ཡང་རྗེ་འབངས་ཉེར་ལྔ་འཁོར་བཅས་ལ་གསོལ་བ་འདེབས་པ་མདོར་བསྡུས་བྱིན་རླབས་སྙིང་པོ།

🚧 This website is under continued development. We appreciate your patience!

Previous Text Back to Volume PageNext Text

Wylie title	yang rje 'bangs nyer lnga 'khor bcas la gsol ba 'debs pa mdor bsdus byin rlabs snying po
Location	mkhyen brtse'i bka' 'bum Volume 1, sde tshan 2, Text 72, Pages 275-278 (Folios 109a1 to 110b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. yang rje 'bangs nyer lnga 'khor bcas la gsol ba 'debs pa mdor bsdus byin rlabs snying po. In 'jam dbyangs mkhyen brtse'i dbang po'i bka' 'bum, Vol. 1: 275-278. Khams sde dge rdzong sar dgon: Rdzong sar blo gros phun tshogs, 2020.
Genre	Stages of the Teachings - bstan rim  ·  Supplications - gsol 'debs
Deity	o rgyan rje 'bangs nyer lnga
Colophon	།ཞེས་པའང་དད་ལྡན་ནཱ་ཐའི་མིང་ཅན་གྱིས་གསོལ་བ་བཏབ་པ་ལྟར། མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་སིདྡྷི་རསྟུ།།
	zhes pa'ang dad ldan nA tha'i ming can gyis gsol ba btab pa ltar/__mtsho skyes bla ma dgyes pa'i 'bangs mkhyen brtse'i dbang pos bris pa sid+d+hi rastu

1 Texts in this Section (sde tshan or chos tshan)

72 275-278	ཡང་རྗེ་འབངས་ཉེར་ལྔ་འཁོར་བཅས་ལ་གསོལ་བ་འདེབས་པ་མདོར་བསྡུས་བྱིན་རླབས་སྙིང་པོ། yang rje 'bangs nyer lnga 'khor bcas la gsol ba 'debs pa mdor bsdus byin rlabs snying po Stages of the Teachings - bstan rim   ·   Supplications - gsol 'debs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཨོ་རྒྱན་རྗེ་འབངས་ཉེར་ལྔ་འཁོར་བཅས་ལ་གསོལ་བ་འདེབས་པ་མདོར་བསྡུས་བྱིན་རླབས་སྙིང་པོ་ཞེས་བྱ་བ་བཞུགས་སོ། །ན་མོ་གུ་རུ་བྷྱཿ འདིར་ཨོ་རྒྱན་རིན་པོ་ཆེ་སྤྲུལ་པའི་ཐོད་ཕྲེང་རིགས་ལྔ་གུ་རུ་མཚན་བརྒྱད་རྗེ་འབངས་ཉེར་ལྔ་འཁོར་བཅས་ལ་མདོར་བསྡུས་ཏེ་གསོལ་བ་གདབ་པར་འདོད་པས། བདག་སོགས་འགྲོ་ཀུན་དེང་ནས་བྱང་ཆུབ་བར། །དཀོན་མཆོག་རྩ་བ་གསུམ་ལ་སྐྱབས་སུ་མཆི། །གཞན་དོན་རྫོགས་པའི་སངས་རྒྱས་འཐོབ་བྱའི་ཕྱིར། །སྨོན་དང་འཇུག་པའི་བྱང་ཆུབ་སེམས་བསྐྱེད་དོ། །ལན་གསུམ་གྱིས་སྐྱབས་སེམས་བྱ། མདུན་གྱི་ནམ་མཁར་ཡིད་འཕྲོག་མཆོད་སྤྲིན་དབུས། །རིན་ཆེན