ཨོ་རྒྱན་རྗེ་འབངས་ཉེར་ལྔ་ལ་གསོལ་བ་འདེབས་པའི་ཚུལ་ཕན་བདེའི་ནོར་བུའི་དོ་ཤལ།

🚧 This website is under continued development. We appreciate your patience!

Previous Text Back to Volume PageNext Text

Wylie title	o rgyan rje 'bangs nyer lnga la gsol ba 'debs pa'i tshul phan bde'i nor bu'i do shal
Location	mkhyen brtse'i bka' 'bum Volume 1, sde tshan 2, Text 71, Pages 269-275 (Folios 106a2 to 109a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. o rgyan rje 'bangs nyer lnga la gsol ba 'debs pa'i tshul phan bde'i nor bu'i do shal. In 'jam dbyangs mkhyen brtse'i dbang po'i bka' 'bum, Vol. 1: 269-275. Khams sde dge rdzong sar dgon: Rdzong sar blo gros phun tshogs, 2020.
Genre	Supplications - gsol 'debs
Deity	o rgyan rje 'bangs nyer lnga
Colophon	།ཅེས་འཛམ་བུའི་ལྗོན་པས་མཚན་པའི་ལྗོངས་འདིར་སྟོན་པ་གཉིས་པར་ཡོངས་སུ་གྲགས་ཤིང་། ས་གསུམ་ན་འགྲན་ཟླ་བྲལ་བ་དུས་གསུམ་མཁྱེན་པ་ཨོ་རྒྱན་ཆེན་པོས་རྗེས་སུ་བཟུང་ཞིང་སྨིན་གྲོལ་གྱི་སྒོ་འཕར་ཕྱེ་བས་གྲུབ་པའི་ས་ལ་གཤེགས་པར་མཛད་པའི་རྣལ་འབྱོར་གྱི་དབང་ཕྱུག་རྗེ་འབངས་ཉི་ཤུ་རྩ་ལྔ་ལ་རྣམ་ཐར་དང་མཐུན་པར་རྟོགས་པ་བརྗོད་པའི་གསོལ་བ་འདེབས་པ་ཕན་བདེའི་ནོར་བུའི་དོ་ཤལ་ཅེས་བྱ་བ་འདི་ནི། གཞོན་ནུ་ཨ་བྷཱ་ཡས་མི་ཕྱེད་པའི་དད་པས་མཚམས་སྦྱར་ཏེ་རང་ལ་བཅོ་ལྔ་པར་བཀོད་པ་ཛ་ཡནྟུ།།
	ces 'dzam bu'i ljon pas mtshan pa'i ljongs 'dir ston pa gnyis par yongs su grags shing /__sa gsum na 'gran zla bral ba dus gsum mkhyen pa o rgyan chen pos rjes su bzung zhing smin grol gyi sgo 'phar phye bas grub pa'i sa la gshegs par mdzad pa'i rnal 'byor gyi dbang phyug rje 'bangs nyi shu rtsa lnga la rnam thar dang mthun par rtogs pa brjod pa'i gsol ba 'debs pa phan bde'i nor bu'i do shal ces bya ba 'di ni/__gzhon nu a b+hA yas mi phyed pa'i dad pas mtshams sbyar te rang la bco lnga par bkod pa dza yan+tu

1 Texts in this Section (sde tshan or chos tshan)

