དམ་པའི་ཆོས་འདུལ་བ་ལ་བསྟོད་པ་མེ་ཏོག་གི་སྐྱེད་མོས་ཚལ།

🚧 This website is under continued development. We appreciate your patience!

Previous Text Back to Volume Page Next Text

Wylie title	dam pa'i chos 'dul ba la bstod pa me tog gi skyed mos tshal
Location	dpal sprul bka' 'bum Volume 1, Text 6, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Verses of Praise - bstod pa · Vinaya Texts - 'dul ba

[edit]

༄༅། །དམ་པའི་ཆོས་འདུལ་བ་ལ་བསྟོད་པ་མེ་ཏོག་གི་སྐྱེད་མོས་ཚལ་ཞེས་བྱ་བ་བཞུགས་སོ། །

ན་མོ་མ་ཧཱ་མུ་ནེ་ཡེ། །གྲངས་མེད་བསྐལ་པར་ཚོགས་གཉིས་རྫོགས་མཛད་ཅིང་། །བདུད་བཏུལ་བྱང་ཆུབ་སྙིང་པོར་མངོན་སངས་རྒྱས། །ཞི་བའི་ལམ་བཟང་སྲིད་ན་སྣང་མཛད་པ། །འགྲོ་བའི་བླ་མ་ཐུབ་པ་དེར་ཕྱག་འཚལ།༡ །གང་ཞིག་འཁོར་བའི་རང་བཞིན་མེ་ཡི་འོབ། །ཡིད་བརྟན་མི་རུང་སྲིད་པའི་ཕུན་ཚོགས་དཔལ། །གང་ལ་མི་ཆགས་མཐའ་གཉིས་ལས་འདས་ལམ། །ཐུབ་པའི་ཆོས་འདུལ་མཛོད་ལ་ཕྱག་འཚལ་ལོ།༢ །ཐུབ་པ་དགྱེས་པའི་སྤྱོད་པ་རྨད་བྱུང་བའི། །ལེགས་མཛད་ཡང་དག་ཁྲིམས་ཀྱིས་རྒྱུད་བསྡམས་ཏེ། །ཕུན་ཚོགས་ཞི་བའི་དགའ་ཚལ་ལ་སྙེགས་པ། །གང་ཟག་འཕགས་པའི་སྡེ་ལ་ཕྱག་འཚལ་ལོ།༣ །གང་ལ་སློབ་རྣམས་རྣམ་གྲོལ་སར་འགྲོ་ཞིང་། །ཡོན་ཏན་ཀུན་གྱི་གཞིར་གྱུར་རིན་པོ་ཆེ། །མི་ཟད་འཕགས་པའི་མཛོད་ཁང་དམ་པའི་ཆོས། །བསྟན་པའི་སྙིང་པོ་སོ་སོར་ཐར་པ་ཡིན། ༤ །མགོན་པོ་སྐྱོབས་པ་དེ་ཡིས་ཡང་དང་ཡང་། །འདི་ནི་སྟོན་དང་བསྟན་པ་གཉིས་ཡིན་ཞེས། །བསྔགས་པའི་གནས་དེ་ཆོས་འདུལ་རིན་པོ་ཆེ། །མི་ཟད་བདུད་རྩིའི་མཛོད་ལ་སླར་ཡང་འདུད། ༥ །ཀྱེ་མ་ཀྱེ་མ་མགོན་པོ་ཐུགས་རྗེ་ཅན། །ཤཱཀྱ་སེངྒེ་རྒྱལ་བ་ལྷ་ཡི་ལྷ། །སྟོན་པ་མཆོག་དེ་ཞི་བར་གཟིམས་པ་ནས། །ཆོས་འདུལ་ཉིན་བྱེད་སྣང་འདི་སྐལ་བཟང་མིག ༦ །འདིས་ནི་སྤངས་བླང་ངེས་པའི་ཚུལ་འདོམས་པས། །ཐུབ་ཚུལ་ཞི་བའི་ལམ་བཟང་གནས་པ་སྟེ། །གཞན་དུ་རྨོངས་པས་ལྡོངས་པའི་འགྲོ་བ་ཡིས། །ཐུབ་རྣམས་དགྱེས་པའི་སྤྱོད་པ་ཅི་སླད་ཤེས། ༧ །འདི་ནི་ལང་ཚོས་མྱོས་ཏེ་རྣམ་འཁྲུལ་བའི། །རྐང་གཉིས་གཞོན་ནུ་འདུལ་བའི་ལྕགས་ཀྱུ་སྟེ། །སེམས་རྟ་གཡེང་པས་རྒོད་པའི་གཞན་དབང་ལས། །ལྡོག་སྤྱོད་མཐུན་པར་བྱེད་པའི་སྲབ་ཀྱང་ཡིན། ༨ །རྨོངས་པས་བཅིངས་པའི་སྲིད་པའི་སེམས་ཅན་ནི། །སྲེད་པའི་མེ་ཡིས་རྣམ་པར་བསྲེགས་པ་ལ། །གཞིལ་ནུས་ཆོ་ག་གཞན་ན་མ་མཆིས་ཏེ། །ཆོས་འདུལ་ཞི་བསིལ་བདུད་རྩིའི་ཆར་པ་ཡིན། ༩ །ཉེས་པའི་དུག་ཅན་གཏིང་ཟབ་འཁོར་བའི་མཚོ། །ཉོན་མོངས་ཆུ་སྲིན་བྱེ་བས་བཟུང་པ་ལས། །བརྒལ་ནས་ཞི་གླིང་གཉེར་བའི་མགྲོན་པོ་ལ། །ཆོས་འདུལ་མི་གཡོ་རིན་ཆེན་གྲུ་བོ་ཡིན།༡༠ །ཐོག་མེད་དུས་ནས་འཐིབས་པའི་མ་རིག་པ། །ཡང་དག་སྣང་བ་བསྒྲིབ་པའི་སྨག་རུམ་དུ། །ལམ་དང་ལམ་མིན་འབྱེད་པའི་སྐལ་དམན་ལ། །ཆོས་འདུལ་ལམ་བཟང་སྣང་བའི་སྒྲོན་མེ་ཡིན།༡༡ །འདི་གནས་ཐར་བའི་ལམ་ལས་མི་འཁྱོགས་ཏེ། །ཉེས་སྤྱོད་གཡང་ས་ཤུགས་ཀྱིས་ཆོད་པའི་ཕྱིར། །ཕུན་ཚོགས་ཡོན་ཏན་དགའ་ཚལ་ལ་འགྲོ་བའི། །ཆོས་འདུལ་མེ་ཏོག་བཀོད་པའི་ལམ་སྲང་ཡིན།༡༢ །སྲིད་ན་ཡོན་ཏན་ཆོས་ཀྱིས་དབུལ་བའི་འགྲོ། །གང་ལ་འཕྲད་ན་འབྱོར་པའི་དཔལ་སྟེར་བའི། །གཏོང་བའི་སྒོ་འཕར་གཞན་གྱིས་མ་བཟུང་བ། །ཆོས་འདུལ་བསླབ་གསུམ་ནོར་བུའི་བང་མཛོད་ཡིན། ༡༣ །རིང་ནས་གོམས་པའི་ཉེས་སྤྱོད་གདུག་པ་དེས། །ཟིན་གྱུར་འཁོར་བའི་དུཿཁ་བརྒྱ་ཕྲག་གིས། །མནར་ལ་ཞི་བའི་བདེ་མཆོག་སླར་སྟེར་བའི། །ཆོས་འདུལ་ཡོན་ཏན་སྨན་གྱི་སྡོང་པོ་ཡིན། ༡༤ །ཞེ་སྡང་ཚ་དབལ་རྣོན་པོས་གདུང་གྱུར་ལས། འདིར་ཚིག་ཁོང་ཁྲོའི་རྣམ་སྨིན་མི་བཟད་པས། །ཕྱི་མར་བསྲེག་འགྱུར་དམྱལ་མེའི་གདུང་སེལ་བའི། །ཆོས་འདུལ་ཟླ་བ་བདུད་རྩིའི་དཀྱིལ་འཁོར་ཡིན།༡༥ །ངན་སོང་ཆུ་བོ་སྡུག་བསྔལ་རྦ་རླབས་ཅན། །རྒྱུན་རིང་བཟློག་དཀའ་མཐོ་རིས་གྲོང་འཇོམས་པ། །བརྒལ་ནས་སྲིད་པའི་རྒྱུ་བ་རྒྱུན་གཅོད་པའི། །ཆོས་འདུལ་མི་ཤིག་ཆུ་ལོན་ཟམ་པ་ཡིན།༡༦ །མཐོ་རིས་གྲོང་བཟང་ནོར་བུའི་སྐྱེད་མོས་ཚལ། །ཞི་བའི་ཡོན་ཏན་ཚོགས་ཀྱི་མཛེས་བྱས་ལས། །ཐར་བའི་ཁང་བཟང་བརྩེགས་པའི་སྟེང་གི་གཞིར། །བགྲོད་ལ་ཆོས་འདུལ་ལྷ་ཡི་ཐེམ་སྐས་ཡིན།༡༧ །རྙོགས་བྲལ་འཕགས་པའི་ཡོན་ཏན་ཨུད་པ་ལ། །ཚུལ་ཁྲིམས་བསུང་ཞིམ་དངར་བའི་གེ་སར་ཅན། །སྐལ་བཟང་སྦྲང་རྩིས་མྱོས་པའི་རོ་སྟེར་བ། །ཆོས་འདུལ་མེ་ཏོག་རྒྱས་པའི་སྐྱེད་ཚལ་ཡིན།༡༨ །ཉོན་མོངས་དགྲ་གཡུལ་ཤིན་ཏུ་མི་བཟད་པ། །ཐར་པའི་སྲོག་རྩ་འཕྲོག་པའི་སྐབས་ཚོལ་ཞིང་། །དགེ་ཚོགས་འབྱོར་བའི་མཛོད་ལ་བརྣག་པ་ཡང་། །གཞོལ་ནུས་ཆོས་འདུལ་གྱད་ཀྱི་དམག་དཔུང་ཡིན།༡༩ །ཐུབ་པའི་ཡོན་ཏན་ཕུང་བོ་བརྒྱ་ཕྲག་ཀྱང་། །གང་ལ་བསྙེན་ན་ངེས་པར་སྟེར་ནུས་པའི། །ལམ་འདི་བསྟན་པའི་སྲོག་ཤིང་ཉག་གཅིག་སྟེ། །རིན་ཆེན་ཆོས་འདུལ་ལྷ་མིའི་མཆོད་སྡོང་ཡིན། ༢༠ །ཕུལ་བྱུང་དཔལ་གྱི་འབྱོར་བ་དུ་མ་ཡང་། །དཀའ་བས་མ་ཡིན་མི་ངལ་འགྲུབ་པ་ལ། །ཚེགས་མེད་བདེ་ནས་བདེ་བར་འགྲོ་བའི་ལམ། །ཆོས་འདུལ་བདུད་རྩི་ཆོས་ཀྱི་སྒོ་མོ་ཡིན། ༢༡ །ལམ་འདི་ལྷ་དང་ཀླུ་དང་མི་དབང་དང་། སྲིད་ན་ཆེ་དགུར་རློམ་ལྟས་མི་ཤེས་ཏེ། །མཚུངས་མེད་རྒྱལ་བ་དེ་ཡི་བསྐལ་མང་དུ། །གོམས་པར་མཛད་ལས་ཚེགས་མེད་འདིར་མཁྱེན་གྱུར།༢༢ །དྲང་སྲོང་ཚུལ་འདི་མཚུངས་པ་མེད་པ་སྟེ། །སྔ་རབས་གཤེགས་པའི་མགོན་པོ་བགྲང་ཡས་ཀྱང་། །ཡང་དག་ལམ་འདི་སློབ་མའི་དབུས་སུ་བསྒྲགས། །བསྟན་པ་རིན་ཆེན་ཉི་མ་འདིས་གསལ་བྱས།༢༣ །བཞུགས་དང་འབྱུང་གྱུར་སྐྱོབས་པ་དུ་མ་ཡང་། །དང་པོར་ཚངས་སྤྱོད་ཡང་དག་ཚུལ་བླང་ནས། །ཕྱི་ནས་བྱང་ཆུབ་སྙིང་པོར་གཤེགས་འགྱུར་གྱི། །ལམ་འདི་མི་བསྟེན་འཚང་རྒྱར་འགྱུར་མ་ལགས།༢༤ །སྲིད་ན་ཆོས་འདུལ་ཉི་མ་ནམ་གནས་པ། །དེ་སྲིད་བསྟན་པའི་སྣང་བ་སྟོང་མིན་ཏེ། །གང་ཟག་ཐུབ་རྗེས་འབྲང་བའང་མང་བྱོན་ཕྱིར། །སངས་རྒྱས་བསྟན་པ་ཆོས་འདུལ་ཁོ་ན་ཡིན།༢༥ །མ་ཉམས་ཚངས་པར་སྤྱོད་པའི་གང་ཟག་ནི། །ལྷར་བཅས་འགྲོ་མང་ཕྱག་བྱའི་འོས་ལགས་ཏེ། །ཚངས་དབང་ཉི་ཟླའི་ལྷས་ཀྱང་བཏུད་འགྱུར་ན། །སྲིད་ན་དེ་ལས་ཆེ་འགྱུར་སུ་ཞིག་ཡོད།༢༦ །དམངས་དང་གདོལ་བ་བརླང་པོར་སྤྱོད་པ་ཡང་། །ཆོས་འདུལ་རིན་ཆེན་བུམ་བཟང་འདི་བཟུང་ནས། །རྒྱལ་རིགས་དྲེགས་པའི་ཕྱག་གི་གནས་ཡིན་ན། །ཅི་སླད་ཆོས་ཀྱི་ཁྲི་འཕང་འདིར་མི་བསྙོན། ༢༧ །སྲིད་ན་ལེགས་བྱས་སྣང་བ་ཇི་སྙེད་པ། །ཆོས་འདུལ་ཉིན་བྱེད་སྣང་འདིའི་བྱིན་རླབས་ཏེ། །གཞན་དུ་སྲིད་པའི་མུན་ཁམས་སྟུག་པོ་ལ། །རྨོངས་པས་ལྡོངས་བ་ཉིད་ལས་གཞན་ཡོད་མིན། ༢༨ །ཚུལ་ཁྲིམས་ཙནྡན་ལྗོན་པའི་བསུང་ཞིམ་དྲིས། །རེག་པའི་ཕྱག་དར་གོས་ཀྱི་ཚལ་བུའང་། །ལྷར་བཅས་འགྲོ་བའི་མཆོད་རྟེན་ཉིད་ཡིན་ན། །སུ་ཞིག་ལེགས་བྱས་འདི་ལ་སྤྲོ་མི་འགྱུར། ༢༩ །ངུར་སྨིག་བླ་གོས་གསལ་བའི་དམར་འོད་དང་། །འགྲོགས་པའི་ཚངས་སྤྱོད་སྡོམ་པ་གནས་གྱུར་པ། །དེ་སྲིད་ས་འདི་བསོད་ནམས་ལྡན་པ་སྟེ། །མཐོ་རིས་འདིར་འོང་བའང་དོན་ཡོད་འགྱུར། ༣༠ །ཐུབ་ཚུལ་བདུད་རྩིའི་ལམ་འདི་ནམ་གནས་པ། །དེ་སྲིད་སྣོད་བཅུད་དགེ་མཚན་དཔལ་གནས་ཏེ། །ནམ་ཞིག་བསྟན་པ་རིན་ཆེན་ཉམས་དམས་པ། །དེ་ཚེ་འབྱོར་བའི་གྲོང་འདིའང་ཉམས་པར་འགྱུར། ༣༡ །མི་འདུལ་ཁ་ལོ་བསྒྱུར་བ་བླ་ན་མེད། །འཇིག་རྟེན་མགོན་པོ་བདེ་གཤེགས་སྐྱོབས་རྣམས་ཀྱང་། །ཆོས་འདུལ་དམ་པའི་ཁྲིམས་ལས་མི་འགོང་ན། །ལམ་འདི་སངས་རྒྱས་མཛད་པ་ཁོ་ནར་གནས། ༣༢ །མཚུངས་མེད་སྐྱོབས་པ་དེ་ཡི་རྗེས་ཞུགས་ཏེ། །ཐུབ་པའི་ལེགས་གསུང་ཁྲིམས་ལས་མི་འགལ་བར། །ཚངས་སྤྱོད་ཡང་དག་སྡོམ་པའི་སྐལ་བ་ཅན། །གང་ཟག་དེ་ཡང་རྒྱལ་བའི་འཕྲིན་ལས་བྱེད། ༣༣ །དེ་ནི་བདུད་སྡེའི་གཡུལ་ལས་རྒྱལ་འགྱུར་ཏེ། །སྲིད་པའི་འདོད་ཡོན་དངོས་པོ་དུག་གི་ཆུར། །ཤེས་ཕྱིར་འདོད་པའི་རྒྱུ་ཡིས་འཆིང་མིན་ན། །དེ་ལ་གཞན་འཕྲུལ་ལྷས་ཀྱང་ཅི་བྱར་ཡོད། ༣༤ །རྒྱལ་འགྱུར་དྲེགས་པའི་སྙེམས་ཀྱང་དེས་སྤངས་ཏེ། །ཆོག་ཤེས་བདུད་རྩིའི་བཏུང་བས་ངོམ་པ་ལ། །ཡང་དག་ཆོས་ཀྱི་སྐལ་བ་ཕུན་ཚོགས་ཀྱིས། །ཞི་བའི་ཡོན་ཏན་ཚོགས་ཀྱང་འོས་པ་བཞིན། ༣༥ །འཆིང་འགྱུར་འཁོར་བའི་འཛིན་ཞེན་དེས་བཀྲོལ་བས། །ཕུལ་བྱུང་ཡོན་ཏན་ཕུང་པོའི་དཔལ་འཛིན་དེས། །ཐུབ་པའི་ཆོས་ཀྱི་འཁོར་ལོ་རང་དབང་བའི། །དཔལ་འདི་སངས་རྒྱས་སྲས་ཀྱི་རྒྱལ་ཐབས་ཡིན། ༣༦ །མཚན་དཔེའི་ཉི་མ་གཞོན་ནུ་དོན་ཀུན་འགྲུབ། །སྲིད་འདིར་འཁོར་ལོས་བསྒྱུར་བའི་དཔལ་སྤངས་ཏེ། །ཚངས་སྤྱོད་བླ་གོས་གསར་བ་ལྷུར་བཞེས་ནས། །སྲིད་གསུམ་རྒྱ་མཚོའི་ཕ་རོལ་དེས་བརྒལ་འགྱུར། ༣༧ །ངེས་འབྱུང་རྩ་བ་བརྟན་པའི་ཚུལ་ཁྲིམས་ལྗོན། །སྤང་བླང་ཁོ་ལག་རྒྱས་པའི་ཡལ་གའི་ཁྱོན། །ནོར་བདུན་འཕགས་པའི་འདོད་དགུའི་འཕྱང་འཕྲུལ་ཅན། །ཆོས་འདུལ་དཔག་བསམ་ལྗོན་པ་དེ་ཁོ་ན། ༣༨ །ནགས་ཚལ་མེ་ཏོག་རྒྱས་པའི་སྐྱེད་ཚལ་ན། །སྙོམ་ལས་གཉིད་ཀྱིས་མི་འཆིང་མིག་མི་འཛུམ། །བསམ་གཏན་བདུད་རྩིའི་བཅུད་ལ་དགྱེས་རོལ་བ། །ཆོས་འདུལ་འདི་འཛིན་ལྷ་ལས་ཁྱད་པར་འཕགས།༣༩ །གསོག་དང་བསྲུང་དང་སྤེལ་བའི་དུཿཁ་ནི། །དེ་ལ་ཡོད་མིན་འབྱོར་རྒུད་མཐའ་སྤངས་པས། །འཁོར་བར་རྙེད་དཀའི་ལོངས་སྤྱོད་རྣམ་པ་ཡང་། །རྩོལ་སྒྲུབ་མི་དགོས་དེ་ལ་ངང་གིས་འོང་། ༤༠ །སྲིད་འབྱོར་སྒྱུ་མའི་རྒྱལ་ཐབས་འཛིན་མིན་ཡང་། །དྲེགས་རློམ་ཁེངས་པའི་ཐོར་ཚུག་ཀུན་གནོན་པའི། །གང་ཞབས་སོར་མོས་རེག་པའི་རྡུལ་ཕྲན་ཡང་། །ས་གསུམ་བཀྲ་ཤིས་བྱེད་པའི་ངོ་མཚར་ལྡན། ༤༡ །ཡོངས་རྫོགས་ཁྲིམས་ཀྱི་རྩ་བ་བརྟན་ལྡན་པའི། །གཞི་གསུམ་ཡལ་ག་ཡངས་པའི་གྲིབ་བསིལ་དུ། །སྦྱང་ཡོན་ངལ་བསོའི་བདེ་བའི་བག་ཡངས་ཅན། །འདུལ་འཛིན་འཛམ་གླིང་མཛེས་པའི་ལྷ་དབང་ཡིན། ༤༢ །ཆོས་འདུལ་བཅས་པའི་ར་བ་མི་བརྟན་ན། །ཏིང་འཛིན་མེ་ཏོག་རྒྱས་པའི་གེ་སར་བཅུད། །སྐལ་བཟང་བུང་བའི་ཉེར་འཚོར་མི་བརླིང་སྟེ། །རྣམ་གཡེང་ཕྱུགས་ཀྱིས་བརྫིས་པའི་མྱ་ངན་སྦྱིན། ༤༣ །ཕ་རོལ་ཉེས་སྤྱོད་གཡུལ་ལས་ཕམ་མིན་པའི། །སྡོམ་པའི་རྩ་བ་རྣམ་བཞིའི་ཡ་ལད་ཅན། །ཚངས་པར་སྤྱོད་ལྡན་མི་འཚོ་བདེན་སྨྲ་ཞིང་། །འདོད་པ་ཆུང་དང་ཆོག་ཤེས་ཁོ་ནས་མཛེས། ༤༤ །མ་ཆགས་མི་བཀུར་འགྱོད་པའི་སེམས་ལྡན་མིན། །ཚངས་པར་མཚུངས་སྤྱོད་གྲོགས་ཀྱི་ངག་ལ་གུས། །བསླབ་པའི་ཡན་ལག་གཙོ་བོ་འདིས་མཛེས་པ། །བག་ཡངས་ཐོས་དང་ཏིང་འཛིན་སྟོབས་ཀྱིས་རྒྱལ། ༤༥ །གོས་གདན་ཡོ་བྱད་ཉུང་དང་གྱི་ནས་འཚོ། །གསོག་དང་འཇོག་སྤངས་བསོད་སྙོམས་བརྟུལ་ཞུགས་ཅན། །སུམ་བཅུའི་གྲངས་འཛིན་ལྟུང་བའི་སྒོ་བཅད་པ། །དེ་ལ་དོན་མང་འདུ་འཛི་ཇི་ལྟར་སྐྱེ། ༤༦ །ཕམ་བཞིའི་ཆར་གཏོགས་ཉེས་མང་རྒྱུན་བཅད་ནས། །གསོ་དང་དགང་སླ་མཐུན་པའི་སྤྱོད་ལམ་ཅན། །ལྟུང་བ་དགུ་བཅུའི་གོ་སྐབས་འབྱེད་མིན་པ། །ཏིང་འཛིན་ཞི་བའི་དགའ་བས་ཅིས་མི་དགའ། ༤༧ །ཅི་ནས་མཛེས་པ་ཞི་བའི་སྤྱོད་ལམ་གྱིས། །ཕ་རོལ་མ་དད་སྐྱེ་བའི་རྒྱུ་སྤངས་ཤིང་། །མ་བརྟགས་བག་མེད་སྤྱོད་པ་ཀུན་སྡོམ་པ། །ཉེས་མང་ཉེས་བྲལ་འཇིག་རྟེན་མཛེས་པའི་རྒྱན། ༤༨ །མ་རུང་ཁོང་ཁྲོའི་མེ་ཆེན་གཏུམ་པོ་ཡིས། །དགེ་ཚོགས་ནགས་ཚལ་ཟ་ལ་རིངས་པ་ན། །བྱམས་པའི་ཆུ་ཆར་འཛིན་པའི་རང་བཞིན་སྤྲིན། །ཚངས་སྤྱོད་ཞི་བའི་ཡིད་མཁར་བསྡུས་པ་བཞིན། ༤༩ །དབྱིབས་དང་ཁ་དོག་རེག་བྱ་མཛེས་འཇམ་ཞེས། །མ་བརྟགས་སྲེད་པའི་སྤུ་ལོང་གཡོ་བགྱིད་ལ། །མི་སྡུག་མི་གཙང་རང་བཞིན་ཤེས་པའི་བློ། །ཆགས་རྡུལ་དྲི་མ་བཀྲུ་བའི་ཆུ་གཙང་བགྱིད། ༥༠ །སྔོན་དང་ཕྱི་མཐའ་ད་ལྟའི་གནས་རྨོངས་ལ། །རྟེན་ཅིང་འབྲེལ་འབྱུང་དམ་པའི་ཆོས་སྒྲོན་མས། །སྲིད་རྩ་མ་རིག་མུན་པའི་དཔུང་བཅིལ་ནས། །ཡང་དག་ལམ་བཟང་མགྲོན་དུ་བོས་པ་བཞིན། ༥༡ །རྣམ་གཡེང་ཚང་ཚིང་ནགས་སུ་མི་འཕྱན་ཞིང་། །རྩེ་གཅིག་དམིགས་པའི་ལམ་ལས་མི་འཁྱོར་པར། །རྣམ་གསུམ་ཞི་བའི་ཞི་གནས་གསོ་སྦྱོང་གིས། །མྱ་ངན་འདས་པའི་སྒོ་འཕར་འབྱེད་ལ་བརྩོན། ༥༢ །མཐུན་པ་འདུས་པ་ཅི་ནས་ཐུགས་མཐུན་ཞིང་། །ཉིས་བརྒྱ་ལྔ་བཅུ་དག་པའི་ཚུལ་མཐུན་པ། །མཐུན་པའི་ཞུ་དག་སོ་ཐར་བཀར་བགྱིས་པས། །གང་བའི་ཟླ་དཀྱིལ་མི་མཐུན་མེད་བཞིན་མཛེས། ༥༣ །གནས་བསྲུང་གནས་པའི་བསླབ་པ་མི་གཏོང་བ། །ཆར་དུས་ཆར་གྱི་ལོ་ཏོག་གསོ་བ་བཞིན། །ཕན་ཚུན་ཡོན་ཏན་བསུང་ཞིམ་གཅིག་ལ་གཅིག །བགོ་བའི་སྣང་ཚུལ་ལྷ་ཡི་སྐྱེད་ཚལ་བཞིན། ༥༤ །ལྟུང་དང་རྙེད་རྒྱུས་འཐབ་ཀྲོལ་འབྱུང་བའི་སྒོ། །དགག་ལས་བྱེད་པའི་ཚུལ་བཟང་རྨད་བྱུང་བས། །གླེང་དྲན་གདམས་ཆུས་ཕན་ཚུན་བསིལ་སྦྱིན་ཞིང་། །རྣམ་གསུམ་གོས་རྒྱུས་རྙེད་པ་ཉུང་མིན་བདེ། ༥༥ །གནས་སྐབས་ཟླ་དཀྱིལ་འཕེལ་དང་འགྲིབ་སྣང་ཡང་། །ཡར་མར་ཕྱོགས་མཐར་གང་དང་སྟོང་མཐུན་བཞིན། །སྐྱོན་ཡོན་འཕེལ་འགྲིབ་གསོ་དང་སྦྱོང་ཐབས་ཀྱིས། །སྐྱོན་སྟོང་ཡོན་ཏན་ཕྱོགས་ཀྱིས་གང་བ་མཛེས། ༥༦ །དབྱར་ཟླའི་ཆར་གྱིས་ལོ་ཏོག་བསྐྱེད་བསྲིང་ཞིང་། །མཚོ་དང་རྫིང་བུ་གང་ཞིང་མཛེས་པ་བཞིན། །ཐོས་སོགས་ཡོན་ཏན་མཐུན་པའི་ཆུས་སྐྱེད་ཅིང་། །རྙེད་པའི་ཚོགས་ཀྱིས་གང་བའི་མཚོ་བཞིན་གནས། ༥༧ །སྟོན་ཟླའི་དཔལ་མོས་འབྲས་མང་བགོ་བྱའི་ཚོགས། །སྦྱིན་པ་སྙེ་མ་གཡུར་ཟ་ལྡེམ་པ་བཞིན། །ཕན་པའི་ངག་དང་རྙེད་པའི་བགོ་བྱའི་ཤས། །དུ་མར་སྤྱོད་པས་འདུས་པའི་ཚོགས་རབ་དགྱེས། ༥༨ །ཕྱི་ནང་རྟེན་འབྲེལ་མཐུན་པའི་སྤྱོད་བཟང་འདི། །ཐུབ་པའི་སྲས་ཀྱི་ཐུབ་ཚུལ་རྨད་བྱུང་སྟེ། །ལམ་འདི་གང་གནས་ལྷར་བཅས་འགྲོ་མང་གི །བསོད་ནམས་ཞིང་དུ་སྟོན་པ་མཆོག་དེས་གནང་། ༥༩ །གཞི་གསུམ་ཚུལ་འདི་གང་དུ་གནས་པ་དེར། །རྒྱལ་བསྟན་རིན་ཆེན་གནས་ཞེས་གདངས་འོས་ལ། །ཡུལ་དབུས་ཡུལ་གྱི་སྙིང་པོ་དམ་པ་ཞེས། །བསྔགས་པའི་མེ་ཏོག་འདི་མིན་གང་ལ་འཐོར། ༦༠ །གྲོང་དང་གྲོང་འདབ་འདུ་འཛིའི་གནས་ལས་རིང་། །༡དགོན་དང་དུར་༢ཁྲོད་དབེན་པའི་༣ཤིང་གི་དྲུང་། །༤ཇི་བཞིན་གཞི་ལ་བླ་གབ་༥མེད་གནས་པའི། །ཐུབ་པའི་སྲས་འདི་རི་དྭགས་རྒྱལ་པོ་བཞིན།༦༡ །༦འཇམ་པོར་མ་ཆགས་མང་༧པོར་དེ་མ་ཡིན། །བཟང་༨པོར་མ་ཞེན་ངན་ངོན་ཙམ་གྱི་གོས། །ཐར་བའི་རྒྱལ་མཚན་དྲང་སྲོང་ཚུལ་མཐུན་པའི། །དྲང་སྲོང་ཆེ་དེ་འདོད་པ་ཆུང་བའི་ཕུལ།༦༢ །༩ལན་གཅིག་བསོད་སྙོམས་དུས་གཅིག་ལས་མི་ལེན༡༠། །སྟན་༡༡གཅིག་ཟས་ཀྱིས་འཚོ་ཞིང་བདེར་གནས་པ། །འགྲང་ཆེན་བཀྲེས་པའི་མཐའ་གཉིས་གནས་གསལ་བའི། །ལུས་སྤྱོད་སྲབ་འདིའི་སེམས་རྟའི་འདུལ་དཔྱད་བྱས། ༦༣ །ཉལ་དང་འཁྲས་སོགས་སྙོམ་ལས་བདེ་བའི་རོར། །ཆགས་མིན་གཉིད་ཀྱི་མྱོས་པ་རྒྱང་རིང་བཏང་། །༡༢ཙོག་པུའི་སྤྱོད་པས་མཚན་མོའི་དུས་འདའ་བས། །ཞི་བའི་ཏིང་འཛིན་མགྲོན་དུ་བོས་པ་བཞིན། ༦༤ །ཚུལ་ཁྲིམས་བྱུག་པས་བསིལ་དང་བསུང་ཞིམ་བྱིན། །ངོ་ཚ་ཤེས་གོས་བགོས་ལ་བཀྲ་ཤིས་བྱས། །ཡོན་ཏན་རྒྱན་གྱི་རྒྱན་གཞན་ཟིལ་གནོན་པ། །ས་སྟེང་འདི་ན་ལྷ་ལས་ལྷག་པར་མཛེས། ༦༥ །རྙེད་པའི་འདོད་ཆུང་བྱམས་པའི་འདོད་རབ་འཕེལ། །འབྱོར་བས་ཆོག་ཤེས་ཡོན་ཏན་ཆོག་མི་ཤེས། །སྲིད་པའི་བདེ་སྤངས་ཏིང་འཛིན་བདེ་བས་དགྱེས། །རྣལ་འབྱོར་སྤྱོད་མཆོག་ཕལ་བའི་ཡུལ་ལས་འདས། ༦༦ །དབེན་པའི་ཤིང་དྲུང་ཞི་བའི་གནས་མཛེས་ལ། །ཐར་བའི་རྒྱལ་མཚན་བགོ་བའི་གོས་མཛེས་ཤིང་། །ཅི་ནས་མཛེས་པའི་སྤྱོད་ལམ་ཀུན་མཛེས་པ། །མཛེས་པ་སྟོང་གི་གནས་སུ་བྱས་པ་བཞིན།༦༧ །དལ་འབྱོར་རྟེན་བཟང་གཙང་མའི་ཟས་ཀྱིས་འཚོ། །ལྷ་ཚོགས་ཡིད་དབང་གཙང་མའི་སྤྱོད་པས་དགའ། །གཙང་མའི་ཆོས་ཆར་གསལ་བ་འཛིན་མཁས་འདིར། །གཙང་རིས་ལྷས་ཀྱང་བསྒྲུན་དུ་ཡོད་དམ་ཅི། ༦༨ །དག་པ་ཡིད་ཀྱིས་ལུས་སྤྱོད་དག་བྱས་ཤིང་། །ཡང་དག་འཚོ་བས་རྣམ་སྨིན་ལྕི་བ་དག །མ་དག་ལྟུང་བའི་རྙོགས་མ་ཀུན་དག་པ། །དག་པའི་མཁའ་ལ་གང་བའི་ཟླ་དཀྱིལ་བཞིན། ༦༩ །ཏིང་འཛིན་བདེ་བའི་བདུད་རྩི་མཆོག་གིས་མྱོས། །བག་ཡངས་གནས་སུ་སྤྱོད་ལམ་ཅི་ཡང་བདེ། །གནོད་མེད་འགྱོད་མེད་འདི་དང་ཕྱི་མར་བདེ། །སངས་རྒྱས་སྲས་དེ་བདེ་ནས་བདེ་བར་འགྲོ། ༧༠ །ཡོ་བྱད་མང་པོའི་གསོག་བསྲུང་རྒྱང་དུ་བཏང་། །བཟའ་བཏུང་མང་པོའི་གཡོ་བསྐོལ་དགོས་པ་མེད། །འདུ་འཛི་མང་པོའི་བྲེལ་དོ་སྤངས་གྱུར་དེ། །ལྷ་ཚོགས་མང་པོའི་ཕྱག་འོས་གྱུར་ལ་ལྟོས། ༧༡ །དལ་བའི་རྟེན་ལ་དལ་བའི་སྤྱོད་ལམ་ཅན། །དུལ་བའི་སྒོ་གསུམ་འདུལ་བའི་ཁྲིམས་ཀྱིས་བསྡམ། །གདུལ་དཀའི་གཞན་རྒྱུད་ཞི་བའི་ཆོས་ཀྱིས་འདུལ། །འདུལ་འཛིན་མཆོག་དེ་རྒྱལ་བའི་རྒྱལ་ཚབ་ཡིན། ༧༢ །ངན་པའི་གྲོགས་སྤང་བཟང་པོའི་ཆོས་ལ་བརྟེན། །དམན་པའི་ས་བཟུང་མཐོན་པོའི་ལམ་བཟང་སྙེགས། །སྲིད་པའི་ཞེན་བཅད་ཞི་བའི་ཏིང་འཛིན་གནས། །མི་གྲལ་ནས་བུད་ལྷ་བརྒྱའི་གཙུག་རྒྱན་བྱེད། ༧༣ །ཚུལ་ཁྲིམས་མ་ལ་ཡ་ཡི་བསུང་ཞིམ་དྲིས། །ཏིང་འཛིན་རེག་བྱའི་བསིལ་བ་མཆོག་སྦྱིན་པ། །ཤེས་རབ་བདུད་རྩི་མཆོག་གི་དཔལ་ཐོབ་དེའི། །འཆི་མེད་ཞི་བའི་ལམ་དང་མཛའ་བར་བྱས། ༧༤ །མ་ཆགས་ཡང་དག་འཕགས་པའི་རིགས་ལ་གནས། །ལྟ་སོགས་ཡང་དག་འཕགས་པའི་ལམ་ལ་བརྟེན། །འཕགས་པ་དགྱེས་པའི་སྤྱོད་པ་ལྷུར་ལེན་པ། །འདུལ་འཛིན་མཆོག་དེ་ལྷ་མིའི་མཆོད་སྡོང་ཡིན། ༧༥ །གཤེ་ཡང་མི་གཤེ་ཁྲོས་ཀྱང་སླར་མི་ཁྲོ། །བརྡེག་ཀྱང་མི་བརྡེག་མཚང་འབྲུའི་བསམ་པ་མེད། །དགེ་སྦྱོང་ཆོས་ཀྱི་ལྷབ་ལྷུབ་བགོ་བ་ཅན། །འདུལ་འཛིན་མཆོག་དེ་བཟོད་པའི་རྒྱན་གྱིས་མཛེས། ༧༦ །ཀློག་དང་སྤོང་བ་རབ་ཏུ་བྱུང་བའི་ལས། །འདི་ལ་གནས་ཏེ་ལུང་རྟོགས་རྒྱལ་བའི་བསྟན། །བཤད་དང་སྒྲུབ་པའི་གྲག་པས་ལེགས་བཏེགས་པ། །འདུལ་འཛིན་མཆོག་དེས་བསྟན་པའི་ཁུར་ཆེན་ཁྱེར། ༧༧ །དད་ལྡན་བསོད་ནམས་བསགས་པའི་ཞིང་མཆོག་སྟེ། །འབྱོར་ལྡན་སྦྱིན་པའི་གནས་བཟང་བླ་ན་མེད། །གུས་ལྡན་ཡང་དག་བསླབ་གཞི་བླང་བའི་ཡུལ། །འདུལ་འཛིན་མཆོག་དེ་མངོན་མཐོ་ངེས་ལེགས་གཞི། ༧༨ །རྒྱལ་བསྟན་རིན་ཆེན་ནོར་བུའི་གླིང་བགྲོད་དེ། །བསླབ་གསུམ་ནོར་གྱི་བགོ་སྐལ་དོན་གཉེར་བའི། །སྐལ་བཟང་དོན་མཐུན་ཆོས་ལམ་རྒྱུ་བ་ལ། །འདུལ་འཛིན་མཆོག་དེ་དམ་པའི་དེད་དཔོན་ཡིན། ༧༩ །ཚུལ་ཁྲིམས་ཟུང་གིས་དལ་འབྱོར་གྲུ་རྙེད་དེ། །བརྩོན་པའི་དར་ཆེན་མཐུན་པའི་རླུང་གིས་བསྐྱོད། །ཐར་པའི་སྐམ་སར་འགྲོ་ཀུན་ལེགས་འདྲེན་པའི། །འདུལ་འཛིན་མཆོག་དེ་ཐར་ལམ་མཉན་པ་ཡིན། ༨༠ །ཐོས་པའི་ཉི་གཞོན་བསམ་པའི་ཤིང་རྟས་དྲངས། །བསྒོམ་པའི་འོད་ཀྱིས་སྒྲིབ་པའི་མུན་པ་བཅོམ། །སྐལ་བཟང་འགྲོ་ལ་ལམ་མཆོག་མིག་སྦྱིན་པའི། །འདུལ་འཛིན་མཆོག་དེ་ཉིན་མོའི་སྣང་བ་ཡིན། ༨༡ །ཞི་བའི་ཚུལ་གྱིས་མ་དད་དད་བགྱིད་ཅིང་། །བསླབ་པའི་སྤྱོད་པས་དད་པ་སྨིན་པར་བྱེད། །དོན་བཟང་ཆོས་ཀྱིས་སྨིན་པ་གྲོལ་མཛད་པ། །འདུལ་འཛིན་མཆོག་དེ་འབྲེལ་ཚད་དོན་ལྡན་ཡིན། ༨༢ །གཏོང་བའི་སྐལ་ཆེན་དབུལ་བ་རྒྱུན་གཅོད་ཅིང་། །འདོད་པའི་འབྲས་ཀུན་གང་ལས་བླང་མི་དཀའ། །ཕན་པའི་འབྱུང་གནས་དུས་ཀུན་མི་བསླུ་བ། །འདུལ་འཛིན་མཆོག་དེ་དཔག་བསམ་ལྗོན་པ་ཡིན། ༨༣ །བག་མེད་གནས་ལས་དམ་པའི་ཆོས་ཀྱིས་བསྐུལ། །ཉེས་སྤྱོད་ལྷ་མིན་གཡུལ་ལས་རྣམ་རྒྱལ་བྱེད། །རྣམ་ཀུན་ཡང་དག་ཕན་པ་སྒྲུབ་བྱེད་པ། །འདུལ་འཛིན་མཆོག་དེ་ལྷ་ཡི་རྔ་སྒྲ་ཡིན། ༨༤ །སྙིགས་མའི་དུས་འདིར་དཀོན་མཆོག་རྣམ་གསུམ་ཞེས། །མཇལ་དུ་རུང་བ་མཁས་པ་འདི་ལས་གཞན། །ཡོད་པ་མིན་ན་ཤེས་ལྡན་སུ་གང་དག །འདུལ་འཛིན་རྒྱལ་བའི་སྲས་འདིར་ཅིས་མི་དད། ༨༥ །བསླབ་པ་ཀུན་གྱི་རྩ་བ་གཅིག་པུ་སྟེ། །ཡོན་ཏན་ཀུན་གྱི་གཞི་རྟེན་ཆེར་བསྔགས་པ། །དམ་པའི་ཆོས་མཆོག་འདུལ་བ་རིན་པོ་ཆེ། །སྲིད་པ་གསུམ་གྱི་རྒྱན་གཅིག་འདི་ཁོ་ན། ༨༦ །ལམ་འདིར་འཇུག་པའི་སྐལ་བ་བཟང་ཐོབ་ནས། །མ་ཉམས་ཚུལ་ཁྲིམས་མིག་འབྲས་བཞིན་དུ་བསྲུང་། །དབེན་པའི་གནས་སུ་བརྩོན་པས་གནས་བགྱིད་དེ། །ཐུབ་པའི་སྲས་ཞེས་བརྗོད་པ་དོན་དང་ལྡན། ༨༧ །གང་ན་དགེ་ལེགས་ཚུལ་འདི་གནས་གྱུར་པ། །དེ་ན་ཐུབ་པའི་བསྟན་པ་གནས་སོ་ཞེས། །ལྷ་དང་བཅས་པའི་འདུ་བ་རྒྱ་ཆེ་ཞིང་། །ཀུན་ཀྱང་རབ་དགའི་མེ་ཏོག་གཏོར་ལ་བྲེལ། ༨༨ །དམར་སེར་ཐུན་མཚམས་སྤྲིན་གྱི་ཕྲེང་བ་ལྟའི། །ངུར་སྨིག་འཛིན་པའི་གྲལ་རིགས་སྲིད་མཐར་ཡང་། །རྒྱལ་བའི་མཛད་བཟང་འགྲོ་ལ་སྣང་བགྱིད་དེ། །ཁམས་གསུམ་ཞི་བར་འདྲེན་པའི་དེད་དཔོན་ཉིད། ༨༩ །ཐུབ་པ་བདེ་གཤེགས་སྐྱོབས་པ་ཐུགས་རྗེ་ཅན། །འཛམ་བུའི་གླིང་འདིར་བསྟན་པའི་སྒྲོན་མེ་སྦར། །སྣང་བྱེད་ཉི་མ་དེ་ནི་དབྱིངས་སུ་གཤེགས། །ཆོས་འདུལ་སྟོན་པའི་རྒྱལ་ཚབ་ཉིད་དུ་བཞུགས། ༩༠ །གྲངས་མེད་ལེགས་བྱས་ཚོགས་གཉིས་བང་མཛོད་ནས། །བདུན་བརྒྱའི་གྲངས་སྙེད་འཁོར་ལོའི་བསྒྱུར་རྒྱལ་དཔལ། །འཛིན་པའི་རྒྱུར་ངེས་དགེ་ཚོགས་དངོས་པོ་ཡང་། །བརྩེ་བས་རྗེས་འཇུག་སྐལ་པ་ཁོ་ནར་བསྔོས། ༩༡ །གང་ལ་བསྟེན་ན་རྣམ་གྲོལ་གོ་འཕང་ཡང་། །སྟེར་ནུས་བསླབ་གསུམ་ནོར་བུའི་བང་མཛོད་དང་། །ཐུགས་ཀྱི་གསང་བ་ཐེག་གསུམ་དམ་པའི་ཆོས། །ཐུབ་པའི་འབྱོར་པ་རྒྱ་མཚོ་སྲིད་འདིར་བཞག ༩༢ །ལྗོངས་གང་མུ་གེས་བསྐལ་པས་ཉམ་དམས་ཏེ། །བྲེ་གང་ཕྱེ་ལ་བདུན་འགྱུར་མུཀྟི་ཀ །གཞལ་བར་བྱེད་ཀྱང་ཚངས་སྤྱོད་སྐལ་འཛིན་པ། །བཀྲེས་པས་གདུང་བར་མི་འགྱུར་ཞལ་བཞེས་གནང་། ༩༣ །ཀྱེ་མ་སྙིགས་མ་འདིར་སྐྱེས་རབ་བྱུང་གཟུགས། །ཐུབ་པའི་ཆོས་ཀྱི་རྒྱལ་སྲིད་མ་ཉམས་པ། །ལྷར་བཅས་འགྲོ་བའི་མཆོད་སྡོང་དེ་བཟུང་ནས། །དུག་ཅན་ལོག་འཚོས་རྙེད་ཕྱིར་འཚོང་བར་བྱེད། ༩༤ །ཐུབ་བསྟན་རྒྱལ་བོའི་རིགས་བཟང་འདིར་སྐྱེས་ནས། །ཚངས་སྤྱོད་དམ་པའི་རྒྱལ་སྲིད་མི་འཛིན་པར། །ཐ་ཆད་མུ་ཏོའི་གྲལ་དུ་རང་གིས་རང་། །འཕེན་འདི་ཀྱི་ཧུད་སུ་ཡིས་བསླུས་པ་ལགས། ༩༥ །ཀྱེ་མ་བྱིས་པ་བསླུ་བའི་སྙན་གྲགས་དང་། །ཚུར་མཐོང་སྨུག་རྒྱུའི་ཆུ་བོའི་རྗེས་བསྙེགས་ ཤིང་། །རྣམ་གྲོལ་ལྷ་ཡི་བདུད་རྩི་རང་གི་ལག །མཆིས་འདི་ཕོ་བར་བྱེད་ན་སྨྱོའམ་ཅི། ༩༦ །ཐུབ་པ་མཚན་དཔེའི་རང་བཞིན་ལྷའི་ཡང་ལྷ། །དབང་པོའི་རྒྱན་མཆོག་ནོར་བུའི་དོ་ཤལ་ཡང་། །དེ་ལ་འོས་མིན་མོག་པོར་བྱེད་པ་ཡི། །རྒྱན་སྤང་ཕྱག་དར་ཁྲོད་པའི་གོས་བཞེས་མཛད། ༩༧ །སྙིགས་མའི་སྐལ་ཆད་ཐུབ་དེའི་རྗེས་འཇུག་ཏུ། །ཁས་འཆེས་མི་གཙང་རྐྱལ་བའི་རང་བཞིན་ལུས། །ཆེ་ནོར་འོས་པའི་ཟ་འོག་གིས་དཀྲིས་ནས། །མི་གནོད་གྲགས་པར་བྱེད་པ་འདི་ཅི་ཞིག ༩༨ །ཐར་བའི་གྲོང་ན་ཐུབ་པའི་རྗེས་འབྲང་སྟེ། །འགྲོ་བའི་མགོན་དུ་གཤེགས་ལ་དགའ་མིན་པར། །འཁོར་བའི་གྲོང་ན་ཁྱིམ་པའི་གཡོག་བགྱིད་པའི། །དམར་སེར་ཅན་དེ་བདུད་ཀྱིས་བསླུས་པ་ལགས། ༩༩ །སྤང་བླང་རི་མོ་འབུམ་བཀྲ་ཆོས་འདུལ་གོས། །གཞལ་དཀའི་ཡོན་ཏན་ཟ་འོག་མ་རྙིང་བ། །འདི་བགོས་ཁྱིམ་གནས་གྲོང་བའི་ཐལ་ཕུང་དུ། །སྤྱོད་ངན་འགྲེ་ལྡོག་བགྱིད་འདི་སྙིང་རྗེའི་གནས།༡༠༠ །ཤཱཀྱ་སེངྒེ་སྐྱོབས་དེས་ལན་བརྒྱར་ཡང་། །དབུ་དང་ཕྱག་ཀྱང་གཏོང་བའི་དཀའ་བ་ཡིས། །དུས་རིང་བསྒྲུབས་པའི་ཆོས་མཛོད་བདུད་རྩིའི་ལམ། །མི་ཕོངས་བསྟན་པའི་བཙས་སུ་འདི་བཞག་མོད།༡༠༡ །ཀྱེ་མ་ལོག་སྤྱོད་གོམས་པའི་སྐྱེ་བོ་ནི། །ཕན་མཛད་དེ་ཡི་བསྟན་པའི་ནགས་ཀློང་དུ། །ཞུགས་ནས་གཉིས་ཕུང་བགྱིད་པའི་ཞུགས་སྦར་བ། །ཀྱི་ཧུད་ཕྱོགས་བཅུའི་རྒྱལ་བས་གཟིགས་སམ་ཅི།༡༠༢ །སྙིགས་མའི་བསྐལ་མཐར་སྐྱེས་པ་བདག་དང་གཞན། །ཐུབ་ཚུལ་ཡོན་ཏན་རང་བཞིན་ཅུང་ཟད་ཙམ། །མཐོང་བ་མཆིས་ན་ཉོན་མོངས་གཞན་དབང་གིས། །ཤེས་བཞིན་ཁྱད་དུ་གསོད་པར་མ་གྱུར་ཅིག ༡༠༣ །བསྔགས་འོས་དམ་པའི་ལམ་བཟང་འདི་བསྔགས་པའི། །དགེ་ཚོགས་ཕུང་བོ་ཇི་སྙེད་མཆིས་ཀུན་དང་། །བདག་གིས་དུས་གསུམ་བསགས་པའི་དགེ་རྩར་བཅས། །བསྟན་པ་མི་ཉམས་གནས་པའི་རྒྱུ་རུ་བསྔོ།༡༠༤ །བསྔོས་པ་ཇི་བཞིན་འགྲུབ་པའི་མཐུན་གྱུར་དུ། །དབྱིངས་ནས་རྒྱལ་བ་སྲས་བཅས་བཞེངས་མཛད་ཅིང་། །ལྷག་བསམ་དམ་པའི་གཞོན་ནུ་ཤྲཱི་ཡང་། །བསམ་དོན་ཆོས་བཞིན་འགྲུབ་པའི་བཀྲ་ཤིས་ཤོག །