བསྙེན་གནས་དང་འབྲེལ་བའི་ཐེག་ཆེན་གསོ་སྦྱོང་སྦྱིན་པའི་མཚམས་སྦྱོར་འཆད་ཚུལ།

🚧 This website is under continued development. We appreciate your patience!

Previous Text Back to Volume Page Next Text

Wylie title	bsnyen gnas dang 'brel ba'i theg chen gso sbyong sbyin pa'i mtshams sbyor 'chad tshul
Location	dpal sprul bka' 'bum Volume 2, Text 36, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Mending and Purifying Vows and Breaches - gso sbyong · Teaching Methods - 'chad thabs

[edit]

༄༅། །བསྙེན་གནས་དང་འབྲེལ་བའི་ཐེག་ཆེན་གསོ་སྦྱོང་སྦྱིན་པའི་མཚམས་སྦྱོར་འཆད་ཚུལ།

ནམ་མཁའ་དང་མཉམ་པའི་སེམས་ཅན་ཐམས་ཅད་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ཐེག་པ་ཆེན་པོའི་གསོ་སྦྱོང་བླངས་ནས་བསྲུང་བར་བྱ་སྙམ་པའི་བྱང་ཆུབ་མཆོག་ཏུ་སེམས་བསྐྱེད་པ་དང་བཅས་ཏེ་གསན་འཚལ། །དེ་ཡང་དུས་ཁྲིམས་ཡན་ལག་བརྒྱད་པའི་སྡོམ་པ་བསྲུང་བ་ནི་ཐེག་དམན་གྱི་དུས་ན། བསྙེན་གནས་ཡན་ལག་བརྒྱད་པའི་སྡོམ་པ་ཞེས་ཁྱིམ་པས་དུས་སུ་བསྲུང་བྱ་དང་། དེ་ཉིད་ཐེག་ཆེན་དུ་བྱང་ཆུབ་ཀྱི་སེམས་ཀྱིས་ཟིན་པའི་སྒོ་ནས་ཉམས་སུ་བླངས་ནས་ཉེས་སྤྱོད་སྡོམ་པའི་ཚུལ་ཁྲིམས་སུ་འགྱུར་ཞིང་། འདིར་འཕགས་པ་སྤྱན་རས་གཟིགས་ཀྱི་བསྐྱེད་རིམ་ལྷའི་རྣལ་འབྱོར་དང་འབྲེལ་བར་ཉམས་སུ་བླང་ན་གསང་སྔགས་བྱ་བའི་རྒྱུད་ཀྱི་དཀའ་ཐུབ་དང་སྡོམ་པའི་ཡན་ལག་ཏུ་འགྱུར་བ་ཡིན། དེ་ཡང་སྔོན་གྱི་རྒྱལ་བ་སྲས་དང་བཅས་པ་རྣམས་ཀྱི་མཛད་པའི་ཚུལ་གང་ཡིན་པ། དེ་ཉིད་རང་རྒྱུད་ལ་ཁྲིམས་སུ་བཅའ་ཞིང་། དེ་ལས་མི་འདའ་བར་སྡོམ་པས་ཚུལ་ཁྲིམས་སམ་སྡོམ་པ་ཞེས་གྲགས་པ་ཡིན་པས་ཇི༵་ལྟ༵ར་སྔོན༵་གྱི༵་ཞེས་པ་ལ་སོགས་རིམ་བཞིན་འབྲུ་འབྲེལ་ཅུང་ཟད་སྨོས་ན། དེ་ཡང་རྫོགས་པའི་སངས་རྒྱས་རྣམས་ནི་ཆོས་ཉིད་དེ་བཞིན་ཉིད་དང་རྗེས་སུ་མཐུན་པར་གཤེགས་པས་ན་དེ༵་བཞིན༵་གཤེག༵ས་པ༵། བདུད་བཞིའི་དགྲ་དང་ཕྲལ་བས་ན་དགྲ༵་བཅོམ༵་པ༵། སྤང་རྟོགས་ཀྱི་ཡོན་ཏན་ཡང་དག་པར་རྫོགས་ཤིང་མ་རིག་པའི་གཉིད་འཐུགས་ལྟ་བུ་སངས་ལ་ཤེས་བྱའི་ཆོས་ཐམས་ཅད་ལ་བློ་གྲོས་རྒྱས་པས་ན་ཡང༵་དག༵་པ༵ར་རྫོག༵ས་པ༵འི་སང༵ས་རྒྱ༵ས། དཔེར་ན་འཁོར་ལོས་བསྒྱུར་བའི་རྒྱལ་པོའི་རྟ་ཅང་ཤེས་དེ་དག་ནི་དགྲའི་གཡུལ་ལ་སོགས་པར་འཇུག་པ་ན་གང་ན་གནོད་པ་མེད་པ་ནས་འཇུག་རང་སྲོག་ཡལ་བར་དོར་ཏེ་རྒྱལ་པོ་དེ་ཉིད་བསྲུང་བ་བཞིན་དུ། སེམས་ཅན་ཐམས་ཅད་ལ་ཐར་བ་དང་ཐམས་ཅད་མཁྱེན་པའི་ལམ་མ་ནོར་བ་སྟོན་ཞིང་གཞན་དོན་ཁོ་ན་ལྷུར་མཛད་པས་ན་རྟ༵་ཅ༵ང་ཤེས༵་ལྟ༵་བུ༵། ནམ་མཁའ་དང་མཉམ་པའི་སེམས་ཅན་ཐམས་ཅད་ལ་མ་བཅོལ་བཞིན་དུ་ཕན་འདོགས་པའི་ཐུགས་རྗེ་ཆེན་པོའི་ཁུར་བསྣམས་ཤིང་ཐེག་པ་ཆེན་པོ་བླ་ན་མེད་པའི་དོན་སྟོན་པས་ན་གླང༵་པོ༵་ཆེན༵་པོ༵། རང་དོན་མཐར་ཕྱིན་པས་ན་བྱ༵་བ༵་བྱ༵ས་ཤིང༵་། གཞན་དོན་ལྷུར་ལེན་པས་ན་བྱེད༵་པ༵་བྱེད༵་པ། ལས་ཉོན་གྱི་སྒྲིབ་པ་སྤང་བས་ན་ཁུར༵་བོར༵་བ༵། མྱ་ངན་ལས་འདས་པའི་གོ་འཕང་བརྙེས་པས་ན་རང༵་གི༵་དོ༵ན་རྗེས༵་སུ༵་ཐོབ༵་པ༵། འཁོར་པའི་གནས་ལས་མི་ཐར་བར་བྱེད་པ་ལྟ་ངན་དང་ཉོན་མོངས་པ་ལས་ཐམས་ཅད་ཟད་པས་ན་སྲིད༵་པ༵་ཀུན༵་ཏུ༵་སྦྱོར༵་བ༵་ཡོང༵ས་སུ༵་ཟ༵ད་པ༵། ཐོག་མཐའ་བར་དུ་དགེ་བའི་ཆོས་སྟོན་པས་ན། ཡང༵་ད༵ག་པ༵འི་བཀ༵འ། སྲིད་པའི་འཆིང་བ་ཐམས་ཅད་བཅད་པས་ན་ལེག༵ས་པ༵ར་རྣ༵མ་པ༵ར་གྲོལ༵་བ༵འི་ཐུག༵ས། རྣམ་པ་ཐམས་ཅད་མཁྱེན་པའི་ཡེ་ཤེས་མངའ་བས་ན་ལེག༵ས་པ༵ར་རྣ༵མ་པ༵ར་གྲོལ༵་བ༵འི་ཤེས༵་ར༵བ་ཅ༵ན། དེ༵་ད༵ག་གི༵ས་ཞེས་པས་ནི་གང་གིས་རྗེས་སུ་སློབ་པའི་དེ་བཞིན་གཤེགས་པའི་ཡོན་ཏན་བསྟན། དེའི་རྗེས་སུ་ཇི་ལྟར་སློབ་པའི་ཀུན་སློང་བྱང་ཆུབ་ཀྱི་སེམས་བསྟན་པར་བཞེད་ཅིང་རང་དོན་ཡལ་བར་དོར་བས་ན་སེམ༵ས་ཅ༵ན་ཐམ༵ས་ཅ༵ད་ཀྱི༵་དོ༵ན་གྱི་ཕྱི༵ར་ད༵ང་། གནས་སྐབས་མངོན་མཐོ་ལ་འགོད་པས་ན་ཕ༵ན་པ༵ར་བྱ༵་བ༵འི་ཕྱི༵ར་ད༵ང་། མཐར་ཐུག་ངེས་ལེགས་ལ་འགོད་པས་ན་གྲོ༵ལ་བ༵ར་བྱ༵་བ༵འི་ཕྱི༵ར་ད༵ང་། སེར་སྣའི་ལས་འབྲས་སྦྱངས་པས་ན་མུ༵་གེ༵་མེད༵་པ༵ར་བྱ༵་བ༵འི་ཕྱིར༵་ད༵ང་། ཞེ་སྡང་གི་རྒྱུ་འབྲས་སྦྱངས་པས་ན་ན༵ད་མེ༵ད་པ༵ར་བྱ༵་བ༵འི་ཕྱིར༵་ད༵ང་། ལམ་བྱ༵ང་ཆུ༵བ་ཀྱི༵་ཕྱོག༵ས་ཀྱི༵་ཆོས༵་རྣ༵མས་ཡོང༵ས་སུ༵་རྫོག༵ས་པ༵ར་བྱ༵་བ༵འི་ཕྱིར་དང་། འབྲས་བུ་བླ༵་ན༵་མེད༵་པ༵་ཡ༵ང་ད༵ག་པ༵ར་རྫོ༵གས་པ༵འི་བྱ༵ང་ཆུབ༵་ངེས༵་པ༵ར་རྟོག༵ས་པ༵ར་བྱ༵་བ༵འི་ཕྱི༵ར་ད༵ང་། ཇི་སྐད་དུ། ཨོ་རྒྱན་སངས་རྒྱས་གཉིས་པའི་ཞལ་ནས། དགེ་བ་མཐའ་དག་ཡང་དག་གསོ་བ་དང་། སྡིག་པ་མ་ལུས་རྣམ་པར་སྦྱོངས་པ་སྟེ། །དགེ་གསོས་ཕྱིར་དང་སྡིག་པ་རྣམ་སྦྱོངས་ཕྱིར། །དེ་བཞིན་གཤེགས་པས་གསོ་སྦྱོང་བཀའ་སྩལ་ཏོ། །ཞེས་གསུངས་པ་ལྟར་གསོ་སྦྱོང་གི་སྡོམ་པ་ཇི་ལྟར་བླང་ཤིང་བསྲུང་བ་དེ་ལྟར་དུ་བདག་གིས་ཀྱང་སེམས་ཅན་ཐམས་ཅད་ཀྱི་དོན་དང་ཕན་པ་དང་གྲོལ་བ་ལ་སོགས་པ་དགོས་པ་དེ་དག་གི་ཕྱིར་དུས་ད་ལྟ་ནས་བཟུང་སྟེ་སང་ཉི་མ་མ་ཤར་གྱི་བར་དུ་ཡན་ལག་བརྒྱད་པའི་སྡོམ་པ་བླངས་ནས་མ་ཉམས་པར་ཚུལ་བཞིན་དུ་བསྲུང་བར་བགྱིའོ་སྙམ་པས་འདི་བཞིན་རྗེས་ཟློས་མཛོད། ཇི༵་ལྟ༵ར་སྔོན་གྱི་སོགས་དེ་ཡང་དུས་ཁྲིམས་ཡན་ལག་བརྒྱད་པའི་སྡོམ་པ་ཞེས་བྱ་བ་ལ་ཚུལ་ཁྲིམས་ཀྱི་ཡན་ལག་བཞི། བག་ཡོད་ཀྱི་ཡན་ལག་གཅིག །བརྟུལ་ཞུགས་ཀྱི་ཡན་ལག་གསུམ་རྣམས་ཡོད་པ་ལས། དང་པོ་རང་རྒྱུད་ཀྱི་ཉེས་སྤྱོད་རྣམས་སྡོམ་པར་བྱེད་པ་ཚུལ་ཁྲིམས་ཀྱི་ཡན་ལག་བཞི་ནི་སྡོམ་པ་ཐམས་ཅད་ཀྱི་རྩ་བ་ཡིན་པས་ན་རྩ༵་བ༵་བཞི༵་ཞེས་གྲགས་ཏེ། དེ་ཡང་མིའི་འགྲོ་བ་ལྟ་ཅི་ཐ་ན་སྲོག་ཆགས་སུ་གཏོགས་པ་ཤིག་སྲོ་ཡན་ཆད་ཀྱི་སྲོག༵་མི༵་གཅོད་པ་དང་གཅིག །གཞན་གྱིས་བདག་ཏུ་བཟུང་བའི་རྒྱུ་རྫས་ཆེན་པོ་ལྟ་ཅི་སྨོས་ཐ་ན་ཁབ་རྐུད་པ་ཟས་ཁམ་གཅིག་ཀྱང་མ༵་བྱི༵ན་པ༵་མི༵་ལེན༵་པ་དང་གཉིས། ཕོ་མོ་གཉིས་སྤྲད་དེ་འཁྲིག་པའི་བདེ་བ་དོན་དུ་གཉེར་བ་ལྟ་ཅི་སྨོས་ཆགས་སེམས་ཀྱིས་ཕན་ཚུན་ལྟ་བ་ཙམ་ཡང་མི་བྱེད་པ་ནི་མི༵་ཚ༵ངས་སྤྱོད་སྤངས་པ་དང་གསུམ། རང་ལ་ས་ལམ་གྱི་ཡོན་ཏན་མེད་ཀྱང་ཡོན་ཏན་ཡོད་པར་རྫུས་པའི་མི་ཆོས་བླ་མའི་རྫུན་ཆེན་པོ་ལྟ་ཅི། ཐ་ན་ཀུ་རེ་དང་རྩེད་མོའི་ཕྱིར་ཡང་གཞན་བསླུ་བར་བྱེད་པའི་རྫུན༵་མི༵་སྨྲ༵་བ་སྟེ་བཞི་ཡིན། བག་ཡོད་ཀྱི་ཡན་ལག་གཅིག་ནི། ཆང་སྤོང་བ་ཡིན་ཏེ། འདི་མ་སྤང་ན་རང་རྒྱུད་བག་མེད་པར་འགྱུར་ཞིང་ཆང་གིས་མྱོས་ནས་བླང་དོར་གྱི་གནས་ཐམས་ཅད་མི་ཤེས་ཤིང་རང་ཉིད་ཀྱིས་སྡོམ་པ་བླང་བ་ཡང་བརྗེད་ནས་མི་དགེ་བ་སྤྱོད་པས་སྡོམ་པ་གང་ཡང་བསྲུང་མི་ནུས་པས་ན་གྲོ་ནས་སོགས་འབྲུའི་ཆང་དང་སྦྲང་དང་མེ་ཏོག་སོགས་གཞན་ཕབ་དང་སྦྱར་བ་བཅོས་པའི་ཆང་དང་། གཞན་ཡང་ཤིང་ཏོག་དང་རྩ་བ་ལ་སོགས་མྱོས་པར་བྱེད་པའི་བཟའ་བཏུང་ཐམས་ཅད་སྤང་དགོས་པ་དེ་ཡིན། བརྟུལ་ཞུགས་ཀྱི་ཡན་ལག་གསུམ་ནི། རང་ཉིད་སྡོམ་ལྡན་ཡིན་པའི་དྲན་པ་གསོ་བའི་ཆེད་དུ་ཁྱིམ་ན་གནས་པས་ཇི་ལྟར་སྤྱོད་པའི་སྤྱོད་པ་དེ་དག་བརྟུལ་ནས། རྒྱལ་སྲས་ཀྱི་མཛད་སྤྱོད་བཟང་པོའི་རྗེས་སུ་ཞུགས་པས་བརྟུལ་ཞུགས་ཏེ། འཕྱོར་སྒེག་དང་། མཛེས་ཆོས་ཀྱི་བསམ་པས་ག་བུར་དང་ཙནྡན་སོགས་དྲི་ཞིམ་པོ་ལུས་ལ་བཀུ་བ། མེ་ཏོག་དང་རིན་པོ་ཆེ་ལ་སོགས་པའི་ཕྲེང་བས་ལུས་ལ་བརྒྱན་པར་བྱེད་པ། དེ་མ་ཡིན་པའི་རྣ་ཆ་དང་གདུ་བུ་ལ་སོགས་སྤངས་པ་ནི། རྒྱ༵ན་གྱི༵་རིགས་གསུམ། རྩེད་མོ་དང་བཞད་གད་ཀྱི་ཆེད་དུ་ལུས་ཀྱི་ཡན་ལག་གཡོ་བ་དང་། ངག་གི་གཏམ་སྣ་ཚོགས་སྨྲ་བ་སོགས་སྤོང་བ་ནི། གར་གྱི་རྣམ་པ་རྩེ་བ་དང་། དེ་བཞིན་འགྱུར་ཁུག་དང་འདེགས་འཇོག་དང་ལྡན་པའི་ངག་གིས་གླུ་ལེན་པ། པི་ཝཾ་དང་གླིང་བུ་སོགས་རོལ་མོ་འབུད་དཀྲོལ་བྱེད་པ་རྣམས་སྤོང་པ་རྩེད༵་མོའི༵་རིག༵ས་བྱེད༵་གསུམ༵། དུས་མ་ཡིན་པ་ཉི་མ་ཡོལ་ཕན་ཆད་སྐོམ་པའི་གདུང་བ་སེལ་བའི་ཆུ་དང་ཇ་སོགས། བཏུང་བ་ལས་བཀྲེས་པ་སེལ་བར་བྱེད་པའི་ཟན་དང་ཆན་ཡོས་ཤིང་ཏོག་ལ་སོགས་བཟའ་བཅའ་རྣམས་ལོངས་མི་སྤྱད། གྲུ་གང་ལས་ལྷག་པའི་ཁྲི༵་སྟ༵ན་མཐོན༵་པོ༵། རང་བཞིན་ཕལ་བར་མི་འོས་པའི་དར་གོས་དང་སྟག་གཟིག་གི་སྟན་སོགས་ཁྲི་སྟན་ཆེན་པོ་ལ་མི་འདུག་པ་རྣམས་ལས། གར་སོགས་རྩེད་མོའི་རིགས་གསུམ་དང་། ཕྲེང་སོགས་རྒྱན་གྱི་རིགས་གསུམ་པོ་གཅིག་ཏུ་བརྩིས་པའི་བརྟུལ་ཞུགས་ཀྱི་ཡན་ལག་གསུམ་སྟེ། ཡན་ལག་བརྒྱད་པོ་འདི་ཇི་སྲིད་སང་ཉི་མ་མ་ཤར་གྱི་བར་དུ་མི་ཉམས་པར་བསྲུང་བར་བགྱིའོ། །སྙམ་པས་འདིའི་རྗེས་ཟློས་མཛོད། དེང་ནས་སྲོག༵་གཅོད༵་སོགས། དེ་ལྟ་བུའི་ཚུལ་ཁྲིམས་དེ་ཉིད་མཐར་ཕྱིན་པར་བྱ་བའི་ཆེད་དུ་འཕགས་པ་དོན་ཡོད་ཞགས་པའི་ཕ་རོལ་ཏུ་ཕྱིན་པ་དྲུག་གི་སྙིང་པོའི་གཟུངས་ལས་བྱུང་བ་ཚུལ་ཁྲིམས་རྣམ་དག་གི་གཟུངས་འདི་བཟླས་པས་དུས་གསུམ་གྱི་རྒྱལ་བ་སྲས་དང་བཅས་པའི་ཚུལ་ཁྲིམས་ཀྱི་ཕུང་པོ་ཐམས་ཅད་རང་རྒྱུད་ལ་རྫོགས་པར་བྱེད་པ་དང་། སྔོན་ཆད་ཚུལ་ཁྲིམས་འཆལ་བའི་ཉེས་པ་ཐམས་ཅད་དག་པར་བྱེད་ཅིང་ཕྱིན་ཆད་མི་ཉམས་པར་བྱེད་པ་སོགས་ཕན་ཡོན་དུ་མ་དང་ལྡན་པའི་སྔགས་འདི་འདིའི་རྗེས་ཟློས་མཛོད། ཨོཾ་ཨ་མོ་གྷ་སོགས་དང་དེ་ནས་སྔོན་བྱང་ཆུབ་སེམས་དཔའ་བྱམས་པས་བྱང་ཆུབ་ཀྱི་སྤྱོད་པ་སྤྱད་པའི་ཚེ་ཉིན་ལན་གསུམ་མཚན་ལན་གསུམ་དུ་བསམ་པ་དྲག་པོའི་སྨོན་ལམ་བཏབ་པ་ལ་བརྟེན་ནས་ལམ་བདེ་བ་དང་འཇུག་པ་བདེ་བ་བསྐལ་པ་མང་པོའི་ཚོགས་རྫོགས་པར་མཛད་པ་བྱམས་པའི་སྨོན་ལམ་ལས་བྱུང་བའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པའི་སྨོན་ལམ་འདིའི་རྗེས་ཟློས་མཛོད། ཁྲིམས་ཀྱི་ཚུལ་ཁྲིམས་སོགས་དང་། དཔལ་མགོན་འཕགས་པ་ཀླུ་སྒྲུབ་ཀྱི་ཞལ་ནས། གསོ་སྦྱོང་