JKW-KABUM-22-ZA-012-043

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 12, sde tshan 43, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

པདྨ་འབྱུང་གནས་ལ་གསོལ་བ་འདེབས་པ་ཡོ་ག་གསུམ་གྱི་གླུ་དབྱངས། དུས་གསུམ་ཀུན་མཁྱེན་པདྨ་འབྱུང་གནས་ལ་གསོལ་བ་འདེབས་པ་ཡོ་ག་གསུམ་གྱི་གླུ་དབྱངས་ཞེས་བྱ་བ། ཨ་ཧོཿ ལྷོ་ནུབ་སྲིན་ཡུལ་ཟངས་མདོག་དཔལ་རི་ཡི་གྲོང་ཁྱེར། །སྐུ་གསུམ་རིགས་འདུས་འཆི་མེད་མཚོ་སྐྱེས་ཀྱི་རྡོ་རྗེ། །རིག་འཛིན་ཌཱ་ཀིའི་ཚོམ་བུའི་བསྐོར་བ་དེ་བཞུགས་ཡོད། །དག་པ་རབ་འབྱམས་ངང་ནས་གསོལ་བ་རང་འདེབས་སོ། །སྒྱུ་ལུས་རྩ་ཁམས་རྣམ་དག་འོད་གསལ་གྱི་ཀློང་ནས། །གཡོ་བ་རླུང་ཀུན་དབུ་མར་ཐིམ་པ་ཡི་རིག་གདངས། །ཐིག་ལེ་ཚོམ་བུར་ཤར་བའི་མཚོ་སྐྱེས་ཀྱི་རྡོ་རྗེར། །བདེ་སྟོང་གཉིས་མེད་ངང་ནས་གསོལ་བ་རང་འདེབས་སོ། །སྙིང་དབུས་ཚོགས་བརྒྱད་རྣམ་དག་དཔལ་རི་ཡི་གྲོང་ཁྱེར། །འགྲོ་འོང་རྟོག་པ་བྲལ་བའི་ཡེ་ཤེས་ཀྱི་ཀློང་ནས། །མཐའ་གྲོལ་གཞོན་ནུ་བུམ་སྐུ་མཚོ་སྐྱེས་ཀྱི་རྡོ་རྗེར། །སྤྲོས་བྲལ་གཉུག་མའི་ངང་ནས་གསོལ་བ་རང་འདེབས་སོ། །སྒྲོན་དྲུག་འཇའ་ཟེར་བཞད་པའི་དཀྱིལ་འཁོར་གྱི་དབུས་ནས། །ཚད་ཕེབས་དཔའ་བོ་མཁའ་འགྲོའི་ཚོགས་འཁོར་ལ་རོལ་པའི། །འཕོ་ཆེན་རྡོ་རྗེའི་སྐུ་བརྙེས་མཚོ་སྐྱེས་ཀྱི་རྡོ་རྗེར། །ཟག་བཅས་རྟོག་བྲལ་ངང་ནས་གསོལ་བ་རང་འདེབས་སོ། །ཕྱི་ནང་གཞན་གསུམ་ཉམས་ལེན་སྦྱར་བ་ཡི་སྒྲ་དབྱངས། །ཡོ་ག་རྣམ་གསུམ་གླུ་དབྱངས་གཏད་མེད་དུ་འབུལ་བས། །ཕུང་ཁམས་སྐྱེ་མཆེད་འདུ་བ་དབུ་མ་རུ་ཐིམ་ནས། །དོན་དམ་ཆོས་ཟད་ཆེན་པོ་མངོན་གྱུར་དུ་ཤོག་ཅིག །ཅེས་བདེ་བ་ཆེན་པོ་པདྨཱ་ཀ་ར་ལ་ཐུན་མོང་མ་ཡིན་པར་གསོལ་བ་གདབ་པའི་རིམ་པའོ།། །། ༈

[edit]

pad+ma 'byung gnas la gsol ba 'debs pa yo ga gsum gyi glu dbyangs/__ dus gsum kun mkhyen pad+ma 'byung gnas la gsol ba 'debs pa yo ga gsum gyi glu dbyangs zhes bya ba/__a hoH_lho nub srin yul zangs mdog dpal ri yi grong khyer/__/sku gsum rigs 'dus 'chi med mtsho skyes kyi rdo rje/__/rig 'dzin DA ki'i tshom bu'i bskor ba de bzhugs yod/__/dag pa rab 'byams ngang nas gsol ba rang 'debs so/__/sgyu lus rtsa khams rnam dag 'od gsal gyi klong nas/__/g.yo ba rlung kun dbu mar thim pa yi rig gdangs/__/thig le tshom bur shar ba'i mtsho skyes kyi rdo rjer/__/bde stong gnyis med ngang nas gsol ba rang 'debs so/__/snying dbus tshogs brgyad rnam dag dpal ri yi grong khyer/__/'gro 'ong rtog pa bral ba'i ye shes kyi klong nas/__/mtha' grol gzhon nu bum sku mtsho skyes kyi rdo rjer/__/spros bral gnyug ma'i ngang nas gsol ba rang 'debs so/__/sgron drug 'ja' zer bzhad pa'i dkyil 'khor gyi dbus nas/__/tshad phebs dpa' bo mkha' 'gro'i tshogs 'khor la rol pa'i/__/'pho chen rdo rje'i sku brnyes mtsho skyes kyi rdo rjer/__/zag bcas rtog bral ngang nas gsol ba rang 'debs so/__/phyi nang gzhan gsum nyams len sbyar ba yi sgra dbyangs/__/yo ga rnam gsum glu dbyangs gtad med du 'bul bas/__/phung khams skye mched 'du ba dbu ma ru thim nas/__/don dam chos zad chen po mngon gyur du shog cig__/ces bde ba chen po pad+mA ka ra la thun mong ma yin par gsol ba gdab pa'i rim pa'o//__//__!