JKW-KABAB-16-MA-006

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' babs Volume 16, Text 6, Pages (Folios to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	Khyentse, Dilgo. . In Rdzong sar 'jam dbyangs mkhyen brtse'i dbang po'i bka' babs, Vol. 16: 1-. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma
Cycle	རྩ་གསུམ་འོད་གསལ་སྙིང་ཏིག་ (rtsa gsum 'od gsal snying tig)
Karchag page	JKW-KABAB-Volume-16-MA-Karchag
RTZ	In the Rinchen Terdzö: https://rtz.tsadra.org/index.php/Terdzo-HUNG-001

Tibetan Text

Wylie

[edit]

རྩ་གསུམ་འོད་གསལ་སྙིང་ཐིག་ལས། རྡོ་རྗེ་རྣམ་པར་འཇོམས་པའི་རྒྱུན་ཁྱེར་འོད་གསལ་སྣང་བ་བཞུགས། །ན་མོ་གུ་རུ་བཛྲ་དྷཱ་ར་ཡེ། རྡཽ་རྗེ་རྣམ་པར་འཇོམས་པ་བླ་མེད་ལུགས་ཀྱི་བསྐྱེད་བཟླས་སྙིང་པོར་དྲིལ་ཏེ་ཉམས་སུ་ལེན་པར་འདོད་པས། ཐོག་མར་སྐྱབས་སེམས་ནི། བདག་དང་མཁའ་མཉམ་འགྲོ་བ་མ་ལུས་ཀུན༔ སྐྱབས་གནས་རྒྱ་མཚོའི་ཚོགས་ལ་སྐྱབས་སུ་མཆི༔ མཐའ་ཀླས་སྲིད་པའི་ཁམས་རྣམས་བསྒྲལ་བའི་ཕྱིར༔ རྡོ་རྗེ་འཛིན་པའི་གོ་འཕང་བསྒྲུབ་པར་བགྱི༔ ལན་གསུམ། གནས་ཡོ་མཆོད་པ་བྱིན་རླབས་དགོས་ན། ཨོཾ་ཨཱཿཧཱུྃ་སརྦ་པཱུ་ཛ་མེ་གྷ་ཨཱཿཧཱུྃ༔ ཞེས་ནམ་མཁའ་མཛོད་ཀྱི་ཕྱག་རྒྱ་བཅས་བྱ། དངོས་གཞི་ལྷ་སྐུར་བསྐྱེད་པ་ནི། ཧཱུྃ༔ སྣང་སྲིད་འཁོར་འདས་གདོད་ནས་རྣམ་དག་ཀློང་༔ ཕྱི་སྣོད་རྡོ་རྗེའི་གུར་ཁང་རྒྱ་ཆེ་བར༔ བྷྲཱུྃ་ལས་རིན་ཆེན་གཞལ་ཡས་མཚན་ཉིད་རྫོགས༔ དེ་དབུས་ཐབས་ཤེས་པད་ཉིའི་གདན་གྱི་སྟེང་༔ སྣ་ཚོགས་རྡོ་རྗེའི་ལྟེ་བར་ཧཱུྃ་གིས་མཚན༔ འོད་ཟེར་འཕྲོ་འདུས་སྲས་བཅས་རྒྱལ་ཀུན་གྱི༔ མཁྱེན་བརྩེ་ནུས་པའི་བྱིན་རླབས་དཔལ་ཡོན་ཀུན༔ དབང་དུ་བསྡུས་ཐིམ་སྐད་ཅིག་དྲན་རྫོགས་སུ༔ བཅོམ་ལྡན་གསང་བདག་རྡོ་རྗེ་རྣམ་པར་འཇོམས༔ སྐུ་མདོག་ལྗང་སྔོན་ཁྲོ་འཛུམ་མཚན་དཔེའི་ཞལ༔ ཕྱག་གཡས་རྡོ་རྗེ་རྒྱ་གྲམ་ཐུགས་ཀར་བསྣམས༔ གཡོན་པས་དྲིལ་བུ་དཀུར་བརྟེན་སྐྱིལ་ཀྲུང་བཞུགས༔ སྣ་ཚོགས་དར་དང་རིན་ཆེན་རྒྱན་གྱིས་མཛེས༔ སྤྱི་བོར་རིགས་ཀུན་ཁྱབ་བདག་རྡོ་རྗེ་སེམས༔ སྐུ་མདོག་དཀར་གསལ་རྡོ་རྗེ་དྲིལ་བུ་འཛིན༔ སླར་ཡང་ཏིང་ངེ་འཛིན་གྱི་རོལ་མོ་ཡིས༔ ཕྱོགས་དུས་རྒྱལ་ཀུན་ཡེ་ཤེས་གཅིག་བསྡུས་ནས༔ མི་ཕྱེད་རྡོ་རྗེའི་ལུས་སུ་བྱིན་བརླབས་ཤིང་༔ ཐུགས་སྲོག་ས་བོན་ཧཱུྃ་གི་སྤྲིན་འཕྲོས་པས༔ ཕྱོགས་བཞིར་སྣ་ཚོགས་རྡོ་རྗེའི་དཀྱིལ་འཁོར་དབུས༔ ཤར་དུ་རྡོ་རྗེ་གཏུམ་པོ་སྐུ་མདོག་དཀར༔ ལྷོ་རུ་རྡོ་རྗེ་བེ་ཅོན་གསེར་གྱི་མདངས༔ ནུབ་ཏུ་རྡོ་རྗེ་ཐོ་བ་སྐུ་མདོག་དམར༔ བྱང་དུ་རྡོ་རྗེ་ཕུར་བུ་མར་གད་མདོག༔ ཐམས་ཅད་ཞལ་གཅིག་ཕྱག་གཉིས་རྡོར་དྲིལ་བསྣམས༔ དར་སྔོན་སྟོད་གཡོགས་སྟག་ལྤགས་ཤམ་ཐབས་དང་༔ སྦྲུལ་གྱི་རྒྱན་སྤྲས་པད་ཉིའི་གདན་ལ་བཞེངས༔ དེ་ཡི་ཕྱི་རོལ་འཁོར་ལོ་རྩིབས་བཅུའི་ཀློང་༔ རང་བྱུང་ཡེ་ཤེས་སྤྲུལ་པའི་ཁྲོ་རྒྱལ་བཅུ༔ མཐིང་ནག་ཕྱག་གཉིས་རྡོ་རྗེ་ཕུར་བུ་འདྲིལ༔ ཁྲོ་བོའི་ཆས་རྫོགས་མེ་དཔུང་དབུས་ན་རོལ༔ སྒོ་བཞིར་སྒོ་སྐྱོང་རྒྱལ་ཆེན་སྡེ་བཞི་དང༔ རྡོ་རྗེའི་ཕོ་ཉ་དྲུག་ཅུ་རྩ་བཞི་སོགས༔ ཆོས་སྲུང་དམ་ཅན་རྒྱ་མཚོ་སྤྲིན་ལྟར་གཏིབས༔ གཞན་ཡང་རྩ་གསུམ་རྒྱལ་བ་རབ་འབྱམས་ཚོགས༔ སྣང་སྟོང་ཟུང་འཇུག་ཆེན་པོར་གསལ་བ་ཡི༔ གནས་གསུམ་རྡོ་རྗེ་གསུམ་གྱི་ཡི་གེས་མཚན༔ དེ་ལས་འོད་འཕྲོས་ཡེ་ཤེས་སྤྱན་དྲངས་གྱུར༔ ཧཱུྃ༔ དག་པ་རབ་འབྱམས་ཆོས་སྐུའི་ཕོ་བྲང་ནས༔ ལོངས་སྤྱོད་ཡོངས་རྫོགས་རྡོ་རྗེ་རྣམ་པར་འཇོམས༔ སྤྲུལ་སྐུའི་ཚུལ་གྱིས་འགྲོ་དོན་བསྒྲུབ་སླད་དུ༔ ཐུགས་རྗེ་ཐུགས་དམ་དབང་གིས་གནས་འདིར་གཤེགས༔ ཨོཾ་བཛྲ་བི་དཱ་ར་ཎ་ས་པ་རི་ཝཱ་ར་ཨེ་ཧྱེ་ཧི༔ ཛཿཧཱུྃ་བྃ་ཧོཿ དམ་ཚིག་ཡེ་ཤེས་དབྱེར་མེད་བརྟན་པར་བཞུགས༔ འདུ་འབྲལ་སྤངས་པའི་བརྡ་ཡིས་ཕྱག་འཚལ་ལོ༔ དངོས་སུ་འབྱོར་དང་ཡིད་ལས་བྱུང་བ་ཡི༔ ཀུན་བཟང་རྣམ་འཕྲུལ་མཆོད་སྤྲིན་རྒྱ་མཚོས་མཆོད༔ ཨ་ཏི་པཱུ་ཧོཿཔྲ་ཏཱིཙྪ་ཧོཿ ཨོཾ་བཛྲ་བི་དཱ་ར་ཎ་ས་པ་རི་ཝཱ་ར་ཨརྒྷཾ་སོགས་ནས། ཤབྡ་སརྦ་པཱུ་ཛ་ཧོཿ ཧཱུྃ༔ གདོད་ནས་གཉིས་མེད་མཉམ་པའི་ཡེ་ཤེས་ལས༔ རྣམ་ཀུན་མཆོག་ལྡན་མཚན་དཔེའི་རོལ་པ་ཅན༔ སངས་རྒྱས་ཀུན་གྱི་གསང་བ་འཛིན་པའི་བདག༔ རྡོ་རྗེ་རྣམ་པར་འཇོམས་ལ་ཕྱག་འཚལ་བསྟོད༔ བདག་དང་མཐའ་ཡས་སེམས་ཅན་ཐམས་ཅད་ཀྱི༔ ནད་གདོན་གྲིབ་དང་མི་གཙང་ཀུན་ཞི་ཞིང་༔ ཚེ་བསོད་དཔལ་འབྱོར་དབང་བཅུའི་ཡོན་ཏན་སོགས༔ བཅོམ་ལྡན་ཁྱེད་དང་མཉམ་པར་བྱིན་གྱིས་རློབས༔ གསུང་སྔགས་ཀྱི་བཟླས་པ་ནི། ཐུགས་ཀར་ཉི་སྟེང་ཧཱུྃ་མཐར་སྔགས་ཕྲེང་གིས༔ བསྐོར་བའི་འོད་ཀྱིས་ཕྱོགས་བཅུའི་རྒྱལ་ཀུན་མཆོད༔ བྱིན་རླབས་དངོས་གྲུབ་ཚུར་འདུས་བདག་ཉིད་ལ༔ ཐིམ་པས་གྲིབ་དང་མི་གཙང་སྒྲིབ་གཉིས་སྦྱངས༔ ན་མཿཙཎྜ་བཛྲ་ཀྲོ་དྷ་ཡ༔ ཧུ་ལུ་ཧུ་ལུ༔ ཏིཥྛ་ཏིཥྛ༔ བྷཱནྡྷ་བྷཱནྡྷ༔ ཧ་ན་ཧ་ན༔ ཨ་མྲྀ་ཏ་ཧཱུྃ་ཕཊ། ཅེས་པ་ཉིད་གཙོ་བོར་བཟླ། སྤྲོ་ཞིང་ནུས་ན་རྡོ་རྗེ་རྣམ་འཇོམས་གཟུངས་མདོ་བཀླག་ཅིང་གྲངས་བསགས། ཐུན་མཐར་དབྱངས་གསལ་རྟེན་སྙིང་ལན་གསུམ། མཆོད་བསྟོད་མདོར་བསྡུས་དང་ཡིག་བརྒྱ་བཟླ། ཐུགས་ཉེར་བསྡུའི་རྣལ་འབྱོར་ནི། ཧོ༔ སྣང་སྟོང་སྒྱུ་འཕྲུལ་དྲྭ་བའི་ཡེ་ཤེས་ལྷ༔ ཟུང་འཇུག་མཚན་མ་མེད་པའི་དབྱིངས་སུ་གཤེགས༔ རྟེན་དང་བརྟེན་པར་བཅས་པའི་དམ་ཚིག་པ༔ འོད་གསལ་སྨོན་པ་མེད་པའི་ཀློང་དུ་ཐིམ༔ ཨ་ཨ་ཨ༔ ཨོཾ་ཨཱཿཧཱུྃ༔ སླར་ཡང་སྣང་བའི་རང་བཞིན་གདན་གསུམ་ལྷ༔ སྒྲར་གྲགས་རླུང་གི་འཁོར་ལོ་ཡི་གེའི་སྤྲིན༔ རྟོག་པ་རྟོག་མེད་རང་གྲོལ་གཉུག་མའི་ངང༔ དུས་གསུམ་དུས་མེད་ཆེན་པོར་རྟག་ཏུ་སྤྱོད༔ བསྔོ་སྨོན་ནི། དགེ་བ་འདི་ཡིས་མྱུར་དུ་བདག །རྡོ་རྗེ་རྣམ་འཇོམས་འགྲུབ་གྱུར་ནས། །སོགས་དང་ཤིས་བརྗོད་བྱའོ། །ཞེས་པའང་རང་ཉིད་ལ་ཉེར་མཁོའི་ཆེད་མངྒ་ལས་གཏེར་གཞུང་རྩ་བ་ལས་ཁོལ་དུ་ཕྱུང་སྟེ་མཚམས་སྦྱོར་ཅུང་ཟད་ཀྱིས་བརྒྱན་པ་དགེ་ལེགས་འཕེལ།། །།

[edit]

rtsa gsum 'od gsal snying thig las/__rdo rje rnam par 'joms pa'i rgyun khyer 'od gsal snang ba bzhugs/__/na mo gu ru badz+ra d+hA ra ye/__rdau rje rnam par 'joms pa bla med lugs kyi bskyed bzlas snying por dril te nyams su len par 'dod pas/__thog mar skyabs sems ni/__bdag dang mkha' mnyam 'gro ba ma lus kun:__skyabs gnas rgya mtsho'i tshogs la skyabs su mchi:__mtha' klas srid pa'i khams rnams bsgral ba'i phyir:__rdo rje 'dzin pa'i go 'phang bsgrub par bgyi:__lan gsum/__gnas yo mchod pa byin rlabs dgos na/__oM AHhU~M sarba pU dza me g+ha AHhU~M:__zhes nam mkha' mdzod kyi phyag rgya bcas bya/__dngos gzhi lha skur bskyed pa ni/__hU~M:__snang srid 'khor 'das gdod nas rnam dag klong :__phyi snod rdo rje'i gur khang rgya che bar:__b+h+rU~M las rin chen gzhal yas mtshan nyid rdzogs:__de dbus thabs shes pad nyi'i gdan gyi steng :__sna tshogs rdo rje'i lte bar hU~M gis mtshan:__'od zer 'phro 'dus sras bcas rgyal kun gyi:__mkhyen brtse nus pa'i byin rlabs dpal yon kun:__dbang du bsdus thim skad cig dran rdzogs su:__bcom