JKW-KABUM-22-ZA-012-107

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 12, sde tshan 107, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

དཔལ་ལྡན་བླ་མ་ཞབས་པད་བརྟན་པའི་རྡོ་རྗེའི་ཐོལ་གླུ་འཆི་མེད་སྤྲིན་དཀར་བཞད་པའི་རོལ་མོ། དཔལ་ལྡན་བླ་མ་དམ་པར་ཞབས་པད་བརྟན་པར་གསོལ་བ་འདེབས་པའི་རྡོ་རྗེའི་ཐོལ་གླུ་འཆི་མེད་སྤྲིན་དཀར་བཞད་པའི་རོལ་མོ་ཞེས་བྱ་བ། ཨ་ཧོ། ཀ་དག་ཟབ་ཞི་སྤྲོས་པའི་མཚན་མ་ལས་འདས་ཀྱང་། །རང་གདངས་ལྷུན་གྲུབ་འོད་གསལ་གཉུག་མ་ཡི་གཤིས་ལུགས། །འགྱུར་མེད་བདེ་ཆེན་རྣམ་ཀུན་མཆོག་ལྡན་གྱི་ངང་དུ། །དཔལ་ལྡན་བླ་མ་ཞབས་པད་བརྟན་པ་རུ་ཤོག་ཅིག །འགྲོ་འོང་སྲོག་རྩོལ་དྲི་བཞོན་དབུ་མ་རུ་ཐིམ་ཞིང་། །གཟུང་འཛིན་ཉི་ཟླའི་རྒྱུ་བ་འཕོ་མེད་དུ་དག་པས། །ཕྱི་ནང་གཞན་གསུམ་རོ་གཅིག་བདེ་ཆེན་གྱི་ངང་དུ། །དཔལ་ལྡན་བླ་མ་ཞབས་པད་བརྟན་པ་རུ་ཤོག་ཅིག །དགའ་བཞིའི་ཕོ་ཉས་བསྐྱེད་པའི་རྩ་ཁམས་ཀྱི་དྭངས་མ། །ཐབས་ཤེས་ཟུང་འཇུག་ཛ་ལནྡྷ་ར་རུ་སྨིན་ནས། །སྣང་སྟོང་གདན་གསུམ་མཚན་དཔེའི་དཀྱིལ་འཁོར་དུ་འབར་བའི། །དཔལ་ལྡན་བླ་མའི་ཞབས་པད་བརྟན་པ་རུ་ཤོག་ཅིག །གསུང་དབྱངས་བདེན་གཉིས་དབྱེར་མེད་དམ་ཆོས་ཀྱི་སྒྲ་དབྱངས། །ཐར་པའི་ལམ་སྟོན་གཅིག་གྱུར་གྲགས་སྟོང་གི་རོལ་མོ། །སྐལ་བཟང་འགྲོ་བའི་མོས་ངོར་ཆད་མེད་དུ་སྩལ་བཞིན། །དཔལ་ལྡན་བླ་མ་ཞབས་པད་བརྟན་པ་རུ་ཤོག་ཅིག །ཐུགས་མཆོག་གདོད་ནས་འཁྲུལ་བྲལ་མཁྱེན་བརྩེ་ཡི་རོལ་པས། །ཇི་ལྟ་ཇི་སྙེད་ཤེས་བྱ་ཐོགས་མེད་དུ་གཟིགས་ཤིང་། །སྐད་ཅིག་རེར་ཡང་འགྲོ་རྣམས་བདེ་ཆེན་ལ་སྦྱོར་བའི། །དཔལ་ལྡན་བླ་མ་ཞབས་པད་བརྟན་པ་རུ་ཤོག་ཅིག །འཇིགས་མེད་བདེ་སྟོང་ཟུང་འཇུག་ཆོས་སྐུ་ཡི་ཀློང་ནས། །འགགས་མེད་མཚན་དཔེའི་རོལ་གར་གཟུགས་སྐུ་རུ་སྟོན་པ། །དེང་འདིར་རྒྱལ་བའི་མྱུ་གུ་གཞོན་ནུ་ཡི་ཚུལ་ཅན། །སྐུ་གསུམ་དབྱེར་མེད་ཞབས་པད་བརྟན་པ་རུ་ཤོག་ཅིག །མཁྱེན་རབ་འཇམ་དཔལ་གཞོན་ནུའི་བློ་གྲོས་དང་དབྱེར་མེད། །བརྩེ་ཆེན་པད་དཀར་དབང་པོའི་ཐུགས་རྗེ་དང་རོ་གཅིག །མཐུ་སྟོབས་གསང་བའི་བདག་པོའི་གོ་ཆ་ལ་རོལ་པའི། །རིགས་གསུམ་འདུས་ཞལ་ཞབས་པད་བརྟན་པ་རུ་ཤོག་ཅིག །སངས་རྒྱས་བྱང་སེམས་དྲང་སྲོང་གྲུབ་པ་ཡི་བདེན་སྟོབས། །བདག་གི་ལྷག་བསམ་སྨོན་པའི་མཐུན་འགྱུར་དུ་བཞེངས་ནས། །བསྐལ་བའི་བར་དུ་ཁྱབ་བདག་དྲིན་ཆེན་གྱི་བླ་མ། །ཞབས་པད་རྡོ་རྗེའི་ཁམས་སུ་བརྟན་པ་རུ་ཤོག་ཅིག །འཆི་མེད་པདྨཱ་ཀཱ་རའི་ཐུགས་རྗེ་ཡི་བྱིན་རླབས། །འཆི་མེད་གྲུབ་པའི་བདུད་རྩི་བཅུད་ལེན་དུ་གཡོ་བས། །འཆི་མེད་བདེ་སྟོང་དབུ་མའི་མཁའ་དབྱིངས་སུ་སྨིན་པའི། །འཆི་མེད་ཚེ་མཐའ་ཡས་པའི་ངོ་བོ་རུ་གྱུར་ཤོག །དེ་སྐད་གང་ཤར་རང་གྲོལ་གྲགས་སྟོང་གི་གླུ་དབྱངས། །མགྲིན་པ་རྡོ་རྗེའི་ཐོལ་གླུའི་དཀོར་མཛོད་ནས་བླངས་པས། །ཇི་སྐད་སྨོན་པའི་དོན་རྣམས་གེགས་མེད་དུ་འགྲུབ་སྟེ། །བསྟན་འགྲོར་ཕན་བདེའི་དགའ་སྟོན་འཕེལ་བ་རུ་ཤོག་ཅིག །ན་མོ་གུ་རུ་ཨཱ་ཡུརྫྙཱ་ན་བཛྲཱ་ཡེ་སྭཱ་ཧཱ། ། ༈

