ཉམས་ལྡན་སོགས་ཁ་ཤས་ཀྱི་རྩོམ་དཔེ།

Previous Text Back to Volume Page Next Text

Wylie title	nyams ldan sogs kha shas kyi rtsom dpe
Location	dpal sprul bka' 'bum Volume 1, Text 5, Pages 117-119 (Folios 1a1 to 2a4)
Author	དཔལ་སྤྲུལ་རིན་པོ་ཆེ་
Less details More details
Citation	Dpal sprul rin po che. Nyams ldan sogs kha shas kyi rtsom dpe. In Dpal sprul 'jigs med chos kyi dbang po'i gsung 'bum, Vol. 1: 117-119. Kathmandu: Tsadra Foundation and Shechen Publications, 2026.
Genre	Poetry - snyan ngag

[edit]

༄༅། །ཉམས་ལྡན་སོགས་ཁ་ཤས་ཀྱི་རྩོམ་དཔེ། མི་སྡུག་པའི་ཉམས། རུལ་ཞིང་མྱག་པ་གཤང་ལྕིའི་ཁྲོད། །དྲི་ངའི་ནང་དུ་ལུས་བྱིང་ཞིང་། །རྟག་པར་མི་གཙང་ཉིད་སྤྱོད་དེ། །ཐུབ་འོད་ཀྱིས་རེག་ལྷ་ཡུལ་འགྲོ། །བཞད་གད་ནི། ཐུབ་པ་དངོས་པོར་སྟོན་བཞེད་པས། །དང་པོར་བྱང་ཆུབ་གཉེར་བ་ན། །ཟབ་པ་ཞི་བ་སྤྲོས་བྲལ་བ། །གསུང་དེས་ཅིའི་སླད་གསང་མི་མཛད། །རྨད་བྱུང་ནི། ཐུབ་པའི་བྱིན་རླབས་འོད་སྣང་གིས། །རེགས་པའི་ལྗོན་ཤིང་ཁང་བཟང་དང་། །མེ་ཏོག་ལས་ཀྱང་དོན་ཟབ་པས། །ཡིད་འོང་ཆོས་སྒྲ་སྒྲོགས་འདི་མཚར། །འཇིགས་རུང་གི་ཉམས། རིང་ནས་ཐུབ་པའི་རྗེས་འབྲང་བ། །གསང་བའི་བདག་པོ་ལྷས་བཟུངས་པའི། །འབར་བའི་རྡོ་རྗེ་མི་བཟད་པ། །དྲན་ན་བདུད་སྡེའི་མགོ་ཡང་འགེམས། །རྣམ་གྲངས་བརྗོད་པ་ནི། མི་སྲུན་སྨོན་ལོག་མཐུ་རྫོགས་པ། །ལྷས་བྱིན་བསམ་པ་ལ་གཟིགས་ནས། །ཐུབ་པ་སོ་སྐྱེས་འཁོར་དང་བཅས། །མི་གསུངས་མཉམ་བཞག་ཁོ་ནས་བཞུགས། །བཟློག་པའི་དཔེ། ཐུབ་ཁྱོད་བསྐལ་པ་གྲངས་མེད་དུ། །ཚོགས་གཉིས་མ་གོམས་དེ་མིན་པས། །སྲིད་མཐར་བྱམས་པའི་ཏིང་འཛིན་ལ། །བདུད་སྡེའི་རྒོལ་བའི་ནུས་པ་བྲལ། །ཡང་། ཐུབ་ཁྱོད་ལམ་དུ་རང་དོན་ལ། །ཞེན་པ་མ་སྤངས་མ་ཡིན་ན། །སྔ་ནས་དམན་པའི་ལམ་དག་ལས། །ཆགས་བྲལ་མངོན་དུ་བྱེད་པ་ཞིག །རིང་འབྲས་ནི། ཐུབ་གསུངས་ལེགས་བཤད་མི་ཡུལ་དུ། །སྐལ་བཟང་ལྡན་ལ་སྒྲོགས་པས་ན། །ཟུར་གྱིས་ངན་འགྲོའི་རྨོངས་པ་རྣམས། །ཐར་པའི་ས་བོན་འདེབས་ལ་ལྟོས། །ལྷན་ཅིག་གི་རྒྱུ་ནི། ཁྱོད་གསུངས་བདུད་རྩི་ཆོས་འཁོར་གྱིས། །ཐར་ལམ་ངོ་བོར་སྟོན་པ་དང་། །ལྷན་ཅིག་སྐལ་བ་མཉམ་པའི་འཁོར། །སྲིད་མཐར་ཕྱིན་པ་ངོ་མཚར་རྨད། །འབྲས་བུ་སྔ་བ། གྲངས་མེད་གོང་ནས་འོག་མིན་དུ། །མངོན་རྫོགས་བྱང་ཆུབ་ཐོབ་བྱས་ཤིང་། །ཕྱིས་ནས་སྲིད་འདིར་བྱང་ཆུབ་ལམ། །སྦྱོང་བ་ཐུབ་པའི་ཐབས་མཁས་ཡིན། །རིགས་མིན་གྱིས་བཟློག་པ། ཐུབ་གསུངས་འཇམ་པ་རྣར་སྙན་ལ། །ཅི་ནས་དགའ་བ་བསྐྱེད་བྱེད་པ། །བདུད་སྡེའི་སྙིང་ལ་ཟུག་རྔུའི་དཔལ། །ཚད་པས་གདུང་བ་སྐྱེས་ལ་ལྟོས། །རིགས་པའི་བཟློག་པ། ཐུབ་པའི་ཚེམ་དཀར་ཡིད་འོང་ལ། །རེག་པའི་གསུང་གི་ཟླ་ཟེར་གྱིས། །སྐལ་བཟང་བློ་ཡི་ཀུ་མུད་ད། འབྱེད་འདིར་ངོ་མཚར་གནས་གཅིག་ཡིན། །ཟུར་གྱིས་ཕྲ་མོ་ནི། མཚན་གཞི་མེད་པའི་མཚན་ཉིད་ལ། །འདྲི་བའི་མུར་སྟུག་གཞན་དག་ལ། །བདག་མེད་འཇིག་རྟེན་མེད་སྟོན་ཕྱིར། །ཐུབ་པ་ཅི་མི་གསུངས་པར་བཞུགས། །རྣམ་པའི་ཕྲ་མོ་ནི། སྐུ་ཚེ་འོད་དང་སྐུ་བོང་གིས། །མཆོག་དམན་བལྟ་བའི་གང་ཟག་ལ། །ཞིང་འདི་དག་ནི་ཞིང་གཞན་གྱི། །རྒྱལ་ཀུན་ངོ་བོ་གཅིག་ཏུ་སྟོན། །ཆེས་སྨད། ཁྱོད་ཀྱི་བསྟན་ལས་ཕྱིར་གྱུར་བ། །ལམ་འདི་འགྲོ་བས་ཆས་སྨད་དེ། །འདི་མེད་ན་ཡང་ཐུབ་ཁྱོད་ཀྱི། །བསྟན་པའི་ཁྱད་ཆོས་སུ་ཡིས་ཤེས། །ཆས་བསྟོད། གཅིག་ཏུ་ཐུབ་བསྟན་ལ་སྡང་བདུད། ཁྱོད་ཀྱི་བྱང་ཆུབ་སྤྱོད་མཆོག་གི །གྲོགས་སུ་ངེས་ཀྱང་ཡུན་རིང་དུ། །ངལ་བ་འབྲས་མེད་བགྱིད་འདིས་ཅི། །ཞེས་པ་ལྟ་བུའོ།། །།