JKW-KABAB-08-NYA-015

🚧 This website is under continued development. We appreciate your patience!

Previous Text Back to Volume PageNext Text

ཡང་ཟབ་ཐུགས་རྗེ་ཆེན་པོ་རྒྱལ་བ་རྒྱ་མཚོའི་དོན་དབང་ཟུར་ཕྱུང་དུ་བཀོད་པ་བདུད་རྩིའི་སྙིང་པོ།

Wylie title	yang zab thugs rje chen po rgyal ba rgya mtsho'i don dbang zur phyung du bkod pa bdud rtsi'i snying po
Location	mkhyen brtse'i bka' babs Volume 8, Text 15, Pages 403-416 (Folios 1a to 7b4)
Author	འཇམ་མགོན་ཀོང་སྤྲུལ་
Less details More details
Tertön	དྲི་མེད་ཀུན་དགའ་, འཇམ་དབྱངས་མཁྱེན་བརྩེའི་དབང་པོ་ (dri med kun dga', 'jam dbyangs mkhyen brtse'i dbang po)
Citation	'jam mgon kong sprul. yang zab thugs rje chen po rgyal ba rgya mtsho'i don dbang zur phyung du bkod pa bdud rtsi'i snying po. In Rdzong sar 'jam dbyangs mkhyen brtse'i dbang po'i bka' babs, Vol. 8: 403-416. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Empowerment Ritual - dbang chog - dbang skur
Cycle	ཡང་ཟབ་ཐུགས་རྗེ་ཆེན་པོ་རྒྱལ་བ་རྒྱ་མཚོ་ཡེ་ཤེས་འོད་ཀྱི་སྙིང་པོ་ (yang zab thugs rje chen po rgyal ba rgya mtsho ye shes 'od kyi snying po)
Karchag page	JKW-KABAB-Volume-08-NYA-Karchag
RTZ	In the Rinchen Terdzö: https://rtz.tsadra.org/index.php/Terdzo-ZA-034
Colophon	།འདི་ཡང་ཁྱེར་བདེ་བའི་སླད་དུ་གཏེར་གཞུང་གི་དགོངས་པ་དང་གཏེར་ཆེན་བླ་མའི་བཞེད་པ་གུང་མཐུན་པར་ཟབ་ཆོས་འདི་ཉིད་ཀྱི་ཐོག་མའི་སྣོད་ལྡན་ཀུ་སཱ་ལི་པདྨ་གར་དབང་གིས་བཀླག་ཆོག་ཏུ་བཀོད་པ་དགེ་ལེགས་འཕེལ།
	'di yang khyer bde ba'i slad du gter gzhung gi dgongs pa dang gter chen bla ma'i bzhed pa gung mthun par zab chos 'di nyid kyi thog ma'i snod ldan ku sA li pad+ma gar dbang gis bklag chog tu bkod pa dge legs 'phel

Tibetan Text

Wylie

[edit]

༄༅། །ཡང་ཟབ་ཐུགས་རྗེ་ཆེན་པོ་རྒྱལ་བ་རྒྱ་མཚོའི་དོན་དབང་ཟུར་ཕྱུང་དུ་བཀོད་པ་བདུད་རྩིའི་སྙིང་པོ་ཞེས་བྱ་བ་བཞུགས་སོ། །ན་མོ་གུ་རུ་བེ། རྒྱལ་བ་རྒྱ་མཚོའི་སྤྱི་གཟུགས་མཆོག །དཀྱིལ་འཁོར་དབང་ཕྱུག་སྙིང་དབུས་སུ། །བཀོད་ནས་སྨིན་བྱེད་བདུད་རྩི་ཡི། །སྙིང་པོའི་ཡང་བཅུད་འདིར་གསལ་བྱ། །སྐལ་ལྡན་གྱི་སློབ་མ་དབང་བསྐུར་རྩ་བ་ཙམ་གྱིས་སྨིན་པར་འདོད་པས་དབང་དོན་སྙིང་པོ་ཙམ་བགྱི་བ་ལ། སྦྱོར་བ་སྟེགས་བུའི་སྟེང་དུ་རས་བྲིས་ཀྱི་དཀྱིལ་འཁོར་བཀྲམ་པའམ་མཎྜལ་ལ་ཚོམ་བུ་ལྷ་གྲངས་བཀོད་པའི་དབུས་སུ་ཁྲིའུ་ལ་བུམ་པའི་དྲི་ཆབ་དང་སོ་ལྔའི་བཅུད་ལྡན་མགུལ་ཆིངས་དམར་པོས་སྤྲས་པ་བཀོད་པའི་ཁར། ཐོད་པ་མཚན་ལྡན་ཨ་མྲི་ཏས་བསྐང་བ་བཞག །དེ་སྟེང་མེ་ལོང་སིནྡྷཱུ་ར་བརྡལ་བ་ལ་ཆོས་འབྱུང་བསྣོལ་མ་བྲིས་པའི་དབུས་སུ་པད་འདབ་བཞིའི་ལྟེ་བར་ཧྲཱིཿམ། འདབ་བཞི་ཤར་ནས་རིམ་བཞིན། ཧཱུྃ་མ། ཏྲཱྃ་མ། ཨོཾ་མ། ཨཱཿམ། རྣམས་དང་གཡས་གཡོན་གྱི་གྲྭ་ཟུར་བཞི་ལ། ཧཿ རིཿ ནིཿ སཿ ཞེས་བྲིས་པས་ཁ་བཅད་ལ་དར་དམར་གྱིས་བཀབ། མདུན་སོགས་སུ་གཙོ་འཁོར་ཚང་མའང་གཙོ་བོའི་སྐུུ་ཙག །སྔགས་བྱང་དང་ཕྲེང་བ། མེ་ལོང་དང་རྡོ་རྗེ་རྣམས་བཞག །ལས་བུམ། སྨན་རག་གཏོར་གསུམ། ཆུ་གཉིས་ཉེར་སྤྱོད་སྤྱི་ལྟར་བཤམ། སྔོན་གཏོར། སྲུང་མའི་གཏོར་འབུལ། ཚོགས་ཀྱི་ཡོ་བྱད། ཆད་བརྟན་སོགས་ཕྲིན་ལས་ལ་དགོས་པ་རྣམས་ཚོགས་པར་བྱའོ། །དངོས་གཞིའི་ཐོག་མར་དབང་དོན་སྒྲུབ་མཆོད་ནི། བརྒྱུད་འདེབས་དང༌། བགེགས་བསྐྲད་ནས་བརྩམས་ལས་བྱང་མཐར་ཆགས་སུ་བཏང༌། བདག་མདུན་གྱི་སྒྲུབ་པའི་དམིགས་བཟླས་ཅི་ནུས་དང་ལས་སྦྱོར་འཁོར་བ་དོང་སྤྲུགས་ཅུང་ཟད་རེ་བཟླ། མཐར་དབྱངས་གསལ་ཡིག་བརྒྱ་རྟེན་སྙིང་རྣམས་ཀྱིས་ཁ་བསྐང༌། ཁྱད་པར་གྱི་མཆོད་པ་འབུལ། གཏོར་འབུལ་འདོད་གསོལ་བཅས་ཚང་བར་བྱ། སྲུང་མའི་གཏོར་འབུལ་སྤྱི་མཚམས་བཏང༌། ཚོགས་བྱིན་རླབས་ནས་བསྒྲལ་སྟབས་ཡན་གྲུབ་ནས། ལས་བུམ་དུ་རྟ་མགྲིན་དམར་པོ་པདྨ་དང་བྷཉྫ་བསྣམས་པ་གསལ་བའི་སྐུ་ལས་བདུད་རྩིའི་རྒྱུན་བབས་བུམ་པ་གང་བར་གྱུར། ཨོཾ་པདྨཱནྟ་ཀྲྀ་ཏ་ཧཱུྃ་ཕཊ། ཅེས་བཟླས་པས་བྱིན་བརླབ། རིག་པའི་མེ་ཏོག་དོར་ལ་གནང་བ་ནོད་དོ། །དེ་ནས་སློབ་མ་རྣམས་ཁྲུས་ནས་དབྱུང༌། བགེགས་གཏོར་བཏང་ལ་བསྐྲད། སྲུང་མཚམས་བཅད། མཎྜལ་བཀྱེ་བསྡུ་དང་སེམས་བསྐྱེད་གསལ་གདབ་ནས་མཚམས་སྦྱོར་ཁྱད་པར། ད་ལན་སྐབས་སུ་བབས་པའི་འཆད་བྱ། སངས་རྒྱས་ཐམས་ཅད་ཀྱི་སྤྲུལ་གཞི་གངས་ཅན་བོད་ཀྱི་ལྷ་གཅིག་འཕགས་མཆོག་སྤྱན་རས་གཟིགས་དབང་ཕྱུག་ལ་རྒྱུད་ལུང་མན་ངག་གི་བཀའ་སྲོལ་བསམ་གྱིས་མི་ཁྱབ་པ་བཞུགས་པ་ཐམས་ཅད་ཀྱི་མཐར་ཐུག་སྙིང་པོའི་ཡང་བཅུད། རྡོ་རྗེ་ཐེག་པ་བླ་ན་མེད་པ་ཕ་མ་གཉིས་མེད་ཀྱི་དགོངས་དོན་གཅིག་ཏུ་དྲིལ་བ། ཐུགས་རྗེ་ཆེན་པོ་རྒྱལ་བ་རྒྱ་མཚོའི་གདམས་པ་འཕྲད་ཆོག་བློ་བདེ་ཡེ་ཤེས་འོད་ཀྱི་སྙིང་པོ་འདི་ཉིད། འཇིག་རྟེན་དབང་ཕྱུག་སྤྲུལ་པའི་སྐུར་བཞེངས་པ་ཨོ་རྒྱན་གྱི་སློབ་དཔོན་ཆེན་པོ་པདྨ་སམྦྷ་བས་གནུབས་ཆེན་སངས་རྒྱས་ཡེ་ཤེས་དང་མཁའ་འགྲོའི་དབང་ཕྱུག་མཚོ་རྒྱལ་མ་ལ་ཐུན་མོང་མ་ཡིན་པའི་ཟབ་ཆོས་ཀུན་གྱི་སྙིང་པོར་སྩལ་བ་སྟེ་གཞུང་ཉིད་ལས། ཁྱད་པར་ཡི་དམ་ཐུགས་རྗེ་ཆེན་པོ་ཡི༔ རྒྱུད་ཀྱི་གཞུང་བསྒྱུར་ལུང་གི་ངེས་པ་དབྱེ༔ མན་ངག་ལག་ལེན་གནད་དུ་དྲིལ་ནས་ཀྱང་༔ བྱེ་བ་ཕྲག་བརྒྱ་གདམས་པའི་སྙིང་པོ་ནི༔ ཚིག་ཉུང་དོན་ཚངས་ཉམས་སུ་བླང་བདེ་བ༔ ཐོས་པས་རང་གྲོལ་རྒྱལ་བ་རྒྱ་མཚོ་ཡི༔ དགོངས་ཉམས་དམར་ཁྲིད་གནད་ཀྱི་ཡང་ཞུན་འདིའི༔ དབང་བསྐུར་ཐོབ་ཚད་བདེ་བ་ཅན་དུ་སྐྱེ༔ རྩེ་གཅིག་ཉམས་བླངས་ཚེ་འདིར་བྱང་ཆུབ་ཐོབ༔ ཅེས་སོགས་རྒྱ་ཆེར་བསྔགས་པ་དོན་དང་ལྡན་པའི་ཟབ་ཆོས་འདིའང་མ་འོངས་པའི་གདུལ་བྱ་ལ་ཐུགས་བརྩེ་བས་ཟབ་མོའི་གཏེར་དུ་སྦས་པ་གནུབས་ཆེན་ཡང་སྲིད་ཨོ་རྒྱན་དྲི་མེད་ཀུན་དགའ་ནས་བསམ་ཡས་མཆིམས་ཕུའི་བྲག་སྣ་སེངྒེའི་གདོང་པ་ཅན་ནས་སྤྱན་དྲངས་ཏེ་ཐུགས་ཉམས་སུ་བཞེས། སླང་ཡང་ལུང་བྱང་ལྟར་དཔལ་གྱི་བསམ་ཡས་བྲག་དམར་མགྲྀན་བཟང་གི་བྲེ་གུའི་སུལ་དུ་རྒྱས་བཏབ་པ་དེང་སང་གདུལ་བྱ་དུས་ལས་བབ་པའི་ཚེ། རྒྱལ་སྲས་ལྷ་རྗེ་ཉིད་གཏེར་སྟོན་རྐྱང་པའི་སྐྱེ་བ་བཅུ་གསུམ་བཞེས་པར་གསུངས་པའི་སྐྱེས་རབ་བཅུ་གསུམ་པ། བཀའ་བབ་བདུན་གྱི་མངའ་བདག །རྩོད་པ་དང་བྲལ་བའི་མཁས་གྲུབ་ཀུན་གྱི་སྤྱི་རྗེ་པདྨ་འོད་གསལ་མདོ་སྔགས་གླིང་པ་ལ་ཡེ་ཤེས་མཁའ་འགྲོས་ཤོག་སེར་དང༌། བྲམ་ཟེ་ཉེར་གཅིག་གི་གདུང་སོགས་དངོས་སུ་ཕུལ་བའི་རིང་དུ་གསང་བའི་དམ་ཚིག་མཐར་ཕྱིན་པར་མཛད་ནས་ལུང་བསྟན་གྱི་ངེས་པས་སྐབས་ཕྱེད་པ་ན་གཏན་ལ་ཕབ་སྟེ་སྐལ་ལྡན་རྗེས་སུ་བཟུང་བར་མཛད་པའི་ཟབ་ཆོས་འདིའི་སྨིན་བྱེད་ཀྱི་སྙིང་པོ་མདོར་བསྡུས་པའི་དོན་དབང་ནོར་བུ་ལུགས་སྒྲུབ་པར་བགྱི་བ་ལ་སོགས་ཀྱིས་མཚམས་སྦྱར་ནས་མཎྜལ་འབུལ་དུ་གཞུག །བླ་མ་དང་དཀྱིལ་འཁོར་གྱི་གཙོ་བོ་དབྱེར་མ་མཆིས་པ་ལ་མོས་གུས་ཆེན་པོས་གསོལ་བ་འདེབས་པ་འདིའི་རྗེས་ཟློས་མཛོད། འཕགས་མཆོག་རྒྱལ་བ་རྒྱ་མཚོ་དང་༔ དབྱེར་མེད་རྡོ་རྗེ་སློབ་དཔོན་གྱིས༔ བདག་ལ་བརྩེ་བས་ཉེར་དགོངས་ནས༔ དཀྱིལ་འཁོར་ཆེན་པོ་འཇུག་མཛད་གསོལ༔ ལན་གསུམ༔ ཐོག་མར་རྒྱུད་རྣམ་པར་དག་པར་བྱ་བའི་སླད་དུ། བླ་མ་དང་འཕགས་མཆོག་འགྲོ་འདུལ་རྒྱལ་བ་རྒྱ་མཚོ་དབྱེར་མེད་པ་ལ་དཀོན་མཆོག་རྒྱ་མཚོའི་ཚོགས་ཀྱིས་བསྐོར་ཏེ་བཞུགས་པའི་སྤྱན་སྔར། བདག་གཞན་སེམས་ཅན་ཐམས་ཅད་འདི་ནས་བྱང་ཆུབ་མ་ཐོབ་ཀྱི་བར་དུ་ཅི་མཛད་ཁྱེད་ཤེས་བློ་གཏད་ལིང་བསྐྱུར་གྱིས་སྐྱབས་སུ་འགྲོ་བར་མོས་ལ་འདིའི་རྗེས་ཟློས། ན་མོ༔ རྒྱལ་བ་རྒྱ་མཚོ་འདུས་པའི་སྐུ༔ བླ་མ་ཐུགས་རྗེ་ཆེན་པོ་ལ༔ བདག་སོགས་འགྲོ་ཀུན་བྱང་ཆུབ་བར༔ ཁྱེད་ཤེས་དད་པས་སྐྱབས་སུ་མཆི༔ ལན་གསུམ། ཐོག་མེད་ནས་དྲིན་ཅན་ཏུ་གྱུར་པའི་ཕ་མ་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་ཏེ་སངས་རྒྱས་ཀྱི་ས་ལ་འགོད་པར་བྱ། དེའི་ཆེད་དུ་ཐེག་ཆེན་ཐུན་མོང་མ་ཡིན་པའི་ལམ་ལ་འཇུག་པར་བགྱིའོ་སྙམ་དུ་སེམས་བསྐྱེད་པ་འདིའི་རྗེས་ཟློས། ཧོཿ མ་གྱུར་ཁམས་གསུམ་སེམས་ཅན་ཀུན༔ སངས་རྒྱས་གོ་འཕང་ཐོབ་བྱའི་ཕྱིར༔ བྱང་ཆུབ་མཆོག་ཏུ་སེམས་བསྐྱེད་ནས༔ ཐུགས་རྗེ་ཆེན་པོ་བསྒྲུབ་པར་བགྱི༔ ལན་གསུམ། ཞིང་མཆོག་ཁྱད་པར་འཕགས་པ་དེ་རྣམས་ཀྱི་སྤྱན་སྔར་ཡན་ལག་བདུན་པས་བསགས་སྦྱོང་སྤེལ་བའི་དམིགས་འདུན་སོ་སོར་དྲན་བཞིན་པས་འདིའི་རྗེས་ཟློས། ཧོཿ བླ་མ་ཐུགས་རྗེ་ཆེན་པོ་སོགས༔ ཕྱོགས་དུས་སྐྱབས་གནས་ཐམས་ཅད་ལ༔ སྒོ་གསུམ་གུས་པས་ཕྱག་འཚལ་ཞིང་༔ དངོས་འབྱོར་ཡིད་སྤྲུལ་མཆོད་པ་འབུལ༔ སྡིག་ལྟུང་ཉམས་ཆགས་མཐོལ་ཞིང་བཤགས༔ བསོད་ནམས་ཀུན་ལ་རྗེས་ཡི་རངས༔ ཆོས་ཀྱི་འཁོར་ལོ་བསྐོར་བར་བསྐུལ༔ མྱ་ངན་མི་འདའ་བཞུགས་གསོལ་འདེབས༔ དགེ་ཚོགས་བྱང་ཆུབ་སྙིང་པོར་བསྔོ༔ འགྲོ་ཀུན་སངས་རྒྱས་མྱུར་ཐོབ་ཤོག༔ ལན་གསུམ། དབང་དོན་རྒྱུད་ལ་འཛིན་ཅིང་བརྟན་པའི་སླད་དུ་སྡོམ་པ་གསུམ་གྱི་ཚུལ་ཁྲིམས་རྣམས་ལེགས་པར་བླངས་ནས་ཅི་ནུས་སུ་བསྲུང་བར་བགྱིའོ་སྙམ་པས་འདིའི་རྗེས་ཟློས། རྩ་གསུམ་རྒྱལ་བ་རྒྱ་མཚོའི་ཚོགས༔ བདག་ལ་དགོངས་པར་མཛད་དུ་གསོལ༔ བདག་གིས་དུས་འདི་ནས་བཟུང་སྟེ༔ བྱང་ཆུབ་སྙིང་པོར་མཆིས་ཀྱི་བར༔ སེམས་ཅན་ཀུན་གྱི་དོན་བསྒྲུབ་ཕྱིར༔ སོ་སོར་ཐར་པའི་འདུལ་བ་དང་༔ བྱང་ཆུབ་སེམས་དཔའི་བསླབ་པ་དང་༔ སྔགས་ཀྱི་འདའ་དཀའི་དམ་ཚིག་རྣམས༔ མ་ལུས་བཟུང་ཞིང་བསྲུང་བར་བགྱི༔ ལན་གསུམ། རྡོ་རྗེ་སྤྱི་བོར་བཞག་ལ། དེང་ཁྱོད་རྒྱལ་བ་རྒྱ་མཚོ་ཡི༔ དཀྱིལ་འཁོར་ཆེན་པོར་གཞུག་བྱ་ཡི༔ དམ་ཉམས་མ་འདྲེས་མེད་པ་ལ༔ ནམ་ཡང་སྨྲ་བར་བྱ་བ་མིན༔ ཞེས་གསང་བར་གདམས། དེ་ནས་དབང་གི་གཞི་འགོད་པའི་ཕྱིར་ཡེ་ཤེས་དབབ་པ་ཡིན་པས། ཁྱེད་རང་རྣམས་ཀྱི་ལུས་ངག་ཡིད་གསུམ་གྱི་གནད་གཅུན་ལ་དམིགས་པ་འདི་རྩེ་གཅིག་ཏུ་སྒོམས་ཤིག །སློབ་དཔོན་དཀྱིལ་འཁོར་གྱི་གཙོ་བོ་ཡམ་ཡུམ་དུ་གསལ་བ་ལ་མོས་གུས་དྲག་ཏུ་བྱས་པས་སྦྱོར་མཚམས་ནས་བདེ་བའི་འོད་ཟེར་མེ་ལྕེ་ལྟ་བུ་བྱུང་༔ སློབ་མའི་ལུས་ལ་རེག་པས་རྣམ་སྨིན་གྱི་ཕུང་ཁམས་བསྲེགས་ཤིང་སྦྱངས༔ རྣམ་པར་ཤེས་པ་ཧྲཱིཿཡིག་དམར་པོར་གྱུར་པ་ཡབ་ཀྱི་ཞལ་དུ་དྲངས༔ ཐུགས་ཀར་རྗེས་ཆགས་ཀྱི་མེས་ཞུ༔ སྦྱོར་མཚམས་ནས་ཧྲཱིཿཡིག་གི་རྣམ་པས་ཕྱིར་སྤྲོས་པ་ལས་རྒྱལ་བ་རྒྱ་མཚོ་ཡུམ་དང་བཅས་པའི་སྐུར་གྱུར་པར་བསམ༔ སྤྱི་བོར་པདྨ་ཉི་ཟླའི་སྟེང་དུ་རྩ་བའི་བླ་མ་སངས་རྒྱས་རྡོ་རྗེ་ཆོས་དམར་གསལ་རྡོ་རྗེ་དང་དྲིལ་བུ་འཛིན་པས་རང་འོད་ཀྱི་ཡུམ་དང་མཉམ་པར་སྦྱོར་བ༔ དར་དང་རིན་པོ་ཆེའི་རྒྱན་ཅན་མཚན་དཔེའི་གཟི་བརྗིད་འབར་བ་ལ་ཚད་བཟུང་མེད་པའི་མོས་གུས་ཤུགས་དྲག་ཏུ་བསྐྱེད་པས༔ དེའི་ཐུགས་ཀ་ནས་འོད་ཟེར་གྱི་ལྕགས་ཀྱུས་འཇིག་རྟེན་དབང་ཕྱུག་རྒྱལ་བ་རྒྱ་མཚོའི་ལྷ་ཚོགས་དཔའ་བོ་དང་རྣལ་འབྱོར་མའི་ཚོགས་ཀྱི་ཐུགས་རྒྱུད་བསྐུལ༔ སྐུ་གསུང་ཐུགས་རྡོ་རྗེའི་རྣམ་པར་སྤྱན་དྲངས༔ བླ་མ་ལ་ཐིམ༔ བླ་མ་ཡབ་ཡུམ་ཡང་རྗེས་ཆགས་ཀྱི་མེས་བྱང་ཆུབ་སེམས་ཀྱི་བདུད་རྩིར་འོད་དུ་ཞུ་སྙིང་གའི་ཧྲཱིཿཡིག་ལ་ཐིམ་པས་རྒྱུད་བྱིན་གྱིས་བརླབས་ཤིང་༔ བདེ་བ་ཆེན་པོའི་ཡེ་ཤེས་ལྷག་པར་འབར་བར་མོས་ཤིག༔ སྤོས་བསྲེག །རོལ་མོ་དྲག་ཏུ་བཀྲོལ་ལ། ཨོཾ་ཨཱཿཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ དྷཱུ་མ་གྷ་ཡེ་ན་མ་སྭཱ་ཧཱ་ར་ཙ་ཧྲི་ཡ་ཧ་རི་ནི་ས་ས་པ་རི་ཝཱ་ར་ས་མ་ཡ་ཧོ༔ ས་མ་ཡ་སྟྭྃ༔ ཛྙཱ་ན་ཨཱ་བེ་ཤ་ཡ་ཨ་ཨཱ༔ ཧྲཱིཾ་ཧྲཱིཾ་ཕེཾ་ཕེཾ༔ ཧཱུྃ་ཧཱུྃ་ཧཱུྃཿ ཛཿཧཱུྃ་བྃ་ཧོཿ ཞེས་བརྗོད་ཅིང་བྱིན་དབབ། དེ་ལྟར་དབབ་པའི་ཡེ་ཤེས་པའི་བྱིན་རླབས་རྒྱུད་ལ་བརྟན་པར་བྱས་པར་མོས་ཤིག༔ ཏིཥྛ་བཛྲ་ས་མ་ཡ་སྟྭཾ། རྡོ་རྗེ་སྤྱི་བོར་རྒྱ་གྲམ་དུ་རེག །དེས་བྱིན་རླབས་ཀྱི་གཞི་དགོད་པ་སོང་ནས། དབང་བསྐུར་དངོས་ལ་བུམ་གསང་ཤེར་ཡེ་ཚིག་དབང་བཅས་རྣམ་གྲངས་བཞིར་འབྱུང་བའི་དང་པོ་བུམ་པའི་དབང་ལ་འདུན་པ་འདི་བཞིན་མཛོད། སློབ་དཔོན་གྱི་ཐུགས་ཀའི་འོད་ཀྱིས་དབང་ལྷ་ནམ་མཁའ་ཁྱབ་པར་སྤྱན་དྲངས་པ་དང་ལྷན་ཅིག་ཏུ་རྣམ་རྒྱལ་བུམ་པ་རྡོ་རྗེ་བདུད་རྩིའི་ཆུ་རྒྱུན་གྱིས་གང་བས་སྤྱི་བོ་ནས་དབང་བསྐུར་བས་སྒྲིབ་པའི་དྲི་མ་གཏོར་ཅིང་ཡེ་ཤེས་རྒྱུད་ལ་བླུགས་པའི་ཕྲིན་ལས་མཐར་ཕྱིན་མཛད་པར་མོས་ཤིག༔ རྣམ་བུམ་གྱིས་དབང་བསྐུར་ལ། ཧྲཱིཿ བཀྲ་ཤིས་རྣམ་པར་རྒྱལ་བའི་བུམ་པ་ན༔ འཕགས་མཆོག་རྒྱལ་བ་རྒྱ་མཚོའི་དཀྱིལ་འཁོར་བཞུགས༔ འོད་ཞུ་བདུད་རྩིའི་རྒྱུན་གྱིས་དབང་བསྐུར་བས༔ སྐུ་ལྔ་ཡེ་ཤེས་ཕྲིན་ལས་ཡོངས་རྫོགས་ཤོག༔ ཧྲཱིཿཧཱུྃ་ཏྲཱྃ་ཨོཾ་ཨཱཿཨ་བྷི་ཥིཉྩ་མིཿ སུ་ར་ཏ་སྟྭཾ་ཨ་ཧཾཿ ཞེས་བྱང་ཆུབ་སེམས་ཀྱི་བདུད་རྩིས་སྤྱི་བོ་ནས་དབང་བསྐུར་བས་ལུས་ཐམས་ཅད་གང་༔ དབང་ཐམས་ཅད་ཐོབ༔ དྲི་མ་ཐམས་ཅད་དག༔ ཆུའི་ལྷག་མ་སྤྱི་བོར་འཁྱིལ་བ་ལས་རིགས་ཀྱི་བདག་པོ་འོད་དཔག་མེད་ཀྱིས་དབུར་བརྒྱན་པར་གྱུར༔ དེའི་རྗེས་འབྲེལ་དུ་སྐུ་གསུང་ཐུགས་ཀྱི་དབང་བསྐུར་སྦྱིན་པ་ལ། དཀྱིལ་འཁོར་པ་གཙོ་འཁོར་གྱི་སྐུ་ལས་ཡེ་ཤེས་ཀྱི་སྐུ་གཉིས་པ་རེ་འཕྲོས་ནས་ཁྱེད་རང་རྣམས་ཀྱི་སྤྱི་བོ་ལ་སོགས་པའི་གནས་ཐམས་ཅད་དུ་ཐིམ་པར་མོས་ཤིག༔ སྐུ་ཙཀ་མགོར་བཞག་ལ། ཧྲཱིཿ ཇི་སྙེད་སངས་རྒྱས་ཐམས་ཅད་ཀྱི༔ སྐུ་ཡི་རྡོ་རྗེའི་བདག་ཉིད་ཆེ༔ ཕྱག་རྒྱ་རྟགས་ཀྱི་དབང་བསྐུར་བས༔ སྣང་སྟོང་ཡེ་ཤེས་མངོན་གྱུར་ཤོག༔ ཨོཾ་སརྦ་ཏ་ཐཱ་ག་ཏ་ཀཱ་ཡ་ཨ་བྷི་ཥིཉྩ་མི༔ དེས་སྣང་བ་ཐམས་ཅད་ལྷའི་འཁོར་ལོར་བྱིན་གྱིས་བརླབས་པ་ཡིན་ནོ། །དཀྱིལ་འཁོར་གྱི་གཙོ་བོའི་ཐུགས་ཀའི་ཡེ་ཤེས་སེམས་དཔའི་ཐུགས་སྲོག་ཧྲཱི༔ཡིག་སྔགས་ཕྲེང་གིས་བསྐོར་བ་ལས་སྔགས་ཕྲེང་གཉིས་པ་འཕྲོས། ཞལ་ནས་འཐོན་ཏེ་ཁྱེད་རང་རྣམས་འཇིག་རྟེན་དབང་ཕྱུག་རྒྱལ་བ་རྒྱ་མཚོར་གསལ་བའི་ཞལ་དུ་ཞུགས། ཐུགས་ཀར་ཡེ་ཤེས་སེམས་དཔའ་རྟ་མགྲིན་དམར་པོ་པདྨ་དང་བྷཉྫ་བསྣམས་པའི་ཞལ་དུ་བརྒྱུད། ཐུགས་ཀར་པད་ཉི་ལ་གནས་པའི་ཧྲཱིཿཡིག་གི་མཐར་འཁོད། འོད་ཟེར་སྤྲོ་བསྡུས་དོན་གཉིས་བསྒྲུབ། དངོས་གྲུབ་རྣམ་གཉིས་བདེ་བླག་ཏུ་ཐོབ་པར་མོས་ལ་སྔགས་འདིའི་རྗེས་ཟློས། ཨོཾ་ཨཱཿཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ དྷཱུ་མ་གྷ་ཡེ་ན་མ་སྭཱ་ཧཱ༔ ཧ་རི་ནི་ས་སརྦ་སིདྡྷི་ཧཱུྃ༔ ལན་གསུམ་བྱར་གཞུག །སྔགས་ཕྲེང་མགྲིན་པར་བཞག་ལ། ཧྲཱིཿ ཇི་སྙེད་སངས་རྒྱས་ཐམས་ཅད་ཀྱི༔ གསུང་གི་རྡོ་རྗེའི་བདག་ཉིད་ཆེ༔ ནུས་པ་སྔགས་ཀྱིས་དབང་བསྐུར་བས༔ གྲགས་སྟོང་ཡེ་ཤེས་མངོན་གྱུར་ཤོག༔ ཨོཾ་སརྦ་ཏ་ཐཱ་ག་ཏ་ཝཱ་ཀ་ཨ་བྷི་ཥིཉྩ་མྀ༔ དེས་གྲགས་པ་ཐམས་ཅད་སྔགས་ཀྱི་འཁོར་ལོར་བྱིན་གྱིས་བརླབས་པ་ཡིན་ནོ༔ མེ་ལོང་ལ་རྡོ་རྗེའི་གཟུགས་བརྙན་འཆར་བའི་བརྡས་མཚོན་ཏེ་འཁོར་འདས་ཀྱི་ཆོས་ཐམས་ཅད་སྣང་སྟོང་དབྱེར་མེད་སྐྱེ་འགག་གནས་གསུམ་དང་བྲལ་བ་རང་བྱུང་རིག་པའི་རང་རྩལ་དུ་རྟོགས་པར་གྱིས་ཤིག །མེ་ལོང་དང་རྡོ་རྗེ་ལྷན་ཅིག་བསྟན་ལ། ཧྲཱིཿ ཇི་སྙེད་སངས་རྒྱས་ཐམས་ཅད་ཀྱི༔ ཐུགས་ཀྱི་རྡོ་རྗེའི་བདག་ཉིད་ཆེ༔ རང་བྱུང་རིག་པའི་དབང་བསྐུར་བས༔ རིག་སྟོང་ཡེ་ཤེས་མངོན་གྱུར་ཤོག༔ ཨོཾ་སརྦ་ཏ་ཐཱ་ག་ཏ་ཙིཏྟ་ཨ་བྷི་ཥིཉྩ་མི༔ དེས་དྲན་རྟོགས་ཐམས་ཅད་འོད་གསལ་ཡེ་ཤེས་ཀྱི་འཁོར་ལོར་བྱིན་གྱིས་བརླབས་པ་ཡིན་ནོ༔ ནམ་མཁར་བཞུགས་པའི་དབང་ལྷ་རྣམས་ཀྱང་ཁྱེད་རང་རྣམས་ལ་ཐིམ་པས་ཡེ་ཤེས་གྱྀ་གཟི་བྱིན་མཆོག་ཏུ་འབར་བར་མོས་ཤིག༔ ཡེ་དྷར་བརྗོད་ལ་འབྲུ་འཐོར། ཕྱི་དཀྱིལ་ལ་བརྟེན་བུམ་དབང་ཐོབ༔ ལུས་ཀྱི་སྒྲིབ་དག་བསྐྱེད་པའི་རིམ༔ བསྒོམ་པར་དབང་ཞིང་སྤྲུལ་པའི་སྐུའི༔ ཡེ་ཤེས་རྒྱུད་ལ་བཞག་པའོ༔ གཉིས་པ་གསང་བའི་དབང་བསྐུར་བ་ལ་འདུན་པ་འདི་བཞིན་དུ་མཛོད༔ བླ་མ་ཡབ་ཡུམ་འདུ་ཤེས་གསུམ་གྱིས་སྙོམས་པར་ཞུགས་པའི་དཀར་དམར་བྱང་ཆུབ་ཀྱི་སེམས་རྒྱལ་བ་རྒྱ་མཚོ་འདུས་པའི་ངོ་བོ་ལྕེ་ཐོག་ཏུ་བྱིན་པར་མོས་ཤིག༔ ཐོད་པའི་བདུད་རྩི་སྦྱིན་ལ། ཧྲཱིཿ བདེ་གཤེགས་རྒྱལ་བ་རྒྱ་མཚོའི་ལྷ༔ གསང་བ་ཡེ་ཤེས་ཡུམ་དང་སྦྱོར༔ བྱང་ཆུབ་སེམས་ཀྱི་དབང་བསྐུར་བས༔ གསལ་སྟོང་ཡེ་ཤེས་མངོན་གྱུར་ཤོག༔ ཨོཾ་ཨཱཿཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ དྷཱུ་མ་གྷ་ཡེ་ན་མ་སྭཱ་ཧཱ༔ ཧ་རི་ནི་ས་སརྦ་སིདྡྷི་ཧཱུྃ༔ གུ་ཧྱ་བོ་དྷི་ཙིཏྟ་ཨ་བྷི་ཥིཉྩ་ཨཱཿ སློབ་མས་ཀྱང་རྟོག་པ་མེད་པའི་ངང་དུ་མྱངས་པས་རྩ་ཁམས་བདེ་བས་གང་༔ གསལ་སྟོང་མཁའ་ཁྱབ་ཀྱི་ཡེ་ཤེས་མངོན་དུ་གྱུར་པར་མོས་ཤིག༔ དམ་རྫས་ལ་བརྟེན་གསང་དབང་ཐོབ༔ ངག་གི་སྒྲིབ་དག་རྩ་རླུང་ལམ༔ བསྒོམ་པར་དབང་ཞིང་ལོངས་སྤྱོད་སྐུའི༔ ཡེ་ཤེས་རྒྱུད་ལ་བཞག་པའོ༔ གསུམ་པ་ཤེས་རབ་ཡེ་ཤེས་ཀྱི་དབང་བསྐུར་བ་ལ༔ སིནྡྷཱུ་རའི་དཀྱིལ་འཁོར་ལས་མཚན་ཉིད་ཡོངས་སུ་རྫོགས་པའི་རིག་མ་གསང་བ་ཡེ་ཤེས་སུ་བྱིན་གྱིས་བརླབས་པ་སྤྲོས་ཏེ་ཁྱེད་རང་རྣམས་ལ་གཏད་པར་མོས་ཤིག །སིནྡྷཱུ་རའི་མེ་ལོང་ལག་ཏུ་གཏད་ལ། ཧཱུྃ༔ འདི་ནི་གསང་བའི་ལྷ་མོ་སྟེ༔ ཐབས་མཆོག་དཔའ་བོ་ཁྱོད་ལ་གཏད༔ སྙོམས་འཇུག་བདེ་བའི་དབང་བསྐུར་བས༔ དགའ་བཞིའི་ཡེ་ཤེས་མངོན་གྱུར་ཤོག༔ ཨོཾ་ཨཱཿཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ དྷཱུ་མ་གྷ་ཡེ་ན་མ་སྭཱ་ཧཱ༔ ཧ་རི་ནི་ས་སརྦ་སིདྡྷི་ཧཱུྃ༔ པྲ་ཛྙཱ་མུ་དྲ་ཨ་བྷི་ཥིཉྩ་ཧཱུྃ༔ སིནྡྷཱུ་རས་དཔྲལ་བར་ཐིག་ལེ་དགོད༔ བུས་ཀྱང་འདུ་ཤེས་གསུམ་གྱིས་རྗེས་སུ་ཆགས་པའི་མེས་བསྐུལ་བས༔ ཡས་བབ་དང་མས་བརྟན་གྱྀ་ལྷན་ཅིག་སྐྱེས་པའི་བདེ་བ་ཉམས་སུ་མྱོང་བར་མོས་ཤིག༔ ཕོ་ཉ་ལ་བརྟེན་ཤེར་དབང་ཐོབ༔ ཡིད་ཀྱི་སྒྲིབ་དག་ཐིག་ལེའི་ལམ༔ བསྒོམ་པར་དབང་ཞིང་ཆོས་ཀྱི་སྐུའི༔ ཡེ་ཤེས་རྒྱུད་ལ་བཞག་པའོ༔ བཞི་པ་ཚིག་དབང་རིན་པོ་ཆེ་དོན་གྱི་ངོ་སྤྲད་པ་ལ། རང་རང་གི་རྒྱུད་ལ་ཤར་བའི་བདེ་ཆེན་གྱི་ངོ་བོར་མཉམ་པར་བཞག་པ་དེ་ཉིད་གདོད་ནས་རང་བྱུང་དོན་དམ་པའི་ཡེ་ཤེས་སུ་ངོ་ཤེས་པར་གྱིས་ཤིག༔ ཧོ༔ ལྟོས་ཤིག་རང་གི་སེམས་ལ་ལྟོས༔ བདེ་བའི་རང་བཞིན་སྟོང་པར་ཤར༔ ཟུང་འཇུག་གཉུག་མའི་དབང་བསྐུར་བས༔ འོད་གསལ་ཕྱག་ཆེན་མངོན་གྱུར་ཤོག༔ ཨོཾ་ཨཱཿཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ དྷཱུ་མ་གྷ་ཡེ་ན་མ་སྭཱ་ཧཱ༔ ཧ་རི་ནི་ས་སརྦ་སིདྡྷི་ཧཱུྃ༔ མ་ཧཱ་མུ་དྲ་ཛྙཱ་ན་ཨ་བྷི་ཥིཉྩ་ཨ་ཨ་ཨཱ༔ བདེ་བས་ཐབས་བྱས་པའི་སྟོང་ཉིད་ཕྱག་རྒྱ་ཆེན་པོ་བསམ་གྱིས་མི་ཁྱབ་པའི་ངང་དུ་མཉམ་པར་ཞོག་མཛོད༔ ཅེས་བྱས་ལ་ཅུང་ཟད་མཉམ་པར་འཇོག་ཏུ་བཅུག །རང་བཞིན་ལ་བརྟེན་བཞི་པ་ཐོབ༔ སྒོ་གསུམ་སྒྲིབ་དག་གཉུག་མའི་ལམ༔ བསྒོམ་པར་དབང་ཞིང་བདེ་ཆེན་སྐུའི༔ ཡེ་ཤེས་རྒྱུད་ལ་བཞག་པའོ༔ ཞེས་རྟོག་པ་བརྗོད་ལ། ཤིས་རྗོད་ཅི་ལྟར་རིགས་པར་བྱ། དེས་ཡང་ཟབ་ཐུགས་རྗེ་ཆེན་པོ་རྒྱལ་བ་རྒྱ་མཚོའི་དཀྱིལ་འཁོར་དུ་དོན་དབང་མདོར་བསྡུས་ཏེ་བསྐུར་བ་ལགས་པས་སོགས་གྱིས་མཚམས་སྦྱར་ལ། གཙོ་བོས་ཇི་ལྟར་སོགས། གཏོང་རག་མཎྜལ། ལུས་འབུལ་དགེ་བསྔོ་བཅས་ཀྱིས་དབང་གྲུབ། སློབ་དཔོན་གྱིས་ཚོགས་ལ་རོལ་ཞིང་ལྷག་གཏོར་བཏང༌། ཆད་བརྟན་ནས་ཤིས་བརྗོད་ཀྱི་བར་ཡང་ཕྲིན་ལས་ལྟར་བྱས་པས་ཚང་བར་འགྲུབ་བོ། །ཐུགས་རྗེའི་ཟེར་གྱིས་སྲིད་མཚོ་ཀུན། །གཏིང་ནས་སྐམ་པའི་ཐུགས་བསྐྱེད་དང༌། །སྨོན་ལམ་སྟོབས་ཀྱིས་འབྲེལ་ཚད་ཀུན། །མི་ལྡོག་བདེ་ཆེན་ཞིང་བགྲོད་ཤོག །འདི་ཡང་ཁྱེར་བདེ་བའི་སླད་དུ་གཏེར་གཞུང་གི་དགོངས་པ་དང་གཏེར་ཆེན་བླ་མའི་བཞེད་པ་གུང་མཐུན་པར་ཟབ་ཆོས་འདི་ཉིད་ཀྱི་ཐོག་མའི་སྣོད་ལྡན་ཀུ་སཱ་ལི་པདྨ་གར་དབང་གིས་བཀླག་ཆོག་ཏུ་བཀོད་པ་དགེ་ལེགས་འཕེལ།

[edit]

