རྗེ་བཙུན་བྱམས་པ་མགོན་པོ་ལ་མཆོད་པའི་ཆོ་ག་དང་འབྲེལ་བར་དགའ་ལྡན་དུ་སེམས་བསྐྱེད་པའི་སྨོན་ལམ་ནོར་བུའི་ཐེམ་སྐས།

🚧 This website is under continued development. We appreciate your patience!

First text in section. Back to Volume PageNext Text

Wylie title	rje btsun byams pa mgon po la mchod pa'i cho ga dang 'brel bar dga' ldan du sems bskyed pa'i smon lam nor bu'i them skas
Location	mkhyen brtse'i bka' 'bum Volume 11, sde tshan 12, Text 1, Pages 363-379 (Folios 1a to 9a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	ཁ་ཆེ་པཎ་ཆེན་ཤཱཀྱ་ཤྲཱི་ (Śākyaśrībhadra)
Citation	'jam dbyangs mkhyen brtse'i dbang po. rje btsun byams pa mgon po la mchod pa'i cho ga dang 'brel bar dga' ldan du sems bskyed pa'i smon lam nor bu'i them skas. In 'jam dbyangs mkhyen brtse'i dbang po'i bka' 'bum, Vol. 11: 363-379. Khams sde dge rdzong sar dgon: Rdzong sar blo gros phun tshogs, 2020.
Genre	Prayers - smon lam  ·  Offering Rituals - mchod sbyin
Deity	byams pa
Colophon	ཅེས་པའང་ཚུལ་འདི་ལ་མོས་པ་རྣམས་ལ་ཕན་པའི་བསམ་པས། མ་བྱོན་པའི་སངས་རྒྱས་རབ་གསལ་གྱི་རྣམ་པར་འཕྲུལ་བ། ཁ་ཆེའི་མ་ཧཱ་པཎྜི་ཏ་ཤཱཀྱ་ཤྲཱི་བྷ་དྲའི་གསུང་ངག །ཁྲོ་ཕུ་ལོ་ཙཱ་བ་ཆེན་པོ་བྱམས་པའི་དཔལ་གྱིས་བསྒྱུར་པའི་གཞུང་ཇི་ལྟ་བར། འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བཀླགས་པས་གྲུབ་པར་བསྡེབས་པ་དགེ་ལེགས་མཆོག་ཏུ་གྱུར་ཅིག
	ces pa'ang tshul 'di la mos pa rnams la phan pa'i bsam pas/__ma byon pa'i sangs rgyas rab gsal gyi rnam par 'phrul ba/__kha che'i ma hA paN+Di ta shAkya shrI b+ha dra'i gsung ngag__/khro phu lo tsA ba chen po byams pa'i dpal gyis bsgyur pa'i gzhung ji lta bar/__'jam dbyangs bla ma dgyes pa'i 'bangs mkhyen brtse'i dbang pos bklags pas grub par bsdebs pa dge legs mchog tu gyur cig

1 Texts in this Section (sde tshan or chos tshan)

1 363-379	རྗེ་བཙུན་བྱམས་པ་མགོན་པོ་ལ་མཆོད་པའི་ཆོ་ག་དང་འབྲེལ་བར་དགའ་ལྡན་དུ་སེམས་བསྐྱེད་པའི་སྨོན་ལམ་ནོར་བུའི་ཐེམ་སྐས། rje btsun byams pa mgon po la mchod pa'i cho ga dang 'brel bar dga' ldan du sems bskyed pa'i smon lam nor bu'i them skas Prayers - smon lam   ·   Offering Rituals - mchod sbyin	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །རྗེ་བཙུན་བྱམས་པ་མགོན་པོ་ལ་མཆོད་པའི་ཆོ་ག་དང་འབྲེལ་བར་དགའ་ལྡན་དུ་སེམས་བསྐྱེད་པའི་སྨོན་ལམ་ནོར་བུའི་ཐེམ་སྐས་ཞེས་བྱ་བ་བཞུགས་སོ།། །། ཨོཾ་སྭསྟི། །གང་མཚན་བྱམས་པའི་བདུད་རྩིས་ཡིད་ཅན་ཀུན། །དབུགས་འབྱིན་མགོན་པོ་མཆོག་ལ་གུས་བཏུད་ནས། །དགའ་ལྡན་ཆོས་ཀྱི་འདུན་སར་བགྲོད་པའི་ལམ། །ཡིད་འཕྲོག་ནོར་བུའི་ཐེམ་སྐས་དེང་འདིར་བསྐྲུན། །དེ་ལ་གྲུབ་པ་བརྙེས་པའི་པཎྜི་ཏ་ཆེན་པོ་བི་ཁྱཱ་ཏ་དེ་བ་ལ་རྗེ་བཙུན་བྱམས་པས་དངོས་སུ་གནང་། དེ་ལ་ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲས་གསན་ཅིང་ཐུགས་ཉམས་སུ་བཞེས་ཏེ། ཁྲོ་ཕུ་ལོ་ཙཱ་བ་གནུབས་བྱམས་པའི་དཔལ་ལ་སྩལ་བའི་དགའ་ལྡན་དུ་སེམས་བསྐྱེད་པའི་ཆོ་གའི་རིམ་པ་ཁྱད་པར་དུ་འཕགས་པ་ཉམས་སུ་ལེན་པར་འདོད་པས་ལག་ཏུ་བླང་བའི་རིམ་པ་ལ་གཉིས། ལས་སུ་བྱ་བ་དང་། སྨོན་ལམ་གདབ་པའོ། །དང་པོ་ནི། གཞུང་ལས། ལས་སུ་བྱ་བ་ནི་རྟེན་བྱིན་རླབས་ཅན་དགོད། མཆོད་པ་ཅི་འབྱོར་དབུལ། སྦྱིན་པ། ཚུལ་ཁྲིམས། སྒོམ་པ་གསུམ་པོ་སྣ་ཚང་བ་རེ་ཅིས་ཀྱང་བྱེད་དགོས་ཏེ། སྦྱིན་པ་ནི་བཟའ་བཏུང་ཁབ་སྐུད་ལ་སོགས་གང་འབྱོར་བྱ་བའོ། །ཚུལ་ཁྲིམས་ནི་བསྙེན་གནས་ཞག་འགའ་བསྲུང་བ་ལ་སོགས་པའོ། །སྒོམ་པའང་ཐུན་མོང་གི་སྒོམ་པ་དང་། ཐུན་མོང་མ་ཡིན་པའི་སྒོམ་པ་གཉིས་ལས། དང་པོ་ནི། ངོ་བོ་རང་སེམས་གཉུག་མ་བསྒོམ་པའོ། །ཐུན་མོང་མ་ཡིན་པའི་སྒོམ་པ་ནི། མདོ་སྡེ་རྒྱན་ལས། གང་ཕྱིར་བྱམས་པ་དེ་ཕྱིར་ཁོང་ཁྲོ་འགལ། །ཞེས་པ་ལ་སོགས་པ་དྲན་པས་བྱམས་ཆོས་ཁྱད་པར་དུ་བསྒོམ་ཞིང་། དེའི་མི་མཐུན་ཕྱོགས་སྤོང་བའོ། །ཞེས་གསུངས་པ་ལྟར་ལག་ཏུ་བླང་བ་སྔོན་དུ་འགྲོ་བས། གཉིས་པ་སྨོན་ལམ་གདབ་པའི་ཆོ་ག་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གནས་གཙང་ཞིང་དབེན་ལ་ཡིད་དང་མཐུན་པར་ཕྱག་དར་བྱ་ཞིང་། དྲི་བཟང་གི་ཆུས་ཆག་ཆག་གདབ། གུང་དུ་མགོན་པོ་མ་ཕམ་པའི་སྣང་བརྙན་གཙོ་བོར་གྱུར་པའི་སྐུ་གསུང་ཐུགས་ཀྱི་རྟེན་དགྲམ། མཆོད་པ་གཡོ་མེད་པས་བཙལ་ལ། ཆུ་གཉིས་སྔོན་འགྲོའི་ཉེར་སྤྱོད་སྤྱི་དང་། ཁྱད་པར་མེ་ཏོག །བདུག་སྤོས། མར་མེ། ཞལ་ཟས་སོགས་ཀྱི་ཕྲེང་བ་ཚར་དུ་དངར་བར་བཤམ། རང་གི་མདུན་དུ་འབུད་དཀྲོལ་བརྡུང་གསུམ་གྱི་རོལ་མོའི་བྱེ་བྲག་དང་། ཁྲུས་ཆས། མཎྜལ་ལ་སོགས་པ་འདུ་བྱའོ། །གཉིས་པ་དངོས་གཞི་ནི། སྟན་བདེ་བ་ལ་བསམ་གཏན་གྱི་སྤྱོད་ལམ་དང་ལྡན་པས་འཁོད་དེ་དགེ་སེམས་ཁྱད་པར་ཅན་གྱིས་མཚམས་སྦྱར་ཏེ། སྐྱབས་ཡུལ་ནམ་མཁའ་གང་བར་སད་པའི་སྤྱན་སྔར། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཞེས་སྐྱབས་འགྲོ་ཅི་ནུས་དང་། ཤེས་རབ་སྙིང་བརྩེ་དང་བཅས་པའི། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བཅས་ཏེ། །རྫོགས་པའི་བྱང་ཆུབ་སེམས་བསྐྱེད་བགྱི། །ཞེས་པས་སེམས་བསྐྱེད། གནས་དང་མཆོད་པའི་ཡོ་བྱད་ལ་དམིགས་ཏེ་སྨན་བླའི་མདོ་ཆོག་ནས་འབྱུང་བ་ལྟར་བྱིན་རླབས་བཞི་སྐོར་རྒྱས་པར་བྱ་བའམ། དེ་ཙམ་མི་ནུས་ན། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་རླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེང་འདིར་ཁོར་ཡུག་གི་ས་གཞི་འདི་དག་བཅོམ་ལྡན་འདས་འོད་དཔག་མེད་ཀྱི་ཞིང་གི་བཀོད་པའི་ཡོན་ཏན་ཕུན་སུམ་ཚོགས་པའི་རྒྱན་ཐམས་ཅད་ཀྱིས་བརྒྱན་པ་མཛེས་ཤིང་ཡིད་དུ་འོང་བར་གྱུར་པའི་གཞིར། གཞལ་མེད་ཁང་རིན་པོ་ཆེ་སྣ་བདུན་མཆོག་ཏུ་འབར་བ་བཀོད་པ་ལེགས་པས་མཛེས་ཤིང་ལྷུན་སྟུག་པ་ཡངས་ཤིང་རྒྱ་ཆེ་བའི་དབུས་སུ། རིན་པོ་ཆེ་སྣ་ཚོགས་ལས་གྲུབ་པའི་ཁྲི་སེང་གེ་ཆེན་པོ་བརྒྱད་ཀྱིས་བཏེག་པའི་སྟེང་དུ་པདྨ་དང་ཟླ་བའི་གདན། མཐའ་སྐོར་ཀུན་ཏུ་སེང་ཁྲི་པད་ཟླའི་གདན་གྲངས་མེད་པ་དང་། ཕྱི་ནང་ཀུན་ཏུའང་ཆོ་རིགས་དང་འཚམས་པར་ལྷ་དང་མིའི་ཡོ་བྱད་དམ་པ་ཞལ་ཟས་དང་། ན་བཟའ་དང་། རོལ་མོ་ལ་སོགས་པ་ཕུལ་དུ་ཕྱིན་པ་སྣ་ཚོགས་པ་ཕུང་པོ་གསུམ་པའི་མདོ་དང་། བཟང་པོ་སྤྱོད་པའི་སྨོན་ལམ་ལས་བྱུང་བའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱིས་རྒྱས་པར་གང་ཞིང་རྒྱན་བཀླུབས་པ་དང་ལྡན་པ་འབྱུང་བར་གྱུར་ཅིག །ཐམས་ཅད་དུ་ཡང་ས་གཞི་དག །གསེག་མ་ལ་སོགས་མེད་པ་དང་། །ལག་མཐིལ་ལྟར་མཉམ་བཻཌཱུཪྻའི། །རང་བཞིན་འཇམ་པོར་གནས་གྱུར་ཅིག །ཅེས་དང་། ན་མོ་བྷ་ག་ཝ་ཏེ། བཛྲ་སཱ་ར་པྲ་མརྡ་ནེ། ཏ་ཐཱ་ག་ཏཱ་ཡ། ཨརྷ་ཏེ་སམྱ་ཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛ་བཛྲེ། མ་ཧཱ་བིདྱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སྃ་ཀྲ་མ་ཎ་བཛྲེ། སརྦ་ཀརྨ་ཨ་ཝ་ར་ཎ་བི་ཤོ་དྷ་ན་བཛྲེ་སྭཱ་ཧཱ། ཞེས་མཆོད་པའི་སྤྲིན་གྱི་གཟུངས་ལན་གསུམ་དང་། སླར་ཡང་། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་རླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེ་དེ་བཞིན་དུ་གྱུར་ཅིག །ཅེས་བདེན་པའི་སྟོབས་བརྗོད། དེ་ནས་འདུན་པ་རྩེ་གཅིག་པས་སྤོས་བཏུལ་ཞིང་སྙན་པའི་དབྱངས་དང་བཅས། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་བསྐལ་པ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེས་རྣམས་སྦྱངས་ཤིང་། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པའི། །ཁྱེད་བཞེད་འགྲོ་དོན་མཛད་དུས་འདིར་ལགས་ན། །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས། །རྫུ་འཕྲུལ་བྱིན་རླབས་སྣ་ཚོགས་སྟོན་མཛད་ཅིང་། །མཐའ་ཡས་སེམས་ཅན་ཚོགས་རྣམས་བསྒྲལ་བའི་ཕྱིར། །ཡང་དག་འཁོར་དང་བཅས་ཏེ་གཤེགས་སུ་གསོལ། ཞེས་གསོལ་བ་བཏབ་པས། དགའ་ལྡན་ཡིད་དགའ་ཆོས་འཛིན་གྱི་ཕོ་བྲང་ནས་དཔལ་རྒྱལ་བ་བྱམས་པ་མགོན་པོ་གསེར་མདོག་མཚན་དཔེ་ཡོངས་སུ་རྫོགས་པ། ཕྱག་གཡས་ཐུགས་ཀར་ཆོས་འཆད་དང་། གཡོན་མཉམ་གཞག་གི་ཚུལ་གྱིས་ཀླུ་ཤིང་གི་ཡལ་གའི་རྩ་བ་བཟུང་ཞིང་མེ་ཏོག་སྙན་གྱི་ཐད་ཀར་ཁ་བྱེ་བའི་སྟེང་ན་རིལ་བ་སྤྱི་བླུགས་དང་བཅས་པ། རལ་པའི་ཅོད་པན་གྱི་ངོས་ལ་བསྟན་པའི་བདག་པོ་མཆོད་རྟེན་གྱི་རྣམ་པས་སྤྲས་པ། རི་དྭགས་ཀྱི་པགས་པས་ནུ་མ་གཡོན་པ་བཀབ་ཅིང་ཚངས་པའི་སྐུད་པ་འཆང་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། འཁོར་སངས་རྒྱས་དང་བྱང་ཆུབ་སེམས་དཔའ་ཉན་ཐོས་དགྲ་བཅོམ་པའི་ཚོགས་དཔག་ཏུ་མེད་པས་བསྐོར་བ་དེ་བཞིན་གཤེགས་པའི་རྫུ་འཕྲུལ་ཆེན་པོས་ནམ་མཁའི་ལམ་ནས་མངོན་སུམ་དུ་གཤེགས་པར་མོས་ཏེ། བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང་། །ཐུགས་ལ་དགོངས་ཤིང་གནང་བར་མཛོད། །ཅེས་འབྱོན་ལེགས་བྱ། ཁྲུས་གསོལ་བའི་ཐོག་མར་ཁྲུས་ཁང་བསྐྱེད་པ་ནི། ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་ལ་བསྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་རེ་བྲེས་པ་དེར། །ཁྲུས་གསོལ་བ་ནི། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །རྒྱལ་བའི་སྐུ་གསུང་ཐུགས་ལ་ཉོན་མོངས་མི་མངའ་ཡང་། །སེམས་ཅན་ལུས་ངག་ཡིད་གསུམ་སྒྲིབ་པ་སྦྱང་སླད་དུ། །རྒྱལ་བའི་སྐུ་གསུང་ཐུགས་ལ་ཁྲུས་ཆབ་འདི་གསོལ་བས། །སེམས་ཅན་ལུས་ངག་ཡིད་གསུམ་སྒྲིབ་པ་དག་གྱུར་ཅིག །ཅེས་དང་། སྤྲོ་ན། འདི་ནི་སྦྱིན་པའི་རང་བཞིན་ཆུ། །སེང་སྣའི་དྲི་མ་སྦྱོང་མཛད་པ། །གཏོང་བ་དྲི་ཡིས་ལེགས་བསྒོས་ཆུས། །ཁྲུས་ལེགས་མཛད་ལ་སྐུ་ཁྲུས་གསོལ། །ཞེས་སོགས་ཕར་ཕྱིན་དྲུག་གི་ཚིགས་བཅད་ཀྱང་བརྗོད། སྐུ་ཕྱི་བ་ནི། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱིའོ། །བྱུག་པ་འབུལ་བ་ནི། སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱངས་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུག་པར་བགྱི། །ན་བཟའ་དང་རྒྱན་འབུལ་བ་ནི། དེ་ནས་དེ་ལ་ཁ་དོག་ལེགས་བསྒྱུར་པའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང་། །རྒྱན་མཆོག་བརྒྱ་ཕྲག་དེ་དང་དེ་དག་གིས། །འཕགས་པ་ཀུན་ཏུ་བཟང་དང་འཇམ་དབྱངས་དང་། །འཇིག་རྟེན་དབང་ཕྱུག་སོགས་ལའང་བརྒྱན་པར་བགྱི། །བཞུགས་སུ་གསོལ་བ་ནི། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ཞེས་བརྗོད་པས་ཚོགས་ཀྱི་ཞིང་དུ་དགྱེས་བཞིན་པས་བརྟན་པར་བཞུགས་པར་བསམ། དེ་ནས་གཞུང་རྩ་བར་ཐོག་མར་མཆོད་པ་དང་། དེའི་རྗེས་སུ་ཡན་ལག་བདུན་པ་བྱ་བར་གསུངས་ནའང་། འདིར་ཡན་ལག་བདུན་གྱི་ཁོངས་སུ་མཆོད་པ་བསྡུས་ཏེ་བྱ་བའི་ཚུལ་ལ། ཐོག་མར་དངོས་སུ་ཕྱག་འཚལ་བ་དང་བཅས་ཏེ། ཇི་སྙེད་སུ་དག་ཕྱོགས་བཅུའི་སོགས་ནས། བདག་གིས་བསྟོད་ཅེས་པའི་བར་བཟང་སྤྱོད་ནས་འབྱུང་བ་ལྟར་དང་། སྤྲོ་ན་ཁྲོ་ཕུ་ལོ་ཙཱ་བ་ཆེན་པོ་སོགས་བླ་མ་གོང་མ་རྣམས་ཀྱིས་མཛད་པའི་བྱམས་པའི་བསྟོད་པ་རྒྱས་པར་བྱ། བསྡུ་ན། བྱམས་ཆེན་མེ་ཡིས་ཞེ་སྡང་བུད་ཤིང་བསྲེགས། །ཡེ་ཤེས་འོད་ཀྱིས་མ་རིག་མུན་པ་སེལ། །ཆོས་ཀྱི་རྒྱལ་ཚབ་འགྲོ་བའི་མགོན་གྱུར་པའི། །དགའ་ལྡན་བཞུགས་པ་དེ་ལ་ཕྱག་འཚལ་ལོ། །ཞེས་མང་དུ་བརྗོད་ཅིང་ཕྱག་བྱ། མཆོད་པ་ལ་གཞུང་ལས། ཐུན་མོང་གི་ལོངས་སྤྱོད་ཅི་འབྱོར་པ་དབུལ་བ་དང་། ཐུན་མོང་མ་ཡིན་པ་རང་གི་ལུས་དབུལ་བ་དང་། ཁྱད་པར་གྱི་མཆོད་པ་དགེ་བའི་རྩ་བ་དབུལ་བའོ། །ཞེས་གསུམ་དུ་གསུངས་པའི་དང་པོ་ནི། བྱམས་པའི་སྣང་བརྙན་ལ་ན་བཟའ་སོགས་ཅི་འབྱོར་པ་དབུལ། སྤོས་དང་མར་མེ་སོགས་སྤར་ལ། དངོས་སུ་བཤམས་པའི་མཆོད་པ་རྒྱུར་བྱས་པ་ལས་བྱུང་བའི་ཡིད་ཀྱིས་སྤྲུལ་པའི་མཆོད་སྤྲིན་རབ་འབྱམས་མཁའ་ཁྱབ་ཏུ་སྤྲོས་ཏེ། མེ་ཏོག་དམ་པ་སོགས་ནས། ཕྱག་འཚལ་མཆོད་པར་བགྱི། །ཞེས་དང་མེ་ཏོག་འཐོར། མཆོད་པའི་སྤྲིན་གྱི་གཟུངས་བཟླ། རོལ་མོ་བྱ། གཉིས་པ་ནི། རྒྱལ་དང་དེ་སྲས་རྣམས་ལ་བདག་གིས་ནི། །བདག་གི་ལུས་ཀུན་གཏན་དུ་དབུལ་བར་བགྱི། །སེམས་དཔའ་མཆོག་རྣམས་བདག་ནི་ཡོངས་བཞེས་ཤིག །གུས་པས་ཁྱེད་ཀྱི་འབངས་སུ་མཆི་བར་བགྱི། །ཞེས་བརྗོད་པས་ལུས་དབུལ། གསུམ་པ་ནི། བདག་གིས་དུས་གསུམ་བསགས་པའི་དགེ་བ་ཀུན། །ནམ་མཁའི་མཐར་ཐུག་སེམས་ཅན་དོན་གྱི་ཕྱིར། །ཐུགས་རྗེའི་མངའ་བདག་མཆོག་ལ་འབུལ་ལགས་ན། །འགྲོ་ཀུན་བྱང་ཆུབ་མྱུར་དུ་ཐོབ་མཛད་གསོལ། །ཞེས་དགེ་བའི་རྩ་བ་དབུལ། ཞར་བྱུང་དེ་ཐམས་ཅད་དང་རྗེས་སུ་འབྲེལ་བར་མཎྜལ་འབུལ་བ་ནི། མཎྜལ་སོ་བདུན་མ་དང་། ཉེར་གསུམ་མ་སོགས་སྤྱི་ལྟར་ལ། མ་ཚང་བ་མེད་པ་འདི་ཉིད། དཔལ་རྒྱལ་བ་བྱམས་པ་མགོན་པོ་འཁོར་སངས་རྒྱས་དང་བྱང་ཆུབ་སེམས་དཔའ་ཉན་ཐོས་དགྲ་བཅོམ་པའི་ཚོགས་དང་བཅས་པ་རྣམས་ལ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་བདག་དང་མཐའ་ཡས་པའི་སེམས་ཅན་ཐམས་ཅད་དགའ་ལྡན་ཆོས་ཀྱི་འདུན་སར་དབུགས་དབྱུང་སྟེ། མྱུར་དུ་བྱང་ཆུབ་ཆེན་པོར་ལུང་བསྟན་ཐོབ་པར་བྱིན་གྱིས་བརླབ་ཏུ་གསོལ། ཞེས་དང་། བདག་གཞན་ལུས་ངག་ཡིད་གསུམ་ལོངས་སྤྱོད་དུས་གསུམ་དགེ་ཚོགས་བཅས། །རིན་ཆེན་མཎྜལ་བཟང་པོ་ཀུན་བཟང་མཆོད་པའི་ཚོགས་བཅས་པ། །བློ་ཡིས་བླངས་ཏེ་མ་ཕམ་མགོན་པོ་འཁོར་དང་བཅས་ལ་འབུལ། །ཐུགས་རྗེའི་དབང་གིས་བཞེས་ནས་བདག་ལ་བྱིན་གྱིས་བརླབ་ཏུ་གསོལ། །ཞེས་བརྗོད། དེ་ནས་སྡིག་པ་བཤགས་པ་ལ་སོགས་པའི་ཡན་ལག་ལྷག་མ་རྣམས་ནི། འདོད་ཆགས་ཞེ་སྡང་སོགས་ནས། ཕྱིར་བསྔོའོ། །ཞེས་པའི་བར་བཟང་སྤྱོད་ལྟར་བྱའོ། །དེ་ལྟར་སྨོན་ལམ་འགྲུབ་པའི་རྒྱུ་བསག་སྦྱང་སྤེལ་གསུམ་གྱི་གནད་བསྡུས་པ་ཡན་ལག་བདུན་པ་གྲངས་མང་དུ་བྱ། གཟུངས་བཟླ་བར་སྤྲོ་ན། ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ་སམྱ་ཀྶཾ་བུདྡྷཱ་ཡ། ཏདྱ་ཐཱ། ཨོཾ་ཨ་ཛི་ཏེ་ཨ་ཛི་ ཏེ། ཨ་པ་རཱ་ཛི་ཏེ། ཨ་ཛི་ཏེ་ཛ་ཡ། ཧ་ར་ཧ་ར། མཻ་ཏྲི་ཨ་ཝ་ལོ་ཀི་ཏེ། ཨ་ར་ཀ་ར། མ་ཧཱ་ས་མ་ཡ་སིདྡྷི། བྷ་ར་བྷ་ར། མ་ཧཱ་བོ་དྷི་མཎྜོ་བི་ཛེ། སྨ་ར་སྨ་ར། ཨསྨ་སྐཾ་ས་མ་ཡཾ། བོ་དྷི་བོ་དྷི། མ་ཧཱ་བོ་དྷི་སྭཱ་ཧཱ། རྩ་བའི་སྔགས་སོ། །ཨོཾ་མོ་ཧི་མོ་ཧི། མ་ཧཱ་མོ་ཧི་སྭཱ་ཧཱ། སྙིང་པོའོ། །ཨོཾ་མ་ཏི་མ་ཏི་སྨྲྀ་ཏི་སྭཱ་ཧཱ། ཉེ་བའི་སྙིང་པོ་སྟེ། དེ་རྣམས་ཅི་ནུས་བཟླས་ནས། སྨོན་ལམ་གདབ་པ་དངོས་ནི། གཞུང་རྩ་བ་ལས་དེ་ནས་མེ་ཏོག་དང་བཅས་པའི་ཐལ་མོ་སྦྱར་ལ་འདི་སྐད་ཅེས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་སློབ་དཔོན་དང་དགེ་འདུན་བདག་ལ་དགོངས་སུ་གསོལ། བདག་མིང་རུས་འདི་ཞེས་བགྱི་བ་དུས་འདི་ནས་བཟུང་སྟེ་སྙིང་པོ་བྱང་ཆུབ་ལ་མཆིས་ཀྱི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་བཅོམ་ལྡན་འདས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་དམ་པའི་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་འཕགས་པའི་དགེ་འདུན་ལ་སྐྱབས་སུ་མཆིའོ། །བདག་མིང་རུས་འདི་ཞེས་བགྱི་བ་ནམ་མཁའི་མཐས་གཏུགས་པའི་སེམས་ཅན་ལ་ཕན་པ་དང་བདེ་བའི་དོན་དུ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བགྱི་བའི་སླད་དུ་དགའ་ལྡན་དུ་འདུག་པའི་སེམས་བསྐྱེད་པར་བགྱི་སྟེ། བདག་གིས་སྦྱིན་པ་དང་། ཚུལ་ཁྲིམས་དང་། སྒོམ་པ་ལས་བྱུང་བའི་དགེ་བའི་རྩ་བ་འདིས་བདག་ཤི་འཕོས་ནས་སྐྱེ་བ་གཞན་གྱིས་བར་མ་ཆོད་པར་དགའ་ལྡན་གྱི་གནས་སུ་དམ་པའི་ཆོས་ལ་ལོངས་སྤྱོད་པར་གྱུར་ཅིག །མའི་མངལ་གྱི་རྫབ་ཏུ་མི་སྐྱེ་ཞིང་པདྨའི་སྦུབས་སུ་བརྫུས་ཏེ་སྐྱེ་བར་གྱུར་ཅིག །དེར་ཡང་སྒྲུབ་པའི་རྟེན་ཕུན་སུམ་ཚོགས་པ་ཆོས་བརྒྱད་དང་ལྡན་པར་གྱུར་ཅིག །བླ་མ་རྗེ་བཙུན་བྱམས་པ་མགོན་པོས་རྗེས་སུ་འཛིན་པར་གྱུར་ཅིག །གྲོགས་བྱང་ཆུབ་སེམས་དཔའ་རྣམས་ཀྱི་རྗེས་སུ་འཇུག་པར་གྱུར་ཅིག །ཀུན་ཏུ་སྤྱོད་པའི་སྒོ་རྣམ་པར་དག་པ་དུ་མས་དེ་ཉིད་མཉེས་པར་བྱེད་པར་གྱུར་ཅིག །ནམ་དུའང་མི་མཉེས་པར་བྱེད་པར་མ་གྱུར་ཅིག །བསམ་པ་བྱང་ཆུབ་ཀྱི་སེམས་རིན་པོ་ཆེ་གོང་ནས་གོང་དུ་འཕེལ་བར་བྱེད་པར་གྱུར་ཅིག །སྦྱོར་བ་ཕ་རོལ་ཏུ་ཕྱིན་པ་བཅུ་ཡོངས་སུ་རྫོགས་པར་བྱེད་པར་གྱུར་ཅིག །སྤྱོད་པ་བླ་ན་མེད་པའི་སྒོ་དྲུག་མཐར་ཕྱིན་པར་བྱེད་པར་གྱུར་ཅིག །ཆེད་དུ་བྱ་བ་གཞན་གྱི་དོན་ཕུན་སུམ་ཚོགས་པ་ཡུལ་དུས་རྣམ་པ་ཐམས་ཅད་དུ་ཡོངས་སུ་རྫོགས་པར་གྱུར་ཅིག །ཕྲིན་ལས་བསམ་གྱིས་མི་ཁྱབ་པས་འཁོར་བ་མ་སྟོངས་ཀྱི་བར་དུ་ཕན་པ་དང་བདེ་བ་རྒྱས་ཤིང་རྒྱུན་མི་འཆད་པར་གྱུར་ཅིག །མདོར་ན་བདག་དང་གཞན་གྱི་དོན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་ལྡན་པར་གྱུར་ཅིག །བདག་གིས་སྦྱིན་སོགས་བགྱིས་པ་འདི་དག་གིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །འདི་ནས་ཤི་འཕོས་དགའ་ལྡན་སྐྱེ་བ་དང་། །བྱམས་མགོན་བསྟེན་པས་དེ་དགོངས་རྫོགས་བྱེད་ཤོག །ཅེས་ལན་གསུམ་བརྗོད་ཅིང་མེ་ཏོག་གཏོར་བར་བྱའོ། །སླར་ཡང་སྨོན་ལམ་དེ་ཉིད་འགྲུབ་པའི་དོན་དུ་དཀོན་མཆོག་གསུམ་གྱི་བདེན་པའི་སྟོབས་བརྗོད་པ་ནི། སངས་རྒྱས་སྐུ་གསུམ་བརྙེས་པ་དང་། །ཆོས་ཉིད་མི་འགྱུར་དྲི་མེད་དང་། །དགེ་འདུན་མི་ཕྱེད་འདུས་པ་ཡི། །བདེན་པས་སྨོན་ལམ་འགྲུབ་པར་ཤོག །ཅེས་དཔོན་སློབ་ཐམས་ཅད་ཀྱིས་མེ་ཏོག་གཏོར་བར་བྱའོ། །ཞེས་གསུངས་པ་ལྟར་ཉམས་སུ་བླང་ངོ་། །གསུམ་པ་རྗེས་ནི། སླར་ཡང་གཏང་རག་གི་ཚུལ་དུ། མེ་ཏོག་དམ་པ་སོགས་མཆོད་པ་དང་། སྤྲོ་ན། སྔོན་ཚེ་གསེར་བཟང་འོད་ཀྱི་རྒྱལ་བ་ལས། །ཞེས་སོགས་ཁོ་བོས་བྱས་པའི་ཐུགས་དམ་གནད་ནས་སྐུལ་བའི་གསོལ་འདེབས་ཀྱང་བྱ། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་གང་། །དེ་ཡང་བཟོད་པར་མཛད་དུ་གསོལ། །ཞེས་ནོངས་པ་བཤགས། མགོན་པོ་མ་ཕམ་པ་ལ་སོགས་པ་འཕགས་པའི་ཚོགས་རྣམས་ཀྱིས་བདག་ཅག་ལ་སོགས་པའི་འགྲོ་བ་ཉམ་ཐག་པ་རྣམས་ཀྱི་དོན་མཛད་ཅིང་བཀའ་དྲིན་སྩལ་ལགས་ཏེ། ད་དུང་དུའང་བདག་ཅག་རྣམས་ལ་ཐུགས་བརྩེ་བས་ཡང་དང་ཡང་དུ་གདན་འཛོམས་པར་མཛད་པར་དགོངས་ཤིང་། རང་ཉིད་ཀྱི་གདུལ་བྱའི་ཞིང་དུ་གདུལ་བྱ་མང་པོའི་དོན་ལ་གཤེགས་པར་སྩལ་དུ་ཅི་གནང་། །ཞེས་པས་དགའ་ལྡན་གྱི་ཞིང་ཁམས་སུ་སླར་ཡང་གཤེགས་པར་གསོལ། སངས་རྒྱས་ཀུན་ལ་ཕྱག་འཚལ་ལོ། །ཞེས་སོགས་འཕགས་པ་བྱམས་པའི་སྨོན་ལམ་དང་། སྤྲོ་ཞིང་ནུས་ན་ཁྲོ་ཕུ་ལོ་ཙཱ་བ་ཆེན་པོས་མཛད་པའི་སྨོན་ལམ་རིན་པོ་ཆེ་སིལ་མ་སོགས་ཀྱང་བཏབ་པའི་མཐར། ཆེ་བའི་ཆེ་མཆོག་སོགས་བཀའ་ལས་བྱུང་བའི་བཀྲ་ཤིས་ཀྱི་ཚིགས་སུ་བཅད་པ་རྒྱ་ཆེར་བརྗོད་ཅིང་མེ་ཏོག་འཐོར། རོལ་མོའི་སྒྲ་སྙན་པར་སྦྱར་བས་དགེ་ལེགས་སུ་བྱའོ། །དེ་ལྟར་བརྩོན་པའི་ཕན་ཡོན་ནི། ཚེ་འདིར་ཚེ་རིང་བ་དང་། ནད་མེད་པ་དང་། དཔལ་དང་གཟི་བརྗིད་འཕེལ་བ་དང་། ཚུལ་ཁྲིམས་དག་ཅིང་གཟུངས་ཐོབ་པ་དང་། བྱང་ཆུབ་སེམས་གཉིས་རྩོལ་མེད་དུ་སྐྱེ་བ་དང་། འཆི་འཕོས་ནས་ཀྱང་དགའ་ལྡན་ཡིད་དགའ་ཆོས་འཛིན་གྱི་འདུན་སར་པདྨའི་སྙིང་པོ་ལས་བརྫུས་ཏེ་སྐྱེས་ནས་མྱུར་དུ་བྱང་ཆུབ་ཆེན་པོར་ལུང་བསྟན་པ་ཐོབ་པར་འགྱུར་བ་སོགས་མཐའ་ཡས་པས་ན། གུས་སྦྱོར་དང་རྟག་སྦྱོར་གྱིས་ཚུལ་འདི་ལ་བརྩོན་པ་ནི་དལ་འབྱོར་གྱི་རྟེན་ལ་སྙིང་པོ་ལེན་པའི་ཐབས་མཆོག་ཏུ་གྱུར་པ་ཡིན་ནོ། །དགའ་བ་བརྒྱ་ལྡན་ཆོས་ཀྱི་ཕོ་བྲང་དུ། །སྨོན་ལམ་གདབ་པའི་ཆོ་ག་རྨད་བྱུང་བ། །ནོར་བུའི་ཐེམ་སྐས་འདིར་བརྟེན་ཡིད་ཅན་ཀུན། །སྐུ་གསུམ་གྲོང་ཁྱེར་མཆོག་ཏུ་འཇུག་གྱུར་ཅིག །ཅེས་པའང་ཚུལ་འདི་ལ་མོས་པ་རྣམས་ལ་ཕན་པའི་བསམ་པས། མ་བྱོན་པའི་སངས་རྒྱས་རབ་གསལ་གྱི་རྣམ་པར་འཕྲུལ་བ། ཁ་ཆེའི་མ་ཧཱ་པཎྜི་ཏ་ཤཱཀྱ་ཤྲཱི་བྷ་དྲའི་གསུང་ངག །ཁྲོ་ཕུ་ལོ་ཙཱ་བ་ཆེན་པོ་བྱམས་པའི་དཔལ་གྱིས་བསྒྱུར་པའི་གཞུང་ཇི་ལྟ་བར། འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བཀླགས་པས་གྲུབ་པར་བསྡེབས་པ་དགེ་ལེགས་མཆོག་ཏུ་གྱུར་ཅིག ། ༈

[edit]

byams pa'i mchod chog dang 'brel bar dga' ldan du sems bskyed pa'i smon lam nor bu'i them skas/_ @#/__/rje btsun byams pa mgon po la mchod pa'i cho ga dang 'brel bar dga' ldan du sems bskyed pa'i smon lam nor bu'i them skas zhes bya ba bzhugs so//__// oM swasti/__/gang mtshan byams pa'i bdud rtsis yid can kun/__/dbugs 'byin mgon po mchog la gus btud nas/__/dga' ldan chos kyi 'dun sar bgrod pa'i lam/__/yid 'phrog nor bu'i them skas deng 'dir bskrun/__/de la grub pa brnyes pa'i paN+Di ta chen po bi khyA ta de ba la rje btsun byams pas dngos su gnang /__de la kha che'i paN+Di ta chen po shAkya shrI b+ha dras gsan cing thugs nyams su bzhes te/__khro phu lo tsA ba gnubs byams pa'i dpal la stsal ba'i dga' ldan du sems bskyed pa'i cho ga'i rim pa khyad par du 'phags pa