ldan gsang bdag rdo rje rnam par 'joms:__sku mdog ljang sngon khro 'dzum mtshan dpe'i zhal:__phyag g.yas rdo rje rgya gram thugs kar bsnams:__g.yon pas dril bu dkur brten skyil krung bzhugs:__sna tshogs dar dang rin chen rgyan gyis mdzes:__spyi bor rigs kun khyab bdag rdo rje sems:__sku mdog dkar gsal rdo rje dril bu 'dzin:__slar yang ting nge 'dzin gyi rol mo yis:__phyogs dus rgyal kun ye shes gcig bsdus nas:__mi phyed rdo rje'i lus su byin brlabs shing :__thugs srog sa bon hU~M gi sprin 'phros pas:__phyogs bzhir sna tshogs rdo rje'i dkyil 'khor dbus:__shar du rdo rje gtum po sku mdog dkar:__lho ru rdo rje be con gser gyi mdangs:__nub tu rdo rje tho ba sku mdog dmar:__byang du rdo rje phur bu mar gad mdog:__thams cad zhal gcig phyag gnyis rdor dril bsnams:__dar sngon stod g.yogs stag lpags sham thabs dang :__sbrul gyi rgyan spras pad nyi'i gdan la bzhengs:__de yi phyi rol 'khor lo rtsibs bcu'i klong :__rang byung ye shes sprul pa'i khro rgyal bcu:__mthing nag phyag gnyis rdo rje phur bu 'dril:__khro bo'i chas rdzogs me dpung dbus na rol:__sgo bzhir sgo skyong rgyal chen sde bzhi dang:__rdo rje'i pho nya drug cu rtsa bzhi sogs:__chos srung dam can rgya mtsho sprin ltar gtibs:__gzhan yang rtsa gsum rgyal ba rab 'byams tshogs:__snang stong zung 'jug chen por gsal ba yi:__gnas gsum rdo rje gsum gyi yi ges mtshan:__de las 'od 'phros ye shes spyan drangs gyur:__hU~M:__dag pa rab 'byams chos sku'i pho brang nas:__longs spyod yongs rdzogs rdo rje rnam par 'joms:__sprul sku'i tshul gyis 'gro don bsgrub slad du:__thugs rje thugs dam dbang gis gnas 'dir gshegs:__oM badz+ra bi dA ra Na sa pa ri wA ra e h+ye hi:__dzaHhU~M ba~M hoH__dam tshig ye shes dbyer med brtan par bzhugs:__'du 'bral spangs pa'i brda yis phyag 'tshal lo:__dngos su 'byor dang yid las byung ba yi:__kun