འདོད་སྤྱོད་ལྷ་ལུས་ཡིད་འོང་པ། །སྐྱེས་པ་བུད་མེད་རྣམས་ལ་སྩོལ་བར་བགྱིད། །ཅེས་གསུངས་པ་ལྟར་སྔོན་བཅོམ་ལྡན་འདས་ཞལ་བཞུགས་པའི་སྐབས་རང་དོན་ཡིད་བྱེད་དང་བཅས་པས་བསྙེན་གནས་ལན་རེ་བསྲུང་བ་རྣམས་ཀྱང་སུམ་ཅུ་རྩ་གསུམ་གྱི་ལྷ་ཡུལ་དུ་སྐྱེས་ཤིང་། བསྙེན་གནས་ཅུང་ཟད་ཉམས་པ་རྣམས་ཀྱང་རྒྱལ་ཆེན་རིགས་བཞིའི་ལྷ་གནས་སུ་སྐྱེ་བས་ཕན་ཡོན་དཔག་ཏུ་མེད་པར་གསུངས་ཤིང་། དེ་ལས་ཀྱང་ཁྱད་པར་དུ་ཟླ་བ་སྒྲོན་མེའི་མདོ་ལས། གང་ཞིག་སྐལ་པ་བསམ་གྱིས་མི་ཁྱབ་པར། །རྒྱལ་བ་བྱེ་བ་མང་ལ་མཆོད་བྱས་ལས། །གང་ཞིག་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་འགག་པར་གྱུར་བའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །དེ་ནི་དེ་བས་བསོད་ནམས་འཕགས་པར་གསུངས། །ཞེས་པ་ལྟར་སྔོན་བསྟན་པ་རྒྱས་པའི་ཚེ་ཡུན་རིང་པོར་སྡོམ་པ་བསྲུང་པ་ལས་ད་ལྟ་སངས་རྒྱས་ཀྱི་བསྟན་པ་མཐར་ཐུག་པའི་སྐབས་འདིར་ཉིན་མཚན་གཅིག་ཏུ་སྡོམ་པ་སྣ་གཅིག་བསྲུང་བ་ཕན་ཡོན་ཆེ་ཞིང་། དེ་ཡང་བྱང་ཆུབ་ཀྱི་སེམས་ཀྱིས་ཟིན་པའི་སྡོམ་པའི་ཕན་ཡོན་ནམ་མཁའ་ལྟར་ཚད་གཟུང་མེད་ཅིང་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འགྱུར་ལ། ཁྱད་པར་ད་རེས་ཀྱི་སྐབས་སུ་གསང་སྔགས་རྡོ་རྗེ་ཐེག་པའི་ལྷ་དང་སྔགས་ཀྱི་རྣལ་འབྱོར་ཟབ་མོ་དང་འབྲེལ་བར་ཉམས་སུ་བླང་པས་ཚེ་འདིར་རིག་འཛིན་གྱི་གྲལ་དུ་འཁོད་ཅིང་། ཇི་ཙམ་འགོར་ཡང་མི་ཚེ་བཅུ་དྲུག་ལས་མི་འགྱང་བར་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་བྱེད་པ་ཡིན་པས་དགའ་བ་བསྒོམ་ཞིང་དེ་ལྟ་བུའི་དགེ་བ་དེ་ཡང་མཇུག་བསྔོ་བས་རྒྱས་མ་ཐེབ་ན་ཁོང་ཁྲོ་སོགས་རྐྱེན་འགའ་ཞིག་གིས་ཟད་པར་འགྱུར་བ་ཡིན་པས་དེས་ན་དགེ་རྩ་བྱང་ཆུབ་ཆེན་པོར་བསྔོ་བ་འདིའི་རྗེས་ཟློས་མཛོད། །བསོད་ནམས་འདི་ཡི་སོགས་བསྔོ་བས་མཐའ་བརྒྱན་པར་བྱའོ། །