71 269-275	ཨོ་རྒྱན་རྗེ་འབངས་ཉེར་ལྔ་ལ་གསོལ་བ་འདེབས་པའི་ཚུལ་ཕན་བདེའི་ནོར་བུའི་དོ་ཤལ། o rgyan rje 'bangs nyer lnga la gsol ba 'debs pa'i tshul phan bde'i nor bu'i do shal Supplications - gsol 'debs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཨོ་རྒྱན་རྗེ་འབངས་ཉེར་ལྔ་ལ་གསོལ་བ་འདེབས་པའི་ཚུལ་ཕན་བདེའི་ནོར་བུའི་དོ་ཤལ་ཅེས་བྱ་བ། ན་མཿཔདྨཱ་ཀ་རཱ་ཡ། སིནྡྷཱུའི་པདྨོའི་ལང་ཚོ་གཡོ་བའི་རྩེར། །ངོ་མཚར་འཆི་མེད་གྲུབ་པའི་ཞལ་སྐྱིན་ནི། །གངས་རིའི་ལ་ཐོད་མཛེས་པའི་རྒྱན་གཅིག་པུ། །ཨོ་རྒྱན་རིན་པོ་ཆེ་ལ་གསོལ་བ་འདེབས། །ཐུགས་བསྐྱེད་ཤིང་རྟའི་སྒྱུ་ཐབས་ལ་བརྟེན་ནས། །རྒྱལ་བསྟན་སྣང་བའི་མུ་ཁྱུད་དྲངས་མ་ཐག །བོད་ཡུལ་མུན་པའི་སྨག་རུམ་བསལ་མཛད་པ། །ཏིང་འཛིན་མཆོག་བརྙེས་ཞབས་ལ་གསོལ་བ་འདེབས། །འཇམ་དཔལ་ཞལ་གཟིགས་བྲག་ལ་ཕུར་པ་བཏབ། །ཉི་ཟླ་གདན་སྟེང་རིག་སྔགས་དམོད་པའི་མཚོན། །རབ་གཡོས་སྡིག་སྤྱོད་རྒྱལ་པོ་སྤ་བཀོང་མཛད། །སངས་རྒྱས་ཡེ་ཤེས་ཞབས་ལ་གསོལ་བ་འདེབས། །ཡུལ་གསུམ་གྱད་དུ་གྱུར་པའི་མཐུ་བྱིན་ལས། །རྟ་མཆོག་འབར་བའི་ཕྱག་རྒྱར་མངོན་སྤྲུལ་ཞིང་། །དབང་བཅུའི་ཐོག་མའི་དངོས་གྲུབ་བརྙེས་མཛད་པ། །རྒྱལ་བ་མཆོག་དབྱངས་ཞབས་ལ་གསོལ་བ༴ དཔལ་ཆེན་ཡང་དག་རོལ་པའི་ཞལ་གཟིགས་ཤིང་། །ཕྲིན་ལས་ཐོགས་མེད་ཉི་མའི་ཟེར་ལ་གཤེགས། །རགས་ལུས་མཁའ་སྤྱོད་གནས་སུ་རོལ་པ་ཡི། །དགེ་སློང་ནམ་མཁའི་སྙིང་པོར་གསོལ་བ༴ སྲ་མཁྲེགས་བྲག་ལས་བདུད་རྩིའི་རྒྱུན་གཡོ་བ། །འགྲོ་བའི་མིག་གི་དཔྱིད་དུ་མངོན་སྩལ་ཅིང་། །ཆེ་མཆོག་བཀའ་བབས་སྒྱུ་འཕྲུལ་སྣ་ཚོགས་བསྟན། །ཛྙཱ་ན་ཀུ་མཱ་ར་དྲི་མེད་ཟླ་ཤར་རྩལ་ལ་གསོལ་བ་འདེབས། །ཤེས་རབ་ཌཱ་ཀི་མི་བརྗེད་གཟུངས་ཐོབ་ཅིང་། །རྡོ་རྗེ་གཞོན་ནུའི་ཞལ་གཟིགས་དངོས་གྲུབ་བརྙེས། །བསད་གསོའི་རྫུ་འཕྲུལ་མཐའ་ཀླས་སྡུད་པ་པོ། །ཡེ་ཤེས་མཚོ་རྒྱལ་ཞབས་ལ་གསོལ༴ སྲིད་པ་བདེ་འགྲོའི་དཀྱིལ་འཁོར་རབ་གཟིགས་ཤིང་། །སྣང་སྲིད་མ་མོ་བྲན་དང་གཡོག་ཏུ་འཁོལ། །རིན་ཆེན་དགོས་འདོད་འབྱུང་བའི་གཏེར་མངའ་བའི། །དཔལ་གྱི་ཡེ་ཤེས་ཞབས་ལ༴ སྤ་གྲོ་སྟག་ཚང་སྒྲུབ་པའི་གནས་མཆོག་ཏུ། །དྲེགས་པ་ཀུན་འདུལ་ལྷ་ཚོགས་ཞལ་གཟིགས་ཤིང་། །སྡེ་བརྒྱད་འབྱུང་པོས་ཕྲིན་ལས་ཐོགས་མེད་བསྒྲུབས། །དཔལ་གྱི་སེང་གེའི་ཞབས་ལ༴ སྒྲ་སྒྱུར་ལོ་ཙཱ་ཀུན་གྱི་སྤྱི་བོས་བཏུད། །སྟོབས་ལྡན་ནག་པོའི་དཀྱིལ་འཁོར་ཞལ་གཟིགས་ཤིང་། །ཡེ་ཤེས་སྤྱན་གྱིས་དུས་གསུམ་སྒྲིབ་མེད་མཁྱེན། །བཻ་རོ་ཙ་ནའི་ཞབས་ལ་གསོལ་བ་འདེབས། །འདི་ཡན་ཆད་བཀའ་བབས་མི་བརྒྱད་དམ་དགུའོ། །ལེགས་གྲུབ་སྒྱུ་འཕྲུལ་རོལ་པ་ལ་ཆགས་ཕྱིར། །ཐེག་མཆོག་རྫོགས་པ་ཆེན་པོའི་ས་ལ་གཤེགས། །གཟུགས་སྐུ་གསེར་གྱི་རྡོ་རྗེ་སྤྲུལ་པའི་གར། །གཡུ་སྒྲ་སྙིང་པོའི་ཞབས་ལ༴ རྡོ་རྗེ་གཞོན་ནུས་རྗེས་བཟུང་ཕྲིན་ལས་ཀྱི། །བསྙེན་ཕུར་སྲ་མཁྲེགས་བྲག་ལ་མངོན་བཏབ་ཅིང་། །རླུང་སེམས་དབང་ཐོབ་རི་བྲག་ཐོགས་མེད་གཤེགས། །རྡོ་རྗེ་བདུད་འཇོམས་ཞབས་ལ༴ དམ་ཆོས་ཕྱི་མོའི་རོལ་སྒེག་བྱང་ཆུབ་ཅིང་། །རིམ་གཉིས་ཟུང་འཇུག་ཐེམ་སྐས་ལ་འཛེགས་པས། །འོག་མིན་མཁའ་སྤྱོད་ཞིང་དུ་བགྲོད་མཛད་པ། །ཨཱ་ཙར་ཡེ་ཤེས་དབྱངས་ལ༴ ཛྙཱ་ན་ཀུ་མཱས་གྲུབ་པའི་སྒྱུ་འཕྲུལ་གྱིས། །རྗེས་སུ་བཟུང་བས་ཐེག་མཆོག་མཛོད་དུ་གྱུར། །བརྟུལ་ཞུགས་གཅན་གཟན་གདུག་པའི་གཉའ་ནས་འཛིན། །སོག་པོ་དཔལ་གྱི་ཡེ་ཤེས་ཞབས་ལ་གསོལ་བ༴ སྒྲ་བསྒྱུར་ལོ་ཙཱའི་མཆོག་ཏུ་རབ་ཕྱིན་ཅིང་། །མཁའ་ལྡིང་རྒྱལ་པོའི་བརྟུལ་ཞུགས་འཛིན་པ་ཡིས། །ནམ་མཁའི་ལམ་ནས་གྱ་གྱུར་གཤེགས་མཛད་པ། །སྣ་ནམ་ཡེ་ཤེས་སྡེ་ལ༴ ཕྲིན་ལས་རྡོ་རྗེ་གཞོན་ནུའི་དཀྱིལ་འཁོར་དུ། །ནུས་པའི་མཚན་མ་མངོན་དུ་བརྙེས་པ་ཡིས། །བསྙེན་ཕུར་གདེངས་པས་དགྲ་བགེགས་སྒྲོལ་མཛད་པ། །དཔལ་གྱི་དབང་ཕྱུག་ཞབས་ལ༴ པདྨས་རྗེས་བཟུང་གསང་མཛོད་བདག་པོར་གྱུར། །མངོན་སུམ་རྟོགས་པའི་ཡེ་ཤེས་རབ་བརྙེས་པས། །དམ་ཆོས་མི་བརྗེད་གཟུངས་མཆོག་ཐོབ་པ་ཡི། །ལྡན་མ་རྩེ་མང་ཞབས་ལ༴ མངོན་པར་ཤེས་པ་ཕྱོགས་མེད་ཤར་བ་ཡིས། །གཞན་རྒྱུད་བསམ་པའི་དངོས་པོ་ཇི་བཞིན་མཁྱེན། །སྤྲུལ་པའི་ལོ་ཙཱར་ལུང་གིས་སྐབས་དབྱེ་བའི། །སྐ་བ་དཔལ་བརྩེགས་ཞབས་ལ༴ ཕྲིན་ལས་ཟབ་མོ་འགྲུབ་པའི་མངོན་རྟོགས་ནི། །བསྙེན་ཕུར་གདེངས་པས་ཆུ་བོ་གྱེན་བཟློག་ཅིང་། །སྲ་མཁྲེགས་བྲག་རིའི་བ་གམ་གཞིལ་མཛད་པ། །ཤུད་བུ་དཔལ་སེང་ཞབས་ལ༴ ཧཱུྃ་ཆེན་ཀཱ་རས་རྗེས་བཟུང་ཧེ་རུ་ཀའི། །དཀྱིལ་འཁོར་མཆོག་ཏུ་བཅུག་པའི་སྒྱུ་འཕྲུལ་ནི། །ཚད་མེད་རོལ་པ་ཛམྦུ་ནཱ་དར་བསྒྱུར། །རྒྱལ་བའི་བློ་གྲོས་ཞབས་ལ༴ གཞོན་པའི་དུས་ནས་བརྡ་སྤྲོད་རིག་པ་མཁྱེན། །མཁའ་ལ་རྒྱུ་བའི་འདབ་ཆགས་གཤོག་རྩལ་ཡང་། །ལྟ་སྟངས་ཕྱག་རྒྱས་འགུགས་པའི་ངོ་མཚར་ཅན། །ཁྱེའུ་ཆུང་ལོ་ཙཱའི་ཞབས་ལ༴ གསང་བ་སྔགས་ཀྱི་ཆོས་ཚུལ་མ་ལུས་ཀུན། །མངའ་དབང་བསྒྱུར་བས་གྲུབ་པའི་ས་ལ་གཤེགས། །དག་བྱེད་གཏེར་ལ་ཉ་བཞིན་འཕྱོ་མཛད་པ། །འོ་བྲན་དབང་ཕྱུག་ཞབས་ལ༴ པདྨས་རྗེས་བཟུང་དམ་ཆོས་མཛོད་དུ་གྱུར། །བརྟུལ་ཞུགས་གྲུབ་པ་བརྙེས་པའི་སྡིགས་མཛུབ་ཀྱིས། །བྱང་ཐང་ཙ་མ་ར་རྣམས་དགུག་པར་མཛད། །དྲན་པ་ནམ་མཁའི་ཞབས་ལ༴ དཔལ་ལྡན་ནཱ་གཱ་རྫུ་ནའི་དགོངས་པ་ལྟར། །མཐའ་བྲལ་དབུ་མའི་ལྟ་བ་མངོན་གྱུར་ཅིང་། །རྫུ་འཕྲུལ་ཕ་ཝཾ་ཟན་ལྟར་བཅད་ནས་གསོལ། །རྨ་བན་རིན་ཆེན་ཞབས་ལ༴ བསླབ་པ་གསུམ་གྱིས་ལེགས་པར་རྒྱུད་བསྡམས་ཤིང་། །གྲུབ་པའི་མཚན་མ་རི་བྲག་ཐོགས་མེད་གཤེགས། །སྡིག་སྤྱོད་རྒྱལ་པོའི་ལས་ངན་རྒྱུན་གཅོད་པའི། །དཔལ་གྱི་རྡོ་རྗེའི་ཞབས་ལ༴ སྐད་གཉིས་སྨྲ་བའི་ཐེམ་སྐས་ལ་འཛེགས་ཤིང་། །ཕྲིན་ལས་གྲུབ་པའི་སྒྱུ་འཕྲུལ་སྣ་ཚོགས་བསྟན། །ནུས་མཐུས་གནམ་ལྕགས་ཕྱག་སོར་རྩེ་ནས་འཕེན། །དཀོན་མཆོག་འབྱུང་གནས་ཞབས་ལ༴ ཐོས་པའི་བཅུད་ལེན་བར་མེད་བཏུང་བའི་མཐུས། །གྲུབ་གཉིས་རྣལ་དུ་འབྱོར་པའི་སྒྱུ་རྩལ་གྱིས། །རྟེན་མེད་མཁའ་ལ་རྡོ་རྗེའི་སྐྱིལ་ཀྲུང་བཅའ། །རྒྱལ་བ་བྱང་ཆུབ་ཞབས་ལ་གསོལ་བ་འདེབས། །གཞན་ཡང་མཚོ་སྐྱེས་པདྨཱ་ཀ་ར་དང་། །དྲི་མེད་བཤེས་གཉེན་ཞི་བ་འཚོ་ལ་སོགས། །སྟོན་པ་གཉིས་པས་རྗེས་བཟུང་སྨིན་གྲོལ་གྱིས། །གྲུབ་བརྙེས་རྣལ་འབྱོར་ཀུན་ལ་གསོལ་བ་འདེབས། །ལྟ་བ་སྤྲོས་བྲལ་དབུ་མ་ཆེན་པོར་རྟོགས། །སྒོམ་པ་འོད་གསལ་ཕྱག་རྒྱ་ཆེན་པོར་གྲོལ། །སྤྱོད་པ་སྣ་ཚོགས་གྲུབ་པའི་རྫུ་འཕྲུལ་སྟོན། །འབྲས་བུ་རྫོགས་པ་ཆེན་པོར་སྨིན་ལ་འདུད། །དེ་ལྟར་རྟག་ཏུ་དད་པའི་དྲི་བཞོན་གྱིས། །མཁྱེན་བརྩེའི་ཆུ་འཛིན་སྟུག་པོ་བསྐུལ་བ་ལས། །ཐུགས་རྗེའི་སྤྲིན་གྱི་མྱུ་གུ་འཇོ་བ་ཡིས། །བསྟན་འགྲོའི་ཕན་བདེའི་དགའ་ཚལ་རྒྱས་གྱུར་ཅིག །ཁྱད་པར་སྔ་འགྱུར་རྡོ་རྗེ་ཐེག་པའི་ལམ། །འཆད་ཉན་སྒྲུབ་ལ་བརྩོན་པའི་རིག་འཛིན་སྡེ། །སྲིད་མཐའ་ཁྱབ་པའི་བར་དུ་འཕེལ་གྱུར་དེས། །འགྲོ་ཀུན་རིམ་གཉིས་ཀློང་དུ་སྨིན་པར་ཤོག །འདི་ནས་བཟུང་སྟེ་ཚེ་རབས་ཐམས་ཅད་དུ། །བསླབ་པ་གསུམ་གྱིས་རྒྱུད་བསྡམས་ཐོས་བསམ་དང་། །དོན་སྒོམ་ཨུཏྤལ་འཛུམ་ཕྲེང་གྲོལ་བ་ཡིས། །བདག་གཞན་སྲིད་ལས་ངལ་བསོ་སྦྱིན་གྱུར་ཅིག །ཟླ་བ་ཞུན་མའི་རྡུལ་བརྩེགས་གངས་རིའི་ཁྲོད། །སྙིགས་མའི་རྒུད་པས་ཉེན་པའི་འགྲོ་རྣམས་ལ། །ལྷག་པར་ཐུགས་རྗེའི་འཇུག་པས་བརྩེ་བ་ཡིས། །སྣོད་བཅུད་ཕན་བདེའི་དཔལ་གྱིས་འཁྱུད་པར་ཤོག །ནམ་ཞིག་འདིར་སྣང་ནུབ་པར་གྱུར་པའི་ཚེ། །རིག་འཛིན་ཌཱ་ཀིའི་ཕོ་ཉས་མདུན་བདར་ཏེ། །མཁའ་སྤྱོད་ཟངས་མདོག་དཔལ་རིའི་ཕོ་བྲང་དུ། །དབུགས་འབྱིན་ཆེན་པོའི་དགའ་སྟོན་བརྙེས་གྱུར་ཅིག །མཐར་ཐུག་གཟོད་ནས་དག་པའི་ཡེ་ཤེས་ཀྱི། །རང་མདངས་ཁ་སྦྱོར་ཡན་ལག་བདུན་གྱི་དངོས། །རྣམ་པ་ཀུན་གྱི་མཆོག་ལྡན་ཧེ་རུ་ཀ །སྐུ་གསུམ་དབྱེར་མེད་གོ་འཕང་ཐོབ་པར་ཤོག །དེ་ལྟར་རྩེ་གཅིག་གསོལ་བཏབ་རྟེན་འབྱུང་དང་། །འཆི་མེད་པདྨ་ཀ་རའི་བྱིན་རླབས་ཀྱིས། །ཇི་སྐད་སྨོན་པའི་དོན་རྣམས་མ་ལུས་ཀུན། །གེགས་མེད་མྱུར་དུ་འགྲུབ་པའི་བཀྲ་ཤིས་ཤོག །ཅེས་འཛམ་བུའི་ལྗོན་པས་མཚན་པའི་ལྗོངས་འདིར་སྟོན་པ་གཉིས་པར་ཡོངས་སུ་གྲགས་ཤིང་། ས་གསུམ་ན་འགྲན་ཟླ་བྲལ་བ་དུས་གསུམ་མཁྱེན་པ་ཨོ་རྒྱན་ཆེན་པོས་རྗེས་སུ་བཟུང་ཞིང་སྨིན་གྲོལ་གྱི་སྒོ་འཕར་ཕྱེ་བས་གྲུབ་པའི་ས་ལ་གཤེགས་པར་མཛད་པའི་རྣལ་འབྱོར་གྱི་དབང་ཕྱུག་རྗེ་འབངས་ཉི་ཤུ་རྩ་ལྔ་ལ་རྣམ་ཐར་དང་མཐུན་པར་རྟོགས་པ་བརྗོད་པའི་གསོལ་བ་འདེབས་པ་ཕན་བདེའི་ནོར་བུའི་དོ་ཤལ་ཅེས་བྱ་བ་འདི་ནི། གཞོན་ནུ་ཨ་བྷཱ་ཡས་མི་ཕྱེད་པའི་དད་པས་མཚམས་སྦྱར་ཏེ་རང་ལ་བཅོ་ལྔ་པར་བཀོད་པ་ཛ་ཡནྟུ།། །། ༈

[edit]

o rgyan rje 'bangs nyer lnga la gsol ba 'debs pa'i tshul phan bde'i nor bu'i do shal/__ o rgyan rje 'bangs nyer lnga la gsol ba 'debs pa'i tshul phan bde'i nor bu'i do shal ces bya ba/__na maHpad+mA ka rA ya/__sin+d+hU'i pad+mo'i lang tsho g.yo ba'i rtser/__/ngo mtshar 'chi med grub pa'i zhal skyin ni/__/gangs ri'i la thod mdzes pa'i rgyan gcig pu/__/o rgyan rin po che la gsol ba 'debs/__/thugs bskyed shing rta'i sgyu thabs la brten nas/__/rgyal bstan snang ba'i mu khyud drangs ma thag__/bod yul mun pa'i smag rum bsal mdzad pa/__/ting 'dzin mchog brnyes zhabs la gsol ba 'debs/__/'jam dpal zhal gzigs brag la phur pa btab/__/nyi zla gdan steng rig sngags dmod pa'i mtshon/__/rab g.yos sdig spyod rgyal po spa bkong mdzad/__/sangs rgyas ye shes zhabs la gsol ba 'debs/__/yul gsum gyad du gyur pa'i mthu byin las/__/rta mchog 'bar ba'i phyag rgyar mngon sprul zhing /__/dbang bcu'i thog ma'i dngos grub brnyes mdzad pa/__/rgyal ba mchog dbyangs zhabs la gsol ba=__dpal chen yang dag rol pa'i zhal gzigs shing /__/phrin las thogs med nyi ma'i zer la gshegs/__/rags lus mkha' spyod gnas su rol pa yi/__/dge slong nam mkha'i snying por gsol ba=__sra mkhregs brag las bdud rtsi'i rgyun g.yo ba/__/'gro ba'i mig gi dpyid du mngon stsal cing /__/che mchog bka' babs sgyu 'phrul sna tshogs bstan/__/dz+nyA na ku mA ra dri med zla shar rtsal la gsol ba 'debs/__/shes rab DA ki mi brjed gzungs thob cing /__/rdo rje gzhon nu'i zhal gzigs dngos grub brnyes/__/bsad gso'i rdzu 'phrul mtha' klas sdud pa po/__/ye shes mtsho rgyal zhabs la gsol=__srid pa bde 'gro'i dkyil 'khor rab