@#/__/yang zab thugs rje chen po rgyal ba rgya mtsho'i don dbang zur phyung du bkod pa bdud rtsi'i snying po zhes bya ba bzhugs so/__/na mo gu ru be/__rgyal ba rgya mtsho'i spyi gzugs mchog__/dkyil 'khor dbang phyug snying dbus su/__/bkod nas smin byed bdud rtsi yi/__/snying po'i yang bcud 'dir gsal bya/__/skal ldan gyi slob ma dbang bskur rtsa ba tsam gyis smin par 'dod pas dbang don snying po tsam bgyi ba la/__sbyor ba stegs bu'i steng du ras bris kyi dkyil 'khor bkram pa'am maN+Dal la tshom bu lha grangs bkod pa'i dbus su khri'u la bum pa'i dri chab dang so lnga'i bcud ldan mgul chings dmar pos spras pa bkod pa'i khar/__thod pa mtshan ldan a mri tas bskang ba bzhag__/de steng me long sin+d+hU ra brdal ba la chos 'byung bsnol ma bris pa'i dbus su pad 'dab bzhi'i lte bar hrIHma/__'dab bzhi shar nas rim bzhin/__hU~M ma/__trA~M ma/__oM ma/__AHma/__rnams dang g.yas g.yon gyi grwa zur bzhi la/__haH__riH__niH__saH__zhes bris pas kha bcad la dar dmar gyis bkab/__mdun sogs su gtso 'khor tshang ma'ang gtso bo'i sku+u tsag__/sngags byang dang phreng ba/__me long dang rdo rje rnams bzhag__/las bum/__sman rag gtor gsum/__chu gnyis nyer spyod spyi ltar bsham/__sngon gtor/__srung ma'i gtor 'bul/__tshogs kyi yo byad/__chad brtan sogs phrin las la dgos pa rnams tshogs par bya'o/__/dngos gzhi'i thog mar dbang don sgrub mchod ni/__brgyud 'debs dang*/__bgegs bskrad nas brtsams las byang mthar chags su btang*/__bdag mdun gyi sgrub pa'i dmigs bzlas ci nus dang las sbyor 'khor ba dong sprugs cung zad re bzla/__mthar dbyangs gsal yig brgya rten snying rnams kyis kha bskang*/__khyad par gyi mchod pa 'bul/__gtor 'bul 'dod gsol bcas tshang bar bya/__srung ma'i gtor 'bul spyi mtshams btang*/__tshogs byin rlabs nas bsgral stabs yan grub nas/__las bum du rta mgrin dmar po pad+ma dang b+hany+dza bsnams pa gsal ba'i sku las bdud rtsi'i rgyun babs bum pa gang bar gyur/__oM pad+mAn+ta kr-i ta hU~M phaT/__ces bzlas pas byin brlab/__rig pa'i me tog dor la gnang ba nod do/__/de nas slob ma rnams khrus nas dbyung*/__bgegs gtor btang la bskrad/__srung mtshams bcad/__maN+Dal bkye bsdu dang sems bskyed gsal gdab nas mtshams sbyor khyad par/__da lan skabs su babs pa'i 'chad bya/__sangs rgyas thams cad kyi sprul gzhi gangs can bod kyi lha gcig 'phags mchog spyan ras gzigs dbang phyug la rgyud lung man ngag gi bka' srol bsam gyis mi khyab pa bzhugs pa thams cad kyi mthar thug snying po'i yang bcud/__rdo rje theg pa bla na med pa pha ma gnyis med kyi dgongs don gcig tu dril ba/__thugs rje chen po rgyal ba rgya mtsho'i gdams pa 'phrad chog blo bde ye shes 'od kyi snying po 'di nyid/__'jig rten dbang phyug sprul pa'i skur bzhengs pa o rgyan gyi slob dpon chen po pad+ma sam+b+ha bas gnubs chen sangs rgyas ye shes dang mkha' 'gro'i dbang phyug mtsho rgyal ma la thun mong ma yin pa'i zab chos kun gyi snying por stsal ba ste gzhung nyid las/__khyad par yi dam thugs rje chen po yi:__rgyud kyi gzhung bsgyur lung gi nges pa dbye:__man ngag lag len gnad du dril nas kyang :__bye ba phrag brgya gdams pa'i snying po ni:__tshig nyung don tshangs nyams su blang bde ba:__thos pas rang grol rgyal ba rgya mtsho yi:__dgongs nyams dmar khrid gnad kyi yang zhun 'di'i:__dbang bskur thob tshad bde ba can du skye:__rtse gcig nyams blangs tshe 'dir byang chub thob:__ces sogs rgya cher bsngags pa don dang ldan pa'i zab chos 'di'ang ma 'ongs pa'i gdul bya la thugs brtse bas zab mo'i gter du sbas pa gnubs chen yang srid o rgyan dri med kun dga' nas bsam yas mchims phu'i brag sna seng+ge'i gdong pa can nas spyan drangs te thugs nyams su bzhes/__slang yang lung byang ltar dpal gyi bsam yas brag dmar mgr-in bzang gi bre gu'i sul du rgyas btab pa deng sang gdul bya dus las bab pa'i tshe/__rgyal sras lha rje nyid gter ston rkyang pa'i skye ba bcu gsum bzhes par gsungs pa'i skyes rab bcu gsum pa/__bka' bab bdun gyi mnga' bdag__/rtsod pa dang bral ba'i mkhas grub kun gyi spyi rje pad+ma 'od gsal mdo sngags gling pa la ye shes mkha' 'gros shog ser dang*/__bram ze nyer gcig gi gdung sogs dngos su phul ba'i ring du gsang ba'i dam tshig mthar phyin par mdzad nas lung bstan gyi nges pas skabs phyed pa na gtan la phab ste