zhal mjal sogs gnang*/_de nas rim par yar mar lam lcogs bcas bzhugs zhag phal cher gnas ri re dang khel ba mdzad de skabs su bcag mal dang bcas so sor tshogs bskang dang me mchod/_lha bsang*/_ri khrus/_bka' nan rab brjid dang byin 'bebs sogs gang la gang 'os dang*/_zhal mjal ba'i skye 'gro rnams kyi re ba skong bzhin khams nas rim par byang nag chu kha dang rwa sgreng brgyud de bod kyi chos 'khor lte ba lha sa/_bsam yas/_khra 'brug sogs lho gnas brgyud/_gtsang stod sa skya nas sbas gnas 'bras mo ljongs/_rim par rdo rje gdan sogs 'phags yul du thengs gnyis/_bal yul du thengs gcig phebs pa'i lam 'khod gnas rten khag dang gsar rnying dgon sde mtha' dag la mchod 'bul bsnyen bkur gang rgyas/_khyad par du bgrang las 'das pa'i skye bo mchog phal yongs la mtshan dpe'i dkyil 'khor gsal bar bstan nas skal ba dang 'tsham pa'i gsung gi bdud rtsi rgya cher bstsal zhing*/_dmigs pa med pa'i thugs rje chen pos kun la khyab pa'i 'brel tshad don ldan gyi phrin las rgya che dang bcas re zhig 'bras ljongs su bzhugs te/_rtsa gsum rig 'dzin srog sgrub kyi bdud rtsi sman sgrub zhig kyang gnang*/_bkra shis sdings du gnas chen byin 'bebs dang gzhi bdag rten bkol/_gtsug lag khang dang pho brang la rab tu gnas pa'i cho ga sogs ji ltar gsol ba btab pa ltar rgyas par gnang*/_sgang thog dang*/_lha sde'i gtso bo pad+ma yang rtse/_rdor gling khul rnams su dad 'dus rnams kyi zhus ngor bka' chos rigs nar mar gsungs/_rgya gar dang yo rob kyi mi sna mang por chos dang 'brel ba'i gsung gis dngos brgyud nas gtan bde'i sa bon bskrun par mdzad/_'di skor rgyas par bkod 'os kyang lam yig las zur du gsal bas 'dir sa bon tsam gyis 'thus par byas pa dang*/_dgung grangs re drug phebs pa sa phag gnam lo gsar tshes skor nas sku khams cung 'khrugs/_tshes bco lnga'i nyin blo sbyong don bdun zhu mkhan byung bar dgyes bzhin gnang nas dus skabs 'di 'drar de ring cho 'phrul zla ba'i dus chen la zab chos 'di lta bu 'don rgyu byung ba bsod nams khyad par can bsags song zhes phebs/_de nas snyun rim ljir bzhes kyang khu nu ba/_'brug pa/_dbyin ci nang chos la dad pa sogs dad 'dus sna tshogs la klong snying rtsa gsum/_mchog gter sgyu 'phrul bcas gsung bzhin/_kun gyi re 'dod skong thub zer ba dka' na'ang ched du re ltos mkhan 'di rnams la 'dod skong ci nus sgrub dgos tshul sogs phebs/_'di rnams gdul bya'i tha ma yin 'dug_/de ltar na gangs ljongs rgyal bstan ris su ma chad pa'i mnga' bdag chos kyi 'khor los bsgyur ba chen po thams cad mkhyen gzigs 'jam dbyangs mkhyen brtse'i dbang po zhes snyigs ma'i dus 'dir rgyal ba'i bstan pa la ston pa gnyis pa lta bu'i mdzad rjes can de dang rnam dbyer med pa'i thugs bskyed dang phrin las sgo kun nas skyong bar mdzad pa ni bdag cag gi dpal ldan bla ma 'di kho na tsam du nges pa bstod 'dod dang sgro btags tsam ma yin par rnam thar 'od zer brgya pa'i snang ba 'jig rten kun la thun mong du gyur pa'o/__/de lta bu'i bsam gyis mi khyab pa'i rnam thar 'gran zla dang bral ba'i phrin las thams cad mthar phyin nas/_sgyu 'phrul las/_ma rig smin mdzad 'dul ba'i phyir/_/byung nas mya ngan 'da' bar ston/_/ces dang*/_gser 'od dam pa'i mdo las/_gzhan yang rigs kyi bu de bzhin gshegs pa de mya ngan las 'da' bar bstan pa dang*/_sems can rnams de dkon pa dang 'phrad par dka' ba'i 'du shes dang*/_mya ngan dang sdug bsngal gyi 'du shes la sogs pa bskyed pas/_sangs rgyas bcom ldan 'das kyis gsungs pa'i mdo 'di dag myur du 'dzin pa dang*/_'chang ba dang*/_klog pa dang*/_kun chub par byed pa dang*/_gzhan dag la'ang rgya cher yang dag par ston pa la skur pa 'debs pa med par 'gyur bas/_de'i phyir de bzhin gshegs pa sku tshe thung bar bstan to/_/zhes sogs nas/_rigs kyi bu de lta bas na de bzhin gshegs pa rgyu mtshan dang rkyen de'i phyir 'jig rten na yun ring du mi bzhugs shing myur du mya ngan las 'da' bar mdzad pas de bzhin gshegs pa rnams ni thabs mkhas pa phun sum tshogs pa de lta bus sems can rnams yongs su smin par mdzad do/_/zhes de bzhin gshegs pa'i sku tshe'i tshad mtha' med pa'ang gdul bya 'dul ba'i thabs mkhas kyis mya ngan las 'da' tshul ston par gsungs pa bzhin/_rje bla ma dam pa 'di nyid kyang nges pa'i don du dus gsum gyi rgyal ba thams cad skyed pa'i yab du gyur pa bcom ldan 'das khyab bdag 'jam pa'i rdo rje nyid sum ldan rdo rje 'dzin pa'i rnam par 'phrul bas na rten 'dis bgres rgud med par ji srid bskal pa'i bar sogs su 'tsho zhing gzhes pa'ang don du 'gyur bar dgongs na bzhugs par nges kyang*/_gshegs bzhugs bgres rgud kyi rnam pa thams cad tshur mthong gdul bya'i snang ngor shar bas na snyigs ma'i skye bo rnams bsod nams dang skal ba dman pas de lta bu'i thugs rje 'jug pa'i yul du ma gyur cing*/_zhing khams gzhan dang gzhan du phrin las 'jug pa la don che bar gzigs te yun ring por mi bzhugs pa'i gsung 'phros/_snga ma snyun khams cung zad re 'khrugs skabs nas nged kyi nad 'di dpal spungs skyabs mgon bde gshegs kyi snyun khams dang gcig pa nyid 'dug ces lan mang gsungs zhing*/_nye char lo snga mar zhabs brtan phul skabs bka' gsal phebs pa'i don snying rags bsdus/_ngos rang thog mar 'jam mgon rin po ches ngos 'dzin gnang ba nas bzung bstan 'gror mdzad rjes gnang ba rnams dmigs bsal gyi rje mkhyen brtse'i dbang po'i phrin las kyi mjug skyong yin pa'i rgyu mtshan bcas gsungs 'phros/_rang lo re gsum nas sku tshab rin po cher brtag bsgril zhus don gnas 'brel bskyod rgyu byung ba mdo khams nas dbus gtsang 'phags bal bar gnas rten zhib mjal phyag bskor mchod 'bul dang*/_zhar byung skye 'gro mchog phal mang por dngos brgyud nas thar pa'i sa bon ci thebs kyi rnam dkar la 'bad pa rnams gtso bor rgyal bstan rin po che dar rgyas yun gnas dang*/_rang gzhan thams cad 'phral yun kun tu dge ba'i dmigs 'dun gang shes bgyis pa yin/_slar yang rgya gar du gnas bskor 'gro rgyu byung ba'ang rje mkhyen brtses bod phyogs gnas gzigs lan mang gnang yang rgya gar du phebs ma mdzad pa gus pa'i bgo skal yin rgyu'i de bzhin phyag mchod smon lam yid tshim pa zhus/_rnam kun 'brel tshad don ldan gyi smon 'dun la brtson bzhin pa sogs rang ngos nas legs byas kyi phyogs tsam ste/_de thams cad kyang rje bla ma dam pa gang gi phrin las kyi cha shas dang zab dgongs rdzogs pa'i thabs kho na yin par rloms pa ste/_spyir 'phags pa'i thugs bskyed dang phrin las mtha' dag rdzogs par so so'i skye bos sgrub ga la nus kyang*/_rang blo dang 'tsham pa'i bgo skal cha shas rigs ci ltar nus pa bsgrubs zin cing*/_rgya la khams su slebs rgyu 'dra yod dar na'ang sku cha shas gser dang gzungs 'bul lhag song ba de tsam byung na dang*/_bzang spyod smon lam 'bum ther gcig nges par 'grub na snyam pa las gzhan bsgrub dgos 'di lhag song snyam pa cher med pa ma zad/_grub zin rnams kyang rang gi bsod nams ni legs par bsags zin pas bdag tu 'dzin pa gang yang med/_da ni bgrang bya yang mtho tsam du son cing lhag par nad mnar shin tu lci ba dang*/_gnas dus kyi 'gyur ba sogs gang cir 'chi brod dang mi 'jigs pa'i gding tshad dang mi ldan mod/_skyes zin 'chi ba las ma 'das pas 'gyod kyang phan pa med pa der zad/_khyed rnam pas yun ring sdod dgos tshul gsungs na'ang skye 'chi la dbang thob zer ba shin tu dka' bas de bzhin khas len zhu nus kyi gding ni cung zad med pa rang blo rang la lkog tu ma gyur pa kho na lags/_'on kyang bla ma dkon mchog thugs rjes lo re zla shas tsam ma shi na rang ngos nas kyang nges par dga' bas/_de bzhin ring du 'tsho ba'i smon 'dun ci nus byed bzhin dang*/_zhabs brtan yang sngar nas lab zin pa ltar gtso bor bstan 'gro bde thabs su bsgrub rgyu nyid dgos gal che zhing phran gyi rkyen sel du'ang zhar byung don gyis 'gyur bas/_bsgrub 'os rnams brtag pa rim gyis gnang chog tshul gyi gsung zab zhib tu bstsal ba dang mthun par/_zla ba de'i tshes nyer gcig nas rje gong ma'i sku mchod mkha' 'gro gsang 'dus sgrub mchod kyi dbu bzhugs gnang ste tshes nyer lnga'i nyin tshogs dang mchod pa rgyas 'phar mkha' 'gro'i bstod bskul sogs cho ga shin tu rgyas par gnang ba'i phyi dro nas snyun khams cher 'khrugs tshul bstan pa na/_ngor pa thar rtse dang klu sdings rnams dbus bzhugs kyis sgrol ma g.yul mdos/_brgya bzhi/_bdud bzlog_/gsur dang chu gtor/_tshe lha rnam gsum mchod chog_/gnas chog_/sgrol chog_/chos skyong bskang gso/_rtsa gsum tshogs bskang brtan bzhugs bcas/_rgya ston bla mas gcod tshogs dang mdos glud rigs grangs mang*/_tshe sgrub sogs phul/_sprul sku bsod rgyal gtsos nang skor zhabs gras rnams nas mkha' 'gro'i tshogs bskang dang sun bzlog sogs zhabs brtan rigs mu mthud sgrub mus/_dbo zla'i yar tshes skor snyun khams cung zad dwangs tshul bstan/_ka sbug nas bdud 'joms rin po ches zhabs brtan ched phul byung bar slar skyes lan du'ang zhabs brtan phul/_tshes bcur tshogs bskang rgyas par gnang*/_'di skor nas bod du 'khrug zing rim par byung 'dug_/spyir bstan 'dzin skyes chen dam pa rnams dang lhag par rje 'di nyid kyi thugs kyi brnag pa mthar thug pa ni bstan 'gro'i don nyag gcig tu gyur pa bzhin/_snga rjes gsung 'phros su da skabs phyi'i rgyal khab rnams nang pa'i chos la dang len gyi so so'i skad yig tu bsgyur ba dang*/_chos tshogs 'dzugs pa sogs kyi gces spras byed skad mang po bshad 'dug pa rjes su yi rang gi yul du gyur cing*/_rgyal ba'i phrin las kyi 'jug pa bsam gyis mi khyab pas de ltar mi 'byung ba'i nges pa'ang ci yod de/_rang re bod 'di sprul pa'i chos rgyal lo paN rnams kyi thugs rjes mdo sngags bstan pa yongs rdzogs dar zhing rgyas pa da lta'ang sa bon ma nub tsam du gnas pa 'di la kun gyis rgyu mtshan shes pa'i gces spras kyis myur du nyams chag ma shor thabs kho na 'bad dgos shin tu gal che/_tha na bsam pa bzang po'i smon 'dun re byas na'ang dgos pa che tshul yang yang phebs shing*/_rje nyid nas gsung chog rigs bar med kyi khur bzhes dang thugs khral shin tu che bar gnang*/_dgos pa dgongs gzhi gang yin sus rtogs kyang bod phyogs su phebs bzhed kyi rnam pa 'dra zhig brgyud mar mdzad cing*/_gus lha ldan du yod skabs phyag bris bstsal ba thams cad du smon tshig yan chad bod du phebs rgyu kho nar gnang*/_bod kyi bstan pa la nyams chag byung tshul gsan pa de phyin thams cad mkhyen pa dbu thon yod rgyur thugs bde'i rnam pa tsam las/_gzhan bod kyi don skor gsung zur tsam phyi nang su la'ang gnang bar ma mdzad/_slob ma khrid zhu ba rnams la ye shes bla ma zhig 'don rgyu byung na snyam yang*/_khong tshos khrid sbyang ji bzhin byung mi 'dug ces phebs bzhin/_gzim mal nas bzhengs bzhugs skabs sku brdabs shor ba'i rnam pas snyun khams slar 'khrugs/_zhabs brtan du mchog gling rin po che dang*/_rgya ston sogs dpon slob sum cur nye bas 'phags ma'i snying thig gi sgrub chen tshugs/_nag zla'i yar tshes la lha yum nas 'gan bzhes te rgya ston 'khrul zhig zung gis dkon spyi'i sgo nas sun bzlog brtan bzhugs dang*/_sgrub chen dngos grub blang ba dang 'brel brtan bzhugs rnams rim par phul/_rgya bod sman bcos kyang gang zab zhu bzhin brdabs rkyen gyi snyun zug rim zhir gyur kyang snyun khams spyir gzhi lci ba las ma g.yos shing bzhengs bzhugs gnang dka' bar gyur/_sa skya bdag chen rin po che la chen du bzhugs pa ched du gdan zhus dang*/_bdud 'joms rin po che/_rdo grub sprul sku/_bya bral sangs rgyas rdo rje sogs la brtan bzhugs thugs smon dang gdan 'dren sogs phul/_sku zhabs khams sprul rin po ches gshin rje khro chu'i gtor bzlog_/dkon spyi'i tshogs bskang sun bzlog brtan bzhugs kyis mtshon zhabs brtan rigs brgyud mar sgrub bzhin/_nag zla'i tshes bco lngar dmigs bsal bka' phebs te mchod tshogs rgyas spros rje nyid sku rkyang gis dus kyi 'khor lo'i mchod chog rgyas par mdzad rjes gsung chog gzhan ma gnang*/_'di skor nas snyun khams kyang bzhengs bzhugs dka' ba tsam las gzhan tshabs cher med pa'i tshul lta bur bzhugs/_sa zla'i yar tshes la ngor pa'i mkhan khag gsum/_mchog gling rin po che/_rgya ston sogs bla sprul mkhan slob nyi shu skor nas rtsa gsum tshogs bskang sun bzlog brtan bzhugs dang 'brel zhabs pad yun du brtan bzhugs grub pa zhes mgrin gcig gis gsol ba btab pa'i lan du rten 'brel la dgongs pa'i gsung lan ci bder gnang*/_yang bskyar du da lta'i snyun khams bzhes tshul bstan pa 'di 'phral dwangs yong ba'i thabs tshul zhabs rim bsgrub 'os gang zab bka' gnang grub pa'i zhu nan cher phul bar/_da lta na rgyu 'di ni tshabs chen ci yang ma red pas yun ring mi dgos par dwangs 'gro rgyu thag chod/_khyed rnams pas kyang de bzhin dgongs shing los yod/_zhabs brtan kyang da snga rgya cher grub song ba da ni dmigs bsal bsgrub 'os cher mi 'dug_/mkhan rin po che rnam pas byab khrus re gnang na bka' drin che tshul tsam zhig phebs/_sa skya bdag chen rin po che yang zhabs sor 'khod nas tshe dbang dgung grangs dang brtan bzhugs bcas zhabs pad yun ring brtan bzhugs grub pa dang*/_zhabs rim bsgrub 'os bka' gsal gnang grub kyi zhu nan phul ba la'ang rten 'brel la dgongs pa'i zhal bzhes gsung lan ci bder 'bul gnang la/_bdag chen rin po ches slar yang zhabs pad brtan pa'i zhu nan dang bcas sku khrus tshe dbang rigs dang*/_thugs bzhed 'jam dpal a ra pa tsa na'i rjes gnang bcas phul/_ngor mkhan khag la 'di rnams rje rdo rje 'chang kun dga' bzang po'i bzhugs khrir phebs pa'i skyes chen dam pa yin pas zhor du chos 'brel re gnad che gsungs pa ltar so so nas rjes gnang byab khrus rnams rim par phul/_gzhan yang bla sprul dang dad 'dus slob 'bangs bcas nas tshe lha rnam gsum mchod chog_/phyogs bzhi'i 'bar ma/_chos spyod gtor bsngo 'bum ther/_dam tshig rdo rje'i bsgom bzlas sogs bar med du sgrub bzhin pa dang*/_mchog gling rin po che rgya ston dpon slob nas pha rol rgol 'joms gtor bzlog_/rdo grub dpon slob nas yum bka'i tshogs dang me mchod/_dad slob sbyin bdag gzhan nas kyang rtsa gsum tshogs 'bum sogs zhabs brtan rgya cher sgrub mus/_'di skor nas sher phyin sdud pa sogs zhal 'don phyag dpe'i steng nas gsungs dgos rnams zhag 'gar nyin ring nan gsungs gnang zhing*/_da ni de rnams bsgril lugs legs par gyis la stegs khar yar zhog cig ces gsol dpon la gnang*/_gzim lam du sgrub chen grol rgyu'i mar me smon lam gnang ba lan btud mar byung tshul dang*/_lan gcig bka' brgyad sgrub chen grol rgyu'i dkyil 'khor phal cher bsdus zin nas mar me'i smon lam byed bzhin mar me rnams ha cang mi gsal bar 'dug pa shin tu gsal porasmis tshul phebs/_tshes nyer lngar zhabs gras rnams nas snying thig yum bka'i tshogs bskang bka' bzhin phul/_'di nub srod yol du sa g.yos che tsam yang byung zhing*/_phyi nyin snga dro'i char thugs khams shin tu gsal dwangs lta bur de ring na rgyu dwangs tshar ba 'dra zhig red/_da ni langs ste 'gro snying 'dod pa 'dug ces sku bzhengs pa'i g.yas nas phyag brten bcas nye skor phar phebs tshur phebs ring tsam mdzad/_'brug nas karma pa dang*/_sku zhabs si tu rin po che sogs phebs/_'brug dbang mo sogs la mjal 'phrad bka' mol zhib par gnang*/_phyi nyin nas slar yang snyun khams rim lcir phebs tshul bstan/_snron zla'i yar tshes nas sa skya bdag chen rin po che dang*/_rgyal dbang karma pa'i mdun nas zhabs pad brtan dgos gsung nan gnang bar rin po che rnam pas thugs smon 'dra gnang na drags shing yod 'gro zhes gsung lan gnang*/_'khrul zhig nas kyang zhabs pad brtan dgos kyi zhu nan dang sku khrus sogs phul/_tshes gsum nyin 'bras ljongs sras yum nas thugs 'gan bzhes te rgya bod sman pas snyun khams mjal rtog zhus par phyag rtsa sogs la skyon gang yang med tshul bshad/_sras yum zung la spyan cer gyis gzigs te zhal 'dzum pa gnang*/_zhabs brtan du rdor sems tshogs 'bum dpon slob nyi shu skor nas tshugs/_tshes lnga nyin rgyal dbang rin po ches dkon spyi'i tshe dbang dang bka' mol gnang nas rum btegs su chibs bsgyur gnang*/_sa skya bdag chen nas phur pa'i sri mnan khag bzhi dang tshe dbang sku khrus sogs bar med du gnang*/_'di skor thugs yengs pa'i rnam pas ngos kyi rtsa ba'i bla ma thams cad byon nas 'dug kyang rdo rje 'chang blo gter dbang po da sngon phebs ma byung zhes gsang yum la zhal 'phros gnang*/_de 'phral nas rmi lam rmis pa red/_'khrul snang za zi'i rmi lam mi 'byung ba ci yod ces zhal bsgyur bar mdzad/_de nas gsung cher ma byon/_skabs mtshams phyag g.yas sdig mdzub thugs ka dang pus steng*/_spyan lta stangs kyis nam mkhar yun ring tsam dang byang shar phyogs su yang yang gzigs par mdzad/_tshes drug gi dgong khar bzhes thang*/_gsol chang*/_'o ma sogs phul ba so so nas cung zad re bzhes shing thugs khams kyang bag tsam gsal ba'i rnam par bzhugs/_phyed yol glang gi phyi cha tsam nas skye med kyi yi ge'i sgra gdangs brtsegs ma lan 'ga' dang bcas dgongs pa nang gsal gdod ma'i gzhi dbyings chen por mngon par byang chub pa'i tshul bstan par mdzad do/__/de 'phral rang byung bstan pa'i btsas 'das rjes kyi glegs bam dang 'khor lo sku lus la phul nas zhag gsum gyi bar du gsang rgyas btab/_tshes dgu nyin bdag chen rin po che dbus gsar rnying mkhan khag bla sprul rnams nas bla ma mchod chog dang 'brel spyi mthun thugs dam bzhengs gsol bcas gsang rgya brtol/_kye rdor/_rdor sems/_rnam sme sogs kyis bsgrub pa'i bum chu dang dri bzang gi chus sku gdung rin po che legs par bkrus shing chos sman dang ga pur sman sna sogs kyis byugs/_gsar rnying gi rgyud sde nas byung ba'i gnas yig gser zhun gyis bris pa dang*/_btags grol/_rgyud kyi glegs bam rnams sku'i gnas so sor ma 'khrul bar phul zhing*/_ras dkar dri bzang gis bsgos pa dang bzang gos ser pos legs par dkris pa'i bar rnams sman sna'i phur mas gcer/_longs sku'i rgyan chas dang phyag tu rdor dril 'bul ba/_bsnyen bkur bcas bka' 'gyur lha khang du bzhugs khrir bzhugs su gsol nas mchod pa'i yo byad rgyas par bshams/_thog mar bdag chen rin po che dbus bla sprul rnams nas sbyang khrus bcas lhag pa'i lhar bskyed bstim mchod bstod gsol gdab sogs sngon du 'gro bas der 'dus rnams dang rim par mchog dman bar ma'i 'gro ba grangs mang rgyun mi chad par sku gdung rin po che'i mjal kha dang*/_gdung khrus sbyin pa sogs 'brel tshad don ldan gyi phrin las rgya cher 'phel/_de yang ji skad du/_rdo rje sems dpa' snying gi me long gi rgyud las/_mya ngan las 'das pa de yang gnyis te/_/yang dag par rdzogs par sangs rgyas pa dang*/_mngon par rdzogs par sangs rgyas pa'o/_/de la yang dag par rdzogs par sangs rgyas pa ni phung po lhag ma med par sangs rgyas pa'o/_/mngon par rdzogs par sangs rgyas pa'i skyes bu de la 'od dang*/_sgra dang*/_gdung dang*/_sku dang*/_sa g.yo ba la sogs pa 'byung ngo*/_/zhes dang*/_de ltar 'od kyi dkyil 'khor du/_/gang zhig byang chub rnyed pa'i mi/_/'di ni skal ldan sems can gyi/_/sprul pa yin gyi phyogs bcu ru/_/sems can don kyang rang bzhin du/_/'di yis byed do mkha' 'gro ma/_/zhes sogs gsungs pa ltar 'di nub sa rub rjes glog spar ba yang mog por bgyid pa'i 'od kyi snang ba shin tu gsal bas phyogs thams cad khyab par yun ring du byung bar kun kyang dad gus ches cher 'phel/_phyi rgyal mi sna khag gis kyang 'di ni nges par dam pa'i skyes bu de nyid dgongs pa rdzogs pa'i rtags su nges so zhes ngo mtshar du gleng bar grags/_de nas ji skad du/_'dul ba lung las/_sA la'i shing la 'khri shing bzhin/_/dam pa rnams ni bsten gyur pa/_/bzang po'i dpal gyis 'khyud par byed/_/ces gsungs pa ltar/_lhar bcas 'gro ba'i 'dren mchog dam pa gang gi rnam thar bzang po'i tsan[1$0000240]da[1$0000300]na gyi tshal du sdong dum phal pa sa la lhung yang mngar po'i dris 'khyud pa bzhin zhabs 'breng du 'khod pa dag kyang yon tan gyis mdza' ba chos nyid de/_rje bla ma mchog gi sku'i dbon mdzod sogs nas gus shing dang ba'i blo gros dri ma med pa rnam par dkar bas mtshams sbyar te rtag gus kyi brtson pa chen pos gshegs rjes dgongs rdzogs mchod 'bul phangs med gzab rgyas su ji ltar bsgrubs pa'ang*/_thog mar gsang rgya brtol 'phral 7 gong sa skyabs mgon tA la'i bla ma mchog gi mdun tar 'phrin phul bar bstan 'gro spyi byer gyong che na'ang don khyad par can gzhan du gzigs nges pas dgongs bzhed legs 'grub kyi thugs smon gnang rgyu'i tar lan phebs/_de rjes thugs dam ston pa'i li sku khyad 'phags gtsos mchod bsngo rten 'bul lam zhus par ljags rtsom myur 'byon gsol 'debs ngo mtshar can sogs zhib gnang gi bka' drin bstsal/_rgyal dbang karma pa phebs lam char zhod kyis bkag pas bsngo rten gzab btus 'bul lam dang*/_slad nas ched du chibs bsgyur dang 'brel gsung chog dang sku gdung rin po che'i mdun du thugs smon zab rgyas gnang*/_bdud 'joms rin po che dbus ka rdor khul bzhugs bla sprul rnams la'ang mchod bsngo so sor bkram/_gtso bor sku tshigs dang por sa skya sgrol pho'i skyabs mgon bdag khri rin po che dbus/_ngor mkhan khag zhabs drung chog rog pa bcas kyis sa sta sngon du 'gro bas 'khon lugs rdo rje phur pa'i sgrub pa gdung mchod dang 'brel ba bdun phrag gcig_/sku zhabs si tu rin po che rgya ston dpon slob nas kar gling zhi khro/_mchog gling rin po che dpon slob nas sngags kyi gso sbyong*/_slob tshogs byings nas dam tshig rdo rje'i bzlas pa 'bum ther bco brgyad grub pa dang lhan du rje bla ma rang gi dgongs bzhed bzang spyod smon lam 'bum ther gyi dbu tshugs/_nyin ltar mar me stong dang mchod pa gzab rgyas bcas sa dge kar rnying zhwa lu sogs ris med pa'i dge 'dun dge tshul slong gi rten can drug cu nas brgya skor bar gyis gsungs/_gzim chung du gsang yum dbus nang skor nas tshes bcur snying thig yab bka'i tshogs skong dang zhi khro'i skong chog tshugs/_'di nas brtsams sku gdung bzhugs ring tshogs skong dang na raka skong bshags nar mar gsungs/_gong gsal rdor sems tshogs 'bum skabs 'dir grub pa'i sku yon sogs 'bras ljongs gzhung nas gtong gnang mdzad/_de nas gsar rnying chog khag gnyis res gdung mchod 'bul rgyur/_sku tshigs gnyis pa la/_sa skya phun pho'i skyabs mgon gdung sras sku bgres rin po che dbur bzhugs/_thar rtse mkhan po/_sga thar lam mchog sprul rnams kye rdor sgrub mchod bdun phrag_/rdo grub nas thugs chen sdug bsngal rang grol/_sku tshigs gsum par sa skya'i rje btsun ma dang mnga' ris sprul sku sogs nas mkha' spyod ma'i sgrub mchod/_rgya ston sprul skus jo lugs dus 'khor mchod chog_/skabs 'dir mar ngo'i tshes bcur khel bas sku gdung rin po che'i mdun mchod tshogs gzab spros kyis bdag khri rin po che dbus ngor pa'i mkhan zhabs sogs bla grwa bzhi bcur nye bas rnal 'byor ma'i sgrub mchod/_rdo grub dang mchog gling dbus bla grwa mang bas yum bka'i tshogs skong*/_bzang spyod 'dus sde bcas yongs rdzogs la bsnyen bkur dang phyag 'gyed bcas gsang yum mdun nas 'phar ma gnang*/_gzim chung du bla sgrub byin rlabs