gzigs shing /__/snang srid ma mo bran dang g.yog tu 'khol/__/rin chen dgos 'dod 'byung ba'i gter mnga' ba'i/__/dpal gyi ye shes zhabs la=__spa gro stag tshang sgrub pa'i gnas mchog tu/__/dregs pa kun 'dul lha tshogs zhal gzigs shing /__/sde brgyad 'byung pos phrin las thogs med bsgrubs/__/dpal gyi seng ge'i zhabs la=__sgra sgyur lo tsA kun gyi spyi bos btud/__/stobs ldan nag po'i dkyil 'khor zhal gzigs shing /__/ye shes spyan gyis dus gsum sgrib med mkhyen/__/bai ro tsa na'i zhabs la gsol ba 'debs/__/'di yan chad bka' babs mi brgyad dam dgu'o/__/legs grub sgyu 'phrul rol pa la chags phyir/__/theg mchog rdzogs pa chen po'i sa la gshegs/__/gzugs sku gser gyi rdo rje sprul pa'i gar/__/g.yu sgra snying po'i zhabs la=__rdo rje gzhon nus rjes bzung phrin las kyi/__/bsnyen phur sra mkhregs brag la mngon btab cing /__/rlung sems dbang thob ri brag thogs med gshegs/__/rdo rje bdud 'joms zhabs la=__dam chos phyi mo'i rol sgeg byang chub cing /__/rim gnyis zung 'jug them skas la 'dzegs pas/__/'og min mkha' spyod zhing du bgrod mdzad pa/__/A tsar ye shes dbyangs la=__dz+nyA na ku mAs grub pa'i sgyu 'phrul gyis/__/rjes su bzung bas theg mchog mdzod du gyur/__/brtul zhugs gcan gzan gdug pa'i gnya' nas 'dzin/___/sog po dpal gyi ye shes zhabs la gsol ba=__sgra bsgyur lo tsA'i mchog tu rab phyin cing /__/mkha' lding rgyal po'i brtul zhugs 'dzin pa yis/__/nam mkha'i lam nas gya gyur gshegs mdzad pa/__/sna nam ye shes sde la=__phrin las rdo rje gzhon nu'i dkyil 'khor du/__/nus pa'i mtshan ma mngon du brnyes pa yis/__/bsnyen phur gdengs pas dgra bgegs sgrol mdzad pa/__/dpal gyi dbang phyug zhabs la=__pad+mas rjes bzung gsang mdzod bdag por gyur/__/mngon sum rtogs pa'i ye shes rab brnyes pas/__/dam chos mi brjed gzungs mchog thob pa yi/__/ldan ma rtse mang zhabs la=__mngon par shes pa phyogs med shar ba yis/__/gzhan rgyud bsam pa'i dngos po ji bzhin mkhyen/__/sprul pa'i lo tsAr lung gis skabs