skal ldan rjes su bzung bar mdzad pa'i zab chos 'di'i smin byed kyi snying po mdor bsdus pa'i don dbang nor bu lugs sgrub par bgyi ba la sogs kyis mtshams sbyar nas maN+Dal 'bul du gzhug__/bla ma dang dkyil 'khor gyi gtso bo dbyer ma mchis pa la mos gus chen pos gsol ba 'debs pa 'di'i rjes zlos mdzod/__'phags mchog rgyal ba rgya mtsho dang :__dbyer med rdo rje slob dpon gyis:__bdag la brtse bas nyer dgongs nas:__dkyil 'khor chen po 'jug mdzad gsol:__lan gsum:__thog mar rgyud rnam par dag par bya ba'i slad du/__bla ma dang 'phags mchog 'gro 'dul rgyal ba rgya mtsho dbyer med pa la dkon mchog rgya mtsho'i tshogs kyis bskor te bzhugs pa'i spyan sngar/__bdag gzhan sems can thams cad 'di nas byang chub ma thob kyi bar du ci mdzad khyed shes blo gtad ling bskyur gyis skyabs su 'gro bar mos la 'di'i rjes zlos/__na mo:__rgyal ba rgya mtsho 'dus pa'i sku:__bla ma thugs rje chen po la:__bdag sogs 'gro kun byang chub bar:__khyed shes dad pas skyabs su mchi:__lan gsum/__thog med nas drin can tu gyur pa'i pha ma sems can thams cad 'khor ba sdug bsngal gyi rgya mtsho las bsgral te sangs rgyas kyi sa la 'god par bya/__de'i ched du theg chen thun mong ma yin pa'i lam la 'jug par bgyi'o snyam du sems bskyed pa 'di'i rjes zlos/__hoH__ma gyur khams gsum sems can kun:__sangs rgyas go 'phang thob bya'i phyir:__byang chub mchog tu sems bskyed nas:__thugs rje chen po bsgrub par bgyi:__lan gsum/__zhing mchog khyad par 'phags pa de rnams kyi spyan sngar yan lag bdun pas bsags sbyong spel ba'i dmigs 'dun so sor dran bzhin pas 'di'i rjes zlos/__hoH__bla ma thugs rje chen po sogs:__phyogs dus skyabs gnas thams cad la:__sgo gsum gus pas phyag 'tshal zhing :__dngos 'byor yid sprul mchod pa 'bul:__sdig ltung nyams chags mthol zhing bshags:__bsod nams kun la rjes yi rangs:__chos kyi 'khor lo bskor bar bskul:__mya ngan mi 'da' bzhugs gsol 'debs:__dge tshogs byang chub snying por bsngo:__'gro kun sangs rgyas myur thob shog:__lan gsum/__dbang don rgyud la 'dzin cing brtan pa'i slad du sdom pa gsum gyi tshul khrims rnams legs par blangs nas ci nus su bsrung bar bgyi'o snyam pas 'di'i rjes zlos/__rtsa gsum rgyal ba rgya mtsho'i tshogs:__bdag la dgongs par mdzad du gsol:__bdag gis dus 'di nas bzung ste:__byang chub snying por mchis kyi bar:__sems can kun gyi don bsgrub phyir:__so sor thar pa'i 'dul ba dang :__byang chub sems dpa'i bslab pa dang :__sngags kyi 'da' dka'i dam tshig rnams:__ma lus bzung zhing bsrung bar bgyi:__lan gsum/__rdo rje spyi bor bzhag la/__deng khyod rgyal ba rgya mtsho yi:__dkyil 'khor chen por gzhug bya yi:__dam nyams ma 'dres med pa la:__nam yang smra bar bya ba min:__zhes gsang bar gdams/__de nas dbang gi gzhi 'god pa'i phyir ye shes dbab pa yin pas/__khyed rang rnams kyi lus ngag yid gsum gyi gnad gcun la dmigs pa 'di rtse gcig tu sgoms shig__/slob dpon dkyil 'khor gyi gtso bo yam yum du gsal ba la mos gus drag tu byas pas sbyor mtshams nas bde ba'i 'od zer me lce lta bu byung :__slob ma'i lus la reg pas rnam smin gyi phung khams bsregs shing sbyangs:__rnam par shes pa hrIHyig dmar por gyur pa yab kyi zhal du drangs:__thugs kar rjes chags kyi mes zhu:__sbyor mtshams nas hrIHyig gi rnam pas phyir spros pa las rgyal ba rgya mtsho yum dang bcas pa'i skur gyur par bsam:__spyi bor pad+ma nyi zla'i steng du rtsa ba'i bla ma sangs rgyas rdo rje chos dmar gsal rdo rje dang dril bu 'dzin pas rang 'od kyi yum dang mnyam par sbyor ba:__dar dang rin po che'i rgyan can mtshan dpe'i gzi brjid 'bar ba la tshad bzung med pa'i mos gus shugs drag tu bskyed pas:__de'i thugs ka nas 'od zer gyi lcags kyus 'jig rten dbang phyug rgyal ba rgya mtsho'i lha tshogs dpa' bo dang rnal 'byor ma'i tshogs kyi thugs rgyud bskul:__sku