snying po'i cho ga tshugs/_sku tshigs bzhi par ngor khang gsar mkhan po dbur bzhugs kyi kun rig sgrub mchod/_pad+ma yang rtse'i bla grwa nas bde gshegs kun 'dus tshugs/_bzang spyod gsung mkhan byings la sku yon phul/_snga ma rje nyid kyi gsung 'phros su phyogs 'dir phebs pa'i dge tshul slong rnams gso sbyong re gnang na shin tu legs tshul bka' bstsal ba'i dgongs don ltar so thar gyi sdom pa'i rten can drug cu skor thog mar bkra shis pa'i gso sbyong dang*/_nyin bzhin gso sbyong re dang bcas sku gdung rin po che'i mdun bzang spyod tshugs/_mchod pa rnam lnga so so nas stong rtsa re nyin bzhin phul/_chu stod zla ba'i tshes bzhi'i dus chen nyin bla grwa thams cad gdan zhus kyi bzang spyod smon lam 'bum ther kha skong bcas legs par grub/_gzim chung du snying thig dang thugs sgrub bla mchod zhag 'ga' tshugs/_sku tshigs lnga par rdzong sar mnga' ris sprul sku dbur bzhugs kun rig sgrub mchod/_dben dgon lung rtogs sgom chen dbur bzhugs kyi smin gling rdor sems tshugs/_sprel zla'i tshes bcur gzim chung du bla ma gsang 'dus tshogs brgya dang*/_sku gdung rin po che'i mdun dad ldan 'ga' nas gzhi len gyi rdo grub dang mchog gling dbur bzhugs rigs 'dus dang thugs sgrub bar chad kun sel gyi tshogs brgya re/_sku tshigs drug par mkhar mdo khang gsar zhabs drung dbur bzhugs kyi kun rig dang*/_g.yon ru gter sras bla ma sogs nas zhi khro'i skong chog tshugs/_bdun phrag rjes mar thar rtse rin po che dbur bzhugs kun rig sgrub mchod/_gnam mtsho do skya sprul sku/_mchog gling rin po che bcas dbur bzhugs gter gsar zhi khro na raka dong sprugs/_tshes nyer lngar chog khag gnyis la kha gsab gsar rnying bla grwa yod rigs gdan 'dren dang stong mchod bcas 'di'i nub sku gdung rin po che'i mdun mkha' 'gro gsang 'dus kyi cho ga mchod skong bye brag pa sogs gzab rgyas/_tshes nyer drug nyin chog khag so sos sbyong khrus bcas bsngo yig rnams bsregs/_gnyis ka lhan tshogs gsar rnying bstan pa rgyas chog rigs dang*/_bzang spyod sogs smon lam nyin 'ga'i bar gsungs pa rags rim tsam dang*/_gzhan yang dad ldan slob tshogs rnams dang*/_sbyin bdag che phra sogs mchog phal kun nas rang rang 'byor rgu rtsal sprugs kyis mchod 'bul dang tshogs bsags/_blo nus dang 'tsham pa'i dge sbyor chos 'chad nyan/_gsol 'debs smon lam bcas la nyin mtshan bar med du brtson pas dus 'da' brnams kyang zhar byung ngo*/__/de ltar gsol dgung gi gsung chog so sor mchod tshogs rigs gzab rgyas/_skyabs mgon bdag chen rin po che gtsos dbur bzhugs khag la rten gsum gyis thog drangs/_mkhan sprul byings dang chog grwa so sor 'os bstun dngos 'bul rgya che spus nom ldan pas mnyes pa sgrub tshul zhib cha deb 'khod las gsal te/_de'ang sdom 'byung las/_mchod pa thams cad yongs spang nas/_/bla ma mchod pa yang dag brtsam/_/de mnyes pa las kun mkhyen pa'i/_/ye shes mchog ni thob par 'gyur/_/zhes dang*/_gsang snying las/_dbang phyug longs spyod lngas mchod na/_/dkyil 'khor thams cad mchod pa yin/_/nye ba'i dkyil 'khor smos ci dgos/_/nyes pa thams cad dag par 'gyur/_/zhes dang*/_spyi mdo dgongs 'dus las/_bskal pa stong gi sangs rgyas las/_/bla ma gnyan par shes par bya/_/ci phyir bskal pa'i sangs rgyas ni/_/bla ma dag la brten nas 'byung*/_/zhes dang*/_kun 'dus rin po che'i rgyud las/_gang gis bskal pa 'bum phrag tu/_/lha sku 'bum phrag bsgoms pa bas/_/bla ma cung zad dran pa mchog_/bsod nams 'di ni pha mtha' yas/_/zhes dang*/_nam mkha' dri ma med pa'i mdo las/_kun dga' bo/_de bzhin gshegs pa rnams ni sems can thams cad la snang ba ma yin gyi/_/dge ba'i bshes gnyen ni yongs su snang la chos ston cing thar pa'i sa bon 'debs pa'i phyir/_de bzhin gshegs pa rnams las dge ba'i bshes gnyen lhag par zungs shig_/ces mdo rgyud rnams nas sangs rgyas thams cad mchod pa las kyang bla ma gcig pu mchod pa khyad par 'phags tshul rgya cher gsungs pa ltar/_dam pa gang gi zag pa med pa'i thugs kyi dgongs pa rdzogs pa'i thabs su rnam dkar tshogs bsags rlabs chen kun gyis bsngags 'os can gro bzhin zla ba'i yar tshes la grub nas ngor e waM thar rtse mkhan rin po ches yon bsngo sogs rgyas par gnang*/_de'i phyi nyin nas bkra shis pa'i gso sbyong dang*/_de nas bzung sku gdung rin po che bzhugs ring nyin bzhin mchod sprin gzab cing rgyas spros/_yar mar tshes bcur tshogs bskang*/_tshes bco lnga dang gnam stong la gso sbyong dang 'brel bstan pa rgyas chog smon lam sogs dang*/_'di nas brtsams te phyogs 'dir gso sbyong dang dbyar gnas kyi srol tshugs pa'ang rje bla ma 'di'i thugs bskyed las byung ba dang*/_gzhan yang rgyan stug po bkod pa'i mdo las/_'jam dpal phyogs gang na chos smra ba de 'dug gam/_de'i rus bu'am/_ro bam pa zhig yod par mthong na'ang mtshams med pa'i las byang bar 'gyur ro/__/zhes 'brel tshad don ldan gyi phrin las khyad par can du gsungs pa ltar/_phyogs mtha'i skye 'gro bgrang las 'das pa dang*/_lhag par khams bod mi grangs shin tu mang bar sku gdung rin po che mjal kha dang gdung khrus sogs zhib tu bstsal bas kun gyis phyag mchod smon lam dge sgrub sdig spong sogs rnam dkar rgya cher bskyed gzhir gyur pas rten 'dis gdul 'os la phrin las kyi 'jug pa mi yol ba'i rlabs chen thugs bskyed kyi rang 'bras ngo mtshar can du nges pa'o/__/gus phran nas kyang dgongs pa nang dbyings su thim tshul thos nas mchod 'bul gsol 'debs ci nus la brtson mus/_sku tshigs rdzogs 'phral slebs pas rang 'khos mchod 'bul sogs dang*/_dbon mdzod nas mchod tshogs gzab gnang gis khams sprul rin po che gus dpon slob nas smin gling rdor sems bdun gcig dang*/_zla bshol gyi sprel zla'i tshes bcur yang gter rtsa gsum dril sgrub tshogs brgya bshags bskang bcas gzab rgyas/_don gnyer ba rnams la dri med rnam gnyis kyi dbang sogs 'don sgrub zhu rgyu tsam byung*/_sku tshigs rdzogs nas gdung rten khag bzhengs rgyu'i sta gon tshugs/_'bras ljongs su smin gling gzungs spar bzhugs pa'i steng dri med rnam gnyis kyi mchod rten la ched du dgos pa rnams spar gsar brkos bcas shing shog kho na la btab par rdzas byugs/_dras mthud/_bsgril dang na bza' gsol rgyu bcas chad lhag nor 'khrul med pa dang*/_gzhan yang bri dgos pa rgyud dang gzungs mdo'i glegs bam rnams dang mthong grol btags grol 'khor lo/_khyad par du tshad dang ldan pa'i srog shing khag byang chub shing gi rigs las bskrun pa/_gal che ba'i gzungs rnams gser zhun gyis bris pa/_gser zangs kyi byang bur gzong ris kyis brkos pa'i gnod sbyin 'khor lo cha gsum bcas la dar gos rgyu bzang kho na'i na bza' dang*/_dri med rnam gnyis kyi dkyil 'khor dang mchod chas yo byad rigs/_klu dang sa bdag nor lha nyes sel sogs kyi bum gter grangs mang*/_de rnams so so'i rdzas cha/_thun mong du lnga tshan lnga dang*/_sman sna/_bsang sna/_'bru sna/_dar zab/_gos sna/_rin chen phye ma/_sa chu 'byung bcud sogs 'gro song sku ngal 'dzem med rtsol sgrub dang*/_lag len rnams mchod dpon bla ma 'jam dbyangs blo gros mchog ldan nas 'jam mgon rnam gnyis phyag bzhes ltar zhal bkod dang bcas dge tshul slong sdom ldan gtsang sbra la gnas pa sha stag gis yun ring du zhib bsgrubs zin pa dang*/_ngos rang*/_mkhar mdo zhabs drung*/_rgya ston rin po che chog rog bcas nas sbyong khrus rab gnas sngon du 'gro bas gzungs sgrub dang*/_srog shing*/_glegs bam/_'khor lo/_bum gter rnams so so'i cho gas yun ring du sgrub pa bgyis/_gdung rten zangs gser yang khams brag yab pa'i bzo bo mkhas pa bzhi nas brdung sgros gzab bskrun gser rtsi bcas gang legs mtha' 'dus grub/_de yang sku gdung rin po che zhugs 'bul zhus na legs tshul sku gong 'og zhal mthun gsung 'phros khyad par can gzhir bzhag gis/_rdo rje gdan lta bu gnas khyad par can zhig tu gdan 'dren zhu rgyu'i gleng bslangs la/_'khrul zhig dpa' bo rdo rje nas 'bras ljongs gnas mthil bkra shis sdings rang du zhugs 'bul dang gdung rten bzhengs grub na sku phreng gong ma lha btsun chen po'i dus dang*/_rje bla ma rang nyid kyi thugs bskyed rten 'brel bsam gyis mi khyab pas sbas gnas 'dis mtshon yangs pa'i rgyal khams kun tu rgyal bstan rin po che dar rgyas yun gnas dang*/_skye rgu yongs la phan bde rgya cher 'byung ba'i btsas su 'gyur tshul nan gsungs dang*/_rje bla ma gnas nang phebs skabs sngar nas nged rang phung po 'dor ba'i gnas kyi bkod pa zhig rmi lam dang rig ngor yang yang gsal ba bkra shis sdings 'di rang red 'dug ces gsung 'phros phebs pa dang gung mthun pas/_gdung dkris rnying gsol zhib bsal gyis sku'i gnas rnams su gser chab dang gnas yig rnams gsar du bris/_btags grol rigs dang gsar rnying rgyud sde'i snying po sogs gser bris tshar mang*/_spar btab phon cher phul zhing dar gos dri bzang gis bgos pas gsar du legs par dkris/_rin po che'i rgyan sogs longs sku'i chas kyi bsnyen bkur zhus te rtsis khog dang bstun par/_smal zla'i yar ngo'i gza' tshes dge bar bkur sti dang bcas 'bras ljongs gnas kyi lte ba bkra shis sdings du gdan 'dren zhus/_der bkra shis pa'i gso sbyong sngon du 'gro bas lto 'phye'i kha rgyu phyogs dang bstun/_bsnyen song slob dpon rgya ston rin po che dang mkhar mdo zhabs drung chog rog pa bcas nas 'od zer dri med kyi sa'i cho ga dang 'brel rmang gi phyogs bzhi dbus lngar klu chen nor rgyas dang sa snying bstan ma sbrags sgrub bcas kyi gter bum tshad ldan re/_sa 'dzin nas them skas bar brtsigs pa'i steng du spur khang myang 'das mchod rten rnam pa can gyi seng khri'i mthil du thab dkyil khag rnams dang*/_bum pa'i dbus su sku gdung rin po che zhal shar du phyogs par bzhugs su gsol/_bre'i steng gdugs dang rgyal mtshan ba dan sogs kyis legs par rgyan/_mchod pa'i yo byad rgyas par bshams/_ngor thar rtse mkhan po/_khang gsar zhabs drung*/_mkhan yon tan bzang po sogs kyis kye rdor/_gnas brtan mchog gling rin po che rgya ston lhan rgyas pas smin gling rdor sems/_rdo grub mchog sprul/_kaHthog rje dbon/_kho bo bcas nas klong snying zhi khro khrom dkrug_/rdzong sar mnga' ris sprul sku/_mkhan blo gros bzang po sogs nas nA ro mkha' spyod/_pad+ma yang rtse'i mkha' spyod sprul sku/_ser sgrub gdung 'dzin lhan rgyas pas rtsa gsum rig 'dzin srog sgrub bcas gsar rnying chog khag lnga la zhal grangs drug cu skor gyis so so'i dkyil 'khor gyi gtso bo dang dbyer med sreg blugs kyi mchod pa dang*/_tsan[1$0000240]da[1$0000300]na dkar dmar dang a ga ru sogs bud shing dri ldan phon mang gis bsregs bzhu grub cing*/_cho ga'i las rim rdzogs nas gdung khang gi sgo rnams rigs lnga'i rtags kyis rgyas btab cing zhag gsum ring mchod 'bul grub pa'i nyi shar la zhal phyes te cho ga bzhin du gdung rus rnams dang gdung thal bcas 'thor med bsdus te spyan drangs pa mchod pa'i rten du bzhugs su gsol/_dpal rdo rje sems dpa'i mchod tshogs 'bul ba sogs grub pa dang*/_dge tshul slong kho nas nyin bzhin gso sbyong blang ba dang bdag gi rnal 'byor bcas gdung rus gdung thal zhib btul la rin chen phye ma dang sman sna phon cher bsres nas gzhung gsal lag len gyis sAts+tsha rnams rim par btab cing so sor tshon dang*/_nyis brgya lhag la gser dngul btul ma gsol grub bstun bsnyen song dbur bzhugs chog khag gnyis nas rim par bsgrubs/_sa rdo skyel 'dren sogs dad slob mchog dman bgres gzhon gyis gus spro bcas brtson nas/_gdung khang dngos kyi sa rdo'i cha shas sAts+tshar bsres shing gzhan du ma 'thor ba mchod rten gyi khongs bzhugs su gsol te snga ma'i 'phros nas rim brtsigs kyi seng khri'i nang du gtso bor gnod sbyin lha mang gi tsakra dang de'i yo byad rigs/_nor lha'i gter bum 'dra min khag_/nyes sel dbang bum bcas so so'i cho gas bskyed bstim bzhugs su gsol/_bang rim stod tsam du gtsug tor dri med kyi cho gas de'i dkyil 'khor/_gza' tshes dge bar bkra shis gso sbyong bcas bum par 'od zer dri med kyi dkyil 'khor du srog shing 'dzugs chog bsnyen song khag dbur bzhugs kyi shin tu gzab rgyas/_nang gzhug gtso bo ring bsrel rnam pa bzhi'am lngar grags pa'i yungs 'bru lta bu'i ring bsrel la bdag cag gi ston pa'i ring bsrel sde srid rin spungs pa'i nang rten las byung ba 'khrul med rdog gcig_/'od srung ring bsrel 'ja' tshon gter ma dang*/_bal yul mchod rten las byung ba grangs mang*/_gu ru'i tshems las sprul pa'i ring bsrel sogs/_chos kyi ring bsrel gzungs chen sde lnga tshar bdun brgya lhag_/nye snying shin tu grangs mang*/_rnying gzungs tshar bco lnga skor/_bla ma zhi drag dang mtshan sngags sna tshogs mang tsam/_gter shog dang rgya dpe byin ldan ldeb kha shas/_zab bdun yang dag gser byang sogs kyi thog ma'i 'bebs gzhi mkhyen brtse gong ma'i phyag bris ngo ma/_rje nyid kyi phyag bris tshan kha shas sogs/_sku gdung ring bsrel kun mkhyen klong chen pa'i dbu klad ring bsrel phung po gtsos gsar rnying skyes chen mang po'i gdung rus dang*/_khyad par rje nyid kyi gdung rus rin po che gser zhun gyis byugs par yi dam gyi snying po bris pa na bza' bcas za ma tog tu bcug pa sogs/_sku bal ring bsrel gu ru rin po che'i na bza'/_gnubs chen dang nyang gi dbu ljon gtsos gsar rnying bla ma gong ma'i na bza' dang dbu ljon grangs mang*/_rje nyid kyi dbu ljon dang phyag sen/_skabs mtshams rten 'brel du bzhes pa'i na bza' 'og 'jug dkar po bub tshang*/_chos sku'i ring bsrel rtswa mchog grong nas thon pa'i mchod rten sogs 'ga' dang*/_gsar rnying skyes chen rnams kyi phyag tshA byin ldan kha shas/_rje nyid kyi gdung rus gdung thal tshad ldan btab sgrub kyi sAts+tsha sum stong lhag bcas/_gzhan yang sku rten gu ru'i sku gser li byin ldan/_gter byon bye ma a krong gi phyag rdor sku ngo mtshar can sogs/_gsung rten bla ma dgongs 'dus dang*/_gur drag ye 'bar rtsa rgyud glegs bam/_thugs sgrub bar chad kun sel gter gzhung cha tshang sogs/_'jam dpal mtshan brjod/_sher phyin sdud pa/_rgyud bla sogs mdo sngags bstan bcos bcas kyi pusta ka kha shas/_chos dbang srog shing brtan pa'i tsakra gnam chos dge 'dun 'du 'khor chen mo sogs tshad ldan bca' sgrub kyi 'khor lo 'dra min 'ga' bcas/_thugs rten li dmar rdo rje byin ldan/_yon tan rten mkhyen kong mchog gsum/_rje bla ma rang nyid bcas kyi bka' gter sgrub chen lan grangs thems pa'i chos sman dang*/_bdud rtsi ril bu khag_/tshe ril rigs 'dra min bcas kyi za ma tog_/phrin las rten mnga' bdag nyang gi gter ma gnam lcags phur pa bcas/_bre nang srog shing rtse mor bstan pa bu gcig sogs btags grol glegs bam dang 'khor lo'i rigs rje bla ma mchog gis sgrub gnang can dar gyi na bza' bcas tsan dan byang bu'i bar gtams pa dang*/_gzhan btags grol rigs 'ga'/_zhar byung thugs


sgrub cha lag shAka thub dran grol mchod rten gyi sems nyid ngal gso'i mthong grol 'khor lo bcas/_bum sgor yang de nyid las byung ba'i phyag rgya mthong grol rdo rje mi 'khrugs pa'i sku kaHthog dbon sprul phyag bzo nang gzhug dang cha tshad ldan pa/_rtse mor gser zangs kyi zar tshags nyi zla tog bcas kyi nang du gdugs dkar tsakra/_rgyal mtshan rtse mo'i glegs bam/_gzungs chen dang mthong grol rigs bcas bzhugs su gsol te/_phyag len gtsang dag gi sgo nas byang chub chen po'i mchod rten rje mkhyen brtse gong mas chos sde chen po lhun grub steng du mchod sdong mthong grol chen mo bzhengs skabs gsar bskrun gnang ba'i thig rtsa 'chugs med du legs par bzhengs pa'i dkar chag logs su bkod pa las shes par bya'o/__/de ltar grub zin pa dang bkra shis pa'i gso sbyong dang mchod pa'i tshogs gzab rgyas dang bcas mkhan sprul rnams dbur bzhugs gsar rnying 'dus pa lhan tshogs kyis yang gter rtsa gsum dril sgrub sgo nas rab gnas nyin 'khyongs dang*/_nyin rjes mar thar rtse mkhan rin po che/_khang sar zhabs drung*/_mnga' ris sprul sku/_mkhan yon tan bzang po/_blo gros bzang po sogs nas kye rdor/_kaHthog dbon sprul dang kho bo sogs kyis smin gling rdor sems sgo nas rab tu gnas pa'i cho ga tshogs skong mchod 'bul/_chos skyong dang yon bdag bsgo ba sogs/_rgya ston mchog sprul dpon slob nas shAka thub dran grol mchod rten gyi cho ga dang*/_mi 'khrugs pa'i phyag rgya mthong grol bcas sgrub gnang gis ye shes sems dpa' nan du bstims shing bzhugs su gsol bar mdzad pa sogs kyi sgo nas phyi rten mchod sdong rin po che bkra shis grol ba bzhi ldan byin rlabs dpal 'bar zhes srid zhi'i bla na mngon par mtho ba'i chos sku'i rten mchog dam par mnga' gsol bas lhar bcas 'gro ba kun gyi phyag mchod bsod nams kyi zhing*/_sbas gnas 'dis mtshon bgrang yas bstan 'gro'i dge legs kyi dpal du srid pa ji srid bar bzhugs su gsol ba dang 'brel/_slar yang phun sum tshogs pa'i mkhan slob dge 'dun rnams nas gso sbyong dang 'brel bar bstan pa rgyas chog dang smon tshig shis brjod rgyas par bsgrubs pas shin tu dge legs ches cher 'phel rgyas su grub pa'o/__/zhar byung de ltar bzhengs pa'i phan yon dang dgos pa'am/_spyir ring bsrel rnam bzhi'i snying po can gyi mchod rten gsar du bzhengs pa'am/_nyams gsos dang phyag mchod bkur bsti bgyis pa sogs dang*/_khyad par du'ang dri med rnam gnyis kyi dkyil 'khor dang 'brel bar srog shing 'dzugs chog ldan pa'i mchod rten bzhengs pa ni phan yon ches shin tu che bar gzungs mdo khag dang*/_gzungs chen sde lnga so so'i mdo dang rtogs pa/_mchod rten bskor ba'i tshigs bcad sogs las gtso bor rdzogs pa'i sangs rgyas dngos kyis rgya cher gsungs pa dang*/_de bzhin du btags grol dang mthong grol rigs/_mchod rten dran grol/_phyag rgya mthong grol/_tsakra dang glegs bam skor/_gter bum sogs bca' sgrub gzhung mthun gyi rten 'dir bzhugs so cog rnams la re re bzhin phan yon mang du gsungs pa thams cad rdzogs par tshang bas na nges par bstan dang 'gro ba'i btsas dam par gyur cing kun gyis bsod nams bsags pa'i zhing bla na med pa grol ba bzhi ldan chen por tshad mas grub pa ste zhib tu rtogs par 'dod na so so'i gzhung rnams las shes par bya zhing*/_'dir gang du zhi ba mngon du mdzad pa'i gnas der ye shes rang snang gi zhing khams rang chas lhun grub tu bzhugs par gsungs pa la nges shes brtan pos thugs yid drangs te/_dpal ldan bla ma rdo rje 'chang mchog gi zab dgongs dbyings su rdzogs pa'i sri zhu dang*/_gdul bya'i bsod nams bsags pa'i zhing du gsang yum mchog nas gzim sbug der nang rten du rje nyid kyi sku tshad las mi dman pa'i mchod sdong bzhengs rgyur thugs dgongs zab bzhes kyis gser zangs mchod rten thog tshad can dang*/_'byung 'gyur khams bod du dus bde'i skabs gdan 'dren zhu rtsis mchod rten mda' tshad lhag bcas la/_lcags byi cho 'phrul zla ba'i yar tshes la so so'i sa 'dzin nas brtsams gzungs rnams rim 'bul gyis mchod rten che bar dri med rnam gnyis kyi dkyil 'khor srog shing 'dzugs chog bcas zhib rgyas dang*/_so so'i sAts+tsha rnams kyang gdung rus las btab pa grangs tshang bar bzhugs/_chung bar gtso bo shAka thub dran grol mchod rten bca' gzhi la 'od dri'i dkyil 'khor zur du bzhengs nas srog shing 'dzugs chog bgyis pa dang*/_nang gzhug la sAts+tsha mang nyung tsam las phal cher phyi rten skabs dang mtshungs shing*/_mchod rten che ba'i bum sgor rdo rje 'chang gi sku gser li mtho tshad khyad 'phags byin ldan dang*/_chung bar spyan ras gzigs kyi sku li ma byin ldan bcas bzhugs/_gnyis ka'i thig rtsa gong smos byang chub mchod rten gyi mtshan nyid yongs su rdzogs pa gser shas ci che g.yu byu ru gzi mchong spos shel mu men mu tig pha lam sogs rin po che sna tshogs pa'i phra rgyan phun sum tshogs pa mig gi bdud rtsir gyur pa dang*/_zhar du sku rten rigs mang tsam la'ang gzungs 'bul mnyam du grub ste/_dbo zla'i yar tshes dge bar dpal spungs sku zhabs tA'i si tu'i mchog sprul rin po che dbus/_dpon slob mang tshogs kyis yang zab dkon mchog spyi 'dus kyi sgo nas rab tu gnas par mdzad pa dang*/_rgyal dbang karma pa mchog gis kyang ye shes dgongs pa'i lhag gnas thun min du bstsal bar mdzad/_slar yang snron zla'i yar tshes rje bla ma mngon par byang chub pa'i dus mchod dang 'brel dpal sa skya'i skyabs mgon bdag khri rin po che dbur bzhugs kyi rab gnas nyin 'khyongs gzab rgyas sogs snga phyi rab tu gnas pa lan mang gis ye shes sems dpa' yang yang bstims zhing bzhugs su gsol ba bcas kyis 'jig rten lha dang bcas pa kun gyi rnam dkar bsod nams kyi zhing mchog phul du byung bar 'bras ljongs sgang tog gtsug lag khang gi gzim spyil 'og mar rje bla ma mchog gis bstan 'gro'i don rgya cher gnang zhing mngon par byang chub pa'i gnas rgyal bstan ris med chos kyi dga' tshal 'og min rdo rje bkod pa'i pho brang chen por bzhugs su gsol ba'o/__/skabs de dag gi gsung chog snga phyi'i dbu bzhugs dang bla grwa byings/_bzo rig las byed khag la dngos 'bul dang gla cha gnang sbyin sogs kyi bsnyen bkur dgyes shing yi rang bar bgyis te sdig dang ma 'dres pa'i rnam dkar gtsang dag tu bsgrubs pa'i dngos po'i 'gro song skor zhib tu bkod na dge ba ngom pa'i skyon du dogs te ma spros la/_rnam dkar rlabs che'i shugs kyis kyang rtogs par nus pa nyid do/__/de ltar bzhengs pa'i gdung rten chos sku'i mchod sdong rin po che dang gzim spyil bcas la dus dang rgyun gyi mchod pa'ang nyin bzhin mchod yon grangs mang dang mar me'i phreng ba/_snang gsal rgyun 'bar kha shas/_nya stong brgyad drug tu 'phar ma gang rgyas/_yar mar tshes bcur tshogs bskang dang*/_'dul ba mdo rtsa bar/_de la dus ston bya'o/_/bltams pa dang*/_gtsug phud dang*/_dbu skra dang*/_byang chub pa'i dus ston dag kyang ngo*/_/zhes gsungs pa ltar rje btsun bla ma rin po che mngon par byang chub pa'i sku mchod du rje gong ma'i dgongs gter 'chi med 'phags ma'i snying thig gi chos sde bla sgrub byin rlabs snying po'i skong chog bdun phrag gi khongs su sprel zla snga mar khel bas tshes bcur gsang sgrub mtsho skyes snying thig gi tshogs brgya rgyas pa re bcas lo bstar/_slar yang lo de'i dgun thog gsang yum mchog nyid dgongs rdzogs mjug skyong ched phebs gnang nas rdo rje gdan du khri mchod lhag bcas/_gan+d+ho la'i phyi nang glog rnams mtshan thog thag spar ba sogs mchod tshogs gzab 'bul/_dgon par yang mang ja sku 'gyed/_wA rA Na sI bod dgon par yang de mtshungs/_gzhan yang mtsho pad+ma dang gnas chen khag tshang mar mchod 'bul gzab rgyas/_bal yul mchod rten rnam gsum so sor sku dkar dang dri bzang na bza'/_stong mchod gzab rgyas/_yang le shod du tshogs mchod sogs skabs babs gsung chog dang gsol 'debs smon lam nan du gnang*/_zhar du gdung zhun gyis bgos pa'i spur tshwa rnams dad ldan don gnyer rigs la gnang ba dang*/_phon mang ba ched du gdan 'dren gyis chu bo gang+gAr gshegs su gsol ba'ang rgyal sras lha rje'i skyes rabs rim byon myong grol skye bdun chen por thang yig las lung bstan bcas rgya cher gsungs pa nyid o rgyan gling pa'i sku gdung gi lo rgyus dang*/_kun mkhyen 'jigs gling gis zhal bzhes gnang ba bzhin 'di kho na'ang phrin las kyi cha shas bsam gyis mi khyab par nges pa sogs mdor na ltos bcas mchog phal kun gyis sgo thams cad nas zab dgongs yongs su rdzogs pa'i thabs la gcig du brtson pas rnam dkar gyi rim pa blo nus dang 'tsham par sgrub bzhin pa lags so/__/de lta bur bla ma'i zab dgongs rdzogs pa'i thabs la brtson pa ni bsags sbyong kun gyi mchog tu 'gyur ba sogs phan yon dang dgos pa bsam gyi mi khyab pa'ang*/_dus kyi 'khor lo'i rtsa ba'i rgyud kyi dum bu bla ma'i yon tan bzung ba'i rgyud las/_nye du 'brel ba shul na gnas pa yis/_/gshin gyi don du dge ba gang byas pa'i/_/rnam par smin pa ma phyir be'u bzhin/_/gang du skye ba de yi rjes su 'brang*/_/de bzhin mos gus ldan pa'i slob ma yis/_/bla ma 'das nas gdung bas mchod byas na/_/thugs kyi dgongs pa gong du yongs rdzogs shing*/_/slob mas bla ma'i rnam thar snyogs par 'gyur/_/bla ma 'das pa'i lo zla tshes grangs dag_/nges par bzung ste mchod pa byas gyur na/_/bskal par bsags pa'i sdig chen rab bcom nas/_/shin tu mi bzad gshin rje'i grong las thar/_/stong gsum skye bo mig bral srog nyams la/_/mig srog byin yang de yi dper mi phod/_/de snyed skye bo dgra bcom la bkod nas/_/bskal par mchod pa'i dge bas dper mi phod/_/bskal pa grangs med byas pa'i sdig pa yang*/_/mun la nyi ma ji bzhin ma lus sel/_/zhes rgyud kyi rdo rje'i lung sogs las rgya cher 'byung ba ltar ro/__/de ltar legs byas kyi thog mtha' bar gsum du sa gzhi skyong ba'i mnga' bdag 'bras ljongs chos rgyal dpal ldan don grub rnam rgyal sras yum zung gis dad dam 'gyur ba med pa'i thugs bskyed lhur bzhes kyi bdag rkyen bla med gnang zhing*/_shul bzhugs ltos bcas kyang rnam kun thugs brtse chen pos bskyangs pa ni/_'jam mgon bla ma rin po che'i chos kyi bka' drin gsob pa'i dam tshig gi gzhung rnam par dkar ba dam pa'i ngang tshul bsngags 'os mdzad bzang zla med la rjes su yi rang ba'i gnas su nges pa'o/__!__/gnyis pa thun min khyad par gyi rnam thar bye brag tu bshad pa la gnyis/_nang dang gsang ba'i rtogs pa brjod pa'o/_/dang po ni/_zab mo'i rnal 'byor gyi byed pas ye shes dag pa'i snang ba la dbang 'byor ba rnams kyi spyod yul du gyur pa nang gi rnam thar te/_de la'ang nang gses gsum du dbye ba las/_dang po sgrub brgyud shing rta brgyad kyi bstan pa'i mnga' bdag smin grol yongs rdzogs kyi bka' srol 'dren pa'i shing rta chen por don gyis grub tshul gtso bor smos pa'i khongs su 'brel mtshungs gzigs snang rigs skabs so sor 'god par bya ste/_mkhas grub chen po pradz+nyA ra rmis/_/dpal ldan rdo rje 'chang nas legs 'ongs pa'i/_/gangs ri'i khrod 'dir sgrub brgyud srol chen brgyad/_/de dag grub thob gong ma'i gshegs shul yin/_/thar 'dod rnams kyang lam de'i rjes su zhugs/_/zhes dang*/_kun gzigs gu Na sA ras/_bod yul sgrub brgyud shing rta chen po brgyad/_/rnying ma bka' gdams lam 'bras bka' brgyud pa/_/shangs pa zhi byed sbyor drug bsnyen sgrub bo/_/zhes gsungs pa ltar/_ljongs 'dir sprul pa'i lo paN skyes mchog rnams kyi bka' drin las legs par byon cing*/_de dag thugs nyams su bzhes pas grub 'bras mngon du mdzad nas dam pa'i skyes bu re res kyang gdul bya mtha' yas pa byang chub chen po'i go 'phang la dbugs dbyung bar mdzad pa sgrub brgyud shing rta chen po brgyad kyi gzhung gdams man ngag gi rgyun so so'i ring brgyud bar ma chad pa bzhugs so cog kun lhag lus med pa kun gzigs 'jam pa'i dbyangs mkhyen brtse'i dbang pos shin tu don gnyer chen pos gsan te thugs dam nyams bzhes yun ring du gnang*/_shing rta so so'i bstan pa'i mnga' bdag chen po rnams dang yi dam lha dang mkha' 'gros yang yang rjes su bzung zhing byin gyis brlabs pas nye brgyud gdams pa'i bka' babs khyad par can brnyes te dbang khrid man ngag gi rgyun rnams ris med pa'i bstan 'dzin skyes chen dang*/_khyad par du 'jam mgon blo gros mtha' yas zhabs la bum pa gang byo'i tshul du rdzogs par bstsal nas bstan pa'i srog mthud par mdzad pa'i rgyun mtha' dag slar yang rje bla ma dam pa mchog gis kyang phra zhing phra bar rtsad gcod dang 'brel yongs rdzogs zhib tshang dang*/_gtso che ba rnams lan grangs du mar gsan cing*/_thugs dam nyams bzhes dang 'chad spel sogs sgo kun nas 'gran zla bral ba'i phyag rjes las/_don gyis sgrub brgyud shing rta brgyad kyi bstan pa'i gsal byed chen por nges pa'i tshul rgya cher sngar smos pas spyir btang shes nus la/_bye brag tu thams cad mkhyen gzigs rje btsun bla ma mchog la gzigs snang du bka' babs brnyes tshul dmigs bsal sa bon tsam smos na/_thog mar snga 'gyur bstan pa'i bdag por nges pa'i tshul ni/_rje nyid kun gzigs mkhyen brtse'i mchog sprul du thog mar mtshan bzhes gnang yul dang*/_sdom pa gsum gyi g.yar dam thog mar bzhes shing mdo sngags rig gnas gsan bsam yongs su rdzogs pa'i gnas snga 'gyur rnying ma'i chos sde dpal kaHthog rdo rje gdan du gyur cing*/_'jam mgon mkhyen brtse'i zhabs gangs ljongs rgyal bstan yongs rdzogs kyi mnga' bdag chen por nges pa'i khyad par las bka' babs bdun gyi gsang mdzod kyang snga 'gyur bka' gter gyi ring lugs las gtso bor 'phros pas na/_rnam thar gyi nges gsang de dang rjes mthun par rje 'jam mgon rnam gnyis kyi zhal slob snga 'gyur bstan pa'i gsal byed mkhas dang grub pa'i rnam thar can kaHthog si tu paN chen/_zhe chen rgyal tshab rin po che/_rdo grub kun mkhyen bstan pa'i nyi ma/_gter chen las rab gling pa/_'brug pa rdo rje 'chang sna tshogs rang grol sogs kyi thugs bcud rdzogs par gsan cing so so'i dgongs gtad thun min dang bcas bstan pa'i bdag por mnga' gsol ba dang*/_gzhan yang mi pham 'jam pa'i dbyangs kyis kyang bdag gi bla ma mkhyen brtse rin po che'i mchog sprul rdzong sar du bzhugs pa 'di nyid ngo mtshar che bar 'byung zhes 'byung 'gyur mngon sum gzigs pas bsngags par mdzad pa bzhin/_bka' gter rtsa gsum lhag pa'i lha rab 'byams kyi bsnyen pa/_nye bsnyen/_sgrub pa/_sgrub chen bcas mthar phyin par gnang zhing*/_zab mo'i rdzogs rim rnams la nyams bzhes dang khyad par 'od gsal rdzogs pa chen po khyab brdal ye shes kyi ting nge 'dzin las nam yang mi 'da' ba klong chen nam mkha'i rnal 'byor chen por bzhugs nas/_snga 'gyur bka' ma dri med rnam gnyis sogs rgyud sde che phra dang*/_khyad par du nang rgyud yo ga rnam gsum yongs su rdzogs pa'i smin grol/_rgyud rgyal gsang ba snying po dang*/_'jam dpal sgyu 'phrul drwa ba/_spyi mdo dgongs 'dus bcas kyi rgyud bshad/_de rnams kyi gzhung pod dang chog khrigs skor/_rnying rgyud bcas kyi lung*/_gter ma mchog gi sprul sku rnam gsum/_gling pa chen po bcu gnyis/_dri med rnam gsum nas/_phyis byon rig 'dzin rtsal 'chang rnam gsum/_las rab gling pa/_dri med pad+ma gling pa yab sras bar du byon pa'i gter chos rtsod bral rgyun bzhugs phal che ba'i dbang lung khrid/_gzhung pod kyi lung dang*/_rin chen gter gyi mdzod chen mo bcas/_rnying phyogs bstan 'dzin che phra la gang la gang dgos bar ma chad par spel mdzad pa'i rgyun las zhe chen rab 'byams lnga pas gdan sa chen po 'og min o rgyan smin grol gling du rin gter gsungs pas mtshon/_khams bod stod smad nas/_byang reb kong gi yul tshun chad du snga 'gyur bka' gter 'chad nyan gyi rgyun rgya cher 'phel zhing*/_zhar byung gter mdzod dkyil tsaka cha tshang spar du 'khod pa sogs byung ba dang*/_khyad par du kun gzigs mkhyen brtse'i dbang pos snga 'gyur ba'i chos kyi srog lta bu bka' ma 'di yin pa'i bsngags brjod dang thugs rtsis che bar gnang zhing*/_gter chen mchog gling la'ang skyes sbyang gi yon tan sad byed du 'jam mgon rin po che las gsang snying rgyud bshad ched du gsan par bskul ba dang*/_dpal yul rgya sprul mdo sngags bstan 'dzin sogs la bka' ma 'di kho na gal gnad che bar yang yang gdams pa ltar rje nyid nas kyang snga phyir lan mang du gnang bas/_kaHdpal/_zhe rdzogs/_mchog gling gdan sa gong 'og sogs kyi bstan rgyun la dmigs bsal du bka' drin che zhing*/_de dag gi bshad grwa'i rgyun la so zur gnubs gsum sogs mkhas grub spyi dang*/_khyad par kun mkhyen rong klong rnam gnyis kyi gsung rab dgongs don 'jam mgon mi pham rin po che'i legs bshad kyis bkral ba'i srol 'dzugs gnang ba'i chos sde de rnams gtsor gyur sangs rgyas gnyis pa'i ring lugs 'dzin pa mtha' yas pa'i gtsug nor gcig pur gyur pa sogs thugs bskyed dang phrin las sgo kun nas 'gran pa'i zla thams cad dang bral zhing rnying bstan gzhir bzhengs kyi tshul du gsal bar mdzad pa ste/_snga 'gyur rig pa 'dzin pa yongs kyi 'khor los sgyur ba chen por gyur cing*/_dus kun tu 'od gsal ye shes kyi sku can lha dang rig 'dzin DA kis byin gyis brlabs te rjes su bzung bas dag pa'i gzigs snang la khyab brdal du spyod par mdzad pa'i tshul phyogs mtshon tsam smos na/_rje nyid kyi phyag thor 'khod pa/_me sprel smin zla'i tshes nyer dgur mtsho pad+mar 'byor nas bskor ba zhig phyin/_sdod gnas su 'byor te mos gus kyi rkyen las gu ru rin po che stong gzugs kyi 'od skya lam zhig shes nyams su mjal rkyen gyis bla ma'i rnal 'byor zhig bri 'dod byung bzhin de 'phral bris zhes dang*/_yang lo de'i zla 9phyi ma'i tshes19 la sbrul gzhung rdza 'gag sdod nub khog stod dang rgyu zhabs la gzer thung tsam byung ba sman g+hi tig dang*/_gu ru'i thugs rjes bskyabs/_tshes20 sbrul mgu rdza 'gag nas mar 'ong skabs gu ru mtsho skyes rdo rje 'chang mi pham rin po che'i tshig bdun bla sgrub nang gsal 'dra zhig shes nyams la shar ba de'i rkyen gyis tshar chen rin po che'i bla sgrub zhig yid ngor dran/_zla 9phyi ma'i tshes19 thang khu nas mar 'ong ba'i shing rong stug po nas 'ong bar char zim bu babs/_gnam gzhung sngo dwangs/_g.yas g.yon sprin 'khrigs pas nyams skyid pa byung*/_des rkyen byas nam mkha' sngo dwangs dbus gu ru rin po che gsang gos zab ber mnab pa'i steng rus rgyan thod skam bzhes pa/_g.yas rdo rje 'phyar/_gzhan rnams za hor ma spyi ltar can dang*/_sa ra ha/_sha wa ri/_ku ku ri pa/_mai tri pa/_mar pa lo tsA sogs bzhugs pa'i shes nyams za zi byung*/_/chu bur mig gis mthong zhes bshad na'ang*/_/bltar med 'dren byed ce re blta dgos shing*/_/de 'dra'i shes nyams rdzun ris snang ba 'dis/_/col chung rgan po nga ni bslus sam snyam/_/zhes gsungs/_yang me bya zla 5tshes10 chad pa'i dgu la 'bras ljongs lha yum gyis thugs khur bzhes nas thugs sgrub bar chad kun sel gyi tshogs btang skabs gu ru rin po cher dad mos 'bar zhing dga' skyo 'dres ma'i ngang gu ru mkha' 'gro'i tshogs 'al 'ol tsam yod snyam dang*/_dus kyi mi 'jigs pa'ang sbyin pa'i nyams zhig byung yang gshob rkyal gyi shes nyams rang bzo la skyag gtad gang yang med/_/ces gsungs/_gal gnad dgos pa gang che'i skabs gu ru rin po cher gsol 'debs mdzad pa tsam gyis zhal gzigs lung bstan 'byung nges pa'i gsung 'phros phebs pa dang*/_spyir 'jam dbyangs mkhyen brtse'i dbang po nyid dbus gtsang gi rdo rje'i gnas rnams su phebs pa'i tshe gdod nas grub pa'i gnas yul rnams dang gnyis su ma mchis par mkhas grub rig 'dzin dbang po rnams kyis byin gyis brlabs pa'i mthus gnas der phebs pa tsam gyis lha dang DA kis rjes su bzung zhing byin gyis brlabs nas chos kyi mdzod gtad pa sogs rnam thar chen mor gsal ba bzhin/_rje 'di la'ang de dang rnam dbyer ma mchis par nges pa'i tshul gzigs snang khyad par can 'di dag la dpyad pas shes nus so/_/me bya zla 9tshes la/_rdo rje gling gi ri rgyud seng chen nam rgyun shar nyi ma 'char dus blta bar song bas/_nyi ma 'char phyogs 'dir rgya nag ri bo rtse lnga yod snyam bi ma lar mos gus byas pas nyi ma'i dkyil zer dang 'grogs pa'i bi ma la ye re re byon nas rang la thim pa'i snang ba byung*/_bi ma'i bla rnal gsog skabs dpe rnying shog ser rgyal po'i bla dpe 'dra ba ldeb ring sngar gyi bris rnying phreng zhib la mang ba rdzogs pa chen po'i khrid skor zhig gi dbu nas ma tshang ba pod chen gcig klog nas thar thor bton pa rmis/_yang nub gcig bi ma la'i bla sgrub mkhyen gter nang nas khrom ser skya mang shos la gtsug lag khang zhig tu sku gsung thugs dbang gi byin rlabs 'don pa dang*/_'jam mgon legs pa rin po che las sngags chos shig zhus pa'i 'phros re bdun dus khong byon nas 'don chog gsungs pa sogs rmis/_khro rdzong mdar sdod nub 'jam mgon legs pa rin po cher rong phur dang rog phur pod gnyis bzang gos nag po'i thum can 'byor ba de'i nang nas phur 'grel 'bum nag gi dpe mjal nas gsung gleng mang du byed pa rmis/_sa khyi zla tshes nam langs khar rmi lam du gsang ba 'dus pa sgyu 'phrul mi bskyod pa gang yin chog pa'i sku mdog sngo dwangs hril sku byis pa lo brgyad lon pa'i tshad tsam zhig ye re re mjal ba rmis/_'di skabs mdo rgyud ma 'bum ther tshar nye dang gsang snying rgyud 'chad skabs yin/_me yos zla ba bdun pa'i tshes bcu gnyis la shar kaHthog tu yod skabs rmi lam la khang pa zhig gi nang yi ge rnying pa dang gsar pa shin tu mang po brtsigs pa'i rab gsal ngos nged rang 'dug pa'i mdun der mi rgan snum ber pags pa'i dug log chen po mnab pa 'brog pa lta bu zhig 'dug pa gnubs chen sangs rgyas ye shes red zer ba de la mdo dgongs 'dus 'grel ba zhu dgos snyam pas pod ring bzhi brgya yod rgyu'i nged nas lung spel byas na/_dang po rang gis tshar gcig bton/_de nas 'don rgyu byed srol 'dug pas bka' 'gyur las mang bas 'don tshod med byas pa/_mi rgan des pod 'di rnams mdo dgongs 'dus kyi 'grel pa yin pas thams cad khyod kyis thob par gyur cig zer bas rang gi bsam par gsar rnying mdo sngags thams cad mdo dgongs 'dus su 'dus shing bstan pa kun gyi gsang ba'i mdzod chen po yin pas des gsungs pa 'dra snyam/_de nas yig rnyog pod bzhi bcu tsam dang*/_pod kha shas lag tu bzhag nas gdams gtad lta bu mdzad song*/_de nas rgas po de mnga' bdag mar par gnas gyur pa mgul lba ba chen po smug dzi re ba zhig red 'dug pas 'di mar pa red dgyes rdor dngos yin snyam mos gus byas pas sems nyams la dgyes rdor dngos su snang ba ltar byung dbang zhu dgos snyam pas smug dzi re ba de'i mchu mur mur 'don pa lta bu zhig mdzad kyang sgra ma thos/_de 'dra mang du rmis mthar gnyid sad/_zhib cha ni dkor nag gis sgrib pas brjed 'byams su gyur to/_/me sprel zla ba bcu gnyis pa'i tshes bco lnga 'bras ljongs sgang thog tu sdod nub rmi lam du lha khang chung ngu zhig gi nang du phyin pas phug tu snyan shal mang po'i gseb zhig tu sngon byon rnying ma'i rig 'dzin chen po gnubs chen yin rgyu dbu zlum 'dra zhal mi tshad gcig 'dug pa de nyid mir dngos su gyur pa 'dra zhig gi phyag g.yas rang gi dpral bar sbyar ba dang sku lus 'gul ba snyam byung ba dga' skrag gnyis ka skyes/_gu ru'i gsol 'debs sh+lo ka gcig kyang gsungs pa ni/_rtsa gsum kun 'dus rgyal dbang pad+ma 'byung*/_/rang bzhin dbyer med ngang nas gsol ba 'debs/_/nad gdon bar chad thams cad zhi ba dang*/_/don gnyis bsam pa lhun gyis grub par shog_/ces so/_yang log gcig nas 'dra zhal lder sku khru gang ba zhig gtad byung ba phag gru yin snyam gsus pa che ba/_sha brgyag pa/_/zhal ngo che zhing sgom thag can zhabs pus phyed slong*/_g.yas rwa dung pus steng g.yon mnyam bzhag thod pa can de rang gi skye ba gong ma zhig yin snyam byed pa/_samyak+saM/_yang dag pa/_mchan/_/zhes pa'i yi ge gcig kyang 'dug pa rmis/_me bya zla ba gsum pa'i tshes nyer bdun nub chos dpe khang zhig gi nang mjal 'gro zer nas song bas gtsug lag khang rtsag mtho ba zhig gi nang chos brtsigs dpag tu med pa'i nang snar thang spar ma bka' bstan lta bu pod kha mtho ba dras kha dmar smug can 'dug pa bltas pas/_sangs rgyas kun gyi dgongs pa 'dus pa'i mdo chen po dang*/_de'i skor kha shas 'dug pa mchog ldan nas chos dbang gter ma red zer/_chos dbang la yod pa go ma myong byas/_yang pod kha shas zhal phyes pas nyang gi gter ma yin rgyur rnying ma'i sngags gzhung gi 'grel pa mang po 'dug pa rgyun ring mjal ba rmis/_me sprel zla tshes la lho brag smra bo cog mjal 'gro skabs dgon gyi gsham nyer slebs pa na/_bla ma mnga' bdag chen po dge bsnyen chas dbu skra thor cog yod pa/_g.yas rdo rje/_g.yon thod pa bsnams pa sku che tsam mjal zhing mthar rang la thim pa'i snang ba byung*/_sngar rdzong sar bzhugs skabs sprul sku a ban nas bsam gtan gling pa'i bka' brgyad dregs 'dul la dbang dpe yod tshul gsungs pa de 'byor na dbang zhig bka' drin bskyang dgos/_gter mdzod du dbang dpe dang dbang rgyun mi 'dug zhus pas mdangs phran nas glegs bam zhig rnyed pa rmis pa de la blta ba yin 'dra gsungs/_me sprel zla ba gnyis pa'i tshes nyer lnga la 'og min o rgyan smin grol gling du yod skabs de nub gnyid srab mor kun mkhyen klong chen pa byis pa lo brgyad tsam dbu zhwa rtse sgril/_chos gos btsag kha/_phyag gnyis sa gnon/_sku'i stod las 'od zer sna lnga gyen du 'phro ba zhig rgyun ring tsam du mjal lo/__/gzhan yang klong chen pa'i bla rnal mdzad byang du rjes su bzung zhing byin gyis brlabs tshul gsungs pas mtshon/_rnam thar zhal gsung las kyang klong chen pas rjes su bzung tshul gsungs pa sogs dang*/_rdo grub mchog sprul 'jigs med bstan pa'i nyi ma las klong snying yang gsang bla sgrub thig rgya'i dbang gsan skabs bla ma nyid kun mkhyen dngos su mjal ba'i gsung 'phros kyang thos/_gong zla'i tshes 17la gnas der rdor gling klong gsal dbang sgrub skabs dang po smin gter lam tsam gsal/_de gnas 'gyur gyi rgyal sras rdo rje gling pa na bza' sngon po phu dung can/_sku smad phyam tse dkris pa/_dbu la pad zhwa sngon po mnab pas dkyil 'khor mang shas sprul nas rang gter rnams kyi dbang dang*/_mthar glegs bam mang tsam gyi bka' gtad mdzad pa'i snang ba byung ngo gsungs/_phyis dpe rgyun gsar rnyed rgyud bcu bdun nas sgra thal 'gyur sogs rgyud kha shas kyi 'grel pa bi ma las mdzad pa rnams kyi lung kaHthog mkhan chen nus ldan sogs la 'chad spel gnang skabs/_gus nas zhal rtsed zhu zol gyis lung 'di nye brgyud yin rgyu byas na rung ngam zhus pas/_'grel pa 'di rigs phal cher theg mchog mdzod sogs dang don gcig par 'dug pas mdzod bdun ni mang po thob/_dpe rgyun yod dus lung rgyun zhig kyang ming btags na dga' snyam/_mkhyen brtse'i gdan sa 'dir dbang khrid lung gi rgyun gsar spel la bkra shis zhal dro red pas da res bton pa yin zhes gsungs pa 'di la'ang don gyi rgyu mtshan go rgyu che ba zhig yod 'dra/__/gnyis pa ni/_lha chos bdun ldan bka' gdams rin po che rjes 'brel dang bcas pa'i mnga' bdag jo bo yab sras dang*/_rje bla ma sogs dge ba'i bshes gnyen chen po rnams kyi mdzad spyod dang rnam thar lhag par gus pa'i bstod bsngags bcas sku mchod so sor mchod 'bul gzab rgyas gnang bas mtshon mchod sbyin gyi sgo 'phar rgya cher 'gyed pa dang bsags sbyong la 'bad brtson btud mar gnang zhing*/_bka' gdams rin po che'i gzhung gdams man ngag spyi dang byang chub lam gyi sgron ma sogs lam rim snga phyi/_blo sbyong rgyas bsdus skor la nyams bzhes kyis byang chub kyi sems rin po che rnam pa gnyis la rtsal 'byongs pas sku tshe dang phrin las la bar du gcod pa'i mi dang mi min gyis brdzi bar ma nus shing thugs dam gyi bogs 'don du gyur tshul zhal las thos/_rnam kun byams snying rje byang chub kyi sems 'di kho na rgyud la 'byong ba gal che zhes nan du gdams par mdzad/_'phags yul shing rta chen po gnyis kyi gzhung bka' pod lnga'i 'chad nyan gyi sde thub bstan bshad sgrub dar rgyas gling gsar du btsugs te mdo smad mkhas pa'i 'byung gnas legs bshad chu bo stong gi 'chad rtsod kyi mgrin rnga bar med sgrog pa'i dge 'dun gyi sde rnams kun spyod 'dul ba dang mthun par bkas bcad/_snga phyir bshes gnyen dam pa dag las gsang bde 'jigs gsum sogs kyi dbang dang bshad bka' ched du gsan bzhes gnang zhing*/_khyad par du rgyal bstan yongs rdzogs kyi mnga' bdag skyabs mgon bcu gsum pa chen po thub bstan rgya mtsho dang*/_bcu bzhi pa bstan 'dzin rgya mtsho sogs kyis thugs brtse thun min du rjes su bzung nas gsung gi bdud rtsis thugs rgyud gtams pa dang*/_bstod bsngags kyi me tog char du bsnyil te mnga' gsol bas mtshon bka' gdams gsar rnying gi bstan 'dzin ches mang bas dngos brgyud nas zhabs pad la bsnyen pas na bstan 'dzin dge ba'i bshes gnyen chen por don gyis grub pa dang*/_de dang 'brel ba'i gzigs snang ni/_dbus phebs dang po'i skabs jo bo rje'i bla ma'i rnal 'byor gyi mdzad byang du jo 'brom yab sras kyis rjes su bzung ba'i tshul dang*/_khyad par du shing lug zla 9tshes19 la rwa sgreng du gling bskor phyin pas/_shar shel lding gi g.yu shug sdong po'i rtser spyan gzigs phyag bzhi dkar po la jo 'brom sku mched rnam gsum sogs bzhugs pa'i nyams shar bas/_gsol 'debs dbang blang sogs byas/_yang 'brom gyi gzim phug du 'brom rje'i thugs kar mi g.yo ba sogs thig le'i lha tshogs bzhugs pa las 'od 'phro ba'i gsal nyams byung bar yid ches kyis mchod pa dang gsol 'debs sogs byas pa'i 'khrul shes byung ba rang nyid mos pa che ba'i yid dpyod kyi 'khrul cha las dag pa'i snang ba lta ci zhig_/ces gsungs/_tshes20 la nub phyogs pha waM rta 'bur ma bskor/_skra sen gtor/_de'i rgyab phyogs shug sdong rtsa bar ngal gso skabs gong bu'i mda' rgyang gi nam mkha' sngo dwangs la bka' gdams brgyud pa gsum gyi bla ma/_jo 'brom yab sras/_yi dam chos skyong bsam gyis mi khyab par bzhugs pa rnams las 'od zer kha dog sna tshogs pa'i 'ja' thig phyag mtshan sna tshogs pas brgyan pa nyi rdul ltar 'khrigs pa byung nas rang la thim mthar thams cad 'dus nas jo 'brom la thim/_de nas 'brom jo bo'i thugs kar thim/_de'i thugs kar yum chen mo/_de'i thugs kar thig le ser po bkrag gsal can/_mthar rang la thim pa'i shes nyams dang lus 'phar g.yo byed la khad pa byung ngo*/__/gzhan yang rje bla ma tsong kha pa las 'dus pa nye brgyud gsan pa'i gzigs snang gi gsham du bla ma rgyang 'bod yod pa'i gsung mgur zhig mjal ba gzigs 'bul gyis de'i lung dang*/_gsang 'dus rje las nye brgyud kyi dgongs gtad byin rlabs mdzad par gsol ba btab pas/_gsang 'dus 'grel pa bzhi sbrags rje gong ma'i phyag dpe bdag gi mgor bzhag ste dgongs gtad smon lam mdzad/_gus nas gsang 'dus 'grel pa bzhi sbrags rgyud bshad 'bul skabs/_sngar kun gzigs mkhyen brtse'i dbang pos gsang 'dus rgyud bshad gnang bzhed shin tu che yang rten 'brel 'phro can du song*/_da res rang re gnyis nas gdan sa 'dir rgyud 'chad nyan byung ba dgos pa che/_phran 'khrul snang la yid rton ci yod ma gtogs/_rje bla ma ni sku che bar ri rab tsam dang*/_mi tshad tsam zhal mjal thengs mang byung tshul gsung gi bdud rtsi dngos su thos/_sa sbrul zla 11tshes skor lha khang gtsang khang du thub pa chen por yod sar rdo skas la 'dzeg_/ngos chos gos dmar po gyon nas de mdun phyag 'tshal/_bzang spyod yan lag bdun pa phul nas sgo khyams su phyir 'ong skabs bla ma sku bong mthon po chos gos dmar po mnab pa/_dpon g.yog gnyis yar thon song ba thu'u bkwan rdo rje 'chang blo bzang bstan pa'i dbang phyug red zer ba sogs rmis/__/gsum pa snyan brgyud tshad ma bzhi ldan gsung ngag rin po