dbye ba'i/__/ska ba dpal brtsegs zhabs la=__phrin las zab mo 'grub pa'i mngon rtogs ni/__/bsnyen phur gdengs pas chu bo gyen bzlog cing /__/sra mkhregs brag ri'i ba gam gzhil mdzad pa/__/shud bu dpal seng zhabs la=__hU~M chen kA ras rjes bzung he ru ka'i/__/dkyil 'khor mchog tu bcug pa'i sgyu 'phrul ni/__/tshad med rol pa dzam+bu nA dar bsgyur/__/rgyal ba'i blo gros zhabs la=__gzhon pa'i dus nas brda sprod rig pa mkhyen/__/mkha' la rgyu ba'i 'dab chags gshog rtsal yang /__/lta stangs phyag rgyas 'gugs pa'i ngo mtshar can/__/khye'u chung lo tsA'i zhabs la=__gsang ba sngags kyi chos tshul ma lus kun/__/mnga' dbang bsgyur bas grub pa'i sa la gshegs/__/dag byed gter la nya bzhin 'phyo mdzad pa/__/'o bran dbang phyug zhabs la=__pad+mas rjes bzung dam chos mdzod du gyur/__/brtul zhugs grub pa brnyes pa'i sdigs mdzub kyis/__/byang thang tsa ma ra rnams dgug par mdzad/__/dran pa nam mkha'i zhabs la=__dpal ldan nA gA rdzu na'i dgongs pa ltar/__/mtha' bral dbu ma'i lta ba mngon gyur cing /__/rdzu 'phrul pha waM zan ltar bcad nas gsol/__/rma ban rin chen zhabs la=__bslab pa gsum gyis legs par rgyud bsdams shing /__/grub pa'i mtshan ma ri brag thogs med gshegs/__/sdig spyod rgyal po'i las ngan rgyun gcod pa'i/__/dpal gyi rdo rje'i zhabs la=__skad gnyis smra ba'i them skas la 'dzegs shing /__/phrin las grub pa'i sgyu 'phrul sna tshogs bstan/__/nus mthus gnam lcags phyag sor rtse nas 'phen/__/dkon mchog 'byung gnas zhabs la=__thos pa'i bcud len bar med btung ba'i mthus/__/grub gnyis rnal du 'byor pa'i sgyu rtsal gyis/__/rten med mkha' la rdo rje'i skyil krung bca'/__/rgyal ba byang chub zhabs la gsol ba 'debs/__/gzhan yang mtsho skyes pad+mA ka ra dang /__/dri med bshes gnyen zhi ba 'tsho la sogs/__/ston pa gnyis pas rjes bzung smin grol gyis/__/grub brnyes rnal 'byor kun la gsol ba 'debs/__/lta ba spros bral dbu ma chen por rtogs/__/sgom pa 'od gsal phyag rgya chen por grol/__/spyod