nyams su len par 'dod pas lag tu blang ba'i rim pa la gnyis/__las su bya ba dang /__smon lam gdab pa'o/__/dang po ni/__gzhung las/__las su bya ba ni rten byin rlabs can dgod/__mchod pa ci 'byor dbul/__sbyin pa/__tshul khrims/__sgom pa gsum po sna tshang ba re cis kyang byed dgos te/__sbyin pa ni bza' btung khab skud la sogs gang 'byor bya ba'o/__/tshul khrims ni bsnyen gnas zhag 'ga' bsrung ba la sogs pa'o/__/sgom pa'ang thun mong gi sgom pa dang /__thun mong ma yin pa'i sgom pa gnyis las/__dang po ni/__ngo bo rang sems gnyug ma bsgom pa'o/__/thun mong ma yin pa'i sgom pa ni/__mdo sde rgyan las/__gang phyir byams pa de phyir khong khro 'gal/__/zhes pa la sogs pa dran pas byams chos khyad par du bsgom zhing /__de'i mi mthun phyogs spong ba'o/__/zhes gsungs pa ltar lag tu blang ba sngon du 'gro bas/__gnyis pa smon lam gdab pa'i cho ga la gsum/__sbyor ba/__dngos gzhi/__rjes so/__/dang po ni/__gnas gtsang zhing dben la yid dang mthun par phyag dar bya zhing /__dri bzang gi chus chag chag gdab/__gung du mgon po ma pham pa'i snang brnyan gtso bor gyur pa'i sku gsung thugs kyi rten dgram/__mchod pa g.yo med pas btsal la/__chu gnyis sngon 'gro'i nyer spyod spyi dang /__khyad par me tog__/bdug spos/__mar me/__zhal zas sogs kyi phreng ba tshar du dngar bar bsham/__rang gi mdun du 'bud dkrol brdung gsum gyi rol mo'i bye brag dang /__khrus chas/__maN+Dal la sogs pa 'du bya'o/__/gnyis pa dngos gzhi ni/__stan bde ba la bsam gtan gyi spyod lam dang ldan pas 'khod de dge sems khyad par can gyis mtshams sbyar te/__skyabs yul nam mkha' gang bar sad pa'i spyan sngar/__'gro rnams bsgral 'dod bsam pa yis/__/sangs rgyas chos dang dge 'dun la/__/byang chub snying por mchis kyi bar/__/rtag par bdag ni skyabs su mchi/__/zhes skyabs 'gro ci nus dang /__shes rab snying brtse dang bcas pa'i/__/brtson pas sems can don du bdag_/sangs rgyas mdun du gnas bcas te/__/rdzogs pa'i byang chub sems bskyed bgyi/__/zhes pas sems bskyed/__gnas dang mchod pa'i yo byad la dmigs te sman bla'i mdo chog nas 'byung ba ltar byin rlabs bzhi skor rgyas par bya ba'am/__de tsam mi nus na/__dkon mchog gsum gyi bden pa dang /__sangs rgyas dang byang chub sems dpa' thams cad kyi byin gyis rlabs dang /__tshogs gnyis yongs su rdzogs pa'i mnga' thang chen po dang /__chos kyi dbyings rnam par dag cing bsam gyis mi khyab pa'i stobs kyis deng 'dir khor yug gi sa gzhi 'di dag bcom ldan 'das 'od dpag med kyi zhing gi bkod pa'i yon tan phun sum tshogs pa'i rgyan thams cad kyis brgyan pa mdzes shing yid du 'ong bar gyur pa'i gzhir/__gzhal med khang rin po che sna bdun mchog tu 'bar ba bkod pa legs pas mdzes shing lhun stug pa yangs shing rgya che ba'i dbus su/__rin po che sna tshogs las grub pa'i khri seng ge chen po brgyad kyis bteg pa'i steng du pad+ma dang zla ba'i gdan/__mtha' skor kun tu seng khri pad zla'i gdan grangs med pa dang /__phyi nang kun tu'ang cho rigs dang 'tshams par lha dang mi'i yo byad dam pa zhal zas dang /__na bza' dang /__rol mo la sogs pa phul du phyin pa sna tshogs pa phung po gsum pa'i mdo dang /__bzang po spyod pa'i smon lam las byung ba'i mchod pa'i sprin rgya mtsho thams cad kyis rgyas par gang zhing rgyan bklubs pa dang ldan pa 'byung bar gyur cig__/thams cad du yang sa gzhi dag__/gseg ma la sogs med pa dang /__/lag mthil ltar mnyam baiDUR+Ya'i/__/rang bzhin 'jam por gnas gyur cig__/ces dang /__na mo b+ha ga wa te/__badz+ra sA ra pra marda ne/__ta thA ga tA ya/__ar+ha te samya k+saM bud+d+ha ya/__tad+ya thA/__oM badz+re badz+re/__ma hA badz+re/__ma hA te dza badz+re/__ma hA bid+ya badz+re/__ma hA bo d+hi tsit+ta badz+re/__ma hA bo d+hi maN+Do pa sa~M kra ma Na badz+re/__sarba karma a wa ra Na bi sho d+ha na badz+re swA hA/__zhes mchod pa'i sprin gyi gzungs lan gsum dang /__slar yang /__dkon mchog gsum gyi bden pa dang /__sangs rgyas dang byang chub sems dpa' thams cad kyi byin gyis rlabs dang /__tshogs gnyis yongs su rdzogs pa'i