[edit]

dpal ldan bla ma zhabs pad brtan pa'i rdo rje'i thol glu 'chi med sprin dkar bzhad pa'i rol mo/__ dpal ldan bla ma dam par zhabs pad brtan par gsol ba 'debs pa'i rdo rje'i thol glu 'chi med sprin dkar bzhad pa'i rol mo zhes bya ba/__a ho/__ka dag zab zhi spros pa'i mtshan ma las 'das kyang /__/rang gdangs lhun grub 'od gsal gnyug ma yi gshis lugs/__/'gyur med bde chen rnam kun mchog ldan gyi ngang du/__/dpal ldan bla ma zhabs pad brtan pa ru shog cig__/'gro 'ong srog rtsol dri bzhon dbu ma ru thim zhing /__/gzung 'dzin nyi zla'i rgyu ba 'pho med du dag pas/__/phyi nang gzhan gsum ro gcig bde chen gyi ngang du/__/dpal ldan bla ma zhabs pad brtan pa ru shog cig__/dga' bzhi'i pho nyas bskyed pa'i rtsa khams kyi dwangs ma/__/thabs shes zung 'jug dza lan+d+ha ra ru smin nas/__/snang stong gdan gsum mtshan dpe'i dkyil 'khor du 'bar ba'i/__/dpal ldan bla ma'i zhabs pad brtan pa ru shog cig__/gsung dbyangs bden gnyis dbyer med dam chos kyi sgra dbyangs/___/thar pa'i lam ston gcig gyur grags stong gi rol mo/__/skal bzang 'gro ba'i mos ngor chad med du stsal bzhin/__/dpal ldan bla ma zhabs pad brtan pa ru shog cig__/thugs mchog gdod nas 'khrul bral mkhyen brtse yi rol pas/__/ji lta ji snyed shes bya thogs med du gzigs shing /__/skad cig rer yang 'gro rnams bde chen la sbyor ba'i/__/dpal ldan bla ma zhabs pad brtan pa ru shog cig__/'jigs med bde stong zung 'jug chos sku yi klong nas/__/'gags med mtshan dpe'i rol gar gzugs sku ru ston pa/__/deng 'dir rgyal ba'i myu gu gzhon nu yi tshul can/__/sku gsum dbyer med zhabs pad brtan pa ru shog cig__/mkhyen rab 'jam dpal gzhon nu'i blo gros dang dbyer med/__/brtse chen pad dkar dbang po'i thugs rje dang ro gcig_/mthu stobs gsang ba'i bdag po'i go cha la rol pa'i/__/rigs gsum 'dus zhal zhabs pad brtan pa ru shog cig_/sangs rgyas byang sems drang srong grub pa yi bden stobs/__/bdag gi lhag bsam smon pa'i mthun 'gyur du bzhengs nas/__/bskal ba'i bar du khyab bdag drin chen gyi bla ma/__/zhabs pad rdo rje'i khams su brtan pa ru shog cig__/'chi med pad+mA kA ra'i thugs rje yi byin rlabs/__/'chi med grub pa'i bdud rtsi bcud len du g.yo bas/__/'chi med bde stong dbu ma'i mkha' dbyings su smin pa'i/__/'chi med tshe mtha' yas pa'i ngo bo ru gyur shog__/de skad gang shar rang grol grags stong gi glu dbyangs/__/mgrin pa rdo rje'i thol glu'i dkor mdzod nas blangs pas/__/ji skad smon pa'i don rnams gegs med du 'grub ste/__/bstan 'gror phan bde'i dga' ston 'phel ba ru shog cig__/na mo gu ru A yur+dz+nyA na badz+rA ye swA hA/___/__!_