JKW-KABUM-22-ZA-012-028

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 12, sde tshan 28, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

བསྐྱེད་རིམ་གསོལ་འདེབས་ཀྱི་རྡོ་རྗེའི་ཐོལ་གླུ་སྣང་སྲིད་གཞིར་བཞེངས། བསྐྱེད་རིམ་གསལ་འདེབས་ཀྱི་རྡོ་རྗེའི་ཐོལ་གླུ་སྣང་སྲིད་གཞིར་བཞེངས་ཞེས་བྱ་བ། ཨ་ཧོ། འཁོར་འདས་ཆོས་རྣམས་གཟོད་མ་ནས། །ཡོངས་གྲུབ་ལྷ་ཡི་ཕྱག་རྒྱ་ཆེ། །དེ་ཕྱིར་གཉིས་སུ་མེད་པ་ཡི། །དོན་གྱི་ལྟ་བས་མཇལ་ཕྱག་འཚལ། །སྣང་བ་གང་ཤར་ཐམས་ཅད་ཀུན། །ཡི་དམ་ལྷ་ཡི་སྐུ་རུ་གསལ། །དེ་ཡང་ཞེན་པ་མེད་པའི་དངོས། །ཆུ་ཟླའི་གར་མཁན་ཉིད་དུ་དག །འགྲོ་འོང་སྲོག་དང་རྩོལ་བའི་རླུང་། །ཁ་སྦྱོར་སྔགས་ཀྱི་སྤྲོ་བསྡུ་ཡིས། །རྡོ་རྗེ་མི་ཤིགས་ནཱ་དའི་གླུ། །འོད་གསལ་དྷཱུ་ཏཱིའི་སྦུབས་སུ་རྫོགས། །དྲན་རིག་ཅི་ཤར་རང་གྲོལ་བ། །ད་ལྟའི་ཤེས་པ་གཉུག་མའི་སྲོག །ཡེངས་མེད་ངང་དུ་གཟེར་ཐེབས་པས། །འབྲས་བུ་ཡེ་ཤེས་ཆེན་པོར་སྨིན། །ཕྱི་སྣོད་འོད་ལྔ་ཡུམ་ལྔའི་མཁར། །ནང་བཅུད་པདྨ་ཧེ་རུ་ཀཿ སྒྲར་གྲགས་ཧཱུྃ་གི་སྣང་གླུ་ཡིས། །བརྟན་གཡོའི་ཞེན་པ་ཕྲ་སར་བཅད། །དེ་ཚེ་གཟུང་འཛིན་བདུད་དགྲའི་སྡེར། །སྤང་གཉེན་བྲལ་བའི་རྒྱས་བཏབ་པས། །རང་སྣང་དོན་གྱི་འོག་མིན་དུ། །དག་པ་རབ་འབྱམས་གཅིག་ཏུ་ཤར། །ཨ་ཧོ་གསལ་འདེབས་ཉམས་ཀྱི་གླུ། །འོན་ཕུ་སྟག་ཚང་གསང་ཕུག་ཏུ། །ཚོགས་ཀྱི་འདུ་བ་བགྱིས་པའི་ཚེ། །རྣལ་འབྱོར་པདྨ་དགྱེས་པས་བླངས། །དགེ་བས་སྣང་ཞེན་ལྷ་སྐུར་དག །འབྱུང་འཇུག་རླུང་ཁམས་སྔགས་སུ་རྫོགས། །གཟུང་འཛིན་ཆོས་སྐུར་སྨིན་པ་ཡི། །ཧེ་རུ་ཀཿདཔལ་མངོན་གྱུར་ཤོག ། ༈

[edit]

bskyed rim gsol 'debs kyi rdo rje'i thol glu snang srid gzhir bzhengs/__ bskyed rim gsal 'debs kyi rdo rje'i thol glu snang srid gzhir bzhengs zhes bya ba/__a ho/__'khor 'das chos rnams gzod ma nas/__/yongs grub lha yi phyag rgya che/__/de phyir gnyis su med pa yi/__/don gyi lta bas mjal phyag 'tshal/__/snang ba gang shar thams cad kun/__/yi dam lha yi sku ru gsal/__/de yang zhen pa med pa'i dngos/__/chu zla'i gar mkhan nyid du dag__/'gro 'ong srog dang rtsol ba'i rlung /__/kha sbyor sngags kyi spro bsdu yis/__/rdo rje mi shigs nA da'i glu/__/'od gsal d+hU tI'i sbubs su rdzogs/__/dran rig ci shar rang grol ba/__/da lta'i shes pa gnyug ma'i srog__/yengs med ngang du gzer thebs pas/__/'bras bu ye shes chen por smin/__/phyi snod 'od lnga yum lnga'i mkhar/__/nang bcud pad+ma he ru kaH__sgrar grags hU~M gi snang glu yis/__/brtan g.yo'i zhen pa phra sar bcad/__/de tshe gzung 'dzin bdud dgra'i sder/__/spang gnyen bral ba'i rgyas btab pas/__/rang snang don gyi 'og min du/__/dag pa rab 'byams gcig tu shar/__/a ho gsal 'debs nyams kyi glu/__/'on phu stag tshang gsang phug tu/__/tshogs kyi 'du ba bgyis pa'i tshe/__/rnal 'byor pad+ma dgyes pas blangs/__/dge bas snang zhen lha skur dag__/'byung 'jug rlung khams sngags su rdzogs/__/gzung 'dzin chos skur smin pa yi/__/he ru kaHdpal mngon gyur shog__/__!_