che lam 'bras bu dang bcas pa'ang kun gzigs mkhyen brtse gong ma ngor e waM thar rtse'i sprul skur sku bdag zhus pa nas bzung sku gong 'og sku tshe ril por bzhugs stan chags pa'i gnas gdan sa'i gtso bo dpal ldan sa skya'i ring lugs 'dzin pa'i chos sde chen po bkra shis lha rtse nyid yin la/_rje gong ma'i thugs sras kyi thu bo gsang bdag rdo rje 'chang dngos 'jam pa'i dbyangs blo gter dbang po dang*/_'jam mgon ngag dbang legs pa gtso bor gyur pa'i sa ngor bstan 'dzin dam pa rnams kyis rje 'di nyid thun min thugs kyi sras su gyur cing*/_bka' srol de las rgyun bzhugs pa'i gdams pa yongs rdzogs nan bskyar du gsan bzhes dang*/_de dag gi bskyed bzlas rdzogs gsum gyi rnal 'byor la nyams bzhes thugs dam chag med gnang ba dang bcas bla ma dang lhag pa'i lhas byin gyis brlabs shing gur zhal sogs chos skyong bran du khol bas nus pa'i gding tshad brnyes par zhal gyis bzhes/_rdo rje rnal 'byor mas rjes su bzung zhing 'bar dang 'du ba gsum gyi drod rtags kyang mngon du mdzad/_bsnyen sgrub dang dbang chos kyi phyag len sa ngor tshar gsum so so'i lugs bzhin phra zhib cher gnang ba sogs rdo rje 'dzin pa'i mchog du gyur/_gangs can bstan pa'i mnga' bdag sa skya pa zhes mtshan don mthun par sa ngor tshar gsum la bzhugs pa'i rgyud sde gong 'og rnams kyi dbang bka' byin rlabs rjes gnang bcas/_de dag gi rdzogs rim gyi khrid ngang rgyud kyi bshad pa rnams dang*/_bka' 'bum gyi lung sogs lan grangs mang du 'chad spel gnang*/_khyad par du rgya gzhung chen po rnams gzhir bzung rje btsun gong ma'i dgongs pa gsal byed kun mkhyen go rams bsod nams seng ge'i yig cha rnams lung rigs kyi lam nas drangs te 'chad nyan gyis 'phel rgyas su mdzad pa'i klog pa thos bsam gyi sde dang*/_gsang chen snyan brgyud slob bshad kyi gdams pa sgom sgrub kyis nyams su len pa'i spong ba bsam gtan gyi sde bcas gsar 'dzugs mdzad pas stod smad kun tu 'chad nyan sgrub pa'i rgyun mang du 'phel bas gsang chen rgyud sde rgya mtsho'i mnga' bdag tu gyur cing*/_gzhan yang gdan sa khag rnams gtsor byas gtsug lag khang dang*/_sku gsung thugs kyi rten rgya che grangs mang gsar bzhengs/_'khon lugs yab chos phur pa'i sgrub mchod rgyas spros kyi rgyun 'dzugs pa sogs zhib par gong du smos zin pa ltar/_mdor na 'jam mgon sa skya pa yab sras kyi ring lugs mtha' bdag bshad sgrub las gsum gyi sgo nas phyogs thams cad du ches cher gsal bar mdzad cing*/_'khon rigs dpal sa skya'i bdag chen khri 'dzin gzhung zur gyis gtsos sa ngor skyes chen brgyud 'dzin dang bcas pa'i rigs bdag du gyur pa sogs kyis brtse chen yab sras brgyud par bcas pa'i thugs bskyed phrin las gcig tu bsdus pa'i rang gzugs bstan pa'i gsal byed chen por mngon sum du grub pa dang*/_de dang 'brel bar ye shes dag pa'i gzigs snang ni/_mang mkhar ka la phug ces pa sgra bsgyur phug red zer ba der lam zab bton pas/_'brog mi lo tsA phug chen nang gi 'dra zhal 'dra ba/_dbu zhwa paN zhu/_phyag gnyis rdor dril bsnol ba/_rab byung chas can zhig rang gi mdun gyi thad der bzhugs pa res rang dang gcig tu gyur/_res tha dad du gyur pa'i nyams shig byung gsungs/_rdor gling du sa khyi zla 7tshes skor gtsang g.yang chos sprul sku sogs la sdom gsum rab dbye bshad nye'i skabs/_chos kyi rje sa skya paN+Di ta de nyid zhabs phyed skyil gyis bzhugs pa rgya gar paN+Di ta'i chas lta bu/_phyag gnyis chos 'chad kyi rgya can/_dpral bar 'jam dbyangs dkar po/_mgrin par smra seng*/_thugs kar 'jam dpal ye shes sems dpa'/_lte bar dbyangs can dkar mo/_gsang bar mi g.yo ba dkar po rnams bzhugs pa la mos gus byas pas/_lha de rnams las 'od zer 'phro bstim sogs kyi nyams za zi byung yang zhag shas yi ge 'god rgyu ma byung bas brjed/_zla 10tshes sgang thog tu sdod pa'i skabs shig nyams snang la chos rje sa paN g.yas chos 'chad ral glegs/_g.yon mnyam bzhag tshe bum/_thugs kar tshe dpag med dkar po/_de'i bdud rtsi'i 'od zer tshe bum steng babs/_de las bdud rtsi rang thog 'bab pa sogs kyi nyams byung*/_dgung grangs sum cu skor yin snyam ba zhig tu chos rje las tshad ma rig gter gsan pa'i dag snang gi phyag tho zhig kyang mjal/_me bya zla tshes nub ngor dgon lta bu zhig tu rdo rje 'chang kun dga' bzang po rab rib zhig dang*/_khong gi dbang bum chu yin zer ba dngul gyi ril ba spyi blugs zhig tu chu 'dug pa rang gis btung nas spyi bor blugs pas dga' ba chen po thob par rmis/_dpal mgon zhal gyi gsol phrin mdzad byang gi mtshan du kun dga' phrin las rgya mtsho zhes gsungs pa 'di'i mtshan sus gsol ba red zhus pas/_sngar rmi lam du ngor gyi gdan sa nas ngor chen rdo rje 'chang dngos las rab byung bsnyen rdzogs sgrub par rmis skabs ming de gnang byung zhes gsungs pa 'di mtshan sus gsol ba red zhus pas/_sngar rmi lam du ngor gyi gdan sa nas ngor chen rdo rje 'chang dngos las rab byung bsnyen rdzogs sgrub par rmis skabs ming de gnang byung zhes zhal las thos shing*/_ngor chen las brgyud pa'i sdom rgyun la shin tu thugs rtsis che bar gnang*/_me bya zla 4tshes25 la/_nged rang ngor du 'byor nas khang pa zhig gi nang sdod par mgon po gur gyi sder sku zhal ngo shin tu chen po thog tshad gcig yod pa yer re re gsham sgo chen gcig nas yar byon pa dang*/_yang chos skyong sku chung ba 'dra min mang po zhig kyang yod par rmis/_yang de'i snga tshes gang yin brjed/_rang ngor du 'du khang sbug khri gsum gyi dbus mar bsdad nas 'tshogs pa dang lhan du zhal 'don byas pa snyam yang zhib cha brjed/_zla ba brgyad pa'i tshes stod zhig la dpal ldan bla ma bsod nams rgyal mtshan yin rgyu'i bla ma rgur nyams can na gza kha nem gsol ba zhig las kye rdor dbang dang*/_lam 'bras lta khrid nas rgyud gsum mdor bsdus shig thob pa'i nyams byung*/_me bya zla 8tshes la mang mkhar thub bstan dge 'phel gyis tshar chen rdo rje 'chang gi 'dra zhal rin po che'i mdun nas dad mos drag pos gsol ba btab pas phaTa?Hlan gnyis gsung snyam byed pa dang shes pa rtog med lus 'phar sprugs byed pa byung*/_yang me sprel zla 12tshes20 la/_tshar chen rdo rje 'chang gi bla rnal 'don skabs mos gus kyi rkyen las tshar chen rdo rje 'chang sku mdog sogs thub bstan dge 'phel gyi 'dra zhal rin po che dang dbyibs 'dra ba mi tshad gcig tsam yod snyam lung bstan zhig gnang*/_rang gis dbang bzhi blangs te rang la bstims pas rang dgyes rdor du gyur pa'i thugs kar bdag med lha mo bco lnga bzhugs pa'i snang ba ban bun byung ngo*/__/shing lug zla 7tshes20 la hor ye tha'i rda chen brgyud nas 'ong skabs tshes19 nub phyogs gnam sngon dwangs par zla ba mthong bas rkyen byas/_rje blo gter dbang po dran pa dang rje de nyid zla ba la rgyab yol byas pa lta bu'i gsang bdag khro bo'i skur gyur pa la mos gus dang dbang blang byas/_bla ma rang la thim pas rang rig gsal dwangs kyi nyams shar bas/_de'i nyin g.ya' ma sngon po'i khug gi thang sgar du rje nyid kyi bla rnal zhig bris/_/zhes gsungs/_me bya zla tshes29 nub yar klung rtse thang bsam gtan gling dgon pa yin snyam pa zhig gi nang chos rgyal 'phags pa'i gdung rus dang bla ma dam pa'i dbu thod red zer ba'i gdung rus tshal pa dang*/_dbu thod dum bu che tsam gnyis mjal kha zhus/_ban rgan zhig gis gdung rus de las yungs kar 'bru tsam kha shas byin/_ngos rang gi lag par blangs bas dum bu che ba zhig gog byung ba ngos rang nas tshag byas/_dbu thod dum bu yang tshe tsam rnyed/_de nas na bza' rnying pa mang po brtsegs 'dug pa de'ang bla ma dam pa'i na bza' red zer ba de las dngos grub zhu dgos snyam/_zhu rgyu dngos byung min brjed gsungs/_gzhan yang lam 'bras brgyud pa'i bla ma 'ga' res rjes su bzung tshul zhal gsung rnam thar las kyang 'byung ngo*/__/tshar chen gsol 'debs mjug_/kun dga' phrin las rgya mtsho don grub dbang gi rgyal pos 'dar grong chen sogs sbyar byang can gyi gsham du/_me sprel zla dgu pa phyi ma'i tshes7 la mchod sdong mdun sdod nub 'jam dpal chos dbyings gsung dbang gi dbang gzhan la bskur ba sogs dang*/_gong ming sngar yod pa la don grub dbang gi rgyal po zer ba sogs rmis/_sa skya bdag chen A yu badz+ras phur pa'i smad las gnang skabs sngags 'chang chen mo mdun thad bzhugs pa'i nyams dang*/_'jam dbyangs gzi 'od 'bar bar gsol smon skabs byin rlabs kyi mtshan ma phran bu byung ba brjed de thal/_/zhes phyag thor 'khod 'dug_/gzhan yang 'jam mgon legs pa rin po che'i rnam thar du/_rje 'di la lam 'bras slob bshad dang 'brel kye rdor rgyu dbang grub 'phral kun gzigs mkhyen brtse'i dbang po la gur lha brgyad kyis bskor ba zhal gzigs pas/_khong gi sprul sku la dbang phul bas thugs dgyes pa yin 'dug gsungs/_de skabs rje 'dis kyang legs pa rin po che sgo rum pa kun dga' legs pa'i 'byung gnas kyi rnam 'phrul du nges shes 'khrungs par lam 'bras bla ma brgyud pa'i rnam thar ljags lung gnang bar sgo rum pa'i rnam thar mjug tu legs pa rin po ches de lta bu'i rnam par thar pa byis pa'i blos bsam par dka' ba zhes gsungs shing rje 'di nyid la spyan cer gyis yun ring du gzigs song bar/_khong la nges shes skyes pa de bla mas dgongs song snyam pa byung gsungs/_yang legs pa rin po ches mkhyen sprul rin po che 'di nged kyi slob ma'i gtso bo yin/_bla ma'ang yin pas lam 'bras bla brgyud kyi zhal thang du'ang bris yod/_zhabs brtan gsol 'debs shwa lo ka gcig rgyun 'don zhu bzhin yod/_slob tshogs thams cad kyis kyang de bzhin gsol 'debs zhabs brtan bsgrub pa la 'bad dgos par gsungs shing*/_khyad par du 'jam mgon legs pa rin po ches rang gi thugs sras thu bo sde gzhung mchog sprul la bka' bslab gnang bar/_mkhyen brtse'i sprul sku rin po che 'di brtag mi dgos pa'i rdo rje slob dpon mtshan nyid dang ldan pa yin pas khyed kyis kyang bla mar brten dgos zhes phebs pa nas bzung rje 'di nyid bla ma'i dam par bzung ste/_phyis dgung grangs mthon por phebs pa na yang li thang nas rdzong sar bar lam thag ring por dbang len la yang yang phebs/_lan gcig slar phebs chos su 'jam dpal mtshan brjod ljags lung mdzad skabs rje 'di 'jam dpal gzhon nu dngos yin pa'i nges shes byung tshul dang*/_slob ma rnams la chos 'chad pa'i skabs su yang sangs rgyas kun 'dus phyi yi bla ma zhes mtshan nyid dang ldan pa ni mkhyen sprul rin po che lta bu yin zhes rgyun du gsungs par grags/_gzhan yang 'khor 'das dbyer med las 'phros pa'i thugs dam nyams bzhes kyi bgro gleng thun min du gnang ba sogs thugs yid gcig 'dres su bzhugs pa'o/__/bzhi pa ni mchog gi dngos grub mngon du byed pa'i gseng lam 'phags yul bka' bzhi brgyud pa'i gdams zab mnga' bdag mar pa'i bka' srol rtsa ba yan lag bcas kyi gdams ngag che phra mtha' dag gsan bzhes gnang bas rnam kun 'dir snang chos brgyad kyi snyems rtog bral zhing*/_rnam g.yeng dang snyoms las kyi bya ba ngan pa shugs 'byung du spong ba sogs sgrub brgyud gong ma'i rnam thar lhur bzhes kyis/_nang gi rnal 'byor 'od gsal phyag rgya chen po'i lta dgongs mthar son pas nyams rtogs kyi gsang mdzod brdol/_rigs kyi bdag po rnams la dad mos dang dag snang shin tu che bas mos gus dang rtogs pa'i bka' babs khyad par can brnyes/_mar mi dwags gsum nas deng gi bar sgrub pa nyams len gyi phyag srol bar ma chad pa bzhugs pa'i bde dgyes sogs rgyud sde'i bskyed rdzogs dang*/_khyad par ras chung snyan brgyud kyi byin rlabs khrid bcas rje mkhyen brtse nas kaHthog si tu rin po cher brgyud pa dang*/_kar 'brug gi chos drug dang phyag chen khrid skor mkhyen brtse nas rgyal tshab rin po che la brgyud pa/_chags med zhabs kyi phyag chen dmar khrid bcas la thugs rtsis cher mdzad cing nyams bzhes gnang bar mngon/_don gnyer ba rnams la gong 'khod rigs dang*/_lam mchog rin chen phreng ba/_thar rgyan/_nang brtag rgyud gsum sogs mos pa dang mthun par re ba yongs su bskangs shing*/_'bri gung dgongs gcig la mdo sngags zab don dang 'brel ba'i gsung bshad bstsal bas thams cad ngo mtshar gyi gnas la bkod/_rgyal dbang bcu drug pa rang byung khyab bdag rig pa'i rdo rje mchog dang*/_byams chen si tu pad+ma dbang mchog rgyal po/_zur mang drung pa rin po che sku phreng bcu pa chos kyi nyin byed/_rgyal sras 'jam mgon mchog sprul rin po che bcas yab sras rnams dang thugs dgongs dbyer med pa'i thugs bskyed phrin las kyi rgyun gcig 'dres su gyur/_sku zhabs si tu rin po che mchog gis deng sang khams bod kyi ljongs 'dir tshad ma'i skyes chen blo gtad zhu yul rje 'di nyid kho nar nges zhes sde dge sa skyong la yang nas yang du bka' gnang bar mdzad/_sku zhabs rin po che zhing khams su gshegs rjes dgongs rdzogs sogs dpal spungs bstan pa la dngos brgyud nas bka' drin che bar bskyangs/_kar 'brug bstan 'dzin skyes chen rnams kyi gtsug nor du gyur cing ring lugs 'di dag 'dzin pa'i chos sde che phra mang por bshad sgrub kyi rgyun sngar med gsar bskrun gyi thugs bskyed dang phrin las kyis khyab pas na/_mnga' bdag mar pa bka' brgyud kyi bstan 'dzin mkhas grub rnal 'byor gyi dbang phyug chen por grub pa dang*/_dag pa'i gzigs snang ni/_me sprel zla ba bcu gcig pa'i tshes gnyis la bal yul tu tai lo dang nA ro'i sgrub phug tu cung zad sdod skabs/_nA ro pa sku mdog sngo skya thor cog rus rgyan/_g.yas thod pa/_g.yon pa'i mtheb srin gyis bdud rtsi 'thor ba/_zhabs tsog pu phyed skyil can mjal snyam par dbang blang rang la bstim dmigs sogs byas so/__/maN[1$0000270]Da[1$0000300\u0f72]'i rgyal sa nas rim par dza lanadaha ra brgyud ri lir bgrod lam nas dge 'dun chos 'phel gyi gnas yig tu dza lanadaha ra ni grub thob o rgyan pa dang*/_rgod tshang pa'i rnam thar du gsal zhes pa'i gnas kang ra man+dir grags pa'i de'i thad tsam du slebs pa yin 'dra sems skyid de ba'i ngang nas mkha' dbyings su ku ku ri pa sogs grub chen mang shas bzhugs yod pa'i nyams snang gsal por byung*/_gro bo lung gi lha khang dmar por mar pa'i 'dra zhal mjal skabs dad mos chen pos gsol 'debs dang*/_dgyes rdor dbang blang sngags kyi bzlas pa'i sngags 'khor spro bsdu'i dmigs pa sogs byas pas spyan hrig byas shing*/_dngos po'i gnas lugs lam dang ni/_/'bras bu skye ba med pa ste/_/sems nyid ma bcos so ma 'di/_/rang byung ye shes phyag rgya che/_/zhes gsungs pa'i snang ba dang rig pa rtog med du rgyang tsam gnas pa'i nyams byung ngo*/__/rngog sprel gzhung gi mar pa'i gdung 'bum mjal skabs su/_gdung 'bum nyid dgyes pa rdo rje lha dgur gyur pa'i sngags aSh+Ta'i phreng ba rang la 'phros pa'i snang ba 'char/_me bya zla 5tshes19 nub lho brag mar pa yin rgyu'i mar pa'i sku dbyibs dang chas lta bu zhig gis 'pho ba grong 'jug byed thub min bshad 'dug_/dar ma mdo sdes byas pa skad zer/_mthar li 'dra dkar po'i bla sku zhig 'dug pa dar ma mdo sde'i 'dra zhal yin rgyu zhig rang gi lag na thogs pa rmis kyang gsal po ma dran/_gnam mtsho thog mar mthong skabs rang gi dad mos rkyen las dpal 'khor lo bde mchog gi pho brang thugs gsung sku'i dkyil 'khor dang bcas pa dpa' bo mkha' 'gro mang pos gar stabs byed pa'i 'khrul nyams rab rib byung bas rang gis kyang bde mchog gi sngags gang shes brjod cing de dag dang skal pa mnyam pa'i smon 'dun yang yang byas/_rdo rje gling du sa khyi zla 7tshes19 la rmi lam du rdzong sar gzim khang nang rje mi la'i sku mchod nyin gcig 'don rgyu gang yin brjed/_mchod pa dem bsgrigs rnams bsdus/_de'i phyir nyin yang 'tshogs dgos pa 'khrul 'khor gcig bskor dus mchod pa rnam lnga thams cad bsgrigs ma dgos pa ser sbreng gshar ba ltar dem thog gcig rjes nyis mthud byung bar ngo mtshar snyam byed pa rmis/_gnyid sad dus rje btsun la mos gus chen pos mtshan gyi gsol 'debs bton pas/_gangs ri ti se'i ngos la pho brang lta bu'i nang rje btsun nyid bde mchog zhal phyag rgyas pa'i skur gyur pa la snyan brgyud thob re'i gsol ba btab pas dbang rgyas bsdus dang glegs bam gyi sdom gtad rnams sprul pa'i dkyil 'khor lta bur skad cig gis thob pa'i nyams 'al 'ol zhig byung gsungs/_stod lung mtshur phur 'gro skabs rgyab ri bde mchog zhal phyag yongs rdzogs ri yi gtos dang mnyam pa mthong snyam dang*/_mdun ri'i mar rgyab brag karma pak+shi sku mdog smug po shin tu che ba mthong snyam byung*/_sa khyi zla 1tshes15 la bro nad kyis mnar bzhin dpe khang nas dpe pod gcig zhal phyes pas/_pak+shi'i gsung gsang sngags kyi rgyud sde'i spyi rnam skor zhig 'dug pa lam tsam mjal nas chu tshod gnyis tsam song ba na/_des rkyen byas pa lta bus nyams snang la mdun mkhar pak+shi de nyid sku mdog dmar smug ag tshom nag khyug ge ba zhal ras khro 'dzum spyan lta stangs phyag sa gnon zil can gyi mdun der DA ki ma sbom thung kha shas yod pa'i nyams byung*/_nga rang nad drag pa'i gsol ba btab pas/_DA ki de rnams dang bla mas phyag gis byabs pa 'dra kha shas byas/_bla ma dang DA ki de rnams las me lce lta bu dmar thar thar 'phros nas rang lus bsregs/_rang bla ma pak+shi'i skur gyur pa'i 'khrul snang zhig byung ba la brten nas bla sgrub zhig yid ngor gsal bzhin bris/_sa khyi hor zla 9tshes la zab mo nang don bshad lung mchog ldan sogs la bgyis pa'i tshes bcu'i nub nam smad rgyal dbang rang byung rdo rje dran pa'i rkyen gyis rje de nyid mi tshad tsam zhwa nag chos gos phyag gnyis chos 'chad mdzad pa zhig la gsung 'bum dgongs gtad zhu snyam pa dang*/_yig pod skya ma kha shas yod snyam/_res shog nag gser bris lta bu/_res zhal nang nas yi ge mang po thor thor byung ba rang la thim pa'i nyams shar ro/__/zla tshes13 nub mtshur phur rgyal dbang bcu drug pa mjal/_ngos la byin rten gnang rtsis kyis rten sgam mang po'i dkyil du sgam gcig rang nas zhal phyes pas/_gnam lcags rdo rje phur pa kha shas dang*/_gzungs thag rdo rje rnying pa li ma lta bu 'phan dzar ldan pa kha shas 'dug_/rgyal dbang nas khyed rang byin rten gang dgos khyer gsungs te rin po che rang gzigs long med par sku 'chags mdzad pa dang*/_sku zhabs si tu gong ma de'ang rmis kyang brjed/_me bya zla 2tshes15 nyi ma me bzhi'i 'grub sbyor nyin rtsa gsum spyi 'dus kyi dbang zhig kyang bskur/_'ja' tshon tshe sgrub sogs lung 'don skabs de'i nub gnas mdo chags med rin po che'i gdan sa skor gyi rmi lam mang zhig byung ba brjed/_yang mnal ba na gnyid srab mo'i nyams snang la/_chags med rin po che dang po dbu la sgom zhwa mnab pa/_dar cig nas thang che ba zhig gi steng rang dang cung thag ring tsam na dge slong dbu zlum bgres nyams med pa zhig bzhugs 'dug pa khong gi gsung rnams lung zhu dgos snyam pa phyag dpe ni bla ma khong rang gsung 'byung ba'i gzhi yin snyam byin rlabs zhu ba'i dmigs 'dun byas pa dang*/_phyag na baiDUraya'i shog gu la mthing skya zhig gis bris pa ldeb gcig gnang nas gsung thams cad kyi rtsa ba yin rgyu de 'dra zhig gtad pa dang*/_bla ma 'od du zhu/_glegs bam chos rtsigs chung ngu zhig tu gyur/_de gnas gyur te thugs chen 'khor ba dong sprugs lta bu g.yas ril ba spyi blugs lta bu'i khrus bum mchog sbyin gyis 'dzin pa/_g.yon skyabs sbyin thugs kar pad phreng 'dzin pa zhig tu gyur/_de rang la thim pas rang yang de 'drar gyur ngang nyams sad do/__/lnga pa ni mkhas grub khyung po'i gser chos shangs pa bka' brgyud skor/_lam 'di'i bka' babs 'jam mgon gu Na'i zhabs kyi thugs sras mkhas dbang bla ma bkra shis chos 'phel zhabs dang*/_sgrub dpon bla ma karma rang byung kun khyab sogs las smin grol dang gdams skor gzhung rnying yongs rdzogs nan tan zhib gsan gyis nyams bzhes dang*/_rgyud sde lha lnga/_lha bzhi dril sgrub/_bla mgon dbyer med sogs ljags bsnyen/_stag tshang sgrub sder lugs 'di'i nyams len dang 'khrul 'khor sogs rgyun 'jags gnang*/_don gnyer la smin grol 'chad spel gyi thugs bskyed dang phrin las rgya che ba sogs shangs chos rin chen bdun brgyud kyi bstan pa 'dzin skyong spel ba'i gsal byed dam par grub pa dang*/_ye shes dag pa'i gzigs snang la/_me sprel zla 10tshes la dur khrod bsil tshal sha wa ri'i sgrub phug tu mchod pa 'don skabs/_sha wa ri pa ri dwags kyi ro phrag par bkal nas g.yas mda'/_g.yon gzhu bsnams pa zhig la gnas lnga'i lha rnams kyang rab rib yod snyam rig pa gsal dwangs byin rlabs kyi zil cung zad byung bas lus 'phar ba mdun du mgon po tshe brtan yod pas mthong ngo*/__/bla sgrub zhig rig ngor thon pa de'i phyi rol lha khang du bris pa lags zhes dang*/_sngar zhe chen nas rgyal tshab rin po che las gdams mdzod nang gi shangs chos gsan skabs gzim lam ngo mtshar can kha shas byung yang de skabs tho ma 'khod pas da lta brjed/_de rigs la don cher ci yod ces gus la bka' bstsal ba tsam las phyag thor 'khod rigs mi snang la/_bka' srol 'di'i shing rta grub chen thang stong rgyal pos rjes su bzung tshul gong gsal ltar ro/__/drug pa ni pha gcig dam pa sangs rgyas kyi gdams zab zhi byed skor dang*/_ma gcig lab sgron gyi bka' srol dam chos bdud gcod bcas kyi smin grol gdams pa'i rgyun bzhugs rigs zhib tu gsan bzhes kyis skabs su bab pa'i thugs dam nyams bzhes mthar phyin cing 'chad spel 'dzin skyong gi phrin las kyang g.yel med brgyud mar skyong bar mdzad pa dang*/_grub chen dam pa sangs rgyas kyi gdams zab zhi byed lam lnga skor dang*/_ma gcig lab sgron gyi gcod yul lam khyer lugs srol rnams kyi smin grol rgyab brten bcas zhib tu gsan bsam sgom pa'i pha mthar son/_gdul bya gang la gang 'os la 'chad spel dang bcas bstan pa'i rgyun nyams med 'dzin skyong gnang zhing*/_khyad par du ma gcig lab sgron dang rdo rje rnal 'byor ma dbyer med pas rje grub thob chen por dngos su gdams pa'i gsang spyod snyan brgyud chen mo zhes nyams len byin rlabs kyi rgyun khyad par 'phags pa shin tu gces spras kyis thugs nyams su bstar zhing nyer mkho'i yig cha gsar spel ci rigs kyang gnang nas mos ldan don gnyer rigs la mnog chos kyi tshul du spel bar mdzad cing*/_snod ldan la gtad rgya bcas rdzogs par gdams pa sogs zhi gcod kyi bstan pa 'dzin pa'i mnga' bdag chen por nges la/_gzigs snang ni/_sku gong ma'i dam pa'i bla sgrub snyan brgyud snying gi thig le'i dbang dpe dgongs klong du gsal ba ltar gtan la phab pa'i mdzad byang las/_kho bo pad+ma ye shes rdo rje rang lo 65 me bya zla 12tshes22 la dam pa sangs rgyas de nyid kyi sku'i snang brnyan rab rib 'char ba'i rkyen gyis yid ngor shar ba bzhin rje bla ma pad+ma 'od gsal mdo sngags gling pa'i dam pa'i bla sgrub dag snang snyan brgyud kyi smin byed du yin par rloms nas 'bras ljongs mkha' spyod DA ki'i pho brang ngo mtshar sprul pa'i zhing gi gtsug lag khang chen po'i 'gram logs kyi ba gam du shar mar bris pa sogs dang*/_de'i gsham du phyag bris mar/_gong gi rgyal zla'i tshes20 skor 'gos lo'i deb ther sngon po mjal ba'i tshe zhi byed skor gyi rnam thar lam tsam re bltas skabs dam pa sangs rgyas sku mdog dmar smug dbu skra nag po ral pa ring po'ang min pa thung ngu'ang min pa'i ar bad can lta bu/_phyag gnyis res dpral bar nam mkha' mdzod rgya/_res DA ru thod pa bsnams pa zhig yid ngor lam tsam gsal lo/__/zhes bkod par mdzad 'dug_/zangs ri mkhar dmar gyi ma gcig 'dra zhal mdun bzhugs zhag gi ring gsung chog gnang skabs gzigs snang ngo mtshar can mang du yod par nges kyang phyag thor 'khod pa bzhugs mi 'dug__/bdun pa ni gnyis med rgyud rgyal dpal dus kyi 'khor lo'i zab don rdo rje'i rnal 'byor sbyor ba yan lag drug gi skor gangs ri'i khrod kyi dus zhabs pa chen po 'jam mgon mkhyen kong rnam gnyis la dpal dus kyi 'khor lo'i bshad sgrub shing rta jo zhal gnyis kyi bka' srol smin grol rgyud bshad dang bcas pa'i chu bo thams cad rdzogs par 'bab cing de thams cad tshang ba rje bla ma mchog gi thugs mtshor bskyil ba nyid 'chad spel gyi phrin las rgya cher bskyangs shing*/_ston pa chos rgyal nyer lnga phyed dum skyong brgyud 'dzin bcas kyi grwa thang sum cu so bdun shin tu khyad 'phags gsar bzhengs dang*/_nag zla'i dus chen la mchod chog gzab rgyas ma chags par gnang zhing*/_gus pa la'ang de bzhin grub na legs pa'i bka' 'phros gnang zhing*/_rgyud rgyal 'di'i zab don rnams la gzhan gyi lad mo tsam ma yin pa'i nges shes khyad par can thugs la 'khrungs tshul nges pa don gyi zhal bzhes gnang zhing*/_zhing 'di'i gdul bya rdzogs la nye ba na'ang gsung chog kun gyi rjes mar dus chen dang khel bas 'di nyid kyi mchod chog gzab rgyas su gnang ba dang*/_ma 'ongs pa na rig ldan nyer lnga drag po 'khor lo can gyi skur bzhengs par zhal gsung gsol 'debs khag las yang yang gsal ba ltar rgyud kyi rgyal po 'di nyid kyi bstan pa'i bdag por nges pa som nyi dang bral zhing*/_gzigs snang skor/_me sprel zla 11tshes la lha babs gnas su bstan rim mnan pa tshar ba'i nub rmi lam du dus 'khor blos bslangs che ba zhig gi nang du zhugs pa dang sku 'khor gyi phyi'i 'dod ma rnams hril po leb mor bzhugs pa rnams nas/_nang 'khor 'dod ma rnams kyi sku gcig gan rkyal yod par cung sdod pa 'dod ma sngon ma de'i bye brag red zer/_de nas nang 'khor gyi mdun phyogs zhig nas sgrub mchod btang*/_bdud rtsi nang mchod la mi kha shas 'dzom dgos grwa pa 'ga' la skad btang*/_de 'dra'i ngang gnyid sad do/__/sa khyi zla tshes20 nub rdo rje gdan gyi sangs rgyas ye shes zhabs kyi dus 'khor dkyil 'khor gyi rdo de gnam gru nang khyer 'ong ba red kyang zer/_mis pang nas khur ba red kyang zer 'byor 'dug_/de'i steng me mchod blugs grabs byed pa dang*/_yang rdo stegs la mkha' 'gro'i dkyil 'khor yod pa chung tsam zhig gi steng me mchod blugs grab byed pa rmis/_me sprel zla 9tshes23 la/_lo de'i rgyal zla'i tshes nyer gsum/_/kun mkhyen dol po sangs rgyas dran/_/yang yang gsol btab sku'i snang ba/_/chung ngu zhig las cher ma dran/_/gnyid ni sad res dus dag tu/_/gsol btab nam smad cha zhig la/_/khri ni mdzes pa zhig gi steng*/_/kun mkhyen de nyid mi tshad tsam/_/sku cam ser po gsol ba dang*/_/rje yi thugs dam sku dbyibs 'dra/_/yer gyis bzhugs la gsol ba btab/_/bar chad zhi ba'i smon lam byas/_/yang gcig rgya mi 'dra ba dang*/_/lha khang gsar bzos tshad blangs pa/_/thag pa lta bu zhig gi tshad/_/ngos rer 'dom pa sum cu re/_/babs 'dug zer ba la sogs rmis/_/dmar phyogs tshes ni nyer bzhi'i nub/_/'jam dbyangs bstod pa gang blo dang*/_/'grel pa sum cu so gnyis po/_/rngog los thugs gtsigs mdzad pa de/_/gzugs su gyur nas yi ge ni/_/me 'od lta bur gyur pa'i nang*/_/rang nyid zhugs pa la sogs pa/_/bshad dka'i rmi lam mang po zhig_/nam gyi rgyun ring rmis pa dang*/_/kun mkhyen dol po'i sku la ni/_/rigs gsum sems dpa' bzhugs pa sogs/_/'al 'ol gsal bzhin bla sgrub ni/_/'dre yis lag bsgul bris pa lags/_/gzhan yang sku tshe'i stod du dol po'i bla rnal gyi mdzad byang la'ang kun mkhyen nyid kyis rjes su bzung tshul can mjal bas mtshon/_dpal rtse rdor dbyings sogs kyi rgyud sde'i dbang dang bskyed rdzogs skor deng sang rgyun dkon pas de dag 'chad nyan 'dzin spel la thugs kyi g.yar dam du bzung bas na/_bu dol jo zhal gyi bstan pa'i srog mthud par mdzad do/__/brgyad pa ni grub thob chen po o rgyan pa la rdo rje btsun mos dngos su bstsal ba'i man ngag rdo rje gsum gyi bsnyen sgrub skor gzhung gdams man ngag gi rgyun bzhugs rigs rdzogs par gsan te 'dzin skyong spel ba'i thugs bskyed dang phrin las rgya cher bdag gir mdzad pas don gyi bstan pa'i gsal byed dam par nges shing*/_'di skor thugs dam nyams bzhes kyi mngon rtags zhal gzigs nyams snang ci rigs bzhugs par nges kyang dmigs bsal gsung 'phros dang phyag thor gnang ba dngos su mthong thos kyi skal par ma gyur la/_der ma zad g.yung drung bon gyi bstan 'dzin mdo smad shar rdza rtogs ldan slob brgyud dang bcas pa la rang lugs smin grol nyams khrid kyi yi ge gsar du mdzad par bskul zhing*/_brgyud 'dzin kun la bstod bsngags kyis dbugs dbyung gnang ba las nam yang khyad du gsod par mi mdzad do/__/de dag kyang rnam thar rtsa bar/_gong ma 'jam mgon bla ma de/_/grub mtha' kun la ma ltar mdza'/_/rang rang rgyud lung man ngag gi_/rnam dbye ma 'dres so sor mkhyen/_/phan tshun bsre bslad mi mdzad cing*/_/gang la gang 'dul chos ston pas/_/sa dge kar rnying thams cad kyis/_/rang gi bla ma bzhin du 'dzin/_/bdag ni de ltar ma lags kyang*/_/bod yul shing rta che brgyad po/_/kun la dag snang cher bskyed cing*/_/log rtog sgrib pas ma gos par/_/gshe skur grub mtha'i phyogs 'dzin spangs/_/dbang khrid man ngag rgyud lung rnams/_/rgyun bzhugs thams cad 'bad pa ches/_/nyan dang mnyan par 'gyur bar smon/_/bstan pa ring du gnas pa yi/_/lhag bsam bzang pos thob pa rnams/_phyogs ris med par spel ba dang*/_/skye 'gro mchog phal thams cad la/_/zur za phrag dog brnyas bcos spangs/_/kun la phan pa'i bsam pa ni/_/dung dang pad rtsa ltar dkar ba'i/_/sems bskyed smon lam bzang po btab/_/'brel pa thams cad don yod byas/_/de ni rnam thar snying po yin/_/zhes gsungs pa ltar/_gangs ljongs rgyal bstan yongs rdzogs 'dzin skyong spel ba'i rnam thar la 'gran zlas dben pa rje bla ma 'jam pa'i dbyangs sku gong ma'i rnam thar gyi gsang ba ni/_thams cad mkhyen gzigs yon tan rgya mtsho'i zhal nas/_thob 'jal rig pa nor sogs kyi/_/dbang du gyur min skyes sbyangs las/_/bod yul rgyal ba'i ring lugs pa/_/kun gyi tshogs rjer gyur pa yi/_/tshul 'di kho nas 'jig rten 'dir/_/thub dbang gnyis pa'i rnam thar 'dzin/_/bshad brgyud 'degs pa'i ka chen bcu/_/sgrub brgyud shing rta che brgyad kyi/_/gzhung lugs smin grol gdams pa'i bcud/_/gangs can ljongs su bzhugs so 'tshal/_/gsan bsam sgom pa mthar phyin mdzad/_/skye ba med las skye tshul dang*/_/'pho ba med las 'pho tshul bzhin/_/spangs rtogs kun gyi mthar son kyang*/_/gdul bya thabs kyis 'dul bar bstan/_/ces rjes su bsngags par mdzad pa nyid don la gnas so/__/gnyis pa bshad ma thag pa de dag las gzhan pa'i gzigs snang sna tshogs rigs rje bla ma nyid kyi phyag thor btab pa rags rim rnyed pa rnams bcos bsgyur med par phyogs gcig tu bkod pa 'di lta ste/_legs nyes blang dor ston mdzad cing*/_/'gro ba'i mun sel chos kyi rje/_/dpal ldan 'dren pa mchog rnams kyis/_/bdag la rtag tu thugs rjes gzigs/_/blo gros blo ngan nyon mongs kyi/_/drwa ba'i sbubs su rab 'thums bdag_/bcu phrag drug la lngar lhag pa'i/_/mgo zla'i tshes la 'phags yul gyi/_/rdo rje gdan mjal phyin pa'i tshe/_/rgyal gyi zla ba'i tshes lnga pa/_/nyis brtsegs snga ma'i dus kyi char/_/byang chub chen po'i mdun sa ru/_/gsol btab bgyid skabs de nyid ni/_/thub dbang dngos su gyur pa yi/_/thugs kar rdo rje 'chang chen sngo/_/yum med longs sku rdor dril bsnams/_/de yi thugs kar kun tu bzang*/_/rgyan med yab yum 'khril sbyor bzhugs/_/phyi rol 'od zer phung po'i klong*/_/sangs rgyas mang po bzhugs pa yi/_/nyams kyi snang ba rab rib byung*/_/tshes lnga phyi mar yang de 'dra'i/_/snang ba byung bas bla rnal bris/_/mgon po phyag bzhir gtor 'bul zhig_/bya dgos snyam rung dpe ma 'dzoms/_/de nub ye shes mgon po ni/_/rdo sku nag po'i smad cha nas/_/zhabs sogs che sbom ldan pa zhig_/mjal zhing de yi phyi nyin la/_/mchod dpon lags kyis bka' 'gyur gyi/_/rgyud 'bum ga par dngos grub 'byung*/_/rgyud gzhung zer bar dran pa la/_/rgyud dpe rnyed na de'i steng nas/_/cho ga bsdebs te 'don rung snyam/_/de nub rgyud rgyal de nyid kyi/_/steng nas cho ga bya ba rmis/_/des rkyen gsol skong bri 'dod byung*/_/nyung ngu zhig ni shar mar bris/_/mnyan yod mchod 'bul bya ba'i skabs/_/steng gi nam mkha' sngo sangs cher/_/de bzhin gshegs pa'i sku che bar/_/sangs rgyas la sogs mang pos bskor/_/bzhugs snyam 'al 'ol tsam zhig byung*/_/sgang thog 'byor nas rmi lam du/_/bya rgod spungs pa'i ri bo'i mdun/_/mchod stegs mdzes pa zhig gi khar/_/ston pa'i rdo sku che tsam mdun/_/mchod pa mang po bshams pa rmis/_/yang gcig nad mnar rmi lam du/_/rdzong sar gzim chung rnying pa ru/_/'khrul zhig byon nas bdag la ni/_/zhal gtugs ljags phu zhig mdzad cing*/_/thang rgyal gser sku khru gang tsam/_/g.yas pas sa gnon g.yon mnyam bzhag_/thod chang mthon por 'phyur ba'i rtser/_tshe bum chung ngu yod pa zhig_/'jog snod thod sgyed dang bcas pa/_sgros legs gsal 'tsher 'bar ba zhig_/bsnams pa'i sku de dem steng bzhag_/thod bum 'gril dogs zur du blang*/_de nas phyag steng bzhag pa sogs/_mang po rmis kyang phal cher brjed/_/'phags yul rdo rje gdan byang chub shing gi nye 'gram zhig nas mchod 'bul smon lam byed skabs su gnadaho la'i phyogs mtshams steng mkhar thams cad du sangs rgyas byang sems mang po bzhugs pa'i snang ba byung*/_mnyan yod gnas mjal ba na sangs rgyas ser 'jam mang po zhig mkha' dbyings su bzhugs snyam pa dang*/_lha babs mjal dus de bzhin gshegs pa chos 'khor gyi phyag rgya can shin tu che ba mkha' dbyings su bzhugs pa las dbang blangs shing*/_mthar d+hIHser por gyur nas rang la thim pa'i shes nyams byung ba'ang rang mthong*/_me sprel zla 12tshes5 nyis brtsegs kyi phyi mar/_bya rung kha shor gyi mchod rten bang rim steng nas gnas chog rgyas pa gtong skabs sangs rgyas byang sems gnas brtan dgra bcom mang po nam mkhar bzhugs snyam byung*/_de'i dgong mor bskor ba byas pas mchod rten de nyid bde gshegs zhi khro sgrub pa sde brgyad kyi dkyil 'khor lha tshogs phyi mchod rten la nang na sgrib med bzhugs pa 'dra zhig shar bas phyag dang sbrags na raka bskang bshags smon lam dang bcas pa bton/_rlung rig dwangs shing bde ba byung ngo*/__/'phags pa'i gnas brtan chen po yan lag 'byung gis rjes su bzung tshul rnam thar zhal gsung ma las gsal ba dang*/_yang tshes11 nub ri li'i nang nyal 'dug skabs bal yul du yod pa'i dbyig gnyen gdung 'bum de dran pa'i rkyen gyis/_dbyig gnyen paN[1$0000270]Da[1$0000300\u0f72] ta'i chas paN zhu dang phyag g.yas skyabs sbyin thugs ka g.yon mchog sbyin/_zhabs rol stabs 'gying nyams can shar ba la mos gus dang gsol 'debs byas/_dad pa la la gdon gyis byas gsungs pa de min na legs/_/sa khyi zla 1tshes na 'bras ljongs sgang thog tu bro nad rgyun ring mnar skabs/_slob dpon tsan+d+ra go mi yin rgyu rgyan drug kaHthog tu phur bu'i phyag bris nang gi dbyibs dang sku chas de lta bu zhig gis rnam 'joms kyi bkru byabs zhig mdzad pa'i 'khrul nyams byung bas nad khams cung zad dwangs/_yang zla 2tshes27 dgongs 'dus bskang chog skabs sha za kha mo che zhi ba'i gzugs can gyi ngos la 'khyud nas b+ha ga nas rdo rje 'jibs te khrag chu ser sogs 'then song ba'i snang ba byung rkyen gyis nad khams la phan rkyen cher byung snyam/_me bya zla 9tshes11 nub rdzong sar gzim chung dbang khang du mi pham rin po che red zer ba'i bla ma na khreb zhig 'dug pa de la dga' spro lta bu'i ngang der slob gnyer ba zhig 'dug pa de la bla mas rtsod pa'i thal ngag kha shas btang 'dug_/de nas nyi yol du song ste/_nged nas thal 'gyur ba'i lugs kyi nyan rang gis bdag med rtogs ma rtogs 'di mi go 'dug pas rtsod ngag zhig gtong chog par zhus/_rang nas bla ma la phyag 'tshal/_rig stong 'jam dpal 'don dran kyang tshig 'go gtan nas ma dran/_gzhan zhig bton/_gang zhig lta ngan gyis sogs 'jam dpal mchod brjod ni blor 'gro mi thub snyam nas 'don ma spobs pa bla ma nyid kyis gsungs/_de nas nged kyis thal ba kha shas 'phang bar bla mas mang po zhig gsungs kyang gsung mi gsal ba lta bus cher go ma thub pa sogs rmis/_tshes22 nub zhe chen kong sprul rin po che'i phyag bris shog lhe zhig 'byor ba/_nged zla ba gsum pa'i nang zhing khams 'gro ba yin gsungs pas de la phan byed tsA ri'am/_adz+nya phug gam cong zhi phug la sku mtshams bzhugs dgos zer ba dang*/_gzhan yig phreng kha shas nang lung bstan 'ga' 'dug kyang ma dran brjed de thal lo/__/sa khyi zla 9tshes26 la rmi lam du ngos dang gsol mchod gnyis sogs sde dge lhun grub steng gi gtsug lag khang chen po'i nang 'byor nas yun ring tsam bsdad/_nged kyi zur der ngor mkhan chen dpal chos kyi gdung rten bum pa man yod pa la/_bum pa'i kha spang leb kyis bcad 'dug_/'di'i nang sku gdung hril bu yod pa mjal zer shing leb rnams bsal/_de'i 'og snyug gis bslas pa'i kha chod 'dug pa blangs/_de'i gseb nas lag pa brgyab pas dri bzang phur ma mang po brlan zhad can dang*/_ril ril lta bu 'ga' 'dug pa gcig blangs pas la phug lo ma dang bcas pa chung ngu gcig byung ba phyir bzhag_/yang ril ril mang po lag gis myong 'dug pa gdung rus dang thugs 'dra min nam snyam/_yang kha rgyab nas bzhag pa/_dar cig nas mchod dpon mchog ldan lta bus sku gdung de mar tsam drangs nas bum pa zhal phyes pa'i nang dri bzang rlon pa drod can dri zhim 'thul zhing de'i nang nas sku gdung khru gang tsam zhal ngo bgres nyams dbu skra se chob skra mthug po rang med pa'i cung ring zhad/_zhabs gnyis byis pa'i rkang pa lta bu gzhon sha chags pa/_rgo logs min pa'i gson po dngos 'dra ba/_zhabs gnyis pus bslangs rkang mgo phyir bstan byas pa yar blangs nas ngos kyi rgyab phyogs gtug_/spyi bor bzhag_/de nas rang gi mdun du blangs nas gsol 'debs dbang len smon lam dos drags pa byas/_sku'i gnas rnams la zhal gtugs pas ljags dbugs 'phro ba dang drod tsha chi le bar bzhugs/_shin tu mos gus byas nas bum pa'i nang phyir bzhag_/gdung ras na bza' lta bu dri bzang gi brlan can 'dug pa las tshal pa che tsam zhus nas kha gcod sogs sngar bzhin byas pa ya mtshan can zhig rmis/_yang tshe dbang rdo rjes gu ru bla ma nor lha gser sku rnying pa mtho gang tsam/_g.yas rdo rje rgyal mtshan/_yang kha T+wAM lta bu ring po zhig dang ne'u le dang bum gter sogs 'dzin pa zhig byin pa rmis/_tshar chen rin po che'i gsol 'debs gsog skabs/_sa khyi zla tshes nub rmi lam chab chob mang po dang*/_sde dge'i spar ma chos rtsigs mang po yod pa'i sar slebs pa dang*/_thugs sgrub bsam lhun dang thugs sgrub sgrol ma gnyis yi dam dgos pa dang*/_gur mgon gyi gzhung pod me 'bar ma yin rgyu'i pod gcig shog gu kha dog sna tshogs la bris pa sdeb kha shas re phyar nas gzhan la ngoms pa lta bus bshad mi shes pa zhig rmis pa rang la gtso che ba yin nam/_zla tshes skor rmi lam du/_rdo rje 'jigs byed zhal thang gsar pa che chung gnyis dang*/_mthar mi pham thugs dam zhal thang bgres po gtsug lag khang gi ngos shig la dpyangs yod pa dang*/_gangs can ri rtser lan kha shas phyin pas lan gnyis pa'i skabs dgon pa 'debs nas dpyad ci 'dug lta bar phyin pas de nyin mi mang po med/_dben par 'dug pas shing stegs la cung bsdad pa dang nam mkha' sngo dwangs nas phyag rdor khro bo phur pa sogs stong gzugs lta bu 'al 'ol yod snyam byed/_yang me bya zla 2tshes11 nub sgrol ljang gser sku khru gang pa byin can gnyis snga rjes byas nas rmis kyang sems la dad 'dun dga' tshor yod pa las sku dngos shog gu ser khag gis thum pas mi mjal 'dug_/tshes30 nub spre'u zhig gis nged la gnod 'tshe byas pa rgyun lcag brab kyang cher ma thub/_rdo rjes brdungs pas cung thub song ba rmis/_sa khyi zla 12tshes1 la nyin mo cung zad mnal bar gyur pa lta bu'i ngang bde ba can gyi zhing khams yin rgyu'i nam mkha' sngo/_ri rgya chen po zhig tu yul bkod 'ja' 'od 'char ba lta bu sna tshogs pa dang*/_bzhugs khri 'degs pa'i rma bya shin tu che ba/_ri dil chung tsam gnyis sogs yod pa la ha cang gsal po min pa na bun gyis sgrib pa lta bu rab rib zhig gi snang ba ring tsam byung*/_tshes4 nub dgon pa chung ngu zhig rdzong sar dgon pa chags pa'i ri las dma' tsam dbyibs de 'dra bar ngos cag 'byor/_grwa pa gzan sham can kha shas nas dar btang*/_mar gsham der sdod nas nged zhabs pad brtan dgos tshul dang*/_'di jo bo smr-i ti dz+nya na'i dgon pa yin/_de'i rten thams cad yod sa 'di yin zer/_chos lugs gang yin lab pas shab shub mang po zer dge ldan yin rgyu 'dra zhig bshad/_de nas nged cag dgon pa'i gling bskor la song bas mgon khang lta bu zhig tu slebs/_der gu ru rin po che'i sku tshab gser ma sogs rten mang po dang*/_lder sku mang po'i dbus dam can chos kyi rgyal po yin pa'i khro bo zhal gsum mi tshad gcig yod pa sogs mang po zhig mjal ngang gnyid sad do/__/zla tshes nub rmi lam du sde dge lha sras ngag dbang 'jam dpal rin chen red zer ba ngos zhig gi gsham grong kha shas yod pa zhig gi nang bzhugs zer ba/_dgong mo sa rub nas mjal zhus song bar/_khang pa dkyus ma zhig gi nang rtswa'i spyil bu sgo shin tu dogs pa'i nang*/_dbu skra nag po thor cog chung ngu gzhon sha can sar gzigs nas lo ma sngo ljang gi na bza' bzhes nas 'dug pa/_nged nas dga' dang gus pa'i rnam 'gyur byas/_khyim phrug dmar hral gyi na bza' bzhes 'dug_/de 'dra zhig nged la'ang bskon/_khong rang bzhengs nas phyi 'khyam zhig du song*/_nged kyang song*/_ngos nas phrug chas de phud nas kho rang la phar phul/_nga rang gcer bur song*/_dad rten zhig zhu dgos snyam dum bu zhig bcad/_khong nas gral rim der yod pa rnams smag nag pas zhib cha ma mthong yang brdeg pa byed snyam/_la dkar bsod rgyal der 'dug pa la phyag 'bebs gnang*/_kho smyo 'dug_/de nas kho gcer bur rgyab bsnyal lta bu mdzad nas bu 'di smyo nas nang 'khrugs zhig byed pa 'dra zhes gsungs pa de 'dra mang mthar gnyid sad/_yang mnal bas snga ma de 'dra la/_da lta de khong dang tsi ke mchog gling rnams mkhyen brtse'i mdun dbang chos mang po lhan zhu 'di bzhin mdzad gsungs stangs ka mang po dang*/_dar cig nas DA dril 'khrol sngon bskal ma gsungs/_nged nas 'di grub thob red snyam/_dad mos byas pas ye shes phebs pa'i nyams byung*/_mos gus tshad med skyes/_khong la ye shes rgya mtsho mtshan zer ba sogs rmis/_de'i phyi nyin lcags thag grub chen 'das skad thos khong mjal na snyam yang ma byung bas byin gyis brlabs pa 'dra min nam snyam/_/dbus phebs sngon ma'i skabs yin 'dra/_shing glang zla 9tshes18 la a tsa dgon zhol du sdod pa'i rmi lam du/_lha khang yid du 'ong ba zhig gi nang du khri chen po'i steng gos 'bol shin tu mtho ba zhig 'dug_/bla ma 'jam rgyal yin nam snyam pa nges tig ma byung*/_rgyud sde'i dbang chen zhig bskur ba thun mong rig pa'i dbang lnga bum dbang rdzogs skabs rdo rje slob dpon gyi dbang mjug chos 'chad pa'i rjes gnang skabs dung dkar chen po zhig 'dug_/ngos nas bus/_de nas ngos rang khri steng song nas chos 'chad rgya bcas bsdad kyang khri ha cang mtho drags pas cung 'jigs/_dbang lha bstan pa sogs gsungs mthar khri las babs/_dbang 'og ma gsum so so'i mthar rjes gnang bcas thob pa rmis/_de rjes tho rangs khar ri brag zhig tu dgon pa zhig gi nang rten mjal byas mthar khang pa chung ngu zhig tu karma pa mkha' khyab rdo rje zhwa nag gsol bzhin bzhugs pa'i sku pang du rten sgam zhig zhal phyes 'dug pa nged la byin rten gnang dgos zhus pas/_rgyal po ka nishaka rten skal de bzhin gshegs pa'i ring bsrel yin zhes gser sgrom zhig nas sgo nga tsam pa'i dkyil ring bsrel gcig 'dug pa yang bskyar bstan byung ba khog gis 'jim pa 'di klu sgrub phyag bzo yin gsungs/_ring bsrel yang gsum tsam 'dug_/'jim pa de la ring bsrel gyi shul khung bu mang po snang*/_nged la gnang dgos zhus pas karma dus gsum mkhyen pa'i na bza' red ces gos chen mi sha kha nag ljib be ba zhig phyag gris che tsam gtub nas gnang byung bas byin rlabs kyi zil dang mos gus tshad med 'bar/_ring bsrel 'di gnang rin med/_shAka thub ring bsrel min kyang 'phel ma gzhan zhig sbyin rgyu yod ces gsungs mthar mnal sad do/__/tshes19 byang lha ri mgo klu sgrub tshang rtsar sdod nub/_lho rgyud g.yo ru khra 'brug tu 'byor/_der sngon med pa'i lha khang shin tu spus legs gnam rgyan sogs sngar gyi rgyan bzhi si'u kha gsar sha stag 'dug_/gser sku khru gang tsam zhi khro shin tu mang ba zhig tu phyin/_sngon ma nga rang 'ong skabs zhib cha ma mjal ba'i lha khang de dang*/_yang kun rig lha khang zhes pa zhig zur du 'dug_/lha khang sngon ma der mchod rten lta bu bum sgo'i khar klong chen pa'i thugs dam rten sgrol ma khu tshur tsam shin tu byon legs dang*/_de'i steng bal po b+ha ro'i thugs dam rten dzam dkar 'brug zhon rgya gar li ma bzo byad lta bas chog mi shes pa 'dug_/de lag tu blangs byin rlabs zhus/_yang bcu gcig zhal zhig gi dbu rgyan khar klong chen pa'i gdung las byon pa'i bcu gcig zhal grang gser byugs pa zhal bsgrigs lugs rim gsum byas pa yang yang mjal/_lha khang khag gnyis ka'i lha rnams la gser chab thig bdun sbyangs nas 'bul grab byas/_kun rig lha khang du tshogs pa zhig 'dug pa kye rdor 'tshogs nas phyi rol ngor pa'i lugs ltar sil snyan skad chen zhig brdung nas byon byung ba sil snyan ming la gar gyi tshig 'go zhig zer yang brjed/_lha khang nang der phyin pa tsam las zhib cha ma dran/_sbug der mgon khang zhig yod snyam/_de nas dkor gnyer dpon red zer ba'i ban[1$0000240]da[1$0000300\u0f7a] zhig gis khyed rang mchod mjal skabs khong med pas rten 'di rnams i mjal zer re re nas dris byung yang zhib cha ma dran/_mthar rdza sa'i thab ka zhig gru mo nang khyer/_de nang sol me dmar hu re sbar nas 'di gnyan lo'i gsol thab yin zhes sa khar 'phangs byung ba thab de 'gro log brgyabs kyang steng 'og kun nas me 'bar ba me phyir yang ma bo/_mthar me 'bar bzhin du yar khyer song mthar mnal sad/_zla7 tshes10 la kong po ju che mdor sdod pa'i tho rangs khang pa nyams dga' ba zhig tu rgyal tshab rin po che bzhugs stan mtho ba zhig gi khar bzhugs nas sems bskyed sdom pa 'bog chog gnang shom gyis nga cag 'dus pa kha shas la rin po che'i zhal nas maN[1$0000270]Da[1$0000300]la phul gsol ba thob gsungs byung ba/_phyag dang maN[1$0000270]Da[1$0000300]la gsol ba btab/_lce btsun snying thig gi thun gyi sngon 'gro'i gsol 'debs la byang chub kyi sems rgyud la skye ba'i gsol btab mthar/_rin po ches khrus lta bu zhig phyag dril dkrol nas gsungs/_spyan snyun ba lta bu g.yas btsum g.yon gzigs 'ga' mdzad/_zhal nyams shin tu rgyas/_de nas spyan hu re gzigs nas dbyangs gsal rten snying lan mang gsungs mthar mnal sad/_/tshes12 nub tho rangs mnal lam du dgon pa lta bu'i khang pa zhig tu