gsung thugs rdo rje'i rnam par spyan drangs:__bla ma la thim:__bla ma yab yum yang rjes chags kyi mes byang chub sems kyi bdud rtsir 'od du zhu snying ga'i hrIHyig la thim pas rgyud byin gyis brlabs shing :__bde ba chen po'i ye shes lhag par 'bar bar mos shig:__spos bsreg__/rol mo drag tu bkrol la/__oM AHhU~M hrIHoM ma Ni pad+me hU~M:__d+hU ma g+ha ye na ma swA hA ra tsa hri ya ha ri ni sa sa pa ri wA ra sa ma ya ho:__sa ma ya s+t+wa~M:__dz+nyA na A be sha ya a A:__hrIM hrIM pheM pheM:___hU~M hU~M hU~MH__dzaHhU~M ba~M hoH__zhes brjod cing byin dbab/__de ltar dbab pa'i ye shes pa'i byin rlabs rgyud la brtan par byas par mos shig:__tiSh+Tha badz+ra sa ma ya s+t+waM/__rdo rje spyi bor rgya gram du reg__/des byin rlabs kyi gzhi dgod pa song nas/__dbang bskur dngos la bum gsang sher ye tshig dbang bcas rnam grangs bzhir 'byung ba'i dang po bum pa'i dbang la 'dun pa 'di bzhin mdzod/__slob dpon gyi thugs ka'i 'od kyis dbang lha nam mkha' khyab par spyan drangs pa dang lhan cig tu rnam rgyal bum pa rdo rje bdud rtsi'i chu rgyun gyis gang bas spyi bo nas dbang bskur bas sgrib pa'i dri ma gtor cing ye shes rgyud la blugs pa'i phrin las mthar phyin mdzad par mos shig:__rnam bum gyis dbang bskur la/__hrIH__bkra shis rnam par rgyal ba'i bum pa na:__'phags mchog rgyal ba rgya mtsho'i dkyil 'khor bzhugs:__'od zhu bdud rtsi'i rgyun gyis dbang bskur bas:__sku lnga ye shes phrin las yongs rdzogs shog:__hrIHhU~M trA~M oM AHa b+hi Shiny+tsa miH__su ra ta s+t+waM a haMH__zhes byang chub sems kyi bdud rtsis spyi bo nas dbang bskur bas lus thams cad gang :__dbang thams cad thob:__dri ma thams cad dag:__chu'i lhag ma spyi bor 'khyil ba las rigs kyi bdag po 'od dpag med kyis dbur brgyan par gyur:__de'i rjes 'brel du sku gsung thugs kyi dbang bskur sbyin pa la/__dkyil 'khor pa gtso 'khor gyi sku las ye shes kyi sku gnyis pa re 'phros nas khyed rang rnams kyi spyi bo la sogs pa'i gnas thams cad du thim par mos shig:__sku tsaka mgor bzhag la/__hrIH__ji snyed sangs rgyas thams cad kyi:__sku yi rdo rje'i bdag nyid che:__phyag rgya rtags kyi dbang bskur bas:__snang stong ye shes mngon gyur shog:__oM sarba ta thA ga ta kA ya a b+hi Shiny+tsa mi:__des snang ba thams cad lha'i 'khor lor byin gyis brlabs pa yin no/__/dkyil 'khor gyi gtso bo'i thugs ka'i ye shes sems dpa'i thugs srog hrI:yig sngags phreng gis bskor ba las sngags phreng gnyis pa 'phros/__zhal nas 'thon te khyed rang rnams 'jig rten dbang phyug rgyal ba rgya mtshor gsal ba'i zhal du zhugs/__thugs kar ye shes sems dpa' rta mgrin dmar po pad+ma dang b+hany+dza bsnams pa'i zhal du brgyud/__thugs kar pad nyi la gnas pa'i hrIHyig gi mthar 'khod/__'od zer spro bsdus don gnyis bsgrub/__dngos grub rnam gnyis bde blag tu thob par mos la sngags 'di'i rjes zlos/__oM AHhU~M hrIHoM ma Ni pad+me hU~M:__d+hU ma g+ha ye na ma swA hA:__ha ri ni sa sarba sid+d+hi hU~M:__lan gsum byar gzhug__/sngags phreng mgrin par bzhag la/__hrIH__ji snyed sangs rgyas thams cad kyi:__gsung gi rdo rje'i bdag nyid che:__nus pa sngags kyis dbang bskur bas:__grags stong ye shes mngon gyur shog:__oM sarba ta thA ga ta wA ka a b+hi Shiny+tsa m-i:__des grags pa thams cad sngags kyi 'khor lor byin gyis brlabs pa yin no:__me long la rdo rje'i gzugs brnyan 'char ba'i brdas mtshon te 'khor 'das kyi chos thams cad snang stong dbyer med skye 'gag gnas gsum dang bral ba rang byung rig pa'i rang rtsal du rtogs par gyis shig__/me long dang rdo rje lhan cig bstan la/__hrIH__ji snyed sangs rgyas thams cad kyi:__thugs kyi rdo rje'i bdag nyid che:__rang byung rig pa'i dbang bskur bas:__rig stong ye shes mngon gyur shog:__oM sarba ta thA ga ta tsit+ta a b+hi Shiny+tsa mi:__des dran rtogs thams cad 'od gsal ye