་སེང་ཁྲི་པདྨ་ཉི་ཟླའི་སྟེང་། །རྩ་བའི་བླ་མ་ཨོ་རྒྱན་རིན་པོ་ཆེ། །སྐུ་མདོག་དཀར་དམར་གཞོན་ཚུལ་གཟི་བརྗིད་འབར། །ཕྱག་གཡས་རྡོ་རྗེ་གཡོན་པས་ཐོད་བུམ་དང་། །གསང་བའི་ཡུམ་མཆོག་སྦས་ཚུལ་ཁ་ཊྭཱྃ་འཁྱུད། །སྐུ་ལ་གསང་ཕོད་ཆོས་གོས་ཟ་བེར་གསོལ། །དབུ་ལ་ཤེའུའི་སྙན་ཞུ་མཐོང་གྲོལ་མཛེས། །ཞབས་ཟུང་རྡོ་རྗེའི་སྐྱིལ་ཀྲུང་དྲང་པོར་བཞུགས། །གསང་གསུམ་ལས་སྐྱེས་འཇའ་ཟེར་འོད་ཕུང་ཀློང་། །ཐོད་ཕྲེང་སྡེ་ལྔ་སྤྲུལ་པའི་མཚན་བརྒྱད་དང་། །ཐུགས་སྲས་མི་རྗེ་འབངས་རིགས་ཉེར་ལྔ་སོགས། །རིག་འཛིན་བླ་མ་རྒྱ་མཚོའི་སྤྲིན་ཕུང་འཕྲོ། །གནས་གསུམ་འབྲུ་གསུམ་མཚན་པའི་འོད་ཟེར་གྱིས། །ཡེ་ཤེས་སྤྱན་དྲངས་གཉིས་སུ་མེད་པར་གྱུར། །ཅེས་གསལ་གདབ། ཧཱུྃ། བཞེངས་ཤིག་པདྨ་འབྱུང་གནས་མཁའ་འགྲོའི་ཚོགས། །དགོངས་ཤིག་ཕྱོགས་བཅུ་དུས་གསུམ་བདེ་གཤེགས་རྣམས། །རྗེ་བཙུན་ཆེན་པོ་པདྨ་ཐོད་ཕྲེང་རྩལ། །རིག་འཛིན་མཁའ་འགྲོའི་གནས་ནས་གཤེགས་སུ་གསོལ། །ཅེས་ཡེ་ཤེས་སྤྱན་དྲངས་ཤིང་བསྟིམ། །སེང་ཁྲི་པདྨ་ཉི་ཟླའི་གདན་ལ་བཞུགས། །སྒོ་གསུམ་གུས་པས་ཕྱག་འཚལ་སྐྱབས་སུ་མཆི། །ཕྱི་ནང་གསང་བ་བླ་མེད་མཆོད་སྤྲིན་འབུལ། །དུས་གསུམ་བསགས་པའི་སྡིག་སྒྲིབ་མཐོལ་ཞིང་བཤགས། །འཕགས་དང་སོ་སྐྱེའི་དགེ་བར་རྗེས་ཡི་རང་། །ཟབ་རྒྱས་ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་རྟག་ཏུ་བཞུགས་གསོལ་འདེབས། །བསོད་ནམས་དངོས་ཀུན་བྱང་ཆུབ་ཆེན་པོར་བསྔོ། །ཞེས་ཚོགས་བསགས། དུས་གསུམ་རྒྱལ་བ་ཀུན་དངོས་རིགས་བརྒྱའི་བདག །ཕྲིན་ལས་རྣམ་བཞིས་འཁོར་ལོས་སྒྱུར་བ་པོ། །སྣང་སྲིད་དབང་དུ་སྡུད་པའི་མཐུ་སྟོབས་ཅན། །པདྨ་འབྱུང་གནས་ཞབས་ལ་གསོལ་བ་འདེབས། །རྡོ་རྗེ་རིན་ཆེན་པདྨ་ཀརྨ་དང་། །བུདྡྷ་ཐོད་ཕྲེང་རིགས་མཆོག་རྣམ་པ་ལྔ། །འཆི་མེད་པད་འབྱུང་པདྨ་སཾ་བྷཱ་ཝ། །བློ་ལྡན་མཆོག་སྲེད་པདྨ་རྒྱལ་པོ་རྩལ། །ཤཱཀྱ་སེང་གེ་ཉི་མ་འོད་ཟེར་དང་། །སེང་གེ་སྒྲ་སྒྲོག་རྡོ་རྗེ་གྲོ་ལོད་སོགས། །གང་འདུལ་སྒྱུ་འཕྲུལ་དྲྭ་བའི་ཚུལ་འཆང་བ། །སྐྱབས་གནས་ཀུན་འདུས་མཆོག་ལ་གསོལ་བ༴ སངས་རྒྱས་ཡེ་ཤེས་རྒྱལ་བ་མཆོག་དབྱངས་སྡེ། །ནམ་མཁའི་སྙིང་པོ་ཛྙཱ་ན་ཀུ་མཱ་ར། །ཡེ་ཤེས་མཚོ་རྒྱལ་དཔལ་གྱི་ཡེ་ཤེས་ཞབས། །དཔལ་གྱི་སེང་གེ་རྣམས་ལ་གསོལ༴ བཻ་རོ་ཙ་ན་ཆོས་རྒྱལ་ཁྲི་སྲོང་ཞབས། །གཡུ་སྒྲ་སྙིང་པོ་རྡོ་རྗེ་བདུད་འཇོམས་རྩལ། །ཡེ་ཤེས་དབྱངས་དང་སོག་པོ་ལྷ་དཔལ་སྡེ། །སྣ་ནམ་ཡེ་ཤེས་རྣམས་ལ་གསོལ༴ དཔལ་གྱི་དབང་ཕྱུག་ལྡན་མ་རྩེ་མང་དང་། །སྐ་བ་དཔལ་བརྩེགས་ཤུད་པུ་དཔལ་གྱི་སེང་། །རྒྱལ་བའི་བློ་གྲོས་འབྲོག་བན་ལོ་ཙཱ་བ། །དྲན་པ་ནམ་མཁའ་རྣམས་ལ༴ འོ་བྲན་དབང་ཕྱུག་རྨ་བན་རིན་ཆེན་མཆོག །དཔལ་གྱི་རྡོ་རྗེ་ལང་གྲོ་དཀོན་མཆོག་འབྱུང་། །རྒྱལ་བ་བྱང་ཆུབ་དགོངས་པ་མངོན་གྱུར་པའི། །ཐུགས་སྲས་རིག་འཛིན་རྣམས་ལ་གསོལ་བ་འདེབས། །གསོལ་བ་འདེབས་སོ་ཨོ་རྒྱན་རིན་པོ་ཆེ། །བྱིན་གྱིས་རློབས་ཤིག་སྤྲུལ་པའི་རིག་འཛིན་ཚོགས། །ཕྱི་ནང་གསང་བའི་བར་ཆད་ཞི་བ་དང་། །བསམ་པ་ལྷུན་གྱིས་འགྲུབ་པར་མཛད་དུ་གསོལ། །ལུས་ངག་ཡིད་ལ་རྡོ་རྗེའི་དབང་བཞི་སྐུར། །ནད་གདོན་སྡིག་སྒྲིབ་བར་ཆད་དབྱིངས་སུ་སོལ། །སྐུ་གསུང་ཐུགས་ཡོན་ཕྲིན་ལས་དངོས་གྲུབ་སྩོལ། །རྣམ་གྲོལ་སྐུ་བཞི་ཐོབ་པར་བྱིན་གྱིས་རློབས། །ཞེས་ཕུར་ཚུགས་སུ་གསོལ་བ་གདབ། སྤྲོ་ན་ལེའུ་བདུན་མ་དང་། བསམ་པ་ལྷུན་གྲུབ། བར་ཆད་ལམ་སེལ་སོགས་གསོལ་འདེབས་རིགས་གང་ཤེས་སྐབས་འདིར་བྱ། གསོལ་འདེབས་ཀྱི་བསྙེན་པ། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་ཅི་ནུས་སུ་བཟླས་མཐར། རིག་འཛིན་བླ་མའི་སྐུ་ཡི་གནས་བཞི་ནས། །འོད་ཟེར་བྱུང་བ་བདག་གི་གནས་བཞིར་ཐིམ། །སྐུ་གསུང་ཐུགས་དང་ཡེ་ཤེས་རྡོ་རྗེ་ཡིས། །བྱིན་གྱིས་བརླབས་ནས་དབང་བཞི་ཐོབ་པར་གྱུར། །མཐར་ནི་ཚོགས་ཞིང་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་དགོངས་པའི་རྩལ་ཆེན་རྫོགས། །འཁོར་འདས་རོ་གཅིག་འོད་གསལ་ཐིག་ལེའི་ཀློང་། །དོན་གཉིས་འབྲས་བུ་སྨིན་པའི་བཀྲ་ཤིས་སྩོལ། །ཅེས་དབང་བླངས་ཤིང་བསྔོ་སྨོན་ཤིས་པ་བརྗོད་པས་མཐའ་བརྒྱན་པར་བྱའོ། །ཞེས་པའང་དད་ལྡན་ནཱ་ཐའི་མིང་ཅན་གྱིས་གསོལ་བ་བཏབ་པ་ལྟར། མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་སིདྡྷི་རསྟུ།། །། ༈

[edit]

yang rje 'bangs nyer lnga 'khor bcas la gsol ba 'debs pa mdor bsdus byin rlabs snying po/__ o rgyan rje 'bangs nyer lnga 'khor bcas la gsol ba 'debs pa mdor bsdus byin rlabs snying po zhes bya ba bzhugs so/__/na mo gu ru b+h+yaH__'dir o rgyan rin po che sprul pa'i thod phreng rigs lnga gu ru mtshan brgyad rje 'bangs nyer lnga 'khor bcas la mdor bsdus te gsol ba gdab par 'dod pas/__bdag sogs 'gro kun deng nas byang chub bar/__/dkon mchog rtsa ba gsum la skyabs su mchi/__/gzhan don rdzogs pa'i sangs rgyas 'thob bya'i phyir/__/smon dang 'jug pa'i byang chub sems bskyed do/__/lan gsum gyis skyabs sems bya/__mdun gyi nam mkhar yid 'phrog mchod sprin