JKW-KABUM-21-ZHA-001-007

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 7, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

གཤིན་པོར་ངོ་སྤྲོད་ཁ་ཤས། གཤིན་པོར་ཆོས་བཤད་སྐབས་སུ། དང་པོ་འོད་གསལ་ངོ་སྤྲད་པ་ནི། འདི་ལྟར་གཉིས་མེད་རྣམ་རྒྱལ་ལས། ལུས་ཅན་རྣམས་ནི་ངེས་པར་འཆི་བའི་ཚེ། ས་ནི་ཆུར་ཐིམ་ཆུ་ནི་མེ་ལ་ཐིམ། མེ་ནི་རླུང་ལ་རླུང་ནི་རྣམ་ཤེས་ཐིམ། རྣམ་ཤེས་གཟུང་བ་འོད་གསལ་འཇུག་པར་འགྱུར། ཞེས་པ་ལྟར་འབྱུང་བཞི་རིམ་པར་ཐིམ་ཞིང་སྣང་མཆེད་ཐོབ་གསུམ་གྱི་མཐར་གཞི་ཡི་འོད་གསལ་ཤར་བ་ངོ་སྤྲོད། དེར་མ་བུ་འདྲེས་པའི་ཚེ་ན་དེ་བཞིན་ཉིད་ཀྱི་འཕོ་བའམ། འཆི་བ་ཆོས་སྐུར་སངས་རྒྱས་པའོ། །རླུང་རྣམ་ཤེས་ལ་ཐིམ་པ་ཚུན་འདས་པའི་གདམས་པ་བཏབ་སྟེ། དེ་ཡང་དབང་ཁྲིད་མ་ཐོབ་པ་སོགས་སྤྱི་ལ། བཟང་སྤྱོད་ཀྱི་དོན་སློབ་དཔོན་ཛཻ་ཏ་རི་ལས་བྱུང་བའི་སྣང་བ་མཐའ་ཡས་ཀྱི་སྒོམ་དོན་ལྟར་གདམས་ཏེ། དེ་ཡང་སྔོན་འགྲོ་ནི། བདག་དང་མཁའ་མཉམ་འགྲོ་བ་མ་ལུས་པ། །དཔལ་ལྡན་བླ་མ་སྟོན་མཆོག་རྫོགས་སངས་རྒྱས། །དམ་ཆོས་འཕགས་པའི་དགེ་འདུན་ཐམས་ཅད་ལ། །དེང་ནས་བྱང་ཆུབ་བར་དུ་སྐྱབས་སུ་འགྲོ། །ལན་གསུམ། འགྲོ་རྣམས་སྲིད་པའི་རྒྱ་མཚོ་ལས་བསྒྲལ་ཕྱིར། བདག་གིས་རྫོགས་པའི་བྱང་ཆུབ་བསྒྲུབ་པར་བྱ། དེ་མི་ཆེད་དུ་བདེ་ཆེན་བགྲོད་པའི་ལམ། །སྣང་བ་མཐའ་ཡས་ཏིང་འཛིན་བསྒོམ་པར་བྱ། །ལན་གསུམ། ཁྱེད་རང་གནས་པའི་ས་འདི་དག་པའི་ཞིང་། །བདེ་བ་ཅན་གྱི་བཀོད་པ་ཕུན་ཚོགས་བསམ། རང་ཉིད་ཐུགས་རྗེ་ཆེ་སོགས་ལྷར་གསལ་བའི། །ནམ་མཁར་ཡེ་ཤེས་རང་སྣང་རིན་ཆེན་ཁྲི། །པདྨ་ཟླ་བ་བརྩེགས་པའི་གདན་སྟེངས་སུ། །རྒྱལ་བ་སྣང་བ་མཐའ་ཡས་སྐུ་མདོག་དམར། །ཞལ་གཅིག་འཛུམ་ཞལ་ཕྱག་གཉིས་མཉམ་བཞག་སྟེང་། ལྷུང་བཟེད་བདུད་རྩིས་བཀང་བ་བསྣམས་པའི་སྐུ། དར་གྱི་ན་བཟའ་རིན་ཆེན་རྒྱན་གྱིས་མཛེས། །ཞབས་གཉིས་རྡོ་རྗེའི་སྐྱིལ་ཀྲུང་བཞུགས་པར་བསྒོམ། །དེ་མཐར་བརྒྱུད་པའི་བླ་མ་ཐམས་ཅད་དང་། །སངས་རྒྱས་བྱང་ཆུབ་སེམས་དཔས་བསྐོར་བར་གྱུར། ཇི་སྙེད་སུ་དག །སོགས་སམ། ཆོས་སྤྱོད་བཅུ་པ་སོགས་གང་འོས་བྱ། དངོས་གཞི། དེ་ནས་སྡིག་པ་དག་སྙམ་ངེས་ཤེས་བསྐྱེད། ཚེ་འདིའི་ཡུལ་ལ་ཆགས་ཞེན་ཐམས་ཅད་སྤང་། འཆི་ལ་མི་འཇིགས་བདེ་བ་ཅན་གྱི་ཞིང་། ངེས་པར་འགྲོ་སྙམ་གསོལ་བ་འདི་ལྟར་གདབ། བཅོམ་ལྡན་དེ་བཞིན་གཤེགས་པ་དགྲ་བཅོམ་པ། །ཡང་དག་རྫོགས་པའི་སངས་རྒྱས་འོད་དཔག་མེད། བདག་གི་སྡིག་སྒྲིབ་སྦྱངས་ནས་ཁྱེད་ཀྱི་ཞིང་། །མྱུར་སྐྱེ་བྱང་ཆུབ་ལུང་བསྟན་ཐོབ་པར་མཛོད། ཅེས་པ་དད་འདུན་དྲག་པོས་གསོལ་བཏབ་མཐར། ཁྱེད་རང་རྣམ་ཤེས་འོད་ཟེར་དཀར་པོའི་གཟུགས། །སྣ་སྒོའི་རླུང་དང་མཉམ་དུ་ཕྱིར་ཐོན་ནས། །རྒྱལ་བའི་ཤངས་བུག་ཞུགས་ནས་ཐུགས་ཀར་ཐིམ། །རང་སེམས་རྒྱལ་བའི་ཐུགས་དང་དབྱེར་མེད་བསྲེས། །རླུང་ནང་འཇུག་དུས་རྒྱལ་བའི་ཐུགས་ཀ་ནས། །འོད་བྱུང་ཁྱོད་ཀྱི་ཁར་ཞུགས་སྙིང་གར་ཐིམ། །རྒྱལ་བའི་ཐུགས་དང་རང་སེམས་འདྲེས་པར་བསམ། །དེ་འདྲ་དབུགས་ཀྱི་འགྲོ་འོང་ཅི་ནུས་བསྒོམ། །རྗེས་ནི། མཐའ་བསྐོར་བཞུགས་པའི་བླ་མ་རྒྱལ་བ་སྲས། །ཕྱི་ནས་རིམ་ཞུ་འོད་དཔག་མེད་ལ་ཐིམ། །དེ་ཡང་འོད་ཞུ་རང་ལ་རང་ཉིད་ཀྱང་། །འོད་ཞུ་བླ་མ་སངས་རྒྱས་རང་སེམས་གསུམ། །དབྱེར་མེད་འཁོར་འདས་རོ་གཅིག་ངང་དུ་ཞོག །སླར་ཡང་རང་ཉིད་འོད་དཔག་མེད་སྐུར་ལྡང་། །རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །སོགས་བརྗོད་དོ། ། ༈ དུས་གསུམ་སངས་རྒྱས་ཐམས་ཅད་འདུས་པའི་བདག །སྐྱབས་གནས་བླ་མ་མཆོག་དང་དབྱེར་མེད་པའི། །རྡོ་རྗེ་རྣལ་འབྱོར་མ་ལ་གསོལ་བ་འདེབས། །བདག་འཛིན་བློ་ཡིས་ཐོངས་པར་བྱིན་གྱིས་རློབས། །དགོས་མེད་རྒྱུད་ལ་སྐྱེ་བར་བྱིན་གྱིས་རློབས། །ལམ་མཆོག་འཕོ་བ་འབྱོངས་པར༴ འཁྱུགས་མེད་མཁའ་སྤྱོད་འགྲུབ་པར་བྱིན་གྱིས་རློབས། ། ༈ གལ་ཏེ་འཕོ་བ་དང་། འོད་གསལ་གྱི་གདམས་པས་མ་ཟིན་ན། འོད་གསལ་ལས་འཁྲུལ་ཏེ་ལུས་སེམས་བྲལ་ནས་སྲིད་པ་བར་དོར་བརྫུས་ཏེ་སྐྱེས་ན་བར་དོའི་ངོ་སྤྲོད་བྱ་བར་བཤད་དོ། ། ༈ རྣམ་སྣང་གི་ཕྱག་རྒྱའི་དགོས་པ་ནི། ལུས་ཀྱི་གཡོན་ན་བྱང་སེམས་འབབ་པའི་རྩ་ཡོད་པ། དེ་མཚོན་པས་གཡོན་པའི་འཛུབ་མོ་བསྒྲེང་བ་ཡིན་ལ། བྱང་སེམས་དེ་ཉིད་ཕྱིར་མི་འཕོ་བར་ལུས་ཀྱིས་རྟག་ཏུ་འཆིང་བར་བྱེད་པ་མཚོན་ཕྱིར་གཡས་པའི་ཁུ་ཚུར་གྱིས་དེ་བཅིང་བར་བྱེད་པའི་དོན་ཏོ། །ཞེས་ལམ་འབྲས་བླ་མ་རིགས་ལྔར་སྒོམ་པའི་ཟིན་བྲིས་ལས་བཤད་དོ། །ཀླུ་གཏོར་ལས། ཡུལ་གྱི་དབང་པོ་སྣ་ཚོགས་སུ་སྣང་བ་ཞེས་པ། ཡུལ་གྱི་རྣམ་པ་སྣ་ཚོགས་སུ་སྣང་བ་ཞེས་དཔེར་ན་ཤེལ་གྱི་ལུས་ལྟ་བུའོ། ། ༈

[edit]

gshin por ngo sprod kha shas/__ gshin por chos bshad skabs su/__dang po 'od gsal ngo sprad pa ni/__'di ltar gnyis med rnam rgyal las/__lus can rnams ni nges par 'chi ba'i tshe/__sa ni chur thim chu ni me la thim/__me ni rlung la rlung ni rnam shes thim/__rnam shes gzung ba 'od gsal 'jug