ཚོན་པྲ་བརྟག་པ་ནི་སོགས་སྒྲུབ་ཆེན་སྐབས་ཀྱི་རྣག་བཞག་སོགས།

🚧 This website is under continued development. We appreciate your patience!

Previous Text Back to Volume PageNext Text

Wylie title	tshon pra brtag pa ni sogs sgrub chen skabs kyi rnag bzhag sogs
Location	mkhyen brtse'i bka' 'bum Volume 3, sde tshan 1, Text 31, Pages 586-591 (Folios 293b2 to 296a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. tshon pra brtag pa ni sogs sgrub chen skabs kyi rnag bzhag sogs. In 'jam dbyangs mkhyen brtse'i dbang po'i bka' 'bum, Vol. 3: 586-591. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris

1 Texts in this Section (sde tshan or chos tshan)

31 586-591	ཚོན་པྲ་བརྟག་པ་ནི་སོགས་སྒྲུབ་ཆེན་སྐབས་ཀྱི་རྣག་བཞག་སོགས། tshon pra brtag pa ni sogs sgrub chen skabs kyi rnag bzhag sogs Notes - zin bris	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཚོན་པྲ་བརྟག་པ་ནི། མདོ་དབང་ལས། ཁྱམས་བཅུ་གཅིག་པའི་བྱང་ཤར་ནང་ནས་ཕྱིར་མཐིང་དཀར་སེར་དམར་ལྗང་བའི་རྩིག་པ་མཛུབ་གང་བ་དྲངས་ཏེ་ཏིང་ཕོར་བཀབ་པ་རྡོ་རྗེས་མནན་ལ་བཞག །ནངས་པར་སྔ་བར་ཟངས་གཞོང་བསལ་ཏེ་རེ་ཁཱ་འདྲེས་ན་ཉམས་པ་ཡོད་པས་བཤགས་པར་བྱ། མ་འདྲེས་གསལ་ན་ཤིས་པའོ། །ཞེས་སྣང་། དེ་ཡང་རྩིག་པ་ལྔ་སྒྲགས་ཀྱི་ནང་ནི་དཀྱིལ་འཁོར་གྱི་གཙོ་ལྷའི་མདོག་དང་། དེ་ནས་དཀར་སེར་དམར་ལྗང་མཐིང་ག་རིམ་བཞིན་ནོ། ། ༈

ཚུལ་ཕྱག་དང་གྲལ་ཕྱག་གི་དབྱེ་བ་ནི། དེ་ཉིད་ལས། ཞི་ཁྲོ་ཕུར་གསུམ་དང་བཀའ་བརྒྱད་གཅིག་དྲིལ་བའི་ཆོག་ཁྲིགས་ཡིག་རྙིང་ཞིག་ལས་ཚུལ་ཕྱག་སྐྱབས་འགྲོ་དྲུག་སྐོར་ལ་ངོས་བཟུང་བ་དང་། གྲལ་ཕྱག་ནི་བླ་མ་ནས་བཟུང་ཞི་ཁྲོ་ཆོས་སྤྱོད་ཀྱི་བར་དུ་ཕྱག་འཚལ་བ་ལ་ངོས་བཟུང་བ་དང་། ཞི་བ་རིན་ཆེན་དྲྭ་བ་དང་། ཁྲོ་བོ་དམ་པ་རྒྱན་གྱི་སྒོམ་ཁོག་མངོན་པར་རྟོགས་པའི་མན་ངག་ལས། ཚུལ་ཕྱག་ནི། རྣལ་འབྱོར་པ་རྣམས་ནང་དུ་འདུས་བ་ལ་དཀྱིལ་འཁོར་གྱི་མཐར་འཁོད་དེ་ས་མ་ཡ་ཛཿཞེས་དཔང་པོས་ལྷ་འོག་ནས་འབྱུང་བ་ལྟར་སྤྱན་དྲངས་ལ། བདག་ལུས་ཞིང་གི་རྡུལ་སྙེད་དུ་སྤྲུལ་ནས། གྲུབ་ན་རྣལ་འབྱོར་རྒྱུན་བཤགས་རྒྱས་བར་བྱ། །དེ་མ་གྲུབ་ན་བླ་མ་དང་མཁའ་འགྲོ་ལ་ཕྱག་གསུམ་བཙལ། ཡི་དམ་གྱི་ལྷ་ཞི་ཁྲོ་ལ་ཕྱག་གསུམ་འཚལ། དེ་ནི་སྔོན་གྱི་ཚུལ་བཟང་པོའི་རྗེས་སུ་བཞུགས་པས་ཚུལ་ཕྱག་ཅེས་བྱའོ། །དེ་ནས་རྡོ་རྗེ་སློབ་དཔོན་གདན་ལ་བཞུགས་པར་ཀུན་གྱིས་ཕྱག་གསུམ་འཚལ་ལོ། །དེ་ནས་དབང་སྔ་བ་ནས་རིམ་པ་བཞིན་དུ་གསུམ་གསུམ་བཙལ་ལོ། །དེ་ནས་དབང་གྲལ་གྱི་རིམ་པ་བཞིན་དུ་ཐོབ་པས་ན་གྲལ་ཕྱག་ཅེས་བྱའོ། །དེ་ལྟར་ཡང་དགོངས་འདུས་ལས། རྡོ་རྗེ་འདུད་པའི་གྲལ་ཕྱག་ཏུ། །རྡོ་རྗེ་འདུས་པའི་སྟང་ཆེན་གཤེར། །ཞེས་གསུངས། དེས་གྲལ་ཕྱག་དང་ཚུལ་ཕྱག་བྱ་བ་དེ་ཐལ། ཅེས་འབྱུང་བས་ཤིན་ཏུ་ཁུངས་བཙུན་ཅིང་དོན་གྱི་འབྲེལ་ཆགས་པ་ལུང་དང་བཅས་འཐད་པར་སྣང་བས་འདི་བཞིན་དུ་བྱ་བ་ལ་ཞེས་སོགས་གསུངས་ཤིང་། ཚུལ་ཕྱག་སྐབས། ལྷ་སྤྱན་དྲངས་པ་དང་རྗེས་དཔོན་སློབ་རྣམས་ལྷན་ཅིག་ཏུ་ཕྱག་བྱ་བ་དང་བསྟུན་བདག་ཉིད་ཆེན་པོ་རིགས་ལྔ་ནས། ཕྱི་ནང་མཁའ་འགྲོ་རྣལ་འབྱོར་མ་ཡི་ཚོགས། །ཞེས་པས་རྩ་གསུམ་དང་། བརྗོད་མེད་ཤེས་རབ་སོགས་ཤློ་ཀ་གཅིག་གིས་རྟོགས་པའི་ཕྱག་དང་། ཐུགས་རྗེའི་གདུང་འཚོབ་མན་གྱིས་བཤགས་པ་རྣམས་ཚང་བས་ཡེ་ཤེས་སྐུ་མཆོག་འདོན་པར་གསུངས། གྲལ་ཕྱག་སྐབས་སུ། སློབ་དཔོན་ཁྲིར་བཞུགས་ནས། སྒྲུབ་མཆེད་ཐམས་ཅད་ཀྱིས་ཕྱག་གསུམ་གསུམ་བཙལ་ཞིང་། དབང་སྔ་མ་ནས་ཕྱག་གསུམ་རིམ་བཞིན་འཚལ་བར་གསུངས་པ། འདུལ་བར་རྒན་རིམ་གྱི་ཕྱག་བྱ་བ་དང་ཆོས་མཚུངས་པར་དཀྱིལ་འཁོར་དུ་དབང་ཐོབ་སྔ་ཕྱི་རིམ་པས་ཕྱག་བྱ་བ་ཡིན་འདུག་ཀྱང་། སྒྲུབ་མཆེད་རྣམས་ཚན་གཉིས་སུ་བཅད་དེ་ཕན་ཚུན་དུ་ཕྱག་གསུམ་རེ་འཚལ་བས་དོན་འཐུས་པར་སེམས། ཞེས་སྣང་ངོ་། །འོན་ཀྱང་དེང་སང་ཕྱག་ལེན་ལ་ནི་རྟེན་ཕྱག་ཁོ་ན་འདེབས་སོ། ། ༈ སྒྲུབ་ཆེན་སྐབས། ཕྱི་མཚམས་རྒྱལ་ཐོ། ནང་མཚམས་སྒོ་བྱང་གདགས་པ། གསང་མཚམས་མ་ཏྲཾ་བསྒྲལ་བའོ། །མཚམས་དགུ་ཕྲུགས་ནི། སྒྱུ་འཕྲུལ་ཞི་ཁྲོ། ཕྱི་ནང་གསང་བའི་མཚམས་དགུ་ཕྲུགས་ཀྱིས་ས་གཞི་བསྲུང་བར་བྱ་སྟེ། ཕྱི་མཚམས་རྒྱལ་ཆེན་བཞི་དང་ཕྱོགས་སྐྱོང་གི་ཐོ་གཟུག །ནང་མཚམས་དམ་སྲི་བརྡུངས་ལ་མནན་པ་བྱ། གསང་མཚམས་སྒོ་བྱང་གདགས། བར་གྱི་ཕྱི་མཚམས་ཁྲོ་བོ་བཅུས་བགེགས་ལ་ཕུར་པ་གདབ། བར་གྱི་ནང་མཚམས་མཚོན་ཆ་འཆོལ་བས་མཚོན་ཆའི་ཕུར་བུ་གདབ། གསང་མཚམས་ཁྲོ་བཅུའི་སྟངས་སྟབས་ཀྱིས་བགེགས་བྲིལ་གྱིས་མནན། གསང་བའི་ཕྱི་མཚམས་བདུད་རྩི་འཁྱིལ་བ་དང་མི་གཡོ་བས་དམ་སྲིའི་བར་ཆད་ཚར་བཅད། ནང་མཚམས་ལུས་ངག་ཡིད་གསུམ་སྐུ་གསུང་ཐུགས་ཀྱི་ཡེ་ཤེས་སུ་བསྒོམ། གསང་མཚམས་གསང་བའི་དམ་སྲི་བདུད་རྩི་གསང་གཏོར་གྱིས་རྡུལ་བཞིན་དུ་བརླག་པར་བྱའོ། །ཞེས་གསུངས་སྣང་ངོ་། ། ༈ ཚེ་དབང་སྐབས། ལུས་ལ་མདའ་དང་ངག་ལ་དར་དམར་པོ། །ཡིད་ཀྱི་རྟེན་དུ་མེ་ལོང་གསུམ་འབྲེལ་བས། །བླ་ཚེ་སྲོག་གི་རྟེན་ཡིན་ཤིན་ཏུ་གཅེས། ། ༈ གཏོར་མ་ཤེས་པ་བཞི་ལྡན་ནི། །དབང་དུས་ལྷ་དང་མཆོད་དུས་འདོད་ཡོན་ཏེ། །དངོས་གྲུབ་ལེན་སྐབས་ཡེ་ཤེས་བདུད་རྩི་དང་། །ཟོར་འཕང་སྐབས་སུ་ནད་མཚོན་ཐོག་ཆར་དང་། །ཕོ་ཉའི་དམག་དཔུང་འཕྲོ་བར་ཤེས་པར་བྱ། ། ༈ སྔགས་ཀྱི་སྐབས། མགལ་མེ་ཀླད་འཁོར་ལྟ་བུ་ནི། །མཚན་མོ་མགལ་དུམ་བར་སྣང་ལ་བསྐོར་བས་བསྐོར་བ་རྒྱུན་མ་ཆད་པའི་དབྱིབས་ལྟ་བུ་སྟེ། ཁ་དོག་དམར་པོའམ་ཡིག་འབྲུ་ལ་མེ་འབར་བ་སོགས་བསྒོམ་དགོས་རྒྱུ་ནི་མ་ལགས་སོ། ། ༈ རང་བཞིན་ལྟ་བའི་དམ་ཚིག་བཞི་ནི། མེད། ཕྱལ། གཅིག་པུ། ལྷུན་རྫོགས་བཞིའོ། །སྦྱིན་སྲེག་གཡབ་རྫས་ལ། ཞི་བར་བྱ་རྒོད། རྒྱས་པར་ངང་པ། དབང་ལ་རྨ་བྱ། དྲག་པོར་ཕོ་རོག་གི་གཤོག་པ་ལ་བྲིས་པ་དགོས་ཤིང་། མེ་ལ་ཕུ་བྱེད་པ་དང་། མེའི་ཚ་བ་དཀྲུགས་པ་སོགས་མི་བྱའོ། ། ༈ མཆོད་པ་ལ། བཤམས་པ་རྫས་ཀྱི། དམིགས་པ་ཏིང་འཛིན། བརྡ་སྤྲོད་པ་ཕྱག་རྒྱའི། བླངས་པ་སྒྲའི། ཟབ་མོ་སྔགས་ཀྱི་མཆོད་པ་དང་ལྔའོ། ། ༈ ཨརྒྷཾ་ཡན་ལག་བརྒྱད་ལྡན་ཆུ། །ཞལ་དུ་བཞེས་དང་སྐུ་ཁྲུས་གསོལ། །པཉྩ་མ་ནི་ཞེས་པ་ཡི། །ཞབས་བསིལ་ཆབ་དང་ལེན་མཚུངས་ཏེ། །པཱ་དྱཾ་ཞབས་བསིལ་སྟན་ཉིད་ལ། །བཞུགས་ཁར་ཞབས་ཉིད་བཀྲུ་བའོ། ། ༈ གནྡྷེ་དྲི་ཆབ་ཙནྡན་དང་། ག་བུར་གུར་གུམ་སི་ཧླ་སོགས་ཆུ་གཙང་དང་སྦྱར་ནས་ཁྲུས་ཐམས་ཅད་ཚར་བའི་རྗེས་སུ་ལུས་ཀྱི་གནས་རྣམས་བྱུགས་ཤིང་ཚ་གདུང་གི་ནད་གཞི་སོགས་སྐྱོབ་ཕྱིར་བསིལ་ངད་ལྡན་པའི་དྲི་བཟང་གི་བྱུག་རྫས་དེ་རྣམས་རྒྱ་གར་ཡུལ་ཚད་གདུང་ཆེ་བ་དང་བསྟུན་པའོ། ། ༈ བསྒྲལ་ལས་སོགས་ལ། འཁོར་གསུམ་ཆོས་ཉིད་སྐྱེ་མེད་དུ་རྟོགས་པ་ལྟ་བ་བློ་འདས་ཀྱི་རྫོང་། བདག་ཉིད་ལྷ་དང་། ཕུར་པ་སྲས་མཆོག །དམིགས་ཡུལ་དངོས་སུ་གསལ་ཞིང་ཐམས་ཅད་ཀྱང་རྒྱལ་བའི་ཕྲིན་ལས་སུ་ཤེས་པ་གསལ་བ་གསུམ་ལྡན་ནི་སྒོམ་པ་ཡེངས་མེད་ཀྱི་འཕྲང་། དེ་དག་ཀྱང་ཨ་འཐས་མ་ཡིན་པར་ཡེ་ཤེས་སྒྱུ་མའི་རྣམ་རོལ་གྱིས་ཚོགས་གཉིས་མཉམ་རྫོགས་ཆེན་པོར་ལ་བཟླ་བ་སྤྱོད་པ་ཞེན་མེད་ཀྱི་སྲོག་ཅེས་བྱའོ། ། ༈

དུས་ཀྱི་སྙིགས་མ་རྩོད་ལྡན་ཏེ། སེམས་ཅན་སྙིགས་མ་དེར་སྐྱེས་པ། །ལྟ་བ་བདག་ལྟ་ཕྱོགས་འཛིན་ཅན། །ཚེ་ནི་ཐུང་ཞིང་བར་ཆད་མང་། །ཉོན་མོངས་གཉེན་པོས་མི་ནོན་པའོ། ། ༈ བསླབ་པ་གསུམ་ནི་སྡོམ་པའི་དབང་བྱས་ན། དགེ་བསྙེན། དགེ་ཚུལ། དགེ་སློང་དང་གསུམ། དཔང་པོ་དང་སྦྱར་ན་སོ་བྱང་དང་སྔགས། ཉམས་སུ་བླང་བྱ་སྦྱར་ན། ཚུལ་ཏིང་ཤེས་རབ་གསུམ་སྟེ་དགུའོ། ། ༈

[edit]