dbus/__/rin chen seng khri pad+ma nyi zla'i steng /__/rtsa ba'i bla ma o rgyan rin po che/__/sku mdog dkar dmar gzhon tshul gzi brjid 'bar/__/phyag g.yas rdo rje g.yon pas thod bum dang /__/gsang ba'i yum mchog sbas tshul kha T+wA~M 'khyud/__/sku la gsang phod chos gos za ber gsol/__/dbu la she'u'i snyan zhu mthong grol mdzes/__/zhabs zung rdo rje'i skyil krung drang por bzhugs/__/gsang gsum las skyes 'ja' zer 'od phung klong /__/thod phreng sde lnga sprul pa'i mtshan brgyad dang /__/thugs sras mi rje 'bangs rigs nyer lnga sogs/__/rig 'dzin bla ma rgya mtsho'i sprin phung 'phro/__/gnas gsum 'bru gsum mtshan pa'i 'od zer gyis/__/ye shes spyan drangs gnyis su med par gyur/__/ces gsal gdab/__hU~M/__bzhengs shig pad+ma 'byung gnas mkha' 'gro'i tshogs/__/dgongs shig phyogs bcu dus gsum bde gshegs rnams/__/rje btsun chen po pad+ma thod phreng rtsal/__/rig 'dzin mkha' 'gro'i gnas nas gshegs su gsol/__/ces ye shes spyan drangs shing bstim/__/seng khri pad+ma nyi zla'i gdan la bzhugs/__/sgo gsum gus pas phyag 'tshal skyabs su mchi/__/phyi nang gsang ba bla med mchod sprin 'bul/__/dus gsum bsags pa'i sdig sgrib mthol zhing bshags/__/'phags dang so skye'i dge bar rjes yi rang /__/zab rgyas chos kyi 'khor lo bskor bar bskul/__/mya ngan mi 'da' rtag tu bzhugs gsol 'debs/__/bsod nams dngos kun byang chub chen por bsngo/__/zhes tshogs bsags/__dus gsum rgyal ba kun dngos rigs brgya'i bdag__/phrin las rnam bzhis 'khor los sgyur ba po/__/snang srid dbang du sdud pa'i mthu stobs can/__/pad+ma 'byung gnas zhabs la gsol ba 'debs/__/rdo rje rin chen pad+ma karma dang /__/bud+d+ha thod phreng rigs mchog rnam pa lnga/__/'chi med pad 'byung pad+ma saM b+hA wa/__/blo ldan mchog sred pad+ma rgyal po rtsal/__/shAkya seng ge nyi ma 'od zer dang /__/seng ge sgra sgrog rdo rje gro lod sogs/__/gang 'dul sgyu 'phrul drwa ba'i tshul 'chang ba/__/skyabs gnas kun 'dus mchog la gsol ba=__sangs rgyas ye shes rgyal