par 'gyur/__zhes pa ltar 'byung bzhi rim par thim zhing snang mched thob gsum gyi mthar gzhi yi 'od gsal shar ba ngo sprod/__der ma bu 'dres pa'i tshe na de bzhin nyid kyi 'pho ba'am/__'chi ba chos skur sangs rgyas pa'o/__/rlung rnam shes la thim pa tshun 'das pa'i gdams pa btab ste/__de yang dbang khrid ma thob pa sogs spyi la/__bzang spyod kyi don slob dpon dzai ta ri las byung ba'i snang ba mtha' yas kyi sgom don ltar gdams te/__de yang sngon 'gro ni/__bdag dang mkha' mnyam 'gro ba ma lus pa/__/dpal ldan bla ma ston mchog rdzogs sangs rgyas/__/dam chos 'phags pa'i dge 'dun thams cad la/__/deng nas byang chub bar du skyabs su 'gro/__/lan gsum/__'gro rnams srid pa'i rgya mtsho las bsgral phyir/__bdag gis rdzogs pa'i byang chub bsgrub par bya/__de mi ched du bde chen bgrod pa'i lam/__/snang ba mtha' yas ting 'dzin bsgom par bya/__/lan gsum/__khyed rang gnas pa'i sa 'di dag pa'i zhing /__/bde ba can gyi bkod pa phun tshogs bsam/__rang nyid thugs rje che sogs lhar gsal ba'i/__/nam mkhar ye shes rang snang rin chen khri/__/pad+ma zla ba brtsegs pa'i gdan stengs su/__/rgyal ba snang ba mtha' yas sku mdog dmar/__/zhal gcig 'dzum zhal phyag gnyis mnyam bzhag steng /__lhung bzed bdud rtsis bkang ba bsnams pa'i sku/__dar gyi na bza' rin chen rgyan gyis mdzes/__/zhabs gnyis rdo rje'i skyil krung bzhugs par bsgom/__/de mthar brgyud pa'i bla ma thams cad dang /__/sangs rgyas byang chub sems dpas bskor bar gyur/__ji snyed su dag__/sogs sam/__chos spyod bcu pa sogs gang 'os bya/__dngos gzhi/__de nas sdig pa dag snyam nges shes bskyed/__tshe 'di'i yul la chags zhen thams cad spang /__'chi la mi 'jigs bde ba can gyi zhing /__nges par 'gro snyam gsol ba 'di ltar gdab/__bcom ldan de bzhin gshegs pa dgra bcom pa/__/yang dag rdzogs pa'i sangs rgyas 'od dpag med/__bdag gi sdig sgrib sbyangs nas khyed kyi zhing /__/myur skye