ལམ་ཉེ་རིང་དང་སྤྲུལ་པ་འབྱུང་སྔ་ཕྱིའི་ཁྱད་པ།

🚧 This website is under continued development. We appreciate your patience!

Previous Text Back to Volume Page Next Text

Wylie title	lam nye ring dang sprul pa 'byung snga phyi'i khyad pa
Location	'phags mchog bka' 'bum Volume 2, Text 26, Pages 535-537 (Folios 1a1 to 2a3)
Author	འཕགས་མཆོག་རྡོ་རྗེ་
Less details More details
Citation	'phags mchog rdo rje. Lam nye ring dang sprul pa 'byung snga phyi'i khyad pa. In Mtshungs med grub sras 'phags mchog rdo rje mchog gi gsung 'bum rin po che , Vol. 2: 535-537. Kathmandu: Khenpo Shedup Tenzin & Lama Thinley Namgyal, 2004.
Genre	Discourses - gtam

[edit]

༄༅། །ལམ་ཉེ་རིང་དང་སྤྲུལ་པ་འབྱུང་སྔ་ཕྱིའི་ཁྱད་པར་ནི། ཉན་ཐོས་པས་བསྐལ་པ་གྲངས་མེད་གསུམ་དུ་ཆོས་བྱས་ནས་སངས་རྒྱས་ཐོབ་པར་འདོད། རང་རྒྱལ་གྱིས་བསྐལ་པ་བརྒྱར། སེམས་ཙམ་བསྐལ་པ་དྲུག་ཅུ། དབུ་མས་བསྐལ་པ་གསུམ། ཀྲི་ཡས་མི་ཚེ་བདུན། ཨུ་པས་མི་ཚེ་དྲུག །ཡོ་གས་མི་ཚེ་ལྔ་ནས་སངས་རྒྱས་ཐོབ་པར་བཞེད་དོ། །དེ་ལྟར་ཐེག་པ་འོག་མ་བདུན་པོས་རྒྱུ་ཡི་ཆོས་ལ་སྤྱོད་པས། སངས་རྒྱས་སྨོན་པ་ལས། ཚེ་འདིར་མི་ཐོབ་སྟེ། ཕྱོགས་རིས་དང་བཟང་ངན་གཉིས་འཛིན་གྱི་ཆོས་ལས་མ་འདས་པའི་ཕྱིར་རོ། །མ་ཧཱ་ཡོ་གས་ནི་ཟླ་བ་བདུན་ནས་སངས་རྒྱས་ཐོབ། ཨ་ནུ་ཡོ་གས་ཟླ་བ་དྲུག་ནས་སངས་རྒྱས་ཐོབ། སྣང་སྟོང་དབྱེར་མེད་ཕྱག་རྒྱ་ཆེན་པོས་ཟླ་བ་གསུམ། བྱ་བྲལ་རྩོལ་མེད་རྫོགས་པ་ཆེན་པོས་ནང་རྟོགས་ན་ནངས་སངས་རྒྱས། ནུབ་རྟོགས་ན་ནུབ་སངས་རྒྱས། སྐལ་ལྡན་ལས་འཕྲོ་ཅན་མ་བསྒོམས་ཀྱང་སངས་རྒྱས་པར་འགྱུར། སངས་རྒྱས་པའི་དུས་ན་བཟང་ངན་མེད་ཀྱང་། འགྲོ་དོན་འབྱུང་མི་འབྱུང་གི་ཁྱད་པར་ཡོད་པར་གསུངས་ཏེ། ཉན་རང་གི་སྟོན་པ་གཅིག་པུའི་སངས་རྒྱས་བྱ་བ་སྤྲུལ་པ་འགྱེད་མི་ནུས། སེམས་ཙམ་དང་དབུ་མ་ནི་སངས་རྒྱས་གཉིས་འཕེལ་བྱ་བ་སྤྲུལ་པ་རེ་རེ་ཙམ་འགྱེད་ནུས། ཀྲི་ཡོག་སྡེ་གསུམ་ནི་སངས་རྒྱས་གདུང་འཕེལ་བྱ་བ་སྐུ་གསུང་ཐུགས་ཀྱི་སྤྲུལ་པ་གསུམ་འགྱེད་ནུས། མ་ཧཱ་ཨོ་ག་དང་ཨ་ནུ་ཡོ་ག་གཉིས་པོ་ནི་སངས་རྒྱས་སྐུ་ལྔའི་བདག་ཉིད་བྱ་བ་སྐུ་གསུང་ཐུགས་ཡོན་ཏན་ཕྲིན་ལས་ལྔའི་སྤྲུལ་པ་རྒྱུན་མི་ཆད་པར་འགྱེད་ནུས། བྱ་བྲལ་རྩོལ་མེད་ཨ་ཏི་ཡོ་ག་རྫོགས་པ་ཆེན་པོས། ཇི་ལྟ་ཇི་སྙེད་མཁྱེན་པའི་སངས་རྒྱས་བྱ་བ་དེས་ཆོས་སྐུ་ལ་ལོངས་སྤྱོད་རྫོགས་པའི་སྐུ་འབྱུང་། དེ་ལས་སྤྲུལ་སྐུ་བྱེ་བ་ཕྲག་བརྒྱར་འགྱེད་ནུས་ཤིང་། དེའང་ཨ་ཏི་རྫོགས་པ་ཆེན་པོ་སེམས་སྡེ་སྐོར་ཏེ། མི་ལོ་ལྔ་བཅུ་ནས་སྤྲུལ་པ་ཐོགས་མེད་འགྱེད་ནུས། ལྷུན་གྱིས་གྲུབ་པའི་སངས་རྒྱས་བྱ་བ་ཀློང་སྡེའི་སྐོར་ཡིན་པས། མི་ལོ་བདུན་ནས་སྤྲུལ་པ་འགྱེད་ནུས། རང་བྱུང་ཆེན་པོ་བྱ་བ་རྫོགས་པ་ཆེན་པོ་མན་ངག་གི་སྡེ་ཡིན་པས། མི་ལོ་ལྔ་ནས་སྤྲུལ་པ་འབྱུང་། ཆོས་ཉིད་མངོན་སུམ་བྱ་བ་རྫོགས་པ་ཆེན་པོ་ཡང་གསང་བླ་ན་པའི་སྐོར་ཡིན་པས། ལུས་བོར་མ་ཐག་སངས་རྒྱས། དེ་མ་ཐག་སྤྲུལ་པ་རྒྱུན་མི་ཆད་པར་འབྱུང་ངོ་།། །།