tshon pra brtag pa ni sogs sgrub chen skabs kyi rnag bzhag sogs/ tshon pra brtag pa ni/__mdo dbang las/__khyams bcu gcig pa'i byang shar nang nas phyir mthing dkar ser dmar ljang ba'i rtsig pa mdzub gang ba drangs te ting phor bkab pa rdo rjes mnan la bzhag__/nangs par snga bar zangs gzhong bsal te re khA 'dres na nyams pa yod pas bshags par bya/__ma 'dres gsal na shis pa'o/__/zhes snang /__de yang rtsig pa lnga sgrags kyi nang ni dkyil 'khor gyi gtso lha'i mdog dang /__de nas dkar ser dmar ljang mthing ga rim bzhin no/___/__!_ tshul phyag dang gral phyag gi dbye ba ni/__de nyid las/__zhi khro phur gsum dang bka' brgyad gcig dril ba'i chog khrigs yig rnying zhig las tshul phyag skyabs 'gro drug skor la ngos bzung ba dang /__gral phyag ni bla ma nas bzung zhi khro chos spyod kyi bar du phyag 'tshal ba la ngos bzung ba dang /__zhi ba rin chen drwa ba dang /__khro bo dam pa rgyan gyi sgom khog mngon par rtogs pa'i man ngag las/__tshul phyag ni/__rnal 'byor pa rnams nang du 'dus ba la dkyil 'khor gyi mthar 'khod de sa ma ya dzaHzhes dpang pos lha 'og nas 'byung ba ltar spyan drangs la/_bdag lus zhing gi rdul snyed du sprul nas/__grub na rnal 'byor rgyun bshags rgyas bar bya/__/de ma grub na bla ma dang mkha' 'gro la phyag gsum btsal/__yi dam gyi lha zhi khro la phyag gsum 'tshal/__de ni sngon gyi tshul bzang po'i rjes su bzhugs pas tshul phyag ces bya'o/__/de nas rdo rje slob dpon gdan la bzhugs par kun gyis phyag gsum 'tshal lo/__/de nas dbang snga ba nas rim pa bzhin du gsum gsum btsal lo/__/de nas dbang gral gyi rim pa bzhin du thob pas na gral phyag ces bya'o/__/de ltar yang dgongs 'dus las/__rdo rje 'dud pa'i gral phyag tu/__/rdo rje 'dus pa'i stang chen gsher/__/zhes gsungs/__des gral phyag dang tshul phyag bya ba de thal/__ces 'byung bas shin tu khungs btsun cing don gyi 'brel chags pa lung dang bcas 'thad par snang bas 'di bzhin du bya ba la zhes sogs gsungs shing /__tshul phyag skabs/__lha spyan drangs pa dang rjes dpon slob rnams lhan cig tu phyag bya ba dang bstun bdag nyid chen po rigs lnga nas/__phyi nang mkha' 'gro rnal 'byor ma yi tshogs/__/zhes pas rtsa gsum dang /__brjod med shes rab sogs sh+lo