mnga' thang chen po dang /__chos kyi dbyings rnam par dag cing bsam gyis mi khyab pa'i stobs kyis de de bzhin du gyur cig__/ces bden pa'i stobs brjod/__de nas 'dun pa rtse gcig pas spos btul zhing snyan pa'i dbyangs dang bcas/__ma lus sems can kun gyi mgon gyur cing /__/bdud sde dpung bcas mi bzad 'joms mdzad lha/__/dngos rnams ma lus ji bzhin mkhyen gyur pa'i/__/bcom ldan 'khor bcas gnas 'dir gshegs su gsol/__/bcom ldan bskal pa grangs med du ma ru/__/'gro la brtse phyir thugs rjes rnams sbyangs shing /__/smon lam rgya chen dgongs pa yongs rdzogs pa'i/__/khyed bzhed 'gro don mdzad dus 'dir lags na/__/de phyir chos dbyings pho brang lhun grub nas/__/rdzu 'phrul byin rlabs sna tshogs ston mdzad cing /__/mtha' yas sems can tshogs rnams bsgral ba'i phyir/__/yang dag 'khor dang bcas te gshegs su gsol/__zhes gsol ba btab pas/__dga' ldan yid dga' chos 'dzin gyi pho brang nas dpal rgyal ba byams pa mgon po gser mdog mtshan dpe yongs su rdzogs pa/__phyag g.yas thugs kar chos 'chad dang /__g.yon mnyam gzhag gi tshul gyis klu shing gi yal ga'i rtsa ba bzung zhing me tog snyan gyi thad kar kha bye ba'i steng na ril ba spyi blugs dang bcas pa/__ral pa'i cod pan gyi ngos la bstan pa'i bdag po mchod rten gyi rnam pas spras pa/__ri dwags kyi pags pas nu ma g.yon pa bkab cing tshangs pa'i skud pa 'chang pa/__dar dang rin po che'i rgyan thams cad kyis brgyan pa/__'khor sangs rgyas dang byang chub sems dpa' nyan thos dgra bcom pa'i tshogs dpag tu med pas bskor ba de bzhin gshegs pa'i rdzu 'phrul chen pos nam mkha'i lam nas mngon sum du gshegs par mos te/__bcom ldan 'dir ni byon pa legs/__/bdag cag bsod nams skal bar ldan/__/bdag gi mchod yon bzhes nas kyang /__/thugs la dgongs shing gnang bar mdzod/__/ces 'byon legs bya/__khrus gsol ba'i thog mar khrus khang bskyed pa ni/__khrus kyi khang pa shin tu dri zhim pa/__/shel gyi sa gzhi gsal zhing 'tsher la bstar/__/rin chen 'bar ba'i ka ba yid 'ong ldan/__/mu tig 'od chags bla re bres pa der/__/khrus gsol ba ni/__ji ltar bltams pa tsam gyis ni/__/lha rnams kyis ni khrus gsol ltar/__/lha yi chu ni dag pa yis/__/de bzhin bdag gis sku khrus gsol/__/rgyal ba'i sku gsung thugs la nyon mongs mi mnga' yang /__/sems can lus ngag yid gsum sgrib pa sbyang slad du/__/rgyal ba'i sku gsung thugs la khrus chab 'di gsol bas/__/sems can lus ngag yid gsum sgrib pa dag gyur cig__/ces dang /__spro na/__'di ni sbyin pa'i rang bzhin chu/__/seng sna'i dri ma sbyong mdzad pa/__/gtong ba dri yis legs bsgos chus/__/khrus legs mdzad la sku khrus gsol/__/zhes sogs phar phyin drug gi tshigs bcad kyang brjod/__sku phyi ba ni/__de dag sku la mtshungs pa med pa'i gos/__/gtsang la dri rab bsgos pas sku phyi'o/__/byug pa 'bul ba ni/__stong gsum kun tu dri ngad ldang ba yi/__/dri mchog rnams kyis thub dbang rnams kyi sku/__/gser sbyangs btso ma byi dor byas pa ltar/__/'od chags 'bar ba de dag byug par bgyi/__/na bza' dang rgyan 'bul ba ni/__de nas de la kha dog legs bsgyur pa'i/__/na bza' shin tu dri zhim dam pa 'bul/__/gos bzang srab la 'jam pa sna tshogs dang /__/rgyan mchog brgya phrag de dang de dag gis/__/'phags pa kun tu bzang dang 'jam dbyangs dang /__/'jig rten dbang phyug sogs la'ang brgyan par bgyi/__/bzhugs su gsol ba ni/__bdag dang 'gro la thugs brtse'i phyir/__/nyid kyi rdzu 'phrul mthu yis ni/__/ji srid mchod pa bdag bgyid na/__/de srid bcom ldan bzhugs su gsol/__/zhes brjod pas tshogs kyi zhing du dgyes bzhin pas brtan par bzhugs par bsam/__de nas gzhung rtsa bar thog mar mchod pa dang /__de'i rjes su yan lag bdun pa bya bar gsungs na'ang /__'dir yan lag bdun gyi khongs su mchod pa bsdus te bya ba'i tshul la/__thog mar dngos su phyag 'tshal ba dang bcas te/__ji snyed su dag phyogs bcu'i sogs nas/__bdag gis bstod ces pa'i bar bzang spyod nas 'byung ba ltar dang /__spro na khro phu lo tsA ba chen po sogs bla ma gong ma rnams kyis mdzad pa'i byams pa'i bstod pa rgyas par bya/__bsdu na/__byams chen me