JKW-KABUM-15-BA-014-010

🚧 This website is under continued development. We appreciate your patience!

Previous Section Back to Volume PageNext Section

Wylie title		page=1
Location	mkhyen brtse'i bka' 'bum Volume 14, sde tshan 10, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

སྙན་བརྒྱུད་ཕུར་པའི་སྨོན་ལམ་ལམ་རིམ་དང་འབྲེལ་བ། ༄༅། །དགེ་བ་འདི་དང་མ་ལུས་དགེ་བའི་མཐུས། །མ་རིག་མུན་པར་འཁྱམས་པའི་འགྲོ་འདི་རྣམས། །བརྒྱུད་པ་གསུམ་ལྡན་བླ་མས་རྗེས་བཟུང་སྟེ། །བྱང་ཆུབ་སྒྲུབ་བྱེད་དབང་བཞིས་སྨིན་པར་ཤོག །མ་བཅོས་སྟོང་ཉིད་སྤྲོས་བྲལ་དེ་བཞིན་ཉིད། །དམིགས་མེད་སྙིང་རྗེ་སྒོམ་པ་ཀུན་ཏུ་སྣང་། །ཟུང་འཇུག་འགགས་མེད་འཁོར་འདས་ཀུན་གྱི་རྒྱུ། །ཏིང་འཛིན་གསུམ་གྱི་ཉམས་ལེན་མཐར་ཕྱིན་ཤོག །ཆོས་སྐུ་ལམ་བྱེད་བདག་ཉིད་རྩ་བ་དང་། །ལོངས་སྤྱོད་རྫོགས་སྐུ་ལམ་བྱེད་ཁྲོ་བོའི་ཚོགས། །སྤྲུལ་སྐུ་ལམ་བྱེད་རྫས་ཀྱི་དཀྱིལ་འཁོར་ཏེ། །རྒྱུ་འབྲས་དབྱེར་མེད་ལམ་མཆོག་བསྒོམ་པར་ཤོག །ཞེ་སྡང་རྩད་གཅོད་ཕྱི་ནང་གསང་བའི་སྨན། །གཏི་མུག་གནས་སུ་དག་པ་བ་ལིཾ་ཏ། །འདོད་ཆགས་བསྒྲལ་བ་རཀྟའི་རྒྱ་མཚོ་སྟེ། །མཆོད་པ་གསུམ་གྱི་རྒྱལ་བ་མཉེས་བྱེད་ཤོག །མ་དག་བདེན་འཛིན་འཁྲུལ་སྣང་འཐུག་པོ་འདི། །བསྐྱེད་རིམ་བཟླས་པར་བཅས་པས་ལེགས་སྦྱངས་ཏེ། །དག་པའི་ཡེ་ཤེས་རང་བཞིན་ངོ་བོས་སྟོང་། །བློ་འདས་ཟུང་འཇུག་མངོན་དུ་འགྱུར་བར་ཤོག །མངོན་སྤྱོད་ལས་ཀྱིས་ཞིང་བཅུ་སྒྲོལ་བའི་ཚེ། །ཐ་མལ་སྙིང་ནང་དྭངས་མ་ལྔ་ཡི་དབུས། །རྣམ་ཤེས་དང་པོའི་དབྱངས་ཡིག་དཀར་ལ་འཚེར། །ཀུན་གཞིའི་གནས་ཚུལ་ཇི་བཞིན་ཤེས་པར་ཤོག །ལས་ཉོན་དྲི་མ་སྦྱོང་བྱེད་ཁྲུས་ལུང་དང་། །འཆི་མེད་ཆོས་སྐུར་བསྒྱུར་བ་ཚེ་ཡི་ཡུང་། །བཅུ་གཉིས་གནད་ལྡན་དགོངས་པ་རྣམ་གསུམ་གྱིས། །བདག་འཛིན་དགྲ་བགེགས་དབྱིངས་སུ་སྒྲོལ་བར་ཤོག །ཆུ་བོ་སྨིན་བྱེད་དབང་གི་ཆུ་བོ་བསྐུར་ཐབས་ལག་ལེན་དང་བཅས་པ། དཀྱུས་བཤད་གཞུང་གི་ཆུ་བོ་འགྲེལ་ཊཱི་ཀ་སྟོང་ཐུན་དང་བཅས་པ། གདམས་པ་ཉམས་ལེན་གྱི་ཆུ་བོ་ལག་ལེན་མངོན་རྟོགས་དང་བཅས་པ། མན་ངག་གནད་ཀྱི་ཆུ་བོ་དྲིས་ལན་གེགས་སེལ་དང་བཅས་པའོ། །བཞི་འདུས་གདམས་པ་ཉམས་ལེན་ཅིང་། །ཡེ་ཤེས་བྱང་ཆུབ་སེམས་སོགས་ཕུར་བུ་བཞི། །ནམ་མཁའ་ཙནྡན་ལྟ་བུའི་གང་ཟག་བཞི། །ཀུན་བཟང་རིགས་བཞིའི་ས་ལ་འགོད་པར་ཤོག །སྐྱེ་བ་ཀུན་ཏུ་ལམ་མཆོག་འདི་ཉིད་ལ། །ཐེ་ཚོམ་མེད་པར་གུས་པས་སྒྲུབ་བྱེད་ཅིང་། །བར་ཆད་བགེགས་ཀྱི་གནོད་པ་མི་འབྱུང་བར། །མཐུན་རྐྱེན་མ་ལུས་འབད་མེད་འགྲུབ་པར་ཤོག །ཚེ་འདིར་འཆི་མེད་དཔལ་དེའི་ཚུལ་ཁྲིམས་ལྡན། །བྱང་ཆུབ་སེམས་གཉིས་ཟུང་འཇུག་ཐོབ་པའི་དོན། །ཡང་དག་ཤེས་ཤིང་སྒྲུབ་ལ་བརྩོན་བྱས་ཏེ། །ལྷག་པའི་ལྷ་ཡིས་རྗེས་སུ་འཛིན་པར་ཤོག །ཕྱོགས་རིས་མུ་མཐའ་མེད་པའི་སེམས་ཅན་རྣམས། །ཡང་ཡང་དྲིན་གྱིས་སྐྱོང་བའི་མར་ཤེས་ནས། །ཚད་མེད་སྙིང་ནས་བརྩེ་བའི་བསམ་པ་ཡིས། །རྟག་ཏུ་གཞན་གྱི་དོན་ལ་བརྩོན་པར་ཤོག །ཤཱཀྱ་སེང་གེའི་རིང་ལུགས་མཐའ་དག་དང་། །རྨད་བྱུང་རྡོ་རྗེ་ཐེག་པའི་བསྟན་པ་མཆོག །ཁྱད་པར་ས་སྐྱའི་རྗེ་བཙུན་བཞེད་གཞུང་རྣམས། །ཉན་བཤད་སྒྲུབ་པ་ཕྱོགས་བཅུར་རྒྱས་པར་ཤོག །རང་བཞིན་རྣམ་དག་དབྱིངས་ཀྱི་བདེན་པ་དང་། །རིག་འཛིན་ཡི་དམ་ལྷ་ཡི་བྱིན་རླབས་དང་། །ཆོས་སྲུང་དམ་ཅན་རྒྱ་མཚོའི་ནུས་མཐུ་ཡིས། །ཇི་ལྟར་སྨོན་པའི་གནས་རྣམས་འགྲུབ་པར་ཤོག །ཅེས་པ་འདིའང་འཇམ་དབྱངས་མཁྱེན་བརྩེའི་དབང་པོས་སྨྲས་པ་སིདྡྷི་རསྟུ། །སརྦ་དཱ་ཀ་ལྱཱ་ཎཾ་བྷ་བ་ཏུ།།

[edit]

snyan brgyud phur pa'i smon lam lam rim dang 'brel ba/ @#/_/dge ba 'di dang ma lus dge ba'i mthus/__/ma rig mun par 'khyams pa'i 'gro 'di rnams/__/brgyud pa gsum ldan bla mas rjes bzung ste/__/byang chub sgrub byed dbang bzhis smin par shog__/ma bcos stong nyid spros bral de bzhin nyid/__/dmigs med snying rje sgom pa kun tu snang /__/zung 'jug 'gags med 'khor 'das kun gyi rgyu/__/ting 'dzin gsum gyi nyams len mthar phyin shog__/chos sku lam byed bdag nyid rtsa ba dang /__/longs spyod rdzogs sku lam byed khro bo'i tshogs/__/sprul sku lam byed rdzas kyi dkyil 'khor te/__/rgyu 'bras dbyer med lam mchog bsgom par shog__/zhe sdang rtsad gcod phyi nang gsang ba'i sman/__/gti mug gnas su dag pa ba liM ta/__/'dod chags bsgral ba rak+ta'i rgya mtsho ste/__/mchod pa gsum gyi rgyal ba mnyes byed shog__/ma dag bden 'dzin 'khrul snang 'thug po 'di/__/bskyed rim bzlas par bcas pas legs sbyangs te/__/dag pa'i ye shes rang bzhin ngo bos stong /__/blo 'das zung 'jug mngon du 'gyur bar shog__/mngon spyod las kyis zhing bcu sgrol ba'i tshe/__/tha mal snying nang dwangs ma lnga yi dbus/__/rnam shes dang po'i dbyangs yig dkar la 'tsher/__/kun gzhi'i gnas tshul ji bzhin shes par shog__/las nyon dri ma sbyong byed khrus lung dang /__/'chi med chos skur bsgyur ba tshe yi yung /__/bcu gnyis gnad ldan dgongs pa rnam gsum gyis/__/bdag 'dzin dgra bgegs dbyings su sgrol bar shog__/chu bo smin byed dbang gi chu bo bskur thabs lag len dang bcas pa/__dkyus bshad gzhung gi chu bo 'grel TI ka stong thun dang bcas pa/__gdams pa nyams len gyi chu bo lag len mngon rtogs dang bcas pa/__man ngag gnad kyi chu bo dris lan gegs sel dang bcas pa'o/__/bzhi 'dus gdams pa nyams len cing /__/ye shes byang chub sems sogs phur bu bzhi/__/nam mkha' tsan+dan lta bu'i gang zag bzhi/__/kun bzang rigs bzhi'i sa la 'god par shog__/skye ba kun tu lam mchog 'di nyid la/__/the tshom med par gus pas sgrub byed cing /__/bar chad bgegs kyi gnod pa mi 'byung bar/__/mthun rkyen ma lus 'bad med 'grub par shog__/tshe 'dir 'chi med dpal de'i tshul khrims ldan/__/byang chub sems gnyis zung 'jug thob pa'i don/__/yang dag shes shing sgrub la brtson byas te/__/lhag pa'i lha yis rjes su 'dzin par shog__/phyogs ris mu mtha' med pa'i sems can rnams/__/yang yang drin gyis skyong ba'i mar shes nas/__/tshad med snying nas brtse ba'i bsam pa yis/__/rtag tu gzhan gyi don la brtson par shog__/shAkya seng ge'i ring lugs mtha' dag dang /__/rmad byung rdo rje theg pa'i bstan pa mchog__/khyad par sa skya'i rje btsun bzhed gzhung rnams/__/nyan bshad sgrub pa phyogs bcur rgyas par shog__/rang bzhin rnam dag dbyings kyi bden pa dang /__/rig 'dzin yi dam lha yi byin rlabs dang /__/chos srung dam can rgya mtsho'i nus mthu yis/__/ji ltar smon pa'i gnas rnams 'grub par shog__/ces pa 'di'ang 'jam dbyangs mkhyen brtse'i dbang pos smras pa sid+d+hi rastu/__/sarba dA ka l+yA NaM b+ha ba tu//