ka gcig gis rtogs pa'i phyag dang /__thugs rje'i gdung 'tshob man gyis bshags pa rnams tshang bas ye shes sku mchog 'don par gsungs/__gral phyag skabs su/__slob dpon khrir bzhugs nas/__sgrub mched thams cad kyis phyag gsum gsum btsal zhing /__dbang snga ma nas phyag gsum rim bzhin 'tshal bar gsungs pa/__'dul bar rgan rim gyi phyag bya ba dang chos mtshungs par dkyil 'khor du dbang thob snga phyi rim pas phyag bya ba yin 'dug kyang /__sgrub mched rnams tshan gnyis su bcad de phan tshun du phyag gsum re 'tshal bas don 'thus par sems/__zhes snang ngo /__/'on kyang deng sang phyag len la ni rten phyag kho na 'debs so/___/__!_ sgrub chen skabs/__phyi mtshams rgyal tho/__nang mtshams sgo byang gdags pa/__gsang mtshams ma traM bsgral ba'o/__/mtshams dgu phrugs ni/__sgyu 'phrul zhi khro/__phyi nang gsang ba'i mtshams dgu phrugs kyis sa gzhi bsrung bar bya ste/__phyi mtshams rgyal chen bzhi dang phyogs skyong gi tho gzug__/nang mtshams dam sri brdungs la mnan pa bya/__gsang mtshams sgo byang gdags/__bar gyi phyi mtshams khro bo bcus bgegs la phur pa gdab/__bar gyi nang mtshams mtshon cha 'chol bas mtshon cha'i phur bu gdab/__gsang mtshams khro bcu'i stangs stabs kyis bgegs bril gyis mnan/__gsang ba'i phyi mtshams bdud rtsi 'khyil ba dang mi g.yo bas dam sri'i bar chad tshar bcad/__nang mtshams lus ngag yid gsum sku gsung thugs kyi ye shes su bsgom/__gsang mtshams gsang ba'i dam sri bdud rtsi gsang gtor gyis rdul bzhin du brlag par bya'o/__/zhes gsungs snang ngo /___/__!_ tshe dbang skabs/__lus la mda' dang ngag la dar dmar po/__/yid kyi rten du me long gsum 'brel bas/__/bla tshe srog gi rten yin shin tu gces/___/__!_ gtor ma shes pa bzhi ldan ni/__/dbang dus lha dang mchod dus 'dod yon te/__/dngos grub len skabs ye shes bdud rtsi dang /__/zor 'phang skabs su nad mtshon thog char dang /__/pho nya'i dmag dpung 'phro bar shes par bya/___/__!