yis zhe sdang bud shing bsregs/__/ye shes 'od kyis ma rig mun pa sel/__/chos kyi rgyal tshab 'gro ba'i mgon gyur pa'i/__/dga' ldan bzhugs pa de la phyag 'tshal lo/__/zhes mang du brjod cing phyag bya/__mchod pa la gzhung las/__thun mong gi longs spyod ci 'byor pa dbul ba dang /__thun mong ma yin pa rang gi lus dbul ba dang /__khyad par gyi mchod pa dge ba'i rtsa ba dbul ba'o/__/zhes gsum du gsungs pa'i dang po ni/__byams pa'i snang brnyan la na bza' sogs ci 'byor pa dbul/__spos dang mar me sogs spar la/__dngos su bshams pa'i mchod pa rgyur byas pa las byung ba'i yid kyis sprul pa'i mchod sprin rab 'byams mkha' khyab tu spros te/__me tog dam pa sogs nas/__phyag 'tshal mchod par bgyi/__/zhes dang me tog 'thor/__mchod pa'i sprin gyi gzungs bzla/__rol mo bya/__gnyis pa ni/__rgyal dang de sras rnams la bdag gis ni/__/bdag gi lus kun gtan du dbul bar bgyi/__/sems dpa' mchog rnams bdag ni yongs bzhes shig__/gus pas khyed kyi 'bangs su mchi bar bgyi/__/zhes brjod pas lus dbul/__gsum pa ni/__bdag gis dus gsum bsags pa'i dge ba kun/__/nam mkha'i mthar thug sems can don gyi phyir/__/thugs rje'i mnga' bdag mchog la 'bul lags na/__/'gro kun byang chub myur du thob mdzad gsol/__/zhes dge ba'i rtsa ba dbul/__zhar byung de thams cad dang rjes su 'brel bar maN+Dal 'bul ba ni/__maN+Dal so bdun ma dang /__nyer gsum ma sogs spyi ltar la/__ma tshang ba med pa 'di nyid/__dpal rgyal ba byams pa mgon po 'khor sangs rgyas dang byang chub sems dpa' nyan thos dgra bcom pa'i tshogs dang bcas pa rnams la dbul bar bgyi'o/__/thugs rjes 'gro ba'i don du bzhes su gsol/__bzhes nas bdag dang mtha' yas pa'i sems can thams cad dga' ldan chos kyi 'dun sar dbugs dbyung ste/__myur du byang chub chen por lung bstan thob par byin gyis brlab tu gsol/__zhes dang /__bdag gzhan lus ngag yid gsum longs spyod dus gsum dge tshogs bcas/__/rin chen maN+Dal bzang po kun bzang mchod pa'i tshogs bcas pa/__/blo yis blangs te ma pham mgon po 'khor dang bcas la 'bul/__/thugs rje'i dbang gis bzhes nas bdag la byin gyis brlab tu gsol/__/zhes brjod/__de nas sdig pa bshags pa la sogs pa'i yan lag lhag ma rnams ni/__'dod chags zhe sdang sogs nas/__phyir bsngo'o/__/zhes pa'i bar bzang spyod ltar bya'o/__/de ltar smon lam 'grub pa'i rgyu bsag sbyang spel gsum gyi gnad bsdus pa yan lag bdun pa grangs mang du bya/__gzungs bzla bar spro na/__na mo rat+na tra yA ya/__na mo b+ha ga wa te/__shAkya mu na ye/__ta thA ga tA ya/__ar+ha te samya k+saM bud+d+hA ya/__tad+ya thA/__oM a dzi te a dzi _te/__a pa rA dzi te/__a dzi te dza ya/__ha ra ha ra/__mai tri a wa lo ki te/__a ra ka ra/__ma hA sa ma ya sid+d+hi/__b+ha ra b+ha ra/__ma hA bo d+hi maN+Do bi dze/__sma ra sma ra/__asma skaM sa ma yaM/__bo d+hi bo d+hi/__ma hA bo d+hi swA hA/__rtsa ba'i sngags so/__/oM mo hi mo hi/__ma hA mo hi swA hA/__snying po'o/__/oM ma ti ma ti smr-i ti swA hA/__nye ba'i snying po ste/__de rnams ci nus bzlas nas/__smon lam gdab pa dngos ni/__gzhung rtsa ba las de nas me tog dang bcas pa'i thal mo sbyar la 'di skad ces/__phyogs bcu na bzhugs pa'i sangs rgyas dang byang chub sems dpa' thams cad dang slob dpon dang dge 'dun bdag la dgongs su gsol/__bdag ming rus 'di zhes bgyi ba dus 'di nas bzung ste snying po byang chub la mchis kyi bar du rkang gnyis rnams kyi mchog sangs rgyas bcom ldan 'das la skyabs su mchi'o/__/'dod chags dang bral ba rnams kyi mchog dam pa'i chos la skyabs su mchi'o/__/tshogs rnams kyi mchog 'phags pa'i dge 'dun la skyabs su mchi'o/__/bdag ming rus 'di zhes bgyi ba nam mkha'i mthas gtugs pa'i sems can la phan pa dang bde ba'i don du myur du bla na med pa yang dag par rdzogs pa'i byang chub thob par bgyi ba'i slad du dga' ldan du 'dug pa'i sems bskyed par bgyi ste/__bdag gis sbyin pa dang /__tshul khrims dang /__sgom pa las byung ba'i dge ba'i rtsa ba 'dis bdag shi 'phos nas skye ba gzhan gyis bar ma chod par dga' ldan gyi gnas su dam pa'i chos la longs spyod par gyur cig__/ma'i