byang chub lung bstan thob par mdzod/__ces pa dad 'dun drag pos gsol btab mthar/__khyed rang rnam shes 'od zer dkar po'i gzugs/__/sna sgo'i rlung dang mnyam du phyir thon nas/__/rgyal ba'i shangs bug zhugs nas thugs kar thim/__/rang sems rgyal ba'i thugs dang dbyer med bsres/__/rlung nang 'jug dus rgyal ba'i thugs ka nas/__/'od byung khyod kyi khar zhugs snying gar thim/__/rgyal ba'i thugs dang rang sems 'dres par bsam/__/de 'dra dbugs kyi 'gro 'ong ci nus bsgom/__/rjes ni/__mtha' bskor bzhugs pa'i bla ma rgyal ba sras/__/phyi nas rim zhu 'od dpag med la thim/__/de yang 'od zhu rang la rang nyid kyang /__/'od zhu bla ma sangs rgyas rang sems gsum/__/dbyer med 'khor 'das ro gcig ngang du zhog__/slar yang rang nyid 'od dpag med skur ldang /__/rgyal ba'i dkyil 'khor bzang zhing dga' ba der/__/sogs brjod do/___/___!_dus gsum sangs rgyas thams cad 'dus pa'i bdag__/skyabs gnas bla ma mchog dang dbyer med pa'i/__/rdo rje rnal 'byor ma la gsol ba 'debs/__/bdag 'dzin blo yis thongs par byin gyis rlobs/__/dgos med rgyud la skye bar byin gyis rlobs/__/lam mchog 'pho ba 'byongs par=__'khyugs med mkha' spyod 'grub par byin gyis rlobs/___/___!_gal te 'pho ba dang /__'od gsal gyi gdams pas ma zin na/__'od gsal las 'khrul te lus sems bral nas srid pa bar dor brdzus te skyes na bar do'i ngo sprod bya bar bshad do/___/___!_rnam snang gi phyag rgya'i dgos pa ni/__lus kyi g.yon na byang sems 'bab pa'i rtsa yod pa/__de mtshon pas g.yon pa'i 'dzub mo bsgreng ba yin la/__byang sems de nyid phyir mi 'pho bar lus kyis rtag tu 'ching bar byed pa mtshon phyir g.yas pa'i khu tshur gyis de bcing bar byed pa'i don to/__/zhes lam 'bras bla ma rigs lngar sgom pa'i zin bris las bshad do/__/klu gtor las/__yul gyi dbang po sna tshogs su snang ba zhes pa/__yul gyi rnam pa sna tshogs su snang ba zhes dper na shel gyi lus lta bu'o/___/___!_