_ sngags kyi skabs/__mgal me klad 'khor lta bu ni/__/mtshan mo mgal dum bar snang la bskor bas bskor ba rgyun ma chad pa'i dbyibs lta bu ste/__kha dog dmar po'am yig 'bru la me 'bar ba sogs bsgom dgos rgyu ni ma lags so/___/__!_ rang bzhin lta ba'i dam tshig bzhi ni/__med/__phyal/__gcig pu/__lhun rdzogs bzhi'o/__/sbyin sreg g.yab rdzas la/__zhi bar bya rgod/__rgyas par ngang pa/__dbang la rma bya/__drag por pho rog gi gshog pa la bris pa dgos shing /__me la phu byed pa dang /__me'i tsha ba dkrugs pa sogs mi bya'o/__/_!_mchod pa la/__bshams pa rdzas kyi/__dmigs pa ting 'dzin/__brda sprod pa phyag rgya'i/__blangs pa sgra'i/__zab mo sngags kyi mchod pa dang lnga'o/__/_!_ar+g+haM yan lag brgyad ldan chu/__/zhal du bzhes dang sku khrus gsol/__/pany+tsa ma ni zhes pa yi/__/zhabs bsil chab dang len mtshungs te/__/pA d+yaM zhabs bsil stan nyid la/__/bzhugs khar zhabs nyid bkru ba'o/__/_! gan+d+he dri chab tsan+dan dang /__ga bur gur gum si h+la sogs chu gtsang dang sbyar nas khrus thams cad tshar ba'i rjes su lus kyi gnas rnams byugs shing tsha gdung gi nad gzhi sogs skyob phyir bsil ngad ldan pa'i dri bzang gi byug rdzas de rnams rgya gar yul tshad gdung che ba dang bstun pa'o/__/_!_ bsgral las sogs la/__'khor gsum chos nyid skye med du rtogs pa lta ba blo 'das kyi rdzong /__bdag nyid lha dang /__phur pa sras mchog__/dmigs yul dngos su gsal zhing thams cad kyang rgyal ba'i phrin las su shes pa gsal ba gsum ldan ni sgom pa yengs med kyi 'phrang /__de dag kyang a 'thas ma yin par ye shes sgyu ma'i rnam rol gyis tshogs gnyis mnyam rdzogs chen por la bzla ba spyod pa zhen med kyi srog ces bya'o/__/_! dus kyi snyigs ma rtsod ldan te/__sems can snyigs ma der skyes pa/__/lta ba bdag lta phyogs 'dzin can/__/tshe ni thung zhing bar chad mang /__/nyon mongs gnyen pos mi non pa'o/__/_!_bslab pa gsum ni sdom pa'i dbang byas na/__dge bsnyen/__dge tshul/__dge slong dang gsum/__dpang po dang sbyar na so byang dang sngags/__nyams su blang bya sbyar na/__tshul ting shes rab gsum ste dgu'o/__/_!