skyabs rje kaHsi rdo rje 'chang red zer zhal ras ni mi 'dra/_dbu skra se chob/_zhal zlum po gzhon sha chags pa sku gzugs sgeg pa zhig la mkha' 'gro snying thig gi dbang nyin bzhi tsam gnang ba'i nyin rjes mar ngos rang gi gzab sprod lta bu'i thon zhu mdzod kyi rgyab 'phan yod pa gyon nas dbang khang der phyin pa dang*/_bla ma nyid bzhengs byung ba zhwa phud tsam byas dbu gtugs gnang rjes bla ma'i khri'i g.yon khri stan mtho ba zhig tu sdod nas dbang phal cher chog rogs kha shas 'dug pa mnyam gsungs dang*/_gcod mkha' 'gro'i gad rgyangs 'dra zhig kyang gsungs/_rig pa'i dbang gsum zhes pa'i rjes gtum mo'i me dbang 'dra zhig kyang gnang*/_mkha' 'gro snying thig gi dbang gzhung sngar yod 'di 'dra zhig ni red/_mthar dbang rdzogs nas dbang gi dkyil thang rnams bsgril ba'i khres po zhig khyer shog byas nas theg la khad pa zhig la mnal sad pas brag dkar lha chu'i gnas kyi byin rlabs zhig yin nam snyam pa 'dug_/lcags rta hor zla 9tshes27 nub ngos rang phu mar yod pa mchod khang nang grub brgya'i zhal thang rnying pa byin ldan bshams 'dug_/thang ka gcig gsar du bzhengs pa yin rgyu zhig gi gser thang zhig 'dug pa gtso bo rgyal ba byams pa bzhengs sku dang*/_'khor lha mo bzhengs pa kha shas 'dug_/ngos nas sgrol ma/_lha mo tsan+dan/_rma bya'i smad khebs mnab pa zhig 'dug pa rma bya chen mo g.yas nor bu bsnam pa/_nor rgyun ma rnams red zer 'dug_/de nas mchod khang bang ba'i arga gas srub chen po zhig 'dug pa yang las dgos zer gri rtses bkog 'dug pas ka ba bzhi mig gcig ling gis bkog nas rgya mthong 'dra ba zhig red zer/_de nang nas mar bltas pas bsod nams dbang rgyal de smin mtshams khro gnyer yod pa zhig yar 'gro phyir 'gro byed 'dug_/yang thang ka rnying pa gong sham can gcig 'dug pas gtso bo gang yin brjed/_mdun klong chen pa/_g.yon mkhyen brtse/_g.yas birawa pa gong g.yas mkhas grub rgya mtsho/_g.yon brjed/_de rnams kha byang 'dug_/tshem thang yin pa 'dra'ang 'dug_/klong chen birawa rnams cung khro nyams sku mdog sngo sangs can zhig red/_sngar gyi rmi lam phu'i sa phyogs 'dra ba der dpyad dgos/_me sprel zla 11tshes14 la rag sor du sdod nub dbon po stod mkhan po mkhyen rab kyi gzim khang yin rgyu/_mkhyen rab kyang bzhugs khang tshon khra can skyon med zhig tu 'byor/_de'i nang li sku gser ma las bzos pa'i bdud rtsi khro mkhar lta bu bar lam zhig tu pad+ma'i 'khor lo yod pa 'phrul bzo byas ba lta bu ngo mtshar ba lus tshad tsam dang*/_yang li dkar las 'jigs byed zhal dgu yum can lus tshad gcig dang*/_yang de las chung tsam bzo khyad ngo mtshar ba dang*/_gzhan yang sku mang po'i nang nas nged la gcig sbyin grab 'dug_/che ba 'di ni sbyin mi 'ong snyam/_rdo sku leb mo sor bzhi tsam pa zhig 'di khyer byas nas dri rdul chus bkrus pas sku gang yin mi 'dug_/so phag rgya gar gyi b+hi la sas bzos pa 'dra ba zhig 'dug pas yid ma rangs/_khro mkhar de la zhib tu brtags pas nang du thugs chen bzhengs sku phyag mang tsam g.yas pa gcig mchog sbyin byas pa/_gzhan rnams brjed/_de'i phyi dang spyi gtsug tu lha kha shas brjod mi shes pa lta bu 'dug pas nged la 'di sbyin dgos byas/_'bul chog zer ba da lta khur grabs kyi sgam sogs bzo dgos byas pas zla ba bcu gcig nang bskyal 'ong da lta ma bsnams na mkhan pos zer ba sogs rmis/_de'i snga nub zhe chen rab 'byams sogs bla sprul mang shas la rgya can nyer lnga rin gter du yod pa mi dgos zer/_gzhan tshang ma'i dbang bton/_rin gter du yod pa'i dwangs ma bcud 'dren/_gro lod las byang 'don bzhin ngang gnyid sad/_me sprel zla 11tshes16 b+hir khany+tsi ra tshe lu na skabs zhi byed rma bya chen mo'i bzlas thun skabs mnga' ris rig 'dzin legs ldan/_byang bdag_/mchog gling gsum gshibs te bsgrub bya'i spyi bo'i thad yod pa'i snang ba byung 'phral gsol 'debs bris/_hor zla 8tshes13 nub sa cha gang yin ma 'tshal ba'i lung stong zhig tu mchod rten lta bu'i 'bum pa'am lha khang gang yin ngos ma 'byed pa'i chen po zhig la bskor nas bang rim steng shod nas phar phyin pas lho stod du gnas sgo 'byed rgyu yod pa red zer/_de nas bar sgo lta bu zhig la bsal nas bltas pas nang na mi mang po zhig kyang 'dug_/de nas mar phyin shar lho nas sgo bsal bas nang khyon che bar 'gro sa 'dug_/mang po shong bar gda' zer ba sogs rmis kyang phal cher brjed/_yang gnyid sad pas snga ma de'i 'phros lta bu'i sgo gnyis gsum zhig phyes nas DA ki bcu gsum res skad gdangs bsgrigs nas glu len pa sogs rmis pa ni/_rdo rje gling dbyar ltas skyed tshal du song bas de nyin gzhas dang glu gar mang po byed kyin snang ba'i sems rmis yin nam/_gang ltar yang pad+ma bkod gnas sgo 'byed pa'i ltas 'dra min nam snyam/_zla 8tshes29 nub zil khrom sbas sde 'byed pa yin zer ngos rang dpon slob kha shas brag ri dkar po'i g.yon zur rdza shur zhig nas 'dzeg pa dang*/_yang de rgyab rdza lung zhig nas 'gro ba sogs rmis/_tshes21 nub pad sdong zhig gi steng slob dpon rin po che za hor ma yum mtsho rgyal gyis 'khril ba khru gang tsam pa zhig rang gi mdun thad nye bar mjal snyam la mchog gi dngos grub zhus pa dang*/_khyad par tshe gegs sel ba'i smon lam drag po btab/_sbyor mtshams nas bdud rtsi 'bab pa spyi bor zag pa'i nyams byung*/_me bya zla tshes la 'bras ljongs sgang thog tu 'ja' tshon chos skor dbang lung 'don pa'i dkon spyi'i drag po'i dbang sgrub skabs rig pa ngar thon te sku'i gsal snang shin tu thon la ltos che ba nam mkha'i khams gang ba las sprul pa mang du 'phro ba/_lha srin thams cad dam la btags nas srog snying rnams dmar nar gyis drangs te gdan la bstims pa'i nyams byung zhing*/_dngos su dam bsgrags bya dgos pa 'dra yang nyams g.yas chung du btang nas ma byas/_hor zla 8 tshes1 rdo rje gling du sngags grwa rnams dang*/_thar mkhan bsod nams rgya mtsho/_'bras ljongs lha yum sogs dgu bcu lhag tsam la byang gter drag mthing gi dbang 'don pa'i sta gon nub rdzong sar gzim spyil ja khang du rgyal 'gong zhig yod pa de 'dul dgos zer nas thugs sgrub drag po'i nga rgyal brtan pos me dmigs byas nas 'dul thub pa rmis/_me bya hor zla 10 tshes4 nub rmi lam du 'jigs skrag zhig gi rkyen byas/_o rgyan rin po che la gsol ba 'debs/_/zhes pa'i shwa lo ka dang*/_rje btsun pad+ma thod phreng rtsal/_/drag po ye shes rab 'bar la/_/zhes pa'i gsol 'debs skad chen pos tshar kha shas bton pa dang*/_mos gus drag tu skyes pa'i rkyen gyis gu ru drag po ye shes rab 'bar zhal gsum phyag drug pa byis pa lo lnga'i tshad tsam dang po lder sku yin pa lta bu skabs rer phyi nang sgrib med dngos lta bu mig gis dngos su bltar yod pa can du 'char ba la gsol 'debs dbang blang byas pa rmis/_sad nas kyang dngos rmis gang yin ma 'byed pa zhig byung*/_sa khyi zla 10tshes nang zhig tu rong gi ri mgo se la lta bu nas ngos cag rta drel bcas la gzar po zhig la 'dzeg nas ri sked sgang phar rgyab sbra gur kha shas phub pa brag 'dre'i sgar pa yin snyam gyi/_bkra rnam dang grwa pa gcig rnams sngon du rgyang chad nas song*/_'dre sgar de nas rlung 'tshubs lta bu dang mi kha shas sngon rgyug rjes ded dang*/_ngos la'ang gnod 'tshe byed shom la rang gshin rje tshe bdag gi gsal snang che brjid ldan pas 'dre de rnams zhal gsum du bstab pa yang yang byas pas 'jam song ba rmis/_zla 10tshes1 nub nged rang ri rtse zhig la rta zhon nas song*/_de nas gser theb gyon bzhin mthur gzar po la lo chung dus song ba ltar byas nas ri gsham du slebs pa dang mkha' 'gro'i tshogs gzhong red zer ba'i brag sngon po ru dra'i khog pa gzhong pa dang*/_de la mgo yod pa/_de'i nang song nas gzhan la'ang de tshul bshad/_de nas phar tsam na sa sngon lta bu'i bang rim bzhi yod pa'i ngos gcig la gter rtags lta bu 'dug pa rdos bsnun nas khrol gyis zhig pa'i nang dpe cha ras ljang gus dril chas can mang tsam dang*/_phug pa de je cher gyur pa/_rdo rje phag mo'i li sku lta bu khru gang lhag tsam dang*/_gzhan mchod cha sogs mang po yod pa rmis kyang zhib cha brjed do/__/gur dkar phug tu 'gro skabs che mchog gi brag ri de bka' brgyad zhal phyag rgyas pa shin tu che ba nam mkha'i gzugs can zhig mjal snyam/_nyang gi gter gnas lho brag srin mo sbar rjes gu ru'i sgrub phug tu yum


kyi spyan 'dren la nye skabs nyams cung zad 'bar nas gar 'khrab snying 'dod pa byung yang mi mang bas nyams 'gog par byas so/__/me sprel zla3 tshes la rdor brag tu 'byor nyer ko gru dang gzings don khar/_dgon pa'i rgyab logs brag ri'i steng mkhar rig 'dzin legs ldan rje sngags 'chang chas thor cog phur pa dang thod pa bsnam pa/_gzhan yang rig 'dzin mang tsam bzhugs snyam byung*/_nam mkha' la sprin 'ja' yang 'dug_/me bya zla 1tshes14 la 'bras ljongs brag dkar bkra shis sdings su phyin/_rgyal dbang karma bcu drug pa'i gser zhal yang yang mjal/_mthong grol cod pan rin po che thengs lnga rgyang mjal mdun thad nas shin tu gsal por zhus/_dad mos drag tu bskyed/_yan lag bdun pa maN+Dal 'don/_zhabs brtan bris/_sngar mtshur phur mjal skabs kyi snang nyams 'dra ba zhig kyang byung*/_byin 'bebs gter bum dang gzhi bdag gter bum la phyag nas thugs smon zhus/_sa mig dgongs babs sar gsas mkhar brtsigs nas tshes bcu drug la gzhi bdag bum pa thog 'og 'jog_/tshes bcu bdun dkyil 'khor gter bum 'jog pa'i bca' gzhi bsgrigs skabs gsol 'debs mgur ma bri skabs lha btsun chen por thug pa dang*/_dad slob li thang dge ma nas dar dang dngul tog rtags brgyad ri mo yod pa/_maN+Dal zangs bzos rdzas brgyad ri mo yod pa sogs byung ba rten 'brel bzang bas dngul tog blang*/_gzhan rnams phar byin/_dngul tog de rgyal sras rin po cher smon lam dang sbrel bkra shis kha btags kyis lcibs te phul/_gter bum bzhag nas dkon spyi dang 'brel byin 'bebs brtan bzhugs byas/_tshes bcu bdun phyi ma'i zhog par dar btsugs nas gsas mkhar bstod pa dang bkra shis brjod/_gyam la zhugs te mar tsam phyin/_mchod rten lta bu chung ngu mang tsam bsgrigs par phyin pa na nam mkhar lha btsun chen po he ru ka'i chas g.yas rkang gling*/_g.yon thod chang*/_sku che ba/_'khor du DA ki mang po gar stabs mdzad par rab rib mjal snyam byung*/_pad+ma yang rtser tshes nyer lnga la mkha' spyod rin po che dbus dpon slob nyer gcig tsam gyis rig 'dzin srog sgrub kyi sun bzlog brtan bzhugs spros bcas kyi byin 'bebs skabs yin snyam/_lha btsun chen po g.yas mchog sbyin tshe bum/_g.yon thod chang he ru ka'i chas can gyi tshe bum rang gi mgo thog bzhag pa sogs byung yang de ring tshes30 bar yi ger 'god rgyu ma byung bas zhib cha brjed/_tshes25 nub kun mkhyen klong chen pa'i gdung 'bum yin rgyu'i mchod rten mang po'i nang nas gcig gnyis hral yo nang sku gdung dmar hril nyal stabs yod pa'i sgal tshigs gzhung nas 'ja' tshon sna lnga yod pa 'dra zhig res dum bur 'thor ba res gcig pa lta bu la zhig gsos byed pa rmis pas/_tshes26 la gsang chos mar zhabs rjes sgang du pha waM rang byon can dang*/_de'i sgang khar pad gling gi dgon shul yod skad zer ba de la blta'am snyam/_me sprel zla 2 tshes20 g.yon ru gter sras 'jam dbyangs bsod nams la thig rgya'i dbang gi skabs bsnyen pa'i nang slebs pa dang*/_bi ma lar mos gus dran pa'i rkyen gyis lha btsun nam mkha' 'jigs med sku na khreb/_ral cog_/na bza' phu dung gzan sham ye mi gsal ba g.yas chos 'chad/_g.yon mnyam bzhag thod chang can/_sku las stong gzugs kyi DA ki'i sngo skya rib be mang du spro ba la gsol 'debs dbang blangs dang dgyes pa'i dbugs dbyung bcas rang la thim pa'i shes nyams byung ngo*/_/hor zla 10tshes30 nub nam smad rmi nyams 'dres mar gter chen mchog gling gu ru'i chas zhugs mdzad nas phebs/_bzhengs bzhin du byabs khrus shig dang tshe dbang bskur dgos kyi sgyu 'phrul tshe dkar gyi dkyil 'khor sprul nas/_thog mar bum pa lnga'i dang*/_de nas lhar bskyed bum pa dang sku gsung thugs dbang*/_gsang sher skabs dpa' bo yab yum mi tshad che tsam gar stabs mdzad pa dang*/_dbang bzhi pa me long shel rdo rma bya'i sgro rnams kyis brda dang tshig gi ngo sprod/_mthar bkra shis shwa lo ka kha shas yod kyang las ngan sdig sgrib che bas brjed de thal/_hor zla 10tshes1 la pad+ma yang rtse'i mkha' spyod rin po che dbus dpon slob bcu bdun skor gyis rig 'dzin srog sgrub sgo nas sun bzlog zhabs brtan 'bul skabs/_dang por nam mkha' nas sngags chas can gyis drag po'i 'chams stabs byas pa'i nyams byung*/_de phyin ci'ang ma gsal/_bum pa lnga 'dug pa snga dgong gi rmis ltas de la lta ba yin nam snyam/_zla 11tshes19 nub gter ston las rab gling pa dang mjal/_bdud rtsi sman sgrub bya rtsis kyis a ru sogs sman sna nyung tsam 'du byas/_gter ston nyid stag zhig tu brdzus nas ngos khang pa zhig nang mnal nas yod pa'i steng nas mnan te/_dang po skrag sngangs phud mthar 'dris brod byas te dga' ba'i rnam 'gyur ston/_nged yar langs nas stag de rdo rje gzhon nu'i skur bskyed pas rdo rje gzhon nur gyur pa sogs mtshar po mang zhig rmis/_las gling phur pa yang snying spu gri'i thun bzung phrin las la brten tshogs 'bum ther bsags skabs gter ston nyid mjal snyam byung yang yi ger ma 'khod pas da lta ma dran/_zla 10tshes17 la rdo grub sprul sku rin po ches klong snying yum bka'i sun bzlog brtan bzhugs skabs/_rab gsal phyes pa'i nam mkhar 'jigs med gling pa sogs bla ma kha shas dang*/_sngags pa dbu skra nag po thor cog can zhal ras zlum po ag tshom cung zad yod pa gsal ba zhig bzhugs pa ngos ma 'byed de 'dra'i nyams byung*/_zla 3tshes skor zhig la mkhyen brtse rdo rje 'chang phyag g.yas tshe bum bsnams pa rab byung chas can gyis thang rgyal tshe dbang gnang nas lo grangs kha shas bar skyon med pa'i dbugs dbyung bstsal ba zhig kyang byung*/_sngar rdzong sar du mkhyen brtse rin po che'i skyes phreng zhal thang bzhengs skabs thang rgyal dang mkhyen brtse rin po che'i phyag gi tshe bum las bdud rtsi 'phyur ba rje bla ma'i phyag gi tshe bum du babs pa'i zhal bkod gnang 'dug pa'ang gzigs snang zhig yin snyam/_zla 9tshes14 nub 'jam mgon kong sprul rin po che mjal/_phyag rdor rdo rje be con gyi 'bebs gzhi shog ser ldeb kha shas 'dug pa/_'jam mgon phyag bris ni ma red/_rje nyid kyi gter chos min 'dra snyam/_gter ston gzhan zhig gi gter chos yin snyam dang*/_yang shog ser dam rdzas rnying hrul zhig kyang lag tu rnyed pas dga' tshor dang*/_kong chen pa res dngos/_res karma'i thugs sras yin rgyu nges med du byung ba rmis/_sa khyi zla 6tshes1 nub dgon gnas ngo mi 'tshal ba zhig gi 'du khang nang du nged nas khrom ser skya sum brgya tsam la dbang zhig bskur/_ngos rang nas gser gwa chung zhig mgo la bzhag_/de nas grub thob brgyad cu dang 'brel ba'i cho ga zhig btang nas tshogs kyi skabs yin rgyu zhig la ngos nas rdor dril chung ngu bzung ste tshogs gar rgyun ring 'khrab mthar bkra shis zhabs bro dga' ba 'khyil pa zhes pa'i 'gor gar gyi bshad pa lta bu mang tsam ngos rang gis byed pa dang zhabs bro 'khrab rgyu ma byung ba sogs rmis/_shing sprel sa ga zla bar bka' brgyad bder 'dus kyi sman sgrub rgyas spros gnang skabs sgrub dkyil steng nas bka' babs rig 'dzin brgyad kyis rdo rje'i gar stabs bsgyur ba'i gzigs snang ches gsal bar byung tshul gsungs shing*/_rgya can nyer lnga'i thugs dam phyag dpe'i gseb tu tshe yum tsaN+dan lIs rjes su bzung tshul gyi phyag bris kyang mjal/_dgung grangs41 phebs pa chu stag zla tshes skor rgyud lugs 'jam dpal gyi bcud len bdud rtsi ril bu sgrub pa'i bzlas thun gnang skabs sgrub dkyil steng nas gzigs snang du 'jam dpal yab yum 'khor dbyangs can rigs bzhi bcas shin tu gsal ba'i ngang*/_yum bzhir rim bzhin mnyam par sbyor bas bde ba'i ye shes kyi nyams khyad par can re re skyes pa'i gsal snang yun ring shar nas sad pa na chog rogs zhabs phyi nas snyun khams bzhes par dogs nas grib bsang sogs byas 'dug tshul phyag bris mjal/_gzhan yang dpal sprul sems dpa' chen po o rgyan 'jigs med chos kyi dbang po las klong snying sngon 'gro khrid yig kun bzang bla ma'i zhal lung nye brgyud gsan tshul sogs rnam thar zhal gsung du'ang gsal ba ltar ro/__/gsum pa zhar byung zab mo gter gyi bka' babs bzhugs tshul sa bon tsam smos na/_spyir rje bla ma mchog 'di'i rnam thar mdzad spyod thams cad kun gzigs mkhyen brtse'i dbang po dang rnam dbyer med pa kun la thun mong du gyur pa bzhin/_rje mkhyen brtse'i thun min gyi gsang mdzod mtha' dag la dbang bsgyur bar som nyi dang bral yang bstan 'gro'i bsod nams kyi skal pas phongs pas de rigs btang snyoms su bzhag nas rgya cher snang bar ma mdzad mod/_'on kyang phyogs tsam mtshon byed gsang ba zab mo'i cha shas 'ga' zhig mthong thos su gyur pa ni/_spyir shog ser gyi rigs la gzigs pa tsam gyis der bstan chos bka' gang bzhugs thugs la gsal ba dang*/_brda bsgyur rgyas 'bring bsdus gsum gyi babs tshul/_rten 'brel gyi gnad gsang sogs thogs med du mkhyen pas zab gter gyi mnga' bdag chen por nges shing*/_gnas khyad par can du phebs pa'am/_thol byung gis ri brag mtsho sogs la zab gter gang yod gzigs pa dang*/_gter rtags ngos 'dzin mang du mdzad/_rje nyid kyi sku'i gcung sprul sku 'chi med la rme shod mu nang rdo rje brag dmar gyi gnas nas gter 'don dgos pa'i kha byang bstsal ba dang*/_gus pa la'ang rdzong sar brgyab ri bkra shis dil lhag tu gter 'don rgyu yod pa'i kha byang bstsal ba dang*/_go 'jo'i phyogs su mkha' 'gro'i rigs can bu mo gcig la brda yig shog ldeb mang po bri rgyu yod pa phran la ldeb kha shas byin pa khyod la sprod dgos 'dra yang med pa byed tshar song zhes gsungs pa dang*/_gter ston bsod rgyal yin snyam gyis gter shog glegs bam gcig gnang byung ba khyod la 'bebs rgyu'i gsal snang byung na sprad chog gsungs kyang*/_slad nas rang gis zhu bskul ma byung la rje bla mas kyang rjes nas gang yang ma gsungs/_de tsam las thun mong gdul bya'i snang ngor dmigs bsal du dngos gter bzhes tshul ma gnang zhing*/_dag snang dang dgongs gter gyi rigs bsam gyis mi khyab par bzhugs pa las/_me sprel nag zla'i tshes nyer drug la brag dmar mgrin bzang du thugs chen sems nyid ngal gso'i tshogs phul skabs/_mkhyen brtse rin po che'i sku'i gsal snang la sems nyid ngal gso'i dkyil 'khor sprul nas sta gon skye mched byin rlabs yod pa/_dngos gzhi phyi nang gi 'jug pa/_rig dbang*/_bum dbang*/_gsang dbang la yum bzhi dang sbyor ba/_sher dbang*/_bzhi pa'i dbang*/_gtor dbang bcas yud tsam gyis thob pa'i snang nyams za zi byung yang zhag shas bar tho rgyab rgyu ma byung bas gsal por ma dran/_zhes rje mkhyen brtse'i sa gter gtso bo thugs chen sems nyid ngal gso'i las byang gi lung tsam las mi bzhugs par rje bla mas smin byed kyi rgyun nye brgyud du gsan par mdzad na'ang bdag cag gi skal bar ma gyur pas ches shin tu phongs shing 'gyod pa'i gnas so/_/kaHthog mkhan tshul khrims nyi mas ched du nang zhus ngor gnang ba'i gu ru'i bla sgrub rtsa gsum spyi dril can dbang dang bcas pa 'di ni sku gong ma'i rdo rje'i do ha skor gyi thog ma der/_nang rdo rje'i phung khams la brten nas rtsa ba gsum sgrub tshul tshigs bcad de'i sgrub thabs yin par gsungs shing*/_mdzad byang du'ang rtsa gsum kun 'dus o rgyan rdo rje 'chang gi rnam thar rjes su dran pa'i dad mos kyi gsos tsam du bla sgrub 'od gsal snying thig tu grags pa 'di'ang mkhas grub rgya mtsho'i spyi rje pad+ma 'od gsal mdo sngags gling pa'i byin rlabs kyi snang ba las rang shar ba'i tshul gyis rje de nyid kyi phrin las kyi byed por smon pa 'jam dbyangs chos kyi blo gros sam rig 'dzin kun bzang 'od gsal snying po rtsal gyis sogs 'god par mdzad/_phyag dpe'i khrod du 'jam dpal bshes gnyen gyi snying thig sgron ma bdun pa'i chos skor yin snyam 'jam dpal gyi rgyud phab 'phro bzhugs pa mjug skyong ba'i phab byang du/_/ces 'jam dpal ye shes snying po'i rgyud le'u lnga pa 'di pad+ma 'od gsal mdo sngags gling pa'i dgongs pa'i gter la byung ba 'bebs 'phro lus pa'i dpe nyid nam mjal res bri rgyu yod snyam ngang le lo'i gzhan dbang du gyur pa sa glang snron zla'i tshes26 la dpe mthong ba na rang slob dad ldan blo gros mchog ldan gyis bri bar bskul ngor zla ba de'i tshes27 la rig gsang nas thon pa bzhin yi ger bkod pa nges don 'jam dpal rdzogs pa chen po'i bstan pa dar zhing rgyas pa'i rten 'brel mchog tu gyur cig__mang+ga laM/_shu b+haM/__de bzhin du rgyud dang sgrub thabs dbang bcas mthar dbyung ba'i rigs dang*/_yar gter mkha' 'gro gsang 'dus kyi bdud rtsi'i rtogs brjod/_snyan brgyud dam pa'i bla sgrub kyi dbang chog_/snyan brgyud rta mgrin gyi rta skad thengs gsum gyi dgongs pa rdo rje'i tshig rkang*/_gnas lnga rig pa mkhan rnam bzang nas zhus ngor snyan brgyud yang dag zab tig gi gar dang*/_snyan brgyud phur pa'i bsgral 'cham dang rtsa tshig sogs/_mchod gar mdor bsdus bcas/_snyan brgyud yang phur sbrags ma'i rdzogs rim khyad 'phags gus la bstsal ba/_rje gong ma'i dag snang 'ja' lus rdo rje'i srog sgrub kyi khongs su gtogs pa grub pa'i rgyal mo'i tshe sgrub bcas/_khyad par du rje gong mar bka' babs kyi gsang ba zab mo kun las ngo mtshar ba dang che ba du mas 'phags pa rgyal po in+d+ra b+hU ti'am bram ze chen po mda' bsnun dngos las rdo rje theg pa'i thabs lam zab mo bzhi tshan bzhi bcu can gsan te bka' bab par gsungs pa'i lo rgyus tsam las chos tshan gtan la phab ma grub pa/_rje bla mas de'i dum bu zhig snang bar mdzad pa'i phab byang du/_e ma shin tu gsang ba yi/_/rgya che'i dum bu bzhi bcu pa/_/mda' bsnun bdag gi gsang ba'i tshig_/sprul pa'i rig 'dzin la gtad pa/_/mngon du snang ba'i skal med kyang*/_/dum bu gcig gi bye brag ni/_/ye shes rdo rje'i snying la snang*/_/'di yi sa bon rab 'phros pas/_/rig 'dzin grub par mngon snang 'gyur/__sa ma ya/__rgya rgya rgya/__/zhes pa'ang kho bo pad+ma ye shes rdo rje 'chi med 'phags ma'i bsnyen sgrub kyi skabs chu sbrul dbo zla'i tshes8 la rig ngor snang ba dang*/_mda' bsnun pa'i sku 'al 'ol mjal ba dang bris pa'o/_/zhes snang bar mdzad pa ches shin tu ngo mtshar ba'i gnas su nges shing*/_'di rigs kyang rang bzhin rten 'brel shugs 'byung lta bur snang bar mdzad pa ste/_gzhan du na rje gong ma'i zab gter phab 'phro thams cad mjug skyong gnang chog yod nges kyang*/_de 'dra'i 'phros zhus tshe gdul bya'i gang zag gis nyams su len nus na 'jam mgon mkhyen brtse rin po che'i gter kha chos tshan re re yang bskyed rdzogs las tshogs dang bcas pa kha tshang don 'dril sha stag mi tshe gcig gi nyams len tshang bar yod/_bdag 'dra'i rnam rtog yig gzugs su bris kyang phan gnod gang byed mi shes gsungs te ched gnyer bri spel mi mdzad par 'dug_/sngar dus sku mdun du rdo lta bu mdog ljang khra nor bu'i dbyibs can zhig 'dug pa bla ma rin 'byung gi sku zhig gi gzungs su phul mdzad pa de mkhyen brtse'i gter ma gnod sbyin gangs bzang gi bla rdo sde dge lhun grub steng du bla ma nor