ཕྲིན་བཅོལ་སྲིད་ཞིའི་ཡིད་ནོར།

🚧 This website is under continued development. We appreciate your patience!

Previous Text Back to Volume Page Next Text

Wylie title	phrin bcol srid zhi'i yid nor
Location	'phags mchog bka' 'bum Volume 2, Text 23, Pages 525-528 (Folios 1a1 to 2b1)
Author	འཕགས་མཆོག་རྡོ་རྗེ་
Less details More details
Citation	'phags mchog rdo rje. Phrin bcol srid zhi'i yid nor. In Mtshungs med grub sras 'phags mchog rdo rje mchog gi gsung 'bum rin po che , Vol. 2: 525-528. Kathmandu: Khenpo Shedup Tenzin & Lama Thinley Namgyal, 2004.
Genre	Exhortations to Act - phrin bcol
Colophon	རིགས་རུས་སྤངས་རྟོགས་རྩེར་སོན་བཀས། །བསྐུལ་ངོར་གྱི་ནས་འོན་རོལ་དཀྲོལ།། ཛ་ཡནྟུ།།
Colophon	rigs rus spangs rtogs rtser son bkas/_/bskul ngor gyi nas 'on rol dkrol//_dza yan+tu//

[edit]

༄༅། །ཕྲིན་བཅོལ་སྲིད་ཞིའི་ཡིད་ནོར་དགེ། རྒྱལ་བསྟན་སྙིང་པོར་སུས་ཀྱང་མ་བཅོལ་བར། །སྲུང་དང་སྤེལ་བའི་ཕྲིན་ལས་གཡར་དམ་ཅན། །ཀུན་ཏུ་བཟང་མོ་ཡུམ་མཆོག་ཨེ་ཀ་ཛཱ། །ཡེ་ཤེས་མགོན་སོགས་དམ་ཅན་རྒྱ་མཚོ་དགོངས། །ཆོས་ཉིད་དོན་ལ་རིག་པའི་རང་རྩལ་ངེས། །ཕྲིན་ལས་བཅོལ་བྱ་བཅོལ་བྱེད་ལས་འདས་ཀྱང་། །ཀུན་རྫོབ་སྒྱུ་མའི་ཆོ་འཕྲུལ་ཙམ་བདེན་པས། །དེང་འདིར་ཇི་ལྟར་བཅོལ་བཞིན་མངོན་གྱུར་འཚལ། །སྤྱི་རུ་རྒྱལ་བའི་བསྟན་པ་རིན་པོ་ཆེ། །ལུང་རྟོགས་མཛོད་འཛིན་རིས་མེད་ཞབས་པད་བརྟན། །ཐེག་གསུམ་དགེ་འདུས་བསླབ་གསུམ་གྱིས་ཕྱུག་སྟེ། །མཆོག་གསུམ་དབུ་འཕང་དགུང་དང་མཉམ་པར་མཛོད། །བསྟན་པའི་དགྲ་བོ་སེམས་ཅན་ཡོངས་ལ་གནོད། །མཐའ་མི་དབུས་སུ་བརྟོལ་བའི་སྣ་འདྲེན་མཁན། །སྙིགས་དུས་བསམ་སྦྱོར་ངན་དང་འབྲས་བུ་བཅས། །སྨོན་ལམ་ལོག་པའི་བདུད་དགྲ་མེད་པར་མཛོད། །འཇིག་རྟེན་ཁམས་སུ་ཆར་ཆུ་དུས་སུ་འབེབས། །ལོ་ཕྱུགས་རྟག་ལེགས་ནད་ཡམས་འཁྲུགས་རྩོད་ཞི། །སད་སེར་བཙའ་ཐན་དབུལ་ཕོངས་མུ་གེ་བྲལ། བདེ་སྐྱིད་རྒྱུ་འབྲས་དཔལ་ལ་སྤྱོད་པར་ཤོག །བྱེ་བྲག་བདག་ཅག་བྱང་ཆུབ་སྒྲུབ་པའི་ཚེ། །དགྲ་ཇག་ཆོམ་རྐུན་མེ་ཆུ་གཅན་འཕྲང་གཡང་། །ངན་སྨྲས་ཤག་འདེབས་མི་ཁ་དགྲ་མཆུ་ཟུག །ནད་གདོན་བར་དུ་གཅོད་རྣམས་ཞི་བར་མཛོད། །ཚེ་འདིར་ཚེ་རིང་བསམ་དོན་ཆོས་བཞིན་འགྲུབ། །ཕྱི་ནང་གསང་བའི་འགལ་རྐྱེན་བར་ཆད་བྲལ། །འབད་མེད་ངང་དུ་མཐུན་རྐྱེན་མ་ཚང་མེད། །ཚེ་དང་སྒྲུབ་པ་མཉམ་པའི་ཕྲིན་ལས་མཛོད། །དབེན་པའི་གནས་སུ་སོས་དལ་ལེ་ལོས་གཡེང་། །ཆོ་བརྒྱད་མགོ་མཐོ་བསྒྲུབ་བྱ་ཚེ་འདིར་གོལ། །བླུན་པོའི་གླེན་སྒོམ་རྟོག་གེའི་བློ་བཅོས་སོགས། །སྒྲུབ་པའི་གཟུགས་བརྙན་ཐབས་ཀྱིས་གྲོལ་བར་མཛོད། །ཁྱད་པར་ཟབ་གསང་སྙིང་པོའི་གསེང་ལམ་ནས། །འབྲས་བུ་སངས་རྒྱས་ཕྱི་དུས་མི་རེ་བར། །ཀ་དག་ལྷུན་གྲུབ་ལམ་སྣང་མཐར་ཕྱིན་ཏེ། །ཆོས་ཟད་གདོད་མའི་མཁའ་ཀློང་སྐྱོལ་བར་མཛོད། །སྣང་བའི་ཆོས་རྣམས་ཁྱོད་སྐུས་མ་ཁྱབ་མེད། །སྟོང་པའི་ཆོས་རྣམས་ཁྱོད་ཐུགས་གཅིག་ཏུ་འདྲེས། །སྣང་སྟོང་ཟུང་འཇུག་ཁྱོད་མཉེས་རྟེན་རྫས་འབུལ། །ཁམས་གསུམ་ཡོངས་སྦྱོར་བདེ་ཆེན་འགྲུབ་པར་མཛོད། །བདེ་ཆེན་ངང་ནས་རང་རིག་ཧེ་རུ་ཀས། །ཁམས་གསུམ་ས་དགུ་སྐུ་གསུམ་ཀློང་དུ་སྒྲོལ། །སྲིད་གསུམ་ཞིང་བསྒྱུར་འཁོར་འདས་དག་མཉམ་ཀློང་། །འཁོར་བ་དོང་སྤྲུགས་གཞན་དོན་ལྷུན་གྲུབ་མཛོད། །གལ་ཏེ་ཚེ་འདིར་དོན་གཉིས་དབུལ་བ་ན། །ཚེ་རབས་དམ་ཅན་ཁྱེད་འབྲེལ་ཡུལ་དབུས་སྐྱེས། །ཐེག་ཆེན་ཆོས་འཕྲད་གསང་ཆེན་རིགས་མཆོག་སད། །རིགས་བདག་བླ་མས་དགྱེས་བཞིན་རྗེས་བཟུང་མཛོད། །མདོར་ན་འཁྲུལ་སྣང་བདེན་པར་བཟུང་བའི་སྐྱོན། །འཕྲལ་ཡུན་སྤང་བྱ་འགལ་རྐྱེན་བར་ཆད་ཞི། །བླང་བྱ་འཁོར་འདས་ལེགས་ཚོགས་འདུ་ཞིང་རྒྱས། །སྲིད་ཞིའི་དགེ་ལེགས་རྒྱས་པའི་བཀྲ་ཤིས་སྩོལ། །རིགས་རུས་སྤངས་རྟོགས་རྩེར་སོན་བཀས། །བསྐུལ་ངོར་གྱི་ནས་འོན་རོལ་དཀྲོལ།། ཛ་ཡནྟུ།། །།