bzang rnam 'phrul mchod sprin rgya mtshos mchod:__a ti pU hoHpra tIts+tsha hoH__oM badz+ra bi dA ra Na sa pa ri wA ra ar+g+haM sogs nas/__shab+da sarba pU dza hoH__hU~M:__gdod nas gnyis med mnyam pa'i ye shes las:__rnam kun mchog ldan mtshan dpe'i rol pa can:__sangs rgyas kun gyi gsang ba 'dzin pa'i bdag:__rdo rje rnam par 'joms la phyag 'tshal bstod:__bdag dang mtha' yas sems can thams cad kyi:__nad gdon grib dang mi gtsang kun zhi zhing :__tshe bsod dpal 'byor dbang bcu'i yon tan sogs:__bcom ldan khyed dang mnyam par byin gyis rlobs:__gsung sngags kyi bzlas pa ni/__thugs kar nyi steng hU~M mthar sngags phreng gis:__bskor ba'i 'od kyis phyogs bcu'i rgyal kun mchod:__byin rlabs dngos grub tshur 'dus bdag nyid la:__thim pas grib dang mi gtsang sgrib gnyis sbyangs:__na maHtsaN+Da badz+ra kro d+ha ya:__hu lu hu lu:__tiSh+Tha tiSh+Tha:__b+hAn+d+ha b+hAn+d+ha:__ha na ha na:__a mr-i ta hU~M phaT/__ces pa nyid gtso bor bzla/__spro zhing nus na rdo rje rnam 'joms gzungs mdo bklag cing grangs bsags/__thun mthar dbyangs gsal rten snying lan gsum/__mchod bstod mdor bsdus dang yig brgya bzla/__thugs nyer bsdu'i rnal 'byor ni/__ho:__snang stong sgyu 'phrul drwa ba'i ye shes lha:__zung 'jug mtshan ma med pa'i dbyings su gshegs:__rten dang brten par bcas pa'i dam tshig pa:__'od gsal smon pa med pa'i klong du thim:__a a a:__oM AHhU~M:__slar yang snang ba'i rang bzhin gdan gsum lha:__sgrar grags rlung gi 'khor lo yi ge'i sprin:__rtog pa rtog med rang grol gnyug ma'i ngang:__dus gsum dus med chen por rtag tu spyod:__bsngo smon ni/__dge ba 'di yis myur du bdag__/rdo rje rnam 'joms 'grub gyur nas/__/sogs dang shis brjod bya'o/__/zhes pa'ang rang nyid la nyer mkho'i ched mang+ga las gter gzhung rtsa ba las khol du phyung ste mtshams sbyor cung zad kyis brgyan pa dge legs 'phel//__//