lha'i sku'i nang rten du gnang ba phyis sku rten nyams chag song bas bla rdo de yin snyam rang gi lag tu son pa yin gsungs/_sku gong mar gnyan chen thang lhas phul ba'i gu ru'i tshems las sprul pa'i ring bsrel mkhyen brtse sku gshegs pa'i snga lo nas gter srung gis bdag byas pa red ces med song tshul rnam thar du 'jam mgon rin po ches gsungs pa/_rje bla mas rdzong sar nas rten byin mang zhig bsdu mdzad skabs sgrom de phyag khar bsnams nas gus la zhal rtsed tshul du 'di phran gyi gter ma red ces gsungs shing*/_zhu mkhan su byung la gnang yang rdzogs rgyu med pa de slar gter srung gis phul bar nges pas mtshon/_rje gong ma'i zab gter chos dang rdzas la rdzogs par dbang bsgyur nges pa som nyi dang bral bar rtogs nus so/__/mdo mkhyen brtse ye shes rdo rjes byin gyis brlabs pa'i bka' babs khyad 'phags bzhugs pa'ang rje nyid kyi bla sgrub snying thig gsal sgron de tshig ris sogs gang cir dgongs gter du nges snyam thabs mkhas kyi zhu bskul lta bus 'di mkhyen brtse ye shes rdo rje'i bla sgrub byas na rung ngam zhus pas/_rgyu mtshan ci'i phyir gsungs/__sku he ru ka'i chas dang mtshan ye shes rdo rje zhes gcig tu 'dug lags na zhus pas/_ngos la pad+ma snying thig ces pa'i chos tshan mang tsam mdo mkhyen brtse ye shes rdo rjes byin gyis brlabs te yid ngor gsal ba/_de skabs bla sgrub 'di zhu mkhan byung bas bris pa mdo mkhyen brtse'i bla sgrub phran la kha bsgyur ba 'dra zhig red gsungs/_des na bla sgrub dgongs gter du nges zhing smin byed tshogs mchod zin bris sogs bzhugs la/_rje bla ma'i gsang mtshan pad+ma ye shes rdo rje zhes rdo grub thams cad mkhyen pa las klong snying rig 'dus kyi dbang gsan skabs mtshan du byung zhes rten 'brel dgos pa chen po'i gnas su mdzad pa dang*/_mdo mkhyen brtse'i chos skor gcod 'dzin pa rang grol tsam las gzhan phal cher tshig brgyud mi 'dug kyang don brgyud lta bu sngar mdo rin po che las chos skor tshang ba'i gtad rgya zhig gsan pa yin gsungs/_phyis su rje'i mnal lam du rgyam rdo thi yin rgyu'i lung pa phu gangs ri gsham du mtsho/_de'i gzhug chu chen po 'bab cing kha lhor blta ba zhig gi mda' nas ston 'khor kha shas chibs thog nas gyen du phebs pa na/_sngags pa ral pa nag nyi le ba/_glegs bam mang po bsnams pa zhig mar phebs byung ba de nyid mdo mkhyen brtse ye shes rdo rje red 'dug pas rje bla ma nyid la gtad rgya dbang bskur mdzad de glegs bam rnams gnang ba/_rje'i g.yon phyogs der gus pa bsdad 'dug pa la gtad pa rmis gsungs pas gus skal pa bzang bas de bzhin byin rlabs dgongs gtad gnang grub zhus par zhal bzhes kyi dbugs dbyung thob pa dang*/_gcod 'dzin pa rang grol gyi khrid yig rnam gsum gyi sgo nas kyang dgongs pa'i gtad rgya byin rlabs rdzogs par thob pa'i skal pa bzang por gyur/_gzhan 'di skor chos bka' rigs gtan la phab pa dang gzhan la spel ba sogs bzhugs min zhib tu ma nges/_gzhan yang gus nas ched du rje bla ma nyid kyi gter byon gu ru'i bla sgrub kyi dbang lung gnang grub zhus pa ltar bka' drin bstsal skabs dbang bshad du/_kun gzigs si tu rdo rje 'chang dgongs pa chos dbyings su thim pa la thugs mya ngan gyis non te gsol ba yang yang btab pa'i byin rlabs las byung ba'i bla ma sgrub pa'i skor zhes phebs par mdzad pas/_de nyid kyi 'das rjes tshul du bka' babs pa'i gu ru rin po che rigs gsum sems dpa' dang 'brel ba'i bla sgrub smin byed khrid bcas bzhugs/_gter ston dri med 'od zer ram pad+ma gling pa dgongs pa rdzogs skabs gdung mchod dang zhugs 'bul sogs gnang skabs gter ston zangs mdog dpal rir phebs pa'i gzigs snang dang 'brel 'das rjes rtsa ba rdo rje tshig rkang dang*/_de las 'phros pa'i bla sgrub dbang dang bcas gter sras bde chen rnam rgyal sku mched la smin grol phyag bris bcas bstsal ba'ang bzhugs/_sha wa ri dang tshar chen bla sgrub skor gong du gsal zhing*/_gu ru'i thugs sgrub rgyas tsam zhig dang*/_sa ra ha'i bla sgrub/_chos rje sa paN gyi bla sgrub phyi nang gsang ba bcas bzhugs/_so so'i lo rgyus dmigs bsal ma nges/_rdzogs chen mchog sprul drug pa'i thugs dam rten khye'u rig 'dzin chen po'i gter kha gu ru'i sku tshab gdan med ma zhes pa'i sku las gsal ba'i brda ris phab pa gu ru drag po'i sgrub skor gus par bstsal ba dang*/_sgrub thabs smin byed las sbyor bcas/_'khrul zhig dpa' bo rdo rje'i zhu bskul gyi rkyen las bal yul mchod rten bya rung kha shor gyi drung nas yi ger snang bar mdzad pa seng gdong ma'i sgrub skor dbang dang*/_rdzogs rim las tshogs sogs cha tshang bar bzhugs pa/_bka' gter seng gdong rigs rnams kyi byin rlabs gcig tu dril zhing khyad par bi ma la'i snyan brgyud gsungs pa la dpags na rtsa ba'i lo rgyus dmigs bsal bzhugs tshod kyang phyag bris 'khod pa ma mjal/_zhar byung lta bur sa khyi zla4 tshes3 la rdo rje gling du song*/_rgyal po ko Ti me shul can du sdod pa'i tshes lnga'i nub rmi lam du/_ri sgang zhig tu dgon pa gcig yod pa'i zhabs phyogs lam brgyud song bas/_grwa khang zhig gi nang dpal spungs sku zhabs si tu gong ma red zer ba'i dpon slob mang po'i zhig gis mngon rtogs tshig lhug can mang po gsungs pa thos/_dar cig nas rang yang tshogs gral der slebs/_khong rnams seng gdong dkar mo'i sgrub mchod gsungs pa yin zer/_sku zhabs rin po che dngos ni min pa 'dra/_yin rgyu'i bla ma lo nyung can gcig 'dug_/seng gdong dbang thob dgos snyam zhus pas dbang chung ngu zhig gnang song ba sngar nged rang gis bris pa'i seng gdong de'i skor las 'phros pa zhig red 'dug snyam/_'di la dkyil chog dang sgrub thabs dbang chen zhig yod rgyur sgrub thabs phrin las de la dngos grub rgya mtsho zer dgos bsam/_seng gdong dbang dang 'brel ba'i sgrub phrin che ba de la 'khor dbyings phyug khro mo rnam dgu sogs kyang yod pa de 'dra zhig gi ngang gnyid sad/_yang mnal ba na sngar gyi 'phros de rmis nas rgya gar lho nub dur khrod rngams pa sgra sgrogs shing se ba'i phung po'i rtsar seng gdong ma'i sgrub skor gter du yod pa de nyid 'don dgos zer ba byung*/_rgyas par brjed nas thal/_/zhes gsungs/_gzhan yang dpal mgon zhal bzhi pa dang*/_snying thig ma bu'i bka' srung g.yu sgron ma bcas kyi rjes gnang yi ge_/lha mo'i rgyun bzlas dang zhing skyong gi rgyun bsnyen sogs thol byung du gsungs pa'i rdo rje tshig rkang rigs dang*/_rdzogs rim skor sogs phyogs 'dir gtogs pa phran tsheg mang tsam bzhugs/_der ma zad gter ston rigs gzhan la'ang mthun sbyor gnang tshul ni/_kun gzigs mkhyen brtse'i dbang po nyid gter ston rgyal po lnga'i ya gyal du gyur pas dus skabs der byon pa'i gter ston che phra kun gyis zhabs pad la btud nas/_so sor bka' slob dang mthun sbyor gyis dbu 'don gnang ba dang mthun par/_rje bla ma 'dis kyang gter ston dri med pad+ma gling pa'i sras bde chen rnam rgyal zab gter byung tshul bka' slob zhus par gter ston tshad ldan yin pa'i nges rnyed dang*/_da lta'i skabs 'dir zab gter gyi ston pa zhig la las rab gling pa 'di las lhag mi 'dug pas de'i mdun phebs na smon lam las 'phro gcig par 'dug pas legs zhes phebs pa ltar dwangs len zhus pas chos nor rdzas kyi gter kha rgya cher phyag tu son cing thog ma'i rten 'brel legs tshogs su gyur/_'bri gter 'od gsal rdo rje la sku tshe'i bar chad sel ba'i zhabs brtan bsgrub par bkas gnang zhing zab gter gyi smin grol gsan pa dang*/_chos skor 'bebs thabs mthun sbyor bka' bslab sogs gnang zhing rten 'brel legs tshogs su gyur pas gter ston gyi chos dang phrin las 'phel ba'i bdag rkyen bka' drin ches che bar gyur/_zhe chen rab 'byams rin po che'i sku mched gter ston sprul sku don kho la'ang de bzhin mthun sbyor dang*/_khyad par thugs sgrub yid bzhin nor bu'i dbang dang 'brel bar sku tshab dngos grub dpal 'bar gyi byin rlabs mdzad/_rje bla mar snga phyir skyabs zhus sogs lan mang dang*/_brtan bzhugs phul skabs gter ston nas rje bla ma dang sku tshab dbyer med pa gu ru rin po che dngos su yun ring mjal ba dang*/_dus 'khor gyi dbang skabs rdo rje shugs babs pa sogs byung zhing rdzas dang chos gter mang dag phyag tu son/_sku'i gcung sprul sku 'chi med la'ang mthun sbyor thugs bskyed kyi mthu las gnas gter rigs gsar 'byed/_dbang chos 'chad spel/_mdo khams gnas chen nyer lnga'i bye brag warti'i gnas zhal gsar 'byed dang*/_gnas der bshad sgrub kyi sde 'dzugs pa/_bstan 'gror sman pa'i phrin las rnam bzhi sogs ches cher 'phel rgyas su gyur/_bdud 'joms mchog sprul 'jigs bral ye shes rdo rjer zab gsang thun min gyi mnga' bdag chen por nges pa'i bden tshig zhabs brtan ched 'bul gnang ba sogs rten 'byung legs tshogs khyad par 'phags pa'i bdag rkyen du gyur/_go 'jo ra khrid gter ston nas kyang chos skor gzigs 'bul skabs bstan 'gro'i zhabs rim bsgrub dgos kyi bka' bslab dang 'brel gter ston sku tshe brtan cing zab chos 'phel rgyas 'byung ba'i smon tshig ljags rtsom phyag rtags kyis spras pa gnang*/_gzhan yang 'di gras che phra 'ga' re yod pa dang*/_rgya rong mkha' 'gro zhes rang grol gyi rnal 'byor ma dang rje bla ma lhan rgyas pas rdzong sar dgon gyi phu rgya rgan khyung stag gnas zhal gsar 'byed dang gnas yig gtan la 'bebs skabs/_gnas de'i sgrub phug nas dz+hi k+ShiM smug po'i phur pa khyad 'phags gter du bzhes shing de la phur pa'i chos skor nyung tsam mkha' 'gros gtan la phab 'dug_/mkha' 'gro 'dis gnas der rje'i zhabs brtan tshogs dang me mchod yun ring gnang skabs rje bla ma mchog ye shes kyi sku la dpa' bo mkha' 'gros bskor ba tshogs kyi 'du bar phebs pa'i dag snang yang yang byung tshul bshad/_gu rus rjes bzung las 'phro'i gter brgyud la dbang ba'i gral du ma mchis pa so skye 'ching ba kun ldan du nges pa rang blo rang la lkog tu ma gyur kyang*/_rje btsun bla ma 'jam pa'i dbyangs sku gong 'og gi thugs rje byin rlabs kho na'i mthu la brten nas/_blun rmongs bdag la'ang dus dang rkyen gyis dgongs gter lta bu thar thor shar ba bri rgyu red song ba rnams rgyu mtshan bcas gzigs 'bul zhus ma thag thugs la nges shes zab mo 'drongs zin pa'i gsung gis 'jam dbyangs bla ma mkhyen brtse'i dbang po'i thugs kyi byin rlabs 'phos pa'i rten 'brel las byung bar dbugs dbyung bcas thams cad gsan bzhes gnang ba dang*/_shing sprel sprel zla'i tshes bcur sgrub gnas kyi rgyal po dzaM nang pad+ma shel phug gi mdun du rtsa gsum tshogs 'bum ther/_bod du mchims phu/_khams su dzaM nang pad+ma shel phug gnyis gu ru rin po che'i sgrub gnas kun gyi rgyal po yin cing*/_sgrub phug 'dir bka' brgyad bdun brgya nyer lnga rang byon du bzhugs pas lha khang bzhengs skabs ka ba dang gdung mas rang byon la skyon ma phog pa dgos zhes thams cad mkhyen gzigs many+dzu'i zhabs dngos kyis ka gdung bzhag yul phyag rtags gnang ba yin tshul sogs rgyu mtshan du ma dang bcas sgrub phug dngos su bka' 'dus chos kyi rgya mtsho'i tshogs sgrub bdud rtsi sman sgrub bcas/_gzims spyil bkra shis 'chi med grub pa'i dga' tshal du thugs sgrub bar chad kun sel dang*/_snyan brgyud yang dag gi bdud rtsi'i sgrub pa dang 'brel ba'i sgrub chen/_mkha' 'gro gsang 'dus kyi sgrub mchod/_lan mang bdud rtsi'i sgrub pa dang 'brel ba/_tshogs 'bum sogs lan du ma'i tshogs gral du rje bla ma nyid dkyil 'khor gyi gtso bor bzhugs pas rten 'brel mthun sbyor dbugs dbyung mdzad/_rin gter yongs rdzogs dang rtsa gsum 'od gsal snying thig sogs rje gong ma'i bka' babs bdun gyi gsang mdzod rnams kyi dbang khrid lung bcas byin rlabs dgongs pa'i gtad rgya thun min yang yang du gnang ba'i dmigs med thugs rje chen po'i nyer len kho na la brten nas kun gzigs gong ma'i gsang mdzod kyi cha shas 'ga' zhig thog mar rje bla ma nyid kyi gzigs snang du brda ris gsal zhing chos skor der bzhugs kyi zhal bkod gnang ba the tshom dogs sel dang yid ches kyi dpang por bkod nas gus phran nas zhabs tog tu rloms te phab spel zhus pa'ang zhar byung sa bon tsam ste/_mdor na rang gi dad mos shugs zhan pa dang rig rtsal brtul zhugs gtad med du skyong ma nus pas nongs pa las/_rang bas skal pa bzang tsam yin na gter chen mchog gling dang 'jam dbyangs bla ma yab sras zhal rgyas pa lta bur 'byung snyam pa'i nges shes 'drongs shing*/_spyir 'di dag dbang bcu thob pa'i byang chub sems dpas phal pa'i sa rdo gser du bsgyur ba dang chos mtshungs par rig 'dzin bla ma mchog gi ye shes 'dod dgu'i rtsal gyi che bas byin gyis brlabs pa'i tshul bshad pa las/_bdag lta dgongs mthon po dang skal pa rab kyi zab chos de dag la dbang ba'i che brjod smras pa min pas dpyod ldan dag gis rgyu mtshan mkhyen par gsol/_rdzas gter rigs dmigs bsal du/_rag chab nas sngags rgan gcig gis zhing kha nas phra man las mgon po gur gyi sku rnyed pa sku mdun gzigs phul bas rten de khong gi phyag tu 'byor dgos rgyu yin tshul rten tshab gzhan zhig dang gnang sbyin bcas bzhes/_gzim chung sbug ma mdzod tshe dpal snga char mchod pa 'bul du 'gro skabs sgo'i steng na li smug gi rdo rje shin tu khyad 'phags mthong ba de 'phral gzigs phul bas zhal rtsed bcas thugs bdag gnang*/_dbus phebs rjes mar lam kha na tshong pa 'dra zhig gis sku rgyu li lta bu shin tu rnying nyams can ral gri be con mda' gzhu dbyug pa sogs mtho re'i tshad lhag yod pa rnams phul ba de tshe dgyes nyams cher ma gnang yang*/_'bul mkhan 'gro tshar rjes nga'i 'jam dpal zhi drag gi phyag mtshan da res 'byor byung gsungs nas rtsa ba che che ltar mdzad pas mtshon sku dang phyag mtshan ches mang dngos brgyud nas bzhes shing*/_gnas zhal dngos su snang bar mdzad pa khyung stag gnas dang*/_rdzong sar bkra shis lha rtse'i gdan sa yang sngar nas 'jam dpal gshin rje'i gnas yin pa'i gzigs snang byung bas gnas yig bri dgos par gus la bka' gnang zhing*/_lha srin dam bsgrags dang gnas lam gsar btod gnang*/_gzhan yang sde dge khro ri zil khrom gyi sbas gnas sgo maN+Dal steng gi pha waM gur 'dra brgyud sbas gnas su 'gro lam gyi lung byang dang*/_dpa' 'og dbang chen brag_/sde dge dang lha thog bar du yod pa'i sha ri gsang chen/_nang chen gze rgyal/_khyung po'i spu rgyal gangs ri/_yar 'brog stag lung*/_'bras mo ljongs kyi gnas kyi cha shas/_bal yul yang le shod kyi gnas yig mdo byang rnams bzhugs/_'di dag sa bon tsam ste kun gzigs gong ma dang rnam dbyer med pa'i ye shes dag pa'i gzigs pa 'byams klas shing thun min bka' babs bdun la rdzogs par dbang bsgyur bar nges kyang*/_ji skad du/_res 'ga' mi 'byin gter rnying bstan pa skyong*/_/zhes pa dang chos mtshungs par gsar rnying bka' gter gyi chos sgor rab 'byams gdul bya gang la gang 'dul du 'chad spel gnang ba nyid gtso bor mdzad pa las/_rje nyid kyi gsung dang dgongs klong las phyung ba'i zab chos skor spel grub par gsol ba btab tshe/_bdag lta bu'i 'khrul snang la yid rton ci yod/_rang gzhan gyi rgyud la phan gnod gang gi rgyur 'gyur mi shes/_dper na sngar dus kun gzigs si tu rdo rje 'chang la kaHdam pa bde gshegs kyis rjes su bzung ba'i gzigs snang dang*/_kaHthog pa'i chos mang po'i nye brgyud byung ba'i lo rgyus phyag bris mkhan chen bla ma stobs ldan gyis gzigs nas de rigs spel mdzad rgyu dang*/_gzigs snang lo rgyus mdzad 'phro lus pa mthar bton thub pa'i zhu nan phul ba'i lan du/_phran lag pa 'dug ma thub pas bris pa de rigs la dgos pa med/_mi res 'khrul snang 'di 'dra mang po bris na bdag cag gi rtsa ba'i bla ma mkhyen brtse rin po che'i dag snang nye brgyud kyi che ba nyams byed dang*/_de'i lad mo zlos kyang me khyer gyis nyi ma la 'gran pa ltar mkhas grub rnams thugs khrel gyi gzhi las ma 'das lugs bka' gnang song ba nges par don la gnas pa yin gsungs te/_de rigs g.yas chung kho nar mdzad pa dang*/_thugs shin tu sgam pas gus nas kyang ched du bka' 'dri sogs zhib cha zhu ma spobs/_gzhan zhal lung dngos dang phyag thor 'khod pa rgya cher ma bzhugs pas re zhig de tsam mo/__/da ni lam rtags kyi yon tan brnyes tshul khyad par can cung zhig brjod na/_sher phyin brgyad stong pa las/_rab 'byor gzhan yang phyir mi ldog pa'i byang chub sems dpa' sems dpa' chen po ni chos gang dang gang du kun chub par byed pa dang*/_sbyin par byed pa de dang de nyid sems la kun chub par byed pa dang sbyin par byed pa de dang de nyid sems la kun chub par byed cing sbyin par byed do/__/bdag gi chos 'di sems can thams cad kyi don dang phan pa dang bde ba'i phyir sbyin par bya ste/_chos bstan pa 'dis kyang sems can thams cad chos kyi bsam pa yongs su rdzogs par gyur cig ces chos kyi sbyin pa de yang sems can thams cad la thun mong du byed de/_rab 'byor rnam pa de dag dang rtags de dag dang mtshan ma de dag dang yang ldan pa'i byang chub sems dpa' sems dpa' chen po ni bla na med pa yang dag par rdzogs pa'i byang chub las phyir mi ldog par gzung bar bya'o/__/zhes pas mtshon byang chub sems dpa' phyir mi ldog pa'i rtags mtshan gyi yon tan rnams theg pa chen po'i mdo sde dag las 'byung ba ltar bzhugs shing*/_khyad par rdo rje theg pa'i lam gyi yon tan snang srid dag pa rab 'byams lha'i 'khor lor shar zhing*/_mthar 'bras nye rgyu'i spyod pa la brten nas mi slob pa'i sa mngon du mdzad tshul zhib par nang gsang gi rtogs brjod kyi dngos shugs las 'byung zhing*/_skabs 'dir nye rgyu'i spyod pa la ji ltar 'jug par mdzad pa'i tshul cung zad brjod na/_de'ang 'di'i dngos don ni gsar rnying gi rgyud sde chen po rnams kyi rdzogs rim nas mthun par gsungs pa'i mthar 'bras kyi sa mngon du byed pa'i sngon du lha dang bla mas lung bstan byung pa'i dngos rig gi phyag rgya dang lhan cig nye rgyu'i spyod pas 'gro kun he ru ka rdo rje'i rigs su bsgrubs pas tshom bu dang bcas pa grol bar byed dgos tshul gsungs pa'i sa mtshams su slebs pa ste/_rje gong ma'i rdo rje do ha'i tshul du lung bstan gyi tshig_/shar phyogs DA ki 'du ba'i pi wang gi snyan 'gyur/_/lho mon smyug ma'i tshal gyi khu byug gis blangs nas/_/dbyar skyes myu gu 'dren pa'i skyo grogs la phebs dang*/_/nyams dga'i pad+mo rgyas pa'i ngo mtshar zhig yod do/__/zhes sogs ma 'ongs 'byung 'gyur ston pa'i gsung dngos dang*/_sa skya phun tshogs pho brang gi bdag khri yab sras la sgrub thabs kun btus kyi bka' dbang gnang ba'i thog mar smin grol sgo 'byed dkar po rnam gsum gyi rjes gnang nyin na bza' sku 'jug dkar po bzhes/_sku mtshams las bzhengs ma thag yin pas dbu skra yang ring por skyes 'dug_/gus nas sngags kyi spyod pas na bza' dkar chas bzhes na rten 'brel che tshul zhus pa'i gsung 'phros su/_rje bla ma nyid kyi ye shes dag pa'i snang ngor shrI he ru ka nam mkha' 'jigs med zhabs kyi thugs brtse bas skyong tshul gyis dbu la phyag gis yang yang byugs shing*/_rig pa brtul zhugs kyi spyod pas gnas yul nges med du phebs pa'i dus la babs tshul gyi lung bstan pa'i nyin der/_gu ru he ru ka'i chas can sku li ma chung ngu gnyis phyag tu son pa sogs rten 'brel legs 'grigs byung tshul gus rmongs la bka' bstsal ba dang*/_gus nas kyang he ru ka'i chas dang spyod pa la dgos pa che bas dgongs spyod de la bskul ba'i mgur zhig phul ba de la dgyes tshul gyis yang nas yang du gzigs pa dang*/_mdo mkhyen brtse ye shes rdo rjes kyang lung bstan dang sngon gnas rjes dran mnga' tshul lam tsam gsungs pas mtshon lhag pa'i lha rig 'dzin bla ma rnams kyis sngags kyi spyod pa la bskul ba'i gzigs snang dang lung bstan snga phyi lan du mar byung zhing*/_nang du lam rtags kyi rtsa rlung thig le'i khams 'dus pa'i rtags su dgung grangs bzhi bcu'i skor nas phyi rol kun gyi mthun snang du sku 'phar g.yo lta bu'i mjug nas gsung 'byon mi thub pa yun ring thung sna tshogs kyis nyin rer yang lan mang 'phar ldang gi bsnyun khams bzhes tshul bstan cing*/_lar rje 'di sa lam mthon por gshegs pa'i rtags mtshan bsnyun khams lci ba'i tshe na phyag chab kyang dwangs su song ba dang*/_de dag shin tu 'khrugs skabs sku khams gsal dwangs su bzhugs pa rlung mkhris bad kan sogs kyi rtags go ldog lta bur 'byung zhing*/_sku khams shin tu 'khrugs skabs gsol sman ji tsam phul rung phan skyed med par glo bur snga phyi dro'i yud re tsam gyi stod smad la mtshan dkyil gsal dwangs su phebs pa lta bu mdor na sman pa sogs thun mong gi dpyod yul las 'das shing shin tu ngo mtshar ba'i gnas su bzhugs la/_skabs der gso dpyad pa rnams kyis grib rlung sogs ngos 'dzin sna tshogs pas der mthun sman dpyad dang zhabs brtan rgya gang che'i rigs bsgrub na'ang phan skyed cher med pa'i tshul bstan pa sogs nye rgyu'i spyod pa skyong ba'i dus la nges par babs pa'i rtags mtshan mngon du gyur pa ste/_rje nyid kyi gsung 'phros las kyang kho bo'i nad 'di lam bsgom pa'i lag rjes ni ga la yin/_de ni rang rgyud nyams len gyis dbul bas 'ong don med/_tshe snga ma'i las lhag 'dra gang yin na rtsa rlung thig le'i khams 'dus pa'i rnam pa 'dra zhig byung ba red ces phebs pa la brtags na nges shes lhag par skye ba'i gnas so/_/de lta na'ang gsang ba srung ba la thugs shin tu sgam pas sku tshe'i rten 'brel gyi dgos pa tsam yin tshul dang*/_der ma zad bstan pa'i mig ltos gang cir de rigs la dgos pa'ang med ces btang snyoms su 'jog par mdzad pa na/_dgos don rgyu mtshan shes pa'i slob 'bangs kun dang*/_khyad par du 'jam mgon rnam gnyis kyi thugs sras sgrub brgyud bstan pa'i mnga' bdag chen po byams mgon tA'i si tu pad+ma dbang mchog rgyal po mchog gi zhal nas/_kho bos snga phyir 'jam mgon bla ma mchog gi sku phywar brtags pa bya dgos yang yang byung ba kun la zhabs brtan bsgrub bya gtso bor rje nyid kyi dgongs nyams gang yod 'thus shor med pa bsgrub gal che tshul brjod pa rnams tshul 'di la bsam pa yin/_cung zad phyis skyon las mi snang yang da res rten 'brel legs 'grigs 'byung thabs shin tu gal che tshul gyi bka' yig dang*/_rgyal sras 'jam mgon mchog sprul rin po ches kyang gsang spyod dang bzhes mdzad na rten 'brel dus las yol mi 'dug cing*/_'jam mgon bla ma mchog nyid bstan 'gro'i mgon du zhabs pad brtan pa'i thugs bskyed lhur bzhes dgos tshul gyi brtan bzhugs legs 'bul bcas bstsal ba dang*/_sa skyong sde dge'i sras yum blon 'khor sogs rgyu mtshan shes pa kun gyis kyang nan tan du gsol ba btab cing*/_'bri gter 'od gsal rdo rjes tshe lam phyag rgya'i rten 'brel dang du bzhes dgos pa'i lung byang phul ba dang*/_sku'i gcung 'chi med pad+ma rdo rje/_gus phran bcas kyi lung bstan khag mang mthun par byung bas rten 'brel gyi gsal 'debs lta bur gyur te/_gtso bor rje bla ma mchog gi ye shes gzigs ngor gsal ba'i lung don bzhin tshe lam phyag rgya'i nye rgyu'i spyod pa dang du bzhes pa'i tshul mdzad pa ste/_de'ang spyir rje bla ma mchog nyid rtag par na bza' bzhes stangs gsol ja sogs mdzad spyod thams cad 'dul ba dang gzhi mthun pa 'ba' zhig gnang*/_sku sham yang le'u can kho na bzhes shing spyod pa la gshegs pa'i rnam thar zhal gsung du/_da ni rang lo brgya phyed la/_/'dod yon bse ru'i grangs