DKYD-KABUM-06-CHA-030
༄༅།« །སེང་ཆེན་སྐྱེས་བུའི་བླ་སྒྲུབ་ཀྱི། །རྒྱུད་འདེབས་བྱིན་རླབས་མྱུར་འཇུག་བཞུགས།» །ཀུན་བཟང་ཡབ་ཡུམ་རྡོ་རྗེ་འཆང་ཆེན་དང༌། །རྡོ་རྗེ་ཆོས་དང་ཡུམ་ཆེན་ལས་དབང་མོ། །རིགས་ལྔའི་སངས་རྒྱས་ཚེ་དཔག་མེད་མགོན་ལ། །གསོལ་བ་འདེབས་སོ་བྱིན་རླབས་མྱུར་དུ་སྩོལ། །ཁ་སར་པ་ཎི་གསང་བདག་དགའ་རབ་རྗེ། །ཤྲཱི་སེང་ཛྙཱ་ན་སུ་ཏྲ་བི་མ་ལ། །པདྨ་རྒྱལ་པོ་རྗེ་འབངས་ལོ་པཎ་བཅས། །གསོལ་བ་འདེབས་སོ༴ །གདོད་མའི་མགོན་དངོས་ཀློང་ཆེན་རབ་འབྱམས་དང༌། །པདྨའི་རྣམ་འཕྲུལ་ཨ་བྷི་ཡ་དཱི་པ། །སྤྲུལ་པའི་གཏེར་ཆེན་ཛྙཱ་ན་བཛྲ་ལ། །གསོལ་བ་འདེབས་སོ༴ །རྩ་གསུམ་རྒྱུད་སྡེ་བཞི་དྲུག་ཀུན་འདུས་དཔལ། །ཡེ་ཤེས་འཇིག་རྟེན་ཌཱཀྐི་ཡོངས་ཀྱི་རྗེ། །བདུད་འདུལ་སྐྱེས་མཆོག་སེང་ཆེན་ནོར་བུ་ལ། །གསོལ་བ་འདེབས་སོ༴ བཀའ་བློན་གྲུབ་བརྙེས་དཔའ་བོ་སུམ་ཅུུ་བདུན། །སྤྲུལ་པའི་ཌཱཀྐཱི་སྡེ་བཞི་རིགས་མ་བརྒྱད། །ཤ་ཟ་འཇིག་རྟེན་དབང་བསྒྱུར་ཌཱཀྐིའི་ཚོགས། །གསོལ་བ་འདེབས་སོ༴ །རིག་འཛིན་དཔའ་བོ་མཁའ་འགྲོའི་ཚོགས་དང་བཅས། །བཀའ་སྲུང་དམ་ཅན་རྒྱ་མཚོ་དགྲ་བླ་དང༌། །ཝེར་མ་ལྷ་ཀླུ་གཉན་གྱི་ཚོགས་རྣམས་ལ། །གསོལ་བ་འདེབས་སོ༴ གྲུབ་པ་བརྒྱད་དང་བཅུ་དང་ཕྱི་ནང་གཉིས། །ཚེ་འདིར་རིག་འཛིན་འགྲོ་འདུལ་སེང་ཆེན་རྗེ། །འགྲུབ་ནས་ཐུགས་ཡིད་དབྱེར་མེད་འདྲེས་པ་དང༌། །སྐུ་ལྔ་ཡེ་ཤེས་འབྲས་བུ་མངོན་གྱུར་ཤོག «།ཞེས་པ་འདིའང་ཁྲོ་ཆེན་མ་ཧཱ་རཱ་ཛ་ཞབས་བརྟན་གེ་སར་བསྒྲུབ་པའི་ཚེ་ཤེས་རབ་མཆོག་གི་བསྐུལ་ངོར་སྔགས་སྨྱོན་དགྱེས་པ་རྡོ་རྗེས་བྲིས་པ་དགེ། །དགེའོ། །