pa sna tshogs grub pa'i rdzu 'phrul ston/__/'bras bu rdzogs pa chen por smin la 'dud/__/de ltar rtag tu dad pa'i dri bzhon gyis/__/mkhyen brtse'i chu 'dzin stug po bskul ba las/__/thugs rje'i sprin gyi myu gu 'jo ba yis/__/bstan 'gro'i phan bde'i dga' tshal rgyas gyur cig__/khyad par snga 'gyur rdo rje theg pa'i lam/__/'chad nyan sgrub la brtson pa'i rig 'dzin sde/__/srid mtha' khyab pa'i bar du 'phel gyur des/__/'gro kun rim gnyis klong du smin par shog__/'di nas bzung ste tshe rabs thams cad du/__/bslab pa gsum gyis rgyud bsdams thos bsam dang /__/don sgom ut+pal 'dzum phreng grol ba yis/__/bdag gzhan srid las ngal bso sbyin gyur cig__/zla ba zhun ma'i rdul brtsegs gangs ri'i khrod/__/snyigs ma'i rgud pas nyen pa'i 'gro rnams la/__/lhag par thugs rje'i 'jug pas brtse ba yis/__/snod bcud phan bde'i dpal gyis 'khyud par shog__/nam zhig 'dir snang nub par gyur pa'i tshe/__/rig 'dzin DA ki'i pho nyas mdun bdar te/__/mkha' spyod zangs mdog dpal ri'i pho brang du/__/dbugs 'byin chen po'i dga' ston brnyes gyur cig__/mthar thug gzod nas dag pa'i ye shes kyi/__/rang mdangs kha sbyor yan lag bdun gyi dngos/__/rnam pa kun gyi mchog ldan he ru ka__/sku gsum dbyer med go 'phang thob par shog__/de ltar rtse gcig gsol btab rten 'byung dang /__/'chi med pad+ma ka ra'i byin rlabs kyis/__/ji skad smon pa'i don rnams ma lus kun/__/gegs med myur du 'grub pa'i bkra shis shog__/ces 'dzam bu'i ljon pas mtshan pa'i ljongs 'dir ston pa gnyis par yongs su grags shing /__sa gsum na 'gran zla bral ba dus gsum mkhyen pa o rgyan chen pos rjes su bzung zhing smin grol gyi sgo 'phar phye bas grub pa'i sa la gshegs par mdzad pa'i rnal 'byor gyi dbang phyug rje 'bangs nyi shu rtsa lnga la rnam thar dang mthun par rtogs pa brjod pa'i gsol ba 'debs pa phan bde'i nor bu'i do shal ces bya ba 'di ni/__gzhon nu a b+hA yas mi phyed pa'i dad pas mtshams sbyar te rang la bco lnga par bkod pa dza yan+tu//___//__!_