ཕ་རྒྱལ་བ་ཀུན་དངོས་ཞེས་པའི་གླུ།

🚧 This website is under continued development. We appreciate your patience!

Previous Text Back to Volume PageNext Text

Wylie title	pha rgyal ba kun dngos zhes pa'i glu
Location	mkhyen brtse'i bka' 'bum Volume 23, sde tshan 1, Text 44, Pages 89-90 (Folios 45a2 to 45b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. pha rgyal ba kun dngos zhes pa'i glu. In 'jam dbyangs mkhyen brtse'i dbang po'i bka' 'bum, Vol. 23: 89-90. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཅེས་པ་འདི་ཡང་ཨཱ་ཡུར་མིང་གིས་རིགས་འདུས་གུ་རུ་རིན་པོ་ཆེའི་ཚོགས་ཀྱི་འཁོར་ལོ་བསྐོར་བའི་དུས་བྱུང་རྒྱལ་དུ་བརྗོད་པའོ།
	ces pa 'di yang A yur ming gis rigs 'dus gu ru rin po che'i tshogs kyi 'khor lo bskor ba'i dus byung rgyal du brjod pa'o

Tibetan Text

Wylie

[edit]

ཕ་རྒྱལ་བ་ཀུན་དངོས་པདྨ་འབྱུང་། །འབངས་སྙིང་ནས་དད་པས་གསོལ་བ་འདེབས། །ལམ་ཚུལ་བཞིན་སྒྲུབ་པར་བྱིན་གྱིས་རློབས། །སྲིད་པས་བསྡུས་པའི་འཇིག་རྟེན་འདིར། །ཕྱི་སྣོད་ནང་བཅུད་གང་ལ་ཡང་། །རྟག་པའི་དངོས་པོ་མ་མཆིས་པས། །རེ་དོགས་དགྲ་གཉེན་གྱི་མདུད་པ་ཁྲོལ། །སྙིང་པོ་མེད་པའི་ནོར་རྫས་ཚོ། །འཆི་བའི་དུས་གཅིག་ཀྱང་ཁྱེར་དུ་མེད། །འདོད་ཆགས་ཀྱི་སྲེད་པ་ཡོངས་སུ་ཁྲོལ། ཁོང་ཀུན་བྱེད་སེམས་ཀྱི་རྒྱལ་པོ་ཆེ། །དོན་བརྟགས་ན་གཞི་མེད་རྩ་བ་བྲལ། །བདེ་གསལ་མི་རྟོག་གི་ཞེན་པ་ཁྲོལ། །ལམ་རྫོགས་པ་ཆེན་པོའི་ལྟ་བ་དེ། །དཔེ་དོན་དང་བྲལ་བར་ཉམས་ལོང་ཞིག །ཚིག་གོ་ཡུལ་གྱི་མདུད་པ་ཡོངས་སུ་ཁྲོལ། །ཕྱི་སྣོད་དེ་པདྨ་འོད་ཀྱི་ཞིང་། །ནང་བཅུད་དེ་གུ་རུ་རིན་པོ་ཆེ། །མ་དག་པའི་སྣང་བའི་འཛིན་ཞེན་ཁྲོལ། །བརྗེད་མེད་ཀྱི་ཤེས་པའི་རང་རྩལ་དེ། །མི་འགག་པའི་བསྐྱེད་རིམ་སྣ་ཚོགས་ཤར། །གདོས་བཅས་ཀྱི་འཛིན་ཞེན་ཡོངས་སུ་འཁྲོལ། །ང་པདྨས་བྱིན་བརླབས་རྗེས་བཟུང་མཐུས། །རང་བྱུང་གི་གསང་མཛོད་མངོན་དུ་གྱུར། །ཐེག་བརྒྱད་ཀྱི་བློ་འདས་རྣལ་འབྱོར་དོན། །གཉུག་མ་ཡི་དོན་ལ་ལྷུན་གྲུབ་ཤོག །ཅེས་པ་འདི་ཡང་ཨཱ་ཡུར་མིང་གིས་རིགས་འདུས་གུ་རུ་རིན་པོ་ཆེའི་ཚོགས་ཀྱི་འཁོར་ལོ་བསྐོར་བའི་དུས་བྱུང་རྒྱལ་དུ་བརྗོད་པའོ། ། ༈

[edit]

pha rgyal ba kun dngos zhes pa'i glu/__ pha rgyal ba kun dngos pad+ma 'byung /__/'bangs snying nas dad pas gsol ba 'debs/__/lam tshul bzhin sgrub par byin gyis rlobs/__/srid pas bsdus pa'i 'jig rten 'dir/__/phyi snod nang bcud gang la yang /__/rtag pa'i dngos po ma mchis pas/__/re dogs dgra gnyen gyi mdud pa khrol/__/snying po med pa'i nor rdzas tsho/__/'chi ba'i dus gcig kyang khyer du med/__/'dod chags kyi sred pa yongs su khrol/__khong kun byed sems kyi rgyal po che/__/don brtags na gzhi med rtsa ba bral/__/bde gsal mi rtog gi zhen pa khrol/__/lam rdzogs pa chen po'i lta ba de/__/dpe don dang bral bar nyams long zhig__/tshig go yul gyi mdud pa yongs su khrol/__/phyi snod de pad+ma 'od kyi zhing /__/nang bcud de gu ru rin po che/__/ma dag pa'i snang ba'i 'dzin zhen khrol/__/brjed med kyi shes pa'i rang rtsal de/__/mi 'gag pa'i bskyed rim sna tshogs shar/__/gdos bcas kyi 'dzin zhen yongs su 'khrol/__/nga pad+mas byin brlabs rjes bzung mthus/__/rang byung gi gsang mdzod mngon du gyur/__/theg brgyad kyi blo 'das rnal 'byor don/__/gnyug ma yi don la lhun grub shog__/ces pa 'di yang A yur ming gis rigs 'dus gu ru rin po che'i tshogs kyi 'khor lo bskor ba'i dus byung rgyal du brjod pa'o/___/__!_