shes kyi 'khor lor byin gyis brlabs pa yin no:__nam mkhar bzhugs pa'i dbang lha rnams kyang khyed rang rnams la thim pas ye shes gy-i gzi byin mchog tu 'bar bar mos shig:__ye d+har brjod la 'bru 'thor/__phyi dkyil la brten bum dbang thob:__lus kyi sgrib dag bskyed pa'i rim:__bsgom par dbang zhing sprul pa'i sku'i:__ye shes rgyud la bzhag pa'o:__gnyis pa gsang ba'i dbang bskur ba la 'dun pa 'di bzhin du mdzod:__bla ma yab yum 'du shes gsum gyis snyoms par zhugs pa'i dkar dmar byang chub kyi sems rgyal ba rgya mtsho 'dus pa'i ngo bo lce thog tu byin par mos shig:__thod pa'i bdud rtsi sbyin la/__hrIH__bde gshegs rgyal ba rgya mtsho'i lha:__gsang ba ye shes yum dang sbyor:__byang chub sems kyi dbang bskur bas:__gsal stong ye shes mngon gyur shog:__oM AHhU~M hrIHoM ma Ni pad+me hU~M:__d+hU ma g+ha ye na ma swA hA:__ha ri ni sa sarba sid+d+hi hU~M:__gu h+ya bo d+hi tsit+ta a b+hi Shiny+tsa AH__slob mas kyang rtog pa med pa'i ngang du myangs pas rtsa khams bde bas gang :___gsal stong mkha' khyab kyi ye shes mngon du gyur par mos shig:___dam rdzas la brten gsang dbang thob:__ngag gi sgrib dag rtsa rlung lam:__bsgom par dbang zhing longs spyod sku'i:__ye shes rgyud la bzhag pa'o:__gsum pa shes rab ye shes kyi dbang bskur ba la:__sin+d+hU ra'i dkyil 'khor las mtshan nyid yongs su rdzogs pa'i rig ma gsang ba ye shes su byin gyis brlabs pa spros te khyed rang rnams la gtad par mos shig__/sin+d+hU ra'i me long lag tu gtad la/__hU~M:__'di ni gsang ba'i lha mo ste:__thabs mchog dpa' bo khyod la gtad:__snyoms 'jug bde ba'i dbang bskur bas:__dga' bzhi'i ye shes mngon gyur shog:__oM AHhU~M hrIHoM ma Ni pad+me hU~M:__d+hU ma g+ha ye na ma swA hA:__ha ri ni sa sarba sid+d+hi hU~M:__pra dz+nyA mu dra a b+hi Shiny+tsa hU~M:__sin+d+hU ras dpral bar thig le dgod:__bus kyang 'du shes gsum gyis rjes su chags pa'i mes bskul bas:__yas bab dang mas brtan gy-i lhan cig skyes pa'i bde ba nyams su myong bar mos shig:__pho nya la brten sher dbang thob:__yid kyi sgrib dag thig le'i lam:__bsgom par dbang zhing chos kyi sku'i:__ye shes rgyud la bzhag pa'o:__bzhi pa tshig dbang rin po che don gyi ngo sprad pa la/__rang rang gi rgyud la shar ba'i bde chen gyi ngo bor mnyam par bzhag pa de nyid gdod nas rang byung don dam pa'i ye shes su ngo shes par gyis shig:__ho:__ltos shig rang gi sems la ltos:__bde ba'i rang bzhin stong par shar:__zung 'jug gnyug ma'i dbang bskur bas:__'od gsal phyag chen mngon gyur shog:__oM AHhU~M hrIHoM ma Ni pad+me hU~M:__d+hU ma g+ha ye na ma swA hA:__ha ri ni sa sarba sid+d+hi hU~M:__ma hA mu dra dz+nyA na a b+hi Shiny+tsa a a A:__bde bas thabs byas pa'i stong nyid phyag rgya chen po bsam gyis mi khyab pa'i ngang du mnyam par zhog mdzod:__ces byas la cung zad mnyam par 'jog tu bcug__/rang bzhin la brten bzhi pa thob:__sgo gsum sgrib dag gnyug ma'i lam:__bsgom par dbang zhing bde chen sku'i:__ye shes rgyud la bzhag pa'o:__zhes rtog pa brjod la/__shis rjod ci ltar rigs par bya/__des yang zab thugs rje chen po rgyal ba rgya mtsho'i dkyil 'khor du don dbang mdor bsdus te bskur ba lags pas sogs gyis mtshams sbyar la/__gtso bos ji ltar sogs/__gtong rag maN+Dal/__lus 'bul dge bsngo bcas kyis dbang grub/__slob dpon gyis tshogs la rol zhing lhag gtor btang*/__chad brtan nas shis brjod kyi bar yang phrin las ltar byas pas tshang bar 'grub bo/__/thugs rje'i zer gyis srid mtsho kun/__/gting nas skam pa'i thugs bskyed dang*/__/smon lam stobs kyis 'brel tshad kun/__/mi ldog bde chen zhing bgrod shog__/'di yang khyer bde ba'i slad du gter gzhung gi dgongs pa dang gter chen bla ma'i bzhed pa gung mthun par zab chos 'di nyid kyi thog ma'i snod ldan ku sA li pad+ma gar dbang gis bklag chog tu bkod pa dge legs 'phel/_