གཟའ་བདུད་ཡེ་ཤེས་སྒྲུབ་ཐབས་དོན་གཉིས་ལྷུན་གྲུབཿ

🚧 This website is under continued development. We appreciate your patience!

Previous Text Back to Volume Page Next Text

Wylie title	gza' bdud ye shes sgrub thabs don gnyis lhun grub
Location	mdo mkhyen brtse bka' 'bum Volume 7, Text 42, Pages (Folios to )
Author	མདོ་མཁྱེན་བརྩེ་
Less details More details
Tertön	མདོ་མཁྱེན་བརྩེ་ (Mdo mkhyen brtse)
Citation
Genre	Protector Rituals - gsol mchod · Sadhanas - Evocation Ritual - sgrub thabs

[edit]

འུྃཿ གཟའ་བདུད་ཡེ་ཤེས་སྒྲུབ་ཐབས་དོན་གཉིས་ལྷུན་གྲུབ་ཅེས་བྱ་བ་བཞུགསཿ

«འུྃཿ བདུད་འདུལ་དཔའ་བོའི་སྐུ་ལ་འདུདཿ གཟའ་བདུད་ཡེ་ཤེས་ལྷའི་སྒྲུབ་ཐབསཿ དངུལ་དཀར་མེ་ལོང་རིན་ཆེན་ལྔཿ སྨྱུག་རྒོད་མདའ་ལ་དངུལ་གྱི་མདིལཿ བྱ་རྒོད་སྒྲོ་ཡིས་མཛེས་པར་བྱསཿ རྨ་བྱའི་སྒྲོ་དང་གཟའི་བྲིས་སྐུཿ བདེ་གཤེགས་རིང་བསྲེལ་བཅས་སྒྲུབ་རྟེནཿ རྟེན་གཏོར་ཟླུམ་པོ་བང་རིམ་བཞིའོཿ སྟེང་དུ་ཡིད་བཞིན་ནོར་བུའི་གཟུགསཿ མདུན་དུ་འབུལ་གཏོར་གཡས་གཅུས་ཅནཿ སྨན་རག་དང་ནི་མཐའ་སྐོར་དུཿ མཆོད་པ་རྣམ་ལྔ་བཤམས་བྱས་ལཿ བདེ་བའི་གདན་ལ་སྐྱིལ་ཀྲུང་བྱཿ སྐྱབས་སེམས་ཡན་ལག་བཅུ་པ་ནིཿ »ཧོཿ རྡོ་རྗེ་སློབ་དཔོན་«སོགས་ནས་»ཆེན་པོར་བསྔོ། «།འབྱུང་པོའི་གཏོར་མ་བྱིན་གྱིས་བརླབསཿ »ཧཱུྃཿ ཉོན་ཅིག་ལན་ཆགས་འབྱུང་པོའི་ཚོགསཿ འདི་རུ་འདུག་པའི་གནས་མེད་ཀྱིསཿ འདོད་ཡོན་གཏོར་མ་འདི་ལོངས་ལཿ རང་རང་སོ་སོའི་གནས་སུ་དེངསཿ གལ་ཏེ་འདུག་ན་བརླག་པར་འགྱུརཿ «ཧཱུྃ་བཞིའི་སྔགས་བརྗོད་ཡུངས་ཀར་བྲབཿ གུ་གུལ་བདུག་ཅིང་མཚམས་བཅད་ནིཿ »ཧཱུྃཿ ཕྱོགས་མཚམས་སྟེང་འོག་ཐམས་ཅད་ཀུནཿ སྟོང་ཉིད་རྡོ་རྗེའི་གུར་དུ་གྱུརཿ ཅིས་ཀྱང་མི་ཆོད་མི་ཤིགས་ཤིངཿ དངོས་འཛིན་མཚན་མ་བྲལ་བར་གྱུརཿ བཛྲ་རཀྵ་རཀྵ་ཧཱུྃཿ «དེ་ནས་བྱིན་འབེབས་བྱ་བ་ནིཿ »ཧཱུྃ་ཀུན་ཏུ་བཟང་པོ་ལ་སོགས་པའིཿ རྩ་བརྒྱུད་བླ་མ་དམ་པ་དངཿ རྡོ་རྗེ་འཛིན་སོགས་ཡི་དམ་ལྷཿ མ་སྲིང་མཁའ་འགྲོ་རྒྱ་མཚོའི་ཚོགསཿ ཆོས་ཀྱི་དབྱིངས་ནས་བྱིན་ཕོབ་ལཿ མཚན་བཅས་རྫས་ཀྱི་དཀྱིལ་འཁོར་དངཿ མཚན་མེད་འོད་གསལ་དེ་བཞིན་ཉིདཿ ཆོས་ཀྱི་དབྱིངས་སུ་བྱིན་ཕོབ་ཅིགཿ ཛྙཱ་ན་བཛྲ་ཨ་བེ་ཤ་ཡ་ཕཻཾ་ཿ «དེ་ནས་མཆོད་པ་བྱིན་རླབས་ནིཿ »ཧཱུྃཿ མ་དག་སྣང་བའི་སྣོད་བཅུད་ཀུནཿ དག་པ་ཡེ་ཤེས་ཆེན་པོར་བརླབསཿ གཟུགས་སྒྲ་དྲི་རོ་རེག་བྱའི་ཚོགསཿ དབང་ལྔའི་སྤྱོད་ཡུལ་མི་ཟད་པཿ ནམ་མཁའ་མཛོད་ཀྱི་འཁོར་ལོར་གྱུརཿ སྨ་གཏོར་རཀྟ་ཟག་མེད་རྫསཿ ངོ་བོ་ཡེ་ཤེས་བདུད་རྩི་ལཿ རྣམ་པ་མཆོད་པའི་བྱེ་བྲག་ཚོགསཿ དཔག་ཡས་ནམ་མཁའ་གང་བར་གྱུར ཨརྒྷཾ་«སོགས་ནས་ »ཤབྟ་ རཱུ་པ་ ཤཔྟ་ གྷནྡྷེ་ རཱ་ས་ སྤརྴེ་ཨཱཿཧཱུྃཿ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཨཱཿཧཱུྃཿ མ་ཧཱ་བཱ་ལིཾ་ཏ་ཨ་ཧཱུྃཿ མ་ཧཱ་རཀྟ་ཨ་ཧཱུྃཿ «དེ་ནས་བསྐྱེད་པའི་རིམ་པ་ནིཿ »ཨོཾ་མ་ཧཱ་ཤཱུནྱ་ཏ་ཛྙཱ་ན་བཛྲ་སྭབྷཱ་ཝ་ཨཱཏྨ་ཀོ྅ཧཾཿ སྟོང་པའི་ངང་ལས་འོག་མིན་ལྕང་ལོ་ཅན་གྱི་གནས་མཆོག་དུར་ཁྲོད་རོལ་པའི་གཞལ་ཡས་ཁང་འཇིགས་སུ་རུང་བའི་དབུས་སུ་ཆོས་འབྱུང་དམར་ནག་རཀྟའི་རྒྱ་མཚོ་ཆེན་པོའི་དབུས་སུ་རང་ཉིད་སྐད་ཅིག་གིས་ཧྲཱིཿལས་ཡེ་ཤེས་ཀྱི་གཟའ་མཆོག་ཆེན་པོ་སྐུ་མདོག་དཀར་གསལ་དབུ་དགུ་ཞལ་རེ་རེ་ལ་སྤྱན་གསུམ་གསུམ་དང་ལྡན་པཿ གཡས་ཞལ་གསུམ་བཞད་པཿ གཡོན་ཞལ་གསུམ་ཁྲོ་བཿ དབུས་ཞལ་གསུམ་འཇིགས་སུ་རུང་པཿ སྟེང་ན་བྱ་རོགགི་གདོང་པ་དམར་པོ་དང་ལྡན་པ་ཕྱག་བཞི་དང་པོ་གཉིས་ཆུ་སྲིན་གྱི་རྒྱལ་མཚན་དང་སྦྲུལ་ཞགསཿ འོག་མ་གཉིས་མདའ་གཞུ་འགེངས་པཿ སྐུ་ལུས་ཐམས་ཅད་མིག་གིས་གང་ཞིང་ལྟོ་ཞལ་འཇིགས་སུ་རུང་པ་སྐུ་སྨད་སྦྲུལ་མཇུག་ལྗང་གུ་འཁྱིལ་བའི་འོག་ཏུ་ལྷ་མ་སྲིན་སྡེ་བརྒྱད་ཐམས་ཅད་དབང་དུ་འདུ་བཿ འཁོར་དུ་རཱ་ཧུ་ལ་སོགས་གཟའ་ཆེན་བརྒྱད་ཀྱིས་བསྐོར་བཿ དེ་ལྟར་གསལ་བའི་གནས་གསུམ་ལས་འོད་ཟེར་འཕྲོས་པས་ལྷོ་ནུབ་ལང་ཀ་པུ་རིའི་གནས་ནས་རང་འདྲའི་ཡེ་ཤེས་པའི་ཚོགས་སྤྱན་དྲངས་པར་གྱུརཿ «གུ་གུལ་བདུག་ཅིང་སྤྱན་འདྲེན་ནིཿ »ཧཱུྃཿ དད་པ་དང་ནི་དམ་ཚིག་གིསཿ ཚུར་སྤྱོན་ཚུར་སྤྱོན་ཡེ་ཤེས་ལྷཿ དྲང་སྲོང་ཆེན་པོ་འཁོར་དང་བཅསཿ གནས་འདིར་སྤྱན་འདྲེན་གཤེགས་སུ་གསོལཿ བཛྲ་ས་མ་ཡ་ཛ་ཛཿ «གཉིས་མེད་བཞུགས་སུ་གསོལ་བ་ནིཿ »ཧཱུྃཿ དམ་ཚིག་ཡེ་ཤེས་དབྱེར་མེད་ཀྱངཿ གློ་བུར་འཛིན་པ་དག་པའི་ཕྱིརཿ ལྷར་སྣང་ཡེ་ཤེས་ཆེན་པོ་རུཿ གཉིས་མེད་དགྱེས་པར་བཞུགས་སུ་གསོལཿ ས་མ་ཡ་ཏིཥྛ་ལྷནཿ «དེ་ནས་ཕྱག་འཚལ་བཤགས་པ་ནིཿ »ཧཱུཾཿ རང་ལས་སྤྲུལ་པའི་ལྷག་པའི་ལྷརཿ རང་བྱུང་རང་ཤར་ཕྱག་འཚལ་ལོཿ ཁྱོད་ཀྱི་ཐུགས་དང་འགལ་བ་གངཿ འགྱོད་ཚངས་ཆེན་པོས་མཐོལ་ཞིང་བཤགསཿ ཨ་ཏི་པུ་ཧོཿ པྲ་ཏི་ཙ་ཧོཿ ར་ཧུ་ལ་ས་ཏྭ་ས་མ་ཡ་«སོགས་ དེ་ནས་ཕྱི་མཆོད་འབུལ་བ་ནིཿ »ཧཱུྃཿ དྲང་སྲོང་ཆེན་པོ་འཁོར་བཅས་ལཿ མཆོད་ཡོན་ཞབས་བསིལ་མེ་ཏོག་དངཿ མར་མེ་དྲི་ཆབ་ཞལ་ཟས་རོལཿ གཞན་ཡང་གཟུགས་སྒྲ་དྲི་རོ་རེགཿ དངོས་འབྱོར་ཡིད་སྤྲུལ་མཆོད་པའི་ཚོགསཿ དགྱེས་པ་ཆེན་པོ་བསྐྱེད་ཕྱིར་བཞེསཿ ཨོཾ་བཛྲ་ཨརྒྷཾ་«སོགས་ »ཤབྟ་ རཱུ་པ་ ཤབྟ་ གྷནྡྷེ་རཱས་སྤརྴེ་སརྦ་པཱུ་ཙ་ཨཱཿཧཱུྃཿ «སྨན་རག་གཏོར་གསུམ་འབུལ་པ་ནིཿ »ཧཱུྃཿ འདོད་ཡོན་རྒྱན་གྱི་གཏོར་མ་དངཿ བདུད་རྩི་སྨན་གྱི་མཆོད་པ་དངཿ རཀྟ་དམར་གྱི་ཨརྒྷཾ་དཿ རང་བྱུང་མཆོད་པ་རྒྱ་མཚོ་བཞེསཿ སརྦ་པཉྩ་རཀྟ་བཱ་ལིཾ་ཏ་ཁཱ་ཧིཿ «དེ་ནས་བསྟོད་པ་བྱ་བ་ནིཿ »ཧཱུྃཿ འཇིག་རྟེན་ལས་འདས་ཡེ་ཤེས་ཚུལ་འཆང་ཞིངཿ གདུག་པ་འདུལ་ཕྱིར་ཁྲོས་པའི་སྐུར་སྟོན་པཿ ལྷ་ཡི་ལྷ་མཆོག་དྲང་སྲོང་ཆེན་པོ་ལཿ བདག་གིས་སྒོ་གསུམ་གུས་པས་བསྟོད་པར་བགྱིསཿ «བཟླས་དམིགས་བྱ་བ་ནིཿ »རང་ཉིད་ཡེ་ཤེས་ལྷར་གསལ་བའི་ཐུགས་ཀར་ཕྱག་ན་རྡོ་རྗེ་ཚོན་གང་བཿ དེའི་ཐུགས་ཀར་ཧཱུྃ་གི་མཐའ་བསྐོར་དུ་རྩ་བའི་སྔགས་ཀྱིས་གཡས་སུ་འཁོར་བ་ལས་འོད་ཟེར་འཕྲོསཿ ཕྱོགས་བཅུའི་རྒྱལ་བ་སྲས་དང་བཅས་པ་མཆོདཿ ཐུགས་རྗེ་བྱིན་རླབས་ཚུར་བསྡུས་ཧཱུྃ་ལ་ཐིམ་པས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་དབང་མཆོག་ཐོབ་ཅིང་མཐུ་སྟོབས་ཀྱི་བདག་པོར་གྱུརཿ ཧཱུྃ་བཛྲ་ཙཎྜ་རཱ་ཧུ་ལ་སརྦ་སིདྡྷི་ཧཱུྃཿ རང་ཉིད་ཡེ་ཤེས་གཟའ་མཆོག་གིཿ ཙིཏྟ་སྙིང་གི་གུར་ཁང་དབུསཿ གསང་བདག་ཐུགས་ཀའི་ཧཱུྃ་མཐིང་ལསཿ འོད་ཟེར་འཕྲོས་པས་རྩ་གསུམ་བསྐུལཿ བྱིན་ནུས་བསྡུས་ཤིང་སྣང་སྲིད་ཀྱིཿ མཐུ་སྟོབས་བདག་པོའི་ཚོགས་ཀུན་དངཿ རཱ་ཧུ་ལ་ཡི་སྲོག་སྙིང་དངཿ གཟི་བརྗིད་ནུས་མཐུ་ཀུན་བསྡུས་ནསཿ ཐུགས་སྲོག་ཡི་གེར་ཐིམ་པར་དམིགསཿ ཧཱུྃ་བཛྲ་ཙཎྜ་རཱ་ཧུ་ལ་ཙིཏྟ་ཧྲིང་ཧྲིང་ཛ་ཛཿ ཝ་ཤཾ་ཀུ་རུ་ཧཱུྃཿ «ཆོས་ཉིད་ལྟ་བའི་ངང་ནས་བཟླཿ སྒྲུབ་པའོཿ »སླར་ཡང་འོད་ཟེར་གློག་ཞགས་ལྟརཿ ཚ་ལ་མྱུར་བ་འཕྲོས་པ་ཡིསཿ ལྷ་སྲིན་སྡེ་བརྒྱད་འབྱུང་པོའི་ཚོགསཿ བཀྲག་མདངས་གཟི་བརྗིད་སྲོག་སྙིང་བཅསཿ བསྡུས་ནས་རང་བསྟིམ་སླར་ཡང་འཕྲོསཿ གནོད་བྱེད་མི་དང་མི་མིན་ཀུནཿ སྨྱོ་ཞིང་ཚེ་བསོད་རང་ལ་བསྟིམཿ སྡུག་བསྔལ་ཉམས་སུ་མྱོང་གྱུར་ནསཿ རྗེས་ཤུལ་མེད་པར་བརླག་པར་གྱུརཿ ཧཱུྃ་བཛྲ་ཙཎྜ་རཱ་ཧུ་ལ་ཨ་ཡ་མ་དུ་རུ་ཙ་ཤ་ན་བསྡུས་བསྡུས་ཆྒཻ་མཱ་ར་ཡ་རྦད་རྦདཿ« ལས་སྦྱོར་རོཿ ཤིན་ཏུ་གསང་བའི་མན་ངག་སྟེཿ སྔོན་ཆད་གུད་དུ་སྦས་པའི་ཆོསཿ བསྙེན་པ་འབུམ་གསུམ་སྒྲུབ་པ་གཉིསཿ ལས་སྦྱོར་ཁྲི་རུ་བཟླས་པ་ནཿ དོན་ཀུན་འགྲུབ་པར་ཐེ་ཚོམ་མེདཿ ཐུན་མཐར་མཆོད་བསྟོད་ནོངས་བཤགས་དངཿ བཀྲ་ཤིས་བསྔོ་སྨོན་རྒྱས་འདེབས་སོཿ འདི་ཉིད་ངག་བཅད་ཁོ་ནས་བཟླཿ ཤུགས་རིང་འདོན་སྤངས་འོག་རླུང་བསྡམཿ ལྷ་བ་རྟོག་པའི་རྣལ་འབྱོར་པསཿ གོང་ནོན་གྱུར་ན་ཅི་ཡང་རུངཿ ཕག་པའི་ཤ་དང་སྒོག་ཙོང་ལྕིམཿ འདི་ཡི་དུག་ཏུ་ཤེས་པར་བྱཿ གསང་བའི་གདམས་ངག་ཉམས་ལེན་གནདཿ ཆོས་ཀྱི་བདག་མོའི་སྙིང་ནོར་མཛོདཿ ས་མ་ཡཱཿ རྣལ་འབྱོར་པ་ལ་དགྲ་བྱུང་ནཿ ལས་མཐའ་དྲག་པོའི་གཏད་པ་ནིཿ ར་རླིད་ནང་དུ་ལིངྒ་ནིཿ དགྲ་བོའི་གྲངས་སམ་ལོ་གྲངས་མཚུངསཿ ཡང་ན་ཉེར་གཅིག་བྲིས་པ་ཡིསཿ སྙིང་གར་ནྲྀཿཡིག་ས་བོན་ལཿ མིང་མཐར་མྱོས་པར་གྱུར་ཅིག་དངཿ དྲག་པོས་བསད་པའི་ལས་བྱེད་ནཿ མིང་མཐར་སྲོག་ལ་མ་ར་ཡ་སོད་སོད་བྲིང་བྲིང་ཨེ་ཧུར་ཐུཾ་རྦདཿ ཞེས་བྲིས་ཐ་མར་སྔགས་འདིས་བསྐོརཿ རཱ་ཧུ་ལ་ནྲྀ་འུར་འུར་དགྲ་བོའི་ལུས་ལ་མེ་སྦོརཿ ལས་གཟའ་དྲག་པོ་རྒྱུག་རྒྱུག་བྲིང་བྲིངཿ དགྲ་བོ་ཆེ་གེ་མོའི་སྙིང་ལ་ཤད་ཤདཿ ཡིད་ཀྱི་དྲན་པ་མྱོས་པར་གྱིས་ཤིགཿ ཞེས་པའམ་ནི་བསད་པ་ནཿ སྙིང་ཁྲག་འཇིབ་འཇིབ་ཚེ་བཅུད་བསྡུས་བསྡུསཿ སྲོག་ལ་ཧུར་ཐུཾ་མཱ་ར་ཡ་རྦད་རྦདཿ ཅེས་བྲི་མྱོས་བྱེད་དྷ་ངྟུ་རཿ གསད་ན་བཙན་དུག་ར་ཁྲག་བྱུགཿ ཟག་རྫས་བྱུང་ན་ལྷན་ཅིག་བྱཿ དྲག་པོའི་གཏོར་མའི་འོག་ཏུ་འགོདཿ ལས་སྦྱོར་རྣོ་སོ་འདི་ལྟར་གདགསཿ» བཛྲ་ཙནྟྲ་ཀེ་ཏ་ཀེ་ཏ་རཱ་ཧུ་ལ་ཨ་ཡ་མ་དུ་རུ་ཙ་ཤ་ན་ལས་ལ་འདུས་འདུས་ཨ་ཀྲོ་ཐར་ལིང་དགྲ་བོ་ཆྒཻ་མོའི་ལུས་ལ་མེ་སྤོརཿ ཤ་ལ་ཡཾ་ཡཾཿ ཁྲག་ལ་རྔུབ་རྔུབཿ སྲོག་དབུགས་བསྡུས་བསྡུསཿ བླ་རྟེན་ཚེ་རྟེན་སྲོག་རྟེན་དང་ཕྲོལ་ཅིགཿ ཧུར་ཐུཾ་མཱ་ར་ཡ་རྦད་སོདཿ «རྒྱུ་དུས་དག་དང་བསྟུན་བྱས་ལཿ བཟླས་པས་རླིང་བུ་སྤོས་པའམཿ གས་དང་སྒྲ་འབྱིན་ལ་སོགས་པཿ རྟགས་བྱུང་དུས་སུ་གློ་བུར་གྱིསཿ གཟའ་འགྱེད་དུག་མདའ་ནག་པོ་བྱཿ ལས་མཐར་བསྲེག་པ་དྲག་པོར་གཏདཿ སྨྱོ་འབོགས་གཏོང་དང་སྲོག་ལས་བྱཿ སྐབས་དང་བསྟུན་ཅིང་ལྡེ་ཁ་བསྒྱུརཿ མི་རྒྱུད་རྩད་ནས་གཅོད་འདོད་ནཿ ར་རུའི་ནང་དུ་ལིང་ག་གཞུགཿ དུག་སྣ་གསུམ་དང་ཁྲག་སྣ་གསུམཿ མི་རྟ་ཁྱི་ཡི་ཤ་དང་བཅསཿ ཆུ་མིག་གམ་ནི་བྲག་དམར་ལཿ གཏད་ན་ཕུང་བར་ཐེ་ཚོམ་མེདཿ དྲག་སྔགས་གཟའ་གདོང་དམར་པོ་ཡིཿ རྒྱུད་ཆེན་ཁྲག་མཚོ་ཁོལ་མ་ལསཿ སྙིང་པོ་བཅུད་དུ་བསྡུས་པའོཿ བརྟུལ་ཞུགས་ཨ་ཙར་དམར་པོ་སྟེཿ ལྷ་ལྕམ་ཡེ་ཤེས་ཌཱཀྐི་མའིཿ བསྟན་དགྲ་བསྒྲལ་བའི་མཚོན་ཆ་རྣོཿ རྣོ་མྱུར་ལག་ཏུ་ལོང་དང་ཤེསཿ ཤིན་ཏུ་གསང་བའི་མན་ངག་སྟེཿ སྣོད་མིན་ལག་ཏུ་ཤོར་ར་རེཿ གཟའ་དམར་ཐོག་རྒོད་འབར་བ་ཡིསཿ ཐུབ་པར་སྲུངསཤིག་དམ་ཚིག་རྒྱཿ ས་མ་ཡཿ ཁ་ཐཾཿ གུ་རྒྱཿ ཙིཏྟའི་རྒྱ་རྒྱ་རྒྱཿ གཉིས་པ་གཟའ་མཆོག་རྒྱུན་གསོལ་ནིཿ ཟངས་སྡེར་ནང་དུ་གཟའ་བཤོས་དངཿ གསེར་སྐྱེམས་བཤམས་ཤིང་སྤོས་དཀར་བདུགཿ »རཾ་ཡཾ་ཁཾཿ ཨོཾ་ཨཱཿཧཱུྃཿ གཏོར་མ་འདོད་པའི་ཡོན་ཏན་ལྔ་དང་ལྡན་བར་གྱུརཿ ཧཱུྃཿ སྔོན་ཚེ་གསང་བདག་སྤྱན་སྔ་རུཿ ཁས་བླངས་དམ་བཅས་མཐུ་བོ་ཆེཿ མི་སྲུན་གཟའ་བདུད་རཱ་ཧུ་ལཿ གནས་འདིར་སྤྱན་འདྲེན་གཤེགས་སུ་གསོལཿ བཛྲ་ས་མ་ཡ་ཛ་ཛཿ ཁྲག་ཞག་རྒྱ་མཚོ་ཆེན་པོའི་དབུསཿ དམ་ཚིག་ཡེ་ཤེས་དབྱེར་མེད་བཞུགསཿ གདུག་པའི་དགྲ་བགེགས་བསྒྲལ་བའི་ཕྱིརཿ ཕྱག་འཚལ་ཕྱི་ནང་མཆོད་པ་འབུལཿ ཧཱུྃཿ དམར་ཆེན་རྒྱན་གྱི་གཏོར་མ་དངཿ གསེར་སྐྱེམས་ཕུད་ཀྱི་མཆོད་པའི་ཚོགསཿ དྲི་ཞིམ་སྤོས་ཀྱི་དུད་པ་སོགསཿ གཞན་ཡང་དངོས་འབྱོར་ཡིད་སྤྲུལ་རྫསཿ གཟའ་བདུད་ཆེན་པོ་རཱ་ཧུ་ལཿ ཁྱོད་ལ་འབུལ་གྱིས་བཞེས་སུ་གསོལཿ སརྦ་པཉྩ་ཁཱ་ཧིཿ མ་ཧཱ་བ་ལིནྟ་ཁཱ་ཧིཿ རཱ་ཧུ་ལ་ཨེ་དཾ་བ་ལིནྟ་ཁཱ་ཧིཿ ཧཱུྃཿ སྐུ་མདོག་དམར་པོ་མི་སྲུན་འཇིགས་པའི་སྐུཿ དབུ་དགུ་ཕྱག་བཞི་དྲང་སྲོང་སྦྲུལ་མཇུག་ལྡནཿ རྣལ་འབྱོར་སྡང་བའི་དགྲ་བོ་ཟས་སུ་ཟཿ ལྟོ་ཞལ་འཇིགས་པས་དྲག་པོའི་སྐན་སྒྲ་རྡེབཿ ལས་བྱེད་ཕོ་ཉ་འགྱེད་ཅིང་བྱ་ར་མཛདཿ དྲང་སྲོང་ཆེན་པོའི་སྐུ་ལ་ཕྱག་འཚལ་བསྟོདཿ དམ་རྫས་བརྒྱན་པའི་གཏོར་མ་འདི་བཞེས་ལཿ མཆོད་ཅིང་བསྟོད་པའི་རིག་འཛིན་བདག་ཅག་ལཿ དོ་བསྔོ་ཕོད་བཙུགས་བསམ་ངན་སྦྱོར་རྩུབ་རིགསཿ མྱུར་དུ་སྒྲོལ་ལ་ལས་བཞིའི་ཕྲིན་ལས་ཀུནཿ ཐོགས་པ་མེད་པར་ལྷུན་གྱིས་གྲུབ་པར་མཛོདཿ «ཅེས་བརྗོད་གཏོར་མ་གཙང་སར་གཤེགསཿ གཟའ་འདུད་གཏོར་འབུལ་བསྟན་དགྲ་ཚར་གཅོད་འདིཿ ཁོ་བོ་རྫོགས་ཆེན་རྣལ་འབྱོར་སྙོམ་ལས་པཿ རིག་འཛིན་མཐུ་སྟོབས་བདུད་འདུལ་རྩལ་གྱིས་ཕབཿ ཉེས་འགལ་བྱུང་ན་ལྷ་ལ་བཟོད་པར་གསོལཿ བསྟན་དགྲ་གནོད་བྱེད་མ་ལུས་ཚར་གཅོད་ཤོགཿ རྒྱ་རྒྱ་རྒྱཿ

འུྃཿ གསང་བདག་དཔའ་བོའི་སྐུ་ལ་འདུདཿ ཡེ་ཤེས་ལྷ་ཡི་གཏོར་དབང་ནིཿ སྐྱབས་སེམས་ཡན་ལག་བདུན་སོང་རྗེསཿ གཏོར་མ་སློབ་བུའི་སྤྱི་བོར་བཞགཿ» ཧཱུྃཿ དམ་ཚིག་ལྡན་པའི་ཡེ་ཤེས་ལྷ་ཡི་ལྷཿ དངོས་གྲུབ་སྩོལ་མཛད་དྲོང་སྲོང་རཱ་ཧུ་ལཿ གསང་བདག་གདུག་པ་འདུལ་ཕྱིར་རབ་སྤྲུལ་པཿ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱིཿ དབང་དང་དངོས་གྲུབ་མ་ལུས་སྩལ་དུ་གསོལཿ སྟེང་གདོན་གཟའ་དང་རྒྱུ་སྐར་གནོད་པ་དངཿ བར་གདོན་བཙན་དང་མ་མོ་འོག་ས་ཀླུའིཿ གདོན་དང་གནོད་པ་དུག་དང་ཁ་རླངས་རིགསཿ ཀུན་ཀྱིས་མི་ཚུགས་རྡོ་རྗེའི་ལུས་སུ་གྱུརཿ «རྩ་སྔགས་ཤམ་དུཿ» ཀཱ་ཡ་ཝཱཀྐ་ཙིཏྟ་སརྦ་དུཥྟཾ་ཤཱནྟིཾ་ཀུ་རུ་སིདྡྷི་ཕ་ལ་ཧཱུྃཿ« ཞེས་བརྗོད་སློབ་དཔོན་གཏང་རག་ཕུལཿ མི་མཐུན་གནོད་པའི་ཚོགས་ཀུན་ལསཿ རྒྱལ་ཞིང་བཀྲ་ཤིས་བདེ་ལེགས་འགྱུརཿ རིག་འཛིན་མཐུ་སྟོབས་བདུད་འདུལ་གྱིསཿ དག་སྣང་ཡི་གེའི་ལམ་དུ་ཕབཿ འགལ་འཁྲུལ་བྱུང་ན་ལྷ་ལ་བཤགསཿ རྒྱ་རྒྱ་རྒྱཿ

༄༅། །དྲང་སྲོང་ཡེ་ཤེས་སྒྲུབ་ཐབས་ཀྱི། ཚོགས་མཆོད་ཚོགས་གཉིས་སྤྲིན་ཕུང་ཞེས་བྱ་བ་བཞུགས། ༅། བླ་མ་དང་ལྷག་པའི་ལྷ་ལ་ཕྱག་འཚལ་ལོ། །འདིར་རྣལ་འབྱོར་པས་ཚོགས་གཉིས་ཡོངས་སུ་རྫོགས་པའི་ཆེད་དུ། ལྷག་པའི་ལྷ་ལ་ཚོགས་མཆོད་འབུལ་ནཿ ཚོགས་ཀྱི་ཡོ་བྱད་རྣམས་འདུ་བྱས་ལ། བྱིན་གྱིས་བརླབས་ལ། »རང་ཉིད་ལྷར་གསལ་ཐུགས་ཀ་ནས། །ཡི་གེ་རྃ་ཡྃ་ཁྃ་གསུམ་འཕྲོསཿ ཚོགས་རྫས་མ་དག་ཉེས་སྐྱོན་སྦྱངས། །ཡེ་ཤེས་བདུད་རྩིའི་རང་བཞིན་གྱུར། །ཨོཾ་ཨཱཿཧཱུཾ་ཧ་ཧོ་ཧྲཱིཿ« སྤྱན་འདྲེན་པ།» ཧཱུྃཿ འོག་མིན་ཆོས་དབྱིངས་ཞིང་ཁམས་ནས། །གསང་བདག་ལྷ་དང་གཉིས་མེད་པའི། །དྲང་སྲོང་ཡེ་ཤེས་ལྷ་ཡི་ཚོགས། །ཚོགས་ལ་སྤྱན་འདྲེན་གཤེགས་སུ་གསོལ། །ཚོགས་ཁང་རང་བྱུང་སྤྲུལ་པའི་ཞིང༌། །ཚོགས་རྫས་མཆོད་སྤྲིན་བསམ་མི་ཁྱབ། །སྤྲུལ་པའི་གཞལ་ཡས་དམ་པ་འདིར། །དགྱེས་པར་དགོངས་ཏེ་བཞུགས་སུ་གསོལ། །བཛྲ་ས་མ་ཡ་ཛ་ཛཿ ཏིཥྛ་ལྷན།« ཚོགས་ཀྱི་མཆོད་པ་འབུལ་བ་ནི། »ཧཱུྃ། འདོད་ཡོན་ལྷ་མོ་སྤྲིན་ལྟར་གཏིབས། །གཟུགས་སྒྲ་དྲི་རོ་རེག་བྱ་ཆོས། །དཔག་མེད་ཕྱི་ནང་གསང་བའི་རྫས། །ཚོགས་ཀྱི་མཆོད་པར་སྤྲུལ་ཏེ་འབུལ། །ཙཀྲ་པཱུ་ཙ་ཁཱ་ཧི། «།དེ་ནས་བཤགས་པ་བྱ་བ་ནི། »ཧཱུྃ། བདག་ཅག་མ་རིག་འཁྲུལ་པ་ཡིས། །སྐུ་གསུང་ཐུགས་དང་ཡན་ལག་གི །དམ་ཚིག་འགལ་འཁྲུལ་ནོངས་པ་ཀུན། །ཞལ་ཟས་ཚོགས་ཀྱི་མཆོད་པས་བཤགས། བཛྲ་ས་མ་ཡ་ཤུདྡྷེ་ཨཱཿ« གཟུང་འཛིན་རུ་ཏྲ་བསྒྲལ་བ་ནི། »ཧཱུྃ། ནྲྀ་ཛཿ དུག་གསུམ་སྒྲོལ་བའི་ཧོམ་ཁུང་དུ། །དགྲ་གདོན་རང་དབང་མེད་པར་ཚུད། །ལྷག་མེད་རྡོ་རྗེའི་ཕུར་བས་གདབ། །རྣམ་ཤེས་ཆོས་ཀྱི་དབྱིངས་སུ་བསྒྲལ། །ཨོཾ་བཛྲ་ཙཎྜ་ཀཱི་ལི་ཀཱི་ལ་ཡ་ཧཱུྃ་ཕཊཿ ཧོཿ ཕྱེས་ཤིག་ཕྱེས་ཤིག་ཞལ་ཕྱེས་ཤིག །དགྲ་གདོན་བསྒྲལ་བའི་ཤ་ཁྲག་རུས། །ལྷག་མ་མེད་པར་ཞལ་དུ་སྟོབས། །དགྱེས་པར་རོལ་ཅིག་ཁ་རཾ་ཁཱ་ཧི། «ཐུགས་དམ་བསྐང་བའི་རིམ་པ་ནི།» ཧྲཱིཿ འཇིགས་བྱེད་དྲང་སྲོང་འཁོར་བཅས་ལ། །སྤྱན་གཟིགས་མཆོད་པ་སྐར་ལྟར་བཀྲམ། །སིལ་སྙན་གླུ་གར་འབྲུག་ལྟར་སྒྲོགས། །སྣ་ཚོགས་བདུག་སྤོས་སྤྲིན་ལྟར་འཐིབ། །ལྷ་ཡི་ཞལ་ཟས་མཚོ་ལྟར་བསྐྱིལ། །ལྷ་རྫས་ན་བཟའ་འཇའ་ལྟར་བཀྲ། །ཕྱི་དང་ནང་དང་གསང་བའི་རྫས། །ས་གསུམ་གནས་ཀུན་ཡོངས་ཁྱབ་པས། །རྩ་བརྒྱུད་བླ་མའི་ཐུགས་དམ་བསྐང༌། །གསང་བདག་གཏུམ་པོའི༴ །དྲང་སྲོང་ཆེན་པོའི༴ །སྤྲུལ་འཁོར་ཡོངས་རྫོགས༴ །ཐུགས་དམ་གཉེན་པོ་བསྐངས་ནས་ཀྱང༌། །འགལ་རྐྱེན་མི་མཐུན་པར་ཆད་སོལ། །དགྲ་བགེགས་ཐམས་ཅད་རྡུལ་དུ་རློག །འདོད་པའི་དོན་ཀུན་ལྷུན་གྲུབ་མཛོད། «དེ་ནས་ལྷག་མ་གཏོང་བ་ནི། »ཀྱཻ། དཀྱིལ་འཁོར་བཀའ་སྡོད་ལྷག་མ་ལ། །དབང་པའི་ཚོགས་རྣམས་ཚོགས་ལྷག་རྫས། །འདོད་པའི་ཡོན་ཏན་བཞེད་དགུ་རུ། །འཆར་འདི་བཞེས་ལ་སྡོང་གྲོགས་མཛོད། །ཨུཥྩི་ཊ་བཱ་ལིངྟ་ཁཱ་ཧི། «རྗེས་ལ་མཆོད་བསྟོད་བཟོད་གསོལ་སོགས། །རྡོ་རྗེའི་གསུང་བཞིན་འདིར་བླངས་ཏེ། །དཀྱིལ་འཁོར་སྤྱི་ཡི་ལས་རིམ་ལྟར། །མ་ཚང་མེད་པར་རྫོགས་པར་བྱ། །དེ་ལྟར་དྲང་སྲོང་ཆེན་པོ་ལ། །ཚོགས་མཆོད་དབུལ་བའི་རིམ་པ་འདི། །རྒྱས་སྲས་དམ་པའི་བཞེད་ངོ་རུ། །དྲི་མེད་གྲགས་པས་བྲིས་པ་ལ། །ནོངས་པ་ཅི་མཆིས་སྡིག་ལྟུང་དང༌། །ལྷན་ཅིག་བླ་མའི་སྤྱན་སྔར་བཤགས། །ལེགས་ཚོགས་ཅི་མཆིས་འགྲོ་བ་ཀུན། །ཚོགས་གཉིས་རྫོགས་པའི་ཆེད་དུ་བསྔོ། །ཡངས་པའི་རྒྱལ་ཁམས་ཐམས་ཅད་དུ། །ཡང་གསང་ཆོས་ཀྱི་ཉི་འོད་ཀྱིས། །ཡོངས་སུ་ཁྱབ་ཅིང་བསྟན་པའི་དཔལ། །སྲིད་པ་གསུམ་ན་འབར་གྱུར་ཅིག། །།