PJCW-KABUM-06-CHA-015
༄༅། །གྲོང་ཉུལ་མཁན་གཅོད་པ་འགའ་ཞིག་ལ་ཟབ་གནད་ཀྱི་དམིགས་སྐོར་རྒྱུན་ཁྱེར་བཞུགས།
གཅོད་པ་རྣམས་ཀྱིས་ལུས་སྦྱིན་བཏང་བའི་དང་པོ་ལ། རྐང་གླིང་ལན་གསུམ་གྱི་སྐད། གྲོང་ཐལ་ལ་འགོམ་ཟེར་བ་འབུད། ཌཱ་རུས་འགོམ་ན་འགོམ་གྱིས་ཌཱ་རྒྱག་སྐྲོལ། ཕོཊ། ཕོཊ། ཕོཊ། ལན་གསུམ། ཟ་ཕོཊ། འཐུང་ཕོཊ། ལེན་ཕོཊ། དབང་སྡུད་ནི། གྲོང་སྟོད་རྒན་པོ་དབང་དུ་སྡུས། །གྲོང་སྨད་རྒན་མོ་དབང་དུ་སྡུས། །བུ་ཚ་བུ་མོ་དབང་དུ་སྡུས། །ཇ་དང་རྩམ་པ་ཆར་ལྟར་ཕོབ། །ཕོཊ་གསུམ། ཟིལ་གནོན་ནི། རང་ཡུལ་བསྐྱུར་བའི་རྟོགས་ལྡན་ངས། །དབྱར་རྒུན་མེད་པར་གཞན་སྒོ་འགྲིམ། །ཟླ་འཚམས་གཅིག་ཀྱང་འདུག་མ་ཚུག །ངོ་ཚ་མེད་པར་ཟིལ་གྱིས་ནོན། །ཕོཊ། ཕོཌ། ཕོཊ། གསུམ། སྐྱབས་འགྲོ་ནི། དཀོན་མཆོག་རིན་ཆེན་རྣམ་གསུམ་ནི། །ཡེ་ནས་དྲན་ནི་མི་ཤེས་པའི། །གྲོང་ཆེན་ཕྱུགས་པོ་ཐམས་ཅད་ལ། །མ་ཤི་བར་དུ་སྐྱབས་སུ་མཆི། །ཕོཊ། ཕོཊ། ཕོཊ། གསུམ། སེམས་བསྐྱེད་ནི། གཞན་དག་རྣམས་ནས་ཅི་རེ་བ། །བདག་ལ་ལྟོ་གོས་འཛོམ་པ་དང་། །ཅི་འདོད་ཅི་མཁོ་བྱིན་ན་
ཡང་། །ད་རུང་ལོན་པར་སེམས་བསྐྱེད་དོ། །རྣལ་འབྱོར་ནི། ཤ་ཆང་རྙེད་པས་ལྟོ་འགྲོང་སྟེ། །
འདིར་ཚོགས་ཕོ་མོ་མཛེས་པ་ཡི། །ལུས་ཀྱི་བ་སྤུ་གཡོ་ནུས་པའི། །འདོད་ཆགས་རྒྱས་པར་བྱིན་གྱིས་རློབས། །ཕོཊ། ཕོཊ། ཕོཊ། གསུམ། ལུས་སྦྱིན་དངོས་ནི། མིག་བསྒྲད་ལྟ་སྟངས་ཧྲིག་གེ་ཧྲིག །སེམས་འཁྲུག་ཅི་དྲན་འདི་དྲན་མེད། །འདྲེ་འདྲ་ཡོད་སྲིད་མེད་སྲིད་ཀྱང་། །ཅི་མཁོ་རྙེད་པའི་ཁ་མགོན་གྱིས། །ཕོཊ། ཕོཊ། ཕོཊ། གསུམ། དབྱར་དུས་འོ་ཞོ་མར་ཆུར་གྱི། །སྣོད་ཁུག་ཅི་ཡོད་གང་བྱེད་པ། །ཞིམ་ཞིམ་མངར་མངར་ཟ་བ་ལ། །ནད་མེད་ཕོ་བས་ཆུན་པར་ཤོག །ཕོཊ། བདག་གི་ལུས་འདིས་ཚེར་མ་ཙམ། །བཟོད་ནུས་མེད་ཀྱང་སེམས་ཅན་གྱི། །ཤ་ཁྲག་ཟ་བའི་ཁ་ཕོ་ནི། །ང་ལས་ཆེ་བ་སུ་ཡང་མེད། །ཕོཊ། ཕོཊ། ཕོཊ། གསུམ། ཤ་ཟོས་ཞིམ་ཞིམ་ཅག་སྒྲ་སྒྲག །
རྒྱུ་མ་ནུས་པས་ངོམ་སེ་ངོམ། །ཁྲག་ནི་མི་འཐུང་བཅད་རྒྱ་ཡིན། །གྱོན་པའི་ལྤགས་པ་དྲོ་བར་ཤོག །བསྔོ་བ། དེ་རིང་ཤི་བོའི་དགེ་རྩ་ལ། །སྦྱིན་བདག་ཁྱེད་ཅག་སྐུའི་རིམ་གྲོ། །འདོན་བྱ་ང་བས་འཇིག་པ་མེད། །འབུལ་བ་ལོངས་སྤྱོད་ང་ལ་བསྔོ། །ཕོཊ། བཀྲ་ཤིས་ནི། ཕོཊ། རེ་ཞིག་ཁྱེད་རྣམས་ཁྱིམ་དུ་སོང་། །རྟོགས་ལྡན་ང་ནི་འཁྱམས་དུ་འགྲོ། །དགོས་པ་བྱུང་ན་ང་རྒྱུགས་འོང་། །
རེ་དོགས་བྱེད་པའི་བཀྲ་ཤིས་ཤོག །ཅེས་གཅོད་རྒན་འགས་བསྐུར་ངོར། དམིགས་པ་ཟབ་ལ་གོ་བདེ་བ་ཞིག་འཕྲལ་དུ་འཁྲུལ་འཛིན་ཞིག་པའི་རྟོགས་ལྡན་ནས་བྲིས་སོ། །དགེ་ལེགས་འཕེལ།