lhag son/_/gter ston dang ni grub thob kyi/_/shas tsam bdag la mi bdog kyang*/_/re zhig ma shi gson gyur na/_/rang don sgrub pa'i zhar byung du/_/gzhan la phan pa'ang cha shas 'byung*/_/de phyir gong ma kun gzigs rje'i/_/gsang ba'i lung gi tshig zur dang*/_/'jam mgon kong chen zhal 'phros sogs/_/dam pa rnams kyi lung byang dang*/_/rang gi rig ngor thon pa bzhin/_/tshe lam phyag rgya'i rten 'brel bsgrigs/_/theg dman sor sdom phul byas shing*/_der brten rtogs pa mi ldan kyang*/_/sems bskyed dge ba nyid du smon/_/'di yis phan par 'gyur ba yi/_/dam bca' byed du ma mchis kyang*/_/rang gzhan rkyen dbang ma gyur na/_re zhig 'tsho bar 'gyur yang srid/_/ces gsungs pa ltar dang*/_mkhas grub chen po sde gzhung mchog sprul rin po ches rje 'di nyid kyi sa lam drod rtags yon tan gyis thugs 'phrog nas/_khyed lta bu'i rdo rje 'dzin pa chen pos dge slong gi bslab pa phul ga la dgos gsungs te/_rgyu mtshan de'ang rdo rje 'chang 'di ni nges par grub pa'i sa mthor gshegs pas na/_rgyud las/_dam tshig sdom las rnam par grol/_/zhes gsungs pa ltar bslab bya'i tshogs thams cad bya ba grub pa'i ye shes su grol zin pas so skye'i sdom pa srung tshul dang bsgrigs mi dgos shing*/_tshul bstan du'ang nyams dang rtogs pa'i dbang phyug chen por bzhugs pas na dge tshul slong gi bslab pa ma phul bar phyag rgya'i nye rgyu bsten rung ba ni/_'phags yul grub pa'i gtso bo sa ra has mda' mkhan phyag rgyar bzhes pa'i rjes/_/kha tsang phan chad bram ze yin/_kha tsang phan chad dge slong min/_/de ring phyin chad dge slong yin/_/he ru ka dpal dge slong mchog_/ces gsungs shing de'i rjes la klu sgrub kyi mkhan po mdzad pa lta bu dang khyad med pa nges par yin mod/_'on kyang rje 'di ni rang rgyud kyi yon tan sbas tshul kho nas gdul bya'i don 'ba' zhig la dgongs te sdom pa gsum gyi bslab bya thams cad lam rim bgrod kyi gang zag gi nyams len ltar rang rang gi gzhung bzhin ma 'dres par spyod pas snyigs dus kyi gang zag rnams bstan pa'i rtsa ba dam pa'i chos 'dul ba'i spyod pa lhod par mi 'gyur ba'i dgos dbang la gzigs nas chos brgyad kyi zhen pa sngar nas spangs shing rgyud dang man ngag rgya mtsho'i dgongs don gsang sngags kyi thabs lam zab mo nyams su bzhes pa gtso bor gyur pa'i skabs su rten bsgyur bar mdzad pa yin la/_de yang nang gi dgongs pa lta sgom mthon por ji tsam phebs kyang phyi'i rtags dang kun spyod ston mchog thub pa'i dbang po'i so thar gyi bcas pa'i bslab pa gal chung khyad gsod du mi 'gyur zhing*/_bstan pa'i che ba 'byin pa dang*/_khyad par snyigs dus 'dir dgos pa med par gter lung dang sngags la khas 'che bas lta sgom gyi gding tshad gang yang med par bslab sdom 'jol nyog tu spyod pa shin tu mang bas de dag bag yod par 'gyur ba sogs kun gyi mig ltos la phan pa'i ched du dge 'dun gyi sde la bsnyen bkur dang 'brel sngon lha btsun chen po nam mkha' 'jigs med spyod pa la gshegs pa'i tshe/_chos gos dang lhung bzed rnams rdo rje gdan gyi thub dbang dang dge 'dun gyi drung du phul nas he ru ka'i chas bzhes pa ltar/_rje nyid kyi rgyun bzhes chos gos rnam gsum tshul khrims kyi dri bzang ring du 'phro ba sogs rab du byung ba'i yo byad rnams chos sde so sor phul nas ji srid bstan pa gnas kyi bar dus chen la bstan rgyas cho ga re'i skabs mchod pa'i yo byad du bshams dgos pa'i rgyu mtshan bka' lung zhib rgyas kyi snyan gsan dang 'brel theg dman so thar lugs kyi sdom pa 'bul ba'i tshul mdzad pa ni/_bstan pa spyi'i babs la dgag bya chung zhing dgos pa shin tu che ba dang*/_der ma zad rgya gar 'phags pa'i yul gyi bstan pa'i shing rta chen po rnams sngags kyi spyod pa bskyangs nas dge 'dun gyi tshogs dpon dang mkhan po ma mdzad pa'i rnam thar dang mthun par bskyang ba ni dpyod ldan dang ba 'dren pa'i gnas so/_/de ltar spyod pa la zhugs pa'i dgos don snying por dril ba rje nyid kyi rdo rje'i gsung ma nyams par bkod pa 'di ltar/_!_/rang ltos kyi slob bu'i tshogs la 'phrin du gsol ba rab rib mun sel zhes bya ba bzhugs so/_/bla ma dang mgon po 'jam pa'i dbyangs la phyag 'tshal lo/__oM swasti/_bdag blo dam pa'i ded dpon gyis bzung zhing*/_/rnam dkar dge ba'i gru gzings la brten te/_/dad brtson shes rab ba dan dkar po yis/_/rnam grol gling du bskyod par dam bcas shing*/_1_/phun tshogs 'byor pa'i rin chen rten bzang po/_/lhag pa'i tshul khrims gser gyi sa gzhi la/_/lhag pa'i ting 'dzin dpag bsam ljon pa'i rtser/_/lhag pa'i shes rab 'bras bzang mtshar du sdug_2_/kun mkhyen nyi ma'i gnyen gyi bstan pa la/_/gcig tu sems pa'i dam bca'i ri mo ni/_/rdo bar bris bzhin mthar thug snying po'i bar/_/yid kyi thig ler dbyer med ro gcig 'dres/_3_/'jam mgon dgyes pa'i mtshan snyan dri bzhon gyis/_/reg pas mthong ba don ldan grags mod kyang*/_/kun mkhyen che de gtsug gi rgyan bsnyen nas/_/de yi phrin las nam mkha'i mtha' khyab spel/_4_/dgos 'byung bsam 'phel rgyal mtshan rtser mchod de/_/'gro sems mchog phal su yis gsol btab kyang*/_/de la 'dod dgu'i dngos grub ster ba bzhin/_/mkhyen brtse'i ye shes byin rlabs cha shas dpog_5_/de yi drin gyis dal ba'i rten mchog 'dir/_/kun rtog rnyogs pa'i gzhan dbang btsan po yis/_/mtha' gcig dkar po'i snang bas dben gyur kyang*/_/phal cher bsam sbyor dag pas khyab par gyur/_6_/da ni mi tshe'i nyi ma nub ri'i phag_/yol ba'i snga ltas shin tu gsal ba dang*/_/gshin rje'i lam du myur bar chas pa yi/_bdog pa'i sta gon dag kyang nye bar mthong*/_7_/de la nyer bsdog sgyu ma'i rig sngags kyi/_/thabs tshul sgyu 'phrul sol ka'i me tog ni/_/rnam mang lha yi dga' tshal bkrag gyur kyang*/_/sman byed srog gi bdud rtsi'i zil thig phra/_8_/e waM phyag rgyas sdom pa'i rdo rje can/_/gang gi tan+t+ra rgya mtsho'i yang snying ni/_/rnal 'byor chen po bla na med pa las/_/phyag rgya rnam bzhir nyer brten gseng lam che/_9_/dman 'bring blo can phal gyis spyod pa na/_/sbrul gdug mgo yi nor bu blangs pa bzhin/_/khe nyen chen pos log par ltung srid kyang*/_/blo chen 'ga' la der thob nye bar 'tshengs/_10_/mchog tu sbas pa'i ngo mtshar sgyu ma ni/_/bde chen ye shes d+hA ki ni gu'i gzugs/_/rnam bcas bde ba'i pad+mo 'dzum pa des/_/rnam med ye shes grub pa'i sa la sbyor/_11_/de phyir ston pas rab bsngags nye lam 'dir/_/'jug pa'i spobs pa ba thag ltar phra yang*/_/rnal 'byor mos pa lam du byed pa yi/_/kun bzang bde stong rol pa'i gar gyis rtsen/_12_/de yi stobs kyi dpung shugs btsan po des/_'chi bdud rtog pa ring du bskrad byas te/_/'chi med gnyug ma'i gar mkhan dpa' bo che'i/_/brtul zhugs mchog la nye bar 'dun cing smon/_13_/srid pa'i grong khyer sgyu ma'i gar mkhan bzhin/_/snang sems dbyer med ro gcig 'dres pa las/_/phyogs las rnam rgyal 'jigs med blo gros kyis/_/gzhan phan bsam pa gser zhun ltar spyod la/_14_/gal te rang 'dod sred pa'i 'ching thag gis/_/dam por bsdams pa'i sems ngan dbang yin na/_/lha dang bla mas kyang ni thugs khrel zhing*/_/rdo rje can gyis bdag gi mgo bo 'gems/_15_/rang gi sems la zol zog ma mchis shing*/_/rgyal ba'i bstan dang 'gro la bde skyid kyi/_/nges sems dang ldan 'jam mgon bla ma rje'i/_/thun mong thun min bstan pa srid mtha'i bar/_16_/spel ba'i g.yar dam zla zhun thags btag gi_/sgo gsum dar yug stong chen khyab pa 'di/_/nyes pa'i dri mas nongs par ma gyur na/_/sras bcas rgyal ba dgyes pa'i mchod sprin 'bul/_17_/de ltar bdag gi spyod pa 'di 'dra bar/_/kun rtog rlung dmar drag tu rgod rnams kyis/_/'phya dang gleng gzhi'i ya ga sgrogs byed kyang*/_/bdag sems ku sha'i rtse tsam g.yo re kan/_/18_gang zhig 'dren byed 'khrul par zhugs rnams kyis/_/yang dag dngos la log 'dzin zhugs pa ltar/_/skyon zad yon tan rdzogs pa'i rgyal ba la'ang*/_/skyon du mthong na bdag 'dra smos ci zhig_19_/mdo rgyud rnams nas bla mar bsten phyin chad/_/gus pas mchod dang ci mdzad tshad mar blta/_/rgyal ba dang 'drar dad gsum sems kyis 'dud/_/de la mchog dngos lag mthil gter bzhin gsungs/_20_/zab rgyas chos kyi 'brel pas bsrungs rnams kyis/_/log par bltas na sa spyod bsti gnas cher/_/'tshigs par dogs pa'i sdug bsngal ma bzod pas/_/brtse ba'i sems kyis rab tu springs pa 'dis/_21_/thar pa'i mig gi rab rib rnam sel zhing*/_/yang dag legs par mthong ba'i spyan stong bkra/_/gsang gsum byin rlabs rgyud la 'jug pa dang*/_/nyams rtogs yon tan gong nas gong 'phel shog_22_/bdag rjes zhugs rnams 'chol bar mi spyod cing*/_/nyes ltung sdom pa'i tshul khrims la brtson te/_/thub pa'i ring lugs gtsang mar spyod pa dang*/_thams cad mkhyen pa'i go 'phang thob gyur cig_23_/rtsa gsum rgya mtsho'i mthu byin rab zhugs nas/_/lha min sder bcas dregs ldan dpung tshogs rnams/_/'khor lo rdo rje 'bar ba'i mtshon rnon pos/_/ming gi lhag ma tsam du bgyid gyur cig_24_/bdag kyang 'chi med rdo rje'i dpal la spyod/_/rgyal khams kun tu dus kyi rgud pa zhi/_/rdzogs ldan gsar pa'i dga' ston dar babs zhing*/_/bstan dang bstan 'dzin dar zhing la rgyas par shog_25_/de skad drang por smra ba'i blo can ni/_/'jam dbyangs phyag gis co to nas bzung ba'i/_/chos kyi blo gros zhes bya'i ben hrul des/_/bkra shis 'chi med grub pa'i dga' tshal che/_26_/mkhas grub rgya mtsho 'du ba'i bsti gnas su/_/dus kyi dge mtshan phun sum tshogs pa'i char/_/bkra shis dpal yon brgya phrag 'char ba na/_/bris 'dis dag pa'i snang ba rgyas gyur cig_27_/sarba dA mang+ga laM/__/zhes skal ba dman pa dag gi the tshom bsal zhing dad ldan slob tshogs rnams spro ba skyed byed du gsang ba chen po'i rdo rje'i do ha lhug par bstsal ba rnams las don gyi dgos pa dgongs gzhi'i gsang ba zab mo rtogs par bya ba kho na las/_'ol tshod tsam du 'chad pa'i nongs pa lha dang bla ma mkha' 'gro'i tshogs kyis bzod par bzhes su gsol/_/de nas snga ma sku lus 'phar g.yo'i bsnyun khams kyang seng dwangs su phebs te khams bye'i mkhan slob la gsang yum skor gyi zhal 'phros gnang skabs/_sku lus 'phar g.yo che tsam gyi snyun gzhi sngar nas byung ba de ni lam 'bras las khams 'dus pa dang po'i skabs su 'byung bar gsungs yod ces bka' bstsal pa dang*/_dad slob gzhan la gsang spyod kyi rten 'brel bsgrigs rgyu 'di cung zad phyi skyon las mi 'dug ces bka' 'phros gnang rigs la dpyad na/_khams 'dus thog mtha' bar gsum las mthar phyin 'bras bu'i khams 'dus tha mar lung bstan pa'i phyag rgya pad+ma can la brten nas lam bzhi pa rdo rje'i rba rlabs bsgom par gsungs pa'i gnad/_dper na mar dwangs snyigs 'byed cing mar me sogs kyi dgos pa rdzogs pa la bzhu dgos/_'ju ba la me dgos/_me la shing dgos pa bzhin du mtshon bya don gyi ye shes kyi grub mtha' snyegs pa la mtshon byed dpe'i ye shes dgos/_de la tshor ba bde ba dgos/_de la lus kyi khams dwangs ma bzhu dgos/_de 'ju ba la rjes su chags pa'i me dgos/_de la rig ma dag pa'i shing dgos pas/_kye rdor rtsa rgyud las/_dngos grub mtshan nyid mi phyed pa/_/phyag rgya'i rnal 'byor pa yis 'grub/_/ces dang*/_bshad rgyud gur las/_phyag rgya'i dngos grub dngos grub che/_/dngos grub kun gyi spyod yul min/_/zhes dang*/_saM b+hu Ti las/_chos kyi phung po brgyad khri dang*/_/bzhi stong gi ni cho ga yang*/_/lus kyi de nyid mi shes pa/_/de dag thams cad 'bras med 'gyur/_/zhes dang*/_ye shes rdo rje kun las btus pa las/_ji ltar 'o ma dang til dag la mngon par 'du byas pa med par mar dang til mar mi 'byung ba de bzhin du/_sngags dang phyag rgya dang mngon par 'du byas pa'i rdo rje dang pad+ma mnyam par sbyar ba med par rnam par shes pa gsum mtshon par mi nus so/_/gang gis b+ha ga dang ling+ga yang dag par mnyam par sbyor ba mi nus pa des ni bde ba chen po'i ting nge 'dzin mi rnyed do/_bde ba chen po'i ting nge 'dzin 'ba' zhig la lhag par mos pa tsam gyis las dang po'i sa la gnas par 'gyur te/_phyir mi ldog pa'i sa la yang slob par 'gyur ro/_/zhes dang*/_rnal 'byor ma'i rgyud kun spyod las/_gnyis med ye shes sems ldan pas/_mi bya ba ni ci yang med/_/mi rtog bdag nyid sems kyis ni/_/'dod pa'i yon tan lnga rnams spyad/_/ces sogs rgyud rnams las rgya cher gsungs pa ltar rten 'brel gyi gzhi rten dkyil 'khor bzhi rdo rje'i lus la tshang ba la gnad du bsnun pas/_brten pa sems la rtogs pa bde blag tu 'char ba'i gnad nyid ches zab pas/_lta ba/_bskyed rdzogs/_spyod pa/_nye rgyu'i mngon rtogs lnga tshang dgos par gsungs/_dpal yang dag par sbyor ba'i rgyud las/_skye ba 'dir sangs rgyas pa nyid dam/_rdo rje sems dpa' thob par 'gyur te/_gang dag bsam gyis mi khyab pa'i gnas thob pa ni bde bar gshegs pa ste sangs rgyas yin la/_mtshan gzhi mtshon pa ni rdo rje sems dpa' yang dag pa'o/_/zhes gsungs pa ltar/_phar phyin theg pa dang rgyud sde 'og ma gsum dang bcas pa'i lam gyis snang gsum 'pho ba'i bag chags sbyong mi nus pa'i gnad kyis spang thob yongs su rdzogs pa rdo rje 'dzin pa'i sa bgrod mi nus pas/_rdo rje theg pas rten dkyil 'khor bzhir dbang bzhis smin/_lam bzhis gnad du bsnun pas spang bgrod gnyis ka lus la gnad du bsnun nas mthar thug 'bras bu'i dus su rig ma dag pa'i phyag rgya la brten pas 'gros bzhi thim ste/_rten dkyil 'khor bzhi brten pa rig ma dang bcas pa sku lnga dbyer mi phyed pa'i ye shes su gnas gyur te rig pa'i skyes bu'am phyag rgya chen po'i dngos grub brnyes nas rtag khyab lhun gyis grub pa'i phrin las kyis gdul bya'i don mdzad pa yang*/_bde mchog sangs rgyas mnyam sbyor las/_sgyu ma dag ni thams cad las/_/bud med sgyu ma khyad par che/_/zhes dang*/_gtum po dpa' gtum yang dag pas/_chags bral las ni sdig gzhan med/_/bde las bsod nams gzhan pa med/_/de phyir sems ni mnyam bzhag pas/_/'dod pa'i bde ba bskyed par bya/_/zhes dang*/_gzhan yang rdzogs pa chen po sgra thal 'gyur rtsa ba'i rgyud kyi dgongs pa theg mchog rin po che'i mdzod dang*/_yid bzhin mdzod rtsa 'grel las gsungs pa rnams sgra ji bzhin du spyod pas rdo rje theg pa'i rgyud don zab mo'i dgongs spyod la dbang bsgyur bar nges pa'i gsang ba chen po zur tsam smos pa 'di dag gzur gnas kyi thugs la nges shes 'drongs pa'i phyir dang*/_deng sang sngags la kha g.yar nas tho co'i spyod pas bstan pa nang bshig pa la phan pa'i ched du rdo rje'i gsang lam gyi lta spyod sgra ji bzhin lam du longs pa 'di ltar yin zhes lhag pa'i bsam pas rang blos gang dpog cung zad tsam brjod pa'o/_/skabs de tsam na skye rgu kun gyi yid mkhar ngo mtshar dga' spro'i nyi ma gsar pa shar bas grub mtha' ris med kyi chos sde khag dang*/_sa skyong rgyal khab che phra dpon blon 'bangs 'khor sogs mchog dman kun gyis dga' spro'i legs 'bul dang 'brel mjal phyag zhu mkhan lha mi'i 'du bas sa gzhi dog por byed pas mtshon dge legs 'bum gyi snang bas yongs su khyab par gyur to/_/de ltar nye rgyu'i spyod pa la zhugs pas lung don bzhin gnas yul nges med du phyogs las rnam rgyal rig pa brtul zhugs kyi spyod pas gshegs par bzhed nas rdo rje kha T+wAM sku'i tshad dang mnyam pa sogs he ru ka'i chas rnams mngon par 'du mdzad pa na/_mchog dman kun gyis rje gong ma'i gdan sa las mi g.yo bar bzhugs grub pa'i gsol ba nan du btab pas rgyal sras rnams thugs kyi brnag bya sems can mgu bar byed pa nyid yin pas thams cad yid pham gyi gnas su 'gro bar gzigs nas de bzhin du zhal bzhes gnang*/_sa skya phun pho'i bdag chen yab sras la lam 'bras gnang skabs der gus la bka' phebs su/_phran sngags lam du zhugs kyang sangs rgyas kyi bstan pa rtags kyi che ba'i dgos pa la bsam nas so thar gyi rtags gzan sham yang ma bor/_dbang chos 'chad pa na chos gos snam sbyar yang gyon pa yin zhes gsungs pa dang*/_kho bo sngags lam zhugs nas gdan sa yin mdog gi khang gog mgo gyon byed nas sdod rgyu 'di cung yong ba min kyang*/_rgyu rkyen rten 'brel gyi byed pas bya thabs bral ba lta bu zhig red/_'on kyang rten 'brel zer ba de rang shugs kyis 'grigs pa las ched du bsgrigs pas 'grigs dka' la/_gnas skabs 'grigs pa ltar yang de tsam gyi dgos don med pa 'dra zhig red/_sngags spyod 'di'ang de las snga tsam byung na cung zad dgos pa yod tshod 'dug kyang rang nyid re dogs kyi 'ching bas da bar btang snyoms su lus/_yin na'ang gnas skabs 'dir thog ma'i rten 'brel skyon med byung bas lo 56 de'i tshe gegs las nges par grol zhing*/_bya ba btang nas gnas nges med du 'gro rgyu'i skor la phyi nang mchog dman su yang yid la 'thad mkhan mi 'dug pas/_bla ma dkon mchog gi thugs rjes gar bzhag bltas nas sdod pa las byed thabs kyang dka' bar snang*/_des na rje mkhyen brtse'i gdan sa byin rlabs can 'di la bkur sti ci 'grub dang*/_bstan 'gror phan res chos 'chad spel gang nus byas na bla ma dam pa rnams kyi dgongs pa rdzogs shing*/_bstan rgyun la sman pa dang*/_gang zag re re'i rgyud la thar pa'i sa bon thebs na'ang dgos don shin tu che bas lo shas sdod rgyu byung ring la de bzhin ci 'grub byed rgyu yin tshul sogs gsungs/_de sngon sa bya lor gter mdzod chos 'khor grub rjes gus nas brtan bzhugs phul ba'i gsung lan du/_lo lnga bcu dang drug cur son skabs khyed lta bu zhig byas na las 'tsho thabs gzhan mi 'dug_/skabs der brtul zhugs kyi spyod pa tshul bzhin byed rgyu byung na sku tshe yun ring tsam bzhugs mthar 'pho chen rdo rje'i sku mngon du mdzad rgyu yin pa dran na'ang sems la mi 'char ba ci yod ces gsungs pa lung bstan dus babs bzhin byung na rje gong ma'i rten 'brel 'phro bskyang rgyu yin par nges kyang*/_de ni bstan 'gro'i bsod nams kyis ma chun par deng dus gdul bya'i skal ba dang mthun pa'i mdzad pas bstan 'gro'i don 'ba' zhig thugs la brnag pas phyogs dang ris su ma chad pa'i zab rgyas chos kyi 'khor lo rgyun chad med par bskor nas gang la gang 'dul gyis gdul bya mtha' yas pa smin grol du bkod bzhin par/_ris med bstan pa rgya mtsho'i bka' gter chos kyi gsang mdzod shrI na len+d+ra gnyis pa 'og min bla ma'i gdan sa bkra shis 'chi med grub pa'i dga' tshal chen por sku tshe ril po bzhugs stan chags pa'o/_/ye shes rdo rje'i sgyu 'phrul bkod pas 'khor 'das kun la mnyam par 'jug_/zag med gsang ba spangs rtogs rgya mtsho'i nor bu rin chen thang mar brdal/_/dge legs phan bde'i dngos po kun gyis 'brel tshad dbugs 'byin mes po mchog_/'khor lo'i dbang phyug dpal ldan bla ma srid zhi'i gtsug rgyan slar yang gus/_/khyod kyi ngang tshul dran dang bstod pa'i ngag_/ma lus legs byas rin thang bral ba'i dbyig_/mdo rgyud kun nas bsngags pa rjes dran pas/_/ji ltar rtogs pa gzur gnas yid kyis bkod/_/snyigs ma'i mun pas 'khor yug brdal ba'i khrod/_/dri med 'phags pa'i ye shes nyin mor byed/_/mngon sum bstan 'gro'i mkha' la sgrib med du/_/gsal ba'i ngo mtshar gnas la mi bsngags su/_/mtha' dag thub bstan rgyu skar phreng ba'i tshogs/_/thugs bskyed kun gsal ngogs su legs bkod mthus/_/lung rtogs snang byed zung gi 'od stong gis/_/rdzogs ldan pad+mo bzhad pa'i dga' ston mthong*/_/rgya bod mkhas grub sum rtsen dga' tshal du/_/rmad byung rnam thar legs bris rnga gsang gis/_/kun dga'i dpal yon spel ba'i gtam 'di yis/_/dam pa'i yon tan rgyal thabs skyong bar bskul/_/zab rgyas chos kyi mgrin par rtag sim zhing*/_/thos bsam sgom pa'i 'dab ma rab yangs pas/_/thub dbang bstan mchog pad tshal skyong mdzad kun/_/'dren mchog rjes dran dga' ston 'os sam snyam/_/dad dang mos pa'i rtsa ba dung ltar dkar/_/gus brtson yal 'dab stug por rgyas pa'i dbus/_/rnam thar me tog 'bras bus brgyan pa 'di/_/gangs can bstan pa'i dpal du 'gyur yang srid/_/mi shes blo yis gsang ba'i don ma rtogs/_/gsang sgo 'chol sogs nyes par spyad pa'i nongs/_/dmigs med thugs rje'i bdag nyid bla ma'i mdun/_/bshags pas 'gyod tshangs dbugs 'byin da ltar stsol/_/mos gus rin chen 'dren byed rab dwangs pas/_/bla ma'i rnam thar rin chen gter mthong nas/_/rgyu mtshan shes pa'i blo yis smra ba dang*/_/tshe rabs kun tu de rjes slob par smon/_/legs spyad dge tshogs dag byed gter bzhis bstan 'gro'i dbyig 'dzin mdzes byas mthus/_/phan bde'i dbyar skyes dar la babs par bshad dang sgrub pa'i zlos gar mkhan/_/mkhas grub bung bas rtsen pa'i mgrin rnga theg gsum chos kyi gling bu yis/_/srid pa'i gdung ba yud kyis bsal ba'i dga' ston 'gro 'di'i dpal du shog_/thugs bskyed rta ljang bgrod pa'i mthu las mchog sprul nyin byed myur du 'char/_/gdul bya'i lhag ma nye bar bskyangs pas thub bstan rgyal thabs mgron du khug_/'jam dbyangs bla ma'i rnam thar nor bu gtsug gi rgyan du mi 'bral ba'i/_/ngang tshul rmad byung myur du mthong nas bdag sogs dbugs 'byin mdzad gyur cig_/ris med thub bstan lung rtogs rgyan gyis sgeg_/theg mchog chos kyi mnga' thang mi nyams bskyangs/_/sras bcas rgyal ba'i bzhed pa sgrub nus pa'i/_/ngo mtshar mdzad bzang bdag gi dpal gyur cig_/bkra shis rmad byung mkha' khyab ye shes dpal/_/rab 'byams 'jig rten kun gyis mngon gyur te/_/dge legs mi zad rtag pa'i rol sgeg ches/_/mkha' khyab chos dbyings kun tu lhun grub shog_/ces pa'ang rje btsun bla ma thams cad mkhyen gzigs chen po 'jam dbyangs chos kyi blo gros rin po che'i rnam thar sa bon tsam du smos pa 'di ni/_rje bla ma mchog gi tshe 'dzin DA ki'idabang mo tshe ring chos kyi sgron mas lha rdzas kyi rten dang bcas pa dang*/_sku'i dbon dad dam dpal gyi zla ba ches cher dkar ba'i gan mdzod tshe dbang dpal 'byor gtsos dad slob kun nas 'di ni khyed kyis 'bri bar 'os so zhes pa'i gsung gis ched du bskul ba bzhin/_khams gsum chos kyi rgyal po 'jam mgon ye shes me long mchog gis thun mong ma yin pa'i bka' drin gyis rjes su bskyangs shing*/_slob 'bangs yongs kyi gral mthar gnas pa 'gyur med theg mchog bstan pa'i rgyal mtshan rang byung mkhyen brtse'i 'od zer du 'bod pas rnam thar zhal gsung nyid rtsa bar bzung*/_gnas gzigs rjes ma'i gzigs snang thor bu mang po mchod dpon bla ma 'jam dbyangs blo gros mchog ldan nas zhu skul gyi phyag bris reg zig dngos rnams gzhir byas te/_rgya gar 'phags pa'i yul dang nye ba'i sa yi cha ka spungs rin chen brtsegs pa'i sa 'dzin gyi rtse zangs mdog dpal ri'i zhing khams bkod pa'i gtsug lag gis mdzes pa thub bstan bshad sgrub dga' tshal du bris shing*/_slad nas rje btsun bla ma'i sku'i nye gnas rdo rje'i mched po rnams dang go bsdur gyis 'phri bsnan ci rigs zhib tu bgyis nas/_lho 'brug chos rgyal chen po'i mnga' ris su gnas pa'i tshe/_gsang zab theg pa mchog gi chos rdzong nas dkyus gcig tu bkod pa'i yi ge gnyis par 'bebs po sdom brtson sde snod 'dzin pa mkhan po thub bstan brtson 'grus phun tshogs dang*/_reb kong sngags pa 'jigs med skal bzang dpal ldan zung gis bgyis pa 'dis kyang bstan 'gro'i dpal yon phyogs dus gnas skabs kun tu 'phel rgyas brtan pa dang*/_mkha' khyab yid can rgya mtsho rje btsun mkhyen pa'i bdag po'i ye shes kyi gsang ba la longs su spyod pa'i rgyur smon bzhin 'grub par gyur cig_/sarba dA ka l+yA NaM mang+ga la b+ha wan+tu//__//

Footnotes

Other Information