ba mchog dbyangs sde/__/nam mkha'i snying po dz+nyA na ku mA ra/__/ye shes mtsho rgyal dpal gyi ye shes zhabs/__/dpal gyi seng ge rnams la gsol=__bai ro tsa na chos rgyal khri srong zhabs/__/g.yu sgra snying po rdo rje bdud 'joms rtsal/__/ye shes dbyangs dang sog po lha dpal sde/__/sna nam ye shes rnams la gsol=__dpal gyi dbang phyug ldan ma rtse mang dang /__/ska ba dpal brtsegs shud pu dpal gyi seng /__/rgyal ba'i blo gros 'brog ban lo tsA ba/__/dran pa nam mkha' rnams la=__'o bran dbang phyug rma ban rin chen mchog__/dpal gyi rdo rje lang gro dkon mchog 'byung /__/rgyal ba byang chub dgongs pa mngon gyur pa'i/__/thugs sras rig 'dzin rnams la gsol ba 'debs/__/gsol ba 'debs so o rgyan rin po che/__/byin gyis rlobs shig sprul pa'i rig 'dzin tshogs/__/phyi nang gsang ba'i bar chad zhi ba dang /__/bsam pa lhun gyis 'grub par mdzad du gsol/__/lus ngag yid la rdo rje'i dbang bzhi skur/__/nad gdon sdig sgrib bar chad dbyings su sol/__/sku gsung thugs yon phrin las dngos grub stsol/__/rnam grol sku bzhi thob par byin gyis rlobs/__/zhes phur tshugs su gsol ba gdab/__spro na le'u bdun ma dang /__bsam pa lhun grub/__bar chad lam sel sogs gsol 'debs rigs gang shes skabs 'dir bya/__gsol 'debs kyi bsnyen pa/__oM AHhU~M badz+ra gu ru pad+ma sid+d+hi hU~M/__zhes ci nus su bzlas mthar/__rig 'dzin bla ma'i sku yi gnas bzhi nas/__/'od zer byung ba bdag gi gnas bzhir thim/__/sku gsung thugs dang ye shes rdo rje yis/__/byin gyis brlabs nas dbang bzhi thob par gyur/__/mthar ni tshogs zhing 'od zhu rang la thim/__/thugs yid gcig 'dres dgongs pa'i rtsal chen rdzogs/__/'khor 'das ro gcig 'od gsal thig le'i klong /__/don gnyis 'bras bu smin pa'i bkra shis stsol/__/ces dbang blangs shing bsngo smon shis pa brjod pas mtha' brgyan par bya'o/__/zhes pa'ang dad ldan nA tha'i ming can gyis gsol ba btab pa ltar/__mtsho skyes bla ma dgyes pa'i 'bangs mkhyen brtse'i dbang pos bris pa sid+d+hi rastu//___//__!