mngal gyi rdzab tu mi skye zhing pad+ma'i sbubs su brdzus te skye bar gyur cig__/der yang sgrub pa'i rten phun sum tshogs pa chos brgyad dang ldan par gyur cig__/bla ma rje btsun byams pa mgon pos rjes su 'dzin par gyur cig__/grogs byang chub sems dpa' rnams kyi rjes su 'jug par gyur cig__/kun tu spyod pa'i sgo rnam par dag pa du mas de nyid mnyes par byed par gyur cig__/nam du'ang mi mnyes par byed par ma gyur cig__/bsam pa byang chub kyi sems rin po che gong nas gong du 'phel bar byed par gyur cig__/sbyor ba pha rol tu phyin pa bcu yongs su rdzogs par byed par gyur cig__/spyod pa bla na med pa'i sgo drug mthar phyin par byed par gyur cig__/ched du bya ba gzhan gyi don phun sum tshogs pa yul dus rnam pa thams cad du yongs su rdzogs par gyur cig__/phrin las bsam gyis mi khyab pas 'khor ba ma stongs kyi bar du phan pa dang bde ba rgyas shing rgyun mi 'chad par gyur cig__/mdor na bdag dang gzhan gyi don thams cad 'jig rten dang 'jig rten las 'das pa'i phun sum tshogs pa thams cad ldan par gyur cig__/bdag gis sbyin sogs bgyis pa 'di dag gis/__/'gro la phan phyir sangs rgyas 'grub par shog__/'di nas shi 'phos dga' ldan skye ba dang /__/byams mgon bsten pas de dgongs rdzogs byed shog__/ces lan gsum brjod cing me tog gtor bar bya'o/__/slar yang smon lam de nyid 'grub pa'i don du dkon mchog gsum gyi bden pa'i stobs brjod pa ni/__sangs rgyas sku gsum brnyes pa dang /__/chos nyid mi 'gyur dri med dang /__/dge 'dun mi phyed 'dus pa yi/__/bden pas smon lam 'grub par shog__/ces dpon slob thams cad kyis me tog gtor bar bya'o/__/zhes gsungs pa ltar nyams su blang ngo /__/gsum pa rjes ni/__slar yang gtang rag gi tshul du/__me tog dam pa sogs mchod pa dang /__spro na/__sngon tshe gser bzang 'od kyi rgyal ba las/__/zhes sogs kho bos byas pa'i thugs dam gnad nas skul ba'i gsol 'debs kyang bya/__ma 'byor pa dang nyams pa dang /__/gang yang bdag rmongs blo yis ni/__/bgyis pa dang ni bgyid stsal gang /__/de yang bzod par mdzad du gsol/__/zhes nongs pa bshags/__mgon po ma pham pa la sogs pa 'phags pa'i tshogs rnams kyis bdag cag la sogs pa'i 'gro ba nyam thag pa rnams kyi don mdzad cing bka' drin stsal lags te/__da dung du'ang bdag cag rnams la thugs brtse bas yang dang yang du gdan 'dzoms par mdzad par dgongs shing /__rang nyid kyi gdul bya'i zhing du gdul bya mang po'i don la gshegs par stsal du ci gnang /__/zhes pas dga' ldan gyi zhing khams su slar yang gshegs par gsol/__sangs rgyas kun la phyag 'tshal lo/__/zhes sogs 'phags pa byams pa'i smon lam dang /__spro zhing nus na khro phu lo tsA ba chen pos mdzad pa'i smon lam rin po che sil ma sogs kyang btab pa'i mthar/__che ba'i che mchog sogs bka' las byung ba'i bkra shis kyi tshigs su bcad pa rgya cher brjod cing me tog 'thor/__rol mo'i sgra snyan par sbyar bas dge legs su bya'o/___/de ltar brtson pa'i phan yon ni/__tshe 'dir tshe ring ba dang /__nad med pa dang /__dpal dang gzi brjid 'phel ba dang /__tshul khrims dag cing gzungs thob pa dang /___byang chub sems gnyis rtsol med du skye ba dang /__'chi 'phos nas kyang dga' ldan yid dga' chos 'dzin gyi 'dun sar pad+ma'i snying po las brdzus te skyes nas myur du byang chub chen por lung bstan pa thob par 'gyur ba sogs mtha' yas pas na/__gus sbyor dang rtag sbyor gyis tshul 'di la brtson pa ni dal 'byor gyi rten la snying po len pa'i thabs mchog tu gyur pa yin no/__/dga' ba brgya ldan chos kyi pho brang du/__/smon lam gdab pa'i cho ga rmad byung ba/__/nor bu'i them skas 'dir brten yid can kun/__/sku gsum grong khyer mchog tu 'jug gyur cig___/ces pa'ang tshul 'di la mos pa rnams la phan pa'i bsam pas/__ma byon pa'i sangs rgyas rab gsal gyi rnam par 'phrul ba/__kha che'i ma hA paN+Di ta shAkya shrI b+ha dra'i gsung ngag__/khro phu lo tsA ba chen po byams pa'i dpal gyis bsgyur pa'i gzhung ji lta bar/__'jam dbyangs bla ma dgyes pa'i 'bangs mkhyen brtse'i dbang pos bklags pas grub par bsdebs pa dge legs mchog tu gyur cig____/_!